BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

ប្រមុខក្រុមឧទ្ទាមហេសបូឡា និយាយថា ខ្លួនមិនអាចនៅស្ងៀមទេ បន្ទាប់ពីការសម្លាប់មេដឹកនាំរងក្រុមហាម៉ាស

ប្រមុខក្រុមឧទ្ទាមហេសបូឡា (Hezbollah) របស់ប្រទេសលីបង់បាននិយាយកាលពីថ្ងៃពុធ (០៣ មករា) ថាខ្លួនមិនអាចនៅស្ងៀមបានទេបន្ទាប់ពីការសម្លាប់មេដឹកនាំរងរបស់ក្រុមហាម៉ាស នៅទីក្រុងបេរូត ហើយបានព្រមានថាកងកម្លាំងប្រដាប់អាវុធដ៏ខ្លាំងរបស់លោកនឹងប្រយុទ្ធរហូតដល់ទីបញ្ចប់ ប្រសិនបើអ៊ីស្រាអែលជ្រើសរើសបន្តសង្គ្រាមពីតំបន់ហ្កាហ្សា ទៅដល់លីបង់។នៅក្នុងសុន្ទរកថាតាមទូរទស្សន៍កាលពីថ្ងៃពុធ លោក សាយយ៉េដ ហាសសាន ណាស្រាលឡាស (Sayyed Hassan Nasrallah) បានបន្ទោសអ៊ីស្រាអែល ចំពោះការវាយប្រហារនោះ និងបានសម្ដែងការរំលែកទុក្ខដល់ក្រុមហាម៉ាស សម្រាប់អ្វីដែលលោកហៅថា «ការឈ្លានពានដ៏ច្បាស់របស់អ៊ីស្រាអែល» ដែលបានសម្លាប់លោក សាឡេស អាល់ អារ៉ួរី (Saleh al-Arouri)។ក្នុងពេលជាមួយគ្នានោះ កងកម្លាំងអ៊ីស្រាអែលបានបន្តវាយលុកពីលើអាកាស និងជើងគោកប្រឆាំងនឹងក្រុមសកម្មប្រយុទ្ធហាម៉ាស នៅតំបន់ហ្កាហ្សា ហើយបានប្រាប់ជនស៊ីវិលឱ្យចាកចេញពីជំរំជនភៀសខ្លួនមួយនៅភាគខាងជើងនៃតំបន់ហ៊ុមព័ទ្ធប៉ាឡេស្ទីននេះ។អ៊ីស្រាអែល ដែលបានបង្កការបំផ្លិចបំផ្លាញដល់តំបន់ហ្កាហ្សាស្ទ្រីប ក្នុងការវាយលុកមួយដើម្បីលុបបំបាត់ក្រុមហាម៉ាស មិនបានអះអាងទទួលខុសត្រូវ ឬបដិសេធថាខ្លួនមិនបានធ្វើឃាតលោក សាឡេស អាល់ អារ៉ួរី នៅក្នុងការវាយប្រហារដោយយានដ្រូននៅក្នុងរដ្ឋធានីលីបង់ កាលពីថ្ងៃអង្គារនោះទេ។ ប៉ុន្តែអ្នកនាំពាក្យយោធារបស់រដ្ឋជី្វហ្វមួយនេះបាននិយាយថា កងកម្លាំងអ៊ីស្រាអែលកំពុងស្ថិតក្នុងស្ថានភាពត្រៀមខ្លួនខ្ពស់ និងត្រៀមខ្លួនរួចជាស្រេចសម្រាប់សេណារីយ៉ូណាមួយដែលអាចកើតមាន៕

ប្រធានគោលនយោបាយការបរទេសអឺរ៉ុប៖ ពិភពលោកត្រូវតែកំណត់ដំណោះស្រាយចំពោះជម្លោះនៅហ្កាហ្សា

ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយកាលពីថ្ងៃពុធថា សហគមន៍អន្តរជាតិត្រូវតែកំណត់ដំណោះស្រាយចំពោះជម្លោះរវាងអ៊ីស្រាអែល និងក្រុមហាម៉ាស់ ខណៈភាគីជម្លោះនេះ មិនអាចដោះស្រាយគ្នាបាន។លោកបានថ្លែងនៅក្នុងព្រឹត្តិការណ៍មួយនៅទីក្រុង Lisbon ថា ដំណោះស្រាយត្រូវតែដាក់ចេញពីខាងក្រៅ ព្រោះភាគីទាំងពីរ នឹងមិនអាចឈានដល់កិច្ចព្រមព្រៀងបានឡើយ។លោក Borrell បាននិយាយថា ប្រសិនបើការប្រយុទ្ធគ្នា មិនបញ្ចប់ក្នុងពេលឆាប់ៗនេះទេ តំបន់មជ្ឈិមបូព៌ាទាំងមូលអាចនឹងត្រូវអូសបន្លាយ។ កាលពីថ្ងៃពុធ ផ្សែងខ្មួលខ្មាញ់ ត្រូវបានគេមើលឃើញពីជំរុំបណ្ដោះអាសន្ន ជាទីជម្រកជនភៀសខ្លួននៅទីក្រុង Rafah ភាគខាងត្បូងតំបន់ហ្កាហ្សា កាលពីថ្ងៃពុធ ខណៈកងកម្លាំងអ៊ីស្រាអែល បន្តការវាយលុករបស់ពួកគេទៅលើតំបន់ហ៊ុមព័ទ្ធប៉ាឡេស្ទីន។ពលរដ្ឋ និងប្រព័ន្ធផ្សព្វផ្សាយប៉ាឡេស្ទីន បាននិយាយថា កងកម្លាំងអ៊ីស្រាអែល បានទម្លាក់គ្រាប់បែកលើជំរុំជនភៀសខ្លួន Al-Nusseirat នៅភាគខាងជើងតំបន់ហ៊ុមព័ទ្ធដែលគ្រប់គ្រងដោយក្រុមហាម៉ាស ពេញមួយយប់ និងឈានចូលដល់ថ្ងៃពុធ ដោយបានបំផ្លាញអគារច្រើនជាន់ ជាច្រើនកន្លែង។ការទម្លាក់គ្រាប់បែករបស់អ៊ីស្រាអែល បានរាយពាសពេញដល់តំបន់ហ៊ុមព័ទ្ធជាច្រើន ហើយពលរដ្ឋចំនួន ២,៣ លាននាក់ ត្រូវរងគ្រោះដោយមហន្តរាយមនុស្សធម៌ ដែលមនុស្សរាប់ពាន់នាក់ត្រូវបានបន្សល់ ទុកការខ្វះខាតខ្លាំង នៅក្នុងតំបន់រួមតូចជាច្រើនក្នុងក្តីសង្ឃឹមថាពួកគេមាននឹងសុវត្ថិភាព ប៉ុន្តែត្រូវបានគំរាមកំហែងដោយគ្រោះទុរ្ភិក្សដោយសារកង្វះការផ្គត់ផ្គង់ស្បៀងអាហារ។

ក្រុមហេសបូឡា និងអ៊ីស្រាអ៊ែល ទំនងជាបង្ហាញសញ្ញាថា គ្មានបំណងចង់ឲ្យសង្រ្គាមហ្កាហ្សារាលដាលឡើយ

ក្រុមហេសបូឡានៅក្នុងប្រទេសលីបង់ និងកងទ័ពអ៊ីស្រាអែល បានធ្វើសេចក្តីថ្លែងការណ៍ ដែលបាននិយាយថា សត្រូវដែលបើកចំហទាំងពីរ មានបំណងបញ្ចៀសហានិភ័យពីការរីករាលដាលសង្រ្គាម លើសពីតំបន់ហ្កាហ្សា បន្ទាប់ពីការវាយប្រហារដោយយានដ្រូន បណ្តាលឲ្យមេដឹកនាំរងក្រុមហាម៉ាសប៉ាឡេស្ទីនម្នាក់ស្លាប់ នៅទីក្រុងបេរូត។ នៅក្នុងសុន្ទរកថាក្នុងទីក្រុងបេរូត កាលពីថ្ងៃពុធ មេដឹកនាំក្រុមហេសបូឡា លោក Hassan Nasrallah បានប្តេជ្ញាថា ក្រុមជីវពលនិកាយស៊ីអ៊ីតគាំទ្រដោយអ៊ីរ៉ង់ដ៏មានឥទ្ធិពលរបស់លោក មិនអាចនៅស្ងៀមបានឡើយ បន្ទាប់ពីការសម្លាប់មេដឹកនាំរងក្រុមហាម៉ាស លោក Saleh al-Arouri កាលពីថ្ងៃអង្គារ។ លោក Nasrallah បាននិយាយថា កងកម្លាំងប្រដាប់អាវុធដ៏ច្រើនរបស់លោក នឹងប្រយុទ្ធរហូតដល់ទីបញ្ចប់ ប្រសិនបើអ៊ីស្រាអែល ជ្រើសរើសការបន្តសង្គ្រាមចូលទៅកាន់ប្រទេសលីបង់ ប៉ុន្តែលោកពុំបានគំរាមកំហែងជាក់ស្តែងណាមួយ ដើម្បីធ្វើសកម្មភាពប្រឆាំងអ៊ីស្រាអែល ក្នុងការគាំទ្រក្រុមហាម៉ាស ដែលជាសម្ព័ន្ធមិត្តរបស់ក្រុមហេសបូឡាគាំទ្រដោយអ៊ីរ៉ង់។ អ្នកនាំពាក្យយោធាអ៊ីស្រាអែល លោកឧត្តមនាវីឯក Daniel Hagari នៅពេលត្រូវបានសួរថាតើ អ៊ីស្រាអែលនឹងធ្វើអ្វីដើម្បីត្រៀមសម្រាប់ការឆ្លើយតបទៅកាន់ក្រុមហេសបូឡាដ៏មានសក្តានុពល ដោយលោកបានប្រាប់អ្នកសារព័ត៌មានថា លោកនឹងមិនឆ្លើយតបទៅនឹងអ្វីដែលទើបតែបានលើកឡើងនោះទេ។ យើង ផ្តោតសំខាន់ទៅលើការប្រយុទ្ធប្រឆាំងក្រុមហាម៉ាស។ អ្នកនាំពាក្យសេតវិមាន លោក John Kirby ដែលត្រូវបានសួរអំពីសុន្ទរកថារបស់លោក Nasrallah បានប្រាប់អ្នកសារព័ត៌មានថា យើងពុំបានឃើញក្រុមហេសបូឡា ជាប់ពាក់ព័ន្ធក្នុងស្ថានភាពជំនួយ និងការដឹកជញ្ជូនជំនួយរបស់ក្រុមហាម៉ាសនោះទេ។ ការស្លាប់របស់ Aouri គឺជាសញ្ញាមួយបន្ថែមទៀត នៃសក្ដានុពលដែលសង្រ្គាមរយៈពេលជិតបីខែ អាចរាលដាលយ៉ាងខ្លាំងហួសពីតំបន់ហ្កាហ្សា ដោយអូសទាញទាំងនៅតំបន់ West Bank ដែលកាន់កាប់ដោយអ៊ីស្រាអែល កងកម្លាំងហេសបូឡានៅលើព្រំដែនប្រទេសលីបង់-អ៊ីស្រាអែល និងផ្លូវដឹកជញ្ជូននៅសមុទ្រក្រហម។

