នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
​សម្តេចតេជោ ហ៊ុន សែន អនុញ្ញាតឱ្យឯកឧត្តម គីម ជីនផ្យូ (Kim Jin-pyo) អតីតប្រធានរដ្ឋសភា នៃសាធារណរដ្ឋកូរ៉េ ចូលជួបសម្ដែងការគួរសម
ទិវាសន្ដិភាពអន្ដរជាតិ| សម្ដេចធិបតី អំពាវនាវឱ្យថៃគោរពកិច្ចព្រមព្រៀងដែលបានឯកភាពគ្នាលើបញ្ហាព្រំដែន ខណៈកម្ពុជាប្រកាន់គោលការណ៍គ្រឹះគោរពអធិបតេយ្យដោះស្រាយបញ្ហាដោយសន្ដិវិធី
សម្ដេចតេជោ បង្ហាញចំណាប់អារម្មណ៍ទៅលើអត្ថបទរបស់អ្នកវិភាគថៃ ក្រោមចំណងជើងថា «ស្កប់ចិត្ត តែនៅមិនឈ្នះ!»
សម្ដេចតេជោលើកទឹកចិត្តឱ្យកម្ពុជា និងស៊ីបរកឱកាស និងយន្តការថ្មីៗជំរុញការវិនិយោគ និងពាណិជ្ជកម្មទ្វេភាគីឱ្យកាន់តែរីកចម្រើន

នយោបាយ​ និង ការអភិវឌ្ឍន៍

ចិន ប្រឆាំងការរំលោភលើសន្តិសុខជាតិរបស់អាមេរិក ខណៈបន្ថែមការរឹតបន្តឹងការនាំចេញបន្ទះឈីប

2024/04/01 06:36:10 pm        158
Facebook Telegram Linkin
ប្រទេសចិនបានប្រឆាំងយ៉ាងដាច់ខាត ចំពោះច្បាប់ដែលបានកែប្រែចុងក្រោយរបស់សហរដ្ឋអាមេរិក ដែលធ្វើឱ្យប្រទេសចិនជួបផលពិបាកកាន់តែខ្លាំងក្នុងការទទួលបានបន្ទះឈីប និងឧបករណ៍សម្រាប់ផលិតបន្ទះឈីបបញ្ញាសិប្បនិម្មិត ឬ (AI) របស់សហរដ្ឋអាមេរិក ដោយបញ្ជាក់ថា អាមេរិក នឹងរំខានដល់ទីផ្សារ បន្ទះឈីបពាក់កណ្ដាលចម្លងអន្តរជាតិ ក៏ដូចជាកិច្ចសហប្រតិបត្តិការក្នុងចំណោមសហគ្រាសនានា។ ការអត្ថាធិប្បាយ ដែលធ្វើឡើងដោយក្រសួងពាណិជ្ជកម្មរបស់ប្រទេសចិន (MOFCOM) កាលពីល្ងាចថ្ងៃអាទិត្យបានកត់សម្គាល់ថា ការពិនិត្យឡើងវិញចុងក្រោយបំផុតនៃការត្រួតពិនិត្យការនាំចេញ បន្ទះឈីបពាក់កណ្ដាលចម្លង បានកើតមានឡើងតិចជាង៥ខែ ចាប់តាំងពីសហរដ្ឋអាមេរិក បានដាក់ចេញច្បាប់នេះ។ ក្រុមអ្នកជំនាញចិន ក៏បានថ្កោលទោសទង្វើនេះថាជាការប៉ុនប៉ងមួយទៀតរបស់អាមេរិកក្នុងការបង្រ្កាបចិនក្នុងវិស័យបច្ចេកវិទ្យាដ៏រីកចម្រើនដោយឥតឈប់ឈរ ដោយបានលះបង់ផលប្រយោជន៍ក្រុមហ៊ុននានារបស់សហរដ្ឋអាមេរិក។ ច្បាប់ថ្មី កម្រាស់១៦៦ ទំព័រ នឹងចូលជាធរមាននៅថ្ងៃទី ៤ ខែមេសាឆ្នាំ២០២៤នេះ ហើយច្បាប់ទាំងនោះ បានបន្ថែមការរឹតបន្តឹងចំពោះកុំព្យូទ័រយួរដៃ ឬ laptops ដែលមានបន្ទះឈីប AI ទាំងនោះ។ សហរដ្ឋអាមេរិកបានរឹតបន្តឹងការនាំចេញបន្ថែមទៀតលើបន្ទះឈីបដែលទាក់ទងនឹង AI និងឧបករណ៍ពាក់កណ្ដាលចម្លង ទៅកាន់ប្រទេសចិនកាលពីខែតុលា ឆ្នាំ ២០២៣ ដោយព្យាយាមបញ្ឈប់ការដឹកជញ្ជូនបន្ទះឈីបបញ្ញាសិប្បនិម្មិត AI កម្រិតខ្ពស់បន្ថែមទៀត ដែលផលិតឡើងដោយ ក្រុមហ៊ុន អេន វីឌីយ៉ា (Nvidia) និងក្រុមហ៊ុនផ្សេងទៀត។ ទីភ្នាក់ងារព័ត៌មាន Reuters បានរាយការណ៍កាលពីថ្ងៃព្រហស្បតិ៍សប្ដាហ៍មុនថា សហរដ្ឋអាមេរិកក៏កំពុងរៀបចំបញ្ជីរោងចក្រផលិតបន្ទះឈីបទំនើបរបស់ចិនផងដែរ ដែលត្រូវបានរារាំងមិនឱ្យទទួលបានឧបករណ៍សំខាន់ៗពីសហរដ្ឋអាមេរិក។ ជាការឆ្លើយតប អ្នកនាំពាក្យក្រសួងការបរទេសចិន លោក លីន ជៀន (Lin Jian) កាលពីថ្ងៃសុក្រ សប្ដាហ៍មុន បានជំរុញឱ្យសហរដ្ឋអាមេរិក កែតម្រូវកំហុសរបស់ខ្លួនជាបន្ទាន់ និងបញ្ឈប់ការដាក់ទណ្ឌកម្មឯកតោភាគីខុសច្បាប់ និងយុត្តាធិការអាវុធវែងប្រឆាំងក្រុមហ៊ុនរបស់ប្រទេសចិន ៕

