BTV NEWS

ទិវាសន្ដិភាពអន្ដរជាតិ| សម្ដេចធិបតី អំពាវនាវឱ្យថៃគោរពកិច្ចព្រមព្រៀងដែលបានឯកភាពគ្នាលើបញ្ហាព្រំដែន ខណៈកម្ពុជាប្រកាន់គោលការណ៍គ្រឹះគោរពអធិបតេយ្យដោះស្រាយបញ្ហាដោយសន្ដិវិធី

សម្ដេចតេជោ បង្ហាញចំណាប់អារម្មណ៍ទៅលើអត្ថបទរបស់អ្នកវិភាគថៃ ក្រោមចំណងជើងថា «ស្កប់ចិត្ត តែនៅមិនឈ្នះ!»

សម្ដេចតេជោលើកទឹកចិត្តឱ្យកម្ពុជា និងស៊ីបរកឱកាស និងយន្តការថ្មីៗជំរុញការវិនិយោគ និងពាណិជ្ជកម្មទ្វេភាគីឱ្យកាន់តែរីកចម្រើន

សម្ដេចតេជោ ជំរុញ កម្ពុជា និង ហ្សកហ្ស៊ី រកចំណុចមិនទាន់រួមគ្នា បង្កើតកិច្ចសហប្រតិបត្តិការកាន់តែស៊ីជម្រៅ

នយោបាយ និង ការអភិវឌ្ឍន៍

សហរដ្ឋអាមេរិក និងជប៉ុន ប្រកាសផែនការបញ្ជូនអវកាសយានិកជប៉ុន ទៅឋានព្រះចន្ទ

ប្រធានាធិបតីអាមេរិក លោក ចូ បៃដិន (Joe Biden) បានប្រកាសកាលពីថ្ងៃពុធ (១០ មេសា) ថា អវកាសយានិកជនជាតិជប៉ុន ដែលមានសំណាង នឹងក្លាយជាអ្នកដំបូងគេដែលមិនមែនជាជនជាតិអាមេរិក ដែលបានដើរលើឋានព្រះចន្ទក្នុងអំឡុងពេលបេសកកម្ម អាតេមីស (Artemis) នាពេលខាងមុខរបស់អង្គការណាសា (NASA)។ការផ្តល់ជូនដល់ប្រទេសជប៉ុន ដែលជាឱកាសដែលប្រជាជាតិជាច្រើនបានសុបិន្តចង់បាននេះ គឺជាផ្នែកមួយនៃដំណើរទស្សនកិច្ចផ្លូវរដ្ឋរបស់លោកនាយករដ្ឋមន្ត្រី ហ្វូមីអូ គីស៊ីដា (Fumio Kishida) និងខណៈដែលទីក្រុងវ៉ាស៊ីនតោន ស្វះស្វែងរកការពង្រឹងទំនាក់ទំនងជាមួយសម្ព័ន្ធមិត្តអាស៊ីដ៏សំខាន់របស់ខ្លួន។លោក គីស៊ីដា បានសាទរចំពោះសេចក្តីប្រកាសនេះថាជា «សមិទ្ធិផលដ៏ធំ» ហើយបានប្រកាសថា ប្រទេសជប៉ុន នឹងជ្រើសរើសអាកាសយានិកសម្រាប់កម្មវិធីនេះ។ បេសកកម្មដំបូងដើម្បីនាំអវកាសយានិកទៅកាន់ផ្ទៃព្រះចន្ទ ឈ្មោះថាបេសកកម្ម អាតេមីស ស៊ីរ (Artemis 3) ត្រូវបានគ្រោងទុកសម្រាប់ឆ្នាំ ២០២៦។ ទន្ទឹមនឹងនោះ ប្រទេសចិនបាននិយាយថា ខ្លួនកំពុងស្វះស្វែងរកការបញ្ជូនមនុស្សនៅលើភពព្រះចន្ទនៅឆ្នាំ២០៣០។ ក្នុងរយៈពេលប្រហែលពីរម៉ោងនៃកិច្ចពិភាក្សា មេដឹកនាំទាំងពីរក៏បានផ្តោតជាសំខាន់លើប្រធានបទជាច្រើនទៀត រួមទាំងបញ្ហាការពារជាតិនៅឥណ្ឌូប៉ាស៊ីហ្វិក ក៏ដូចជាជម្លោះដែលកំពុងបន្តនៅអ៊ុយក្រែន និងតំបន់ហ្កាហ្សា។ លោក គីស៊ីដា បាននិយាយថា កូរ៉េខាងជើង កោះតៃវ៉ាន់ និងចិន គឺជាចំណុចផ្តោតជាពិសេសនៃកិច្ចពិភាក្សា ដោយអំពាវនាវឱ្យរក្សា «សណ្តាប់ធ្នាប់អន្តរជាតិ ដោយផ្អែកលើនីតិរដ្ឋ»។សម្ព័ន្ធមិត្តទាំងពីរក៏នឹងអភិវឌ្ឍបណ្តាញការពារដែនអាកាស និងមីស៊ីលរួមគ្នានៅក្នុងតំបន់ រួមជាមួយនឹងប្រទេសអូស្ត្រាលី ក៏ដូចជាចូលរួមក្នុងសមយុទ្ធយោធាត្រីភាគី រួមជាមួយនឹងកងកម្លាំងចក្រភពអង់គ្លេសផងដែរ៕

