BTV NEWS

ក្រសួងកសិកម្ម ចុះអនុស្សរណៈយោគយល់គ្នាជាមួយបណ្តាធនាគារដៃគូ ដើម្បីផ្តល់កម្ចីក្នុងអត្រាការប្រាក់ទាបដល់កសិករ

ឆមាសទី១ឆ្នាំនេះ ការដោះដូរពាណិជ្ជកម្មអន្តរជាតិរបស់កម្ពុជាមានទំហំទឹកប្រាក់ជាង៣១ពាន់លានដុល្លារ

ឯកឧត្តម ស៊ុន ចាន់ថុល អំពាវនាវដល់ម្ចាស់រោងចក្រសូមរក្សាភាពស្ងាត់ស្ងៀម និងជឿជាក់លើរាជរដ្ឋាភិបាលដែលកំពុងខិតខំប្រឹងប្រែង

កម្ពុជាកំពុងបន្តស្វែងរកទីផ្សារថ្មីៗ ដើម្បីពង្រីកទីផ្សារនាំចេញបន្ថែម

សេដ្ឋកិច្ច និង កសិកម្ម

សម្តេចធិបតី ហ៊ុន ម៉ាណែត ប្រកាសប្រែក្លាយកំពង់ផែព្រះសីហនុជាកន្លែងផ្ទេរទំនិញ

ព្រះសីហនុ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសដាក់ចេញមហិច្ឆតាប្រែក្លាយកំពង់ផែព្រះសីហនុ ជាកន្លែងផ្ទេរទំនិញរបស់កម្ពុជា ខណៈកំពង់ផែទឹកជ្រៅជំហាន១ នឹងចាប់ផ្ដើមបុកគ្រឹះសាងសង់នាមុនបំណាច់ឆ្នាំ ២០២៣នេះ ដើម្បីពង្រីកសមត្ថភាពទទួល កប៉ាល់ដឹក ទំនិញ និងកាត់បន្ថយតម្លៃដឹកជញ្ជូន។សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ថ្លែងក្នុងពិធីសំណេះសំណាលជាមួយកម្មករ-និយោជិត ក្នុងតំបន់សេដ្ឋកិច្ចពិសេស ខេមបូឌា ចេជាង ហ្គ័រជី អេសអ៊ីហ្សេត ស្ថិតក្នុងស្រុកព្រៃនប់ ខេត្តព្រះសីហនុ នាព្រឹកថ្ងៃទី៧ វិច្ឆិកា ២០២៣នេះ ដោយបានថ្លែងសាទរ និងរីករាយ ចំពោះការចាប់ផ្តើមដំណើរការការដ្ឋានសាងសង់កំពង់ផែទឹកជ្រៅខេត្តព្រះសីហនុ ដំណាក់កាលទី១ មុនដាច់ឆ្នាំ២០២៣។សម្តេចធិបតី ហ៊ុន ម៉ាណែត ថ្លែងប្រកាសដាក់ចេញមហិច្ឆតាប្រែក្លាយកំពង់ផែព្រះសីហនុ ជាកន្លែងផ្ទេរទំនិញ។ សម្តេចថ្លែងថា រាជរដ្ឋាភិបាលកំពុងដាក់ចេញផែនការមេ អភិវឌ្ឍន៍ខេត្តព្រះសីហនុ និងខេត្តជាប់សមុទ្រ ដោយមិនយកខេត្តជាប់សមុទ្រដទៃ មកប្រកួតប្រជែងជាមួយខេត្តព្រះសីហនុនោះឡើយ។សម្តេចនាយករដ្ឋមន្រ្ដីក៏ប្រកាសប្រគល់ភារកិច្ចជូនឧបនាយករដ្ឋមន្ត្រី ស៊ុន ចាន់ថុល គិតគូរពីការអភិវឌ្ឍផែនៅខេត្តជាប់សមុទ្រផងដែរ។សូមជម្រាបថា រាជរដ្ឋាភិបាលកម្ពុជាបានកំណត់ផែនការយុទ្ធសាស្រ្ដប្រែក្លាយខេត្តព្រះសីហនុ ទៅជាប៉ូលសេដ្ឋកិច្ចដែលមានសក្តានុពលដ៏សំខាន់ក្នុងការជំរុញកំណើនសេដ្ឋកិច្ចកម្ពុជា ដោយសារខេត្តនេះមានកំពង់ផែសមុទ្រទឹកជ្រៅអាកាសយានដ្ឋានអន្តរជាតិ ស្ថានីយរាជាយស្ម័យយាន តំបន់សេដ្ឋកិច្ចពិសេស និងឆ្នេរសមុទ្រដ៏ស្រស់ស្អាត ស្ថិតនៅប៉ែកនិរតីនៃប្រទេសកម្ពុជា។ ជាក់ស្ដែងបរិមាណទំនិញឆ្លងកាត់នៅឆ្នាំ ២០២២ មានចំនួនប្រមាណ ៧ លានតោន កើនឡើង ០,១៨% និងចំណូលសរុបមានចំនួនប្រមាណ ៣៤៤ ប៊ីលានរៀល (ប្រមាណ ៨៤ លានដុល្លារ អាមេរិក) កើនឡើង ០,៤១% បើធៀបនឹងឆ្នាំ២០២១។ កំពង់ផែស្វយ័តក្រុងព្រះសីហនុទទួលបានកំណើនបរិមាណកុងតឺន័រឆ្លងកាត់ជាមធ្យម ១០,៥៥% ក្នុងរយៈពេល ៥ ឆ្នាំ ចុងក្រោយនេះ (២០១៨-២០២២) ជាពិសេសនៅឆ្នាំ ២០២១ បរិមាណកុងតឺន័រកើន ១៤,១១%៕ អត្ថបទ៖វ៉ន ដារ៉ា

