BTV NEWS

សម្តេចតេជោ ហ៊ុន សែន ក្រើនរំលឹកដល់មន្រ្តីរាជការទាំងអស់ឲ្យបន្តយកចិត្តទុកដាក់បំពេញតួនាទីភារកិច្ចបម្រើជាតិ និងប្រជាជនឱ្យបានល្អប្រសើរ

សម្តេចតេជោ ណែនាំដល់មន្ត្រីរាជការ ក្រុមប្រឹក្សាខេត្ត ឃុំ សង្កាត់ បន្តយកចិត្តទុកដាក់បំពេញតួនាទីភារកិច្ចបម្រើជាតិ និងប្រជាជនឱ្យបានល្អប្រសើរ

សម្ដេចតេជោ ហ៊ុន សែន អញ្ជើញជួបសំណេះសំណាលជាមួយសមាជិក សមាជិកា ក្រុមប្រឹក្សាខេត្ត ក្រុង-ស្រុក ឃុំ-សង្កាត់ និងមន្ត្រី នៃមន្ទីរ-អង្គភាពនានា ក្នុងខេត្តកំពង់ស្ពឺ

TOP STORY | ក្រសួងព្រះបរមរាជវាំង៖ ព្រះរាជសុខភាព ព្រះមហាក្សត្រមានភាពប្រសើរជាបណ្តើរៗ ក្រុមគ្រូពេទ្យព្រះបរមរាជានុញ្ញាតថ្វាយព្រះអង្គយាងចេញពីមន្ទីរពេទ្យនៅថ្ងៃនេះ និងបន្តគង់ប្រថាប់នៅព្រះរាជដំណាក់រដ្ឋធានីប៉េកាំង ដើម្បីបន្តតាមដាន

ព័ត៌មានសំខាន់ៗ

ប្រធានាធិបតីបេឡារុសនិយាយថា ខ្លួននឹងចូលរួមប្រយុទ្ធជាមួយរុស្ស៊ី បើបេឡារុសរងការវាយប្រហារ

បេឡារុស៖ ទីភ្នាក់ងារសារព័ត៌មានរដ្ឋ Belta បានរាយការណ៍ថា លោកប្រធានាធិបតីបេឡារុស Alexander Lukashenko បាននិយាយកាលពីថ្ងៃព្រហស្បតិ៍ថា លោកនឹងបញ្ជាឲ្យទាហានរបស់លោកកៀកស្មារចូលរួមប្រយុទ្ធជាមួយសម្ព័ន្ធមិត្តរុស្ស៊ី ប្រសិនបើមានប្រទេសណាមួយបើកការវាយប្រហារមកលើបេឡារុស។ លោក Lukashenko ដែលនៅតែច្រានចោលដដែលៗពីការអះអាងរបស់ទីក្រុង Kyiv និងលោកខាងលិចដែលថា ប្រទេសរបស់លោកអាចត្រូវបានទាញទម្លាក់ចូលសង្គ្រាមកាន់តែជ្រៅ នៅក្នុងប្រទេសអ៊ុយក្រែនជួយទីក្រុង Moscow ក៏បាននិយាយផងដែរថា លោកគ្រោងនឹងជួបលោកប្រធានាធិបតីរុស្ស៊ី Vladimir Putin នៅថ្ងៃសុក្រនេះ។ ទីភ្នាក់ងារសារព័ត៌មាន Belta បានដកស្រង់សម្ដីរបស់លោក Lukashenko ខណៈកំពុងប្រាប់សន្និសីទសារព័ត៌មានកាលពីថ្ងៃព្រហស្បតិ៍ថា ខ្ញុំបានត្រៀមខ្លួនប្រយុទ្ធរួចជាស្រេចជាមួយរុស្ស៊ីពីទឹកដីបេឡារុស នៅក្នុងករណីតែមួយគត់គឺប្រសិនបើមានទាហានណាម្នាក់ចូលមកក្នុងដែនដីបេឡារុស ដើម្បីសម្លាប់មនុស្សរបស់ខ្ញុំ។ ប្រសិនបើពួកគេវាយប្រហារមកលើបេឡារុស នោះនឹងមានការឆ្លើយតបដ៏ធ្ងន់ធ្ងរបំផុត ហើយសង្គ្រាមនឹងរីកកាន់តែធំ។ ប្រទេសរុស្ស៊ីបានប្រើប្រទេសបេឡារុសជាប៉ុស្តិ៍បើកឆាក សម្រាប់ការវាយលុកទ្រង់ទ្រាយធំរបស់ខ្លួនលើអ៊ុយក្រែនកាល ពីឆ្នាំមុន ដោយបើកការវាយប្រហាររបស់ខ្លួនដែលបានបរាជ័យទៅលើរដ្ឋធានី Kyiv របស់អ៊ុយក្រែនពីប្រទេសនេះ៕អត្ថបទ៖ សុខមាន

លោក Biden គ្រោងពិភាក្សាជាមួយលោក Xi Jinping តែមិនសូមអភ័យទោសចំពោះការបាញ់ទម្លាក់បាឡុងទេ

