BTV NEWS

ជនជាតិឥណ្ឌូនេស៊ី ២១នាក់ ពាក់ព័ន្ធនឹងការលួចឆ្លងដែន ស្នាក់នៅ និងធ្វើការងារខុសច្បាប់ ត្រូវបានបណ្ដេញចេញពីកម្ពុជា

ជនជាតិឥណ្ឌូនេស៊ី ៧២នាក់ ពាក់ព័ន្ធនឹងOnline Scams ត្រូវបានបណ្ដេញចេញពីកម្ពុជា

ក្រសួងសន្តិសុខសាធារណៈចិន ចុះពិនិត្យទីតាំងធ្លាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យានៅតំបន់ OP ក្រុងបាវិត

ឧត្តមសេនីយ៍ឯក ជួន ណារិន្ទ ប្រកាសឲ្យអ្នកបើករថយន្ត Range Rover បង្កគ្រោះថ្នាក់ចរាចរណ៍ស្លាប់មនុស្សនៅខណ្ឌជ្រោយចង្វារ ចូលខ្លួនបន្ទាន់ មិនបាច់រកអន្តរាគមន៍ទេ

សន្តិសុខ និង សង្គម

ក្រុមអ្នកតវ៉ាក្នុងទីក្រុង ហ្ស៊េរ៉ុយសាឡឹម ប៉ះទង្គិចជាមួយនគរបាល ខណៈអំពាវនាវឲ្យដោះលែងចំណាប់ថ្នូរ

ការប៉ះទង្គិចគ្នា បានកើតឡើង នៅក្នុងទីក្រុងហ្ស៊េរ៉ុយសាឡឹម(Jerusalem)កាលពីថ្ងៃចន្ទទី១៩ខែកុម្ភៈ ខណៈក្រុមបាតុករប្រឆាំងរដ្ឋាភិបាលអ៊ីស្រាអែល បានដើរក្បួនទៅកាន់គេហដ្ឋានរបស់លោកនាយករដ្ឋមន្ត្រី Benjamin Netanyahu ក្រោយចាកចេញពីអគាររដ្ឋសភា។មនុស្សរាប់ពាន់នាក់បានចូលរួមការតវ៉ា អំពាវនាវឲ្យរដ្ឋាភិបាលពន្លឿនកិច្ចព្រមព្រៀងដោះលែងដំណាប់ថ្នូរឲ្យវិលត្រឡប់មកផ្ទះវិញ ដែលកំពុងស្ថិតក្នុងកណ្ដាប់ដៃក្រុមហាម៉ាសនៅក្នុងតំបន់ហ្កាហ្សានៅឡើយ។ អ្នកតវ៉ាម្នាក់ឈ្មោះលីរ៉ុន ប្រេតស៍ (Liron Pretz) បាននិយាយថា ពេលនេះ យើងកំពុងឈប់ហើយ យើងកំពុងប្រាប់រដ្ឋាភិបាលរបស់យើងថា សូមបញ្ឈប់ទៅ មានកិច្ចព្រមព្រៀងទៅ គ្មានឱកាសទៀតទេ គ្មាននាទីចុងក្រោយមួយទៀតទេ ហើយក៏គ្មាននាទី ទី២ដែរ។ ក្រុមអ្នកតវ៉ាបានអំពាវនាវឲ្យមានការរៀបចំការបោះឆ្នោតបន្ទាន់នៅក្នុងប្រទេសអ៊ីស្រាអែល និងបាននិយាយថា រដ្ឋាភិបាលគិតតែប្រយោជន៍ខ្លួនឯង។ ក្រុមបាតុការមួយចំនួនបានដុតភ្លើង ខណៈដែលអ្នកផ្សេងទៀត ស្រែកច្រៀងចម្រៀងស្នេហាជាតិ និងលើកបដាប្រឆាំងនឹងលោក Netanyahu។ ប៉ុន្តែលោក Netanyahu បានច្រានចោលការបោះឆ្នោតមុនអាណត្តិ ខណៈក្រុមអ្នកតវ៉ា អំពាវនាវឲ្យលោកលាលែងពីតំណែង។មនុស្សជិត៣ម៉ឺននាក់បានស្លាប់នៅក្នុងការវាយលុកឥតឈប់ឈររបស់អ៊ីស្រាអែលនៅក្នុងតំបន់ ហ្កាហ្សា ក្រោយអ៊ីស្រាអែល វាយសងសឹកលើក្រុមហាម៉ាស ដែលបានបើកការវាយប្រហារដ៏សាហាវកាលពីថ្ងៃទី៧ខែតុលា សម្លាប់ពលរដ្ឋអ៊ីស្រាអែលប្រមាណ ១.២០០នាក់ និងចាប់មនុស្សជាង២៥០នាក់ជាចំណាប់ថ្នូរចូលទៅក្នុងតំបន់ហ្កាហ្សា៕

