BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

ក្រុមអ្នកជំនាញសិទ្ធិមនុស្សUN ព្រមានពីការកើនឡើងអំពើប្រល័យពូជសាសន៍ ខណៈពលរដ្ឋហ្កាហ្សាគ្រប់គ្នាអត់ឃ្លាន

ក្រុមអ្នកជំនាញឯករាជ្យរបស់អង្គការសហប្រជាជាតិកាលពីថ្ងៃអង្គារបានព្រមានថាបច្ចុប្បន្ននេះ ប្រជាពលរដ្ឋហ្កាហ្សា ប្រមាណ៨០%នៃចំនួនប្រជាជនសរុប កំពុងប្រឈមនឹងគ្រោះទុរភិក្ស ឬគ្រោះមហន្តរាយនៃភាពអត់ឃ្លាននៅទូទាំងពិភពលោក។ ការបញ្ចេញតួលេខនេះ បានកើតឡើងនៅពេល ពួកគេបានលើកឡើងពីភាពអាសន្នផ្នែកមនុស្សធម៌មិនធ្លាប់មាននៅក្នុងតំបន់ហ្កាហ្សាស្ទ្រីប ក្នុងការប្រឈមនឹងការវាយប្រហាររបស់អ៊ីស្រាអែលដែលកំពុងបន្តលើតំបន់រងការឡោមព័ទ្ធមួយនេះ។ក្រុមអ្នកជំនាញសិទ្ធិមនុស្សបាននិយាយថា បច្ចុប្បន្ននេះ មនុស្សគ្រប់រូបនៅក្នុង ហ្កាហ្សា កំពុងស្រេកឃ្លាន ក្នុងនោះមួយភាគបួននៃចំនួនប្រជាជនសរុប កំពុងស្រេកឃ្លាន និងព្យាយាមស្វែងរកអាហារ និងទឹកផឹក ហើយទុរ្ភិក្សជិតមកដល់ ។ ក្រុមអ្នកជំនាញខាងលើបានបន្ថែមថា កង្វះអាហារូបត្ថម្ភ និងការថែទាំសុខភាពមិនបានគ្រប់គ្រាន់ កំពុងបង្កគ្រោះថ្នាក់ដល់អាយុជីវិតរបស់ស្ត្រីមានផ្ទៃពោះ និងទារកក្នុងផ្ទៃរបស់ពួកគេ ហើយកុមារទាំងអស់ដែលមានអាយុក្រោម ៥ ឆ្នាំ សរុបប្រហែល ៣៣៥.០០០ នាក់ ងាយនឹងទទួលរងនូវផលប៉ះពាល់នៃកង្វះអាហារូបត្ថម្ភធ្ងន់ធ្ងរ ដែលជាការគំរាមកំហែងនៃភាពអត់ឃ្លានបន្តកើនឡើង។ ក្រុមអ្នកជំនាញរួមមានលោកស្រីហ្វ្រានសេស្កា អាល់បានីស (Francesca Albanese) អ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធិមនុស្សប្រចាំដែនដីប៉ាឡេស្ទីនដែលអ៊ីស្រាអែលបានកាន់កាប់តាំងពីឆ្នាំ១៩៦៧ លោកស្រី រីម អាល់សាឡឹម (Reem Alsalem) អ្នករាយការណ៍ពិសេសស្តីពីអំពើហិង្សាលើស្ត្រី និងកុមារី និងលោក ផេដ្រូអារ៉ូចូ អាហ្គូដូ(Pedro Arrojo Agudo) អ្នករាយការណ៍ពិសេសស្តីពីសិទ្ធិមនុស្សចំពោះទឹកស្អាត និងអនាម័យ និងជាអ្នករាយការណ៍ពិសេសស្តីពីសិទ្ធិទទួលបានអាហារ ការអប់រំ សិទ្ធិរបស់មនុស្សគ្រប់រូបក្នុងការទទួលបានភាពរីករាយនៃស្តង់ដារសុខភាពផ្លូវកាយ និងផ្លូវចិត្តខ្ពស់បំផុតដែលអាចសម្រេចបាន សិទ្ធិទទួលបានលំនៅដ្ឋានសមរម្យ និងសិទ្ធិមនុស្សស្ដីពីការភៀសខ្លួននៅក្នុងប្រទេស។ក្រុមអ្នកជំនាញនិយាយថា យើង បានប្រកាសអាសន្ននៃហានីភ័យអំពើប្រល័យពូជសាសន៍ជាច្រើនដងរួចមកហើយ ដែលជាការក្រើនរំម្លឹកទៅដល់រដ្ឋាភិបាលនានា ថា ពួកគេមានតួនាទីទប់ស្កាត់អំពើប្រល័យពូជសាសន៍៕

