BTV NEWS

សមត្ថកិច្ចបង្ក្រាបទីតាំង Online Scams ចំនួន៩កន្លែងនៅក្រុងបាវិត ឃាត់ខ្លួនជនបរទេសជាង ៣០០នាក់

កម្លាំងជំនាញបន្តឆ្មក់ចុះបង្ក្រាបទីតាំងឆបោកតាមប្រពន្ធ័បច្ចេកវិទ្យា នៅខណ្ឌសែនសុខ ឃាត់ជនបរទេស ២៧នាក់

គណៈបញ្ជាការឯកភាពរាជធានីចុះបង្ក្រាបទីតាំងឆបោកតាមប្រពន្ធ័បច្ចេកវិទ្យា នៅខណ្ឌសែនសុខ ឃាត់ជនសង្ស័យ០៨នាក់

បណ្តេញជនបរទេសជិត ៥០០នាក់ ចេញពីកម្ពុជាករណីឆបោកតាមប្រព័ន្ធអនឡាញ

សន្តិសុខ និង សង្គម

[UPDATE] អ្នកស្លាប់ក្នុងទឹកជំនន់ និងបំណាក់ដីនៅស្រី លង្កា ឡើងដល់១៦នាក់ ខណៈសាលារៀនបន្តបិទទ្វារ

ក្រុមមន្ត្រីបាននិយាយថា ប្រទេសស្រីលង្កា នៅតែបន្តបិទសាលារៀនកាលពីថ្ងៃចន្ទដើមសប្ដាហ៍នេះ ខណៈចំនួនអ្នកស្លាប់ដោយសារទឹកជំនន់ និងបំណាក់ដី បង្កឡើងដោយភ្លៀងធ្លាក់ខ្លាំងនៅក្នុងផ្នែកជាច្រើននៃប្រទេសកោះមួយនេះ បានកើនឡើងដល់ ១៦ នាក់។ក្រសួងអប់រំបានប្រកាសថា ការបើកសាលារៀនឡើងវិញគឺអាស្រ័យលើការវិវត្តន៍នៃស្ថានភាពអាកាសធាតុ។ភ្លៀងធ្លាក់ខ្លាំងបានបង្កការបំផ្លិចបំផ្លាញនៅក្នុងតំបន់ជាច្រើនរបស់ប្រទេសនេះ ចាប់តាំងពីថ្ងៃអាទិត្យចុង សប្ដាហ៍មុនមក ដោយបានជន់លិចផ្ទះសម្បែង ស្រែចំការ និងផ្លូវថ្នល់ ហើយបង្ខំឱ្យអាជ្ញាធរកាត់ផ្តាច់ចរន្តអគ្គិសនីជាការប្រុងប្រយ័ត្ន។យោងតាមមជ្ឈមណ្ឌលគ្រប់គ្រងគ្រោះមហន្តរាយបានឱ្យដឹងថា មនុស្ស ១២ នាក់បានស្លាប់បន្ទាប់ពី ទឹកហូរកួច និងលង់ទឹកនៅជិតរដ្ឋធានីកូឡុំបូ និងតំបន់ដាច់ស្រយាល រ៉ាត់ថាភូរ៉ា (Rathnapura) ស្រុក ម៉ាតារ៉ា (Matara) និងស្រុកហ្គាឡេ (Galle) កាលពីថ្ងៃអាទិត្យ។ បីនាក់ទៀតបានស្លាប់ពេលបំណាក់ដីបាក់សង្កត់លើផ្ទះ ហើយមនុស្សម្នាក់ស្លាប់ពេលដើមឈើបាក់រលំលើ។ មជ្ឈមណ្ឌលដដែលនេះ បាននិយាយថា ដោយឡែកមនុស្ស៥នាក់បានរងរបួសនៅពេលបំណាក់ដីបានវាយប្រហារ និងបំផ្លាញផ្ទះពីរខ្នងនៅតំបន់ រ៉ាត់ណាភូរ៉ា(Ratnapura) ស្ថិតនៅចម្ងាយប្រហែល ៨៦គីឡូម៉ែត្រ ភាគអាគ្នេយ៍ពីរដ្ឋធានីកូឡុំបូ។ មជ្ឈមណ្ឌលខាងលើនេះបាននិយាយនៅក្នុងសេចក្តីថ្លែងការណ៍មួយថា គិតត្រឹមថ្ងៃចន្ទទី៣ មិថុនា មនុស្សជាង ៦.០០០នាក់ ត្រូវបានជម្លៀសទៅកាន់មជ្ឈមណ្ឌលជម្លៀស ហើយលំនៅឋានជាង១២.០០០ ខ្នង ត្រូវបានខូចខាត៕

មនុស្ស ៤ នាក់ស្លាប់ដោយសារទឹកជំនន់នៅអាល្លឺម៉ង់ ស្របពេលការព្រមានពីបម្រែបម្រួលអាកាសធាតុ

