BTV NEWS

សម្ដេចធិបតី៖ កម្ពុជាជ្រើសរើសយកយន្តការ UNCLOS ដោយសារថៃលុបចោល MOU ២០០១ ជាឯកតោភាគី

សម្ដេចធិបតី៖ កងទ័ពថៃបានចូលកាន់កាប់ទឹកដីកម្ពុជាយ៉ាងជ្រៅលើសសូម្បីផែនទីឯកតោភាគីគេបានអះអាង

សម្ដេចតេជោ ហ៊ុន សែន ឆ្លៀតវាយកូនគោលនៅថ្ងៃចុងសប្ដាហ៍ ក្រោយខកខានជាង ១ឆ្នាំ

រាជរដ្ឋាភិបាលបង្ហាញលទ្ធផលការងារឆ្នាំ២០២៥ សម្រាប់ការអនុវត្តផែនការយុទ្ធសាស្ត្រអភិវឌ្ឍន៍ជាតិ

ព័ត៌មានសំខាន់ៗ

សម្ដេចធិបតី៖ កម្ពុជាជ្រើសរើសយកយន្តការ UNCLOS ដោយសារថៃលុបចោល MOU ២០០១ ជាឯកតោភាគី

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បន្តប្រាប់ទៅសារព័ត៌មាន Bloomberg តាមរយៈបទសម្ភាសន៍កាលពីថ្ងៃទី២៤ ខែកក្កដា ឆ្នាំ២០២៦នេះជាថ្មីថា មូលហេតុដែលកម្ពុជាជ្រើសរើសយកយន្តការផ្សះផ្សាដោយបង្ខំក្រោមអនុញ្ញា UNCLOS គឺដោយសារប្រទេសថៃបានសម្រេចលុបចោលអនុស្សរណៈយោគយល់គ្នាឆ្នាំ ២០០១ ដែលជាកិច្ចព្រមព្រៀងទ្វេភាគីតែមួយគត់រវាងកម្ពុជា និងថៃ ស្ដីពីបញ្ហាសមុទ្រ ជាឯកតោភាគី ទោះបីជាកម្ពុជាបានព្រមានស្នើកុំឱ្យលុបចោលក៏ដោយ។ តាមរយៈបទសម្ភាសន៍ សម្ដេចធិបតីបានបញ្ជាក់ថា ចំពោះការលើកឡើងរបស់ថ្នាក់ដឹកនាំថា ជាពិសេសរដ្ឋមន្រ្ដីការបរទេសថៃ ដែលបាននិយាយថា ការណ៍ដែលកម្ពុជាដាក់សំណុំរឿងទៅកាន់យន្តការផ្សះផ្សាដោយបង្ខំក្រោមអនុញ្ញា UNCLOS គឺជាការបិទទ្វារចំពោះការចរចា អំពីព្រំដែនគោក, សម្ដេចធិបតីចាត់ទុកថា ការលើកឡើងនេះ គឺមិនសូវត្រឹមត្រូវ និងមិនសូវយុត្តិធម៌ទេ។ សម្ដេចធិបតីបានបញ្ជាក់ជាថ្មីថា មូលហេតុដែលកម្ពុជាជ្រើសរើសយក យន្តការផ្សះផ្សាដោយបង្ខំក្រោមអនុញ្ញា UNCLOS គឺដោយសារប្រទេសថៃបានសម្រេចលុបចោលអនុស្សរណៈយោគយល់គ្នាឆ្នាំ២០០១ ដែលជាកិច្ចព្រមព្រៀងទ្វេភាគីតែមួយគត់រវាងកម្ពុជា និងថៃ ស្ដីពីបញ្ហាសមុទ្រ។ សម្ដេចបានថ្លែងថា អស់រយៈពេលប្រមាណ ១៥ឆ្នាំ កម្ពុជា និងរដ្ឋាភិបាលថៃជាច្រើនជំនាន់ដែលមានជាង ១០រដ្ឋាភិបាល បានបន្តធ្វើការដោយផ្អែកលើអនុស្សរណៈយោគយល់គ្នាឆ្នាំ២០០១នេះ រួមទាំងអតីតនាយករដ្ឋមន្រ្ដីថៃពីររូប លោក Sretha Thavisin និងលោកស្រី Paetongtarn Shinawatra ក្នុងអំឡុងពេលដែលសម្ដេចកាន់តំណែងជានាយករដ្ឋមន្រ្ដី ក៏បានធ្វើការរួមគ្នា ដើម្បីស្វែងរកដំណោះស្រាយ រួមទាំងការពិភាក្សាអំពីការអភិវឌ្ឍរួម និងបញ្ហាពាក់ព័ន្ធផ្សេងៗថែមទៀតផង។ សម្ដេចធិបតីបានបង្ហាញការសោកស្ដាយ ទោះបីជាកម្ពុជាបានព្រមាន និងស្នើសុំឱ្យប្រទេសថៃ កុំលុបចោល អនុស្សរណៈយោគយល់គ្នាឆ្នាំ ២០០១ ក៏ដោយក៏ភាគីថៃនៅតែសម្រេចលុបចោលកិច្ចព្រមព្រៀងនោះ ដូច្នេះកម្ពុជាគ្មានជម្រើសផ្សេងក្រៅពីការប្រើប្រាស់យន្តការផ្សះផ្សាដោយបង្ខំក្រោមអនុញ្ញា UNCLOSនោះឡើយ៕

សម្ដេចធិបតី៖ កងទ័ពថៃបានចូលកាន់កាប់ទឹកដីកម្ពុជាយ៉ាងជ្រៅលើសសូម្បីផែនទីឯកតោភាគីគេបានអះអាង