អាមេរិក៖ កាលពីថ្ងៃព្រហស្បតិ៍លោកប្រធានាធិបតីអាមេរិក Joe Biden និយាយថា លោកមានគម្រោងពិភាក្សាជាមួយសមភាគីចិនគឺលោក Xi Jinping ក្រោយយោធាអាមេរិកបានបាញ់ទម្លាក់បាឡុង ដែលសង្ស័យថាជាបាឡុងចារកម្មរបស់ចិន ដោយបញ្ជាក់ថា លោកនឹងមិនសូមអភ័យទោសឡើយ ចំពោះការបញ្ជាឲ្យបាញ់ទម្លាក់បាឡុងនោះ។ លោកថា អាមេរិកនឹងប្រកួតប្រជែងជាមួយចិន តែមិនបង្កជម្លោះជាមួយចិនទេ។ លោក Biden បាននិយាយនៅក្នុងការធ្វើអត្ថាធិប្បាយនៅសេតវិមានថា ខ្ញុំរំពឹងថានឹងមានឱកាសពិភាក្សាជាមួយលោកប្រធានាធិបតី Xi ហើយខ្ញុំសង្ឃឹមថា យើងនឹងចូលទៅឲ្យដល់បាតនៃបញ្ហានេះ ប៉ុន្តែខ្ញុំនឹងមិនសូមអភ័យទោសចំពោះការបាញ់ទម្លាក់បាឡុងនោះទេ។ ការសន្ទនាចុងក្រោយរវាងលោក Biden និងលោក Xi បានកើតឡើងអំឡុងជំនួបទល់មុខគ្នាកាលពីខែវិច្ឆិកានៅក្រៅជំនួបកំពូល G20 នៅក្នុងប្រទេសឥណ្ឌូនេស៊ី។ លោក Biden បាននិយាយកាលពីថ្ងៃព្រហស្បតិ៍ថា ការបាញ់ទម្លាក់បាឡុងចារកម្មរបស់ចិនបានផ្ញើសារយ៉ាងច្បាស់ ពីការបំពានអធិបតេយ្យភាពរបស់យើងដែលមិនអាចទទួលយកបាន។ លោកបានបន្ថែមថា បញ្ហានេះបានគូសបញ្ជាក់ពីសារៈសំខាន់ នៃការរក្សាការបើកចំហរខ្សែទំនាក់ទំនងរវាងការទូត និងអ្នកជំនាញយោធាទាំង២ របស់យើង។ អ្នកការទូតរបស់យើងនឹងធ្វើការជាមួយគ្នាបន្ថែមទៀត ហើយខ្ញុំនឹងនៅតែមានទំនាក់ទំនងជាមួយលោកប្រធានាធិបតី Xi៕អត្ថបទ៖ សុខមាន

រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គាំទ្រការប្រើប្រាស់រថយន្តអគ្គិសនីនៅកម្ពុជា

ភ្នំពេញ៖ ឯកឧត្ដម អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានជំរុញ និងគាំទ្រ ដល់ការប្រើប្រាស់រថយន្តអគ្គិសនីនៅកម្ពុជា ក្នុងនោះឯកឧត្ដមបាន ជំរុញឱ្យការងារសាធារណការ និង ដឹកជញ្ជូន លើកទឹកចិត្ត និងអនុវត្តគោលនយោបាយលើការប្រើប្រាស់រថយន្តអគ្គិសនីនេះនៅកម្ពុជា។ឯកឧត្ដម អូន ព័ន្ធមុនីរ័ត្ន ឧបនាយករដ្ឋមន្រ្តី បានមានប្រសាសន៍ណែនាំបែបនេះ ក្នុងឱកាស តំណាងដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ថ្លែងក្នុង ពិធីបិទសន្និបាតបូកសរុបការងារសាធារណការ និង ដឹកជញ្ជូន ឆ្នាំ ២០២២ និង ទិសដៅការងារ ឆ្នាំ ២០២៣ ទីស្ដីការក្រសួងសាធារណការ និង ដឹកជញ្ជូន នៅថ្ងៃទី ១៦ ខែ កុម្ភៈ ឆ្នាំ ២០២៣។ឯកឧត្ដម អូន ព័ន្ធមុនីរ័ត្ន បានបង្ហាញមោទកភាព ចំពោះវឌ្ឍនភាព និងសមិទ្ធផលនានា ក្នុងវិស័យសាធារណការ និង ដឹកជញ្ជូន និងបានការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែង របស់ ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្រ្ដីក្រសួង ព្រមទាំងឯកឧត្តម, លោកជំទាវ ជាថ្នាក់ដឹកនាំ និង មន្រ្តីរាជការគ្រប់លំដាប់ថ្នាក់នៃក្រសួងសាធារណការ និង ដឹកជញ្ជូន ដែលបានខិតខំបំពេញតួនាទី និង ភារកិច្ចរបស់ខ្លួនប្រកបដោយប្រសិទ្ធភាព និងការទទួលខុសត្រូវខ្ពស់។ឯកឧត្ដមបន្ថែមថា កត្តាសុខសន្តិភាពពេញលេញ, ស្ថិរភាពម៉ាក្រូសេដ្ឋកិច្ចរឹងមាំ និង ភាព សុខដុមក្នុងសង្គម ក្រោមគោលនយោបាយ និង យុទ្ធសាស្រ្តច្បាស់លាស់ និង មោះមុត របស់រាជរដ្ឋាភិបាលកម្ពុជា, ពិសេស ជោគជ័យដ៏ត្រចះត្រចង់នៃការរៀបចំ និង ភាពជាប្រធាននៃកិច្ចប្រជុំកំពូលអាស៊ាន និង កិច្ចប្រជុំកំពូលពាក់ព័ន្ធ កាលពីឆ្នាំ ២០២២ កន្លងទៅ បាន និង កំពុង ធ្វើឱ្យកម្ពុជា កាន់តែមានកិត្តិនាមល្បីរន្ទឺ និង ទទួលបាននូវការកោតសរសើរលើឆាកអន្តរជាតិ ។ឯកឧត្ដមបន្តថា ទោះបីវឌ្ឍនភាពជារួមមានភាពល្អប្រសើរ ប៉ុន្ដែឯកឧត្តមបានកត់សម្គាល់ឃើញថា គម្រោងសំខាន់ៗមួយចំនួននៅមិនទាន់អាចសម្រេចបានតាមការគ្រោងទុក ហើយទិសដៅមួយចំនួនដែលត្រូវបានលើកឡើងក្នុងសន្និបាតបូកសរុបការងារកាលពីឆ្នាំកន្លងទៅក៏មិនទាន់សម្រេចបានពេញលេញនៅឡើយ។ ឯកឧត្ដមជំរុញឱ្យក្រសួងសាធារណការ បន្តខិតខំដោះស្រាយបញ្ហាប្រឈម និងពន្លឿនការងារមួយចំនួនទៀតដែលមានសារៈសំខាន់ជាយុទ្ធសាស្ត្រឱ្យបានចប់សព្វគ្រប់ និងទាន់ពេលដើម្បីចូលរួមចំណែកក្នុងការស្ដារ និងជំរុញកំណើនសេដ្ឋកិច្ចជាតិឡើងវិញឱ្យបានកាន់តែមានប្រសិទ្ធភាព៕ អត្ថបទ៖ វ៉ន ដារ៉ា