យោធាអាមេរិក៖ ខ្លួនបានរឹបអូសអាវុធអ៊ីរ៉ង់ដែលមានទិសដៅទៅកាន់ក្រុមហ៊ួទី នៅយេម៉ែន

ទីបញ្ជាការកណ្តាលរបស់សហរដ្ឋអាមេរិក បាននិយាយនៅក្នុងសេចក្តីថ្លែងការណ៍កាលពីថ្ងៃអង្គារថា ខ្លួនបានរឹបអូសអាវុធធម្មតាឈានមុខរបស់អ៊ីរ៉ង់ មានទិសដៅទៅកាន់ក្រុមឧទ្ទាមហ៊ួទី នៅប្រទេសយេម៉ែន កាលពីថ្ងៃទី ១១ ខែមករា។ សេចក្តីថ្លែងការណ៍បាននិយាយថា វាគឺជាការរឹបអូសលើកដំបូងនៃអាវុធធម្មតាឈាបមុខផ្គត់ផ្គង់ដោយប្រទេសអ៊ីរ៉ង់ ទៅដល់ក្រុមហ៊ួទី ចាប់តាំងពីការវាយប្រហាររបស់ក្រុមហ៊ួទី ទៅលើនាវាពាណិជ្ជកម្ម បានចាប់ផ្តើមនៅក្នុងខែវិច្ឆិកា។ កងទ័ពជើងទឹកសហរដ្ឋអាមេរិក បានរាយការណ៍ថា ខ្លួនបានរឹបអូសអាវុធដែលអ៊ីរ៉ង់បញ្ជូនមក ដើម្បីផ្គត់ផ្គង់ឡើងវិញដល់ក្រុមឧទ្ទាមហ៊ួទីនៅយេម៉ែន កាលពីសប្តាហ៍មុន។ ទីបញ្ជាការកណ្តាលរបស់សហរដ្ឋអាមេរិក បានប្រកាសនៅក្នុងសេចក្តីថ្លែងការណ៍កាលពីថ្ងៃអង្គារថា កងទ័ពជើងទឹកអាមេរិក បានរកឃើញអាវុធក្នុងអំឡុងពេលការវាយឆ្មក់ពេលយប់ នៅលើទូកមួគ្រឿងនៅសមុទ្រអារ៉ាប់ កាលពីថ្ងៃទី ១១ ខែមករា។ អ៊ីរ៉ង់ បានបដិសេធការជាប់ពាក់ព័ន្ធណាមួយទៅនឹងយុទ្ធនាការវាយប្រហាររបស់ក្រុមហ៊ួទី នៅសមុទ្រក្រហម ដែលបានបង្អាក់ដល់ការធ្វើពាណិជ្ជកម្មពិភពលោក។ សេចក្តីថ្លែងការណ៍បាននិយាយថា ការវាយឆ្មក់នៅលើទូកនៅជិតឆ្នេរសមុទ្រប្រទេសសូម៉ាលីកាលពីសប្តាហ៍មុន បានរកឃើញអាវុធធម្មតាឈានមុខ។ មីស៊ីលបាលីស្ទីក ដែលផលិតដោយអ៊ីរ៉ង់ និង សមាសធាតុមីស៊ីលស៊ីបគោលដៅ ត្រូវបានកងកម្លាំងអាមេរិករឹបអូសបាន។ ការរឹបអូស បានកើតឡើងនៅពេលដែលមានការកើនឡើងអំពើហិង្សាក្នុងតំបន់ ដែលជាប់ទាក់ទងទៅនឹងសង្គ្រាមរបស់អ៊ីស្រាអែលលើតំបន់ហ្កាហ្សា។ ក្រុមឧទ្ទាមហ៊ួទី ដែលគ្រប់គ្រងភាគច្រើននៅឆ្នេរសមុទ្រក្រហមរបស់ប្រទេសយេម៉ែន បាននិងកំពុងវាយប្រហារលើនាវាពាណិជ្ជកម្ម ដែលពួកគេនិយាយថា មានទំនាក់ទំនងជាមួយអ៊ីស្រាអែល ឬមានគោលដៅទៅកាន់កំពង់ផែអ៊ីស្រាអែល។ ការវាយលុកនេះ ត្រូវបានចាប់ផ្តើមនៅក្នុងខែវិច្ឆិកា ដែលយោងតាមក្រុមនៅប្រទេសយេម៉ែនបានឲ្យដឹងថា មានបំណងការពារពលរដ្ឋប៉ាឡេស្ទីន។

សមត្ថកិច្ចកម្ពុជា ជួយសង្រ្គោះជនបរទេសពីការជួញដូរ ៥៦នាក់ ខណៈមេខ្លោងជួញដូរពីរនាក់ជាជនជាតិបង់ក្លាដេស ត្រូវបានឃាត់ខ្លួន