ហ្វីលីពីនពង្រឹងសន្តិសុខដែនសមុទ្រ ខណៈភាពតានតឹងជាមួយប្រទេសចិន កើនឡើងខ្លាំង

2024/04/01 06:32:27 pm        92
Facebook Telegram Linkin
លោកប្រធានាធិបតីហ្វីលីពីន ហ្វឺឌីណានម៉ាកូស ជូនៀរ(Ferdinand Marcos Jr) បានបញ្ជាឲ្យរដ្ឋាភិបាលពង្រឹងការសម្របសម្រួលលើសន្តិសុខដែនសមុទ្រដើម្បីទប់ទល់ការប្រឈមកាន់តែធ្ងន់ធ្ងរចំពោះ អធិបតេយ្យភាពដែនដី និងសន្តិភាព ខណៈជម្លោះជាមួយប្រទេសចិនរីកកាន់តែធំ។ បទបញ្ជាដែលត្រូវបានចុះហត្ថលេខាកាលពីថ្ងៃចន្ទ និងបានចេញផ្សាយជាសាធារណៈកាលពីថ្ងៃអាទិត្យ ពុំបាននិយាយឈ្មោះប្រទេសចិន ទេ ក្រោយការប្រឈមដែនសមុទ្រទ្វេភាគីជាបន្តបន្ទាប់ និងការចោទដាក់គ្នាទៅវិញទៅមក ជុំវិញតំបន់មានជម្លោះនៅក្នុងសមុទ្រចិនខាងត្បូង ។ ក្រសួងកិច្ចការបរទេសចិន ពុំបានឆ្លើយតបទៅនឹងសំណើសុំការអត្ថាធិប្បាយរបស់សារព័ត៌មាន Reuters កាលពីថ្ងៃអាទិត្យទេ។ ទីក្រុងប៉េកាំង បានអះអាងសិទ្ធិគ្រប់គ្រងស្ទើរទាំងស្រុងនៅសមុទ្រចិនខាងត្បូង ជាផ្លូវទឹកមួយសម្រាប់ផ្លូវពាណិជ្ជកម្មជាង៣ពាន់លានដុល្លារក្នុងមួយឆ្នាំ ។ ប្រទេសចិន អះអាងសិទ្ធិគ្រប់គ្រងត្រួតស៊ីគ្នា ជាមួយ ហ្វីលីពីន វៀតណាម ឥណ្ឌូនេស៊ី ម៉ាឡេស៊ី និងប្រ៊ុយណេ ។ ភាពតានតឹងចុងក្រោយបានកើតឡើងកាលពីចុងសប្ដាហ៍មុននៅពេលកងទ័ពចិន ប្រើកាណុងបាញ់ទឹក ដើម្បីបង្អាក់បេសកកម្មផ្គត់ផ្គង់ឡើងវិញរបស់ហ្វីលីពីន ទៅកាន់តំបន់ជម្លោះ Second Thomas Shoal សម្រាប់កងទ័ពរបស់ខ្លួន កំពុងយាមកាមនៅនាវាសល់ពីសម័យសង្រ្គាម ដែលតាំងមូលដ្ឋាននៅលើថ្មប៉ប្រះទឹករយៈពេល២៥ឆ្នាំមកហើយ៕

រយៈពេលបីខែមកនេះ រដ្ឋសភាកទទួលជោគជ័យធំធេងលើការងារវិស័យការទូតសភា នាំមកនូវផលប្រយោជន៍ជូនពលរដ្ឋ និងប្រទេសជាតិ

