នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សមត្ថកិច្ចបង្ក្រាបទីតាំង Online Scams ចំនួន៩កន្លែងនៅក្រុងបាវិត ឃាត់ខ្លួនជន​បរទេសជាង ៣០០នាក់
កម្លាំងជំនាញបន្តឆ្មក់ចុះបង្ក្រាបទីតាំងឆបោកតាមប្រពន្ធ័បច្ចេកវិទ្យា នៅខណ្ឌសែនសុខ ឃាត់​ជន​បរទេស​ ២៧នាក់
គណៈបញ្ជាការឯកភាពរាជធានីចុះបង្ក្រាបទីតាំងឆបោកតាមប្រពន្ធ័បច្ចេកវិទ្យា នៅខណ្ឌសែនសុខ ឃាត់ជនសង្ស័យ០៨នាក់
បណ្តេញជនបរទេសជិត ៥០០នាក់ ចេញពីកម្ពុជាករណីឆបោកតាមប្រព័ន្ធអនឡាញ

សន្តិសុខ និង សង្គម

UPDATE៖ សេចក្តីថ្លែងការណ៍របស់ក្រុមហ៊ុន OceanGate Titan ពាក់ព័ន្ធករណីផ្ទុះនាវាមុជទឹកទីតាន(Titan)

2023/06/23 09:17:00 am        312
Facebook Telegram Linkin
នេះជាសេចក្តីថ្លែងការណ៍របស់ក្រុមហ៊ុន OceanGate ស្តីពីការបាត់ Titan ជាព័ត៌មានលម្អិតពេញលេញ៖«ឥឡូវនេះយើងជឿថា នាយកប្រតិបត្តិរបស់យើង លោក Stockton Rush, លោក Shahzada Dawood និងកូនប្រុសរបស់លោក Suleman Dawood, លោក Hamish Harding និងលោក Paul-Henri Nergeolet បានបាត់បង់ជីវិតជារៀងរហូតដ៏គួរសោកស្តាយជាពន់ពេក។ បុរសទាំង ៥នាក់នេះ គឺជាអ្នករុករកពិតប្រាកដ ដែលបានចែករំលែកស្មារតីនៃដំណើរផ្សងព្រេងប្លែកៗពីគ្នា និងចំណង់ចំណូលចិត្តយ៉ាងជ្រាលជ្រៅ ក្នុងការរុករក និងការពារមហាសមុទ្ររបស់ពិភពលោក»។«បេះដូងរបស់ពួកយើងកំពុងនៅជាមួយព្រលឹងរបស់អ្នកទាំងប្រាំនេះ និងសមាជិកគ្រប់រូបនៃក្រុមគ្រួសាររបស់ពួកគេ អំឡុងពេលសោកនាដកម្មនេះ។ យើងសោកស្ដាយណាស់ចំពោះការបាត់បង់ជីវិត និងការពេញចិត្តដែលពួកគេបាននាំឲ្យអ្នករាល់គ្នា ដែលពួកគេបានស្គាល់។ នេះគឺជាពេលវេលាដ៏សោកសៅដ៏ក្រែលែងសម្រាប់បុគ្គលិកដែលប្រឹងប្រែងលះបង់គ្រប់យ៉ាងរបស់យើង ដែលហត់នឿយ និងដែលមានអារម្មណ៍សោកស្ដាយយ៉ាងជាពន់ពេក ចំពោះការបាត់បង់នេះ»។«គ្រួសាររបស់ក្រុមហ៊ុន OceanGate ទាំងមូល សូមដឹងគុណយ៉ាងជ្រាលជ្រៅ ចំពោះសុភាពបុរស និងសុភាពស្ត្រី ដែលមិនអាចពិពណ៌នាបាន មកពីស្ថាប័នជាច្រើននៃសហគមន៍អន្តរជាតិ ដែលបានជួយពន្លឿនធនធានដ៏ធំទូលាយ ហើយបានខិតខំប្រឹងប្រែងយ៉ាងខ្លាំងក្នុងបេសកកម្មនេះ។ យើងសូមកោតសរសើរចំពោះការប្តេជ្ញាចិត្តរបស់អ្នកទាំងអស់គ្នា ក្នុងការស្វែងរកអ្នករុករកទាំងប្រាំនាក់នេះ និងការងារដែលមិនចេះនឿយហត់ទាំងយប់ទាំងថ្ងៃរបស់អ្នកទាំងអស់គ្នា ក្នុងការជួយដល់ក្រុមនាវិករបស់យើង និងក្រុមគ្រួសាររបស់ជនរងគ្រោះទាំងអស់»។«នេះគឺជាពេលវេលាដ៏ក្រៀមក្រំបំផុត សម្រាប់សហគមន៍អ្នករុករកទាំងមូល និងសម្រាប់សមាជិកគ្រួសារនីមួយៗរបស់អ្នកដែលបានបាត់ខ្លួន នៅក្នុងសមុទ្រនេះ។ ដោយក្ដីគោរពយ៉ាងស្មោះស្ម័គ្រ យើងសុំការយោគយល់ថា ឯកជនភាពរបស់ក្រុមគ្រួសារនៃជនរងគ្រោះទាំងអស់នេះ ត្រូវបានគោរពក្នុងអំឡុងពេលដ៏សែនឈឺចាប់បំផុតនេះ»៕

UPDATE​​៖ នាវាមុជទឹកស្វែងរកបំណែកនាវាទីតានិក រងការខូចខាតដោយសារការផ្ទុះដ៏មហន្តរាយនៅបាតសមុទ្រ បណ្ដាលឲ្យអ្នកដំណើរទាំង៥នាក់ស្លាប់