ក្រុមអ្នកជួយសង្គ្រោះកាលពីថ្ងៃចន្ទ (០៣ មិថុនា) បានបន្តប្រតិបត្តិការជម្លៀសប្រជាជនចេញពីទឹកជំនន់នៅភាគខាងត្បូងប្រទេសអាល្លឺម៉ង់ ដែលបានឆក់យកជីវិតមនុស្ស ៤ នាក់ ខណៈដែលលោកអធិការបតី អូឡា សូស (Olaf Scholz) បានហៅគ្រោះហន្តរាយនោះថាថាជា «ការព្រមាន» ពីបញ្ហាបម្រែបម្រួលអាកាសធាតុកាន់តែអាក្រក់ទៅៗ។មនុស្សរាប់ពាន់នាក់នៅក្នុងតំបន់ បាវ៉ារៀ (Bavaria) និងតំបន់ បាដិន-វើធិមប៊ែក (Baden-Wuerttemberg) ត្រូវចាកចេញពីលំនៅឋានរបស់ពួកគេចាប់តាំងពីភ្លៀងធ្លាក់ខ្លាំងកាលពីថ្ងៃសុក្រ សប្ដាហ៍មុនបានបង្កឱ្យមានទឹកជំនន់យ៉ាងធ្ងន់ធ្ងរ។ ការជម្លៀសបន្ថែមត្រូវបានគេដាក់ចេញពេញមួយយប់ដល់ថ្ងៃចន្ទ ខណៈដែលបរិមាណទឹកជំនន់ដ៏ច្រើនបណ្តាលឱ្យការការពារទឹកជំនន់បរាជ័យ ហើយអ្នកស្រុកនៅជុំវិញតំបន់ ម៉ានឈីង-ភីឈែល (Manching-Pichl) ដែលរងផលប៉ះពាល់ខ្លាំងបំផុតដោយទឹកជំនន់ ត្រូវបានគេប្រាប់ឱ្យជ្រកកោននៅជាន់ខាងលើនៃលំនៅឋានរបស់ពួកគេ។ នគរបាលក្នុងតំបន់បាននិយាយថា អ្នកស្ម័គ្រចិត្តម្នាក់នៅតែបន្តបាត់ខ្លួន បន្ទាប់ពីទូករបស់គេ ក្រឡាប់កាលពីយប់ថ្ងៃអាទិត្យ ខណៈប្រតិបត្តិការស្វែងរកត្រូវបញ្ឈប់ដោយសារតែកម្ពស់ទឹកខ្ពស់ និងចរន្តទឹកខ្លាំង។ ទឹកជំនន់ដែលរីករាលដាល និងភ្លៀងធ្លាក់ជាបន្តបន្ទាប់បានជះឥទ្ធិពលដល់ការដឹកជញ្ជូនក្នុងតំបន់ ជាមួយនឹងការលុបចោល និងពន្យារពេលរថភ្លើងយ៉ាងទូលំទូលាយ។ ទោះបីជាមានការសន្យារបស់លោក សូស ក្នុងការប្រយុទ្ធប្រឆាំងនឹងបម្រែបម្រួលអាកាសធាតុក៏ដោយ ក្រុមអ្នកជំនាញបាននិយាយដោយឡែកពីគ្នាកាលពីថ្ងៃចន្ទថា ការព្យាករការបំភាយឧស្ម័នរបស់រដ្ឋាភិបាលរហូតដល់ឆ្នាំ២០៣០ គឺមិនប្រាកដប្រជានោះទេ ដែលជាហេតុមួយផ្នែកបង្កឱ្យមានគ្រោះធម្មជាតិទាំងនេះ៕

អ៊ុយក្រែន បានបិទថាមពលភាគច្រើន បន្ទាប់ពីការវាយប្រហាររបស់រុស្សី កំណត់គោលដៅលើហេដ្ឋារចនាសម្ព័ន្ធ

