BTV NEWS

ប្រធានក្រុមការងារចុះមូលដ្ឋាន ប្រកាសបញ្ចូលសមាជិកថ្មីគណបក្សប្រជាជនកម្ពុជាចំនួន ៦៩០០នាក់ ក្នុងស្រុកប្រាសាទបល្ល័ង្ក ខេត្តកំពង់ធំ

សម្ដេចតេជោ៖ការពង្រឹងខឿនការពារជាតិមិនសំដៅតែនៅសមរភូមិមុខទេ ត្រូវយកចិត្តទុកដាក់ទំនុកបម្រុងអ្នកសមរភូមិក្រោយជាគ្រួសារយុទ្ធជនជួរមុខ និងអតីតយុទ្ធជន

ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី

ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ និង ការអភិវឌ្ឍន៍

នាយកដ្ឋានប្រយុទ្ធនឹងជំងឺឆ្លង ណែនាំអំពីរបៀបថែទាំព្យាបាលជំងឺកូវីដ-១៩ ស្រាលនៅផ្ទះ និងថែទាំសុខភាពផ្លូវចិត្ត

ភ្នំពេញ ៖ បើយោងតាមផេកផ្លូវការរបស់នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានចេញផ្សាយនៅថ្ងៃទី២២ ខែមិថុនា ឆ្នាំ២០២១នេះ បានណែនាំអំពីរបៀបថែទាំព្យាបាលជំងឺកូវីដ-១៩ ស្រាលនៅផ្ទះ និងថែទាំសុខភាពផ្លូវចិត្ត។នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានបង្ហាញសារអប់រំណែនាំជាវីដេអូ ដើម្បីណែនាំ អោយមានការមើលថែទាំអ្នកជំងឺកូវីដ-១៩ ស្រាលនៅតាមផ្ទះ ដោយបានបញ្ជាក់ថា ប្រសិនបើមានអាការៈសង្ស័យក្អក ក្តៅខ្លួន ឈឺក គួរទំនាក់ទំនងទៅកាន់លេខ១១៥ ដើម្បីពិគ្រោះនិងផ្តល់យោបល់។ បុគ្គលមានរោគសញ្ញាកូវីដ-១៩ មួយចំនួន ត្រូវបានគ្រូពេទ្យវាយតម្លៃថា អាចព្យាបាលនៅផ្ទះបាន ដោយណែនាំអោយព្យាបាលនៅផ្ទះ ប៉ុន្តែក៏អាចទំនាក់ទំនងទៅកាន់គ្រូពេទ្យប្រសិនបើអាការៈមានការប្រែប្រួលធ្ងន់ធ្ងរ។ ចំពោះអាការៈធ្ងន់ធ្ងរបំផុតគឺពិបាកដកដង្ហើមត្រូវចាំបាច់បញ្ជូនទៅកាន់មន្ទីរពេទ្យ។ អ្នកជំងឺព្យាបាលនៅផ្ទះត្រូវពាក់ម៉ាសគ្រប់ពេលវេលា អ្នកមើលថែទាំត្រូវពាក់ម៉ាស និងរក្សាគម្លាតឲ្យបាន២ម៉ែត្រ។ ដាក់អ្នកជំងឺនៅបន្ទប់ដាច់ដោយឡែក និងមិនអនុញ្ញាតអោយមានភ្ញៀវចូលផ្ទះឡើយ ទោះបីមិត្ត ភក្តិ ឬ គ្រួសារសាច់ញាតិក៏ដោយ។ អ្នកជំងឺត្រូវសម្រាកអោយបានគ្រប់គ្រាន់ បរិភោគទឹកឲ្យបានច្រើន និងបរិភោគអាហារមានជីវជាតិ តាមដានរោគសញ្ញាសមាជិកគ្រួសារអោយទៀងទាត់ ។ត្រូវលាងដៃអោយបានញឹកញាប់និងអាកុល ហើយត្រូវបើកចំហរបង្អួច និងទ្វារ ដើម្បីខ្យល់ចេញចូលគ្រប់គ្រាន់ ។ សមាជិកក្នុងគ្រួសារគួរតែប្រើតែរបស់របរផ្ទាល់ខ្លួន ដោយមិនប្រើឡូកឡំគ្នានោះទេ ។ អ្នកជំងឺត្រូវព្យាយាមរក្សាភាពវិជ្ជមានផ្លូវចិត្ត និងប្រយ័ត្នចំពោះអ្វីដែលបានអាននិងឃើញតាមប្រព័ន្ធ Internet ត្រូវមើលព័ត៌មានពិត និងព្យាយាមធ្វើលំហាត់ប្រាណ និងជៀសវាងទម្លាប់ណាមិនល្អដែលប៉ះពាល់ដល់សុខភាព។សូមរំលឹកថា កាលពីថ្ងៃទី២០ ខែមិថុនា ឆ្នាំ២០២១ ក្រសួងសុខាភិបាល នៃព្រះរាជាណាចក្រកម្ពុជា បានប្រកាសស្តីពី ការដាក់ឲ្យប្រើនីតិវិធីប្រតិបតិ្តស្តង់ដារសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ-១៩ នៅតាមផ្ទះដោយអនុវត្តជាជំហានដំបូងក្នុងភូមិសាស្ត្ររាជធានីភ្នំពេញ។ ដោយឡែកការដាក់ឲ្យដំណើរការ ព្យាបាលអ្នកជំងឺកូវីដ-១៩ កម្រិតស្រាល និងគ្មានរោគសញ្ញានៅតាមផ្ទះសម្រាប់ភូមិសាស្ត្រខេត្តផ្សេងទៀត ត្រូវកំណត់ដោយប្រកាសរបស់ក្រសួងសុខាភិបាល នៅពេលក្រោយ ផ្អែកតាមកម្រិតនៃការឆ្លងរាលដាលនៃជំងឺកូវីដ-១៩ ក្នុងភូមិសាស្ត្រនីមួយៗ។ ក្រៅពីនេះ សម្រាប់អ្នកជំងឺស្រាលដែលព្យាបាលនៅតាមផ្ទះ ត្រូវយកសំណាកវិភាគ PCR ឡើងវិញនៅថ្ងៃទី១៣ បន្ទាប់ពីថ្ងៃវិជ្ជមានដំបូង បើលទ្ធផលអវិជ្ជមាន ត្រូវបញ្ចប់ការព្យាបាល ដោយបន្តធ្វើចត្តាឡីស័ក១៤ថ្ងៃទៀត ។ ក្នុងករណីមិនបានយកសំណាកពិនិត្យឡើងវិញនៅថ្ងៃទី១៣ ឬលទ្ធផលថ្ងៃទី១៣ វិជ្ជមានត្រូវបន្តព្យាបាលរហូតដល់ថ្ងៃទី២១ បូករួមនឹងអ្នកជំងឺអត់មានរោគសញ្ញារយៈពេល៣ថ្ងៃចុងក្រោយ ត្រូវបញ្ចប់ការព្យាបាល៕ អត្ថបទ ៖ រដ្ឋា

កម្ពុជាអនុញ្ញាតឱ្យនាំសាច់បង្កក និងទំនិញបង្កកពីប្រទេសឥណ្ឌាឡើងវិញ តែត្រូវប្រកាន់ខ្ជាប់លក្ខខណ្ឌសុវត្ថិភាព