សម្ដេចធិបតីជំរុញឱ្យសិក្សាអភិវឌ្ឍន៍ផ្លូវដែក ឱ្យអាចបើកក្នុងល្បឿនយ៉ាងតិច ៨០ គីឡូម៉ែត្រក្នុងមួយម៉ោង

ព្រះសីហនុ៖ ថ្លែងក្នុងអំឡុងពេលអញ្ជើញជួបសំណេះសំណាលជាមួយកម្មករ និយោជិតជាងមួយម៉ឺនប្រាំពាន់នាក់នៅតំបន់សេដ្ឋកិច្ចពិសេស ខេមបូឌា ចេជាង ហ្គ័រជី អេសអ៊ីហ្សេត ស្ថិតក្នុងស្រុកព្រៃនប់ ខេត្តព្រះសីហនុ នាថ្ងៃទី៧ ខែវិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានមានប្រសា សន៍ ដោយស្នើឱ្យមានការសិក្សាអភិវឌ្ឍន៍ផ្លូវដែកនៅកម្ពុជា ដើម្បីមានសមត្ថភាពបើកបរឱ្យបានលឿន ជាងសព្វថ្ងៃ។សម្ដេចធិបតី ហ៊ុន ម៉ាណែត បន្ថែមថា ល្បឿនរថភ្លើងដឹកទំនិញនៅកម្ពុជាបច្ចុប្បន្ន បើកក្នុងល្បឿនរង្វង់ ៥០ គីឡូម៉ែត្រក្នុងមួយម៉ោង គឺមិនអាចបំពេញតម្រូវការក្នុងការដឹកជញ្ជូនប្រចាំថ្ងៃបាននោះទេ។សម្ដេចធិបតីនាយករដ្ឋមន្ត្រី បញ្ជាក់បន្ថែមថា នៅក្នុងរយៈពេលប៉ុន្មានឆ្នាំចុងក្រោយនេះ កម្ពុជាមាន តម្រូវការកាន់តែច្រើនលើការដឹកជញ្ជូនទំនិញ កត្តានេះក៏បានធ្វើឱ្យមានការកកស្ទះផងដែរ។ក្រៅពីការជំរុញឱ្យសិក្សាអភិវឌ្ឍន៍ផ្លូវដែក សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក៏បាន បង្ហាញពីគម្រោងអភិវឌ្ឍន៍ប្រព័ន្ធហេដ្ឋារចនាសម្ពន្ធផ្លូវស្ពាននានាទៅកាន់តំបន់ផ្សេងៗឱ្យបានខ្វែងខ្វាត់ នៅទូទាំងប្រទេស ដើម្បីជំរុញកំណើនសេដ្ឋកិច្ច និងជីវភាពពលរដ្ឋកាន់តែប្រសើរផងដែរ៕ដោយ៖ គង់ ឌិន

