នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
មន្ត្រីជាន់ខ្ពស់ក្រសួងអភិវឌ្ឍន៍ជនបទ ចុះត្រួតពិនិត្យ និងវាយតម្លៃលើ​ការងារ​ស្ថាបនា​ផ្លូវ នៅ​ទីតាំង​ដីសម្បទានសង្គមកិច្ច ខេត្តឧត្តរមានជ័យ
គណបក្សនយោបាយសម្ព័ន្ធភាព បង្ហាញជំហររបស់ខ្លួនក្នុង​ការចូលរួ​ម​ដោះស្រាយ​បញ្ហារួម​សម្រាប់​ជាតិ
កម្ពុជានឹងមានវត្តមានរោងចក្រដំឡើងរថយន្តអគ្គិសនីថ្មីមួយទៀត នៅក្នុងតំបន់សេដ្ឋកិច្ចពិសេស ខេត្តពោធិ៍សាត់ ខណៈត្រឹមឆ្នាំ២០២៥ កំណើនរថយន្តអគ្គិសនីចុះបញ្ជីមានចំនួន ៦,១២៩គ្រឿង កើនឡើង ១៧២% បើធៀបឆ្នាំ២០២៤
ទូតចិនអបអរការដាក់ឱ្យពលរដ្ឋឆ្លងកាត់ស្ពានមិត្តភាពកម្ពុជា-ចិន មេគង្គក្រចេះនៅដើមខែក្រោយ ខណៈមិត្តចិនប្រកាសបន្តពង្រីកការសាងសង់ស្ពាន និងផ្លូវនៅកម្ពុជាឥតឈប់ឈរ

នយោបាយ​ និង ការអភិវឌ្ឍន៍

បេក្ខជនសំខាន់ៗដែលនឹងដណ្ដើមតំណែងជានាយករដ្ឋមន្ត្រីថ្មីរបស់ជប៉ុន ក្រោយលោក Fumio Kishidaប្រកាសចាកចេញពីតំណែង

2024/08/15 10:45:50 am        127
Facebook Telegram Linkin
លោកនាយករដ្ឋមន្ត្រីជប៉ុន Fumio Kishida បាននិយាយកាលពីថ្ងៃពុធសប្ដាហ៍នេះថា លោកនឹងចុះចេញពីតំណែងជានាយករដ្ឋមន្ត្រីនៅខែក្រោយ បន្ទាប់ពីកាន់តំណែងរយៈពេល ៣ ឆ្នាំ ដែលត្រូវបានរង្គោះរង្គើរដោយរឿងអាស្រូវ និងការធ្លាក់ចុះការគាំទ្រសាធារណៈ។  មានគូរប្រជែងសំខាន់ៗជាច្រើន ដែលអាចជំនួសតំណែងលោកបាននៅពេលគណបក្សកាន់អំណាចប្រជាធិបតេយ្យសេរី (LDP) របស់លោករៀបចំការបោះឆ្នោតថ្នាក់ដឹកនាំនៅខែក្រោយ។លោកហ្ស៊ីហ្គេរូ អ៊ីហ្ស៊ីបា (SHIGERU ISHIBA) វ័យ ៦៧ឆ្នាំ ជាបេក្ខភាពបួនសម័យកាលសម្រាប់ប្រធានបក្សនិងជាអតីតរដ្ឋមន្ត្រីការពារជាតិ។ លោកនៅមិនទាន់ប្រកាសជាផ្លូវការអំពីបំណងរបស់លោកក្នុងការប្រកួតប្រជែងនាពេលខាងមុខនៅឡើយទេ។  លោក តូស៊ីមីតស៊ូ ម៉ូតេជី (TOSHIMITSU MOTEGI ) វ័យ៦៨ ដែលបច្ចុប្បន្នជាអគ្គលេខាធិការគណបក្សកាន់អំណាច LDP បានបម្រើការក្នុងជួរគណៈរដ្ឋមន្ត្រីជាច្រើនតំណែង រួមទាំងជារដ្ឋមន្ត្រីការបរទេស ពាណិជ្ជកម្ម និងសេដ្ឋកិច្ច។លោកស៊ីនជីរ៉ូកូអ៊ីស៊ូមី (SHINJIRO KOIZUMI)វ័យ៤៣ឆ្នាំ អតីតរដ្ឋមន្ត្រីក្រសួងបរិស្ថាន និងជាកូនប្រុសរបស់អតីតនាយករដ្ឋមន្ត្រីដែលមានប្រជាប្រិយភាពលោក ជូនីជីរ៉ូ កូអ៊ីស៊ូមី (Junichiro Koizumi) ។ លោកស្រី សាណេ តាកៃជី (SANAE TAKAICHI) មានតួនាទីជារដ្ឋមន្ត្រីទទួលបន្ទុកសន្តិសុខសេដ្ឋកិច្ច ហើយត្រូវបានគេផ្តល់កិត្តិយសសម្រាប់ការអនុម័តច្បាប់ដើម្បីបង្កើតប្រព័ន្ធបោសសម្អាតសន្តិសុខសេដ្ឋកិច្ច។    រដ្ឋមន្ត្រីផ្នែកឌីជីថល លោក តារ៉ូ កូណូ (TARO KONO) វ័យ៦៣ឆ្នាំ ក៏បានប្រជែងនឹង លោក Kishida ក្នុងការប្រកួតប្រជែងថ្នាក់ដឹកនាំបក្សចុងក្រោយផងដែរ ហើយត្រូវបានគេមើលឃើញថាជា ឈរឈ្មោះជាបេក្ខជនម្ដងទៀត។ លោកស្រី យ៉ូកូ កាមីកាវ៉ា (YOKO KAMIKAWA )វ័យ ៧១ឆ្នាំ ជារដ្ឋមន្ត្រីការបរទេសបច្ចុប្បន្ន គឺជាឥស្សរជនដែលមានឋានៈទាប ប៉ុន្តែបានទាក់ទាញការចាប់អារម្មណ៍ក្នុងនាមជាបេក្ខជនដែលអាចក្លាយជានាយករដ្ឋមន្ត្រីដ៏មានសក្តានុពលនៅក្នុងការស្ទង់មតិថ្មីៗនេះ។ ចុងក្រោយ លោក តាកាយ៉ូគី កូបាយ៉ាហ្ស៊ី (TAKAYUKI KOBAYASHI) វ័យ៤៩ឆ្នាំ ដែលបានបម្រើការជារដ្ឋមន្ត្រីទីមួយ ទទួលបន្ទុកសន្តិសុខសេដ្ឋកិច្ចត្រូវបានផ្តល់កិត្តិយសសម្រាប់ការអនុម័តច្បាប់ស្តីពីសន្តិសុខសេដ្ឋកិច្ចក្នុងគោលបំណងពង្រឹងខ្សែសង្វាក់ផ្គត់ផ្គង់ដ៏សំខាន់៕