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បន្តប្រាប់ទៅសារព័ត៌មាន Bloomberg តាមរយៈបទសម្ភាសន៍កាលពីថ្ងៃទី២៤ ខែកក្កដា ឆ្នាំ២០២៦នេះថា កងទ័ពថៃបានចូលកាន់កាប់ទឹកដីកម្ពុជាយ៉ាងជ្រៅលើសសូម្បីផែនទីឯកតោភាគីដែលថៃបានអះអាង ខណៈសម្ដេចបានបញ្ជាក់ថា បញ្ហាព្រំដែនរវាងប្រទេសទាំងពីរ គឺអាចដោះស្រាយបានតាមរយៈការអនុវត្តយន្តការដែលមានស្រាប់ ដូចជា គណៈកម្មការចម្រុះខណ្ឌសីមាព្រំដែនគោក (JBC), អនុស្សរណៈនៃការយោគយល់គ្នាឆ្នាំ ២០០០ និងយន្តការផ្សេងៗទៀត។ តាមរយៈបទសម្ភាសន៍សម្ដេចធិបតី បានបញ្ជាក់ថា មានរយៈពេលប្រហែលមួយឆ្នាំហើយ ចាប់តាំងពីការប្រយុទ្ធបានចាប់ផ្ដើម ហើយក៏មានរយៈពេលប្រហែល ៧ខែផងដែរចាប់តាំងពីបទឈប់បាញ់លើកទីពីរកាលពីថ្ងៃទី២៧ ខែធ្នូ ឆ្នាំ២០២៥។ សម្ដេចបន្តថា បច្ចុប្បន្នបទឈប់បាញ់នៅតែមានសុពលភាព ប៉ុន្ដែស្ថានភាពនៅតែមានភាពផុយស្រួយ ដោយសារកងទ័ពរាប់ពាន់នាក់របស់ភាគីទាំងពីរ នៅតែឈរជើងប្រឈមមុខគ្នាតាមបណ្ដោយព្រំដែន។ រហូតមកដល់ពេលនេះ នៅមិនទាន់មានវិធានការណាមួយ ដើម្បីបន្ធូបន្ថយភាពតានតឹងជុំវិញវត្តមានកងទ័ពនោះទេ។ សំខាន់ជាងនេះទៅទៀត មូលហេតុ ឫសគល់នៃវិវាទនេះនៅមិនទាន់ត្រូវបានដោះស្រាយនៅឡើយ ដែលនោះគឺជាបញ្ហាអធិបតេយ្យភាព បូរណភាពទឹកដី ដោយផ្អែកលើច្បាប់អន្តរជាតិ អនុសញ្ញា និងសន្ធិសញ្ញា ដែលភាគីទាំងពីរបានឯកភាពគ្នា ខ្សែបន្ទាត់ព្រំដែនទាំងពីរមាន គឺខ្សែព្រំដែនអន្តរជាតិ។ សម្ដេចធិបតីបានបញ្ជាក់ថា «ដូច្នេះ បញ្ហានេះ (ជម្លោះព្រំដែនកម្ពុជា-ថៃ) អាចដោះស្រាយបានតាមរយៈការអនុវត្តយន្តការដែលមានស្រាប់រួមមាន៖ គណៈកម្មការចម្រុះខណ្ឌសីមាព្រំដែនគោក (JBC) អនុស្សរណៈនៃការយោគយល់គ្នាឆ្នាំ ២០០០ និងយន្តការផ្សេងៗទៀត។ យើងមានយន្តការទាំងនេះរួចជាស្រេច ហើយយន្តការទាំងនេះក៏បានដំណើរការមុនពេលការប្រយុទ្ធបានផ្ទុះឡើងជាថ្មីនៅថ្ងៃទី២៧ ខែធ្នូផងដែរ។ សម្ដេចធិបតីបានឱ្យដឹងថា ក្រៅពីនេះសកម្មភាពដែលកំពុងកើតមាននៅលើដី ក៏បានបង្កការព្រួយបារម្ភ និងធ្វើឱ្យស្ថានការណ៍កាន់តែស្មុគស្មាញផងដែរ។ សកម្មភាពរបស់កងទ័ពថៃដែលបានចូលកាន់កាប់ទឹកដីកម្ពុជាយ៉ាងជ្រៅតាមរយៈការដាក់របងបន្លាលួស និងទូកុងតឺន័រ នៅតែមានស្ថិតនៅទីនោះដដែល សកម្មភាពទាំងនេះ បានលើសសូម្បីតែបន្ទាត់ព្រំដែនដែលប្រទេសថៃបានអះអាងដោយឯកតោភាគី ហើយបានលាតសន្ធឹងចូលមកក្នុងទឹកដីរបស់កម្ពុជា។ សម្ដេចបន្ថែមថា លើសពីនេះ ក៏មានសកម្មភាពផ្សេងៗទៀតដែលមានលក្ខណៈ «បង្កើតអង្គហេតុសម្រេចលើទីតាំងជាក់ស្ដែង» (fait accompli) ផងដែរ។ ឧទាហរណ៍ ការសាងសង់ផ្លូវ និងហេដ្ឋារចនាសម្ព័ន្ធរឹងមាំ ការសាងសង់លេណដ្ឋានយោធា ការដំឡើងព្រះពុទ្ធរូបនៅតំបន់វិវាទ ការបំផ្លាញដីធ្លី និងផ្ទះសម្បែងរបស់ប្រជាពលរដ្ឋកម្ពុជា ដែលធ្លាប់ជាទីលំនៅរបស់ប្រជាពលរដ្ឋរាប់ពាន់នាក់ ព្រមទាំងការបែងចែកដីទាំងនោះ និងចេញបណ្ណកម្មសិទ្ធិជូនប្រជាពលរដ្ឋថៃ។ សកម្មភាពទាំងនេះ ត្រូវបានអនុវត្តក្នុងរយៈពេល៧ខែកន្លងមកនេះ មុនពេលដំណើរការកំណត់ព្រំដែនត្រូវបានបន្តឡើងវិញ។ សម្ដេចធិបតីបានរម្លឹកឡើងវិញថា សេចក្ដីថ្លែងការណ៍រួមរវាងភាគីទាំងពីរ ក៏បានឯកភាពគ្នាយ៉ាងច្បាស់ថា ការកំណត់ព្រំដែណដែលធ្វើឡើងតាមរយៈ យន្តការ JBC ប៉ុណ្ណោះទើបជាមូលដ្ឋានសម្រាប់កំណត់បូរណភាពទឹកដី និងខ្សែបន្ទាប់ព្រំដែនរវាងប្រទេសទាំងពីរ។ ដូច្នេះបញ្ហាទាំងនេះគឺជាក្ដីបារម្ភដ៏ធ្ងន់ធ្ងរសម្រាប់កម្ពុជា។ កម្ពុជា បានផ្ញើលិខិតតវ៉ា និងលិខិតបណ្ដឹងជាច្រើន ដើម្បីទាមទារឱ្យបញ្ឈប់សកម្មភាពទាំងនេះ និងស្នើឱ្យបន្តកិច្ចប្រជុំរបស់ JBC ឡើងវិញ ប៉ុន្ដែរហូតមកដល់ពេលនេះ នៅមិនទាន់មានការឆ្លើតតបជាវិជ្ជមាននៅឡើយ។ សម្ដេចបានសង្គត់ធ្ងន់ថា កម្ពុជាបានបង្ហាញការអត់ធ្មត់យ៉ាងខ្លាំង, រង់ចាំឱ្យប្រទេសថៃរៀបចំការបោះឆ្នោត បង្កើតរដ្ឋាភិបាលថ្មី និងតែងតាំងសមាសភាបគណៈកម្មការ JBC។ កម្ពុជាបានរង់ចាំអស់រយៈពេល៧ខែ។ ឥឡូវនេះបានឮថា ប្រទេសថៃទើបតែបានតែងតាំងសមាសភាព និងថ្នាក់ដឹកនាំរបស់ JBC ហើយ កម្ពុជា សង្ឃឹមថា កិច្ចប្រជុំរបស់ JBC នឹងអាចចាប់ផ្ដើមឡើងវិញក្នុងពេលឆាប់ៗនេះ៕

