នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី បង្ហាញភាពអំណោយផល របស់កម្ពុជា ៦ចំណុច ក្នុងការទាក់ទាញវិនិយោគិនតួកគីយ៉េ
កម្ពុជា តួកគីយ៉េ មាន គោលដៅរួមសម្រេចទំហំពាណិជ្ជកម្ម ១ពាន់លានដុល្លារ
កម្ពុជា-អាស៊ែបៃហ្សង់ បង្ហាញសុទិដ្ឋិនិយមចំពោះការជំរុញទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ
អ្នកនាំពាក្យ៖ ទីបំផុតលោក សម រង្ស៊ី បានបង្ហាញច្បាស់ថា គាត់ពិតជាបាននិយាយការពារថៃ និង​មួលបង្កាច់កម្ពុជា

នយោបាយ​ និង ការអភិវឌ្ឍន៍

ចំនួនអ្នកស្លាប់ក្នុងបំណាក់ដីនៅភាគពាយព្យប្រទេសចិន កើនឡើងដល់ ២១នាក់ និងមនុស្ស៦នាក់ផ្សេងទៀតបន្តបាត់ខ្លួន

2023/08/14 05:43:35 pm        126
Facebook Telegram Linkin
ចិន៖ កាលពីថ្ងៃអាទិត្យ ក្រុមជួយសង្គ្រោះបាននិយាយថា ចំនួនអ្នកស្លាប់ដោយសារទឹកជំនន់ដ៏គំហុក និងបំណាក់ដីនៅតំបន់ជាយក្រុងភាគខាងត្បូងទីក្រុងស៊ីអាន នៃខេត្តសានស៊ី ភាគពាយ័ព្យប្រទេសចិន កាលពីល្ងាចថ្ងៃសុក្រ បានកើនឡើងដល់២១នាក់ហើយ ខណៈមនុស្ស៦នាក់ផ្សេងទៀតកំពុងបាត់ខ្លួន។ទឹកជំនន់ដ៏គំហុកដែលបង្កឡើងដោយភ្លៀងធ្លាក់តាមរដូវកាល បានវាយប្រហារភូមិវ៉ីជឺភីង (Weiziping) ក្នុងស្រុកឆាងអាន នៃទីក្រុងស៊ីអាន នៅវេលាម៉ោងប្រហែល១៨:០០ថ្ងៃសុក្រ (ម៉ោងក្នុងស្រុក) ដោយបានបំផ្លាញលំនៅឋានចំនួន២ខ្នង និងហេដ្ឋារចនាសម្ព័ន្ធនៅក្នុងតំបន់ជុំវិញនោះដូចជាផ្លូវថ្នល់ ស្ពាន និងកន្លែងផ្គត់ផ្គង់ថាមពល ដោយមានពលរដ្ឋចំនួន៩០០គ្រួសារ រងផលប៉ះពាល់ និងស្ថានីយទូរគមនាគមន៍ចំនួន៥៥ទីតាំង ត្រូវបានបំផ្លាញ ឬខូចខាតយ៉ាងធ្ងន់ធ្ងរ។បន្ទាប់ពីគ្រោះមហន្តរាយដែលកើតឡើងភ្លាមៗនោះ ទីក្រុងស៊ីអាន បានបង្កើតទីស្នាក់ការកណ្តាលភ្លាមៗនៅនឹងទីតាំងរងគ្រោះ ហើយបានចល័តកម្លាំងសង្គ្រោះចំនួន១៤ក្រុម ដែលរួមមានក្រុមពន្លត់អគ្គិភ័យ និងក្រុមសន្តិសុខសាធារណៈ ដែលសរុបមានបុគ្គលិកជាង៩៨០នាក់។ ឧបករណ៍សំខាន់ៗជាង១.១០០គ្រឿង រួមទាំងឧបករណ៍រាវរកអ្នកនៅមានជីវិត ទូរស័ព្ទផ្កាយរណប និងយាន្តអេស្កាវ៉ាទ័រ ព្រមទាំងសត្វសុខនជួយសង្គ្រោះ ក៏ត្រូវបានបញ្ជូនដើម្បីជួយក្នុងប្រតិបត្តិការសង្គ្រោះផងដែរ។មកទល់ពេលនេះ មនុស្សចំនួន១៨៦នាក់ ត្រូវបានជម្លៀសចេញដោយជោគជ័យ ខណៈកំណាត់ផ្លូវដែលរងការខូចខាតកំពុងដំណើរការជួសជុល និងពង្រឹងបន្ថែម។ ការស្ដារឡើងវិញនូវស្ថានីយ៍មូលដ្ឋានទូរគមនាគមន៍ភាគច្រើនត្រូវបានសម្រេច ហើយការផ្គត់ផ្គង់ថាមពលត្រូវបានបន្តឡើងវិញសម្រាប់ពលរដ្ឋ៨៥៥គ្រួសារ ក្នុងចំណោមប្រជាជនដែលរងផលប៉ះពាល់ចំនួន៩០០គ្រួសារនោះ៕