ប្រជាជនជប៉ុន សម្តែងការភ្ញាក់ផ្អើល ចំពោះការលាចេញពីតំណែងរបស់នាយករដ្ឋមន្ត្រី

2024/08/14 02:31:28 pm        895
Facebook Telegram Linkin
ប្រជាជនជប៉ុនមួយចំនួន បាននិយាយថា «វាគឺជាការសម្រេចចិត្តដ៏អស្ចារ្យមួយ» ខណៈអ្នកផ្សេងទៀតសម្តែងការភ្ញាក់ផ្អើលចំពោះការសម្រេចចិត្តរបស់នាយករដ្ឋមន្ត្រី លោក Fumio Kishida នៅថ្ងៃពុធ នេះ ក្នុងការមិនឈរឈ្មោះសម្រាប់ការបោះឆ្នោតថ្មី ជាប្រធានគណបក្សប្រជាធិបតេយ្យសេរីនិយម (LDP) ដែលកំពុងកាន់អំណាចរបស់លោក និងការបន្តជាមេដឹកនាំនៃប្រទេសមានសេដ្ឋកិច្ចធំបំផុតទីបួនរបស់ពិភពលោក។ប្រជាជនចូលនិវត្តន៍ម្នាក់ បាននិយាយថា លោកសង្ឃឹមថា សមាជិកវ័យក្មេង នឹងត្រូវបានជ្រើសរើសឱ្យធ្វើជាអ្នកដឹកនាំ នៅក្នុងប្រទេសជប៉ុន។ លោក ប្រហែលជាត្រូវធ្វើការសម្រេចចិត្ត ព្រោះលោកគិតថា លោកគ្មានឱកាសទទួលជ័យជម្នះក្នុងការប្រកួតប្រជែងតំណែងជាថ្នាក់ដឹកនាំគណបក្សប្រជាធិបតេយ្យសេរីនិយមនោះទេ។ប្រជាជនដ៏ទៃទៀតចង់ឲ្យលោក Kishida នៅបន្ត។ លោក Naoya Okamoto បុគ្គលិកក្រុមហ៊ុនអាយុ ២២ ឆ្នាំ បាននិយាយថា ខ្លួនលោកផ្ទាល់ លោកសូមឱ្យលោក Kishida បន្តធ្វើជានាយករដ្ឋមន្ត្រី។ លោក Okamoto និយាយថា ប្រហែលជាលោក Kishida មានភាពតានតឹងអារម្មណ៍ដោយការវាយតម្លៃក្នុងអត្រាទាប។ការសម្រេចចិត្តលាលែងពីតំណែងរបស់លោក Kishida កើតឡើងក្នុងពេលមានភាពភ្ញាក់ផ្អើលអំពីទំនាក់ទំនងរបស់គណបក្ស ជាមួយព្រះវិហារបង្រួបបង្រួមដែលមានភាពចម្រូងចម្រាស និងបញ្ហាផ្សេងទៀតកាលពីពេលថ្មីៗនេះ និងការរៃអង្គាសថវិការបស់គណបក្សប្រជាធិបតេយ្យសេរីនិយម (LDP)ដែលពុំបានកត់ត្រា។