ការព្រមានរួមចំពោះក្រុមឧទ្ទាមហ៊ូធី៖ ត្រូវបញ្ឈប់ការវាយប្រហារ បើមិនដូច្នេះទេ នឹងត្រូវប្រឈមមុខនឹងផលវិបាកជាច្រើន

ប្រទេសចំនួន១២កាលពីថ្ងៃពុធ បានចេញការព្រមានរួមគ្នាមួយទៅកាន់ក្រុមហួទីដែលគាំទ្រដោយអ៊ីរ៉ង់នៅក្នុងប្រទេសយេម៉ែន ដោយទាមទាឲ្យពួកគេបញ្ឈប់ការវាយប្រហារលើការដឹកជញ្ជូនពាណិជ្ជកម្ម នៅក្នុង សមុទ្រក្រហម។ ទោះជាយ៉ាងនេះក្តី ការព្រមាននេះ មិនបានបញ្ជាក់ថា តើនឹងចាត់វិធានការបែបណា ប្រសិនបើការវាយប្រហារទាំងនេះ នៅតែបន្ត។ ក្រុមនេះ បានធ្វើការវាយប្រហារចំនួន ២៤លើក ចាប់តាំងពីថ្ងៃទី ១៩ ខែវិច្ឆិកា នេះបើយោងតាមទីបញ្ជាការកណ្តាលរបស់សហរដ្ឋអាមេរិក។សហរដ្ឋអាមេរិក អូស្ត្រាលី បារ៉ែន បែលហ្ស៊ិក កាណាដា ដាណឺម៉ាក អាល្លឺម៉ង់ អ៊ីតាលី ជប៉ុន ហូឡង់ នូវែលសេឡង់ និងចក្រភពអង់គ្លេស បានទាមទារនៅក្នុងសេចក្តីថ្លែងការណ៍រួមដែលចេញផ្សាយដោយសេតវិមានកាលពីថ្ងៃពុធថា៖«យើងអំពាវនាវឲ្យបញ្ចប់ជាបន្ទាន់នូវការវាយប្រហារខុសច្បាប់ទាំងនេះ និងដោះលែងនាវា និងនាវិកដែលជាប់ឃុំដោយខុសច្បាប់ទាំងនោះ»។ ក្រុមហួទីនឹងទទួលខុសត្រូវចំពោះផលវិបាកនានា ប្រសិនបើពួកគេ នៅបន្តការគំរាមកំហែងដល់អាយុជីវិត សេដ្ឋកិច្ចពិភពលោក និងលំហូរពាណិជ្ជកម្មសេរី នៅក្នុងផ្លូវទឹកដ៏សំខាន់ក្នុងតំបន់។ យើងនៅតែប្តេជ្ញាចិត្តចំពោះសណ្តាប់ធ្នាប់ដែលផ្អែកលើច្បាប់អន្តរជាតិ ហើយប្តេជ្ញាថា នឹងចាប់តួអង្គអាក្រក់ៗឲ្យទទួលខុសត្រូវ ចំពោះការរឹបអូស និងការវាយប្រហារដោយខុសច្បាប់ទាំងអស់នោះ»។ការព្រមាននេះ បានបញ្ជាក់ថា ការវាយប្រហាររបស់ក្រុមហួទីដែលកំពុងបន្តនៅសមុទ្រក្រហម គឺខុសច្បាប់ មិនអាចទទួលយកបាន និងធ្វើឲ្យអស្ថិរភាពកាន់តែជ្រៅឡើង។ មិនមានហេតុផលត្រឹមត្រូវតាមច្បាប់សម្រាប់គោលដៅដោយចេតនាលើការដឹកជញ្ជូនស៊ីវិល និងនាវាកងទ័ពជើងទឹកនោះទេ។ ការវាយប្រហារលើនាវា រួមទាំងនាវាពាណិជ្ជកម្ម ដោយប្រើយានដ្រូន ទូកតូចៗ និងមីស៊ីល រួមទាំងការប្រើជាលើកដំបូងនូវមីស៊ីលបាលិស្ទិកប្រឆាំងនាវា គឺជាការគំរាមកំហែងដោយផ្ទាល់ចំពោះសេរីភាពនៃការធ្វើនាវាចរណ៍ដែលដើរតួជាមូលដ្ឋានគ្រឹះនៃពាណិជ្ជកម្មពិភពលោក នៅក្នុងផ្លូវទឹកដ៏សំខាន់បំផុតមួយរបស់ពិភពលោក។