2023/06/23 09:08:08 am        369
Facebook Telegram Linkin
អង្គភាពឆ្មាំល្បាតឆ្នេរសហរដ្ឋអាមេរិក បាននិយាយថា នាវាមុជទឹកដែលបានទៅដល់បាតសមុទ្រ ដោយមានផ្ទុកអ្នកដំណើរ៥ នាក់ ធ្វើដំណើរទៅទស្សនាបំណែកនាវាទីតានិក(Titanic)មានអាយុកាល១០០ឆ្នាំ នោះ ត្រូវបានរកឃើញបំណែកពីការផ្ទុះដ៏មហន្តរាយ ដែលបានសម្លាប់មនុស្សទាំងអស់៥នាក់ ។ ការរកឃើញបំណែកនេះ បានបញ្ចប់នូវការរុករកដ៏ធំជាអន្តរជាតិ សម្រាប់នាវាមួយដែលបានបាត់ការទាក់ទងកាលពីថ្ងៃអាទិត្យចុងសប្ដាហ៍នេះមក។  ឧត្តមនាវីទោនៃអង្គភាពឆ្មាំល្បាតឆ្នេរសហរដ្ឋអាមេរិក លោក John Mauger បានប្រាប់ក្រុមអ្នកសារព័ត៌មានថា នាវារូបយន្តមុជទឹកមួយគ្រឿង ដែលបានបញ្ជូនពីនាវារបស់ប្រទេសកាណាដា បានរកឃើញ បំណែកមួយចេញពីនាវាមុជទឹកទីតាន (Titan) កាលពីព្រឹកថ្ងៃព្រហស្បតិ៍នៅបាតសមុទ្រ ចម្ងាយ៤៨៨ម៉ែត្រពីបំណែកនាវាលិចទីតានិក ដែលមានជម្រៅប្រហែល៤គីឡូម៉ែត្រពីផ្ទៃខាងលើសមុទ្រ ក្នុងជ្រុងម្ខាងនៃសមុទ្រអាត្លង់ទិកខាងជើង។  នាវាទីតាន ត្រូវបានធ្វើប្រតិបត្តិការដោយក្រុមហ៊ុន OceanGate Expeditionsដែលមានមូលដ្ឋាននៅក្នុងសហរដ្ឋអាមេរិក។ គួរម្លឹកថា នាវាមុជទឹកនេះ បានបាត់ ចាប់តាំងពីបាត់ការទាក់ទងជាមួយនាវាជំនួយនៅលើផ្ទៃទឹក កាលពីព្រឹកថ្ងៃអាទិត្យ ប្រហែល៤ម៉ោង និង៤៥នាទី ជាអ្វីដែលគួរតែត្រូវបានបើកបររយៈពេល២ម៉ោងដើម្បីទៅដល់បំណែកនាវាដ៏ល្បីល្បាញបំផុតរបស់ពិភពលោកមួយនេះ។  ក្រុមមន្ត្រីអង្គភាពឆ្មាំល្បាតឆ្នេរ បាននិយាយថា បំណែកធំៗ ចំនួន៥បន្ទះ របស់នាវាមុជទឹក មានទំហំ ៦,៧ម៉ែត្រ ទីតាន ត្រូវបានរកឃើញ នៅក្នុងទីតាំងបំណែកដែលបានបន្សល់ទុកពីការបែកចេញពីតួនាវា រួមទាំងកន្ទុយរាងស្រួចរបស់នាវា និងបំណែក២ទៀតនៃសំបកតួនាវា៕

អាវុធហត្ថរាជធានីភ្នំពេញ បង្ក្រាបបណ្តាញ ក្រុមHacker មួយក្រុម ដែលបាន Hack ចូល Telegram ជាច្រើន ដើម្បីឆបោកប្រាក់!