2024/04/01 06:18:44 pm        108
Facebook Telegram Linkin
រដ្ឋសភាបានបង្ហាញលទ្ធផលការងារនៅក្នុងរយៈពេល៣ខែចុងក្រោយនេះ គឺនៅ​ចន្លោះ​សម័យ​ប្រជុំ​រដ្ឋសភា​លើកទី១ និងសម័យប្រជុំរដ្ឋសភាលើកទី២ ដែលគិតពីថ្ងៃទីខែមករា​ដល់​ខែ​មេសា​ឆ្នាំ​២០២៤​ នៅក្នុងឱកាសបើកសម័យប្រជុំរដ្ឋសភាលើកទី២នីតិកាលទី៧ នាព្រឹកថ្ងៃទី១ខែមេសា ឆ្នាំ២០២៤នេះ។ក្នុងរយៈពេលបីខែមកនេះ រដ្ឋសភាបាន​សម្រេច​លទ្ធផលជាច្រើនក្នុងការបម្រើប្រទេសជាតិ និង​ប្រជា​ពលរដ្ឋ ស្របតាមមុខងារសំខាន់ៗរបស់ខ្លួនដែលបានកំណត់នៅក្នុងច្បាប់ មានដូចជា​មុខ​ងារ​នីតិកម្ម មុខងារតាមដានការអនុវត្តច្បាប់ និងមុខងារភាពជាតំណាងពលរដ្ឋ ព្រមទំាង​វិស័យ​ការ​ទូត​សភា និងការងារជាច្រើនទៀត។ រដ្ឋសភានីតិកាលទី៧ ក្រោមការដឹកនាំដោយសម្តេចរដ្ឋសភាធិបតី ឃួន សុដារី បាន​ផ្តោត​ការ​យក​ចិត្ត​ទុក​ដាក់​ពង្រឹង​ពង្រីក​វិស័យការទូតសភា ដើម្បីនាំ​មក​នូវ​ផលប្រយោជន៍​ជូនពលរដ្ឋ និង​ប្រទេស​​ជាតិ​នៅ​លើឆាកអន្តរជាតិ។ នៅក្នុងរយៈពេលបីខែមកន្លងមកនេះ សម្តេចរដ្ឋសភា ប្រធាន​រដ្ឋសភា បានទទួលជួបសវនាការ សម្តែងការគួរសម និង​ពិភាក្សា​ការងារ​ជាមួយ​ឯកអគ្គ​រាជទូត ឯកអគ្គរដ្ឋទូតប្រចាំកម្ពុជា ភ្ញៀវជាតិ-អន្តរជាតិ និងអង្គការនានាចំនួន១២លើក។ នៅគ្រប់ជំនួបពិភាក្សាការងារ សម្តេចរដ្ឋសភាធិបតី ប្រធានរដ្ឋសភា តែង​តម្កល់​ផល​ប្រយោជន៍​ប្រជាពលរដ្ឋ​ និង​ប្រទេសជាតិជាធំ ដោយបានប្រើប្រាស់យន្តការវិស័យការទូតសភានេះ សំដៅ​រឹត​ចំណង​ទំនាក់ទំនង មិត្តភាព និងសហប្រតិបត្តិការឱ្យកាន់តែសកម្ម ជាមួយ​សម​ភាគី​ទំាង​ស្ថាប័ន​នីតិប្ប​ញ្ញត្តិ និងនីតិប្រតិបត្តិ ក្នុងនោះការទាក់ទាញអ្នកវិនិយោគ អ្នកទេសចរ ការបណ្តុះ​បណ្តាល​ធន​ធាន​មនុស្ស ការពង្រឹងសមត្ថភាពមន្រ្តីរាជការ នៃអគ្គលេខាធិការដ្ឋានរដ្ឋសភា ការស្វែង​រក​ការ​គំាទ្រ​ដល់​ការធ្វើទំនើបកម្មរដ្ឋសភារបស់យើងទៅជាសភាឌីជីថល សំដៅលើក​កម្ពស់​ប្រសិទ្ធ​ភាព​ការងារ បម្រើប្រជាពលរដ្ឋឱ្យបានឆាប់រហ័ស និងមានប្រសិទ្ធភាពខ្ពស់។ កាលពីដើមខែមីនាឆ្នាំ២០២៤កន្លងមកនេះ សម្តេចរដ្ឋសភាធិបតី ឃួន សុដារី បានដឹ​ក​នាំ​គណៈ​ប្រតិភូ​ជាន់​ខ្ពស់ រដ្ឋសភាកម្ពុជាទៅបំពេញទស្សនកិច្ចនៅសាធារណរដ្ឋបារំាង និងបាន​ចូលរួម​កិច្ច​ប្រជុំ​កំពូល​ប្រធានរដ្ឋសភាស្រ្តី លើកទី១ ដែលរដ្ឋសភា​ប្រទេស​បារំាង​ធ្វើ​ជា​ម្ចាស់​ផ្ទះ និង​មាន​វត្ត​មាន​ប្រធាន​រដ្ឋសភាស្រ្តីចូលរួមចំនួន២៥ប្រទេស តបតាមការអញ្ជើញរបស់ លោកជំទាវ យ៉ាអ៊ែល ប្រូន-ពីវេ ប្រធានរដ្ឋសភាបារាំង។ ដំណើរទស្សនកិច្ចផ្លូវការនេះ សម្តេចរដ្ឋសភាធិបតី ប្រធានរដ្ឋសភា បានជួប​ពិភាក្សា​ការងារ​ជាមួយ​លោក​ជំទាវប្រធានរដ្ឋសភា និងជួបសន្ទនាជាមួយឯកឧត្តម អេម៉ានុយអែល ម៉ាក្រុង ប្រធានាធិបតីបារំាង នៃសាធារណរដ្ឋបារាំង ដើម្បីបន្តពង្រឹង ពង្រីក​បន្ថែម​ទៀត​នូវ​ទំនាក់​ទំនង​ដ៏​ល្អ​និង​ជាប្រវត្តិសាស្រ្តកម្ពុជា-បារំាងឱ្យកាន់តែរឹងមាំជិតស្និទ្ធថែមទៀត ជាពិសេស​បាន​ពង្រឹង​ពង្រី​កកិ​ច្ច​សហប្រតិបត្តិការរដ្ឋសភាប្រទេសទំាងពីរឱ្យកាន់តែសកម្ម និងគ្រប់ជ្រុងជ្រោយ ទំាងក្រប​ខណ្ឌ​ទ្វេភាគី និងពហុភាគី។ ក្រៅពីនេះ សម្តេចរដ្ឋសភាធិបតី ឃួន សុដារី បាន​ជួប​ពិភាក្សា​ការងារ​ផ្លូវ​ការ​និង​ជួប​សន្ទនា​ក្រៅ​ផ្លូវ​ការ​ជាមួយ​ថ្នាក់ដឹកនាំប្រតិភូចូលរួមកិច្ចប្រជុំ ដើម្បីពង្រឹង វិស័យការទូតសភា និងបង្កើន​កិច្ច​សហប្រតិបត្តិការជាមួយប្រទេសទំាងនោះឱ្យកាន់តែជិតស្និទ្ធ ក្នុងគោលបំណងស្វែង​រ​កផល​ប្រយោជន៍​ជូនប្រជាពលរដ្ឋ និងប្រទេសជាតិ លើកកម្ពស់វិស័យការទូតសភាជាមួយ ប្រទេស​និង​ដៃគូ​ជាមិត្តមកពីគ្រប់ទ្វីបក្នុងពិភពលោក។នៅក្នុងខែមីនា កន្លងទៅថ្មីៗនេះ រដ្ឋសភាក៏បានទទួលស្វាគមន៍ដំណើរទស្សនកិច្ចរបស់ ឯកឧត្តម វ៉ាន់មូហាម៉ាត់ណ មៈថា ប្រធានរដ្ឋសភា និងជាប្រធានសភាតំណាងរាស្ត្រ នៃព្រះរាជាណាចក្រថៃ ដែល​បានអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា ដើម្បី​ពង្រឹង​ពង្រីក​ចំណង​មិត្ត​ភាព​ និងកិច្ចសហប្រតិបត្តិការរវាងស្ថាប័ននីតិប្បញ្ញត្តិនៃប្រទេសទាំងពីរ ផងដែរ។“ក្នុងរយៈពេលនេះដែរ រដ្ឋសភានីតិកាលទី៧ បានបំពេញការងារការបរទេសយ៉ាងសកម្ម ទាំងក្នុង​ក្រប​ខណ្ឌ​ទ្វេភាគីនិងពហុភាគី សំដៅពង្រឹង ពង្រីក និងលើកកម្ពស់វិស័យការទូតសភា។ ការងារការ​ទូត​សភានេះជាកិច្ចការការបរទេសរបស់សភាមួយដ៏សំខាន់ ដែលបានរួម​ចំណែក​ដល់​ការ​ពង្រឹង ពង្រីក និងលើកកម្ពស់ទំនាក់ទំនង ចំណងមិត្តភាព និងសហប្រតិបត្តិជាមួយសភា និង​រដ្ឋាភិបាល​នៃប្រទេសនានា ដៃគូអភិវឌ្ឍន៍ និងអង្គទូតបរទេសនានា ព្រមទាំងពង្រីក និង​លើក​កម្ពស់​តួនាទី​សភាកម្ពុជាក្នុងវេទិកាអន្តរសភានានា និងលើកកម្ពស់យន្តការពហុភាគី មាន​លក្ខណៈ​បើក​ចំហរ និងបរិយាប័ន្ន និងគោរពនូវសណ្តាប់ធ្នាប់អន្តរជាតិ ដោយផ្អែកលើច្បាប់ ដើម្បី​ធានា​ការពារសុខសន្តិភាព ស្ថិរភាព វិបុលភាព និងការអភិវឌ្ឍប្រកបដោយចីរភាព “ នេះជា​ការ​បញ្ជាក់​រប​ស់រដ្ឋសភាកម្ពុជា៕

សម្តេចតេជោ ហ៊ុន សែន ប្រកាសអរគុណគ្រប់យ៉ាងដល់សមាជិករដ្ឋសភាទាំងអស់ ដែលបានគាំទ្រសម្តេច ក្នុងរយៈពេល៤៥ឆ្នាំកន្លងមក