រុស្ស៊ី និងអ៊ុយក្រែន ធ្វើការដោះដូរឈ្លើយសឹកសង្គ្រាមដ៏ច្រើន បន្ទាប់ពីការសម្រុះសម្រួលរបស់អារ៉ាប់រួម

ប្រទេសអ៊ុយក្រែន និងរុស្ស៊ី កាលពីថ្ងៃពុធ បានប្រកាសពីការដោះដូរឈ្លើយសឹកសង្គ្រាមលើកដំបូង របស់ពួកគេ ក្នុងរយៈពេលជិត ៥ខែមកនេះ ដោយភាគីម្ខាងៗមានឈ្លើយសឹកជាង ២០០នាក់ ត្រូវដោះលែង បន្ទាប់ពីអ្វីដែលទីក្រុងមូស្គូ បាននិយាយថា ជាការចរចាដ៏ស្មុគស្មាញ ពាក់ព័ន្ធនឹងការសម្រុះសម្រួលដោយប្រទេសអារ៉ាប់រួម។ក្រសួងការពារជាតិរុស្ស៊ី បាននិយាយថា បុគ្គលិកយោធាចំនួន ២៤៨ នាក់ ត្រូវបានប្រគល់ឲ្យដោយភាគីអ៊ុយក្រែន។ ទីក្រុងគីវ បាននិយាយថា ខ្លួនបាននាំមនុស្សត្រឡប់មកប្រទេសវិញចំនួន ២៣០ នាក់ ក្នុងនោះមានទាហាន ២២៤ នាក់ និងជនស៊ីវិល ៦ នាក់ ជាអ្វីដែលខ្លួនបាននិយាយថា ជាការដោះដូរទាហានដែលមានឯកសារច្រើនបំផុតរហូតមកដល់ពេលនេះ។មជ្ឈមណ្ឌលសម្របសម្រួលឈ្លើយសឹកសង្គ្រាម របស់អ៊ុយក្រែន ក៏បានទទួលស្គាល់ភ្លាមៗអំពីតួនាទីរបស់ប្រទេសអារ៉ាប់រួម ក្នុងការដោះដូរនេះ ដោយពុំបានផ្តល់ព័ត៌មានលម្អិតបន្ថែម។ ទោះបីជាមិនមានការសន្ទនាណាមួយ អំពីរបៀបបញ្ចប់សង្រ្គាមរយៈពេល ២២ ខែក៏ដោយ ទីក្រុងគីវ និងទីក្រុងមូស្គូ បានធ្វើការដោះដូរឈ្លើយសឹកជាច្រើននាក់ ចាប់តាំងពីដើមខែដំបូងនៃការវាយលុករបស់រុស្ស៊ី ក្នុងខែកុម្ភៈ ឆ្នាំ ២០២២។

អ៊ីរ៉ង់បន្ទោសអ៊ីស្រាអែល និងអាមេរិក ចំពោះការបំផ្ទុះដ៏សាហាវនៅជិតផ្នូររបស់ឧត្តមសេនីយ Soleimani