សង្គ្រាមជាមួយក្រុមហាម៉ាស នឹងធ្វើឲ្យអ៊ីស្រាអែលចំណាយជាង ៥០ពាន់លានដុល្លារ

ជម្លោះជាមួយក្រុមសកម្មប្រយុទ្ធហាម៉ាសនៅតំបន់ហ្គាហ្សា នឹងធ្វើឲ្យអ៊ីស្រាអែលចំណាយប្រាក់ប្រមាណ ៥១ ពាន់លានដុល្លារ។របាយការណ៍ បានបញ្ជាក់ថា ការប៉ាន់ប្រមាណនេះ ធ្វើឡើងតាមការសន្មតថា សង្រ្គាមនឹងមានរយៈពេលពី ៨ ទៅ ១២ ខែ ហើយនឹងត្រូវបានកំណត់ត្រឹមតំបន់ហ្កាហ្សា ដោយគ្មានការចូលរួមពេញលេញពីក្រុមហេសបូឡា លីបង់ អ៊ីរ៉ង់ ឬយ៉េម៉ែន ហើយថា ជនជាតិអ៊ីស្រាអែលប្រហែល ៣៥0.០០០ នាក់ ដែលត្រូវបានត្រៀមឲ្យចូលទៅក្នុងទាហានបម្រុង នឹងបន្តការងាររបស់ពួកគេ នាពេលឆាប់ៗនេះ។ក្រសួងបានចាត់ទុកការប៉ាន់ប្រមាណនៃប្រាក់សាកែលអ៊ីស្រាអែល(ILS) ចំនួន២០០ពាន់លាន (៥១ ពាន់លានដុល្លារ) ឬប្រហែល១០ភាគរយនៃផលិតផលក្នុងស្រុកសរុបរបស់អ៊ីស្រាអែលថា ជា សុទិដ្ឋិនិយម។ការចំណាយពាក់កណ្តាល បានធ្លាក់ទៅផ្នែកការការពារ ដែលមានប្រាក់ ILS ចំនួនប្រហែលមួយពាន់លាន (ប្រហែល ២៥២,២ លានដុល្លារអាមេរិក) ប្រចាំថ្ងៃ។ ប្រាក់ ILS ៤០-៦០ពាន់លាន (១០,0៩-១៥,១៣ ពាន់លានដុល្លារ) ផ្សេងទៀត នឹងត្រូវគណនាដោយការបាត់បង់ប្រាក់ចំណូល ILS ចំណូល ១៧ -២០ ពាន់លាន(៤,២៨-៥,០៤ពាន់លាន) សម្រាប់សំណងដល់អាជីវកម្ម និង ប្រាក់ILS ចំនួន ១០-២០ ពាន់លាន (ប្រហែល ២,៥២-៥,០៤ពាន់លានដុល្លារ)សម្រាប់ការស្តារនីតិសម្បទា។

អ៊ីរ៉ង់ជំរុញឲ្យបណ្តារដ្ឋាភិបាលឥស្លាម បញ្ឈប់ការនាំចេញប្រេង និងអាហារ ទៅកាន់អ៊ីស្រាអែល

ប្រព័ន្ធផ្សព្វផ្សាយរដ្ឋ បានរាយការណ៍ថា មេដឹកនាំកំពូលរបស់ប្រទេសអ៊ីរ៉ង់ បានអំពាវនាវឲ្យរដ្ឋាភិបាលឥស្លាម បញ្ឈប់ការនាំចេញប្រេង និងអាហារទៅកាន់ ប្រទេសអ៊ីស្រាអែល ដោយទាមទារឲ្យបញ្ចប់ការទម្លាក់គ្រាប់បែករបស់ខ្លួន ទៅលើតំបន់ហ្កាហ្សាស្ទ្រីប។លោក អាយ៉ាតូឡា អាលី ខាមីណេ (Ayatollah Ali Khamenei)ត្រូវបានដកស្រង់សម្តីដោយប្រាប់ក្រុមនិស្សិតនៅទីក្រុងតេអេរ៉ង់ថា៖«ការទម្លាក់គ្រាប់បែកលើតំបន់ហ្កាហ្សា ត្រូវតែបញ្ឈប់ជាបន្ទាន់... ផ្លូវនៃការនាំចេញប្រេងនិងអាហារ ទៅកាន់របបជ្វីហ្វនិយម គួរតែត្រូវបានបញ្ឈប់»។ «រដ្ឋាភិបាលឥស្លាមទាំងអស់ ត្រូវតែទទូចឲ្យបញ្ចប់អំពើឧក្រិដ្ឋកម្មឲ្យបានឆាប់រហ័ស» ។អ៊ីស្រាអែល បានប្តេជ្ញាកម្ចាត់ក្រុមហាម៉ាស ដែលជាក្រុមភេរវកម្មគាំទ្រដោយអ៊ីរ៉ង់ ដែលគ្រប់គ្រងតំបន់ហ្កា ហ្សាស្ទ្រីប ជាការសងសឹកចំពោះការវាយប្រហារកាលពីថ្ងៃទី៧ ខែតុលា ដែលបានសម្លាប់មនុស្ស ១.៤០០ នាក់ និងចាប់ចំណាប់ថ្នូររាប់រយនាក់។អ៊ីស្រាអែល បានបើកការទម្លាក់គ្រាប់បែកមិនធ្លាប់មានពីមុនមកលើតំបន់ហ្កាហ្សា និងបានដាក់ការឡោមព័ទ្ធទឹកដីនេះ។ ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយថា មនុស្សជាង ៨.000នាក់ ត្រូវបានសម្លាប់ នៅក្នុងការវាយប្រហារសងសឹកទាំងនោះ។