សម្ដេចតេជោ ហ៊ុន សែន ឆ្លៀតវាយកូនគោលនៅថ្ងៃចុងសប្ដាហ៍ ក្រោយខកខានជាង ១ឆ្នាំ

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នៅព្រឹកថ្ងៃទី២៥ ខែកក្កដា ឆ្នាំ២០២៦នេះ ឆ្លៀតវាយកូនគោលនៅថ្ងៃចុងសប្ដាហ៍ ក្រោយខកខានជាង ១ឆ្នាំ។សម្ដេចតេជោ បានសរសេរថា ក្រោយការខកខានវាយកូនគោលជាង ១ឆ្នាំថ្ងៃនេះឆ្លៀតវាយកូនគោល។ ជាមួយតារាងថ្មី ឧបករណ៍វាយថ្មីជាមួយ ដៃគូរប្រកួតចាស់ ខ្ញុំនៅវាយបានតែមិនទាន់ល្អ។សម្ដេចតេជោបានថ្លែងថា ការវាយមិនទាន់ល្អអាចមកពីខានវាយរយៈពេលយូរ ហើយក៏អាចមកពីទម្ងន់ដែលមុនៗវាយក្នុងទម្ងន់ ៨០គីឡូក្រាម តែថ្ងៃនេះចាប់វាយក្នុងទម្ងន់ ៧៦គីឡូក្រាម និងវាយចប់រយៈពេល ២ម៉ោងទម្ងន់ធ្លាក់មកត្រឹម ៧៥គីឡូក្រាម ប្រហែលកាឡូរីធ្លាក់ខ្លាំងមកធាតុអាកាសធាតុក្តៅ។ សម្ដេចតេជោ ក៏ឆ្លៀតជូនពរបងប្អូនជនរួមជាតិទាំងអស់ រីករាយចុងសប្តាហ៍ផងដែរ៕

រាជរដ្ឋាភិបាលបង្ហាញលទ្ធផលការងារឆ្នាំ២០២៥ សម្រាប់ការអនុវត្តផែនការយុទ្ធសាស្ត្រអភិវឌ្ឍន៍ជាតិ

ភ្នំពេញ៖ កិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រ ទី២៤ ខែកក្កដា ឆ្នាំ២០២៦ ដឹកនាំដោយសម្តេចមហាបវរធិបតី ហ៊ុន ម៉ាណែត បានបើកការត្រួតពិនិត្យលទ្ធផលការងារឆ្នាំ២០២៥ លើការអនុវត្តផែនការយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាលនីតិកាលទី៧។ របាយការណ៍នេះ ជារបាយការណ៍តាមដាន និងត្រួតពិនិត្យប្រចាំឆ្នាំលើកដំបូង នៃការអនុវត្តផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ.) របស់រាជរដ្ឋាភិបាលនីតិកាលទី៧ នៃរដ្ឋសភា ដែលឆ្លុះបញ្ចាំងពីតម្លាភាព គណនេយ្យភាព ការចូលរួម និងកិច្ចសហការល្អពីគ្រប់ក្រសួង ស្ថាប័ន វិស័យឯកជន និងដៃគូអភិវឌ្ឍ ដោយឈរលើ អភិក្រម «ជវភាពនៃប្រព័ន្ធតួអង្គតែមួយ»។ ក្នុងរបាយការណ៍បានបង្ហាញថា សមិទ្ធផលសំខាន់ៗដែលសម្រេចបាននោះ គឺរាជរដ្ឋាភិបាលរក្សាបាននូវសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈយ៉ាងរឹងមាំ រួមទាំងការការពារអធិបតេយ្យភាពនិងបូរណភាពទឹកដី ដោយប្រកាន់ភ្ជាប់ នូវគោលនយោបាយការបរទេស ឯករាជ្យផ្អែកលើច្បាប់និងភាពឈ្លាសវៃ។ សម្រាប់ការកែទម្រង់ និងពង្រឹងអភិបាលកិច្ច ដែលជាស្នូលនៃយុទ្ធសាស្ត្របញ្ចកោណដំណាក់កាលទី១វិញ រាជរដ្ឋាភិបាល បាននិងកំពុងអនុវត្តកម្មវិធីកែទម្រង់ និងពង្រឹងអភិបាលកិច្ច ដើម្បីឆ្លើយតបទៅនឹងការប្រែប្រួលសង្គម សេដ្ឋកិច្ច សន្តិសុខ បរិស្ថាន និងបច្ចេកវិទ្យា ព្រមទាំងការកើនឡើងនៃតម្រូវការសេវាសាធារណៈប្រកបដោយគុណភាពនិងភាពជឿទុកចិត្តបាន។ របាយការណ៍ ក៏បានបង្ហាញពីការធ្វើកំណែទម្រង់រដ្ឋបាលសាធារណៈ។ ការកែទម្រង់រដ្ឋបាលសាធារណៈ រាជរដ្ឋាភិបាលបានធ្វើវិចារណកម្មមុខងារ និងរៀបចំរចនាសម្ព័ន្ធក្រសួង ស្ថាប័នឡើងវិញ និងបានចាប់ផ្ដើមដំណើរការជំរឿនមន្ត្រីរាជការជាក់ស្ដែង នៅតាមរចនាសម្ព័ន្ធក្រសួង ស្ថាប័នចំណុះអង្គការនីតិប្រតិបត្តិ ព្រមទាំងការពង្រឹងប្រព័ន្ធជ្រើសរើសមន្ត្រីដោយផ្អែកលើគុណាធិបតេយ្យ តម្លាភាព និងសមិទ្ធកម្ម ការបណ្តុះបណ្តាល សមត្ថភាព និងការកែទម្រង់ច្បាប់ និងប្រព័ន្ធយុត្តិធម៌ ជាពិសេសការដោះស្រាយវិវាទក្រៅប្រព័ន្ធតុលាការ។ ដោយឡែកអភិបាលកិច្ចវិស័យឯកជន និងធុរកិច្ច ត្រូវបានពង្រឹងតាមរយៈការធ្វើបច្ចុប្បន្នកម្មច្បាប់ និងលិខិតបទដ្ឋានគតិយុត្ត ការលើកកម្ពស់តម្លាភាព និងភាពជាដៃគូរដ្ឋនិងឯកជន។ ក្នុងការអភិវឌ្ឍមូលធនមនុស្ស រាជរដ្ឋាភិបាលបានបន្តលើកកម្ពស់គុណភាពអប់រំ កីឡា វិទ្យាសាស្ត្រ និង បច្ចេកវិទ្យា តាមរយៈការអប់រំឌីជីថល ស្ទែម (STEAM) និងការអភិវឌ្ឍយុវជន តាមរយៈការបណ្តុះបណ្តាល ជំនាញបច្ចេកទេសនិងវិជ្ជាជីវៈ (TVET) ផ្តោតលើការផ្លាស់ប្តូរជំនាញ និងបង្កើនជំនាញ។ លើសពីនេះ ប្រព័ន្ធសុខាភិបាល និងគាំពារសង្គមត្រូវបានពង្រឹង និងពង្រីក តាមរយៈសេវាថែទាំបឋម កម្មវិធីថែទាំសុខភាព ដោយឈរលើស្មារតី «មិនបោះបង់ពលរដ្ឋណាម្នាក់»។ រាជរដ្ឋាភិបាល ក៏បានធ្វើពិពិធកម្មសេដ្ឋកិច្ច និងបង្កើនភាពប្រកួតប្រជែងលើវិស័យកសិកម្ម ឧស្សាហកម្ម សេវាកម្ម និងទេសចរណ៍ ដោយបន្តអភិវឌ្ឍហេដ្ឋារចនាសម្ព័ន្ធរូបវន្ត ដើម្បីទាក់ទាញការវិនិយោគផ្ទាល់ពីបរទេស តាមរយៈការពង្រីកតំបន់សេដ្ឋកិច្ចពិសេស។ ជាមួយគ្នានេះ ក្នុងការអភិវឌ្ឍវិស័យឯកជន និងការងារ រាជរដ្ឋាភិបាលបានបន្តគាំទ្រសហគ្រាសធុនមីក្រូ តូច និងមធ្យម តាមរយៈការសម្រួលនីតិវិធី ការធ្វើបរិវត្តកម្មឌីជីថល និងការបង្កើតការងារ និងមុខរបរ។ ដោយឡែកការគ្រប់គ្រងធនធានធម្មជាតិ បរិស្ថាន និងការឆ្លើយតបនឹងការប្រែប្រួលអាកាសធាតុ ត្រូវបានពង្រឹងតាមរយៈការបន្តកែទម្រង់ដីធ្លី ការរៀបចំនគរូបនីយកម្ម ការអភិវឌ្ឍថាមពលកកើតឡើងវិញ ដើម្បីគាំទ្រដល់ការអភិវឌ្ឍសេដ្ឋកិច្ចបៃតង ក្នុងការអភិវឌ្ឍប្រកបដោយភាពធន់ បរិយាបន្ន និងចីរភាព។ ស្របគ្នានេះដែរ រាជរដ្ឋាភិបាល បានបន្តជំរុញការអភិវឌ្ឍសេដ្ឋកិច្ច និងសង្គមឌីជីថល រួមមាន រដ្ឋាភិបាលឌីជីថល ធុរកិច្ចឌីជីថល និងពលរដ្ឋឌីជីថល៕