អ៊ុយក្រែន បានបិទថាមពលភាគច្រើនជាបន្ទាន់ នៅក្នុងប្រទេសកាលពីថ្ងៃអាទិត្យ មួយថ្ងៃបន្ទាប់ពីប្រទេសរុស្ស៊ី បានធ្វើការវាយប្រហារទ្រង់ទ្រាយធំលើហេដ្ឋារចនាសម្ព័ន្ធថាមពល ហើយបានអះអាងថា ខ្លួនទទួលបានផលចំណេញ នៅក្នុងខេត្តដូណិតស្ក៍(Donetsk)ភាគខាងកើត។ការបិទនេះ បានធ្វើឡើងនៅក្នុងតំបន់ទាំងអស់ លើកលែងតែតំបន់ចំនួនបីរបស់អ៊ុយក្រែន បន្ទាប់ពីការវាយប្រហារដោយយានដ្រូន និងមីស៊ីលកាលពីថ្ងៃសៅរ៍ លើគោលដៅថាមពល ដែលបានបណ្តាលឲ្យមនុស្សយ៉ាងហោចណាស់ ១៩នាក់ រងរបួស។ប្រតិបត្តិករបណ្តាញអគ្គិសនី Ukrenergo គ្រប់គ្រងដោយរដ្ឋរបស់អ៊ុយក្រែន បាននិយាយថា ការបិទបានប៉ះពាល់ដល់ទាំងអ្នកប្រើប្រាស់ឧស្សាហកម្ម និងគ្រួសារ។ការវាយប្រហាររបស់រុស្ស៊ីលើបណ្តាញអគ្គិសនីរបស់ប្រទេសអ៊ុយក្រែនក្នុងប៉ុន្មានសប្តាហ៍ថ្មីៗនេះ បានបង្ខំឲ្យរដ្ឋាភិបាលផ្តាច់ចរន្តអគ្គិសនីទូទាំងប្រទេស។ បើគ្មានប្រព័ន្ធការពារដែនអាកាសគ្រប់គ្រាន់ ដើម្បីទប់ទល់នឹងការវាយលុក និងអនុញ្ញាតឲ្យជួសជុលទេ ភាពខ្វះខាតនៅតែអាចកាន់តែអាក្រក់ឡើងៗ ដោយសារតម្រូវការកើនឡើង នៅចុងរដូវក្តៅ និងរដូវរងាខ្លាំងនោះ។ក្នុងចំណោមការវាយប្រហារថ្មីៗដ៏សំខាន់បំផុត គឺការវាយប្រហារកាលពីខែមេសា ដែលបានបំផ្លាញរោងចក្រថាមពលកម្តៅដ៏ធំបំផុតរបស់ទីក្រុងគីវ និងការវាយប្រហារដ៏ធំកាលពីថ្ងៃទី៨ ខែឧសភា ដែលផ្តោតលើការផលិតថាមពល និងឧបករណ៍បញ្ជូនថាមពល នៅក្នុងតំបន់ជាច្រើន។បន្ទាប់ពីការវាយប្រហារកាលពីថ្ងៃសៅរ៍ កងកម្លាំងអាកាសរបស់អ៊ុយក្រែន បាននិយាយកាលពីថ្ងៃអាទិត្យថា ការការពារដែនអាកាស បានបាញ់ទម្លាក់យានដ្រូនចំនួន២៥គ្រឿង ដែលបានបាញ់នៅពេលយប់។

រដូវកាលទឹកជំនន់របស់ចិន ចាប់ផ្តើមខ្លាំងក្លា និងលឿនជាងធម្មតា នៅតំបន់ភាគខាងត្បូង

យោងតាមក្រសួងធនធានទឹក (MWR) បានឱ្យដឹងថា ប្រទេសចិន បានឈានចូលដល់រដូវកាលទឹកជំនន់ទូទៅរបស់ខ្លួនកាលពីថ្ងៃសៅរ៍ ដោយទឹកជំនន់នៅក្នុងតំបន់ភាគខាងត្បូង បានកើនឡើងខ្លាំងរួចទៅហើយ ខណៈដែលអ្នកជំនាញម្នាក់បានប្រាប់សារព័ត៌មាន គ្លូបប៊ល ថែមស៍ (Global Times) កាលពីថ្ងៃអាទិត្យ (០២ មិថុនា) ថា រដូវទឹកជំនន់ឆ្នាំនេះនៅតំបន់ភាគខាងត្បូង ប្រទេសចិន បានចាប់ផ្តើមលឿនជាងធម្មតា។រដូវទឹកជំនន់ទូទៅឆ្នាំនេះ ដែលរំពឹងថានឹងដំណើរការចាប់ពីខែមិថុនា ដល់ខែសីហា នឹងមានទាំងទឹកជំនន់ និងគ្រោះរាំងស្ងួត ដោយគ្រោះធម្មជាតិបែបនេះកាលពីមុនបណ្តាលឱ្យខូចខាតជាច្រើន។ ព្រឹត្ដិការណ៍អាកាសធាតុធ្ងន់ធ្ងរក៏ត្រូវបានគេរំពឹងថានឹងកាន់តែញឹកញាប់ រីករាលដាល និងខ្លាំងជាងមុន ជាមួយនឹងផលប៉ះពាល់កាន់តែខ្លាំង នេះបើយោងតាមការចេញផ្សាយព័ត៌មានរបស់ក្រសួងធនធានទឹក។ ទីភ្នាក់ងារព័ត៌មានស៊ីនហួរ បានរាយការណ៍ថា នាយកដ្ឋានពាក់ព័ន្ធកំពុងតាមដានយ៉ាងដិតដល់នូវជំនន់ទឹកភ្លៀង បម្រែបម្រួលកម្រិតទឹក ធ្វើការពិគ្រោះ និងវិនិច្ឆ័យ ព្រមទាំងចូលរួមយ៉ាងសកម្មក្នុងការទប់ស្កាត់ និងឆ្លើយតបទៅនឹងភ្លៀងធ្លាក់ខ្លាំង និងទឹកជំនន់។អាជ្ញាធរគ្រប់គ្រងទឹកជំនន់ក្នុងទីក្រុងប៉េកាំង ក៏បានក្រើនរំលឹកសាធារណជនកាលពីថ្ងៃអាទិត្យ ឱ្យយកចិត្តទុកដាក់លើការព្យាករ និងការព្រមានដែលពាក់ព័ន្ធ ហើយសិក្សាអំពីនីតិវិធីផ្តល់ជម្រកសង្គ្រោះបន្ទាន់សម្រាប់រដូវទឹកជំនន់៕