សម្ដេចតេជោ ហ៊ុន សែន ប្រាប់ទៅអង្គការក្រៅរដ្ឋាភិបាលឈប់និយាយពីស្តង់ដាពីរជាមួយរាជរដ្ឋាភិបាល

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន កាលពីម៉ោង ១ និង៤៩ នាទី យប់ថ្ងៃទី១៧ ខែកុម្ភៈ ឆ្នាំ២០២៣នេះ បានសរសេរសារលើតេឡេក្រាមប្រាប់ទៅក្រុមអង្គការសង្គមស៊ីវិលក្រៅរដ្ឋាភិបាលមួយចំនួននៅកម្ពុជាដែលភាគច្រើនទទួលជំនួយពីបរទេសផងនោះ ចង់ចាំទុកនិងឈប់និយាយពីស្តង់ដាពីរជាមួយរាជរដ្ឋាភិបាលតទៅទៀត។សម្ដេចតេជោ ហ៊ុន សែន បានសរសេរថា នៅយប់ថ្ងៃទី១៧ ខែកុម្ភៈនេះ សម្ដេចបានបង្ហើយការងារនៅរំលងអាធ្រាតទៅហើយតែសម្ដេចមិនទាន់សម្រាកទេ ព្រោះនៅមិនអស់ចិត្តរឿងស្តង់ដាពីរ របស់ក្រុមអង្គការសង្គមស៊ីវិលទាំងនោះ។សម្ដេចបានមានប្រសាសន៍ទាក់ទងនឹង លោក ផែង វណ្ណៈ ដែលត្រូវបានអង្គការក្រៅរដ្ឋាភិបាល ដែលភាគច្រើនទទួលលុយបរទេស ទាមទារឲ្យថ្កោលទោសដោយសារបាននិយាយអាក្រក់ពីស្ត្រីដែលនិយាយព័ត៌មានរហូតដល់ វិទ្យុវីអូឌីស្លាប់ដែលគ្មានពេលចាប់ជាតិ។ សម្ដេចតេជោបានបញ្ជាក់ថា សម្ដេចមិនកាន់ជើង ផែង វណ្ណៈទេ។ តែអ្វីដែលសម្ដេចមិនអស់ចិត្ត គឺប្អូនថ្លៃស្រីសម្ដេច ក្រោយស្លាប់ ត្រូវបានគេប្រមាថច្រើនរាប់ពាន់រាប់ម៉ឺនដងប្រៀបជាមួយការដែល ផែង វណ្ណៈ និយាយដល់នាងជាអ្នកនិយាយព័ត៌មានរបស់វិទ្យុវីអូឌីនោះ។សម្ដេចបានមានប្រសាសន៍ថា ពួកជនអាក្រក់ទាំងនោះ មិនគ្រាន់តែប្រមាថប្អូនថ្លៃសម្ដេចទេ តែគេ ថែមទាំងប្រមាថភរិយាសម្ដេច ក្រុមគ្រួសារសម្ដេច ក្នុងពេលដែលក្រុមគ្រួសារ កំពុងបង្ហូរ ទឹកភ្នែកស្តាយស្រណោះប្អូនស្រី ម្តាយ ជីដូន ម្តាយមីង ដែលលាចាកលោកទៅ ដោយមិនបានលាសូម្បីមួយម៉ាត់។សម្ដេចតេជោ ចោទសួរថា តើអង្គការទាំង ៤០ នេះក្តាប់បានរឿងនេះឬទេ? បានជានៅស្ងៀមស្តាត់ ឬមួយអង្គការទាំងនេះបង្កើតឡើងដើម្បីតែការពារអ្នកប្រឆាំង?។សម្ដេចប្រាប់ថា«សូមចាំទុក និងសូមឈប់និយាយពីស្តង់ដាពីរជាមួយរាជរដ្ឋាភិបាលតទៅទៀត»៕អត្ថបទ៖ វ៉ន ដារ៉ា