យ៉ាងហោចណាស់៥៥នាក់ស្លាប់ ដោយទឹកជំនន់នៅបង់ក្លាដេស នៅក្នុងខែសីហា

2023/08/14 05:41:00 pm        76
Facebook Telegram Linkin
បង់ក្លាដេស៖ ក្រុមមន្ត្រីបាននិយាយកាលពីថ្ងៃអាទិត្យថា យ៉ាងហោចណាស់មនុស្ស៥៥នាក់បានស្លាប់ និងមនុស្សជាង១លាននាក់ បានរងផលប៉ះពាល់ដោយភ្លៀងធ្លាក់ខ្លាំងរយៈពេល២សប្តាហ៍ បណ្តាលឲ្យមានទឹកជំនន់ និងបំណាក់ដី នៅប្រទេសបង់ក្លាដេសភាគអាគ្នេយ៍។ រដ្ឋបាលស្រុកដែលរងគ្រោះខ្លាំងបំផុតចំនួន៤ស្រុក បាននិយាយថា ទឹកជំនន់ និងបំណាក់ដី ចាប់តាំងពីថ្ងៃទី១ ខែសីហា បានបណ្តាលឲ្យមនុស្ស២១នាក់ស្លាប់នៅតំបន់Cox's Bazar ១៩នាក់នៅក្រុងChittagong ១០នាក់នៅក្រុងBandarban និង៥នាក់នៅក្រុង Rangamati ។ប្រធាននាយកដ្ឋានឧតុនិយមប្រទេសបង់ក្លាដេស លោក Azizur Rahman បានប្រាប់សារព័ត៌មាន AFP ថា តំបន់ទាំងនេះមានភ្លៀងធ្លាក់ខ្លាំងបំផុតក្នុងប៉ុន្មានឆ្នាំថ្មីៗនេះ។ មន្ត្រីនិយាយថា ភ្លៀងធ្លាក់ខ្លាំង បានធ្លាក់នៅក្នុងតំបន់រហូតដល់ថ្ងៃទី១១ ខែសីហា បង្កឲ្យមានទឹកជំនន់ភ្លាមៗ ដែលបានបង្កឲ្យទឹកទន្លេពេញហៀរច្រាំង និងបានជនលិចភូមិរាប់រយ។ វាអាចបញ្ជាក់បានថាតើមនុស្សប៉ុន្មាននាក់បានស្លាប់បន្ទាប់ពីទឹកជំនន់បានចាប់ផ្តើមស្រកទៅវិញ។ រដូវកាលភ្លៀងមូសុងនៅរដូវក្តៅ បាននាំមកដល់នៅអាស៊ីខាងត្បូងប្រមាណ៨០ភាគរយនៃភ្លៀងធ្លាក់ប្រចាំឆ្នាំ ព្រមទាំងបណ្តាលឲ្យមានអ្នកស្លាប់និងការបំផ្លាញដោយសារតែការជន់លិចនិងបំណាក់ដី។ ភ្លៀងធ្លាក់ខ្លាំងពិបាកក្នុងការព្យាករណ៍ និងមានការប្រែប្រួលច្រើន ប៉ុន្តែអ្នកវិទ្យាសាស្ត្រនិយាយថា បម្រែបម្រួលអាកាសធាតុ កំពុងធ្វើឲ្យរដូវភ្លៀងមូសុងកាន់តែខ្លាំងឡើងនិងមិនទៀងទាត់ច្រើន ខណៈការកាប់បំផ្លាញព្រៃឈើ និងការសាងសង់នៅតាមជើងភ្នំ បានធ្វើឲ្យមានទឹកជំនន់ភ្លាមៗ កាន់តែធ្ងន់ធ្ងរឡើង។

រុស្ស៊ីបាញ់ព្រមាននាវាដឹកទំនិញនៅក្នុងសមុទ្រខ្មៅ

2023/08/14 05:37:12 pm        98
Facebook Telegram Linkin
រុស្ស៊ី៖ នាវាចម្បាំងរុស្ស៊ីមួយគ្រឿងបានបាញ់ព្រមានទៅលើនាវាដឹកទំនិញនៅភាគនិរតីនៃសមុទ្រខ្មៅ កាលពីថ្ងៃអាទិត្យ (១៣ សីហា) ខណៈដែលនាវានោះបានធ្វើដំណើរឆ្ពោះទៅភាគខាងជើង។ នេះជាលើកទីមួយហើយ ដែលរុស្ស៊ីបានធ្វើការបាញ់ព្រមានលើការដឹកជញ្ជូនទំនិញហួសពីដែនទឹកប្រទេសអ៊ុយក្រែន ចាប់តាំងពីប្រទេសនេះបានចាកចេញពីកិច្ចព្រមព្រៀងគ្រាប់ធញ្ញជាតិ ដែលសម្របសម្រួលដោយអង្គការសហប្រជាជាតិកាលពីខែមុន។ កិច្ចព្រមព្រៀងនេះបានអនុញ្ញាតឱ្យអ៊ុយក្រែននាំចេញកសិផលតាមសមុទ្រខ្មៅ។បន្ទាប់ពីចាកចេញពីកិច្ចព្រមព្រៀងសមុទ្រខ្មៅ ទីក្រុងមូស្គូបាននិយាយថា ខ្លួននឹងចាត់ទុកនាវាទាំងអស់ដែលធ្វើដំណើរទៅកាន់ដែនទឹកអ៊ុយក្រែន ថាជានាវាផ្ទុកអាវុធ។ រុស្ស៊ីបាននិយាយនៅក្នុងសេចក្តីថ្លែងការណ៍មួយថា នាវាល្បាតរបស់ខ្លួនមួយបានបាញ់អាវុធស្វ័យប្រវត្តិទៅលើនាវាឈ្មោះ Sukru Okan ដែលមានទង់ជាតិប្រទេសផាឡាវ បន្ទាប់ពីកាពីទែនរបស់នាវានោះបានបរាជ័យក្នុងការឆ្លើយតបទៅនឹងសំណើសុំឱ្យផ្អាកសម្រាប់ការត្រួតពិនិត្យ។ រុស្ស៊ីបាននិយាយថា នាវានោះកំពុងធ្វើដំណើរឆ្ពោះទៅកាន់កំពង់ផែ Izmail របស់អ៊ុយក្រែន។ការបាញ់ព្រមានលើនាវាពាណិជ្ជកម្ម នឹងធ្វើឱ្យមានការព្រួយបារម្ភយ៉ាងខ្លាំងក្នុងចំណោមម្ចាស់នាវា ក្រុមហ៊ុនធានារ៉ាប់រង និងពាណិជ្ជករទំនិញ អំពីគ្រោះថ្នាក់ដែលអាចកើតមាននៃការជាប់ឃុំនៅក្នុងសមុទ្រខ្មៅ។ ចាប់តាំងពីរុស្ស៊ីបានចាកចេញពីកិច្ចព្រមព្រៀងគ្រាប់ធញ្ញជាតិនៅសមុទ្រខ្មៅមក ទាំងទីក្រុងម៉ូស្គូ និងទីក្រុងគីវ បានចេញការព្រមាន និងធ្វើការវាយប្រហារ ដែលបានធ្វើឱ្យមានការរង្គោះរង្គើតាមរយៈទីផ្សារទំនិញ ប្រេង និងការដឹកជញ្ជូនទូទាំងពិភពលោក៕

ការវាយប្រហារលើទីសក្ការបូជារបស់អ៊ីរ៉ង់ បណ្តាលឲ្យមនុស្សយ៉ាងហោចណាស់ម្នាក់ស្លាប់ និងរបួសជាច្រើននាក់

