BTV NEWS

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

សន្តិសុខ និង សង្គម

គណបក្សសាធារណរដ្ឋអាមេរិក បើកការស៊ើបអង្កេតលើការចោទប្រកាន់លោក បៃដិន ដោយផ្តោតលើអាជីវកម្មរបស់កូនប្រុសលោក

អាមេរិក៖ គណបក្សសាធារណរដ្ឋ ដឹកនាំការស៊ើបអង្កេតលើការចោទប្រកាន់ដើម្បីទម្លាក់តំណែងប្រធានាធិបតីអាមេរិក លោកចូ បៃដិន ដោយផ្ដោតលម្អិតលើការទូទាត់ប្រាក់បរទេសដល់សមាជិកនៃគ្រួសាររបស់លោក នៅក្នុងសវនាការលើកដំបូងរបស់ពួកគេកាលពីថ្ងៃព្រហស្បតិ៍ (២៨ កញ្ញា) ប៉ុន្តែមិនបានផ្តល់ភស្តុតាងដែលថាប្រធានាធិបតីប្រជាធិបតេយ្យរូបនេះ បានទទួលផលប្រយោជន៍ផ្ទាល់ខ្លួននោះទេ។សវនាការលើការចោទប្រកាន់ដំបូង ដោយគណៈកម្មាធិការត្រួតពិនិត្យសភាតំណាងរាស្រ្តសហរដ្ឋអាមេរិក បានធ្វើការពិនិត្យលើភស្តុតាងដែលថា គណបក្សសាធារណរដ្ឋបានប្រមូលផ្តុំមកទល់ពេលនេះ អំពីការបណ្តាក់ទុនអាជីវកម្មបរទេស ដោយកូនប្រុសដែលកំពុងមានបញ្ហារបស់លោក បៃដិន ឈ្មោះ ហាន់ធឺ បៃដិន (Hunter Biden) វ័យ៥៣ឆ្នាំ ដែលពួកគេនិយាយថា ភស្តុតាងបានបង្ហាញថាសមាជិកគ្រួសាររបស់លោក បៃដិន កំពុងលក់សិទ្ធិប្រើប្រាស់នៃអាជីវកម្មបរទេសទាំងនោះ។គណបក្សប្រជាធិបតេយ្យ និងសាក្សីឯករាជ្យជាច្រើននាក់បាននិយាយថា មិនមានភស្តុតាងណាមួយដែលថាលោក បៃដិន បានទទួលប្រាក់ទាំងនោះ ឬបានចូលរួមក្នុងអាកប្បកិរិយាមិនសមរម្យ ខណៈពេលដែលលោកបម្រើការជាអនុប្រធានាធិបតីចន្លោះឆ្នាំ២០០៩ និងឆ្នាំ២០១៧ នោះទេ។ សេតវិមានបានបដិសេធការប្រព្រឹត្តខុសរបស់លោកបៃដិន ហើយបានច្រានចោលការស៊ើបអង្កេតនេះថា មានហេតុផលនយោបាយនៅពីក្រោយ។គួររម្លឹកផងដែរថា គណបក្សសាធារណរដ្ឋ បានចោទប្រកាន់លោក បៃដិន និងក្រុមគ្រួសាររបស់លោក ថាបានប្រយោជន៍ពីគោលនយោបាយ ដែលលោកបានបន្តធ្វើជាអនុប្រធានាធិបតី ក្នុងអំឡុងពេលរដ្ឋបាលរបស់អតីតប្រធានាធិបតីអាមេរិក លោក បារ៉ាក់ អូបាម៉ា (Barack Obama) ចន្លោះឆ្នាំ២០០៩ និងឆ្នាំ២០១៧។ ដោយឡែក ពួកគេក៏បានចោទប្រកាន់ក្រសួងយុត្តិធម៌ ថាបានជ្រៀតជ្រែកក្នុងការស៊ើបអង្កេតឧក្រិដ្ឋកម្មរបស់កូនប្រុសលោកប្រធានាធិបតីរូបនេះ គឺលោក ហាន់ធឺ បៃដិន ផងដែរ៕

