BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

ករណីបាញ់បោះដោយសេរីអំឡុងបុណ្យណូអែល ចុងសប្ដាហ៍ នៅសហរដ្ឋអាមេរិក ធ្វើឲ្យមានអំពើហិង្សាកាន់តែធ្ងន់ធ្ងរ

ពេលវេលាចុងសប្តាហ៍នៃពិធីបុណ្យណូអែល ត្រូវបានបំផ្លាញដោយអំពើហិង្សាដោយកាំភ្លើងនៅក្នុងរដ្ឋមួយចំនួនរបស់សហរដ្ឋអាមេរិក ជាគ្រោះមហន្តរាយមួយផ្សេងទៀតដែលធ្វើឱ្យមានកំណត់ត្រាដ៏អាក្រក់នៃការបាញ់ប្រហារដោយសេរី នៅក្នុងទឹកដីសហរដ្ឋអាមេរិក។ ក្នុងចំណោមឧបទ្ទវហេតុនេះ មនុស្សយ៉ាងហោចណាស់ពីរនាក់បានរងរបួសក្នុងអំឡុងការបាញ់ប្រហារយប់រំលងអាធ្រាត្រនៅក្លឹបកម្សាន្តមួយក្នុងទីក្រុងស៊ីនស៊ីនណាទី(Cincinnati)រដ្ឋ អូហៃយ៉ូ (Ohio) កាលពីថ្ងៃអាទិត្យ ខណៈត្រូវបានរាយការណ៍ដោយប្រព័ន្ធផ្សព្វផ្សាយក្នុងស្រុក WLWT ។ជនរងគ្រោះត្រូវបានគេបញ្ជូនទៅកាន់មន្ទីរពេទ្យ តែពុំបានបណ្ដាលឲ្យគ្រោះថ្នាក់ដល់អាយុជីវិតឡើយ ។នគរបាលក្រុងស៊ីនស៊ីនណាទី ពុំទាន់បានបញ្ចេញអត្តសញ្ញាណជនរងគ្រោះ ឬជនសង្ស័យនៅឡើយទេ ដោយសារករណីនេះកំពុងស្ថិតក្រោមការស៊ើបអង្កេត។យោងតាមសារព័ត៌មាន USA Today នៅរដ្ឋផ្លរីដា ជនសង្ស័យម្នាក់ត្រូវបានគេស្គាល់ឈ្មោះកាលពីថ្ងៃអាទិត្យនៅក្នុងការបាញ់ប្រហារដែលបានសម្លាប់បុរសម្នាក់ និងជាច្រើននាក់ទៀតរងរបួសនៅផ្សារទំនើបមួយនៅកណ្តាលរដ្ឋផ្លរីដា ដែលប្រមូលផ្តុំដោយអ្នកដើរទិញឥវ៉ាន់ថ្ងៃឈប់សម្រាកពីរថ្ងៃមុនបុណ្យណូអែល ។ ការដ្ឋាននគរបាលអូកាឡា(Ocala)បានកំណត់អត្តសញ្ញាណជនសង្ស័យ មានឈ្មោះថា អាល់ប៊ើតចែមស៍ហ្សេល ជូនៀរ (Albert James Shell Jr) អាយុ ៣៩ ឆ្នាំ ហើយអាជ្ញាធរជឿថាការបាញ់ប្រហារនេះគឺជា អំពើហិង្សាដែលមានគោលដៅ។ យោងតាមប្រព័ន្ធផ្សព្វផ្សាយក្នុងស្រុក WTOK ។ នៅទីក្រុង Newton រដ្ឋ មីស៊ីស៊ីពី (Mississippi) ស្នងការនគរបាលប្រចាំតំបន់បានឆ្លើយតបទៅនឹងការបាញ់ប្រហារកាលពីថ្ងៃអាទិត្យ ដែលបានបណ្តាលឲ្យមនុស្សម្នាក់ស្លាប់ ។ ការបាញ់ប្រហារនៅចុងសប្តាហ៍បុណ្យណូអែល គឺជាការរំលឹកដ៏ក្រៀមក្រំមួយថា អំពើហិង្សានៅសហរដ្ឋអាមេរិក គ្មាមថ្ងៃធូរស្រាកស្រានឡើយ។គិតត្រឹមថ្ងៃសៅរ៍ចុងសប្ដាហ៍មុន មានការបាញ់ប្រហារទ្រង់ទ្រាយធំយ៉ាងហោចណាស់៦៤៥លើក នៅសហរដ្ឋអាមេរិក នេះបើយោងតាម Gun Violence Archive ជាអង្គការមិនរកប្រាក់ចំណេញដែលតាមដានការបាញ់ប្រហារនៅក្នុងសហរដ្ឋអាមេរិក និងកំណត់ការបាញ់ប្រហារទ្រង់ទ្រាយធំថាជាឧបទ្ទវហេតុដែលជនរងគ្រោះ ៤ នាក់ឬច្រើនជាងនេះ ត្រូវបានបាញ់ឲ្យរងរបួស ឬស្លាប់៕