2023/08/14 05:30:59 pm        109
Facebook Telegram Linkin
អ៊ីរ៉ង់៖ មន្ត្រីក្នុងតំបន់ម្នាក់ បានប្រាប់ទូរទស្សន៍រដ្ឋថា ការវាយប្រហារលើទីសក្ការបូជាមូស្លីមនិកាយស៊ីអ៊ីតនៅទីក្រុងហ្ស៊ីរ៉ាស( Shiraz) ភាគខាងត្បូងប្រទេសអ៊ីរ៉ង់ បានបណ្តាលឲ្យមនុស្សយ៉ាងហោចណាស់ម្នាក់ ស្លាប់កាលពីថ្ងៃអាទិត្យ (១៣ សីហា) ដោយបន្ថែមថា មនុស្សម្នាក់ត្រូវបានចាប់ខ្លួន។យ៉ាងហោចណាស់មនុស្ស ៧នាក់ បានរងរបួស ក្នុងនោះមានកម្មករពីរនាក់នៅទីសក្ការបូជា និងអ្នកធ្វើធម្មយាត្រាពីរនាក់ ហើយហាងនានានៅក្នុងតំបន់ ត្រូវបានបិទ។ ទូរទស្សន៍រដ្ឋ បានឲ្យដឹងថា តំបន់ទីសក្ការបូជានេះ ត្រូវបានបិទមិនឲ្យចូលដោយកងកម្លាំងសន្តិសុខ។វីដេអូបង្ហាញពីសម្លៀកបំពាក់ប្រឡាក់ឈាមនៅលើដី ហើយអ្នកគោរពបូជា ភ័យស្លន់ស្លោរត់ទៅស្វែងរកសាច់ញាតិរបស់ពួកគេ បន្ទាប់ពីការវាយប្រហារនោះ។គ្មានក្រុមណាមួយចេញមុខអះអាងទទួលខុសត្រូវភ្លាមៗចំពោះការវាយប្រហារលើទីសក្ការបូជាហ្សាចេរាហ្គ ( Shah Cheragh) ដែលទីភ្នាក់ងារព័ត៌មានរដ្ឋ IRNA បាននិយាយថា ត្រូវបានធ្វើឡើងដោយពួកភេរវករ៕

នាយករដ្ឋមន្រ្តីថ្មីរបស់កម្ពុជា ប្តេជ្ញាបន្តរក្សាគោលជំហរដោយឥតងាករេចំពោះ «គោលនយោបាយចិនមួយ»

