BTV NEWS

សមត្ថកិច្ចបង្ក្រាបទីតាំង Online Scams ចំនួន៩កន្លែងនៅក្រុងបាវិត ឃាត់ខ្លួនជនបរទេសជាង ៣០០នាក់

កម្លាំងជំនាញបន្តឆ្មក់ចុះបង្ក្រាបទីតាំងឆបោកតាមប្រពន្ធ័បច្ចេកវិទ្យា នៅខណ្ឌសែនសុខ ឃាត់ជនបរទេស ២៧នាក់

គណៈបញ្ជាការឯកភាពរាជធានីចុះបង្ក្រាបទីតាំងឆបោកតាមប្រពន្ធ័បច្ចេកវិទ្យា នៅខណ្ឌសែនសុខ ឃាត់ជនសង្ស័យ០៨នាក់

បណ្តេញជនបរទេសជិត ៥០០នាក់ ចេញពីកម្ពុជាករណីឆបោកតាមប្រព័ន្ធអនឡាញ

សន្តិសុខ និង សង្គម

ក្រុមអ្នកតវ៉ានៅជុំវិញពិភពលោក ថ្កោលទោសការវាយប្រហារតាមអាកាសលើទីក្រុង Rafah

កងកម្លាំងអ៊ីស្រាអែល បានបំពានទៅនឹងសេចក្តីបង្គាប់ដែលត្រូវបានចេញកាលពីថ្ងៃសុក្រ ដោយតុលាការយុត្តិធម៌អន្តរជាតិ (ICJ) ដើម្បីបញ្ឈប់ការវាយលុករបស់អ៊ីស្រាអែលលើទីក្រុង Rafah ភាគខាងត្បូងតំបន់ហ្កាហ្សា។ អ៊ីស្រាអែល បានបើកការវាយប្រហារតាមអាកាស កាលពីចុងសប្តាហ៍កន្លងទៅនេះ ដែលអាជ្ញាធរសុខាភិបាលតំបន់និយាយថា បានសម្លាប់មនុស្សយ៉ាងហោចណាស់ ៤៥នាក់។ ការវាយប្រហារនេះ បានធ្វើឲ្យមានការរិះគន់នៅជុំវិញពិភពលោក។បាតុករនៅប្រទេសអេស្បាញ បាននិយាយថាពួកគេមិនចង់ធ្វើជាអ្នកសមគំនិត ចំពោះអ្វីដែលពួកគេហៅថាជាអំពើប្រល័យពូជសាសន៍ នោះទេ។ មេដឹកនាំនយោបាយរបស់ពួកគេ បានចូលរួមជាមួយប្រទេសអៀរឡង់ និងន័រវែស កាលពីសប្តាហ៍មុន ដើម្បីបន្ថែមប្រទេសរបស់ពួកគេ ចូលជាមួយប្រទេស ១៤០ផ្សេងទៀត ដែលបានទទួលស្គាល់ភាពជារដ្ឋរបស់ដែនដីប៉ាឡេស្ទីន។ បាតុករក្នុងទីក្រុងអ៊ីស្តង់ប៊ុល ប្រទេសទួរគី បានបញ្ចេញសំឡេងលឺៗ ខណៈពួកគេចេញធ្វើបាតុកម្មទៅកាន់ស្ថានកុងស៊ុល អ៊ីស្រាអែល។នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រាប់សមាជិកសភាថា លោក និងក្រុមរបស់លោក កំពុងស៊ើបអង្កេតលើការវាយប្រហារនេះ។ លោកនិយាយថា កងកម្លាំងរបស់លោកបាន ខិតខំប្រឹងប្រែងយ៉ាងខ្លាំង ដើម្បីបញ្ចៀសការបង្កគ្រោះថ្នាក់ដល់ជនស៊ីវិល ប៉ុន្តែមានកំហុស «សោកនាដកម្ម» ។ លោក Netanyahu និយាយបន្ថែមថា សម្រាប់ពួកយើង ការបង្កគ្រោះថ្នាក់ដល់ជនស៊ីវិល គឺជាសោកនាដកម្មមួយ ប៉ុន្តែសម្រាប់ក្រុមហាម៉ាស វាគឺជាយុទ្ធសាស្ត្ររបស់យើង។ អ្នកនាំពាក្យយោធាអ៊ីស្រាអែល លោក Daniel Hagari បាននិយាយកាលពីថ្ងៃអង្គារថា ការវាយប្រហារនេះបានបង្កឲ្យមានអគ្គិភ័យដ៏សន្ធោសន្ធៅ។ ទោះយ៉ាងណា លោកបាននិយាយថា គ្រាប់រំសេវដែលបានប្រើប្រាស់ មិនអាចឆាបឆេះបង្កអគ្គិភ័យដល់កម្រិតធំបែបនោះទេ។ លោក និយាយថា ប្រហែលជាមានអាវុធស្តុកទុក នៅក្បែរនោះ។ទាហានអ៊ីស្រាអែល មិនព្រមបោះបង់ចោលការវាយលុករបស់ខ្លួននៅទីក្រុងក្រុងរ៉ាហ្វានោះទេ។ ទីភ្នាក់ងារសារព័ត៌មាន Reuters បានរាយការណ៍ថា សាក្សីបាននិយាយថា រថក្រោះជាច្រើនគ្រឿង បានរុលចូលទៅដល់កណ្តាលទីក្រុង ជាលើកដំបូង។