2023/06/22 03:22:24 pm        449
Facebook Telegram Linkin
ភ្នំពេញ ៖ រយៈពេលថ្មីៗចុងក្រោយនេះ គឺមានករណីហែកចូលតេលេក្រាមជាច្រើនករណីកើតឡើង បង្កឲ្យមាន​ជនរងគ្រោះ មួយចំនួនត្រូវបានខាតបង់ប្រាក់រាប់ពាន់ម៉ឺនដុល្លារដោយសារតែការបោកបញ្ឆោត។ ជាក់ស្តែងកាលពីថ្ងៃទី២៧ ខែមីនា ឆ្នាំ២០២៣ អាវុធហត្ថភ្នំពេញបានទទួលបណ្តឹងពីជនរងគ្រោះម្នាក់ សុំប្តឹងពី​ជនសង្ស័យមិនស្គាល់អត្តសញ្ញាណ បានហែកចូលតេឡេក្រាមរបស់ខ្លួន និងបានឆាត​ទៅបងប្អូន​មិត្តភក្តិជាច្រើន​ដើម្បីខ្ចីប្រាក់ ព្រមទាំងឆាតទៅគម្រាមទារប្រាក់អតិថិជនដែលជំពាក់ខ្លួនផងដែរ។ ស្របពេលជាមួយគ្នានោះ ក៏មានអតិថិជនរបស់ខ្លួនម្នាក់ ក៏ត្រូវបានគេហែកចូលតេឡេក្រាមរបស់គាត់ដូចគ្នា ហើយបានឆាតមក​ខ្ចីប្រាក់ខ្លួន​ចំនួន ៦០,០០០$ ហើយខ្លួនបានវេរទៅឲ្យអស់ ១០,០០០$ ក៏មានការសង្ស័យ ហើយក៏តេទៅអតិថិជនផ្ទាល់​ដើម្បីសួរនាំ ទើបដឹងថាមានការចាញ់បោកជនសង្ស័យយ៉ាងពិតប្រាកដ ព្រោះអតិថិជនរបស់ខ្លួន បានអះអាងថា មិនបានឆាតខ្ចីប្រាក់នោះទេ គឺមានគេហែកចូលតេឡេក្រាមរបស់គាត់បាត់ហើយ។តាមរយៈវិធានការជំនាញ និងការតាមប្រម៉ាញ់ជាប់ប្រចាំ រហូតដល់ថ្ងៃទី១៧,១៨ និង១៩ ខែមិថុនា ឆ្នាំ២០២៣ កម្លាំងជំនាញរបស់អាវុធហត្ថរាជធានីភ្នំពេញ បានធ្វើការឃាត់ខ្លួនជនសង្ស័យចំនួន០៥នាក់ ជាបន្តបន្ទាប់ (ខ្មែរ០១នាក់, ចិន០៤នាក់) ដែលមានការពាក់ព័ន្ធជាបណ្តាញ ជាមួយក្រុមHacker នៅឯបរទេស ធ្វើសកម្មភាព ហែកចូលតេឡេក្រាមនុស្សជាច្រើន ដើម្បីឆបោកប្រាក់។ ជនសង្ស័យទាំង ០៥នាក់រួមមាន៖១.ឈ្មោះ YU YULONG ជនជាតិចិន ទទួលខុសត្រូវក្នុងការទំនាក់ទំនងជាមួយក្រុម Hacker នៅក្រៅប្រទេស។២.ឈ្មោះ មាស ស្រីចិន (ហៅស្រីពៅ) ជនជាតិខ្មែរ ប្រពន្ធរបស់ឈ្មោះ YU YULONG ទទួលខុសត្រូវបកប្រែឆាត ពីខ្មែរទៅចិន និងពីចិនទៅខ្មែរ ទាំងអក្សរនិងសម្លេង ឲ្យក្រុម Hacker។៣.ឈ្មោះ HUANG ZHENG LIANG ជនជាតិចិន ទទួលខុសត្រូវខាងដកលុយចេញពីធនាគារ, រកបណ្តាញបន្ថែម និងពេលខ្លះ ទំនាក់ទំនងផ្ទាល់ជាមួយក្រុម Hacke​ ។៤.ឈ្មោះ ZHANG ZHAOCUN ជនជាតិចិន ទទួលខុសត្រូវខាងដកលុយចេញពីធនាគារ។៥.ឈ្មោះ LI QUEQIN ទទួលខុសត្រូវតម្កល់ប្រាក់នៅធនាគារ ដើម្បីធានាប្រតិបត្តិការឲ្យក្រុម Hacker នៅក្រៅប្រទេស។តាមចម្លើយសារភាពរបស់ឈ្មោះ YU YULONG និងប្រពន្ធឈ្មោះ មាស ស្រីចិន បានឲ្យដឹងថា ពួកគេស្គាល់ក្រុម Hacker តាមរយៈតែវីឆាត (WeChat) ប៉ុណ្ណោះ មិនដឹងថាពួកនោះនៅទីណាទេ គ្រាន់តែធ្លាប់ឭពួកវា​ប្រាប់ថារស់នៅ​ប្រទេសថៃ ហើយពួកវាប្រាប់ថា អាចហែកតេឡេក្រាមបាន តាមរយៈផ្ញើសារឬកម្មវិធីអ្វីមួយទៅបុគ្គលណាម្នាក់ ប្រសិនបើបុគ្គលនោះចូលមើល នោះពួកវានឹងចូលទៅគ្រប់គ្រងកម្មវិធីទូរស័ព្ទ​ឬឈានដល់គ្រប់គ្រង​អាខោនធនាគារ​បាន និងម៉្យាងទៀតប្រសិនបើយើងថតស្កែនលេខតេលេក្រាម៥ខ្ទង់ផ្ញើទៅឲ្យពួកវា នោះពួកវាក៏អាចគ្រប់គ្រង Telegram យើងបានដូចគ្នា។ រាល់ប្រតិបត្តិការជោគជ័យទាំងអស់ ឈ្មោះ YU YULONG និងប្រពន្ធឈ្មោះ មាស ស្រីចិន ទទួលបាន ៧%, ឈ្មោះ HUANG ZHENG LIANG ទទួលបាន ៤%, ឈ្មោះ ZHANG ZHAOCUN ទទួលបាន ២%, ឈ្មោះ LI QUEQIN ទទួលបាន ២% នៅសល់ទាំងប៉ុន្មាន គឺត្រូវផ្ញើទៅឲ្យ ក្រុម Hacker តាមរយៈធនាគារ ហ៊ុយវ័ង។ តាមរយៈបទពិសោធន៍នៃការបង្ក្រាបករណីខាងលើនេះ លោកឧត្តមសេនីយ៍ឯក រ័ត្ន ស៊្រាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានលើកឡើងថា ដោយ​សារតែបច្ចេកវិទ្យាដើរលឿនពេក ធ្វើឲ្យមានកម្មវិធីជាច្រើនដែលយើងមិនអាចតាមទាន់បាន ដូច្នេះ បងប្អូនដែល​ប្រើទូរស័ព្ទទាំងអស់ មិនត្រូវចូលមើល Link ឬ App ណាមួយ ដែលមានប្រភពមិនច្បាស់លាស់ ហើយផ្ញើមកឲ្យយើង តាមរយៈ SMS, WhatsApp, Telegram, Line ឬ Messenger ក៏ដូចជាមិនត្រូវ ឆ្លើយឆ្លងជា​មួយសារទាំងឡាយណា ដែលទាមទារឲ្យយើងបង្ហាញនូវទិន្នន័យផ្ទាល់ខ្លួន ទិន្នន័យធនាគារ ឬថតស្គ្រីនទូរស័ព្ទ របស់យើង ទៅពួកគេនោះ​ឡើយ ហើយបើមានអ្នកស្គាល់ផ្ញើសារជាអក្សរខ្មែរ ឬអក្សរបរទេស​មកយើង ដើម្បីខ្ចីប្រាក់ ឬទារប្រាក់ ឬបង្ខំឲ្យទូទាត់​អ្វី​ផ្សេងៗ យើងមិនត្រូវផ្ទេរប្រាក់ទៅភ្លាមៗនោះទេ គឺត្រូវឆែកបញ្ជាក់ឲ្យបានច្បាស់លាស់​ជាមុនសិន ដើម្បីជៀងវាង​ការ​ខាតបង់ ឬការចាញ់បោក ដោយប្រការណាមួយ លើការប្រើប្រាស់ទូរស័ព្ទ៕ ដោយ ៖ ប្រាក់ វ៉ាន់ដា

