BTV NEWS

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

ត្រឹមថ្ងៃទី១៩កក្កដា សមត្ថកិច្ចរាជធានី-ខេត្ត បង្រ្កាបករណីឆបោកតាមប្រព័ន្ធបច្ចេកវិទ្យា ៥២ទីតាំង ឃាត់ខ្លួនជនសង្ស័យ ២.៧៦៧ នាក់ មានជនជាតិចិនចំនួន ៨៤៣នាក់

សន្តិសុខ និង សង្គម

រដ្ឋមន្ត្រីការបរទេសរុស្ស៊ី មកដល់ប្រទេសចិន ដើម្បីពិភាក្សាអំពីសង្គ្រាមនៅអ៊ុយក្រែន និងបញ្ហាអាស៊ី-ប៉ាស៊ីហ្វិក

ក្រសួងការបរទេសរុស្ស៊ី បានឲ្យដឹងនៅថ្ងៃចន្ទនេះថា ប្រមុខការទូតរបស់រុស្ស៊ីលោក សឺហ្គេ ឡាវរ៉ូវ (Sergei Lavrov) បានមកដល់ប្រទេសចិនហើយ សម្រាប់អ្វីដែលទីក្រុងមូស្គូ បាននិយាយថា ជាការពិភាក្សាអំពី សង្គ្រាមនៅអ៊ុយក្រែន ទំនាក់ទំនងទ្វេភាគី និងស្ថានភាពនៅក្នុងតំបន់អាស៊ីប៉ាស៊ីហ្វិក។ទីក្រុងម៉ូស្គូ បាននិយាយមុននេះថា រដ្ឋមន្ត្រីការបរទេសរុស្ស៊ី នឹងពិភាក្សាជាមួយសមភាគីចិនលោក វ៉ាង យី (Wang Yi) លើប្រធានបទសំខាន់ៗជាបន្តបន្ទាប់ ដែលនឹងរួមបញ្ចូលផងដែរនូវកិច្ចសហប្រតិបត្តិការរួមគ្នា នៅក្នុងអង្គការអន្តរជាតិ ដូចជាអង្គការសហប្រជាជាតិ និងក្រុមប្រទេស G20។ សារព័ត៌មានរ៉យទ័រ បានរាយការណ៍កាលពីខែមុនថា ប្រធានាធិបតីរុស្ស៊ីលោក វ្ល៉ាឌីមៀ ពូទីន នឹងធ្វើដំណើរទៅកាន់ប្រទេសចិន ក្នុងខែឧសភា ដើម្បីពិភាក្សាជាមួយប្រធានាធិបតីចិន លោក ស៊ី ជីនពីង ជាអ្វីដែលអាចជាដំណើរទៅក្រៅប្រទេសលើកដំបូងរបស់ប្រមុខវិមានក្រឹមឡាំងនៃអាណត្តិប្រធានាធិបតីថ្មីរបស់ខ្លួន។ទីក្រុងមូស្គូ និងទីក្រុងប៉េកាំង បានប្រកាសភាពជាដៃគូ «គ្មានដែនកំណត់» នៅក្នុងខែកុម្ភៈ ឆ្នាំ ២០២ នៅពេលដែលលោក ពូទីន ធ្វើទស្សនកិច្ចនៅទីក្រុងប៉េកាំង ប៉ុន្មានថ្ងៃមុនពេលដែលរុស្ស៊ីចាប់ផ្តើមការលុកលុយពេញទំហឹងរបស់ខ្លួនលើអ៊ុយក្រែន ដែលបង្កឲ្យមានសង្រ្គាមទឹកធ្លីបណ្តាលឲ្យមនុស្សស្លាប់ច្រើនបំផុត នៅអឺរ៉ុប ចាប់តាំងពីសង្គ្រាមលោកលើកទី២។ដោយរងទណ្ឌកម្មដែលបានបិទការចូលទៅកាន់ទីផ្សារលោកខាងលិច និងហិរញ្ញវត្ថុ បន្ទាប់ពីបញ្ជូនទ័ពទៅអ៊ុយក្រែន រុស្ស៊ី បានក្លាយជាដៃគូពាណិជ្ជកម្ម ដែលមានកំណើនលឿនបំផុតរបស់ចិន។នៅក្នុងការហៅទូរស័ព្ទជាមួយលោកពូទីនកាលពីខែមុន លោកស៊ី បាននិយាយថា ភាគីទាំងពីរ គួរតែប្រឆាំងដាច់ខាតការជ្រៀតជ្រែកក្នុងកិច្ចការក្នុងស្រុកដោយកងកម្លាំងខាងក្រៅ ដែលជាការសំដៅជាក់ ស្តែងចំពោះសហរដ្ឋអាមេរិក។អនុរដ្ឋមន្ត្រីការបរទេសចិន លោក Sun Weidong បាននិយាយថា ទំនាក់ទំនងទ្វេភាគី គឺ «ល្អបំផុតក្នុងប្រវត្តិសាស្ត្រ» នៅពេលដែលខ្លួន បានជួបសមភាគីរុស្ស៊ី នៅទីក្រុងមូស្គូកាលពីខែមុន នេះបើយោងតាមសេចក្តីថ្លែងការណ៍របស់ក្រសួងការបរទេសចិន។