អ៊ីរ៉ង់បានស្តីបន្ទោសអ៊ីស្រាអែល និងសហរដ្ឋអាមេរិក កាលពីថ្ងៃពុធចំពោះការបំផ្ទុះគ្រាប់បែកពីរលើកផ្ទួនៗគ្នា ដែលបានសម្លាប់មនុស្សយ៉ាងហោចណាស់៩៥នាក់ នៅភាគខាងត្បូងរបស់ប្រទេសនេះ ដែលបានផ្ទុះនៅក្នុងហ្វូងមនុស្សកំពុងប្រមូលផ្ដុំគ្នាប្រារព្ធពិធីរំលឹកវិញ្ញាណក្ខន្ធលោកឧត្តមសេនីយឆ្មាំបដិវត្ត លោក Qasem Soleimani បួនឆ្នាំបន្ទាប់ពីការស្លាប់របស់លោកក្នុងការវាយប្រហាររបស់សហរដ្ឋអាមេរិក។លោក មហាម៉ាត់ ចាំស៊ីឌី (Mohammad Jamshidi)អនុប្រធានផ្នែកនយោបាយរបស់ប្រធានាធិបតីអ៊ីរ៉ង់ បានសរសេរនៅលើបណ្ដាញសង្គម X ថា ក្រុងវ៉ាស៊ីនតោននិយាយថា សហរដ្ឋអាមេរិក និងអ៊ីស្រាអែល គ្មានតួនាទីក្នុងការវាយប្រហារភេរវកម្មនៅទីក្រុងឃើម៉ាន់(Kerman) បើមិនមែន អញ្ចឹងគឺប្រទេសអ៊ីរ៉ង់ទេមែនទេ?។កញ្ជ្រោង ធំក្លិនខ្លួនគ្នារបស់វាមុនគេ។ លោកបានបន្ថែមថា កុំធ្វើខុស ការទទួលខុសត្រូវចំពោះឧក្រិដ្ឋកម្មនេះស្ថិតនៅជាមួយរបបរបស់សហរដ្ឋអាមេរិក និង ស៊ីយ៉ូនីស (Zionist) របស់អ៊ីស្រាអែល ហើយអំពើភេរវកម្មគ្រាន់តែជាឧបករណ៍មួយប៉ុណ្ណោះ។សហរដ្ឋអាមេរិកបានច្រានចោលរាល់ការលើកឡើងដែលថាខ្លួនឬសម្ព័ន្ធមិត្តអ៊ីស្រាអែលពាក់ព័ន្ធខណៈអ៊ីស្រាអែលបដិសេធមិនធ្វើអត្ថាធិប្បាយជុំវិញរឿងនេះ។ អ្នកនាំពាក្យក្រសួងការបរទេសលោក ម៉ាត់ស៊ូ មីល័រ (Matthew Miller)បាននិយាយថា សហរដ្ឋអាមេរិកពុំបានជាប់ពាក់ព័ន្ធក្នុងមធ្យោបាយណាមួយឡើយ យើងមិនមានហេតុផលដែលត្រូវជឿថាអ៊ីស្រាអែលមានជាប់ពាក់ព័ន្ធនឹងការបំផ្ទុះនេះនោះទេ។នៅពេលសួរអំពីការបំផ្ទុះនេះ អ្នកនាំពាក្យកងទ័ពអ៊ីស្រាអែល លោក ដានីញែល ហាហ្ការី (Daniel Hagari) បាននិយាយថា យើងផ្តោតលើការប្រយុទ្ធជាមួយក្រុមហាម៉ាសតែប៉ុណ្ណោះ៕

ក្រុមអ្នកជំនាញ UN ជំរុញអាមេរិក ឲ្យបញ្ឈប់គម្រោងការប្រហារជីវិតដោយប្រើឧស្ម័នអាសូតជាលើកដំបូង

ក្រុមអ្នកជំនាញរបស់អង្គការសហប្រជាជាតិ កាលពីថ្ងៃពុធ (០៣ មករា) បានជំរុញឱ្យអាជ្ញាធរសហរដ្ឋអាមេរិក បញ្ឈប់ផែនការប្រហារជីវិតអ្នកទោសម្នាក់ដោយការថប់ដង្ហើមដល់ស្លាប់ ដោយប្រើប្រាស់ឧស្ម័នអាសូតសុទ្ធ ដោយនិយាយថាវិធីសាស្ត្រ ដែលមិនបានសាកល្បងនេះ អាចធ្វើឱ្យអ្នកទោសនោះទទួលរងនូវ «ការប្រព្រឹត្តិអំពើឃោរឃៅ អមនុស្សធម៌ ឬថោកទាប និងដូចជាការធ្វើទារុណកម្ម»។អ្នកទោសឈ្មោះ ខេននីត ស្មីត (Kenneth Smith) វ័យ ៥៨ឆ្នាំ ដែលត្រូវបានកាត់ទោសពីបទស៊ីឈ្នួលឃាតកម្ម ដែលបានប្រព្រឹត្តក្នុងឆ្នាំ១៩៨៨ គ្រោងនឹងត្រូវប្រហារជីវិតនៅរដ្ឋ អាឡាបាម៉ា (Alabama) របស់សហរដ្ឋអាមេរិក នៅថ្ងៃទី២៥ ខែមករា ខាងមុខនេះដោយប្រើវិធីសាស្ត្រ ដែលមានបំណងកាត់ផ្ដាច់អុកស៊ីសែនដោយការប្រើម៉ាសគ្របមុខដែលភ្ជាប់ទៅស៊ីឡាំងឧស្ម័នអាសូត។នេះជាលើកដំបូងហើយក្នុងពិភពលោក ដែលការកាត់ទោសតាមផ្លូវតុលាការត្រូវបានអនុវត្តដោយប្រើការថប់ដង្ហើមដល់ស្លាប់ដោយឧស្ម័នអសកម្មបែបនេះ នេះបើយោងតាមក្រុមអ្នកជំនាញការដាក់ទោសទណ្ឌ។អ្នករាយការណ៍ពិសេសសិទ្ធិមនុស្សរបស់អង្គការសហប្រជាជាតិចំនួនបួននាក់បាននិយាយថា វិធីសាស្ត្រប្រហារជីវិតថ្មីនេះអាចបង្កឱ្យមាន «ការឈឺចាប់យ៉ាងធ្ងន់ធ្ងរ» និង «ការស្លាប់ដ៏ឈឺចាប់ និងគួរឱ្យអាម៉ាស់» ដែលទំនងជាបំពានលើសន្ធិសញ្ញាអន្តរជាតិ ដែលសហរដ្ឋអាមេរិកជាភាគី ដោយហាមឃាត់ការធ្វើទារុណកម្ម និងអំពើឃោរឃៅអមនុស្សធម៌ផ្សេងទៀត ព្រមទាំងការដាក់ទណ្ឌកម្មយ៉ាងថោកទាបជាដើម៕