សមត្ថកិច្ចក្រុងសិរីសោភ័ណ ឆ្មក់បង្ក្រាបទីតាំងការ៉ាអូខេ១កន្លែង នៅសង្កាត់អូរអំបិល ឃាត់ខ្លួនជាង២០នាក់ និងវត្ថុតាងគ្រឿងញៀនមួយចំនួន

បន្ទាយមានជ័យ ៖ កាលពីយប់រំលងអាធ្រាតឈានចូលថ្ងៃទី០៣ ខែមិថុនា ឆ្នាំ២០២៤ កម្លាំងសមត្ថកិច្ច នៃអធិការដ្ឋាននគរបាលក្រុងសិរីសោភ័ណ ដឹកនាំដោយលោក សោម វុទ្ធី ព្រះរាជអាជ្ញារង អមសាលាដំបូងខេត្ត លោកវរសេនីយ៍ឯក ស៊ី ឌី អធិការនគរបាលក្រុង រួមនឹងកម្លាំងជំនាញ និងកម្លាំងប៉ុស្តិ៍ បានចុះឆ្មក់បង្ក្រាបទីតាំងការ៉ាអូខេ០១កន្លែងយីហោ TNL នៅចំនុចភូមិរោងម៉ាស៊ីន សង្កាត់អូរអំបិល ក្រុង សិរីសោភ័ណ ឃាត់ខ្លួនមនុស្សជាង២០នាក់ ព្រមទាំង ដកហូតវត្ថុតាងគ្រឿងញៀនមួយចំនួន នាំមកកាន់អធិការនគរបាលក្រុង ដើម្បីសួនាំតាមនីតិវិធី។ លោកវរសេនីយ៍ឯក ស៊ី ឌី អធិការនគរបាលក្រុង បានប្រាប់ឱ្យដឹងថា ដោយអនុវត្តតាមបទបញ្ជាក់យ៉ាងម៉ឹងម៉ាត់ពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត និងមានការសម្របសម្រួលពីឯកឧត្តមព្រះរាជអាជ្ញា ដឹកនាំដោយលោក សោម វុទ្ធី ព្រះរាជអាជ្ញារង កាលពីយប់រំលងអាធ្រាតលោកបានដឹកនាំកម្លាំង ចុះឆ្មក់បង្ក្រាបទីតាំងការ៉ាអូខេ០១កន្លែងយីហោTNL នៅចំនុចភូមិរោងម៉ាស៊ីន សង្កាត់អូរអំបិល ឃាត់ខ្លួនចំនួនសរុប២៤នាក់ /ស្រី០៨នាក់(ភ្ញៀវមកលែងចំនួន១៧នាក់/ស្រី០២នាក់ និងបុគ្គលិកចំនួន០៧នាក់/ស្រី០៦នាក់)។ លោកបន្តថា ក្នុងប្រតិបត្តិការ កម្លាំងសមត្ថកិច្ចបានដកហូតវត្ថុតាងរួមមាន ប្រភេទថ្នាំសប្បាយអក្ស Forrari សំបកពណ៌ក្រហមរូបសញ្ញាសេះខ្មៅចំនួន០២កញ្ចប់, ថ្នាំសប្បាយអក្ស Lambogini សំបកទឹកប្រាក់ រូបសញ្ញារូបគោ ចំនួន០១កញ្ចប់, ថ្នាំសប្បាយអក្ស Strowberry សំបកទឹកសមុទ្រចំនួន០១កញ្ចប់, ថ្នាំសប្បាយអក្ស Grape Juice ទឹកសមុទ្រ ផ្កាឈូកចំនួន០១កញ្ចប់, ម្សៅសចំនួន០៣កូនថង់, ម្សៅសដាក់ក្នុងថង់ពណ៌ផ្កាឈូកលាយ ទឹកសមុទ្រ០១កូនថង់, សំបកថង់រូបលុយដុល្លា០១, សំបកថង់រូបសេះដែលប្រើរួច០១ថង់, សំបកអក្ស Grape Fruit tea ០១, សំបកថង់០១, បារីអេឡិចទ្រនិចសរុប១១ដើម, ក្បាលបារីអេឡិចទ្រនិចចំនួន០២។ បច្ចុប្បន្ន ជនសង្ស័យទាំង២៤នាក់ កំពុងសួនាំបាននៅអធិការដ្ឋាននគរបាលក្រុង ដើម្បីធ្វើតេស្តស្វែងរកសារធាតុញៀន ចាត់ការតាមនីតិវិធី៕ អត្ថបទ រឿង ចន្ទ្រា

