BTV NEWS

សម្ដេចតេជោ៖ការពង្រឹងខឿនការពារជាតិមិនសំដៅតែនៅសមរភូមិមុខទេ ត្រូវយកចិត្តទុកដាក់ទំនុកបម្រុងអ្នកសមរភូមិក្រោយជាគ្រួសារយុទ្ធជនជួរមុខ និងអតីតយុទ្ធជន

ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី

ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

សម្តេចធិបតីផ្ញើសារច្បាស់លាស់ និងយ៉ាងម៉ឺងម៉ាត់ដល់អាជ្ញាធរមូលដ្ឋានឱ្យបង្ក្រាប Online Scams ឱ្យទាល់តែអស់ជាដាច់ខាតប្រកបដោយស្មារតីទទួលខុសត្រូវខ្ពស់បំផុត

នយោបាយ និង ការអភិវឌ្ឍន៍

មនី្ទរពេទ្យកុមារជាតិ ដំណើរការចាក់វ៉ាក់សាំងដូសជំរុញ ឬដូសទី៣ ប្រភេទអាស្រ្តាហ្សេនីកា ជូនចំពោះមន្រី្តរាជការស៊ីវិល និងមន្រី្តជាប់កិច្ចសន្យា

ភ្នំពេញ ៖ មនី្ទរពេទ្យកុមារជាតិ ដំណើរការចាក់វ៉ាក់សាំងបង្ការជំងឺកូវីដ-១៩ ដូសជំរុញ ឬដូសទី៣ ប្រភេទអាស្រ្តាហ្សេនីកា ជូនចំពោះមន្រី្តរាជការស៊ីវិល និងមន្រី្តជាប់កិច្ចសន្យា ដែលកំពុងបម្រើការនៅថ្នាក់ជាតិ ដែលបានចាក់វ៉ាក់សាំងស៊ីណូហ្វាម ឬស៊ីណូវ៉ាក់ ដូសទី១ និងដូសទី២រួចរាល់។បើតាមលោកសាស្រ្តាចារ្យវេជ្ជបណ្ឌិត ញឹប អង្គាបុស្ស នាយកមនី្ទរពេទ្យកុមារជាតិ ប្រាប់BTV ព័ត៌មាន នាព្រឹកថ្ងៃទី១២ ខែសីហានេះថា ថ្ងៃនេះមនី្ទរពេទ្យកុមារជាតិ ក៏ដូចជាមនី្ទរពេទ្យដទៃទៀតដែរ បានចាប់ផ្តើមដំណើរការចាក់វ៉ាក់សាំងបង្ការជំងឺកូវីដ-១៩ ដូសទី៣ ប្រភេទអាស្រ្តាហ្សេនីកា ជាវ៉ាក់សាំងជំរុញ សម្រាប់ចាក់ជូនក្រុមប្រឈមមុខខ្ពស់ដែលបានកំណត់ដោយគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស។ជាមួយគ្នានោះដែរ មន្រី្តរាជការស៊ីវិល និងមន្រី្តជាប់កិច្ចសន្យា ដែលកំពុងបម្រើការនៅថ្នាក់ជាតិ បានមកទទួលការចាក់វ៉ាក់សាំងដូសជំរុញ ឬដូសទី៣ ពីក្រុមការងារគ្រូពេទ្យ នៃមនី្ទរពេទ្យកុមារជាតិ បានលើកឡើងស្រដៀងគ្នាថា ការចាក់វ៉ាក់សាំងនេះ ធ្វើឲ្យសុខភាពរបស់ពួកគាត់ល្អ និងរឹងមាំតទៅថ្ងៃមុខបន្តទៀត។ ប្រសិនបើយើងមិនបានចាក់វ៉ាក់សាំងដូសជំរុញ ឬដូសទី៣នោះទេ គឺពួកគាត់មិនអាចការពារ ទប់ទល់ នឹងមេរោគកូវីដ-១៩បាននោះទេ បើទោះបីជាពួកគាត់ឆ្លងកូវីដ-១៩ ក៏មិនអាចឈានដល់ដំណាក់កាលធ្ងន់ធ្ងររហូតដល់បាត់បង់ជីវិតដែរ។ដូច្នេះពួកគាត់សូមគោរពអរគុណដល់ប្រមុខរាជរដ្ឋាភិបាល ជាពិសេសសម្តេចតេជោ ហ៊ុន សែន នាយករដ្ឋមន្រី្ត បានខិតខំស្វះស្វែងរកវ៉ាក់សាំងការពារជំងឺកូវីដ-១៩ មកចាក់ជូនមន្រី្តរាជការស៊ីវិល និងមន្រី្តជាប់កិច្ចសន្យា ដែលកំពុងបម្រើការនៅថ្នាក់ជាតិ និងប្រជាពលរដ្ឋទូទាំងប្រទេស។ជាចុងក្រោយលោកសាស្រ្តាចារ្យវេជ្ជបណ្ឌិត ញឹប អង្គាបុស្ស បានបញ្ជាក់ទៀតថា ទោះបីបានចាក់វ៉ាក់សាំងដូសជំរុញ និងដូសទី៣ រួចហើយក៏ដោយ មិនមែនមានន័យថា មិនឆ្លងមេរោគកូវីដ-១៩នោះទេ គ្រាន់តែវាស្ថិតក្នុងស្ថានភាពការពារកម្រិតខ្ពស់ ឆ្លងហើយមិនវិវត្តន៍ទៅរកសភាពធ្ងន់ធ្ងរ នេះជាចំនុចពិសេសរបស់វ៉ាក់សាំងការពារជំងឺកូវីដ-១៩។ ដូច្នេះដើម្បីទប់ស្កាត់ការឆ្លងវីរុសកូវីដ-១៩នេះ ជាពិសេសប្រភេទដែលតា (Delta) ដែលទើបនឹងឆ្លងចូលមកក្នុងសហគមន៍ នៃប្រទេសកម្ពុជាថ្មីនេះ ចាំបាច់បំផុតបងប្អូនប្រជាពលរដ្ឋចូលរួមចាក់វ៉ាក់សាំងបង្ការជំងឺកូវីដ-១៩ និងអនុវត្តន៍វិធានការ៣កុំ ៣ការពារ ដែលប្រមុខរាជរដ្ឋាភិបាល ក៏ដូចជាក្រសួងសុខាភិបាល បានដាក់ចេញ៕អត្ថបទ រដ្ឋា

សភាកម្ពុជាត្រៀមខ្លួនធ្វើជាម្ចាស់ផ្ទះរៀបចំកិច្ចប្រជុំភាពជាដៃគូរសភាអាស៊ី-អឺរ៉ុប (ASEP) លើកទី១១ នៅពាក់កណ្ដាលខែវិច្ឆិកា ឆ្នាំ២០២១ខាងមុខ

