នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជា-ម៉ាឡេស៊ី បង្កើនកិច្ចសហប្រតិបត្តិការជំរុញ​បរិយាកាស​ធ្វើធុរកិច្ច​ឱ្យ​កាន់​តែ​ខ្លាំង​ក្លា​ជាមួយ​គ្នា
ទូតជប៉ុន អរគុណកម្ពុជា​បានខិតខំ​ដោយ​ស្មារតី​ទទួល​ខុស​ត្រូវ​ឆ្លើយ​តប​ប្រកប​ដោយ​ភាព​ទន់​ភ្លន់​ចំពោះ​ក្ដីកង្វល់ និងសំណូមពរនានារបស់វិនិយោគិនជប៉ុន
កម្ពុជាផ្សព្វផ្សាយផែនការយុទ្ធសាស្ត្រអភិវឌ្ឍបច្ចេកវិទ្យាហិរញ្ញវត្ថុក្នុងវិស័យហិរញ្ញវត្ថុមិនមែនធនាគារ
ម្ចាស់សិប្បកម្មជាស្រ្តី៖ ការផលិតក្នុងស្រុកកើនឡើងខ្លាំង បើធៀប​មុន​ពេល​ផ្ទុះ​ឡើង​នៃ​ជម្លោះ​ព្រំដែន

សេដ្ឋកិច្ច និង កសិកម្ម

វិស័យឯកជនកំពុងស្វែករកគន្លឹះល្អៗ ដើម្បីលើកកម្ពស់ការធ្វើអាជីវកម្មឱ្យកាន់តែល្អប្រសើរ

2024/08/26 02:19:53 pm        208
Facebook Telegram Linkin
សមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា រៀបចំចងក្រង ជួបជុំ រវាង​ក្រុម​ហ៊ុន​ដឹកជញ្ជូន និងក្រុមវិនិយោគិនលើ វិស័យផ្សេងៗ បានជួបពិភាក្សា និងការស្វែក​រក​គន្លឹះ​វិជ្ជមាន​មួយចំនួន ដើម្បីលើកកម្ពស់ការធ្វើអាជីវកម្មនៅកម្ពុជាឱ្យកាន់តែល្អប្រសើរ។លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា លើក​ឡើង​នៅ​ក្នុងពិធីជួបជុំម្ចាស់ អាជីវកម្ម នាំចេញ-ចូល ក្រុមហ៊ុនដឹកជញ្ជូន និងឡូជីស្ទិកលើកទី៥ នេះថា បើតាមរយៈរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ចាប់ពីឆ្នាំ ២០២៣ កម្ពុជាបាន​កំពុង​ស្រូប​យកវិនិយោគមកបណ្តាក់ទុននៅព្រះរាជណាចក្រកម្ពុជា មានជាហូរហែរ ខណៈការធ្វើ ពាណិជ្ជកម្មជាអន្តរជាតិ បើតាមរបាយការណ៍គយ និងរដ្ឋាករកម្ពុជា ឃើញថា ចាប់ពីចុងឆ្នាំ ២០២៣ គឺមានកំណើនកើនឡើងជាបន្ត បន្ទាប់, មកដល់បច្ចុប្បន្ន ការធ្វើពាណិជ្ជកម្ម ជាពិសេស​ការ​នាំ​ចេញ​ទំនិញរបស់កម្ពុជាបានកំពុងហក់ឡើងកាន់តែល្អប្រសើរ។លោក បន្តថា នេះគឺជាពេលវេលាមួយដ៏ល្អមួយសម្រាប់វិស័យឯកជន ជាក់ស្តែង​ការ​ចង​ក្រង​រវាង​ក្រុម​ហ៊ុន​ដឹកជញ្ជូន ឡូជីស្ទិក និងក្រុមហ៊ុនវិនិយោគលើវិស័យផ្សេងៗនេះ បានជួបជុំពិភាក្សា ការ​ផ្លាស់​ប្តូរ​បទពិសោធន៍ និងការស្វែករកគន្លឹះវិជ្ជមានល្អៗមួយចំនួននា ពេលនេះ គឺជាការជំរុញ​នូវ​កិច្ច​សហប្រតិបត្តិការរួមគ្នា ដើម្បីលើកកម្ពស់ដល់ការធ្វើពាណិជ្ជកម្មនៅកម្ពុជាកាន់តែល្អប្រសើរ ទាំង​ប្រតិបត្តិ ការនៅក្នុងការធ្វើអាជីវកម្ម ក៏ដូចជាការដឹកជញ្ជូន និងឡូជីស្ទិក ជាក់ស្តែង​នា​ពេល​កន្លង​មក​នេះ ចំពោះវិស័យដឹកជញ្ជូនវិញ បានកំពុង រើបឡើងវិញជាបណ្តើរៗ ដែលគាំទ្រដោយ​សម្ទុះ​ការ​ងើបឡើងនៃសកម្មភាពសេដ្ឋកិច្ច។សូមបញ្ជាក់ថា នៅក្នុងរយៈពេល ៦ ខែ ក្នុងឆ្នាំ ២០២៤ នេះ បើតាម​របាយការណ៍​ស្តីពី​លទ្ធផល​នៃ​ការ​អនុវត្តថវិកាឆមាសទី១ របស់ ក្រសួងសេដ្ឋកិច្ច និងហិរញ្ញវត្ថុ, សេដ្ឋកិច្ចកម្ពុជា​ត្រូវ​បាន​ប៉ាន់​ស្មាន​ថា នឹងសម្រេចបាន ៦% ដោយមានវិស័យខ្លះៗបានងើបឡើង សមរម្យ ខ្លះយឺត និងវិស័យ​ខ្លះទៀត​ងើបឡើងបន្តក្នុងកំណើនទាប ខណៈដែល​មិន​ទាន់​មាន​ភាព​ប្រាកដ​ប្រជា​នៃ​សេដ្ឋកិច្ច​សកល។ ក្នុងនោះសម្រាប់អនុវិស័យដឹកជញ្ជូន និងគមនាគមន៍វិញ, ឃើញថា នៅពាក់​កណ្តាល​ឆ្នាំ​នេះ​ត្រូវបាន​រំពឹងថា នឹងបន្តមានកំណើន ៥,២% ដោយសារការបន្ត​រក្សា​ចលនការ​នៃ​សកម្មភាព​ដឹកជញ្ជូន ទាំងនិន្នាការដឹកជញ្ជូនឡូជីស្ទីក ជាពិសេសការងើបសន្សឹមៗនៃ អនុវិស័យ​គាំទ្រកា​រ​ដឹកជញ្ជូន ដូចជាអនុវិស័យកាត់ដេរជាដើម៕ អត្ថបទ៖ សុន រ៉ាឌី

