BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

ជនជាតិប៉ាឡេស្ទីនជាង ២១.១០០នាក់ បានស្លាប់នៅហ្កាហ្សា ក្នុងការវាយប្រហាររបស់អ៊ីស្រាអែល ចាប់តាំងពីថ្ងៃទី៧ ខែតុលា

ក្រសួងសុខាភិបាលហ្កាហ្សាបាននិយាយកាលពីថ្ងៃពុធថាប្រជាជនប៉ាឡេស្ទីនសរុបចំនួន ២១.១១០ នាក់បានស្លាប់ និង៥៥.២៤៣នាក់ បានរងរបួសនៅក្នុងការវាយប្រហាររបស់អ៊ីស្រាអែលនៅក្នុងតំបន់ហ្កាហ្សា ចាប់តាំងពី ក្រុមហាម៉ាស បានវាយសម្រុកចូលក្នុងប្រទេសអ៊ីស្រាអែលភាគខាងត្បូងសម្លាប់មនុស្សជាង១ពាន់នាក់ កាលពីថ្ងៃទី ៧ខែតុលា មក ។ ក្រសួងនេះ បានបន្ថែមថា តួលេខនេះរួមមានជនជាតិប៉ាឡេស្ទីន ១៩៥ នាក់បានស្លាប់ និង ៣២៥ នាក់ បានរងរបួសក្នុងរយៈពេល ២៤ ម៉ោងកន្លងមក។ កងកម្លាំងអ៊ីស្រាអែលបានបន្តវាយលុកភាគកណ្តាលតំបន់ហ្កាហ្សាដោយថ្មើជើង តាមសមុទ្រ និងផ្លូវអាកាសកាលពីថ្ងៃពុធ ហើយការដាច់ប្រព័ន្ធទូរគមនាគមន៍នៅក្នុងតំបន់ជាច្រើនក្នុងដែនដីរងការឡោមព័ទ្ធនេះ បានប៉ះពាល់ដល់កិច្ចខិតខំប្រឹងប្រែងដើម្បី ធ្វើដំណើរទៅឲ្យដល់ កន្លែងដែលមានប្រជាពលរដ្ឋប៉ាឡេស្ទីន ស្លាប់ និងរបួស។ ចាប់តាំងពីក្រុមហាម៉ាស បានសម្លាប់មនុស្សប្រមាណ១.២០០នាក់ និងចាប់មនុស្សជាចំណាប់ថ្នូរ ចំនួន២៤០ នាក់កាលពីថ្ងៃទី ៧ ខែតុលា ក្នុងថ្ងៃដ៏អាក្រក់បំផុតក្នុងប្រវត្តិសាស្ត្រអ៊ីស្រាអែល នាយករដ្ឋមន្ត្រីអ៊ីស្រាអែលលោក Benjamin Netanyahu បានឆ្លើយតបដោយការវាយប្រហារ កម្ទេច មិនបង្អង់ដៃ លើតំបន់ហ្កាហ្សាគ្រប់គ្រងដោយក្រុមហាម៉ាស។ អ៊ីស្រាអែលនិយាយថា ខ្លួនកំពុងធ្វើអ្វីដែលខ្លួនអាចធ្វើបានដើម្បីការពារជនស៊ីវិល ហើយបានស្តីបន្ទោសក្រុមហាម៉ាស ថាជាដើមចមធ្វើឱ្យពួកគេមានគ្រោះថ្នាក់ដោយប្រតិបត្តិការក្នុងចំណោមពួកគេ ដែលក្រុមហាម៉ាស បានច្រានចោល ប៉ុន្តែសូម្បីតែសម្ព័ន្ធមិត្តជិតស្និទ្ធបំផុតរបស់អ៊ីស្រាអែល គឺសហរដ្ឋអាមេរិកបាននិយាយថា អ៊ីស្រាអែលគួរតែធ្វើបន្ថែមទៀតដើម្បីកាត់បន្ថយការស្លាប់របស់ជនស៊ីវិល ពីអ្វីដែលលោកប្រធានាធិបតី Joe Biden បានហៅថា ជាការទម្លាក់គ្រាប់បែកដោយមិនរើសមុខ៕

នាវិករុស្ស៊ី ៣៣នាក់ បានបាត់ខ្លួន បន្ទាប់ពីនាវាចម្បាំង ត្រូវបានវាយប្រហារនៅតំបន់គ្រីម៉េ