ភ្នំពេញ ៖ អគ្គនាយកដ្ឋានគយ និងរដ្ឋាករកម្ពុជា តាមរយៈលិខិតដែលបានចេញផ្សាយ កាលពីថ្ងៃទី ១៩ខែមិថុនា កន្លងទៅនេះ បញ្ជាក់ថា កម្ពុជាបានសម្រេចអនុញ្ញាតឱ្យមានការនាំចូលនៅសាច់បង្កក និងទំនិញបង្កកពីប្រទេសឥណ្ឌាជាថ្មី ដោយគោរពតាមលក្ខខណ្ឌពីរជាចាំបាច់ ដើម្បីធានាសុវត្ថិភាពថា សាច់បង្កកនិងទំនិញបង្កកទាំងនោះពុំមានផ្ទុកវីរុសកូវីដ-១៩។សម្រាប់ការអនុញ្ញាតឱ្យមានការនាំចូលនូវសាច់បង្កក ក៏ដូចជាទំនិញបង្កកពីប្រទេស ឥណ្ឌា ចូលមកកម្ពុជាឡើងវិញនេះ គឺនឹងចាប់ផ្ដើមអនុវត្តចាប់ពីថ្ងៃទី២១ ខែមិថុនាឆ្នាំ២០២១។ ការអនុញ្ញាតឱ្យនាំចូលជាថ្មីនេះ រាជរដ្ឋាភិបាលកំណត់នូវលក្ខខណ្ឌចាំបាច់ចំនួនពីរជាបណ្ដោះអាសន្ន ដើម្បីធានាបាននូវសុវត្ថិភាពថាសាច់បង្កក និងទំនិញបង្កកទាំងនោះ គ្មានផ្ទុកវីរុសកូវីដ-១៩នោះទេ។លក្ខខណ្ឌទី ១ដែលកំណត់ គឺតម្រូវឱ្យមានវិញ្ញាបនបត្រ ឬលិខិតបញ្ជាក់បន្ថែមចេញដោយអាជ្ញាធរមានសមត្ថកិច្ចនៃប្រទេសដើមកំណើតទំនិញ ដែលបញ្ជាក់ថា គ្មានវីរុសកូវីដ-១៩ លើសាច់បង្កក រឺទំនិញបង្កកនោះទេ។ រីឯលក្ខខណ្ឌទី ២ ដែលរាជរដ្ឋាភិបាលកម្ពុជាកំណត់នោះ គឺពេលដែលមកកម្ពុជា ត្រូវមានការយកសំណាកធ្វើតេស្តរកវីរុសកូវីដ-១៩ ដោយវិទ្យាស្ថានប៉ាស្ទ័រកម្ពុជា មុននឹងអនុញ្ញាតឱ្យបំពេញបែបបទបញ្ចេញទំនិញពីគយ។ចំពោះលក្ខខណ្ឌទាំងពីរនេះ អាចត្រូវបានបន្ធូរបន្ថយ រឺដកចេញទាំងស្រុង ដោយអាស្រ័យលើ ស្ថានភាពធូរស្រាលនៃការរីករាលដាលជំងឺកូវីដ-១៩ នៅប្រទេសនាំចេញ និងលទ្ធផលនៃការធ្វើតេស្តលើសាច់បង្កកដោយវិទ្យាស្ថានប៉ាស្ទ័រកម្ពុជា បើរកឃើញអវិជ្ជមានជាបន្តបន្ទាប់។គួរបញ្ជាក់ថា កម្ពុជាបានផ្អាកការនាំចូលសាច់បង្កក និងទំនិញបង្កកពីប្រទេសឥណ្ឌា ចូលកម្ពុជា កាលពីដើមខែ ឧសភា កន្លងទៅ ដោយការផ្អាកនេះ ធ្វើឡើងក្រោមហេតុផលព្រួយបារម្ភថា សាច់បង្កកនិងទំនិញបង្កកទាំងនោះអាចបង្កជាហានិភ័យក្នុងការចម្លងកូវីដ-១៩ ចូលមកកម្ពុជា ខណៈពេលដែលប្រទេស ឥណ្ឌា បានឈរលើលំដាប់តារាង ជាប្រទេសដែលមានអាត្រាឆ្លង និងស្លាប់ខ្ពស់ដោយសារ កូវីដ-១៩។បើយោងតាម វេបសាយ Worldometers បង្ហាញថា ប្រទេសឥណ្ឌាគិតត្រឹមពេលបច្ចុប្បន្ននេះ គឺឈរលើលេខរៀងទី២ ជាប្រទេសដែលមានករណីឆ្លងច្រើនបំផុត បន្ទាប់ពីប្រទេសអាមេរិក។ គិតត្រឹមថ្ងៃនេះប្រទេស ឥណ្ឌា មានករណីឆ្លងចំនួនជិត៣០លាននាក់ និងមានករណីស្លាប់បាត់បង់ជីវិតដោយសារកូវីដ-១៩ ចំនួន ប្រមាណជិត ៣៩ម៉ឺននាក់៕អត្ថបទ៖ គឹមហុក

កម្ពុជានឹងផ្តោតលើបញ្ហាពហុភាគីនិយមដើម្បីដោះស្រាយបញ្ហាប្រឈមសកលកូវីដ-១៩ ក្នុង(ASEM)

ភ្នំពេញ ៖ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា នឹងអញ្ជើញចូលរួមពិធីបើកកិច្ចសន្ទនាគោលនយោបាយជាន់ខ្ពស់ ស្តីពី «កិច្ចប្រជុំ អាស៊ី-អឺរ៉ុប (ASEM) ខួប២៥ឆ្នាំ “ការពង្រឹងភាពជាដៃគូអាស៊ី-អឺរ៉ុបនៅក្នុងពិភពលោក ដែលកំពុងផ្លាស់ប្ដូរ» ដែលនឹងប្រព្រឹត្តទៅនៅថ្ងៃទី២២ ខែមិថុនានេះ នៅប្រទេសវៀតណាម តាមរយៈប្រព័ន្ធវីដេអូ។ឯកឧត្ដមឧបនាយករដ្ឋមន្ត្រី ប្រាក់ សុខុន នឹងអញ្ជើញធ្វើជាវាគ្មិនកិត្តិយសនៅក្នុងពិធីបើកកិច្ចសន្ទនាគោលនយោបាយជាន់ខ្ពស់ ស្តីពី «កិច្ចប្រជុំ អាស៊ី-អឺរ៉ុប (ASEM) ខួប២៥ឆ្នាំ ជាមួយនឹងឯកឧត្តម ប៊ូយ ថាញ់សឺន រដ្ឋមន្ត្រីការបរទេសវៀតណាម។ តំណាងជាន់ខ្ពស់ទទួលបន្ទុកកិច្ចការបរទេស និងគោលនយោបាយសន្តិសុខ និងជាអនុប្រធានគណៈកម្មការអឺរ៉ុប។ រដ្ឋមន្ត្រីការបរទេសសិង្ហបុរី និងរដ្ឋមន្ត្រីការបរទេស នៃសហព័ន្ធរុស្ស៊ី ផងដែរ។សុន្ទរកថាគន្លឹះរបស់ឯកឧត្តម ឧបនាយករដ្ឋមន្ត្រី នឹងផ្ដោតលើដំណើរការនៃការប្រព្រឹត្តទៅ របស់ កិច្ចប្រជុំកំពូលអាស៊ី-អឺរ៉ុប តាំងពីការបង្កើតឡើងនៅឆ្នាំ១៩៩៦ តួនាទីរបស់កិច្ចប្រជុំនេះ ជាគ្រឹះមួយ ក្នុង ចំណោមគ្រឹះនានា នៃអភិបាលកិច្ចសកល ការធ្វើឱ្យប្រសើរឡើងវិញនូវពហុភាគីនិយមដើម្បីដោះស្រាយបញ្ហាប្រឈមសកល ដូចជាវិបត្តិកូវីដ-១៩ និងផលប៉ះពាល់របស់ជំងឺនេះ ទៅលើវិស័យសេដ្ឋកិច្ច-សង្គម ជាដើម។ ក្នុងន័យនេះ មូលបទ នៃកិច្ចប្រជុំកំពូលអាស៊ី-អឺរ៉ុប លើកទី១៣ ដែលកម្ពុជា បានដាក់ចេញ «ការ ពង្រឹងពហុភាគីនិយម ដើម្បីកំណើនរួមគ្នា» គឺពិតជាមានភាពពាក់ព័ន្ធជាងពេលណាៗទាំងអស់។ឯកឧត្ដមឧបនាយករដ្ឋមន្ត្រី ក៏នឹងចែករំលែកចក្ខុវិស័យលើអនាគត របស់ASEM នៅឆ្នាំខាងមុខ ផងដែរ ជាពិសេស គឺកិច្ចសហប្រតិបត្តិការពហុវិស័យ របស់ASEM ដើម្បីសន្តិភាព និងការអភិវឌ្ឍ នៅអាស៊ី និងអឺរ៉ុប។ក្នុងការរំលឹកខួប២៥ឆ្នាំ នៃកិច្ចប្រជុំអាស៊ី-អឺរ៉ុប កិច្ចសន្ទនាជាន់ខ្ពស់នេះ នឹងផ្តល់នូវកាលានុវត្ត ភាព សម្រាប់ដៃគូ ASEM និងភាគីពាក់ព័ន្ធទាំងអស់ ដើម្បីឆ្លុះបញ្ចាំងពីសមិទ្ធផលរបស់ ASEM សម្រេច បាននាពេលកន្លងមក។ វាយតម្លៃពីទំនោរថ្មីៗ ដែលនឹងអាចជះឥទ្ធិពលមកលើតួនាទី របស់ASEM។ កំណត់វិស័យសហប្រតិបត្តិការសំខាន់ៗ របស់ASEM និងជំរុញភាពជាដៃគូអាស៊ី-អឺរ៉ុប ឱ្យកាន់តែរីក ចម្រើនថែមទៀត នៅក្នុងបរិបទនៃពិភពលោក ដែលកំពុងមានការផ្លាស់ប្តូរនាពេលបច្ចុប្បន្ននេះ៕អត្ថបទ ៖ មុត សុទ្ធ