ទីក្រុងប៉េកាំងត្រៀមទប់ទល់សម្រាប់អាកាសធាតុក្តៅខ្លាំងខណៈរលកកម្ដៅវិលត្រឡប់មកវិញ

2023/06/22 02:43:51 pm        132
Facebook Telegram Linkin
ចិន៖ ទីក្រុងប៉េកាំងនៅថ្ងៃព្រហស្បតិ៍ទី ២២ ខែមិថុនានេះ បានចេញការព្រមានធ្ងន់ធ្ងរបំផុតលើកទីពីររបស់ខ្លួនសម្រាប់សីតុណ្ហភាពខ្ពស់ ដែលត្រូវបានគេរំពឹងថានឹងបន្តរហូតដល់ចុងសប្តាហ៍ ខណៈប្រទេសចិនភាគខាងជើង បានទប់ទល់នឹងរលកកម្តៅជុំមួយទៀតក្នុងមួយសប្តាហ៍នេះ។រដ្ឋធានីរបស់ប្រទេសចិន បានបង្កើនការជូនដំណឹងពណ៌លឿងទុំ ដោយព្រមានថា សីតុណ្ហភាពអាចកើនឡើងខ្ពស់ដល់ ៣៩ អង្សាសេ នៅក្នុងតំបន់ភាគច្រើននៃទីក្រុង ចាប់ពីថ្ងៃព្រហស្បតិ៍នេះ ដល់ថ្ងៃសៅរ៍។ទីក្រុងប៉េកាំង ធានជីន ហឺប៉ី និងសានទុង នៅក្នុងប្រទេសចិនភាគខាងជើង ត្រូវបានញាំញីដោយរលកកម្តៅកាលពីសប្តាហ៍មុន ដែលបានជំរុញឱ្យអាជ្ញាធរក្នុងតំបន់បង្កើនកិច្ចខិតខំប្រឹងប្រែងដើម្បីការពារផលដំណាំ ធានាបានសុវត្ថិភាពរបស់អ្នកទេសចរ និងផ្អាកការងារនៅខាងក្រៅលំនៅឋានក្នុងអំឡុងពេលនៃថ្ងៃក្តៅបំផុត។ កាលពីសប្តាហ៍មុន ការិយាល័យឧតុនិយមជាតិបានចេញការប្រកាសអាសន្នសម្រាប់ជំងឺសុរិយរោគជាឣាការៈសន្លប់ដោយសារកម្តៅរយៈពេលជិត២សប្តាហ៍ ដោយសីតុណ្ហភាពកំណត់ត្រាថ្មីសម្រាប់ខែមិថុនា បានវាយប្រហារទីក្រុងនានានៅភាគខាងជើងប្រទេសចិន។នៅក្នុងទីក្រុងកំពង់ផែ Tianjin តម្រូវការដែលការកើនឡើងសម្រាប់ការប្រើប្រាស់ម៉ាស៊ីនត្រជាក់ បានជំរុញបន្ទុកបណ្តាញអគ្គិសនីដល់ ១៤,៥៤ លានគីឡូវ៉ាត់កាលពីថ្ងៃទី ១៥ ខែមិថុនា កើនឡើង ២៣ ភាគរយធៀបនឹងឆ្នាំមុន៕

អ្នកជំនាញបានព្រមានក្រុមហ៊ុន OceanGate អំពីកង្វល់សុវត្ថិភាពនាវាមុជទឹកទីតានកាលពីឆ្នាំ២០១៨

2023/06/22 02:01:45 pm        122
Facebook Telegram Linkin
ក្រុមអ្នកជំនាញបានលើកឡើងពីកង្វល់សុវត្ថិភាពកាលពីឆ្នាំ ២០១៨ អំពីនាវាមុជទឹកដែលបានបាត់តាំងពីថ្ងៃអាទិត្យ (១៨ មិថុនា)នោះ នៅពេលដែលវាបានដឹកអ្នកទេសចរក្នុងការធ្វើដំណើរក្នុងសមុទ្រដ៏ជ្រៅមួយដើម្បីទៅមើលបំណែកកប៉ាល់ទីតានិក។មានអ្នកបើកនាវា និងអ្នកដំណើរ ៤ នាក់នៅលើនាវានោះ ហើយអុកស៊ីសែនដែលមាននៅក្នុងនាវានោះ ត្រូវបានគេព្យាករណ៍ថានឹងអស់នៅថ្ងៃព្រហស្បតិ៍ (២២ មិថុនា)នេះ។លោក Will Kohnen ប្រធានគណៈកម្មាធិការអង្គភាពបច្ចេកវិទ្យាដែនសមុទ្រ (MTS) បានចេញលិខិតមួយចុះថ្ងៃទី ២៧ ខែមីនា ឆ្នាំ ២០១៨ ទៅកាន់ស្ថាបនិកក្រុមហ៊ុន OceanGate និងនាយកប្រត្តិបត្តិលោក Stockton Rush ជាអ្នកបើកនាវាដែលបានបាត់នោះ។ នៅក្នុងលិខិតនោះ លោក Kohnen បានសម្តែងនូវក្តីកង្វល់ខ្លាំងអំពីនាវាមុជទឹក ហើយ Kohnen បាននិយាយថា ក្រោយមកលោកបានពិភាក្សាអំពីលិខិតនេះជាមួយនឹងលោក Rush ។បញ្ហានោះមិនមែនជាគុណវិបត្តិនៃការរចនាតែម៉្យាងនោះទេ ប៉ុន្តែថាក្រុមហ៊ុន OceanGate ជ្រើសរើសមិនបន្តដំណើរការវិញ្ញាបនប័ត្រដែលត្រូវបានទទួលស្គាល់របស់ឧស្សាហកម្មនេះ។ លោក Kohnen បាននិយាយថា លិខិតនោះបានធ្វើឡើងបន្ទាប់ពីអ្នកជំនាញផ្នែកមុជទឹកជាច្រើនបានសម្តែងការព្រួយបារម្ភអំពី នាវាមុជទឹកទីតាន ក្នុងអំឡុងពេលសន្និសីទប្រចាំឆ្នាំរយៈពេលបីថ្ងៃ។ លោកបាននិយាយថាខ្លួនបានស្នើសុំឱ្យក្រុមប្រឹក្សាភិបាលអង្គភាពបច្ចេកវិទ្យា MTS ផ្ញើលិខិតនេះតំណាងឲ្យសង្គមទាំងមូលប៉ុន្តែក្រុមប្រឹក្សាភិបាលបានបដិសេធលិខិតនោះ៕