រាជរដ្ឋាភិបាលកម្ពុជា បានកំពុងធ្វើឱ្យមានតុល្យភាពសេដ្ឋកិច្ចឡើងវិញ

2024/08/26 02:08:25 pm        180
Facebook Telegram Linkin
សមិទ្ធផលដែលរាជរដ្ឋាភិបាលសម្រេចបានពេញក្នុងមួយឆ្នាំ ក្នុងអាណត្តិ ទី ៧ នៃរដ្ឋសភា, ជា​ពិសេស​ការសម្រេចបានលើការនាំ ចេញរបស់កម្ពុជា បានកំពុងគាំទ្រ​ដល់​ការ​ធ្វើ​ពាណិជ្ជ​កម្ម​ជា​អន្តរ​ជាតិ នឹងបានកំពុងរុញច្រានសេដ្ឋកិច្ចកម្ពុជាឱ្យបន្តងើបឡើងវិញ។រាជរដ្ឋាភិបាល ក្នុងនីតិកាលទី៧ នៃរដ្ឋសភា ដែលដឹកនាំប្រកបដោយ​ភាព​ឈ្លាស​វៃ​របស់​សម្តេច​មហា​បវរធិបតី ហ៊ុន ម៉ាណែត នាយករដ្ឋមន្រ្តី នៅក្នុងរយៈពេល ១២ ខែ កន្លងមកនេះ, ទោះ​បី​ស្ថិត​ក្នុង​ដំណាក់កាលដែលសភាពការណ៍អន្តរជាតិមានការវិវត្តប្រកប ដោយភាពស្មុគស្មាញ និង​ពិបាក​ប៉ាន់​ស្មាន កម្ពុជានៅតែបាននិងកំពុងបន្តធ្វើដំណើរក្នុងគន្លងវិជ្ជមាន និងសម្រេច​បាន​នូវ​សមិទ្ធផល សំខាន់ៗជាច្រើន ជាក់ស្តែងទាក់ទិនការធ្វើពាណិជ្ជកម្មអន្តរជាតិសរុប គិតចាប់ពីខែ សីហា ឆ្នាំ ២០២៣ ដល់ ខែកក្កដា ឆ្នាំ ២០២៤ ធៀបនឹងរយៈពេលដូចគ្នានៃឆ្នាំមុន បាន​កើន​ឡើង​ប្រមាណ ៩,៤% ក្នុងទំហំទឹកប្រាក់ប្រមាណ ៥២ ពាន់លានដុល្លារ, ការនាំចេញ មាន​កំណើន ១២% ក្នុងទំហំប្រមាណ ២៥ ពាន់លានដុល្លារ ទៅកាន់ ១៧០ ប្រទេស ក្នុង​នោះ​ទីផ្សារ​ធំៗ​មាន​ដូចជា៖ អាស៊ាន, សហភាពអឺរ៉ុប, សហរដ្ឋអាមេរិក, ចិន, ជប៉ុន និង កាណាដាជាដើម។ជុំវិញការសម្រេចកំណើនការធ្វើពាណិជ្ជកម្មនេះ, ឧកញ៉ា ប៉ិច បូឡែន ប្រធាន​សមាគម​សហគ្រិន​វ័យ​ក្មេង​កម្ពុជា លើកឡើង ថា សម្រាប់សមិទ្ធផលដែលសម្រេចបាន ជាពិសេសការ​សម្រេច​បាន​លើ​ការ​នាំ​ចេញ ដែលគាំទ្រដល់កំណើនសេដ្ឋកិច្ច មិនមែនកើត ឡើងដោយចចៃដន្យនោះទេ ហើយ​កម្ពុជាក៏មិននៅតែឯងនោះឡើយ ដែលទាំង​អស់​នេះ​គឺ​បាន​កើត​ឡើង​ពី​ការ​ខិតខំ​ប្រឹង​ប្រែង​របស់រាជរដ្ឋាភិបាល ធ្វើយ៉ាងណាឱ្យមានតុល្យភាពសេដ្ឋកិច្ច ជំរុញឱ្យមាន​កំណើនកើន​ឡើង​បន្តិច​ម្តង​ៗ​ឡើង​វិញ បន្ទាប់ពីការរងប៉ះពាល់នៃ វិបត្តិសកល ជាពិសេសសង្រ្គាមរុស្សី អ៊ុយក្រែន ដែល​កំពុង​នៅ​អូសបន្លាយ។សូមបញ្ជាក់ថា សេដ្ឋកិច្ចកម្ពុជានៅឆ្នាំ ២០២៣ សម្រេចបានកំណើន ៥% ហើយ​ត្រូវ​បាន​ព្យាករណ៍​ថា នឹងកើនឡើងក្នុងរង្វង់ ៦% នៅឆ្នាំ២០២៤ ក្នុងនោះវិស័យសំខាន់ៗ​ដែល​គាំទ្រ​កំណើន​រួម​មាន៖ វិស័យកសិកម្ម, វិស័យឧស្សាហកម្ម (ជាពិសេសវិស័យកាត់ដេរ), វិស័យកម្ម​ន្ត​សាល​មិនមែនកាត់ដេរ និងវិស័យសេវាកម្ម ក្នុងនោះសម្រាប់ការនាំចេញនៃវិស័យកម្មន្តសាល មាន​កំណើនប្រមាណ ២០% ក្នុងទំហំទឹកប្រាក់ប្រមាណជាង ១៥ ពាន់លានដុល្លារ វិស័យ​សំខាន់​នាំ​ចេញ​រួម​មាន៖ សម្លៀកបំពាក់, វាយនភណ្ឌ, ស្បែកជើង, សម្ភារៈ ធ្វើដំណើរ, សំបកកង់រថយន្ត, កង់ និងសម្ភារៈអគ្គីសនី ។ ចំណែកការនាំចេញផលិតផលកសិកម្មវិញ មានកំណើនប្រមាណ ៣៦% ក្នុងទំហំទឹកប្រាក់ ៣,៧ ពាន់លានដុល្លារ ដែលក្នុងនោះទំនិញសំខាន់ៗរួមមាន៖ ស្រូវ, អង្ករ, ម្រេច, ដំឡូងមី, ស្វាយចន្ទី, ស្វាយកែវ រមៀត, ជ័រកៅស៊ូ និងទំនិញផ្សេងទៀត៕ អត្ថបទ៖ សុន រ៉ាឌី 

សមត្ថកិច្ចក្រុងប៉ៃលិនឃាត់ខ្លួនជនសង្ស័យលួចកាត់ខ្សែភ្លើងនិងអាគុយសូឡារបស់សាខាអគ្គិសនីកម្ពុជា

2024/08/23 03:59:05 pm        1220
Facebook Telegram Linkin
ប៉ៃលិន៖ ក្រោយពីទទួលពាក្យបណ្តឹងពីជនរងគ្រោះ ករណីបាត់ខ្សែភ្លើង អាគុយសូឡា និងសម្ភារមួយ ចំនួនរបស់អគ្គិសនីកម្ពុជាសាខាប៉ៃលិន កម្លាំងនគរបាលក្រុងប៉ៃលិន សហការជាមួយកម្លាំងប៉ុស្តិ៍រដ្ឋបាល សង្កាត់ប៉ៃលិន - អូរតាវ៉ៅ បានប្រតិបត្តិការបង្ក្រាបជនសង្ស័យម្នាក់ នៅចំណុចមុខមន្ទីរពេទ្យបង្អែកខេត្តប៉ៃ លិន ។វរសេនីយ៍ឯក យ៉ែម សារិទ្ធ អធិការនគរបាលក្រុងប៉ៃលិន បានឱ្យដឹងថា នាថ្ងៃទី២២ ខែសីហា នេះ បន្ទាប់ពីទទួលពាក្យបាន បណ្តឹង កម្លាំងសមត្ថកិច្ចជំនាញ បានសហការគ្នាយ៉ាងយកចិត្តទុក ធ្វើការស្រាវ ជ្រាវរហូតបានឃើញជនសង្ស័យកំពុងជិះម៉ូតូដឹកសម្ភារដែលបានលួច និងធ្វើការបង្រ្កាបតែម្តង។ ជន សង្ស័យឈ្មោះ ទឹម រាំបូ ភេទ ប្រុស អាយុ២៣ឆ្នាំ មុខរបរមិនពិតប្រាកដ រស់នៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន មានផ្ទុកសារធាតុញៀន ចំណែកបក្សពួកបានរត់គេចខ្លួន ។វរសេនីយ៍ឯក បានឱ្យដឹងថា វត្ថុតាងដែលរឹបអូសបាន រួមមាន៖ អាគុយសូឡា ចំនួនបួនគ្រាប់ ខ្សែ ភ្លើង ចំនួនបីដុំ ប្រវែងប្រហែល៥០ម៉ែត្រ ឧបករណ៍ទប់ភ្លើងប្រភេទAVR មួយគ្រាប់ អាំងម៉ូទ័រ ពីរគ្រាប់ ដុំDRC មួយគ្រឿង និងសម្ភារសម្រាប់កាត់ខ្សែភ្លើងមួយចំនួនទៀត។វរសេនីយ៍ឯក យ៉ែម សារិទ្ធ អធិការនគរបាលក្រុងប៉ៃលិន បានបញ្ជាក់ថា ជនសង្ស័យ បានឆ្លើយ សារភាពថា ខ្លួន និងបក្សពួក ពិតជាបានធ្វើសកម្មភាពលួចកាត់ខ្សែភ្លើង លួចអាគុយសូឡា និងសម្ភារមួយ ចំនួនទៀតមែន ។ បច្ចុប្បន្ន ជនសង្ស័យនេះ ត្រូវបានឃាត់ខ្លួននៅអធិការដ្ឋាននគរបាលក្រុងប៉ៃលិនដើម្បី អនុវត្តនីតិ វិធីបន្ត ៕