គណបក្សកាន់អំណាចរបស់កូរ៉េខាងត្បូង ទទួលបរាជ័យយ៉ាងខ្លាំងក្នុងការបោះឆ្នោតសកល

គណបក្សប្រឆាំងរបស់ប្រទេសកូរ៉េខាងត្បូង បានឈ្នះសំឡេងភាគច្រើននៅក្នុងការបោះឆ្នោតសកលរបស់ប្រទេសក្នុងការរក្សាការគ្រប់គ្រងសភា។ គណបក្សប្រជាធិបតេយ្យ (DPK) និងគណបក្សប្រឆាំងតូចៗជាច្រើន រួមគ្នាដណ្តើមបានអាសនៈចំនួន ១៩២ ក្នុងចំណោមអាសនៈចំនួន ៣០០ នៅក្នុងរដ្ឋសភា។ ការបោះឆ្នោតនេះ ត្រូវបានគេមើលឃើញយ៉ាងទូលំទូលាយថា ជាការបោះប្រជាមតិពាក់កណ្តាលអាណត្តិសម្រាប់ប្រធានាធិបតី លោក Yoon Suk Yeol ដែលនៅសល់រយៈពេលបីឆ្នាំក្នុងការកាន់តំណែងរបស់លោក។មេដឹកនាំគណបក្ស លោក Han Dong-hoon បានលាលែងពីតំណែង ហើយនាយករដ្ឋមន្ត្រី លោកHan Duk-soo បានស្នើសុំលាលែងពីតំណែង។ នេះគឺជាការបរាជ័យយ៉ាងខ្លាំងសម្រាប់លោក Yoon និងគណបក្សអំណាចប្រជាជន (PPP) របស់លោក ដែលបាននិងកំពុងព្យាយាមដើម្បីទទួលបានបានរបៀបវារៈរបស់ខ្លួននៅក្នុងសភាដែលគណបក្សប្រជាធិបតេយ្យ(DPK) មានសំឡេងច្រើនលើសលប់ ។ ការទទួលជ័យជម្នះរបស់គណបក្សប្រជាធិបតេយ្យ(DPK) មានន័យថាពួកគេនឹងអាចពន្លឿននិងជំរុញច្បាប់តាមរយៈសភា។ ទាំងគណបក្សប្រជាធិបតេយ្យ(DPK) និងគណបក្សអំណាចប្រជាជន(PPP) ប្រើប្រាស់បក្សសម្ព័ន្ធតូចៗ ដើម្បីបង្កើនការសំឡេងឆ្នោតរបស់ពួកគេ ក្រោមប្រព័ន្ធបោះឆ្នោតរបស់ប្រទេសកូរ៉េខាងត្បូង ដែលផ្តល់អាសនៈមួយចំនួនដល់គណបក្សតូចៗ ដែលចំនួនអាសនៈមិនតិចជាងការគាំទ្រសរុបរបស់ពួកគេនោះទេ។មេដឹកនាំគណបក្សបប្រជាធិបតេយ្យ(DPK) លោកលី ចា ម្យុង(Lee Jae-myung) បាននិយាយនៅថ្ងៃព្រហស្បតិ៍នេះថា នេះពុំមែនជាជ័យជម្នះរបស់គណបក្សប្រជាធិបតេយ្យនោះទេ ប៉ុន្តែជាជ័យជម្នះដ៏អស្ចារ្យសម្រាប់ប្រជាជន។លោកបាននិយាយទៅកាន់អ្នកសារព័ត៌មានថា អ្នកនយោបាយនៅគណបក្សទាំងសងខាង ត្រូវប្រមូលផ្តុំកម្លាំងរបស់យើងដើម្បីដោះស្រាយវិបត្តិសេដ្ឋកិច្ចបច្ចុប្បន្ន។ គណបក្សប្រជាធិបតេយ្យ នឹងដឹកនាំមធ្យោបាយក្នុងការដោះស្រាយវិបត្តិជីវភាពរស់នៅ។ លទ្ធផលថ្ងៃនេះ អាចជំរុញលោក លោក Lee ដែលបានចាញ់ក្នុងការបោះឆ្នោតប្រធានាធិបតីឆ្នាំ ២០២២ យ៉ាងប្រកៀកប្រកិតជាមួយលោក Yoon ឱ្យឈរឈ្មោះជាប្រធានាធិបតីក្នុងអាណត្តិមួយផ្សេងទៀត។ លោក Yoon បានស្ថិតនៅក្រោមសម្ពាធក្នុងការដោះស្រាយបញ្ហាមួយចំនួន រួមមានទាំងការកើនឡើងតម្លៃស្បៀងអាហារ ប្រជាជនមានវ័យចំណាស់ឆាប់រហ័ស និងការធ្វើកូដកម្មរបស់វេជ្ជបណ្ឌិតដែលនៅតែបន្ត។

ប្រទេសស្វីស នឹងធ្វើជាម្ចាស់ផ្ទះនៃកិច្ចប្រជុំកំពូលសន្តិភាពអ៊ុយក្រែន នៅថ្ងៃទី១៥-១៦ ខែមិថុនា