មនុស្សយ៉ាងហោចណាស់១៦០នាក់ បានស្លាប់ក្នុងការវាយប្រហារនៅក្នុងប្រទេសនីហ្ស៊េរីយ៉ា ភាគកណ្ដាល

ក្រុមមន្ត្រីរដ្ឋាភិបាលក្នុងតំបន់បាននិយាយកាលពីថ្ងៃចន្ទថា ក្រុមប្រដាប់អាវុធបានសម្លាប់មនុស្សយ៉ាងហោចណាស់ ១៦០ នៅប្រទេសនីហ្សេរីយ៉ា ភាគកណ្តាល ក្នុងការវាយប្រហារជាបន្តបន្ទាប់ទៅលើភូមិនានា។ចំនួនអ្នកស្លាប់បានកើនឡើងខ្ពស់ពីតួលេខដំបូងដែលត្រូវបានរាយការណ៍ដោយកងទ័ពកាលពីល្ងាចថ្ងៃអាទិត្យនៃអ្នកស្លាប់ត្រឹមតែ ១៦ នាក់ប៉ុណ្ណោះនៅក្នុងតំបន់ដែលញាំញីដោយភាពតានតឹងខាងសាសនា និងជនជាតិភាគតិច អស់រយៈពេលជាច្រើនឆ្នាំ មកនេះ។ លោក ម៉ាន់ដេ កាសា (Monday Kassah)ប្រមុខរដ្ឋាភិបាលក្នុងតំបន់នៅទីក្រុងបូកូស (Bokkos)រដ្ឋនៃរដ្ឋ ផ្លាតថូ (Plateau) បានប្រាប់សារព័ត៌មាន AFP ថា មនុស្សចំនួន ១១៣ នាក់ត្រូវបានបញ្ជាក់ថាបានស្លាប់ ខណៈអរិភាពកាលពីថ្ងៃសៅរ៍នៅតែបន្តកើតមានរហូតដល់ព្រឹកថ្ងៃចន្ទ ។ នេះគឺជាការរីករាលដាលនៃអំពើហិង្សាដ៏ធ្ងន់ធ្ងរបំផុត ក្នុងរដ្ឋ ផ្លាតថូ ចាប់តាំងពីខែឧសភា នៅពេលដែលមនុស្សជាង១០០ នាក់បានស្លាប់ ក្នុងការវាយប្រហារលើអ្នកចិញ្ចឹមសត្វ។ លោក Kassah បាននិយាយថា ក្រុមជនអន្ធពាល ដែលត្រូវគេហៅថាជាក្រុមចោរ បានបើកការវាយប្រហារ នៅក្នុង សហគមន៍មិនតិចជាង ២០ ផ្សេងគ្នា និងបានដុតបំផ្លាញផ្ទះសម្បែងប្រជាពលរដ្ឋ។លោកបាននិយាយថា យើងបានរកឃើញអ្នករបួសជាង៣០០ នាក់ ដែលត្រូវបានបញ្ជូនទៅមន្ទីរពេទ្យនៅ ទីក្រុង បូកូស (Bokkos) ទីក្រុង ចូស (Jos)និងទីក្រុង បាគីនឡាឌី(Barkin Ladi) ។ ចំនួនអ្នកស្លាប់បណ្តោះអាសន្នកត់ត្រាដោយកាកបាទក្រហមក្នុងតំបន់បានរាយការណ៍ថាមានមនុស្សស្លាប់ចំនួន ១០៤ នាក់នៅក្នុងភូមិចំនួន១៨ ក្នុងទីក្រុង បូកូស (Bokkos)។យោងតាមលោក ឌីកស៊ុន កូឡូម (Dickson Chollom)សមាជិកសភាប្រចាំរដ្ឋ បាននិយាយថា មនុស្សយ៉ាងហោចណាស់ ៥០ នាក់ក៏ត្រូវបានគេរាយការណ៍ថាបានស្លាប់នៅក្នុងភូមិជាច្រើននៅក្នុងួទីក្រុងបាគីន ឡាឌី (Barkin Ladi)៕

ក្រុមហាម៉ាស និងក្រុមអ៊ីស្លាមជីហាដ ច្រានចោលការបោះបង់រដ្ឋាភិបាលហ្កាហ្សា ដើម្បីបទឈប់បាញ់អចិន្ត្រៃយ៍

