នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជា សម្ពោធដាក់ឱ្យប្រើប្រាស់យុទ្ធសាស្រ្តពង្រីក និងពិពិធកម្មទីផ្សានាំចេញអង្ករ ២០២៥-២០៣០
ក្រុមការងារអន្តរក្រសួង (ត្រី-វិស័យ) អញ្ជើញចុះជួបសហគមន៍មូលដ្ឋាន សម្រាប់អនុវត្តអន្តរាគមន៍អន្តរវិស័យកសិកម្ម-ទឹក-ជនបទ
ឯកឧត្តម ស៊ុន ចាន់ថុល អញ្ជើញ​បើកកម្មវិធីផ្សព្វផ្សាយនិងបណ្តុះបណ្តាលអំពី នីតិវិធី​នៃ​ការ​ចុះ​បញ្ជី​គម្រោង​វិនិយោគតាមប្រព័ន្ធគ្រប់គ្រងគម្រោងវិនិយោគកម្ពុជា cdcIPM និងការប្រើប្រាស់​ហត្ថលេខា និងត្រាអេឡិចត្រូនិក (e-Signature & e-Stamp)
រយៈពេល៧ខែ, កម្ពុជានាំចេញទំនិញទៅសហរដ្ឋអាមេរិក មានទឹកប្រាក់ជិត ៧ពាន់លានដុល្លារ

សេដ្ឋកិច្ច និង កសិកម្ម

កម្ពុជា-កូរ៉េ បើកកិច្ចសន្ទនា ដើម្បីដោះស្រាយ និងបង្កើនបរិយាកាសវិនិយោគឱ្យកាន់តែប្រសើរ

2024/10/25 10:59:27 am        150
Facebook Telegram Linkin
កម្ពុជា-កូរ៉េ បើកកិច្ចសន្ទនាលើកដំបូង រវាងរដ្ឋ និងវិស័យឯកជន ដើម្បីជំរុញកិច្ចសហប្រតិបត្តិការ​សេដ្ឋកិច្ច ពាណិជ្ជកម្ម វិនិយោគ និងការដោះស្រាយ​បញ្ហាប្រឈម សំដៅធានាបាននូវភាព​សុខដុមរមនា ជំរុញធ្វើឱ្យប្រសើរឡើងនូវទំនាក់ទំនងសេដ្ឋកិច្ច និងបរិយាកាស វិនិយោគ។ឯកឧត្ដម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងឯកឧត្តម Park Jung Wook ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋកូរ៉េប្រចាំនៅកម្ពុជា នៅថ្ងៃទី ២៤ ខែតុលា ម្សិលមិញនេះ បានដឹកនាំកិច្ច សន្ទនា រវាងរដ្ឋ និងវិស័យឯកជនកម្ពុជា-កូរ៉េខាងត្បូង លើកទី១, ដែលកិច្ចសន្ទនាផ្លូវការនេះជាបៀបវារៈថ្មី ដែលរៀបចំឡើងក្រោម គំនិតផ្ដួចផ្ដើមរបស់ថ្នាក់ដឹកនាំនៃប្រទេសទាំងពីរ គឺសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងឯកឧត្តម យូន ស៊កយ៉ល ប្រធានាធិបតីនៃសាធារណរដ្ឋកូរ៉េ ក្នុងជំនួបកាលពីថ្ងៃទី ១៦ ខែ ឧសភា ឆ្នាំ ២០២៤ នៅសាធារណរដ្ឋកូរ៉េ។កិច្ចសន្ទនានេះមានគោលបំណងពង្រឹង និងជំរុញកិច្ចសហប្រតិបត្តិការសេដ្ឋកិច្ច, ពាណិជ្ជកម្ម, និងការវិនិយោគ ព្រមទាំងធ្វើ ឱ្យប្រសើរឡើង នូវទំនាក់ទំនងសេដ្ឋកិច្ច បរិយាកាសវិនិយោគ និងកសាងជំនឿទុកចិត្ត ពីសំណាក់សហគមន៍ធុរកិច្ចកូរ៉េ សំដៅជំរុញ ការវិនិយោគបន្ថែមទៀតមកកម្ពុជា។ នៅក្នុងការបើកកិច្ចសន្ទនានេះ, ឯកឧត្តមឧបនាយករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅ និងបានបញ្ជាក់ថា តាមរយៈនៃកិច្ចសន្ទនានេះ បានឆ្លុះបញ្ចាំងអំពីការយកចិត្តទុកដាក់របស់រាជរដ្ឋាភិបាលកម្ពុជា ដើម្បីស្ដាប់នូវរាល់កង្វល់របស់វិនិយោគិន កូរ៉េ តាមរយៈការប្រើប្រាស់របៀបវារៈផ្លូវការជាទៀងទាត់ សំដៅធានាដល់ការតាមដាន និងដោះស្រាយបញ្ហាប្រឈមរបស់វិនិយោគិន ជាអាទិភាព។ លើសពីនេះ ឯកឧត្តមឧបនាយករដ្ឋមន្រ្ដី ក៏បានធ្វើបច្ចុប្បន្នភាពថ្មី នូវព័ត៌មានពាក់ព័ន្ធនឹងនិន្នាការវិនិយោគនៅកម្ពុជា មានជាអាទិ៍ ស្ថានភាពនៃរំហូរវិនិយោគ និងវឌ្ឍនភាពនៃការដាក់ឱ្យដំណើរការសាកល្បងនូវប្រព័ន្ធគ្រប់គ្រងគម្រោងវិនិយោគកម្ពុជា (cdcIPM) ជូនភាគីមិត្តផងដែរ។ ចំណែក ឯកឧត្តមឯកអគ្គរដ្ឋទូត បានបង្ហាញនូវសេចក្ដីសោមនស្សរីករាយក្រៃលែង ដែលបានសហការរៀបចំកិច្ចសន្ទនានេះ ក្នុងគោលដៅរួមគ្នាពិនិត្យ និងពិភាក្សាអំពីបរិយាកាសវិនិយោគនៅកម្ពុជា ក៏ដូចជាចូលរួមចំណែកក្នុងការកែលម្អបរិស្ថានធុរកិច្ច សំដៅ ពង្រឹង និងពង្រីកវត្តមានរបស់សហគ្រាសកូរ៉េ ឱ្យមកបណ្តាក់ទុនវិនិយោគនៅលើទឹកដីកម្ពុជាបន្ថែមទៀត, ឯកឧត្តមក៏មានជំនឿចិត្ត យ៉ាងមុតមាំថា កិច្ចសហប្រតិបត្តិការសេដ្ឋកិច្ចទ្វេភាគី នឹងកាន់តែមានភាពស្រស់បំព្រងគួរជាទីមោទនៈ។សូមបញ្ជាក់ថា ក្នុងកិច្ចសន្ទនារវាងរដ្ឋ និងវិស័យឯកជន កម្ពុជា-កូរ៉េនេះ អង្គប្រជុំបានជជែកពិភាក្សាយ៉ាងផុសផុល ប្រកបដោយការ ទទួលខុសត្រូវខ្ពស់ លើប្រធានបទចំនួន៧ គ្របដណ្ដប់លើវិស័យពន្ធដារ ភស្ដុភារកម្ម និងហិរញ្ញវត្ថុ ជាមួយនឹងស្មារតីជឿជាក់ថា រាល់បញ្ហាប្រឈម ត្រូវតែមានដំណោះ ស្រាយឈ្នះ-ឈ្នះ សំដៅធានាបាននូវភាពសុខដុមរមនា និងភាពកក់ក្តៅជូនវិនិយោគិន៕ អត្ថបទ៖ សុន រ៉ាឌី

អគ្គនាយកដ្ឋានពន្ធដារ ផ្សព្វផ្សាយផ្នែកពន្ធដារដល់វិស័យឯកជន ដើម្បីលើកកម្ពស់​អនុលោមភាពការបង់ពន្ធ