ហេតុការណ៍ផ្ទុះហ្គាសក្នុងហាងលក់សាច់អាំងនៅតំបន់ភាគពាយ័ព្យប្រទេសចិន បានសម្លាប់មនុស្ស ៣១នាក់

2023/06/22 01:52:26 pm        104
Facebook Telegram Linkin
ចិន៖ យោងតាមសេចក្តីរាយការណ៍ពីទីភ្នាក់ងារព័ត៌មានរដ្ឋស៊ីនហួ បានឲ្យដឹងថា ហេតុការណ៍ផ្ទុះហ្គាសក្នុងហាងលក់សាច់អាំងកាលពីយប់ថ្ងៃពុធនៅតំបន់ភាគពាយ័ព្យ Ningxia (នីងសៀ) ប្រទេសចិន បានសម្លាប់មនុស្ស ៣១នាក់ ជាហេតុនាំឲ្យលោកប្រធានាធិបតី Xi Jinping ចេញបទបញ្ជាពិនិត្យសុវត្ថិភាពតឹងរឹងជាងមុន ។  សារព័ត៌មានស៊ីនសួ រាយការណ៍នៅថ្ងៃព្រហស្បតិ៍នេះថា ហេតុការណ៍ផ្ទុះហ្គាសក្នុងទីក្រុង Yinchuan រដ្ឋធានីតំបន់ Ningxia បណ្តាលមកពីធ្លាយធុងហ្គាសនៅក្នុងហាង ។  សារព័ត៌មានស៊ីនហួ រាយការណ៍ទៀតថា មនុស្ស ៧នាក់ កំពុងទទួលការព្យាយាលស្នាមរលាក និងរយះសាច់ដោយសារបែកកែវ ។   ដោយឡែក ទូរទស្សន៍រដ្ឋចិន CCTV រាយការណ៍ថា លោកប្រធានាធិបតី Xi បាននិយាយប្រាប់ក្រុមអាជ្ញាធរឲ្យចេញប្រតិបត្តិការភ្លាមៗ ដើម្បីព្យាបាលអ្នករងរបួស ហើយលោកនិយាយថា ការត្រួតពិនិត្យសុវត្ថិភាពនៅតាមឧស្សាហកម្មធំៗ និងតាមវិស័យធុរកិច្ច គួរតែត្រូវបានពង្រឹង ។  សូមបញ្ជាក់ថា ឧបទ្ទេវហេតុផ្ទុះហ្គាស និងសារធាតុគីមី មិនមែនជារឿងចម្លែកនោះទេនៅក្នុងប្រទេសចិន បើទោះបីជាមានការព្យាយាមធ្វើឲ្យល្អប្រសើរសុវត្ថិភាពក៏ដោយ ។  ជាក់ស្តែងកាលពីឆ្នាំ ២០១៥កន្លងទៅ ហេតុការណ៍ផ្ទុះជាច្រើនលើកនៅទីក្រុងកំពង់ផែភាគខាងជើង Tianjin បានសម្លាប់មនុស្ស ១៧៣នាក់ ៕

