កម្ពុជាបានបង្ហាញការសោកស្ដាយចំពោះការវាយតម្លៃរបស់អាម៉េរិក ក្នុងចំណាត់ថ្នាក់លេខ៣ អំពីស្ថានភាពអំពើជួញដូរមនុស្ស ដោយបានហៅការវាយតម្លៃនេះថា មិនបានឆ្លុះបញ្ចាំងពេញលេញនូវឆន្ទៈនយោបាយដ៏មោះមុតរបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងអំពើជួញដូរមនុស្សនោះឡើយ។

គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សរបស់ប្រទេសកម្ពុជា បានសម្តែងការសោកស្តាយជាខ្លាំង ដែលអស់រយៈពេលជាច្រើនឆ្នាំកន្លងមកនេះ កិច្ចខិតខំប្រឹងប្រែងក្នុងការប្រយុទ្ធប្រឆាំងអំពើជួញដូរមនុស្សរបស់រាជរដ្ឋាភិបាលកម្ពុជា មិនត្រូវបានទទួលការវាយតម្លៃសមស្របពីក្រសួងការបរទេសសហរដ្ឋអាម៉េរិក និងមិនបានឆ្លុះបញ្ចាំងពេញលេញនូវឆន្ទៈនយោបាយដ៏មោះមុត រួមទាំងវិធានការ ដ៏ម៉ឺងម៉ាត់ គួបផ្សំនឹងលទ្ធផលជាក់ស្តែងដែលរាជរដ្ឋាភិបាលកម្ពុជាសម្រេចបាននោះឡើយ។ ជាក់ស្តែងឆ្នាំ២០២៦នេះ គឺជាឆ្នាំទី៥ហើយដែលកម្ពុជាទទួលបានការវាយតម្លៃក្នុងចំណាត់ថ្នាក់លេខ៣។

លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានប្រាប់BTVថា ការវាយតម្លៃរបស់សហរដ្ឋអាម៉េរិកមកលើកិច្ចខិតខំប្រឹងប្រែងកម្ពុជាក្នុងការប្រយុទ្ធប្រឆាំងអំពើជួញដូរមនុស្សនៅកម្ពុជា ជារឿងមិនគួរកើត ព្រោះអ្វីដែលជាលទ្ធផល គឺបានឆ្លុះបញ្ចាំងតែជ្រុងម្ខាងដែលហៅថាជាចំណុចខ្វះខាត។ កម្ពុជាក៏ដូចជាដៃគូប្រទេសពាក់ព័ន្ធ និងអង្គការសង្គមស៊ីវិលដៃគូដែលធ្វើការជាមួយគ្នា ច្បាស់ជាបានដឹងហើយថាតើរាជរដ្ឋាភិបាលកម្ពុជាបាននិងកំពុងធ្វើអ្វីខ្លះក្នុងរយៈពេលជាច្រើនឆ្នាំកន្លងមកនេះ គឺអាចមានប្រសិទ្ធភាពនៅក្នុងការប្រយុទ្ធប្រឆាំងអំពើជួញដូរមនុស្ស។

លោកជំទាវ បានបញ្ជាក់បន្ថែមថា ចំពោះការបង្ក្រាប ការដាក់ទោសទណ្ឌ និងផ្តន្ទាទោស គឺត្រូវបានធ្វើជាបន្តបន្ទាប់ទៅតាមវិស័យតុលាការ។ ហើយកិច្ចការពារជនរងគ្រោះក៏ដូចគ្នាដែរ គឺបានទទួលឧបត្ថម្ភគាំទ្រជនរងគ្រោះដោយមិនប្រកាន់ជនជាតិខ្មែរ ឬបរទេសនោះទេ ពោលគឺឲ្យតែរងគ្រោះដោយអំពើជួញដូរមនុស្ស គឺអនុវត្តនូវគោលការណ៍រួមដែលបានរៀបចំ ហើយក៏មានការកំណត់អត្តសញ្ញាណប្រគល់ភារកិច្ចទៅឲ្យនគរបាលយុត្តិធម៌នៅក្នុងការកំណត់បទល្មើស និងជនល្មើស ដើម្បីតាមបង្ក្រាប ឬក៏នាំខ្លួនយកមកផ្តន្ទាទោស និងផ្តល់ភាពយុត្តិធម៌ជូនជនរងគ្រោះ៕ អត្ថបទ៖ វង្ស សុភាព