ប្រទេសស្វីសនិយាយថា រដ្ឋាភិបាលស្វីស នឹងធ្វើជាម្ចាស់ផ្ទះនៃសន្និសីទកម្រិតខ្ពស់រយៈពេលពីរថ្ងៃក្នុងខែមិថុនា ក្នុងគោលបំណងសម្រេចបានសន្តិភាពក្នុងប្រទេសអ៊ុយក្រែន ទោះបីជារុស្ស៊ី បានបញ្ជាក់យ៉ាងច្បាស់ថាខ្លួននឹងមិនចូលរួមក្នុងគំនិតផ្តួចផ្តើមនេះក៏ដោយ។ប្រទេសស្វីស បាននិយាយកាលពីខែមករា ថាខ្លួននឹងធ្វើជាម្ចាស់ផ្ទះនៃកិច្ចប្រជុំកំពូលសន្តិភាពតាមសំណើរបស់ប្រធានាធិបតីអ៊ុយក្រែន លោក វ្ល៉ូឌីមី ហ៊្សេឡិនស្គី (Volodymyr Zelenskiy) ហើយចាប់តាំងពីពេលនោះមកបានជួបពិភាក្សាជាមួយសហភាពអឺរ៉ុប រដ្ឋសមាជិកនៃក្រុមប្រទេសទាំង៧ (G7) និងប្រទេសដូចជាចិន និងឥណ្ឌា ដើម្បីវាយតម្លៃចំណាប់អារម្មណ៍របស់ពួកគេក្នុងការចូលរួម។សន្និសីទនេះនឹងធ្វើឡើងនៅថ្ងៃទី១៥-១៦ ខែមិថុនា នៅរមណីយដ្ឋាន បួហ្គិនស្តុក (Bürgenstock) ក្នុងរដ្ឋ នីតវ៉ាល់ដិន (Nidwalden) នៅខាងក្រៅទីក្រុង លូសើន (Lucerne)។ កិច្ចប្រជុំនេះនឹងមានគោលបំណងបង្កើតក្របខ័ណ្ឌអំណោយផលដល់សន្តិភាពដ៏ទូលំទូលាយ និងយូរអង្វែងនៅអ៊ុយក្រែន ក៏ដូចជា «ផែនទីបង្ហាញផ្លូវជាក់ស្តែងសម្រាប់ការចូលរួមរបស់រុស្ស៊ី ក្នុងដំណើរការសន្តិភាព»។ខណៈដែលទីក្រុងមូស្គូ បាននិយាយថា ខ្លួនមិនប្រឆាំងនឹងការចរចាដើម្បីបញ្ចប់សង្រ្គាម ក្រុមមន្ត្រីរុស្ស៊ីបាននិយាយថាពួកគេនឹងមិនចូលរួមក្នុងកិច្ចចរចានៅស្វីសនេះទេ ដែលពួកគេចាត់ទុកប្រទេសនេះថាបានបោះបង់ចោលអព្យាក្រឹតភាពរបស់ខ្លួនទាក់ទងនឹងជម្លោះ៕

យានដ្រូនរបស់អ៊ីរ៉ង់ ជួយកងទ័ពស៊ូដង់ផ្លាស់ប្តូរស្ថានភាពសង្រ្គាមស៊ីវិល

កងទ័ពស៊ូដង់និយាយថា ខ្លួនបានចាប់ផ្តើមប្រើយានដ្រូនផលិតដោយអ៊ីរ៉ង់ ដើម្បីជួយដណ្តើមយកទឹកដី និងផ្លាស់ប្តូរស្ថានភាពនៃសង្រ្គាមស៊ីវិលរបស់ប្រទេសនេះ។យានដ្រូនបញ្ជាពីចម្ងាយដែលទើបទទួលបានថ្មីនេះ ត្រូវបានប្រើសម្រាប់ការឈ្លបយកការណ៍ និងកំណត់ ទីតាំងកាំភ្លើងធំ អំឡុងពេលជ័យជម្នះរបស់កងទ័ពនាពេលថ្មីៗនេះ នៅក្នុងទីក្រុង Omdurman ដែលឆ្លងកាត់ទន្លេនីល(Nile)ពីរដ្ឋធានីខាទុំ( Khartoum)របស់ប្រទេសនេះ។មន្ត្រីអ៊ីរ៉ង់ ក៏បានប្រាប់សារព័ត៌មានរ៉យទ័រថា កងកម្លាំងប្រដាប់អាវុធស៊ូដង់ បានចាប់ផ្តើមប្រើប្រាស់យានដ្រូន ក្នុងរយៈពេលប៉ុន្មានខែចុងក្រោយនេះ ក្នុងសង្គ្រាមរបស់ខ្លួនប្រឆាំងនឹងគូប្រជែងរបស់កងជីវពល គឺកងកម្លាំងគាំទ្ររហ័ស (RSF)។ទោះបីជាយ៉ាងណាក៏ដោយ ប្រទេសស៊ូដង់ បានបដិសេធថា យានដ្រូន មិនត្រូវបានផ្គត់ផ្គង់ដោយផ្ទាល់ដោយទីក្រុងតេអេរ៉ង់ ហើយប្រភពដើមរបស់ពួកគេ មិនបានបញ្ជាក់ច្បាស់ភ្លាមៗនោះទេ។យានដ្រូនរបស់អ៊ីរ៉ង់ ក៏ត្រូវបានដាក់ពង្រាយយ៉ាងទូលំទូលាយដោយកងទ័ព និងកងជីវពល ក្នុងបណ្តាប្រទេសនានា រួមទាំងរុស្ស៊ី ស៊ីរី និងយេម៉ែន។លោក Ali Sadeq រដ្ឋមន្ត្រីការបរទេសស្តីទីរបស់ស៊ូដង់ដែលបានទៅបំពេញទស្សនកិច្ចនៅអ៊ីរ៉ង់ កាលពីឆ្នាំមុន ហើយមានសម្ព័ន្ធភាពជាមួយកងទ័ព បានប្រាប់សារព័ត៌មានរ៉យទ័រថា៖«ស៊ូដង់មិនបានទទួលអាវុធណាមួយពីអ៊ីរ៉ង់ទេ»។