ភ្នំពេញ ៖ ឯកឧត្ដមកិត្តិនីតិកោសលបណ្ឌិត ងួន ញ៉ិល អនុប្រធានទី១ នៃរដ្ឋសភា និងជាប្រធានគណៈកម្មការរៀបចំកិច្ចប្រជុំភាពជាដៃគូរសភាអាស៊ី-អឺរ៉ុប ASEP លើកទី១១ បានអញ្ជើញដឹកនាំកិច្ចប្រជុំគណៈកម្មការរៀបចំកិច្ចប្រជុំ ASEP11 ដើម្បីពិនិត្យពិភាក្សាលើការងារមួយចំនួន សម្រាប់ត្រៀមរៀបចំកិច្ចប្រជុំភាពជាដៃគូរសភាអាស៊ី-អឺរ៉ុប លើកទី១១ ដែលសភាកម្ពុជានឹងត្រូវធ្វើជាម្ចាស់ផ្ទះ នាអំឡុងពាក់កណ្ដាលខែវិច្ឆិកា ឆ្នាំ២០២១ខាងមុខ នៅរាជធានីភ្នំពេញ ព្រះរាជាណាចក្រកម្ពុជា។កិច្ចប្រជុំនាពេលនេះ ធ្វើឡើងតាមប្រព័ន្ធវីដេអូ នាព្រឹកថ្ងៃទី១១ ខែសីហា ឆ្នាំ២០២១នេះ ដោយមានការអញ្ជើញចូលរួមពី ឯកឧត្តម លោកជំទាវ សមាជិក សមាជិកា នៃគណៈកម្មការរៀបចំទាំងអស់ ដោយធ្វើការពិភាក្សា និងត្រួតពិនិត្យលើវឌ្ឍនភាពការងាររបស់អនុគណៈកម្មការទទួលបន្ទុកតាមផ្នែកនីមួយៗ ជាពិសេសអនុគណៈកម្មការទទួលបន្ទុកផ្នែកខ្លឹមសារ និងឯកសារ និងអនុគណៈកម្មការទទួលបន្ទុកផ្នែកព័ត៌មាននិង ICT សំដៅធ្វើយ៉ាងណាឱ្យកិច្ចប្រជុំ ASEP11 ខាងមុខ ប្រព្រឹត្តទៅដោយរលូន និងទទួលបានជោគជ័យ។ឯកឧត្តមកិត្តិនីតិកោសលបណ្ឌិត បានមានប្រសាសន៍ថា រហូតមកដល់ពេលនេះ សម្ដេចប្រធានរដ្ឋសភា សម្ដេចប្រធានព្រឹទ្ធសភា និងសម្ដេចនាយករដ្ឋមន្ត្រី បានឯកភាពជាគោលការណ៍រួចហើយ ឲ្យរៀបចំកិច្ចប្រជុំ (ASEP-11) តាមរយៈអនឡាញ (Online) ឬហៅថាប្រព័ន្ធនិម្មិត (Virtual Meeting) ផ្សាយចេញពីរាជធានីភ្នំពេញ នៅថ្ងៃទី១៦ ខែវិច្ឆិកា ឆ្នាំ២០២១ គឺបានន័យថា កិច្ចប្រជុំ (ASEP-11) ធ្វើមុនកិច្ចប្រជុំកំពូលអាស៊ី-អឺរ៉ុបលើកទី១៣ (ASEM13) របស់រាជរដ្ឋាភិបាលជាងមួយសប្ដាហ៍ប៉ុណ្ណោះ។ឯកឧត្តមកិត្តិនីតិកោសលបណ្ឌិត ងួន ញ៉ិល ក៏បានមានប្រសាសន៍ជំរុញដល់អនុគណៈកម្មការនានា ចំណុះគណៈកម្មការរៀបចំ បន្តធ្វើការងារតាមមុខសញ្ញារៀងៗខ្លួន ជាពិសេស អនុគណៈកម្មការទី៤ (សារព័ត៌មាន និង អាយ ស៊ី ធី) សិក្សាជាមួយអង្គភាពជំនាញនានា សំដៅធ្វើយ៉ាងណា ត្រៀមលក្ខណៈអោយបានគ្រប់ជ្រុងជ្រោយ ដើម្បីធានាអោយកិច្ចប្រជុំតាមប្រព័ន្ធនិម្មិតនេះ ប្រព្រឹត្តទៅដោយរលូន និងជៀសវាងភាពរអាក់រអួល។ ម្យ៉ាងទៀត លេខាធិការដ្ឋានជាតិASEP11 ត្រូវរៀបចំការងារនិងឯកសារនានាពាក់ព័ន្ធកិច្ចប្រជុំ ASEP11 ដោយរាល់ខ្លឹមសារឯកសារទាំងអស់ពាក់ព័ន្ធកិច្ចប្រជុំនេះ ត្រូវដាក់ជូនអនុគណៈកម្មការទី១ ទទួលបន្ទុកខ្លឹមសារនិងឯកសារ ដែលមាន ឯកឧត្ដមកិត្ដិនីតិកោសលបណ្ឌិត ប៉ែន បញ្ញា ជាប្រធាន ធ្វើការពិនិត្យអោយបានគ្រប់ជ្រុងជ្រោយនិងទាន់ពេលវេលា ដើម្បីដាក់ជូនថ្នាក់ដឹកនាំពិនិត្យសម្រេច។ចំពោះលិខិតអញ្ជើញ ដែលសម្តេចប្រធានរដ្ឋសភា និងសម្តេចប្រធានព្រឹទ្ធសភា បានចុះហត្ថលេខារួចហើយ ព្រមទាំងឯកសារពាក់ព័ន្ធនានា ឯកឧត្ដមកិត្តិនីតិកោសលបណ្ឌិត បានណែនាំឲ្យធ្វើការផ្ញើរជូនប្រទេសជាសមាជិកអោយបានឆាប់ គឺត្រូវផ្ញើរចេញអោយបានមុនថ្ងៃទី១៦ ខែសីហា ឆ្នាំ២០២១នេះ ពោលគឺផ្ញើរអោយបានបីខែ មុនកាលបរិច្ឆេទនៃកិច្ចប្រជុំ ដូចដែលធ្លាប់បានអនុវត្តនាពេលកន្លងមក។ឯកឧត្ដមកិត្តិនីតិកោសលបណ្ឌិត ងួន ញ៉ិល ក៏បានស្នើឲ្យក្រុមការងារលេខាធិការដ្ឋាន (ASEP11) បន្តធ្វើទំនាក់ទំនងជាប្រចាំជាមួយក្រសួងការបរទេសនិងសហប្រតិបត្តិការអន្តរជាតិ និងទំនាក់ទំនងជាមួយមន្ត្រីសម្របសម្រួលការងារ ASEP នៅទីក្រុងប៊្រុយស៊ែល ដើម្បីធ្វើយ៉ាងណាឱ្យការរៀបចំកិច្ចប្រជុំនេះ ប្រព្រឹត្តទៅបានរលូន និងទទួលបានជោគជ័យប្រកបដោយកិត្តិយស។សូមជម្រាបជូនថា ការរៀបចំកិច្ចប្រជុំភាពជាដៃគូសភាអាស៊ី-អឺរ៉ុបលើកទី១១ (ASEP11) តាមរយៈអនឡាញ (Online) ឬហៅថាប្រព័ន្ធនិម្មិត (Virtual Meeting) នៅថ្ងៃទី១៦ ខែវិច្ឆិកា ឆ្នាំ២០២១ ខាងមុខ គឺជាលើកទី១ហើយសម្រាប់សភានៃព្រះរាជាណាចក្រកម្ពុជា ក្នុងនាមជាប្រទេសម្ចាស់ផ្ទះ ដែលត្រូវទទួលរៀបចំកិច្ចប្រជុំជាលក្ខណៈអន្តរជាតិតាមរយៈអនឡាញ (Online) បែបនេះ៕