ទីក្រុងហុងកុង ចាប់ខ្លួនមនុស្ស៦នាក់ពីបទបះបោរ ក្រោមច្បាប់សន្តិសុខជាតិថ្មី

ទីក្រុងហុងកុង បានប្រកាសពីការចាប់ខ្លួនលើកដំបូងរបស់ខ្លួន ក្រោមច្បាប់សន្តិសុខថ្មី ដោយឃុំខ្លួនមនុស្ស៦នាក់ ពីបទបង្ហោះតាមប្រព័ន្ធផ្សព្វផ្សាយសង្គមដែលញុះញង់ឱ្យមានការស្អប់ខ្ពើម ប្រឆាំងនឹងទីក្រុងប៉េកាំង។ ស្ត្រី៥នាក់ និងបុរសម្នាក់ រួមទាំងសកម្មជន លោក ជូ ហាំងទុង (Chow Hang Tung) ត្រូវបានចាប់ខ្លួនកាលពីថ្ងៃអង្គារសប្ដាហ៍នេះ។ ក្រុមមន្ត្រីបាននិយាយថា ក្រុមនេះកំពុងបង្ហោះសារដែលផ្តោតលើកាលបរិច្ឆេទដ៏រសើប ដែលត្រូវបានរាយការណ៍ ថាជាខួបនៃទីលានចតុរង្គធានអានមិន ៤មិថុនា (Tiananmen Square)។ ប្រសិនបើរកឃើញថាមានកំហុស ក្រុមនេះអាចប្រឈមនឹងការជាប់ពន្ធនាគាររហូតដល់៧ឆ្នាំ ក្រោមការផ្តន្ទាទោសដ៏តឹងរ៉ឹង ដែលច្បាប់ថ្មីហៅថា មាត្រា ២៣។ ច្បាប់ ដែលត្រូវបានតាមដានយ៉ាងរហ័សតាមរយៈសភាគាំទ្រទីក្រុងប៉េកាំងរបស់ហុងកុងកាលពីខែមីនា គ្របដណ្តប់លើអំពើក្បត់ជាតិ ការបះបោរ និងអាថ៌កំបាំងរដ្ឋ ហើយអនុញ្ញាតឱ្យមានការកាត់ក្តីដោយបិទទ្វារ។ ច្បាប់ថ្មីនេះ ពង្រីកលើច្បាប់សន្តិសុខជាតិ ដែលដាក់ចេញដោយទីក្រុងប៉េកាំងកាលពីឆ្នាំ ២០២០។រដ្ឋាភិបាលទីក្រុងហុងកុងនិយាយថា វាចាំបាច់សម្រាប់ស្ថិរភាព ប៉ុន្តែការដាក់ចេញរបស់ខ្លួនបានធ្វើឱ្យមានក្ដីបារម្ភថា សេរីភាពស៊ីវិល នឹងត្រូវលុបបំបាត់បន្ថែមទៀត។ក្រុមតាមដានសិទ្ធិមនុស្សរបស់អង្គការលើកលែងទោសអន្តរជាតិ បាននិយាយថា ការចាប់ខ្លួននេះ គឺជាការប៉ុនប៉ងដ៏អាម៉ាស់មួយក្នុងការបង្ក្រាប ដែលធ្វើឲ្យគេនឹកឃើញដល់ការបង្រ្កាបនៅទីលានចតុរង្គ ធានអានមិន៕

ក្រុមហាម៉ាស់៖ ការវាយប្រហារក្រុង Rafah បង្ហាញសញ្ញាថាអ៊ីស្រាអែល មិនគោរពសេចក្តីសម្រេចរបស់តុលាការពិភពលោក