2024/04/01 06:04:00 pm        223
Facebook Telegram Linkin
សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តីនៃកម្ពុជា បាន​ប្រកាស​ថ្លែង​អំណរ​គុណ​គ្រប់​យ៉ាងដល់សមាជិក-សមាជិកា នៃរដ្ឋសភាទាំងអស់ ដែល​បាន​គាំទ្រ​ដល់​សម្តេច​ក្នុង​រយៈពេល ៤៥ឆ្នាំកន្លងមកនេះ នៅក្នុងរដ្ឋសភា ពោលគឺចាប់​តាំង​ពី​ឆ្នាំ១៩៨១​ដល់​ឆ្នាំ​២០២៤។ថ្លែងនៅក្នុងសម័យប្រជុំរដ្ឋសភាលើកទី២ នីតិកាលទី៧ ដែលជាថ្ងៃចុងក្រោយនៃការបំពេញភារ កិច្ច​នៅ​ក្នុងរដ្ឋសភានៃព្រះរាជាណាចក្រកម្ពុជា នាថ្ងៃទី១ ខែមេសា ឆ្នាំ២០២៤នេះ សម្តេចតេជោ ហ៊ុន សែន បានលើកឡើងថាសម្តេចបានអង្គុយធ្វើការនៅក្នុងរដ្ឋសភាជិតកន្លះសតវត្សន៍ ដោយ​ដំណាក់​កាល​ទី១ គឺឆ្នាំ១៩៨១ដល់ឆ្នាំ១៩៩៣ និងដំណាក់កាលទី២គឺចាប់ពីឆ្នាំ១៩៩៣ដល់ឆ្នាំ ២០២៤នេះ ខណៈរយៈពេលកន្លងមកនេះគឺសម្តេចបានទទួលការគាំទ្រគ្រប់យ៉ាងពីសមាជិក-សមាជិកា​រដ្ឋសភា ទាំងអស់មិនថាកាលៈទេសៈណានោះឡើយ។សម្តេចតេជោ ហ៊ុន សែន អតីតនាយករដ្ឋមន្រ្តីបានបញ្ជាក់បន្ថែមទៀត ក្នុងរយៈពេល៤៥ឆ្នាំនៃការ អង្គុយ​ធ្វើការនៅក្នុងរដ្ឋសភាដោយក្នុងនោះមានតួនាទីជានាយករដ្ឋមន្រ្តីចំនួន៣៨ឆ្នាំ បើទោះ​បីជា​ក្នុង​រយៈពេលកាលមកនេះបានជួបដំណើរការរអាក់រអួលនៅក្នុងរដ្ឋសភាក៏ដោយ ក៏នាំ​គ្នា​ស្វះ​ស្វែង​រក​ដំណោះ​ស្រាយបាន។ ជាក់ស្តែងដូច​ការជាប់​គាំង​ដោយ​បង្កើត​រាជ​រដ្ឋាភិបាល​មិន​បាន​ទាន់​ពេល​វេលា ​ដូចនៅចុងឆ្នាំ១៩៩៨ ដោយពេលនោះបានបង្កើតរាជរដ្ឋាភិបាលយឺតពេល ដោយសារ​តែ​មាន​ការ​ជាប់​គាំង​ប្រព័ន្ធ​២ភាគ៣ និងឆ្នាំ២០០៣និង២០០៤ ដោយបានគាំងជិតមួយឆ្នាំ ប៉ុន្តែ​ទោះ​បី​ជា​យ៉ាងណាក៏ដោយបានរក ដំណោះ​ស្រាយ​មួយ​បាន​រក​ឃើញ​ដោយ​បញ្ចប់​ភាព​ជាប់​គាំង​តាមរយៈ​ការ​ធ្វើវិសោធនកម្មរដ្ឋធម្មនុញ្ញ ពី២ភាគ៣មក៥០បូក១។ កត្តា​ទាំង​នេះ​ហើយ​ដែល​សម្តេច​ពិត​ជា​អរគុណយ៉ាងខ្លាំងចំពោះសមាជិកទំាង អស់នៃព្រះរាជាណាចក្រកម្ពុជានោះ។មុននឹងចូលរួមកិច្ចប្រជុំរដ្ឋសភាលើកទី២ នីតិកាលទី៧ សម្តេចតេជោ ហ៊ុន សែន ក៏បានសរសេរ សំណេរ​មួយ​មុននឹងលាលែងពីរដ្ឋសភាទៅកាន់តំណែងជាប្រធានព្រឹទ្ធសភាផងដែរ ដោយ​ក្នុង​សំណេរនោះសម្តេចតេជោ បានលើកឡើងថា «លាហើយរដ្ឋសភា ដែល​ខ្ញុំ​អង្គុយ​និង​ធ្វើការ​ជាង​ពាក់​កណ្តាល​ជីវិត ដំណាក់កាលទី១ខែមិថុនា ១៩៨១ ដល់ខែឧសភា ឆ្នាំ១៩៩៣ ហើយ​និង​ចាប់​ពី​ថ្ងៃ​១៤មិថុនា ឆ្នាំ១៩៩៣ ដល់ថ្ងៃទី២មេសា ឆ្នាំ២០២៤»៕ អត្ថបទ៖ បាន ចក់

ព្រះមហាក្សត្រ៖ សម្តេចរដ្ឋសភាធិបតី ឃួន សុដារី ស្រ្តីឆ្នើម មានស្មារតីមោះមុត ដឹកនាំស្ថាប័នរដ្ឋសភា គិតគូរឧត្តមប្រយោជន៍ជាតិជាធំ

