BTV NEWS

ជនជាតិឥណ្ឌូនេស៊ី ៧២នាក់ ពាក់ព័ន្ធនឹងOnline Scams ត្រូវបានបណ្ដេញចេញពីកម្ពុជា

ក្រសួងសន្តិសុខសាធារណៈចិន ចុះពិនិត្យទីតាំងធ្លាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យានៅតំបន់ OP ក្រុងបាវិត

ឧត្តមសេនីយ៍ឯក ជួន ណារិន្ទ ប្រកាសឲ្យអ្នកបើករថយន្ត Range Rover បង្កគ្រោះថ្នាក់ចរាចរណ៍ស្លាប់មនុស្សនៅខណ្ឌជ្រោយចង្វារ ចូលខ្លួនបន្ទាន់ មិនបាច់រកអន្តរាគមន៍ទេ

ករណីគ្រឿងញៀនខុសច្បាប់ជិត ១តោន ៖ ចោទប្រកាន់ជនសង្ស័យចំនួន ១២នាក់

សន្តិសុខ និង សង្គម

ចំនួនអ្នកស្លាប់ក្នុងគ្រោះរញ្ជួយដីកោះតៃវ៉ាន់ កើនឡើងដល់ ១៦នាក់ ខណៈមនុស្ស ៣ នាក់បន្តបាត់ខ្លួន

ក្រុមមន្ត្រីបាននិយាយថា ចំនួនអ្នកស្លាប់ដោយសារការរញ្ជួយដីដ៏ធំដែលបានវាយប្រហារកោះតៃវ៉ាន់ កាលពីសប្តាហ៍មុន បានកើនឡើងដល់ ១៦ នាក់ហើយកាលពីថ្ងៃពុធ (១០ មេសា) បន្ទាប់ពីសាកសពមនុស្សបីនាក់ទៀតត្រូវបានរកឃើញនៅលើផ្លូវឡើងភ្នំ។គ្រោះរញ្ជួយដីកម្រិត ៧,២ រ៉ិចទ័រ ដែលបានវាយប្រហារកោះនេះកាលពីថ្ងៃទី០៣ ខែមេសា ក៏បានបណ្តាលឱ្យមនុស្សជាង ១.១០០ នាក់បានរងរបួសផងដែរ ជាមួយនឹងអគារជាច្រើនខ្នងត្រូវខូចខាត ខណៈការត្រៀមលក្ខណៈដ៏ល្អរបស់តៃវ៉ាន់ សម្រាប់គ្រោះមហន្តរាយដែលរីករាលដាល ត្រូវបានចាត់ទុកថាអាចបញ្ចៀសគ្រោះមហន្តរាយកាន់តែធំ។អាជ្ញាធរបានរកឃើញជនរងគ្រោះទាំងបីនាក់នោះកាលពីថ្ងៃពុធ ខណៈដែលពួកគេធ្វើការដើម្បីយកសាកសពពីរផ្សេងទៀតដែលកប់នៅក្រោមថ្មតាមបណ្តោយផ្លូវឡើងភ្នំ សាខាតាង (Shakadang) ក្នុងតំបន់ ហ័រលៀន (Hualien) ភាគខាងកើតកោះតៃវ៉ាន់ ដែលជាចំណុចកណ្តាលនៃការរញ្ជួយដី។ អ្នកស្លាប់ថ្មីទាំងនោះបានធ្វើឱ្យចំនួនអ្នកស្លាប់សរុបពីការរញ្ជួយដីនេះកើនឡើងដល់ ១៦ នាក់ នេះបើយោងតាមភ្នាក់ងារពន្លត់អគ្គិភ័យជាតិ។ទីភ្នាក់ងារនេះបាននិយាយថា មនុស្សបីនាក់នៅតែបាត់ខ្លួននៅតាមបណ្តោយផ្លូវភ្នំ សាខាតាង រួមទាំងជនជាតិសិង្ហបុរីពីរនាក់ផងដែរ។ ទីភ្នាក់ងារអន្តោប្រវេសន៍តៃវ៉ាន់បាននិយាយថា គូស្នេហ៍ជនជាតិសិង្ហបុរីដែលបាត់ខ្លួននោះ គឺជាប្តីប្រពន្ធ។ ការរញ្ជួយដីកាលពីថ្ងៃពុធសប្តាហ៍មុន គឺជាគ្រោះមហន្តរាយដ៏ធ្ងន់ធ្ងរបំផុតនៅតៃវ៉ាន់ ចាប់តាំងពីការរញ្ជួយដីកម្រិត ៧,៦ រ៉ិចទ័របានវាយប្រហារកោះនេះក្នុងឆ្នាំ១៩៩៩៕

នាយករដ្ឋមន្ត្រី៖ ប្រទេសប៉ូឡូញ នឹងមិនទទួលយកយន្តការផ្លាស់ទីលំនៅរបស់ជនអន្តោប្រវេសន៍ទេ

