BTV NEWS

ប្រធានរដ្ឋសភាម៉ាឡេស៊ីចង់ឱ្យថ្នាក់ដឹកនាំ និងយុវជនអាស៊ានជំនាន់ក្រោយ សិក្សា និងឈ្វេងយល់អំពីគំរូវីរភាព និងស្នាដៃរបស់សម្តេចតេជោ

សម្ដេចតេជោ ហ៊ុន សែន ទទួលជួបឯកឧត្ដមប្រធានរដ្ឋសភា នៃប្រទេសម៉ាឡេស៊ី

ព្រឹទ្ធសភាបានពិនិត្យ និងអនុម័ត លើសេចក្តីស្នើវិសោធនកម្មបទបញ្ជាផ្ទៃក្នុងព្រឹទ្ធសភា ក្រោមអធិបតីភាពសម្ដេចតេជោ ហ៊ុន សែន

ប្រជាពលរដ្ឋស្រុកកំពង់លែង ថ្លែងអំណរគុណសម្តេចធិបតី ហ៊ុន ម៉ាណែត ដែលបានជួយផ្លូវកៅស៊ូ ផ្លូវបេតុងដល់ពួកគាត់ធ្វើដំណើរបានស្រួល

នយោបាយ និង ការអភិវឌ្ឍន៍

សម្ដេចតេជោចាត់ទុកការទទួលបានសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព»នេះ បានបង្ហាញពីការលះបង់របស់សម្ដេចក្នុងការលះបង់ស្វែងរកសន្ដិភាព

សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានបង្ហាញក្ដីសោមនស្សរីករាយក្រៃលែង ដែលទទួលសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យដុងហ្គុកវ៉ាយស៍ នៃសាធារណៈរដ្ឋកូរ៉េ ខណៈសម្ដេចបានចាត់ទុកការទទួលបានសញ្ញាបត្របណ្ឌិតកិត្តិយសនេះ គឺបានបង្ហាញពីការលះបង់របស់សម្ដេចក្នុងការតស៊ូរំដោះប្រទេសជាតិពីរបបប្រល័យពូជសាសន៍ និងស្វែងរកសុខសន្ដិភាពរហូតមកដល់បច្ចុប្បន្ននេះ។ក្នុងឱកាសនោះសម្ដេចតេជោ បានរម្លឹកឡើងពីគុណតម្លៃមិនអាចកាត់ថ្លៃបាននៃសុខសន្ដិភាពរបស់ប្រទេសនីមួយៗនៅលើសកលលោក ខណៈដែលសោកនាដកម្មសង្គ្រាម អាចឆាប់ឆេះបានយ៉ាងលឿន និងយ៉ាងងាយបំផុត ប៉ុន្ដែការលុបបំបាត់សង្គ្រាមទៅវិញពិតជាមានការលំបាកខ្លាំងណាស់។ សម្ដេចតេជោបានរម្លឹកឡើងថា ជាក់ស្ដែងបទពិសោធន៍របស់កម្ពុជា ដើម្បីស្ដារប្រទេសឡើងវិញពីរបបប្រល័យពូជសាសន៍ប៉ុលពត កម្ពុជាត្រូវការពេលជាង ៣០ឆ្នាំទើបអាចស្វែងរកសន្ដិភាពបានដូចសព្វថ្ងៃនេះ ឡើងវិញ។សូមបញ្ជាក់ថា សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា កាលពីព្រឹកថ្ងៃទី៩ ខែកញ្ញា ឆ្នាំ២០២៤ បានអញ្ជើញដឹកនាំគណៈប្រតិភូជាន់ខ្ពស់ធ្វើដំណើរទៅកាន់សាធារណៈរដ្ឋកូរ៉េខាងត្បូង ដើម្បីអញ្ជើញចូលរួមក្នុងវេទិកាចំណេះដឹងពិភពលោកលើកទី២៥ ក្រោមមូលបទ «មាគ៌ាឆ្ពោះទៅរកសហត្ថិភាព» ក្នុងឱកាសនេះសម្ដេចក៏បានអញ្ជើញចូលរួមកម្មវិធី និងជំនួបផ្លូវការសំខាន់ៗផ្សេងទៀតជាមួយថ្នាក់ដឹកនាំកំពូលនៅសាធារណរដ្ឋកូរ៉េខាងត្បូង ចាប់ពីថ្ងៃទី៩ ដល់ថ្ងៃទី១៣ ខែកញ្ញា ឆ្នាំ២០២៤នេះផងដែរ។នៅព្រឹកនេះសម្ដេចតេជោ បានបន្តដំណើរទស្សនកិច្ចទៅកាន់ខេត្តឃុងសាងបុកដូ ដើម្បីទទួលសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព» ដែលរៀបចំដោយសាកលវិទ្យាល័យដុងហ្គុកវ៉ាយស៍ និងសម្ដេចតេជោក៏បានផ្តល់កិត្តិយសធ្វើបាឋកថាស្តីពី «បទពិសោធន៍របស់ប្រទេសកម្ពុជា ក្នុងការរំដោះជាតិ ការកសាងសន្តិភាព ការផ្សះផ្សា និងការកសាងជាតិឡើងវិញ» ពីប្រទេសដែលហែកហួរដោយសង្គ្រាម និងវាលពិឃាត មកជាប្រទេសជាតិដែលពោរពេញដោយសន្តិភាពការរួមរស់ជាមួយគា្ន (សហត្ថិភាព) និងការអត់ឱន ផងដែរ៕ អត្ថបទ៖ វ៉ន ដារ៉ា