ស្ថានភាពកូវីដ១៩ នៅបាត់ដំបង និងឧត្តរមានជ័យថយចុះ ខណៈបន្ទាយមានជ័យ និងប៉ៃលិន នៅមានតួលេខខ្ពស់

បាត់ដំបង៖ ខេត្តចំនួន៤ នៅជាប់នឹងព្រំដែននៃប្រទេសថៃ មានពលករឆ្លងដែនមកជាប្រចាំថ្ងៃ ក្នុងពេលមុនបិទព្រំដែន គឺមានខេត្តបាត់ដំបង និងខេត្តឧត្តរមានជ័យ នារយៈពេលប៉ុន្មានថ្ងៃចុងក្រោយនេះ ស្ថានភាពការឆ្លងជំងឺកូវីដ១៩ មានការថយចុះគួរឲ្យកត់សម្គាល់ ខណៈខេត្តបន្ទាយមានជ័យ និងខេត្តប៉ៃលិន មានអត្រាឆ្លងច្រើនគួរឲ្យបារម្ភ ។ដោយគិតត្រឹមរយៈពេល២ថ្ងៃ ចុងក្រោយនេះ សម្រាប់ខេត្តបាត់ដំបង អាជ្ញាធរខេត្តបានរកឃើញអ្នកវិជ្ជមានកូវីដ១៩ ក្នុងរង្វង់ពីជាង ៥០នាក់ទៅជាង៨០នាក់ ខណៈដែលនៅចុងខែកក្កដា រហូតដល់ដើមខែសីហា ឆ្នាំ២០២១ បានរកឃើញក្នុងរង្វង់ពីជាង ១០០នាក់ ទៅជាង២០០នាក់ ហើយអ្នកជំងឺកូវីដ១៩ទាំងអស់នោះ ភាគច្រើនពាក់ព័ន្ធព្រឹត្តិការណ៍សហគមន៍២០កម្ភៈ ។យោងតាមរបាយការណ៍របស់រដ្ឋបាល បានឲ្យដឹងថា ចាប់ពីមានការផ្ទុះឆ្លងជំងឺកូវីដ១៩ នៅកម្ពុជា ខេត្តបាត់ដំបងមានឆ្លងជំងឺនេះចំនួន៤៣២៩នាក់ ព្យាបាលជាសះស្បើយចំនួន២៧៨២នាក់ ស្លាប់ចំនួន៥១នាក់ និងកំពុងសម្រាកព្យាបាលចំនួន១៤៩៦នាក់ ។ ការចាក់វ៉ាក់សាំងវិញ គឺ បានចំនួន ៣៧០ ០៥៩នាក់ លើផែនការជាង៧០ម៉ឺននាក់ និងចាក់ដូសទី៣ ជូនមន្ត្រីជួរមុខបានចំនួន ២៧០នាក់ ។ចំណែកខេត្តឧត្តរមានជ័យវិញ ស្ថានភាពជំងឺកូវីដ១៩ ក៏មានការថយចុះគួរឲ្យកត់សម្គាល់ផងដែរ ដោយ២ថ្ងៃចុងក្រោយនេះ អាជ្ញាធរបានរកឃើញអ្នកវិជ្ជមាន ត្រឹមចន្លោះជាង ៣០នាក់ ទៅជាង ៥០នាក់ ដោយកាលពីអំឡុងខែកក្កដា ឆ្នាំ២០២១ គឺរកឃើញរហូតដល់លើស១០០នាក់ ភាគច្រើនជាពលករទើបត្រឡប់មកពីថៃ ក្នុងចំណោមនោះ ក៏មានអ្នកឆ្លងវីរុសបំប្លែងថ្មី ដែលតា (Delta) ផងដែរ ។ចាប់ពីមានការឆ្លងជំងឺកូវីដ១៩ នៅខេត្តឧត្តរមានជ័យ អាជ្ញាធរបានរកឃើញអ្នកវិជ្ជមានចំនួន ៥ ៣៥០នាក់ ត្រូវបានព្យាបាលជាសះស្បើយចំនួន ១ ៧៥៣នាក់ ស្លាប់ចំនួន ៩នាក់ និងកំពុងសម្រាកព្យាបាលចំនួន ៣ ៥៨៨នាក់ ។ ដោយបច្ចុប្បន្នខេត្តមួយនេះ កំពុងដំណើរការចាក់វ៉ាក់សាំងជំរុញ ដូសទី៣ ដល់កម្លាំងជួរមុខផងដែរ ។ដោយឡែកនៅខេត្តបន្ទាយមានជ័យ អាជ្ញាធរនៅតែបន្តរកឃើញអ្នកវិជ្ជមានកូវីដ១៩ ក្នុងរង្វង់ជាង១០០នាក់ មានទាំងពលករទើបត្រឡប់មកពីថៃ និងអ្នកពាក់ព័ន្ធព្រឹត្តិការណ៍២០កុម្ភៈ ។ តែយ៉ាងណា រដ្ឋបាលខេត្តបន្ទាយមានជ័យ បានប្រកាសថា ក្នុងរយៈពេល២ថ្ងៃចុងក្រោយនេះ ក៏មានអ្នកជាសះស្បើយច្រើន ដែលមានរហូតដល់ជាង ១០០០នាក់ ហើយខេត្តមួយនេះ កំពុងដំណើរការចាក់វ៉ាក់សាំងជូនពលរដ្ឋ និងចាក់ដូសទី៣ ជូនកម្លាំងជួរមុខ ដោយរហូតមកដល់ពេលនេះចាក់បានជិត ៣០ម៉ឺននាក់ហើយ ។សម្រាប់ខេត្តប៉ៃលិនវិញ ក្នុងរយៈពេលដូចគ្នានេះ ហាក់មានការកម្រើក ចំពោះអ្នកវិជ្ជមានកូវីដ១៩ គឺបានរកឃើញក្នុងចន្លោះពីជាង ៣០នាក់ ទៅជាង ១០០នាក់ សុទ្ធសឹងជាពលរក កំពុងធ្វើចត្តាឡីស័កនៅក្នុងមណ្ឌល ខណៈកន្លងទៅអាជ្ញាធរបានរកឃើញអ្នកឆ្លងមានតិចតួចប៉ុណ្ណោះ ហើយតាមទីតាំងព្យាបាលវិញ គឺមានការធូរស្បើយ រហូតមានការបញ្ជូនអ្នកជំងឺកូវីដ១៩ មកពីខេត្តមួយចំនួនជាប់ព្រំដែនថៃ មកព្យាបាលក្នុងខេត្តមួយនេះផងដែរ ។ តែយ៉ាងណាអាជ្ញាធខេត្ត កំពុងពន្លឿងការចាក់វ៉ាក់សាំងជូនពលរដ្ឋ និងចាក់ដូសទី៣ ដល់កម្លាំងជួរមុខ ហើយបើមិនមានអ្វីប្រែប្រួលទេនោះ នៅថ្ងៃទី១៦ ខែសីហា ឆ្នាំ២០២១ខាងមុខនេះ ខេត្តប៉ៃលិន នឹងមានការចាក់វ៉ាក់សាំងដល់កុមារចាប់ពីអាយុ១២ឆ្នាំ រហូតដល់ក្រោមអាយុ១៨ឆ្នាំ ។គួរបញ្ជាក់ថា ខេត្តបាត់ដំបង ប៉ៃលិន បន្ទាយមានជ័យ និងឧត្តរមានជ័យ ជាខេត្តត្រូវបានរាជរដ្ឋាភិបាល ធ្វើការបិទខ្ទប់រយៈពេល១៤ថ្ងៃ ចាប់ពីថ្ងៃទី២៩ ខែកក្កដា រហូតដល់ថ្ងៃទី១២ ខែសីហា ឆ្នាំ២០២១ ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ពិសេសប្រភេទបំប្លែងថ្មីដែលតា ៕អត្ថបទ ៖ សុខរិទ្ធ