អាមេរិក ធ្វើសមយុទ្ធបាញ់គ្រាប់ពិតនៅកូរ៉េខាងត្បូង ជាផ្នែកនៃការដាក់ពង្រាយឆាប់រហ័ស

2024/08/14 02:16:43 pm        733
Facebook Telegram Linkin
យោធាសហរដ្ឋអាមេរិក បានធ្វើសមយុទ្ធបាញ់គ្រាប់ពិតនៅក្នុងប្រទេសកូរ៉េខាងត្បូង នៅថ្ងៃពុធ (14 សីហា) នេះដើម្បីសាកល្បងការត្រៀមខ្លួនសម្រាប់ការដាក់ពង្រាយឆាប់រហ័សរបស់ពួកគេទៅកាន់ឧបទ្វីបកូរ៉េ។ យោធានិយាយថា សមយុទ្ធដោយក្រុមប្រយុទ្ធនៃកងពលតូចរថពាសដែកទី១ ដែលមានមូលដ្ឋាននៅទីក្រុង ហ្វដប្លីស (Fort Bliss) រដ្ឋតិចសាស់ (Texas) បានធ្វើឡើងនៅឯតំបន់បាញ់គ្រាប់ពិត រ៉ូទ្រីហ្គេស (Rodriguez Live Fire Complex) ក្នុងទីក្រុង ផូឆុន (Pocheon) ចម្ងាយប្រហែល ៣០គីឡូម៉ែត្រភាគខាងត្បូងពីព្រំដែនដ៏រឹងមាំជាមួយកូរ៉េខាងជើង។ការដាក់ពង្រាយបណ្ដោះអាសន្ននេះ ធ្វើឡើងបន្ថែមពីលើទាហានអាមេរិកប្រមាណ ២៨.៥០០នាក់ ដែលឈរជើងក្នុងកូរ៉េខាងត្បូងរួចទៅហើយ ជាផ្នែកនៃកិច្ចខិតខំប្រឹងប្រែងដើម្បីរារាំងកូរ៉េខាងជើង ដែលមានអាវុធនុយក្លេអ៊ែរ។ សមយុទ្ធបាញ់គ្រាប់ពិតនៅថ្ងៃពុធនេះ ធ្វើឡើងនៅពេលដែលកូរ៉េខាងត្បូង និងសហរដ្ឋអាមេរិកគ្រោងនឹងធ្វើសមយុទ្ធយោធារដូវក្តៅប្រចាំឆ្នាំដ៏ធំរបស់ពួកគេនៅសប្តាហ៍ក្រោយ ដើម្បីបង្កើនសមត្ថភាពរបស់សម្ព័ន្ធមិត្តទាំងពីរក្នុងការទប់ទល់នឹងការគំរាមកំហែងអាវុធ និងអ៊ីនធឺណិតរបស់កូរ៉េខាងជើង៕

អាមេរិក អនុម័តការលក់កញ្ចប់សព្វាវុធតម្លៃ ២០ពាន់លានដុល្លារដល់អ៊ីស្រាអែល

2024/08/14 11:14:22 am        236
Facebook Telegram Linkin
សហរដ្ឋអាមេរិក កាលពីថ្ងៃអង្គារ (១៣ សីហា) បានអនុម័តការលក់យន្តហោះចម្បាំង និងគ្រឿងយុទ្ធោបករណ៍យោធាផ្សេងទៀតក្នុងទំហំទឹកប្រាក់ចំនួន ២០ពាន់លានដុល្លារទៅឱ្យអ៊ីស្រាអែល ខណៈប្រទេសនេះកំពុងបន្តសង្រ្គាមរយៈពេល ១០ខែនៅក្នុងតំបន់ហ្កាហ្សាស្ទ្រីប ដោយមន្ទីរបញ្ចកោណនិយាយថា ការចែកចាយលើកញ្ចប់សព្វាវុធទាំងនោះនឹងត្រូវចំណាយពេលរាប់ឆ្នាំ។មន្ទីរបញ្ចកោណបាននិយាយនៅក្នុងសេចក្តីថ្លែងការណ៍មួយថា រដ្ឋមន្ត្រីការបរទេសអាមេរិក លោក អង់តូនី ប្លីងខិន (Antony Blinken) បានអនុម័តការលក់យន្តហោះចម្បាំង F-15 និងគ្រឿងយុទ្ធោបករណ៍ដែលមានតម្លៃជិត ១៩ពាន់លានដុល្លារ រួមជាមួយនឹងគ្រាប់កាំភ្លើងរថក្រោះដែលមានតម្លៃ ៧៧៤លានដុល្លារ គ្រាប់កាំភ្លើងត្បាល់មានតម្លៃជាង ៦០លានដុល្លារ និងយានជំនិះសម្រាប់កងទ័ពមានតម្លៃ ៥៨៣លានដុល្លារ។ យន្តហោះចម្បាំង ប៊ូអ៊ីង ខូ អេហ្វ-១៥ (Boeing Co F-15) ត្រូវបានគេរំពឹងថានឹងចំណាយពេលច្រើនឆ្នាំដើម្បីផលិត ហើយការចែកចាយត្រូវរំពឹងថានឹងចាប់ផ្តើមនៅឆ្នាំ២០២៩។ គ្រឿងយុទ្ធោបករណ៍ផ្សេងទៀតនឹងចាប់ផ្តើមចែកចាយនៅឆ្នាំ២០២៦ នេះបើតាមមន្ទីរបញ្ចកោណ។ អ្នកជំនាញម្នាក់លើដំណើរការនេះនិយាយថា ការចែកចាយខ្លះអាចលឿនជាងឆ្នាំ២០២៦។រដ្ឋមន្ត្រីក្រសួងការពារជាតិអ៊ីស្រាអែល លោក យ៉ាវ ហ្កាឡាន់ (Yoav Gallant) នៅក្នុងការបង្ហោះនៅលើបណ្ដាញសង្គម X ដោយបានថ្លែងអំណរគុណដល់ក្រុមមន្ត្រីអាមេរិកដែលបានជួយអ៊ីស្រាអែល រក្សា «សមត្ថភាពយោធាប្រកបដោយគុណភាពនៅក្នុងតំបន់» និងការប្តេជ្ញាចិត្តរបស់សហរដ្ឋអាមេរិក ចំពោះសន្តិសុខរបស់អ៊ីស្រាអែល៕