2024/10/24 02:55:34 pm        193
Facebook Telegram Linkin
អគ្គនាយកដ្ឋានពន្ធដារ បាននិងកំពុងបន្តផ្សព្វផ្សាយផ្នែកពន្ធដារដល់វិស័យឯកជន ដែល​ប្រតិបត្តិការ​អាជីវកម្មនៅកម្ពុជា បាន សិក្សាស្វែងយល់បន្ថែម លើការអនុវត្ត​កាតព្វកិច្ច​នៃ​ការ​បង់ពន្ធ ក៏ដូចជាការគោរពអនុលោមភាពសារពើរពន្ធនៃព្រះរាជាណាចក្រកម្ពុជា។ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុក ជា​អគ្គនាយកនៃអគ្គនាយក ដ្ឋានពន្ធដារ លើកនៅក្នុងវេទិកាពន្ធដារឆ្នាំ ២០២៤ ដែល​រៀបចំ​ដោយ​សមាគម​វាយ​នភណ្ឌ ស្បែកជើង និងសម្ភារៈធ្វើដំណើរ នៅថ្ងៃទី ២៤ ខែ តុលា ឆ្នាំ ២០២៤ នេះថា ជុំវិញការរៀបចំវេទិកាស្តីពីពន្ធដារ ក្នុងរយៈពេលជាង ១ ទស្សវត្សមកនេះ អគ្គនាយក​ដ្ឋាន​ពន្ធដារ បានអនុវត្តកិច្ចការនេះជាច្រើន ដើម្បីពង្រឹងដល់វប្បធម៌ដល់ការបង់ពន្ធ និងការអប់រំ ដើម្បី​ឱ្យ​អ្នក​ជាប់ពន្ធបានយល់ច្បាស់ពីកាតព្វកិច្ច ពន្ធដារ។ឯក​ឧត្តម បន្ថែមថា ជុំវិញវប្បធម៌បងពន្ធនេះ ឃើញថា វិស័យឯកជនមានការយល់ដឹងជាច្រើន និង​បានចូលរួមដល់ការ បង់ពន្ធយ៉ាងផុលផុស ខណៈដែលអគ្គនាយកដ្ឋានពន្ធដារ បាន​កែ​ទម្រង់​ជា​បន្ត​បន្ទាប់ដូចជា ការកែទម្រង់ផ្នែកបទប្បញ្ញាត្តិឱ្យកាន់តែល្អ ប្រសើរ ហើយនៅពេល​កន្លង​មក​នេះ អគ្គនាយកដ្ឋានក៏បានចេញច្បាប់សារពើរឆ្នាំ ២០២៣ និងបទប្បញ្ញត្តិ​ពាក់ព័ន្ធ​ជា​បន្ត​បន្ទាប់​ទៀត​ ដោយឱ្យអ្នកជាប់ពន្ធ និងសាធារណៈជនបានយល់ច្បាស់អំពីច្បាប់ និងបទប្បញ្ញត្តិ​ទំាង​នោះ​។ ក្រៅពីនេះអគ្គនាយកដ្ឋានពន្ធដារ ក៏បាន ធ្វើទំនើបកម្មផ្នែកពន្ធដារ ឱ្យជារដ្ឋបាល​សារ​ពើពន្ធ​ឌីជីថល​ជារួម ការធ្វើទំនើបកម្មផ្នែកពន្ធដារនេះ កម្ពុជាបានកំពុងអនុវត្តមិនចាញ់ បរទេសនោះ​ឡើយ ទោះបីកម្ពុជាដើរក្រោយគេក៏ដោយ ក្នុងនោះសម្រាប់ការអនុវត្តនេះមានដូចជា ការ​ដាក់ឱ្យ​បង់ពន្ធ E-filling, ការដាក់ឱ្យបង់ពន្ធអនឡាញ, ការដាក់ឱ្យប្រើប្រាស់ E-Tax service ក្តី ហើយ​បច្ចុប្បន្ន អគ្គនាយកដ្ឋានពន្ធដារបានឈានទៅបង្កើត E-take and taxation ដើម្បី​ប្រាស្រ័យ​ទាក់​ទង​មក​ពន្ធដារ តាមរយៈប្រព័ន្ធអេឡិចត្រូនិចទាំងអស់។ឯកឧត្តម គង់ វិបុល បញ្ជាក់ថា ទាក់ទិននិងការធ្វើទំនើបកម្មនេះ អគ្គនាយក​ដ្ឋាន​ពន្ធដារ​បាន​ធ្វើ​ឱ្យ​អ្នក​ជា​ប់ពន្ធ មានការងាយស្រួល ក្នុងការបង់ពន្ធ ការផ្តល់សេវាបានរហ័ស ប្រកបដោយតម្លាភាព ក្នុង​នោះចំពោះផ្នែកអនុលោមភាពវិស័យឯកជន អគ្គនាយកដ្ឋាន ពន្ធដារ នៅតែបន្តផ្សព្វផ្សាយ ក៏ដូច​ជាការបណ្តុះបណ្តាល ក្នុងគោលដៅពង្រឹងនូវវិស័យនេះឱ្យមានអនុលោមភាពផ្នែកពន្ធដារ បាន ស្គា​ល់នូវកាតព្វកិច្ចពន្ធដារប្រសើរជាងមុន និងបានធ្វើ​បច្ចុប្បន្ន​ភាព​លើការ​កែទម្រង់​នៅ​វិស័យ​ពន្ធដារនេះ ក៏ដូចជាការធ្វើទំនើបកម្មឱ្យ បានយល់ច្បាស់ផងដែរ៕អត្ថបទ៖ សុន រ៉ាឌី

អ្នកជំនាញ៖ កម្ពុជាត្រូវជំរុញធ្វើពិពិធកម្មលើវិស័យកសិកម្មបន្ថែម ដើម្បីជំរុញការនាំចេញ និងបង្កើតការងារ