លោកនាយករដ្ឋមន្ត្រី ដូណាល់ ថាស់ (Donald Tusk) បាននិយាយកាលពីថ្ងៃពុធថា ប្រទេសប៉ូឡូញនឹងមិនទទួលយកយន្តការផ្លាស់ទីលំនៅជនអន្តោប្រវេសន៍របស់សហភាពអឺរ៉ុបទេ បើទោះបីជាមានការ អនុម័តច្បាប់របស់សភាអឺរ៉ុបដែលសំដៅទប់ស្កាត់ការធ្វើទេសន្តរប្រវេសន៍ចូលទៅក្នុងទ្វីបនេះក៏ដោយ។សមាជិកសភាអឺរ៉ុប បានបោះឆ្នោតកាលពីថ្ងៃពុធលើការកែប្រែប្រព័ន្ធការធ្វើទេសន្តរប្រវេសន៍របស់ប្លុកនេះ ដើម្បីកាត់បន្ថយរយៈពេលនៃនីតិវិធីសន្តិសុខ និងសិទ្ធិជ្រកកោន និងបង្កើនការវិលត្រឡប់របស់ជនអន្តោប្រវេសន៍ ដើម្បីកាត់បន្ថយការធ្វើអន្តោប្រវេសន៍ដែលមិនចង់បានពីមជ្ឈិមបូព៌ា និងអាហ្វ្រិក ដែលជាអាទិភាពចម្បងនៅលើរបៀបវារៈរបស់សហភាពអឺរ៉ុប។លោកថាស់ បានប្រាប់អ្នកយកព័ត៌មានថា៖«យើងនឹងស្វែងរកមធ្យោបាយដើម្បីឲ្យកិច្ចព្រមព្រៀងទេសន្តរប្រវេសន៍ចូលជាធរមាន ក្នុងទម្រង់មិនផ្លាស់ប្តូរក៏ដោយ យើងនឹងការពារប៉ូឡូញប្រឆាំងនឹងយន្តការផ្លាស់ ប្តូរទីលំនៅ»។លោកបានបន្ថែមថា ប្រទេសសហភាពអឺរ៉ុប ចាំបាច់ត្រូវផ្តោតលើការការពារព្រំដែនរបស់ខ្លួន។ប្រទេសប៉ូឡូញ ធ្លាប់បានបញ្ជាក់ថា ខ្លួនគួរតែត្រូវបានលើកលែងពីយន្តការសាមគ្គីភាព នៅក្នុងច្បាប់ថ្មីនេះ ខណៈដែលខ្លួន បានជួយនិងទទួលយកជនភៀសខ្លួនអ៊ុយក្រែនច្រើនជាងគេ ចាប់តាំងពីការឈ្លានពានរបស់រុស្ស៊ីលើប្រទេសនេះ ក្នុងឆ្នាំ ២០២២។ការធ្វើទេសន្តរប្រវេសន៍ គឺជាបញ្ហាដ៏ចម្រោងចម្រាស នៅក្នុងសហភាពអឺរ៉ុប ចាប់តាំងពីមនុស្សជាងមួយលាននាក់ដែលភាគច្រើនជាជនភៀសខ្លួនស៊ីរី បានមកដល់ពាសពេញសមុទ្រមេឌីទែរ៉ាណេ ក្នុងឆ្នាំ ២០១៥ ដោយចាប់បានប្លុកនេះពុំបានត្រៀមខ្លួនជាមុន ចំពេលដែលមានភាពវឹកវរ និងស្ថានភាពលំបាកខ្លាំង។

ទាហាននិងរថក្រោះអ៊ីស្រាអែល ធ្វើសកម្មភាពក្បែរព្រំដែនហ្កាហ្សា ខណៈជំនួយតាមយន្តហោះ លើដែនដីគ្រប់គ្រងដោយក្រុមហាម៉ាស