2023/08/14 05:10:16 pm        215
Facebook Telegram Linkin
ឯកឧត្តមកិតិ្តទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីទើបតែងតាំងថ្មីរបស់កម្ពុជា បានអះអាង ចំពោះមុខប្រមុខការទូតចិនថា រដ្ឋាភិបាលថ្មី​របស់​ឯកឧត្តម​នៅ​បន្ត​រក្សា​គោល​ជំហរ​ដដែល​ចំពោះ«គោលនយោបាយចិនតែមួយ» ។នៅក្នុងកិច្ចជំនួបទ្វេភាគីជាមួយរដ្ឋមន្រ្តីក្រសួងការបរទេសចិន ឯកឧត្តម វ៉ាង យី នាថ្ងៃទី១៣ ខែ​សីហា ឆ្នាំ២០២៣ម្សិលមិញនេះ នៅវិមានសន្តិភាព ឯកឧត្តមកិតិ្តទេសាភិបាលបណ្ឌិត ហ៊ុន ម៉ាណែត បានថ្លែងអំណរគុណ និងធ្វើការគូសបញ្ជាក់ទៅកាន់ឯកឧត្តម វ៉ាង យី នូវ​ការ​រក្សា​គោល​ជំហរ​ឥត​ប្រួលប្រែរបស់រាជរដ្ឋាភិបាលថ្មី នៃព្រះរាជា​ណា​ចក្រ​កម្ពុជា​ចំពោះ «គោល​នយោបាយ​ចិន​មួយ» និងការមិនជ្រៀតជ្រែកលើកិច្ចការផ្ទៃក្នុងរបស់ចិន ។ ជាមួយគ្នានោះដែរឯកឧត្តមកិតិ្តទេសាភិបាលបណ្ឌិត បានឆ្លើយតប​ទៅ​នឹង​ការ​អញ្ជើញ​របស់​ភាគី​មិត្ត​ចិន​ទៅ​ចូលរួមពិធីខួបលើកទី១០នៃការបង្កើតគំនិតផ្តួចផ្តើមខ្សែក្រវាត់ និងផ្លូវ​នៅ​រដ្ឋធានី​ប៉េកាំង សាធារណរដ្ឋប្រជាមានិតចិន នាពាក់កណ្តាលខែតុលា ឆ្នាំ​២០២៣​ខាង​មុខ​ខាង​នេះ​ផង​ដែរ​។ នៅក្នុងកិច្ចជំនួបនោះដែរ រដ្ឋមន្រ្តីការបរទេសចិនឯកឧត្តម វ៉ាង យី បាន​ថ្លែង​ថា​ ចិន​នៅ​បន្ត​ជំរុញ​ការ​អនុវត្ត​ការងារប្រកបដោយប្រសិទ្ធភាព និងភាពជិតស្និទ្ធជាមួយកម្ពុជាដដែល ហើយភាគី​មិត្ត​ចិន​នឹង​ត្រៀម​ទទួលស្វាគមន៍ដំណើរទស្សនកិច្ចផ្លូវការ និងការចូលរួមរបស់ ឯកឧត្តម កិតិ្តទេសា​ភិបាល​បណ្ឌិត នៅក្នុងពិព័រណ៍ចិន-អាស៊ាន លើកទី២០ ឆ្នាំ២០២៣ ដែលនឹង​ប្រព្រឹត្ត​ទៅ​នៅ​ទីក្រុង​ណាននីង ខេត្តក្វាងស៊ី ប្រទេសចិន នាពាក់កណ្តាលខែកញ្ញា ឆ្នាំ២០២៣ ខាងមុខផង។ នៅក្នុងកិច្ចជំនួបនោះដែរ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត និងប្រមុខ​ការ​ទូត​ចិន ក៏បានប្តេជ្ញាបន្តលើកកម្ពស់កិច្ចសហប្រតិបត្តិការរវាងប្រទេសទាំងពីរកម្ពុជា-ចិន ឱ្យកាន់​ជិត​ស្និទ្ធ តាមរយៈការថែរក្សាសមិទ្ធផលដែលមានកន្លងមក ក៏ដូច​ជា​ការ​ពង្រីក​ទិស​ដៅ​កិច្ច​សហប្រតិបត្តិការ​ទៅ​លើវិស័យថ្មីៗបន្ថែមទៀត ដូចជា វិស័យអគ្គិសនី ជាពិសេស វារីអគ្គិសនី, វិស័យហេដ្ឋារចនាសម្ព័ន្ធ, វិស័យកសិកម្ម និងវិស័យពាណិជ្ជកម្ម ជាដើម ។ល។ លើសពីនេះ ភាគីទាំងពីរ ក៏ឯកភាពនឹងបន្តកិច្ចសហប្រតិបត្តិការ និងផ្តល់ការគាំទ្រ​ដល់​គ្នា​ទៅ​វិញ​ទៅ​មក​ផង​ដែរ នៅក្នុងក្របខ័ណ្ឌតំបន់ និងលើឆាកអន្តរជាតិ។ សូមបញ្ជាក់ថារដ្ឋមន្រ្តីក្រសួងការបរទេសចិន ឯកឧត្តម វ៉ាង យី បានមក​បំពេញ​ទស្សនកិច្ច​ជា​ផ្លូវ​ការ​នៅ​កម្ពុជារយៈពេលពីរថ្ងៃគឺចាប់ពីថ្ងៃទី១២ ដល់ថ្ងៃទី១៣ ខែសីហា ឆ្នាំ២០២៣នេះ។ ដំណើរ​ទស្សន​កិច្ច​របស់ប្រមុខការទូតចិនរូបនេះមកកម្ពុជា គឺដើម្បីលើក​កម្ពស់​ក្រប​ខ័ណ្ឌ​កិច្ច​សហប្រតិបត្តិការ​ត្បូង​ពេជ្រ ព្រមទាំងជំរុញកិច្ចសហប្រតិបត្តិការនៅក្នុង វេទិកាតំបន់ និង​អន្តរជាតិ​ផង​ដែរ​។ដំណើរ​ទស្សនកិច្ចរបស់ឯកឧត្តមវ៉ាង យី បានចូលក្រាបបង្គំគាល់ ព្រះករុណា ព្រះបាទសម្តេច​ព្រះបរម​នាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រះបរមរាជវាំង។ បាន​ចូល​ជួបសម្តែងការគួរសមជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជួប​ឯកឧត្តម កិត្តិទេសាភិបាល បណ្ឌិត ហ៊ុន ម៉ាណែត នាយករដ្ឋមន្ដ្រីចាត់តាំង នៃកម្ពុជា ជួប​ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និង​ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និង​ជា​អគ្គលេខាធិការ នៃ​ក្រុម​ប្រឹក្សា​អភិវឌ្ឍន៍​កម្ពុជា និងជួបជាមួយឯកឧត្តម ហោ ណាំហុងអតីត ប្រមុខការទូតកម្ពុជាជាដើម។នៅ​ក្នុង​អំឡុងពេលទស្សនកិច្ចផ្លូវការនៅកម្ពុជារយៈពេលពីរថ្ងៃនេះ ឯកឧត្តម វ៉ាង យី បាន​បញ្ជាក់​ជា​ថ្មី​ថា រដ្ឋាភិបាលចិននូវបន្តប្តេជ្ញាចិត្តដោយឥតងាករេក្នុងការគោរពអធិបតេយ្យរបស់កម្ពុជា និង​ពាំនាំ​នូវ ការគាំទ្រយ៉ាងពេញលេញរបស់ប្រទេសចិនចំពោះថ្នាក់ដឹកនាំថ្មី និងមាគ៌ា​អភិវឌ្ឍ​របស់​កម្ពុជា​ផង​ដែរ។ ឯក ឧត្តម វ៉ាង យី ក៏បានលើកឡើងផងដែរថា អាណត្តិដែល​ទទួល​បាន​ពី​សំឡេង​ឆ្នោត​គាំទ្រ​ចំនួន​៨២ភាគរយ បានគូសបញ្ជាក់អំពី​អភិក្រម​នៃកា​រ​ដឹកនាំ​ប្រក​បដោយ​ការ​ឆ្លើយ​តប​របស់​​គណបក្សប្រជាជនកម្ពុជា ដែល តែងតែយកចិត្តទុកដាក់ចំពោះតម្រូវការចាំបាច់ និង​បំណង​ប្រាថ្នា​របស់​ប្រជាពលរដ្ឋជាដើម៕ អត្ថបទ៖ បាន ចក់