កម្ពុជា-ព្រុយណេដារ៉ូសាឡឹម ចុះហត្ថលេខាលើអនុស្សារណៈនៃការយោគយល់គ្នា ស្តីពីកិច្ចសហ ប្រតិបត្តិការលើវិស័យវប្បធម៌

ភ្នំពេញ ៖ ក្រសួងវប្បធម៌ និងវិចិត្រសិល្បៈ ព្រឹកថ្ងៃទី១១ ខែសីហា ឆ្នាំ២០២១នេះ បានចុះហត្ថ លេខាលើអនុស្សារណៈ នៃការយោគយល់គ្នារវាងរដ្ឋាភិបាល នៃព្រះរាជាណាចក្រកម្ពុជា និងព្រះចៅស៊ុលតង់ នៃរាជរដ្ឋាភិបាលព្រុយណេដារ៉ូសាឡឹម ស្តីពីកិច្ចសហប្រតិបត្តិការលើវិស័យវប្បធម៌ និងវិចិត្រសិល្បៈតាម ប្រព័ន្ធវីដេអូ។ពិធីចុះហត្ថលេខាលើអនុស្សរណៈយោគយល់គ្នាខាងលើនេះ ភាគីកម្ពុជា មានលោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ ជាហត្ថលេខី តំណាងរដ្ឋាភិបាល នៃព្រះរាជាណាចក្រកម្ពុជា និងភាគីព្រុយណេ មានឯកឧត្តម MAJOR GENRAL (Rtd.) DATO PADUKA SERI HAJI AMINUDDIN IHSAN BIN PEHIN ORANG KAYA SAIFUL MULOK DATO SERI PADUKA HAJI ABIDIN រដ្ឋមន្រី្តក្រសួងវប្បធម៌ យុវជន និងកីឡា ជាហត្ថលេខីតំណាងតាងនាម ព្រះចៅស៊ុលតង់ នៃរាជរដ្ឋាភិបាលព្រុយណេដារ៉ូសាឡឹម។ គោលបំណងនៃការចុះអនុស្សរណៈយោគយល់គ្នានេះ គឺដើម្បីពង្រឹងទំនាក់ទំនងលើវិស័យវប្បធម៌រវាងប្រជាជន និងប្រទេសទាំងពីរកម្ពុជា-ព្រុយណេ ការជម្រុញការផ្លាស់ប្តូរក្នុងវិស័យវប្បធម៌ លើកទឹកចិត្ត និងលើកកម្ពស់កិច្ចសហប្រតិបតិ្តការវប្បធម៌ដោយផ្អែកលើគោលការណ៍ស្មើភាគគ្នា និងផ្តល់ផលប្រយោជន៍ទៅវិញទៅមក។ ភាគីទាំងពីរ នឹងជម្រុញលើកទឹកចិត្ត និងសម្របសម្រួលការផ្លាស់ប្តូរវប្បធម៌ ទស្សនកិច្ចសិក្សា វគ្គបណ្តុះបណ្តាលការតាំងពិព័រណ៍ការចូលរួមក្នុងសន្និសីទ វេទិកា សន្និសីទ ជំនាញ សិក្ខាសាលា មហោស្រព និងសកម្មភាពដទៃទៀតដែលរៀបចំដោយប្រទេសណាមួយក្នុងវិស័យដូចខាងក្រោម ៖១.សិល្បៈទស្សនីយភាព, ២.សិល្បៈវិចិត្រ និងសូនរូប, ៣.ការតាំងពិព័រណ៍, ទី៤.សិល្បៈសិប្បកម្ម, ទី៥.សារមនី្ទរបុរាណវិទ្យា និងបេតិកភណ្ឌ, ទី៦.នរវិទ្យា និងជាតិពន្ទុវិទ្យា, ទី៧.បណ្ណាល័យ និងបណ្ណាសារ, ទី៨.ប្រវតិ្តសាស្រ្ត និងអក្សរសាស្រ្ត, ទី៩.ឧស្សាហកម្មវប្បធម៌ និងច្នៃប្រឌិត, ទី១០.គ្រឹះស្ថានវប្បធម៌ និងAcademics និងទី១១.ទម្រង់កិច្ចសហប្រតិបតិ្តការដទៃទៀតដែលបានព្រមព្រៀងគ្នា៕អត្ថបទ ៖ រដ្ឋា

ក្រសួងកសិកម្មប្រាប់មូលហេតុ៩ចំណុច ធ្វើឲ្យតម្លៃជីថ្លៃខុសរាល់ឆ្នាំ បង្កពីបញ្ហាវិបត្តិជំងឺកូវីដ១៩