ការអំពាវនាវរបស់អឺរ៉ុបឲ្យបន្ធូរបន្ថយភាពតានតឹងក្នុងជម្លោះតំបន់ហ្កាហ្សារបស់អ៊ីស្រាអែលគ្មានអ្នកស្ដាប់

2024/08/14 10:00:54 am        241
Facebook Telegram Linkin
អ៊ីរ៉ង់និយាយថា ខ្លួននឹងមានការតាំងចិត្តខ្ពស់ ក្នុងការការពារសន្តិសុខរបស់ខ្លួន បន្ទាប់ពីមានការប៉ុនប៉ងធ្វើអន្តរាគមន៍រួមគ្នាដោយចក្រភពអង់គ្លេស បារាំង និងអាល្លឺម៉ង់ មុនពេលកិច្ចចរចាបទឈប់បាញ់ដែលបានគ្រោងទុកនៅក្នុងដែនដីហ្កាហ្សា។ ក្រសួងការបរទេសរបស់អ៊ីរ៉ង់ បានថ្កោលទោសក្រុមមេដឹកនាំអឺរ៉ុប បន្ទាប់ពីពួកគេបានជំរុញឱ្យក្រុងតេអេរ៉ង់ រក្សាភាពអត់ធ្មត់ កុំបើកការវាយប្រហារសងសឹកលើអ៊ីស្រាអែល ខណៈមានសញ្ញាជាច្រើនលេចឡើងថា ជម្លោះនៅតំបន់ហ្កាហ្សាអាចរាលដាលទៅជាសង្គ្រាមមជ្ឈិមបូព៌ាកាន់តែធំ។អ៊ីរ៉ង់លើកឡើងថា ការសងសឹកគឺជាមធ្យោបាយក្នុងការបញ្ឈប់ឧក្រិដ្ឋកម្ម និងជាសិទ្ធិស្របច្បាប់របស់ខ្លួន។ សហរដ្ឋអាមេរិកបានព្រមានថា ការវាយប្រហារលើអ៊ីស្រាអែលដោយអ៊ីរ៉ង់ ជាការសងសឹកចំពោះការធ្វើឃាតមេដឹកនាំក្រុមហាម៉ាសលោក Ismail Haniyeh ក្នុងទីក្រុងតេអេរ៉ង់ និងមេបញ្ជាការក្រុម ហេសបូឡា លោក ហ្វ៊ូអាដ សុកឺ (Fuad Shukr) ក្នុងទីក្រុង បេរូត (Beirut) អាចកើតឡើងក្នុងរយៈពេលប៉ុន្មានថ្ងៃខាងមុខ។ អ្នកនាំពាក្យក្រុមប្រឹក្សាសន្តិសុខជាតិអាមេរិក លោក John Kirby បាននិយាយថា ពេលវេលានៃការវាយប្រហារសងសឹករបស់អ៊ីរ៉ង់ អាចនៅក្នុងសប្តាហ៍នេះ។ ដោយចេញសេចក្តីថ្លែងការណ៍រួម នាយករដ្ឋមន្រ្តីអង់គ្លេស លោក គៀរស្ដាមើ (Keir Starmer) លោកប្រធានាធិបតីបារាំង Macron និងអធិការបតីអាល្លឺម៉ង់ លោក អូឡាហ្វ សូល (Olaf Scholz) បានអំពាវនាវឱ្យអ៊ីរ៉ង់ កុំវាយប្រហារ ដែលនឹងធ្វើឱ្យភាពតានតឹងក្នុងតំបន់កាន់តែពុះកញ្ជ្រោលឡើងថែមទៀត ។មេដឹកនាំទាំងបីបានព្រមានថា រាល់ការវាយប្រហារមុនណាមួយលើអ៊ីស្រាអែលនឹង បង្កគ្រោះថ្នាក់ដល់ឱកាសក្នុងការយល់ព្រមបទឈប់បាញ់ និងការដោះលែងចំណាប់ខ្មាំង ដោយបន្ថែមថា គ្មានប្រទេសឬដែនដីណាមួយ ទទួលបានលផចំណេញពីការកើនឡើងជម្លោះបន្ថែមទៀតនៅមជ្ឈិមបូព៌ាឡើយ៕