អ្នកសារព័ត៌មានប៉ាឡេស្ទីនទទួលសិទ្ធិជ្រកកោននៅអង់គ្លេស ត្រូវបានចោទប្រកាន់ពីសើចចំអកចំណាប់ថ្នូរអ៊ីស្រាអែល

អ្នកសារព័ត៌មានជនជាតិប៉ាឡេស្ទីនម្នាក់ ដែលបានភៀសខ្លួនទៅអង់គ្លេស បន្ទាប់ពីបានលាតត្រដាងអំពើពុករលួយ នៅតំបនហ្កាហ្សា ត្រូវបានគេចោទប្រកាន់ថា បានសើចចំអកចំណាប់ថ្នូរអ៊ីស្រាអែល នៅលើប្រព័ន្ធផ្សព្វផ្សាយសង្គម។អ្នកស្រី Hajar Harb ត្រូវបានគេផ្តល់ឲ្យស្នាក់នៅក្នុងចក្រភពអង់គ្លេស បន្ទាប់ពីបានធ្វើដំណើរទៅប្រទេសអង់គ្លេស បន្ទាប់ពីការប្តឹងឧទ្ធរណ៍ដោយជោគជ័យរបស់ខ្លួនក្នុងឆ្នាំ ២០១៩ ប្រឆាំងនឹងការកាត់ទោសដាក់ពន្ធនាគារនិងពិន័យជាប្រាក់យ៉ាងច្រើនលើរូបអ្នកស្រី ដោយតុលាការនៅតំបន់ហ្កាហ្សា។ពីទីក្រុងឡុងដ៍ អ្នកស្រី Harb បានចូលរួមចំណែកដល់ប្រព័ន្ធផ្សព្វផ្សាយដូចជា សារព័ត៌មាន Washington Post ដែលបាននិពន្ធជាបន្តបន្ទាប់អំពីស្ថានភាពរបស់ប្រជាជនប៉ាឡេស្ទីន នៅតំបន់ហ្កាហ្សា និងការស្លាប់របស់ជនស៊ីវិល និងអ្នកសារព័ត៌មាន។ប៉ុន្តែអ្នករិះគន់ បានអះអាងថា អ្នកស្រីបានប្រើជំហររបស់ខ្លួន នៅលើប្រព័ន្ធផ្សព្វផ្សាយសង្គម ដើម្បីចំអកដល់ជនរងគ្រោះនៃការវាយប្រហារថ្ងៃទី ៧ តុលា របស់ក្រុមភេរវជនលើអ៊ីស្រាអែល។យុទ្ធនាការសម្រាប់ភាពត្រឹមត្រូវក្នុងការរាយការណ៍ និងការវិភាគមជ្ឈិមបូព៌ា (កាមេរ៉ា) ដែលបានជំរុញឲ្យ ទទួលបានព័ត៌មាន«ត្រឹមត្រូវ និងតុល្យភាព»អំពីអ៊ីស្រាអែល បានបញ្ចេញការបង្ហោះរបស់អ្នកស្រី Harb ដែលបានបោះពុម្ពផ្សាយ ជាអ្វីដែលហាក់ដូចជាការបង្ហាញគួរឲ្យសង្ស័យ បន្ទាប់ពីការវាយប្រហារភ្លាមៗនោះ។

ម៉ិកស៊ិក ផ្អាកទំនាក់ទំនងជាមួយអេក្វាឌ័រ បន្ទាប់ពីស្ថានទូតត្រូវបានសម្រុកចូលដោយបង្ខំ