សម្តេចធិបតី ហ៊ុន ម៉ាណែត ណែនាំឱ្យត្រៀមខ្លួនឆ្លើយតបផលប៉ះពាល់ដោយសារបាតុភូតធម្មជាតិអែលនីញ៉ូ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានណែនាំដល់អាជ្ញាធរពាក់ព័ន្ធឱ្យយកចិត្តទុកដាក់ត្រៀមខ្លួនឆ្លើយតបផលប៉ះពាល់ទាំងឡាយបណ្តាលមកពីបាតុភូតធម្មជាតិអែលនីញ៉ូ។ ក្នុងកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រ ទី២៤ ខែកក្កដា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត បានណែនាំឱ្យក្រសួងធនធានទឹក និងឧតុនិយម ត្រូវសហការជាមួយគណៈកម្មាធិការជាតិគ្រប់គ្រងគ្រោះមហន្តរាយ ក្រសួង ស្ថាប័ន និងរដ្ឋបាលរាជធានី ខេត្ត បន្តតាមដាន ការវិវត្តន៍ និងផ្សព្វផ្សាយជាប្រចាំជូនប្រជាពលរដ្ឋបានដឹងអំពីផលវិបាកនៃការប្រែប្រួលអាកាសធាតុនេះ និងត្រៀមឆ្លើយតបនូវមធ្យោបាយចាំបាច់ ដើម្បីអន្តរាគមន៍ជួយង្គ្រោះប្រជាពលរដ្ឋក្នុងករណីចាំបាច់។ សម្តេចនាយករដ្ឋមន្ត្រី បានណែនាំទៅក្រសួងកសិកម្ម រុក្ខាប្រមាញ់ និងនេសាទ ត្រូវសហការជាមួយក្រសួងសេដ្ឋកិច្ច និងហិរញ្ញវត្ថុ ត្រៀមបម្រុងស្បៀងសម្ភារៈនានា ជួយអន្តរាគមន៍ដល់ប្រជាកសិករដែលរងផលប៉ះពាល់ឱ្យបានទាន់ពេលវេលា។ ក្រសួងសុខាភិបាល ត្រូវបន្តផ្សព្វផ្សាយ អំពីវិធានការការពារខ្លួនពីផលប៉ះពាល់ពីបាតុភូតនេះ។ ចំណែកក្រសួងរ៉ែ និងថាមពល សម្ដេចធិបតី នាយករដ្ឋមន្រ្ដី ក៏បានបញ្ជាក់ថា ត្រូវត្រៀមថាមពលអគ្គិសនី ដើម្បីផ្គត់ផ្គង់ជូនប្រជាពលរដ្ឋ៕

ព្រះមហាក្សត្រ ប្រោសប្រទានលើកលែងទោសបន្ថែមដល់លោក កឹម សុខា បើកផ្លូវឱ្យចាកចេញទៅក្រៅប្រទេសបាន

ភ្នំពេញ៖ នៅថ្ងៃទី២៤ ខែកក្កដា ឆ្នាំ២០២៦នេះព្រះមហាក្សត្រកម្ពុជា ប្រោសប្រទានលើកលែងទោសលោក កឹម សុខា ត្រង់ចំណុចការហាមឃាត់ចំពោះការចាកចេញពីដែនដី នៃព្រះរាជាណាចក្រកម្ពុជា សម្រាប់រយៈពេល៥ឆ្នាំ។ នេះបើយោងតាមព្រះរាជក្រឹត្យ។មាត្រា២ នៃព្រះរាជក្រឹត្យបានចែងថា ការលើកលែងទោសចំពោះទោសបន្ថែមនេះ មិនអនុវត្តចំពោះទោសបន្ថែមផ្សេងទៀតឡើយ។លែងមានហើយបំរាមសម្រាប់ការចាកចេញក្រៅប្រទេស ពោលនៅពេលនេះ លោក កឹម សុខា អាចធ្វើដំណើរចាកចេញក្រៅប្រទេសបានហើយ។កាលពីថ្ងៃទី២៥ ខែឧសភា ឆ្នាំ២០២៦កន្លងទៅនេះ លោក កឹម សុខា ទទួលបានការលើកលែងទោសម្តងរួចមកហើយ។ តែប្រោសព្រះរាជទានទោសកាលនោះ គឺសម្រាប់តែការជាប់ពន្ធនាគាររយៈពេល២៧ឆ្នាំប៉ុណ្ណោះ តែទោសហាមឃាត់ចេញក្រៅប្រទេស និងការហាមឃាត់ធ្វើនយោបាយ មិនត្រូវបានលើកលែងនោះឡើយ។តែព្រះរាជទានលើកលែងទោសនៅថ្ងៃទី២៤ ខែកក្កដា ដោយមានការទូលថ្វាយពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា, ព្រះមហាក្សត្រ បានបញ្ចប់ការហាមឃាត់សម្រាប់ការចេញទៅក្រៅប្រទេស។ ដូច្នេះនៅពេលនេះ លោក កឹម សុខា នៅតែទោសមួយទៀតប៉ុណ្ណោះ គឺទោសហាមឃាត់ធ្វើនយោបាយ៕

សម្ដេចធិបតី៖ រាជរដ្ឋាភិបាលនឹងដាក់ចេញនូវវិធានការមុតស្រួចមួយចំនួនដើម្បីដោះស្រាយបញ្ហាសំខាន់ៗជូន SME