មនុស្សម្នាក់ស្លាប់ និង ៣នាក់របួសក្នុងការបាញ់ប្រហារនៅផ្សារទំនើបទីក្រុង El Paso

អាមេរិក៖ យោងតាមនគរបាលបានឱ្យដឹងថា មនុស្សម្នាក់ស្លាប់ និង ៣នាក់ផ្សេងទៀតរងរបួស បន្ទាប់ពីការបាញ់ប្រហារកាលពីល្ងាចថ្ងៃពុធនៅផ្សារទំនើប Cielo Vista ក្នុងទីក្រុង El Paso រដ្ឋតិចសាស់។ នគរបាលទីក្រុង El Paso និយាយនៅក្នុងសន្និសីទសារព័ត៌មានថា បុរសពីរនាក់កំពុងស្ថិតក្នុងការឃុំឃាំង ហើយលែងមានការគំរាមកំហែងដល់សាធារណជនទៀតហើយ។ អាជ្ញាធរនិយាយថា វាមានភាពវឹកវរ ខណៈមនុស្សបានរត់គេចខ្លួនព្រោះតែការភ័យខ្លាច។ មន្ទីរពេទ្យបានបញ្ជាក់ថា ជនរងគ្រោះជាបុរស ២នាក់ត្រូវបានបញ្ជូនទៅមជ្ឈមណ្ឌលវេជ្ជសាស្ត្រសាកលវិទ្យាល័យទីក្រុង El Paso ក្នុងស្ថានភាពធ្ងន់ធ្ងរ។ ផ្សារទំនើបមួយនេះនៅជាប់នឹងហាង Walmart ជាកន្លែងដែលមានការបាញ់ប្រហារកាលពីឆ្នាំ២០១៩ បណ្តាលឲ្យមនុស្ស ២៣នាក់ស្លាប់ និងបានបណ្តាលឲ្យមនុស្សជិត ២០នាក់ផ្សេងទៀតរងរបួស។ យោងតាមអង្គការហ្គាន់ វ៉ាយអឺលេន អាខាយ (Gun Violence Archive) បានឲ្យដឹងថា រហូតមកដល់ពេលនេះ នៅឆ្នាំនេះមានការបាញ់ប្រហារទ្រង់ទ្រាយធំជាង ៧០ដងនៅទូទាំងសហរដ្ឋអាមេរិក។ ទាំងប្រព័ន្ធផ្សព្វផ្សាយ CNN និង GVA កំណត់ថា ការបាញ់ប្រហារទ្រង់ទ្រាយធំ ជាការបាញ់ប្រហារដែលបណ្តាលឲ្យមនុស្សរងរបួស ឬស្លាប់ចាប់ពី ៤នាក់ ឬច្រើនជាងនេះ ដោយមិនរាប់បញ្ចូលអ្នកបាញ់ប្រហារនោះទេ៕អត្ថបទ៖ ប៊ុនថន

រុស្ស៊ីប្រកាសពីការបំបែកខ្សែត្រៀមសមរភូមិ ខណៈអ៊ុយក្រែនជំរុញផ្ដល់ជំនួយយោធាឲ្យបានលឿន

រុស្ស៊ី៖ រុស្ស៊ីបាននិយាយកាលពីថ្ងៃពុធថា ខ្លួនបានបំបែកខ្សែត្រៀមការពារដ៏រឹងមាំចំនួន២ របស់អ៊ុយក្រែននៅក្នុងភាគខាងកើត ហើយទីក្រុង Kyiv បាននិយាយថា ការវាយប្រហារឥតឈប់ឈររបស់រុស្ស៊ី ធ្វើឲ្យមានការលំបាកសម្រាប់យើង ខណៈក្រុមសម្ព័ន្ធមិត្តលោកខាងលិចបានប្រកាសផ្ដល់ជំនួយយោធាបន្ថែមទៀតដល់ទីក្រុង Kyiv រួមទាំងគ្រាប់កាំភ្លើងធំ។ ក្រុមសម្ព័ន្ធមិត្តអ៊ុយក្រែននិយាយកាលពីថ្ងៃពុធថា ប្រទេសសមាជិកណាតូកំពុងបង្កើនការផលិតគ្រាប់កាំភ្លើងធំដោយសារបារម្ភថា អ៊ុយក្រែនប្រើអស់លឿនជាងលោកខាងលិចផ្ដល់ឲ្យ។ ដោយមានជំនួយពីការកែណ្ឌកម្លាំងបម្រុងរាប់ពាន់នាក់កាលពីខែធ្នូ បន្ទាប់ពីការដកថយយ៉ាងអាម៉ាសក្នុងសមរភូមិជាច្រើនខែកន្លងមកនេះ រុស្ស៊ីបានបង្កើនការវាយប្រហារទូទាំងភាគខាងត្បូង និងខាងកើតរបស់ប្រទេសអ៊ុយក្រែនក្នុងរយៈកាលប៉ុន្មានសប្ដាហ៍ថ្មីៗនេះ ហើយការវាយលុកថ្មីទ្រង់ទ្រាយធំត្រូវគេរំពឹងថានឹងកើតឡើង ខណៈខួបមួយឆ្នាំដំបូងនៃការលុកលុយរបស់ខ្លួនជិតចូលមកដល់។ ក្រសួងការពារជាតិរុស្ស៊ីបាននិយាយថា កងកម្លាំងអ៊ុយក្រែនបានដកថយក្នុងពេលប្រឈម នឹងការវាយប្រហារពីកងកម្លាំងរុស្ស៊ីនៅក្នុងតំបន់ Luhansk ទោះបីជាពុំបានផ្ដល់ព័ត៌មានលម្អិតក៏ដោយ ហើយសារព័ត៌មាន Reuters មិនអាចស្វែងរកការផ្ទៀងផ្ទាត់ដោយឯករាជ្យបានទេចំពោះបញ្ហានេះ ក៏ដូចជាសេចក្ដីរាយការណ៍ពីសមរភូមិផ្សេងទៀត។ ក្រសួងខាងលើបាននិយាយនៅក្នុងសារ Telegram ថា អំឡុងការវាយប្រហារនោះ ទាហានអ៊ុយក្រែនបានដកថយចម្ងាយ ៣គីឡូម៉ែត្រពីខ្សែត្រៀមដែលខ្លួនបានកាន់កាប់។ ក្រសួងនេះពុំបានបញ្ជាក់ច្បាស់ទេថា ផ្នែកណាមួយនៃតំបន់ Luhansk ដែលមានការវាយប្រហារកើតឡើង៕អត្ថបទ៖ សុខមាន