រថក្រោះជាច្រើនគ្រឿងរបស់អ៊ីស្រាអែល បានធ្វើសកម្មភាពតាមបណ្តោយព្រំដែន រវាងអ៊ីស្រាអែល និងតំបន់ហ្កាហ្សាស្ទ្រីបកាលពីថ្ងៃពុធ មុនពេលកូនប្រុសបីនាក់របស់មេដឹកនាំក្រុមហាម៉ាស លោក អ៊ីស្មាល ហានីយ៉េ(Ismail Haniyeh) ត្រូវបានសម្លាប់ក្នុងការវាយប្រហារតាមអាកាសរបស់អ៊ីស្រាអែល នៅក្នុងដែនដីនេះ។យោធាអ៊ីស្រាអែល បានអះអាងចំពោះការវាយប្រហារនេះ ដោយចាត់ទុកកូនប្រុសទាំងបីនាក់នេះ ថាស្ថិតនៅក្នុងប្រតិបត្តិការរបស់ក្រុមប្រដាប់អាវុធហាម៉ាស។ ក្រសួងសុខាភិបាលតំបន់ហ្កាហ្សា បាននិយាយថា ប្រជាជនប៉ាឡេស្ទីនចំនួន ៣៣.៤៨២ នាក់ ត្រូវបានសម្លាប់នៅក្នុងការវាយលុករបស់អ៊ីស្រាអែលចូលទៅក្នុងតំបន់ហ្កាហ្សា ចាប់តាំងពីថ្ងៃទី ៧ ខែតុលា។ ការវាយប្រហាររបស់ក្រុមហាម៉ាសលើប្រទេសអ៊ីស្រាអែល ក្រុមសកម្មប្រយុទ្ធបានសម្លាប់មនុស្ស ១.២០០នាក់ និងចាប់ជាចំណាប់ថ្នូរជាង ២៥០នាក់ ភាគច្រើនជាជនស៊ីវិល។ កាលពីថ្ងៃពុធ គេបានមើលឃើញពីព្រំដែន មានយន្តហោះជាច្រើនគ្រឿងកំពុងហោះហើរទម្លាក់ជំនួយនៅលើតំបន់ហ្កាហ្សា។ទន្ទឹមនឹងនេះ ខណៈប្រជាជនមូស្លីមរាប់លាននាក់នៅជុំវិញពិភពលោកកំពុងប្រារព្ធពិធីបុណ្យ Eid កាលពីថ្ងៃពុធជាថ្ងៃបញ្ចប់នៃខែបុណ្យតមអាហារនៃបុណ្យរ៉ាម៉ាដានដោយមានពិធីជាច្រើន មានពិធីទទួលទានអាហារ និងការជួបជុំគ្រួសារ ដែលមនុស្សតិចតួចណាស់នៅហ្កាហ្សា អាចទទួលបានការលួងលោមពីពេលវេលាដ៏ពិសេសបែបនេះ។ នៅចន្លោះតង់នៅជំរំសម្រាប់ជនភៀសខ្លួនប៉ាឡេស្ទីនក្នុងទីក្រុង Rafah កុមារមួយចំនួនត្រូវបានគេមើលឃើញថាកំពុងប្រមូលទឹកពីរទេះសត្វលា ខណៈអ្នកផ្សេងទៀតបានប្រមូលផ្តុំគ្នាជុំវិញបុរសម្នាក់វាយស្គរ ដែលជាការលួងលោមចិត្តពីការផ្តោតអារម្មណ៍នៃជម្លោះរយៈពេលប្រាំមួយខែចុងក្រោយនៃការរស់រានមានជីវិតពីការវាយប្រហារតាមអាកាសរបស់អ៊ីស្រាអែល មានទាំងការបាញ់ផ្លោង ការវាយលុកតាមជើងគោក និងវិបត្តិមនុស្សធម៌។

មេធាវីនិយាយថា អតីតអនុប្រធានាធិបតីអេក្វាឌ័រ លោក Glas ធ្វើកូដកម្មបង្អត់អាហារ

មេធាវី លោក Sonia Vera បាននិយាយនៅក្នុងសារបង្ហោះនៅលើបណ្តាញ X កាលពីថ្ងៃពុធ ថា អតីតអនុប្រធានាធិបតីប្រទេសអេក្វាឌ័រ លោក Jorge Glas បានធ្វើកូដកម្មបង្អត់អាហារនៅក្នុងពន្ធនាគារក្នុងទីក្រុង ហ្គាយ៉ាហ្គីល(Guayaquil) ដើម្បីតវ៉ាប្រឆាំងការចាប់ខ្លួនលោក។ លោក Glas ត្រូវបានចោទប្រកាន់ចំនួន២លើករួចមកហើយពីបទពុករលួយ ហើយពេលនេះកំពុងប្រឈមុខបទចោទប្រកាន់ថ្មីៗ ដែលត្រូវបានចាប់ខ្លួនកាលពីថ្ងៃសុក្រ បន្ទាប់ពីការឆ្មក់ចូលរបស់នគរបាលនៅស្ថានទូតម៉ិកស៊ិក ក្នុងទីក្រុង Quito ជាកន្លែងដែលលោកបានស្នាក់នៅចាប់តាំងពីខែធ្នូមក។រដ្ឋាភិបាលប្រទេសអេក្វាឌ័រ បាននិយាយថា ខ្លួនមានភ័ស្តុតាងដែលថា លោក Glas មានផែនការរត់គេចខ្លួន ទោះបីជាពុំបានផ្តល់ព័ត៌មានលម្អិតក៏ដោយ។ លោក Glas ត្រូវបានគេបញ្ជូនទៅកាន់មន្ទីរពេទ្យកាលពីថ្ងៃចន្ទ បន្ទាប់ពីអង្គភាពពន្ធនាគារបាននិយាយថា លោកមិនព្រមទទួលទានអាហារ ដែលផ្តល់ឱ្យនៅក្នុងពន្ធនាគារ ហើយបានធ្លាក់ខ្លួនឈឺ ប៉ុន្តែលោកបានចេញពីមន្ទីរពេទ្យវិញកាលពីថ្ងៃអង្គារ ទី៩ ខែមេសា និងបានត្រឡប់ទៅពន្ធនាគារវិញ។កាលពីថ្ងៃសុក្រ ទី០៥ មេសា កងកម្លាំងប្រទេសអេក្វាឌ័រ បានឆ្មក់ចូលស្ថានទូតម៉ិកស៊ិកដើម្បីចាប់ខ្លួនអតីតអនុប្រធានាធិបតីអេក្វាឌ័រ លោក Jorge Glas ដែលបានភៀសខ្លួនជាច្រើនខែមកនៅក្នុងស្ថានទូតម៉ិកស៊ិកក្នុងទីក្រុងQuito។ ប្រទេសអេក្វាឌ័រ បានអះអាងថា ការផ្តល់សិទ្ធិជ្រកកោនឲ្យលោក Glas គឺខុសច្បាប់ ខណៈលោកត្រូវបានកាត់ទោសពីរដងរួចមកហើយលើបទចោទប្រកាន់អំពើពុករលួយ។ប្រធានលេខាការបរទេសរបស់ប្រទេសម៉ិកស៊ិកប្រចាំស្ថានទូតម៉ិកស៊ិកក្នុងប្រទេសអេក្វាឌ័រ លោក រ៉ូប៊ឺតូ ខេនសេកូ(Roberto Canseco) បាននិយាយថា លោក បានរងរបួសជិតភ្នែក អំឡុងការឆ្មក់ចូល។ លោក Canseco ត្រូវបានគេមើលឃើញថាបានទប់ទល់ជាមួយកងកម្លាំងសន្តិសុខនៅក្នុងវីដេអូនៃការឆ្មក់ចូលរបស់នគរបាលអេក្វាឌ័រ។ ប្រធានាធិបតីម៉ិកស៊ិកលោក Andres Manuel Lopez Obrador បាននិយាយថា ករណីនេះនឹងត្រូវបញ្ជូនទៅតុលាការពិភពលោកក្នុងសប្តាហ៍នេះដើម្បីធ្វើអន្តរាគមន៍។ ការឆ្មក់ចូលស្ថានទូតម៉ិកស៊ិក បានធ្វើឱ្យជម្លោះកាន់តែក្តៅគគុករវាងប្រទេសទាំងពីរ ដែលជំរុញឱ្យម៉ិកស៊ិក ផ្អាកទំនាក់ទំនងផ្នែកការទូតជាមួយប្រទេសអេក្វាឌ័រ និងធ្វើឲ្យមានការរិះគន់ពីបណ្តាប្រទេសជុំវិញតំបន់ និងនៅកន្លែងផ្សេងទៀត។