ក្រសួងការបរទេសអាមេរិក រៀបចំផែនការបន្ទាន់ក្នុងករណីមានការបិទរដ្ឋាភិបាល

អាមេរិក៖ អ្នកនាំពាក្យក្រសួងការបរទេសអាមេរិក លោក Matthew Miller បាននិយាយកាលពីថ្ងៃព្រហស្បតិ៍ (២៨ កញ្ញា) ថា ក្រសួងការបរទេសសហរដ្ឋអាមេរិក បាននិងកំពុងរៀបចំផែនការបន្ទាន់ ក្នុងករណីមានការបិទរដ្ឋាភិបាល។ក្នុងអំឡុងសន្និសីទសារព័ត៌មាន លោក Miller បាននិយាយថា ផែនការនោះនឹងបន្តនៅប៉ុន្មានថ្ងៃខាងមុខ ដើម្បីសម្រេច ថាតើការងារណា ដែលចាំបាច់សម្រាប់សន្តិសុខជាតិ ហើយមិនអាចត្រូវផ្អាកក្នុងពេលការបិទរដ្ឋាភិបាល និងការងារណាខ្លះដែលត្រូវផ្អាក។គួរបញ្ជាក់ផងដែរថា សភាតំណាងរាស្រ្តគណបក្សសាធារណរដ្ឋ ដែលដឹកនាំដោយក្រុមតូចមួយនៃពួកអភិរក្សនិយមដ៏រឹងរូស បានបដិសេធកម្រិតការចំណាយសម្រាប់ឆ្នាំសារពើពន្ធ២០២៤ ដែលបានកំណត់នៅក្នុងកិច្ចព្រមព្រៀង ដែលប្រធានសភាអាមេរិក លោក Kevin McCarthy បានចរចាជាមួយលោកប្រធានាធិបតី ចូ បៃដិន កាលពីខែឧសភា៕

មន្ត្រី៖កិច្ចព្រមព្រៀងEUចែករំលែកអ្នកស្វែងរកសិទ្ធិជ្រកកោននឹងត្រូវកំណត់ ក្នុងរយៈពេលប៉ុន្មានថ្ងៃខាងមុខ

EU៖ មន្ត្រីទេសន្តរប្រវេសន៍ជាន់ខ្ពស់របស់សហភាពអឺរ៉ុប បាននិយាយថា ប្លុកនេះ ត្រូវបានកំណត់ ដើម្បីយល់ព្រមលើរបៀបដោះស្រាយអន្តោប្រវេសន៍មិនទៀងទាត់ឲ្យបានឆាប់ បន្ទាប់ពីកិច្ចពិភាក្សារបស់រដ្ឋមន្ត្រី មិនមានកិច្ចព្រមព្រៀងចុងក្រោយ កាលពីថ្ងៃព្រហស្បតិ៍ជាមួយទីក្រុងប៊ែរឡាំងទេ ហើយទីក្រុងរ៉ូម ព្រួយបារម្ភអំពីការកើនឡើងចំនួននៃអ្នកមកដល់ នៅមុនការបោះឆ្នោតសំខាន់ៗ។ក្រុមរដ្ឋមន្ត្រី កំពុងស្វែងរកកិច្ចព្រមព្រៀងលើប្រព័ន្ធដែលជាប់គាំងជាយូរមកហើយសម្រាប់ការចែករំលែកនៅទូទាំងសហភាពអឺរ៉ុប ដែលអ្នកស្វែងរកសិទ្ធិជ្រកកោន បានទៅដល់អឺរ៉ុប នៅខាងក្រៅច្រកឆ្លងព្រំដែនផ្លូវការ។លោកស្រី អ៊ីលវ៉ា ចូហានសុន (Ylva Johansson) ប្រធានកិច្ចការមហាផ្ទៃរបស់សហភាពអឺរ៉ុប បានបដិសេធមិនផ្តល់ព័ត៌មានលម្អិតថា៖«ខ្ញុំប្រាកដថា ក្នុងរយៈពេលពីរបីថ្ងៃទៀត យើងនឹងមានការសម្រេចចិត្តជាផ្លូវការលើវិធីសាស្រ្តទូទៅសម្រាប់យន្តការដោះស្រាយវិបត្តិនេះ។លោកស្រី បានដាក់ចំនួនមកដល់មិនទៀងទាត់ក្នុងឆ្នាំនេះ គឺមានជនអន្តោប្រវេសន៍ ២៥០.០០០នាក់ ដែលភាគច្រើនជាអ្នកដែលបានភៀសខ្លួនចេញពីសង្គ្រាម និងភាពក្រីក្រនៅមជ្ឈិមបូព៌ា អាហ្វ្រិក និងអាស៊ីខាងត្បូង ហើយបានទៅដល់សហភាពអឺរ៉ុប នៅទូទាំងសមុទ្រមេឌីទែរ៉ាណេ៕