មេដឹកនាំកូរ៉េខាងជើង ចុះពិនិត្យរោងចក្រផលិតគ្រឿងយុទ្ធោបករណ៍រួមទាំងរោងចក្រមីស៊ីល

2023/08/14 04:31:31 pm        284
Facebook Telegram Linkin
កូរ៉េខាងជើង៖ ប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃចន្ទនេះថា មេដឹកនាំប្រទេសកូរ៉េខាងជើង លោក Kim Jong Un បានធ្វើទស្សនកិច្ចនៅរោងចក្រផលិតសម្ភារៈយោធាសំខាន់ៗ រួមមានទាំងរោងចក្រផលិតមីស៊ីលតាកទិក។ ព័ត៌មាន KCNA និយាយថា លោក Kim បានបង្ហាញការពេញចិត្តលើការផ្តោតសំខាន់នាពេលបច្ចុប្បន្ននៅរោងចក្រមួយលើការផលិតមីស៊ីលតាកទិក និងការពង្រីកសមត្ថភាពផលិតកម្ម អំឡុងទស្សនកិច្ចរបស់លោកកាលពីសប្តាហ៍កន្លងទៅនេះ។ សារព័ត៌មាន និយាយថា លោកបានបង្ហាញគោលដៅដ៏សំខាន់ ដើម្បីធ្វើឲ្យប្រសើរឡើងការផលិតមីស៊ីល ដោយបានកោតសរសើរសមត្ថភាពប្រតិបត្តិការចុងក្រោយនៃគ្រាប់កាំភ្លើងធំ និងបានជំរុញផ្ទាល់នៃយានរថពាសដែកប្រយុទ្ធ។ នេះគឺជាដំណើលរទស្សនកិច្ចចុងក្រោយដែលធ្វើឡើងជាបន្តបន្ទាប់ដោយមេដឹកនាំ លោក Kim Jong Un ទៅកាន់រោងចក្រផ្នៃកការពារជាតិ ជាកន្លែងដែលលោកបញ្ជាក់ពីការផលិតអាវុធទ្រង់ទ្រាយធំ។ សហរដ្ឋអាមេរិក បានចោទប្រកាន់ប្រទេសកូរ៉េខាងជើងពីការផ្តល់អាវុធដល់ប្រទេសរុស្ស៊ីសម្រាប់សង្គ្រាមរបស់ខ្លួននៅអ៊ុយក្រែន។ អ្នកនាំពាក្យរងក្រសួងការបរទេស លោក Vedant Patel បាននិយាយកាលពីខែមុនថា សហរដ្ឋអាមេរិកមានក្តីបារម្ភមិនគួឲ្យជឿអំពីទំនាក់ទំនងរបស់ពួកគេ។ ប្រទេសកូរ៉េខាងជើង និងរុស្ស៊ី បានច្រានចោលការដឹកជញ្ជូនអាវុធណាមួយ។ សារព័ត៌មាន KCNA បាននិយាយដាច់ដោយឡែកនៅថ្ងៃចន្ទនេះថា លោក Kim បានធ្វើទស្សនកិច្ចតំបន់រងគ្រោះដោយព្យុះទីហ្វុង បន្ទាប់ពីព្យុះត្រូពិក Khanun វាយបក់បោកមកលើឧបទ្វីបកូរ៉េកាលពីសប្តាហ៍មុន ដែលបានធ្វើឲ្យជន់លិច ដីស្រែចំការ៕

មេដឹកនាំលំដាប់ទី២របស់កោះតៃវ៉ាន់ និយាយថា តៃវ៉ាន់ នឹងមិនចុះញ៉មចំពោះការគំរាមឡើយអំឡុងទស្សនកិច្ចទៅអាមេរិក

2023/08/14 04:28:35 pm        436
Facebook Telegram Linkin
តៃវ៉ាន់៖ មេដឹកនាំលំដាប់ទី២របស់កោះតៃវ៉ាន់ បានបា្រប់ក្រុមអ្នកគាំទ្រ អំឡុងដំណើរទស្សនកិច្ចរទៅកាន់សហរដ្ឋអាមេរិក ដែលទីក្រុងប៉េកាំងបានថ្កោលទោស ខណៈបញ្ជាក់ជាថ្មីពីឆន្ទៈក្នុងការពិភាក្សាជាមួយចិន ថាប្រសិនបើកោះតៃវ៉ាន់មានសុវត្ថិភាព ដូច្នេះ ពិភពលោកនឹងមានសុវត្ថិភាពដែរ ហើយកោះតៃវ៉ាន់នឹងមិនចុះញ៉មក្នុងការប្រឈមមុខចំពោះការគំរាមនេះទេ ។លោក វីលៀម ឡៃ(William Lai) ដែលជាបេក្ខជននាំមុខសម្រាប់តំណែងមេដឹកនាំបន្ទាប់របស់កោះតៃវ៉ាន់ ក្នុងការបោះឆ្នោតជ្រើសរើសមេដឹកនាំនៅខែមករាឆ្នាំក្រោយ ផងដែរនេះ កំពុងមានវត្តមាននៅក្នុងសហរដ្ឋអាមេរិក នូវអ្វីដែលជាដំណើរឈប់សំចតផ្លូវការរបស់លោកទៅកាន់ប្រទេសប៉ារ៉ាហ្គាយ ដើម្បីអបអរសាទរប្រធានាធិបតីថ្មីរបស់ខ្លួន ។ ប្រទេសប៉ារ៉ាហ្គាយគឺជាប្រទេសមួយក្នុងចំណោមប្រទេស១៣ ដែលបានរក្សាទំនាក់ទំនងធម្មតាជាមួយកោះដែលចិនអះអាងសិទ្ធិជាដែនដីរបស់ខ្លួន។  ទាំងកោះតៃវ៉ាន់ ទាំងសហរដ្ឋអាមេរិកនិយាយថាសំណើរឈប់សំចតនេះ រួមទាំង នៅក្នុងទីក្រុង San Francisco ក្នុងដំណើរវិលត្រឡប់ទៅវិញ តាមទម្លាប់ ប៉ុន្តែចិន បានរិះគន់និងហៅលោកឡៃ ថាជាអ្នកបង្ករឿងរបស់ក្រុមផ្ដាច់ខ្លួន។ យោងតាមការអានពីការិយាល័យមេដឹកនាំកោះតៃវ៉ាន់ នៅក្នុងការអត្ថាធិប្បាយពេលទទួលទានអាហារថ្ងៃត្រង់នៅក្នុងទីក្រុង New Yorkកាលពីថ្ងៃអាទិត្យ លោក ឡៃ បាននិយាយថា ប្រសិនបើកោះតៃវ៉ាន់មានសុវត្ថិភាព ពិភពលោកមានសុត្ថិភាព ប្រសិនបើ ច្រកសមុទ្រតៃវ៉ាន់សុខសាន្ត នោះ ពិភពលោកទាំងមូលនឹងសុខសាន្តដែរ៕

ចំនួនអ្នកស្លាប់កើនដល់៩៣នាក់ពីចំហេះព្រៃកោះ ម៉ូអ៊ី ខណៈប្រតិបត្តិការស្វែងរកកំពុងបន្ត