អត្រាអតិផរណារបស់ប្រទេសឥណ្ឌូណេស៊ី បានកើនឡើងក្នុងខែតុលា

អតិផរណាប្រចាំឆ្នាំរបស់ប្រទេសឥណ្ឌូនេស៊ី បានកើនឡើងក្នុងខែតុលា ដែលជំរុញដោយកំណើនតម្លៃម្ហូបអាហារ ភេសជ្ជៈ និងថ្នាំជក់ នេះបើយោងតាមទីភ្នាក់ងារស្ថិតិឥណ្ឌូនេស៊ី (BPS) កាលពីថ្ងៃពុធ (១ វិច្ឆិកា)។ លោក ភូដជី អ៊ីស្មាទីនី (Pudji Ismartini) អនុប្រធានទីភ្នាក់ងារស្ថិតិ BPS ទទួលបន្ទុកផ្នែកស្ថិតិចែកចាយ និងសេវាកម្ម បាននិយាយនៅក្នុងសន្និសីទសារព័ត៌មានមួយថា «អង្ករគឺជាអ្នករួមចំណែកដ៏ធំបំផុតចំពោះអតិផរណាចាប់ពីខែសីហា ដល់ខែតុលា» ដោយបន្ថែមថាព្រឹត្តិការណ៍អាកាសធាតុ អ៊ែល នីញ៉ូ (El Nino) បានបង្កជាគ្រោះរាំងស្ងួតដ៏យូរ ដែលបណ្តាលឱ្យផលិតកម្មស្រូវធ្លាក់ចុះ។តួលេខអតិផរណានេះ ស្ថិតនៅក្នុងគោលដៅសុវត្ថិភាពរបស់ធនាគារកណ្តាលពីកម្រិត ២ភាគរយទៅ ៤ភាគរយនៅឆ្នាំនេះ។ សម្រាប់ឆ្នាំក្រោយ គោលដៅសុវត្ថិភាពអតិផរណានឹងមានពីកម្រិត ១,៥ភាគរយ ទៅ ៣,៥ភាគរយ។ ធនាគារកណ្តាលរបស់ប្រទេសឥណ្ឌូនេស៊ី កាលពីថ្ងៃទី១៩ ខែតុលា បានដំឡើងអត្រាការប្រាក់គោល ដែលឥឡូវនេះ គឺមានចំនួន ៦ភាគរយ ដើម្បីធ្វើឲ្យមានស្ថិរភាពតម្លៃនៃរូបិយប័ណ្ណ រូពៀ ក្នុងការប្រឈមមុខនឹងការកើនឡើងនៃភាពមិនច្បាស់លាស់ជាសកល ក៏ដូចជាការគ្រប់គ្រងអតិផរណាផងដែរ។ក្រុមអ្នកជំនាញប៉ាន់ប្រមាណថា អង្ករនឹងក្លាយជាកត្តាកំណត់ចម្បងសម្រាប់អតិផរណារួមនៅឆ្នាំ២០២៣ ព្រោះឥទ្ធិពលនៃព្រឹត្តិការណ៍អាកាសធាតុ អ៊ែល នីញ៉ូ នឹងនៅតែបន្តរហូតដល់ខែដំបូងនៃឆ្នាំក្រោយ បើទោះបីជាប្រទេសឥណ្ឌូនេស៊ី បានចាប់ផ្តើមចូលរដូវវស្សាក៏ដោយ៕

«អង្ករខ្មែរជើងដំបូង»ចំនួនប្រមាណ១ម៉ឺនតោន នឹងត្រូវដឹកចេញដល់កំពង់ផែឥណ្ឌូនេស៊ី ជាផ្លូវការនៅថ្ងៃនេះ

ភ្នំពេញ៖ តាមរយៈការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានចរចាបើកទីផ្សារក្នុងការនាំអង្ករចេញទៅកាន់ប្រទេសឥណ្ឌូនេស៊ី «អង្ករខ្មែរជើងដំបូង» ចំនួន ៣ ៥០០តោន បានដឹកទៅដល់កំពង់ផែឥណ្ឌូនេស៊ីជាផ្លូវការ ខណៈជាលទ្ធផល អង្ករកម្ពុជាចំនួនប្រមាណ១ម៉ឺនតោន នឹងត្រូវដឹកចេញ ទៅដល់កំពង់ផែឥណ្ឌូនេស៊ីជាផ្លូវការហើយនៅថ្ងៃនេះ។មានប្រសាសន៍ប្រាប់ទូរទស្សន៍ព័ត៌មាន ប៊ីធីវី នៅព្រឹកថ្ងៃទី២ ខែវិច្ឆិកា ឆ្នាំ២០២៣នេះ ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា បានឲ្យដឹងថា ការដឹកអង្ករចេញពីកម្ពុជាមានចំនួន៣ជើង ដោយប្រើរយៈពេល ១៨ថ្ងៃ ទៅដល់ប្រទេសឥណ្ឌូណេស៊ី និងអាស្រ័យកំពង់ផែដែលត្រូវទៅ។ ឯកឧត្តម បានរៀបរាប់ថា ក្នុងជើងទី១នេះ បានទៅដល់ទីផ្សារឥណ្ឌូនេស៊ី ចំនួន ៣,៥០០តោន។ ឯកឧត្តម បានបន្តថា ជើងទី២ មានចំនួន ៣,០០០តោន បានចេញដំណើរទៅ នៅថ្ងៃ២៩ តុលា ២០២៣ និងជើងទី៣ ចំនួន ៣,៥០០តោន នឹងត្រូវចេញដំណើរនៅថ្ងៃ៥ ខែវិច្ឆិកា ឆ្នាំ២០២៣។សូមបញ្ជាក់ថា នេះជាលទ្ធផលនៃកិច្ចខំប្រឹងប្រែងក្នុងការចរចាបើកទីផ្សារ និងជំរុញការនាំចេញរហូតបានសម្រេច តាមរយៈការដឹកនាំរបស់សម្ដេចនាយករដ្ឋមន្ដ្រីនៃកម្ពុជា និងការចូលរួមពីសំណាក់ក្រសួងស្ថាប័នពាក់ព័ន្ធទាំងអស់ រាប់ចាប់តាំងពីក្រសួងកសិកម្ម រុក្ខាប្រមាញ់ និងនេសាទ , ក្រសួងពាណិជ្ជកម្ម , អគ្គនាយកដ្ឋានគយនិងរដ្ឋាករកម្ពុជា ក៏ដូចជាវិស័យឯកជនជាដៃគូ គឺសហព័ន្ធស្រូវអង្ករកម្ពុជា។ កិច្ចខំប្រឹងប្រែងទាំងអស់នេះ ធ្វើឡើងស្របទៅតាមគោលនយោបាយបញ្ចកោណដំណាក់កាលទី១ ផ្ដោតលើការលើកស្ទួយកសិកម្ម និងការអភិវឌ្ឍជនបទ ដែលផ្ដោតលើការបន្តពង្រឹងតួនាទី និងការអភិវឌ្ឍវិស័យកសិកម្មឱ្យទំនើប សម្បូរបែប និងមានភាពធន់ ដែលគាំទ្រដល់ការអភិវឌ្ឍជនបទ សំដៅធានាសន្តិសុខ និងសុវត្ថិភាពស្បៀង, បង្កើនតម្លៃបន្ថែមខ្ពស់, ជំរុញភាពប្រកួតប្រជែង និងលើកកម្ពស់គុណភាពជីវភាពប្រជាជននៅទីជនបទ៕

