រថយន្ត​ពេទ្យ​ ០១​គ្រឿង​ ជា​អំណោយ​សម្តេច​តេ​ជោ និង​សម្តេច​កិ​ត្ត​ព្រឹទ្ធ​បណ្ឌិត​ផ្តល់ជូន​មន្ទីរ​សុខាភិបាល​ខេត្ត​ព្រះវិហារ​

149

ភ្នំពេញ៖ ​លោក​ឧកញ៉ា​បណ្ឌិត ជា រតនា ទីប្រឹក្សា​សម្តេច​តេ​ជោ ហ៊ុន សែន នៅ​ព្រឹក​ថ្ងៃទី​១៣​ ខែ​មករា ឆ្នាំ​២០២១​នេះ​ បាន​យក​រថយន្ត​ពេទ្យ​សង្គ្រោះបន្ទាន់ មួយគ្រឿង​ដែល​ជា​អំណោយ​របស់​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ជូន​មន្ទីរ​ពេទ្យបង្អែក​១៦ មករា ខេត្តព្រះវិហារ ខណៈ​រថយន្ត​នេះ​ទី​៤៤​ហើយ​ បន្ទាប់ពី​ផ្តល់​ជូន​តាម​មណ្ឌល​សុខភាព និង​មន្ទីរ​ពេទ្យបង្អែក​នានា​នៅ​ទូទាំង​ប្រទេស​នោះ​។​

ថ្លែង​នៅ​ក្នុង​កម្មវិធី​ផ្តល់នូវ​រថយន្ត​នោះ លោក​ឧកញ៉ា ជា រតនា បាន​លើកឡើងថា រថយន្ត​នេះ​បាន​បំពាក់​នូវ​ឧបករណ៍​គ្រប់​ទាំងអស់ ដើម្បី​ផ្តល់​ភាពងាយស្រួល​ក្នុងការ​ប្រើប្រាស់​សម្រាប់​ម​ន្ទីរ​ពេទ្យ​បង្អែក​នេះ និង​ក៏​ដើម្បី​បំរើ​ផលប្រយោជន៍​រួម​ជូន​ដល់​បងប្អូន​ប្រជាពលរដ្ឋ​ផងដែរ​។​

លោក​ឧកញ៉ា​ក៏បាន​បញ្ជាក់​ផងដែរ​ថា រថយន្ត​ពេទ្យ​ដែលជា​អំណោយ​របស់​សម្តេច​តេ​ជោ និង​សម្តេច​កិត្តិ​ព្រឹទ្ធ​បណ្ឌិត​នេះ មិនមែន​ផ្តល់ជូន​តែ​មន្ទីរពេទ្យបង្អែក​១៦ មករា ខេត្តព្រះវិហារ នោះទេ គឺ​នឹង​ផ្តល់ជូន​តាម​មណ្ឌល​សុខភាព និង​មន្ទីរពេទ្យបង្អែក​ស្រុក​នានា នៅ​ទូទាំងប្រទេស​។ សម្រាប់​ដល់​មន្ទីរពេទ្យ​បង្អែក​១៦ មករា ខេត្តព្រះវិហារ​នេះ​គឺជា​រថយន្ត​ទី​៤៤​ហើយ ហើយនឹង​ផ្តល់ជូន​បន្តបន្ទាប់​ទៀត​នាពេល​ខាងមុខនេះ​។​

ថ្លែង​នៅក្នុង​កម្មវិធី​នោះដែរ លោក ស៊ុម សិញ ប្រធាន​មន្ទីរ​សុខាភិបាល​ខេត្តព្រះវិហារ បាន​លើកឡើងថា ក្នុងនាម​លោក​ជា​ប្រធាន​មន្ទីរ និង​តំណាង​ដល់​ក្រុម​គ្រួ​ពេទ្យ​ទាំងអស់​នៃ​ខេត្តព្រះវិហារ សូម​គោរព​ថ្លែងអំណរគុណ​យ៉ាង​ជ្រាលជ្រៅ​ជាទីបំផុត ចំពោះ​សម្តេច​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ដែលជា​និច្ចកាល សម្ដេច​ទាំងពីរ តែង​បាន​យកចិត្ត​ទុក្ខ​ដាក់ គិតគូរ​ក្រុម​គ្រួ​ពេទ្យ និង​ប្រជាពលរដ្ឋ​ទូទាំងប្រទេស​នោះ​។​

លោក​ក៏បាន​ថ្លែងអំណរគុណ​យ៉ាង​ជ្រាលជ្រៅ​ចំពោះ​ទឹកចិត្ត ប្រកបដោយ​សប្បុរសធម៌​របស់លោក​ឧកញ៉ា​បណ្ឌិត ជា រតនា និង​ជំទាវ លី ហៀក រតនា ដែល​បាន​ចូលរួមចំណែក​ជួយ​ដល់​សង្គមជាតិ និង​វិស័យ​ការពារជាតិ សូម​គោរព​ជូនពរ លោក​ឧកញ៉ា ព្រមទាំង​ក្រុមគ្រួសារ មាន​សុខ​ភាពល្អ បរិបូរណ៍ សុភមង្គល កម្លាំង​ពលំ​មាំមួន​ផងដែរ​៕ ​អត្ថបទ​៖ ចក់​