នគរបាលអន្តោប្រវេសន៍បានឃាត់ខ្លួនជនជាតិបង់ក្លាដេសពីរនាក់ប្តីប្រពន្ធដោយសង្ស័យជាមេខ្លោងពាក់ព័ន្ធករណីនាំមនុស្សចេញ-ចូលឆ្លងដែនខុសច្បាប់(ការជួញដូរមនុស្សខុសច្បាប់) ខណៈជនបរទេសដែលត្រូវបានគេជួញដូរចំនួន៥៦នាក់ត្រូវបានជួយសង្រ្គោះទាន់ពេលវេលាក្នុងប្រតិបត្តិការពីរទីតាំងដាច់ដោយឡែកពីគ្នា។នាថ្ងៃទី១៦ ខែមករា ឆ្នាំ២០២៤ម្សិលមិញនេះ កម្លាំងនាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍ បានសហការជាមួយកម្លាំងរបស់នាយកដ្ឋានចារកម្ម នៃអគ្គស្នងការដ្ឋាននគរបាលជាតិ ដោយមានការឯកភាពពីព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះត្រួតពិនិត្យរដ្ឋបាលចំនួន ២ទីតាំង ទី១ សណ្ឋាគារមួយកន្លែង ស្ថិតនៅសង្កាត់វត្តភ្នំ ខណ្ឌដូនពេញ និងទី២ ផ្ទះសំណាក់មួយកន្លែង សង្កាត់ផ្សារកណ្ដាល ខណ្ឌដូនពេញ ដោយបានឃាត់ខ្លួនជនបរទេសចំនួន ៥៨នាក់ ដោយក្នុងនោះពីរនាក់ប្តីប្រព័ន្ធជាជនជាតិបង់ក្លាដេសត្រូវបានសង្ស័យជាអ្នកជួញដូរមនុស្សខុសច្បាប់ ខណៈ ៥៦នាក់ ជាជនបរទេសដូចគ្នាតែជាជនរងគ្រោះ។យោងតាមប្រភពរបស់អគ្គនាយកដ្ឋានអន្តោប្រវេសន៍បានឲ្យដឹងថា ប្រតិបត្តិការខាងលើនេះគឺបាន ឡើយបន្ទាប់ពីទទួលបានបណ្ដឹងអន្តរាគមន៍ ឲ្យជួយសង្គ្រោះពីជនជាតិបង់ក្លាដេសម្នាក់ តាមរយៈប្រព័ន្ធ Hotline កាលពីថ្ងៃទី១៤ ខែមករា ឆ្នាំ២០២៤កន្លងទៅ។ជនបរទេសដែលជាជនរងគ្រោះចំនួន៥៦នាក់នោះ មាន៣សញ្ជាតិ (បង់ក្លាដេស ៥១នាក់, ឥណ្ឌា ៤នាក់ និងស្រីលង្កា ១នាក់) ដោយត្រូវបានមេខ្សល់អូសទាញមកកម្ពុជា ដើម្បីស្វែងរកការងារធ្វើ ហើយសម្រាប់ជនរងគ្រោះណាមិនចេះអង់គ្លេស និងកុំព្យូទ័រ នឹងត្រូវបញ្ជូនបន្តទៅប្រទេសថៃ និងម៉ាឡេស៊ី មួយតង់ទៀត។យ៉ាងណាក៏ដោយជនរងគ្រោះជាជនបរទេសទាំង៥៦នាក់នោះ ត្រូវបានអាជ្ញាធរកម្ពុជាជួយសង្រ្គោះទាន់ពេលវេលា ហើយបច្ចុប្បន្នជនរងគ្រោះទាំង ៥៦នាក់ បានប្រគល់ឲ្យទៅក្រសួងសង្គមកិច្ច អតីតយុទ្ធជន និងយុវនីតិសម្បទា ខណៈជនជាតិបង់ក្លាដេស ២នាក់ ដែលសង្ស័យជាមេខ្លោង ពាក់ព័ន្ធករណីនាំមនុស្សចេញឆ្លងដែនខុសច្បាប់ត្រូវបានកសាងសំណុំរឿងបញ្ជូនទៅតុលាការ ដើម្បីអនុវត្តតាមនីតិវិធីច្បាប់៕ អត្ថបទ៖ បាន ចក់

ការវាយប្រហាររបស់អ៊ីរ៉ង់ បង្កឱ្យមានជម្លោះជាមួយអ៊ីរ៉ាក់ ខណៈការភ័យខ្លាចនៃចលាចលក្នុងតំបន់កើនឡើង