ឯកឧត្តម ប្រាក់ សុខុន នឹងជំរុញភាគីនិយមបើកចំហឲ្យទទួលវ៉ាក់សាំងជាសកលដោយសមធម៌

ភ្នំពេញ ៖ សេចក្តីប្រកាសព័ត៌មានរបស់ក្រសួង ចេញថ្ងៃទី២១មិថុនា ម្សិលមិញនេះ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា នឹងអញ្ជើញចូលរួមសន្និសីទជាន់ខ្ពស់អាស៊ី-ប៉ាស៊ីហ្វិកស្តីពីកិច្ចសហប្រតិបត្តិការខ្សែក្រវាត់ និងផ្លូវ ក្រោមមូលបទ «ការជំរុញកិច្ចសហប្រតិបត្តិការស្តីពីការប្រយុទ្ធប្រឆាំង ជំងឺរាតត្បាតសកល សម្រាប់ការងើបឡើងវិញប្រកបដោយនិរន្តរភាព ដែលនឹងប្រព្រឹត្តទៅតាម ប្រព័ន្ធវីដេអូ នៅថ្ងៃទី ២៣ ខែមិថុនា ឆ្នាំ ២០២១ នៅទីក្រុងប៉េកាំង សាធារណរដ្ឋប្រជាមានិតចិន។សេចក្តីប្រកាសព័ត៌មានដដែល បានបញ្ជាក់ថា ឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិន នឹង ធ្វើជាប្រធានដឹកនាំសន្និសីទ ដោយមានការចូលរួមពីរដ្ឋមន្ត្រីការបរទេសមកពីបណ្តាប្រទេសដៃគូ កិច្ចសហប្រតិបត្តិការខ្សែក្រវាត់ និងផ្លូវ និងតំណាងជាន់ខ្ពស់របស់អង្គការសហប្រជាជាតិ។ សន្និសីទ នឹងពិភាក្សា ព្រមទាំងផ្លាស់ប្តូរយោបល់រិះរកមធ្យោបាយ ដើម្បីពង្រឹងកិច្ចខិតខំប្រឹងប្រែងរួមគ្នាបន្ថែម ទៀតក្នុងការប្រយុទ្ធប្រឆាំងនឹងជំងឺរាតត្បាតកូវីដ-១៩ និងដើម្បីសម្រេចបាននូវការស្ដារសេដ្ឋកិច្ច សង្គមឡើងវិញ ព្រមទាំងលើកកម្ពស់ភាពជាដៃគូសម្រាប់ការអភិវឌ្ឍប្រកបដោយចីរភាព និងបរិយាប័ន្ន។ឯកឧត្ដមឧបនាយករដ្ឋមន្ត្រី ប្រាក់ សុខុន នឹងអញ្ជើញថ្លែងបទអន្តរាគមន៍ ដោយផ្តោតលើ ទិដ្ឋភាពសំខាន់ៗ រួមមាន ការលើកកម្ពស់ពហុភាគីនិយមដែលបើកចំហរ និងប្រកបដោយបរិយាប័ន្ន ការជំរុញភាពជាដៃគូ និងកិច្ចសហប្រតិបត្តិការអន្តរជាតិសំដៅធានានូវការទទួលបានវ៉ាក់សាំងការពារ ជំងឺកូវីដ-១៩ ប្រកបដោយសមធម៌សម្រាប់សកលលោក និងការស្តារសេដ្ឋកិច្ច-សង្គមប្រកបដោយ ចីរភាព។ ឯកឧត្ដម ឧបនាយករដ្ឋមន្ត្រីក៏នឹងចែករំលែកអនុសាសន៍ប្រកបដោយអត្ថន័យទូលំទូលាយនិងជាក់លាក់ដល់សន្និសីទផងដែរ៕អត្ថបទ៖ មុត សុទ្ធ

ពីរថ្ងៃទៀត រដ្ឋសភានឹងប្រជុំពេញអង្គបោះឆ្នោតផ្តល់សេចក្តីទុកចិត្តប្រធាន(គជប)ថ្មី

ភ្នំពេញ ៖ រយៈពេលពីរថ្ងៃទៀត គឺត្រូវនឹងថ្ងៃទី២៤ខែមិថុនានេះ រដ្ឋសភា នឹងប្រជុំពេញអង្គបោះឆ្នោតផ្ដល់សេចក្ដីទុកចិត្តប្រធានថ្មី នៃគណៈកម្មាធិការជាតិរៀបចំការបោះឆ្នោត។សម្តេចអគ្គមហាពញាចក្រី ហេង សំរិន ប្រធានរដ្ឋសភា នៅព្រឹកថ្ងៃទី២២ ខែមិថុនា នេះ បានដឹកនាំកិច្ចប្រជុំគណៈកម្មាធិការអចិន្ត្រៃយ៍រដ្ឋសភា តាមប្រព័ន្ធវីដេអូ ដោយកិច្ចប្រជុំ បានអនុម័តកំណត់ កាលបរិច្ឆេទបើកសម័យប្រជុំរដ្ឋសភា លើកទី៦ នីតិកាលទី៦ នៅថ្ងៃទី២៤ ខែមិថុនានេះ។ អ្វីដែលសំខាន់នោះ គឺការប្រជុំពេញអង្គបោះឆ្នោតផ្ដល់សេចក្ដីទុកចិត្ត ប្រធានថ្មី នៃគណៈកម្មាធិការជាតិរៀបចំការបោះឆ្នោត។កិច្ចប្រជុំព្រឹកនេះ គណៈកម្មាធិការអចិន្ត្រៃយ៍រដ្ឋសភា បានអនុម័តរបៀបវារៈមួយចំនួនទៀត សម្រាប់សម័យប្រជុំរដ្ឋសភា លើកទី៦ នីតិកាលទី៦ រួមមាន ព្រះរាជសាររបស់ព្រះករុណាព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជូនសម័យប្រជុំរដ្ឋសភា លើកទី៦ នីតិកាលទី៦។ របាយការណ៍សង្ខេប ស្តីពីសកម្មភាពការងាររបស់រដ្ឋសភា ចន្លោះសម័យប្រជុំរដ្ឋសភា លើកទី៥ និងលើកទី៦ នីតិកាលទី៦។ ការសម្រេចអំពីសុពលភាព នៃអាណត្តិរបស់បេក្ខជនជាប់ឆ្នោតតំណាងរាស្ត្រ នៃរដ្ឋសភា នីតិកាលទី៦ ចំនួនពីររូប ជំនួសសមាជិក ដែលបានលាលែង។ចំណែកសេចក្តីព្រាងច្បាប់ ដែលនឹងលើកយកមកពិភាក្សា និងអនុម័តនៅក្នុងសម័យប្រជុំរដ្ឋសភា លើកទី៦ នីតិកាលទី៦នោះ រួមមាន សេចក្តីព្រាងច្បាប់ ស្តីពីការអនុម័តយល់ព្រមលើការធានាទូទាត់ របស់រាជរដ្ឋាភិបាលកម្ពុជា ឱ្យក្រុមហ៊ុន ស្មេថេក ខូ អិលធីឌី សម្រាប់គម្រោងអភិវឌ្ឍខ្សែបណ្តាញបញ្ជូន អគ្គិសនី តង់ស្យុង ៥០០គីឡូវ៉ុល ពីខេត្តបាត់ដំបង ទៅកាន់ព្រំដែនកម្ពុជា-ថៃ និងសម្រាប់គម្រោងអភិវឌ្ឍ ខ្សែបណ្តាញបញ្ជូនអគ្គិសនី តង់ស្យុង៥០០គីឡូវ៉ុល ពីរាជធានីភ្នំពេញ ទៅកាន់ព្រំដែនកម្ពុជា-ឡាវ។ សេចក្តីព្រាងច្បាប់ ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាលកម្ពុជា ឱ្យក្រុមហ៊ុន អគ្គិសនីវៀតណាម សម្រាប់ធានាលើការទិញថាមពលអគ្គិសនីពីប្រទេសវៀតណាម និងសេចក្តីព្រាងច្បាប់ ស្តីពីការអនុម័តយល់ព្រមលើការធានាទូទាត់ របស់រាជរដ្ឋាភិបាលកម្ពុជា ឱ្យក្រុមហ៊ុន ឆាយណា ណេសិន ណល ហេវី ម៉ាស៊ីនណឺរី ខបភើរេសិន សម្រាប់គម្រោងអភិវឌ្ឍវារីអគ្គិសនីស្ទឹងតាតៃលើ អានុភាព ១៥០ មេហ្កាវ៉ាត់ ខេត្តកោះកុង៕អត្ថបទ៖ បាន ចក់