ភ្នំពេញ៖ ក្រសួងកសិកម្មរុក្ខាប្រមាញ់ និងនេសាទ បានប្រកាសប្រាប់ពីមូលហេតុចំនួន៩ចំណុច ដែលធ្វើឲ្យតម្លៃជីកសិកម្ម នៅក្នុងឆ្នាំ២០២១នេះ មានការឡើងថ្លៃខ្ពស់ជាងរាល់ឆ្នាំ និងធ្វើឲ្យមានការត្អូញត្អែរជាបន្តបន្ទាប់ពីសំណាក់ប្រជាពលរដ្ឋ ពិសេសកសិករធ្វើដំណាំស្រូវ ដោយបញ្ហានេះ គឺបានបង្កឡើងដោយវិបត្តិជាសកល នៃជំងឺកូវីដ១៩ ។សេចក្តីប្រកាសព័ត៌មានរបស់ក្រសួងកសិកម្មរុក្ខាប្រមាញ់ និងនេសាទ កាលពីថ្ងៃទី៩ ខែសីហា ឆ្នាំ២០២១ បានឲ្យដឹងថា ស្ថានភារីករាលដាលនៃជំងឺកូវីដ១៩ រយៈពេលជិត២ឆ្នាំកន្លងទៅនេះ បានធ្វើឲ្យគ្រប់វិស័យជួបនឹងបញ្ហាប្រឈម ។ ដោយឡែកផលិតកម្ម ក្នុងវិស័យកសិកម្មនៅកម្ពុជា ឆ្នាំ២០២១នេះ បានពិនិត្យឃើញថាមានសន្ទុះ កើនឡើងគួរឲ្យកត់សម្គាល់ រីឯតម្រូវការថ្នាំកសិកម្ម និងជីកសិកម្មក៏មានសន្ទុះកើនឡើងផងដែរ ។សេចក្តីប្រកាសបានបន្តថា នៅឆ្នាំ២០២០ មានក្រុមហ៊ុននាំចូលថ្នាំកសិកម្ម និងជីកសិកម្ម យោងតាមលិខិតអនុញ្ញាតនាំចូលមាន ថ្នាំកសិកម្មចំនួន ១០៣ ០០៥តោន និងជីកសិកម្មចំនួន ១ ៤០៦ ៧៧៥តោន ហើយនៅឆ្នាំ២០២១នេះ គិតត្រឹមខែឧសភា ក្រសួងបានពិនិត្យឃើញថា ការនាំចូលថ្នាំកសិកម្មចំនួន ៤៧ ៤០៩តោន និងជីកសិកម្មចំនួន ៨៥៨ ៦៣២តោន ។ប្រភពបន្ថែមថា ទន្ទឹមនឹងនេះជីកសិកម្ម ក៏មានតម្លៃថ្លៃជាងកាលពីឆ្នាំកន្លងទៅ ដោយផ្ដើមចេញមូលហេតុសំខានៗមួយចំនួន រួមមានទី១. បណ្ដាប្រទេសផលិតថ្នាំកសិកម្ម និងជីកសិកម្ម មិនអាចផលិតឆ្លើយតបបានតាមការបញ្ជាទិញពីកម្ពុជា, ទី២. វត្ថុធាតុដើមមានការខ្វះខាតក្នុងការផ្គត់ផ្គងពីបណ្ដាប្រទេសផលិតធំៗ មានដូចជា ប្រទេសចិន ប្រទេសម៉ាឡេ និងប្រទេសអារ៉ាប់, ទី៣. ផលិតកម្មជីកសិកម្ម ត្រូវបានកាត់បន្ថយកម្លាំងពលកម្មដោយបញ្ហាការរាលដាលជំងឺកូវីដ១៩ មាននៅចិន ថៃ និងវៀតណាម ។ ទី៤. ការដឹកជញ្ជូនប្រើពេលវេលាយូរដោយមានបញ្ហារាលដាលនៃជំងឺកូវីដ១៩ (មានការប្រុងប្រយ័ត្នទៅលើផ្នែកសុខភាព និងត្រួតពិនិត្យតាមវិធានការសុខាភិបាល), ទី៥. ទន្ទឹមនឹងការបញ្ជាទិញពីកម្ពុជា នៅបណ្ដាប្រទេសផ្សេងៗក៏មានការបញ្ជាទិញដែរ ដូចនេះការផ្គត់ផ្គង់មិនគ្រប់តាមតម្រូវការ, ទី៦. ការចំណាយលើការរៀបចំវេចខ្ចប់ឡើងវិញ ដែលត្រូវការសំបកវេចខ្ចប់បោះពុម្ពជាភាសាខ្មែរ ។ ទី៧. ក្រុមហ៊ុនផ្គត់ផ្គង់ជី-ថ្នាំកសិកម្មមួយចំនួន មិនបានទៅទិញដល់រោងចក្រផលិតផ្ទាល់ ដោយទិញតាមរយៈឈ្មួញកណ្ដាល ជាហេតុធ្វើឲ្យជី-ថ្នាំកសិកម្មថ្លៃជាងតម្លៃនៅក្នុងរោងចក្រផលិត, ទី៨. តម្រូវការជីកសិកម្មក្នុងស្រុក មានការកើនឡើងច្រើន ដោយសារអ្នកវិនិយោគមួយចំនួន ប្តូរវិស័យផ្សេងៗ មកវិនិយោគលើវិស័យកម្ម និងទី៩. ប្រទេសកម្ពុជាមិនទាន់មានលទ្ធភាព អាចផលិតជីកសិកម្មបាននៅឡើយ (មានលទ្ធភាពផលិតជីធម្មជាតិ និងជីសរីរាង្គតែប៉ុណ្ណោះ) ។គួរបញ្ជាក់ថា បច្ចុប្បន្ននៅកម្ពុជា មានកសិករតាមបណ្ដាខេត្តមួយចំនួន ពិសេសនៅតំបន់មានប្រភពទឹកធំៗ និងមានការអភិវឌ្ឍប្រព័ន្ធធារាសាស្ត្រ អាងស្តុកទឹក ទំនប់ស្ទាក់ទឹក និងមានប្រឡាយច្រើន បានបង្កើនការដាំដុះដំណាំស្រូវ ប្រភេទស្រូវស្រាល (ស្រូវបង្កើនរដូវ) ចំនួន២ ទៅ៣ដង ក្នុងមួយឆ្នាំ ទើបមានប្រើប្រាស់ជីកសិកម្មច្រើន និងមានតម្រូវការច្រើនឡើងៗពីមួយឆ្នាំទៅមួយឆ្នាំ ៕អត្ថបទ ៖ បាន សុខរិទ្ធ

ក្រសួងការពារជាតិ ដំណើរការចាក់វ៉ាក់សាំងដូសទី៣ ជូនកងទ័ពនិងគ្រួសារកងទ័ព ចំនួន៥មណ្ឌល ក្នុងរាជធានីភ្នំពេញ

ភ្នំពេញ ៖ ក្រសួងការពារជាតិ នៃព្រះរាជាណាចក្រកម្ពុជា បានដំណើរការចាក់វ៉ាក់សាំងកូវីដ-១៩ ប្រភេទអាស្រ្តាហ្សេនីកា ដូសជំរុញ ឬដូសទី៣ ជូនកងទ័ព និងគ្រួសារកងទ័ព ចំនួន៥មណ្ឌល ក្នុងរាជធានីភ្នំពេញ ដែលបានចាប់ផ្តើមយុទ្ធនាការចាក់វ៉ាក់សាំងជូនកាលពីថ្ងៃទី៩ ខែសីហា ឆ្នាំ២០២១ម្សិលមិញនេះ។បើតាមឧត្តមសេនីយ៍ទោ ព្រំ សុខារ័ត្ន នាយករង នៃនាយកដ្ឋានសុខាភិបាល និងជាប្រធានក្រុមប្រចាំការទទួលខុសត្រូវការងារចាក់វ៉ាក់សាំងបង្ការជំងឺកូវីដ-១៩ នៅសាលាបឋមសិក្សា និងអនុវិទ្យាល័យ វត្តនាគវ័ន ខណ្ឌទួលគោក រាជធានីភ្នំពេញ បានប្រាប់BTVព័ត៌មាននាព្រឹកថ្ងៃទី១០ ខែសីហា ឆ្នាំ២០២១នេះថា មណ្ឌលចាក់វ៉ាក់សាំងដូសជម្រុញ ឬដូសទី៣ ជូនកងទ័ព និងគ្រួសារកងទ័ព នៅក្នុងរាជធានីភ្នំពេញ មានចំនួន៥មណ្ឌលចាក់វ៉ាក់សាំង គឺទី១.មណ្ឌលចាក់វ៉ាក់សាំង ក្នុងមនី្ទរពេទ្យព្រះកេតុមាលា, ទី២.មណ្ឌលចាក់វ៉ាក់សាំង ក្នុងសាលាបឋមសិក្សា និងអនុវិទ្យាល័យ វត្តនាគវ័ន, ទី៣. មណ្ឌលចាក់វ៉ាក់សាំង ក្នុងវិទ្យាស្ថានវិទ្យាសាស្រ្តសុខាភិបាល ខ.ភ.ម, ទី៤. មណ្ឌលចាក់វ៉ាក់សាំង ក្នុងអាជ្ញាធរមីនក្រោមការគ្រប់គ្រងរបស់មជ្ឈមណ្ឌលជាតិគ្រប់គ្រងកងកម្លាំងរក្សាសនិ្តភាព បោសសំអាតមីន និងកាកសំណល់សង្រ្គាម និងទី៥. មណ្ឌលចាក់វ៉ាក់សាំង ក្នុងវិទ្យាស្ថានបច្ចេកវិទ្យាសម្តេចតេជោ កំពង់ស្ពឺ។ទន្ទឹមគ្នានោះដែរកងទ័ព និងគ្រួសារកងទ័ព បានមកទទួលការចាក់វ៉ាក់សាំងបង្ការជំងឺកូវីដ-១៩ ដូសជម្រុញ ឬដូសទី៣ បានលើកឡើងស្រដៀងគ្នាថា ការចាក់វ៉ាក់សាំងដូសទី៣នេះ គឺពិតជាសំខាន់ណាស់សម្រាប់ការពារ និងពង្រឹងសុខភាពយកឈ្នះជំងឺកូវីដ-១៩ និងជំងឺផ្សេងៗទៀត ហើយក៏សូមគោរពដឹងគុណដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត និងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងប្រមុខថ្នាក់ដឹកនាំទាំងអស់ ដែលបានគិតគូរដល់កងកម្លាំងប្រដាប់អាវុធ ព្រមទាំងប្រជាពលរដ្ឋនៅទូទាំងប្រទេស។ជាចុងក្រោយឧត្តមសេនីយ៍ទោ ព្រំ សុខារ័ត្ន បានបញ្ជាក់ថា ក្រុមការងារគ្រូពេទ្យដែលចាក់វ៉ាក់សាំងនៅមណ្ឌលនេះ មានចំនួន៤០នាក់ មានបន្ទប់ចាក់វ៉ាក់សាំង២ និងបន្ទប់សង្រ្គោះ១ ដោយធ្វើការចាក់វ៉ាក់សាំងជូនចំនួន៨អង្គភាព ក្រោមចំណុះនាយកដ្ឋាន។ ក្រោយពីកងទ័ព និងគ្រួសារកងទ័ព ចាក់វ៉ាក់សាំងដូសជម្រុញ ឬដូសទី៣រួចរាល់ សូមបន្តចូលរួមអនុវត្តន៍វិធានការរបស់សម្តេចតេជោ គឺ៣កុំ ៣ការពារ ដើម្បីការពារ ទប់ស្កាត់ការឆ្លងមេរោគកូវីដ-១៩៕អត្ថបទ រដ្ឋា