លោកស្រី Hasina ជំរុញឱ្យអ្នកគាំទ្ររបស់ខ្លួននៅបង់ក្លាដែស បង្ហាញកម្លាំងជាសាធារណៈ

2024/08/14 09:45:10 am        198
Facebook Telegram Linkin
នាយករដ្ឋមន្ត្រីបង់ក្លាដែស ដែលត្រូវបានបណ្តេញចេញពីតំណែង លោកស្រី សេក ហាស៊ីណា (Sheikh Hasina) កាលពីថ្ងៃអង្គារ (១៣ សីហា) បានស្នើឱ្យអ្នកគាំទ្ររបស់ខ្លួនបង្ហាញពីភាពរឹងមាំ និងកម្លាំងរបស់ពួកគេជាសាធារណៈនៅចុងសប្តាហ៍នេះ ប៉ុន្មានម៉ោងបន្ទាប់ពីតុលាការបានសម្រេចថា ការស៊ើបអង្កេតករណីឃាតកម្មប្រឆាំងនឹងលោកស្រីដែលពាក់ព័ន្ធនឹងភាពចលាចលកាលពីខែមុន អាចដំណើរការបាន។លោកស្រី Hasina វ័យ ៧៦ឆ្នាំ បានភៀសខ្លួនកាលពីសប្តាហ៍មុនទៅកាន់ប្រទេសឥណ្ឌា ខណៈក្រុមបាតុករបានសម្រុកតវ៉ាក្នុងទីក្រុងដាកា ដែលនាំឱ្យបញ្ចប់ការគ្រប់គ្រងរយៈពេល ១៥ឆ្នាំរបស់លោកស្រី។ មនុស្សជាង ៤៥០នាក់ត្រូវបានសម្លាប់ និងរាប់រយនាក់របួសក្នុងអំឡុងពេលប៉ុន្មានសប្តាហ៍នៃភាពចលាចលនោះ។លោកស្រី Hasina បាននិយាយនៅក្នុងសេចក្តីថ្លែងការណ៍ជាលាយលក្ខណ៍អក្សរទៅកាន់អ្នកសារព័ត៌មានតាមរយៈកូនប្រុសរបស់ខ្លួនថា «ខ្ញុំសូមអំពាវនាវដល់អ្នកគាំទ្រឱ្យប្រារព្ធទិវាជាតិនៃការកាន់ទុក្ខនៅថ្ងៃទី១៤ ខែសីហា ដោយការគោរព និងឱឡារិក»។ លោកស្រីបានស្នើឱ្យអ្នកគាំទ្រនាំគ្នា «អធិស្ឋាន» នៅលំនៅឋានកុមារភាពរបស់ខ្លួនក្នុងរដ្ឋធានីដាកា និងបង្ហាញភាពរឹងមាំរបស់ពួកគេ។សេចក្តីថ្លែងការណ៍កាលពីថ្ងៃអង្គារនេះគឺជាការអត្ថាធិប្បាយជាសាធារណៈលើកដំបូងរបស់លោកស្រី Hasina ចាប់តាំងពីការលាលែងពីតំណែង។ លោកស្រីក៏បានទាមទារឱ្យមានការស៊ើបអង្កេតលើការសម្លាប់ និងអំពើឧក្រិដ្ឋកម្មផ្សេងទៀតក្នុងអំឡុងពេលចលាចលដែលបានបង្ខំឱ្យលោកស្រីចេញពីតំណែង ដោយពិរុទ្ធជនត្រូវតែ «កំណត់អត្តសញ្ញាណ និងផ្តន្ទាទោស»៕

[BREAKING NEWS] នាយករដ្ឋមន្ត្រីជប៉ុន លោក Kishida នឹងចុះពីតំណែងប្រធានបក្សកាន់អំណាចនៅខែកញ្ញា

2024/08/14 09:41:48 am        194
Facebook Telegram Linkin
ប្រព័ន្ធផ្សព្វផ្សាយបានរាយការណ៍នៅថ្ងៃពុធ (១៤ សីហា) នេះថា នាយករដ្ឋមន្ត្រីជប៉ុន លោក ហ្វ៊ូមីអូ គីស៊ីដា (Fumio Kishida) នឹងចុះចេញពីតំណែងជាមេដឹកនាំគណបក្សកាន់អំណាចនៅក្នុងខែកញ្ញា ដោយបញ្ចប់អាណត្តិរយៈពេល ៣ឆ្នាំ ក្នុងអំឡុងពេលដែលលោកបានជំរុញឱ្យមានប្រាក់ឈ្នួលខ្ពស់ និងបង្កើនការចំណាយលើវិស័យការពារជាតិ។លោក Kishida ដែលបានមើលឃើញការគាំទ្រជាសាធារណៈរបស់ខ្លួនធ្លាក់ចុះស្របពេលមានរឿងអាស្រូវជាបន្តបន្ទាប់ និងស្របពេលមានជម្លោះនយោបាយ នឹងមិនស្វះស្វែងរកការបោះឆ្នោតឡើងវិញនៅក្នុងតំណែងមេដឹកនាំគណបក្សប្រជាធិបតេយ្យសេរី (LDP) នោះទេ នេះបើយោងតាមប្រព័ន្ធផ្សព្វផ្សាយក្នុងស្រុក រួមទាំងទូរទស្សន៍សាធារណៈ NHK បានរាយការណ៍ ដោយសម្អាងដល់បុគ្គលិករដ្ឋបាលជាន់ខ្ពស់។ការសម្រេចចិត្តលាលែងពីតំណែងរបស់លោកនេះនឹងបង្កឱ្យមានការប្រកួតប្រជែងដើម្បីជំនួសតំណែងរបស់លោកជាប្រធានបក្ស និងដោយការបន្តជាមេដឹកនាំប្រទេសសេដ្ឋកិច្ចធំទីបួនរបស់ពិភពលោក។ អ្នកស្នងតំណែងបន្តពីនាយករដ្ឋមន្ត្រីជប៉ុនរូបនេះ នឹងប្រឈមមុខនឹងបញ្ហាកំណើនថ្លៃចំណាយប្រចាំថ្ងៃ ការកើនឡើងនៃភាពតានតឹងភូមិសាស្ត្រនយោបាយ និងលទ្ធភាពនៃការវិលត្រឡប់របស់លោក ដូណាល់ ត្រាំ (Donald Trump) ជាប្រធានាធិបតីសហរដ្ឋអាមេរិកនៅឆ្នាំក្រោយ៕