ប្រជាជនហ្កាហ្សា អាចត្រូវបានបញ្ជូនទៅកុងហ្គោ នៅពេលដែលសង្គ្រាមអ៊ីស្រាអែលបញ្ចប់

ប្រជាជនហ្កាហ្សា អាចត្រូវបានបញ្ជូនទៅប្រទេសកុងហ្គោ នៅពេលបញ្ចប់សង្គ្រាមរបស់អ៊ីស្រាអែលប្រឆាំងនឹងក្រុមហាម៉ាស់ក្រោម «គម្រោងទេសន្តរប្រវេសន៍ដោយស្ម័គ្រចិត្ត»។រដ្ឋាភិបាលរបស់លោកបេនចាមីន ណេតាន់យ៉ាហ៊ូ (Benjamin Netanyahu) ត្រូវបានគេរាយការណ៍ថាកំពុងធ្វើការចរចាសម្ងាត់ ដែលលោកកំពុងចង់ឲ្យប្រទេសកុងហ្គោ និងប្រទេសដទៃទៀតទទួលយកជនអន្តោប្រវេសន៍រាប់ពាន់នាក់។ប្រភពដ៏សំខាន់មួយនៅក្នុគណៈកម្មាការធិការទទួលបន្ទុកផ្នែកសន្តិសុខ បានប្រាប់គេហទំព័រព័ត៌មាន Zman Israelថា៖«ប្រទេសកុងហ្គោ នឹងមានឆន្ទៈក្នុងការទទួលយកជនអន្តោប្រវេសន៍ ហើយយើងកំពុងពិភាក្សាជាមួយប្រទេសផ្សេងទៀត»។របាយការណ៍ព័ត៌មាន បានឲ្យដឹងថា៖«ការធ្វើទេសន្តរប្រវេសន៍របស់ប្រជាជនហ្កាហ្សា កំពុងក្លាយជាគោលនយោបាយនាំមុខគេរបស់រដ្ឋាភិបាលដែលជាដំណោះស្រាយមួយចំពោះជម្លោះនេះ។នៅក្នុងតំបន់ហ្កាហ្សា វិបត្តិមនុស្សធម៌កំពុងកើនឡើង ចំពេលមានការខ្វះខាតការផ្គត់ផ្គង់ រួមទាំងស្បៀងអាហារ និងទឹកស្អាតផងដែរ។ តើនឹងមានអ្វីកើតឡើងចំពោះដែនដីនេះ នៅចុងបញ្ចប់នៃការប្រយុទ្ធគ្នានៅមិនទាន់ច្បាស់នៅឡើយនោះ។ប្រទេសកុងហ្គោមានកម្រិតវិសមភាពខ្ពស់ ហើយ ៥២,៥ភាគរយនៃចំនួនប្រជាជន រស់នៅក្រោមបន្ទាត់នៃភាពក្រីក្រ។លោកណេតាន់យ៉ាហ៊ូ បានថ្លែងប្រាប់កិច្ចប្រជុំបក្សសម្ព័ន្ធ Likud កាលពីសប្តាហ៍មុនថា លោកកំពុងធ្វើការឆ្ពោះទៅរកការសម្របសម្រួលឲ្យមានការធ្វើទេសន្តរប្រវេសន៍ដោយស្ម័គ្រចិត្តនៃប្រជាជនហ្កាហ្សា។

ប្រធានចារកម្មអ៊ីស្រាអែល ប្តេជ្ញាតាមស្វែងរកចាប់ភេរវករហាម៉ាសទាំងអស់ ដែលទទួលខុសត្រូវចំពោះការវាយនៅថ្ងៃទី៧ ខែតុលា