តម្លៃប្រេងហក់ឡើងខ្ពស់ ខណៈជម្លោះនៅមជ្ឈិមបូព៌ា បង្កក្តីបារម្ភដល់ការផ្គត់ផ្គង់

តម្លៃប្រេងបានកើនឡើងខ្ពស់នៅក្នុងការជួញដូរដំបូងនៅថ្ងៃព្រហស្បតិ៍ទី២ខែវិច្ឆិកានេះ ស្របពេលជម្លោះនៅមជ្ឈិមបូព៌ា ធ្វើឲ្យក្រុមវិនិយោគិនព្រួយបារម្ភខ្លាំង ថាតើជម្លោះនោះអាចរំខានដល់ការផ្គត់ផ្គង់ប្រេងនៅជុំវិញតំបន់នេះដែរឬទេ។តម្លៃភាគហ៊ុននៃប្រេងឆៅរបស់ក្រុមហ៊ុនប្រេនធ៍(Brent) របស់សហរដ្ឋអាមេរិក បានកើនឡើង ៣៨សេន ក្នុងតម្លៃ ៨៥,០១ដុល្លារ ក្នុងមួយបារ៉ែល នៅត្រឹម ០០ ម៉ោងសកល ស្រពពេលតម្លៃភាគហ៊ុនប្រេងឆៅរបស់អាមេរិក West Texas Intermediate បានកើនឡើង៤៦ សេន ក្នុងតម្លៃ៨០,៩០ដុល្លារក្នុងមួយបារ៉ែល។ ប្រព័ន្ធផ្សព្វផ្សាយរដ្ឋបានរាយការណ៍ថា មេដឹកនាំកំពូលរបស់អ៊ីរ៉ង់ លោក អាយ៉ាតូឡា អាលី កាម៉េនី (Ayatollah Ali Khamenei)បានអំពាវនាវឱ្យបណ្ដារដ្ឋមូស្លីមបញ្ឈប់ការនាំចេញប្រេង និងអាហារទៅកាន់ប្រទេសអ៊ីស្រាអែល ដោយទាមទារឱ្យបញ្ចប់ការទម្លាក់គ្រាប់បែករបស់ខ្លួនលើតំបន់ហ្កាហ្សា តទទៅទៀត ។ យោងតាមទិន្នន័យថាមពលរបស់សហរដ្ឋអាមេរិក អ៊ីរ៉ង់ ដែលជាសមាជិកនៃអង្គការប្រទេសនាំចេញប្រេងឬហៅថា (OPEC) ផលិតបានប្រេងឆៅប្រហែល ២,៥ លានបារ៉ែលក្នុងមួយថ្ងៃកាលពីឆ្នាំ២០២២។កងកម្លាំងអ៊ីស្រាអែលបានសម្លាប់មេបញ្ជាការក្រុមហាម៉ាសម្នាក់ទៀតកាលពីថ្ងៃពុធនៅក្នុងការវាយប្រហារលើកទីពីររបស់ពួកគេលើជំរំជនភៀសខ្លួន ចាបាលីយ៉ា (Jabalia) ក្នុងតំបន់ហ្កាហ្សារយៈពេលពីរថ្ងៃ ស្របពេលក្រុមជនស៊ីវិលដំបូងដែលជម្លៀសចេញពីតំបន់ឡោមព័ទ្ធបានឆ្លងចូលទៅក្នុងប្រទេសអេហ្ស៊ីប។ អ្នកចូលរួមក្នុងទីផ្សារហិរញ្ញវត្ថុ កំពុងរង់ចាំកិច្ចប្រជុំរបស់ធនាគារអង់គ្លេសដែលរំពឹងទុកនៅថ្ងៃព្រហស្បតិ៍នេះ ។ នៅអឺរ៉ុប អតិផរណាខែតុលានៅក្នុងតំបន់ចាយប្រាក់អឺរ៉ូ គឺនៅកម្រិតទាបបំផុតក្នុងរយៈពេលពីរឆ្នាំ ដោយការិយាល័យស្ថិតិសហភាពអឺរ៉ុប បានបង្ហាញពីទស្សនៈថាធនាគារកណ្តាលអឺរ៉ុបទំនងជាមិនដំឡើងអត្រាការប្រាក់ក្នុងពេលឆាប់ៗនេះទេ៕