2024/04/01 05:02:08 pm        217
Facebook Telegram Linkin
រដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី១ ខែមេសា ឆ្នាំ២០២៤ បាន​បើកស​ម័យ​ប្រជុំ​រដ្ឋសភា លើកទី២ នីតិកាលទី៧ ក្រោមអធិបតីភាពដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ដោយមានរបៀបវារៈចំនួនពីរ៖ ទី១- ព្រះរាជសារ ព្រះករុណា​ព្រះបាទ​សម្តេចព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា ជូនសម័យប្រជុំរដ្ឋសភាលើកទី២ នីតិកាលទី៧ និង ទី២-របាយការណ៍លទ្ធផលការងារ​រដ្ឋសភា​ចន្លោះសម័យ​ប្រជុំរដ្ឋសភាលើកទី១ និងលើកទី២ ពីថ្ងៃទី១ ខែមករា ដល់ថ្ងៃទី៣១ មីនា ឆ្នាំ២០២៤។ក្នុងព្រះរាជសារ ផ្ញើជូនសម័យប្រជុំរដ្ឋសភា ព្រះករុណា ព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានសម្តែង​ព្រះរាជ​ហឫទ័យ​សោមនស្ស​រីករាយ​ក្រៃលែង ដោយបានគូសបញ្ជាក់ថា សម្តេចមហារដ្ឋសភាធិការធិបតី ប្រធានរដ្ឋសភា ជា​ស្ត្រី​ឆ្នើម មានស្មារតីមោះមុត ដឹកនាំស្ថាប័នរដ្ឋសភា ក្នុងការបំពេញមុខងារស្នូលទាំងបី រួមមាន ការងារនីតិកម្ម ការងារតាមដានការអនុវត្តច្បាប់និងគោលនយោបាយ និងមុខងារជាតំណាង ប្រកប​ដោយស្មារតីទទួលខុសត្រូវខ្ពស់ និងគិតគូរដល់ឧត្តមប្រយោជន៍ជាតិជាធំ។ ព្រះករុណា​ជាអម្ចាស់បានវាយតម្លៃខ្ពស់ចំពោះសមាជិក សមាជិការដ្ឋសភាទាំ​ង​អស់​នៃ​នីតិកាល​ទី៧ ជាឥស្សរជនឆ្នើមដែលមានស្នាដៃ និងបទពិសោធន៍ល្អៗយ៉ាងសម្បូរបែប ក្នុង​ការ​ដឹកនាំ​ព្រះរាជា​ណាចក្រកម្ពុជានៃយើងឆ្ពោះទៅរកវឌ្ឍនភាព វិបុលភាព និងសុខដុមរមនា។អង្គព្រះមហាក្សត្រ បានមានព្រះរាជបន្ទូលបន្តថា រដ្ឋសភានីតិកាលទី៧ ត្រូវបាន​ប្រសូត​ឡើង​ចេញ​ពី​ការបោះឆ្នោតប្រកបដោយសេរី យុត្តិធម៌ ត្រឹមត្រូវ និងតម្លាភាព ស្របតាម​គោលការណ៍​លទ្ធិ​ប្រជាធិបតេយ្យ សេរីពហុបក្ស ដែលមានគណបក្សចំនួន១៨ បានចូលរួមប្រកួតប្រជែង និង​មាន​គណបក្សចំនួន២ ទទួលបានអាសនៈក្នុងរដ្ឋសភា គឺគណបក្សប្រជាជនកម្ពុជាទទួលបាន ១២០​ អាសនៈ និងគណបក្សហ្វុនស៊ិនប៉ិចទទួលបាន ៥ អាសនៈ ដោយបង្កើត​បាន​រដ្ឋសភា​នីតិកាលទី៧ (២០២៣-២០២៨) ដឹកនាំដោយសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ជាស្រ្តីទី១ ក្នុងប្រវត្តិសាស្រ្តកម្ពុជាដែលទទួលបានដំណែងដ៏ឧត្តុង្គឧត្តមនេះ។  ក្នុងព្រះរាជសារផ្ញើជូនរដ្ឋសភាក្នុងឱកាសបើកសម័យប្រជុំរដ្ឋសភាលើកទី២នីតិកាលទី៧នេះ ព្រះករុណា ព្រះបាទសម្តេចព្រះបរមនាថនរោត្តម សីហមុនី​ព្រះមហាក្សត្រ​នៃ​ព្រះរាជាណា​ចក្រ​កម្ពុជា​ ក៏បានកោតសរសើរ ដល់ការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីដែរ។ ព្រះករុណា ព្រះមហាក្សត្រនៃព្រះរាជាណាចក្រកម្ពុជា បានមានព្រះរាជអង្គការថា សម្តេច​មហាបវរ​ធិបតី ហ៊ុន ម៉ាណែតជាថ្នាក់ដឹកនាំវ័យក្មេង ប្រកបដោយថាមវន្ត វាងវៃ និងមោះមុត បន្តវេនពី សម្តេចអគ្គមហាសេនាបតីតេជោ ហ៊ុន សែន ដែលបាន​ដឹក​នាំ​ប្រទេស​ទទួល​បាន​នូវ​សុខ​សន្តិភាព ស្ថិរភាពនយោបាយ ការអភិវឌ្ឍលើគ្រប់វិស័យ និងមាន​កិត្យានុភាព​ខ្ពស់​លើ​ឆាក​អន្តរជាតិ​។ ព្រះរាជសារជូនរដ្ឋសភាបានបន្តថា រាជរដ្ឋាភិបាលនីតិកាលទី៧ ដែលមានថ្នាក់​ដឹកនាំជា​យុវជន​វ័យ​ក្មេង​ ប្រកបដោយចំណេះដឹង ឆន្ទៈមោះមុតនិងការប្តេជ្ញាចិត្តខ្ពស់ បានខិតខំប្រឹង​ប្រែង​យក​អស់​កម្លាំង​កាយចិត្តអនុវត្តយុទ្ធសាស្រ្តបញ្ចកោណ ដំណាក់កាលទី១ និងគោល​នយោបាយ​សំខាន់​ៗ​ ជាពិសេសគោលនយោបាយជាតិផលិតភាពសេដ្ឋកិច្ចកម្ពុជា និងក្រប​ខណ្ឌ​គោល​នយោបាយ​សេដ្ឋកិច្ច និងសង្គមឌីជីថលកម្ពុជា ដើម្បីលើកកម្ពស់សេដ្ឋកិច្ចជាតិ និង​ការ​អភិវឌ្ឍ​ប្រកប​ដោយ​ចីរភាព។សូមជម្រាបថា ព្រះរាជសារ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជូនសម័យប្រជុំរដ្ឋសភាលើកទី២ នីតិកាលទី៧ ត្រូវ​បានអានជូនអង្គរដ្ឋសភា ដោយសម្តេចរដ្ឋសភាធិបតី ឃួន សុដារី ។ ចំណែក របាយការណ៍លទ្ធផលការងាររដ្ឋសភាចន្លោះសម័យប្រជុំរដ្ឋសភាលើកទី១ និងលើកទី២ ត្រូវបាន​អាន​ជូន​អង្គរដ្ឋសភា ដោយ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា៕

សំណេរសម្ដេចតេជោ ក្នុងបញ្ជីវត្តមានតំណាងរាស្ត្រ ថ្ងៃទី១មេសា ២០២៤!