ការប្រជែងតំណែងជានាយករដ្ឋមន្ត្រីបន្ទាប់របស់ជប៉ុន ចាប់ផ្ដើមហើយ

ការក្រកួតប្រជែងក្នុងបក្សដើម្បីក្លាយជានាយករដ្ឋមន្ត្រីបន្ទាប់របស់ប្រទេសជប៉ុន បានចាប់ផ្តើមនៅថ្ងៃព្រហស្បតិ៍ ១២ កញ្ញា នេះ ដោយមានបេក្ខភាពចំនួន៩រូប រួមទាំងកូនប្រុសរបស់អតីតនាយករដ្ឋមន្ត្រី និងអ្នកជាតិនិយម ដែលប្រជែងគ្នាធ្វើជាមេដឹកនាំស្ត្រីដំបូងរបស់ប្រទេសនេះ។ អ្នកដែលឈ្នះការប្រកួតប្រជែងក្លាយជាមេដឹកនាំរបស់គណបក្សប្រជាធិបតេយ្យសេរី (LDP) នៅថ្ងៃទី ២៧ ខែកញ្ញា នឹងបន្តតំណែងនាយករដ្ឋមន្ត្រីបន្ទាប់ពីលោក Fumio Kishida ដែលអាណត្តិរយៈពេល៣ ឆ្នាំរបស់លោក ត្រូវបានធ្វើឱ្យប៉ះពាល់ដោយសាររឿងអាស្រូវ ខណៈអ្នកបោះឆ្នោតកំពុងតតាំងនឹងបញ្ហាអតិផរណាក្នុងប្រទេស។ គណបក្សអភិរក្សនិយមLDP បានគ្រប់គ្រងប្រទេសស្ទើរតែគ្មានការរំខានអស់ជាច្រើនទសវត្សរ៍ ហើយទទួលបានសំឡេងភាគច្រើននៅក្នុងសភា ដែលមានន័យថាអ្នកឈ្នះ គឺត្រូវបានទទួលការគាំទ្រក្លាយជានាយករដ្ឋមន្ត្រី។ ការផ្លាស់ប្ដូរមេដឹកនាំ មិនត្រូវបានគេរំពឹងថានឹងមានការប្រែប្រួលដល់គោលនយោបាយបច្ចុប្បន្នរបស់រដ្ឋាភិបាលជប៉ុនទេ ខណៈគណបក្ស LDP នឹងបន្តកាន់អំណាចយូរទៀត៕

ការស្ទង់មតិរបស់CNN៖ ភាគច្រើននៃអ្នកមើលការពិភាក្សាដេញដោលនិយាយថា លោកស្រី Harris ធ្វើបានល្អជាងលោកTrump

តាមការស្ទង់មតិរបស់ទូរទស្សន៍ CNN អំពីទស្សនៈរបស់អ្នកមើលការជជែកដេញដោលដែលធ្វើឡើងដោយសេវាវិភាគ SSRS បានឲ្យដឹងថា អ្នកបានចុះឈ្មោះបោះឆ្នោតរួចដែលបានមើលការពិភាក្សាដេញដោលប្រធានាធិបតីកាលពីថ្ងៃអង្គារសប្ដាហ៍នេះយល់ស្របយ៉ាងទូលំទូលាយថាលោកស្រី Kamala Harris ធ្វើបានល្អជាងលោក Donald Trump ។ ការស្ទង់មតិបានរកឃើញថា អនុប្រធានាធិបតីក៏បានធ្វើយ៉ាងល្អលើសពីការរំពឹងទុករបស់អ្នកមើលការជជែកដេញដោលសម្រាប់លោកស្រីនៅលើវេទិកាផងដែរ និងល្អជាងនៅលើវាទិការបស់លោក Joe Biden ទល់នឹងអតីតប្រធានាធិបតី Trump កាលពីដើមឆ្នាំនេះទៅទៀត។ អ្នកមើលការពិភាក្សាដេញដោលបាននិយាយថា ៣៧%ដល់៦៣% លោកស្រី Harris ប្រែក្លាយសកម្មភាពលើវេទិកាក្នុងទីក្រុង ហ្វីឡាដេលហ្វៀ ( Philadelphia) កាន់តែមានភាពទាក់ទាញ។មុនពេលការជជែកដេញដោល អ្នកបោះឆ្នោតដូចគ្នាបានជជែកវែកញែកថាតើបេក្ខជនរូបណានឹងធ្វើបានជាងគេ ដោយមាន៥០% និយាយថាលោកស្រី Harris នឹងធ្វើបានល្អដូចជាលោកTrump ដែរ។ ហើយក្រោយការស្ដាប់សង្រ្គាមពាក្យសម្ដីរវាងបេក្ខជនទាំងពីរមក ៩៦% នៃក្រុមអ្នកគាំទ្រលោកស្រី Harris បាននិយាយថា បេក្ខជនដែលពួកគេបានជ្រើសរើសធ្វើបានល្អជាង ចំណែកក្រុមអ្នកគាំទ្រលោក Trump ដែលមានតិចជាង ៦៩% បានសរសើរលោកថា ធ្វើបានល្អហើយ៕

ទិន្នន័យ៖ ការជជែកដេញដោល Harris-Trump លើទូរទស្សន៍ ABC មានអ្នកទស្សនាជាង ៦៧លាននាក់

យោងតាមទិន្នន័យរបស់ក្រុមហ៊ុនស្រាវជ្រាវផ្នែកប្រព័ន្ធផ្សព្វផ្សាយ នីលសិន (Nielsen) កាលពីថ្ងៃពុធ (១១ កញ្ញា) បានឱ្យដឹងថា ការជជែកដេញដោលបេក្ខភាពប្រធានាធិបតីសហរដ្ឋអាមេរិក រវាងអនុប្រធានាធិបតីបក្សប្រជាធិបតេយ្យ លោកស្រី កាម៉ាឡា ហារីស (Kamala Harris) និងបេក្ខជនមកពីបក្សសាធារណរដ្ឋ លោក ដូណាល់ ត្រាំ (Donald Trump) បានទាក់ទាញអ្នកទស្សនាចំនួន ៦៧,១លាននាក់។ព្រឹត្តិការណ៍កាលពីយប់ថ្ងៃអង្គារនេះគឺជាលើកទីមួយហើយដែលបេក្ខជននៅក្នុងការបោះឆ្នោតប្រធានាធិបតីថ្ងៃទី០៥ ខែវិច្ឆិកា ទាំងពីររូបនេះបានជួបជជែកទល់មុខគ្នា។ តួលេខអ្នកទស្សនាក្នុងព្រឹត្តិការណ៍នេះ បានលើសពីតួលេខទស្សនិកជនប្រហែល ៥១លាននាក់ ដែលបានមើលការជជែកដេញដោលរបស់លោក Trump ទល់នឹងលោកប្រធានាធិបតី Joe Biden កាលពីខែមិថុនា។តួលេខនេះមិនបានក្ដោបយកវិសាលភាពពេញលេញនៃអ្នកមើលតាមអ៊ីនធឺណិត ដែលជារឿងដ៏ពេញនិយមនោះទេ ខណៈទស្សនិកជនដែលធ្លាប់តែមើលតាមទូរទស្សន៍ធ្លាក់ចុះខ្លាំង ហើយចំនួននេះក៏មិនឆ្លុះបញ្ចាំងពីអ្នកទស្សនាដែលបានមើលការជជែកដេញដោលនោះនៅទីតាំងផ្សេងទៀត ដូចជានៅតាមភោជនីយដ្ឋានដែរ។ ចំនួនទស្សនិកជនតាមកញ្ចក់ទូរទស្សន៍សម្រាប់ការជជែកដេញដោលបេក្ខភាពប្រធានាធិបតីដ៏ច្រើនបំផុតក្នុងកំណត់ត្រា បានកើតឡើងក្នុងឆ្នាំ២០១៦ នៅពេលដែលមនុស្ស ៨៤លាននាក់បានចូលទស្សនាការជជែកតស៊ូមតិរវាងបេក្ខជនគណបក្សប្រជាធិបតេយ្យ លោកស្រី ហីលឡារី ឃ្លីងតុន (Hillary Clinton) ទល់នឹងលោក Trump៕