អាជ្ញាធរអេក្វាឌ័រ បានចាប់ខ្លួនអតីតអនុប្រធានាធិបតីអេក្វាឌ័រ លោក ហ័រហេ ក្លាស (Jorge Glas) កាលពីល្ងាចថ្ងៃសុក្រ (០៥ មេសា) ដោយបានសម្រុកចូលចាប់ខ្លួនលោកពីក្នុងស្ថានទូតម៉ិកស៊ិក ដែលជំរុញឱ្យម៉ិកស៊ិក ផ្អាកទំនាក់ទំនងទ្វេភាគី។លោក ក្លាស វ័យ ៥៤ ឆ្នាំដែលត្រូវបានកាត់ទោសពីបទពុករលួយចំនួនពីរដង បានពួននៅក្នុងស្ថានទូតម៉ិកស៊ិកក្នុងរដ្ឋធានីគីតូ ចាប់តាំងពីការស្វែងរកសិទ្ធិជ្រកកោននយោបាយនៅក្នុងខែធ្នូ ដោយជាសំណើដែលម៉ិកស៊ិក បានយល់ព្រមកាលពីថ្ងៃសុក្រ។ ប្រធានាធិបតីម៉ិកស៊ិក លោក អាន់ដ្រេស ម៉ានូអ៊ែល ឡូប៉េស អូប្រាដ័រ (Andres Manuel Lopez Obrador) បានបង្ហោះនៅលើគេហទំព័របណ្ដាញសង្គម X ថា នគរបាលបានសម្រុកចូលទៅក្នុងស្ថានទូតម៉ិកស៊ិក ក្នុងទីក្រុងគីតូ ដោយបង្ខំ នៅមុនពេលការចាប់ខ្លួននោះ។នៅក្នុងសេចក្តីថ្លែងការណ៍មួយ ប្រធានាធិបតីអេក្វាឌ័របានចោទប្រកាន់ម៉ិកស៊ិកថា «បានរំលោភលើអភ័យឯកសិទ្ធិ និងសិទ្ធិពិសេសដែលផ្តល់ដល់បេសកកម្មការទូត ដែលលាក់ទុកអតីតអនុប្រធានាធិបតី និងការផ្តល់សិទ្ធិជ្រកកោនការទូតដែលផ្ទុយនឹងក្របខ័ណ្ឌច្បាប់សាមញ្ញ»។ប្រធានាធិបតីម៉ិកស៊ិកនិយាយថា លោកបានណែនាំរដ្ឋមន្ត្រីការបរទេសម៉ិកស៊ិក លោកស្រី អាលីសៀ បាសេណា (Alicia Barcena) ឱ្យផ្អាកទំនាក់ទំនងការទូតជាមួយអេក្វាឌ័រ ដោយហៅការចាប់ខ្លួននេះថាជាទង្វើ «ផ្តាច់ការ» និងការរំលោភលើច្បាប់អន្តរជាតិ និងអធិបតេយ្យភាពរបស់ម៉ិកស៊ិក៕

ជនស៊ីវិល ២៥ នាក់ត្រូវបានសម្លាប់ក្នុងការវាយប្រហាររបស់កងជីវពលនៅភាគខាងកើតកុងហ្គោ

ចំនួនអ្នកស្លាប់ដោយសារការវាយប្រហារនៅក្នុងភូមិមួយក្នុងខេត្ត អ៊ីទូរី (Ituri) ភាគខាងកើតនៃសាធារណរដ្ឋប្រជាធិបតេយ្យកុងហ្គោ បានកើនឡើងដល់ ២៥ នាក់កាលពីថ្ងៃអាទិត្យ (០៧ មេសា) បន្ទាប់ពីអ្នកនាំពាក្យរដ្ឋាភិបាល និងឯកសាររបស់អង្គការសហប្រជាជាតិបានបញ្ជាក់ពីការវាយប្រហារកាលពីថ្ងៃសៅរ៍។របាយការណ៍បានឱ្យដឹងថា ក្រុមសហករណ៍ដើម្បីការអភិវឌ្ឍកុងហ្គោ (CODECO) ដែលជាកងជីវពលមួយក្នុងចំណោមកងជីវពលជាច្រើនដែលកំពុងប្រតិបត្តិការនៅតំបន់ភាគខាងកើតដែលគ្របដណ្ដប់ដោយជម្លោះ បានធ្វើការសម្លាប់នៅក្នុងភូមិ ហ្កាឡាយី (Galayi) ចម្ងាយ ៧០ គីឡូម៉ែត្រ ភាគពាយព្យនៃទីក្រុង ប៊ូនៀ (Bunia)។លោក បានហ្សាឡា ដាននី (Banzala Danny) ប្រធានតំបន់ និងលោក វីតាល ទុងហ្គូលូ (Vital Tungulo) មេដឹកនាំសង្គមស៊ីវិលបានប្រាប់សារព័ត៌មានរ៉យទ័រ ថាសាកសពចំនួន ១៥ នាក់ត្រូវបានគេរកឃើញកាលពីថ្ងៃអាទិត្យ បន្ថែមពីលើសាកសពចំនួន ១០ នាក់ដែលត្រូវបានរកឃើញកាលពីថ្ងៃសៅរ៍។ក្រុមកងជីវពល សហករណ៍ដើម្បីការអភិវឌ្ឍកុងហ្គោ CODECO និងកងកម្លាំងប្រជាធិបតេយ្យសម្ព័ន្ធមិត្ត (ADF) ដែលជាក្រុមជីវពលមួយទៀត ទទួលខុសត្រូវចំពោះការសម្លាប់ជនស៊ីវិលភាគច្រើននៅភាគខាងកើតសាធារណរដ្ឋប្រជាធិបតេយ្យកុងហ្គោ នេះបើយោងតាមរបាយការណ៍របស់បេសកកម្មរក្សាសន្តិភាពរបស់អង្គការសហប្រជាជាតិចេញផ្សាយក្នុងខែមីនា៕

ពលរដ្ឋហុងគ្រី រាប់ម៉ឺននាក់ចេញតវ៉ាប្រឆាំងនឹងរដ្ឋាភិបាលរបស់លោកនាយករដ្ឋមន្រ្តី Orban