មន្ត្រីជាន់ខ្ពស់របស់ក្រុមហាម៉ាស់ លោក Osama Hamdan បាននិយាយក្នុងសន្និសីទសារព័ត៌មាន ក្នុងទីក្រុង Beirut ប្រទេសលីបង់ កាលពីថ្ងៃចន្ទថា ការវាយប្រហារថ្មីៗលើទីក្រុង Rafah បង្ហាញពីការមិនគោរពរបស់អ៊ីស្រាអែល ចំពោះសេចក្តីសម្រេចរបស់តុលាការពិភពលោក។ លោក Hamdan និយាយថា ការអះអាងដែលធ្វើឡើងដោយអ៊ីស្រាអែលថាជនប្រដាប់អាវុធ មានវត្តមាននៅទីតាំងនៃការវាយប្រហារ កាលពីថ្ងៃអាទិត្យនៅទីក្រុង Rafah គឺជាការ «គួរឲ្យអៀនខ្មាស»។ក្រុមមន្ត្រីបាននិយាយកាលពីថ្ងៃចន្ទថា ការវាយប្រហារតាមអាកាសរបស់អ៊ីស្រាអែល បានបង្កឱ្យមានអគ្គិភ័យឆាបឆេះសម្លាប់មនុស្សយ៉ាងហោចណាស់៤៥នាក់នៅក្នុងជំរំតង់មួយកន្លែងក្នុងទីក្រុង Rafah តំបន់ហ្កាហ្សា បង្កឱ្យមានការប្រឆាំងយ៉ាងខ្លាំងពីសំណាក់មេដឹកនាំពិភពលោក ដែលបានជំរុញឱ្យមានការអនុវត្តសេចក្តីបង្គាប់របស់តុលាការពិភពលោក ដើម្បីបញ្ឈប់ការវាយប្រហាររបស់អ៊ីស្រាអែល។ យោធាអ៊ីស្រាអែល ដែលកំពុងព្យាយាមកម្ចាត់ក្រុមហាម៉ាសនៅក្នុងតំបន់ហ្កាហ្សា បាននិយាយថា ខ្លួនកំពុងស៊ើបអង្កេតរបាយការណ៍ដែលថា ការវាយប្រហារដែលធ្វើឡើងប្រឆាំងមេបញ្ជាការក្រុមសកម្មប្រយុទ្ធអ៊ីស្លាមនិយមនៅទីក្រុងRafha បានបណ្តាលឱ្យមានអគ្គិភ័យយ៉ាងសន្ធោសន្ធៅ។នាយករដ្ឋមន្ត្រី លោក Benjamin Netanyahu បាននិយាយថា ការវាយប្រហារនេះ ពុំមានគោលបំណងធ្វើឱ្យជនស៊ីវិលស្លាប់ ឬរងរបួសនោះទេ។ លោក Hamdan បានប្រាប់អ្នកសារព័ត៌មានថា ពុំមានផែនការសម្រាប់កិច្ចចរចាបទឈប់បាញ់នោះទេ ហើយការទាមទារកាលពីពេលរបស់ក្រុមលោកដើម្បីទទួលបានកិច្ចព្រមព្រៀង ដែលរួមមានបទឈប់បាញ់អចិន្ត្រៃយ៍ ក៏នៅតែមិនផ្លាស់ប្តូរ។លោក Hamdan និយាយថា កាលណា លោក Netanyahu និងអ្នកគាំទ្ររបស់លោក ពន្យារពេលកាន់តែយូរ ចំណាប់ថ្នូររបស់ពួកគេកាន់តែច្រើននឹងបាត់បង់ជីវិត នៅក្នុងកណ្តាប់ដៃកងទ័ពសត្រូវ។ ការបន្តពន្យារពេល និងការវាយប្រហារតាមអាកាស មានន័យថាចំណាប់ថ្នូររបស់ពួកគេ ប្រហែលជាមិនអាចត្រឡប់ទៅវិញ ប៉ុន្តែសាកសព ក៏ប្រហែលជានឹងមិនបញ្ជូនត្រឡប់ទៅវិញដែរ។

សីតុណ្ហភាពនៅប្រទេសប៉ាគីស្ថាន រលកកម្តៅឡើងលើសពី ៥២អង្សាសេ

ការិយាល័យឧតុនិយម បាននិយាយកាលពីថ្ងៃច័ន្ទថា សីតុណ្ហភាពបានកើនឡើងលើសពី ៥២ អង្សាសេ នៅក្នុងខេត្ត Sindh ភាគខាងត្បូងប្រទេសប៉ាគីស្ថាន ជាការបង្ហាញសីតុណ្ហភាពខ្ពស់បំផុតនៅរដូវក្តៅ និងខិតជិតដល់កម្រិតកំណត់ត្រាខ្ពស់បំផុតរបស់ប្រទេស ក្នុងពេលមានរលកកម្តៅនៅតែបន្ត។មន្ត្រីជាន់ខ្ពស់នៃនាយកដ្ឋានឧតុនិយមប្រទេសប៉ាគីស្ថាន លោក Shahid Abbas បានប្រាប់សារព័ត៌មានរ៉យទ័រថា នៅក្នុងក្រុង ម៉ូហេនចូ ដារ៉ូ(Mohenjo Daro) ជាក្រុងមួយក្នុងខេត្ត Sindh ល្បីល្បាញដោយសារទីតាំងវត្ថុបុរាណ ដែលមានមកតាំងពីអរិយធម៌ជ្រលងភ្នំ Indus សីតុណ្ហភាពបានកើនឡើងខ្ពស់ រហូតដល់ ៥២,២អង្សាសេ។ ការកើតមានសីតុណ្ហភាពខ្ពស់នេះ គឺជាកម្រិតខ្ពស់បំផុតនៅរដូវក្តៅ រហូតមកដល់ពេលនេះ ហើយបានខិតជិតដល់កម្រិតកំណត់ត្រាខ្ពស់បំផុតនៅក្នុងទីក្រុង និងប្រទេស ដែលឈានដល់កម្រិត៥៣,៥អង្សាសេ និង ៥៤អង្សាសេ។ ក្រុង Mohenjo Daro គឺជាក្រុងតូចមួយ ដែលជួបប្រទះរដូវក្តៅ ក្តៅខ្លាំង និងរដូវរងាក្តៅមធ្យម ហើយមានភ្លៀងធ្លាក់តិច ប៉ុន្តែទីផ្សារមានកម្រិត ខណៈហាងនំប៉័ង ហាងលក់តែ ហាងជួសជុលគ្រឿងអេឡិចត្រូនិក និងហាងលក់បន្លែ ផ្លែឈើ ដែលជាធម្មតាមានសភាពអ៊ូអរដោយមានអតិថិជនច្រើន។ ប៉ុន្តែក្នុងពេលមានរលកកម្តៅបច្ចុប្បន្ន ហាងនានា ស្ទើរតែគ្មានមនុស្សចូល។រលកកម្តៅនៅពេលនេះ ត្រូវបានគេរំពឹងថានឹងថយចុះនៅ ក្រុង Mohenjo Daro និងតំបន់ជុំវិញ ប៉ុន្តែអំឡុងពេលណាមួយ ត្រូវបានគេរំពឹងថានឹងវាយលុកនៅតំបន់ផ្សេងទៀតនៅក្នុងខេត្ត Sindh រួមទាំងរដ្ឋធានី Karachi ជាទីក្រុងធំបំផុតរបស់ប្រទេសប៉ាគីស្ថាន។ក្រុមអ្នកវិទ្យាសាស្ត្រអន្តរជាតិ បាននិយាយថា សីតុណ្ហភាពក្តៅខ្លាំងនៅទូទាំងទ្វីបអាស៊ី ក្នុងរយៈពេលមួយខែកន្លងទៅនេះ ទំនងជាកាន់តែមិនអំណោយផលខ្លាំង ដោយសារតែបម្រែបម្រួលអាកាសធាតុបង្កឡើងដោយមនុស្ស។