ទាហានជើងទឹករុស្ស៊ីចំនួន ៣៣ នាក់បានបាត់ខ្លួន បន្ទាប់ពីការវាយប្រហារដោយមីស៊ីលរបស់អ៊ុយក្រែន លើនាវាចម្បាំងនៅតំបន់គ្រីម៉េ (Crimea) ដែលគ្រប់គ្រងដោយរុស្ស៊ី នេះបើយោងតាមរបាយការណ៍។កងទ័ពអាកាសអ៊ុយក្រែនកាលពីម្សិលមិញ បានអះអាងថា ខ្លួនបាន «បំផ្លាញ» នាវា Novocherkasskដែលកំពុងចតនៅ កំពង់ផែ Feodosia ក្នុងការវាយប្រហារមួយ ដែលមានសញ្ញាសម្គាល់នៃមីស៊ីលតម្រង់គោលដៅរបស់ចក្រភពអង់គ្លេស Storm Shadow ។នាវិកប្រហែល ៨០នាក់ នៅលើនាវានោះ នៅពេលដែលមីស៊ីល បានវាយប្រហារ នេះបើយោងតាមសារព័ត៌មាន Astra ជាបណ្តាញព័ត៌មាន Telegram ដែលរាយការណ៍អំពីសង្គ្រាម នៅអ៊ុយក្រែន។សារព័ត៌មាន Astra បានរាយការណ៍ថា មនុស្ស ១៩នាក់ បានរងរបួស នៅក្នុងការវាយប្រហារ ហើយ ៣៣ នាក់ផ្សេងទៀត នៅបាត់ខ្លួន។សារព័ត៌មាននេះ បានបន្ថែមថា ជនស៊ីវិលម្នាក់ ត្រូវបានសម្លាប់ និង៤នាក់ផ្សេងទៀត បានរងរបួសក្នុងការការវាយប្រហារនោះ ។វិមានក្រឹមឡាំង បាននិយាយថា នាវា Novocherkassk ត្រូវបាន «ខូចខាត» ដោយមីស៊ីលតម្រង់គោលដៅពីលើអាកាស ប៉ុន្តែមិនបាននិយាយអំពីការស្លាប់ និងរបួសណាមួយឡើយ។

ចំនួនអ្នកស្លាប់ក្នុងការវាយប្រហារនៅប្រទេសនីហ្ស៊េរីយ៉ា ភាគកណ្ដាលបានកើនឡើងដល់១៩៨នាក់

ក្រុមអាជ្ញាធរក្នុងស្រុក បាននិយាយកាលពីថ្ងៃពុធថា ចំនួនអ្នកស្លាប់ពីការវាយប្រហារជាបន្តបន្ទាប់លើភូមិនានាក្នុងប្រទេសនីហ្ស៊េរីយ៉ា ភាគកណ្ដាល បានកើនឡើងដល់ជិត២០០នាក់ ហើយ។ ក្រុមប្រដាប់អាវុធ បានបើកការវាយប្រហារនចន្លោះល្ងាចថ្ងៃសៅរ៍ និងព្រឹកថ្ងៃអង្គារ នៅក្នុងរដ្ឋផ្លាតូ (Plateau State) របស់ប្រទេសនីហ្ស៊េរីយ៉ា។ក្រុមអាជ្ញាធរបានដាក់ចំនួនអ្នកស្លាប់កាលពីថ្មីៗនេះ ក្នុងចំនួន១៦៣នាក់។ក្នុងអំឡុងជំនួបមួយជាមួយអនុប្រធានាធិបតីនីហ្ស៊េរីយ៉ា កាលពីថ្ងៃពុធ ប្រមុខរដ្ឋាភិបាលប្រចាំតំបន់ក្នុងទីក្រុងបូកូស (Bokkos )នៃរដ្ឋ ផ្លាតូ លោក ម៉ាន់ដេ កាសា (Monday Kassah) បាននិយាយថា អ្នកភូមិបូកូស ១៤៨នាក់ បានស្លាប់ នៅក្នុងការវាយប្រហារទាំងនោះ។ យោងតាមលោក ឌីកស៊ុន កូឡូម (Dickson Chollom) សមាជិកសភាប្រចាំរដ្ឋ បាននិយាយថាមនុស្សយ៉ាងហោចណាស់៥០នាក់ ក៏ត្រូវបានគេរាយការណ៍ថាបានស្លាប់ផងដែរនៅក្នុងភូមិមួយចំនួន ក្នុងតំបន់ បាគីន ឡាឌី(Barkin Ladi)៕