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានថ្លែងអំណរគុណចំពោះការចូលរួមជាមតិយោបល់របស់បងប្អូនប្រជាពលរដ្ឋ ពាក់ព័ន្ធជាមួយនឹងបញ្ហាប្រឈមនានាដែលសហគ្រាសធុនតូចនិងមធ្យម (SME) ជួបប្រទះ។ សម្ដេចបានថ្លែងថា ផ្អែកលើយោបល់របស់បងប្អូន និងលទ្ធផលនៃការសិក្សាស្រាវជ្រាវ ពិគ្រោះយោបល់បន្ថែមជាមួយតួអង្គពាក់ព័ន្ធ ជាពិសេសវិស័យឯកជន រាជរដ្ឋាភិបាលនឹងដាក់ចេញនូវវិធានការមុតស្រួចមួយចំនួនដើម្បីដោះស្រាយបញ្ហាសំខាន់ៗជូន SME។ នេះបើតាមការបញ្ជាក់បន្ថែមរបស់សម្ដេចធិបតី នៅលើហ្វេសប៊ុកផ្លូវការនៅព្រឹកថ្ងៃទី២៥ ខែកក្កដា ឆ្នាំ២០២៦នេះ។ នៅក្នុងកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រ ទី២៤ ខែកក្កដា ឆ្នាំ២០២៦នេះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានបានណែនាំឱ្យក្រសួង ស្ថាប័នពាក់ព័ន្ធទាំងអស់សម្រួលនីតិវិធីនានាឱ្យបានលឿនរហ័សសម្រាប់ការចុះបញ្ជីសហគ្រាសខ្នាតតូច និងមធ្យម។ សម្តេចមហាបវរធិបតី បានលើកឡើងថា ការចុះបញ្ជីសហគ្រាសខ្នាតតូច និងមធ្យមនេះ មិនត្រូវឱ្យសហគ្រិនសុំច្បាប់ក្រសួង ស្ថាប័នច្រើនកន្លែងដូចពីមុនឡើយ។ ក្រសួង ស្ថាប័នពាក់ព័ន្ធត្រូវធ្វើការជាមួយគ្នា ដើម្បីសម្រួលនីតិវិធីទាំងអស់ជូនអ្នកស្នើសុំចុះបញ្ជី ហើយត្រូវការពារផលប្រយោជន៍របស់ពួកគេ តាមរយៈការប្រយុទ្ធប្រឆាំងផលិតផលក្លែងក្លាយឱ្យមានប្រសិទ្ធភាព។ សម្តេចមហាបវរធិបតី បានបញ្ជាក់ថា សម្តេចនឹងតាមដានដោយផ្ទាល់ ដើម្បីជំរុញឱ្យការងារនេះសម្រេចបានជោគជ័យ៕

សម្ដេចតេជោ ហ៊ុន សែន ចែករំលែកសាររបស់លោកស្រី Angelina Jolie តារាហូលីវូដដ៏ល្បីពិភពលោក ដែលបានរំឭកខួប១ឆ្នាំនៃសង្គ្រាមឈ្លានពានរបស់កងទ័ពថៃលើបូរណភាពទឹកដីកម្ពុជា

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នៅព្រឹកថ្ងៃទី២៤ ខែកក្កដា ឆ្នាំ២០២៦នេះ បានចែករំលែក សាររបស់លោកស្រី Angelina Jolie រាហូលីវូដដ៏ល្បីពិភពលោក ដែលបានរំឭកខួប១ឆ្នាំនៃសង្គ្រាមឈ្លានពានរបស់កងទ័ពថៃលើបូរណភាពទឹកដីកម្ពុជា។ សម្ដេចតេជោបានសរសេរថា «ខ្ញុំមានចំណាប់អារម្មណ៍លើសំណេររបស់លោកស្រី អេនជេលីណា ជូលី (Angelina Jolie) តារាហូលីវូដដ៏ល្បីពិភពលោក ដែលបានបញ្ចេញសារនៅក្នុងថ្ងៃខួបមួយឆ្នាំ នៃសង្គ្រាមឈ្លានពានរបស់កងទ័ពថៃលើបូរណភាពទឹកដីកម្ពុជា»។ ខ្លឹមសាររបស់លោកស្រីដូចខាងក្រោម៖«ក្នុងរយៈពេលមួយឆ្នាំមកនេះ ជម្លោះដែលបានផ្ទុះឡើងនៅតាមបណ្ដោយព្រំដែនរបស់កម្ពុជា បានធ្វើឱ្យប្រជាជនជាច្រើនបាត់បង់នូវអារម្មណ៍មានស្ថិរភាព និងសុវត្ថិភាព។ បច្ចុប្បន្ន ប្រជាជនជិត ៣០ ០០០នាក់ នៅតែមិនទាន់អាចវិលត្រឡប់ទៅកាន់ផ្ទះសម្បែងរបស់ពួកគេវិញ។ កម្ពុជាតែងតែជាប្រទេសដ៏ពិសេសមួយសម្រាប់រូបខ្ញុំ និងក្រុមគ្រួសាររបស់ខ្ញុំ។ ទីនេះជាប្រទេសកំណើតកូនប្រុសរបស់ខ្ញុំ ទីនេះជាផ្ទះរបស់ពួកយើង ហើយអស់រយៈពេល២០ឆ្នាំមកនេះ យើងបានបំពេញការងារជាមួយក្រុមការងារក្នុងសហគមន៍នានាស្ដីពីការអភិរក្ស និងការអភិវឌ្ឍសហគមន៍»។ មូលនិធិ Maddox មានទីស្នាក់ការនៅក្នុងតំបន់ព្រំដែនជាកន្លែងតែមួយដែលជម្លោះព្រំដែនបានផ្ទុះឡើង។ ខ្ញុំពិតជាមានកិត្តិយសដែលបានក្លាយជាមិត្តជិតស្និទ្ធជាមួយអ្នកជិតខាងរបស់ខ្ញុំ និងក្រុមការងារមូលនិធិ ខណៈយើងបានដោះគ្រាប់មីន និងបានអភិវឌ្ឍតំបន់ជាមួយគ្នា។ នៅពេលដែលជម្លោះផ្ទុះឡើងកាលពីឆ្នាំមុន យើងបានជម្លៀសបុគ្គលិករបស់យើង និងគ្រួសាររបស់ពួកគេ ហើយបទពិសោធន៍ដ៏ឈឺចាប់ទាំងនេះបានបង្ហាញថា ជម្លោះអាចផ្ទុះឡើងវិញបានភ្លាមៗ។ ខ្ញុំស្រឡាញ់ប្រទេសមួយនេះ (កម្ពុជា) និងប្រជាជនដែលមានភាពរឹងមាំ ព្រមទាំងពោរពេញដោយភាពកក់ក្ដៅ និងរួសរាយរាក់ទាក់។ ខណៈយើងពិតជា មានក្ដីសោមនស្សរីករាយដើម្បីចាប់ផ្ដើម ការងាររបស់ពួកយើងឡើងវិញ ក្នុងការការពារដីធ្លី និងគាំទ្រដល់សុខមាលភាពសហគមន៍ ព្រមទាំងការរស់នៅ បេះដូងរបស់ខ្ញុំនៅជាមួយអ្នករាល់គ្នាដែលទន្ទឹងរង់ចាំចាំថ្ងៃត្រឡប់ទៅផ្ទះរបស់ខ្លួនវិញ។ខ្ញុំស្រឡាញ់ប្រទេសមួយនេះ និងប្រជាជនដែលមានភាពរឹងមាំ ព្រមទាំងពោរពេញដោយភាពកក់ក្តៅ និងរួសរាយ រាក់ទាក់។ បេះដូងរបស់ខ្ញុំនៅជាមួយអ្នករាល់គ្នា ដែលនៅតែទន្ទឹងរង់ចាំថ្ងៃដែលអាចវិលត្រឡប់ទៅផ្ទះរបស់ខ្លួនវិញ៕»