ប៉ាពួនូវ៉ែលហ្គីណេ ជម្លៀសមនុស្ស ៧.៩០០ នាក់ ក្រោមការគំរាមកំហែងនៃបំណាក់ដីថ្មី

ប្រទេសប៉ាពួនូវ៉ែលហ្គីណេ កំពុងជម្លៀសមនុស្សប្រមាណ ៧.៩០០ នាក់ ដែលរស់នៅក្បែរកន្លែងបំណាក់ដីដ៏មហន្តរាយមួយ នេះបើតាមមន្ត្រីជាន់ខ្ពស់ខេត្តមួយរូបបាននិយាយនៅថ្ងៃអង្គារ (២៨ ឧសភា) នេះ ខណៈដែលការភ័យខ្លាចកើនឡើងកាន់តែខ្លាំងថាអាចនឹងមានបំណាក់ដីបន្ថែមទៀត។ ប្រធានរដ្ឋបាលខេត្ត អែនហ្កា (Enga) លោក សានឌីស សាខា (Sandis Tsaka) បានប្រាប់សារព័ត៌មាន AFP ថា «រៀងរាល់ម៉ោង សំឡេងផ្ទុះ និងរង្គើ ដូចជាគ្រាប់បែក ឬគ្រាប់កាំភ្លើងបានលាន់លឺឡើង ហើយថ្មនៅតែបន្តធ្លាក់ចុះមកក្រោមពីលើតំបន់ភ្នំ»។សហគមន៍ដែលរស់នៅលើភ្នំក្នុងខេត្ត អែនហ្កា ស្ទើរតែត្រូវបានកប់នៅក្រោមបំណាក់ដីនៅពេលដែលបំណែកនៃភ្នំ ម៉ុនហ្កាឡូ (Mungalo) បានបាក់ចុះមកក្រោមកាលពីព្រឹកព្រលឹមថ្ងៃសុក្រ (២៤ ឧសភា) សប្ដាហ៍មុន ដោយបានបំផ្លាញលំនៅឋានជាច្រើនខ្នង និងកប់មនុស្សដែលកំពុងដេកលង់លក់នៅខាងក្នុង។ មជ្ឈមណ្ឌលគ្រោះមហន្តរាយជាតិរបស់ប៉ាពួនូវ៉ែលហ្គីណេ បារម្ភថាមនុស្សជាង ២.០០០ នាក់ត្រូវបានកប់ស្លាប់ ប៉ុន្តែមានតែសាកសពចំនួន ៦ និងជើងសាកសពទី៦ ប៉ុណ្ណោះ ដែលត្រូវបានទាញចេញពីគំនរបាក់បែក។កិច្ចខិតខំប្រឹងប្រែងជួយសង្រ្គោះត្រូវបានពន្យារពេលដោយសារភាពដាច់ស្រយាលនៃទីតាំងបំណាក់ដីក្នុងតំបន់ខ្ពង់រាបដ៏រដិបរដុបរបស់ប្រទេសមួយនេះ ក៏ដូចជាការកាត់ផ្តាច់ផ្លូវ និងការប្រយុទ្ធនៃកុលសម្ព័ន្ធនៅក្បែរនោះ៕

ជនជាតិរ៉ូហ៊ីងយ៉ា នៅមីយ៉ាន់ម៉ា រងការគំរាមកំហែង ខណៈការវាយប្រហារកាន់តែខ្លាំងក្លាក្នុងរដ្ឋរ៉ាឃីន