មេដឹកនាំកូរ៉េខាងជើង បញ្ជាឲ្យយោធាពន្លឿនការត្រៀមខ្លួនធ្វើសង្រ្គាម

ប្រព័ន្ធផ្សព្វផ្សាយរដ្ឋបាននិយាយនៅថ្ងៃព្រហស្បតិ៍ (២៨ ធ្នូ) នេះថាមេដឹកនាំកូរ៉េខាងជើង លោក គីម ជុងអ៊ុន បានបញ្ជាឱ្យយោធា ឧស្សាហកម្មសព្វាវុធ និងវិស័យអាវុធនុយក្លេអ៊ែររបស់ខ្លួនឲ្យពន្លឿនការរៀបចំខ្លួនធ្វើសង្រ្គាមដើម្បីទប់ទល់នឹងអ្វីដែលលោកហៅថាការប្រឈមមុខដាក់គ្នាដែលមិនធ្លាប់មានពីមុនមកដោយសហរដ្ឋអាមេរិក។ដោយថ្លែងអំពីទិសដៅគោលនយោបាយសម្រាប់ឆ្នាំថ្មីនៅក្នុងកិច្ចប្រជុំដ៏សំខាន់មួយរបស់គណបក្សកាន់អំណាចរបស់ប្រទេសឯកោមួយនេះកាលពីថ្ងៃពុធ លោក គីម ក៏បាននិយាយផងដែរថា ទីក្រុងព្យុងយ៉ាង នឹងពង្រីកកិច្ចសហប្រតិបត្តិការជាយុទ្ធសាស្រ្តជាមួយបណ្តាប្រទេស «ឯករាជ្យប្រឆាំងនឹងចក្រពត្តិនិយម» នេះបើយោងតាមទីភ្នាក់ងារសារព័ត៌មាន KCNA បានរាយការណ៍។ប្រព័ន្ធផ្សព្វផ្សាយនេះបាននិយាយថា «លោកគីម បានដាក់ចេញនូវភារកិច្ចសកម្មប្រយុទ្ធសម្រាប់កងទ័ពប្រជាជន និងឧស្សាហកម្មសព្វាវុធ អាវុធនុយក្លេអ៊ែរ និងផ្នែកការពារស៊ីវិល ដើម្បីពន្លឿនការត្រៀមរៀបចំខ្លួនធ្វើសង្រ្គាមបន្ថែមទៀត»។កូរ៉េខាងជើង បាននិងកំពុងពង្រីកទំនាក់ទំនងជាមួយរុស្ស៊ី ក្នុងចំណោមប្រទេសដទៃទៀត ខណៈដែលក្រុងវ៉ាស៊ីនតោន បានចោទប្រកាន់ក្រុងព្យុងយ៉ាង ថាបានផ្គត់ផ្គង់គ្រឿងយុទ្ធោបករណ៍ដល់ទីក្រុងមូស្គូ សម្រាប់ប្រើប្រាស់ក្នុងសង្គ្រាមជាមួយអ៊ុយក្រែន ខណៈដែលរុស្ស៊ី ផ្តល់ជំនួយបច្ចេកទេសដើម្បីជួយកូរ៉េខាងជើង បង្កើនសមត្ថភាពយោធារបស់ខ្លួន៕

មនុស្សជិត២០នាក់ បានស្លាប់ក្នុងគ្រោះទឹកជំនន់ និងព្យុះ នៅប្រទេសថៃ អូស្រ្តាលី និង ម៉ាឡេស៊ី

ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃពុធថា មនុស្សយ៉ាងហោចណាស់១០ នាក់បានស្លាប់បន្ទាប់ពីព្យុះភ្លៀងដ៏ធ្ងន់ធ្ងរ ដែលបានវាយប្រហារប្រទេសអូស្ត្រាលីក្នុងឱកាសបុណ្យណូអែល និងថ្ងៃទិវា Boxing Day ខណៈមនុស្ស ៦នាក់បានស្លាប់ដោយសារទឹកជំនន់នៅក្នុងប្រទេសថៃផងដែរ។សារព័ត៌មាន ABC ដែលមានមូលដ្ឋាននៅទីក្រុង កងបេរ៉ា (Canberra ) បានរាយការណ៍ថា សាកសពមនុស្សទី ១០ ត្រូវបានរកឃើញនៅតំបន់ ហ្គីបស្លែន (Gippsland) ភាគខាងកើតខេត្ត វីកតូរីយ៉ា (Victoria) របស់ប្រទេសអូស្ត្រាលី កាលពីថ្ងៃពុធ។ ខេត្តឃ្វីនលែន (Queensland) វីកតូរីយ៉ា (Victoria) និង ខេត្ត ញូវស៍ សោតវេលស៍ (News South Wales) ត្រូវបានរងការវាយប្រហារយ៉ាងធ្ងន់ធ្ងរដោយព្យុះក្នុងរយៈពេលប៉ុន្មានថ្ងៃកន្លងមកនេះ ដែលបណ្តាលឱ្យមានទឹកជំនន់ដ៏គំហុកផងដែរ។ ភ្លៀងធ្លាក់ខ្លាំង និងទឹកជំនន់ធ្ងន់ធ្ងរ ក៏បានប៉ះពាល់ដល់ប្រជាជន និងបង្កការខូចខាតយ៉ាងធ្ងន់ធ្ងរនៅផងដែរក្នុងប្រទេសថៃ និងប្រទេសម៉ាឡេស៊ី ក្នុងនោះមនុស្សរាប់ម៉ឺននាក់ត្រូវបានជម្លៀសចេញពីលំនៅឋានរបស់ខ្លួន ទៅកាន់កន្លែងមានសុវត្ថិភាព។ នៅក្នុងប្រទេសថៃ មនុស្សយ៉ាងហោចណាស់ ៦នាក់បានស្លាប់នៅក្នុងទឹកជំនន់ ដែលបានវាយប្រហារយ៉ាងធ្ងន់ធ្ងរ ដល់ខេត្តចំនួន៥ ប៉ះពាល់ដល់ ប្រជាពលរដ្ឋប្រហែល ៧០.០០០ គ្រួសារ ។ សារព័ត៌មាន Bangkok Post បានរាយការណ៍ថា មនុស្សម្នាក់នៅតែបាត់ខ្លួននៅឡើយ។ទោះជាយ៉ាងណាក៏ដោយ កម្រិតទឹកជំនន់កំពុងស្រកចុះបណ្ដើរៗ។ នៅប្រទេសជិតខាងម៉ាឡេស៊ី ភ្លៀងធ្លាក់ខ្លាំង បានឆក់យកជីវិតមនុស្សម្នាក់ និងបានប៉ះពាល់ដល់មនុស្សជាង ៤០.០០០នាក់ នាក់នៅទូទាំងប្រទេស។ សារព័ត៌មាន Free Malaysia Today ដែលមានមូលដ្ឋាននៅទីក្រុងគូឡាឡាំពួរ បានរាយការណ៍ថា ធនាគារម៉ាឡេស៊ីបាននិយាយថា ពួកគេនឹងផ្តល់ជំនួយហិរញ្ញវត្ថុ រួមទាំងការសងប្រាក់កម្ចី និងការលើកលែងការបង់ការប្រាក់ធនាគារ ដល់ប្រជាពលរដ្ឋ ដែលរងផលប៉ះពាល់ក្នុងគ្រោះមហន្តរាយធម្មជាតិនេះ៕

មនុស្ស ៤០នាក់ទៀត បានស្លាប់នៅក្នុងទឹកជំនន់ និងបំណាក់ដីនៅសាធារណរដ្ឋប្រជាធិបតេយ្យកុងហ្គោ

ក្រុមអាជ្ញាធរបាននិយាយថា មនុស្សយ៉ាងហោចណាស់ ៤០ នាក់ទៀតបានស្លាប់នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ បន្ទាប់ពីមានភ្លៀងធ្លាក់ខ្លាំងពេញមួយយប់កាលពីថ្ងៃអង្គារ បង្កឲ្យមានទឹកជំនន់ និងបំណាក់ដី ធ្ងន់ធ្ងរ ដែលបានធ្វើឱ្យក្រុមអ្នកស្រុកជីកកកកាយដីល្បប់ដើម្បីស្វែងរកសាកសព។ សារព័ត៌មាន Reuters បាននិយាយថា កាលពីថ្ងៃពុធ នៅក្នុងទីក្រុងប៊ូកាវ៉ូ (Bukavu) បុរសមួយក្រុមបានទាញរថយន្តចេញពីល្បប់ ដើម្បីទាញយកសាកសពនារីម្នាក់ចេញពីក្រោមរថយន្តនោះ។ យោងតាមមន្រ្តីនៅកន្លែងកើតហេតុទាំងពីរ មនុស្សយ៉ាងហោចណាស់នាក់ នាក់បានស្លាប់នៅក្នុងទីក្រុងប៊ូកាវ៉ូ ហើយមនុស្សយ៉ាងហោចណាស់ ២០ នាក់ទៀតត្រូវបានសម្លាប់នៅក្នុងភូមិប៊ូរីនអ៊ី (Burinyi) ចម្ងាយ ៥០ គីឡូម៉ែត្រពី ទីក្រុង ប៊ូកាវ៉ូ (Bukavu)។ មន្ត្រីក្រុងប៊ូកាវ៉ូ លោក អេម៉ានូអែល ម៉ាជីវ៉ូណូ កាលីមបា (Emmanuel Majivuno Kalimba) បានប្រាប់សារព័ត៌មាន Reuters នៅកន្លែងកើតហេតុថា នៅពេលមានភ្លៀងធ្លាក់ ផ្លូវទឹកសំខាន់ត្រូវបានស្ទះ ពេលខ្លះដោយសារតែកាកសំណល់ ដូច្នេះទើបបណ្ដាលឲ្យទឹកជន់លិច ហើយបានបំផ្លិចបំផ្លាញផ្ទះសម្បែងជាច្រើនរបស់ប្រជាពលរដ្ឋ។ការបំផ្លិចបំផ្លាញពេញមួយយប់បន្ទាប់ពីការស្លាប់មនុស្សយ៉ាងហោចណាស់ ២២នាក់នៅក្នុងខេត្ត កាសៃ សែនត្រល(Kasai-Central)កាលពីថ្ងៃអង្គារ នៅពេលបំណាក់ដីបានបាក់ធ្លាក់គ្របសង្កត់ លំនៅឋាន ព្រះវិហារ និងផ្លូវថ្នល់ ជាច្រើន ដោយបានសម្លាប់មនុស្សមួយគ្រួសារទាំងមូល និងធ្វើឱ្យមនុស្សជាច្រើនទៀត គ្មានផ្ទះសម្បែង៕