អ៊ុយក្រែន ថាខ្លួនអាចនឹងកាត់ផ្តាច់ទំនាក់ទំនងជាមួយអ៊ីរ៉ង់ ជុំវិញការបញ្ជូនមីស៊ីលទៅឱ្យរុស្ស៊ី

ទីក្រុងគីវ បាននិយាយកាលពីថ្ងៃអង្គារ (១០ កញ្ញា) ថាខ្លួនអាចនឹងកាត់ផ្តាច់ទំនាក់ទំនងជាមួយទីក្រុងតេអេរ៉ង់ ប្រសិនបើរុស្ស៊ី ប្រើមីស៊ីលបាលិស្ទិកដែលផ្តល់ដោយអ៊ីរ៉ង់ ទៅវាយប្រហារអ៊ុយក្រែន ហើយទីក្រុងគីវ ថ្កោលទោសការចែកចាយសព្វាវុធបែបនេះថាជារឿងមិនអាចទទួលយកបានទេ។សូមបញ្ជាក់ថា រដ្ឋមន្ត្រីការបរទេសអាមេរិក លោក អង់តូនី ប្លីងខិន (Antony Blinken) បាននិយាយដោយសម្អាងលើរបាយការណ៍ចារម្មថា រុស្ស៊ីបានទទួលមីស៊ីលពីអ៊ីរ៉ង់ ហើយលោករំពឹងថាទីក្រុងមូស្គូ នឹងប្រើសព្វាវុធទាំងនោះនៅប៉ុន្មានសប្តាហ៍ខាងមុខ។ ប៉ុន្តែអ៊ីរ៉ង់បដិសេធថាមិនបានផ្តល់អាវុធបែបនោះឡើយ។អ៊ុយក្រែន ដែលកំពុងប្រឈមមុខនឹងកំណើននៃការវាយប្រហារមីស៊ីល និងយានដ្រូនរបស់រុស្ស៊ី បាននិយាយថា នឹងមានផលវិបាកដ៏អាក្រក់សម្រាប់ទំនាក់ទំនងទ្វេភាគីរបស់ខ្លួនជាមួយអ៊ីរ៉ង់ ប្រសិនបើរបាយការណ៍នៃការផ្គត់ផ្គង់មីស៊ីលត្រូវបានបញ្ជាក់។ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី (Volodymyr Zelenskiy) មិនបានលើកឡើងដោយផ្ទាល់ស្ដីពីអ៊ីរ៉ង់នៅក្នុងសុន្ទរកថាពេលយប់របស់ខ្លួនទេ ប៉ុន្តែបានសន្យាថានឹងសម្របសម្រួលការឆ្លើយតបដ៏រឹងមាំពីទូទាំងពិភពលោកចំពោះមហាអំណាចណាមួយដែលជួយរុស្ស៊ី និងជួយដល់លោកប្រធានាធិបតី វ្ល៉ាឌីមៀ ពូទីន (Vladimir Putin)។ គួររម្លឹកថា អ៊ុយក្រែន បានបន្ទាបទំនាក់ទំនងជាមួយអ៊ីរ៉ង់ ក្នុងឆ្នាំ២០២២ ជុំវិញការផ្គត់ផ្គង់យានដ្រូនវាយប្រហារ សាហេដ (Shahed) របស់ទីក្រុងតេអេរ៉ង់ ឱ្យដល់រុស្ស៊ី ដែលកងទ័ពទីក្រុងមូស្គូ បានប្រើប្រាស់សម្រាប់ការវាយប្រហារចម្ងាយឆ្ងាយជាប្រចាំ៕

លោក Trudeau អាចបន្តធ្វើនាយករដ្ឋមន្ត្រីកាណាដា រហូតដល់ឆ្នាំ២០២៥ ទោះមានហានិភ័យនយោបាយក្ដី