ស្រីលង្កា បិទសាលារៀន ខណៈមនុស្ស១៤នាក់បានស្លាប់ក្នុងទឹកជំនន់រដូវមូសុង

មជ្ឈមណ្ឌលគ្រប់គ្រងគ្រោះមហន្តរាយរបស់ប្រទេសស្រី លង្កា បាននិយាយកាលពីថ្ងៃអាទិត្យទី២មិថុនា ថា ទឹកជំនន់ដ៏គំហុក បំណាក់ដី និងការដួលរលំដើមឈើបានសម្លាប់មនុស្សយ៉ាងហោចណាស់ ១៤នាក់នៅក្នុងប្រទេសស្រីលង្កា ខណៈប្រទេសកោះមួយនេះ ត្រូវបានវាយប្រហារដោយព្យុះរដូវមូសុង។មនុស្សមួយចំនួនបានលង់ទឹកស្លាប់ រួមទាំងសមាជិកបីនាក់នៃគ្រួសារតែមួយ ដែលត្រូវបានទឹកហូរកួចយកទៅ នៅជិតរដ្ឋធានីកូឡុំបូ (Colombo) កាលពីថ្ងៃអាទិត្យ។ មជ្ឈមណ្ឌលគ្រប់គ្រងគ្រោះមហន្តរាយ (DMC) បាននិយាយថា អ្នកផ្សេងទៀតត្រូវបានកប់ទាំងរស់នៅក្នុងបំណាក់ដី រួមទាំងក្មេងស្រីអាយុ ១១ ឆ្នាំ និងយុវជនវ័យ ២០ឆ្នាំម្នាក់។មជ្ឈមណ្ឌលគ្រប់គ្រងគ្រោះមហន្តរាយដដែលនេះ បាននិយាយថា មនុស្ស៦នាក់ផ្សេងទៀតបានស្លាប់នៅពេលដើមឈើបានដួលរលំលើពួកគេនៅក្នុងស្រុកចំនួន ៧ ចាប់តាំងពីខ្យល់មូសុងបោកបក់កាន់តែខ្លាំង កាលពីថ្ងៃទី ២១ ខែឧសភា។ស្របពេលស្រីលង្កាពឹងផ្អែកលើភ្លៀងមូសុងតាមរដូវសម្រាប់ប្រព័ន្ធធារាសាស្រ្ត ក៏ដូចជាវារីអគ្គិសនី អ្នកជំនាញបានព្រមានថាប្រទេសនេះប្រឈមនឹងទឹកជំនន់ញឹកញាប់ជាងមុន ខណៈពិភពលោកកាន់តែក្តៅដោយសារតែបម្រែបម្រួលអាកាសធាតុ។មជ្ឈមណ្ឌលគ្រប់គ្រងគ្រោះមហន្តរាយខាងលើ បាននិយាយថា ស្រុកចំនួន ២០ ក្នុងចំណោមស្រុកទាំង ២៥ ដែលត្រូវបានរងផលប៉ះពាល់ដោយភ្លៀងធ្លាក់ខ្លាំងរបស់ប្រទេសនេះ ហើយបានចេញការព្រមានដល់ប្រជាជនដែលរស់នៅតាមច្រាំងទន្លេសំខាន់ៗ ឱ្យផ្លាស់ទីទៅកាន់ទីទួលខ្ពស់មានសុវត្ថិភាព៕