រថយន្ដ Hammer បុកមនុស្សស្លាប់២នាក់ នៅខណ្ឌដូនពេញ សមត្ថកិច្ចរកឃើញរថយន្ដហើយ នៅឡើយម្ចាស់បន្តរត់គេច

ភ្នំពេញ៖ យោងតាមផេកហ្វេសបុកផ្លូវការ របស់ស្នងការដ្ឋាននគរបាលរាជធានីភ្នំពេញ នៅយប់ថ្ងៃទី២៧ ខែធ្នូ ឆ្នាំ២០២៣នេះ បានឲ្យដឹងថា ករណីរថយន្ដ Hammer បុកមនុស្ស២នាក់បណ្ដាលឲ្យស្លាប់ ហើយរត់គេចខ្លួននោះ នៅពេលនេះកម្លាំងជំនាញរកឃើញរថយន្ដហើយ។ ដូច្នេះ ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាក់ថាក្នុងនាមស្នងការដ្ឋាន បញ្ជាឲ្យស្រាវជ្រាវដោយយកចិត្តទុកដាក់បន្ដទៀត ដើម្បីស្វែងរកអ្នកបើកបរមកផ្ដន្ទាទោសតាមច្បាប់យ៉ាងបានម៉ឺងម៉ាត់បំផុត។គួរបញ្ជាក់ផងដែកាលពីវេលាម៉ោង ១២យប់រំលងអធ្រាត្រ ឈានចូលថ្ងៃទី២៥ ខែធ្នូ ឆ្នាំ២០២៣ ប្តីប្រពន្ធនិងកូន ជិះម៉ូតូឌុបគ្នាចេញពីហូបស៊ុប ស្រាប់តែត្រូវរថយន្តមិនចាំម៉ាក១គ្រឿង បើកបុកពេញទំហឹងបណ្តាលឲ្យស្លាប់ប្រពន្ធនៅកន្លែងកើតហេតុ រីឯប្តីនិងកូនស្លាប់បន្ទាប់ពី បញ្ជូនទៅសង្គ្រោះនៅមន្ទីរពេទ្យ ។ ដែលហេតុការណ៍នេះបានកើតហេតុនៅនៅទល់មុខអាផាតមិន១កន្លែង ស្ថិតនៅលើកំណាត់វិថីព្រះស៉ីសុវត្ថិ សង្កាត់ស្រះចក ខណ្ឌដូនពេញ រាជធានីភ្នំពេញ។តាមប្រភពពីអ្នកឃើញហេតុការណ៍ បានឲ្យដឹងថា៖ មុនពេលកើតហេតុ ជនរងគ្រោះបានជិះម៉ូតូតាមបណ្តោយវិថីព្រះសុវត្ថិ ក្នុងទិសដៅពីត្បូងទៅជើង ភ្លាមៗនោះ គាត់បានឃើញរថយន្តបង្ក មានពណ៌ខ្មៅ មិនចាំម៉ាក និងមិនចាំស្លាកលេខនោះទេ បានបើកបរក្នុងល្បឿនលឿនពីក្រោយគាត់ ទិសដៅស្របទិសគ្នា ដោយសារសម្លេងលឺ និងល្បឿនលឿនខ្លាំង គាត់បានអែបម៉ូតូទៅកៀន ស្រាប់តែឃើញរថយន្តបង្ក បើកទៅបុកម៉ូតូ១គ្រឿង ម៉ាក Suzuki Nex ពណ៌ស ពាក់ស្លាកលេខ ព្រៃវែង 1Q-7635 ពេញទំហឹង បណ្តាលឲ្យមនុស្សប្រុសស្រី២នាក់ និងកូនក្មេងប្រុសវ័យប្រមាណជាង២ខួបម្នាក់ ត្រូវបានខ្ទាតជាមួយនិងម៉ូតូ១គ្រឿង ដែលអ្នកទាំង៣កំពុងតែជិះឌុបគ្នា៕អត្ថបទ៖ កុម្ភៈ