2024/10/23 01:34:39 pm        141
Facebook Telegram Linkin
កម្ពុជាត្រូវតែជំរុញធ្វើពិពិធកម្មលើវិស័យកសិកម្ម ផលិត និងការកែច្នៃទៅ​ជា​ផលិតផល​សម្រេច​ផ្សេង​ៗ​ឱ្យបានច្រើន ដើម្បីគាំទ្រដល់ កំណើននៃការនាំចេញ ការបង្កើតតម្លៃបន្ថែម និងបង្កើត​កម្លាំង​​ពលកម្មផងដែរ។  អ្នកជំនាញសេដ្ឋកិច្ច វិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា គឺលោកបណ្ឌិត ហុង វណ្ណៈ លើកឡើងនៅក្នុង កិច្ចសម្ភាសន៍ជាមួយ BTV ស្តីពីការអភិវឌ្ឍន៍ និងការកែ​ច្នៃ​ផលិត​ផល​ចេញ​វិស័យកសិកម្ម នេះថា ជុំវិញវិស័យកសិកម្មនេះ ឃើញថា រាជរដ្ឋាភិបាល​បាន​កំពុង​យក​ចិត្ត​ទុក​ហើយ ក្នុងនោះវិស័យឯកជនក៏កំពុងខិតខំក្នុងការដាំដុះផងដែរ ស្របពេលការ​នាំ​ចេញ​ក៏​មាន កំណើនជាបណ្តើរៗ តែនាំចេញភាគច្រើនគឺជាកសិផលស្រស់។ទាក់ទងដំណើរផលិតវិញ, លោកបណ្ឌិត ចង់ឱ្យកសិករ ម្ចាស់កសិដ្ឋាន និងអ្នក​ធ្វើ​អាជីវកម្ម​នៅ​​ក្នុង​វិស័យ​នេះ ងាកទៅរកការធ្វើពិពិធកម្ម ជំរុញផលិត និងកែច្នៃចេញពីវិស័យ​នេះ​ក្លាយ​ទៅ​ជា​ផលិត​ផល​​សម្រេចផ្សេងៗឱ្យបានច្រើន ដើម្បីបង្កើតតម្លៃបន្ថែម លើវិស័យនេះឱ្យកាន់តែធំ ពិសេស​ជាង​នេះ​ទៅ​ទៀត ប្រសិនយើងបង្កើតនូវផលិតផលសម្រេចផ្សេងៗ ពិភពលោកនឹងអាចស្គាល់កម្ពុជា កាន់តែច្រើន តាមរយៈផ្លាកយីយោផ្សេងៗ ដែលអាចអូសទាញដល់ការនាំចេញផងដែរ ព្រោះ​ប្រទេ​សកម្ពុជាបានដាំដុះដំាណាំកសិកម្ម ល្អៗជាច្រើនដូចជា៖ ស្វាយកែរមៀត, ស្វាយចន្ទី, ខ្នុរ, ចេក, ដំឡូងមី, និងស្រូវជាដើម សុទ្ធសឹងជាកសិផលដែលអាចកែច្នៃបាន ជាក់​ស្តែង​គ្រាប់​ស្វាយ​ចន្ទី នាពេលកន្លងមក កម្ពុជាភាគច្រើននាំចេញគ្រាប់ស្រស់ ការនាំចេញរៀបនេះ គឺមិនបាន​តម្លៃ​ខ្ពស់​នោះ​ឡើយ។ចំណែកជុំវិញទីផ្សារនាំចេញ, នាពេលថ្មីៗនេះ, បណ្ឌិត តាន់ មុនីវណ្ណ អនុប្រធា​ន​សភា​ពាណិជ្ជ​កម្ពុជា និងជាអ្នកជំនាញផ្នែក កសិកម្ម ថ្លែងថា នៅក្នុងអាណត្តិទី៧ នៃរដ្ឋសភានេះ រាជរដ្ឋាភិបាល និង​បន្ត​លើកទឹកចិត្ត ជំរុញផលិត និងកែច្នៃឲ្យបានច្រើន ដើម្បីនាំ ចេញកសិផលចម្រុះ ក្នុងនោះ​នា​ពេល​កន្លងមកនេះ ឯកឧត្តម ស៊ុន ចាន់ថុល ឧបនាយ ករដ្ឋមន្ត្រី អនុប្រធានទី១ ក្រុមប្រឹក្សា​អភិវឌ្ឍន៍កម្ពុជា បានដឹកនាំប្រតិភូកម្ពុជាទៅកាន់សហរដ្ឋអាមេរិក ដើម្បីបង្ហាញជូនវិស័យឯកជន ពី​វឌ្ឍនភាពថ្មីៗនៃសក្ដានុពល និងបរិយាកាស វិនិយោគនៅកម្ពុជា។ តាមរយៈនេះ យើងរំពឹងថា ទីផ្សារ​អាមេរិកនឹងស្រូបយកកសិផលពីវិស័យកសិកម្មរបស់កម្ពុជាមួយផ្នែកបន្ថែម ទៀត បន្ទាប់​ពី​សម្លៀក​បំពាក់ ស្បែកជើង និងសម្ភារៈធ្វើដំណើរ ដោយនឹង​ជួយ​គាំទ្រ​ដល់​កំណើន​នៃ​ការ​នាំ​ចេញ​ទំនិញ​របស់​កម្ពុជា។សូមបញ្ជាក់ថា នៅពាក់កណ្តាលឆ្នាំនេះ រាជរដ្ឋាភិបាលបានព្យាករថា វិស័យកសិកម្ម ត្រូវ​បាន​ប៉ាន់​ស្មាន​រក្សា​បាននូវកំណើនក្នុងរង្វង់ ០,៧% ដែលទ្រទ្រង់ដោយកំណើនល្អនៃអនុវិស័យដំណាំ និង​ការ​ងើប​វិញនៃអនុវិស័យនេសាទ ខណៈអនុវិស័យចិញ្ចឹមសត្វជួបបញ្ហា ប្រឈមមួយចំនួន ធ្វើ​ឱ្យ​ប៉ះ​ពាល់​ដល់ផលិតកម្មក្នុងស្រុក ដែលតម្រូវ​ឱ្យ​រាជ​រដ្ឋាភិបាល​ដាក់​ចេញ​នូវ​វិធាន​ការ​ពង្រឹង​ការ​គ្រប់​គ្រង​ការនាំចូលសាច់បង្កក សំដៅដោះស្រាយផលប៉ះពាល់អវិជ្ជមាននេះ។ អនុវិស័យដំណាំ ត្រូវ​បាន​ប៉ាន់​ស្មានថាមានកំណើន ១,៦% ដោយសារ ការរំពឹងទុកនូវកំណើននៃផលិតកម្ម ទាំង​សម្រាប់​តម្រូវការក្នុងស្រុកនិងបម្រើការនាំចេញ ដែលគាំទ្រដោយភាពល្អប្រសើរនៃថ្លៃ កសិផល, ការបន្តងើបនៃវិស័យទេសចរណ៍, ការបន្តកើននៃសកម្មភាពសេដ្ឋកិច្ច និងការ​ជួយ​ជ្រោម​ជ្រែង​ពី​រាជរដ្ឋាភិបាល តាមរយៈ ហិរញ្ញប្បទាន និងវិធានការផ្សេងៗ៕ អត្ថបទ៖ សុន រ៉ាឌី 

ប្រព័ន្ធបច្ចេកវិទ្យា CamDX កំពុងលើកកម្ពស់ដល់ការចុះបញ្ជី ការទាក់ទាញធុរកិច្ច និងការវិនិយោគ

2024/10/23 01:06:04 pm        136
Facebook Telegram Linkin
ប្រព័ន្ធបច្ចេកវិទ្យា CamDX របស់រដ្ឋាភិបាល កំពុងដើរតួយ៉ាងសំខាន់លើការចែករំលែកព័ត៌មាន ការកាត់បន្ថយបន្ទុករដ្ឋបាល និងការជំរុញលើកកម្ពស់ដល់ដំណើរការចុះបញ្ជី ការទាក់ទាញធុរកិច្ច និងអ្នកវិនិយោគ ដោយជំរុញការធ្វើពាណិជ្ជកម្មនៅកម្ពុជាកាន់តែប្រសើរ។ឯកឧត្តមបណ្ឌិត គង់ ម៉ារី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារអន្តរក្រសួង រៀបចំសេវា អេឡិចត្រូនិកសម្រាប់ធុរកិច្ច លើកឡើងក្នុងកម្មវិធីស្ដីពីការធ្វើឌីជីថលូបនីយកម្មសេវាសាធារណៈ ពាក់ព័ន្ធនឹងធុរកិច្ចរបស់ក្រសួង ស្ថាប័ន នៃរាជរដ្ឋាភិបាល តាមប្រព័ន្ធផ្សព្វផ្សាយផ្លូវការ Online business registration នេះថា ការចុះបញ្ជីពាណិជ្ចកម្មនេះ ជាការចាប់ផ្តើមមានការ ចូលរួមពីក្រសួងពាណិជ្ជកម្ម អគ្គនាយកដ្ឋានពន្ធដារ ក្រសួងការងារបណ្តុះបណ្តាលវិជ្ជាជីវ: និងក្រុមប្រឹក្សាអភិវឌ្ឍន៍កម្ពុជា បន្ទាប់មក CamDX ក៏បានពង្រីកថែមទៀត ដែលដំណាលបន្ទាប់នេះ ធ្វើយ៉ាងណា ដើម្បីជួយសម្រួលឱ្យមានភាពងាយស្រួលដល់ការ សុំអាជ្ញា ប័ណ្ណ និងលិខិ អនុញ្ញាតតាមរយៈប្រព័ន្ធអនឡាញ ។ បញ្ហានេះ ក្រសួងពាណិជ្ជកម្ម ក៏ដូចអគ្គនាយកដ្ឋានពន្ធដារ គឺមានប្រព័ន្ធចុះបញ្ជី នេះជាយូរណាស់មកហើយ តែទោះបីយ៉ាងណា ក៏នៅតែមិនអាចដោះស្រាយបញ្ហាប្រឈម ដែលកើតចេញពីការស្នើរចុះឈ្មោះ។ បញ្ហា នេះដោយសារអវត្តមាននៃការផ្លាស់ប្តូរទិន្នន័យ នៃប្រព័ន្ធទាំងអស់ធ្វើការដាច់ដោយឡែកពីគ្នាដោយមិនអាចចែករំលែកគ្នាបាន។ ឯកឧត្តមបណ្ឌិត បន្តថា ដោយមើលឃើញពីបញ្ហាទាំងនេះ ហើយផ្អែកប្រព័ន្ធដែលមានស្រាប់ CamDX បានព្យាយាមឱ្យ ប្រព័ន្ធទាំងបីនេះផ្លាស់ប្តូរទិន្នន័យជាមួយគ្នា ដោយយើងមិនចាំបាច់បង្កើតអ្វីឡើងវិញថ្មីនោះទេ ដែលតាមរយៈនេះយើងបង្កើតថ្នាល ផ្លាស់ប្តូរទិន្ន័យកម្ពុជា Data Exchange ដោយអនុញ្ញាត្តិឱ្យប្រព័ន្ធបច្ចេកវិទ្យាព័ត៌មានឌីជីថលក្រសួងពាណិជ្ជកម្ម ថ្ពាក់ជាមួយបច្ចេក វិទ្យារបស់ អគ្គនាយកដ្ឋានពន្ធដារ ក៏ដូចក្រសួងការងារ ដែលយើងអាចមើលឃើញាអង្គតែមួយ ហើយប្រព័ន្ធនេះបានចែករំលែកតាម រយៈ CamDX ទៅស្ថាប័នទាំងបីនោះ ដោយបានផ្តល់ភាពងាយស្រួលក្នុងការចុះបញ្ជីត្រឹមរយៈពេល ៨ ថ្ងៃប៉ុណ្ណោះ ចំណែកការចំ ណាយក្នុងការចុះបញ្ជី ក៏មានតម្លៃធូរថ្លៃផងដែរ។ ចំណែកដំណាក់កាលទី២ និងទី៣, CamDX បានឈរលើគោលការណ៍នេះដូចគ្នា ជារួម, ការផ្លាស់ប្តូរទិន្ន័យជារឿងមួយល្អបំផុត ដើម្បីឱ្យក្រសួងស្ថាប័នធ្វើការជាមួយគ្នា តាមរយៈការប្រើប្រាស់បច្ចេកវិទ្យាព័ត៌មាន ពោល គឺការប្រើប្រាស់ប្រព័ន្ធអនឡាញមានសារៈសំខាន់ណាស់ ជម្រុញលើកកម្ពស់ដល់ការចុះបញ្ជី និងការទាក់ទាញវិនិយោគផងដែរ។ សូមបញ្ជក់ថា ជុំវិញការចុះបញ្ជី តាមប្រព័ន្ធចុះបញ្ជីអាជីវកម្មនៃថ្នាលបច្ចេកវិទ្យាព័ត៌មាននេះ បើគិតមកដល់ថ្ងៃទី៥ ខែតុលា ឆ្នាំ២០២៤ នេះ កម្ពុជាទទួលបានការចុះបញ្ជីពាណិជ្ជកម្ម ការចុះបញ្ជីពាណិជ្ជកម្ម ការពិនិត្យ និងប្រកាសជូនដំណឹងបើកសហគ្រាស មាន ចំនួនក្រុមហ៊ុនចុះបញ្ជី ជាង ៣៨ ពាន់ និងមានចំនួននាមប័ណ្ណបម្រុងទុក ជាង ២០ ពាន់ ដោយមានដើមទុនចុះបញ្ជីសរុបជិត ១៣ ប៊ីលានដុល្លារអាមេរិក៕ អត្ថបទ៖ សុន រ៉ាឌី 