ទូរទស្សន៍ BBC និងសមាគមធ្វើដំណើរអាស៊ីប៉ាស៊ីហ្វិក គាំទ្រផែនការបើកទេសចរណ៍ឡើងវិញរបស់កម្ពុជា និងប្ដេជ្ញាចូលរួមផ្សព្វផ្សាយទៅកាន់ពិភពលោក

ភ្នំពេញ ៖ ខណៈដែលក្រសួងទេសចរណ៍ បាននិងកំពុងរៀបចំការបើកទេសចរណ៍ឡើងវិញ ប្រកបដោយសុវត្ថិភាពនោះ សមាគមធ្វើដំណើរអាស៊ីប៉ាស៊ីហ្វិក (PATA) និងទូរទស្សន៍លំដាប់អន្តរជាតិ BBC បានបង្ហាញគាំទ្រផែនការបើកទេសចរណ៍ឡើងវិញនេះ និងបានប្ដេជ្ញាចូលរួមផ្សព្វផ្សាយអំពីផែនការនេះទៅកាន់ពិភពលោកផងដែរ។ការបង្ហាញការគាំទ្រនេះ ធ្វើឡើងកិច្ចសម្ភាសក្នុងកម្មវិធី «Destination Insights Series» ក្រោមការរៀបចំរបស់សមាគមទេសចរណ៍ធ្វើដំណើរអាស៊ីប៉ាស៊ីហ្វិច (PATA) សហការជាមួយបណ្ដាញសារព័ត៌មាន BBC ក្នុងនោះឯកឧត្ដម ថោង រដ្ឋសក្ដិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ ជាវាគ្មិនតំណាងប្រទេសកម្ពុជា។ កម្មវិធីនេះដែរធ្វើឡើងតាមរយៈប្រព័ន្ធវីដេអូ Zoom ដោយផ្ដោតសំខាន់ទៅលើការនិន្នាការបច្ចុប្បន្ន ក្នុងអំឡុងវិបត្តិកូវីដ-១៩ និងការស្ដារវិស័យទេសចរណ៍ឡើងវិញ។ក្នុងកិច្ចសម្ភាសជាមួយទូរទស្សន៍ BBC ឯកឧត្ដម ថោង រដ្ឋសក្តិ បានបញ្ជាក់ពីកិច្ចខិតខំរបស់រាជរដ្ឋាភិបាលក្នុងការទប់ស្កាត់ការរីករាលដាលនៃជំងឺកូវីដ-១៩ ល្បឿននៃការចាក់វ៉ាក់សាំងដ៏ខ្លាំង ដើម្បីបញ្ចប់ការចាក់វ៉ាក់សាំងឲ្យបានតាមគោលដៅ ៨០% នៃប្រជាជន នៅចុងឆ្នាំ២០២១។ឯកឧត្ដម អគ្គនាយកក៏បានរំលឹកអំពីវិធានសង្គ្រោះអាជីវកម្ម និងអ្នកបម្រើការងារក្នុងវិស័យទេសចរណ៍កន្លងមករបស់រាជរដ្ឋាភិបាល និងបានប្រាប់អំពីយុទ្ធនាការចាក់វ៉ាក់សាំងដល់កុមារ និងយុវវ័យអាយុចាប់ពី ១២-១៧ឆ្នាំ, គម្រោងចាក់វ៉ាក់សំាងដូសទី៣ និងកិច្ចខិតខំប្រឹងប្រែងផ្សេងៗទៀតរបស់រាជរដ្ឋាភិបាល ដែលទាំងនេះនឹងចូលរួមដល់ការស្ដារឡើងវិញនូវទំនុកចិត្ត និងភាពជឿជាក់ក្នុងការធ្វើដំណើររបស់ទេសចរជាតិ និងអន្តរជាតិ។ឯកឧត្ដម ថោង រដ្ឋសក្តិ បានបញ្ជាក់ទៀតថា «ក្រសួងទេសចរណ៍ បាននិងកំពុងរៀបចំនូវក្របខណ្ឌយុទ្ធសាស្ត្រនៃការបើកទេសចរណ៍ឡើងវិញ ប្រកបដោយសុវត្ថិភាព គ្មានការឆ្លងរីករាលដាល»។ឯកឧត្ដម ក៏បានជម្រាបជូនដល់សមាគមធ្វើដំណើរអាស៊ីប៉ាសស៊ីហ្វិក និងទូរទស្សន៍ BBC អំពីផែនការបើកទេសចរណ៍នៅកម្ពុជាឡើងវិញ នៅចុងឆ្នាំ២០២១នេះ ដោយត្រូវរៀបចំដោយយកចិត្តទុកដាក់ខ្ពស់ដល់សុខភាព និងសុវត្ថិភាពសាធារណៈជាអាទិភាព តាមរយៈការពិគ្រោះយោបល់ជាមួយអាជ្ញាធរពាក់ព័ន្ធ និងការចូលរួមពីគ្រប់ភាគី ព្រមទាំងអាស្រ័យលើស្ថានការណ៍ចាក់ស្ដែង ស្របតាមផែនទីបង្ហាញផ្លូវសម្រាប់ការលើកស្ទួយ និងស្ដារវិស័យទេសចរណ៍កម្ពុជាអំឡុង និងក្រោយវិបត្តិកូវីដ-១៩ ដែលរាជរដ្ឋាភិបាលបានអនុម័តកាលពីដើមឆ្នាំ២០២១។ឯកឧត្ដម តំណាងក្រសួងទេសចរណ៍រូបនេះ ក៏បានជម្រាបអំពីការរៀបចំវេទិកាទេសចរណ៍អាស៊ាន ២០២២ នៅក្រុងព្រះសីហនុ ដែលរួមមានកិច្ចប្រជុំ និងការតាំងពិព័រណ៍ខ្នាតតូចល្មម ដោយត្រូវអនុវត្តតាមវិធានសុវត្ថិភាព និងអនាម័យនានាយ៉ាងតឹងរឹង៕អត្ថបទ ៖ មុត សុទ