2023/08/14 03:10:23 pm        411
Facebook Telegram Linkin
អាមេរិក៖​ ចំនួនអ្នកស្លាប់ដោយសារចំហេះព្រៃកោះ ម៉ូអ៊ី រដ្ឋហាវ៉ៃ សហរដ្ឋអាមេរិក បានកើនឡើងដល់៩៣នាក់កាលពីថ្ងៃអាទិត្យ ខណៈដែលគ្រួសាររបស់អ្នកបាត់ខ្លួនកំពុងស្វែងរកសាច់ញាតិពួកគេយ៉ាងអន្ទះសារ ដោយសង្ឃឹមថាអ្នកទាំងនោះអាចនៅមានជីវិត។ អភិបាលរដ្ឋហាវ៉ៃ លោក Josh Green កាលពីថ្ងៃអាទិត្យបានប្រដូចទីក្រុងឡាហេណា ដែលឆេះខ្ទេចខ្ទីអស់ ទៅនឹង "តំបន់សង្គ្រាម" បន្ទាប់ពីចំហេះដែលរាលដាលយ៉ាងលឿននោះ បានលេបត្របាក់ឆ្នេរសមុទ្រភាគពាយ័ព្យនៃកោះ ម៉ូអ៊ី កាលពីថ្ងៃអង្គារ ដោយបានធ្វើឱ្យខូចខាតទីក្រុងរមណីយដ្ឋានប្រវត្តិសាស្ត្រជាច្រើន និងបានឆាបឆេះស្ទើរតែគ្រប់យ៉ាងទាំងអស់នៅក្នុងតំបន់នោះ។ប៉ុន្មានថ្ងៃបន្ទាប់ពីគ្រោះមហន្តរាយនេះ ក្រុមពន្លត់អគ្គិភ័យនៅតែកំពុងទប់ទល់នឹងចំហេះនេះ ហើយសត្វសុខន cadaver កំពុងដើរស្វែងរកតាមប្រាសាទដែលឆេះយ៉ាងសន្ធោសន្ធៅក្នុងទីក្រុង ដើម្បីស្វែងរកជនរងគ្រោះ ខណៈដែលអ្នកនៅរស់រានមានជីវិត និងក្រុមមន្ត្រីបានកំណត់ពីទំហំនៃគ្រោះមហន្តរាយនេះ។តួលេខអ្នកស្លាប់នេះ បានធ្វើឱ្យចំហេះនេះក្លាយជាគ្រោះធម្មជាតិដ៏អាក្រក់បំផុតរបស់រដ្ឋហាវ៉ៃ លើសពីរលកយក្សស៊ូណាមិ ដែលបានសម្លាប់មនុស្ស៦១នាក់ក្នុងឆ្នាំ១៩៦០ រយៈពេលមួយឆ្នាំបន្ទាប់ពីហាវ៉ៃក្លាយជារដ្ឋរបស់សហរដ្ឋអាមេរិក។ យោងតាមទីភ្នាក់ងារគ្រប់គ្រងគ្រោះអាសន្នសហព័ន្ធ (FEMA) បានឱ្យដឹងថា ការចំណាយលើការកសាងទីក្រុង ឡាហេណា ឡើងវិញត្រូវបានប៉ាន់ប្រមាណថាមានចំនួន៥,៥ពាន់លានដុល្លារ ដោយមានរចនាសម្ព័ន្ធជាង២.២០០ទីតាំង ត្រូវបានខូចខាត ឬបំផ្លាញ និងផ្ទៃដីជាង២.១០០ហិចតា ត្រូវបានដុតបំផ្លាញ៕

ឯកឧត្តមកិតិ្តទេសាភិបាលបណ្ឌិត ហ៊ុន ម៉ាណែត និង ឯកឧត្តម វ៉ាង យី ប្តេជ្ញាបន្តលើកកម្ពស់​កិច្ចសហប្រតិបត្តិការ​រវាងប្រទេសទាំងពីរកម្ពុជា-ចិន ឱ្យកាន់តែជិតស្និទ្ធបន្ថែមទៀត

2023/08/14 01:36:29 am        854
Facebook Telegram Linkin
នារសៀលថ្ងៃទី១៣ ខែសីហា ឆ្នាំ២០២៣, នៅវិមានសន្តិភាព ឯកឧត្តមកិតិ្តទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីតែងតាំង នៃព្រះរាជាណាចក្រកម្ពុជា បាន​ទទួល​ជួប​សម្តែង​ការ​គួរសម​ជាមួ​យនឹង ឯកឧត្តម វ៉ាង យី សមាជិកការិយាល័យនយោបាយ, ប្រធានការិយាល័យ​គណៈកម្មការ​កិច្ច​ការបរទេស នៃគណៈកម្មាធិការមជ្ឈិមបក្សកុម្មុយនីស្តចិន និង ជារដ្ឋមន្ត្រី​ការ​បរទេស​ចិន ដែលបានអញ្ជើញបំពេញទស្សនកិច្ចផ្លូវការនៅព្រះរាជាណាចក្រកម្ពុជា ចាប់​ពី​ថ្ងៃ​ទី​១២-១៣ ខែសីហា ឆ្នាំ២០២៣ ។ នៅក្នុងជំនួបនេះ, ឯកឧត្តម វ៉ាង យី បានបញ្ជាក់អំពីជំហរបន្តជំរុញការអនុវត្តការងារ ប្រកប​ដោយ​ប្រសិទ្ធ​ភាព និងភាពជិតស្និទ្ធជាមួយកម្ពុជា ហើយ​ភាគី​មិត្ត​ចិន​នឹង​ត្រៀម​ទទួល​ស្វាគមន៍​ដំណើរ​ទស្សន​កិច្ច​ផ្លូវការ និងការចូលរួមរបស់ ឯកឧត្តម កិតិ្តទេសាភិបាលបណ្ឌិត នៅក្នុងពិព័រណ៍ចិន-អាស៊ាន លើកទី២០ ឆ្នាំ២០២៣ ដែលនឹងប្រព្រឹត្តទៅនៅទីក្រុងណាននីង ខេត្តក្វាងស៊ី ប្រទេស​ចិន នាពាក់កណ្តាលខែកញ្ញា ឆ្នាំ២០២៣ ខាងមុខ ។ជាការឆ្លើយតប ឯកឧត្តមកិតិ្តទេសាភិបាលបណ្ឌិត បានថ្លែងអំណរគុណ និង​ធ្វើ​ការ​គូស​បញ្ជាក់​ជូន​ភាគី​មិត្ត​ផងដែរ នូវការរក្សាគោលជំហរឥតប្រួលប្រែរបស់រាជរដ្ឋាភិបាលថ្មី នៃ​ព្រះរាជា​ណា​ចក្រ​​កម្ពុជា​ចំពោះ «គោលនយោបាយចិនមួយ» និងការមិន​ជ្រៀត​ជ្រែក​លើ​កិច្ច​ការផ្ទៃក្នុងរបស់ចិន ។ ជាមួយគ្នានេះ ឯកឧត្តមកិតិ្តទេសាភិបាលបណ្ឌិត បាន​ឆ្លើយ​តប​ទៅ​នឹង​ការ​អញ្ជើញ​របស់​ភាគី​មិត្ត​ចិន​ទៅ​ចូលរួមពិធីខួបលើកទី១០ នៃការបង្កើតគំនិតផ្តួចផ្តើមខ្សែក្រវាត់ និងផ្លូវ នៅរដ្ឋធានី​ប៉េកាំង សាធារណរដ្ឋប្រជាមានិតប្រទេសចិន នាពាក់កណ្តាលខែតុលា ឆ្នាំ២០២៣ ខាងមុខ ។ ជាចុងក្រោយ ថ្នាក់ដឹកនាំទាំងពីរ បាន​ប្តេជ្ញា​បន្ត​លើក​កម្ពស់​កិច្ច​សហប្រតិបត្តិការ​រវាង​ប្រទេស​ទាំង​ពីរ​កម្ពុជា-ចិន ឱ្យកាន់ជិតស្និទ្ធ តាមរយៈការថែរក្សាសមិទ្ធផលដែលមានកន្លងមក ក៏ដូច​ជា​ការ​ពង្រីក​ទិស​ដៅកិច្ចសហប្រតិបត្តិការទៅលើវិស័យថ្មីៗបន្ថែមទៀត ដូចជា៖ វិស័យអគ្គិសនី ជា​ពិសេស វារីអគ្គិសនី, វិស័យហេដ្ឋារចនាសម្ព័ន្ធ, វិស័យកសិកម្ម និងវិស័យពាណិជ្ជកម្ម ជាដើម ។ល។ លើសពីនេះ ភាគីទាំងពីរ ក៏ឯកភាពនឹងបន្តកិច្ចសហប្រតិបត្តិការ និង​ផ្តល់​ការ​គាំទ្រ​ដល់​គ្នា​ទៅ​វិញ​ទៅមកផងដែរ នៅក្នុងក្របខ័ណ្ឌតំបន់ និងលើឆាកអន្តរជាតិ៕