កម្ពុជារៀបចំពិព័រណ៍វិស័យអចលទ្រព្យ ដើម្បីបង្ហាញការវិវត្តថ្មីៗ និងការស្វែងរកដៃគូ​វិនិយោគបន្ថែម

2024/10/21 11:03:04 am        96
Facebook Telegram Linkin
កម្ពុជារៀបចំព្រឹត្តិការណ៍ពិព័រណ៍វិស័យអចលទ្រព្យ និងវិស័យសំណង់ ដើម្បីបង្ហាញ​នូវ​ការ​វិវត្ត​ថ្មី​ៗ​នៅ​លើវិស័យនេះ ការស្វែងរក ដៃគូវិនិយោគទាំងក្នុងនិងក្រៅប្រទេស និងការលក់​វិស័យ​អចល​ទ្រព្យ ខណៈដែលវិស័យនេះនៅមិនទាន់មានកំណើនល្អក្នុងសេដ្ឋកិច្ច។ក្រុមពាណិជ្ចករនៅក្នុងវិស័យអចលទ្រព្យ លើកឡើងនៅក្នុងព្រឹត្តិការណ៍តាំងពិព័រណ៍ ២០២៤ នៅ​ថ្ងៃទី២០ ខែតុលាម្សិលមិញនេះថា នៅមុនវិបត្តិនៃការផ្ទុះជំងឺកូវីដ-១៩ វិស័យអចលនទ្រព្យ និង​សំណង់នៅកម្ពុជា មានសម្ទុះរីកច្រើនគួរកត់សម្គាល់ ដោយ បានចូលរួ​ម​ចំណែក​ក្នុង​វិស័យ​ការងារ និងកំណើនសេដ្ឋកិច្ចបានយ៉ាងល្អប្រសើរ ប៉ុន្តែខណៈដែលវិបត្តិនេះកើតឡើង បាន​ធ្វើ​ឱ្យ​សេដ្ឋកិច្ចសកល ក៏ដូចនៅកម្ពុជា វិស័យនេះបានធ្លាក់ចុះយ៉ាងខ្លាំង។ក្រុម​ពាណិជ្ជករទាំងនោះ បានលើកឡើងស្រដៀងគ្នាទៀតថា បន្ទាប់​ពី​វិស័យ​នេះ​ស្រុត​ចុះជា​ង​ច្រើន​ បច្ចុប្បន្នឃើញថា វិស័យ មួយចំនួនបានកំពុងរើបឡើងវិញខ្លះ តែស្ថិតនៅក្នុ​ង​កម្រិត​ទាប​នៅ​ឡើយ ក្នុងនោះតាមរយៈព្រឹត្តិការណ៍តាំងពិព័រណ៍នេះ និងស្រប ពេលរាជរដ្ឋាភិបាល បានបន្ទូរ​បន្ថយ និង​លើកទឹកចិត្តផ្នែកពន្ធដារ ចំពោះវិស័យអចលនទ្រព្យ, ពន្ធប្រថាប់ត្រានៃការផ្ទេរកម្មសិទ្ធិ ឬសិទ្ធិ កាន់កាប់អចលនទ្រព្យ, ពន្ធលើចំណេញមូលធន, ពន្ធលើអចលនទ្រព្យជាដើម ដែលការលើកលែង ការអនុគ្រោះ និងការព្យួរពន្ធនេះ គឺជាការលើកទឹកចិត្តដ៏សំខាន់ដល់អ្នកអភិវឌ្ឍន៍វិស័យអចលនទ្រព្យ និងសំណង់ និងអ្នករកស៊ីផ្សេងៗលើផ្នែកនេះ អាចបន្តដំណើរការ អភិវឌ្ឍន៍គម្រោងរបស់ខ្លួន ស្របពេលវិស័យខុនដូកំពុងរើបឡើងវិញ ខណៈដែលភ្ញៀវបរទេសកំពុងចាប់អារម្មណ៍ឱកាសវិនិយោគលើ វិស័យអចលនទ្រព្យនិងសំណង់នេះ។ទាក់ទិនការរៀបចំពិព័រណ៍នេះ, លោក សន សៀប ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា មើលឃើញថា ការរៀបចំពិព័រណ៍នៅពេលនេះពិតជាមានសារៈសំខាន់ណាស់ ក្នុងការគៀងគរ ប្រមែមូលអ្នកអភិវឌ្ឍន៍វិស័យអចលនទ្រព្យទាំងក្នុងនិង ក្រៅប្រទេស បានជួបជុំគ្នា ស្វែងរកចំណុះគន្លឹះវិជ្ជមានមួយចំនួន ដើម្បីនាំគ្នាអភិវឌ្ឍន៍វិស័យនេះឱ្យមានសម្ទុះឡើងវិញ។លោកបានបញ្ជាក់ឱ្យដឹងថា ទាក់ទងវិស័យអចលនទ្រព្យនេះ មកដល់បច្ចុប្បន្នផ្នែកខ្លះនៃវិស័យអចលនទ្រព្យ ចាប់ផ្តើមមាន ភាពវិជ្ជមានដូចជា៖ វិស័យខុនដូ ការអភិវឌ្ឍន៍គម្រោងបម្រើឱ្យវិស័យឧស្សាហកម្ម ក៏ដូចជាវិស័យកសិកម្ម ជាពិសេសវិស័យខុនដូ ដែលបច្ចុប្បន្ន ឃើញថា វិនិយោគិនបរទេសបានកំពុងចាប់យកឱកាសនៃការវិនិយោគលើវិស័យនេះ ពេលដែលនៅលើទីផ្សារមានការ ទិញ-លក់ច្រើន៕ អត្ថបទ៖ សុន រ៉ាឌី

អ្នកនាំចេញមានសុទិដ្ឋិយមថា ការនាំចេញផលិតផលស្បែកជើង​នឹងមានកំណើន​ថែមទៀត​ក្នុងឆ្នាំនេះ