រដ្ឋាភិបាលនិយាយថា ប្រទេសកាណាដា ប្រឈមហានិភ័យរដូវកាលចំហេះព្រៃដ៏មហន្តរាយមួយផ្សេងទៀត

រដ្ឋាភិបាលសហព័ន្ធ បាននិយាយកាលពីថ្ងៃពុធថា ប្រទេសកាណាដា ប្រឈមទៅនឹងហានិភ័យរដូវកាលចំហេះព្រៃដ៏មហន្តរាយមួយផ្សេងទៀត ខណៈរដ្ឋាភិបាល បានព្យាករណ៍ថា សីតុណ្ហភាពនិទាឃរដូវ និងរដូវក្តៅ ខ្ពស់ជាងសីតុណ្ហភាពធម្មតានៅទូទាំងប្រទេស ដែលត្រូវបានជំរុញដោយលក្ខខណ្ឌអាកាសធាតុ បាតុភូត អែលនីញ៉ូ(El Nino) ។កាលពីឆ្នាំមុន ប្រទេសកាណាដា បានទប់ទល់ទៅនឹងរដូវកាលចំហេះព្រៃដ៏អាក្រក់បំផុតមិនធ្លាប់មានដោយមានចំហេះព្រៃជាង ៦.៦០០កន្លែង បានឆាបឆេះលើផ្ទៃដី ១៥ លានហិកតា បណ្តាលឲ្យអ្នកពន្លត់អគ្គិភ័យ ៨ នាក់ស្លាប់ ហើយមនុស្ស ២៣០.០០០នាក់ ត្រូវបានជម្លៀសខ្លួនចេញពីលំនៅឋានរបស់ពួកគេ។រដូវរងានេះ ប្រទេសកាណាដា បានជួបប្រទះសីតុណ្ហភាពក្តៅជាងធម្មតា និងគ្រោះរាំងស្ងួតរាលដាល ដែលនេះជាដំណាក់កាលសម្រាប់រដូវក្តៅមួយផ្សេងទៀត។ រដ្ឋមន្ត្រីសហព័ន្ធ បានព្រមានថា បម្រែបម្រួលអាកាសធាតុ បានរួមចំណែកដល់ព្រឹត្តិការណ៍អាកាសធាតុធ្ងន់ធ្ងរបន្ថែមទៀត រួមមានចំហេះព្រៃ គ្រោះរាំងស្ងួត និងរលកកម្តៅ។ទីក្រុង Ottawa កំពុងផ្តល់ទឹកប្រាក់ចំនួន ១៨៧,១៥ លានដុល្លារ ក្នុងរយៈពេល ៥ឆ្នាំ ដើម្បីផ្តល់មូលនិធិដល់ឧបករណ៍ថ្មីៗ និងបានសន្យាបណ្តុះបណ្តាលក្រុមអ្នកពន្លត់ចំហេះព្រៃនៅតាមសហគមន៍បន្ថែមចំនួន ១.០០០នាក់។កាលពីឆ្នាំមុន ប្រទេសកាណាដា បានដាក់ពង្រាយអ្នកពន្លត់អគ្គិភ័យអន្តរជាតិចំនួន ៥.៥០០ នាក់ មកពីប្រទេសនានារួមមានអាហ្រ្វិកខាងត្បូង និងអេស្បាញ និងសមាជិកកងកម្លាំងប្រដាប់អាវុធ ២.១៣៥ នាក់ ដើម្បីជួយពន្លត់ចំហេះព្រៃ។យោងតាមការវិភាគរបស់រដ្ឋាភិបាលបានឱ្យដឹងថា អាកាសធាតុមិនអំណោយផលខ្លាំង រួមមានទាំងចំហេះព្រៃ បានបណ្តាលឱ្យមានការខូចខាតក្នុងថវិកាជាង ៣,១ ពាន់លានដុល្លារកាណាដា ក្នុងឆ្នាំ ២០២៣ ។