មនុស្សរាប់ម៉ឺននាក់ បានចេញតវ៉ាប្រឆាំងនឹងរដ្ឋាភិបាលរបស់លោកនាយករដ្ឋមន្រ្តីហុងគ្រី វីកទ័រ អ័របាន (Viktor Orban) នៅកណ្តាលរដ្ឋធានី ប៊ុយដាប៉ែស (Budapest) កាលពីថ្ងៃសៅរ៍ (០៦ មេសា) ដឹកនាំដោយមេធាវីម្នាក់ ដែលធ្លាប់ស្និទ្ធនឹងរដ្ឋបាលលោក អ័របាន និងដែលទើបបង្កើតចលនានយោបាយមានគោលបំណងប្រកួតប្រជែងជាមួយនាយករដ្ឋមន្ត្រីរូបនេះ។ក្រុមអ្នកតវ៉ាបានដើរដង្ហែទៅកាន់សភាក្នុងអាកាសធាតុនិទាឃរដូវក្តៅខុសពីធម្មតា ដោយអ្នកខ្លះស្រែកថា «យើងមិនខ្លាចទេ» និង «លោក អ័របាន ត្រូវតែលាលែងពីតំណែង!» ខណៈមនុស្សជាច្រើនបានស្លៀកពាក់ពណ៌តំណាងជាតិ គឺក្រហម-ស-បៃតង ឬកាន់ទង់ជាតិ ដោយជានិមិត្តសញ្ញាដែលគណបក្សរបស់លោក អ័របាន ប្រើជារបស់បក្សអស់រយៈពេលពីរទសវត្សរ៍កន្លងមក។ការហែក្បួនតវ៉ានេះត្រូវបានដឹកនាំដោយលោក ភីធើ ម៉េកយ៉ា (Peter Magyar) វ័យ ៤៣ ឆ្នាំដែលធ្លាប់បានរៀបការជាមួយអតីតរដ្ឋមន្ត្រីយុត្តិធម៌របស់លោក អ័របាន គឺលោកស្រី ជូឌីត វ៉ាហ្កា (Judit Varga) ហើយបានចាប់ផ្តើមគណបក្សរបស់ខ្លួនដើម្បីប្រឆាំងនឹងលោក អ័របាន។យោងតាមទិន្នន័យស្ទង់មតិដោយស្ថានប័នស្រាវជ្រាវ មេដ្យាន (Median) ដែលត្រូវបានចេញផ្សាយដោយសារព័ត៌មានប្រចាំសប្តាហ៍ HVG នៅពាក់កណ្តាលខែមីនា បានបង្ហាញថា អ្នកបោះឆ្នោត ៦៨ ភាគរយបានដឹងឮពីការចូលប្រឡូកក្នុងវិស័យនយោបាយរបស់លោក ម៉េកយ៉ា ហើយចំនួន ១៣ ភាគរយនៃអ្នកទាំងនោះបាននិយាយថាពួកគេទំនងជាគាំទ្រគណបក្សរបស់លោក៕

អ្នករស់នៅក្រុង រ៉ាហ្វា កំពុងប្រឈមនឹងវិបត្តិមនុស្សធម៌ធ្ងន់ធ្ងរ ខណៈជម្លោះមានរយៈពេលប្រាំមួយខែ

សង្គ្រាមនៅតំបន់ហ្កាហ្សា ដែលមានរយៈពេល ៦ ខែហើយឈានចូលខែទី៧ របស់ខ្លួន បានធ្វើឱ្យជនស៊ីវិលប៉ាឡេស្ទីនជាងមួយលាននាក់ ដែលបានជ្រៀតចូលជ្រកទៅក្នុងទីក្រុងរ៉ាហ្វា (Rafah) ភាគខាងត្បូងហ្កាហ្សា កំពុងប្រឈមនឹងវិបត្តិមនុស្សធម៌ធ្ងន់ធ្ងរ ហើយត្រូវបានបង្ខំឱ្យជម្លៀសខ្លួនបន្ថែមទៀតទៅចុងភាគខាងត្បូងដោយសារការទម្លាក់គ្រាប់បែក និងការវាយលុកជើងគោកដែលរំពឹងទុករបស់អ៊ីស្រាអែល។ភ្នាក់ងាររបស់អង្គការសហប្រជាជាតិកំពុងរាយការណ៍ថា ជាមធ្យមមានមនុស្ស ៨៥០ នាក់កំពុងប្រើបង្គន់មួយរួមគ្នា និងមនុស្ស ៣.៦០០ នាក់ប្រើបន្ទប់ទឹកមួយរួមគ្នានៅទីក្រុងរ៉ាហ្វា។ អ្នកជម្លៀសខ្លួនកំពុងព្យាយាមអស់ពីសមត្ថភាពដើម្បីចិញ្ចឹមជីវិតដោយប្រមូលតង់ ក្រណាត់ ភួយ និងសំណល់ផ្សេងៗពីការដ្ឋានសំណង់ ដើម្បីសាងសង់ជម្រកបណ្តោះអាសន្នរបស់ពួកគេផ្ទាល់។នាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាយ៊ូ (Benjamin Netanyahu) ថ្មីៗនេះបាននិយាយថា ការត្រៀមលក្ខណៈសម្រាប់ការវាយលុកនៅក្រុងរ៉ាហ្វា កំពុងចាប់ផ្ដើមដំណើរការ។ ប៉ុន្តែតាមពិត ការវាយប្រហារតាមអាកាសរបស់កងទ័ពអ៊ីស្រាអែល ការបាញ់ផ្លោងកាំភ្លើងធំ និងប្រតិបត្តិការយោធាផ្សេងទៀត សំដៅទៅលើទីក្រុង រ៉ាហ្វា មិនដែលបញ្ឈប់ឡើយ។លំនៅឋានជាច្រើនខ្នងរបស់ជនជាតិប៉ាឡេស្ទីននៅក្រុង រ៉ាហ្វា ត្រូវបានបំផ្លាញដោយកងកម្លាំងអ៊ីស្រាអែល។ ស្ថានការណ៍នៅហ្កាហ្សា ដូចជានៅឋាននរក ដោយប្រព័ន្ធថែទាំសុខភាពរបស់តំបន់ហ៊ុមព័ទ្ធនេះកំពុងជិតដួលរលំ ដោយសារតែការវាយប្រហាររបស់អ៊ីស្រាអែលម្តងហើយម្តងទៀត ដែលរារាំងការចូលនៃបរិក្ខារ និងបុគ្គលិកពេទ្យ៕