ប្រធានទីភ្នាក់ងារចារកម្មរបស់ប្រទេសនេះ បាននិយាយកាលពីថ្ងៃពុធថា អ៊ីស្រាអែលនឹងតាមស្វែងរកក្រុមភេរវករ ហាម៉ាសទាំងអស់ដែលទទួលខុសត្រូវចំពោះការវាយប្រហារកាលពីថ្ងៃទី៧ ខែតុលា លើទីក្រុងព្រំដែនអ៊ីស្រាអែល ដែលក្នុងនោះអ៊ីស្រាអែល និយាយថា មនុស្ស ១.២០០នាក់ ត្រូវបានសម្លាប់ និងច្រើនជាង ២៤០នាក់ ត្រូវបានចាប់ធ្វើជាចំណាប់ថ្នូរ។ ការវាយប្រហារនេះ បានបង្កឲ្យមានសង្គ្រាមអ៊ីស្រាអែល និងក្រុមហាម៉ាសបច្ចុប្បន្ន។ប្រធានទីភ្នាក់ងារចារម្ម Mossad លោក David Barnea បាននិយាយនៅជិតទីក្រុងតែលអាវីវ (Tel Aviv) ក្នុងអំឡុងពេលថ្លែងសុន្ទរកថាទៅកាន់អ្នកស្នងតំណែងមុនរបស់ខ្លួនគឺ លោក Zvi Zamir ថា សូមឲ្យម្តាយជនជាតិអារ៉ាប់គ្រប់រូបដឹងថា ប្រសិនបើកូនប្រុសរបស់គាត់ បានចូលរួមដោយផ្ទាល់ ឬដោយប្រយោល នៅក្នុងការសម្លាប់រង្គាលថ្ងៃទី៧ ខែតុលា ឈាមរបស់គាត់ នឹងត្រូវបាត់បង់» ។លោកបានបន្ថែមថា៖«ថ្ងៃនេះ យើងនៅកណ្តាលសង្រ្គាមម្តងទៀត។ ទីភ្នាក់ងារចារកម្ម Mossad ថ្ងៃនេះដូចកាលពី ៥០ឆ្នាំមុន ប្តេជ្ញាដោះស្រាយបញ្ហានេះជាមួយក្រុមឃាតករដែលបានវាយលុកទូទាំងតំបន់ ហ្កាហ្សាកាលពីថ្ងៃទី៧ ខែតុលា ជាមួយអ្នករៀបចំផែនការ និងជាមួយអ្នកដែលដាក់បញ្ជូនពួកគេទៅ។ វានឹងត្រូវការពេលវេលា ព្រោះវាត្រូវការពេលវេលា បន្ទាប់ពីការសម្លាប់រង្គាលក្នុងទីក្រុងមុយនិក (Munich) ប៉ុន្តែយើងនឹងតាមស្វែងរកចាប់ពួក មិនថាពួកគេ នៅទីណានោះទេ»។មន្ត្រីអ៊ីស្រាអែល បាននិយាយថា មេក្លោងនៃការវាយប្រហារថ្ងៃទី៧ ខែតុលា គឺលោក Yahya Sinwar មេដឹកនាំក្រុមហាម៉ាស នៅតំបន់ហ្គាហ្សា និងលោក Mohammed Deif មេបញ្ជាការយោធា នៅតែមានវត្តមាន ហើយអ៊ីស្រាអែល បានបញ្ជាក់ថា វាអាចត្រូវការពេលច្រើនខែទៀត ដើម្បីតាមស្វែងរកចាប់ពួកគេ។

ក្រុមអ្នកសង្រ្គោះជនរងគ្រោះក្នុងបំណាក់ដីនៅប្រទេសជប៉ុន ជួបឧបសគ្គដោយសារអាកាសធាតុខណៈអ្នកស្លាប់បន្តកើនឡើង