ក្រសួងកសិកម្មចាត់មន្ត្រីចុះអន្តរាគមន៍ករណីស្រូវជាច្រើនហិកតាក្នុងខេត្តពោធិ៍សាត់កំពុងជួបបញ្ហាលឿងស្លឹក និងអុចស្លឹក

2024/08/22 05:24:24 pm        732
Facebook Telegram Linkin
ពោធិ៍សាត់៖ បន្ទាប់ពីទទួលបានពត៌មានអំពីករណីដំណាំស្រូវ (ពូជសុម៉ាលី) របស់ប្រជាពលរដ្ឋ ជាច្រើនហិកតាក្នុងស្រុកបាកាន និងស្រុកតាលោសែនជ័យ កំពុងជួបបញ្ហាឡើងលឿងស្លឹក និងអុចស្លឹក ដែលអាចបណ្តាលឱ្យបរិមាណទិន្នផលប្រឈមនិងការថយចុះខ្លះ ក្រសួងកសិកម្ម រុក្ខាប្រមាញ់ និងនេសាទ បានចាត់មន្ត្រីជំនាញបច្ចេកទេសនៃអគ្គនាយកដ្ឋានកសិកម្ម សហការជាមួយមន្ទីរកសិកម្មខេត្តពោធិ៍សាត់ និងអាជ្ញាធរពាក់ព័ន្ធ បានចុះពិនិត្យវាយតំលៃស្ថានភាព ផលប៉ះពាល់ និងអន្តរាគមន៍ផ្ទាល់ដល់ទីតាំងដំណាំស្រូវរបស់ប្រជាកសិករដែលកំពុងមានបញ្ហា ។ ក្នុងរយៈពេល៣ថ្ងៃ នៃការចុះពិនិត្យវាយតំលៃ ពីថ្ងៃទី២១ ដល់ថ្ងៃទី២៣ ខែសីហា ឆ្នាំ២០២៤ របស់ក្រុមការងារបច្ចេកទេសក្រសួងកសិកម្ម និងមន្ទីរកសិកម្មខេត្ត ជាលទ្ធផលបានបង្ហាញថា ក្នុងភូមិកំប្រាក់កូន ឃុំខ្នារទទឹង ស្រុកបាកានមានផ្ទៃដីដាំដុះ៣៤១ហិកតា ក្នុងនោះផ្ទៃដីដាំដុះពូជស្រូវសុម៉ាលីមាន២៨០ហិកតា ហើយកំពុងទទួលរងផលប៉ះពាល់ចំនួន១៥០ហិកតា ចំណែក្នុងភូមិកោះស្វាយ ឃុំតាលោ ស្រុកតាលោសែនជ័យ មានផ្ទៃដីដាំដុះ៧១៧ហិកតា ក្នុងនោះពូជស្រូវសុម៉ាលីមាន៥២៥ហិកតា ដោយមានការប៉ះពាល់តិចតួច ។ ជាមួយគ្នានោះក្រុមការងារបានសង្កេតឃើញថា ស្លឹកស្រូវមាន ស្នាមអុចៗ មានសភាពលឿងជាពិសេសផ្នែកខាងចុងនិងគែមស្លឹក ហើយដង់ស៊ីតេដើមស្រូវមានចំនួនច្រើន (១៨០-២០០គីឡូក្រាមក្នុង១ហិកតា) និងមានវត្តមានមមាចត្នោតតិចតួច ព្រមទាំងពពួកសត្វមានប្រយោជន៍(ស្រឹងគោក) ច្រើនផងដែរ ។ តាមការស្រាវជ្រាវប្រជាកសិករនៅក្នុងតំបន់នោះបានប្រើប្រាស់ថ្នាំដែលមានធាតុសកម្ម Paclobutrazol ដើម្បីបង្អាក់ការពន្លូតដើម និងជម្រុញការបែកគុម្ព ចំនួន០២លើក ដែលលើកទី១នៅពេលស្រូវអាយុ២០-២៥ថ្ងៃ ក្រោយដុះ ដោយលាយជាមួយជីកសិម្ម និងលើកទី២ពេលស្រូវស្ថិតក្នុងដំណាក់កាលពន្លូតដើមក្នុងបរិមាណ ១០០០-១៥០០ក្រាមក្នុង១ហិកតា ដោយមានលាយជាមួយថ្នាំកសិកម្មផ្សេងទៀត សម្រាប់ការពារនិងកម្ចាត់ជំងឺនិងសត្វល្អិតចង្រៃ ។ ជាការសន្និដ្ឋានដំណាំស្រូវដែលមានសភាពលឿងនិងស្នាមអុចស្លឹក គឺបណ្តាលមកពីប្រើប្រាស់ថ្នាំ Paclobutrazol លាយជាមួយជីនិងថ្នាំកសិកម្ម គួបផ្សំបញ្ហារអាកាសធាតុក្តៅខ្លាំងអូសបន្លាយ និងមិនមានភ្លៀងធ្លាក់ ការប្រើប្រាស់គ្រាប់ពូជ និងជីកសិកម្មលើសកម្រិតណែនាំ ។ ដោយសារបច្ចុប្បន្នមានភ្លៀងធ្លាក់ បានធ្វើឱ្យដំណាំស្រូវដែលរងផលប៉ះពាល់មានការដុះលូតលាស់ប្រសើរឡើងវិញ មិនធ្វើឱ្យមានផលប៉ះពាល់ធ្ងន់ធ្ងរដល់ទិន្នផលស្រូវនោះទេ ។ជាមួយគ្នានោះក្រសួងកសិកម្ម ក៏ដូចជាមន្ទីរកសិកម្មខេត្តនៅតែបន្តតាមដាននិងអន្តរាគមន៍លើករណីនេះ ហើយដើម្បីទប់ស្តាត់បញ្ហាបែបនេះ ក្រុមការងារបច្ចេកទេស បានពន្យល់ណែនាំឱ្យប្រជាកសិករ -ត្រូវចុះពិនិត្យស្រែជាប្រចាំដើម្បីតាមដាននិងកម្ចាត់សមាសភាពចង្រៃឱ្យទាន់ពេលវេលា -ការប្រើប្រាស់គ្រាប់ពូជស្របតាមការណែនាំ ៨០-១២០គីឡូក្រាមក្នុង១ហិកតា -ការប្រើប្រាស់ថ្នាំនិងជីកសិកម្មឱ្យស្របតាមបទដ្ឋានបច្ចេកទេស ដើម្បីឱ្យមានប្រសិទ្ធិភាពនិងសុវត្តិភាព -អនុវត្តពិពិធកម្មដំណាំ (ដំណាំឆ្លាស់ ឬដំណាំបង្វិល) -អនុវត្តវិធានការចម្រុះគ្រប់គ្រងដំណាំស្រូវ (IPM) -ក្នុងករណីដំណាំស្រូវរងផលប៉ះពាល់ធ្ងន់ធ្ងរ គួរប្រើប្រាស់ថ្នាំកសិកម្ម -ប្រសិនបើកសិករប្រើប្រាស់ថ្នាំកសិកម្មដែលមានធាតុសកម្ម Paclobutrazol គួរប្រើប្រាស់ឱ្យត្រូវតាមបទដ្ឋាន បច្ចេកទេស មិនឱ្យលើសកម្រិតនៃការណែនាំ ៕ អត្ថបទ និងរូបភាព ៖ ភិរុណ ពៅ