អាជ្ញាធរខណ្ឌទួលគោក ទុកពេល៧ថ្ងៃឱ្យបញ្ឈប់ការលក់ដូរលើចិញ្ចើមផ្លូវម៉ៅសេងទុង

អាជ្ញាធរខណ្ឌទួលគោក បានដាក់ឱសានវាទ ត្រឹមរយៈពេល៧ថ្ងៃ គិតចាប់ពីថ្ងៃទី១៩ កុម្ភៈ ឆ្នាំ២០២៤នេះ រហូតដល់គម្រប់១សប្តាហ៍ ដោយមិនបន្តឱ្យមានការយកចំណី ឬចិញ្ចើមផ្លូវលេខ ២៤៥ ( មហាវិថីម៉ៅសេងទុង ) ធ្វើជាទីតាំងសម្រាប់អាជីវកម្មលក់ដូរបន្តទៀតនោះឡើយ ក្នុងករណីដែលពលរដ្ឋជាម្ចាស់ទីតាំង មិនមានការចូលរួមនោះ អាជ្ញាធរនឹងមានវិធានការរដ្ឋបាល ។ លោក ស៊ឹប សុផង់ អភិបាលរងខណ្ឌទួលគោក ទទួលបន្ទុកកិច្ចការងារសណ្តាប់ធ្នាប់សាធារណៈ បានប្រាប់ BTV ឱ្យដឹងថា ក្រុមការងារអាជ្ញាធរ បានចុះគូសគំនូសដើម្បីជាការកំណត់ចំណាំឱ្យប្រជាពលរដ្ឋលក់ដូរ បានដឹងពីចំណុចដែលត្រូវបានហាមឃាត់មិនឱ្យលក់ដូរហួសចូលមកចិញ្ចើមផ្លូវ ។ ក្នុងនោះដែរអាជ្ញាធរ បានចុះតាមលំនៅឋានពលរដ្ឋទាំងអស់ នៅប្របសងខាងផ្លូវលេខ២៤៥ ( មហាវិថីម៉ៅសេងទុង ) ដោយបានជូនលិខិតជូនដំណឹងរបស់រដ្ឋបាលខណ្ឌជូនពួកគាត់ និងបានពន្យល់ណែនាំដោយផ្ទាល់មាត់បន្ថែមផង ឱ្យពួកគាត់បានយល់ដឹង នឹងចូលរួមគោរពឱ្យបានខ្ជាប់ខ្ជួន មុនពេលដែលអាជ្ញាធរឈានដល់វិធានការរដ្ឋបាល ដោយប្រើវិធានការក្តៅ នៅពេលឆាប់ៗខាងមុខនេះ ។ ពលរដ្ឋ ដែលមានលំនៅឋាននៅលើដងផ្លូវខាងលើ ក៏បានបង្ហាញអារម្មណ៍រីករាយ និងពេញចិត្តចំពោះការចូលរួមគោរព និងសហការជាមួយក្រុមការងារអាជ្ញាធរខណ្ឌ ដែលបានចុះរៀបចំសណ្តាប់ធ្នាប់ និងរបៀបរៀបរយសាធារណៈ ឱ្យមានភាពល្អប្រសើរឡើងនោះ ។គួរបញ្ជាក់ថា បញ្ហាសណ្តាប់ធ្នាប់របៀបរៀបរយ នៅលើមហាវិថីម៉ៅសេងទុង និងផ្លូវមួយចំនួនទៀត នៅក្បែរ និងជុំវិញផ្សារដើមគរ និងផ្សារនាគមាសជាដើម តែងត្រូវបានក្រុមការងារអាជ្ញាធរខណ្ឌមានវិធានការចុះរដ្ឋបាលរៀបចំជាបន្តបន្ទាប់មករហូត ប៉ុន្តែការរៀបចំកន្លងមក ហាក់នៅមិនទាន់ទទួលបានប្រសិទ្ធភាពល្អប្រសើរនៅឡើយទេ ខណៈការលក់ដូរយ៉ាងអានាធិបតេយ្យពាសពេញលើដងផ្លូវនៅតែបន្តឧស្សាហ៍កើតមាន ពិសេសនៅវេលាយប់ និងវេលាទាបភ្លឺ ៕ អត្ថបទ ៖ លីហេង

អ៊ីស្រាអែល នឹងបើកការវាយលុកក្រុងរ៉ាហ្វា បើចំណាប់ថ្នូរមិនត្រូវបានដោះលែងត្រឹមខែបុណ្យរ៉ាម៉ាដាន