WHO៖ យេម៉ែន ប្រឈមនឹងវិបត្តិសុខភាព ខណៈមនុស្សរាប់លាននាក់ខ្វះលទ្ធភាពទទួលបានការថែទាំចាំបាច់

ស្ថាប័នអង្គការសុខភាពពិភពលោក (WHO) របស់អង្គការសហប្រជាជាតិ បាននិយាយកាលពីថ្ងៃអាទិត្យ(០៨ មេសា) ថា ជម្លោះប្រដាប់អាវុធដ៏អូសបន្លាយរបស់ប្រទេសយេម៉ែន បានធ្វើឱ្យប្រព័ន្ធសុខភាពរបស់ប្រទេសនេះខូចខាតយ៉ាងធ្ងន់ធ្ងរ ដែលធ្វើឱ្យមនុស្ស ១៧,៨ លាននាក់ត្រូវការជំនួយបន្ទាន់ផ្នែកសុខភាព។នៅក្នុងការប្រារព្ធទិវាសុខភាពពិភពលោកឆ្នាំ២០២៤ អង្គការសុខភាពពិភពលោកបាននិយាយថា ខ្លួនកំពុងធ្វើការដើម្បីធានាថាប្រជាជនយេម៉ែន រាប់លាននាក់អាចទទួលបានសេវាសុខភាពសំខាន់ៗ។ យោងតាមទិន្នន័យថ្មីៗនេះពី WHO បានបង្ហាញថា មានស្ត្រីចំនួន ២៤ ភាគរយនៃបុគ្គលចំនួន ១៧,៨ លាននាក់ដែលត្រូវការជំនួយផ្នែកសុខភាព ហើយកំពុងត្រូវការសេវាសុខភាពបន្តពូជយ៉ាងចាំបាច់។ទន្ទឹមនឹងនេះ ចំនួន ៥០ ភាគរយដែលរួមមានកុមារជាង ៥០០.០០០ នាក់មានអាយុក្រោម ៥ ឆ្នាំ កំពុងត្រូវការការព្យាបាលជាបន្ទាន់សម្រាប់កង្វះអាហារូបត្ថម្ភធ្ងន់ធ្ងរ។ លើសពីនេះទៀត ១០ ភាគរយនៃកុមារតូចៗក្នុងចំណោមនោះកំពុងជួបប្រទះនូវផលវិបាកធ្ងន់ធ្ងរ ដែលត្រូវការការថែទាំនៅមន្ទីរពេទ្យដែលពឹងផ្អែកខ្លាំង។ប្រទេសយេម៉ែន បានជាប់គាំងនៅក្នុងជម្លោះស៊ីវិលដែលអូសបន្លាយតាំងពីឆ្នាំ២០១៤ មកនៅពេលដែលក្រុមឧទ្ទាមហ៊ូទី (Houthis) ដណ្តើមកាន់កាប់រដ្ឋធានីសាណា។ ក្នុងឆ្នាំ ២០១៥ សម្ព័ន្ធយោធាដឹកនាំដោយអារ៉ាប៊ីសាអ៊ូឌីត បានធ្វើអន្តរាគមន៍ក្នុងការប៉ុនប៉ងដើម្បីស្តាររដ្ឋាភិបាលឡើងវិញ ប៉ុន្តែទោះជាមានចំណាត់ការផ្នែកការទូតក៏ដោយ ក៏នៅតែមិនអាចដោះស្រាយវិបត្តិដែលប្រទេសនេះកំពុងជួបប្រទះបាន៕