ទេសរដ្ឋមន្ត្រី លី ធុជ អនុញ្ញាតឲ្យតំណាង UNDP ប្រចាំនៅកម្ពុជាដែលចប់អាណត្តិ ចូលជួបសម្ដែងការគួរសម និងជម្រាបលា

ភ្នំពេញ ៖ ព្រឹកថ្ងៃទី២២ ខែមិថុនា ឆ្នាំ២០២១ នៅទីស្នាក់ការអាជ្ញាធរមីន ឯកឧត្តម ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានអនុញ្ញាតឲ្យ លោក Nick Beresford តំណាង UNDP ប្រចាំនៅកម្ពុជា ចូលជួបសម្តែងការគួរសម និងជម្រាបលា ក្នុងឱកាសដែលលោកបានបញ្ចប់អាណត្តិបេសកកម្មរយៈពេល០៥ឆ្នាំនៅកម្ពុជា ចាប់ពីឆ្នាំ២០១៦ មក។ក្នុងជំនួបនេះ លោក Nick Beresford មានប្រសាសន៍ថា លោកមានសេចក្តីសប្បាយរីករាយដែលបានបំពេញការងារនៅកម្ពុជា ព្រមទាំងទទួលបាននូវកិច្ចសហប្រតិបត្តិការយ៉ាងល្អ និងការគាំទ្រពីរាជរដ្ឋាភិបាលកម្ពុជា លើការរួមចំណែកអភិវឌ្ឍន៍នៅកម្ពុជា ក្នុងនោះរួមមានការងារបោសសម្អាតមីនមនុស្សធម៌ផងដែរ និងបានចូលរួមចំណែកក្នុងផ្តល់ដីមានសុវត្ថិភាពជូនប្រជាពលរដ្ឋនៅទីជនបទ និងកាត់បន្ថយអត្រាគ្រោះថ្នាក់ដោយសារមីនជាដើម។ ក្នុងនាមរាជរដ្ឋាភិបាលកម្ពុជា ឯកឧត្តម ទេសរដ្ឋមន្ត្រី លី ធុជ បានថ្លែងអំណរគុណ និងវាយតម្លៃខ្ពស់ចំពោះអង្គការ UNDP ដែលបានចូលរួមចំណែកគាំទ្រដល់ការងារអភិវឌ្ឍន៍នៅកម្ពុជាលើគ្រប់វិស័យ ក្នុងនោះវិស័យបោសសម្អាតមីន តាមរយៈគម្រោងបោសសម្អាតមីនដើម្បីលទ្ធផលចាប់តាំងពីឆ្នាំ២០០៦ រហូតដល់ឆ្នាំ២០២៥ UNDP បានកៀរគរនូវធនធានសរុបថវិកាប្រមាណ ៨៤,៨៦០,៨៩៥ ដុល្លារអាមេរិក ផ្តោតលើខេត្តបាត់ដំបង ប៉ៃលិន និងបន្ទាយមានជ័យ ក្រោមការចូលរួមផ្តល់ជំនួយគាំទ្រពីបណ្តាប្រទេសម្ចាស់ជំនួយ និងដៃគូអភិវឌ្ឍន៍ រួមមាន៖ UN អូស្ត្រាលី កាណាដា សាធារណរដ្ឋកូរ៉េ ស្វីស អេស្ប៉ាញ សហរដ្ឋអាមេរិក អូទ្រីស អង់គ្លេស ន័រវេស្ស ស៊ុយអែដ អៀរឡង់ បែលហ្សិក និងបារាំង ដែលក្នុងនោះអង្គការ UNDP បានរួមចំណែកថវិកាសរុប៦,០៧៩,៧៩៩ ដុល្លារអាមេរិក។ឯកឧត្តម ទេសរដ្ឋមន្ត្រី បានចាត់ទុកអង្គការ UNDP គឺជាដៃគូការងារដ៏រឹងមាំ និងធ្វើការងារមិនខ្លាចការនឿយហត់ ជាមួយអាជ្ញាធរមីន ដែលបានចូលរួមយ៉ាងសកម្ម ក្នុងការស្វែងរកការគាំទ្រ ដល់គម្រោងបោសសម្អាតមីន ដើម្បីលទ្ធផលទាំងផ្នែកថវិកា សម្ភារៈ និងការផ្តល់ប្រឹក្សាបច្ចេកទេស។ទេសរដ្ឋមន្ត្រី លី ធុជ បានបន្តទៀតថា ក្រោមជំនួយគាំទ្រខាងលើ និងក្រោមការសម្របសម្រួលរបស់លោក Nick Beresford ចាប់ពីឆ្នាំ២០១៦ លោកបានខិតខំប្រឹងប្រែងកៀរគរនូវធនធានគិតជាថវិកាសរុប ៣២,២៣១,៤១៩ ដុល្លារអាមេរិក ដែលនឹងត្រូវប្រើប្រាស់រហូតដល់ឆ្នាំ២០២៥ ក្នុងការគោលដៅបញ្ចប់ការគំរាមកំហែងដោយសារមីន ស្របតាមចក្ខុវិស័យរបស់រាជរដ្ឋាភិបាលកម្ពុជា។សូមបញ្ជាក់ថា ក្នុងបេសកកម្មរយៈពេល ០៥ឆ្នាំនេះ សម្រាប់វិស័យសកម្មភាពមីនមនុស្សធម៌ លោក Nick Beresford បានទទួលនូវមេដាយសហមេត្រី ថ្នាក់មហាសិរីវឌ្ឍន៍ ពីរាជរដ្ឋាភិបាលកម្ពុជាក្នុងឱកាសប្រារព្ធសន្និបាតជាតិវិស័យសកម្មភាពមីន ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នាថ្ងៃទី១៧ ខែឧសភា ឆ្នាំ២០១៨៕

ក្រសួងទេសចរណ៍ ចាប់ផ្តើមរៀបចំប្រព័ន្ធវិញ្ញាបនបត្រវិជ្ជាជីវៈទេសចរណ៍ជំរុញយុវជនបន្តសិក្សាលើជំនាញទេសចរណ៍