រដ្ឋមន្ត្រីអ៊ីស្រាអែល លោក បេននី ហ្កាន់ស៍ (Benny Gantz) បាននិយាយកាលពីថ្ងៃអាទិត្យ (១៨ កុម្ភៈ) ថាអ៊ីស្រាអែល នឹងបើកការវាយលុកក្នុងក្រុងរ៉ាហ្វា (Rafah) នៃតំបន់ហ្កាហ្សា បើចំណាប់ថ្នូរដែលត្រូវបានចាប់ខ្លួនដោយក្រុមហាម៉ាស មិនត្រូវបានដោះលែងមកវិញត្រឹមខែតមអាហារមូស្លីមនៃបុណ្យរ៉ាម៉ាដាន ក្នុងពាក់កណ្ដាលខែមីនា។លោក ហ្កាន់ស៍ សមាជិកនៃគណៈរដ្ឋមន្ត្រីសង្គ្រាមរបស់អ៊ីស្រាអែល បានសន្យាថា យោធានឹងជួយសម្រួលដល់ការជម្លៀសជនស៊ីវិលហ្កហ្សា ក្នុងការសម្របសម្រួលជាមួយសហរដ្ឋអាមេរិក និងអេហ្ស៊ីប ដើម្បីកាត់បន្ថយចំនួនអ្នកស្លាប់ និងរបួស។ប្រជាជនប៉ាឡេស្ទីនប្រមាណមួយលាននាក់ ដែលរត់គេចពីការប្រយុទ្ធគ្នានៅតំបន់ហ្កាហ្សា បានភៀសខ្លួនទៅក្រុងរ៉ាហ្វា ភាគខាងត្បូងហ្កាហ្សា ជាប់ព្រំដែនប្រទេសអេហ្ស៊ីប។ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា ប្រតិបត្តិការជើងគោកនៅក្រុងរ៉ាហ្វា គឺចាំបាច់សម្រាប់ការលុបបំបាត់កងវរសេនាតូចដែលនៅសេសសល់របស់ក្រុមហាម៉ាស ហើយថាអ្នកដែលអំពាវនាវអ៊ីស្រាអែល មិនឱ្យប៉ះពាល់តំបន់នោះគឺជាការអំពាវនាវឱ្យអ៊ីស្រាអែលចាញ់សង្រ្គាម៕

សង្រ្គាមដែលកំពុងបន្តនៅតំបន់ហ្កាហ្សា បានសម្លាប់ជនជាតិប៉ាឡេស្ទីន ជិត ២.៩០០០ នាក់

ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយកាលពីថ្ងៃអាទិត្យ (១៨ កុម្ភៈ) ថាចំនួនអ្នកស្លាប់របស់ប៉ាឡេស្ទីន នៅតំបន់ហ្កាហ្សាស្ទ្រីប បានកើនឡើងដល់ ២៨.៩៨៥ នាក់។ នៅក្នុងសេចក្តីថ្លែងការណ៍មួយដែលបានផ្ញើទៅកាន់សារព័ត៌មានស៊ីនហួ ក្រសួងបាននិយាយថា ជនជាតិប៉ាឡេស្ទីនចំនួន ៦៨.៨៨៣ នាក់បានរងរបួសនៅក្នុងតំបន់ហ៊ុមព័ទ្ធមាត់សមុទ្រនេះ ចាប់តាំងពីការផ្ទុះឡើងនៃជម្លោះអ៊ីស្រាអែល និងក្រុមហាម៉ាស កាលពីថ្ងៃទី០៧ ខែតុលា ឆ្នាំ២០២៣ មក។ក្រសួងនេះបានបន្ថែមថា កងទ័ពអ៊ីស្រាអែលបានសម្លាប់ជនជាតិប៉ាឡេស្ទីន ១២៧ នាក់ និងបង្ករបួស ២០៥ នាក់ផ្សេងទៀតក្នុងអំឡុងពេល ២៤ ម៉ោងចុងក្រោយ។ ជនរងគ្រោះមួយចំនួននៅតែស្ថិតនៅក្រោមគំនរបាក់បែក ស្របពេលមានការទម្លាក់គ្រាប់បែកយ៉ាងធ្ងន់ធ្ងរ និងកង្វះផ្នែកការពារស៊ីវិល និងក្រុមរថយន្តគិលានសង្គ្រោះ។បន្ថែមពីលើនេះ សង្គមអឌ្ឍចន្ទក្រហមប៉ាឡេស្ទីនបាននិយាយថា មន្ទីរពេទ្យ អាល់អាម៉ាល់ (Al-Amal) ក្នុងទីក្រុង ខាន់ យូនីស (Khan Younis) ភាគខាងត្បូងតំបន់ហ្កាហ្សាស្រ្ទីប បានឃើញការវាយប្រហារដោយផ្ទាល់ជាច្រើនពីរថក្រោះអ៊ីស្រាអែល៕

អ៊ុយក្រែន៖ កងកម្លាំងរុស្ស៊ីស្លាប់ និងរបួសបុគ្គលិកជិត ៥០.០០០នាក់ នៅក្នុងទីក្រុង Avdiivka