ប្រតិបត្តិការផ្ទេរប្រាក់ និងទូទាត់តាមប្រព័ន្ធបាគង កំពុងទទួលការគាំទ្រ​ពីមជ្ឈដ្ឋានជាតិនិងអន្តរជាតិ

2024/08/21 11:55:41 am        165
Facebook Telegram Linkin
ការផ្ទេរប្រាក់និងទូទាត់តាមរយៈប្រព័ន្ធបាគង គិតត្រឹមឆមាសទី១ នេះ មានចំនួនសរុប ២២២ លានប្រតិបត្តិការ ក្នុងនោះជាង ៩៨ លានប្រតិបត្តិការ ជាប្រាក់រៀល មានទំហំប្រាក់ចំនួន ៧៧​ទ្រីលានរៀល និងជាង ១២៤ លានប្រតិបត្តិការ ជាប្រាក់ដុល្លារអាមេរិក មានទំហំទឹកប្រាក់ជាង ៤៦ ប៊ីលានដុល្លារអាមេរិក។ការអភិវឌ្ឍប្រព័ន្ធទូទាត់សងប្រាក់ ជាការងារអាទិភាពមួយក្នុងចំណោមការងារអាទិភាព​ផ្សេងៗ​ទៀត​ របស់ធនាគារជាតិនៃ កម្ពុជា ដើម្បីផ្តល់នូវហេដ្ឋារចនាសម្ព័ន្ធប្រព័ន្ធទូទាត់​សងប្រាក់​ប្រកប​ដោយ​នវានុវត្តន៍ សុវត្ថិភាព និងប្រសិទ្ធភាព សម្រួលការទូទាត់ ពាណិជ្ជកម្ម និង​សកម្ម​ភាព​សេដ្ឋកិច្ច ទាំងក្នុងប្រទេសនិងក្នុងតំបន់។ ដោយពិនិត្យឃើញពីសារៈសំខាន់នេះ ធនាគារជាតិ នៃ​កម្ពុជា បានដាក់ឱ្យដំណើរការជាផ្លូវការប្រព័ន្ធបាគង ដែលមានមុខងារជាប្រព័ន្ធទូទាត់កន្លោង កាលពីខែ តុលា ឆ្នាំ ២០២០ និងមានការគាំទ្រ យ៉ាងច្រើនពីមជ្ឈដ្ឋានជាតិនិងអន្តរជាតិ។ជុំវិញប្រព័ន្ធបានគងនេះ, លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បាន​លើក​ឡើង​ក្នុងពិធីសម្ពោធ ដាក់ឱ្យដំណើរការបឋម កម្មវិធីទូទាត់បាគងទេសចរ Bakong Tourist App នៅខេត្តសៀមរាប នាពេលថ្មីៗនេះថា ការដាក់ឱ្យដំណើរ ការប្រព័ន្ធ​បាគង​របស់​ធនាគារជាតិ​នៃ​​កម្ពុជា គឺជាការផ្តល់នូវហេដ្ឋារចនាសម្ព័ន្ធហិរញ្ញវត្ថុបន្ថែម សម្រាប់​គ្រឹះស្ថាន​ធនាគារ និង​ហិរញ្ញវត្ថុ អាចធ្វើប្រតិបត្តិការទូទាត់ និងផ្ទេរប្រាក់ឆ្លងគ្រឹះស្ថានទៅវិញទៅមក។ ជាក់ស្តែង​គិត​ត្រឹម​ឆមាស​ទី១ ឆ្នាំ ២០២៤ នេះ ប្រព័ន្ធបាគង មានសមាជិកសរុបចំនួន ៧២ គ្រឹះស្ថាន ក្នុងនោះមាន​គ្រឹះស្ថាន​ចំនួន ៦០ បានដាក់ឱ្យដំណើរការជាផ្លូវការ និងគ្រឹះស្ថានចំនួន ១២ ទៀត បាននិងកំពុង​បន្ត​ធ្វើ​សន្ធានកម្មប្រព័ន្ធ។ ចំពោះប្រតិបត្តិការផ្ទេរប្រាក់ និងទូទាត់​ដែល​ធ្វើឡើង​តាមរយៈ​ប្រព័ន្ធ​បាគង មានជាង ២២២ លានប្រតិបត្តិការ (ក្នុងនោះជាង ៩៨ លានប្រតិបត្តិការ ជាប្រាក់រៀល និង​ជាង ១២៤ លានប្រតិបត្តិការជាប្រាក់ដុល្លារ អាមេរិក) និងមានទំហំជាប្រាក់រៀលចំនួន ៧៧,៣៦ ទ្រីលានរៀល និងជាប្រាក់ដុល្លារ មានចំនួន ៤៦,៣៣ ប៊ីលានដុល្លារអាមេរិក។ផ្អែកតាមទិន្នន័យខាងលើបង្ហាញឱ្យឃើញថា ប្រតិបត្តិការទូទាត់សងប្រាក់អេឡិចត្រូនិក​តាម​ប្រព័ន្ធ​បាគង និង KHQR ទទួល បានការពេញនិយមក្នុងការប្រើប្រាស់យ៉ាងឆាប់រហ័ស ជាក់​ស្តែង​ការប្រើប្រាស់ QR ទាំងតូចទាំងធំនៅកម្ពុជា មានចំនួនជាង ៣,៣ លានកន្លែង ដែលកំពុង​ទទួល​យក QR ក្រៅពីនេះមានការចាយវាយតាម POS (ការចាយតាមកាត) មានចំនួនជាង ៥២ ពាន់​ម៉ាស៊ីន ខណៈ ATM នៅទូទាំងប្រទេសមានចំនួន ៥ ៦០០ ATM ដូច្នេះការអភិវឌ្ឍប្រព័ន្ធបាគង​នៅ​ក្នុង​ជំហានបន្ទាប់ ក្រោយពីបានដាក់ ដំណើរការប្រកបដោយភាពជោគជ័យ ដើម្បីឱ្យប្រព័ន្ធ​បាគង​អាច​បំពេញមុខងារកាន់តែសម្បូរបែប អាចសម្រួលដល់សាធារណជនជាតិ និងអន្តរជាតិ​ធ្វើ​ប្រតិបត្តិការ​ទូទាត់ឌីជីថលប្រកបដោយបរិយាបន្ន, ថ្មីៗនេះ ធនាគារជាតិនៃកម្ពុជា បានដាក់​ឱ្យ​ប្រើប្រា​ស់​កម្មវិធីទូទាត់ បាគងទេសចរ “Bakong Tourist App” មានគោលបំណង​លើកកម្ពស់​សេវា​ទូទាត់​នៅកម្ពុជាឱ្យកាន់តែប្រសើរ រួមចំណែកគាំទ្រវិស័យទេសចរណ៍នៅកម្ពុជា តាមរយៈ​ការ​ជួយ​សម្រួលដល់ការទូទាត់ជាឌីជីថល លើថ្លៃទំនិញ និងសេវារបស់ភ្ញៀវទេសចរអន្តរជាតិ ដែល អញ្ជើញមកកម្សាន្តនៅប្រទេសកម្ពុជា៕ អត្ថបទ៖ សុន រ៉ាឌី