2024/10/21 10:50:13 am        157
Facebook Telegram Linkin
អ្នកនាំចេញផលិតផលស្បែកជើងនៅកម្ពុជា បានបង្ហាញជំនឿជឿជាក់ថា ការ​នាំ​ចេញ​ផលិត​ផល​ស្បែក​ជើង​ទៅកាន់ទីផ្សារអន្តរជាតិនៅឆ្នាំ២០២៤នេះ នឹងទទួលកំណើនល្អប្រសើរ​ជាង​ឆ្នាំ​២០២៣​បន្ថែម​ទៀត ខណៈគិតក្នុងរយៈពេល ៩ខែ ឆ្នាំនេះ សម្រេចបានកំណើនប្រមាណជាង ២៣% បើធៀបរយៈពេលដូចគ្នាទៅនឹងឆ្នាំ២០២៣។អ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជា និងជាប្រធានសមាគមសហព័ន្ធអ្នកវិនិយោគកម្ពុជា បានមានប្រសាសន៍ប្រាប់ព័ត៌មាន ប៊ីធីវី ឲ្យដឹងកាលពីសប្តាហ៍កន្លងទៅថា គិតមកដល់ពេលនេះ សមាគមស្បែកជើងកម្ពុជា បានបង្កើតឡើងរយៈពេល ៥ឆ្នាំមកហើយ ដោយមើលឃើញពីការកើនឡើងជាបន្តបន្ទាប់នៃទំនាក់ទំនង និងការអភិវឌ្ឍនៃវិស័យឧស្សាហកម្ម ជាពិសេសឧស្សាហកម្មស្បែកជើង ដែលជាឧស្សាហកម្មដ៏សំខាន់មួយក្នុងប្រទេសកម្ពុជា ដែលលេចចេញជាលទ្ធផលជាទីគាប់ប្រសើរនៅក្នុងទីផ្សារពិភពលោកនាពេលបច្ចុប្បន្ន។អ្នកឧកញ៉ា បានឲ្យដឹងទៀតថា សមាគមស្បែកជើង បានអភិវឌ្ឍខ្លួនឥតឈប់ឈរ និងសម្រេចបាននូវភាពរីកចម្រើននានា ជាពិសេសការរួមចំណែកក្នុងវិស័យឧស្សាហកម្មស្បែកជើងនៅកម្ពុជា ក្នុងការលើកកម្ពស់ការអភិវឌ្ឍវិស័យឧស្សាហកម្ម និងការលើកកម្ពស់ការប្រកួតប្រជែងទីផ្សារ ដោយបង្កើតការងារបានជាង ១៤ម៉ឺនកន្លែង ដែលនេះជាបេសកម្មដ៏សំខាន់សម្រាប់សមាគមមួយនេះ។ លោកបន្ថែមថា គិតចាប់ពីខែមករា រហូតមកដល់ខែកញ្ញា ឆ្នាំ២០២៤ ទំហំនាំចេញសម្រេចបាន ១,២ពាន់លានដុល្លារ។អ្នកឧកញ៉ា លី ឃុនថៃ បានបញ្ជាក់ថា ប្រសិនបើគ្មានការគាំទ្រពីរាជរដ្ឋាភិបាលកម្ពុជា និងដៃគូពាក់ព័ន្ធទេ នោះ សមាគមស្បែកជើងកម្បុជា ក៏មិនអាចកសាងឲ្យមានភាពរឹងមាំ និងសម្រេចលទ្ធផលដ៏ល្អប្រសើរដូចសព្វថ្ងៃនេះដែរ។ពាក់ព័ន្ធទីផ្សារនាំចេញនេះដែរ លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា បានឲ្យ ប៊ីធីវី ដឹងដែរថា រហូតមកដល់សព្វថ្ងៃនេះ ការធ្វើពាណិជ្ជកម្មរបស់ប្រទេសកម្ពុជានៅតែមានសកម្មភាពល្អប្រសើរ ជាពិសេសការនាំចេញទំនិញកម្ពុជា ទៅកាន់ទីផ្សារប្រទេសចិន។ ជាក់ស្តែង បើទោះបីជាស្ថិតក្នុងភាពមិនប្រាកដប្រជានៃវិបត្តសកលយ៉ាងណាក្តី ប៉ុន្តែកម្ពុជានៅតែមានឱកាសក្នុងការអភិវឌ្ឍខ្លួន។សូមបញ្ជាក់ថា ប្រទេសកម្ពុជា បានស្ថិតនៅចំណាត់ថ្នាក់ទី១ ក្នុងឆ្នាំ២០២៤នេះ សម្រាប់ប្រទេសមានកំណើនផលិតផលក្នុងស្រុកខ្លាំង និងថេរ អត្រាអតិផរណាទាប និងកំណើនយ៉ាងឆាប់រហ័សក្នុងវិស័យវិនិយោគផ្ទាល់ពីបរទេស៕អត្ថបទ ឈិត បូរ៉ាវី

ឯកឧត្តមរដ្ឋមន្រ្តី ឌិត ទីណា អញ្ជើញចែកស្រូវពូជជូនដល់ប្រជាពលរដ្ឋដែលរងផលប៉ះពាល់​ដោយសារគ្រោះទឹកជំនន់ក្នុងភូមិសាស្រ្តខេត្តកំពង់ធំ

2024/10/18 01:51:00 pm        202
Facebook Telegram Linkin
នាព្រឹកថ្ងៃទី១៨​ ខែតុលា​ ឆ្នាំ២០២៤​ ឯកឧត្តម ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញចុះចែកស្រូវពូជជូនដល់ប្រជាពលរដ្ឋដែលរងផលប៉ះពាល់ដោយសារគ្រោះទឹកជំនន់ នៅសាលាស្រុកកំពង់ស្វាយ​ ខេត្តកំពង់ធំ។ថ្លែងទៅកាន់អង្គវេទិកា ឯកឧត្តមរដ្ឋមន្រ្តី​ បានពាំនាំនូវការសួរសុខទុក្ខ និងការយកចិត្តទុកដាក់ពីសំណាក់ប្រមុខរាជរដ្ឋាភិបាល សម្ដេចមហាបវរធិបតីនាយករដ្ឋមន្ដ្រី ជូនដល់បងប្អូនប្រជាកសិករដែលរងផលប៉ះពាល់ដោយសារគ្រោះទឹកជំនន់។​ លើសពីនេះ​ ឯកឧត្តមរដ្ឋមន្រ្តី​ បានផ្តល់អនុសាសន៍ឱ្យបងប្អូនប្រជាកសិករចូលរួមសហការគិតគូរឱ្យបានវែងឆ្ងាយ​ ទទួលស្តាប់នូវការណែនាំរបស់ក្រសួងស្ថាប័នពាក់ព័ន្ធ​ពីការព្យាករណ៍ធាតុអាកាស បំរែបំរួលអាកាសធាតុ​ ដើម្បីកាត់បន្ថយនូវផលប៉ះពាល់​ ដោយមិនប្រថុយធ្វើស្រែទាំងមានហានិភ័យខ្ពស់។បើតាម​ ឯកឧត្តម​រដ្ឋមន្រ្តី​ គោលដៅរបស់រាជរដ្ឋាភិបាល​គឺជួយបងប្អូនប្រជាកសិករ​ឱ្យមានសន្តិសុខស្បៀង​ និងមានប្រសិទ្ធភាពសេដ្ឋកិច្ច​ ពោលគឺមានហូបគ្រប់គ្រាន់​ និងមានបាន​ ដោយរាជរដ្ឋាភិបាល​មិនទុកនរណាម្នាក់ចោលនោះទេ​ និងតែងតែយកចិត្តទុកដាក់​ ផ្តល់ជំនួយ​ ព្រមទាំងជួយស្តារនូវផលប៉ះពាល់កន្លងមក។ទន្ទឹមនឹងនេះ​ ឯកឧត្តមរដ្ឋមន្រ្តី​ បានគូសបញ្ជាក់បន្ថែមថា ក្រោមការដឹកនាំដ៏ស្វាហាប់ និង ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា រាជរដ្ឋាភិបាលបានដាក់ចេញនូវកម្មវិធីគោលនយោបាយអាទិភាព ក្នុងការរក្សាស្ថេរភាពថ្លៃកសិផល កាត់បន្ថយថ្លៃដើមផលិត​ ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ និងការរៀបចំសហគមន៍កសិកម្មទំនើប ដើម្បីជួយគាំទ្រលើផ្នែកបច្ចេកទេស ការផ្តល់ព័ត៌មានការប្រឹក្សាយោបល់ និងជួយដោះស្រាយបញ្ហាពាក់ព័ន្ធនឹងការងារកសិកម្មដល់កសិករក្នុងគោលបំណងបង្កើនផលិតភាពកសិកម្ម ជំរុញជីវភាព ធានាបាននូវសន្តិសុខ និងសុវត្តិភាពស្បៀងផងដែរ។សូមបញ្ជាក់ជូនថា ឯកឧត្តមរដ្ឋមន្ដ្រីក្រសួងកសិកម្ម បានចែកស្រូវពូជចំនួន​ ៣០០តោន​ជូនដល់កសិករចំនួនប្រមាណ​ ៥.០០០​គ្រួសារ មកពី​ ៧ក្រុង-ស្រុក ក្នុងខេត្តកំពង់ធំដែលបានរងការខូចខាតនូវផលដំណាំស្រូវប្រមាណ​ ៥.០០០​ ជាងហិចតា៕ 