កោះតៃវ៉ាន់បង្ហាញនាវាមុជទឹកថ្មី ដើម្បីទប់ទល់ប្រទេសចិន

តៃវ៉ាន់៖ កោះតៃវ៉ាន់ បានបង្ហាញនាវាមុជទឹកផលិតក្នុងស្រុកលើកដំបូងរបស់ខ្លួន ខណៈកោះនេះពង្រឹងការការពារប្រឆាំងការវាយប្រហាររបស់ប្រទេសចិន។ មេដឹកនាំលោកស្រី Tsai Ing-wen បានអញ្ចើញជាអធិបតីក្នុងពិធីចាប់ផ្តើមការបង្ហាញនៅទីក្រុងកំពង់ផែ Kaohsiung នៅថ្ងៃព្រហស្បតិ៍នេះ។ មន្ត្រីសហរដ្ឋអាមេរិក បានព្រមានថា ប្រទេសចិន អាចប្រើសមត្ថភាពផ្នែកយោធា ក្នុងការបង្កើនការឈ្លានពានក្នុងរយៈពេលប៉ុន្មានឆ្នាំខាងមុខនេះ។ កោះតៃវ៉ាន់ ជាកោះស្វ័យគ្រប់គ្រង ដែលប្រទេសចិនចាត់ទុកថាជាខេត្តរបស់ខ្លួន ហើយបានប្តេជ្ញាទាមទារសិទ្ធក្រសោបយកមកវិញនៅថ្ងៃណាមួយ។ អ្នកសង្កេតការណ៍ភាគច្រើន ជឿថា ប្រទេសចិននឹងមិនវាយប្រហារទៅលើកោះនេះភ្លាមៗនោះទេ ហើយទីក្រុងប៉េកាំងបាននិយាយថាខ្លួនស្វែងរក ការបង្រួបបង្រួមដោយសន្តិវិធីជាមួយកោះតៃវ៉ាន់។ ប៉ុន្តែទន្ទឹមនឹងនេះ ប្រទេសចិនបាន ព្រមានកោះតៃវ៉ាន់ចំពោះការប្រកាសឯករាជ្យជាផ្លូវការ និងមានការគាំទ្រពីបរទេសណាមួយ។ ប្រទេសនេះបានព្យាយាមកាន់តែខ្លាំងឡើង ដើម្បីដាក់សម្ពាធលើកោះនេះ ដោយមានសមយុទ្ធយោធារបស់ខ្លួននៅច្រកសមុទ្រតៃវ៉ាន់ រួមទាំងការធ្វើសមយុទ្ធជាច្រើននៅក្នុងខែនេះ។លោកស្រី Tsai បាននិយាយខណៈលោកស្រីឈរនៅពីមុខនាវាមុជទឹកដែលមានរូបទង់ជាតិកោះតៃវ៉ាន់ថា «ប្រវត្តិសាស្ត្រនឹងចងចាំជារៀងរហូតនៅថ្ងៃនេះ»។ លោកស្រីនិយាយបន្ថែមថា គំនិតនៃនាវាមុជទឹកផលិតក្នុងស្រុកកាលពីពេលមុនត្រូវបានគេចាត់ទុកថា «ជាកិច្ចការមិនអាចទៅរួច ប៉ុន្តែយើងបានធ្វើវា»។យោងតាមមន្ត្រីយោធាបានឱ្យដឹងថា នាវាមុជទឹកដើរដោយថាមពលប្រេងម៉ាស៊ូតតម្លៃ ១,៥៤ពាន់លានដុល្លារ នឹងដំណើរការសាកល្បងជាច្រើនលើក ហើយនឹងត្រូវបញ្ជូនទៅឱ្យកងទ័ពជើងទឹកនៅចុងឆ្នាំ ២០២៤ ។