មេបញ្ជាការយោធាអ៊ុយក្រែនម្នាក់បាននិយាយថា កងទ័ពរបស់លោក បានធ្វើឱ្យស្លាប់និងរងរបួសបុគ្គលិកកងកម្លាំងរុស្ស៊ីជិត ៥០.០០០នាក់ មុនពេលដកខ្លួនចេញពីទីក្រុងសំខាន់ជាយុទ្ធសាស្ត្រ Avdiivka។ ប៉ុន្តែសារព័ត៌មានអាមេរិកមួយ បានព្រមានពីបញ្ហាប្រឈមនានាដែលទាហានអ៊ុយក្រែនប្រឈមមុខ ក្នុងពេល ជំនួយយោធាពីសហរដ្ឋអាមេរិកជាប់គាំង។ មេបញ្ជាការអ៊ុយក្រែន លោក អូឡេកសានឌ័រ តាណាវស្គី(Oleksandr Tarnavskiy) បាននិយាយដូច្នេះទៅកាន់ប្រព័ន្ធផ្សព្វផ្សាយសង្គមកាលពីថ្ងៃអាទិត្យ មួយថ្ងៃបន្ទាប់ពីអ៊ុយក្រែនបានប្រកាសពីការសម្រេចចិត្តរបស់ខ្លួនក្នុងការដកកងទ័ពចេញពីទីក្រុង Avdiivka នៅតំបន់ភាគខាងកើតតំបន់ Donetsk ។ ក្រសួងការពារជាតិរុស្ស៊ី ក៏បានអះអាងថា បានគ្រប់គ្រងទីក្រុងនេះទាំងស្រុង។លោក Tarnavskiy បាននិយាយថា កងទ័ពរបស់លោក បានធ្វើឱ្យមនុស្សស្លាប់និងរងរបួសនៅខាងភាគីរុស្ស៊ី ក្នុងអំឡុងពេលប្រតិបត្តិការរបស់ពួកគេដើម្បីការពារទីក្រុង Avdiivka ចាប់តាំងពីខែតុលាឆ្នាំមុន។ លោកបាននិយាយថា ទាហានរបស់លោក បានបំផ្លាញរថក្រោះ ៣៦៤ គ្រឿង និងយន្តហោះ ៥ គ្រឿងរបស់កងកម្លាំងរុស្ស៊ីផងដែរ។ ទោះជាយ៉ាងណា អត្ថបទមួយដែលត្រូវបានចេញផ្សាយដោយសារព័ត៌មាន The New York Times បាននិយាយថា ការដួលរលំទីក្រុង Avdiivka អនុញ្ញាតឱ្យយោធារុស្ស៊ីចល័តកងទ័ព និងយុទ្ធោបករណ៍កាន់តែមានប្រសិទ្ធភាព នៅពីក្រោយសមរភូមិមុខ ខណៈខ្លួនវាយសម្រុកក្នុងទិសដៅដ៏ទៃទៀត។អត្ថបទសារព័ត៌មាននិយាយថា «នៅទូទាំងសមរភូមិមុខចម្ងាយ ៦០០ ម៉ាយស៍ អ៊ុយក្រែនខ្វះគ្រាប់រំសេវបើគ្មានជំនួយយោធាពីសហរដ្ឋអាមេរិកថ្មីនោះទេ ហើយអ៊ុយក្រែនក៏កំពុង តស៊ូដើម្បីបំពេញបន្ថែមកងកម្លាំងដែលបានបាត់បង់របស់ខ្លួន បន្ទាប់ពីការប្រយុទ្ធគ្នាខ្លាំងអស់រយៈពេលពីរឆ្នាំមកនេះ។ សារព័ត៌មាននេះ បានព្រមានថា កងកម្លាំងជើងគោកអ៊ុយក្រែន ប្រហែលជាស្ថិតក្នុងទីតាំងមានគ្រោះថ្នាក់បំផុតរបស់ពួកគេ ចាប់តាំងពីការចាប់ផ្តើមសង្រ្គាមមក។

មនុស្ស ៤នាក់ស្លាប់ រួមទាំងជនសង្ស័យ ក្នុងការបាញ់ប្រហារនៅរដ្ឋ Minnesota សហរដ្ឋអាមេរិក