ការវាយប្រហារដោយមីស៊ីលរបស់អ៊ីរ៉ង់ ទៅលើគោលដៅនៅភាគខាងជើងប្រទេសអ៊ីរ៉ាក់ បានបង្កឱ្យមានជម្លោះមិនធម្មតារវាងសម្ព័ន្ធមិត្តជិតខាងទាំងពីរនេះកាលពីថ្ងៃអង្គារ (១៦ មករា) ដោយទីក្រុងបាកដាដ បានកោះហៅឯកអគ្គរដ្ឋទូតរបស់អ៊ីរ៉ង់ដើម្បីតវ៉ា ហើយទីក្រុងតេអេរ៉ង់ បានទទូចថាការវាយប្រហារនេះមានគោលបំណងរារាំងការគំរាមកំហែងពីចារកម្មអ៊ីស្រាអែលប៉ុណ្ណោះ។ប្រព័ន្ធផ្សព្វផ្សាយអ៊ីរ៉ង់បានរាយការណ៍កាលពីយប់ថ្ងៃច័ន្ទថា កងឆ្មាំបដិវត្តន៍អ៊ីរ៉ង់បានវាយលុកនូវអ្វីដែលពួកគេហៅថាមជ្ឈមណ្ឌលចារកម្មរបស់អ៊ីស្រាអែលនៅតំបន់ពាក់កណ្តាលស្វយ័ត ឃើឌីស្ថាន (Kurdistan) របស់ប្រទេសអ៊ីរ៉ាក់ ខណៈដែលកងកម្លាំងវរជននេះបាននិយាយថាពួកគេក៏បានវាយប្រហារគោលដៅនៅក្នុងប្រទេសស៊ីរី ប្រឆាំងនឹងក្រុមរដ្ឋអ៊ីស្លាមផងដែរ។ការវាយប្រហារនេះទំនងជាធ្វើឱ្យមានការព្រួយបារម្ភកាន់តែខ្លាំងអំពីអស្ថិរភាពកាន់តែអាក្រក់ឡើងនៅទូទាំងមជ្ឈិមបូព៌ា ចាប់តាំងពីសង្រ្គាមរវាងអ៊ីស្រាអែល និងក្រុមហាម៉ាស បានចាប់ផ្តើមកាលពីថ្ងៃទី០៧ ខែតុលា មកដោយសម្ព័ន្ធមិត្តរបស់អ៊ីរ៉ង់ជាច្រើនក៏បានចូលជ្រៀតជ្រែករាប់ចាប់ពីប្រទេសលីបង់ ស៊ីរី អ៊ីរ៉ាក់ និងយេម៉ែន។គេក៏មានការព្រួយបារម្ភផងដែរថា អ៊ីរ៉ាក់អាចក្លាយជាចំណុចកណ្ដាលសម្រាប់ជម្លោះក្នុងតំបន់ម្តងទៀត បន្ទាប់ពីការវាយប្រហារជាបន្តបន្ទាប់របស់សហរដ្ឋអាមេរិក ទៅលើក្រុមសកម្មប្រយុទ្ធដែលមានទំនាក់ទំនងជាមួយអ៊ីរ៉ង់ ដែលជាផ្នែកនៃកងកម្លាំងសន្តិសុខផ្លូវការរបស់ប្រទេសអ៊ីរ៉ាក់ផងដែរ។ ការវាយប្រហារទាំងនោះបានកើតឡើងក្នុងការឆ្លើយតបទៅនឹងការវាយប្រហាររាប់សិបលើកមកលើកងកម្លាំងអាមេរិកក្នុងតំបន់ដែលបានធ្វើចាប់តាំងពីថ្ងៃទី០៧ ខែតុលាមក៕

សេតវិមាននិយាយថា សហរដ្ឋអាមេរិក មិនចង់មានសង្រ្គាមជាមួយក្រុមហ៊ួទីទេ

សេតវិមានបាននិយាយកាលពីថ្ងៃអង្គារ (១៦ មករា) ថាសហរដ្ឋអាមេរិក មិនចង់បង្កឲ្យមានសង្រ្គាមជាមួយក្រុមហ៊ួទី (Houthis) នោះទេ។ អ្នកនាំពាក្យសេតវិមានលោក ចន ឃឺប៊ី (John Kirby) បាននិយាយថា «យើងមិនចង់ពង្រីករឿងនេះឲ្យធំទេ។ ពួកហ៊ួទី នៅមានជម្រើសហើយពួកគេនៅតែមានពេលវេលាដើម្បីធ្វើការជ្រើសរើសត្រឹមត្រូវ ពោលគឺបញ្ឈប់ការវាយប្រហារដែលមិនប្រុងប្រយ័ត្នទាំងនេះ»។ការវាយប្រហារដោយក្រុមហ៊ួទីទៅលើនាវាក្នុងតំបន់ចាប់តាំងពីខែវិច្ឆិកា បានប៉ះពាល់ដល់ក្រុមហ៊ុននានា និងបានធ្វើឱ្យមហាអំណាចព្រួយបារម្ភនៅក្នុងការកើនឡើងនៃសង្គ្រាមរយៈពេលជាង ៣ខែរបស់អ៊ីស្រាអែល ជាមួយក្រុមសកម្មប្រយុទ្ធហាម៉ាស នៅក្នុងតំបន់ហ្កាហ្សា។ ក្រុមនេះនិយាយថា ខ្លួនកំពុងធ្វើសកម្មភាពក្នុងការរួបរួមជាមួយប៉ាឡេស្ទីន។មន្ត្រីម្នាក់មកពីក្រុមហ៊ួទី បាននិយាយកាលពីថ្ងៃចន្ទ ថានាវាអង់គ្លេស និងអាមេរិកបានក្លាយជា «គោលដៅស្របច្បាប់» ដោយសារតែការវាយប្រហារដែលធ្វើឡើងដោយប្រទេសទាំងពីរលើប្រទេសយេម៉ែនកាលពីសប្តាហ៍មុន ខណៈដែលក្រុមនេះបានប្តេជ្ញាបន្តការវាយប្រហារបន្ទាប់ពីសហរដ្ឋអាមេរិក និងអង់គ្លេស វាយប្រហារលើទីតាំងរបស់ខ្លួនក្នុងប្រទេសយេម៉ែន។ ក្រុមហ៊ួទីនេះពីមុនបាននិយាយថា ពួកគេនឹងកំណត់គោលដៅតែលើនាវាអ៊ីស្រាអែល ឬនាវាដែលធ្វើដំណើរទៅកាន់អ៊ីស្រាអែលប៉ុណ្ណោះ៕