អាជ្ញាធរខណ្ឌសែនសុខ ដាក់ឱសានវាទ ឱ្យបញ្ឈប់ការយកចិញ្ចើមផ្លូវ២៧១ ធ្វើអាជីវកម្មលក់ដូរ

ភ្នំពេញ ៖ កម្លាំងអាជ្ញាធរខណ្ឌសែនសុខ ដឹកនាំដោយលោកសាំង សុភៈវិចិត្រ អភិបាលរងខណ្ឌ បានដឹកនាំក្រុមមន្ត្រី ចុះអប់រំណែនាំជាលើកចុងក្រោយ លើក្រុមអ្នកលក់ដូរបន្លែត្រីសាច់ទាំងឡាយ ឱ្យបញ្ឈប់ការយកចិញ្ចើមផ្លូវលេខ២៧១ ធ្វើអាជីវកម្មបន្តទៀត ខណះដែលកាលពីពេលកន្លង អាជ្ញាធរក៏ធ្លាប់បានចុះអប់រំជារឿយៗផងដែរ ។ ការចុះដាក់ឱសានវាទ នៃការយកចិញ្ចើមផ្លូវធ្វើអាជីវកម្មខាងលើនេះ ធ្វើឡើងនាវេលាម៉ោង៥ និង៣០នាទីព្រឹក ថ្ងៃទី២៨ ខែកញ្ញា ឆ្នាំ២០២៣នេះ នៅតាមបណ្តោយផ្លូវលេខ២៧១ ( ម្តុំទល់មុខផ្សារហេងលី ) ស្ថិតក្នុងសង្កាត់ទឹកថ្លា និងសង្កាត់អូរបែកក្អម ខណ្ឌសែនសុខ រាជធានីភ្នំពេញ ។ នៅព្រឹកថ្ងៃខែដដែលនេះ កម្លាំងអាជ្ញាធរបានពិនិត្យឃើញថា នៅតែមានបងប្អូនពលរដ្ឋមួយចំនួន បន្តការលក់ដូរលើចិញ្ចើមផ្លូវសាធារណះដដែល បើទោះបីជាអាជ្ញាធរពន្យាចុះអប់រំពន្យល់ណែនាំច្រើនលើកច្រើនសារ ឱ្យបញ្ឈប់ការលក់ដូរបែបនេះទៀតក៏ដោយ ខណះដែលការដាក់លក់បែបនេះ វាធ្វើឱ្យប៉ះពាល់ដល់សណ្តាប់ និងរបៀបរៀបរយផ្លូវសាធារណះ ក៏ដូចជាបរិស្ថានអនាម័យជាដើម ។ មន្ត្រីអាជ្ញាធរ បានណែនាំឱ្យពលរដ្ឋកំពុងលក់ដូរបំពានខាងលើ សូមឱ្យពួកគាត់ស្វែងទីតាំងថ្មី បន្តអាជីវកកម្មលក់ដូររបស់ខ្លួនបន្តទៀត ដែលជាទីតាំងត្រឹមត្រូវ ជៀសវៀងការដាក់លក់ដូរលើចិញ្ចើមផ្លូវ ដែលធ្វើឱ្យបាត់បង់សណ្តាប់ធ្នាប់សង្គម ។ មន្ត្រីអាជ្ញាធរ បញ្ជាក់ថា ក្រោយការអប់រំណែនាំលើកចុងក្រោយនេះត្រូវបានបញ្ចប់រួច នៅពេលខាងមុខ អាជ្ញាធរនឹងមានវិធានការរដ្ឋបាលតាមនីតិវិធីច្បាប់ ដោយដាក់កម្លាំងចុះរៀបចំ ដោយមិនទទួលខុសត្រូវលើការបាត់បង់ ឬខូចខាតទ្រព្យសម្បត្តិរបស់បងប្អូនអ្នកលក់ដូរនោះឡើយ ៕ ដោយ ៖ លីហេង

ត្រីរាប់រយក្បាលងាប់ ខណៈប្រេស៊ីលរងការវាយប្រហារដោយគ្រោះរាំងស្ងួតធ្ងន់ធ្ងរ

រដ្ឋមន្ត្រីក្រសួងបរិស្ថាន លោកស្រី Marina Silva បាននិយាយថា រដ្ឋាភិបាលរបស់ប្រទេសប្រេស៊ីល កំពុងរៀបចំក្រុមការងារមួយ ដើម្បីផ្តល់ជំនួយសង្គ្រោះបន្ទាន់ដល់ប្រជាជននៅក្នុងតំបន់ព្រៃអាម៉ាហ្សូន ដែលរងផលប៉ះពាល់ដោយគ្រោះរាំងស្ងួតធ្ងន់ធ្ងរ ដោយបានជះឥទ្ធិពលដល់ទន្លេ ដែលជាជំនួយជីវិតរបស់ពួកគេ។កម្រិតទឹកទន្លេទាប និងស៊ីតុណ្ហភាពទឹកកាន់តែក្តៅ បានសម្លាប់ហ្វូងត្រីរាប់រយក្បាលអោយអណ្តែតលើផ្ទៃទន្លេ ដោយបំពុលទឹកផឹកសម្រាប់ប្រជាជន។ លោកស្រី Silva បានប្រាប់សារព័ត៌មាន រ៉យទ័រ ថា គ្រោះរាំងស្ងួតដ៏ធ្ងន់ធ្ងរបំផុតក្នុងកំណត់ត្រានេះ បានរំខានដល់ផ្លូវដឹកជញ្ជូនតាមដងទន្លេ ដែលគំរាមកំហែងដល់ការខ្វះខាតស្បៀងអាហារ និងទឹក ហើយបានសម្លាប់ត្រីមួយចំនួនធំនៅក្នុងទន្លេផងដែរ។លោកស្រីបានបន្ថែមថា មនុស្សប្រហែល១១១.០០០នាក់ បានរងផលប៉ះពាល់នៅក្នុងតំបន់ដែលប្រភពចំណូលរបស់ប្រជាជនភាគច្រើនបានមកពីការនេសាទ ហើយសកម្មភាពនេសាទនឹងត្រូវផ្អាកមួយរយៈផងដែរ។ ទីភ្នាក់ងារការពារជនស៊ីវិលបានព្រមានថា គ្រោះរាំងស្ងួតអាចប៉ះពាល់ដល់មនុស្សរហូតដល់ ៥០០.០០០នាក់នៅក្នុងតំបន់ព្រៃអាម៉ាហ្សូន។ គ្រោះរាំងស្ងួតនេះ ក៏ដូចជាទឹកជំនន់នៅភាគខាងត្បូងនៃប្រទេសប្រេស៊ីល បណ្តាលមកពីបាតុភូតអាកាសធាតុអ៊ែល នីញ៉ូ ដែលធ្វើឲ្យកម្ដៅទឹកលើផ្ទៃក្នុងមហាសមុទ្រប៉ាស៊ីហ្វិកកើនឡើង៕