មេបញ្ជាការយោធាអ៊ុយក្រែន ទទួលស្គាល់ពីការដកកងទ័ពទៅជាយក្រុងសំខាន់ៗ

មេបញ្ជាការកងកម្លាំងប្រដាប់អាវុធអ៊ុយក្រែន បានប្រកាសថា កងទ័ពអ៊ុយក្រែន បានដកខ្លួនទៅកាន់ជាយក្រុង Maryinka ជាទីក្រុងសំខាន់មួយនៅតំបន់ភាគខាងកើតតំបន់ Donetsk ។ កាលពីថ្ងៃចន្ទ រដ្ឋមន្ត្រីក្រសួងការពារជាតិរុស្ស៊ី លោក Sergei Shoigu បានប្រាប់ ប្រធានាធិបតី លោក Vladimir Putin ថា កងកម្លាំងរបស់រុស្ស៊ី រំដោះបានទាំងស្រុងទីក្រុង Maryinka ។ លោក Putin បាននិយាយថា លោកផ្តល់ដំណើរការចូលរបស់យោធា ទៅដល់ «កន្លែងប្រតិបត្តិការកាន់តែទូលំទូលាយ» ។ទន្ទឹមនឹងនេះ កងកម្លាំងទ័ពអាកាសប្រទេសអ៊ុយក្រែន កាលពីថ្ងៃអង្គារបាននិយាយថា ខ្លួនបានបើកការវាយប្រហារដោយមីស៊ីល ទៅលើកំពង់ផែ Feodosiia តំបន់គ្រីម៉េ ហើយបានបំផ្លាញនាវាធុនធំមួយគ្រឿងកំពុងចត ដែលជាកម្មសិទ្ធិរបស់កងទ័ពជើងទឹកប្រចាំនៅសមុទ្រខ្មៅរបស់រុស្ស៊ី។ រុស្ស៊ីបានដាក់បញ្ចូលជាឧបសម្ព័ន្ធតំបន់គ្រីម៉េជាឯកតោភាគី កាលពីឆ្នាំ ២០១៤។ អ្នកនាំពាក្យរបស់កងទ័ពកម្លាំងទ័ពអាកាស បាននិយាយថា នាវានោះនឹងមិនអាចជួសជុលបាន ហើយបាននិយាយថា លទ្ធផលនេះកើតមានបន្ទាប់ពីការបំផ្លាញនាវា Moskva ជានាវាចម្បាំងរបស់កងទ័ពជើងទឹកនៅសមុទ្រខ្មៅរបស់រុស្ស៊ី កាលពីខែមេសាឆ្នាំ ២០២២។ អ្នកនាំពាក្យបាននិយាយបន្ថែមថា ការវាយប្រហារ ក៏បានបំផ្លាញហេដ្ឋារចនាសម្ព័ន្ធកំពង់ផែ និងនាវាផ្គត់ផ្គង់នៅក្បែរនោះផងដែរ។ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា លោក Shoigu បានជម្រាបប្រាប់ លោក Putin អំពីការវាយប្រហាររបស់អ៊ុយក្រែន និងការខូចខាតនាវាដែលកំពុងចត។ រដ្ឋមន្ត្រីការពារជាតិ ចក្រភពអង់គ្លេស លោក ហ្គ្រាន់ ស្សាប(Grant Shapps) បាននិយាយនៅលើបណ្តាញផ្សព្វផ្សាយសង្គមថា ការបំផ្លាញចុងក្រោយនៃកងទ័ពជើងទឹករបស់លោក Putin បង្ហាញថា អ្នកទាំងឡាយណា ដែលជឿថា មានភាពជាប់គាំងក្នុងសង្គ្រាមអ៊ុយក្រែន គឺខុសហើយ»។លោកនិយាយថា ពួកគេមិនបានកត់សំគាល់នោះទេថា ក្នុងរយៈពេលជាង ៤ ខែកន្លងទៅនេះ ២០ភាគរយ នៃកងនាវានៅសមុទ្រខ្មៅរបស់រុស្ស៊ីត្រូវបានបំផ្លាញ។