ប្រភពសន្តិសុខអេហ្ស៊ីបចំនួនពីរបានប្រាប់សារព័ត៌មានរ៉យទ័រ កាលពីថ្ងៃច័ន្ទ (២៥ ធ្នូ) ថាក្រុមហាម៉ាស និងក្រុមអ៊ីស្លាមជីហាដ ដែលជាសម្ព័ន្ធមិត្ត បានបដិសេធសំណើរបស់អេហ្ស៊ីប ដែលថាឲ្យពួកគេលះបង់អំណាចនៅតំបន់ហ្កាហ្សាស្ទ្រីប ជាថ្នូរនឹងបទឈប់បាញ់ជាអចិន្ត្រៃយ៍មួយ។មន្ត្រីពីររូបមកពីក្រុមហាម៉ាស និងក្រុមអ៊ីស្លាមជីហាដ ក្រោយមកបានបដិសេធដាច់ដោយឡែកពីគ្នានូវអ្វីដែលប្រភពអេហ្ស៊ីបនោះបាននិយាយអំពីការចរចា។ លោក អ៊ីសហ្សាត អាល់រ៉ីស៊ីក (Izzat al-Rishq) សមាជិកនៃការិយាល័យនយោបាយរបស់ក្រុមហាម៉ាសបានបន្ថែមថា «មិនអាចមានការចរចារនោះទេ បើគ្មានការបញ្ឈប់ទាំងស្រុងនៃការឈ្លានពាន»។ប្រភពអេហ្ស៊ីបនោះបាននិយាយថា ទាំងក្រុមហាម៉ាស និងក្រុមអ៊ីស្លាមជីហាដ ដែលបាននិងកំពុងពិភាក្សាដាច់ដោយឡែកជាមួយអ្នកសម្រុះសម្រួលអេហ្ស៊ីបនៅទីក្រុងគែរ បានច្រានចោលការផ្តល់សម្បទានណាមួយលើសពីលទ្ធភាពនៃការដោះលែងចំណាប់ថ្នូរបន្ថែមទៀតដែលត្រូវបានចាប់ខ្លួននៅថ្ងៃទី០៧ ខែតុលា។ប្រភពបាននិយាយថា អេហ្ស៊ីបបានស្នើឲ្យមានការបោះឆ្នោត ខណៈពេលដែលផ្តល់ការធានាដល់ក្រុមហាម៉ាស ថាសមាជិករបស់ខ្លួននឹងមិនត្រូវបានដេញចាប់ ឬកាត់ទោសនោះទេ ប៉ុន្តែក្រុមអ៊ីស្លាមនិយមមួយនេះបានបដិសេធសម្បទានណាមួយក្រៅពីការដោះលែងចំណាប់ថ្នូរ៕

រុស្ស៊ីថា បំផ្លាញយុទ្ធោបករណ៍របស់អ៊ុយក្រែន ខណៈអ៊ុយក្រែនអះអាងបាញ់ទម្លាក់យន្តហោះចម្បាំងរុស្ស៊ី

រុស្ស៊ី កាលពីថ្ងៃអាទិត្យ (ទី២៤ ខែធ្នូ) បាននិយាយថា បានបាញ់ទម្លាក់យន្តហោះចម្បាំង និងយានដ្រូនរបស់អ៊ុយក្រែន ហើយបានបំផ្លាញសព្វាវុធរបស់អ៊ុយក្រែន ដែលផ្តល់ដោយប្រទេសមួយចំនួនទៀតផង ខណៈដែលភាគីអ៊ុយក្រែន បានអះអាងថា ខ្លួនបានបាញ់ទម្លាក់យន្តហោះចម្បាំងរុស្ស៊ីប្រភេទ Sukhoi Su-34 ១គ្រឿង វាយប្រហារការប្រមូលផ្តុំកងទ័ពរុស្ស៊ី និងបំផ្លាញអាវុធយុទ្ធភណ្ឌរុស្ស៊ីជាបន្តបន្ទាប់ ក្នុងការប្រយុទ្ធគ្នា រវាងភាគីទាំង២ រយៈពេល ២៤ម៉ោងកន្លងមកនេះ។នាថ្ងៃអាទិត្យនោះ ក្រសួងការពារជាតិរុស្ស៊ី បានរាយការណ៍នៅក្នុងសន្និសីទថា កងកម្លាំងរុស្ស៊ី បានវាយលុកការវាយប្រហារពីភាគីអ៊ុយក្រែននៅទីក្រុង Kupiansk ភាគខាងកើត ទីក្រុង Kharkov នៅភាគឦសាន ទីក្រុង Zaporizhzhia នៅភាគអាគ្នេយ៍ និងទីក្រុង Kherson នៅភាគខាងត្បូងអ៊ុយក្រែន ដោយបានបំផ្លាញឃ្លាំងរំសេវ ព្រមទាំងអាវុធ ដែលបានពីប្រទេសដទៃទៀតផង ដូចជា កាំភ្លើងយន្ត M109 និង M777 ដែលផលិតដោយសហរដ្ឋអាមេរិក ជើងទម្រប្រព័ន្ធមីស៊ីលប្រឆាំងយន្តហោះ យន្តហោះ ជំនួយនាវាចរណ៍ និងគ្រាប់រំសេវ នៅលើអាកាស ដែលផលិតដោយប្រទេសន័រវ៉ែស និងបារាំង។របាយការណ៍បានឲ្យដឹងទៀតថា កងកម្លាំងរុស្ស៊ីក៏បានបាញ់ទម្លាក់យន្តហោះចម្បាំងអ៊ុយក្រែនចំនួន ៤ គ្រឿង និងយានដ្រូនចំនួន ៤៩គ្រឿង ព្រមទាំងស្ទាក់ចាប់មីស៊ីលប្រឆាំងរ៉ាដាជាច្រើន គ្រាប់រ៉ុក្កែត និងមីស៊ីលប្រឆាំងនាវាផងដែរ។នៅថ្ងៃដដែលនោះ អគ្គសេនាធិការនៃកងកម្លាំងប្រដាប់អាវុធអ៊ុយក្រែន (AFU) បានចេញរបាយការណ៍សមរភូមិ ដោយនិយាយថា មានការចូលរួមប្រយុទ្ធចំនួន ៤៨ដង រយៈពេល ២៤ម៉ោងកន្លងមកនេះ ហើយបានអះអាងថា បានបើកការវាយប្រហារលើការប្រមូលផ្តុំទ័ព អាវុធ និងឧបករណ៍យោធាចំនួន ១២កន្លែង របស់កងកម្លាំងរុស្ស៊ី។ការចេញផ្សាយនោះបានឲ្យដឹងថែមទៀតថា ឃ្លាំងផ្ទុកគ្រាប់រំសេវ និងកន្លែងការពារដែនអាកាសរបស់រុស្ស៊ីក៏ត្រូវបានវាយប្រហារ ហើយបើយោងតាមអគ្គសេនាធិការ AFU បានបញ្ជាក់ថា ប្រព័ន្ធការពារដែនអាកាសអ៊ុយក្រែន បានបាញ់ទម្លាក់យន្តហោះចម្បាំងរុស្ស៊ីប្រភេទ Sukhoi Su-34 ១គ្រឿងផងដែរ។ ចំពោះកងកម្លាំងរ៉ុក្កែត និងកាំភ្លើងធំរបស់ប្រទេសនេះ ពួកគេបាននិយាយថា ពួកគេបានបំផ្លាញបំណែកកាំភ្លើងធំចំនួនពីរ និងប៉ុស្តិ៍បញ្ជាការមួយរបស់រុស្ស៊ី៕