ក្រុមអ្នកវិភាគនយោបាយបាននិយាយថា លោក ចាស្ទីន ទ្រូដូ (Justin Trudeau) អាចបន្តធ្វើជានាយករដ្ឋមន្ត្រីកាណាដារហូតដល់ឆ្នាំក្រោយបាន ទោះបីជារដ្ឋាភិបាលសេរីនិយមសំឡេងភាគតិចរបស់លោកកំពុងជួបហានិភ័យ បន្ទាប់ពីគណបក្សឆ្វេងនិយមបានដកពាក្យសន្យាគាំទ្ររបស់ខ្លួននៅលើការបោះឆ្នោតសំខាន់ៗដ៏ដោយ។លោក Trudeau ដែលប្រឈមមុខនឹងភាពមិនសប្បាយចិត្តពីអ្នកបោះឆ្នោតបន្ទាប់ពីកាន់អំណាចជិត ៩ឆ្នាំមក បានបាត់បង់ការគាំទ្រដ៏សំខាន់កាលពីសប្តាហ៍មុននៅពេលគណបក្សប្រជាធិបតេយ្យថ្មី (NDP) បានបញ្ចប់កិច្ចព្រមព្រៀងឆ្នាំ២០២២ ដែលបក្សនេះបានយល់ព្រមគាំទ្រលោកជាថ្នូរនឹងការចំណាយបន្ថែមទៀតសម្រាប់សង្គម។ការបាត់បង់សំឡេងគាំទ្រដ៏សំខាន់មានន័យថាលោកនាយករដ្ឋមន្ត្រី វ័យ ៥២ឆ្នាំរូបនេះមិនអាចមានភាពប្រាកដប្រជាក្នុងការឈ្នះលើការបោះឆ្នោតទំនុកចិត្តនៅក្នុងសភាជាប់ឆ្នោត ដែលក្រុមសេរីនិយមរបស់លោកទទួលបានតែ ១៥៤អាសនៈប៉ុណ្ណោះក្នុងចំណោម ៣៣៨អាសនៈ។ប្រសិនបើសមាជិកសភាបក្សប្រឆាំង ១៧០រូបបោះឆ្នោតប្រឆាំងនឹងក្រុមសេរីនិយម នោះរដ្ឋាភិបាលនឹងត្រូវដួលរលំមុនអាណត្តិរបស់ខ្លួនផុតកំណត់នៅចុងខែតុលា ឆ្នាំ២០២៥ ដោយបង្ខំឱ្យមានការបោះឆ្នោតសកលមុនកាលកំណត់។ ក្នុងស្ថានភាពនោះ ការស្ទង់មតិបង្ហាញយ៉ាងខ្លាំងថា ក្រុមអភិរក្សស្តាំនិយមកណ្តាលអាចនឹងឈ្នះសំឡេងភាគច្រើន។លោក Trudeau ហាក់ដូចជាមិនទាន់ជួបរឿងឈឺក្បាលបែបនេះនៅឡើយទេយ៉ាងហោចណាស់ប្រហែលពីរបីខែខាងមុខទៀត។ ការបោះឆ្នោតទំនុកចិត្តបន្ទាប់ ដែលរដ្ឋាភិបាលត្រូវតែប្រឈម គឺនៅពេលដែលខ្លួនស្នើឱ្យសភាផ្តល់សច្ចាប័នលើអ្វីដែលគេហៅថាការធ្វើបច្ចុប្បន្នភាពថវិកា ដែលនឹងផុតកំណត់នៅចុងខែវិច្ឆិកា ឬខែធ្នូខាងមុខនេះ៕

ផ្ទុះការចាប់អារម្មណ៍ខ្លាំងលើបណ្តាញសង្គម អំឡុងការជជែកដេញដោលរវាងលោកស្រី HARRIS និងលោក TRUMP

ស្របពេលប្រជាពលរដ្ឋអាមេរិករាប់សិបលាននាក់កំពុងតាមដានការជជែកដេញដោលរវាងបេក្ខជនមកពីគណបក្សសាធារណរដ្ឋលោក Donald Trump និងបេក្ខភាពមកពីគណបក្សប្រជាធិបតេយ្យ លោកស្រី Kamala Harris នៅលើកញ្ចក់ទូរទស្សន៍ជាលើកដំបូងកាលពីថ្ងៃអង្គារសប្ដាហ៍នេះ ចំនួនអ្នកចូលទស្សនាបានផ្ទុះឡើងនៅលើប្រព័ន្ធផ្សព្វផ្សាយសង្គមតាមរយៈឃ្លីប និងវីដេអូ ត្រូវបានកែសម្រួល ឬ edits នៃពេលវេលាពិភាក្សាដេញដោលដែលមិនអាចបំភ្លេចបាន។ អ្នកប្រើបណ្ដាញផ្សព្វផ្សាយសង្គម បានចាប់ផ្ដើមបើក និងទស្សនាការជជែកដេញដោលដ៏ក្ដៅគគុក របស់បេក្ខជនមកពីបក្សធំៗទាំង២ ដោយបានមើលឃើញលោកស្រី Harris បង្ហាញខ្លួនជាមួយទឹកមុខញញឹមនៅលើវេទិកា ចាប់ដៃលោក Trump និងណែនាំខ្លួនលោកស្រី។ អ្នកប្រើប្រាស់ប្រព័ន្ធផ្សព្វផ្សាយសង្គមមានឈ្មោះថា Adam James Smith បានបង្ហោះនៅលើបណ្ដាញ X ដោយមានអ្នកចុច Like និងចូលទស្សនារហូតដល់ ៤០.០០០នាក់។ សង្រ្គាមពាក្យសម្ដីដ៏ខ្លាំងក្លា បានរាលដាលយ៉ាងឆាប់រហ័សនៅលើវេទិកាប្រព័ន្ធផ្សព្វផ្សាយសង្គម X ដែលត្រូវបានផ្សព្វផ្សាយដោយអ្នកបង្ហោះរាប់ពាន់នាក់ ដោយរួមទាំងមនុស្សជាច្រើនមានការភាន់ច្រលំចំពោះការពាក់ព័ន្ធរបស់សម្រង់សម្តីនៅក្នុងការជជែកដេញដោលប្រធានាធិបតីបន្ទាប់ពីលោកTrump បាននិយាយដល់ជនភៀសខ្លួនហៃទីគ្មានអាហារទទួលទាន បែជាទទួលទានសាច់សុនខ និងឆ្មា ជាដើម។ ការវាយប្រហារពាក្យសម្ដី និងការចោទដាក់គ្នាជុំវិញការដឹកនាំប្រទេសយ៉ាងក្ដៅគគុក រវាងបេក្ខជនទាំង២លើបញ្ហាជាច្រើន បានរុញឲ្យអ្នកចូលទស្សនានៅលើបណ្ដាញសង្គមកើនឡើងយ៉ាងខ្លាំង៕