លោក Putin និយាយថា ភាពជារដ្ឋរបស់អ៊ុយក្រែន មានហានិភ័យ ប្រសិនបើគំរូនៃសង្រ្គាមនៅតែបន្ត

លោកប្រធានាធិបតីរុស្ស៊ី Vladimir Putin បាននិយាយកាលពីថ្ងៃអង្គារថា ភាពជារដ្ឋរបស់អ៊ុយក្រែនអាចទទួលរង ការវាយលុកដែលមិនអាចជួសជុលបាន ប្រសិនបើគំរូនៃសង្រ្គាមនេះនៅតែបន្ត ហើយរុស្ស៊ី នឹងមិនត្រូវបានគេបង្ខំឱ្យបោះបង់ចោលផលប្រយោជន៍ដែលខ្លួនបានធ្វើនោះទេ។ បច្ចុប្បន្ន ប្រទេសរុស្ស៊ីគ្រប់គ្រង ១៧,៥% នៃទឹកដីរបស់ប្រទេសអ៊ុយក្រែន។ លោក Putin បានធ្វើអត្ថាធិប្បាយតាមទូរទស្សន៍ មួយថ្ងៃបន្ទាប់ពីប្រទេសស្វីសបានយល់ព្រមធ្វើជាម្ចាស់ផ្ទះនៃកិច្ចប្រជុំកំពូលពិភពលោកតាមសំណើរបស់លោកប្រធានាធិបតីអ៊ុយក្រែន Volodymyr Zelenskiy ។ លោក Putin បានច្រានចោល អ្វីដែលគេហៅថារូបមន្តសន្តិភាព ដែលកំពុងត្រូវបានពិភាក្សានៅក្នុងប្រទេសខាងលិច និងអ៊ុយក្រែន និងអ្វីដែលលោកហៅថា ការទាមទារត្រូវបានហាមឃាត់ ដែលពួកគេបានបញ្ចូល។លោកបាននិយាយថា បើគេមិនចង់ ចរចា ទេ អញ្ចឹង កុំអី!។ ឥឡូវនេះវាច្បាស់ណាស់ មិនត្រឹមតែការវាយលុករបស់អ៊ុយក្រែនទេដែលបរាជ័យ ប៉ុន្តែគំនិតផ្តួចផ្តើមនេះគឺស្ថិតនៅក្នុងដៃរបស់កងកម្លាំងប្រដាប់អាវុធរុស្ស៊ីទាំងស្រុង។ ប្រសិនបើសង្រ្គាមនេះនៅតែបន្ត ភាពជារដ្ឋរបស់អ៊ុយក្រែន អាចនឹងទទួលរងនូវការវាយប្រហារយ៉ាងធ្ងន់ធ្ងរដែលមិនអាចជួសជុលបាន។ ប្រធានាធិបតីរុស្ស៊ី Vladimir Putin ចូលរួមវេទិកាក្រុង-រុស្ស៊ីទាំងអស់ នៅទីក្រុងអូឌីនសូវ៉ូ ( Odintsovo) ក្នុងតំបន់មូស្គូ។ សេចក្តីថ្លែងការណ៍របស់លោក Putin អំពីដំណើរនៃសង្រ្គាម កាន់តែមានទំនុកចិត្ត និងឈ្លានពានកាន់តែខ្លាំងឡើងក្នុងប៉ុន្មានខែថ្មីៗនេះ ជាមួយនឹងការបរាជ័យនៃការវាយលុករបស់អ៊ុយក្រែន ដែលជាការផ្តល់ផលចំណេញយ៉ាងច្រើនដល់កងកម្លាំងរុស្ស៊ីដែលបានពង្រឹងកម្លាំងយ៉ាងល្អ។លោក Putin បាននិយាយថា ការពិភាក្សាអំពីការចរចាគឺជា ការប៉ុនប៉ងដើម្បីជំរុញឱ្យយើងបោះបង់ចោលនូវផលចំណេញដែលយើងបានដឹងក្នុងរយៈពេលមួយឆ្នាំកន្លះកន្លងមកនេះ។ប៉ុន្តែនេះគឺមិនអាចទៅរួចទេ។ មនុស្សគ្រប់គ្នាសុទ្ធតែយល់ឃើញ ថា នេះគឺមិនអាចទៅរួចទេ៕

កិច្ចព្រមព្រៀងមួយ ត្រូវបានធ្វើឡើងដើម្បីបញ្ជូនជំនួយទៅកាន់តំបន់ហ្កាហ្សាដោយរួមទាំងការដោះលែងចំណាប់ថ្នូរ