ធនាគារពិភពលោក ព្រមានថា សង្គ្រាមនៅមជ្ឈឹមបូព៌ាអាចបង្កឲ្យមានការរង្គោះរង្គើតម្លៃប្រេង

ធនាគារពិភពលោក បាននិយាយកាលពីថ្ងៃចន្ទថា ស្ថាប័ននេះរំពឹងថាតម្លៃប្រេងពិភពលោកជាមធ្យម ៩០ ដុល្លារក្នុងមួយបារ៉ែល ក្នុងត្រីមាសទី ៤ និងធ្លាក់ចុះមកជាមធ្យម ៨១ ដុល្លារក្នុងឆ្នាំ ២០២៤ ខណៈដែលកំណើនយឺតបានកាត់បន្ថយតម្រូវការ ប៉ុន្តែបានព្រមានថាការកើនឡើង ខណៈជម្លោះនៅមជ្ឈិមបូព៌ាចុងក្រោយនេះ អាចបង្កើនតម្លៃកាន់តែខ្ពស់ខ្លាំង។ របាយការណ៍ទស្សនវិស័យទីផ្សារទំនិញចុងក្រោយ របស់ធនាគារពិភពលោក បានកត់សម្គាល់ថា តម្លៃប្រេងបានកើនឡើងត្រឹមតែប្រហែល ៦% ចាប់តាំងពីការចាប់ផ្តើមសង្រ្គាមអ៊ីស្រាអែល និងក្រុមហាម៉ាស ខណៈតម្លៃទំនិញកសិកម្ម លោហៈ និងទំនិញផ្សេងទៀត បានកើនឡើងយឺត។ធនាគារបាននិយាយថារបាយការណ៍នេះ បានបញ្ជាក់អំពីសេណារីយ៉ូ ហានិភ័យចំនួនបី ដោយផ្អែកលើវគ្គប្រវត្តិសាស្ត្រដែលពាក់ព័ន្ធទៅនឹងជម្លោះក្នុងតំបន់ចាប់តាំងពីទសវត្សរ៍ឆ្នាំ ១៩៧០ ដោយការកើនឡើងភាពធ្ងន់ធ្ងរ និងផលវិបាក។ សេណារីយ៉ូ នៃការបង្អាក់តិចតូច ស្មើនឹងការកាត់បន្ថយទិន្នផលប្រេង ដែលត្រូវបានឃើញក្នុងអំឡុងពេលសង្រ្គាមស៊ីវិលប្រទេសលីប៊ី ក្នុងឆ្នាំ ២០១១ ប្រមាណ ៥០០.០០០ ទៅ ២ លានបារ៉ែលក្នុងមួយថ្ងៃ ដែលជំរុញឱ្យតម្លៃប្រេងហក់ឡើងចន្លោះពី ៩៣ ទៅ ១០២ ដុល្លារក្នុងមួយបារ៉ែលនៅក្នុងត្រីមាសទី ៤ ។ សេណារីយ៉ូ ការបង្អាក់កម្រិតមធ្យម ដែលដូចគ្នាទៅនឹងសង្រ្គាមអ៊ីរ៉ាក់ ក្នុងឆ្នាំ ២០០៣ បានកាត់បន្ថយការផ្គត់ផ្គង់ប្រេងនៅទូទាំងពិភពលោកពី ៣ លានទៅ ៥ លានបារ៉ែលក្នុងមួយថ្ងៃ ដែលជំរុញឱ្យតម្លៃនៅចន្លោះពី ១០៩ ទៅ ១២១ ដុល្លារក្នុងមួយបារ៉ែល។ លោក Ayhan Kose អនុប្រធានសេដ្ឋវិទូរបស់ធនាគារពិភពលោក បាននិយាយថា តម្លៃប្រេងហក់ឡើងខ្ពស់ ហើយប្រសិនបើនៅបន្ត នោះមានន័យថាតម្លៃស្បៀងអាហារកើនឡើងកាន់តែខ្ពស់ផងដែរ។