ភ្នំពេញ ៖ ដើម្បីជំរុញអោយយុវជនកម្ពុជាដែលបានបោះបង់ការសិក្សានានា ទទួលបានសិក្សាជំនាញនានា ជាបន្តបន្ទាប់ក្នុងវិស័យទេសចរណ៍ផងដែរនោះ និងអាចចូលបំរើការងារនៅតាមមូលដ្ឋានអាជីវកម្មទេសចរណ៍បាន ក្រសួងទេសចរណ៍បានសម្រេចរៀបចំគុណវុឌ្ឍិជាតិវិជ្ជាជីវៈទេសចរណ៍ វិញ្ញាបនបត្រវិជ្ជាជីវៈកម្រិតដំបូង ជូនដល់យុវជនដែលសិក្សាជំនាញទេសចរណ៍ចប់អាចយកវិញ្ញាបនបត្រនោះទៅប្រើប្រាស់ស្វែងរកការសិក្សាជំនាញបន្តរហូតកម្រិតឧត្តមសិក្សា។នៅក្នុងកិច្ចប្រជុំបច្ចេកទេសស្តីពី ការរៀបចំគុណវុឌ្ឍិជាតិវិជ្ជាជីវៈទេសចរណ៍ វិញ្ញាបនបត្រវិជ្ជាជីវៈលើជំនាញសេវាម្ហូបអាហារ និងភេសជ្ជៈ ជំនាញការិយាល័យជួរមុខ និងគេហកិច្ច នៅល្ងាចថ្ងៃទី២១ ខែមិថុនានេះ ។លោក ជួប រតនា ប្រធាននាយកដ្ឋានផែនការអភិវឌ្ឍទេសចរណ៍ និងប្រធានលេខាធិការដ្ឋានគណៈកម្មការគ្រប់គ្រងគម្រោងហូកា បានថ្លែងថា នៅក្នុងដំណាក់ដំបូងនេះ ក្រសួងទេសចរណ៍ចាប់ផ្តើមរៀបចំវិញ្ញាបនបត្រវិជ្ជាជីវៈ១ ក្របខ័ណ្ឌគុណវុឌ្ឍិជាតិ ជូនដល់បណ្តាយុវជននានាដែលទទួលបានការបណ្តុះបណ្តាលលើ ជំនាញសេវាម្ហូបអាហារនិងភេសជ្ជៈ ជំនាញការិយាល័យជួរមុខ និងគេហកិច្ច ដើម្បីអោយគេយកវិញ្ញាបនបត្រនោះទៅប្រើប្រាស់ស្វែងរកការងារធ្វើផង និងប្រើប្រាស់ដើម្បីបន្តការសិក្សាជំនាញទេសចរណ៍ រហូតដល់បរិញ្ញាបត្ររង និងបរិញ្ញាបត្រជាន់ខ្ពស់ជាដើម។លោក បន្តថា អនុវត្តគម្រោងកិច្ចសហប្រតិបត្តិការជាមួយអង្គការស្វីសខនថាក់ នៅក្នុងដំណាក់កាលបន្ទាប់ក្រសួងទេសចរណ៍នឹងបន្តរៀបចំគុណវុឌ្ឍិជាតិវិជ្ជាជីវៈ វិញ្ញាបនបត្រវិជ្ជាជីវៈលើជំនាញបដិសណ្ឋារកិច្ច ជំនាញចុងភៅ និងជំនាញនានាទៀតក្នុងវិស័យទេសចរណ៍ ហើយគ្រប់យុវជនដែលសិក្សាជំនាញទេសចរណ៍ ដែលទទួលស្គាល់ក្នុងកម្រិតគុណវុឌ្ឍិជាតិវិជ្ជាជីវៈទេសចរណ៍នេះ គេក៏អាចបន្តសិក្សា ឬ អាចដាក់ពាក្យស្នើប្រឡងតេស្តសមត្ថភាពដើម្បីទទួលវិញ្ញាបនបត្រវិជ្ជាជីវៈទេសចរណ៍ និងសញ្ញាប័ត្រដែលទទួលស្គាល់កម្រិតស្តង់ដារអាស៊ានផងដែរ។ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ មានប្រសាសន៍ថា ការបង្កើតគុណវុឌ្ឍិជាតិ វិជ្ជាជីវៈទេសចរណ៍នេះ គឺជាការបង្កលក្ខណៈអោយយុវជនកម្ពុជា ជាពិសេសយុវជនបោះបង់ការសិក្សា យុវជនក្នុងក្រុមងាយរងគ្រោះ យុវជនបាត់បង់ឱកាសការងារនានា និងពលករចំណាកស្រុកនានា ទទួលបានឱកាសការសិក្សា ជំនាញវិជ្ជាជីវៈទេសចរណ៍ ក្នុងប្រព័ន្ធច្បាស់លាស់ដើម្បីទទួលបានការទទួលស្គាល់ជាផ្លូវការលើចំណេះដឹង ជំនាញ និងបទពិសោធន៍ ដែលខ្លួនបានសិក្សានិងអនុវត្ត ព្រមទាំងបើកច្រកអោយយុវជនកម្ពុជាយើងទទួលបានការសិក្សាពេញមួយជីវិត ។ឯកឧត្តម ប៉ាក់ សុខុម បញ្ជាក់ថា តាមរយៈកិច្ចប្រជុំពិគ្រោះយោបល់តាមប្រព័ន្ធ VIDEO CONFERENCE នៅថ្ងៃនេះ គឺជាចំណុចផ្ដើមដ៏មានអត្ថន័យបំផុតសម្រាប់វិស័យទេសចរណ៍កម្ពុជា ពិសេសការផ្តល់ឱកាសអោយយុវជនជំនាន់ក្រោយៗ ទទួលបានការសិក្សាជំនាញវិជ្ជាជីវៈតាម ប្រព័ន្ធដែលមានការទទួលស្គាល់ត្រឹមត្រូវ៕អត្ថបទ ស៊ុម សុខជា

ខេត្តកណ្តាលដំណើរការចាក់វ៉ាក់សាំងកូវីដ-១៩ ជូនពលរដ្ឋទូទៅបានជាង៧០%ហើយ លើកលែងស្ត្រីមានផ្ទៃពោះមិនអនុញ្ញាតចាក់នោះទេ