រាជរដ្ឋាភិបាលបានដាក់ចេញគោលនយោបាយអនុគ្រោះជាច្រើនដើម្បីលើកកម្ពស់វិស័យកសិកម្ម

រាជរដ្ឋាភិបាលនៅក្នុងអាណត្តិថ្មីនេះ បានដាក់ចេញនូវគោលនយោបាយអនុគ្រោះជាច្រើន ដល់វិស័យកសិកម្មរួមមាន ការព្យូរទុក ការបង់ប្រាក់រំដោះពន្ធលើប្រាក់ចំណូល ការលើកលែងអាករលើតម្លៃបន្ថែម និងអាករលើតម្លៃពិសេសបន្ថែមជាដើម ដើម្បីលើកកម្ពស់ វិស័យកសិកម្ម ជាពិសេសស្រូវអង្ករឱ្យមានការប្រកួតប្រជែងលើទីផ្សារ។ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍លើកឡើងនៅក្នុងពិធីបិទ វេទិកាស្រូវអង្ករកម្ពុជា លើកទី៧ ឆ្នាំ២០២៤ នៅថ្ងៃទី១០ ខែកញ្ញា ឆ្នាំ ២០២៤នេះថា កន្លងមក រាជរដ្ឋាភិបាលបានដាក់ចេញនូវ ភាពអនុគ្រោះជាច្រើនដូចជា ការលើកលែងពន្ធប្រចំាឆ្នាំ លើដីកសិកម្មរបស់កសិករ, ការលើកលែងពន្ធប្រចាំឆ្នាំលើដីសម្បទានសេដ្ឋកិច្ច ពាក់ព័ន្ធកសិកម្ម, សហគ្រាសកសិកម្មដែលសុំការអនុគ្រោះតាមរយៈគម្រោងមានលក្ខណៈគ្រប់គ្រាន់, អាករលើតម្លៃបន្ថែមជាបន្ទុក របស់រដ្ឋ លើការនាំចូលនិងការផ្គត់ផ្គង់ទំនិញដូចជា៖ ជី ពូជដំណាំ ចំណីសត្វ និងការលើកលែងអាករផលិតផលកសិកម្មមិនទាន់កែច្នៃ ហើយរាជរដ្ឋាភិបាលក្នុងអាណត្តិថ្មីនេះ ក៏បន្តការដាក់ចេញនូវគោលនយោបាយអនុគ្រោះជាច្រើនផ្សេងទៀត ដើម្បីលើកកម្ពស់វិស័យ កសិកម្មនៅកម្ពុជាឱ្យកាន់តែប្រសើរ។សម្ដេចធិបតី មានប្រសាសន៍បន្ថែមថា ក្រៅពីគោលការណ៍ខាងលើ រាជរដ្ឋាភិបាលក៏បានសម្រួលនៅក្នុងការបញ្ចុះថ្លៃអគ្គិសនី លើវិស័យកសិកម្មផ្សេងៗ ធ្វើយ៉ាងណាកាត់បន្ថយថ្លៃដើមនៃការប្រកួតប្រជែង ហើយសម្តេចកំពុងពិនិត្យមើលលទ្ធភាពដើម្បីជួយផ្សេងៗទៀត។ជុំវិញវិស័យស្រូវអង្ករនេះ, ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា លើកឡើងថា ក្រោមការយកចិត្តទុកដាក់ដ៏ខ្ពស់របស់រាជរដ្ឋាភិបាល ដែលមានសេនាធិការដូចជា ក្រសួងកសិកម្ម រុក្ខាប្រមាញ់ និងនេសាទ លើការអភិវឌ្ឍពូជស្រូវ និងបច្ចេកទេស ដាំដុះ, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើបទដ្ឋានស្តង់ដារ និងការកិនកែច្នៃ, ក្រសួងពាណិជ្ជកម្ម លើការធ្វើពិពិធកម្មទីផ្សារ និងការផ្សព្វផ្សាយ លើឆាកអន្តរជាតិ, ព្រមទាំងមានការចូលរួមពីក្រសួងស្ថាប័ននានា រួមទាំងដៃគូអភិវឌ្ឍន៍របស់ បណ្តាប្រទេសជាមិត្ត និងស្ថាប័នអន្តរជាតិ នៃអង្គការសហប្រជាជាតិ បានជួយលើកកម្ពស់វិស័យស្រូវអង្ករកម្ពុជាគឺបានពង្រីកគោលដៅ ទីផ្សារនាំចេញដែលមានការកើនពីចំនួន ៣៥ គោលដៅនៅឆ្នាំ ២០១០ រហូតដល់ ១២១ គោលដៅត្រឹមឆ្នាំ ២០២៣ បានកំពុងធ្វើឱ្យ អង្ករកម្ពុជាទទួលស្គាល់ពេញពិភពលោក, ជាក់ស្តែងនៅក្នុងរយៈពេល ៨ខែឆ្នាំ២០២៤នេះ អង្ករកម្ពុជាបាននាំចេញ មានចំនួន ១១២ ពាន់តោន និងស្រូវ មានចំនួន ៣,៣ លានតោន៕ អត្ថបទ៖ សុន រ៉ាឌី