បព្វជិតកាតូលិកជាច្រើនតវ៉ានៅអ៊ីតាលី ដើម្បីទាមទារច្បាប់គ្មានការអត់ឱនលើការរំលោភបំពានផ្លូវភេទ

កាលពីថ្ងៃពុធ (២៧ កញ្ញា) ក្រុមជនរងគ្រោះនៃរំលោភបំពានពីវិហារកាតូលិក និងអ្នកតស៊ូមតិ បានអំពាវនាវដល់សម្តេចប៉ាប ហ្វ្រង់ស៊ីស ឱ្យអនុវត្តច្បាប់ «គ្មានការអត់ឱន»" ប្រឆាំងនឹងការរំលោភបំពានផ្លូវភេទពីបព្វជិត បន្ទាប់ពីបានបញ្ចប់ធម្មយាត្រាតវ៉ារយៈពេលប្រាំមួយថ្ងៃ ទៅកាន់ទីក្រុងរ៉ូម ដោយកាន់ឈើឆ្កាងដ៏ធំមួយ។មេធាវីអាមេរិក លោក Timothy Law សហស្ថាបនិកនៃអង្គការលុបបំបាត់ការរំលោភបំពានផ្លូវភេទពីបព្វជិត (ECA) បាននិយាយថា ក្បួនធម្មយាត្រានេះ បង្ហាញពីការប្តេជ្ញាចិត្តនៃអ្នកនៅរស់រានមានជីវិត ដើម្បីមកថ្លែងសាររបស់ពួកគេទៅកាន់សម្តេចប៉ាប ហ្វ្រង់ស៊ីស ដោយថាត្រូវតែមានច្បាប់ជាសកលនៃព្រះវិហារក្នុងការមិនអត់ឱនឱ្យជនល្មើសបំពានផ្លូវភេទពីបព្វជិតនោះទេ។ ការបំពានផ្លូវភេទ និងការបិទបាំងរឿងអាស្រូវ បានធ្វើឱ្យខូចកេរ្តិ៍ឈ្មោះរបស់វិហារកាតូលិក ហើយជាបញ្ហាប្រឈមដ៏សំខាន់សម្រាប់សម្តេចប៉ាប ដែលបានចាត់វិធានការជាបន្តបន្ទាប់ក្នុងគោលបំណងរក្សាឋានានុក្រមសាសនាចក្រ ឱ្យកាន់តែមានទំនួលខុសត្រូវ ជាមួយនឹងលទ្ធផលចម្រុះ។សម្តេចប៉ាប ហ្វ្រង់ស៊ីស បានមានបន្ទូលសន្យាថា «គ្មានការអត់ឱន» ទាក់ទងនឹងការរំលោភបំពានក្នុងព្រះវិហារ ប៉ុន្តែក្រុមអ្នករិះគន់និយាយថា កំណែទម្រង់ និងគោលការណ៍ណែនាំរបស់សម្ដេចប៉ាប មិនទាន់បានសម្រេចគ្រប់គ្រាន់ទេ ហើយត្រូវបានអនុម័តមិនស្មើគ្នាដោយវិហារកាតូលិកជាតិជាច្រើនផងដែរ៕

វិបត្តិសុខភាពនៅស៊ូដង់កាន់តែធ្ងន់ធ្ងរទៅៗ ក្នុងពេលជម្លោះនិងការរាលដាលវីរុសតាមរដូវកាល