យោធាថៃ បង្កើនការល្បាតតាមព្រំដែនមីយ៉ាន់ម៉ា ខណៈការប៉ះទង្គិចនៅតែបន្ត

យោធារបស់ប្រទេសថៃ បានរឹតបន្តឹងសន្តិសុខកាលពីថ្ងៃពុធ (១០ មេសា) នៅតាមភូមិព្រំដែនភាគខាងលិចជាប់នឹងសហភាពមីយ៉ាន់ម៉ា ជាទីដែលក្រុមឧទ្ទាមប្រឆាំងរបបសឹក បានបន្តប៉ះទង្គិចជាមួយយោធាទន់ខ្សោយ ដែលបានរងបរាជ័យជាបន្តបន្ទាប់នៅក្នុងតំបន់ជួរមុខ។អ្នកស្រុកចំនួនបួននាក់បាននិយាយថា រថយន្តរបស់កងទ័ពថៃជាច្រើនគ្រឿងដែលបំពាក់ដោយកាំភ្លើងយន្តលើដំបូល បានយាមល្បាតតាមដងផ្លូវនៃទីក្រុង មេសុត (Mae Sot) ខណៈសំឡេងនៃការផ្ទុះ និងការប្រយុទ្ធគ្នាយ៉ាងខ្លាំងបានបន្លឺឡើងឆ្លងព្រំដែនពីក្នុងសហគមន៍ ម៉យ៉ាវ៉ាឌី (Myawaddy)។មេបញ្ជាការយោធាថៃ ពីររូបបានប្រាប់ប្រព័ន្ធផ្សព្វផ្សាយក្នុងស្រុកថា ការប្រយុទ្ធគ្នាកំពុងបន្តនៅជុំវិញសហគមន៍ ម៉យ៉ាវ៉ាឌី ដែលជាទីតាំងពាណិជ្ជកម្មដ៏សំខាន់មួយដែលត្រូវបានវាយប្រហារដោយសហភាពជាតិ ការ៉ែន (KNU) និងក្រុមសម្ព័ន្ធមិត្តប្រឆាំងរបបសឹក។យោធាមីយ៉ាន់ម៉ា ដែលបានឡើងកាន់អំណាចក្នុងរដ្ឋប្រហារឆ្នាំ២០២១ បន្ទាប់ពីទម្លាក់រដ្ឋាភិបាលស៊ីវិលជាប់ឆ្នោត បានប្រឈមមុខនឹងការបរាជ័យជាបន្តបន្ទាប់ប្រឆាំងនឹងសម្ព័ន្ធភាពនៃក្រុមឧទ្ទាមជនជាតិភាគតិច និងចលនាកងជីវពលស៊ីវិល៕

កងកម្លាំងរុស្ស៊ី បើកការវាយប្រហារយ៉ាងខ្លាំងក្លានៅភាគខាងត្បូង និងភាគខាងជើងអ៊ុយក្រែន

ក្រុមមន្ត្រីអ៊ុយក្រែនបាននិយាយថា កងកម្លាំងរុស្ស៊ីបានបើកការវាយប្រហារយ៉ាងបង្ហូរឈាម និងខ្លាំងក្លាកាលពីថ្ងៃពុធ(១០ មេសា) លើគោលដៅជាញឹកញាប់នៅភាគខាងត្បូង និងខាងជើងអ៊ុយក្រែន ក្នុងតំបន់ ខាកូវ (Kharkov) និងក្រុងកំពង់ផែ អូដេសា (Odesa) ដោយបានសម្លាប់មនុស្សប្រាំពីរនាក់ និងជាច្រើននាក់ទៀតរងរបួស។ អភិបាលតំបន់ លោក អូលេ ឃីភើ (Oleh Kiper) បាននិយាយថា នៅក្នុងតំបន់ អូដេសា ភាគខាងត្បូង ការវាយប្រហារដោយមីស៊ីលនៅពេលល្ងាចបានសម្លាប់មនុស្ស ៤ នាក់ រួមទាំងក្មេងស្រីអាយុ ១០ ឆ្នាំម្នាក់ ហើយមនុស្ស ១៤ នាក់ទៀតរងរបួស។លោក អូលេ ស៊ីនេហ៊ូបូវ (Oleh Synehubov) អភិបាលតំបន់ខាគីវ (Kharkiv) ដែលក៏ត្រូវបានគេស្គាល់ថាឈ្មោះតំបន់ ខាកូវ បាននិយាយថា នៅតំបន់ភាគឦសាន ដែលទទួលរងការវាយប្រហារកាន់តែខ្លាំងពីរុស្ស៊ីលើទីក្រុង និងទីតាំងថាមពលក្នុងប៉ុន្មានសប្តាហ៍ថ្មីៗនេះ មានការវាយប្រហារលើឱសថស្ថានបានសម្លាប់ក្មេងស្រីអាយុ ១៤ ឆ្នាំម្នាក់ និងស្ត្រីពីរនាក់នៅក្នុងភូមិ លីបស៊ី (Lyptsi)។ប្រធានាធិបតីអ៊ុយក្រែន លោក វ៉្លូឌីមី ហ៊្សេឡិនស្គី (Volodymyr Zelenskiy) បានរិះគន់ការស្លាប់ដ៏ច្រើននោះ នៅក្នុងសុន្ទរកថាវីដេអូពេលយប់របស់ខ្លួនដោយនិយាយថា «ភេរវកម្មរុស្ស៊ី នៅតែបន្តទាំងថ្ងៃទាំងយប់ទាំងនៅព្រំដែន និងនៅតំបន់ជួរមុខរបស់យើង»។ នៅខាងព្រំដែនរុស្ស៊ីវិញ លោក រ៉ូម៉ាន ស្តារ៉ូវ៉ូត (Roman Starovoyt) អភិបាលតំបន់ ឃើស្ក៍ (Kursk) បាននិយាយថា មនុស្ស ៣ នាក់ដែលក្នុងនោះ ២ នាក់ជាកុមារ ត្រូវបានសម្លាប់នៅក្នុងការវាយប្រហារដោយយានដ្រូនរបស់អ៊ុយក្រែនលើរថយន្តមួយគ្រឿង៕