ប្រជាពលរដ្ឋកោះតៃវ៉ាន់ និងក្រុងសៀងហៃបង្ហាញពីទស្សនៈផ្ទុយគ្នាចំពោះជំនួបរបស់អតីតមេដឹកនាំកោះតៃវ៉ាន់ជាមួយលោកXi

ជំនួបរបស់អតីតមេដឹកនាំរបស់កោះតៃវ៉ាន់ លោកម៉ា យីង ជាវ (Ma Ying-jeou) ជាមួយលោកប្រធានាធិបតីចិន Xi Jinping កាលពីថ្ងៃពុធទី១០មេសា សប្ដាហ៍នេះ បានធ្វើឲ្យមានការបញ្ចេញគំនិតផ្សេងៗគ្នាក្នុងចំណោមពលរដ្ឋនៅក្នុងទីក្រុងតៃប៉ិ របស់កោះនេះ និងនៅក្នុងទីក្រុងសៀងហៃ។ ពលរដ្ឋម្នាក់បាននិយាយថាខ្ញុំគិតថា ដោយមើលឃើញពីស្ថានភាពឆ្លងកាត់ច្រកសមុទ្រតៃវ៉ាន់ នាពេលបច្ចុប្បន្ន ក៏ដូចជាក្នុងស្ថានភាពជាអន្តរជាតិបច្ចុប្បន្ន ព្រមទាំងការពិចារណាជំហររបស់លោកជាអតីតមេដឹកនាំមួយរូប ជំនួបនេះគឺមិនមែនត្រឹមត្រូវទេ។ ចំណែកប្រជាពលរដ្ឋនៅក្នុងទីក្រុងសៀងហៃវិញ បាននិយាយកាលពីថ្ងៃពុធទី១០មេសា ថា ជំនួបរបស់ប្រធានាធិបតី Xi ជាមួយអតីតមេដឹកនាំកោះតៃវ៉ាន់ ពេលនេះ គឺជាជំហានវិជ្ជមានមួយឆ្ពោះទៅរកការជុំជាតិឡើងវិញ ។ ប្រធានាធិបតីចិនលោក Xi Jinping កាលពីថ្ងៃពុធ ទី១០ ខែមេសា សប្ដាហ៍នេះ បានប្រាប់អតីតមេដឹកនាំកោះតៃវ៉ាន់ រូបនេះ ថា ការជជែកវែកញែកពីខាងក្រៅមិនអាចបញ្ឈប់ការជួបជុំជាតិ រវាងភាគីទាំង២នៃច្រកសមុទ្រតៃវ៉ាន់បានឡើយ ហើយថាគ្មានបញ្ហាណាមួយដែលមិនអាចពិភាក្សាគ្នាបាននោះទេ។លោក Ma ដែលកាន់តំណែងជាមេដឹកនាំពីឆ្នាំ២០០៨ ដល់ឆ្នាំ២០១៦ កាលពីឆ្នាំមុន បានក្លាយជាអតីតមេដឹកនាំកោះតៃវ៉ាន់ដំបូងគេដែលបានធ្វើទស្សនកិច្ចទៅកាន់ប្រទេសចិន ហើយឥឡូវនេះលោកកំពុងធ្វើដំណើរទៅកាន់ប្រទេសនេះជាលើកទី២។ គួរបញ្ជាក់ថា គិតចាប់តាំងពីរដ្ឋាភិបាលសាធារណរដ្ឋចិនដែលបានបរាជ័យ បានភៀសខ្លួនទៅកោះតៃវ៉ាន់ ក្នុងឆ្នាំ១៩៤៩ បន្ទាប់ពីចាញ់សង្រ្គាមស៊ីវិល ក្រោមដៃក្រុមកុម្មុយនីស្តរបស់លោក ម៉ៅ សេទុង គ្មានមេដឹកនាំកោះតៃវ៉ាន់ណាម្នាក់បានទៅទស្សនកិច្ចនៅប្រទេសចិននោះឡើយ៕

អាមេរិកនិងជប៉ុន ប្រកាសពីការពង្រឹងទំនាក់ទំនងសន្តិសុខជាប្រវត្តិសាស្ត្រដើម្បីទប់ទល់នឹងចិន