មនុស្សចាស់ និងកុមារត្រូវបានសង្គ្រោះចេញពីគំនរថ្មជាបន្តបន្ទាប់ ក្រោយរញ្ជួយដីនៅទួរគី និងស៊ីរី

ទួរគី៖ ស្ត្រី ២នាក់ត្រូវបានសង្គ្រោះចេញពីគំនរកម្ទេចថ្ម នៅក្នុងទីក្រុងការ៉ាម៉ាន់ម៉ារ៉ាស់ភាគខាងត្បូងរបស់ប្រទេសទួរគី ហើយម្ដាយ និងកូន ២នាក់ត្រូវបានជួយសង្គ្រោះក្នុងទីក្រុង Antakya កាលពីថ្ងៃពុធ ខណៈកិច្ចខិតខំប្រឹងប្រែងជួយសង្គ្រោះនៅតែបន្ត ដើម្បីស្វែងរកអ្នកនៅរស់រានមានជីវិតរយៈពេល ៩ថ្ងៃបន្ទាប់ពីគ្រោះរញ្ជួយដីដ៏ធ្ងន់ធ្ងរ។ គេបានឃើញក្រុមអ្នកសង្គ្រោះបានអបអរសាទរ និងឱបគ្នា ខណៈរថយន្តសង្គ្រោះបានដឹកស្រី្តវ័យ ៧៤ឆ្នាំក្រោយការសង្គ្រោះចេញពីទីក្រុងការ៉ាម៉ាន់ម៉ារ៉ាស់ ហើយកាលពីមួយថ្ងៃមុន ស្ត្រីវ័យ ៤៦ឆ្នាំម្នាក់ត្រូវបានជួយសង្គ្រោះនៅក្នុងទីក្រុងនេះដែរ ជាទីតាំងដែលស្ថិតនៅជិតនឹងចំណុចកណ្ដាលនៃការរញ្ជួយ។ ទីភ្នាក់ងារសារព័ត៌មានរដ្ឋទួរគី Anadolu បានរាយការណ៍ថា ក្រោយមកកាលពីថ្ងៃពុធ ស្ត្រីម្នាក់ឈ្មោះ Ela និងកូនរបស់គាត់ ២នាក់ទៀតត្រូវបានជួយសង្គ្រោះចេញពីគំនរកម្ទេចថ្មនៃប្លុកអឹផាតមិនមួយក្នុងទីក្រុង Antakya រយៈពេល ២២៨ម៉ោងបន្ទាប់ពីការរញ្ជួយ។ ចំនួនអ្នកស្លាប់សរុបទាំងក្នុងប្រទេសទួរគី និងស៊ីរីបានកើនឡើងដល់ជាង ៤១.០០០នាក់ និងមនុស្សរាប់លាននាក់ត្រូវការជំនួយមនុស្សធម៌បន្ទាន់ ស្របពេលអ្នកនៅរស់រានមានជីវិតជាច្រើននាក់ ដែលបានបាត់បង់ផ្ទះសម្បែងកំពុងរស់នៅក្នុងសីតុណ្ហភាពត្រជាក់រដូវរងា៕អត្ថបទ៖ សុខមាន

សម្តេចតេជោ ហ៊ុន សែន នាយករដ្ឋមន្ត្រី អនុញ្ញាតឱ្យមេបញ្ជាការកងស្វ័យការពារជើងគោកជប៉ុនចូលជួបសម្តែងការគួរសម និងពិភាក្សាការងារ