សម្ដេចតេជោ ហ៊ុន សែន អនុញ្ញាតឲ្យប្រធានសមាគមវប្បធម៌កូរ៉េ ជួបសំដែងការគួរសម

នៅរសៀលថ្ងៃទី១០ខែកញ្ញា សម្ដេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជាបានអនុញ្ញាតឲ្យលោក Samuel Chung ប្រធានសមាគមវប្បធម៌កូរ៉េ(KCA-Korean Culture Association) ចូលជួបសម្ដែងការគួរសម។សម្ដេចតេជោបានសំដែងនូវសេចក្តីសប្បាយរីករាយដែលបានជួបជាមួយសមាគមវប្បធម៌កូរ៉េ ក្នុងឱកាសដែលសម្តេចបានអញ្ជើញមកទីក្រុងអ៊ីឆន់ នៃសាធារណរដ្ឋកូរ៉េ ដើម្បីចូលរួមក្នុងវេទិកាចំណេះដឹងពិភពលោកខួបលើកទី២៥។លោកប្រធានសមាគមបានជំរាបជូនសម្តេចថា លោកក៏ធ្លាប់បានសិក្សាអំពីប្រវត្តិសាស្ត្រ ការដែលសម្តេចតេជោបានបញ្ចប់សង្គ្រាម ហើយនាំមកនូវសុខសន្តិភាព និងប្រទេសកម្ពុជាឱ្យមានការរីកចម្រើនរហូតមកដល់សព្វថ្ងៃ។លោកប្រធានសមាគមក៏បានគោរពជំរាបជូនសម្តេចថា លោកបាននិងកំពុងធ្វើកិច្ចសហប្រតិបត្តិការជាមួយលោកជំទាវ ឯកអគ្គរាជទូតកម្ពុជានៅទីក្រុងសេអ៊ូល ដើម្បីរៀបចំសកម្មភាពនានានៃគម្រោងផ្លាស់ប្ដូរវប្បធម៌គ្នាទៅវិញទៅមក ដោយកម្ពុជា និងសាធារណរដ្ឋកូរ៉េមានទំនាក់ទំនងល្អ ហើយកិច្ចសហការនេះគឺធ្វើតាមរយៈស្ថានទូតកម្ពុជានៅទីក្រុងសេអ៊ូល។ លោកក៏បានសំណូមពរ ឱ្យរាជរដ្ឋាភិបាលកម្ពុជាគាំទ្រគម្រោងនានាដើម្បីបំរើឱ្យទំនាក់ទំនងកិច្ចសហប្រតិបត្តិការលើវិស័យវប្បធម៌នៃប្រទេសទាំង២ ឱ្យមានការរីកចម្រើន។លោកថា កាលពីខែឧសភាកន្លងមករូបថត២០០០សន្លឹកអំពីវិស័យវប្បធម៌នៅកម្ពុជាដូចជារូបថតប្រាសាទអង្គរវត្ត ប្រាសាទបុរាណនានាជាច្រើនត្រូវបានដាក់តាំងនៅទីក្រុងសេអ៊ូល ហើយនៅថ្ងៃទី២៦កញ្ញាខាងមុខនេះ នឹងរៀបចំធ្វើរាត្រីសមោសរមួយ ដើម្បីរៃអង្គាសពីសប្បុរសជនជួយដល់ក្រុមគ្រូពេទ្យធីតានៅកម្ពុជា។ សមាគមវប្បធម៌កូរ៉េក៏មានគម្រោងរៀបចំពិព័រណ៍គំនូរ និងរាត្រីស្រមោលសថ្ងៃទី១ ខែធ្នូ ឆ្នាំ២០២៤ នៅទីរួមខេត្តសៀមរាបក្នុងគោលដៅធ្វើអោយ រាត្រីស្រមោលសនោះបានប្រព្រឹត្តិទៅជោគជ័យ ដោយ សមាគមវប្បធម៌កូរ៉េនិងនាំយកទៅជាមួយនូវសិល្បករ សិល្បការិនីល្បីៗ ទៅធ្វើការបង្ហាញម៉ូតនៅកម្ពុជាផងដែរ។លោកក៏បានជំរាបជូនអំពីបំណងផ្លាស់ប្ដូរប្រជាជន និងប្រជាជន ដើម្បីឱ្យបានស្គាល់អំពីវប្បធម៌របស់កម្ពុជា ជាពិសេសកូនៗរបស់កម្ពុជានៅប្រទេសកូរ៉េបានស្គាល់នូវអត្តសញ្ញាណវប្បធម៌ជាតិរបស់គេ។ទន្ទឹមនេះ សមាគមក៏មានគម្រោងរៀបចំជាវេទិកា ឬសិក្ខាសាលា ផ្សេងៗឱ្យបានសកម្មរវាងប្រទេសទាំង២។សម្ដេចតេជោបានថ្លែងអំណរគុណ ចំពោះគម្រោងនានាដែល លោកប្រធានសមាគមវប្បធម៌កូរ៉េបានរៀបរាប់ អំពីទំនាក់ទំនង នៃកិច្ចសហប្រតិបត្តិការរវាងប្រទេសទាំងពីរដែលបានធ្វើកន្លងមក និងនៅពេលអនាគត ដើម្បីជំរុញនូវទំនាក់ទំនងវប្បធម៌រវាងប្រទេសទាំងពីរ។សម្ដេចបានបញ្ជាក់ថា ដើម្បីឲ្យការផ្លាស់ប្ដូរ និងការតភ្ជាប់តាមរយៈការផ្លាស់ប្ដូរវប្បធម៌នេះគឺមានតម្លៃ មិនគ្រាន់តែសម្រាប់ប្រជាជន និងប្រជាជនទេ ប៉ុន្តែក៏មានតម្លៃ លើការពង្រឹងទំនាក់ទំនងរវាងរដ្ឋ និងរដ្ឋ និងរវាងរាជធានី និងរាជធានីផងដែរ។ សម្តេចថាការផ្លាស់ប្ដូរប្រជាជននិងប្រជាជនក៏ជាចំណែកជួយជំរុញដល់វិស័យទេសចរណ៍ រវាងប្រទេសទាំងពីរ ដោយប្រទេសទាំង២ ជាដន្លងនឹងគ្នា ក្នុងនោះស្ត្រីខ្មែរប្រមាណជា៨ពាន់នាក់បានរៀបការជាមួយបុរសកូរ៉េ ហើយមានកូន ចៅជាង១ម៉ឺននាក់ ដែលកូនចៅ របស់គេគឺត្រូវស្គាល់អំពីវប្បធម៌ នៃប្រទេសទាំងពីរនិងត្រូវបង្កើតឲ្យមានការទៅមក ដើម្បីឲ្យគេបានស្គាល់នូវជីដូនជីតារបស់គេ និងធ្វើឲ្យមានការបង្កើនល្បឿនលំហូរទេសចរណ៍ រវាងប្រទេសទាំងពីរផងដែរ។សម្ដេចក៏បានលើកទឹកចិត្តឲ្យរដ្ឋាភិបាលកម្ពុជានិងរដ្ឋាភិបាលកូរ៉េ បន្តធ្វើការជាមួយគ្នា លើការផ្លាស់ប្ដូរវប្បធម៌នេះ ហើយសង្ឃឹមថា លោកប្រធានសមាគមវប្បធម៌កូរ៉េ និងអញ្ជើញទៅធ្វើទស្សនកិច្ចនៅប្រទេសកម្ពុជាញឹកញាប់។លោកប្រធានសមាគមក៏បញ្ជាក់ថា កាលពីខែសីហាលោក និងសមាគមបានទៅទស្សនកិច្ច និងទស្សនាប្រាសាទអង្គរវត្ដ។ ជាចុងក្រោយសម្តេច បានលើកទឹកចិត្តឲ្យសមាគមធ្វើការឲ្យកាន់តែជិតស្និទ្ធជាមួយលោកជំទាវឯកអគ្គរាជទូតកម្ពុជា នៅសាធារណរដ្ឋកូរ៉េដើម្បីធ្វើសកម្មភាពក្នុង គោលដៅផ្លាស់ប្ដូរវប្បធម៌ និងវប្បធម៌ក៏ដូចជាការផ្លាស់ប្ដូរប្រជាជននិងប្រជាជន ដើម្បីជំរុញដល់កំណើនទេសចរណ៍រវាងប្រទេសទាំង២ឲ្យបានកាន់តែច្រើនថែមទៀត៕ អត្ថបទ មុត សុទ្ធ