ឪពុកម្តាយនៅកោះតៃវ៉ាន់តវ៉ាបន្ទាប់ពីចោទសាលាមត្តេយ្យថាឲ្យកុមារលេបថ្នាំងងុយគេង

2023/06/22 01:36:55 pm        94
Facebook Telegram Linkin
តៃវ៉ាន់៖ ឪពុកម្តាយរបស់ក្មេងៗ នៅមត្តេយ្យសិក្សា ដែលបានចោទប្រកាន់ពីការផ្តល់ថ្នាំងងុយដេកដោយបុគ្គលិកក្នុងសាលាមត្តេយ្យ នៅកោះតៃវ៉ាន់ បាន និងកំពុងធ្វើការតវ៉ា សម្រាប់ការឆ្លើយតបយឺតយ៉ាវរបស់រដ្ឋាភិបាលចំពោះហេតុការណ៍នេះ។កាលពីថ្ងៃអាទិត្យ មនុស្សរាប់រយនាក់ បានប្រមូលផ្តុំគ្នា នៅទីក្រុងតៃប៉ិថ្មី (New Taipei) ដើម្បីរិះគន់លើដំណើរការ ដែលត្រូវចំណាយពេលជាច្រើនសប្តាហ៍ សម្រាប់អាជ្ញាធរ ក្នុងតំបន់ ក្នុងការធ្វើតេស្តសុខភាពរបស់កុមារ បន្ទាប់ពីមានការលើកឡើងនូវការសង្ស័យជាច្រើន កាលពីពាក់កណ្តាលខែឧសភា។ទីភ្នាក់ងារសារព័ត៌មានកណ្តាល (CNA) របស់កោះតៃវ៉ាន់ បានរាយការណ៍ថា កាលពីថ្ងៃទី១៤ ខែឧសភា ឪពុកម្តាយ ៣រូប បានប្រាប់នគរបាលក្នុងតំបន់ថា កូនៗរបស់ពួកគេ មានអាការឆាប់ខឹង និងបង្ហាញអាកប្បកិរិយាធ្វើបាបខ្លួនឯង នៅចន្លោះខែកុម្ភៈ ដល់ខែមេសា ឆ្នាំនេះ។ ឪពុកម្ដាយទាំងនោះ បានបន្ថែមថា ក្មេងៗបានប្រាប់ថា គ្រូរបស់ពួកគេបានឲ្យពួកគេលេបថ្នាំ ហើយការធ្វើតេស្តវេជ្ជសាស្រ្តលើកុមារ បានរកឃើញដាននៃសារធាតុថ្នាំងងុយដេក និងថ្នាំរម្ងាប់ប្រព័ន្ធប្រសាទ។យោងតាមសេចក្ដីថ្លែងការណ៍មួយ បានឲ្យដឹងថា ការិយាល័យអយ្យការស្រុកនៅទីក្រុងតៃប៉ិថ្មី (New Taipei) ត្រូវបានជូនដំណឹងលើកដំបូងពីការពាក់ព័ន្ធនឹងករណីដែលអាចឲ្យអនីតិជនប្រើថ្នាំញៀន កាលពីថ្ងៃទី១៥ ខែឧសភា។ ៣ថ្ងៃក្រោយ ការិយាល័យបានដឹកនាំកម្លាំងនគរបាលចុះស្រាវជ្រាវសាលាមត្តេយ្យនោះ ហើយត្រឡប់មកវិញជាមួយនឹងឯកសារដែលយកពីកាម៉ារ៉ាសុវត្ថិភាព CCTV និងភ័ស្តុតាងផ្សេងទៀត។ គិតត្រឹមដើមខែមិថុនា ឪពុកម្តាយជាង ១០នាក់ បានរាយការណ៍ករណីនេះទៅនគរបាល។ការរាយការណ៍ពីទីភ្នាក់ងារសារព័ត៌មានកណ្តាល (CNA) បានឲ្យដឹងទៀតថា នាយកដ្ឋានអប់រំក្នុងតំបន់ បានបញ្ជាឲ្យបិទសាលាមត្តេយ្យនេះ និងផាកពិន័យទឹកប្រាក់ចំនួន ១៥០.០០០ដុល្លារតៃវ៉ាន់ថ្មី (ប្រហែល ៤.៨៥០ដុល្លារ)។ នាយកសាលា និងគ្រូបង្រៀន ៤នាក់មកពីសាលាមត្តេយ្យនេះ ត្រូវនគរបាលសាកសួរ។ អ្នកទាំងនោះត្រូវបានដោះលែងឲ្យនៅក្រៅឃុំ ហើយមិនទាន់កំណត់កាលបរិច្ឆេទសម្រាប់សវនាការនៅតុលាការនោះទេ៕

មន្ទីរពេទ្យជាច្រើនរបស់ឥណ្ឌាផ្ទុកពេញដោយអ្នកជំងឺ ខណៈរលកកំដៅគ្របដណ្ដប់លើភាគខាងជើង

2023/06/22 10:12:51 am        148
Facebook Telegram Linkin
ឥណ្ឌា៖ រលកកំដៅដែលចេះតែកើនឡើងខ្ពស់នៅក្នុងរដ្ឋចំនួន២ដែលមានប្រជាជនច្រើនបំផុតរបស់ប្រទេសឥណ្ឌា បានធ្វើឲ្យមន្ទីរពេទ្យនានាផ្ទុកអ្នកជំងឺលើសចំណុះ  សាលតម្កល់សពផ្ទុកពេញដោយសាកសព និងការដាច់ចរន្តអគ្គិសនី ដោយបង្ខំឲ្យបុគ្គលិកប្រើសៀវភៅបក់ឲ្យអ្នកជំងឺ ស្របពេលការស៊ើបអង្កេតជាផ្លូវនៃចំនួនអ្នកស្លាប់ ដែលបានកើនឡើងជិត១៧០ នាក់។  យោងតាមសេចក្ដីរាយការណ៍ព័ត៌មានក្នុងស្រុក និងក្រុមមន្ត្រីសុខាភិបាល នៅក្នុងរដ្ឋ ឧត្តា ប្រទេស (Uttar Pradesh) ភាគខាងជើង  មនុស្ស១១៩នាក់ស្លាប់ ដោយសារជំងឺទាក់ទងនឹងរលកកំដៅ កាលពីប៉ុន្មានថ្ងៃមុន ខណៈដែលរដ្ឋជិតខាង គឺ រដ្ឋប៊ីហា (Bihar) ត្រូវបានរាយការណ៍ថាមានអ្នកស្លាប់ចំនួន៤៧នាក់ ។ ប្រជាពលរដ្ឋនិយាយថា ពួកគេបារម្ភខ្លាំងក្នុងការចេញទៅខាងក្រៅ ពេលថ្ងៃត្រង់។ មន្ទីរពេទ្យធំបំផុតក្នុងស្រុក បាលីយ៉ា (Ballia) របស់រដ្ឋ ឧត្តាប្រទេស មិនអាចទទួលអ្នកជំងឺបន្ថែមទៀត ឲ្យស្នាក់នៅព្យាបាលបានទេ ។ ក្រុមមន្ត្រីនិយាយថា សាលតម្កល់សព ពេញដោយសាកសព បន្ទាប់ពីមនុស្ស៥៤នាក់ សុទ្ធតែជាស្ត្រីចំណាស់ធ្លាក់ខ្លួនឈឺដោយសារបញ្ហាសុខភាពផ្សេងៗគ្នា បានស្លាប់ អំឡុងរលកកំដៅ។ ក្រុមគ្រួសារមួយចំនួនត្រូវបានស្នើឲ្យយកសាកសពសាច់ញាតិត្រឡប់ទៅផ្ទះវិញ។ សីតុណ្ហភាព បានហក់ឡើងដល់ជិត៤៥អង្សាសេរ ក្នុងពេលប៉ុន្មានថ្ងៃនេះ នៅក្នុងស្រុក បាលីយ៉ា ស្របពេលវិបត្តិថាមពលបន្ថែមបន្ទុកដល់សា្ថនភាពនេះ៕