ភ្នំពេញ៖ នៅព្រឹកថ្ងៃទី១៦ ខែកុម្ភៈ ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឱ្យឯកឧត្តម នាយឧត្តមសេនីយ៍ យ៉ូស៊ីដា យ៉ូស៊ីហ៊ីដេ មេបញ្ជាការកងស្វ័យការពារជើងគោកជប៉ុន ចូលជួបសម្តែងការគួរសម និងពិភាក្សាការងារ នៅវិមានសន្តិភាព។មេបញ្ជាការកងទ័ព ជើងគោកជប៉ុនបានអះអាងជំរាបសម្តេចតេជោ ហ៊ុន សែនថា ឯកឧត្តមនឹងជំរុញពង្រីក ពង្រឹង កិច្ចសហប្រតិបត្តិការជាមួយរវាងកងទ័ពជើងគោកជប៉ុន និងកងទ័ពកម្ពុជា ក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ ដោយស្មើភាព ។ឯកឧត្តម អ៊ាង សុផល្លែត ជំនួយការសម្តេចតេជោបានប្រាប់ថា ឯកឧត្តម យ៉ូស៊ីដា បានសំដែងនូវការគោរពជូនសម្ដេចតេជោដែលបានកសាងទ័ព ដឹកនាំទ័ព និងដឹកនាំកិច្ចចរចានាំមកជូនកម្ពុជានូវសុខសន្តិភាព ស្ថិរភាព និងការអភិវឌ្ឍន៍យ៉ាងឆាប់រហ័ស។ឯកឧត្តមបានបន្ថែមថា ប្រសិនបើគ្មានសម្ដេចតេជោទេ គឺគ្មានទេសន្តិភាព។ ឯកឧត្តមប្រកាសជំរុញពង្រីក ពង្រឹង កិច្ចសហប្រតិបត្តិការជាមួយកងទ័ពកម្ពុជាក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ ដោយស្មើភាព មិនមានអ្នកដើរពីមុខឬអ្នកដើរពីក្រោយគឺដៃគូស្មើភាពគ្នាដើម្បីបម្រើឲ្យការងារមនុស្សធម៌ផងនិងរក្សាសុខសន្តិភាពផង។ក្នុងន័យនេះឯកឧត្តម យ៉ូស៊ីដា បានគោរពស្នើសុំការគាំទ្រដ៏ខ្ពង់ខ្ពស់អំពីសម្ដេចតេជោ។ជាការឆ្លើយតប សម្ដេចតេជោ បានថ្លែងអំណរគុណចំពោះការវាយតម្លៃរបស់ឯកឧត្តម យ៉ូស៊ីដា ហើយបានជម្រាបជូនឯកឧត្តមអំពីដំណើរស្វែងរកសន្តិភាពរបស់កម្ពុជាដែលជាប្រទេសបានរងការបែកបាក់គ្នាដែលនៅពេលនោះគឺពិតជាមានការលំបាកណាស់ដែលកម្ពុជាបានបាត់បង់ស្ទើរតែទាំងអស់។មួយចំណែកទៀតម្ខាងមានការកាប់សម្លាប់អស់ជាងបីលាននាក់ ហើយនៅពេលនោះក្នុងនាមជាយុវជនមួយរូប សម្ដេចតេជោគ្មានជម្រើសផ្សេងទេ គឺមានតែការកសាងទ័ពនិងតស៊ូចរចា និងយកជីវិតទៅប្តូរដើម្បីសន្តិភាពមានសន្តិភាព។ បើគ្មានសន្តិភាពទេគឺគ្មានទេ លទ្ធិប្រជាធិបតេយ្យ គ្មានទេសិទ្ធិមនុស្ស ហើយសិទ្ធិមនុស្សមិនជ្រកក្រោមសង្គ្រាមទេ យ៉ាងណាមិញដែលមានប្រទេសអ៊ុយក្រែនជាឧទាហរណ៍ស្រាប់៕

កម្ពុជារៀបចំពិធីលៀងសាយភោជន៍ ជូនប្រធានាធិបតី នៃសាធារណរដ្ឋសហព័ន្ធអាល្លឺម៉ង់

ភ្នំពេញ៖ រាជរដ្ឋាភិបាលកម្ពុជាបានរៀបចំពិធីលៀងសាយភោជន៍ ជូនប្រធានាធិបតី នៃសាធារណរដ្ឋសហព័ន្ធអាល្លឺម៉ងនៅវិមានសន្តិភាព នាថ្ងៃទី ១៥ ខែកុម្ភៈ ឆ្នាំ២០២៣នេះ។ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញចូលរួមក្នុងពិធីលៀងសាយភោជន៍ ជូនដល់ ឯកឧត្តម ហ្វ្រាំង វ៉ាល់ធ័រ ឆ្តែនម៉ៃយ័រ ( Frank-Walter Steinmeier) ប្រធានាធិបតីនៃសាធារណរដ្ឋសហព័ន្ធអាល្លឺម៉ង់ ក្នុងឱកាសដែលឯកឧត្តម និងលោកជំទាវ អញ្ជើញបំពេញទស្សនកិច្ចនៅក្នុងព្រះរាជាណាចក្រកម្ពុជា។ ពិធីនេះ ក្រោមអធិបតីភាព សម្ដេចវិបុលសេនាភក្តី សាយ ឈុំ ប្រមុខរដ្ឋស្ដីទី និងជាប្រធានព្រឹទ្ធសភា នៃព្រះរាជាណាចក្រកម្ពុជា។តាមរយៈដំណើរទស្សនកិច្ចរបស់ ឯកឧត្តមប្រធានាធិបតីនៃសាធារណរដ្ឋសហព័ន្ធអាល្លឺម៉ង់ នាពេលនេះ នឹងបើកទំព័រមាសក្នុងប្រវត្តិសាស្ត្រ នៃទំនាក់ទំនងជាប្រពៃណី ក៏ដូចជាមិត្តភាព ព្រមទាំងកិច្ចសហប្រតិបត្តិការដ៏ល្អប្រសើររវាងប្រទេសទាំងពីរ និងពង្រឹងបន្ថែមទៀតនូវចំណងទាក់ទង និងកិច្ចសហប្រតិបត្តិការដ៏ល្អដែលមានស្រាប់សម្រាប់ជាផលប្រយោជន៍ទៅវិញទៅមក របស់ប្រជាជននៃប្រទេសទាំងពីរ៕