ស្លាប់ ៨នាក់ និងរបួសធ្ងន់ស្រាល ១២នាក់ ក្នុងករណីគ្រោះថ្នាក់ចរាចរណ៍ទូទាំងប្រទេសនៅថ្ងៃទី២៥ ធ្នូនេះ

ភ្នំពេញ៖ គ្រោះថ្នាក់ចរាចរណ៍ផ្លូវគោក ទូទាំងប្រទេសនៅថ្ងៃទី២៥ ខែធ្នូ ឆ្នាំ២០២៣ បានកើតឡើងចំនួន ១១លើក (យប់ ៥លើក) បណ្តាលឲ្យមនុស្ស ស្លាប់ ៨ នាក់ (ស្រី ២នាក់), រងរបួសសរុប ១២នាក់ (ស្រី ១នាក់), រងរបួសធ្ងន់ ៧នាក់ (ស្រី ១នាក់) រងរបួសស្រាល ៥នាក់ (ស្រី ០នាក់) និងមិនពាក់មួកសុវត្ថិភាព ៨នាក់ (យប់ ១នាក់)។ នេះបើយោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស ចេញដោយនាយក ដ្ឋាននគរបាលចរាចរណ៍ និងសណ្តាប់សាធារណៈ នៃអគ្គស្នងការដ្ឋាននគរបាលជាតិ។របាយការណ៍ដដែលបញ្ជាក់ថា មូលហេតុដែលបង្កអោយមានគ្រោះថ្នាក់រួមមានៈ ៖ ល្មើសល្បឿន ៨លើក (ស្លាប់ ៧នាក់) , មិនគោរពសិទ្ធិ ១លើក (ស្លាប់ ០នាក់), មិនប្រកាន់ស្តាំ ១លើក (ស្លាប់ ១នាក់) និងកត្តាយាន ១លើក (ស្លាប់ ០នាក់)៕

មនុស្សជិតមួយម៉ឺននាក់ តវ៉ាក្នុងរដ្ឋធានីរ៉ាបា ទាមទារបញ្ចប់ទំនាក់ទំនងរវាងប្រទេសម៉ារ៉ុក និងអ៊ីស្រាអែល