សម្ដេចក្រឡាហោម ជំរុញអាជ្ញាធរបាត់ដំបងត្រូវខិតខំទប់ស្កាត់ការឆ្លងរាលដាលកូវីដ១៩បំប្លែងថ្មី

ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជំរុញទៅ ដល់អាជ្ញាធរខេត្តបាត់ដំបង ត្រូវខិតខំទប់ស្កាត់ការឆ្លងរីករាលដាលនៅក្នុងសហគមន៍ នៃជំងឺកូវីដ១៩ ពិសេសប្រភេទបំប្លែងថ្មីដែលតា (Delta) ខណៈខេត្តមួយនេះ ក៏មានជាប់ព្រំដែន និងជាមុខសញ្ញាមានពលករត្រឡប់មកពីប្រទេសថៃប្រចាំថ្ងៃ ។ក្នុងកិច្ចប្រជុំតាមរយៈវីដេអូសន្និសីទ Zoom នៅថ្ងៃទី៩ ខែសីហា ឆ្នាំ២០២១នេះ សម្ដេចក្រឡាហោម បានមានប្រសាសន៍ថា កិច្ចប្រជុនេះ ធ្វើឡើងដើម្បីរៀបចំបន្ថែមការប្រយុទ្ធប្រឆាំងនឹងជំងឺកូវីដ-១៩ ពិសេសការដោះស្រាយបញ្ហាប្រឈមនានា បង្កឡើងដោយការរីករាលដាលមេរោគបំប្លែងថ្មី ដែលខេត្តបាត់ដំបង ក៏ស្ថិតក្នុងតំបន់ងាយឆ្លងជំងឺនេះ ។សម្ដេច បានបន្ថែមថា ខេត្តបាត់ដំបង ជាខេត្តមួយជាប់ព្រំដែនជាមួយប្រទេសថៃ ហើយថៃកំពុងស្ថិតក្នុងអត្រាឆ្លងខ្ពស់ នៃមេរោគកូវីដ-១៩ ពិសេសមេរោគបំប្លែងថ្មី ដែលធ្វើឱ្យពលរដ្ឋខ្មែរក្នុងនោះពលរដ្ឋ ជាពលករនាំគ្នាធ្វើដំណើរត្រឡប់មកវិញ ជាបន្តបន្ទាប់ និងបានក្លាយជាបញ្ហាប្រឈមថ្មីមួយ ដែលទាមទារឱ្យមានការខិតខំដោះស្រាយ ។រដ្ឋមន្ត្រីក្រសួងមហាផ្ទៃ បានបញ្ជាក់ថា យ៉ាងណាក៏ដោយ ការងារប្រយុទ្ធប្រឆាំងជំងឺកូវីដ១៩នេះ មានការចូលរួមពីក្រុមការងារថ្នាក់ជាតិទាំងអស់ បានជួយជ្រោមជ្រែងដល់រដ្ឋបាលខេត្តបាត់ដំបង ទាំងជំនួយសម្ភារៈ និងស្មារតី ។ក្នុងកិច្ចប្រជុំនោះ ឯកឧត្តម ងួន រតនៈ អភិបាលខេត្តបាត់ដំបង បានថ្លែងថា ខេត្តបាត់ដំបង មានពលករ និងអ្នកកំពុងធ្វើចត្តាឡីស័កសរុបជិត ២០០០នាក់ ក្នុងមណ្ឌលទាំងចំនួន២០ទូទាំងខេត្ត និងមានអ្នកឆ្លងកូវីដ-១៩ បំប្លែងថ្មីប្រភេទDeltaចំនួន១៣នាក់ ព្យាបាលជាសះស្បើយចំនួន៤នាក់ និងត្រៀមទីតាំងចំនួន ៤១កន្លែង ដើម្បីធ្វើជាមណ្ឌលចត្តាឡីស័ក ទទួលពលករពីប្រទេសថៃ ។ ឯកឧត្តម បន្ថែមថា ចាប់តាំងពីមានការផ្ទុះឆ្លងជំងឺកូវីដ១៩ នៅក្នុងប្រទេសកម្ពុជា សម្រាប់ខេត្តបាត់ដំបង មានអ្នកឆ្លងសរុបចំនួន៤០៩៣នាក់ ព្យាបាលជាសះស្បើយចំនួន២ ៥១៥នាក់ និងស្លាប់ចំនួន ៤៨នាក់ ។ កាលពីថ្ងៃទី៨ ខែសីហា ឆ្នាំ២០២១ បានរកឃើញអ្នកឆ្លងកូវីដ១៩ ចំនួន៩៤នាក់ ជាសះស្បើយចំនួន ៧៩នាក់ ៕

កងកម្លាំងជួរមុខទិសយោធភូមិភាគទី៥ ចាប់ផ្តើមដំណើរការចាក់វ៉ាក់សាំងបង្ការជំងឺកូវីដ-១៩ ដូសទី៣ (ដូសជំរុញ)

បាត់ដំបង ៖ នៅព្រឹកថ្ងៃទី៩ ខែសីហា ឆ្នាំ២០២១ ឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ អញ្ជើញពិនិត្យការចាក់វ៉ាក់សាំងបង្ការជំងឺកូវីដ-១៩ ដូសទី៣ (ដូសជំរុញ) នៅទីបញ្ជាការយោធភូមិភាគទី៥ និងគ្រប់ទីតាំងផ្សេងទៀតក្នុងទិសយោធភូមិភាគទី៥ ក៏បានដំណើរការចាក់វ៉ាក់សាំងដូសទី៣ ឬដូសជំរុញ នេះផងដែរ។ឯកឧត្តមមេបញ្ជាការ បានថ្លែងថា វ៉ាក់សាំង Astra Zeneca ដែលចាក់ជូនកម្លាំងជួរមុខទិសយោធភូមិភាគទី៥ ដូសទី៣នាពេលនេះ គឺជាការផ្តល់ជូនពីសំណាក់សម្តេចតេជោ ហ៊ុន សែន នាយករដ្ឋមន្ត្រី ដែលសម្តេចបានខិតខំគ្រប់បែបយ៉ាង ដើម្បីរកវ៉ាក់សាំង និងបានដាក់ចេញវិធានការ សម្រាប់ចាក់ជូនមន្ត្រីរាជការ កងកម្លាំងប្រដាប់អាវុធ ប្រជាពលរដ្ឋរបស់យើងឱ្យបានគ្រប់ៗគ្នា ដូច្នេះហើយបងប្អូនត្រូវគោរពដឹងគុណចំពោះសម្តេច។ ទោះបីជាទទួលបានការវ៉ាក់សាំងទាំង២ដូស និង៣ដូសហើយ សូមបន្តចូលរួមអនុវត្តន៍អោយបានខ្ជាប់ខ្ជួន វិធានការសុខាភិបាល ៣ការពារ និង៣កុំ។ក្នុងនាមមេបញ្ជាការយោធភូមិភាគទី៥ ក៏ដូចជាកម្លាំងជួរមុខនៅទិសយោធភូមិភាគទី៥ ទាំងអស់សូមគោរពថ្លែងអំណរគុណ និងជូនពរសម្តេចតេជោ និងសម្តេចកិត្តិព្រឹទ្ធបណ្ឌិត សូមទទួលបាននូវសុខភាពល្អបរិបូរណ៍កម្លាំងមាំមួនខ្លាំងក្លា បញ្ញាញាណវាងវៃជន្មាយុយឺនយូរ និងទទួលបានជោគជ័យត្រចះត្រចង់ក្នុងដឹកនាំប្រទេសជាតិឲ្យមានការរីកចម្រើន៕