2024/04/01 04:26:21 pm        251
Facebook Telegram Linkin
ក្នុងបញ្ជីវត្តមានតំណាងរាស្រ្ត ក្នុងសម័យប្រជុំលើកទី២ នីតិកាលទី៧នៃរដ្ឋសភា នាថ្ងៃទី១ ខែមេសា ឆ្នាំ២០២៤នេះ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាតំណាងរាស្រ្តមណ្ឌលខេត្តកណ្តាល បានសរសេរថា «លាហើយរដ្ឋសភា ដែលខ្ញុំអង្គុយ និងធ្វើការជាងពាក់កណ្តាលជីវិត ដំណាក់កាលទី១ ខែមិថុនា ១៩៨១ ដល់ខែឧសភា ឆ្នាំ១៩៩៣ ហើយនិងចាប់ពីថ្ងៃ១៤មិថុនា ឆ្នាំ១៩៩៣ ដល់ថ្ងៃទី២មេសា ឆ្នាំ២០២៤»៕

ក្រុមស្ត្រីហ្វីលីពីន ថ្កោលទោសសមយុទ្ធយោធារួមគ្នារវាងហ្វីលីពីន និងសហរដ្ឋអាមេរិក

2024/04/01 04:26:05 pm        171
Facebook Telegram Linkin
ស្ត្រីមកពីក្រុមស្ត្រីជឿនលឿន ហ្គាប្រ៊ីឡា (GABRIELA) នៅក្នុងប្រទេសហ្វីលីពីន កាលពីថ្ងៃអាទិត្យបានថ្កោលទោសយ៉ាងខ្លាំងចំពោះសមយុទ្ធយោធារួមប្រចាំឆ្នាំរវាងហ្វីលីពីន និងសហរដ្ឋអាមេរិក ដែលបានគ្រោងទុកនៅខែក្រោយ។ អគ្គលេខាធិការក្រុម GABRIELA លោកស្រី ក្លារីច ផាល់ស៍(Clarice Palce) បានទាមទារឱ្យមានការបណ្តេញកងទ័ពអាមេរិកទាំងអស់ចេញពីប្រទេសហ្វីលីពីន និងការបញ្ចប់ជាបន្ទាន់នូវកិច្ចព្រមព្រៀងយោធា ដូចជាកិច្ចព្រមព្រៀងកងកម្លាំងបំពេញទស្សនកិច្ច និងកិច្ចព្រមព្រៀងសហប្រតិបត្តិការការពារជាតិ (EDCA) ជាមួយសហរដ្ឋអាមេរិក ជាដើម។ លោកស្រី បានព្រមានថា មូលដ្ឋានរបស់សហរដ្ឋអាមេរិក និងគេហទំព័រ EDCA បានគំរាមកំហែងយ៉ាងធ្ងន់ធ្ងរដល់សុវត្ថិភាព សុខុមាលភាព និងសិទ្ធិរបស់ប្រជាជនហ្វីលីពីន ជាពិសេសស្ត្រី និងកុមារ ។ លោកស្រី បានបន្ថែមថា ការបង្កើនសកម្មភាពយោធា និងវត្តមានរបស់ទាហានបរទេសនៅក្នុងប្រទេសហ្វីលីពីន បាននាំឱ្យមានការរីកសាយភាយនៃសកម្មភាពពេស្យាចារយោធា ។ ទាហានរបស់សហរដ្ឋអាមេរិក យ៉ាងហោចណាស់ ១១,០០០នាក់ និងទាហានហ្វីលីពីន៥,០០០នាក់ ត្រូវបានគេរំពឹងថានឹងចូលរួមក្នុងសមយុទ្ធ មានឈ្មោះថា បាលីកាតាន (Balikatan) នៅឆ្នាំនេះ ដែលនឹងចាប់ផ្តើមនៅថ្ងៃទី ២២ ខែមេសា និងដំណើរការរហូតដល់ថ្ងៃទី ៨ខែឧសភា។ លោកស្រី បានសង្កត់ធ្ងន់ថា សមយុទ្ធ Balikatan ពុំបានយកចិត្តទុកដាក់ចំពោះអធិបតេយ្យភាពជាតិរបស់ប្រទេសហ្វីលីពីនទេ ដោយការបំប្លែងប្រទេសឱ្យទៅជាមូលដ្ឋានទ័ពអាមេរិកដ៏ធំសម្បើម ជាមួយនឹងចលនាទាហានអាមេរិកដែលមិនមានការរឹតបន្តឹង៕

លោក Putin ចុះហត្ថលេខាលើក្រឹត្យស្តីពីការកេណ្ឌកម្លាំងយោធានៅនិទាឃរដូវ

2024/04/01 04:22:18 pm        134
Facebook Telegram Linkin
ឯកសារមួយដែលបានបង្ហោះនៅលើគេហទំព័ររបស់វិមានក្រឹមឡាំងកាលពីថ្ងៃអាទិត្យ បានបង្ហាញថា លោកប្រធានាធិបតីរុស្ស៊ី Vladimir Putin បានចុះហត្ថលេខាលើក្រឹត្យមួយ ដែលកំណត់ចេញយុទ្ធនាការកេណ្ឌកម្លាំងទ័ពនៅវនិទាឃរដូវ ដោយហៅពលរដ្ឋចំនួន ១៥០,០០០នាក់ សម្រាប់ការបម្រើយោធាតាមច្បាប់។ បុរសទាំងអស់នៅក្នុងប្រទេសរុស្ស៊ី ត្រូវបំពេញកាតព្វកិច្ចយោធារយៈពេលមួយឆ្នាំ ឬការបណ្តុះបណ្តាល ក្នុងអំឡុងពេលសិក្សាថ្នាក់ឧត្តមសិក្សាចាប់ពីអាយុ ១៨ ឆ្នាំឡើងទៅ។ កាលពីខែកក្កដា សភាជាន់ទាបរបស់រុស្ស៊ីបានបោះឆ្នោត ដើម្បីដំឡើងអាយុអតិបរមាដែលបុរសអាចជាប់ឈ្មោះចូលបម្រើកងទ័ពពីអាយុ ២៧ ដល់៣០ឆ្នាំ។ ច្បាប់ថ្មីនេះ បានចូលជាធរមានកាលពីថ្ងៃទី១ ខែមករា ឆ្នាំ ២០២៤។ ការបំពេញកាតព្វកិច្ចយោធាគឺជាបញ្ហាដ៏រសើបក្នុងប្រទេសរុស្ស៊ីជាយូរមកហើយ ដែលបុរសជាច្រើនមានរយៈពេលយូរ ដើម្បីជៀសវាងការប្រគល់ឯកសារចុះឈ្មោះចូលបម្រើការងារក្នុងអំឡុងពេលហៅចូលពីរដងក្នុងមួយឆ្នាំ។ ការកេណ្ឌកម្លាំងទ័ព មិនអាចត្រូវបានដាក់ពង្រាយស្របច្បាប់ដើម្បីប្រយុទ្ធនៅក្រៅប្រទេសរុស្ស៊ី ទេ ហើយត្រូវបានលើកលែងពីការចល័តមានកំណត់ក្នុងឆ្នាំ ២០២២ ដែលបានប្រមូលផ្តុំបុរសយ៉ាងហោចណាស់៣០០.០០០ នាក់ ដែលត្រូវបានហ្វឹកហ្វឺនយោធាពីមុន ដើម្បីប្រយុទ្ធនៅអ៊ុយក្រែន ទោះបីជាទាហានមួយចំនួនត្រូវបានបញ្ជូនទៅជួរមុខដោយកំហុសក៏ដោយ។កាលពីខែកញ្ញា លោក Putin បានចុះហត្ថលេខាលើបទបញ្ជាហៅមនុស្សចំនួន ១៣ ម៉ឺននាក់សម្រាប់យុទ្ធនាការរដូវស្លឹកឈើជ្រុះ ហើយកាលពីរដូវស្លឹកឈើជ្រុះឆ្នាំមុន រុស្ស៊ីគ្រោងកេណ្ឌទាហាន ១៤៧.០០០នាក់៕