ក្រុមអ្នកសម្របសម្រួលរបស់ប្រទេសកាតាបាននិយាយថា អ៊ីស្រាអែល និងក្រុមហាម៉ាស បានឈានដល់កិច្ចព្រមព្រៀងមួយដើម្បីអនុញ្ញាតឱ្យមានជំនួយមនុស្សធម៌បន្ថែមទៀតចូលទៅក្នុងតំបន់ហ្កាហ្សាដែលរងការបំផ្លិចបំផ្លាញដោយសង្រ្គាម។ពួកគេនិយាយថា ក្រោមកិច្ចព្រមព្រៀងដែលសម្របសម្រួលដោយកាតា និងបារាំង ថ្នាំពេទ្យនឹងត្រូវផ្តល់ទៅឱ្យចំណាប់ខ្មាំងដែលត្រូវបានឃុំខ្លួនដោយក្រុមហាម៉ាស។ជាថ្នូរមកវិញ អ៊ីស្រាអែល នឹងអនុញ្ញាតឱ្យមានការផ្គត់ផ្គង់ជាមូលដ្ឋានបន្ថែមទៀតចូលទៅក្នុងតំបន់ហ្កាហ្សា។ ស្ថានភាពក្នុងដែនដីមួយនេះ មានសភាពធ្ងន់ធ្ងរ បន្ទាប់ពីការទម្លាក់គ្រាប់បែករបស់អ៊ីស្រាអែលអស់រយៈពេលជាងបីខែ មកនេះ។ ទន្ទឹមនឹងនោះ សហរដ្ឋអាមេរិកនិយាយថា ខ្លួនសង្ឃឹមថា កិច្ចពិភាក្សាបន្ថែមទៀតអាចនាំទៅដល់ការដោះលែងចំណាប់ខ្មាំងបន្ថែមទៀត។ អ្នកនាំពាក្យសន្តិសុខជាតិរបស់សេតវិមានលោក ចន ឃើប៊ី (John Kirby) បាននិយាយកាលពីថ្ងៃអង្គារថា បេសកជនមជ្ឈិមបូព៌ារបស់សហរដ្ឋអាមេរិក កំពុងស្ថិតនៅក្នុងប្រទេសកាតាដើម្បីពិភាក្សាពីលទ្ធភាពនៃកិច្ចព្រមព្រៀងបែបនេះ។ លោកបានបន្ថែមថា ការពិភាក្សានេះមានលក្ខណៈហ្មត់ចត់ និងតានតឹងខ្លាំងណាស់។យើងសង្ឃឹមថា នឹងទទួលបានលទ្ធផលប្រកបដោយផ្លែផ្កាឆាប់ៗ។ថ្មីៗនេះអ្នកនាំពាក្យក្រសួងការបរទេសកាតា លោកម៉ាចេដអាល់ អានសារី(Majed Al Ansari)បានប្រកាសអំពីកិច្ចព្រមព្រៀងស្តីពីជំនួយ។ នៅក្រោមកិច្ចព្រមព្រៀង ការផ្គត់ផ្គង់មនុស្សធម៌ នឹងចាកចេញពីរដ្ឋធានី ដូហ(Doha) ប្រទេសកាតា ទៅកាន់ប្រទេសអេហ្ស៊ីបនៅថ្ងៃពុធនេះ ។ ជំនួយនឹងត្រូវដឹកជញ្ជូនចូលទៅតំបន់ហ្កាហ្សា ដើម្បីបញ្ជូនទៅកាន់ដៃជនស៊ីវិល ខណៈថ្នាំពេទ្យនឹងត្រូវទៅដល់ក្រុមជនជាតិអ៊ីស្រាអែលក្នុងដៃក្រុមហាម៉ាស។ ចំណាប់ខ្មាំងជាង ១៣២ នាក់ត្រូវបានគេគិតថានៅតែត្រូវបានជាប់ឃុំខ្លួននៅក្នុងតំបន់ ហ្កាហ្សា ៕

កម្លាំងគណៈបញ្ជាការឯកភាពខណ្ឌដូនពេញចុះធ្វើរដ្ឋបាលនៅតំបន់ស្មុគស្មាញ ក្នុងមូលដ្ឋានរបស់ខ្លួន

ភ្នំពេញ ៖ លោក ចាប ឌីណា អភិបាលរងខណ្ឌដូនពេញ នៅយប់ថ្ងៃទី១៦ ខែមករា ឆ្នាំ២០២៤នេះ បានដឹកនាំកម្លាំងគណៈបញ្ជាការឯកភាពខណ្ឌដូនពេញ ចុះធ្វើរដ្ឋបាលនៅតំបន់ដែលស្មុគស្មាញ (បេនឡានផ្សារថ្មីនិងច្រកផ្លូវឌឿងហែម) ដើម្បីបង្ការទប់ស្កាត់ រក្សាសន្តិសុខ សណ្ដាប់ធ្នាប់ សាធារណៈជូនប្រជាពលរដ្ឋដែលមានលំនៅឋាននៅជុំវិញនោះ៕ ដោយ ៖ កុម្ភះ