លោក Biden ហៅការវាយលុកចូលរបស់អ៊ុយក្រែនថា ជាទ្វេគ្រោះពិតប្រាកដសម្រាប់លោក Putin

2024/08/14 08:46:43 am        228
Facebook Telegram Linkin
លោកប្រធានាធិបតីអាមេរិក Joe Biden បាននិយាយកាលពីថ្ងៃអង្គារទី ១៣ ខែសីហាថា ការលុកលុយយោធារបស់អ៊ុយក្រែនចូលទៅក្នុងប្រទេសរុស្ស៊ី បានបង្កើតជាទ្វេគ្រោះពិតប្រាកដសម្រាប់លោកប្រធានាធិបតីរុស្ស៊ី លោក Vladimir Putin ដោយបន្ថែមថាក្រុមមន្ត្រីអាមេរិកកំពុងតាមដានស្ថានការយ៉ាងដិតដល់ចំពោះសកម្មភាពរបស់អ៊ុយក្រែន។មួយសប្តាហ៍បន្ទាប់ពីទាហានអ៊ុយក្រែនប្រហែល ១.០០០នាក់ បានឆ្លងព្រំដែនរុស្ស៊ីកាលពីព្រឹកព្រលឹមថ្ងៃទី ៦ខែសីហា អមដោយរថក្រោះ និងរថពាសដែក ក្រុមមន្ត្រីសហរដ្ឋអាមេរិកបាននិយាយថា ពួកគេនៅតែស្វែងរកដើម្បីសិក្សាពីអ្វីដែលអ៊ុយក្រែនចង់សម្រេចបានជាមួយនឹងការលុកលុយរបស់ខ្លួន។ ខណៈកំពុងឆ្លើយសំណួររបស់អ្នកសារព័ត៌មានពេលមកដល់ទីក្រុង New Orleans លោក Biden បាននិយាយថា លោកត្រូវបានគេផ្ដល់សេចក្ដីរាយការណ៍រៀងរាល់ ៤ ទៅ ៥ ម៉ោង ម្ដងសម្រាប់រយៈពេល ៦ ទៅ៨ ថ្ងៃចុងក្រោយអំពីសកម្មភាពរបស់អ៊ុយក្រែន។ លោកបាននិយាយនៅក្នុងការអត្ថាធិប្បាយសំខាន់ៗដំបូងរបស់លោកអំពីប្រតិបត្តិការនេះថា ស្ថានការណ៍នេះ កំពុងបង្កើតភាពទ្វេគ្រោះ ឬការលំបាកខ្លាំងយ៉ាងពិតប្រាកដសម្រាប់លោក Putin ។សហរដ្ឋអាមេរិកបានផ្តល់សព្វាវុធតម្លៃរាប់ពាន់លានដុល្លារដល់អ៊ុយក្រែន ភាគច្រើនសម្រាប់គោលបំណងការពារ ខណៈអ៊ុយក្រែនព្យាយាមវាយបកការឈ្លានពានរបស់រុស្ស៊ីកាលពីខែកុម្ភៈឆ្នាំ២០២២ ៕

លោក Biden និយាយថាបទឈប់បាញ់ហ្កាហ្សា អាចបញ្ឈប់អ៊ីរ៉ង់ មិនឱ្យវាយប្រហារអ៊ីស្រាអែល

2024/08/14 08:21:51 am        159
Facebook Telegram Linkin
ប្រធានាធិបតីអាមេរិក លោក ចូ បៃដិន (Joe Biden) បាននិយាយកាលពីថ្ងៃអង្គារ (១៣ សីហា) ថា កិច្ចព្រមព្រៀងបទឈប់បាញ់នៅតំបន់ហ្កាហ្សា អាចរារាំងអ៊ីរ៉ង់ ពីការវាយប្រហារលើអ៊ីស្រាអែល ក្នុងការសងសឹកចំពោះការសម្លាប់មេដឹកនាំក្រុមហាម៉ាស ដែលបានធ្វើឱ្យភាពតានតឹងក្នុងតំបន់កើនឡើងខ្លាំង។ការលើកឡើងរបស់លោកបានធ្វើឡើងបន្ទាប់ពីអ៊ីរ៉ង់ បានច្រានចោលការអំពាវនាវរបស់លោកខាងលិច ឱ្យ«បន្ធូរបន្ថយ» ការគំរាមកំហែងនៃការសងសឹករបស់ខ្លួន។ សាធារណរដ្ឋអ៊ីស្លាមមួយនេះ និងសម្ព័ន្ធមិត្តរបស់ខ្លួនបានស្តីបន្ទោសអ៊ីស្រាអែលចំពោះការសម្លាប់ លោក អ៊ីស្មេល ហានីយេ (Ismail Haniyeh) កាលពីថ្ងៃទី៣១ ខែកក្កដា នៅទីក្រុងតេអេរ៉ង់ ខណៈអ៊ីស្រាអែលមិនបានធ្វើអត្ថាធិប្បាយលើរឿងនោះទេ។ អ៊ីរ៉ង់បានប្តេជ្ញាសងសឹកយ៉ាងចាស់ដៃចំពោះការស្លាប់នេះ។នៅពេលត្រូវសាកសួរថា តើបទឈប់បាញ់រវាងអ៊ីស្រាអែល និងក្រុមហាម៉ាស អាចទប់ទល់នឹងការវាយលុករបស់អ៊ីរ៉ង់ដែរឬទេ លោក Biden បានឆ្លើយថា «នោះជាការរំពឹងទុករបស់ខ្ញុំ»។ លោកបានប្រាប់អ្នកយកព័ត៌មាននៅទីក្រុង ញូវស៍ អលីនស៍ (New Orleans) ថា៖ ទោះជាការចរចាកំពុងស្ថិតក្នុង «ស្ថានភាពពិបាក» ក៏លោក «នៅតែមិនបោះបង់ឡើយ»។អ្នកការទូតលោកខាងលិចបានព្យាយាមទប់ស្កាត់ជម្លោះដ៏ធំមួយនៅមជ្ឈិមបូព៌ា ដែលភាពតានតឹងបានកើនឡើងខ្ពស់រួចទៅហើយ ដោយសារតែសង្គ្រាមអ៊ីស្រាអែល និងក្រុមហាម៉ាសនៅតំបន់ហ្កាហ្សា។ សេតវិមានបានព្រមានថា «ការវាយប្រហារដ៏ធំជាច្រើន» ដោយអ៊ីរ៉ង់ និងសម្ព័ន្ធមិត្ត អាចកើតឡើងក្នុងសប្តាហ៍នេះ ដោយនិយាយថា អ៊ីស្រាអែលក៏បានចែករំលែកការវាយតម្លៃដូចគ្នានេះដែរ៕