អគ្គនាយកដ្ឋានពន្ធដារ ប្រមូលចំណូលពន្ធបានជាង ៣ ពាន់លានដុល្លារអាម៉េរិក

ភ្នំពេញ៖ អគ្គនាយកដ្ឋានពន្ធដារ គិតត្រឹមថ្ងៃទី៣០ ខែតុលា ឆ្នាំ២០២៣នេះ ប្រមូលចំណូលពន្ធអាករគ្រប់ប្រភេទ តាមប្រព័ន្ធគ្រប់គ្រង ទិន្នន័យចំណូលអនឡាញ បានចំនួនជាង១២ ពាន់ប៊ីលានរៀល ត្រូវប្រមាណជាង ៣ ពាន់លានដុល្លារ ស្មើនឹង ៨៥,៧០ ភាគរយនៃផែនការប្រចាំឆ្នាំ២០២៣។ឯកឧត្តម គង់ វិបុល រដ្ឋមន្រ្តីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន ពន្ធដារ លើកឡើងក្នុងកិច្ចប្រជុំបូកសរុបការងារប្រមូលចំណូលប្រចាំ ខែកញ្ញា និងប្រចាំត្រីមាសទី៣ ឆ្នាំ ២០២៣នេះថា លទ្ធផលប្រមូលពន្ធក្នុងខែកញ្ញា ឆ្នាំ ២០២៣ នេះ ចំណូលពន្ធអាករគ្រប់ប្រភេទដែលអគ្គនាយកដ្ឋានពន្ធដារប្រមូលបានជាក់ស្ដែង តាមប្រព័ន្ធគ្រប់ គ្រងទិន្នន័យចំណូលអនឡាញ បានចំនួនជាង ១ ពាន់ប៊ីលានរៀល ត្រូវប្រមាណ ២៥៥ លានដុល្លារ ស្មើជាង ៧ ភាគរយ នៃផែនការ ច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣។ ទាក់ទងការប្រមូលចំណូលនេះ បើគិតសរុបក្នុងរយៈពេល ៣ ត្រីមាស ក្នុងឆ្នាំ ២០២៣, អគ្គនាយកដ្ឋានពន្ធដារប្រមូលបាន មានចំនួនជាង ១១ ពាន់ប៊ីលានរៀល ត្រូវប្រមាណជាង ២ ៨០៦ លានដុល្លារ ស្មើនឹង ៧៨,៥៧ ភាគរយ នៃផែនការច្បាប់ ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ ២០២៣ ក្នុងនោះបើត្រឹមថ្ងៃទី ៣០ ខែ តុលា ឆ្នាំ២០២៣ នេះវិញ ការប្រមូលចំណូលសម្រេចបានជាង ១២ ពាន់ប៊ីលានរៀលត្រូវជា៣ ០៦០ លានដុល្លារស្មើនឹង ៨៥,៧០ ភាគរយ នៃផែនការប្រចាំឆ្នាំ២០២៣។ជុំវិញការប្រមូលចំណូលនេះ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បាន ផ្តល់នូវអនុសាសន៍ណែនាំសម្រាប់ជាទិសដៅអនុវត្តបន្ត របស់អគ្គនាយកដ្ឋានពន្ធដារ ជាពិសេសការងារអាទិភាពសំខាន់ៗ ក្នុងការពង្រឹង និងធ្វើឱ្យប្រសើរឡើងនូវការផ្ដល់សេវាអ្នកជាប់ពន្ធ ការដាក់ចេញនូវអាទិភាពការងារ និងដោះស្រាយនូវបញ្ហាប្រឈមនានារបស់វិស័យ ឯកជន ក៏ដូចជាសាធារណជនទូទៅ ការលើកកម្ពស់ការយល់ដឹងនិងការអប់រំអំពីពន្ធដារ ការពង្រឹងការបំពេញ ការងារដោយផ្អែកលើ និយាមនីតិវិធីប្រតិបត្តិការងារ លើគ្រប់ប្រភេទការងារ និងប្រភេទពន្ធ ព្រមទាំងដាក់ចេញនូវអនុសាសន៍គន្លឹះមួយចំនួនទៀត សម្រាប់ ការងារកែទម្រង់ជាលក្ខណៈប្រព័ន្ធផងដែរ។ បន្ថែមពីលើនេះ ឯកឧត្តមអគ្គបណ្ឌិតសភាចារ្យ បានគាំទ្រលើការដាក់ចេញនូវចក្ខុវិស័យនៃការធ្វើបរិវត្តកម្មឌីជីថលរដ្ឋបាលសារពើពន្ធ ដើម្បីកែប្រែអគ្គនាយកដ្ឋានពន្ធដារកម្ពុជា ទៅជារដ្ឋបាលសារពើពន្ធជំនាន់ ៣.០ ស្របទៅតាមបរិការណ៍វិវត្តនៃរដ្ឋបាលសារពើពន្ធ ក្នុងសកលលោក៕អត្ថបទ៖ សុន រ៉ាឌី