ការព្រួយបារម្ភកំពុងកើនឡើងជុំវិញស្ថានភាពសុខភាពកាន់តែធ្ងន់ធ្ងរនៅប្រទេសស៊ូដង់ ក្នុងពេលមានការកើនឡើងជំងឺរាតត្បាតតាមរដូវកាល គួបផ្សំនឹងជម្លោះដែលកំពុងបន្តរវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF)។ក្រសួងសុខាភិបាលប្រទេសស៊ូដង់ បានទទួលស្គាល់ពីភាពអាសន្នជំងឺគ្រុនឈាម គ្រុនចាញ់ និងជំងឺអាសន្នរោគ នៅទូទាំងតំបន់ផ្សេងៗរបស់ប្រទេស។ នៅក្នុងសេចក្តីថ្លែងការណ៍ ដែលបានចេញផ្សាយនៅលើទំព័រ Facebook របស់ខ្លួនកាលពីល្ងាចថ្ងៃអង្គារ ក្រសួងបានរាយការណ៍ពីករណីស្លាប់ទាក់ទងនឹងជំងឺអាសន្នរោគចំនួន ២១ នាក់ នៅក្នុងរដ្ឋ Khartoum និងរដ្ឋ Gedaref ។យោងតាមក្រសួងបានឲ្យដឹងថា «ករណីសង្ស័យជំងឺអាសន្នរោគចំនួន ២៦៥ករណី ត្រូវបានរាយការណ៍នៅក្នុងរដ្ឋ Gedaref ដោយមានអ្នកស្លាប់ចំនួន១៨នាក់ ខណៈរដ្ឋ Khartoum បានកត់ត្រាករណីជំងឺអាសន្នរោគចំនួន ១៣ ករណី ក្នុងនោះមានអ្នកស្លាប់ចំនួន ៣ នាក់។ សារព័ត៌មាន ស៊ូដង់ ទ្រីប្យូន(Sudan Tribune) ជាប្រព័ន្ធផ្សព្វផ្សាយព័ត៌មានឯករាជ្យមួយ ដោយបានលើកឡើងពីរដ្ឋមន្ត្រីក្រសួងសុខាភិបាលស្តីទីរបស់ប្រទេសស៊ូដង់ លោក Haitham Mohamed Ibrahim ដែលបានរាយការណ៍ កាលពីថ្ងៃពុធថាករណីជំងឺគ្រុនឈាមនៅក្នុងរដ្ឋ Gedaref បានកើនឡើងដល់យ៉ាងហោចណាស់ ៧០០ករណី រួមទាំងអ្នកស្លាប់៨ នាក់ ។ រដ្ឋមន្រ្តីបាននិយាយថា ការរាតត្បាតជំងឺគ្រុនឈាម កំពុងរាលដាលនៅក្នុងរដ្ឋចំនួន ៨ ដែលរួមចំណែកដល់ការរាលដាលជំងឺចំពោះការកើនឡើងនៃការបង្កាត់ពូជសត្វមូស ក្នុងពេលមានភ្លៀងធ្លាក់ជាបន្តបន្ទាប់។លោកបាននិយាយថាថា ក្រសួងបានចាប់ផ្តើមយុទ្ធនាការប្រយុទ្ធប្រឆាំងសត្វមូស និងសត្វចម្លងជំងឺផ្សេងៗទៀតនៅក្នុងរដ្ឋ Gedaref កាលពីពីរសប្តាហ៍មុន ដោយមានការគាំទ្រពីអង្គការសុខភាពពិភពលោក (WHO) មូលនិធិកុមារអង្គការសហប្រជាជាតិ (UNICEF) និងក្រុមគាំទ្រសហព័ន្ធនៅក្នុងរដ្ឋ Gedaref ។