សហគមន៍ជនជាតិភាគតិចមូស្លីម រ៉ូហ៊ីងយ៉ា របស់សហភាពមីយ៉ាន់ម៉ា កំពុងតែស្ថិតក្រោមការគំរាមកំហែងនៃការវាយប្រហារ និងការផ្លាស់ទីលំនៅជាថ្មីម្តងទៀត ខណៈដែលការប្រយុទ្ធគ្នារវាងកងទ័ពជនជាតិភាគតិចដ៏មានឥទ្ធិពល និងរបបយោធាកំពុងកាន់អំណាចរបស់ប្រទេសនេះ កាន់តែកើនឡើងខ្លាំងនៅក្នុងរដ្ឋរ៉ាឃីន (Rakhine) ភាគខាងលិច នេះបើយោងតាមអង្គការសហប្រជាជាតិ និងទីភ្នាក់ងារជំនួយ។ជនជាតិរ៉ូហ៊ីងយ៉ា រាប់ម៉ឺននាក់ ត្រូវបានគេប៉ាន់ស្មានថាបានភៀសខ្លួនដើម្បីសុវត្ថិភាពទៅកាន់ប្រទេសជិតខាងបង់ក្លាដែស ចាប់តាំងពីពាក់កណ្តាលខែឧសភា ដែលស្ទាក់ស្ទើរក្នុងការទទួលយកជនភៀសខ្លួនបន្ថែមទៀត ហើយអ្នកដែលនៅសល់ជាច្រើននាក់នៅក្នុងរដ្ឋរ៉ាឃីន កំពុងត្រូវការជំនួយមនុស្សធម៌យ៉ាងខ្លាំង។កងទ័ពអារ៉ាកាន (AA) បានអះអាងកាន់កាប់ភូមិ ប៊ូធីឌួង (Buthidaung) កាលពីដើមខែឧសភា បន្ទាប់ពីមានការប្រយុទ្ធគ្នា ក្នុងអំឡុងពេលដែលកងទ័ពជនជាតិភាគតិចមួយនេះត្រូវបានចោទប្រកាន់ពីបទកំណត់គោលដៅលើសមាជិកសហគមន៍រ៉ូហ៊ីងយ៉ា ប៉ុន្តែខ្លួនបានបដិសេធ។កងទ័ពអារ៉ាកាន ឥឡូវនេះ កំពុងទប់ទល់ការវាយប្រហារនៅតាមភូមិព្រំដែន មួងដាវ (Maungdaw) ជាកន្លែងរស់នៅរបស់ប្រជាជនរ៉ូហ៊ីងយ៉ា យ៉ាងច្រើន ដែលរបបយោធាមីយ៉ាន់ម៉ា ទំនងជានឹងព្យាយាមកាន់កាប់ ដោយបង្កើនទិដ្ឋភាពនៃអំពើហិង្សាកាន់តែធ្ងន់ធ្ងរ។ ជនជាតិរ៉ូហ៊ីងយ៉ា បានប្រឈមមុខនឹងការធ្វើទុក្ខបុកម្នេញជាច្រើនទសវត្សរ៍ ហើយបន្ទាប់ពីការបង្រ្កាបដោយយោធាឆ្នាំ២០១៧ ជនជាតិនេះជិតមួយលាននាក់បានភៀសខ្លួនទៅកាន់ប្រទេសបង់ក្លាដែស ដែលឥឡូវនេះមនុស្សជាច្រើនរស់នៅក្នុងជំរំជនភៀសខ្លួន៕

មន្ទីរពេទ្យកូវ៉ែត នៅក្រុង Rafah បានបិទដំណើរការ ដោយសារប្រតិបត្តិការយោធាអ៊ីស្រាអែល

មន្ត្រីវេជ្ជសាស្រ្តប៉ាឡេស្ទីន បានប្រកាសកាលពីថ្ងៃចន្ទ (២៧ ឧសភា) ពីការបិទមន្ទីរពេទ្យកូវ៉ែត ដែលជាមន្ទីរពេទ្យមួយក្នុងចំណោមពីរ ដែលនៅតែដំណើរការនៅទីក្រុងរ៉ាហ្វា (Rafah) ភាគខាងត្បូងនៃតំបន់ហ្កាហ្សា ដោយសារប្រតិបត្តិការយោធាអ៊ីស្រាអែល នៅក្នុងទីក្រុងនេះ។សេចក្តីថ្លែងការណ៍នេះបានលើកឡើងថា ជំហាននេះត្រូវបានធ្វើឡើងដោយសារតែការពង្រីកប្រតិបត្តិការយោធារបស់កងទ័ពអ៊ីស្រាអែល នៅក្រុងរ៉ាហ្វា និងការវាយលុកដោយចេតនាម្តងហើយម្តងទៀតទៅលើតំបន់ជុំវិញមន្ទីរពេទ្យ ដោយចុងក្រោយបំផុតគឺបានកំណត់គោលដៅលើច្រកទ្វារមន្ទីរពេទ្យ ដែលបណ្តាលឱ្យគ្រូពេទ្យពីរនាក់បានស្លាប់។ទន្ទឹមនឹងនេះ មន្ទីរពេទ្យ អាល់អាកសា (Al-Aqsa) ក្នុងទីក្រុង ឌើ អាល់បាឡា (Deir al-Balah) កណ្តាលតំបន់ហ្កាហ្សាស្រ្ទីប បានព្រមានថា ការទប់ស្កាត់ការផ្គត់ផ្គង់ប្រេងឥន្ធនៈរបស់កងទ័ពអ៊ីស្រាអែល អាចនាំឱ្យមានការផ្អាកសេវាសុខភាពក្នុងរយៈពេលប៉ុន្មានម៉ោងខាងមុខ។ មន្ទីរពេទ្យនេះបាននិយាយនៅក្នុងសេចក្តីថ្លែងការណ៍មួយថា កងទ័ពអ៊ីស្រាអែល បាននិងកំពុងរារាំងការផ្គត់ផ្គង់ប្រេងឥន្ធនៈចាប់តាំងពីថ្ងៃអាទិត្យ មក។ សេចក្តីថ្លែងការណ៍បានបញ្ជាក់ថា មន្ទីរពេទ្យនេះផ្តល់សេវាថែទាំ និងសេវាសុខភាពដល់អ្នកជំងឺ និងរបួសជាង ១.២០០ នាក់ រួមទាំងអ្នកជំងឺខូចក្រលៀនចំនួន ៦០០ នាក់ ដែលត្រូវការលាងឈាម ហើយការព្យាបាលរបស់ពួកគេនឹងត្រូវផ្អាកក្នុងរយៈពេលប៉ុន្មានម៉ោងដែលអាចបណ្ដាលឱ្យស្ថានភាពជំងឺកាន់តែធ្ងន់ធ្ងរ ប្រសិនបើប្រេងឥន្ធនៈមិនត្រូវបានផ្គត់ផ្គង់៕