និយ័តករគណនេយ្យ ដាក់ឱ្យអនុវត្តប្រព័ន្ធបច្ចេកវិទ្យាចំនួនពីរ សម្រាប់វិស័យ​សាធារណៈ និងឯកជន

2024/10/18 11:59:53 am        119
Facebook Telegram Linkin
និយ័តករគណនេយ្យ និងសវនកម្ម ដាក់ឱ្យអនុវត្តនូវប្រព័ន្ធសទ្ទានុក្រមគណនេយ្យ និងសវនកម្ម តាម​ទូរស័ព្ទវៃឆ្លាត និងថ្នាលរៀប ចំរបាយការណ៍ហិរញ្ញវត្ថុឌីជីថលសម្រាប់សហគ្រាសធុនតូច និង​មធ្យម និងអង្គភាពមិនស្វែងរកប្រាក់ចំណេញ ដែលនឹងផ្តល់ប្រយោជន៍ ជាច្រើន​សម្រាប់​វិស័យ​សាធារណៈ និងឯកជន។ឯកឧត្តម ប៊ូ ថារិន អគ្គនាយកនិយ័តករគណនេយ្យ និងសវនកម្ម លើកឡើង​ក្នុង​ពិធី​បើក​វទិកា​ជាតិ​គណនេយ្យ ក្រោមប្រធានបទ "តួនាទីនៃគណនេយ្យនិងបច្ចេកវិទ្យា​ហិរញ្ញវត្ថុ​កម្ពុជា​សម្រាប់​ចក្ខុ​វិស័យឆ្នាំ២០៣០”នៅថ្ងៃទី ១៧ ខែ តុលា ម្សិលមិញនេះថា ការងារធ្វើទំនើកម្ម ដោយ​ប្រើ​ប្រាស់​បច្ចេកវិទ្យាឌីជីថល និយ័តករគណនេយ្យ និងសវនកម្ម បាននិងកំពុង​ក្លាយ​ជា​ការ​ងារ​អាទិភាព​មួយ ក្នុងចំណោមការងារអាទិភាពផ្សេងទៀត។ ជាក់ស្តែងប៉ុន្មានឆ្នាំចុងក្រោយនេះ និយ័តករ​គណនេយ្យ និងសវនកម្ម បានរៀបចំនិងដាក់ ឱ្យអនុវត្តសេវា​សាធារណៈ​តាម​ប្រព័ន្ធ​ឌីជីថល​រួម​មាន៖ ប្រព័ន្ធគ្រប់គ្រងការដាក់របាយការណ៍ហិរញ្ញវត្ថុ តាមអនឡាញ (E-Filing) សម្រាប់​សហគ្រាស និងអង្គភាពមិនស្វែងរកប្រាក់ចំណេញ ប្រព័ន្ធគ្រប់គ្រង​ការ​ស្នើ​សុំ​អាជ្ញា​បណ្ណ​ប្រកប​វិជ្ជាជីវៈគណនេយ្យ និងសវន- កម្មតាមអនឡាញ (E-License), និងប្រព័ន្ធ​គ្រប់​គ្រង​ឯកសារ​ចញ-ចូល និងការដាក់ឱ្យដំណើរការប្រព័ន្ធចំនួនពីរខាងលើ នៅក្នុង ពេលនេះជាដើម។ឯកឧត្តម បន្តថា ចំពោះថ្នាលរៀបចំរបាយការណ៍ហិរញ្ញវត្ថុឌីជីថល ត្រូវបាន​កំណត់​ច្បាស់​នៅ​ក្នុង​សេចក្តី​ព្រាង​យុទ្ធសាស្ត្រ អភិវឌ្ឍន៍វិស័យគណនេយ្យ និងសវនកម្មនៅកម្ពុជា ២០២៥-២០៣៥ ក្រោម​គម្រោងរបាយការណ៍ហិរញ្ញវត្ថុឌីជីថល ។ គម្រោងថ្នាល រៀបចំរបាយ​ការណ៍​ហិរញ្ញវត្ថុ​ឌីជីថល ត្រូវបានចែកចេញជា៣ដំណាក់កាល ២០២៤ដល់២០៣០។ ការអភិវឌ្ឍ​ដំណាក់​កាល​ទី១ បានផ្ដោតសំខាន់ទៅលើការរៀបចំថ្នាលរៀបចំរបាយការណ៍ហិរញ្ញវត្ថុឌីជីថល សម្រាប់​សហ​គ្រាស និងអង្គភាពមិនរងសវនកម្ម ។ ដំណាក់ កាលទី២ និងពង្រីក​បន្ថែម​មុខ​ងារ​ថ្នាល​បច្ចេក​វិទ្យា​ព័ត៌មាន ឱ្យមានវិសាលភាពបន្ថែមសម្រាប់របាយការណ៍អង្គភាព រងសវនកម្ម ឯករាជ្យ។ ក្នុង​ដំណាក់​កាលទី៣ នឹងពង្រីកវិសាលភាពដល់ការរៀបចំរបាយការណ៍ជាទម្រង់ XBRL (Extended Business Reporting Language)។ឯកឧត្តម ប៊ូ ថារិន បញ្ជាក់ថា ការដាក់ឱ្យអនុវត្ត “ថ្នាលរៀបចំរបាយការណ៍ហិរញ្ញវត្ថុឌីជីថល នឹង​នាំ​មកនូវផលប្រយោជន៍ ជាច្រើន ទាំងសម្រាប់វិស័យសាធារណៈ និងទាំងវិស័យឯកជន ក្នុង​នោះ​ស​ម្រាប់វិស័យឯកជន នឹងទទួលបានអត្ថប្រយោជន៍ដូចជា៖ ជួយសម្រួលដល់ដំណើរការរៀបចំ និង​កាត់បន្ថយចំណាយក្នុងរបាយការណ៍ហិរញ្ញវត្ថុ និងកំណត់សម្គាល់របស់របាយការណ៍ ដោយ ផ្អែក​តាម​ទម្រង់រួមបែបឌីជីថល និងទិន្ន័យដែលមានលក្ខណៈស្តង់ដា។ ការជួយកាត់​បន្ថយ​កំហុស​ឆ្គង ​និងបង្កើនកម្រិតអនុលោមភាព ក្នុងការរៀបចំរបាយការណ៍ហិរញ្ញវត្ថុ តាមរយៈ​គោលការណ៍​ផ្ទៀង​ផ្ទាត់​អនុលោមភាពដោយស្វ័យប្រវត្តិ ក្នុងការរៀបចំរបាយការណ៍ ហិរញ្ញវត្ថុបែបឌីជីថល ។ បង្កើន​គុណភាព នៃរបាយការណ៍ហិរញ្ញវត្ថុ ដែលអនុលោមតាមស្តង់ដារបាយការណ៍ហិរញ្ញវត្ថុ ដោយ​ផ្អែកតាមវដ្តករសាស្ត្រគណនេយ្យរបស់ស្តង់ដារបាយការណ៍អន្តរជាតិ (IFRS Accounting Taxonomy) ។ បង្កើនគុណភាពនៃការ សម្រេចចិត្តហិរញ្ញវត្ថុ និងការវិនិយោគ ដោយផ្អែក​តាម​ការ​វិភាគ​អនុបាតហិរញ្ញវត្ថុគោល (Financial Benchmarking) ក្នុងកម្រិតការ វិភាគថ្នាក់វិស័យ និ​ង​ប្រទេស និងការបង្កើនលទ្ធភាពទទួលបានហិរញ្ញប្បទាន ដែលរបាយការណ៍ហិរញ្ញវត្ថុ ដែល​បាន​ដាក់មកនិយត័ករ អាចចែករំលែកទៅឱ្យស្ថាប័នហិរញ្ញវត្ថុក្នុងទម្រង់ឌីជីថល៕ អត្ថបទ៖ សុន រ៉ាឌី

កម្ពុជារៀបចំវេទិកាជាតិគណនេយ្យ ដើម្បីជាមូលដ្ឋានគ្រឹះ ជំរុញឱ្យសម្រេចតាម​ចក្ខុវិស័យ​ឆ្នាំ២០៣០