ការិយាល័យ BBC នៅឥណ្ឌាត្រូវបានឆែកឆេរ បន្ទាប់ពីមានឯកសាររិះគន់នាយករដ្ឋមន្ត្រី

ឥណ្ឌា៖ មនុស្សជាច្រើនបានមកប្រមូលផ្តុំគ្នា នៅខាងក្រៅការិយាល័យប្រព័ន្ធផ្សព្វផ្សាយ BBC ទីក្រុង New Delhi កាលពីថ្ងៃអង្គារ ខណៈមន្ត្រីពន្ធដារឥណ្ឌាបានឆែកឆេរការិយាល័យរបស់ប្រព័ន្ធផ្សព្វផ្សាយមួយនេះ និងនៅទីក្រុង Mumbai។ ចំណាត់ការនេះធ្វើឡើង ខណៈរដ្ឋាភិបាលបង្ក្រាបលើការផ្សាយ និងការចែករំលែកឯកសាររបស់ព័ត៌មាន BBC ដែលរិះគន់នាយករដ្ឋមន្ត្រីលោក Narendra Modi ជុំវិញតួនាទីរបស់លោកនៅក្នុងកុប្បកម្មដ៏ឃោរឃៅកាលពីឆ្នាំ២០០២។ កាលពីខែមុននិស្សិតជាង ១០នាក់ត្រូវបានឃុំខ្លួនក្នុងរដ្ឋធានី ពីបទព្យាយាមចាក់បញ្ចាំងភាពយន្តឯកសារនេះដែលកម្មវិធីមានឈ្មោះថា «India: The Modi Question»។ ឯកសារផ្តោតលើការដឹកនាំរបស់អ្នកនយោបាយជាតិនិយមហិណ្ឌូ ក្នុងឋានៈជាប្រធានរដ្ឋមន្ត្រីនៃរដ្ឋ Gujarat ភាគខាងលិចកាលពីខែកុម្ភៈ ឆ្នាំ២០០២។ កុប្បកម្មកាលពីពេលនោះបានបណ្តាលឲ្យមនុស្សយ៉ាងហោចណាស់ ១,០០០នាក់ស្លាប់ដែលភាគច្រើនជាប្រជាជនមូស្លីម។ សកម្មជននិយាយថា ចំនួនអ្នកស្លាប់មានចំនួនច្រើនជាងនេះពីរដង។ ក្នុងអំឡុងពេលកាន់មុខតំណែងរបស់លោក លោក Modi នៅពេលនោះត្រូវបានគេចោទប្រកាន់ថា លោកមិនបានធ្វើអ្វីឲ្យបានគ្រប់គ្រាន់ដើម្បីបញ្ឈប់កុប្បកម្ម ហើយតែងតែបដិសេធថាមិនបានធ្វើខុស។ គណបក្សរបស់លោក Modi គឺគណបក្ស BJP បាននិយាយថា ស្ថាប័នជាច្រើនរបស់ឥណ្ឌាធ្វើការដោយឯករាជ្យ ហើយនាយកដ្ឋានពន្ធដារធ្វើការផ្អែកលើច្បាប់ក្នុងការពិនិត្យមើលការអនុវត្តន៍ច្បាប់។ ប៉ុន្តែអ្នកតស៊ូមតិសិទ្ធិប្រព័ន្ធផ្សព្វផ្សាយ និងក្រុមប្រឆាំងរបស់ឥណ្ឌាបានថ្កោលទោសការឆែកឆេរកាលពីថ្ងៃអង្គារ។ សម្រាប់ប្រព័ន្ធផ្សព្វផ្សាយ BBC បាននិយាយថា ខ្លួនឈរលើការរាយការណ៍របស់ខ្លួនដោយសហការជាមួយមន្ត្រីពន្ធដារ ហើយនៅតែប្តេជ្ញាចិត្តក្នុងការបម្រើទស្សនិកជននៅក្នុងប្រទេសឥណ្ឌា៕អត្ថបទ៖ ប៊ុនថន

បណ្ដាញសង្គម

ព័ត៌មានថ្មីៗ

ក្រុមអន្តរាគមន៍បង្ក្រាបបទល្មើសចលនាសត្វ ឃាត់រថយន្តដឹកជ្រូក ១៧០ក្បាលមកពីប្រទេសឡាវ

ជនបរទេស ២,៦៧១នាក់ ត្រូវបានបណ្ដេញចេញពីកម្ពុជាពាក់ព័ន្ធករណី Online Scams និងបទល្មើសព្រហ្មទណ្ឌផ្សេងៗទៀត

គិតត្រឹមចុងខែមីនាឆ្នាំ២០២៦៖ រោងចក្រ សហគ្រាសកើនដល់ជាង ៤ម៉ឺន៧ពាន់ ផ្ដល់ការងាររាប់ម៉ឺនកន្លែង

លីបង់និយាយថា មនុស្ស ១៣នាក់ បានស្លាប់ នៅក្នុងការវាយប្រហាររបស់អ៊ីស្រាអែលនៅភាគខាងត្បូង

មន្ត្រីយោធាអ៊ីរ៉ង់និយាយថា សង្គ្រាមជាថ្មីជាមួយសហរដ្ឋអាមេរិក ទំនងជាកើតឡើង

នាយករដ្ឋមន្ត្រីអង់គ្លេសនិយាយថា ការដង្ហែក្បួនគាំទ្រប៉ាឡេស្ទីនមួយចំនួន អាចត្រូវបានហាមឃាត់

ការតវ៉ាផ្ទុះឡើងនៅទីក្រុង Pune ប្រទេសឥណ្ឌា ជុំវិញការចោទប្រកាន់ពីបទរំលោភ និងឃាតកម្មលើកុមារីអាយុ ៤ឆ្នាំ

រដ្ឋមន្ត្រីការបរទេសរុស្ស៊ី និងអ៊ីរ៉ង់ ពិភាក្សាអំពីសេរីភាពនៃការធ្វើនាវាចរណ៍ និងកម្មវិធីនុយក្លេអ៊ែររបស់អ៊ីរ៉ង់