មន្ត្រីនិយាយថា គ្រោះមហន្តរាយលិចទូក បានឆក់យកជីវិតមនុស្សជាង៩០នាក់ នៅម៉ូហ្សំប៊ិក

ក្រុមអាជ្ញាធរក្នុងតំបន់ បាននិយាយថា មនុស្សជាង៩០ នាក់បានស្លាប់ បន្ទាប់ពីទូកមួយគ្រឿងបានលិចនៅឆ្នេរសមុទ្រភាគខាងជើងរបស់ប្រទេសម៉ូហ្សំប៊ិក។ មន្ត្រីនៅក្នុងខេត្តណាំពូឡា(Nampula) បាននិយាយថា មនុស្ស ៥ នាក់ត្រូវបានជួយសង្គ្រោះ ក្នុងចំណោមមនុស្សប្រហែល ១៣០ នាក់ដែលត្រូវបានគេជឿថាបាននៅលើទូកនោះ។លោក ជេម ណេតូ (Jaime Neto )រដ្ឋមន្ត្រីការបរទេស ប្រចាំខេត្ត នេះ បាននិយាយថា ពួកគេកំពុងរត់គេចពីការផ្ទុះជំងឺអាសន្នរោគ ដោយលោកបានបន្ថែមថា កុមារជាច្រើននាក់ស្ថិតក្នុងចំណោមអ្នកស្លាប់ទាំងនោះដែរ។ លោក Neto បាននិយាយថា ដោយសារទូកនោះផ្ទុកមនុស្សច្រើនពេក ហើយមិនស័ក្តិសមក្នុងការដឹកអ្នកដំណើរទេ ទើបណ្ដាលឲ្យទូកនោះលិច។ វីដេអូ ដែលមិនបានផ្ទៀងផ្ទាត់ត្រូវបានគេបង្ហោះលើប្រព័ន្ធផ្សព្វផ្សាយសង្គម បានបង្ហាញសាកសពរាប់សិបនាក់រណូករណែលលើឆ្នេរ។ទូកនេះទំនងជាធ្វើដំណើរពីកោះ Luga ទៅកោះប្រទេសម៉ូហ្សំប៊ិក(Mozambique) ក្បែរឆ្នេរ Nampula។Nampula គឺជាខេត្តមួយដែលរងផលប៉ះពាល់យ៉ាងធ្ងន់ធ្ងរបំផុតដោយការផ្ទុះជំងឺអាសន្នរោគ ដែលបានរីករាលដាលលើប្រទេសជាច្រើននៅអាហ្វ្រិកខាងត្បូងចាប់តាំងពីខែមករាឆ្នាំមុន។យោងតាមអង្គការ Unicef ការផ្ទុះឡើងនាពេលបច្ចុប្បន្នគឺធ្ងន់ធ្ងរបំផុតក្នុងរយៈពេល ២៥ ឆ្នាំ។ ចាប់តាំងពីខែតុលាឆ្នាំ ២០២៣មក ប្រទេសម៉ូហ្សំប៊ិកបានរាយការណ៍ថាមានករណីឆ្លងដែលបានបញ្ជាក់ចំនួន ១៣.៧០០ នាក់ និងមានអ្នកស្លាប់ចំនួន ៣០នាក់ ៕

ប្រជាជនអ៊ីស្រាអែល រាប់ពាន់នាក់ប្រមូលផ្តុំគ្នា ទាមទារឲ្យមានការដោះលែងចំណាប់ថ្នូរ បន្ទាប់ពីសង្រ្គាមរយៈពេល៦ខែ