អង្គការលើកលែងទោសអន្តរជាតិ អំពាវនាវឱ្យតុលាការ ICC ស៊ើបអង្កេត លើការវាយប្រហារ៣លើករបស់អ៊ីស្រាអែល

អង្គការលើកលែងទោសអន្តរជាតិកាលពីថ្ងៃចន្ទសប្ដាហ៍នេះ បានជំរុញឱ្យតុលាការឧក្រិដ្ឋកម្មអន្តរជាតិ ICC ស៊ើបអង្កេតជាឧក្រិដ្ឋកម្មសង្គ្រាម កាលពីពេលថ្មីៗនេះរបស់អ៊ីស្រាអែលចំនួន៣លើកដែលបានសម្លាប់ជនស៊ីវិលប៉ាឡេស្ទីន ៤៥នាក់រួមទាំងកុមារ៣២ នាក់។ កាលពីសប្តាហ៍មុន រដ្ឋអាជ្ញានៃតុលាការឧក្រិដ្ឋកម្មអន្តរជាតិលោក ការីម ខាន់ (Karim Khan)បានដាក់បណ្ដឹងសុំដីកាចាប់ខ្លួន លោកនាយករដ្ឋមន្ត្រីអ៊ីស្រាអែល Benjamin Netanyahu និងមេដឹកនាំកំពូលៗរបស់ក្រុមហាម៉ាសពីបទសង្ស័យប្រព្រឹត្តឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ។ អង្គការលើកលែងទោសបាននិយាយថាការវាយប្រហាររបស់អ៊ីស្រាអែលចំនួន៣លើក លើកមួយលើជំរំជនភៀសខ្លួន អាល់ ម៉ាហ្គាហ្ស៊ី (al-Maghazi) នៅកណ្ដាលដែនដីហ្កាហ្សា កាលថ្ងៃទី១៦ខែមេសា លើកពីរនៅលើក្រុងរ៉ាហ្វា ភាគខាងត្បូងហ្កាហ្សា និងលើកទី៣ នៅថ្ងៃទី ១៩ និង ២០ ខែមេសា គឺជា ភស្តុតាងបន្ថែមទៀតនៃគំរូកាន់តែទូលំទូលាយនៃឧក្រិដ្ឋកម្មសង្គ្រាម ដែលប្រព្រឹត្តដោយ យោធាអ៊ីស្រាអែលនៅក្នុងដែនដីហែកហួរដោយសង្រ្គាមហ្កាហ្សា។ លោកស្រីអេរីកា គ្វេវ៉ារ៉ា រ៉ូសាស់ (Erika Guevara-Rosas) នាយកជាន់ខ្ពស់អង្គការលើកលែងទោសអន្តរជាតិ បាននិយាយថា ករណីដែលបានចងក្រងនៅទីនេះបង្ហាញពីគំរូច្បាស់លាស់នៃការវាយប្រហារក្នុងរយៈពេល៧ខែកន្លងមកនេះ ដែលយោធាអ៊ីស្រាអែលបានបំពានច្បាប់អន្តរជាតិ ដោយបានសម្លាប់ជនស៊ីវិលប៉ាឡេស្ទីន ដោយនិទណ្ឌភាពទាំងស្រុង និងបង្ហាញពីការមិនយកចិត្តទុកដាក់យ៉ាងខ្លាំងចំពោះជីវិតមនុស្ស៕