សាលារៀននៅប៉ាគីស្ថានចំនួន ៥៦.០០០កន្លែង ត្រូវបានបិទជុំវិញការផ្ទុះឡើងនៃមេរោគភ្នែក

ក្រុមមន្ត្រីបាននិយាយកាលពីថ្ងៃពុធថា សាលារៀននៅប្រទេសប៉ាគីស្ថានជាង ៥៦.០០០កន្លែង នឹងបិទទ្វារសម្រាប់រយៈពេលមួយសប្តាហ៍ ក្នុងគោលបំណងទប់ស្កាត់ការផ្ទុះឡើងខ្លាំងនៃមេរោគភ្នែកដែលឆ្លងរាលដាល។សិស្សរាប់លាននាក់ នឹងស្នាក់នៅក្នុងលំនៅឋានចាប់ពីថ្ងៃស្អែកតទៅ បន្ទាប់ពីខេត្ត Punjab ជាខេត្តដែលមានប្រជាជនច្រើនបំផុតរបស់ប្រទេសប៉ាគីស្ថាន បានប្រកាសពីការគ្របដណ្តប់ការបិទ ដែលបានកត់ត្រាករណីជំងឺភ្នែកក្រហមចំនួន ៣៥៧.០០០ករណី ចាប់តាំងពីដើមឆ្នាំមក។ការឆ្លងមេរោគភ្នែកដែលរាលដាលយ៉ាងឆាប់រហ័ស បណ្តាលឱ្យឡើងក្រហម រមាស់ និងហូរទឹកភ្នែក ហើយការចម្លងមេរោគអាចឆ្លងរាលដាលតាមរយៈការប៉ះដៃ ព្រមទាំងការក្អក និងកណ្តាស់។អ្នកនាំពាក្យនាយកដ្ឋានអប់រំខេត្ត Punjab លោក Zulfiqar Ali បានប្រាប់សារព័ត៌មាន AFP ថា «ការបិទសាលារៀនត្រូវបានប្រកាសថាជាវិធានការសកម្មមួយដើម្បីផ្តល់ការការពារជាអតិបរមា ដល់សិស្សទប់ស្កាត់ការឆ្លងរាលដាល។ មានពលរដ្ឋចំនួន ១២៧.០០០.០០០នាក់ នៅក្នុងខេត្តភាគខាងកើតខេត្ត Punjab និងសាលារៀនរដ្ឋចំនួន ៥៦.០០០កន្លែង ព្រមទាំងសាលារៀនឯករាជ្យរាប់ពាន់កន្លែង ត្រូវបិទទ្វារផងដែរ។លោក Ali និយាយថា យើងសង្ឃឹមថា វានឹងបំបែកវដ្តនៃការឆ្លងនៅក្នុងខេត្តនេះ។ សាលារៀននៅទូទាំងប្រទេសប៉ាគីស្ថាន ត្រូវបានកំណត់ពេលបិទរួចហើយនៅថ្ងៃសុក្រ ដោយសារថ្ងៃឈប់សម្រាកសាសនាសាធារណៈ ប៉ុន្តែទោះជាយ៉ាងណា ជាធម្មតាសាលារៀនជាច្រើននឹងបើកនៅចុងសប្តាហ៍ដើម្បីផ្តល់ថ្នាក់រៀនបន្ថែម ឬការប្រឡងដំណាក់កាល។ អាជ្ញាធរខេត្ត Punjab បាននិយាយថា សិស្សនឹងត្រូវបានពិនិត្យនៅច្រកទ្វារចូលសាលារៀន នៅពេលដែលសាលាបើកឡើងវិញនៅថ្ងៃច័ន្ទ។

សមាជិកក្រុមគ្រួសារអារ៉ាប់៥នាក់ ត្រូវបានបាញ់សម្លាប់ ខណៈអត្រាឧក្រិដ្ឋកម្មនៅអ៊ីស្រាអែលកើនឡើង

នគរបាលបាននិយាយកាលពីថ្ងៃពុធថា សមាជិក៥នាក់ នៃក្រុមគ្រួសារអារ៉ាប់មួយ ត្រូវបានបាញ់សម្លាប់នៅក្នុងលំនៅឋានរបស់ពួកគេក្នុងប្រទេសអ៊ីស្រាអែល ជារលកចុងក្រោយបង្អស់ ក្នុងរលកឃាតកម្មទាក់ទងទៅនឹងឧក្រិដ្ឋកម្ម ក្នុងសហគមន៍អារ៉ាប់នៅប្រទេសអ៊ីស្រាអែល ដែលបានឈានដល់ចំណុចខ្ពស់ថ្មីនៅឆ្នាំនេះ។ ពលរដ្ឋអារ៉ាប់ ជាង៨០០នាក់ នៅក្នុងប្រទេសអ៊ីស្រាអែល ត្រូវបានសម្លាប់ ក្នុងអំពើហិង្សាទាក់ទងទៅនឹងឧក្រិដ្ឋកម្ម ចាប់តាំងពីខែមករា ក្នុងសន្ទុះនៃឃាតកម្ម ដែលបានបន្តមិនត្រួតពិនិត្យ បណ្តាលឲ្យមានការចោទប្រកាន់ដែលថារដ្ឋាភិបាលជាតិនិយមសាសនារបស់នាយករដ្ឋមន្ត្រីលោក Benjamin Netanyahu ធ្វើព្រងើយចំពោះការបង្ហូរឈាមនេះ។អភិបាលសហគមន៍អារ៉ាប់ បានចោទប្រកាន់រដ្ឋាភិបាល និងនគរបាលពីការធ្វេសប្រហេសដោយចេត្តនាចំពោះសហគមន៍របស់ពួកគេ និងផ្តល់លទ្ធភាពដល់ឧក្រិដ្ឋជនធ្វើសកម្មភាពដោយភាពគ្មានទោស។ពលរដ្ឋអារ៉ាប់ ដែលភាគច្រើនជាកូនចៅរបស់ជនប៉ាឡេស្ទីន ដែលនៅសល់ក្នុងប្រទេសអ៊ីស្រាអែល អំឡុងការធ្វើអន្តោប្រវេសន៍នៃជនភៀសខ្លួនក្នុងសង្គ្រាមឆ្នាំ១៩៤៨ អំឡុងពេលការបង្កើតអ៊ីស្រាអែល ដែលបង្កើតបានប្រមាណ១ភាគ៥នៃចំនួនប្រជាជនរបស់ប្រទេស។ ពួកគេបានជួបបញ្ហាប្រឈមជាច្រើនទសវត្សរ៍មកហើយចំពោះអត្រាភាពក្រីក្រខ្ពស់ សាលារៀនត្រូវបានផ្តល់មូលនិធិខ្សត់ខ្សោយ និងទីក្រុងមានមនុស្សច្រើនខ្វះខាតសេវាកម្មនានា និងបាននិយាយថាពួកគេត្រូវបានប្រព្រឹត្តជាពលរដ្ឋថ្នាក់ទី២ដោយប្រៀបធៀបទៅនឹងពលរដ្ឋអ៊ីស្រាអែលជ្វីហ្វ។