មនុស្សជាង ២៨.០០០នាក់ ត្រូវបានជម្លៀសទៅកាន់មជ្ឈមណ្ឌលសង្គ្រោះទឹកជំនន់នៅម៉ាឡេស៊ី

រដ្ឋ Johor និង Sabah បានក្លាយជារដ្ឋចុងក្រោយនៅក្នុងប្រទេសម៉ាឡេស៊ី រងគ្រោះដោយទឹកជំនន់ ដែលសរុបទៅមានរដ្ឋចំនួន៦ មានចំនួនអ្នកជម្លៀសខ្លួនច្រើន គិតត្រឹមម៉ោង៦ព្រឹកថ្ងៃពុធនេះដែលកើនឡើងដល់ ២៨.៣១០នាក់ បើប្រៀបធៀបទៅនឹងចំនួន ២៥.៩៣៨នាក់ កាលពីល្ងាចថ្ងៃអង្គារ។យោងតាមទីភ្នាក់ងារគ្រប់គ្រងគ្រោះមហន្តរាយជាតិ (Nadma) បានឲ្យដឹងថា រដ្ឋ Kelantan នៅតែជារដ្ឋ ដែលមានចំនួនអ្នកជម្លៀសខ្លួនច្រើនបំផុតដល់ ១៧.៤៦៦នាក់ ដែលត្រូវបានផ្តល់ទីជម្រកនៅក្នុងមជ្ឈមណ្ឌលសង្គ្រោះបណ្តោះអាសន្នចំនួន៨៩កន្លែង។នេះគឺជាការកើនឡើង បើប្រៀបធៀបទៅកាលពីមួយថ្ងៃមុននេះ មានជនរងគ្រោះចំនួន ១៥.១៤៥នាក់ នៅក្នុងមជ្ឈមណ្ឌលចំនួន៩២កន្លែង កាលពីម៉ោង ៤ រសៀល ។ នៅក្នុងរដ្ឋ Pahang បានឃើញការធ្លាក់ចុះចំនួនអ្នកជម្លៀសខ្លួនដោយទឹកជំនន់ ដោយមានមនុស្សត្រឹមតែ ៤៨៥ នាក់ នៅតែស្នាក់នៅក្នុងមណ្ឌលចំនួន ៩ កន្លែង បើប្រៀបធៀបនឹងកាលពីមួយថ្ងៃមុន មាន ៥៩០ នាក់ នៅក្នុងមណ្ឌលចំនួន ១៣ កន្លែង។ ទីភ្នាក់ងារ Nadma បានរាយការណ៍ថា ក្នុងចំណោមមជ្ឈមណ្ឌលសង្គ្រោះចំនួន៩កន្លែង នៅតែបើកនៅ ក្នុងរដ្ឋ Pahang ដែលមួយកន្លែងក្នុងចំណោមមជ្ឈមណ្ឌលគឺនៅតំបន់ខ្ពង់រាប Cameron ដែលបានបន្តផ្តល់ទីជម្រកដល់ជនរងគ្រោះចំនួន ៨៧ នាក់ មកពី ១៧គ្រួសារ ដែលត្រូវបានជម្លៀសខ្លួនចេញពីលំនៅឋាន ដោយសារឧបទ្ទវហេតុបំណាក់ដី។ភ្លៀងដែលនៅតែបន្តធ្លាក់ ត្រូវបានគេរំពឹងថា នឹងកើតឡើងនៅទូទាំងរដ្ឋ តេរេនហ្គានូ(Terengganu), Pahang និងរដ្ឋ Johor ។

ប្រជាជនប៉ាឡេស្ទីន បញ្ចុះសាកសពមិនស្គាល់អត្តសញ្ញាណ៨០នាក់ នៅក្នុងផ្នូរធំរួម នៅទីក្រុង