កណ្ដាល ៖ នៅសល់ប្រមាណតែបីថ្ងៃទៀតប៉ុណ្ណោះ ដំណើរការចាក់វ៉ាក់សាំងការពារកូវីដ-១៩ដូសទី១ នៅតាមទីប្រជុំជន និងកម្មកររោងចក្រតាមក្រុងស្រុកនៅខេត្តកណ្តាល នឹងត្រូវបិទបញ្ចប់ ហើយក្រុមពេទ្យនឹងដំណើរការចាក់តែដូសទី២។ សម្រាប់យុទ្ធនាការចាក់វ៉ាក់សាំងនេះ សំគាល់ឃើញថា បណ្តាស្ត្រីជាកម្មការិនីមានផ្ទៃពោះកំពុងបំរើការងារនៅតាមរោងចក្របានបង្ហាញពីការសោកស្តាយដោយសារមិនអាចចាក់វ៉ាក់សាំងពេលឱកាសមកដល់នេះ។បើតាមកម្មការិនីដែលមានផ្ទៃពោះកំពុងបំរើការងារនៅក្នុងរោងចក្រប្រូពីស័ស ក្នុងក្រុងតាខ្មៅខេត្តកណ្តាល បានប្រាប់ BTV នៅថ្ងៃទី២១ ខែមិថុនានេះ ថា នៅក្នុងរោងចក្រប្រូពីស័សនេះ គ្រប់កម្មករកម្មការិនីបានចាក់វ៉ាក់សាំងការពារកូវីដ-១៩ រួចរាល់ហើយ ប៉ុន្តែសម្រាប់កម្មការិនីអំឡុងពេលកំពុងមានផ្ទៃពោះ ក្រុមពេទ្យបានណែនាំថាមិនអាចចាក់វ៉ាក់សាំងនេះបាននោះទេ ដោយសារបារម្ភខ្លាចប៉ះពាល់ទារកនៅក្នុងផ្ទៃម្តាយ តែទោះយ៉ាងណា បណ្តាកម្មការិនីដែលមានផ្ទៃពោះទាំងនោះ ក៏បានត្រៀមទៅចាក់ការពារខ្លួនផងដែរ នៅក្រោយពេលសម្រាលបានបីខែ។កម្មការិនីកំពុងពរពោះ បានថ្លែងថា ទោះយ៉ាងណានៅក្នុងអំឡុងពេលនេះ យើងបានបន្តធ្វើការងារក្នុងរោងចក្រជាធម្មតា តែត្រូវប្រកាន់ខ្ជាប់អនុវត្តវិធាន៣កុំ៣ការពារយ៉ាងខ្លាំងក្លាបំផុត ចៀសវាងការឆ្លងមេរោគកូវីដ-១៩ អំឡុងពេលពរពោះនេះអោយខាងតែបាន។បើតាមវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាល បានថ្លែងថា គិតត្រឹមព្រឹកថ្ងៃទី២១ ខែមិថុនានេះ ក្រុមពេទ្យបាននិងកំពុងចុះចាក់វ៉ាក់សាំងការពារកូវីដ-១៩ ដូសទី១ ជូនពលរដ្ឋ និងកម្មករកម្មការិនីទូទៅនៅតាមទីប្រជុំជនតាមភូមិឃុំសង្កាត់ តាមរោងចក្រនានានៅទូទាំងខេត្តកណ្តាល បានចំនួនជាង៧០% នៃចំនួនវ៉ាក់សាំងដែលត្រូវចាក់ជិត៦០ម៉ឺននាក់ (៥៩៩២៥១នាក់) ហើយនៅសល់ប្រមាណតែ៣ថ្ងៃទៀត ការចាក់ដូសទី១ នឹងត្រូវបិទបញ្ចប់ ហើយក្រុមពេទ្យនឹងត្រូវបន្តចាក់តែដូសទី២ ជូនពលរដ្ឋ និងកម្មករកម្មការិនីណាដែលបានចាក់ដូសទី១តែប៉ុណ្ណោះ។វេជ្ជបណ្ឌិត គួយ ប៊ុនធឿន បញ្ជាក់ថា នៅក្នុងអំឡុងយុទ្ធនាការចាក់វ៉ាក់សាំងជូនពលរដ្ឋអាទិភាពមានមន្ត្រីរាជការជួរមុខ នគរបាល មន្ត្រីចូលនិវត្តន៍ និងអាជីវករជាដើមកន្លងមក គឺក្រុមពេទ្យចាក់បានប្រមាណជាង៧ម៉ឺននាក់ ហើយនៅក្នុងយុទ្ធនាការចាក់ជូនពលរដ្ឋទូទៅតាមទីប្រជុំជន និងកម្មកររោងចក្រនានា ដែលកំពុងដំណើរចាក់បានចំនួន១១ថ្ងៃនេះ គឺយើងចាក់បានចំនួនជាង៤២ម៉ឺននាក់ ។បើតាម ឯកឧត្តម គង់ សោភ័ណ្ឌ អភិបាលខេត្តកណ្តាល បានថ្លែងថា បច្ចុប្បន្ន រដ្ឋបាលខេត្តកណ្តាល មានផែនការចាក់វ៉ាក់សាំងការពារកូវីដ-១៩ ជូនពលរដ្ឋដែលត្រូវចាក់ចាប់ពីអាយុ១៨ឆ្នាំឡើងទៅ គឺមានចំនួនប្រមាណជាង៩០ម៉ឺននាក់៕អត្ថបទ ៖ ស៊ុម សុខជា

សិស្សថ្នាក់ទី១២លើកឡើងនូវមតិផ្សេងគ្នាជុំវិញការប្រឡង ដែលក្រសួងអប់រំប្រកាសថា នៅតែបន្តរៀបចំ

ភ្នំពេញ ៖ ថ្មីៗនេះក្រសួងអប់រំ បានប្រកាសថា ការប្រឡងថ្នាក់ទី៩ ក៏ដូចជា ការប្រឡងថ្នាក់ជាតិថ្នាក់ទី១២ នៅតែបន្តរៀបចំ ដោយប្រកាន់ខ្ជាប់នូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព។ ការអះអាងរក្សាការប្រឡងនេះ គឺមានការចាប់អារម្មណ៍ច្រើន ជាពិសេសសិស្សថ្នាក់ទី១២ ដោយមានទាំងការគាំទ្រ និងការមិនគាំទ្រ។ក្រសួងអប់រំយុវជន និងកីឡា បានប្រកាសនាពេលចុងសប្ដាហ៍មុនថា ការប្រឡងទាំងថ្នាក់ទី៩ និងថ្នាក់ទី២ ទាំងរដ្ឋនិងឯកជន នឹងរៀបចំឡើង ដោយប្រកាន់ខ្ជាប់នូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព។ ក្រសួងអប់រំ បានកំណត់យកថ្ងៃទី១៥ វិច្ឆិកា ២០២១ សម្រាប់ការប្រឡងថ្នាក់ទី៩ និងកំណត់យកថ្ងៃទី០៦ ធ្នូ២០២១ សម្រាប់ការប្រឡងបាក់ឌុបសម្រាប់សាលារដ្ឋ។ ចំពោះសាលារៀនឯកជនវិញ គឺកំណត់យកថ្ងៃទី១១ តុលា ២០២១ សម្រាប់សិស្សថ្នាក់ទី៩ និងកំណត់យកថ្ងៃទី២៥ តុលា ២០២១ សម្រាប់សិស្សថ្នាក់ទី ១២។ការរក្សាការប្រឡងនេះ គឺមានការចាប់អារម្មណ៍ច្រើន ជាពិសេសសិស្សថ្នាក់ទី១២ដែលត្រូវបញ្ចប់ថ្នាក់វិទ្យាល័យ ចូលទៅសកលវិទ្យាល័យ។ សិស្សមួយចំនួនលើកឡើងនូវជំនឿទុកចិត្តចំពោះការរៀបចំ របស់ក្រសួងអប់រំ ដោយខ្លួនកំពុងព្យាយាមខិតខំរៀនសូត្រគ្រប់វិធីសាស្ត្រ សម្រាប់ការឡងខាងមុខ។យ៉ាងណាម៉ិញ ការរក្សាការប្រឡងនេះ ក៏មានការមិនពេញចិត្តមួយចំនួន ពីសំណាក់សិស្សផងដែរ។ ជាក់ស្ដែង គឺមានការចូលទៅបញ្ចេញមតិសម្ដែងការមិនពេញមួយចំនួន ក្នុងទំព័រហ្វេសប៊ុកផ្លូវការរបស់ក្រសួងអប់រំផ្ទាល់តែម្ដង។ ការលើកឡើងនូវភាពមិនពេញចិត្ត ភាគច្រើនគឺក្រោមហេតុផល សិក្សានៅថ្នាក់រៀនបានតិច និងភាពពិបាកនៃការសិក្សាតាមប្រព័ន្ធអនឡាញ ដែលក្រសួងបន្តផ្ដល់ជូនរាល់ថ្ងៃ។ ភាពពិបាកកាន់តែមានច្រើន ពិសេសសម្រាប់សិស្សនៅតាមបណ្ដាខេត្តជនបទ។ សម្រាប់អ្នកប្រើប្រាស់ហ្វេសប៊ុក មួយនាក់ឈ្មោះ Dazai Sama បានលើកឡើងថា “ ទី ១២ឆ្នាំនេះ ពិបាកជាងឆ្នាំមុនឆ្ងាយណាស់ ឆ្នាំមុនគេបានរៀននៅសាលាខ្លះ តែឆ្នាំនេះវិញរៀនបានមួយខែ បិទសាលាបាត់ រៀនតាមអនឡាញ ខ្ញុំខំប្រឹងកត់មេរៀនយកពិន្ទុប្រចាំខែហើយ តែបើប្រឡងបាក់ឌុបវិញគឺសង្ឃឹមតិចណាស់ គណិតរូប គីមី ជីវៈ មិនសូវមានការរៀនតាម zoom ទេ ភាគច្រើនគឺមុខវិជ្ជាកត់មេរៀនបានតែត្រឹមកត់មេរៀនហើយ ផ្ញើអោយគ្រូដើម្បីយកពិន្ទុ។ និយាយតាមត្រង់បើខ្ញុំធ្លាក់មែនគឺ អស់ចិត្តហើយអត់ស្ដាយក្រោយទេ។” រីឯអ្នកប្រើហ្វេសប៊ុក មួយនាក់ទៀត បានបានលើកឡើងថា “ សិស្សធ្លាក់យ៉ាងតិច ៧០ ទៅ ៨០% បើប្រឡងទាំងខ្ញុំទាំងគេ តើយកអ្វីទៅប្រឡងមួយឆ្នាំរៀនបានពីរខែ?” ។សម្រាប់ឆ្នាំ ២០២១នេះ ក្រសួងអប់រំបានសម្រេចផ្អាកការសិក្សាក្នុងថ្នាក់រៀនទូទាំងប្រទេស គ្រប់កម្រិតសិក្សាទាំងរដ្ឋ និងឯកជន តាំងពីថ្ងៃទី ២០ ខែមីនា មកម្ល៉េះ។ មកទល់ពេលនេះ ក៏ពុំទាន់មានការជូនដំណឹងជាថ្មី ពីការបើកដំណើរការថ្នាក់រៀនវិញនោះទេ ព្រោះព្រឹត្តិការណ៍សហគមន៍ ២០កុម្ភៈ មិនទាន់បានបិទបញ្ចប់និងករណីឆ្លងស្ថិតក្នុងចំនួនច្រើនជារៀងរាល់ថ្ងៃ។ សព្វថ្ងៃ ក្រសួងអប់រំនៅតែបន្តលើកទឹកចិត្ត ជំរុញឱ្យសិស្សព្យាយាមធ្វើស្វ័យសិក្សា ក៏ដូចជាសិក្សាតាមប្រព័ន្ធអនឡាញ ដែលក្រសួងមានផ្ដល់ជូន៕អត្ថបទ ៖ គឹមហុក