2024/10/17 02:13:05 pm        96
Facebook Telegram Linkin
កម្ពុជារៀបចំវេទិកាជាតិគណនេយ្យ ២០២៤ ដើម្បីផ្ដល់នូវព័ត៌មានអំពីវឌ្ឍនភាពថ្មី​ៗ​នៃ​វិស័យ​គណនេយ្យ និងសវនកម្ម និងប្រមូល ធាតុចូលសម្រាប់ជាមូលដ្ឋានបន្ថែម ក្នុងការរៀបចំ និង​ការ​កែ​លម្អ​ក្របខ័ណ្ឌគោលនយោបាយយុទ្ធសាស្ត្រ ជាពិសេសការពង្រឹងតួនាទី និយ័តករ និង​គណនេយ្យ​ករជំនាញ ក្នុងការសម្រេចបាននូវចក្ខុវិស័យឆ្នាំ២០៣០ ។ឯកឧត្តម ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជា​ប្រធាន​ក្រុម​ប្រឹក្សា​អាជ្ញាធរ​សេវា​ហិរញ្ញវត្ថុមិនមែនធនា គារ លើកឡើងនៅក្នុងពិធីបើកវទិកាជាតិគណនេយ្យ ក្រោមប្រធាន​បទ "តួនាទីនៃគណនេយ្យនិងបច្ចេកវិទ្យាហិរញ្ញវត្ថុកម្ពុជាសម្រាប់ ចក្ខុវិស័យឆ្នាំ២០៣០”នៅថ្ងៃទី ១៧ ខែតុលា ឆ្នាំ២០២៤នេះថា ការរៀបវេទិកាជាតិគណនេយ្យនេះ មានគោលបំណងសំខាន់ ដើម្បីផ្ដល់នូវព័ត៌មានដល់សិក្ខាកាម អំពីវឌ្ឍនភាពថ្មីៗនៃវិស័យគណនេយ្យ និងសវនកម្ម​នៅ​កម្ពុជា, និងដើម្បីប្រមូលធាតុចូលពីអ្នក ចូលរួមទាំងអស់ សម្រាប់ជាមូលដ្ឋានបន្ថែម ក្នុងការ​រៀប​ចំ និង​ការកែលម្អក្របខ័ណ្ឌគោលនយោបាយយុទ្ធសាស្ត្រ និងក្របខណ្ឌបទប្ប- ញ្ញត្តិពាក់ព័ន្ធ នឹង​វិស័យ​គណនេយ្យ និងបច្ចេកវិទ្យាហិរញ្ញវត្ថុ ជាពិសេសក្នុងការពង្រឹងតួនាទីនិយ័តករ និង​គណនេយ្យករជំនាញ ក្នុង ការសម្រេចបាននូវចក្ខុវិស័យឆ្នាំ ២០៣០ របស់ប្រទេសកម្ពុជា ឱ្យ​ទៅ​ជា​ប្រទេសចំណូលមធ្យមកម្រិតខ្ពស់។ ចំណែកទាក់ទងបច្ចេកវិទ្យា, ឯកឧត្តម បន្តថា ដើម្បីទាញយក​ប្រយោជន៍​អតិបរមា​ពី​បច្ចេក​វិទ្យា​ឌីជីថល, រាជរដ្ឋាភិបាលនីតិ- កាលទី៦នៃរដ្ឋសភា បានប្រកាសដាក់ឱ្យអនុវត្តនូវ «ក្របខ័ណ្ឌគោ​ល​​នយោបាយសេដ្ឋកិច្ចនិងសង្គមឌីជីថលកម្ពុជា២០២១-២០៣៥» នៅឆ្នាំ២០២១ ។ លើ​មូល​ដ្ឋាន​នេះ រាជរដ្ឋាភិបាលនីតិកាលទី ៧ នៃរដ្ឋសភា ក៏បានប្រកាសដាក់ឱ្យអនុវត្តនូវ «យុទ្ធសាស្ត្រ​បញ្ច​កោណ ដំណាក់កាលទី១» ដោយក្នុងនោះ «បច្ចេកវិទ្យា, ពិសេសបច្ចេកវិទ្យាឌីជីថល, ត្រូវ​បាន​កំណត់ជាអាទិភាពគន្លឹះថ្មីមួយទៀត, បន្ថែម ពីលើអាទិភាពគន្លឹះ ទាំង ៤ នៃយុទ្ធសាស្ត្រ​ចតុ​កោណ​ ពោលគឺ ៖ មនុស្ស, ផ្លូវ, ទឹក និង ភ្លើង» ។ អាទិភាពគន្លឹះថ្មីនេះ ត្រូវបានយក មក​រៀប​ចំ​ជា​វិធានការ យុទ្ធសាស្ត្រ សម្រាប់ការអនុវត្តជាក់ស្ដែងនៅក្នុងបញ្ចកោណទី៥ នៃ «យុទ្ធសាស្ត្រ​បញ្ច​កោណ​ដំណាក់​កាលទី១ គឺបញ្ចកោណស្តីពី «ការកសាងសេដ្ឋកិច្ចនិងសង្គមឌីជីថល» ។ឯកឧត្តម ងី តាយី បន្ថែមថា ស្របគ្នានេះ យុទ្ធសាស្ត្រអភិវឌ្ឍន៍វិស័យគណនេយ្យ និងសវន​កម្ម​នៅ​កម្ពុជា ២០២៥-២០៣៥ នឹងដាក់ឱ្យអនុវត្តក្នុងពេលដ៏ខ្លីខាងមុខ សម្រាប់ជាមគ្គុទេសន៍ និង​ជា​ផែន​ទី​បង្ហាញផ្លូវ ក្នុងការអនុវត្តបេសកកម្មរបស់និយ័តករគណ- នេយ្យ និងសវនកម្ម ក្នុង​បុព្វ​ហេតុ​ធានា​ឱ្យប្រព័ន្ធគណនេយ្យនិងសវនកម្មជាតិមួយរឹងមាំ មានតម្លាភាព និងអាចជឿទុកចិត្តបាន។ឯកឧត្តម ប៊ូ ថារិន អគ្គនាយកនិយ័តករ គណនេយ្យនិងសវនកម្ម លើកឡើងផងដែរថា ដើម្បី​សម្រេច​បាន​នូវគោលបំណង និងគោលដៅដូច​បាន​កំណត់​នៅ​ក្នុង​គោល​នយោបាយ​រដ្ឋាភិបាល​ឌីជីថលកម្ពុជា យុទ្ធសាស្ត្រ ផែនការយុទ្ធសាស្ត្រ និងផែនការសកម្ម- ភាពមួយចំនួន ត្រូវ​បាន​រៀប​ចំ ​និងកំពុងរៀបចំដាក់ឱ្យអនុវត្តគោលនយោបាយអភិវឌ្ឍន៍បច្ចេកវិទ្យាហិរញ្ញវត្ថុកម្ពុជា២០២៣-២០២៨។ស្របគ្នានេះ, សេចក្តីព្រាងផែនការយុទ្ធសាស្ត្រអភិវឌ្ឍន៍បច្ចេកវិទ្យាហិរញ្ញវត្ថុ ក្នុងវិស័យ​ហិរញ្ញ​វត្ថុ​មិន​មែន​ធនាគារ និងសេចក្តីព្រាងយុទ្ធ សាស្រ្តអភិវឌ្ឍន៍វិស័យនិងវិជ្ជាជីវៈគណនេយ្យ និងសវនកម្មនៅកម្ពុជា ២០២៥-២០៣៥ គឺជាធាតុសំខាន់មួយ ដើម្បីសម្រេចឱ្យបាន នូវ​គោល​ដៅ​យុទ្ធ​សាស្ត្ររបស់វិស័យគណនេយ្យ និងសវនកម្មនៅកម្ពុជា គឺប្រព័ន្ធគណ​នេយ្យ និង​សវនកម្ម​ជាតិ​រឹងមាំ និងអាចជឿទុក ចិត្តបាន ក្នុងបរិការណ៍សេដ្ឋកិច្ចឌីជីថល។ ដើម្បី​សម្រេច​នូវ​គោល​ដៅ​ខាង​លើ តួអង្គពាក់ព័ន្ធ ទាំងក្នុងវិស័យសាធារណៈ ក៏ដូចជាវិស័យ ឯកជន ត្រូវពង្រឹង​សមត្ថភាព​ស្ថាប័ន​របស់​ខ្លួន ពិសេសការធ្វើបរិវត្តកម្មឌីជីថល សេវាសាធារណៈក្រោមសមត្ថកិច្ចរបស់ខ្លួន ឱ្យបានជាអតិបរមា តាមតែអាចធ្វើទៅបាន៕ អត្ថបទ៖ សុន រ៉ាឌី