ក្រុមអ្នកជួយសង្គ្រោះជប៉ុនបានតស៊ូនឹងភ្លៀងធ្លាក់ខ្លាំង ការរាំងស្ទះផ្លូវ និងរលករញ្ជួយកាលពីថ្ងៃពុធទី ៣ ខែមករា បន្ទាប់ពីការរញ្ជួយដីដ៏ខ្លាំងក្លាដែលបានសម្លាប់មនុស្សយ៉ាងហោចណាស់ ៧៣ នាក់ និងធ្វើឱ្យមនុស្សរាប់ម៉ឺននាក់គ្មានថាមពលអគ្គិសនី ឬទឹកស្អាតប្រើប្រាស់។ នៅទូទាំងខេត្ត អ៊ីហ្ស៊ីកាវ៉ា(Ishikawa) នៅលើកោះហ៊ុងស៊ូ (Honshu) ស៊ីរ៉ែនបានបន្លើឡើង ខណៈរថយន្តសង្គ្រោះបន្ទាន់ព្យាយាមបើកជំម្នះផ្លូវនានា ដែលត្រូវបានរាំងខ្ទប់ដោយកម្ទេចថ្មនិងដើមឈើដួលរលំ។ឧបទ្វីប ណូតូ(Noto) រងការវាយប្រហារយ៉ាងធ្ងន់ធ្ងរបំផុតដោយការរញ្ជួយដីកម្រិត ៧,៥ រ៉ិចទ័រ កាលពីថ្ងៃទី ១ ខែមករា ទន្ទឹមនឹងទីក្រុងកំពង់ផែដូចជា វ៉ាជីម៉ា (Wajima) និងទីក្រុងស៊ូស៊ុយ (Suzu) ក៏មិនខុសពីតំបន់រងគ្រោះផ្សេងៗ ដែលផ្លូវត្រូវបានគ្របដណ្ដប់ដោយល្បប់ លំនៅឋានជាច្រើនខ្នងបាក់រាបដល់ដី និងទូកជាច្រើនគ្រឿងបានលិច។ លោកអភិបាលក្រុង ម៉ាស៊ូហ៊ីរ៉ូ អ៊ីហ្ស៊ូមីយ៉ា (Masuhiro Izumiya) បាននិយាយថា ស្ទើរតែគ្មានផ្ទះសម្បែងណាមួយនៅឈរទេ នៅក្នុងទីក្រុងមួយនៅក្នុងតំបន់ ស៊ូស៊ុយ ។ យោងតាមទូរទស្សន៍ TBS លោកអភិបាលក្រុង បាននិយាយថា លំនៅឋានប្រហែល៩០ % នៅក្នុងទីក្រុងនោះ ត្រូវបានបំផ្លាញទាំងស្រុង ឬស្ទើរតែទាំងស្រុង ហើយស្ថានភាពពិតជាមហន្តរាយបំផុត ។ រដ្ឋាភិបាលក្នុងតំបន់បានបញ្ជាក់ថា មនុស្ស ៧៣នាក់បានស្លាប់ និងជិត ៤០០នាក់រងរបួស ប៉ុន្តែចំនួនអ្នកស្លាប់ត្រូវបានគេរំពឹងថានឹងកើនឡើង។ មនុស្សជាង៣៣.៤០០ នាក់ ស្ថិតនៅក្នុងជម្រកបណ្ដោះអាសន្នហើយអគារយ៉ាងហោចណាស់ ២០០ បានដួលរលំ។ក្រុមហ៊ុនផ្គត់ផ្គង់ថាមពលអគ្គិសនី ក្នុងតំបន់បាននិយាយថា មនុស្សប្រហែល៣០.០០០ គ្រួសារនៅតែគ្មានថាមពលប្រើប្រាស់ នៅក្នុងខេត្ត អ៊ីហ្ស៊ីកាវ៉ា (Ishikawa) ហើយមនុស្សជាង១១០.០០០ គ្រួសារ គ្មានទឹកប្រើប្រាស់៕

បណ្ដាញសង្គម

ព័ត៌មានថ្មីៗ

ស្នងការ៖ស្ថានភាពសន្តិសុខក្នុងព្រឹត្តិការណ៍នគរសង្ក្រាន្តមានភាពល្អប្រសើរមិនមានបាតុភាពណាមួយកើតឡើងទេ

ក្រុមការងារគោលដៅបាសាក់លែន អំពាវនាវទេសចរជាតិ អន្តរជាតិមកចូលរួមលេងកម្សាន្តឱ្យបានច្រើន

ក្រុមគ្រូពេទ្យជាង ១ពាន់នាក់ និងស្តង់សុខភាពប្រចាំការ ត្រៀមសង្រ្គោះបឋម ជូនភ្ញៀវជាតិ និងអន្តរជាតិ ចូលមកកម្សាន្តក្នុងព្រឹតិ្តការណ៍នគរសង្រ្កាន្ត

អភិបាលរាជធានីភ្នំពេញ៖ ការការពារសន្តិសុខជូនពលរដ្ឋក្នុងព្រឹត្តិការណ៍ «នគរសង្ក្រាន្ត» គឺជាការងារចម្បងរបស់រដ្ឋបាលរាជធានីភ្នំពេញ

ភ្ញៀវទេសចរជាច្រើននាំគ្នាទៅលេងកម្សាន្តនៅតំបន់រមណីយដ្ឋានទឹកឈូច្រើនក្នុងឱកាសចូលឆ្នាំថ្ងៃទីពីរ

ពលករ និងសហគមន៍ខ្មែរនៅប្រទេសម៉ាឡេស៊ីជួបជុំរៀបចំពិធីបុណ្យចូលឆ្នាំថ្មីប្រពៃណីខ្មែរយ៉ាងសប្បាយរីករាយដើម្បីបង្ហាញពីវប្បធម៌ប្រពៃណីជាតិដ៏ផូរផង់

កម្ពុជា បដិសេធចំពោះការផ្សាយរបស់សារព័ត៌មានថៃថា «កម្ពុជាស្នើឱ្យបើកច្រកដឹកជញ្ជូនទំនិញសង្គ្រោះបន្ទាន់» ដែលនេះជាព័ត៌មានក្លែងក្លាយ

រដ្ឋមន្ត្រីក្រសួងទេសចរណ៍ អញ្ជើញចូលរួម ព្រឹត្តិការណ៍លៀសហាល ចំនួន ៥តោន ជាមួយថ្នាក់ដឹកនាំ និងប្រជាពលរដ្ឋខេត្តកំពង់ចាម

នាវាដឹកប្រេងចិនរងទណ្ឌកម្មអាមេរិក ធ្វើដំណើរឆ្លងកាត់ច្រកសមុទ្រ Hormuz

ធានាធិបតីកូរ៉េខាងត្បូង ព្រមានថាជម្លោះមជ្ឈិមបូព៌ានឹងធ្វើឲ្យតម្លៃប្រេងនៅតែហក់ឡើងខ្ពស់ប្រធ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877