ក្រុមបាតុករជិតមួយម៉ឺននាក់ បានដើរដង្ហែរក្បួនដ៏ធំបំផុតមួយដែលគាំទ្រប៉ាឡេស្ទីននៅទីក្រុងរ៉ាបា (Rabat) កាលពីថ្ងៃអាទិត្យ (២៤ ធ្នូ) ចាប់តាំងពីការផ្ទុះឡើងនៃសង្រ្គាមនៅតំបន់ហ្កាហ្សា ដោយទាមទារឱ្យបញ្ចប់ទំនាក់ទំនងរបស់ប្រទេសម៉ារ៉ុក ជាមួយអ៊ីស្រាអែល។ការតវ៉ាប្រឆាំងនឹងសង្គ្រាមរបស់អ៊ីស្រាអែល នៅតំបន់ហ្កាហ្សា បានទាក់ទាញមនុស្សរាប់ពាន់នាក់នៅក្នុងប្រទេសម៉ារ៉ុក ចាប់តាំងពីជម្លោះបានចាប់ផ្តើមជាងពីរខែមុន ដែលភាគច្រើនដឹកនាំដោយក្រុមអារ៉ាប់ និងក្រុមអ៊ីស្លាមនិយម។ ការហែក្បួនកាលពីថ្ងៃអាទិត្យនេះត្រូវបានសហការរៀបចំដោយក្រុមឆ្វេងនិយម និងក្រុមក្រៅច្បាប់។មនុស្សភាគច្រើននៃបាតុករជិត ១០.០០០នាក់នោះហាក់ដូចជាអ្នកកាន់សាសនាអ៊ីស្លាម ដោយបុរសដើរដង្ហែក្បួនដាច់ដោយឡែកពីស្ត្រី ខណៈគ្រវីទង់ជាតិប៉ាឡេស្ទីន និងកាន់បដាដែលសរសេរថា «តស៊ូរហូតដល់ជ័យជំនះ» «បញ្ឈប់ការធ្វើប្រក្រតីភាពរវាងរដ្ឋាភិបាលម៉ារ៉ុក និងអ៊ីស្រាអែល» និង «សេរីភាពប៉ាឡេស្ទីន»។ ក្រុមអ្នកតវ៉ានៅក្នុងការហែក្បួនកាលពីថ្ងៃអាទិត្យនោះក៏បានអំពាវនាវឱ្យពិភពលោកធ្វើពហិការឈប់ប្រើប្រាស់ម៉ាកយីហោណាដែលគាំទ្រអ៊ីស្រាអែល។ម៉ារ៉ុកបានយល់ព្រមពង្រឹងទំនាក់ទំនងជាមួយអ៊ីស្រាអែល នៅឆ្នាំ២០២០ ក្រោមកិច្ចព្រមព្រៀងដែលសម្របសម្រួលដោយរដ្ឋបាលសហរដ្ឋអាមេរិក ក្រោមការដឹកនាំរបស់អតីតប្រធានាធិបតីអាមេរិក លោក ដូណាល់ ត្រាំ (Donald Trump) ដែលរួមបញ្ចូលទីក្រុងវ៉ាស៊ីនតោន ទទួលស្គាល់អធិបតេយ្យភាពម៉ារ៉ុក លើទឹកដីដែលមានជម្លោះនៃតំបន់វាលខ្សាច់សាហារ៉ាខាងលិច៕

ជម្លោះជនជាតិអាហ្វហ្គានីស្ថានជិត ២០០ករណីត្រូវបានដោះស្រាយក្នុងរយៈពេលមួយឆ្នាំ

ក្រសួងកិច្ចការព្រំដែន និងកុលសម្ព័ន្ធ (MoBTA) របស់រដ្ឋាភិបាលបណ្តោះអាស្នអាហ្វហ្គានីស្ថាន បានដោះស្រាយជម្លោះ និងទំនាស់ជនជាតិភាគតិចជិត ២០០ករណីក្នុងរយៈពេលមួយឆ្នាំកន្លងមក នៅក្នុងប្រទេសដែលរងការបំផ្លិចបំផ្លាញដោយសង្រ្គាម នេះបើតាមការដកស្រង់ការផ្សាយចេញពីសារព័ត៌មាន ថូឡូញ៉ូវស៍ (Tolonews)។សារព័ត៌មានឯកជនមួយនេះបានដកស្រង់សម្តីអ្នកនាំពាក្យរបស់ក្រសួងកិច្ចការព្រំដែន និងកុលសម្ព័ន្ធ លោក ហាមឌូលឡាហ្វ ហ្វីត្រាត (Hamdullah Fitrat) បាននិយាយថា «រហូតមកដល់ពេលនេះ ជម្លោះជនជាតិចំនួន ១៩៧ករណីត្រូវបានដោះស្រាយ ហើយជម្លោះជាង ១០០ករណីទៀតកំពុងស្ថិតក្នុងដំណើរការដោះស្រាយ ហើយយើងកំពុងព្យាយាមដោះស្រាយជម្លោះជនជាតិភាគតិចទាំងនេះឱ្យបានឆាប់តាមដែលអាចធ្វើទៅបាន»។សមិទ្ធិផលនាពេលថ្មីៗនេះគឺនៅក្នុងខេត្ត នូរីស្ថាន (Nuristan) ភាគខាងកើត ជាទីដែលមានអរិភាពអាយុកាល ៤១ឆ្នាំបានឆក់យកជីវិតជាច្រើនពីភាគីគូប្រជែង ហើយត្រូវបានបញ្ចប់ដោយការសម្របសម្រួលនិងការខិតខំប្រឹងប្រែងរបស់ក្រសួងអាហ្វហ្គានីស្ថានមួយនេះ។ដោយជាជម្រកនៃពូជសាសន៍ ជនជាតិភាគតិច ភាសា សាសនា និងកុលសម្ព័ន្ធជាច្រើន ប្រទេសអាហ្វហ្គានីស្ថាន បានរងទុក្ខយ៉ាងធ្ងន់ធ្ងរពីសង្គ្រាម និងជម្លោះស៊ីវិលជាងបួនទសវត្សរ៍ ខណៈដែលក្រុមគ្រួសារ និងកុលសម្ព័ន្ធជាច្រើនបានបាត់បង់សមាជិកគ្រួសារជាច្រើន៕