ទឹកជំនន់បន្តលេបត្របាក់រុស្ស៊ី និងកាហ្សាក់ស្ថាន ខណៈមនុស្សប្រហែល ១១ ម៉ឺននាក់ត្រូវបង្ខំជម្លៀសខ្លួន

ទឹកជំនន់បានបន្តលេបត្របាក់ទីក្រុង និងទីប្រជុំជននានាទូទាំងប្រទេសរុស្ស៊ី និងកាហ្សាក់ស្ថាន កាលពីថ្ងៃពុធ (១០ មេសា) បន្ទាប់ពីទន្លេដែលវែងជាងគេទីបីរបស់អឺរ៉ុប បានបាក់ច្រាំងបង្កជាទឹកជំនន់ធ្ងន់ធ្ងរ ដោយបង្ខំមនុស្សប្រហែល ១១០.០០០ នាក់ឱ្យជម្លៀសខ្លួនចេញពីលំនៅឋាន និងបង្កការជន់លិចផ្នែកជាច្រើននៃទីក្រុង អូរិនប៊ឺក (Orenburg) របស់រុស្ស៊ី។ទឹកជំនន់ពីការរលាយទឹកកកនេះ បានគ្របដណ្ដប់លើការតាំងទីលំនៅជាច្រើននៅតំបន់ភ្នំ អ៊ូរ៉ល់ (Ural) ស៊ីបេរី (Siberia) វ៉ុលហ្កា (Volga) របស់ប្រទេសរុស្ស៊ី និងតំបន់ជាច្រើននៃប្រទេសកាហ្សាក់ស្ថាន បន្ទាប់ពីកម្ពស់ទឹកពីទន្លេសំខាន់ៗដូចជាទន្លេ អ៊ូរ៉ល់ ដែលហូរចូលទៅក្នុងសមុទ្រកាសព្យែន បានកើនឡើងលើសពី ៧០ សង់ទីម៉ែត្រ ដែលហួសពីចំណុចផ្ទុះរបស់វារហូតដល់ជាង ១០ ម៉ែត្រ។នៅទីក្រុង អូរិនប៊ឺក ដែលជាទីក្រុងមានប្រជាជនចំនួន ៥៥០.០០០ នាក់ ចម្ងាយប្រហែល ១.២០០ គីឡូម៉ែត្រភាគខាងកើតទីក្រុងមូស្គូ លំនៅឋានរាប់រយខ្នងត្រូវបានជន់លិច ហើយយ៉ាងហោចណាស់មនុស្ស ៧.៧០០ នាក់ត្រូវបានជម្លៀសចេញ ខណៈដែលទឹកទន្លេ អ៊ូរ៉ល់ បានកើនឡើងយ៉ាងលឿនហួសពីកម្រិតធ្ងន់ធ្ងរ ហើយតំបន់ទាំងមូលនៃទីក្រុងនេះស្ថិតនៅក្រោមទឹក។នៅប្រទេសកាហ្សាក់ស្ថាន ភាពអាសន្ននៅតែមានជាធរមាននៅក្នុងខេត្តចំនួនប្រាំបីនៃខេត្តទាំង ១៧ របស់ប្រទេស។ ក្រុមមន្ត្រីកាហ្សាក់ស្ថានបាននិយាយថា ទឹកជំនន់ភាគច្រើនបានហូរមកពីប្រទេសរុស្ស៊ី ខណៈមានទន្លេជាច្រើនដែលហូរក្នុងទិសដៅរវាងប្រទេសទាំងពីរ ដែលមានព្រំប្រទល់ដីគោកវែងជាងគេលើពិភពលោក៕