CLV-DTA នឹងផ្តល់អត្ថប្រយោជន៍ដល់សេដ្ឋកិច្ច និងការលើកកម្ពស់ជីវភាពប្រជាពលរដ្ឋនៅទីនោះ

2024/08/20 01:16:49 pm        344
Facebook Telegram Linkin
កិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV-DTA) នឹងផ្តល់អត្ថប្រយោជន៍ជាច្រើន តាមរយៈការលើកស្ទួយវិស័យសេដ្ឋ កិច្ច ពាណិជ្ជកម្ម ទេសចរណ៍ និងវិស័យផ្សេងៗទៀត ជាពិសេសជួយសម្រួលដល់ជីវភាពបងប្អូនប្រជាពលរដ្ឋ ដែលរស់នៅខេត្តជាប់ ព្រំដែនឱ្យកាន់តែមានភាពប្រសើរ។ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា លើកឡើងក្នុងពិធីសម្ពោធ​ដាក់ឱ្យ​ដំណើរ​ការបឋម កម្មវិធី ទូទាត់បាគងទេសចរ “Bakong Tourist App” នៅខេត្តសៀមរាប ម្សិល​មិញ​នេះថា ទាក់ទងនឹងប្រវត្តិសាស្រ្តរបស់អាណាចក្រខ្មែរ មានអាយុកាលយូរ​លង់ណាស់​មកហើយ ដែលជាអាណាចក្រមួយនៅក្នុងចំណោមអាណាចក្រដែលមានឥទ្ធិពលបំផុតនៅអាស៊ី អាគ្នេយ៍ ប៉ុន្តែដោយសារតែសង្រ្គាមឥតឈប់ឈរ ទើបធ្វើឱ្យប្រទេសយើងក្លាយ​ទៅជា​ប្រទេសដ៏​អភ័ព្វ។ មូលហេតុនៃការកើតសង្រ្គាម គឺដោយសារតែការបែកបាក់សាមគ្គីផ្ទៃក្នុង ការស្តាប់ និងជឿតាម​ពាក្យញុះញង់ពីអ្នកដទៃ ហើយងាកមកបំផ្លាញជាតិឯង ធ្វើឱ្យរាំងស្ទះ ដល់ការអភិវឌ្ឍ​ប្រទេស និងសេដ្ឋកិច្ចជាតិ។នេះជាបទពិសោធដ៏ជូរចត់ ដែលអ្នកនយោបាយកម្ពុជាគួរសិក្សាស្វែងយល់ និងចៀសវាងឱ្យបាន ព្រោះថា សន្តិភាពមានតម្លៃ មិនអាចកាត់ថ្លៃបាន, មានសន្តិភាពទើបមានការអភិវឌ្ឍ​លើគ្រប់​វិស័យ ដែលអនុញ្ញាតឱ្យយើងអាចរស់នៅដោយគ្មានការ​ភ័យខ្លាច មាន អាហារ​ទទួល​ទាន​គ្រប់គ្រាន់ មានជម្រកស្នាក់នៅសមរម្យ មានឱកាសទទួលបានការអប់រំ មានសិទ្ធិប្រតិបត្តិ​ជំនឿ​សាសនា មាន លទ្ធភាពចូលរួមសកម្មភាពសង្គមផ្សេងៗ និងអាចធ្វើដំណើរកម្សាន្ត​ក្នុងឱកាស​ពិធីបុណ្យនានាទាំងក្នុងនិងក្រៅប្រទេស។លោកជំទាវបណ្ឌិត បន្តថា ទាក់ទិនគម្រោង (CLV-DTA), ថ្មីៗនេះមានការបំផុសបំផុល និង​ញុះញង់​ពីក្រុមជ្រុលនិយម ទាក់ទងនឹងកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV-DTA) បានបង្កើតឡើងតំាងពីឆ្នាំ ១៩៩៩ ដោយធ្វើឱ្យសាធារណជន មានការខឹងសម្បា​មក​កាន់រាជរដ្ឋាភិបាល និងមានការព្រួយបារម្ភលើការខាតបង់ប្រយោជន៍នានាជាពិសេសទឹកដី។ តាមពិតកិច្ចព្រម ព្រៀងនេះ គ្រាន់តែអនុញ្ញាតឱ្យប្រទេសទាំងបីធ្វើសហប្រតិបត្តិការជាមួយគ្នា ក្នុងនាមប្រទេសជិតខាង ដើម្បីពន្លឿនការអភិវឌ្ឍ ក្នុងនោះប្រទេសនីមួយៗ​ត្រូវគ្រប់គ្រង​ទឹកដីរបស់ខ្លួន ។ បញ្ហានេះ មិនមានការបាត់បង់ទឹកដីដូចការបំភ្លៃព័ត៌មានមួយចំនួន ពីអ្នក វិភាគគ្មានមូលដ្ឋាននោះឡើយ ព្រោះទឹកដីកម្ពុជានៅតែជារបស់កម្ពុជា។លោកជំទាវបណ្ឌិត ជា សិរី លើកឡើងបន្ថែមថា ផ្ទុយទៅវិញ ជុំវិញកិច្ចសហប្រតិបត្តិការ​តំបន់ត្រីកោណ​អភិវឌ្ឍន៍ (CLV-DTA) នឹងផ្តល់អត្ថប្រយោជន៍ជាច្រើន តាមរយៈការ​ជួយ​លើកស្ទួយវិស័យសេដ្ឋកិច្ច ពាណិជ្ជកម្ម និងវិស័យទេសចរណ៍ រួមទាំងវិស័យផ្សេងៗជាច្រើនទៀត ជាពិសេសជួយសម្រួលដល់ជីវភាព បងប្អូនប្រជាពលរដ្ឋដែលរស់នៅខេត្តជាប់ព្រំដែន ឱ្យកាន់តែមានភាព ប្រសើរឡើង ។ បញ្ហានេះ, លោកជំទាវបណ្ឌិត បានអំពាវនាវដល់មន្រ្តីរាជការស្ថិតក្រោមឱវាទ៍ និងសាធារណជន កុំស្តាប់ និងជឿតាម ការញុះញង់ យើងត្រូវចេះរួបរួមសាមគ្គីគ្នា និងសូមបន្តជឿជាក់លើរាជរដ្ឋាភិបាលកម្ពុជា ក្នុងការដឹកនាំ និងអភិវឌ្ឍប្រទេសកម្ពុជាឲ្យ កាន់តែរីកចម្រើនខ្លាំងថែមទៀត ក្រោមដំបូលសុខសន្តិភាពដែលមានសម្តេចតេជោ ជាអគ្គស្ថាបនិកដ៏ឆ្នើម និងក្រោមការដឹកនាំ រាជរដ្ឋាភិបាលដោយ សម្តេចមហាបវរធិបតី ជានាយករដ្ឋមន្ត្រី៕ អត្ថបទ៖ សុន រ៉ាឌី