គណៈកម្មការរដ្ឋសភា និងតំណាងរាជរដ្ឋាភិបាលបានលើកយកសេចក្តីព្រាងច្បាប់ចំនួនពីរមកពិភាក្សា

ភ្នំពេញ ៖ គណៈកម្មការជំនាញរដ្ឋសភា នៅព្រឹកថ្ងៃទី២១ ខែមិថុនា ឆ្នាំ២០២១នេះ បានបើកកិច្ចប្រជុំជាមួយតំណាងរាជរដ្ឋាភិបាល ដោយបានលើកយកសេចក្តីព្រាងច្បាប់ចំនួន២ ដើម្បីពិភាក្សាគ្នា ដែលសេចក្តីព្រាងច្បាប់នោះគឺស្តីពី ការអនុម័តយល់ព្រមលើកិច្ចព្រមព្រៀងភាពជាដៃគូរសេដ្ឋកិច្ចគ្រប់ជ្រុងជ្រោយតំបន់ និងសេចក្តីព្រាងច្បាប់ ស្តីពីវិសោធនកម្មមាត្រា១៨ថ្មី នៃច្បាប់ស្តីពីវិសោធនកម្មមាត្រា១៨ នៃច្បាប់ស្តីពីសវនកម្ម នៃព្រះរាជាណាចក្រកម្ពុជា។កិច្ចប្រជុំនេះ បានធ្វើឡើងក្រោមអធិបតីភាព ឯកឧត្តមបណ្ឌិត ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា សហការជាមួយគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្មរ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា និងឯកឧត្តម នឹម ច័ន្ទតារា លេខាធិការគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា ដោយមានការចូលរួមពីលោក លោកស្រីអនុប្រធាន លេខាធិការ និងសមាជិក សមាជិកាគណៈកម្មការជំនាញនានា។តំណាងភាគីរាជរដ្ឋាភិបាលរួមមាន ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោកស្រី សោម គឹមសួគ៌ អគ្គសវនករនៃអាជ្ញាធរសវនកម្មជាតិ តំណាងរាជរដ្ឋាភិបាលការពារសេចក្តីព្រាងច្បាប់ទាំងពីរនេះ ដែលផ្សាយចេញពីសាលសន្និសីទបាយ័ន នៃវិមានរដ្ឋសភា ទៅកាន់ក្រសួងពាក់ព័ន្ធ តាមប្រព័ន្ធវីដេអូ។នៅក្នុងកិច្ចពិភាក្សានោះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងថា សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងភាពជាដៃគូរសេដ្ឋកិច្ចគ្រប់ជ្រុងជ្រោយតំបន់ គឺជាកិច្ចព្រមព្រៀងភាពជាដែគូសេដ្ឋកិច្ចគ្រប់ជ្រុងជ្រោយតំបន់ដែលតទៅនេះ ហៅកាត់ថាកិច្ចព្រមព្រៀងអាសិប (Regional Comprehensive Economic Partnership RCEP) ជាកិច្ចព្រមព្រៀងពាណិជ្ជកម្មសេរី តំបន់ ដើមឡើយមានប្រទេសចូលរួមចរចាចំនួន១៦ រួមមាន ៖ ប្រទេសសមាជិកអាស៊ានទាំង១០ និងប្រទេសដៃគូរពាណិជ្ជកម្មសេរី អាស៊ានចំនួន៦ ដូចជា ៖ ប្រទេសអូស្ត្រាលី ចិន ឥណ្ឌា ជប៉ុន កូរ៉េខាងត្បូង និង ណូវែលហ្សេឡង់។ បន្ទាប់មកទៀត ដោយសារបញ្ហាផ្ទៃក្នុងរបស់ខ្លួនឥណ្ឌា បានប្រកាសដកខ្លួនចេញពីកិច្ចព្រមព្រៀងអាសិប ក្នុងកិច្ចប្រជុំកំពូលអាសិបលើកទី៣ កាលពីឆ្នាំ២០១៩ នៅប្រទេសថៃ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានបន្ថែមថា កិច្ចព្រមនេះ ត្រូវបានរចនាឡើង ដើម្បីសម្រេចបាននូវគោលបំណងដោយវិធីសាស្ត្រមួយចំនួន ដូចជា តាមរយៈភាពទន់ភ្លន់ដែលសមស្រប និងបទប្បញ្ញត្តិសម្រាប់ប្រព្រឹត្តកម្មពិសេស ជាពិសេសសម្រាប់ប្រទេសកម្ពុជា ឡាវ មីយ៉ាន់ម៉ា និងវៀតណាម និងភាពទន់ភ្លន់បន្ថែម សម្រាប់ប្រទេសអភិវឌ្ឍន៍តិចតួច។ លើសពីនេះទៀតកិច្ចព្រមព្រៀងអាសិប បញ្ចូលនូវកិច្ចសហប្រតិបត្តិការបច្ចេកទេស និងការកសាងសមត្ថភាព ដើម្បីអនុវត្តន៍កាតព្វកិច្ចនៅក្នុងកិច្ចព្រមព្រៀង និងទាញយកផលប្រយោជន៍ឱ្យបានជាអតិបរមា។ កិច្ចព្រមព្រៀងអាសិប ក៏បានបញ្ចូលនៅបទប្បញ្ញត្តិ ដែលធានាថាប្រទេសចូលរួមចរចាទោះបីសេដ្ឋកិច្ច និងទំហំអាជីវកម្មខុសៗគ្នាក៏ដោយអាចទទួលបានអត្ថប្រយោជន៍ពីពាណិជ្ជកម្ម។ដោយឡែកសេចក្តីព្រាងច្បាប់ ស្តីពីវិសោធនកម្មមាត្រា១៨ថ្មី នៃច្បាប់ស្តីពីវិសោធនកម្មមាត្រា១៨ នៃច្បាប់ស្តីពីសវនកម្ម នៃព្រះរាជាណាចក្រកម្ពុជា ត្រូវបានលោកស្រី សោម គឹមសួគ៌ អគ្គសវនករនៃអាជ្ញាធរសវនកម្មជាតិ បានពន្យល់ថា សេចក្តីព្រាងច្បាប់នេះរៀបចំឡើង ក្នុងគោលបំណងបើកផ្លូវឱ្យមានការតែងតាំងអគ្គសវនករ និងអគ្គសវនកររងថ្មី នៅពេលដែលអាណត្តិ៥ឆ្នាំ ត្រូវបានបញ្ចប់ដើម្បីទទួលស្គាល់គុណវុឌ្ឍិ ស្នាដៃ បទពិសោធន៍ សមត្ថភាព កិច្ចសហប្រតិបត្តិការ និងការទទួលខុសត្រូវខ្ពស់លើការដឹកនាំអាជ្ញាធរសវនកម្មជាតិ ក្នុងការបំពេញតួនាទីរបស់ខ្លួនដូចមានចែងក្នុងច្បាប់ស្តីពីសវនកម្ម នៃព្រះរាជាណាចក្រកម្ពុជា។ក្រោយពីស្តាប់ការពន្យល់ពីតំណាងរដ្ឋាភិបាលបានបកស្រាយពីអត្ថប្រយោជន៍នៃសេចក្តីព្រាងច្បាប់ទាំងពីរគណៈជំនាញរបស់រដ្ឋសភា បានចោទជាសំនួរ និងមានការបកស្រាយពីខាងតំណាងរដ្ឋាភិបាល ហើយអង្គប្រជុំបានឯកភាពគ្នាដោយរក្សាទម្រង់អត្ថបទនៃសេចក្តីព្រាងច្បាប់ទាំងពីរឱ្យនៅដែល ដោយគ្រាន់តែកែសម្រួលអក្ខរាវិរុទ្ធឱ្យត្រឹមត្រូវតាមអត្ថបទច្បាប់៕អត្ថបទ ៖ បាន ចក់