ករណីហិង្សាក្នុងគ្រួសារនៅទីក្រុង ប៊ឺនស៍វីល (Burnsville) រដ្ឋ មីនីសូថា (Minnesota) សហរដ្ឋអាមេរិក បានប្រែក្លាយទៅជាការប្រឈមមុខដាក់គ្នាដោយប្រដាប់អាវុធដ៏បង្ហូរឈាមកាលពីថ្ងៃអាទិត្យ (១៨ កុម្ភៈ) នៅពេលដែលបុរសជនសង្ស័យម្នាក់បានបាញ់សម្លាប់មន្ត្រីនគរបាលក្រុង ប៊ឺនស៍វីល ពីរនាក់ និងគ្រូពេទ្យបឋមសង្រ្គោះម្នាក់។យោងតាមប្រព័ន្ធផ្សព្វផ្សាយក្នុងស្រុកបានឱ្យដឹងថា បុរសម្នាក់បានឃុំខ្លួនឯងនៅក្នុងផ្ទះជាមួយសមាជិកគ្រួសារកាលពីព្រឹកថ្ងៃអាទិត្យ។ ការប៉ះទង្គិចគ្នានេះបានកើនឡើងទៅជាការបាញ់ប្រហារគ្នាដោយបានសម្លាប់ក្រុមមន្រ្តីឆ្លើយតបដំបូងចំនួនបីនាក់ និងម្នាក់ទៀតរងរបួស។មន្ត្រីមូលដ្ឋានបានបញ្ជាក់ថា ជនសង្ស័យបានស្លាប់ ប៉ុន្តែមិនបានប្រាប់លម្អិតថាបុរសរូបនោះស្លាប់ដោយរបៀបណាទេ ហើយមិនមានសមាជិកគ្រួសារណាម្នាក់ដែលនៅក្នុងផ្ទះនោះទទួលរងគ្រោះថ្នាក់ទេ។មន្ត្រីនគរបាលរងគ្រោះទាំងនោះរួមមាន លោក ផល អេមស្រ្ទែន (Paul Elmstrand) វ័យ ២៧ ឆ្នាំ និងលោក ម៉ាធូ រ៉ុច (Matthew Ruge) វ័យ ២៧ ឆ្នាំ រួមជាមួយគ្រូពេទ្យបឋមខាងពន្លត់អគ្គិភ័យ ឈ្មោះ អាដាម ហ្វីនសេត (Adam Finseth) វ័យ ៤០ ឆ្នាំត្រូវបានសម្លាប់។ មន្ត្រីពលបាលម្នាក់ទៀតឈ្មោះ អាដាម ម៉េដលីខុត (Adam Medlicott) ត្រូវបានគេបញ្ជូនទៅមន្ទីរពេទ្យដោយមិនមានរបួសគំរាមកំហែងដល់អាយុជីវិតទេ៕

យោធានិយាយថា អាមេរិក បានវាយប្រហារស្វ័យការពារចំនួនប្រាំលើក នៅក្នុងតំបន់គ្រប់គ្រងដោយក្រុមហ៊ូទីនៅយេម៉ែន

ទីបញ្ជាការកណ្តាលរបស់សហរដ្ឋអាមេរិក បាននិយាយកាលពីថ្ងៃអាទិត្យថា សហរដ្ឋអាមេរិក បានវាយប្រហារស្វ័យការពារខ្លួនចំនួនប្រាំលើក នៅក្នុងតំបន់ជាច្រើននៅប្រទេសយេម៉ែន ដែលគ្រប់គ្រងដោយកងជីវពលហ៊ូទី គាំទ្រដោយអ៊ីរ៉ង់។ ទីបញ្ជាការនិយាយថា ខ្លួនបានវាយប្រហារដោយមីស៊ីលតម្រង់គោលដៅប្រឆាំងនាវាចល័តចំនួនបីលើក នាវាក្រោមទឹកគ្មានមនុស្សបើកមួយលើក និងនាវាលើផ្ទៃទឹកគ្មានមនុស្សបើកមួយលើក កាលពីថ្ងៃសៅរ៍។ ទីបញ្ជាការកណ្តាលសហរដ្ឋអាមេរិក(CENTCOM) បាននិយាយនៅក្នុងការបង្ហោះនៅលើបណ្តាញ X ថា «នេះគឺជាការងាររបស់ក្រុមហ៊ូទី ដែលត្រូវបានគេសង្កេតឃើញជាលើកដំបូងនៃយានក្រោមទឹកគ្មានមនុស្សបើក(UUV) ចាប់តាំងពីការវាយប្រហារបានចាប់ផ្តើមនៅថ្ងៃទី២៣ ខែតុលា។ ទីបញ្ជាការ បាននិយាយថាខ្លួន បានកំណត់មីស៊ីល និងនាវា ដែលបានបង្ហាញការគំរាមភ្លាមៗ ចំពោះនាវាកងទ័ពជើងទឹកសហរដ្ឋអាមេរិក និងនាវាពាណិជ្ជកម្ម នៅក្នុងតំបន់។ការវាយប្រហាររបស់ក្រុមហ៊ូទី នៅតំបន់សមុទ្រក្រហម គឺជាសញ្ញាមួយនៃការរីករាលដាលជម្លោះនៅមជ្ឈិមបូព៌ា ចាប់តាំងពីសង្គ្រាមផ្ទុះឡើងរវាងអ៊ីស្រាអែល និងក្រុមហាម៉ាស បន្ទាប់ពីការវាយប្រហារដ៏ឃោឃៅរបស់ក្រុមសកម្មប្រយុទ្ធប៉ាឡេស្ទីន មកលើអ៊ីស្រាអែល កាលពីថ្ងៃទី ៧ ខែតុលា។ ក្រុមហ៊ូទី ដែលគ្រប់គ្រងផ្នែកមានប្រជាជនរស់នៅច្រើនបំផុតនៅប្រទេសយេម៉ែន និយាយថា ការវាយប្រហាររបស់ពួកគេមានសាមគ្គីភាពជាមួយពលរដ្ឋប៉ាឡេស្ទីន ខណៈអ៊ីស្រាអែលវាយប្រហារតំបន់ហ្កាហ្សា។ ប៉ុន្តែសហរដ្ឋអាមេរិក និងសម្ព័ន្ធមិត្ត ចាត់ទុកពួកគេថាជាការវាយប្រហារមិនរើសអើង និងជាការគំរាមកំហែងដល់ពាណិជ្ជកម្មពិភពលោក។ ដោយប្រឈមមុខទៅនឹងអំពើហឹង្សានៅសមុទ្រក្រហម បណ្តាញដឹកជញ្ជូនសំខាន់ៗភាគច្រើន បានបោះបង់ចោលផ្លូវពាណិជ្ជកម្មដ៏សំខាន់នេះ ហើយងាកទៅរកផ្លូវដ៏វែងឆ្ងាយជាងនៅជុំវិញទ្វីបអាហ្រ្វិក។ បញ្ហានេះ បានបង្កើនការចំណាយ ដែលធ្វើឲ្យមានការព្រួយបារម្ភអំពីអតិផរណាពិភពលោក។