ត្រឹម១សប្ដាហ៍ សមត្ថកិច្ចឃាត់ខ្លួនក្មេងទំនើងជាង ២០០នាក់ នៅទូទាំងប្រទេស

ភ្នំពេញ៖ បញ្ជាដ៏ម៉ឺងម៉ាត់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា ឱ្យអាជ្ញាធរគ្រប់រាជធានី ខេត្ត បង្កើនការយកចិត្តទុកដាក់បង្ក្រាបក្រុមក្មេងទំនើង នៅគ្រប់មូលដ្ឋាន បានធ្វើឱ្យលទ្ធផលកិច្ចប្រតិបត្តិការ របស់កម្លាំងនគរបាលជាតិ នៃក្រសួងមហាផ្ទៃ ដែលបាននឹងកំពុងអនុវត្តយ៉ាងសកម្មលើការងារនេះ ចាប់តាំងពីដើមនីតិកាលទី៧ នៃរដ្ឋសភាមកនោះ កាន់តែមានប្រសិទ្ធភាពខ្ពស់។លោក ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ បានឱ្យដឹងថា ក្នុងរយៈពេល៧ថ្ងៃ បន្ទាប់ការចេញបញ្ជាដ៏មុតស្រួច របស់សម្ដេចធិបតីនាយករដ្ឋមន្រ្តី កម្លាំងនគបាលជាតិ ចាប់ពីកម្រិតអគ្គស្នងការដ្ឋាន រហូតដល់ប៉ុស្តិ៍នគរបាលឃុំ សង្កាត់ ទូទាំងប្រទេស បានបង្ក្រាបក្រុមក្មេងទំនើងចំនួន ៦៥ករណី ឃាត់ខ្លួនយុវជនសរុបចំនួន ២២៣នាក់ កើនខ្ពស់ជិត ២ដងធៀបនឹងកិច្ចប្រតិបត្តិការកន្លងទៅ ។អ្នកនាំពាក្យរងដដែល បានបន្តថា ស្របតាមគោលនយោបាយរាជរដ្ឋាភិបាល និងអនុសាសន៍ ដ៏ខ្ពង់ខ្ពស់របស់សម្ដេចមហាបវរធិបតី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានដៅយកបញ្ហាក្មេងទំនើង ជាកិច្ចការអាទិភាពមួយក្នុងចំណោមអាទិភាព៦ ដែលត្រូវយកចិត្តទុកដាក់ដោះស្រាយ ចាប់ពីដើមនីតិកាលទី៧ រួមទាំងការពង្រឹងការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព ។លោក ទូច សុឃៈ បន្ថែមថា យុវជនទាំងនោះ នឹងប្រឈមុខវិធានការរដ្ឋបាល និងវិធានការច្បាប់ ក្នុងនោះចំពោះវិធានការរដ្ឋបាល គឺការអប់រំ ណែនាំ និងធ្វើកិច្ចសន្យាមុនអនុញ្ញាតឱ្យត្រឡប់ទៅផ្ទះ សម្រាប់ករណីស្រាលៗ ប៉ុន្តែត្រូវបានរកឃើញពាក់ព័ន្ធនឹងបទល្មើសព្រហ្មទណ្ឌ នឹងត្រូវកសាងសំណុំរឿងបញ្ជូនទៅតុលាការ។ គួរកត់សម្គាល់ថា ក្នុងចំណោមករណីក្មេងទំនើងទូទាំងប្រទេស រាជធានីភ្នំពេញ មានករណីនេះច្រើនជាងគេ សម្រាប់រាជធានីភ្នំពេញ ក្នុងកិច្ចប្រតិបត្តការរយៈពេល៧ថ្ងៃមកនេះ ឯកឧត្តមអភិសន្តិបណ្ឌិត ស សុខា បានណែនាំឱ្យស្នងការដ្ឋានរាជធានីភ្នំពេញ ធ្វើតេសទឹកមូត្រលើក្រុមក្មេងទំនើង ដែលឃាត់ខ្លួនបានសរុប ដោយជាលទ្ធផលបានរកឃើញថាជាង ៥០ភាគរយ មានសារធាតុញៀនក្នុងខ្លួន។ព្រោះហេតុដូច្នេះហើយ បានជាក្នុងឱកាសដឹកនាំកិច្ចប្រជុំ ពិនិត្យការងារប្រយុទ្ធប្រឆាំងគ្រឿងញៀន នៅខេត្តបន្ទាយមានជ័យ និងខេត្តបាត់ដំបង កាលពីថ្ងៃទី២៧ និង២៨ ខែសភា ឆ្នាំ២០២៤ ឯកឧត្តមអភិសន្តិបណ្ឌិត បានណែនាំឱ្យរដ្ឋបាលខេត្តទាំងពីរ និងរាជធានី ខេត្ត ផ្សេងទៀត បង្កើនការយកចិត្តទុកដាក់បង្ក្រាបករណីក្មេងទំនើង ដោយភ្ជាប់នឹងការស្រាវជ្រាវឈានទៅបង្ក្រាបបទល្មើសគ្រឿងញៀន៕ អត្ថបទ បាន សុខរិទ្ធិ

អ្នកស្លាប់ដោយសាររថយន្តក្រុងធ្លាក់ចូលក្នុងជ្រោះ ក្នុងទីក្រុង Jammu ប្រទេសឥណ្ឌា កើនឡើងដល់ ២២នាក់

អាជ្ញាធរបាននិយាយថា រថយន្តក្រុងដឹកអ្នកធ្វើធម្មយាត្រាមួយគ្រឿង បានធ្លាក់ចូលទៅក្នុងជ្រលងជ្រោះជ្រៅមួយកន្លែង ក្នុងដែនដីសហព័ន្ធ Jammu ភាគខាងជើង កាលពីថ្ងៃព្រហស្បតិ៍ បណ្តាលឲ្យ មនុស្សយ៉ាងហោចណាស់ ២២ នាក់ស្លាប់ និងរាប់សិបនាក់ផ្សេងទៀតរងរបួស។អ្នកនាំពាក្យនគរបាល បាននិយាយថា រថយន្តក្រុងដែលបានចាប់ផ្តើមធ្វើដំណើរក្នុងទីក្រុង គូរូស្សេត្រា(Kurukshetra) ក្នុងរដ្ឋ Haryana ភាគខាងជើង បានធ្វើដំណើរទៅកាន់ព្រះវិហារហិណ្ឌូមួយកន្លែងក្នុងទីក្រុង Jammu នៅពេលនោះ រថយន្តបានធ្លាក់ចូលទៅក្នុងជ្រលងជ្រោះជ្រៅ។មនុស្សយ៉ាងហោចណាស់៦០នាក់ដែលរងរបួស ត្រូវបានបញ្ជូនទៅកាន់មហាវិទ្យាល័យវេជ្ជសាស្ត្ររបស់រដ្ឋាភិបាល ក្នុងទីក្រុង Jammu ដើម្បីព្យាបាល។មន្ត្រីនគរបាលម្នាក់ និយាយថា ប្រតិបត្តិការជួយសង្គ្រោះ នៅបន្ត។ រថយន្តក្រុងដែលបានជួបឧបទ្ទវហេតុនេះ បានផ្ទុកមនុស្សច្រើនលើសទម្ងន់ ដែលមានអ្នកដំណើររហូតដល់៨០នាក់ ជិះនៅលើរថយន្តក្រុងនេះ។