បក្សប្រឆាំងរបស់ទួរគី ទទួលបានជ័យជំនះជាប្រវត្តិសាស្ត្រក្នុងការបោះឆ្នោតមូលដ្ឋាន

2024/04/01 04:18:47 pm        193
Facebook Telegram Linkin
គណបក្សប្រឆាំងដ៏សំខាន់របស់ប្រទេសទួរគី បានដណ្តើមបានជ័យជម្នះក្នុងការបោះឆ្នោតដ៏ធំនៅក្នុងទីក្រុងសំខាន់ៗគឺទីក្រុងអ៊ីស្តង់ប៊ុល និងរដ្ឋធានីអង់ការ៉ា។ លទ្ធផលនេះគឺជាការវាយប្រហារដ៏សំខាន់មួយសម្រាប់លោកប្រធានាធិបតី ថាយីប អឺដូហ្កាន់ (Tayyip Erdogan) ដែលសង្ឃឹមថានឹងអាចគ្រប់គ្រងទីក្រុងទាំងនោះឡើងវិញ តិចជាងមួយឆ្នាំបន្ទាប់ពីលោកទទួលបានអាណត្តិទីបីជាប្រធានាធិបតី។បេក្ខជនបក្សប្រឆាំង លោក អេក្រែម អ៊ីម៉ាម៉ូកឡូ (Ekrem Imamoglu) ដែលបានឈ្នះលើកដំបូងនៅអ៊ីស្តង់ប៊ុល ក្នុងឆ្នាំ ២០១៩ បានទទួលជ័យជម្នះជាលើកទីពីរសម្រាប់ក្រុមប្រឆាំងច្បាប់ផ្លូវលោកនៃគណបក្ស CHP ។ យោងតាមចំនួន ៧៩,៧៧ ភាគរយនៃសន្លឹកឆ្នោតដែលបានរាប់នៅទីក្រុងអ៊ីស្តង់ប៊ុល ដែលជាទីក្រុងធំបំផុតរបស់អឺរ៉ុប មានប្រជាជនច្រើនជាង ១៦ លាននាក់ បង្ហាញថាលោ អ៊ីម៉ាម៉ូកឡូ មានការគាំទ្រ ៥០,៥៣ ភាគរយបើធៀបនឹងចំនួន ៤០,៧៣ ភាគរយសម្រាប់គូប្រជែងបក្ស AKP លោក មូរ៉ាត់ គូរ៉ុម (Murat Kurum) ដែលជាអតីតរដ្ឋមន្ត្រីក្នុងរដ្ឋាភិបាលជាតិរបស់លោក អឺដូហ្កាន់។នេះក៏ជាលើកទីមួយដែរ ចាប់តាំងពីលោក អឺដូហ្កាន់ ឡើងកាន់អំណាចកាលពី ២១ ឆ្នាំមុនមក ដែលគណបក្សរបស់លោកត្រូវបានចាញ់នៅទូទាំងប្រទេសក្នុងការបោះឆ្នោតបែបនេះ។ នៅរដ្ឋធានីអង់ការ៉ា រហូតមកដល់ពេលនេះ អភិបាលក្រុងបក្សប្រឆាំងលោក ម៉ានសួរ យ៉ាវ៉ាស (Mansur Yavas) នាំមុខគូប្រជែងរបស់ខ្លួនក្នុងការគាំទ្រចំនួន ៥៩ ភាគរយ ដែលនាំឱ្យលោកប្រកាសថាខ្លួនបានទទួលជ័យជម្នះនៅពេលដែលសន្លឹកឆ្នោតតិចជាងពាក់កណ្តាលត្រូវបានរាប់។គួរឱ្យកត់សម្គាល់នោះគឺគណបក្សប្រឆាំង CHP ក៏ស្ថិតក្នុងដំណើរឆ្ពោះទៅរកការឈ្នះនៅក្នុងទីក្រុងធំៗជាច្រើនទៀតរបស់ប្រទេសទួរគី រួមមានទីក្រុង អ៊ីស្មៀ (Izmir) ទីក្រុង បួរសា (Bursa) ទីក្រុង អង់ដាណា (Adana) និងទីក្រុងរមណីយដ្ឋាន អង់ថាល់យ៉ា (Antalya)៕