សហរដ្ឋអាមេរិក និងជប៉ុន បានប្រកាសពីការពង្រឹងទំនាក់ទំនងកាន់តែប្រសើរឡើងជាប្រវត្តិសាស្រ្តចំពោះសម្ព័ន្ធភាពសន្តិសុខរបស់ខ្លួនកាលពីថ្ងៃពុធ ខណៈលោកប្រធានាធិបតី Joe Biden ធ្វើជាម្ចាស់ផ្ទះទទួលនាយករដ្ឋមន្ត្រីជប៉ុន លោកFumio Kishida សម្រាប់ដំណើរទស្សនកិច្ចផ្លូវការដែលបង្ហាញពីតួនាទីរបស់ប្រទេសជប៉ុនក្នុងការទប់ទល់ឥតទ្ធិពលរបស់ប្រទេសចិននៅក្នុងតំបន់អាស៊ី-ប៉ាស៊ីហ្វិក។ លោកBidenបាននិយាយនៅក្នុងសុន្ទរកថាបើកកិច្ចប្រជុំរបស់លោកក្នុងអំឡុងសន្និសីទសារព័ត៌មានរួមគ្នានៅសួនច្បារផ្កាកូឡាប Rose Garden ក្នុងសេតវិមាន ថា តាមរយៈភាពជាដៃគូរបស់យើង យើងបានពង្រឹងសម្ព័ន្ធភាពនេះ។ យើងបានពង្រីកការងាររបស់យើងជាមួយគ្នា។យើងបានលើកឡើងពីមហិច្ឆតារួមគ្នារបស់យើង។ហើយពេលនេះសម្ព័ន្ធភាពអាមេរិក-ជប៉ុន គឺជាសញ្ញាបង្ហាញដល់ពិភពលោកទាំងមូល។ដំណើរទស្សនកិច្ចផ្លូវការលើកដំបូងដោយមេដឹកនាំជប៉ុនក្នុងរយៈពេល៩ឆ្នាំមកនេះក៏កើតឡើងផងដែរស្របពេលមានការខ្វែងគំនិតគ្នារវាងប្រទេសទាំងពីរជុំវិញការស្នើទិញដែកថែបរបស់សហរដ្ឋអាមេរិកដោយក្រុមហ៊ុនជប៉ុន។លោក Kishida និយាយថា ការវិនិយោគពីជប៉ុនទៅកាន់សហរដ្ឋអាមេរិកអាចកើនឡើងតែនៅក្នុងរយៈពេលប៉ុន្មានខែ និងប៉ុន្មានឆ្នាំខាងមុខ។ ហើយយើងចង់ពង្រឹងទំនាក់ទំនងឈ្នះ-ឈ្នះនេះ។លោក Biden បាននិយាយថា លោកប្រកាន់ខ្ជាប់ការប្តេជ្ញាចិត្តរបស់លោកចំពោះកម្មករអាមេរិក ។ម៉ាត់ណាម៉ាត់នឹង។ខ្ញុំនឹងមិនលេបសម្ដីឡើយ។ នៅថ្ងៃព្រហស្បតិ៍នេះ លោក Kishida នឹងថ្លែងសុន្ទរកថានៅក្នុងកិច្ចប្រជុំរួមគ្នារបស់សភា ជាមេដឹកនាំជប៉ុនទីពីរ ដែលនឹងថ្លែងបន្ទាប់ពីអតីតនាយករដ្ឋមន្ត្រី Shinzo Abe កាលពីឆ្នាំ ២០១៥ ។ ក្រោយមក លោកនឹងចូលរួមក្នុងកិច្ចពិភាក្សាត្រីភាគីជាមួយសហរដ្ឋអាមេរិក និងហ្វីលីពីន។កិច្ចពិភាក្សាត្រីភាគីនៅថ្ងៃព្រហស្បតិ៍នេះ កើតមានឡើងខណៈទំនាក់ទំនងរវាងចិន និងហ្វីលីពីន ធ្លាក់ដុនដាបខ្លាំងព្រោះការប៉ះទង្គិចគ្នារវាងនាវាឆ្មាំសមុទ្រប្រទេសទាំង២នៅសមុទ្រចិនខាងត្បូង។អាមេរិកនិយាយថាសន្ធិសញ្ញាការពារគ្នាទៅវិញទៅមកជាមួយហ្វីលីពីន នឹងអនុវត្តន៍ដើម្បីទប់ទល់សកម្មភាពបែបនេះ ដែលបង្កើនក្ដីបារម្ភពីការធ្វើអន្តរាគមន៍របស់អាមេរិក ក្នុងករណីមានជម្លោះរីកធំ៕

លោក Biden សន្យាគាំទ្ររឹងមាំដូចដែកថែបចំពោះអ៊ីស្រាអែល ប្រឆាំងនឹងការគំរាមកំហែងរបស់អ៊ីរ៉ង់