ក្រុមបាតុកររាប់ពាន់នាក់ បានមកប្រមូលផ្តុំគ្នានៅទីក្រុងហ្សេរុយសាឡឹម កាលពីថ្ងៃអាទិត្យ ទាមទារឱ្យមានការដោះលែងចំណាប់ថ្នូរប្រហែល១៣០នាក់ ដែលនៅតែត្រូវបានឃុំខ្លួនក្នុងតំបន់ហ្សា បន្ទាប់ពីរយៈពេលប្រាំមួយខែនៃសង្គ្រាមអ៊ីស្រាអែលប្រឆាំងក្រុមហាម៉ាស។ នៅក្នុងទីក្រុង Tel Aviv មានការដុតទៀនបំភ្លឺ សម្រាប់ចំណាប់ថ្នូរ។យោងតាមក្រុមអ្នកជំនាញរបស់អង្គការសហប្រជាជាតិបានឲ្យដឹងថា ខ្មាន់កាំភ្លើងក្រុមហាម៉ាស បានសម្រុកចូលក្នុងទឹកដីអ៊ីស្រាអែលកាលពីថ្ងៃទី ៧ ខែតុលា ដោយបានសម្លាប់មនុស្សចំនួន ១.២០០ នាក់នៅក្នុងលំនៅឋានរបស់ពួកគេ នៅមូលដ្ឋានកងទ័ព និងនៅតាមដងផ្លូវ ព្រមទាំងបានបង្កអំពើហិង្សាផ្លូវភេទលើជនរងគ្រោះមួយចំនួន។ នាង Michal Nachshon អាយុ ៣៩ ឆ្នាំ ដែលបានធ្វើដំណើរពីទីក្រុង Tel Aviv ទៅតវ៉ានៅខាងក្រៅសភារបស់អ៊ីស្រាអែល បាននិយាយថា ពិភពលោកត្រូវតែក្រោកឈរឡើង ហើយនាំយកចំណាប់ថ្នូរត្រឡប់មកវិញ។ វាលើសពីបញ្ហានយោបាយ វាលើសពីបញ្ហាសាសនា វាជាបញ្ហាមនុស្សធម៌ ហើយនោះជាអ្វីដែលយើងមកទីនេះ ដើម្បីស្រែកតវ៉ានៅថ្ងៃនេះ។ខណៈឪពុកម្តាយចំណាប់ថ្នូរមួយចំនួននៅក្នុងការប្រមូលផ្តុំ កាលពីថ្ងៃអាទិត្យបានអំពាវនាវឱ្យនាយករដ្ឋមន្ត្រី លោក Benjamin Netanyahu ធ្វើការបន្ថែមទៀតដើម្បីនាំយកចំណាប់ថ្នូរត្រឡប់មកផ្ទះវិញ ខណៈមនុស្សភាគច្រើនបានរក្សាសារនយោបាយ ដោយផ្តោតលើការឈឺចាប់របស់ពួកគេ និងតម្រូវការបន្ទាន់ដើម្បីនាំយកមនុស្សជាទីស្រលាញ់ត្រឡប់មកវិញ។ ក្នុងរយៈពេលប៉ុន្មានសប្តាហ៍កន្លងទៅនេះ ការតវ៉ាប្រឆាំងរដ្ឋាភិបាលរបស់លោក Netanyahu បានកើនឡើងកាន់តែខ្លាំង ដោយមានអ្នករិះគន់មួយចំនួនចោទប្រកាន់ថា មេដឹកនាំជើងចាស់រូបនេះ បាននឹងកំពុងអូសបន្លាយពេលក្នុងការធានាបានកិច្ចព្រមព្រៀងមួយ ជាការចោទប្រកាន់ដែលលោកបានបដិសេធ។ គណៈរដ្ឋមន្ត្រីរបស់លោក Netanyahu បានប្រឈមមុខទៅនឹងការរិះគន់យ៉ាងខ្លាំង ជុំវិញការបរាជ័យផ្នែកសន្តិសុខកាលពីថ្ងៃទី ៧ ខែតុលា ជាថ្ងៃដែលមានមនុស្សស្លាប់ច្រើនបំផុតរបស់អ៊ីស្រាអែល និងការវាយប្រហារដ៏ឃោឃៅបំផុតលើជនជាតិហ្វីជ្វ ចាប់តាំងពីការសម្លាប់រង្គាលមក។

មនុស្សរាប់រយនាក់ ប្រមូលផ្តុំគ្នានៅក្រុងញូវយ៉ក ដើម្បីទាមទារឱ្យមានការដោះលែងចំណាប់ថ្នូរ