អ៊ីស្រាអែល នឹងបើកច្រកឆ្លងកាត់ថ្មីនៅភាគខាងជើងហ្កាហ្សា សម្រាប់ជំនួយពីក្រៅប្រទេស

រដ្ឋមន្ត្រីការពារជាតិអ៊ីស្រាអែល លោក យ៉ាវ ហ្កាឡាន់ (Yoav Gallant) បាននិយាយកាលពីថ្ងៃពុធ (១០ មេសា) ថាអ៊ីស្រាអែល នឹងបើកច្រកផ្លូវឆ្លងកាត់ជើងគោកថ្មីមួយចូលទៅក្នុងតំបន់ហ្កាហ្សាស្ទ្រីប ដែលត្រូវបានធ្វើឡើងជាចម្បងដើម្បីជួយសម្រួលដល់ការបញ្ជូនជំនួយដល់ប៉ាឡេស្ទីនពីក្រៅប្រទេស ឬប្រទេសជិតខាងហ្ស៊កដានី។បន្ទាប់ពីការវាយប្រហារឆ្លងព្រំដែនដោយក្រុមអ៊ីស្លាមហាម៉ាស ដែលកំពុងកាន់អំណាចនៅហ្កាហ្សា កាលពីថ្ងៃទី០៧ ខែតុលា អ៊ីស្រាអែលបានធ្វើសង្គ្រាម និងកាត់ផ្តាច់ការផ្គត់ផ្គង់ដែលចេញពី ឬឆ្លងកាត់ទឹកដីរបស់ខ្លួនទៅកាន់តំបន់ឆ្នេរហ៊ុមព័ទ្ធដ៏ក្រីក្រនេះ។វិបត្តិមនុស្សធម៌ដែលកំពុងកើនឡើង បានទាក់ទាញសម្ពាធដាក់លើអ៊ីស្រាអែល ពីបណ្ដាដៃគូលោកខាងលិច និងអារ៉ាប់ ក្នុងការរុញអ៊ីស្រាអែលឱ្យធ្វើបន្ថែមទៀតដើម្បីជួយសម្រួលដល់ការចូលនៃជំនួយ បន្ទាប់ពីជាច្រើនខែដែលខ្លួនបានព្យាយាមរុញបន្ទុកនេះទៅឱ្យអេហ្ស៊ីប ដែលក៏មានព្រំដែនជាប់ជាមួយហ្កាហ្សាផងដែរ។លោក ហ្កាឡាន់ បាននិយាយថា ចំណុចឆ្លងកាត់ថ្មីនេះនឹងជំរុញការបញ្ជូនជំនួយជើងគោកពីហ្ស៊កដានី ទៅកាន់ភាគខាងកើតអ៊ីស្រាអែល។ អ៊ីស្រាអែលក៏បានជួយបង្កើតច្រករបៀងសមុទ្រសម្រាប់ការបញ្ជូនជំនួយដោយផ្ទាល់ទៅកាន់តំបន់ហ្កាហ្សាតាមសមុទ្រ និងបានបើកដែនអាកាសរបស់ខ្លួនដល់យន្តហោះបរទេសដែលបានទម្លាក់ជំនួយតាមឆ័ត្រយោងជាច្រើនតោនសម្រាប់ប្រជាជនប៉ាឡេស្ទីន៕

កូនប្រុសបីនាក់របស់មេដឹកនាំក្រុមហាម៉ាស ត្រូវបានសម្លាប់ក្នុងការវាយប្រហារតាមអាកាសរបស់អ៊ីស្រាអែល