កូសូវ៉ូ និយាយថា ខ្មាន់កាំភ្លើងមកពីប្រទេសស៊ែរប៊ី កំពុងរៀបចំផែនការវាយប្រហារបន្ថែមទៀត

នាយករដ្ឋមន្ត្រីកូសូវ៉ូ លោក អាល់ប៊ីន ខួរទី (Albin Kurti) បាននិយាយកាលពីថ្ងៃសៅរ៍ (២៤ ធ្នូ) ថាក្រុមប្រដាប់អាវុធគាំទ្រដោយភ្នាក់ងារសន្តិសុខស៊ែរប៊ី កំពុងត្រូវបានបណ្តុះបណ្តាល ដើម្បីបើកការវាយប្រហារថ្មីនៅក្នុងប្រទេសកូសូវ៉ូ បន្ទាប់ពីការវាយប្រហារកាលពីខែកញ្ញា ដែលបានបណ្តាលឲ្យមនុស្ស៤នាក់ស្លាប់ ប៉ុន្តែស៊ែរប៊ីបានបដិសេធថាមិនមានផែនការបែបនេះនោះទេ។កាលពីថ្ងៃទី២៤ ខែកញ្ញា ក្រុមប្រដាប់អាវុធមួយក្រុមមានគ្នា ៨០នាក់ បានវាយប្រហារនគរបាលកូសូវ៉ូ នៅក្នុងភូមិ បានស៍ឆ្កា (Banjska) ដ៏ស្ងប់ស្ងាត់ក្បែរព្រំដែនជាមួយប្រទេសស៊ែរប៊ី បណ្តាលឲ្យមន្ត្រីនគរបាលម្នាក់ និងខ្មាន់កាំភ្លើង ៣នាក់ស្លាប់។ថ្លែងនៅក្នុងសន្និសីទសារព័ត៌មានមួយ លោក ខួរទី បាននិយាយថាលោក មីឡាន រ៉ាដូអ៊ីស៊ីក (Milan Radoicic) ដែលជាអ្នកនយោបាយជាន់ខ្ពស់កូសូវ៉ូជនជាតិស៊ែរប៊ី ដែលបានទទួលស្គាល់ថាបានចូលរួមក្នុងការប្រយុទ្ធដោយកាំភ្លើងកាលពីខែកញ្ញា កំពុងរៀបចំផែនការវាយប្រហារបន្ថែមទៀត ប៉ុន្តែលោក រ៉ាដូអ៊ីស៊ីក បានបដិសេធរឿងនោះ។ កូសូវ៉ូ ដែលមានជនជាតិភាគតិចអាល់បានី ភាគច្រើនបានប្រកាសឯករាជ្យពីប្រទេសស៊ែរប៊ី ក្នុងឆ្នាំ២០០៨ បន្ទាប់ពីការបះបោរទ័ពព្រៃ និងការអន្តរាគមន៍ពីអង្គការណាតូ ក្នុងឆ្នាំ១៩៩៩។ប្រហែល ៥ភាគរយនៃចំនួនប្រជាជនក្នុងប្រទេសនេះ គឺជាជនជាតិស៊ែរប៊ី ដែលជាងពាក់កណ្តាលរស់នៅភាគខាងជើង ដោយបដិសេធមិនទទួលស្គាល់ឯករាជ្យរបស់កូសូវ៉ូ ហើយមើលឃើញទីក្រុងបែលក្រាដ ថាជារដ្ឋធានីរបស់ពួកគេ។ ប្រជាជនទាំងនោះបានប៉ះទង្គិចគ្នាជាញឹកញាប់ជាមួយនគរបាលកូសូវ៉ូ និងកងរក្សាសន្តិភាពអន្តរជាតិ៕