កងឆ្មាំបដិវត្តន៍អ៊ីរ៉ង់ វាយប្រហារលើទីស្នាក់ការចារកម្មរបស់អ៊ីស្រាអែល នៅអ៊ីរ៉ាក់ ខណៈប្តេជ្ញាសងសឹកបន្ថែមទៀត

ប្រព័ន្ធផ្សព្វផ្សាយរដ្ឋបានរាយការណ៍កាលពីយប់ថ្ងៃចន្ទ (១៥ មករា) ថាកងឆ្មាំបដិវត្តន៍អ៊ីរ៉ង់ បាននិយាយថាពួកគេបានវាយប្រហារលើ «ទីស្នាក់ការចារកម្ម» របស់អ៊ីស្រាអែល នៅក្នុងតំបន់ពាក់កណ្តាលស្វយ័ត ឃើឌីស្ថាន (Kurdistan) របស់ប្រទេសអ៊ីរ៉ាក់ ខណៈដែលកងកម្លាំងវរជននេះបាននិយាយថា ពួកគេក៏បានវាយប្រហារនៅក្នុងប្រទេសស៊ីរីប្រឆាំងនឹងក្រុមរដ្ឋអ៊ីស្លាមផងដែរ។ការវាយប្រហារនេះកើតឡើងស្របពេលមានការព្រួយបារម្ភអំពីការកើនឡើងនៃជម្លោះដែលរីករាលដាលពាសពេញមជ្ឈិមបូព៌ា ចាប់តាំងពីសង្គ្រាមរវាងអ៊ីស្រាអែល និងក្រុមអ៊ីស្លាមប៉ាឡេស្ទីនហាម៉ាស បានចាប់ផ្តើមកាលពីថ្ងៃទី០៧ ខែតុលា ដោយសម្ព័ន្ធមិត្តរបស់អ៊ីរ៉ង់ជាច្រើនក៏បានចូលទៅក្នុងជម្លោះពីប្រទេសលីបង់ ស៊ីរី អ៊ីរ៉ាក់ និងយេម៉ែនផងដែរ។កងឆ្មាំនេះបាននិយាយនៅក្នុងសេចក្តីថ្លែងការណ៍មួយថា «ដើម្បីឆ្លើយតបទៅនឹងភាពឃោរឃៅនាពេលថ្មីៗនេះនៃរបបជ្វីហ្វនិយម ដែលបណ្តាលឱ្យមានការសម្លាប់មេបញ្ជាការជាំច្រើននៃកងឆ្មាំបដិវត្តន៍អ៊ីរ៉ង់ និងចលនាអ័ក្សនៃការតស៊ូ ទីស្នាក់ការសំខាន់មួយក្នុងចំណោមទីស្នាក់ការចារកម្ម ម៉ូសាដ សំខាន់ៗ នៅក្នុងតំបន់ឃើឌីស្ថាន របស់អ៊ីរ៉ាក់ ត្រូវបានកម្ទេចដោយមីស៊ីលបាលិស្ទិក»។អ៊ីរ៉ង់បានប្តេជ្ញាសងសឹកចំពោះការសម្លាប់សមាជិកឆ្មាំបដិវត្តន៍អ៊ីរ៉ង់បីនាក់ នៅក្នុងប្រទេសស៊ីរី កាលពីខែមុន រួមទាំងមេបញ្ជាការឆ្មាំជាន់ខ្ពស់ម្នាក់ ដែលបានបម្រើការជាទីប្រឹក្សាយោធានៅទីនោះ៕

អ៊ីស្រាអែល ចោទក្រុមហាម៉ាសពីបទធ្វើទារុណកម្មផ្លូវចិត្តដល់ក្រុមគ្រួសារចំណាប់ថ្នូរ បន្ទាប់ពីវីដេអូចំនួនបីបានចេញផ្សាយ