សម្តេចតេជោ ហ៊ុន សែន៖ អាស៊ាន ប្រកាន់ខ្ជាប់ពហុភាគីនិយម ផ្តោតលើប្រជាជន និងយកប្រជាជនធ្វើជាស្នូល

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានចែករំលែកនូវទស្សនៈវិស័យសាមគ្គីភាព សក្តានុពល ពហុភាគីនិយម របស់អាស៊ាន ជាពិសេសអាស៊ានបានប្រកាន់ខ្ជាប់ដោយយកប្រជាជនជាស្នូល។ សម្ដេចតេជោ ហ៊ុន សែន ប្រធានព្រឹទ្ធសភា នៃកម្ពុជា បានគូសបញ្ជាក់បែបនេះតាមរយៈសុន្ទរកថាពិសេសក្រោមប្រធានបទ (មាគ៌ាឆ្ពោះទៅកាន់សន្តិសហវិជ្ជមាននិងវិបុលភាពក្នុងអាស៊ាន) ក្នុង «វេទិកាចំណេះដឹងពិភពលោកលើកទី២៥» នៅសាធារណរដ្ឋកូរ៉េ នាថ្ងៃទី១០ខែកញ្ញានេះ។សម្តេចតេជោថ្លែងថា អាស៊ានបានទាក់ទាញវិនិយោគ និងដៃគូពីខាងក្រៅមកវិនិយោគយ៉ាងច្រើនដោយពុំមានថមថយនោះទេគឺមានតែការកើនឡើងជាលំដាប់ពីមួយឆ្នាំទៅមួយឆ្នាំ។ សម្តេចបន្តថា បើទោះបីពេលខ្លះ នៅក្នុងបរិបទសកល បានជួបប្រទះនូវការធ្លាក់ចុះសេដ្ឋកិច្ចយ៉ាងណាក៏ដោយ បានក្លាយពីតំបន់ដែលរងការអភិវឌ្ឍន៍ទៅជាតំបន់ដែលជួយដឹកនាំកំណើនសេដ្ឋកិច្ចតំបន់ និងសកលផងដែរ។សម្តេចតេជោបានបញ្ជាក់ពីភាពខ្លាំងរបស់អាស៊ាន ដែលបានផ្តល់អាទិភាពខ្ពស់បំផុតទៅដល់ការធ្វើសមាហរណកម្មសេដ្ឋកិច្ច ជាពិសេសការបង្កើតឡើងកិច្ចព្រមព្រៀងពាណិជ្ជកម្មសេរីជាមួយដៃគូជាច្រើនដូចជាកូរ៉េ ចិន ជប៉ុន អូស្ត្រាលីជាដើម និងភាពជាដៃគូសេដ្ឋកិច្ចគ្រប់ជ្រុងជ្រោយ ដែលទាំងអស់នេះ កម្ពុជាគាំទ្រជានិច្ច ដល់ពហុភាគី និយម ដោយសេរី បើកចំហរ មានបរិយាបន្ន និងតម្លាភាពដែល មានអង្គការពាណិជ្ជកម្មពិភពលោកជាស្នូល។ សម្តេចថា អាស៊ានក៏បាននិងកំពុងខិតខំគិតគូរ ស្វែងរកប្រភពកំណើនថ្មី ខ្សែច្របាក់ផ្គត់ផ្គង់តំបន់ ឲ្យកាន់តែប្រសើរ ពីការតភ្ជាប់វិទ្យាសាស្ត្របច្ចេកវិទ្យា ដែលតំបន់អាស៊ានបន្តសម្រេចបានមិនត្រឹមតែកំណើនសេដ្ឋកិច្ចខ្ពស់ប៉ុណ្ណោះទេ តែថែមទាំងមានភាពធន់និងមានជីវភាពកំណើនផងដែរ។ អាទិភាពទាំងអស់នេះ ត្រូវបានច្បាស់ក្នុងការរៀបចំចក្ខុវិស័យសហគមន៍អាស៊ានឆ្នាំ២០៤៥ ក៏ដូចជាផែនការយុទ្ធសាស្ត្រ នៃសសរស្ដម្ភទាំងបីរបស់សហគមន៍អាស៊ានផងដែរ។ អាស៊ានបានប្រកាន់ខ្ជាប់នូវគោលការណ៍បរិយាប័ន្ននៅក្នុងការកសាងសហគមន៍របស់ខ្លួន ដែលផ្ដោតលើប្រជាជន និងយកប្រជាជនជាស្នូលជាមួយនឹងចក្ខុវិស័យមិនទុកកន្លែងណាមួយ ឬប្រជាជនណាម្នាក់ចោលនោះទេ។ សម្ដេចសង្ឃឹមថា បទបង្ហាញនេះនឹងចូលរួមចំណែកផ្ដល់ជាពុទ្ធិសម្រាប់សាធារណជននៅវេទិកាអន្តរជាតិ ដើម្បីឲ្យពួកគេបានស្គាល់ និងយល់កាន់តែច្បាស់ពីអាស៊ាន និងពីសមិទ្ធផលក៏ដូចជាយន្តការរបស់អាស៊ាន ដែលយកសន្តិភាព ស្ថេរភាពតំបន់ធ្វើជាមូលដ្ឋានស្នូល ដើម្បីជំរុញសមាហរណកម្ម និងវិបុលភាពសម្រាប់ប្រជាជនក្នុងតំបន់៕ អត្ថបទ៖ មុត សុទ្ធ

បណ្ដាញសង្គម

ព័ត៌មានថ្មីៗ

ទីភ្នាក់ងារUNRWA៖ ជំនួយច្រើនសន្ធឹកសន្ធាប់ចូលទៅតំបន់ហ្កាហ្សា អាចនឹងសម្រាលបញ្ហាប្រឈមផ្នែកសន្តិសុខ

សីតុណ្ហភាពត្រជាក់ខ្លាំង បង្ខំឱ្យពិធីឡើងកាន់តំណែងរបស់លោក Trump ប្រព្រឹត្តទៅនៅខាងក្នុងវិមាន