អ៊ីស្រាអែលបដិសេធរបាយការណ៍អំពីអំពើឃោរឃៅ នៅមន្ទីរពេទ្យហ្កាហ្សា

អ៊ីស្រាអែល បានច្រានចោលរបាយការណ៍អំពីអំពើឃោរឃៅ ដែលប្រព្រឹត្តដោយទាហានអ៊ីស្រាអែល នៅមន្ទីរពេទ្យក្នុងតំបន់ហ្កាហ្សាស្ទ្រីប។ប្រទេសនេះ បាននិយាយនៅក្នុងសេចក្តីថ្លែងការណ៍មួយ កាលពីថ្ងៃអាទិត្យថា កងកម្លាំងការពារអ៊ីស្រា អែល (IDF) មិនមានអ្វីពាក់ព័ន្ធនឹងសាកសព ដែលត្រូវបានរកឃើញ នៅមន្ទីរពេទ្យ Kamal Adwan ក្នុងទីក្រុងចាបាលៀ (Jabalia) ភាគខាងជើងនៃតំបន់ហ្កាហ្សាស្ទ្រីបនោះទេ។កងកម្លាំងការពារអ៊ីស្រាអែល(IDF) បាននិយាយថា វីដេអូមួយ ត្រូវបានចែកចាយនៅលើប្រព័ន្ធផ្សព្វផ្សាយសង្គម ដែលគ្រឿងចក្រឈូសឆាយពណ៌ក្រហមមួយគ្រឿង ត្រូវបានចោទប្រកាន់ថា បានកប់មនុស្ស នៅក្រោមវានៅឯមន្ទីរពេទ្យ។ កងកម្លាំងការពារនេះ បានបន្ថែមទៀតថា ទោះបីជាយ៉ាងណាក៏ដោយ វីដេអូនេះ មានតាំងពីឆ្នាំ២០១៣ ហើយមិនមានជាប់ពាក់ព័ន្ធនឹងការដាក់ពង្រាយទាហានអ៊ីស្រា អែល នាពេលបច្ចុប្បន្ន នៅក្នុងទីក្រុងចាបាលៀនោះទេ។ករណីនេះ មិនអាចផ្ទៀងផ្ទាត់ព័ត៌មានដោយឯករាជ្យបានទេ។កាលពីមួយសប្តាហ៍មុន បណ្តាញព័ត៌មាន Al Jazeera បានរាយការណ៍ថា កងទ័ពអ៊ីស្រាអែល បានប្រើគ្រឿងចក្រឈូសឆាយមួយគ្រឿង ដើម្បីបំផ្លាញតង់ជនភៀសខ្លួន នៅក្នុងទីធ្លាមន្ទីរពេទ្យ ដោយបានសម្លាប់មនុស្សប្រហែល ២០នាក់ នៅក្នុងដំណើរការនេះ។

តុលាការចេញដីការសម្រេចឃុំខ្លួនជនបើករថយន្ត Jeep បង្កគ្រោះថ្នាក់ស្លាប់មនុស្ស នៅខណ្ឌទួលគោក ដាក់ពន្ធនាគារ

ចៅក្រមស៊ើបសួរសាលាដំបូងរាជធានីភ្នំពេញ លោកហុង ម៉ារីណិច បានចេញដីការសម្រេចឃុំខ្លួនជនបើករថយន្ត Jeep បង្កគ្រោះថ្នាក់ចរាចរណ៍ដែលបណ្តាលឱ្យស្លាប់មនុស្សនៅខណ្ឌទួលគោក ដាក់ពន្ធនាគារ PJ ជាបណ្តោះអាសន្ន ដើម្បីបន្តបើកការស៉ើបអង្គេតតាមនីតិវិធីច្បាប់ ។ ជនជាប់ចោទមានឈ្មោះ ព្រហ្ម វិចិត្រសុសក្តា ភេទប្រុស អាយុ២៣ឆ្នាំ ស្នាក់នៅផ្ទះលេខ៥២ ផ្លូវ៦៣ សង្កាត់ទន្លេបាសាក់ ខណ្ឌចំការមន បច្ចុប្បន្នគឺជាសិស្សកំពុងបន្តការសិក្សាថ្នាក់អនុបណ្ឌិត ។ ជនរូបនេះត្រូវបានតុលាការចោទប្រកាន់ពីបទ « បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ច ដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្តាលឱ្យស្លាប់អ្នកដទៃ និងបទរត់គេចខ្លួន » តាមមាត្រា ៨៥ នៃច្បាប់ស្ដីពីចរាចរណ៍ផ្លូវគោក និងមាត្រា ៥៤៣ នៃក្រមព្រហ្មទណ្ឌ ។ គួររំលឹកថា ករណីគ្រោះថ្នាក់ចរាចរណ៍ខាងលើ គឺបានកើតឡើងកាលពីវេលាយប់ថ្ងៃទី១៥ ខែ ធ្នូ ឆ្នាំ២០២៣ ស្ថិតនៅចំណុចផ្លូវលេខ៣១៧ ប្រសព្វផ្លូវលេខ៥៦៦ ក្នុងសង្កាត់បឹងកក់ទី២ ខណ្ឌទួលគោក ។ប្រភពព័ត៌មានបានឱ្យដឹងថា មុនពេលកើតហេតុ គេបានឃើញជនរងគ្រោះ ជិះម៉ូតូឃ្លីក ពណ៌ស ពាកផ្លាកលេខ ភ្នំពេញ1DF-5396 ធ្វើដំណើរតាមបណ្តោយផ្លូវលេខ៥៦៦ ក្នុងទិសដៅពីលិចទៅកើត ចំណែករថយន្តម៉ាក Jeep Gladiator ពណ៌ខ្មៅ ពាក់ផ្លាកលេខ ភ្នំពេញ 2CB-9963 បានបើកបរតាមបណ្តោយផ្លូវលេខ៣១៧ ទិសដៅពីជើងទៅត្បូង។ លុះមកដល់ចំណុចកើតហេតុ ភាគីខាងម៉ូតូបានបើកឆ្លងផ្លូវបំបែក ស្របពេលនោះរថយន្តបើកដល់ចំណុចផ្លូវប្រសព្វ ក៏ជ្រុលទៅបុកម៉ូតូពេញទំហឹង បណ្តាលឱ្យអ្នកបើកម៉ូតូ ខ្ទាតចេញពីម៉ូតូបែកក្បាលស្លាប់ ចំណែករថយន្តនៅមានល្បឿនបានអូសម៉ូតូរបស់ជនរងគ្រោះជាប់ខាងក្រោមរថយន្ត ទើបអ្នកបើកទុករថយន្តចោល ហើយគេចខ្លួនបាត់។ ក្រោយការរត់គេចខ្លួនអស់មួយរយៈពេលតាំងពីថ្ងៃកើតហេតុរួចមក ជនបង្កខាងលើ ក៏ត្រូវបានអាណាព្យាបាលនាំខ្លួនចូលទៅកាន់ស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី២៣ ធ្នូ ឆ្នាំ២០២៣ ដើម្បីប្រគល់ខ្លួនជូននគរបាលអនុវត្តតាមផ្លូវច្បាប់៕ អត្ថបទ ៖ លីហេង