ឯកអគ្គរដ្ឋទូតសាធារណរដ្ឋកូរ៉េបេ្តជ្ញាជំរុញទំនាក់ទំនងកម្ពុជា-កូរ៉េ ឱ្យកាន់តែរីកចម្រើនថែមទៀត

2024/08/13 03:47:06 pm        716
Facebook Telegram Linkin
សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នាព្រឹកថ្ងៃទី១៣ ខែសីហា ឆ្នាំ ២០២៤​នេះ​បានអនុញ្ញាតឱ្យ ឯកឧត្តម ផាក ជុងវុក (Park Jung-Wook) ឯកអគ្គ​រដ្ឋទូត​សាធារណ​រដ្ឋ​កូរ៉េ ប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងពិភាក្សាការងារ នៅ​វិមានសន្តិភាព។ក្នុងឱកាសនៃជំនួប ឯកឧត្តម ផាក ជុងវុក (Park Jung-Wook) ឯកអគ្គរដ្ឋទូតសាធារណរដ្ឋកូរ៉េ ប្រចាំ​ព្រះរាជាណាចក្រកម្ពុជា បានវាយតម្លៃខ្ពស់ចំពោះទស្សនកិច្ចផ្លូវការ របស់​សម្ដេច​ធិបតី​នៅ​សាធារណ​រដ្ឋកូរ៉េ កាលពីខែឧសភា ឆ្នាំ២០២៤ ដែលជាមូលដ្ឋានក្នុងការបន្តពង្រឹង និងពង្រីក​កិច្ច​សហប្រតិបត្តិការរវាងប្រទេសទាំងពីរ ឱ្យកាន់តែរឹងមាំបន្ថែមទៀត។ ឯកឧត្តម​ឯក​អគ្គ​រដ្ឋទូត​បាន​ប្ដេជ្ញា​ខិតខំ​ប្រឹងប្រែងជំរុញទំនាក់ទំនងសាធារណរដ្ឋកូរ៉េ-កម្ពុជាឱ្យកាន់តែរីកចម្រើនថែមទៀត តាម​រយៈកិច្ចសម្របសម្រួលយ៉ាងជិតស្និទ្ធជាមួយនឹងក្រសួង-សា្ថប័នពាក់ព័ន្ធរបស់កម្ពុជា ដើម្បី​អនុវ​ត្ត​ប្រកបដោយប្រសិទ្ធភាពនូវកិច្ចព្រមព្រៀង និងគំនិតផ្ដួចផ្ដើមនានា ដែលបាន​សម្រេច​ក្នុង​ដំណើរ​ទស្សនកិច្ចផ្លូវការខាងលើ។ សម្ដេចធិបតីបានកោតសសើរចំពោះការចូលរួមយ៉ាងសកម្មរបស់ឯកឧត្តម ឯកអគ្គរដ្ឋទូត ក្នុង​ការ​ពង្រឹង និងពង្រីកទំនាក់ទំនងកម្ពុជា-សាធារណរដ្ឋកូរ៉េ។ សម្តេច​ធិបតី​បាន​សម្តែង​ក្តី​រីក​រាយ​ចំពោះ​ភាព​រីក​ចម្រើនជាលំដាប់ និងជាបន្តបន្ទាប់នៃទំនាក់ទំនងរវាងប្រទេសទាំងពីរ ដែលត្រូវ​បាន​តម្លើង​កម្រិត​ដល់ “ភាពជាដៃគូយុទ្ធសាស្រ្ត” នៅក្នុងឆ្នាំ២០២៤នេះ។ សម្ដេចធិបតី បាន​អរគុណ​រដ្ឋាភិបាល និងប្រជាជននៃសាធារណរដ្ឋកូរ៉េ ដែលបានចូលរួមគាំទ្រ និងរួម​ចំណែក​ក្នុង​ការ​អភិវឌ្ឍ​សង្គម​-សេដ្ឋកិច្ចរបស់កម្ពុជា។ សម្ដេចធិបតី និងឯកឧត្តមឯកអគ្គរដ្ឋទូត ក៏បាន​ពិភាក្សា​គ្នាអំពី​កិច្ច​សហ​ប្រតិបត្តិការ​សំខាន់​ៗ​មួយ​ចំនួន រួមមាន៖ វិស័យពាណិជ្ជកម្ម និងវិនិយោគ, វិស័យការពារជាតិនិងសន្តិសុខ, វិស័យ​ទេសចរណ៍, ការផ្លាស់ប្ដូរប្រជាជននិងប្រជាជន ព្រមទាំងការបណ្តុះបណ្តាលជំនាញបច្ចេកទេស និង​វិជ្ជាជីវៈ។ ឯកឧត្តមឯកអគ្គរដ្ឋទូតបានកោតសរសើរកិច្ចខិតខំប្រឹងប្រែងរបស់សម្តេចធិបតី ក្នុង​ការ​ធ្វើ​ឱ្យ​កាន់តែប្រសើរឡើងនូវបរិយាកាសអំណោយផលដល់ការវិនិយោគនៅកម្ពុជា តាមរយៈ​ការ​ដាក់​ចេញ​នូវគោលនយោបាយលើកទឹកចិត្ត និងយន្តការសម្របសម្រួលជាច្រើន សំដៅបង្កើន​ទំនុក​ចិត្ត​ និងជោគជ័យរបស់វិនិយោគិនកូរ៉េដែលបណ្តាក់ទុននៅប្រទេសកម្ពុជា។ ឯកឧត្តម​ឯក​អគ្គ​រដ្ឋទូត​ក៏បានគូសបញ្ជាក់ថា វិនិយោគិនកូរ៉េមានការចាប់អារម្មណ៍ចំពោះប្រទេសកម្ពុជា បន្ទាប់​ពី​ដំណើរ​ទស្សនកិច្ចផ្លូវការរបស់សម្តេចធិបតី, សិក្ខាសាលា និងវេទិកាធុរកិច្ចជាបន្តបន្ទាប់៕

