ការកើនឡើងនៃការវាយប្រហារតាមអាកាសថ្មីៗនេះ បានធ្វើឲ្យការដឹកជញ្ជូនប្រេងឥន្ធនៈទៅកាន់ផ្នែកខ្លះនៃភាគខាងត្បូងប្រទេសរុស្ស៊ី មានភាពតឹងតែង។ នេះបើយោងតាមក្រសួងថាមពលរបស់ប្រទេសនេះកាលពីថ្ងៃចន្ទ។

ក្រសួងបាននិយាយនៅក្នុងសេចក្តីថ្លែងការណ៍មួយថា សហគ្រាសជាច្រើនក្នុងវិស័យប្រេងឥន្ធនៈ និងថាមពល បានប្រឈមនឹងការវាយប្រហារតាមអាកាសកាន់តែច្រើនឡើង ដែលបានបណ្តាលឲ្យមានការលំបាកបណ្តោះអាសន្នជាមួយនឹងការផ្គត់ផ្គង់ប្រេងឥន្ធនៈ នៅក្នុងតំបន់ភាគខាងត្បូងមួយចំនួន។

ក្រសួងបាននិយាយថា ខ្លួនបានបង្កើតទីស្នាក់ការកណ្តាលសម្របសម្រួលឧស្សាហកម្មអចិន្ត្រៃយ៍ ដែលមានក្រុមហ៊ុនធំៗទាំងអស់ នៅក្នុងវិស័យប្រេងឥន្ធនៈ និងថាមពលរបស់ប្រទេសរុស្ស៊ី ដើម្បីធានាបាននូវប្រតិបត្តិការប្រកបដោយស្ថិរភាព និងប្រសិទ្ធភាពរបស់ឧស្សាហកម្មទាំងមូល៕