ក្ដីសង្ឃឹមសម្រាប់ការសង្រ្គោះអ្នកដំណើរក្នុងនាវាមុជទឹក Titan មានកាន់តែតិចទៅ ខណៈពេលវេលាកាន់តែខើច

2023/06/22 10:05:10 am        199
Facebook Telegram Linkin
ពេលវេលានៅសល់កាន់តែខើចទៅៗ ក្នុងកិច្ចខិតខំប្រឹងប្រែងស្វែងរកមនុស្ស៥នាក់ ក្នុងនាវាមុជទឹកមួយគ្រឿងដែលកំពុងបាត់ខ្លួន នៅក្នុងមហាសមុទ្រអាត្លង់ទិកខាងជើង។  នាវាពាណិជ្ជកម្មទីតាន(Titan ) ដែលត្រូវ បានធ្វើប្រតិបត្តិការដោយក្រុមហ៊ុនធ្វើដំណើរទេសចរណ៍ឯកជនឈ្មោះ OceanGate បានបាត់ការទាក់ទងជាមួយនាវាស្រាវជ្រាវរបស់ខ្លួន នៅម៉ោង៥និង៤៥នាទីព្រឹកម៉ោងក្នុងស្រុកក្នុងភាគខាងកើតកាលពីថ្ងៃអាទិត្យទី១៨មិថុនា ដោយបានចេញដំណើរដឹកអ្នកដំណើរទៅមើលបំណែកនាវាទីតានិក ដែលមានអាយុកាលមួយសតវត្សរ៍ នៅក្បែរឆ្នេរសមុទ្ររបស់ប្រទេសកាណាដា ។បេសកកម្មនេះ មានតម្លៃ២៥ម៉ឺនដុល្លារអាមេរិកសម្រាប់មនុស្សម្នាក់។ ក្រុមអ្នកជំនាញ ជឿថា នៅពេលនេះ នាវានេះ ស្ថិតនៅជម្រៅប្រហែល៣.៥០០ ម៉ែត្រ ក្រោមកម្រិតទឹកសមុទ្រ  និងជិតដល់គោលដៅរបស់ខ្លួននៃបំណែកនាវាទីតានិក (Titanic)ដែល ស្ថិតនៅជម្រៅ៣.៨០០ម៉ែត្រក្រោមកម្រិតទឹកសមុទ្រ។ នាវាមុជទឹកនេះ អាចផ្ទុកសមត្ថភាពអ៊ុកស៊ីសែនសង្គ្រោះបន្ទាន់អតិបរមា៩៦ ម៉ោង ឬ ប្រហែល៤ថ្ងៃប៉ុណ្ណោះ។ អង្គភាពល្បាតឆ្នេរអាមេរិកនិយាយថា នាវាមុជទឹកទីតាន អាចនៅសល់អុកស៊ីសែនតិចជាង២០ម៉ោងទៀត។ ឆ្មាំល្បាតឆ្នេរអាមេរិក និយាយថា គេបានលឺសំឡេងថ្មីមួយទៀត ខណៈពង្រីកតំបន់កាន់តែធំក្នុងការស្វែងរកនាវាមុជទឹកនេះ។ យន្តហោះរបស់អង្គភាពឆ្មាល្បាតឆ្នេរអាមេរិក និងកាណាដា បានកំពុងស្វែងរកក្នុងតំបន់កើតហេតុចាប់តាំងពីថ្ងៃអាទិត្យមក និងបានគ្របដណ្ដប់លើផ្ទៃទឹកទំហំ១ម៉ឺនម៉ាយក្រឡា នៃផ្ទៃខាងលើមហាសមុទ្រតែពុំមានលទ្ធផល៕

ក្រុមក្មេងទំនើងអ្នកលេងកាំបិតផ្គាក់១៣នាក់ ត្រូវអាវុធហត្ថធ្វើការបង្ក្រាបបញ្ចូនទៅតុលាការ