អ.ដ.ក.និងគណៈមេធាវីកម្ពុជារៀបចំសិក្ខាសាលាស្តីពីបេសកកម្មនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ

រុស្ស៊ី៖ អ៊ុយក្រែន វាយប្រហារដោយមីស៊ីល ATACMS របស់អាមេរិកម្ដងទៀត ហើយសន្យាថានឹងឆ្លើយតប

តុលាការកំពូលអាមេរិក គាំទ្របម្រាមលើ TikTok ដោយទុកជោគវាសនារបស់កម្មវិធីនេះឲ្យលោក Trump

ថ្នាក់ដឹកនាំ និងបុគ្គលិកអង្គភាព CMAC អញ្ជើញគោរពវិញ្ញាណក្ខន្ធ សពបុគ្គលិកបោសសម្អាតមីន ២រូបជួបគ្រោះថ្នាក់បាត់បង់ជីវិតក្នុងឧបទ្ទវហេតុផ្ទុះមីនអំឡុងពេលបំពេញការងារ

គណៈរដ្ឋមន្ត្រីអ៊ីស្រាអែល អនុម័តកិច្ចព្រមព្រៀងបទឈប់បាញ់នៅហ្កាហ្សា និងដោះលែងចំណាប់ថ្នូរ

ឯកឧត្តមសាស្រ្តាចារ្យ ឈាង រ៉ា បានលើកទឹកចិត្តដល់មន្រ្តីនៃមជ្ឈមណ្ឌលជាតិផ្តល់ឈាម «ត្រូវឈរលើគោលការណ៍ នវានុវត្តន៍ ប្រសិទ្ធភាព គុណភាព សមភាព និងគុណធម៌»

បុរសម្នាក់បើករថយន្តដឹកដំឡូងក្នុងចម្ការប៉ះមីនតោនផ្ទុះរងរបួសធ្ងន់ ស្ថិតនៅស្រុកសំពៅលូន ខេត្តបាត់ដំបង

សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ប្រធានកាកបាទក្រហមកម្ពុជា ចាត់មន្ត្រីចូលរួមរំលែកទុក្ខយ៉ាងក្រៀមក្រំបំផុតចំពោះមរណភាមន្រ្តីបោសសម្អាតមីនអង្គភាពស៊ីម៉ាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

ការប្រជែងតំណែងជានាយករដ្ឋមន្ត្រីបន្ទាប់របស់ជប៉ុន ចាប់ផ្ដើមហើយ

ការស្ទង់មតិរបស់CNN៖ ភាគច្រើននៃអ្នកមើលការពិភាក្សាដេញដោលនិយាយថា លោកស្រី Harris ធ្វើបានល្អជាងលោកTrump

ទិន្នន័យ៖ ការជជែកដេញដោល Harris-Trump លើទូរទស្សន៍ ABC មានអ្នកទស្សនាជាង ៦៧លាននាក់

អ៊ុយក្រែន ថាខ្លួនអាចនឹងកាត់ផ្តាច់ទំនាក់ទំនងជាមួយអ៊ីរ៉ង់ ជុំវិញការបញ្ជូនមីស៊ីលទៅឱ្យរុស្ស៊ី

លោក Trudeau អាចបន្តធ្វើនាយករដ្ឋមន្ត្រីកាណាដា រហូតដល់ឆ្នាំ២០២៥ ទោះមានហានិភ័យនយោបាយក្ដី

ផ្ទុះការចាប់អារម្មណ៍ខ្លាំងលើបណ្តាញសង្គម អំឡុងការជជែកដេញដោលរវាងលោកស្រី HARRIS និងលោក TRUMP

រាជរដ្ឋាភិបាលបានដាក់ចេញគោលនយោបាយអនុគ្រោះជាច្រើនដើម្បីលើកកម្ពស់វិស័យកសិកម្ម

សម្ដេចតេជោ ហ៊ុន សែន អនុញ្ញាតឲ្យប្រធានសមាគមវប្បធម៌កូរ៉េ ជួបសំដែងការគួរសម

សម្តេចតេជោ ហ៊ុន សែន៖ អាស៊ាន ប្រកាន់ខ្ជាប់ពហុភាគីនិយម ផ្តោតលើប្រជាជន និងយកប្រជាជនធ្វើជាស្នូល

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ការប្រជែងតំណែងជានាយករដ្ឋមន្ត្រីបន្ទាប់របស់ជប៉ុន ចាប់ផ្ដើមហើយ

ការស្ទង់មតិរបស់CNN៖ ភាគច្រើននៃអ្នកមើលការពិភាក្សាដេញដោលនិយាយថា លោកស្រី Harris ធ្វើបានល្អជាងលោកTrump

ទិន្នន័យ៖ ការជជែកដេញដោល Harris-Trump លើទូរទស្សន៍ ABC មានអ្នកទស្សនាជាង ៦៧លាននាក់

អ៊ុយក្រែន ថាខ្លួនអាចនឹងកាត់ផ្តាច់ទំនាក់ទំនងជាមួយអ៊ីរ៉ង់ ជុំវិញការបញ្ជូនមីស៊ីលទៅឱ្យរុស្ស៊ី

លោក Trudeau អាចបន្តធ្វើនាយករដ្ឋមន្ត្រីកាណាដា រហូតដល់ឆ្នាំ២០២៥ ទោះមានហានិភ័យនយោបាយក្ដី

ផ្ទុះការចាប់អារម្មណ៍ខ្លាំងលើបណ្តាញសង្គម អំឡុងការជជែកដេញដោលរវាងលោកស្រី HARRIS និងលោក TRUMP

រាជរដ្ឋាភិបាលបានដាក់ចេញគោលនយោបាយអនុគ្រោះជាច្រើនដើម្បីលើកកម្ពស់វិស័យកសិកម្ម

សម្ដេចតេជោ ហ៊ុន សែន អនុញ្ញាតឲ្យប្រធានសមាគមវប្បធម៌កូរ៉េ ជួបសំដែងការគួរសម

សម្តេចតេជោ ហ៊ុន សែន៖ អាស៊ាន ប្រកាន់ខ្ជាប់ពហុភាគីនិយម ផ្តោតលើប្រជាជន និងយកប្រជាជនធ្វើជាស្នូល

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