លោកប្រធានាធិបតីអាមេរិក Joe Biden កាលពីថ្ងៃពុធ ទី១០ មេសាសប្ដាហ៍នេះ បានសន្យាថានឹងគាំទ្រដល់អ៊ីស្រាអែល ខណៈអ៊ីរ៉ង់គំរាមសងសឹកចំពោះការវាយប្រហារតាមអាកាសលើអគារកុងស៊ុលអ៊ីរ៉ង់នៅទីក្រុងរដ្ឋធានីដាម៉ាស(Damascus) ប្រទេសស៊ីរី និងបានសម្លាប់ឧត្តមសេនីយ៍ពីរនាក់។ការសន្យារបស់លោក Biden កើតមានឡើង ទោះបីជាមានការរិះគន់ជាសាធារណៈរបស់លោកលើលោកនាយករដ្ឋមន្ត្រី Benjamin Netanyahu ជុំវិញការស្លាប់ជនស៊ីវិលរាប់ម៉ឺននាក់នៅក្នុងយុទ្ធនាការរបស់អ៊ីស្រាអែលប្រឆាំងនឹងក្រុមហាម៉ាសនៅហ្កាហ្សា ជាពិសេសបន្ទាប់ពីការវាយប្រហារតាមអាកាសបានសម្លាប់បុគ្គលិកចែកចាយជំនួយរបស់អង្គការផ្ទះបាយកណ្ដាលពិភពលោកចំនួនប្រាំពីរនាក់។ លោក Biden បានប្រាប់សន្និសីទសារព័ត៌មានជាមួយនាយករដ្ឋមន្ត្រីជប៉ុន លោក Fumio Kishida ថា អ៊ីរ៉ង់កំពុងគំរាមបើកការវាយប្រហារដ៏ធំមួយលើអ៊ីស្រាអែល។ ដូចខ្ញុំបានប្រាប់នាយករដ្ឋមន្រ្តី Netanyahu ហើយថា ការប្តេជ្ញាចិត្តរបស់យើងចំពោះសន្តិសុខរបស់អ៊ីស្រាអែលប្រឆាំងនឹងការគំរាមកំហែងទាំងនេះពីប្រទេសអ៊ីរ៉ង់ និងកងកម្លាំងតំណាងរបស់អ៊ីរ៉ង់ គឺរឹងមាំដូចដែកថែប។ខ្ញុំសូមបញ្ជាក់ជាថ្មីទៀតថា យើងនឹងប្រឹងប្រែងឱ្យអស់ពីសមត្ថភាពដើម្បីការពារសន្តិសុខរបស់អ៊ីស្រាអែល។ ក្រុមមន្ត្រីអាមេរិកបានបង្ហាញក្ដីបារម្ភអំពីការរំពឹងទុកនៃការវាយប្រហារដែលនឹងកើតឡើងលើផលប្រយោជន៍របស់អ៊ីស្រាអែល បន្ទាប់ពីសម្ព័ន្ធមិត្តដ៏ស្អិតរមួតរបស់អាមេរិកនៅមជ្ឈិមបូព៌ាមួយនេះ បានបំផ្លាញអគារស្ថានកុងស៊ុលកាលពីថ្ងៃទី១ខែមេសា ដោយបានសម្លាប់សមាជិក៧នាក់នៃកងឆ្មាំបដិវត្តន៍របស់អ៊ីរ៉ង់ រួមទាំងឧត្តមសេនីយ៍ពីរនាក់ផងដែរ។ ស្របពេលមានហានិភ័យកើនឡើង ក្រុមហ៊ុនអាកាសចរណ៍អាល្លឺម៉ង់ Lufthansa កាលពីថ្ងៃពុធបានប្រកាសថាខ្លួនបានផ្អាកជើងហោះហើរទាំងទៅ ទាំងមក ពីទីក្រុងតេអេរ៉ង់ ប្រហែលជារហូតដល់ថ្ងៃព្រហស្បតិ៍នេះ ដោយនិយាយថា ដោយសារតែស្ថានភាពបច្ចុប្បន្ននៅក្នុងតំបន់មជ្ឈិមបូព៌ា។ចំណែកមេដឹកនាំកំពូលរបស់អ៊ីរ៉ង់ លោក អាយ៉ាត់តូឡា អាលីខាមីណេ(Ayatollah Ali Khamenei )បានព្រមាននៅក្នុងសុន្ទរកថាមួយកាលពីថ្ងៃពុធថា របបដ៏អាក្រក់ របស់អ៊ីស្រាអែល ត្រូវតែទទួលទណ្ឌកម្ម ហើយនឹងត្រូវដាក់ទោស៕

អ៊ីស្រាអែល ធ្វើសមយុទ្ធដឹកជញ្ជូនដើម្បីត្រៀមសម្រាប់ «សង្រ្គាមពហុសង្វៀន» ដែលអាចកើតមាន