បណ្ដាញសង្គម

ព័ត៌មានថ្មីៗ

រូបយន្តមុជទឹកក្រោមបាតបឹងកកប្រទេសស្វីស មានគោលបំណងវាស់កម្រាស់ទឹកកកពីខាងក្រោមទឹក

UNICEF៖ កុមារកាន់តែច្រើនបន្ថែមទៀត អាចរងទុក្ខវេទនា បើអ៊ីស្រាអែលពង្រីកការគ្រប់គ្រង នៅតំបន់ហ្កាហ្សា

មន្ត្រីរុស្ស៊ីព្រមានអឺរ៉ុបឲ្យត្រៀមប្រឈមឧប្បត្តិហេតុយានដ្រូនបន្ថែមទៀត ក្រោយហេតុការណ៍ នៅរ៉ូម៉ានី

ក្រុមជីករ៉ែខុសច្បាប់ទាញយកប្រយោជន៍មាសតម្លៃរាប់ពាន់លានដុល្លារនៅព្រៃជប់ភ្លៀងអាម៉ាហ្សូនរបស់ប្រេស៊ីល

ឥណ្ឌារំពឹងថា ភ្លៀងធ្លាក់អំឡុងរដូវវស្សាឆ្នាំ ២០២៦ ទាបជាងកម្រិតមធ្យមរាល់ដង

ប្រធានាធិបតី៖ រ៉ូម៉ានីបិទស្ថានកុងស៊ុលរុស្ស៊ី ប្រចាំទីក្រុង Constanta

ក្រសួងការបរទេសធ្វើបទបង្ហាញស្ដីពីការវិនិយោគជូនមន្ត្រីការទូតកម្ពុជា

លោក Zelenskyy៖ រុស្ស៊ីកំពុងរៀបចំការវាយប្រហារទ្រង់ទ្រាយធំថ្មី លើអ៊ុយក្រែន

ប្រទេសជប៉ុនចូលរួមបេសកកម្មគាំទ្រអ៊ុយក្រែនរបស់អង្គការណាតូ ជាលើកដំបូង

លោក Rutte ៖ អង្គការណាតូ ត្រៀមខ្លួនការពាររាល់មីលីម៉ែត្រនៃទឹកដីរបស់សម្ព័ន្ធមិត្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

កម្ពុជានឹងផ្តោតលើបញ្ហាពហុភាគីនិយមដើម្បីដោះស្រាយបញ្ហាប្រឈមសកលកូវីដ-១៩ ក្នុង(ASEM)

ឯកឧត្តម ប្រាក់ សុខុន នឹងជំរុញភាគីនិយមបើកចំហឲ្យទទួលវ៉ាក់សាំងជាសកលដោយសមធម៌

ពីរថ្ងៃទៀត រដ្ឋសភានឹងប្រជុំពេញអង្គបោះឆ្នោតផ្តល់សេចក្តីទុកចិត្តប្រធាន(គជប)ថ្មី

ទេសរដ្ឋមន្ត្រី លី ធុជ អនុញ្ញាតឲ្យតំណាង UNDP ប្រចាំនៅកម្ពុជាដែលចប់អាណត្តិ ចូលជួបសម្ដែងការគួរសម និងជម្រាបលា

ក្រសួងទេសចរណ៍ ចាប់ផ្តើមរៀបចំប្រព័ន្ធវិញ្ញាបនបត្រវិជ្ជាជីវៈទេសចរណ៍ជំរុញយុវជនបន្តសិក្សាលើជំនាញទេសចរណ៍

សិស្សថ្នាក់ទី១២លើកឡើងនូវមតិផ្សេងគ្នាជុំវិញការប្រឡង ដែលក្រសួងអប់រំប្រកាសថា នៅតែបន្តរៀបចំ

គណៈកម្មការរដ្ឋសភា និងតំណាងរាជរដ្ឋាភិបាលបានលើកយកសេចក្តីព្រាងច្បាប់ចំនួនពីរមកពិភាក្សា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

កម្ពុជា​នឹង​ផ្តោតលើ​បញ្ហា​ពហុភាគី​និយម​ដើម្បី​ដោះស្រាយ​បញ្ហា​ប្រឈម​សកល​កូ​វីដ​-១៩​ ក្នុង​(ASEM)

ឯកឧត្តម ប្រាក់ សុខុន​ នឹង​ជំរុញ​ភាគី​និយម​បើកចំហ​ឲ្យ​ទទួល​វ៉ាក់សាំង​ជា​សកល​ដោយ​សមធម៌

ពីរ​ថ្ងៃ​ទៀត រដ្ឋសភានឹង​ប្រជុំ​ពេញអង្គ​បោះឆ្នោត​ផ្តល់​សេចក្តីទុកចិត្ត​ប្រធាន​(​គជប​)​ថ្មី

គណៈកម្មការ​រដ្ឋសភា និង​តំណាង​រាជរដ្ឋាភិបាល​បាន​លើក​យក​សេចក្តីព្រាងច្បាប់​ចំនួន​ពីរ​មក​ពិភាក្សា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

កម្ពុជានឹងផ្តោតលើបញ្ហាពហុភាគីនិយមដើម្បីដោះស្រាយបញ្ហាប្រឈមសកលកូវីដ-១៩ ក្នុង(ASEM)

ឯកឧត្តម ប្រាក់ សុខុន នឹងជំរុញភាគីនិយមបើកចំហឲ្យទទួលវ៉ាក់សាំងជាសកលដោយសមធម៌

ពីរថ្ងៃទៀត រដ្ឋសភានឹងប្រជុំពេញអង្គបោះឆ្នោតផ្តល់សេចក្តីទុកចិត្តប្រធាន(គជប)ថ្មី

គណៈកម្មការរដ្ឋសភា និងតំណាងរាជរដ្ឋាភិបាលបានលើកយកសេចក្តីព្រាងច្បាប់ចំនួនពីរមកពិភាក្សា