អ៊ីស្រាអែល បាននិយាយកាលពីថ្ងៃចន្ទថា ក្រុមហាម៉ាស កំពុងអនុវត្ត «ការធ្វើទារុណកម្មផ្លូវចិត្ត» នៅពេលដែលក្រុមសកម្មប្រយុទ្ធ បានចេញផ្សាយវីដេអូទីបីក្នុងរយៈពេល ២៤ម៉ោង ដែលបង្ហាញពីចំណាប់ថ្នូរបីនាក់ដែលកំពុងត្រូវបានឃុំខ្លួននៅតំបន់ហ្កាហ្សា ដែលចុងក្រោយនេះ ហាក់ដូចជាបង្ហាញពីចំណាប់ថ្នូរពីរនាក់ បានស្លាប់។រដ្ឋមន្ត្រីការពារជាតិអ៊ីស្រាអែល លោក យ៉ូអាវ ហ្គាឡែនធ៍ (Yoav Gallant) បានប្រាប់អ្នកយកព័ត៌មានកាលពីថ្ងៃចន្ទថា៖«ក្រុមហាម៉ាស ត្រូវបានវាយប្រហារយ៉ាងធ្ងន់ធ្ងរដោយកងកម្លាំងការពារអ៊ីស្រាអែល (IDF) ហើយអ្វីដែលនៅសេសសល់សម្រាប់ពួកគេ គឺនាំមកនូវការធ្វើទារុណកម្មផ្លូវចិត្តដល់គ្រួសារ [ចំណាប់ថ្នូរ] ដោយទុកឲ្យកងកម្លាំងការពារបំភ្លឺរឿងនេះដល់គ្រួសារនៅពេលក្រោយ។ .វីដេអូទីមួយដែលត្រូវបានចេញផ្សាយកាលពីថ្ងៃអាទិត្យ បានបង្ហាញឃ្លីបរបស់ចំណាប់ថ្នូរបីនាក់ គឺ Noa Argamani, Itai Svirsky និងបុរសម្នាក់ទៀតដែលគ្រួសាររបស់គាត់ បានស្នើសុំឲ្យឃុំខ្លួនគាត់ដោយនិយាយទៅកាន់កាមេរ៉ា។ វីដេអូនេះ បញ្ចប់ដោយចំណងជើងថា «ថ្ងៃស្អែកយើង នឹងប្រាប់អ្នកអំពីជោគវាសនារបស់ពួកគេ»។វីដេអូទីពីរដែលត្រូវបានចេញផ្សាយកាលពីថ្ងៃចន្ទ នៅក្នុងការប៉ុនប៉ងជាក់ស្តែងមួយដោយក្រុមហាម៉ាសដើម្បីបង្កើនការព្រួយបារម្ភនោះ បានផ្សាយសាឡើងវិញថា ជោគវាសនារបស់ចំណាប់ថ្នូរទាំងបីនាក់ នឹងត្រូវបានបង្ហាញជាសាធារណៈ ក្នុងពេលឆាប់ៗនេះ។វីដេអូទីបី ដែលត្រូវបានចេញផ្សាយ នៅថ្ងៃល្ងាចចន្ទ ហាក់ដូចជាបង្ហាញពីសាកសពចំណាប់ថ្នូរពីរនាក់ គឺ Itai Svirsky និងបុរសផ្សេងទៀត។ វាក៏បង្ហាញពី Noa Argamani ដោយនិយាយថា បុរសទាំងពីរនាក់ ត្រូវបានសម្លាប់ដោយកងកម្លាំងអ៊ីស្រាអែល។

បណ្ដាញសង្គម

ព័ត៌មានថ្មីៗ

ព្យុះខ្សាច់បានវាយប្រហារតំបន់ស៊ីនជាំងរបស់ប្រទេសចិន

ប្រធានាធិបតីបារាំង ស្វាគមន៍ការបើកច្រកសមុទ្រ Hormuz ឡើងវិញនៅក្នុងកិច្ចប្រជុំពហុភាគី

អូស្ត្រាលី និងជប៉ុនចុះហត្ថលេខាលើកិច្ចសន្យាដើម្បីចាប់ផ្តើមកិច្ចព្រមព្រៀងនាវាចម្បាំងតម្លៃ៧ពាន់លានដុល្លារ

អ៊ុយក្រែនត្រៀមខ្លួនរួចជាស្រេចសម្រាប់កិច្ចប្រជុំថ្នាក់ដឹកនាំជាមួយរុស្ស៊ីក្រោមការសម្របសម្រួល

តម្លៃប្រេងឆៅធ្លាក់ចុះជាង ១០ ភាគរយ ខណៈច្រកសមុទ្រហ័រមូសបើកដំណើរការឡើងវិញ

ពលរដ្ឋលីបង់ភៀសខ្លួនពីសង្គ្រាមសម្រុកវិលត្រឡប់ទៅភាគខាងត្បូងវិញនៅថ្ងៃទីពីរនៃបទឈប់បាញ់ជាមួយអ៊ីស្រាអែល

អ្នកស្រុក Manipur របស់ឥណ្ឌាប្រមូលផ្ដុំដោយកាន់គប់ភ្លើង ជុំវិញការផ្ទុះដ៏សាហាវដែលបានសម្លាប់កុមារពីរនាក់

ពិធីអបអរសាទរបុណ្យចូលឆ្នាំថ្មីប្រពៃណីខ្មែរ រៀបចំដោយសមាគមនិស្សិតខ្មែរនៅប្រទេសជប៉ុន

អាមេរិកបន្តលើកលែងទណ្ឌកម្មប្រេងរុស្ស៊ី ក្រោយមានសម្ពាធពីប្រទេសដែលកំពុងដោះស្រាយវិបត្តិតម្លៃប្រេងក្នុងពេលមានសង្គ្រាមអ៊ីរ៉ង់

អ៊ីរ៉ង់គំរាមបិទច្រកសមុទ្រហ័រមូស (Hormuz) ប្រសិនបើអាមេរិកនៅតែបន្តបិទកំពង់ផែរបស់ខ្លួន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877