កិច្ចសម្ភាសន៍ជាមួយ Bloomberg៖ សម្ដេចធិបតីបញ្ជាក់ជាថ្មីថា កម្ពុជាសម្រេចប្រើយន្តការ UNCLOS ដោយសារថៃលុប MOU ២០០១ ជាឯកតោភាគី

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ជាថ្មីថា មូលហេតុដែលកម្ពុជាសម្រេចប្រើយន្តការផ្សះផ្សាដោយចាប់បង្ខំក្រោមអនុសញ្ញា (UNCLOS) របស់អង្គការសហប្រជាជាតិ ដោយសារប្រទេសថៃបានសម្រេចលុបចោលអនុស្សរណៈយោគយល់ (MOU) ឆ្នាំ២០០១ ដែលជាកិច្ចព្រមព្រៀងទ្វេភាគីតែមួយគត់រវាងកម្ពុជា និងថៃស្តីពីដែនសមុទ្រ។ សម្តេចនាយករដ្ឋមន្រ្ដីបានបញ្ជាក់ជាថ្មីបែបនេះ តាមរយៈកិច្ចសម្ភាសន៍ផ្តាច់មុខជាមួយអ្នកសារព័ត៌មាន Bloomberg ចេញផ្សាយនៅថ្ងៃទី២៤ ខែកក្កដា ឆ្នាំ២០២៦នេះ។ តាមរយៈសំណួរបន្ទាប់ថា ប្រទេសថៃបានផ្អាកការពិភាក្សាអំពីបញ្ហាព្រំដែនបន្ទាប់ពីកម្ពុជាបានស្នើឱ្យអង្គការសហប្រជាជាតិចូលរួមដោះស្រាយវិវាទដែនសមុទ្រ។ តើកំពុងមានកិច្ចខិតខំប្រឹងប្រែងអ្វីខ្លះ ដើម្បីចាប់ផ្តើមការចរចាព្រំដែនឡើងវិញ? សម្ដេចធិបតីបានលើកឡើងថា សម្ដេចបានឮថា ថ្នាក់ដឹកនាំថៃ ជាពិសេសរដ្ឋមន្ត្រីការបរទេស បាននិយាយថា ដោយសារកម្ពុជាបានទៅប្រើយន្តការរបស់អង្គការសហប្រជាជាតិ នោះទ្វារសម្រាប់ការចរចាព្រំដែនគោកត្រូវបានបិទ។ សម្ដេចបានបញ្ជាក់ថា ការលើកឡើងនេះមិនសូវត្រឹមត្រូវហើយក៏មិនសូវយុត្តិធម៌ដែរ ដោយសារហេតុផលពីរ។ សម្ដេចបានបញ្ជាក់ថា ទីមួយ៖ មូលហេតុដែលយើងទៅប្រើការផ្សះផ្សាដោយចាប់បង្ខំក្រោមអនុសញ្ញា (UNCLOS) របស់អង្គការសហប្រជាជាតិ គឺដោយសារប្រទេសថៃបានសម្រេចលុបចោលអនុស្សរណៈយោគយល់ (MOU) ឆ្នាំ២០០១ ដែលជាកិច្ចព្រមព្រៀងទ្វេភាគីតែមួយគត់រវាងកម្ពុជា និងថៃស្តីពីដែនសមុទ្រ។ អស់រយៈពេលប្រហែល១៥ឆ្នាំ រដ្ឋាភិបាលថៃជាច្រើនជំនាន់ និងកម្ពុជាបានខិតខំធ្វើការលើមូលដ្ឋាននៃ MOU នេះ ដើម្បីស្វែងរកដំណោះស្រាយ រួមទាំងការអភិវឌ្ឍរួម។ ក្នុងអំឡុងពេលខ្ញុំកាន់តំណែង យើងក៏បានធ្វើការជាមួយអតីតនាយករដ្ឋមន្ត្រីថៃពីររូបផងដែរ។ ប៉ុន្តែទោះបីយើងបានស្នើសុំឱ្យថៃកុំលុបចោល MOU នេះក៏ដោយ ថៃនៅតែសម្រេចលុបចោល។ ដូច្នេះ យើងគ្មានជម្រើសផ្សេងក្រៅពីទៅប្រើយន្តការផ្សះផ្សានោះទេ។ សម្ដេចបន្តថា ទីពីរ៖ មិនមានលក្ខខណ្ឌ ឬកិច្ចព្រមព្រៀងណាមួយដែលហាមឃាត់សកម្មភាពនេះឡើយ។ ត្រង់សំសំណួរបន្ត៖ ហាក់ដូចជាកម្ពុជា និងថៃមានទស្សនៈខុសគ្នាចំពោះអ្វីដែលគួរត្រូវបានពិភាក្សានៅក្នុងដំណើរការរបស់អង្គការសហប្រជាជាតិ។ ថៃចង់ផ្តោតលើការកំណត់ព្រំដែនសមុទ្រ ខណៈកម្ពុជាចង់ផ្តោតលើការអភិវឌ្ឍរួមនៅតំបន់ដែលមានការអះអាងត្រួតស៊ីគ្នា។ ក្នុងនាមជាកាយវិការនៃឆន្ទៈល្អ តើកម្ពុជាអាចពិចារណាកំណត់វិសាលភាពនៃការពិភាក្សាឱ្យផ្តោតតែលើការកំណត់ព្រំដែនសមុទ្រដែរឬទេ? ជាការឆ្លើយតប៖ សម្ដេចធិបតីបានបញ្ជាក់ថា សម្ដេចគិតថា វានៅឆាប់ពេកក្នុងការនិយាយអំពីរឿងនេះ។ យើងត្រូវព្រមព្រៀងគ្នាលើដំណើរការតែងតាំងអាជ្ញាកណ្តាលជាមុនសិន។ ឥឡូវនេះ ភាគីទាំងពីរបានតែងតាំងអាជ្ញាកណ្តាលពីររូបរួចហើយ ហើយយើងកំពុងធ្វើការលើការជ្រើសរើសប្រធានអាជ្ញាកណ្តាល ដែលជាសមាជិកទី៥។ ត្រង់សំណួរបន្តថា៖ ដូច្នេះសម្រាប់ពេលនេះ ការកំណត់វិសាលភាពនៃការពិភាក្សាមិនមែនជាជម្រើសដែលកម្ពុជានឹងពិចារណាទេឬ? សម្ដេចធិបតីបានឆ្លើតតបវិញថា វាមិនមែនជាសំណើដែលកម្ពុជាបានលើកឡើងទេ។ កម្ពុជាបានស្នើឱ្យពិភាក្សាទាំងការកំណត់ព្រំដែន និងការអភិវឌ្ឍរួម។ ប៉ុន្តែដូចសម្ដេចបាននិយាយ សម្រាប់ដំណាក់កាលនេះ សូមផ្តោតលើការធ្វើឱ្យដំណើរការចាប់ផ្តើមទៅមុខសិន៕