កម្ពុជានឹងរៀបចំវេទិការធុរកិច្ចក្រៅស្រុកចំនួនពីរធំៗ ដើម្បីស្វែងរកទីផ្សារ និងដៃគូពាណិជ្ជកម្មបន្ថែម

2024/08/20 01:01:07 pm        340
Facebook Telegram Linkin
កម្ពុជាគ្រោងរៀបចំវេទិការធុរកិច្ចនៅក្រៅស្រុកធំៗចំនួនពីរ ដោយប្រមូលផ្តុំធុរកិច្ចសំខាន់ៗ​នៅ​កម្ពុជា ជួបជាមួយអ្នកបញ្ជាទិញ ផ្ទាល់ ក្នុងគោលដៅស្វែងរកទីផ្សារ និងដៃគូ​ពាណិជ្ជកម្ម​បន្ថែម ដើម្បីជំរុញការនាំចេញទំនិញរបស់កម្ពុជាឱ្យបានកាន់តែច្រើន ។លោកបណ្ឌិត ហោ សេរីវឌ្ឍន៍ ប្រធានក្រុមប្រឹក្សាភិបាលសមាគម IDI លើកឡើងនៅក្នុងកិច្ច​សម្ភាសន៍ ស្តីពីគម្រោងរៀបចំ វេទិកាធុរកិច្ចនៅក្រៅប្រទេស នៅសហរដ្ឋអាមេរិក និងអឺរ៉ុប នេះថា IDI គឺសមាគមមួយបានផ្តោតយកចិត្តទុកដាក់ខ្ពស់លើការវិនិយោគ ដើម្បីទាក់ទាញវិនិយោគិន និងដើម្បីចូលរួមជំរុញការនាំចេញរបស់កម្ពុជាឱ្យបានកាន់តែច្រើន ដោយក្នុងគម្រោងនោះ IDI នឹងបង្ហាញ អំពីសក្តានុពលទីផ្សារនៅកម្ពុជា ដោយបានកំណត់គោលដៅសំខាន់ៗមួយចំនួនដូចជា ការវិនិយោគលើវិស័យសេវាកម្ម កសិកម្ម និងវិស័យអចលនទ្រព្យជាដើម។លោកបណ្ឌិត បន្តឱ្យដឹងថា តាមរយៈនៃការរៀបចំគម្រោងខាងលើនេះ នៅក្នុងខែ កញ្ញា ខាងមុខ សមាគមនឹងគ្រោងរៀបចំ វេទិការធុរកិច្ចនៅសហរដ្ឋអាមេរិក ដែលក្នុងកម្មវិធីនោះនឹងមានបញ្ជាទិញចូលរួមជាច្រើន មកពីបណ្តាក្រុមហ៊ុនផ្សេងៗ និងនៅក្នុងខែ តុលា ឆ្នាំ ២០២៤ នេះដែរ សមាគមក៏គ្រោងរៀបចំនៅសហគមន៍អឺរ៉ុបបន្ថែម ដែលគម្រោងនេះមានគោលដៅស្វែងរកទីផ្សារ និងដៃ គូរពាណិជ្ជកម្មជូនដល់វិនិយោគិនកនុងស្រុកបន្ថែម និងដើម្បីជំរុញការនាំចេញទំនិញរបស់កម្ពុជាឱ្យបានកាន់តែច្រើន ស្របតាមការ គិតគូរ និងការយកចិត្តទុកដាក់បំផុតរបស់រាជរដ្ឋាភិបាលកម្ពុជា។តាមរយៈការរៀបចំវេទិកានេះដែរ, លោកបណ្ឌិត ហោ សេរីវឌ្ឍន៍ ក៏បានអំពាវនាវដល់ធុរកិច្ច និងអ្នកវិនិយោគក្នុងស្រុក សូមចូលរួមឱ្យ បានច្រើនកុះករ ដើម្បីស្វែងរកដៃគូពាណិជ្ជកម្ម តម្រូវការទីផ្សារផ្សេងៗ និងការត្រៀមវិនិយោគជាមួយគ្នា ក្នុងគោលដៅចូលរួមកសាង អេកូឡូស៊ីលើការវិនិយោគនៅកម្ពុជា។សូមបញ្ជាក់ថា ជុំវិញការធ្វើពាណិជ្ជកម្មទៅកាន់ទីផ្សារអន្តរជាតិ នៅក្នុងឆមាសទី ១ ឆ្នាំ២០២៤, កម្ពុជាបាននាំចេញទៅកាន់ទីផ្សារ សហអាមេរិក មានទឹកប្រាក់ជាង ៤ ៤០០ លានដុល្លារ កើនឡើងជិត ៤ ភាគរយ ធៀបនិងឆ្នាំ ២០២៣ ដោយទីផ្សារនេះឈរក្នុងលំ ដាប់ទី១ និងត្រូវប្រមាណ ៤៤ ភាគរយ នៃទីផ្សារនាំចេញសរុប, ខណៈទីផ្សារអឺរ៉ុប មានទំហំទឹកប្រាក់ជិត ២ ០០០ លានដុល្លារ កើនឡើងជាង ៩ ភាគរយ ត្រូវប្រមាណ ១៩ ភាគរយ ឈរក្នុងលំដាប់ទី២ នៃទីផ្សារអឺរ៉ុបសម្រាប់ការនាំចេញរបស់កម្ពុជាផងដែរ៕ អត្ថបទ៖ សុន រ៉ាឌី

កម្ពុជាបង្ហាញតម្រូវការវិនិយោគលើវិស័យស្វាយចន្ទី ដើម្បីបម្រើការនាំចេញទៅទីផ្សារបរទេស

2024/08/20 12:51:45 pm        145
Facebook Telegram Linkin
ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានទទួលជួបសម្តែងការគួរសមរបស់ លោក Jost Kadel តំណាងស្ថានទូតអាល្លឺម៉ង់ប្រចាំនៅកម្ពុជា និងក្រុមការងាររបស់អង្គការអភិវឌ្ឍអន្តរជាតិអាល្លឺម៉ង់ (GIZ) នៅទីស្តីការក្រសួងកសិកម្ម។នៅក្រោយចប់ជំនួបការងារ នៅថ្ងៃទី២០ សីហា ឆ្នាំ២០២៤នេះ ក្រសួងកសិកម្ម រុក្ខាប្រមាញ់ និងនេសាទ បានសសេរថា ក្នុងកិច្ចប្រជុំនេះ ឯកឧត្តមរដ្ឋមន្ត្រី បានសម្តែងនូវការស្វាគមន៍ក្នុងការពង្រឹងកិច្ចសហប្រតិបត្តិការនៃប្រទេសទាំងពីរ និងការវិនិយោគក្នុងវិស័យកសិកម្ម។ ឯកឧត្តម បានលើកឡើងពីកសិផលរបស់កម្ពុជាជាច្រើន ដែលមានគុណភាពល្អ និងអាចវិនិយោគសម្រាប់នាំចេញទៅកាន់ទីផ្សារអន្តរជាតិ។ឯកឧត្តមរដ្ឋមន្ត្រី បានគូសបញ្ជាក់ថា ក្រសួងបាននិងកំពុងជំរុញគោលនយោបាយកសិកម្មឱ្យកាន់តែរីកចម្រើន ដើម្បីធានាសន្តិសុខស្បៀង និងនិរន្តរភាពសេដ្ឋកិច្ច ពោលគឺ «មានហូប មានប្រើ មានបាន និងមានរហូត»។ ឯកឧត្តម បានបន្ថែមថា កម្ពុជាត្រូវការដៃគូអភិវឌ្ឍធ្វើយ៉ាងណាឱ្យប្រជាកសិករទទួលបានតម្លៃបន្ថែមខ្ពស់ កាត់បន្ថយថ្លៃដើមផលិត តាមរយៈការជំរុញការចងក្រងសហគមន៍កសិកម្មទំនើប។ ឯកឧត្តម បានបន្តថា សហគមន៍កសិកម្មទំនើប គឺជាកម្មវិធីគោលនយោបាយអាទិភាពមួយ ដែលដាក់ចេញក្នុងគោលដៅជួយដោះស្រាយបញ្ហាប្រឈមនានារបស់កសិករ ដូចជា ដើមទុន បច្ចេកទេស ទីផ្សារជាដើម ជាពិសេសការទទួលបានកម្ចីដែលមានអត្រាការប្រាក់ទាប និងមានប្រសិទ្ធភាពសេដ្ឋកិច្ច។ជាមួយគ្នានេះ ឯកឧត្តមរដ្ឋមន្ត្រី បានណែនាំឱ្យវិស័យឯកជនអាល្លឺម៉ង់ គិតគូរពិនិត្យលទ្ធភាពក្នុងការជំរុញការកែច្នៃគ្រាប់ស្វាយចន្ទីកម្ពុជា ដើម្បីបម្រើដល់ការនាំចេញទៅក្រៅប្រទេស ដែលអាចទទួលបានតម្លៃបន្ថែមខ្ពស់ផងដែរ៕