ស្ពានអាកាស «មរតកតេជោ» បានបើកឱ្យប្រើប្រាស់ជាបណ្តោះអាសន្ន ចាប់ពីថ្ងៃនេះតទៅ

2024/04/01 02:55:21 pm        248
Facebook Telegram Linkin
តបតាមការផ្តល់ការអនុញ្ញាតដ៏ខ្ពង់ខ្ពស់ របស់រាជរដ្ឋាភិបាលកម្ពុជា រដ្ឋបាលរាជធានីភ្នំពេញ បាន​សម្រេច​បើក​ឱ្យដំណើរការប្រើប្រាស់បណ្តោះអាសន្ន ស្ពានអាកាស «មរតកតេជោ» ចាប់​ពី​ថ្ងៃ​ទី០១ ខែមេសា ឆ្នាំ២០២៤នេះតទៅ ដើម្បីសម្រួលដល់លំហូរចរាចរណ៍ និងជួយ​រំដោះ​លើ​បញ្ហា​កក​ស្ទះ ​មុនឱកាសបុណ្យចូលឆ្នាំប្រពៃណីជាតិខ្មែរចូលមកដល់ ។ ការដាក់ឱ្យប្រើប្រាស់បណ្តោះអាសន្ននេះ គឺ ស្ពានអាកាសជាន់ទី២ ដែលជាដំណាក់កាលទី១ ទើប​​ត្រូវ​បានបញ្ចប់ការសាងសង់ ។ ស្ពានជាន់ទី២នេះ មាន​តម្រាយ​ផ្លូវ​តភ្ជាប់​ពី​មហា​វិថី​សម្តេច​តេជោ (ផ្លូវ៦០ម៉ែត្រ) ស្ថិតក្នុងខណ្ឌមានជ័យ ភ្ជាប់ទៅកាន់មហាវិថី ព្រះមុន្នីវង្ស ស្ថិត​ក្នុង​ខណ្ឌ​ចំការមន។ ប្រជាពលរដ្ឋអ្នកដំណើរបានបង្ហាញភាពរីករាយពេលបានប្រើប្រាស់សម្មទ្ធិផលថ្មីខាងលើនេះ ដោយ​ស្ពាន​នេះបានជួយ​សម្រួល​ដល់​ការ​ធ្វើ​ដំណើរ​ទៅ​មក​របស់​ពួក​គាត់​បាន​លឿន​រហ័ស​មិន​ចំណា​យ​ពេល និងអាចបញ្ច្រៀសបានពីការកកស្ទះ ដែលតែងបានរំខាន និងប៉ះ​ពាល់​ដល់​ពេល​វេលា​ធ្វើ​ដំណើរ​របស់ពលរដ្ឋ ។ ប្រជាអ្នកដំណើរ បានថ្លែងអំណរគុណរាជរដ្ឋាភិបាល ចំពោះការបន្ត​គិត​គូរ​យក​ចិត្តទុ​ក​ដាក់​ក្នុង​ការ​កសាង​សមិទ្ធផលថ្មីៗជាបន្តបន្ទាប់ជូនប្រជាពលរដ្ឋប្រើប្រាស់ ពិសេស​ស្ពាន​អាកាស​មរតក​តេជោ ដែល​បាន​ដាក់​ឱ្យពលរដ្ឋគ្រប់រូបអាចប្រើប្រាស់ មុនពីធីបុណ្យចូលឆ្នាំប្រពៃណីជាតិខ្មែរ។ សូមបញ្ជាក់ថា ស្ពានអាកាស “មរតកតេជោ” ខាងលើនេះ មានកម្ពស់ពីរជាន់ ស្ថិត​នៅ​ចំណុច​ប្រសព្វ​រវាង​មហាវិថី សម្តេចតេជោ ហ៊ុន សែន, មហាវិថីព្រះមុនីវង្ស និង មហាវិថីកង​យោធពល​ខេមរ​ភូមិន្ទ។ បច្ចុប្បន្នដំណាក់កាលទី១បានបញ្ចប់ហើយ នឹងកំពុងដាក់​ឱ្យ​ដំណើរ​ការ​ប្រើប្រាស់​បណ្តោះ​អាសន្ន​ក្នុងថ្ងៃនេះតែម្តង ខណះការសាងសង់ដំណាក់កាលទី២ គឺនឹងត្រូវបញ្ចប់​នៅ​មុន​ខែ​មេសា ឆ្នាំ២០២៥ខាងមុខឯណោះ ។ គួររំលឹកថា ស្ពានអាកាស “មរតកតេជោ” គឺបានដំណើរការបើកការដ្ឋានសាងសង់កាលពីថ្ងៃទី៣១ ខែសីហា ឆ្នាំ២០២២កន្លងទៅ ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតី តេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា ។ ស្ពាននេះ​ទទួ​ល​ការ​សាង​សង់​ដោយ​ក្រុមហ៊ុនវិនិយោគទុនអាណិកជនកម្ពុជា ( OCIC ) ដោយគ្រោងចំណាយ​ថវិការ​សាង​សង់​ជាង ៣៦លានដុល្លារអាមេរិក៕ អត្ថបទ៖ លីហេង

បណ្ដាញសង្គម

ព័ត៌មានថ្មីៗ

ពិធីបើកការដ្ឋានសាងសង់ទីតាំងថ្មីរួមគ្នានៃសាលាអន្តរជាតិជប៉ុនភ្នំពេញ (JISPP) និងសាលាជប៉ុនភ្នំពេញ (JSPP) នៅខណ្ឌមានជ័យ
09/22/2026 08:09 PM
Facebook Telegram Linkin
ក្រសួងការងារ ជំរុញការវិនិយោគលើជំនាញស្ត្រី និងបរិយាកាសការងារប្រកបដោយសុវត្ថិភាព
09/22/2026 08:09 PM
Facebook Telegram Linkin
រដ្ឋាភិបាលជំរុញគោលនយោបាយសុវត្ថិភាពចរាចរណ៍តាមរោងចក្រ ការពារជីវិតកម្មករ និងកាត់បន្ថយគ្រោះថ្នាក់ចរាចរណ៍
09/22/2026 07:09 PM
Facebook Telegram Linkin
ឧត្តមសេនីយ៍ទោ ប៊ុន សុសិក្ខា៖វត្តុតាងមួយចំនួនធំ ត្រូវបានដកហូតក្នុងប្រតិបត្តិការបង្ក្រាប Online Scams រយៈពេល១ឆ្នាំមកនេះ
09/22/2026 07:09 PM
Facebook Telegram Linkin
វៀតណាមវាយតម្លៃខ្ពស់ចំពោះកិច្ចខិតខំប្រឹងប្រែង និងលទ្ធផលនៃការបង្ក្រាបបទល្មើស Online Scams នៅកម្ពុជា
09/22/2026 07:09 PM
Facebook Telegram Linkin
លោក Trump នឹងមាន​កិច្ចប្រជុំដ៏មមាញឹកនៅ UN ដោយរបៀបវារៈ គឺ​សង្គ្រាម នៅអ៊ីរ៉ង់ និងអ៊ុយក្រែន
09/22/2026 07:09 PM
Facebook Telegram Linkin
កងទ័ពអ៊ីស្រាអែលប្រែក្លាយភូមិរបស់ខ្មាន់កាំភ្លើងប៉ាឡេស្ទីននៅតំបន់វ៉េសប៊ែងទៅជាបន្ទាយទាហាន
09/22/2026 06:09 PM
Facebook Telegram Linkin
អ៊ីរ៉ង់គ្រោងលក់នាវាអាមេរិក និងអ៊ីស្រាអែលដែល​រឹបអូសបាន​នៅច្រក​សមុទ្រ​ Hormuz
09/22/2026 06:09 PM
Facebook Telegram Linkin
រដ្ឋមន្ត្រីអ៊ីស្រាអែលប្តេជ្ញាបង្ខំឱ្យអ្នក​ក្រុង​​ហ្កាហ្សាចាកចេញ បើប្រជាជន​អ៊ីស្រាអែលត្រូវបានចាប់ពង្រត់​
09/22/2026 06:09 PM
Facebook Telegram Linkin
តុលាការកូរ៉េខាងត្បូងកាត់បន្ថយទោសជាប់ពន្ធនាគាររបស់អតីតស្ត្រីទី១ មក​ត្រឹម ៥ឆ្នាំ
09/22/2026 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.