ចិនបញ្ជាក់ការគាំទ្រកម្ពុជា​ និងមានជំនឿលើការដឹកនាំរបស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត

2023/08/13 08:42:07 pm        625
Facebook Telegram Linkin
ភ្នំពេញ៖ នៅព្រឹកថ្ងៃទី១៣ ខែសីហា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បាន​អនុញ្ញាត​ឱ្យ​ឯកឧត្តម វ៉ាង យី សមាជិកការិយាល័យនយោបាយ ប្រធាន​ការិយាល័យ​គណៈ​កម្មការ​កិច្ច​ការ​បរទេស នៃគណៈកម្មាធិការមជ្ឈិមបក្សកុម្មុយនីស្តចិន និងជា​រដ្ឋមន្រ្តី​ការបរទេស នៃ​សាធារណ​រដ្ឋ​ប្រជាមានិត​ចិន ចូលជួបសំដែងការគួរសម និងពិភាក្សាការងារ នៅវិមានសន្តិភាព។បើតាម ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោបានឱ្យដឹងថា ឯកឧត្តម វ៉ាង យី បាន​គោរព​ពាំនាំ​នូវ​ការផ្ដាំផ្ញើសួរសុខទុកពី ឯកឧត្តមប្រធានាធិបតី ស៊ី ជិនពីង ឯកឧត្តមនាយករដ្ឋមន្ត្រី លី ឈាង និង​ថ្នាក់​ដឹកនាំចិ​នមួយចំនួនទៀត ជូនចំពោះសម្ដេចតេជោ។ ឯកឧត្តម វ៉ាង យី បានគោរព​ជម្រាប​ជូន​សម្ដេច​តេជោ​ថា ឯកឧត្តមបានមកកាន់កម្ពុជាជាច្រើនដងហើយៗជារៀងរាល់ដងដែលបានមកដល់កម្ពុជា ឯកឧត្តម​បានឃើញកម្ពុជា ជាពិសេសរាជធានីភ្នំពេញ មានការផ្លាស់ប្ដូរយ៉ាងរស់រវើក ហើយ​ពេល​នេះ​ជា​សក្ខីភាព​ទី​ក្រុងភ្នំពេញ បានក្លាយទៅជាទីក្រុងពាណិជ្ជកម្ម យ៉ាងទំនើប។ ឯកឧត្តម​បាន​គោរព​សម្ដែង​នូវ​ការ​អបអ​រសាទរជូនចំពោះសម្ដេចតេជោ ជូនចំពោះគណបក្សប្រជាជនកម្ពុជា ដែល​ទទួ​ល​បាន​ការ​គាំទ្រ​ពី​ប្រជាជន​លើស​៨០%។ ឯកឧត្តម វ៉ាង យី បានមានប្រសាសន៍ថា ប្រទេស​ជា​ច្រើន​បាន​មក​សង្កេតការណ៍​ការ​បោះឆ្នោតនៅកម្ពុជាហើយឃើញថា ការបោះឆ្នោតដែលប្រព្រឹត្តទៅកាលពីថ្ងៃទី២៣ខែកក្កដា កន្លងទៅ គឺយុត្តិធម៌ តម្លាភាព និងស្របច្បាប់។ ប្រជាជនជាង៨០% បានទៅបោះឆ្នោត ដែលនោះសបញ្ជាក់​ឱ្យ​ឃើញ​ថា ប្រជាជនកម្ពុជាបានប្រើប្រាស់សិទ្ធិពេញលេញ ប្រជាជនជាង ៨០% បាន​បោះឆ្នោ​ត​ជូន​គណបក្ស​ប្រជាជនកម្ពុជា នោះសឱ្យឃើញថា ប្រជាជនគាំទ្រគណបក្សប្រជាជនកម្ពុជា ឲ្យ​ដឹក​នាំ​បន្ត​ទៀត​។​ ឯកឧត្តមថា ការទទួលបានការទុកចិត្តពីប្រជាជននេះ ជាកត្តាសំខាន់បំផុត។ ក្នុងន័យនេះ ឯកឧត្តម វ៉ាង យី សូមគោរពសម្ដែង នូវការអបអរសាទរជូនចំពោះសម្ដេចតេជោហើយបានបញ្ជាក់ជូនសម្ដេចតេជោថា ដំណើរ​ទស្សនកិច្ចរបស់ឯកឧត្តមមកកាន់ព្រះរាជាណាចក្រកម្ពុជា នៅពេលនេះ ដើម្បីបញ្ជាក់ថា ចិន​គាំ​ទ្រ​កម្ពុជា​ ហើយមានជំនឿថា ក្រោមការដឹកនាំរបស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត កិច្ច​សហប្រតិបត្តិការ​រវាងកម្ពុជានិងចិន នឹងរីកចម្រើនឡើង កាន់តែធំធាត់ ជាពិសេស​កម្ពុជា​កាន់​តែ​មាន​ភាព​រុង​រឿង​ឡើង​ថែមទៀត។ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណជូនចំពោះ ឯកឧត្តម វ៉ាង យី ដែលបាន​ពាំនាំ​នូវ​ការផ្ដាំផ្ញើសួរសុខទុក្ខ ពីឯកឧត្តមប្រធានាធិបតី ស៊ី ជិនពីង ឯកឧត្តមនាយករដ្ឋមន្ត្រី លី ឈាង និងថ្នាក់ដឹកនាំចិនមួយចំនួនទៀត ហើយក៏បានថ្លែងអំណរគុណជូនចំពោះឯកឧត្តមប្រធានាធិបតី ស៊ី ជិនពីង ឯកឧត្តមនាយករដ្ឋមន្ត្រី លី ឈាង និងថ្នាក់ដឹកនាំចិនជាច្រើនទៀត ផងដែរ។ សម្ដេចបានថ្លែង អំណរគុណជូនចំពោះឯកឧត្តម វ៉ាង យី ចំពោះពាក្យពេចន៍ដ៏ល្អ ជាពិសេសការគាំទ្រ របស់មិត្តចិន។ សម្ដេចតេជោបាន មានប្រសាសន៍ថា ប្រជាជនកម្ពុជាបានដឹងជាមុនថា នឹង​មាន​ការ​ផ្លាស់​ប្ដូរ​មុន​ពេល​បោះឆ្នោត ហើយការគាំទ្រ រហូតដល់ទៅ៨៤% គឺជាការអបអរសាទរ។គួរបញ្ជាក់ថា ឯកឧត្តម វ៉ាង យី បានអញ្ជើញមកដល់ព្រលានយន្តហោះអន្តរជាតិភ្នំពេញដោយសុវត្ថិភាព កាល​ពីល្ងាចថ្ងៃទី១២សីហាម្សិលមិញ ដើម្បីចាប់ផ្ដើមទស្សនកិច្ចផ្លូវការ នៅព្រះរាជាណាចក្រកម្ពុជា ពី​ថ្ងៃ​ទី​១២ ដល់ថ្ងៃទី១៣ ខែសីហា ឆ្នាំ២០២៣៕