កម្ពុជា-ហ្វីលីពីន ពង្រឹងប្រព័ន្ធប្រតិបត្តិការធនាគារកណ្តាល សម្រាប់ផ្តល់ប្រយោជន៍​ប្រទេសទាំងពីរ

2024/08/20 12:51:23 pm        219
Facebook Telegram Linkin
ធនាគារជាតិនៃកម្ពុជា និងធនាគារកណ្ដាលហ្វីលីពីន ពង្រឹងកិច្ចសហប្រតិបត្តិការលើផ្នែកពាក់ព័ន្ធ នឹងប្រព័ន្ធប្រតិបត្តិការ ធនាគារកណ្តាល ការតភ្ជាប់និងនវានុវត្តន៍ប្រព័ន្ធទូទាត់ នវានុវត្តន៍ហិរញ្ញវត្ថុឌីជីថល ការត្រួតពិនិត្យប្រព័ន្ធធនាគារ និងផ្នែកផ្សេងៗ សម្រាប់ផលប្រយោជន៍ទៅវិញទៅមក។ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា និង ឯកឧត្តម Eli M. Remolona, Jr. ទេសាភិបាល ធនាគារកណ្តាលហ្វីលីពីន នៅថ្ងៃទី ១៩ ខែ សីហា ម្សិលមិញនេះ បានបើកកិច្ចប្រជុំទ្វេភាគី និងចុះហត្ថលេខាលើអនុស្សរណៈយោគ យល់ ក្នុងគោលបំណងពង្រឹងកិច្ចសហប្រតិបត្តិការរវាងធនាគារកណ្តាលទាំងពីរ, ក្នុងនោះកិច្ចប្រជុំទ្វេភាគីកម្រិតខ្ពស់ រវាងធនាគារ ជាតិនៃកម្ពុជា និងធនាគារកណ្ដាលហ្វីលីពីន បានផ្លាស់ប្តូរទស្សនៈលើស្ថានភាពម៉ាក្រូសេដ្ឋកិច្ច និងហិរញ្ញវត្ថុ ដំណើរវិវឌ្ឍន៍នៃប្រព័ន្ធ ទូទាត់ បញ្ញសិប្បនិម្មិត សន្តិសុខសាយប៊័រ និងហិរញ្ញវត្ថុប្រកបដោយចីរភាព ក៏ដូចជាពិភាក្សាអំពីកាលានុវត្តភាព សម្រាប់ការបន្ត កិច្ចសហប្រតិបត្តិការលើការងារ និងគំនិតផ្តួចផ្តើមនានារនៃធនាគារកណ្តាលទាំងពីរ។អនុស្សរណៈយោគយល់នេះសបញ្ជាក់ឱ្យឃើញពីឆន្ទៈ នៃស្មារតីប្តេជ្ញារបស់ធនាគារជាតិនៃកម្ពុជា និងធនាគារកណ្តាល ហ្វីលីពីន ក្នុងការបង្កើតក្របខ័ណ្ឌជាក់លាក់មួយ សម្រាប់ដំណើរការសម្រប់សម្រួលក៏ដូចជាពង្រឹងទំនាក់ទំនង និងកិច្ចសហប្រតិបត្តិ ការទ្វេភាគីរវាងធនាគារកណ្ដាលទាំងពីរ ដែលកន្លងមកតែងតែមានកិច្ចសហប្រតិបត្តិការល្អជាមួយគ្នា ក្នុងក្របខ័ណ្ឌទាំងទ្វេភាគី និងតំបន់។តាមរយៈលទ្ធផលនៃកិច្ចប្រជុំទ្វេភាគី និងអនុស្សរណៈយោគយល់នេះដែរ ធនាគារកណ្តាលទាំងពីរ នឹងពង្រឹងកិច្ច សហប្រតិបត្តិការថែមទៀត ជាពិសេសក្នុងផ្នែកពាក់ព័ន្ធ នឹងប្រព័ន្ធប្រតិបត្តិការធនាគារកណ្តាល ការតភ្ជាប់និងនវានុវត្តន៍ប្រព័ន្ធទូទាត់ នវានុវត្តន៍ហិរញ្ញវត្ថុឌីជីថល ការត្រួតពិនិត្យប្រព័ន្ធធនាគារ ការអភិវឌ្ឍធនធានមនុស្ស និងផ្នែកផ្សេងៗជាច្រើនទៀត សម្រាប់ផល ប្រយោជន៍ទៅវិញទៅមក៕ អត្ថបទ៖ សុន រ៉ាឌី