កិច្ចសម្ភាសន៍ជាមួយ Bloomberg៖ សម្តេចធិបតី ហ៊ុន ម៉ាណែត បង្ហាញការប្តេជ្ញាបង្កើនការបង្ក្រាបបណ្តាញឆបោកតាមអនឡាញ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្តេជ្ញាបង្កើនយុទ្ធនាការបង្ក្រាបទូទាំងប្រទេសប្រឆាំងនឹងបណ្តាញឆបោកតាមអនឡាញឆ្លងដែន ដែលកំពុងវិវត្ត និងមានភាពស្មុគស្មាញកាន់តែខ្លាំង។ សម្តេចនាយករដ្ឋមន្រ្ដីបានបញ្ជាក់ជាថ្មីបែបនេះ តាមរយៈកិច្ចសម្ភាសន៍ផ្តាច់មុខជាមួយអ្នកសារព័ត៌មាន Bloomberg ចេញផ្សាយនៅថ្ងៃទី២៤ ខែកក្កដា ឆ្នាំ២០២៦នេះ។ តាមរយៈកិច្ចសម្ភាសន៍នេះបានចោទសួរសម្ដេចធិបតីថា កម្ពុជាបានសហការជាមួយសហរដ្ឋអាមេរិក ហើយក៏សហការជាមួយចិនលើបញ្ហាបង្ក្រាបបទល្មើសឆបោកតាមអនឡាញនេះ ។ តើសម្ដេចគិតថា សហរដ្ឋអាមេរិក និងចិនគួរតែសហការគ្នាឱ្យកាន់តែជិតស្និទ្ធជាងនេះដែរឬទេ? ដូចដែលសម្ដេចបានលើកឡើងថា នេះគឺជាបញ្ហាឆ្លងដែនដែលគ្មានប្រទេសណាមួយអាចដោះស្រាយតែម្នាក់ឯងបាន។ សម្ដេចធិបតីបានបញ្ជាក់វិញថា ពិតជាដូច្នោះមែន។ ប្រធានាធិបតី Xi Jinping និងប្រធានាធិបតី Donald Trump ទើបតែបានជួបគ្នា។ រដ្ឋមន្ត្រីការបរទេស Marco Rubio ក៏កំពុងស្ថិតនៅទីក្រុងប៉េកាំង ជួបជាមួយរដ្ឋមន្ត្រីការបរទេស Wang Yi ដើម្បីរៀបចំដំណើរទស្សនកិច្ចរបស់ប្រធានាធិបតីទៅកាន់សហរដ្ឋអាមេរិក។ ទាំងនេះជាកិច្ចសហប្រតិបត្តិការទ្វេភាគីដែលប្រទេសទាំងពីរមានរួចហើយ។ នៅលើឆាកអន្តរជាតិក៏នឹងមានកិច្ចសហប្រតិបត្តិការពហុភាគី រួមទាំងរវាងសហរដ្ឋអាមេរិក និងចិនផងដែរ។ កម្ពុជា នឹងធ្វើជាម្ចាស់ផ្ទះនៃសន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (International Conference on Combating Online Scams) ដែលនឹងមានការចូលរួមពីទាំងចិន និងសហរដ្ឋអាមេរិក។ សម្ដេចធិបតីបានលើកឡើងថា សម្ដេចក៏បានអញ្ជើញគណៈប្រតិភូពី FBI ឱ្យចូលរួម ហើយលោកនាយក Kash Patel បាននិយាយថា លោកនឹងបញ្ជូនគណៈប្រតិភូជាន់ខ្ពស់មកចូលរួម។ ទាំងនេះគឺជាកិច្ចសហប្រតិបត្តិការដើម្បីដោះស្រាយបញ្ហារួម ដែលលើសពីបញ្ហាភូមិសាស្ត្រនយោបាយ។ វាគឺដើម្បីផលប្រយោជន៍របស់ប្រទេសទាំងអស់។ សម្ដេចធិបតីបានបន្តថា បណ្តាញឧក្រិដ្ឋកម្មអាចវាយប្រហារប្រទេសណាក៏បាន ដោយមិនគិតថាប្រទេសនោះមានការពាក់ព័ន្ធនយោបាយជាមួយពួកគេឬអត់។ អ្វីដែលពួកគេអាចកេងប្រវ័ញ្ចបានពួកគេនឹងកេងប្រវ័ញ្ច។ ពួកគេអាចវាយប្រហារទាំងសហរដ្ឋអាមេរិក និងចិនក្នុងពេលតែមួយ ដើម្បីរកប្រាក់ចំណេញពីការបោកប្រាស់ ឬជួញដូរគ្រឿងញៀន។ ដូច្នេះ សម្ដេចយល់ថា កិច្ចសហប្រតិបត្តិការទាំងនេះមិនគួរត្រូវបានកំណត់ ឬក្លាយជាចំណាប់ខ្មាំងនៃបញ្ហាភូមិសាស្ត្រនយោបាយឡើយ។ សម្ដេចថ្លែងបញ្ជាក់ថា «ពេលខ្លះ យើងផ្តោតខ្លាំងពេកលើចំណុចអវិជ្ជមាន។ ប៉ុន្តែជារួមទំនាក់ទំនងវិជ្ជមានរវាងចិន និងសហរដ្ឋអាមេរិកនៅតែមានហើយមានកិច្ចសហប្រតិបត្តិការតាមរយៈបណ្តាញជាច្រើន»។ ក្នុងសំណួរជាមួយ Bloomberg ថា សម្ដេចបាននិយាយថា ក្រុមឧក្រិដ្ឋជនទាំងនេះកំពុងកាន់តែមានភាពស្មុគស្មាញ។ របាយការណ៍របស់អង្គការសហប្រជាជាតិបង្ហាញថា ពួកគេកំពុងដំណើរការដូចជាក្រុមហ៊ុនធំៗ ហើយនៅអាស៊ីអាគ្នេយ៍ ពួកគេកំពុងប្រើប្រាស់ដីសម្បទានក្នុងតំបន់សេដ្ឋកិច្ចពិសេស (SEZ) ដើម្បីប្រព្រឹត្តបទល្មើស។ កម្ពុជាមានតំបន់សេដ្ឋកិច្ចពិសេសជាច្រើន។ តើកម្ពុជាកំពុងធ្វើអ្វីខ្លះ ដើម្បីធានាថាតំបន់ទាំងនេះមិនត្រូវបានប្រើប្រាស់សម្រាប់សកម្មភាពឧក្រិដ្ឋកម្ម? ចំណុចនេះសម្ដេចធិបតីបានបញ្ជាក់ថា៖ យើង (កម្ពុជា) បានរៀនពីបទពិសោធន៍របស់ប្រទេសដទៃ។ សម្ដេចបានផ្តល់ការណែនាំយ៉ាងតឹងរ៉ឹងដល់អាជ្ញាធរសន្តិសុខ ឱ្យធ្វើការជាមួយអាជ្ញាធរមូលដ្ឋាន និងស្ថាប័នគ្រប់គ្រងតំបន់សេដ្ឋកិច្ចពិសេស ដើម្បីធានាថា មិនមាន SEZ ណាមួយត្រូវបានប្រើប្រាស់សម្រាប់លាក់បាំងសកម្មភាពឆបោកតាមប្រព័ន្ធបច្ចេកវិទ្យាឡើយ។ ប្រសិនបើ SEZ ណាមួយត្រូវបានរកឃើញថាជាកន្លែងគាំទ្រឧក្រិដ្ឋកម្មបោកប្រាស់ នោះតំបន់នោះនឹងត្រូវទទួលខុសត្រូវតាមផ្លូវច្បាប់ ដូចជាអ្នកដទៃដែរ។ មកទល់ពេលនេះ យើងមិនទាន់មានភស្តុតាងបញ្ជាក់អំពីករណីបែបនេះនៅឡើយទេ។ សម្ដេចបានថ្លែងថា យើងមានការប្រុងប្រយ័ត្នយ៉ាងខ្លាំងចំពោះបញ្ហានេះ។ តំបន់សេដ្ឋកិច្ចពិសេសជាច្រើននៅកម្ពុជា គឺជាវេទិកាសម្រាប់ទាក់ទាញការវិនិយោគផ្ទាល់ពីបរទេសក្នុងវិស័យផ្សេងៗ។ យើងសង្ឃឹមថា វានឹងបន្តរីកចម្រើន និងទាក់ទាញការវិនិយោគកាន់តែច្រើន។ យើងប្តេជ្ញាបន្តបង្ក្រាបបទល្មើសទាំងនេះ ហើយយើងបានឃើញលទ្ធផលរួចមកហើយ។ យើងនឹងធ្វើឱ្យកម្ពុជាក្លាយជាកន្លែងដែលមិនងាយស្រួល និងមិនមានតម្លៃសម្រាប់ក្រុមឆបោកតាមប្រព័ន្ធបច្ចេកវិទ្យាក្នុងការបន្តសកម្មភាព៕