ក្រុមអ៊ីស្លាមនិយមប៉ាឡេស្ទីន និងក្រុមគ្រួសាររបស់លោក Haniyeh បាននិយាយថា កូនប្រុសបីនាក់របស់មេដឹកនាំក្រុមហាម៉ាស លោក អ៊ីស្មាល ហានីយ៉េ(Ismail Haniyeh) ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលនៅតំបន់ហ្កាហ្សា កាលពីថ្ងៃពុធ ទី១០ ខែមេសា។ យោធាអ៊ីស្រាអែល បានអះអាងពីការអនុវត្តន៍ការវាយប្រហារនេះ ដោយចាត់ទុកកូនប្រុសទាំងបីនាក់នេះ ថាស្ថិតនៅក្នុងប្រតិបត្តិការនៃស្លាបប្រដាប់អាវុធរបស់ក្រុមហាម៉ាស។ក្រុមហាម៉ាសនិយាយថា កូនប្រុសទាំងបីនាក់មានឈ្មោះ ហាហ្សេម(Hazem), អាមៀ(Amir) និង ម៉ូហាម៉ាត(Mohammad) ត្រូវបានសម្លាប់នៅពេលដែលរថយន្តដែលពួកគេកំពុងបើកបរ ត្រូវបានបំផ្ទុះនៅក្នុងជំរំ Al-Shati តំបន់ហ្កាហ្សា។ ចៅៗរបស់លោក Haniyeh បួននាក់ ចៅស្រី៣នាក់ និងចៅប្រុសម្នាក់ ក៏ត្រូវបានសម្លាប់នៅក្នុងការវាយប្រហារនេះដែរ។ លោក Haniyeh ដែលស្ថិតនៅបរទេសក្នុងប្រទេសកាតា ជាអ្នកដែលតឹងរ៉ឹងក្នុងផ្នែកការទូតអន្តរជាតិរបស់ក្រុមហាម៉ាស ខណៈសង្រ្គាមជាមួយអ៊ីស្រាអែល បានផ្ទុះឡើងនៅតំបន់ហ្កាហ្សា ជាកន្លែងដែលលំនៅឋានគ្រួសាររបស់លោកត្រូវបានបំផ្លាញនៅក្នុងការវាយប្រហារតាមអាកាសរបស់អ៊ីស្រាអែល កាលពីខែវិច្ឆិកា។ យោងតាមសាច់ញាតិបានឱ្យដឹងថា កូនប្រុសទាំងបី និងចៅៗបួននាក់ បានទៅលេងគ្រួសារក្នុងថ្ងៃដំបូងនៃពិធីបុណ្យ Eid al-Fitr របស់ពលរដ្ឋមូស្លីមនៅតំបន់ Shati ជាជំរំជនភៀសខ្លួននៅក្នុងទីក្រុងហ្កាហ្សា ។ក្រុមហាម៉ាស បាននិយាយកាលពីថ្ងៃអង្គារថា ខ្លួនកំពុងសិក្សាសំណើបទឈប់បាញ់របស់អ៊ីស្រាអែលក្នុងសង្គ្រាមនៅហ្កាហ្សារយៈពេលជាងប្រាំមួយខែមកនេះ ប៉ុន្តែបាននិយាយថា វាពុំមានភាពរីកចម្រើនអ្វីនោះទេ ហើយក៏ពុំបានបំពេញតាមការទាមទារណាមួយរបស់ប៉ាឡេស្ទីននោះដែរ។ នៅក្នុងខែទីប្រាំពីរនៃសង្រ្គាម ដែលការវាយលុកតាមអាកាសនិងជើងគោករបស់អ៊ីស្រាអែល បានបំផ្លិចបំផ្លាញតំបន់ហ្កាហ្សា ក្រុមហាម៉ាសមានបំណងឲ្យបញ្ចប់ប្រតិបត្តិការយោធារបស់អ៊ីស្រាអែល និងការដកកងទ័ពចេញពីតំបន់ហ៊ុមព័ទ្ធមួយនេះ និងអនុញ្ញាតឱ្យប្រជាជនភៀសខ្លួនប៉ាឡេស្ទីនត្រឡប់ទៅលំនៅឋានវិញ។

បណ្ដាញសង្គម

ព័ត៌មានថ្មីៗ

អ៊ីរ៉ង់ព្រមានថា សង្គ្រាមអាចរាលដាល «កាន់តែធំទូលាយ» បើសហរដ្ឋអាមេរិកបើក «ប្រតិបត្តិការយោធាថ្មី»

ប្រធានាធិបតីប៉ូឡូញប្រកាសពីការរំលោភសណ្តាប់ធ្នាប់រដ្ឋធម្មនុញ្ញ ក្រោយការប្រឈមមុខដាក់គ្នា ជុំវិញបញ្ហាតុលាការ

ជនជាតិប៉ាឡេស្ទីននៅបន្តស្លាប់ ខណៈអ៊ីស្រាអែលនៅបន្តរំលោភកិច្ចព្រមព្រៀងបទឈប់បាញ់ នៅហ្កាហ្សា

ការហោះរបស់យន្តហោះ Air Force One ពីលើសេតវិមាន សម្រាប់បុណ្យ Halloween នាំឱ្យមានការពន្យារជើងហោះហើរ

ក្រុមចម្រុះដឹកនាំដោយអារ៉ាប៊ីសាអ៊ូឌីត៖ យានដ្រូន ១គ្រឿង ត្រូវបានស្ទាក់ចាប់ នៅលើតំបន់ Riyadh

ការបាញ់ប្រហារ នៅហាងសម្ភារៈបុណ្យ Halloween ក្នុងរដ្ឋ California បណ្តាលឱ្យមនុស្សម្នាក់ស្លាប់ និង ៦នាក់រងរបួស

សម្តេចបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី បន្តផ្ដល់អំណោយប្រចាំខែប្រគល់ជូនមណ្ឌលមែកឈើ និងឧបត្ថម្ភស៊ីម៉ង់ត៍ ១០ តោនបន្ថែម

កូរ៉េខាងជើងអះអាងថា ទណ្ឌកម្មមិនអាចកែប្រែឋានៈរបស់ខ្លួន ក្នុងនាមជារដ្ឋមានអាវុធនុយក្លេអ៊ែរនោះទេ

គណបក្សប្រឆាំង នៅប៉ូឡូញ អំពាវនាវឱ្យមានការតវ៉ានៅខាងក្រៅតុលាការធម្មនុញ្ញ ក្នុងទីក្រុងវ៉ាសូវី

របាយការណ៍៖ លោក Trump អាចនឹងបញ្ជាឱ្យវាយប្រហារអ៊ីរ៉ង់ទ្រង់ទ្រាយធំ បើបក្សសាធារណរដ្ឋចាញ់ឆ្នោត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877