ផែនការទាហានកាតព្វកិច្ចរបស់មីយ៉ាន់ម៉ា បង្ហាញពីចំនួនការស្លាប់ដ៏ច្រើននៃអ្នកប្រយុទ្ធប្រឆាំងក្រុមឧទ្ទាម

ក្រុមអ្នកវិភាគ និងអ្នកការទូតបាននិយាយថា ផែនការយោធាកាតព្វកិច្ចរបស់មីយ៉ាន់ម៉ា បង្ហាញពីចំនួនការស្លាប់ដ៏ច្រើនក្នុងការប្រយុទ្ធមិនឈប់ឈរជាច្រើនខែប្រឆាំងនឹងពួកឧទ្ទាម បានកើតមានលើកងទ័ពរបស់ខ្លួន និងឧបសគ្គដែលក្រុមមេទ័ពកំពុងប្រឈមមុខដើម្បីបំពេញបន្ថែមជួរទាហានរបស់ពួកគេ។ផែនការទាហានកាតព្វកិច្ចដែលត្រូវបានប្រកាសក្នុងសប្តាហ៍នេះ កើតឡើងបន្ទាប់ពីរបបសឹកបាត់បង់ការគ្រប់គ្រងលើទឹកដីជាច្រើននៅតាមបណ្តោយខ្សែបន្ទាត់សមរភូមិជួរមុខ ដែលលាតសន្ធឹងពីតំបន់ខ្ពង់រាបជាប់ព្រំដែនប្រទេសចិន ទៅកាន់ឆ្នេរសមុទ្រក្បែរប្រទេសបង់ក្លាដែស។លោក រីឆាត ហ័រស៊ី (Richard Horsey) ទីប្រឹក្សាជាន់ខ្ពស់មីយ៉ាន់ម៉ារបស់ក្រុងប្រឆាំងវិបត្តិ បាននិយាយថា «យោធាកំពុងប្រឈមមុខនឹងការខ្វះខាតកម្លាំងយោធាយ៉ាងខ្លាំង ដោយនោះជាមូលហេតុដែលខ្លួនកំពុងណែនាំសេចក្តីព្រាងយោធាថ្មីនេះជាលើកដំបូងនៅក្នុងប្រវត្តិសាស្ត្ររបស់ខ្លួន»។យោធាមីយ៉ាន់ម៉ា បាននិងកំពុងប្រយុទ្ធប្រឆាំងនឹងការតស៊ូប្រដាប់អាវុធដែលបានពង្រីកខ្លួន ចាប់តាំងពីរដ្ឋប្រហារឆ្នាំ២០២១ បានផ្តួលរំលំរដ្ឋាភិបាលជាប់ឆ្នោតតាមបែបប្រជាធិបតេយ្យរបស់លោកស្រី អ៊ុងសាន ស៊ូជី (Aung San Suu Kyi) ហើយរបបសឹកនេះបានហៅអ្នកតស៊ូប្រឆាំងទាំងនោះថាជា «ភេរវករ» ដោយស្ដីបន្ទោសពួកគេចំពោះការបំផ្លាញសន្តិភាព និងស្ថិរភាពរបស់សហភាពមីយ៉ាន់ម៉ា៕