ក្រសួងដឹកជញ្ជូនរបស់អ៊ីស្រាអែល កាលពីថ្ងៃពុធ (១០ មេសា) បាននិយាយថា ខ្លួនបានធ្វើសមយុទ្ធមួយ ជាមួយនឹងសេណារីយ៉ូនិមិត្តនៃការដាច់ចរន្តអគ្គិសនីរយៈពេលយូរ ដើម្បីកែលម្អការត្រៀមខ្លួនសម្រាប់ «សង្រ្គាមពហុសង្វៀន» ដែលអាចកើតមាន។សមយុទ្ធដែលធ្វើឡើងកាលពីល្ងាចថ្ងៃអង្គារនោះ មានការចូលរួមពីអាជ្ញាធរ មន្ទីរ និងក្រុមហ៊ុនរបស់ក្រសួង ព្រមទាំងក្រុមមន្ត្រីជាន់ខ្ពស់មកពីទីស្តីការនាយករដ្ឋមន្ត្រី អាជ្ញាធរជាតិគ្រប់គ្រងគ្រោះអាសន្ន បញ្ជាការដ្ឋានកងទ័ពជើងគោក និងអង្គភាពផ្សេងៗទៀត។យោងតាមសេចក្តីថ្លែងការណ៍របស់ក្រសួងបានឱ្យដឹងថា គោលបំណងនៃសមយុទ្ធនេះគឺដើម្បីកែលម្អការត្រៀមខ្លួននៃវិស័យដឹកជញ្ជូន ដើម្បីទប់ទល់នឹងសង្គ្រាមដែលមានកម្រិតខ្លាំង ជាពិសេសនៅក្នុងសេណារីយ៉ូងងឹត។សមយុទ្ធនេះបានសង្កត់ធ្ងន់លើការពង្រឹងសមាហរណកម្ម និងទំនាក់ទំនងទៅវិញទៅមករវាងអាជ្ញាធរ និងអង្គការនានា ដើម្បីឆ្លើយតបទៅនឹងព្រឹត្តិការណ៍សំខាន់ៗ ដូចជាវិបត្តិអគ្គិសនីដែលអាចកើតមាននៅក្នុងស្ថានការណ៍ពហុវិស័យ៕

មេដឹកនាំកូរ៉េខាងជើង៖ ឥឡូវនេះដល់ពេលដែលត្រូវត្រៀមខ្លួនសម្រាប់ធ្វើសង្គ្រាមហើយ

ទីភ្នាក់ងារសារព័ត៌មាន KCNA បានរាយការណ៍នៅថ្ងៃព្រហស្បតិ៍ (១១ មេសា) នេះថា មេដឹកនាំកូរ៉េខាងជើងលោក គីម ជុងអ៊ុន (Kim Jong Un) បាននិយាយថា ស្ថានភាពភូមិសាស្ត្រនយោបាយមិនស្ថិតស្ថេរជុំវិញប្រទេសរបស់លោកមានន័យថា ឥឡូវនេះគឺជាពេលវេលាដើម្បីត្រៀមខ្លួនសម្រាប់ធ្វើសង្រ្គាមជាងពេលណាៗទាំងអស់ ខណៈដែលលោកបានចុះត្រួតពិនិត្យសាកលវិទ្យាល័យយោធាដ៏សំខាន់របស់ប្រទេស។លោក គីម បានផ្តល់ការណែនាំបែបនេះកាលពីថ្ងៃពុធ នៅសាកលវិទ្យាល័យយោធា និងនយោបាយ គីម ជុងអ៊ីល (Kim Jong Il University of Military and Politics) ដោយដាក់ឈ្មោះតាមឪពុករបស់លោកដែលបានស្លាប់នៅឆ្នាំ២០១១ ដែលប្រព័ន្ធផ្សព្វផ្សាយ KCNA បាននិយាយថាសាលានេះជា «កៅអីខ្ពស់បំផុតនៃការអប់រំយោធា» នៅក្នុងប្រទេស។កូរ៉េខាងជើង បានបង្កើនការអភិវឌ្ឍន៍សព្វាអាវុធក្នុងរយៈពេលប៉ុន្មានឆ្នាំចុងក្រោយនេះក្រោមការដឹកនាំរបស់លោក គីម ហើយបានពង្រឹងទំនាក់ទំនងយោធា និងនយោបាយកាន់តែជិតស្និទ្ធជាមួយរុស្ស៊ី ខណៈទីក្រុងព្យុងយ៉ាង ត្រូវបានចោទប្រកាន់ថាបានជួយទីក្រុងមូស្គូ ក្នុងសង្គ្រាមរបស់ខ្លួនជាមួយអ៊ុយក្រែន ជាថ្នូរនឹងជំនួយសម្រាប់គម្រោងយោធាយុទ្ធសាស្ត្រ។កូរ៉េខាងជើង បានចោទប្រកាន់សហរដ្ឋអាមេរិក និងកូរ៉េខាងត្បូង ពីបទបង្កភាពតានតឹងផ្នែកយោធា ដោយធ្វើនូវអ្វីដែលខ្លួនហៅថា «សមយុទ្ធសង្គ្រាម» ខណៈដែលសម្ព័ន្ធមិត្តទាំងពីរនេះបានធ្វើសមយុទ្ធយោធាជាមួយនឹងកម្រិតកាន់តែធំធេង និងខ្លាំងក្លានៅក្នុងប៉ុន្មានខែថ្មីៗនេះ៕

សម្តេចធិបតី៖ បញ្ហារវាងបងប្អូនប្រជាពលរដ្ឋជាមួយម្ចាស់បុរី សម្ដេចបានបញ្ជាឲ្យធ្វើការដោះស្រាយជារៀងរាល់ថ្ងៃ