បណ្ដាញសង្គម

ព័ត៌មានថ្មីៗ

លោកស្រី Kamala Harris បក្សប្រជាធិបតេយ្យ បង្ហើបពីបំណងប្រជែងតំណែងប្រធានាធិបតីនៅឆ្នាំ ២០២៨
04/11/2026 11:04 AM
Facebook Telegram Linkin
នគរសង្ក្រាន្តផ្សារទួលទំពូង នឹងចាប់ផ្តើមដំណើរការមុនគេនៅរសៀលនេះ ក្នុងភូមិសាស្ត្រ​រាជធានីភ្នំពេញ
04/11/2026 11:04 AM
Facebook Telegram Linkin
ប្រជាពលរដ្ឋអាចមកចូលរួមធ្វើនំអន្សម នំខ្ញី និងអំបុកសម្រាប់ជូនជួរមុខ នៅទីតាំងភូមិវប្បធម៌
04/11/2026 11:04 AM
Facebook Telegram Linkin
ប្រជាជនលីបង់នៅទីក្រុងបេរូត បានចេញតវ៉ាប្រឆាំងការចរចារបស់រដ្ឋាភិបាលដែលរំពឹងទុកជាមួយ អ៊ីស្រាអែល
04/11/2026 11:04 AM
Facebook Telegram Linkin
ប្រសាសន៍សំខាន់ៗរបស់សម្ដេចធិបតី ហ៊ុន ម៉ាណែត ​ក្នុង​ពិធី​បើក​ការដ្ឋាន​គម្រោង​គ្រប់​គ្រង​ធន​ធាន​ទឹកចម្រុះហ្វូណនតេជោ កំណាត់ទី២
04/11/2026 11:04 AM
Facebook Telegram Linkin
លោក Trump និយាយថា សហរដ្ឋអាមេរិកនឹងឲ្យគេបើកច្រកសមុទ្រ Hormuz «ឆាប់ៗនេះយ៉ាងយុត្តិធម៌»
04/11/2026 11:04 AM
Facebook Telegram Linkin
កូរ៉េខាងត្បូង អនុម័តថវិកាបន្ថែមចំនួន១៧,៧ពាន់លានដុល្លារ ដើម្បីជួយទប់ទល់ផលប៉ះពាល់សង្គ្រាមនៅអ៊ីរ៉ង់
04/11/2026 11:04 AM
Facebook Telegram Linkin
លោក Netanyahu ស្នើសុំពន្យារពេលការផ្តល់សក្ខីកម្មក្នុងការជម្រះក្តីអំពើពុករលួយរបស់លោក
04/11/2026 11:04 AM
Facebook Telegram Linkin
សម្តេចធិបតី៖ គម្រោង«ព្រែកជីកហ្វូណនតេជោ»នឹង​ធ្វើឲ្យចប់ដូចការគ្រោងទុក មិន​បាន​ជាប់​គាំង​ដូច​ការ​លើកឡើងរបស់ជនមួយក្តាប់តូចនោះទេ
04/11/2026 10:04 AM
Facebook Telegram Linkin
លីបង់និយាយថា កិច្ចចរចាជាមួយអ៊ីស្រាអែល ត្រូវបានកំណត់នៅថ្ងៃអង្គារសប្តាហ៍ក្រោយ នៅអាមេរិក
04/11/2026 10:04 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.