ការវាយប្រហារតាមអាកាសរបស់អ៊ីស្រាអែល ធ្លាក់លើជំរំ Jabalia ខណៈប្រជាជនប៉ាឡេស្ទីនត្រឡប់ទៅមើលការខូចខាត

វីដេអូ ត្រូវបានថតនៅពេលការវាយប្រហារតាមអាកាសរបស់អ៊ីស្រាអែល បានវាយប្រហារ ទៅលើជំរំ Jabalia កាលពីថ្ងៃព្រហស្បតិ៍។ ប្រជាជន និយាយថា ពួកគេបានវិលត្រឡប់មកវិញ បន្ទាប់ពីកងកម្លាំងអ៊ីស្រាអែល បានដកខ្លួនចេញពីផ្នែកមួយនៃជំរំនៅភាគខាងជើងតំបន់ហ្កាហ្សាស្ទ្រីប។ លោក Ali Badran ជាជនភៀសខ្លួនប៉ាឡេស្ទីន បាននិយាយថា លោកបានភៀសខ្លួនទៅកាន់ជំរំមួយកន្លែងនៅឆ្នេរសមុទ្រ នៅពេលដែលកងកម្លាំងកាន់កាប់ បានមកដល់ជំរំ Jabalia ហើយនៅពេលដែលយើងទទួលដំណឹងថាពួកគេបានដកខ្លួនចេញពីជំរំនោះ យើងក៏បានត្រឡប់ទៅវិញ។នៅពេលដែលយើងត្រឡប់ទៅជំរំ Jabalia ពួកយើងមានការភ្ញាក់ផ្អើលជាខ្លាំងចំពោះហេតុការណ៍ដែលបានកើតឡើងនៅជំរំ គឺការបំផ្លិចបំផ្លាញ។ លំនៅឋានជាច្រើនខ្នង ត្រូវបានបំផ្លាញរាបដល់ដី និងមានភ្លើងឆេះ ហើយអ្វីដែលមិនបានឆេះនោះ ក៏ត្រូវបានបំផ្លាញទាំងស្រុង។យោធារបស់ប្រទេស បាននិយាយថា កងកម្លាំងអ៊ីស្រាអែល បានដណ្តើមការគ្រប់គ្រងតំបន់ទ្រនាប់មួយកន្លែងនៅតាមព្រំដែនរវាងតំបន់ហ្កាហ្សាស្ទ្រីប និងប្រទេសអេហ្ស៊ីប ដោយផ្តល់អំណាចដល់អ៊ីស្រាអែលដោយប្រសិទ្ធភាព នៅលើព្រំដែនដីគោកទាំងមូលនៃដែនដីប៉ាឡេស្ទីន។ អ៊ីស្រាអែល បានបន្តការវាយឆ្មក់លើទីក្រុង Rafah នៅភាគខាងត្បូងតំបន់ហ្កាហ្សា ទោះបីជាមានសេចក្តីបង្គាប់ពីតុលាការយុត្តិធម៌អន្តរជាតិ(ICJ) ឲ្យបពា្ឈប់ការវាយលុកលើទីក្រុងដែលមានប្រជាជនពាក់កណ្តាល នៃប្រជាជន២,៣ លាននាក់ នៅហ្កាហ្សា ដែលបានភៀសខ្លួនចេញកាលពីពេលមុន។អាជ្ញាធរសុខាភិបាលបាននិយាយថា ប្រជាជនប៉ាឡេស្ទីនជាង ៣៦.០០០ នាក់ត្រូវបានសម្លាប់ក្នុងការវាយលុករបស់អ៊ីស្រាអែលនៅតំបន់ហ្កាហ្សា។

មនុស្សបីនាក់ស្លាប់នៅក្នុងការបាញ់ប្រហារនៅទីក្រុង មីនីប៉ូលីស រួមទាំងមន្រ្តីនគរបាលនៅអាមេរិក