សម្តេចធិបតី ហ៊ុន ម៉ាណែត នាយករដ្ឋមន្រ្តី បានអះអាងថា រាជរដ្ឋាភិបាលមិនដេកអេះពោះដូចការលើកឡើងរបស់ជនអគតិមួយក្តាប់តូចនោះទេ គឺរាជរដ្ឋាភិបាលបានកំពុងខិតខំដោះស្រាយរាល់បញ្ហាជូនបងប្អូនជានិច្ចជាពិសេសបញ្ហារវាងពលរដ្ឋ និងម្ចាស់បុរីនានា ដែលបានកំពុងកើតឡើងនាពេលសព្វថ្ងៃនេះ។សម្តេចធិបតី បានបញ្ជាក់ថា សម្តេចបានបញ្ជាឲ្យឯកឧត្តម សាយ សំអាល រដ្ឋមន្រ្តីក្រសួងរៀបចំ ដែនដី នគរូបនីយកម្ម និងសំណង់ ធ្វើការដោះស្រាយជូនដល់បងប្អូនប្រជាពលរដ្ឋ ដែលមានបញ្ហាជាមួយ ម្ចាស់បុរីនានាយ៉ាងយកចិត្តទុកដាក់បំផុត ប៉ុន្តែមិនបានធ្វើការផ្សព្វផ្សាយជាសាធារណៈនោះទេ។ ក្រៅពីឲ្យមានការដោះស្រាយចំពោះការវិវាទរបស់បងប្អូន និងម្ចាស់បុរី សម្តេចក៏បានធ្វើការជាមួយធនាគារជាតិ ដោយឲ្យតួអង្គនេះត្រូវចរចាជាមួយធនាគារនានាដើម្បីសម្រួលដល់ពលរដ្ឋដែលជួបប្រទះភាពជាប់គាំងផ្នែកសេដ្ឋកិច្ចផងដែរ។ការលើកឡើងរបស់សម្តេចធិបតីនាយករដ្ឋមន្រ្តីនេះ គឺបានធ្វើឡើងនៅក្នុងឱកាសអញ្ជើញសម្ពោធដាក់ឲ្យប្រើប្រាស់នូវកសិដ្ឋានចិញ្ចឹមគោយកទឹកដោះគិរីសួគ៌ របស់ក្រុមហ៊ុនខ្មែរហ្វ្រេសមីលឯ.ក ស្ថិតនៅស្រុកបាទី ខេត្តតាកែវ នាថ្ងៃ១១ ខែមេសា ឆ្នាំ២០២៤នេះ៕អត្ថបទ៖ បាន ចក់

បណ្ដាញសង្គម

ព័ត៌មានថ្មីៗ

ប្រជាពលរដ្ឋប្រមាណជាង ១ម៉ឺននាក់ ក្នុងខេត្តកំពង់ស្ពឺ ទទួលបានការពិនិត្យ និងព្យាបាលជំងឺដោយឥតគិតថ្លៃ ពីក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី

រយៈពេល ៣ឆ្នាំ វិទ្យាស្ថានពហុបច្ចេកទេសខេត្តកំពង់ចាម បណ្ដុះបណ្ដាលយុវជនជំនាញជាង ២ពាន់នាក់

ជនអន្តោប្រវេសន៍បន្តជាប់ខ្លួនលើដែនដី Ceuta របស់អេស្ប៉ាញ ខណៈប្រតិបត្តិការចាប់ផ្តើម ដើម្បីពង្រីកជម្រកបណ្តោះអាសន្ន

យុវជនសុទ្ធតែជាកម្មកររ៉ែ ៣៧នាក់ ដែលបានស្លាប់នៅក្នុងការឃុំឃាំងរបស់យោធានៅនីហ្សេរីយ៉ា

វិទ្យាស្ថានពហុបច្ចេកទេសខេត្តកោះកុង បណ្តុះបណ្តាលជំនាញដល់សិស្សជិត ៥ពាន់នាក់ ក្នុងរយៈពេល៣ឆ្នាំ

ក្រសួងការងារ ជំរុញការធ្វើអាជីវកម្មប្រកបដោយការទទួលខុសត្រូវ ដើម្បីពង្រឹងការប្រកួតប្រជែង និងការងារសមរម្យ

ប្រធានក្រុមការងារចុះមូលដ្ឋានស្រុករមាសហែក អញ្ជើញបិទសិក្ខាសាលាស្តីពី «ការពង្រឹងអភិបាលកិច្ចគណៈកម្មការគ្រប់គ្រងសហគមន៍ព្រៃឈើត្រពាំងពិការ» និងប្រកាសដាក់ឱ្យដំណើរការ «ភូមិមិត្តភាព» តំបន់កសិកម្មចម្រុះ និងសេវាកម្មទេសចរណ៍សហគមន៍ព្រៃឈើត្រពាំងពិការ

គណៈកម្មាធិការគណបក្សប្រជាជនកម្ពុជាខេត្តបាត់ដំបងបណ្ដុះបណ្ដាលជនបង្គោលលើការងារមហាជន

សម្តេច ម៉ែន សំអន៖ «ការដាំដើមឈើ និងការពារព្រៃឈើ ជាការជួយខ្លួនឯង ដែលអាចជួយទប់ទល់នឹងការប្រែប្រួលអាកាសធាតុ សុវត្ថិភាពពីគ្រោះធម្មជាតិ និងក្លាយជាក្តីសង្ឃឹមសម្រាប់កូនចៅជំនាន់ក្រោយ»

គ្រួសារដែលរងគ្រោះដោយការបាក់ស្រុតច្រាំងក្នុងស្រុកស្រីសន្ធរ បានទទួលអំណោយពីសម្ដេចធិបតី នាយករដ្ឋមន្រ្ដី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