មនុស្សម្នាតម្រង់ជួរយ៉ាងវែងរង់ចាំចាក់ប្រេងឥន្ធនៈនៅប្រទេសអាហ្សង់ទីន ដោយសារកង្វះខាតធ្ងន់ធ្ងរ

កាលពីថ្ងៃសៅរ៍ (២៨ តុលា) មនុស្សម្នាជាច្រើនបានតម្រង់ជាជួរយ៉ាងវែងនៅស្ថានីយ៍សេវាកម្មឥន្ធនៈក្នុងទីក្រុង Buenos Aires និងទីក្រុងផ្សេងទៀតក្នុងប្រទេសអាហ្សង់ទីន ដោយសារកង្វះខាតប្រេងឥន្ធនៈធ្ងន់ធ្ងរ។ ការតម្រង់ជួរដ៏វែងនេះ បានបង្កឱ្យមានការខឹងសម្បារក្នុងចំណោមប្រជាពលរដ្ឋ ដែលភាពតានតឹងរួចទៅហើយ ដោយវិបត្តិសេដ្ឋកិច្ចជាមួយនឹងអតិផរណាជិត ១៤០% និងបញ្ហារូបិយប័ណ្ណ ដែលបានបាត់បង់តម្លៃរហូតដល់ទៅ ៤២% នៅឆ្នាំនេះផងដែរ។រដ្ឋាភិបាលអាហ្សង់ទីន បាននិយាយថាមូលហេតុនៃកង្វះខាតនេះ គឺដោយសារវិបត្តិទេសចរណ៍ក្នុងអំឡុងពេលចុងសប្តាហ៍ ហើយនិងពាក្យចចាមអារ៉ាមអំពីកំណើនតម្លៃទំនិញ ដែលអាចកើតមាន បន្ទាប់ពីការបោះឆ្នោតប្រធានាធិបតី កាលពីថ្ងៃទី២២ ខែតុលា។ រដ្ឋាភិបាល និងក្រុមហ៊ុនប្រេងកាលពីថ្ងៃសៅរ៍បាននិយាយថា ការដឹកជញ្ជូនប្រេងឥន្ធនៈកំពុងចាប់ផ្តើមមកដល់ក្នុងប្រទេស ហើយបន្ថែមថាកង្វះខាតគួរតែត្រូវបានបន្ធូរបន្ថយនៅក្នុងប៉ុន្មានថ្ងៃខាងមុខនេះផងដែរ៕

បណ្ដាញសង្គម

ព័ត៌មានថ្មីៗ

តុលាការព្រហ្មទណ្ឌកម្មអន្តរជាតិ ៖ ឧក្រិដ្ឋកម្មប្រឆាំងមនុស្សជាតិកើតមាននៅតំបន់ Darfur ប្រទេសស៊ូដង់

UN៖ ការកាត់ជំនួយ UNAIDS នឹងនាំឲ្យអ្នកផ្ទុះជំងឺអេដស៍រាប់លាននាក់ស្លាប់គិតត្រឹមឆ្នាំ ២០២៩

អ្នកបើកបរថយន្តតាក់ស៊ីបង្កើតម៉ាស៊ីនត្រជាក់ធ្វើដោយខ្លួនឯង ខណៈរលកកម្តៅវាយប្រហារអាហ្វហ្គានីស្ថាន

ម្ចាស់ជ័យលាភីណូបែល លោកស្រី Mohammadi ប្រាប់ថា អ៊ីរ៉ង់ចេញការគំរាមសម្លាប់

ផ្លូវក្រាលកៅស៊ូពីរជាន់ DBST ចំនួន១ខ្សែ ក្នុងស្រុកកណ្តាលស្ទឹង នឹងបញ្ចប់ការស្ថាបនាក្នុងពេលឆាប់ៗ

សេចក្តីថ្លែងការណ៍៖ ប្រធានាធិបតីលីបង់ ច្រានចោលការធ្វើប្រក្រតីភាពទំនាក់ទំនងជាមួយអ៊ីស្រាអែល

ឧត្តមសេនីយ៍អាមេរិក៖ អង្គការណាតូត្រូវការមីស៊ីលរយៈចម្ងាយឆ្ងាយបន្ថែមទៀត ដើម្បីទប់ស្កាត់រុស្ស៊ី

សមាជិកសភាក្រិក អនុម័តបំរាមសុំសិទ្ធិជ្រកកោនសម្រាប់ជនអន្តោប្រវេសន៍មកពីអាហ្វ្រិកខាងជើង

UN៖ ការគាំទ្រជនភៀសខ្លួនរ៉ូហ៊ីងយ៉ា នៅបង់ក្លាដែស ប្រឈមនឹងការដួលរលំ

វិមានក្រឹមឡាំងអះអាងថា ទីក្រុងម៉ូស្គូកំពុងរង់ចាំសេចក្តីថ្លែងការណ៍សំខាន់ពីលោក Trump

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877