2023/06/21 03:01:26 pm        447
Facebook Telegram Linkin
ភ្នំពេញ៖ ក្រុមក្មេងទំនើងជាអ្នកលេងកាំបិតផ្គាក់១៣នាក់ ត្រូវបានកម្លាំងកងរាជអាវុធហត្ថ​ខណ្ឌពោធិ៍សែនជ័យ ធ្វើការបង្ក្រាបក្រោយជនទាំង១៣ និងបក្សពួកសរុបជិត ២០នាក់ បានធ្វើ​សកម្មភាពចូលទៅកាប់បំផ្លាញទ្រព្យសម្បត្តិក្នុងផ្ទះពលរដ្ឋមួយគ្រួសារ ដោយប្រើកាំបិតផ្គាក់​ជា​ច្រើនដើម បង្កការភ្ញាក់ផ្អើលកាលពីវេលាម៉ោង ​១៨និង០០នាទី ថ្ងៃទី១៨​ ខែមិថុនា ឆ្នាំ២០២៣ នៅចំណុច ផ្លូវបេតុង ភូមិប៉ប្រកខាងត្បូង ​សង្កាត់កាកាប ខណ្ឌពោធិ៍សែនជ័យ ។ នៅវេលាកើតហេតុខាងលើ ក្រុមក្មេងទំនើង បានជិះម៉ូតូជាច្រើនគ្រឿង ប្រដាប់ដោយកាំបិតផ្គាក់ បានចូលទៅធ្វើសកម្មភាពកាប់ម៉ូតូជនរងគ្រោះ០១គ្រឿង​ដល់ក្នុងផ្ទះ បង្កអោយ​មាន​ការ​ភ្ញាក់ផ្អើល​ជា​ខ្លាំងនៅតំបន់នោះ រហូតភ្ញាក់ផ្អើល​ដល់​កម្លាំងកងរាជអាវុធហត្ថខណ្ឌពោធិ៍សែនជ័យ ដែល​កំពុងល្បាតឆ្លងកាត់ភូមិសាស្ត្រនោះ ​បានចូល​ទៅ​ជួយអន្តរាគមន៍ និង​ចាប់ឃាត់​បាន​ក្រុមក្មេងទំនើង១៣នាក់ ក្នុងចំណោមបក្សពួកជាច្រើនទៀតដែលបានរត់គេច ដោយដកហូត​បានម៉ូតូ០៣គ្រឿង ​និងកាំបិតផ្គាក់០៤ដើម ។តាមចម្លើយសារភាពរបស់ក្រុមក្មេងទំនើងទាំង១៣នាក់ ​បានឲ្យដឹងដូចគ្នាថា ៖ ពួកខ្លួនពិតជាធ្វើ​សកម្មភាពប្រើអំពើហិង្សា​ ចូលកាប់​បំផ្លិចបំផ្លាញ​ម៉ូតូរបស់ជនរងគ្រោះ ​ពិតប្រាកដមែន ដោយសារ​កន្លងមកពួក​ខ្លួនធ្លាប់​មាន​ទំនាស់​ជាមួយ​ក្មេងស្ទាវ​មួយ​ក្រុមផ្សេងទៀត ​ហើយធ្លាប់​ឃើញ​ក្រុម​ក្មេងស្ទាវទាំងនោះ ​ឧស្សាហ៍​អង្គុយ​លេង​ក្នុង​ផ្ទះ​មួយ​នោះ​ និង​ឃើញម៉ូតូម្ចាស់ផ្ទះ​ ស្មានថា​ជា​ម៉ូតូរបស់ភាគីសត្រូវ​ដែលមានទំនាស់ជាមួយ​ពួកខ្លួន ​ក៏​ចូលកាប់​បំផ្លាញ​ម៉ូតូនោះតែម្តង ។ បច្ចុប្បន្នជន ក្រុមក្មេងទំនើងទាំង១៣នាក់ ​រួមទាំងវត្ថុតាង ត្រូវបានកម្លាំងជំនាញ​ការិយាល័យប្រឆាំង​បទល្មើសព្រហ្មទណ្ឌ ​នៃកងរាជអាវុធហត្ថរាជធានីភ្នំពេញ ​នឹងបន្តកសាង​សំណុំ​រឿង​បញ្ជូន​ទៅ​តុលាការ ដើម្បីចាត់ការតាមនីតិវិធីច្បាប់ ៕ លីហេង

បណ្ដាញសង្គម

ព័ត៌មានថ្មីៗ

Atletico Madrid ឈ្នះនៅទឹកដី Barcelona លើកដំបូងតាំងពីឆ្នាំ ២០០៦
04/09/2026 02:04 PM
Facebook Telegram Linkin
អ៊ីស្រាអែល៖ ក្រុមសកម្មប្រយុទ្ធហេសបូឡារាប់រយនាក់ ត្រូវបានដាក់គោលដៅក្នុងការវាយប្រហារ
04/09/2026 02:04 PM
Facebook Telegram Linkin
ប្រទេសជប៉ុន ពិចារណាផ្តល់ហិរញ្ញប្បទានដើម្បីជួយអ្នកផ្គត់ផ្គង់អាស៊ីទទួលបានប្រេង
04/09/2026 02:04 PM
Facebook Telegram Linkin
ក្រុមការពារជើងឯក PSG កាន់ពីរគ្រាប់ចំណេញពីជ័យជំនះ ២-០ លើ Liverpool ជើងទីមួយ
04/09/2026 01:04 PM
Facebook Telegram Linkin
ក្រសួងសុខាភិបាល នៃព្រះរាជាណាចក្រកម្ពុជា ទស្សនកិច្ចនៅវិទ្យាស្ថានប៉ាស្ទ័រ ក្រុងប៉ារីស សាធារណរដ្ឋបារាំង
04/09/2026 01:04 PM
Facebook Telegram Linkin
សម្ដេចធិបតី ថ្លែងអំណរគុណប្រធានាធិបតីបារាំងចំពោះការស្វាគមន៍យ៉ាងកក់ក្តៅ និងរៀបចំដំឡើងកម្រិតទំនាក់ទំនងប្រទេសទាំងពីរដល់កម្រិត «ភាពជាដៃគូរយុទ្ធសាស្ត្រ»
04/09/2026 01:04 PM
Facebook Telegram Linkin
ស.ស.យ.ក បាននាំយកក្រមា សារ អំបុក នំខ្ញី និងជំនួយជូនដល់វីរកងទ័ពជួរមុខ
04/09/2026 01:04 PM
Facebook Telegram Linkin
ទំនិញចម្រុះ៣០០ មុខ ត្រូវបានតាំងបង្ហាញក្នុងពិព័រណ៍ផលិតផលខ្មែរដ៏ធំ នៅកោះពេជ្រ នៅព្រឹកនេះ
04/09/2026 12:04 PM
Facebook Telegram Linkin
ក្រុមប្រឹក្សារាជធានី អំពាវនាវឱ្យសន្សំសំចៃការចំណាយផ្សេងៗ ខណៈរថយន្ត​ក្រុង​ប្រមាណ ៦០០​គ្រឿង​នៅ​តែ​ដឹក​ជញ្ជូនប្រជាពលរដ្ឋទៅលេងស្រុកកំណើតក្នុងឱកាសបុណ្យចូលឆ្នាំថ្មី
04/09/2026 12:04 PM
Facebook Telegram Linkin
កូរ៉េខាងជើងបើកការសាកល្បងសព្វាវុធរយៈពេល៣ថ្ងៃ
04/09/2026 12:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.