នាយករដ្ឋមន្ត្រីអ៊ីស្រាអែល៖ ការវាយប្រហារលើក្រុងរ៉ាហ្វា បណ្ដាលមកពីខុសគោលដៅ

ក្រុមមន្ត្រីបាននិយាយកាលពីថ្ងៃចន្ទ ២៧ ឧសភា ថាការវាយប្រហារតាមអាកាសរបស់អ៊ីស្រាអែលបានបង្កឱ្យមានការឆាបឆេះយ៉ាងសន្ធោរសន្ធៅដែលបានសម្លាប់មនុស្ស៤៥ នាក់នៅក្នុងជំរំតង់មួយក្នុងទីក្រុង រ៉ាហ្វា (Rafah)របស់ហ្កាហ្សា ដែលជំរុញឱ្យមានការផ្ទុះកំហឹងពីមេដឹកនាំពិភពលោកដែលជំរុញឱ្យអនុវត្តដីការបស់តុលាការពិភពលោកដើម្បីបញ្ឈប់ការវាយប្រហាររបស់អ៊ីស្រាអែល។យោងតាមក្រុមមន្ត្រីប៉ាឡេស្ទីននៅតំបន់ហ្កាហ្សាគ្រប់គ្រងដោយក្រុមហាម៉ាស មនុស្សរាប់សិបនាក់ត្រូវបានសម្លាប់ ហើយចំនួនអ្នកស្លាប់ទំនងជាកើនឡើង ខណៈអ្នកផ្សេងទៀតកាន់ទុក្ខអ្នកស្លាប់។ លោកនាយករដ្ឋមន្ត្រីអ៊ីស្រាអែល Benjamin Netanyahu បានប្រាប់សភាថា ការវាយប្រហារនេះពុំ មានបំណងសម្លាប់ជនស៊ីវិលឡើយ តែពេលនេះ ដោយសារការវាយប្រហារខុសគោលដៅប៉ុណ្ណោះ។ លោកនិយាយថា នៅក្នុងទីក្រុងរ៉ាហ្វា យើងបានជម្លៀសអ្នកស្រុកមិនមែនអ្នកចូលរួមសមរភូមិប្រហែលមួយលាននាក់រួចហើយ ទោះបីមានការខិតខំប្រឹងប្រែងអស់ពីសមត្ថភាពរបស់យើងដើម្បីកុំឱ្យប៉ះពាល់ដល់អ្នកមិនមែនជាអ្នកប្រយុទ្ធក៏ដោយ ប៉ុន្តែគួរឲ្យសោកស្ដាយដែលបណ្ដាលឲ្យមានសោកនាដកម្មនេះកើតឡើង។ យើងកំពុងស៊ើបអង្កេតឧបទ្ទវហេតុនេះ ហើយនឹងឈានដល់ការសន្និដ្ឋាន ព្រោះនេះជាគោលការណ៍របស់យើង។ ការវាយប្រហារនេះបានជំរុញឱ្យមានការផ្ទុះកំហឹងជាអន្តរជាតិ ដែលឥឡូវនេះកំពុងអំពាវនាវឱ្យអនុវត្តសេចក្តីសម្រេចនៅថ្ងៃសុក្រពីតុលាការកំពូលរបស់អង្គការសហប្រជាជាតិ ដោយបញ្ជាឱ្យអ៊ីស្រាអែលបញ្ឈប់ការវាយប្រហាររបស់ខ្លួនលើក្រុងរ៉ាហ្វា។អ៊ីស្រាអែល នៅតែបន្តការវាយលុករបស់ខ្លួន ដោយនិយាយថា សេចក្តីសម្រេចរបស់តុលាការបង្អាក់ សកម្មភាពយោធានៅទីនោះ៕

[UPDATE]មនុស្សយ៉ាងហោចណាស់ ១០នាក់ស្លាប់ ខណៈព្យុះស៊ីក្លូន វាយប្រហារប្រទេសបង់ក្លាដែស និងឥណ្ឌា