មនុស្សរាប់រយនាក់ បានមកប្រមូលផ្តុំគ្នានៅទីក្រុងញូវយ៉ក កាលពីថ្ងៃអាទិត្យ ទី៧ ខែមេសា ដោយទាមទារឱ្យមានការដោះលែងចំណាប់ថ្នូរប្រហែល ១៣០នាក់ ដែលនៅតែត្រូវបានឃុំខ្លួននៅក្នុងតំបន់ហ្កាហ្សា បន្ទាប់ពីរយៈពេលប្រាំមួយខែនៃសង្គ្រាមអ៊ីស្រាអែលប្រឆាំងក្រុមហាម៉ាស ជាការប្រមូលផ្តុំគ្នាមួយក្នុងចំណោមការប្រមូលផ្តុំជាច្រើន ត្រូវបានធ្វើឡើងនៅក្នុងទីក្រុងធំៗនៅទូទាំងពិភពលោក។ខ្មាន់កាំភ្លើងក្រុមហាម៉ាស បានចាប់ចំណាប់ថ្នូរចំនួន២៥៣នាក់ រួមមានទាំងកុមារ និងមនុស្សចាស់ ជនស៊ីវិល និងទាហានផងដែរ។ ប្រហែលពាក់កណ្តាលនៃពួកគេទាំងអស់នេះ ត្រូវបានដោះលែងជាផ្នែកនៃកិច្ចព្រមព្រៀងបទឈប់បាញ់ភ្លាមៗកាលពីចុងខែវិច្ឆិកា។ កិច្ចចរចានានា ដើម្បីទទួលបានបទឈប់បាញ់មួយផ្សេងទៀតនឹងរួមបញ្ចូលការដោះលែងចំណាប់ថ្នូររាប់សិបនាក់បន្ថែមទៀតនៅសេសសល់ ដែលការចរចា បានបន្តនៅក្នុងប្រទេសអេហ្ស៊ីប កាលពីថ្ងៃអាទិត្យ។ ប៉ុន្តែគ្រួសារចំណាប់ថ្នូរមួយចំនួន មានមន្ទិលសង្ស័យ ដោយការចរចាកាលពីលើកមុន ពុំមានលទ្ធផល ហើយចំណាប់ថ្នូរបាន ស្លាប់ក្នុងការឃុំឃាំង។ទន្ទឹមនឹងនេះ ក្រុមបាតុករក៍បានប្រមូលផ្តុំគ្នានៅទីក្រុងវ៉ាស៊ីនតោនឌី.ស៊ី កាលពីថ្ងៃអាទិត្យ ដើម្បីទាមទារឱ្យមានការដោះលែងចំណាប់ថ្នូរប្រហែល ១៣០ នាក់ដែលនៅតែឃុំខ្លួនក្នុងហ្កាហ្សា បន្ទាប់ពីរយៈពេលប្រាំមួយខែនៃសង្គ្រាមអ៊ីស្រាអែល-ហាម៉ាស។ សមាជិកគ្រួសារចំណាប់ថ្នូរជាច្រើន មានវត្តមាននៅក្នុងការប្រមូលផ្តុំនេះ ។មេដឹកនាំប្រឆាំងអ៊ីស្រាអែល លោក Yair Lapid ដែលស្ថិតនៅក្នុងបាតុកម្មនោះ បានប្រាប់សារព័ត៌មានរ៉យទ័រថា លោកមានផែនការជួបជាមួយរដ្ឋបាល លោក Biden ។ លោក Lapid និយាយថា យើងត្រូវធ្វើអ្វីៗគ្រប់យ៉ាងតាមលទ្ធភាពដែលយើងអាចធ្វើបាន អ្វីៗទាំងអស់ស្ថិតនៅក្នុងអំណាចរបស់យើង ដើម្បីនាំយកចំណាប់ថ្នូរទាំងអស់ត្រឡប់មកលំនៅឋានវិញ។

បណ្ដាញសង្គម

ព័ត៌មានថ្មីៗ

អូស្ត្រាលី ព្រមានថា នឹងពុំមានប៉ាឡេស្ទីន នៅសេសសល់ឱ្យទទួលស្គាល់ទៀតទេ ស្របពេលសង្រ្គាមឥតឈប់ឈរ

ឯកឧត្តម អ៊ុច បូររិទ្ធ អញ្ជើញចុះសួរសុខទុក្ខវីរកងទ័ព រងរបួសក្នុងពេលប្រយុទ្ធជាមួយទ័ពឈ្លានពានថៃ នៅតាមមន្ទីរពេទ្យជាតិចំនួន ៤ ក្នុងរាជធានីភ្នំពេញ

ឯកឧត្ដម ហ៊ុន ម៉ានី៖ «រាជរដ្ឋាភិបាល និងប្រជាជនកម្ពុជាមានភាពជឿជាក់លើកងកម្លាំងប្រដាបអាវុធរបស់យើង»

គិតមកដល់ពេលនេះ ពលករខ្មែរចាកចេញពីថៃមកកម្ពុជាវិញ មានចំនួនប្រមាណ ៥៥ម៉ឺននាក់

[UPDATE] ក្រសួងការពារជាតិ៖ កាលពីម៉ោង ១១ព្រឹក ថ្ងៃទី០៤ ខែសីហា ឆ្នាំ២០២៥ កងកម្លាំងប្រដាប់អាវុធថៃ អមដោយគ្រឿងចក្រធន់ធ្ងន់ដូចជា គ្រឿងចក្រ កាយដី (អេស្កាវ៉ាទ័រ) បានចល័តចូលតំបន់អានសេះ ដែលជាដែនដីអធិបតេយ្យភាពកម្ពុជា

«គណៈកម្មការរៀបចំការប្រឡងប្រជែង និងគ្រប់ភាគីពាក់ព័ន្ធ ប្រឹងប្រែងធានាតម្លាភាពភាពរលូន និងប្រសិទ្ធភាពដើម្បីឆ្លើយតបនឹងជំនឿទុកចិត្តដែលបេក្ខជនគ្រប់ៗរូបផ្តល់ឱ្យ»

ឯកអគ្គរដ្ឋទូតអាមេរិកប្រចាំណាតូ៖ ហូឡង់ទិញសព្វាវុធជាច្រើនរបស់អាមេរិកសម្រាប់អ៊ុយក្រែនជាលើកដំបូង

សន្តិភាពបៃតង ជំរុញសន្ធិសញ្ញាអង្គការសហប្រជាជាតិស្តីពីប្លាស្ទិក «កាត់បន្ថយការផលិតផ្លាស្ទិក»

សប្បុរសជន នាំយកគ្រឿងឧបភោគបរិភោគ និងថវិកាជូនកងទ័ពជួរមុខ

អ៊ុយក្រែននិយាយថា «ទាហានស៊ីឈ្នួល» បរទេស មកពីប្រទេសផ្សេងៗកំពុងជួយរុស្ស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877