បណ្ដាញសង្គម

ព័ត៌មានថ្មីៗ

ថ្នាក់ដឹកនាំ បុគ្គលិកនៃអគ្គនាយកដ្ឋានវិទ្យុនិងទូរទស្សន៍បាយ័ន កាន់វេនបិណ្ឌទី៥ នៅវត្តកោះនរា

វេទិកា និងពិព័រណ៍កសិកម្មកម្ពុជាឆ្នាំ២០២៦ ត្រៀមប្រមូលផ្តុំអ្នកពាក់ព័ន្ធជាង ២៥,០០០នាក់ និងស្តង់ពិព័រណ៍ជាង ៤០០

ប្រសាសន៍សំខាន់ៗរបស់សម្ដេចធិបតី ក្នុងពិធីសម្ពោធបើកឲ្យប្រើប្រាស់ជាផ្លូវការផ្លូវជាតិលេខ១០ ប្រវែងសរុប ១៩៨,៥១៨ គីឡូម៉ែត្រ នៅខេត្តពោធិ៍សាត់

ទិវាមនុស្សចាស់| សម្ដេចធិបតី៖«ការវិនិយោគលើយុវជនវ័យក្មេងនៅថ្ងៃនេះសម្រាប់មនុស្សវ័យចាស់ប្រកបដោយផលិតភាពនៅថ្ងៃអនាគត»

ទិវាមនុស្សចាស់| ព្រះមហាក្សត្រ អំពាវនាវដល់អាជ្ញាធរគ្រប់លំដាប់ថ្នាក់ និងជនរួមជាតិយកចិត្តទុកដាក់ និងជួយបីបាច់ថែរក្សាមនុស្សវ័យចាស់ ជរា ពិការ ក្រីក្រ និងអ្នកគ្មានទីពឹងទាំងឡាយ

ក្រសួងបរិស្ថាន និងក្រសួងមហាផ្ទៃ ជំរុញភាពស្អាតនៅតាមពន្ធនាគារនៅទូទាំងប្រទេស

នាយករដ្ឋមន្រ្តីកាតាថ្កោលទោសអំពើឃោឃៅរបស់អ៊ីស្រាអែលនៅតំបន់ហ្កាហ្សា

គ្រូពេទ្យ៖ ការវាយប្រហាររបស់អ៊ីស្រាអែល នៅតំបន់ហ្កាហ្សា សម្លាប់មនុស្សយ៉ាងតិច ៥នាក់

តំណាងអចិន្ត្រៃយ៍កម្ពុជា ប្រចាំ UN ស្នើអ្នករាយការណ៍ពិសេសស្តីពីស្ថានភាពសិទ្ធិមនុស្សបន្តយកចិត្តទុកដាក់ចំពោះប្រជាជនភៀសសឹកកម្ពុជា និងការវិលត្រឡប់ទៅកាន់លំនៅឋានវិញដោយសុវត្ថិភាព និងសេចក្តីថ្លៃថ្នូរ

ជើងហោះហើរទៅកាន់អ៊ីស្រាអែល បង្វែរទិសដៅហោះហើរទៅកាន់អារ៉ាប៊ីសាអ៊ូឌីត ក្រោយការប្រកាសអាសន្ន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877