បណ្ដាញសង្គម

ព័ត៌មានថ្មីៗ

លោក Trump ប្រាប់ពីកិច្ចចរចា «ល្អ» ជាមួយអ៊ីរ៉ង់ និងបញ្ជាក់ជាថ្មីពីការគំរាមវាយប្រហារគោលដៅនានា

ក្រុមគ្រួសារអ្នកដំណើរនៃជើងហោះហើរ MH370 ចង់បានការពិត ខណៈតុលាការចិនបើកសវនាការបណ្តឹងឧទ្ធរណ៍

ជប៉ុនស្នើឱ្យអ៊ីរ៉ង់អនុវត្ត «ភាពបត់បែនជាអតិបរិមា» ដើម្បីបន្ថយភាពតានតឹងនៅមជ្ឈិមបូព៌ាឱ្យបានឆាប់

រដ្ឋមន្ត្រីការពារជាតិអ៊ីស្រាអែល៖ យន្តហោះចម្បាំងអាមេរិកហោះចេញពីអ៊ីស្រាអែលទៅវាយប្រហារអ៊ីរ៉ង់

អ៊ូហ្គង់ដាប្រកាសគ្មានជំងឺអេបូឡា បន្ទាប់ពីអ្នកជំងឺចុងក្រោយចេញពីមន្ទីរពេទ្យ

ក្រុមអ្នកសង្កេតការណ៍អាស៊ានប្រចាំប្រទេសកម្ពុជា និង ប្រធានបេសកកម្មក្រុមអ្នកសង្កេតការណ៍អាស៊ាន (HOM AOT) ហ្វីលីពីនប្រចាំកម្ពុជា ធ្វើបទបង្ហាញ «ស្តីពីវឌ្ឍនភាពនៃការងារខណ្ឌសីមា និងបោះបង្គោលព្រំដែនរវាងកម្ពុជានិងថៃ»

កូរ៉េខាងត្បូងចេញការជូនដំណឹងបន្ទាន់ អំពីការសង្ស័យលេចធ្លាយផូស្វ័រ នៅមូលដ្ឋានទ័ពអាកាសអាមេរិក

វិមានក្រឹមឡាំង៖ ការវាយប្រហាររបស់អ៊ុយក្រែន លើនាវាអ៊ីរ៉ង់ គួរត្រូវបានចាត់ទុកថា ជាការវាយប្រហារលើអ៊ីរ៉ង់

រញ្ជួយដីកម្រិត ៥,៧រ៉ិចទ័រ ធ្វើឱ្យញ័រខេត្ត Qinghai របស់ប្រទេសចិន

របាយការណ៍៖ លោក Trump ហាក់កាន់តែទោរទៅរកលោក Zelenskyy ជាងលោក Putin

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

សម្ដេចធិបតី៖ កម្ពុជាជ្រើសរើសយកយន្តការ UNCLOS ដោយសារថៃលុបចោល MOU ២០០១ ជាឯកតោភាគី

សម្ដេចធិបតី៖ កងទ័ពថៃបានចូលកាន់កាប់ទឹកដី​កម្ពុជា​យ៉ាងជ្រៅ​លើស​សូម្បី​ផែនទី​ឯក​តោ​ភាគី​គេ​បាន​អះអាង

សម្ដេចតេជោ ហ៊ុន សែន ឆ្លៀតវាយកូនគោលនៅថ្ងៃចុងសប្ដាហ៍ ក្រោយខកខានជាង ១ឆ្នាំ

រាជរដ្ឋាភិបាលបង្ហាញលទ្ធផលការងារឆ្នាំ២០២៥ សម្រាប់ការអនុវត្តផែន​ការ​យុទ្ធសាស្ត្រ​អភិវឌ្ឍន៍​ជាតិ

សម្តេចធិបតី ហ៊ុន ម៉ាណែត ណែនាំឱ្យត្រៀមខ្លួនឆ្លើយតប​ផលប៉ះពាល់​ដោយសារ​បាតុភូត​ធម្មជាតិ​អែលនីញ៉ូ

ព្រះមហាក្សត្រ ប្រោសប្រទានលើកលែងទោសបន្ថែមដល់លោក កឹម សុខា បើក​ផ្លូវ​ឱ្យ​ចាក​ចេញ​ទៅ​ក្រៅ​ប្រទេស​បាន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សម្ដេចធិបតី៖ កងទ័ពថៃបានចូលកាន់កាប់ទឹកដីកម្ពុជាយ៉ាងជ្រៅលើសសូម្បីផែនទីឯកតោភាគីគេបានអះអាង

រាជរដ្ឋាភិបាលបង្ហាញលទ្ធផលការងារឆ្នាំ២០២៥ សម្រាប់ការអនុវត្តផែនការយុទ្ធសាស្ត្រអភិវឌ្ឍន៍ជាតិ

សម្តេចធិបតី ហ៊ុន ម៉ាណែត ណែនាំឱ្យត្រៀមខ្លួនឆ្លើយតបផលប៉ះពាល់ដោយសារបាតុភូតធម្មជាតិអែលនីញ៉ូ

ព្រះមហាក្សត្រ ប្រោសប្រទានលើកលែងទោសបន្ថែមដល់លោក កឹម សុខា បើកផ្លូវឱ្យចាកចេញទៅក្រៅប្រទេសបាន