របាយការណ៍៖ ការផ្ទុះគ្រាប់បែកដែលនៅសល់ពីការវាយប្រហារ បានសម្លាប់សមាជិកឆ្មាំបដិវត្តន៍អ៊ីរ៉ង់ចំនួន ១៤នាក់

អង្គការ WHO អំពាវនាវឲ្យមានការបញ្ចូលថ្នាំពេទ្យជាបន្ទាន់ទៅកាន់តំបន់ហ្កាហ្សា ដើម្បីកសាងសេវាសុខភាពឡើងវិញ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

ប្រធានាធិបតីបេឡារុសនិយាយថា ខ្លួននឹងចូលរួមប្រយុទ្ធជាមួយរុស្ស៊ី បើបេឡារុសរងការវាយប្រហារ

លោក Biden គ្រោងពិភាក្សាជាមួយលោក Xi Jinping តែមិនសូមអភ័យទោសចំពោះការបាញ់ទម្លាក់បាឡុងទេ

រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គាំទ្រការប្រើប្រាស់រថយន្តអគ្គិសនីនៅកម្ពុជា

សម្ដេចតេជោ ហ៊ុន សែន ប្រាប់ទៅអង្គការក្រៅរដ្ឋាភិបាលឈប់និយាយពីស្តង់ដាពីរជាមួយរាជរដ្ឋាភិបាល

មនុស្សម្នាក់ស្លាប់ និង ៣នាក់របួសក្នុងការបាញ់ប្រហារនៅផ្សារទំនើបទីក្រុង El Paso

រុស្ស៊ីប្រកាសពីការបំបែកខ្សែត្រៀមសមរភូមិ ខណៈអ៊ុយក្រែនជំរុញផ្ដល់ជំនួយយោធាឲ្យបានលឿន

មនុស្សចាស់ និងកុមារត្រូវបានសង្គ្រោះចេញពីគំនរថ្មជាបន្តបន្ទាប់ ក្រោយរញ្ជួយដីនៅទួរគី និងស៊ីរី

កម្ពុជារៀបចំពិធីលៀងសាយភោជន៍ ជូនប្រធានាធិបតី នៃសាធារណរដ្ឋសហព័ន្ធអាល្លឺម៉ង់

ការិយាល័យ BBC នៅឥណ្ឌាត្រូវបានឆែកឆេរ បន្ទាប់ពីមានឯកសាររិះគន់នាយករដ្ឋមន្ត្រី

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

ប្រធានាធិបតី​បេឡា​រុស​និយាយថា ខ្លួន​នឹងចូលរួម​ប្រយុទ្ធ​ជាមួយ​រុស្ស៊ី បើ​បេឡា​រុស​រង​ការវាយប្រហារ​

លោក Biden គ្រោង​ពិភាក្សា​ជាមួយ​លោក Xi Jinping តែ​មិន​សូម​អភ័យទោស​ចំពោះ​ការបាញ់​ទម្លាក់​បា​ឡុង​ទេ​

រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គាំទ្រការប្រើប្រាស់រថយន្តអគ្គិសនីនៅកម្ពុជា

សម្ដេចតេជោ ហ៊ុន សែន ប្រាប់ទៅអង្គការក្រៅរដ្ឋាភិបាលឈប់និយាយពីស្តង់ដាពីរជាមួយរាជរដ្ឋាភិបាល

មនុស្ស​ម្នាក់​ស្លាប់ និង​ ៣​នាក់​របួស​ក្នុងការ​បាញ់ប្រហារ​នៅ​ផ្សារ​ទំនើប​ទីក្រុង El Paso

រុស្ស៊ី​ប្រកាស​ពី​ការ​បំបែក​ខ្សែត្រៀម​សមរភូមិ ខណៈអ៊ុយ​ក្រែ​ន​ជំរុញ​ផ្ដល់ជំនួយ​យោធា​ឲ្យ​បាន​លឿន​

កម្ពុជារៀបចំពិធីលៀងសាយភោជន៍ ជូនប្រធានាធិបតី នៃសាធារណរដ្ឋសហព័ន្ធអាល្លឺម៉ង់

ការិយាល័យ BBC នៅ​ឥណ្ឌា​ត្រូវបាន​ឆែកឆេរ​ បន្ទាប់​ពីមាន​ឯកសារ​រិះគន់​នាយករដ្ឋមន្ត្រី​

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ប្រធានាធិបតីបេឡារុសនិយាយថា ខ្លួននឹងចូលរួមប្រយុទ្ធជាមួយរុស្ស៊ី បើបេឡារុសរងការវាយប្រហារ

លោក Biden គ្រោងពិភាក្សាជាមួយលោក Xi Jinping តែមិនសូមអភ័យទោសចំពោះការបាញ់ទម្លាក់បាឡុងទេ

មនុស្សម្នាក់ស្លាប់ និង ៣នាក់របួសក្នុងការបាញ់ប្រហារនៅផ្សារទំនើបទីក្រុង El Paso

រុស្ស៊ីប្រកាសពីការបំបែកខ្សែត្រៀមសមរភូមិ ខណៈអ៊ុយក្រែនជំរុញផ្ដល់ជំនួយយោធាឲ្យបានលឿន

ការិយាល័យ BBC នៅឥណ្ឌាត្រូវបានឆែកឆេរ បន្ទាប់ពីមានឯកសាររិះគន់នាយករដ្ឋមន្ត្រី