អាជ្ញាធរតំបន់ហ្កាហ្សា បានជីកផ្នូរធំរួមមួយ និងបានបញ្ចុះសាកសពពលរដ្ឋប៉ាឡេស្ទីន មិនស្គាល់អត្តសញ្ញាណចំនួន ៨០ នាក់ កាលពីថ្ងៃអង្គារ។ ក្រសួងសុខាភិបាល បាននិយាយថា សាកសពត្រូវបានប្រគល់ឲ្យដោយប្រទេសអ៊ីស្រាអែល តាមរយៈច្រកឆ្លងកាត់ Kerem Shalom ។សមាជិកនៃក្រុមអ៊ីស្លាម វ៉ាហ្គ(Waqf) បានថតរូបភាពសាកសព សម្រាប់ការកំណត់អត្តសញ្ញាណ នៅពេលក្រោយ មុនពេលដាក់សាកសពចូលទៅក្នុងទីតាំងជីករួចដ៏វែងមួយនៅទីបញ្ចុះសព ទីក្រុង Rafah ។ យោងតាមក្រុមអ៊ីស្លាម វ៉ាហ្គ(Waqf) បានឲ្យដឹងថា សាកសពទាំងអស់ ត្រូវបានប្រមូលមកពីប្រតិបត្តិការជើងគោក របស់អ៊ីស្រាអែល នៅផ្នែកភាគខាងជើងតំបន់ហ្កាហ្សា។អ៊ីស្រាអែល និយាយថា ខ្លួនកំពុងធ្វើអ្វីដែលអាចធ្វើបាន ដើម្បីការពារជនស៊ីវិល និងបានដាក់កំហុសលើក្រុមហាម៉ាស់ ចំពោះការធ្វើឱ្យពលរដ្ឋមានគ្រោះថ្នាក់ ដោយការធ្វើប្រតិបត្តិការនៅក្នុងចំណោមជនស៊ីវិលដែលក្រុមហាម៉ាស់ បានបដិសេធ។ ប៉ុន្តែទោះបីជាមានការបដិសេធក៏ដោយ សម្ព័ន្ធមិត្តជិតស្និទ្ធបំផុតរបស់អ៊ីស្រាអែល គឺសហរដ្ឋអាមេរិក បាននិយាយថា អ៊ីស្រាអែល គួរតែធ្វើការងារបន្ថែមទៀតដើម្បីកាត់បន្ថយការស្លាប់របស់ជនស៊ីវិល ជាអ្វីដែលប្រធានាធិបតីសហរដ្ឋអាមេរិក លោក Joe Biden ចាត់ទុកថាជា «ការទម្លាក់គ្រាប់បែកមិនរើសមុខ»។

បណ្ដាញសង្គម

ព័ត៌មានថ្មីៗ

ក្រសួងវប្បធម៌ និងវិចិត្រសិល្បៈកម្ពុជាតវ៉ាយ៉ាងដាច់អហង្ការចំពោះការកាន់កាប់ដោយខុសច្បាប់របស់ប្រទេសថៃមកលើតំបន់បេតិកភណ្ឌវប្បធម៌របស់កម្ពុជា

ពលរដ្ឋលីបង់ជម្លៀសខ្លួននិយាយថា វាដល់ពេលដែលពួកយើងត្រូវរស់ក្រោមម្លប់សន្តិភាពម្តងហើយ

អ៊ីស្រាអែល បញ្ជាក់ថា កងកម្លាំងរបស់ខ្លួន បានឡោមព័ទ្ធទីក្រុង Bint Jbeil របស់លីបង់ទាំងស្រុង

ក្រសួងការពារជាតិ៖ ឥណ្ឌូនេស៊ី ពិភាក្សាលើសំណើអនុញ្ញាតឲ្យយោធាអាមេរិកហោះហើរលើដែនអាកាសរបស់ខ្លួន

យោធាអាមេរិកចេញសេចក្ដីជូនដំណឹងទៅកាន់នាវិក មុនដល់ពេលបិទខ្ទប់ផ្លូវរបស់អ៊ីរ៉ង់

សម្ព័ន្ធមិត្តណាតូ បដិសេធមិនចូលរួមផែនការរបស់លោក Trump ក្នុងការបិទច្រកសមុទ្រ Hormuz

អ្នកវិភាគ៖ ជប៉ុនប្រឈមនឹងវិបត្តិថាមពលរដូវក្តៅ ដោយសារការបង្អាក់ឧស្ម័ន LNG នៅតំបន់មជ្ឈិមបូព៌ា

ប្រធានាធិបតីរុស្ស៊ី និងសមភាគីឥណ្ឌូនេស៊ី ពិភាក្សាលើវិស័យថាមពល អវកាស និងកសិកម្ម អំឡុងជំនួបនៅវិមានក្រឹមឡាំង

កិច្ចប្រជុំនិទាឃរដូវរបស់ IMF និងធនាគារពិភពលោក ចាប់ផ្តើម អំឡុងភាពតានតឹង នៅមជ្ឈិមបូព៌ា

ឧស្ម័នបង្ហូរទឹកភ្នែកត្រូវបានបាញ់លើកម្មកររោងចក្រឥណ្ឌាដែលទាមទារដំឡើងប្រាក់បៀវត្សរ៍ ខណៈការចំណាយកើនឡើង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877