ប្រជាជនប៉ាឡេស្ទីន នៅតំបន់វេសបែង រងផលវិបាកដ៏ធ្ងន់ធ្ងរ ដោយសារសង្គ្រាមហ្កាហ្សា

លោកកាម៉ាល់ ការ៉ាចា (Kamal Karaja) ធ្លាប់រកចំណូលបាន ៣.៥០០ ដុល្លារ (២,៧៨០ ផោន ឬ ៣,២៥០ ផោន) ក្នុងមួយខែធ្វើការនៅការដ្ឋានសំណង់ ក្នុងប្រទេសអ៊ីស្រាអែល ដែលជាការរស់នៅដ៏ល្អសម្រាប់ជនជាតិប៉ាឡេស្ទីន នៅតំបន់វេសបែង (West Bank) ដែលគ្រប់គ្រងដោយអ៊ីស្រាអែល។ប៉ុន្តែបន្ទាប់ពីការវាយលុករបស់ពួកហាម៉ាសលើអ៊ីស្រាអែលនៅថ្ងៃទី៧ ខែតុលា និងការសងសឹកដោយការវាយប្រហារតាមអាកាសរបស់អ៊ីស្រាអែល និងការឈ្លានពានដីនៅតំបន់ហ្កាហ្សាស្ទ្រីប លិខិរអនុញ្ញាតរបស់លោក ត្រូវបានលុបចោល។ អ៊ីស្រាអែល បានលើកឡើងពី «ការព្រួយបារម្ភផ្នែកសន្តិសុខ»។បុរសវ័យ៣២ឆ្នាំរូបនេះមកពីទីក្រុងឌា ប៊ីហ្ស៊ី (Deir Bzi) នៅខាងក្រៅទីក្រុងរ៉ាម៉ាឡា ( Ramallah) និយាយថា៖«ខ្ញុំបានរង់ចាំឲ្យសង្រ្គាមត្រូវបញ្ចប់ ប៉ុន្តែវានៅតែបន្ត»។«ខ្ញុំត្រូវលក់រថយន្ត ក្រោយពីសង្គ្រាមបានរយៈពេលមួយខែ ដោយសារបញ្ហាលុយលាក់»។អាជ្ញាធរប៉ាឡេស្ទីន (PA) និយាយថា កម្មករ ២០០.០០០នាក់ ត្រូវបានរងផលប៉ះពាល់ ដែលភាគច្រើននៅតំបន់វេសបែង។

តុលាការរុស្ស៊ី បានកាត់ទោសឲ្យជាប់ពន្ធនាគារ អ្នកកាន់ទុក្ខ លោក Navalny រាប់សិបនាក់

សេចក្តីប្រកាសរបស់តុលាការជាផ្លូវការ បានបង្ហាញថា តុលាការប្រទេសរុស្ស៊ី បានកាត់ទោសមនុស្សរាប់សិបនាក់ដែលត្រូវបានឃុំខ្លួន នៅក្នុងព្រឹត្តិការណ៍គោរពវិញ្ញាក្ខន្ធដល់អ្នករិះគន់វិមានក្រឹមឡាំង លោក អាឡិចសេ ណាវ៉ាលនី(Alexei Navalny) ឱ្យជាប់ពន្ធនាគាររយៈពេលខ្លី ដោយមនុស្ស១៥៤នាក់ត្រូវបានកាត់ទោស នៅក្នុងទីក្រុង Saint Petersburg តែមួយប៉ុណ្ណោះ។សេចក្តីលម្អិតនៃការចេញសេចក្តីសម្រេច ចេញផ្សាយដោយអង្គភាពតុលាការរបស់ទីក្រុង កាលពីថ្ងៃសៅរ៍ និងថ្ងៃអាទិត្យ បានបង្ហាញថា មនុស្សចំនួន ១៥៤នាក់ ត្រូវបានកាត់ទោសឱ្យជាប់ពន្ធនាគាររហូតដល់ ១៤ថ្ងៃ សម្រាប់ការបំពានច្បាប់ប្រឆាំងការតវ៉ាដ៏តឹងរ៉ឹងរបស់ប្រទេសរុស្ស៊ី។ ក្រុមសិទ្ធិមនុស្ស និងប្រព័ន្ធផ្សព្វផ្សាយឯករាជ្យ បានរាយការណ៍អំពីការកាត់ទោសស្រដៀងគ្នាមួយចំនួននៅក្នុងទីក្រុងផ្សេងៗទៀតនៅទូទាំងប្រទេស។អ្នករិះគន់វិមានក្រឹមឡាំងអាយុ ៤៧ឆ្នាំ បានស្លាប់កាលពីថ្ងៃសុក្រ នៅពន្ធនាគារទារុណកម្មនៅតំបន់អាកទិក ជាកន្លែងដែលលោកត្រូវបានឃុំខ្លួនពីបទចោទប្រកាន់ដែលត្រូវបានគេមើលឃើញយ៉ាងទូលំទូលាយថា ជាការដាក់ទោសសងសឹកចំពោះយុទ្ធនាការរបស់លោកប្រឆាំងប្រធានាធិបតី លោក Vladimir Putin ។ កាលពីចុងសប្តាហ៍ នគរបាលបានចាប់ខ្លួនពលរដ្ឋរុស្សីរាប់រយនាក់នៅក្នុងទីក្រុងជាច្រើនដែលបានមកដាក់ផ្កា និងដុតទៀនដើម្បីគោរព នៅក្នុងពិធីគោរពវិញ្ញាណក្ខន្ធដល់ជនរងគ្រោះ នៃការគាបសង្កត់ក្នុងសម័យស្តាលីន។បាតុកម្មប្រឆាំងវិមានក្រឹមឡាំង ឬការបង្ហាញជាសាធារណៈ អំពីការប្រឆាំងទៅនឹងរបបនេះ គឺខុសច្បាប់ នៅក្នុងប្រទេសរុស្ស៊ី ក្រោមច្បាប់រិះគន់យោធាដ៏តឹងរឹងនិងច្បាប់ប្រឆាំងការប្រមូលផ្តុំដែលពុំមានការអនុញ្ញាត។ នគរបាល និងក្រុមបុរសស្លៀកសំលៀកបំពាក់ធម្មតា បានដើរល្បាតនៅតាមទីក្រុងជាច្រើនក្នុងប្រទេសរុស្ស៊ី ជាកន្លែងដែលប្រជាជនបានមកប្រមូលផ្តុំគ្នាដើម្បីគោរពវិញ្ញាក្ខន្ធដល់ លោក Navalny កាលពីចុងសប្តាហ៍។

