សម្ដេចតេជោ ហ៊ុន សែន ប្រមុខរដ្ឋស្ដីទី នៃកម្ពុជា បានថ្លែងផ្ញើសារទៅកាន់ជនរួមជាតិអំពីហានិភ័យ នៃជម្លោះអូសបបន្លាយយូរឆ្នាំរវាងកម្ពុជា និងថៃ ដូចជាអ៊ីស្រាអែល និងកាហ្សា ដូច្នោះដែរ ប្រសិនបើកម្ពុជា ជ្រើសយកការប្រើកម្លាំងដើម្បីដណ្ដើមយកដីដែលថៃរំលោភយកនោះមកវិញ។

សម្ដេចតេជោ ហ៊ុន សែន ប្រមុខរដ្ឋស្ដីទី នៃកម្ពុជា ក្នុងពិធីសំសំណេះសំណាលសួរសុខទុក្ខប្រជាពលរដ្ឋជនភៀសសឹក ចំនួន២៨០៥គ្រួសារ ក្នុងស្រុកស្វាយចេក ខេត្តបន្ទាយមានជ័យ នាព្រឹកថ្ងៃទី០៩ ខែមិថុនា នេះ បានលើកជាសំណួរថាតើត្រូវធ្វើសង្គ្រាម ដើម្បីដណ្ដើមយកដី ឬដណ្ដើមយកមកវិញតាមផ្លូវច្បាប់អន្តរជាតិ។ បើប្រើកម្លាំង លទ្ធផលដែលជះត្រឡប់មកវិញ គឺប្រជាពលរដ្ឋ ឬជនភៀសសឹកដែលកំពុង នៅទីនេះ បានដឹងរួចហើយ គឺមានតែការស្លាប់ របួស និងភៀសខ្លួនម្ដងទៀត ដែលបញ្ហានេះគួរតែចៀស។

សម្ដេចតេជោ បានបញ្ជាក់ថា «ដំណោះស្រាយខាងយោធាមិនអាចទៅរួចទេ។ ហើយបើវាយក៏មិនប្រាកដថាវាយយកបានដែរ។ វាយយកមកបានហើយ ក៏យើងមិនអាចឈរជើងបានដែរ គឺនឹងត្រូវវាយទៅវាយមក ដូចសង្គ្រាមរវាងតំបន់កាហ្សា និងអ៊ីស្រាអែល និងរវាងប្រទេសខ្លះដែលមានជម្លោះព្រំដែនជាមួយគ្នា ក្លាយជាជម្លោះតពូជ ពង្ស ជំនាន់ ដូច្នេះតើយើងចង់បានទេ ស្ថានភាពបែបនេះ? យើងពិតជាមិនចង់បានទេ។ ដូច្នេះហើយបានជានៅពេលមានបទឈប់បាញ់ យើងត្រូវគោរពបទឈប់បាញ់នោះ ដូច្នេះកងទ័ពយើងត្រូវធ្វើសកម្មភាពថ្នាក់ថ្នមបទឈប់បាញ់ កុំបំពាន» ។

សម្ដេចតេជោ ហ៊ុន សែន ដែលបានបញ្ជាក់ថា កម្ពុជាមិនមែនគ្មានកម្លាំងតបតនោះ បានប្រកាសប្រាប់ប្រជាពលរដ្ឋអំពីវិធីសន្តិភាព ដើម្បីដោះស្រាយបញ្ហាដែលកំពុងកើតមាននេះ បច្ចុប្បន្នខណៈដែលកម្ពុជា និងថៃ កំពុងអនុវត្តបទឈប់បាញ់ ប្រសិនបើកម្ពុជាផ្ទុះអាវុធវាយដណ្ដើមយកដីដែលថៃកាន់កាប់មកវិញ នោះកម្ពុជានឹងមានកំហុសធ្ងន់ធ្ងរ និងឈានដល់បរ៉ាជ័យនយោបាយការទូតតែម្ដង ចំពោះមុខអន្តរជាតិ ដែលបរ៉ាជ័យនយោបាយការទូតនេះ វាធ្ងន់ធ្ងរជាងបរ៉ាជ័យខាងយោធាទៀត៕