ថៃបានយកនាំយកផលិតផលមិនប៉ះពាល់បរិស្ថានជាច្រើនប្រភេទ បង្ហាញលើទីផ្សារកម្ពុជា

2024/08/16 12:15:43 pm        171
Facebook Telegram Linkin
ថៃបានយកនាំយកផលិតផលដែលមិនប៉ះពាល់បរិស្ថានជាច្រើនប្រភេទ មកដល់តាំងបង្ហាញ និង​លក់ ក៏ដូចជាការស្វែងរកដៃគូ ពាណិជ្ជកម្ម ដើម្បីចែកចាយផលិតផលរបស់ខ្លួន ខណៈ​កម្ពុជា​គឺ​ជា​ប្រទេសដែលប្រជាជាជន ពាណិជ្ជករ និងអ្នកធ្វើអាជីកម្មថៃ ចាប់អារម្មណ៍យ៉ាងខ្លាំងនៅលើទីផ្សារមួយនេះ។លោក នីរ៉ាវ៉ាត់ រ៉ាំងស៊ីកានចាណៈ (Nirawat Rangseekanjana) អគ្គទីប្រឹក្សា​ពាណិជ្ជ​កម្ម​ប្រចាំ​ស្ថាន​ទូត​ថៃនៅកម្ពុជា លើកឡើងនៅក្នុងពិព័រណ៍ពាណិជ្ជកម្មថៃ (BCG THAI FESTIVE FAIR 2024) នៅថ្ងៃទី ១៥ ខែ សីហា ឆ្នាំ ២០២៤ នេះថា ជុំវិញ ផលិតផលដែលមានគុណភាព មិន​ប៉ះ​ពាល់ដល់បរិស្ថាននេះ ក្នុងនោះក្រុមអ្នកធ្វើអាជីវកម្មនៅប្រទេសថៃ តែងតែព្យាយាមផលិតនូវ ផលិត​ផលរបស់ខ្លួន ឱ្យជាមិត្តនិងបរិស្ថាន និងមិនប៉ះពាល់ដល់បរិស្ថាន ជាក់ស្តែង​ការ​នាំ​យក​ផលិតផ​ល​មកតាំងពិព័រណ៍ ចាប់ពីថ្ងៃទី ១៥ ដលថ្ងៃទី ១៨ នៅមជ្ឈមណ្ឌល​ពិព័រណ៍​កោះពេជ្រ​នា​ពេល​នេះ​ មានចំនួនប្រមាណជាប់ ៣០០ ស្តង់ ដែលភាគីច្រើនសុទ្ធសឹងជា ផលិតផល​ដែល​មាន​ស្លាក​សញ្ញា Recyle មានន័យថា, ផលិតផលដែលអាចកែច្នៃវិញបាន។លោក បន្តទៀតថា ជុំវិញផលិតផលនេះ សម្រាប់នៅក្នុងប្រទេសថៃ ត្រូវបាន​ប្រជាជន​ថៃ​គាំទ្រ​យ៉ាង​ខ្លាំង និងមានដាក់តាំង លក់នៅគ្រប់ទីកន្លែងនៅក្នុងប្រទេសថៃផងដែរ និងបានចែក​ចាយ​ទៅ​កាន់​ទី​ផ្សារអឺរ៉ុប ចិន និងនៅសហរដ្ឋអាមេរិកជាដើម ចំណែក នៅពេលនេះ ក្នុងនាមកម្ពុជា​គឺ​ជា​ប្រទេសជិ​ត​ខាងភូមិផងរបងតែមួយ និងក៏ជាទីផ្សារដែលប្រជាជាជន ពាណិជ្ជករ និងអ្នកធ្វើ​អាជីកម្ម ថៃចាប់អារម្មណ៍យ៉ាងខ្លាំងនោះ ទើបមានព្រឹត្តិការណ៍នាពេលនេះ ដើម្បី​ដាក់​តាំង​បង្ហាញ​បន្ថែម ប្រជាជនកម្ពុជាបានស្គាល់កាន់ តែច្បាស់ និងជាវយកផលិផលទាំងនេះសម្រាប់ប្រើប្រាស់ និងហូបចុកប្រចាំថ្ងៃ។ឯកឧត្តម ឆើតគៀត អត្ថកន (Cherdkiat ATTHAKOR) ឯកអគ្គរាជទូ​ត​ថៃ​ប្រចាំ​ព្រះរាជា​ណា​ចក្រ​ក​ម្ពុជា លើកឡើងថា ពិព័រណ៍ BCG Thai Festive Fair បានបង្កប់នូវគោលការណ៍នៃ Bio-Circular-Green Economy ដែលមិនត្រឹមតែឆ្លុះបញ្ចាំងពីការ យកចិត្តទុកដាក់របស់យើង ចំពោះ​ការ​អភិវឌ្ឍប្រកបដោយនិរន្តរភាពប៉ុណ្ណោះទេ ប៉ុន្តែថែមទាំងបម្រើក្នុងក្របខណ្ឌសម្រាប់ការលើក កម្ពស់ ការអនុវត្តអាជីវកម្មដែលមិនប៉ះពាល់ដល់បរិស្ថាន និងការច្នៃ​ប្រឌិត​ដែល​ពិភពលោក​កំពុង​ឆ្ពោះ​ទៅមុខ។ទាក់ទិនពិព័រណ៍នេះដែរ, ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្មកម្ពុជា លើក​ឡើង​ផង​ដែរថា តាមរយៈ ព្រឹត្តិការណ៍នេះ គឺជាការពង្រឹងចំណង​មិត្តភាព​រវាង​ប្រទេស​ទាំង​ពីរ​បន្ថែម​ និងក៏ជាការស្វែងយល់ពីសក្តានុពលដ៏ធំធេងសម្រាប់ សេដ្ឋកិច្ច និងកិច្ចសហការ ជា​ពិសេស​ជា​ការជំរុញដល់ការធ្វើពាណិជ្ជកម្មទ្វេភាគីរវាងកម្ពុជានិងថៃបន្ថែមផងដែរ ដើម្បីជំរុញ​ឱ្យ​មានកំណើនកាន់តែល្អប្រសើរ សម្រាប់ផ្តល់ផលប្រយោជន៍ដល់ប្រទេសយើងទាំងពីរ៕ អត្ថបទ៖ សុន រ៉ាឌី 

បណ្ដាញសង្គម

ព័ត៌មានថ្មីៗ

ក្រសួងអប់រំ ប្រជុំណែនាំសម្រាប់ការចាប់ផ្ដើមការងារបូកស្រង់ពិន្ទុការប្រឡងសញ្ញាបត្របាក់ឌុប
09/08/2025 11:09 AM
Facebook Telegram Linkin
អភិបាលខេត្តឧត្ដរមានជ័យ នាំយកនូវទេយ្យទាន គ្រឿងឧបភោគ-បរិភោគ និងថវិកា ប្រគេនដល់ព្រះសង្ឃចំនួន៣វត្ត នៅតាមបន្ទាត់ព្រំដែន កម្ពុជា-ថៃ
09/08/2025 11:09 AM
Facebook Telegram Linkin
កម្ពុជា-ម៉ាឡេស៊ី បង្កើនកិច្ចសហប្រតិបត្តិការជំរុញ​បរិយាកាស​ធ្វើធុរកិច្ច​ឱ្យ​កាន់​តែ​ខ្លាំង​ក្លា​ជាមួយ​គ្នា
09/08/2025 10:09 AM
Facebook Telegram Linkin
សម្តេចធិបតី នាយករដ្ឋមន្ត្រី អញ្ជើញជួបប្រជុំទ្វេភាគីជាមួយឯកឧត្តម ប្រធានាធិបតីហ្វីលីពីន
09/08/2025 10:09 AM
Facebook Telegram Linkin
ព្យុះត្រូពិក វាយប្រហារប្រទេសចិនភាគខាងត្បូង ដោយបង្ខំឲ្យជម្លៀសមនុស្ស និងបិទសាលារៀន
09/08/2025 10:09 AM
Facebook Telegram Linkin
សម្តេចតេជោ ហ៊ុន សែន ប្រមុខរដ្ឋស្ដីទី អញ្ជើញជួបប្រជុំកំពូលជាមួយ ឯកឧត្តម ប្រធានាធិបតីហ្វីលីពីន
09/08/2025 10:09 AM
Facebook Telegram Linkin
អតីតប្រមុខការបរទេសជប៉ុន លោក Motegi ប្រកាសឈរឈ្មោះប្រជែងតំណែងប្រធានបក្សកាន់អំណាចថ្មី
09/08/2025 10:09 AM
Facebook Telegram Linkin
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥
09/08/2025 10:09 AM
Facebook Telegram Linkin
ឯកឧត្តម ស៊ុន ចាន់ថុល ដឹកនាំគណៈប្រតិភូកម្ពុជាចូលរួមពិព័រណ៍អន្តរជាតិចិនលើកទី២៥ CIFIT នៅប្រទេសចិន
09/08/2025 10:09 AM
Facebook Telegram Linkin
ថ្នាក់ដឹកនាំខេត្តកោះកុងនាំយកនូវទេយ្យទាន និងចង្ហាន់ប្រគេនព្រះសង្ឃវត្តជោតញ្ញាណ ថ្ងៃកាន់បិណ្ឌទី១
09/08/2025 10:09 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.