បណ្ដាញសង្គម

ព័ត៌មានថ្មីៗ

ក្រសួង ស្ថាប័ននានា ដាក់កម្រងផ្កាគោរពវិញ្ញាណក្ខន្ធវីរជននៅវិមានឯករាជ្យ និងព្រះបរមរូបសម្ដេចព្រះនរោត្តម សីហនុ ក្នុងឱកាសខួបលើកទី៧៣ នៃទិវាបុណ្យឯករាជ្យជាតិ ៩វិច្ឆិកា

ប្រព័ន្ធផ្សព្វផ្សាយអ៊ីរ៉ង់រាយការណ៍ថា មានសំឡេងផ្ទុះត្រូវគេឮក្នុងតំបន់មួយចំនួននៅភាគខាងត្បូងប្រទេសអ៊ីរ៉ង់

គុណភាពខ្យល់នៅរដ្ឋធានីឥណ្ឌាយ៉ាប់យ៉ឺនខ្លាំង ខណៈពិធីបុណ្យឌីវ៉ាលីបង្កក្តីបារម្ភកាន់តែខ្លាំងពីការបំពុលបរិស្ថាន

ប្រធានក្រុមការងារចុះមូលដ្ឋានខណ្ឌព្រែកព្នៅ ណែនាំអាជ្ញាធរសង្កាត់ឱ្យពង្រឹងការអនុវត្តគោលនយោបាយភូមិ-សង្កាត់មានសុវត្ថិភាព ថែរក្សាផ្លូវ លូ និងបន្តផ្តល់សេវាជូនពលរដ្ឋឱ្យកាន់តែល្អប្រសើរបន្ថែមទៀត

អ៊ីរ៉ង់អះអាងថា កងកម្លាំងរបស់ខ្លួនមានភាព «រឹងមាំជាង» មុនពេលចាប់ផ្តើមសង្គ្រាម

ពលរដ្ឋវ័យចំណាស់ បង្ហាញមោទនភាពចំពោះសន្ទុះ នៃការអភិវឌ្ឍផលិតផលក្នុងស្រុកកាន់តែល្អ

ក្រុម AOT ចុះសង្កេតការណ៍ និងសួរសុខទុក្ខដល់ជនភៀសសឹក ស្ថិតនៅភូមិរង់ចាំ ខណៈពួកគាត់មិនទាន់អាចវិលត្រឡប់ទៅកាន់លំនៅដ្ឋានវិញដោយសារថៃឈ្លានពាន

រុស្ស៊ីវាយប្រហាររោងចក្រថាមពលនៅជុំវិញទីក្រុងគីវ បំផ្លាញស្ពានសំខាន់ៗ និងបណ្ដាលឲ្យមនុស្ស២នាក់ស្លាប់

យុវជនប្ដេជ្ញាខិតខំសិក្សាលើបច្ចេកវិទ្យា ដើម្បីការពារជាតិ និងអភិវឌ្ឍន៍ជាតិឆ្ពោះទៅឆ្នាំ២០៥០

ពលរដ្ឋ និងយុវជនខេត្តមណ្ឌលគិរី រីករាយចំពោះវេទិកាការងារនាំយកឱកាសការងារមកដល់មូលដ្ឋាន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877