ក្រសួងគ្រប់គ្រងគ្រោះមហន្តរាយរបស់បង់ក្លាដែស បានប្រាប់សារព័ត៌មាន AFP ថា មនុស្សយ៉ាងហោចណាស់១០នាក់ស្លាប់ ចាប់តាំងពីព្យុះស៊ីក្លូនរីម៉ាល់ (Remal) បានវាយប្រហារកាលពីយប់ថ្ងៃអាទិត្យ ។ ព្យុះស៊ីក្លូនដ៏ខ្លាំងក្លាមួយបានបោកបក់ចូលឆ្នេរសមុទ្រនៅតំបន់ទំនាបនៃប្រទេសបង់ក្លាដែសកាលពីថ្ងៃអាទិត្យ ២៦ ឧសភា ដោយមនុស្សជិតមួយលាននាក់បានជម្លៀសខ្លួនចេញពីដីគោក។ ប្រធានមន្ទីរឧតុនិយមបង់ក្លាដែស លោក អាហ្ស៊ីហ្សើររ៉ាម៉ាន់ (Azizur Rahman) បានប្រាប់សារព័ត៌មាន AFP ថា ព្យុះស៊ីក្លូន មានឈ្មោះថា រីម៉ាល់ (Remal) ដ៏ធ្ងន់ធ្ងរបានចាប់ផ្តើមឆ្លងកាត់ឆ្នេរសមុទ្របង់ក្លាដែស ដោយបន្ថែមថា ព្យុះដ៏មានទ្ធិពលនេះ អាចបន្តវាយលុកតំបន់ឆ្នេរសមុទ្ររហូតដល់យ៉ាងហោចណាស់ព្រឹកព្រលឹមថ្ងៃចន្ទនេះ។ យើងបានកត់ត្រាល្បឿនខ្យល់អតិបរមា ៩០ គីឡូម៉ែត្រក្នុងមួយម៉ោង ប៉ុន្តែល្បឿនខ្យល់អាចនឹងកើនឡើងខ្លាំងជាងនេះ។ ប្រជាពលរដ្ឋ រាប់រយនាក់ រថយន្តដឹកទំនិញ និងពាណិជ្ជករ ត្រូវបានជាប់ក្នុងនាវាចម្លងក្នុងស្រុក ម៉ុនក្លា(Mongla) កាលពីថ្ងៃអាទិត្យ ក្រោយក្រុមអាជ្ញាធរផ្អាកការឆ្លងកាត់ខណៈព្យុះរីម៉ាល់ មកដល់។ក្រុមអ្នកព្យាករណ៍អាកាសធាតុ បានព្យាករណ៍ថា មានខ្យល់បោកបក់ក្នុងល្បឿន ១៣០ គីឡូម៉ែត្រក្នុងមួយម៉ោង ដោយមានភ្លៀងធ្លាក់ខ្លាំង ហើយខ្យល់ក៏កំពុងបក់បោកទៅលើប្រទេសឥណ្ឌាជិតខាងផងដែរ។ក្រុមអាជ្ញាធរបានដំឡើងសញ្ញាគ្រោះថ្នាក់ដល់កម្រិតខ្ពស់បំផុត។ ប្រទេសឥណ្ឌា ត្រៀមទប់ទល់ព្យុះស៊ីក្លូនដំបូង នៅឆ្នាំនេះ ខណៈព្យុះរីម៉ាល់ បោះពួយក្នុងល្បឿន១២០គីឡូម៉ែត្រក្នុងមួយម៉ោង។ គួររម្លឹកថា ព្យុះស៊ីក្លូន ធ្លាប់បានសម្លាប់មនុស្សរាប់សែននាក់ក្នុងប្រទេសបង់ក្លាដែសក្នុងរយៈពេលប៉ុន្មានទសវត្សរ៍ថ្មីៗនេះ ប៉ុន្តែចំនួននៃព្យុះកំបុតត្បូងដ៏បំផ្លិចបំផ្លាញ ដែលវាយប្រហារឆ្នេរសមុទ្រមានប្រជាជនរស់នៅយ៉ាងច្រើន បានកើនឡើងយ៉ាងខ្លាំងពីមួយឆ្នាំទៅមួយឆ្នាំពិសេស៣ឆ្នាំចុងក្រោយ ដោយសារឥទ្ធិពលនៃបម្រែបម្រួលអាកាសធាតុ៕

បណ្ដាញសង្គម

ព័ត៌មានថ្មីៗ

នាយករដ្ឋមន្រ្តីអង់គ្លេសធ្វើដំណើរដល់ទីក្រុង Abu Dhabi អំឡុងដំណើរទស្សនៈកិច្ចនៅតំបន់ឈូងសមុទ្រ

អេស្ប៉ាញថ្កោលទោសការវាយប្រហាររបស់អ៊ីស្រាអែលលើលីបង់ ខណៈចង់បើកស្ថានទូតឡើងវិញនៅទីក្រុងតេអេរ៉ង់

អ៊ីតាលីនិយាយថា EUគួរគិតគូរពីការផ្អាកច្បាប់ថវិកា បើសិនជាវិបត្តិសង្រ្គាមអ៊ីរ៉ង់នៅបន្តមាន

ប៉ាគីស្ថាននិយាយថា ការវាយប្រហាររបស់អ៊ីស្រាអែលលើលីបង់ បំផ្លាញកិច្ចខិតខំប្រឹងប្រែងសន្តិភាពក្នុងតំបន់

អារ៉ាប់រួម និងគូវ៉ែត ប្រឈមនឹងការបាញ់មីស៊ីលរបស់អ៊ីរ៉ង់ ប៉ុន្មានម៉ោង បន្ទាប់ពីបទឈប់បាញ់ចូលជាធរមាន

ចិនជំរុញឲ្យមានវិធានការការពារបុគ្គលិកផ្នែកមនុស្សធម៌ និងអង្គការសហប្រជាជាតិ

ប៉ាគីស្ថានប្រកាសថ្ងៃឈប់សម្រាកនៅទីក្រុងអ៊ីស្លាម៉ាបាដ មុនកិច្ចចរចារវាងអាមេរិក និងអ៊ីរ៉ង់

MF ធនាគារពិភពលោក និងកម្មវិធីស្បៀងអាហារពិភពលោករបស់UNថា សង្គ្រាមកំពុងបង្កើនអសន្តិសុខស្បៀង

អាហ្វហ្គានីស្ថាន និងប៉ាគីស្ថាន យល់ព្រមស្វែងរកដំណោះស្រាយមួយ បន្ទាប់ពីប្រយុទ្ធគ្នាជាច្រើនសប្តាហ៍

សមាជិកព្រឹទ្ធសភាអាមេរិកជំរុញឲ្យសភាតៃវ៉ាន់អនុម័តផែនការជាប់គាំង លើការចំណាយការពារដែនកោះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877