ក្រសួងសេដ្ឋកិច្ចចេញប្រកាសថ្មី នៃការលើកទឹកចិត្តចំពោះការកែតម្រូវ​លិខិតប្រកាសពន្ធ​ដោយស្ម័គ្រចិត្ត

2024/10/17 01:15:14 pm        219
Facebook Telegram Linkin
អ្នកជាប់ពន្ធ ឬភ្នាក់ងារកាត់ទុក ដែលស្នើសុំធ្វើការកែតម្រូវបញ្ជីគណនេយ្យ និងលិខិតប្រកាសពន្ធឡើងវិញដោយស្ម័គ្រចិត្ត ត្រូវ ទទួលបានការលើកលែងទណ្ឌកម្មរដ្ឋបាលរួមមាន ពន្ធបន្ថែម ការប្រាក់ និងការផាកពិន័យជាប្រាក់ទាំងស្រុង ដោយទុករយៈពេលរហូត ដល់ដំណាច់ខែ មិថុនា ឆ្នាំ២០២៥។ក្រសួងសេដ្ឋកិច្ច និងហិរញ្ញវត្ថុ ចេញប្រកាស ស្តីពីការកែសម្រួលប្រការ៣ នៃប្រកាសលេខ ០៧១ សហវ.ប្រក.អពដ ចុះថ្ងៃទី ៣០ ខែ មករា ឆ្នាំ២០២៤ ស្តីពីការលើកទឹកចិត្តចំពោះការកែតម្រូវលិខិតប្រកាសពន្ធដោយស្ម័គ្រចិត្ត ដោយប្រការ ៣ ថ្មីនេះបានកែ សម្រួល គឺអ្នកជាប់ពន្ធ ឬភ្នាក់ងារកាត់ទុកដែលស្នើសុំធ្វើការកែតម្រូវបញ្ជីគណនេយ្យ និងលិខិតប្រកាសពន្ធឡើងវិញដោយស្ម័គ្រចិត្ត ត្រូវទទួលបានការលើកលែងទណ្ឌកម្មរដ្ឋបាលរួមមាន ពន្ធបន្ថែម ការប្រាក់ និងការផាក ពិន័យជាប្រាក់ទាំងស្រុង ដោយទុករយៈពេល រហូតដល់ដំណាច់ខែមិថុនា ឆ្នាំ២០២៥ ដូចជា៖ ចំពោះការស្នើសុំកែតម្រូវបញ្ជីគណនេយ្យ និងលិខិតប្រកាសពន្ធឡើងវិញ លើប្រតិ- បត្តិការដែលកើតឡើងមុនការិយបរិច្ឆេទ ខែ សីហា ឆ្នាំ ២០២៤ តែប៉ុណ្ណោះ។ ដោយឡែក ការស្នើសុំកែតម្រូវលិខិតប្រកាសពន្ធ លើ ប្រតិបត្តិការដែលកើតឡើងចាប់ពីខែ សីហា ឆ្នាំ២០២៤ តទៅ មិនត្រូវទទួលបានការលើកលែងទណ្ឌកម្មរដ្ឋបាលនេះឡើយ។ចំពោះការស្នើសុំកែតម្រូវបញ្ជីគណនេយ្យ និងលិខិតប្រកាសពន្ធឡើងវិញ ក្នុងអំឡុងពេលរងសវនកម្មពន្ធដារ ដែលការកែ តម្រូវនោះ បានធ្វើឡើងមុនពេលសវនករពន្ធដាររកឃើញកំហុសរបស់អ្នកជាប់ពន្ធ ឬភ្នាក់ងារកាត់ទុកតែប៉ុណ្ណោះ (ក្នុងករណីសវនករ មិនទាន់បានបង្ហាញ និងគ្មានកំណត់ហេតុបញ្ជាក់ពីលទ្ធផលសវនកម្ម)។ប្រសិនបើការកែតម្រូវលិខិតប្រកាសពន្ធ លើលទ្ធផលសវនកម្មដែលសវនករបានរកឃើញ ក្នុងអំឡុងពេលរងសវនកម្មពន្ធដារ អ្នកជាប់ពន្ធ ឬភ្នាក់ងារកាត់ទុក ត្រូវទទួលរងពន្ធបន្ថែម ១០ ភាគរយ និងការប្រាក់ ១,៥ ភាគរយ ស្របតាមច្បាប់ និងលិខិតបទដ្ឋាន គតិយុត្ត ស្ដីពីពន្ធដារជាធរមាន។ ករណីនេះអ្នកជាប់ពន្ធ ឬភ្នាក់ងារកាត់ទុក នឹងត្រូវទទួលរងពន្ធបន្ថែម និងការប្រាក់ តាមនីតិវិធី និង លទ្ធផលនៃការធ្វើសវនកម្មពន្ធដារ ដោយពន្ធបន្ថែម និងការប្រាក់ដែលបានបង់រួច តាមរយៈការកែតម្រូវលិខិតប្រកាសពន្ធដោយស្ម័គ្រ ចិត្ត ត្រូវអនុញ្ញាតឱ្យកាត់កងជាមួយនឹងពន្ធបន្ថែម និងការប្រាក់ដែលជាលទ្ធផលនៃការធ្វើសវនកម្ម៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

លោក Putin៖ រុស្ស៊ី និងចិន ប្រឆាំងនឹងការដាក់ទណ្ឌកម្ម «រើសអើង» នៅក្នុងពាណិជ្ជកម្មពិភពលោក
08/30/2025 02:08 PM
Facebook Telegram Linkin
សម្ដេចធិបតី ហ៊ុន ម៉ាណែត បានអញ្ជើញទៅដល់អាកាសយានដ្ឋានអន្តរជាតិ Tianjin Binhai នៅទីក្រុងធានជីន ប្រកបដោយសុវត្ថិភាព
08/30/2025 01:08 PM
Facebook Telegram Linkin
លោក Anutin ជាបេក្ខជននាំមុខ សម្រាប់តំណែងនាយករដ្ឋមន្ត្រី ក្រោយតុលាការបណ្ដេញលោកស្រី Paetongtarn
08/30/2025 01:08 PM
Facebook Telegram Linkin
ឯកឧត្តម គន់ គីម ណែនាំដល់ក្រុមការងារសមាជិកគណបក្សចូលរួមកាន់តែសកម្ម ក្នុងកិច្ចការមនុស្សធម៌ ជួយជនភៀសសឹក ដែលប្រឈមដោយសារជម្លោះព្រំដែន
08/30/2025 12:08 PM
Facebook Telegram Linkin
ឯកអគ្គរដ្ឋទូតបារាំង ប្រគល់អំណោយសម្ភារៈអភិរក្សបណ្ណសារដល់ទីស្តីការគណៈរដ្ឋមន្រ្តី
08/30/2025 11:08 AM
Facebook Telegram Linkin
លោក Zelenskiy ចង់បានការចរចាកម្រិតខ្ពស់លើការធានាសន្តិសុខ នៅសប្តាហ៍ក្រោយ
08/30/2025 11:08 AM
Facebook Telegram Linkin
ក្រុមបាតុករឥណ្ឌូនេស៊ី បង្កអគ្គិភ័យនិងដុតអគារ ខណៈភាពវឹកវរបានផ្ទុះឡើងក្នុងទីក្រុង Bandung
08/30/2025 11:08 AM
Facebook Telegram Linkin
ទួរគី បិទដែនអាកាសសម្រាប់អ៊ីស្រាអែល និងហាមឃាត់នាវាអ៊ីស្រាអែលពីកំពង់ផែទួរគី
08/30/2025 11:08 AM
Facebook Telegram Linkin
គ្រប់ទិដ្ឋភាពពិតនៃវិនាសកម្មបង្កលើកម្ពុជាក្នុងជម្លោះព្រំដែនកម្ពុជាថៃ ត្រូវបានលាតត្រដាងដល់ពិភពលោកបានឃើញ ខណៈដំណើរទស្សនកិច្ចអ្នកសារព័ត៌មានតំបន់អាស៊ីឈានដល់ទីបញ្ចប់
08/30/2025 11:08 AM
Facebook Telegram Linkin
ប្រធានាធិបតីរុស្ស៊ី លោកPutin នឹងធ្វើទស្សនកិច្ចនៅប្រទេសឥណ្ឌាក្នុងខែធ្នូ
08/30/2025 11:08 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.