បណ្ដាញសង្គម

ព័ត៌មានថ្មីៗ

ស្នងការ៖ស្ថានភាពសន្តិសុខក្នុងព្រឹត្តិការណ៍នគរសង្ក្រាន្តមានភាពល្អប្រសើរមិនមានបាតុភាពណាមួយកើតឡើងទេ

ក្រុមការងារគោលដៅបាសាក់លែន អំពាវនាវទេសចរជាតិ អន្តរជាតិមកចូលរួមលេងកម្សាន្តឱ្យបានច្រើន

ក្រុមគ្រូពេទ្យជាង ១ពាន់នាក់ និងស្តង់សុខភាពប្រចាំការ ត្រៀមសង្រ្គោះបឋម ជូនភ្ញៀវជាតិ និងអន្តរជាតិ ចូលមកកម្សាន្តក្នុងព្រឹតិ្តការណ៍នគរសង្រ្កាន្ត

អភិបាលរាជធានីភ្នំពេញ៖ ការការពារសន្តិសុខជូនពលរដ្ឋក្នុងព្រឹត្តិការណ៍ «នគរសង្ក្រាន្ត» គឺជាការងារចម្បងរបស់រដ្ឋបាលរាជធានីភ្នំពេញ

ភ្ញៀវទេសចរជាច្រើននាំគ្នាទៅលេងកម្សាន្តនៅតំបន់រមណីយដ្ឋានទឹកឈូច្រើនក្នុងឱកាសចូលឆ្នាំថ្ងៃទីពីរ

ពលករ និងសហគមន៍ខ្មែរនៅប្រទេសម៉ាឡេស៊ីជួបជុំរៀបចំពិធីបុណ្យចូលឆ្នាំថ្មីប្រពៃណីខ្មែរយ៉ាងសប្បាយរីករាយដើម្បីបង្ហាញពីវប្បធម៌ប្រពៃណីជាតិដ៏ផូរផង់

កម្ពុជា បដិសេធចំពោះការផ្សាយរបស់សារព័ត៌មានថៃថា «កម្ពុជាស្នើឱ្យបើកច្រកដឹកជញ្ជូនទំនិញសង្គ្រោះបន្ទាន់» ដែលនេះជាព័ត៌មានក្លែងក្លាយ

រដ្ឋមន្ត្រីក្រសួងទេសចរណ៍ អញ្ជើញចូលរួម ព្រឹត្តិការណ៍លៀសហាល ចំនួន ៥តោន ជាមួយថ្នាក់ដឹកនាំ និងប្រជាពលរដ្ឋខេត្តកំពង់ចាម

នាវាដឹកប្រេងចិនរងទណ្ឌកម្មអាមេរិក ធ្វើដំណើរឆ្លងកាត់ច្រកសមុទ្រ Hormuz

ធានាធិបតីកូរ៉េខាងត្បូង ព្រមានថាជម្លោះមជ្ឈិមបូព៌ានឹងធ្វើឲ្យតម្លៃប្រេងនៅតែហក់ឡើងខ្ពស់ប្រធ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877