បណ្ដាញសង្គម

ព័ត៌មានថ្មីៗ

កងទ័ពជើងគោកកម្ពុជា និងកងទ័ពការពារព្រំដែនវៀតណាម ពង្រឹងកិច្ចសហប្រតិបត្តិការគ្រប់គ្រង និងការពារព្រំដែន
10/16/2026 07:10 PM
Facebook Telegram Linkin
មន្ត្រី៖ មេបញ្ជាការក្រុមហ៊ូទីត្រូវបានសម្លាប់ អំឡុង​ការប៉ះទង្គិចជាមួយកង​កម្លាំងរដ្ឋាភិបាលយេម៉ែន នៅទី​ក្រុង​ Taiz
10/16/2026 07:10 PM
Facebook Telegram Linkin
ប្រមុខ​គោល​នយបាយការ​​បរទេស EU ជំរុញឱ្យអាមេរិកបង្កើនសម្ពាធលើរុស្ស៊ី ដើម្បីបញ្ចប់សង្គ្រាម នៅអ៊ុយក្រែន
10/16/2026 07:10 PM
Facebook Telegram Linkin
ចិនផ្ដោត​លើ​វិធានការ​ជាក់ស្តែង ពីវេទិកាអភិបាលកិច្ចសកល នៅសប្តាហ៍ក្រោយ
10/16/2026 07:10 PM
Facebook Telegram Linkin
ឯកអគ្គរដ្ឋ​ទូត៖ ចិនអាច «ឈ្នះយ៉ាងងាយស្រួល​» នៅ​ក្នុង​ការ​ប្រឈមមុខ​ដាក់​គ្នា​ជាមួយហ្វីលីពីន
10/16/2026 07:10 PM
Facebook Telegram Linkin
សម្ដេចធិបតី បង្ហាញភាពអំណោយផល របស់កម្ពុជា ៦ចំណុច ក្នុងការទាក់ទាញវិនិយោគិនតួកគីយ៉េ
10/16/2026 07:10 PM
Facebook Telegram Linkin
កម្ពុជា តួកគីយ៉េ មាន គោលដៅរួមសម្រេចទំហំពាណិជ្ជកម្ម ១ពាន់លានដុល្លារ
10/16/2026 07:10 PM
Facebook Telegram Linkin
លោក MUSK បង្អួតរថយន្តអគ្គិសនី Tesla ជំនាន់ថ្មី ដែលអាចហោះ និងបត់បែនកណ្តាល​អាកាស ​
10/16/2026 06:10 PM
Facebook Telegram Linkin
ចិនជំរុញឱ្យរដ្ឋាភិបាលជប៉ុនប្រឈមមុខនឹងប្រវត្តិសាស្ត្រ និងផ្តាច់ខ្លួនចេញពីលទ្ធិយោធានិយម
10/16/2026 06:10 PM
Facebook Telegram Linkin
ប្រធានាធិបតីលីបង់ជំរុញអាមេរិកឲ្យដាក់សម្ពាធអ៊ីស្រាអែលបញ្ឈប់ការវាយប្រហារនៅភាគខាងត្បូងលីបង់
10/16/2026 06:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.