មនី្ទរពេទ្យព្រះអង្គឌួង និងមជ្ឈមណ្ឌលជាតិគាំពារមាតា និងទារកចាក់វ៉ាក់សាំងជូនអ្នកសេសសល់មិនទាន់បានចាក់វ៉ាក់សាំងកូវីដ១៩

ភ្នំពេញ ៖ មនី្ទរពេទ្យព្រះអង្គឌួង និងមជ្ឈមណ្ឌលជាតិគាំពារមាតា និងទារក បានដំណើរការរៀបចំចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋខ្មែរ ជនបរទេស និងស្រី្តដែលទើបនឹងសម្រាលកូនរួច ប្រជាពលរដ្ឋដែលបានបញ្ចប់ការធ្វើចត្តាឡិស័ក មានអាយុចាប់ពី១៨ឆ្នាំឡើង ដែលនៅសេសសល់មិនទាន់បានចាក់វ៉ាក់សាំងកូវីដ១៩ ដែលមានអាសយដ្ឋានរស់នៅក្នុងរាជធានីភ្នំពេញ។ ចាប់ផ្តើមពីថ្ងៃទី៩ ខែសីហានេះ រហូតដល់ថ្ងៃទី៨ ខែកញ្ញា ឆ្នាំ២០២១ ចាប់ពីម៉ោង៨:០០ព្រឹក ដល់១១:០០ និងម៉ោង១៤:០០ ដល់១៦:០០។ប្រជាពលរដ្ឋដែលនៅសេសសល់មិនទាន់បានចាក់វ៉ាក់សាំងបង្ការជំងឺកូវីដ-១៩ ជាច្រើនរស់នៅក្នុងរាជធានីភ្នំពេញ នៅព្រឹកនេះ បានសម្រុកមកចាក់វ៉ាក់សាំងនៅតាមបណ្តាមនី្ទរពេទ្យរដ្ឋថ្នាក់ជាតិ ដូចជាមនី្ទរពេទ្យព្រះអង្គឌួង និងមជ្ឈមណ្ឌលជាតិគាំពារមាតា និងទារក បានលើកឡើងស្រដៀងគ្នាថា យុទ្ធនាការការចាក់វ៉ាក់សាំងជូនប្រជាពលរដ្ឋនៅសេសសល់នេះ ពិតជាល្អណាស់ ដែលប្រមុខរាជរដ្ឋាភិបាលបានជួយគាំពារប្រជាពលរដ្ឋទាំងអស់កុំឲ្យកើតនិងឆ្លងជំងឺកូវីដ-១៩។បើតាមឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានបន្ដអំពាវនាវដោយទទូចដល់សាធារណជន បងប្អូនប្រជាពលរដ្ឋយើងទាំងអស់នៅទូទាំងប្រទេសកម្ពុជា ឲ្យបន្តប្រុងប្រយ័ត្នខ្ពស់ការពារខ្លួនកុំភ្លេចខ្លួនឲ្យសោះ ដោយត្រូវចេះផ្លាស់ប្តូរទម្លាប់រស់នៅរបស់ខ្លួនឲ្យស្របតាមពាក្យស្លោកដែលថា «រៀនរស់នៅធម្មតាជាមួយវីរុសកូវីដ-១៩ តាមបែបគន្លងថ្មី ក្នុងបរិបទប្រយុទ្ធ នឹងជំងឺកូវីដ-១៩» សំដៅបង្ការគ្រប់គ្រង និងកាត់ផ្តាច់នូវខ្សែចម្លងនៃវីរុសកូវីដ-១៩ ពិសេសពពួកប្រភេទបំប្លែងថ្មីនេះ ឬក៏ប្រភេទថ្មីផ្សេងទៀត ដែលអាចកើតមានក្នុងព្រះរាជាណាចក្រកម្ពុជា យើងជាយថាហេតុណាមួយ សូមបន្តអនុវត្តឲ្យបានខ្ជាប់ខ្ជួននូវ៣ការពារ និង៣កុំ តាមការណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា៕អត្ថបទ រដ្ឋា

បណ្ដាញសង្គម

ព័ត៌មានថ្មីៗ

រដ្ឋមន្ត្រីក្រសួងការពារជាតិចិន នឹងមិនមានវត្តមាននៅកិច្ចប្រជុំ Shangri-La ជាឆ្នាំទី២

ប្រមុខ WHO កំពុងធ្វើដំណើរទៅកុងហ្គោដែលរងផលប៉ះពាល់ដោយជំងឺ Ebola

ចិន៖ តៃវ៉ាន់មិនគួរ «រំខាន» បេសកកម្មកងទ័ពអាកាសរបស់ទីក្រុងប៉េកាំង នៅជុំវិញកោះនេះ

ហាម៉ាស៖ អ៊ីស្រាអែលចង់វិលទៅសង្គ្រាមប្រល័យពូជសាសន៍នៅហ្កាហ្សា ក្រោយសម្លាប់មនុស្សជាង ២០នាក់ ត្រឹម ៤៨ម៉ោង

ភ្ញៀវទេសចរងាកទៅរកប្រភពទឹកនៅទីក្រុងរ៉ូម ខណៈរលកកម្តៅមុនរដូវក្តៅវាយប្រហារប្រទេសអ៊ីតាលី

ប្រធានាធិបតីរុស្ស៊ីមាននូវជំនួបកម្រិតខ្ពស់ជាមួយសមភាគីកាហ្សាក់ស្ថាននៅទីក្រុង Astana

អវកាសយានិករុស្ស៊ីនៅ ISS ដើរលើលំហរអាកាសជាលើកដំបូងក្នុងឆ្នាំ ២០២៦នេះ

រដ្ឋមន្រ្តីការបរទេសសហរដ្ឋអាមេរិកលោក Marco Rubio អះអាងថា គុយបានមានបញ្ហាច្រើនណាស់

អ៊ូហ្គង់ដា បិទព្រំដែនជាមួយកុងហ្គោ ដើម្បីទប់ស្កាត់ការរីករាលដាលឆ្លងជំងឺអេបូឡា

លោក Macron ៖ ន័រវែសយល់ព្រមចូលរួមឆ័ត្រនុយក្លេអ៊ែររបស់បារាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