យោងតាមប្រព័ន្ធផ្សព្វផ្សាយក្នុងស្រុកដែលសំអាងប្រភពពីសមត្ថកិច្ចបានឱ្យដឹងថា មនុស្ស៣ នាក់ រួមទាំងមន្ត្រីនគរបាលម្នាក់ត្រូវបានសម្លាប់ និងជាច្រើននាក់ទៀតបានរងរបួសក្នុងហេតុការណ៍បាញ់ប្រហារ នៅទីក្រុង មីនីប៉ូលីស (Minneapolis) សហរដ្ឋអាមេរិក កាលពីថ្ងៃព្រហស្បតិ៍ ៣០ ឧសភាសប្ដាហ៍នេះ។ ក្រុមអាជ្ញាធរបាននិយាយថា ជនសង្ស័យក៏បានស្លាប់ផងដែរក្នុងពេលបាញ់តដៃជាមួយនគរបាល។ ហើយជនល្មើសត្រូវបានកំណត់អត្តសញ្ញាណ មានឈ្មោះថា ចាម៉ាល់ មីតឈេល (Jamal Mitchell)វ័យ២៨ឆ្នាំ។ ស្នងការនគរបាលក្រុង មីនីប៉ូលីស បាននិយាយនៅលើបណ្តាញសង្គមរបស់ខ្លួនថា ក្រុមមន្រ្តីកំពុង ឆ្លើយតបទៅនឹងឧបទ្ទវហេតុសកម្មមួយ ដែលមានមនុស្ស៦ នាក់ក្នុងនោះ២នាក់ជាមន្ត្រីនគរបាល ត្រូវបានរាយការណ៍ថាបានរងរបួស។ ស្នងការនគរបាលខាងលើ បាននិយាយថា ក្រោយហេតុការណ៍បាញ់បោះដោយសេរី ស្ថានភាពនៅមិនទាន់ល្អនៅឡើយ ដោយជំរុញឱ្យសាធារណជន ជៀសវាងទៅជិតតំបន់មួយនៃសង្កាត់ វៃធីអ័រ (Whittier) នៃទីក្រុងដែលមានករណីបាញ់បោះបានកើតឡើង។ពុំមានព័ត៌មានលម្អិតផ្លូវការបន្ថែមទៀតភ្លាមៗទេ។សមត្ថកិច្ច បានរាយការណ៍បឋមពីហេតុការណ៍នេះនៅម៉ោងប្រហែល ៦ និង ១៥ នាទីល្ងាច ថ្ងៃព្រហស្បតិ៍សប្ដាហ៍នេះ ម៉ោងនៅសហរដ្ឋអាមេរិក ។ ស្ថានីយ៍ទូរទស្សន៍ មីនីប៉ូលី KMSP ដែលជាបុត្រសម្ព័ន្ធរបស់ទូរទស្សន៍ Fox បានរាយការណ៍ថា មនុស្ស៦ នាក់ត្រូវបានបាញ់ រួមទាំងមន្រ្តីនគរបាល២ នាក់ និងជនស៊ីវិល ៤ នាក់ ហើយមន្រ្តីម្នាក់ និងជនស៊ីវិល២ ផ្សេងទៀតបានស្លាប់។ ស្ថានីយ៍ទូរទស្សន៍ក្នុងស្រុកមួយផ្សេងទៀតដែលដកស្រង់ប្រភពពីបណ្ដាញសារព័ត៌មាន ABC សាខា របស់ប្រព័ន្ធផ្សព្វផ្សាយ KSTP បានរាយការណ៍ថា មន្ត្រីម្នាក់បានស្លាប់ និងម្នាក់ទៀតកំពុងសម្រាកព្យាបាលនៅមន្ទីរពេទ្យ ខណៈជនស៊ីវិលជាច្រើននាក់បានរងរបួសដោយសារគ្រាប់កាំភ្លើង៕

បណ្ដាញសង្គម

ព័ត៌មានថ្មីៗ

Atletico Madrid ឈ្នះនៅទឹកដី Barcelona លើកដំបូងតាំងពីឆ្នាំ ២០០៦

អ៊ីស្រាអែល៖ ក្រុមសកម្មប្រយុទ្ធហេសបូឡារាប់រយនាក់ ត្រូវបានដាក់គោលដៅក្នុងការវាយប្រហារ

ប្រទេសជប៉ុន ពិចារណាផ្តល់ហិរញ្ញប្បទានដើម្បីជួយអ្នកផ្គត់ផ្គង់អាស៊ីទទួលបានប្រេង

ក្រុមការពារជើងឯក PSG កាន់ពីរគ្រាប់ចំណេញពីជ័យជំនះ ២-០ លើ Liverpool ជើងទីមួយ

ក្រសួងសុខាភិបាល នៃព្រះរាជាណាចក្រកម្ពុជា ទស្សនកិច្ចនៅវិទ្យាស្ថានប៉ាស្ទ័រ ក្រុងប៉ារីស សាធារណរដ្ឋបារាំង

សម្ដេចធិបតី ថ្លែងអំណរគុណប្រធានាធិបតីបារាំងចំពោះការស្វាគមន៍យ៉ាងកក់ក្តៅ និងរៀបចំដំឡើងកម្រិតទំនាក់ទំនងប្រទេសទាំងពីរដល់កម្រិត «ភាពជាដៃគូរយុទ្ធសាស្ត្រ»

ស.ស.យ.ក បាននាំយកក្រមា សារ អំបុក នំខ្ញី និងជំនួយជូនដល់វីរកងទ័ពជួរមុខ

ទំនិញចម្រុះ៣០០ មុខ ត្រូវបានតាំងបង្ហាញក្នុងពិព័រណ៍ផលិតផលខ្មែរដ៏ធំ នៅកោះពេជ្រ នៅព្រឹកនេះ

ក្រុមប្រឹក្សារាជធានី អំពាវនាវឱ្យសន្សំសំចៃការចំណាយផ្សេងៗ ខណៈរថយន្តក្រុងប្រមាណ ៦០០គ្រឿងនៅតែដឹកជញ្ជូនប្រជាពលរដ្ឋទៅលេងស្រុកកំណើតក្នុងឱកាសបុណ្យចូលឆ្នាំថ្មី

កូរ៉េខាងជើងបើកការសាកល្បងសព្វាវុធរយៈពេល៣ថ្ងៃ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877