នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកឧត្តម ស៊ុន ចាន់ថុល៖ ព្រែកជីកហ្វូណនតេជោ គ្រោងបញ្ចប់ការផ្ទៀងផ្ទាត់និយាមកា និងបោះបង្គោលព្រំដីក្នុងពេលដ៏ខ្លីខាងមុខ
សម្តេចតេជោ៖ ថ្ងៃទី១១កក្កដានេះ រដ្ឋសភានឹងកោះប្រជុំ ដើម្បី​ធ្វើ​វិសោធន​កម្ម​ច្បាប់​រដ្ឋ​ធម្មនុញ្ញ​ដក​សញ្ជាតិ ជនជាតិខ្មែរណាដែលឃុបឃិតជាមួយបរទេសបំផ្លាញជាតិសាសន៍ឯង
ប្រសាសន៍សំខាន់ៗសម្ដេចតេជោ ហ៊ុន សែន ក្នុងពិធីសំណេះសំណាលជាមួយសិស្ស និស្សិត លោកគ្រូ អ្នកគ្រូ នៅមជ្ឈមណ្ឌលអប់រំ និង​បណ្តុះ​បណ្តាល ជាស៊ីមកំចាយមារ
សម្ដេចតេជោជំរុញឱ្យសិង្ហបុរីមានជើងហោះហើរកាន់តែច្រើនមកកាន់កម្ពុជាបន្ទាប់ពីដាក់ឱ្យដំណើរ​ការព្រលានយន្តហោះអន្តរជាតិតេជោ

នយោបាយ​ និង ការអភិវឌ្ឍន៍

ចិន អំពាវនាវឲ្យមានទំនាក់ទំនងស្ថិរភាព ជាមួយកូរ៉េខាងត្បូង ទោះមានការប្រឈមដាក់គ្នាដ៏លំបាកក្ដី

2024/05/14 12:26:37 pm        47
Facebook Telegram Linkin
ប្រមុខការបរទេសចិន លោក Wang Yi បានប្រាប់សមភាគីកូរ៉េខាងត្បូង កាលពីថ្ងៃចន្ទទី១៣ឧសភា នៅឯកិច្ចប្រជុំកម្រមួយក្នុងទីក្រុងប៉េកាំង ដែលបានធ្វើឡើងស្របពេលមានភាពតានតឹងជុំវិញបញ្ហាកោះតៃវ៉ាន់ និងបញ្ហាតំបន់ផ្សេងៗជាច្រើនទៀតថា ប្រទេសចិន និងកូរ៉េខាងត្បូង គួរតែស្វែងរកទំនាក់ទំនងប្រកបដោយស្ថិរភាព ទោះបីជាមានការប្រឈមដាក់គ្នាដ៏លំបាកនៅពេលថ្មីៗនេះក៏ដោយ។រដ្ឋមន្ត្រីការបរទេសកូរ៉េខាងត្បូង លោក ចូ តេយ៉ុល (Cho Tae-yul) បាននិយាយថា ប្រទេសនានា ចាំបាច់ត្រូវបន្តកិច្ចសហប្រតិបត្តិការ និងការគ្រប់គ្រងទំនាក់ទំនងដោយប្រុងប្រយ័ត្ន នៅក្នុងជំនួបមានរយៈពេល៤ម៉ោង។ លោក ចូ បានទៅដល់ក្រុងប៉េកាំង កាលពីថ្ងៃចន្ទ ជាដំណើរលើកដំបូងទៅកាន់ប្រទេសចិន ចាប់តាំងពីលោកឡើងកាន់តំណែងកាលពីខែមករា ហើយក៏ជាដំណើរទស្សនកិច្ចលើកដំបូងផងដែរ ដោយរដ្ឋមន្ត្រីការបរទេសកូរ៉េខាងត្បូង ក្នុងរយៈពេលជាង៦ឆ្នាំមកនេះ ។ ទំនាក់ទំនងរវាងក្រុងប៉េកាំង និងសេអ៊ូល ស្ថិតក្រោមសម្ពាធថ្មី នៅពេលលោកប្រធានាធិបតី កូរ៉េខាងត្បូង យ៉ុន សុក យ៉ុល (Yoon Suk Yeol) បាននិយាយកាលពីឆ្នាំមុន ថា កោះស្វ័យគ្រប់ក្រងតាមបែបលទ្ធិប្រជាធិបតេយ្យ តៃវ៉ាន់ ដែលចិនអះអាងសិទ្ធិថាជាដែនដីរបស់ខ្លួន គឺជាបញ្ហាសកល មិនមែនត្រឹមតែរវាងចិន និងកោះតៃវ៉ាន់ ប៉ុណ្ណោះទេ។ យោងតាមសេចក្ដីថ្លែងការណ៍ពីក្រសួងការបរទេសចិន កាលពីថ្ងៃចន្ទ លោក Wang បានប្រាប់លោក ចូ ថា ទំនាក់ទំនងចិន ជាមួយកូរ៉េខាងត្បូង បានប្រឈមការលំបាក និងការប្រកួតប្រជែងជាច្រើន ដែលមិនមែនជាផលប្រយោជន៍រួមសម្រាប់ប្រទេសទាំង២ឡើយ ហើយប្រទេសចិនក៏មិនចង់ឃើញដែរ ៕

លោក Trump រិះគន់ខ្លាំងៗចៅក្រមនៅទីក្រុងញូវយ៉ក ជុំវិញការជំនុំជម្រះក្តីប្រាក់បំបិទមាត់

2024/05/14 12:23:03 pm        97
Facebook Telegram Linkin
ដោយចាកចេញពីតុលាការ កាលពីថ្ងៃចន្ទ ទី១៣ ខែឧសភា នៅក្នុងការជំនុំជម្រះក្តីប្រាក់បំបិទមាត់ លោក Trump ជាថ្មីម្តងទៀត បានរិះគន់ខ្លាំងៗទៅលើចៅក្រម លោក ជូអាន មឺចាន(Juan Merchan) ដោយបានអះអាងដដែលៗថា ពេលវេលានៃការជំនុំជម្រះក្តីនេះ គឺមានបំណងធ្វើឱ្យប៉ះពាល់ដល់សមត្ថភាពរបស់លោកក្នុងការធ្វើយុទ្ធនាការ ខណៈលោកស្វែងរកការទាមទារយកវិញសេតវិមាន នៅក្នុងឆ្នាំ២០២៤នេះ។ លោក Trump ពុំបាននិយាយអំពីអតីតអ្នកសម្របសម្រួលដែលលែងមានទំនាក់ទំនង លោក Michael Cohen ដែលកាលពីពេលមុន បានប្រាប់តុលាការថា អតីតប្រធានាធិបតីសហរដ្ឋអាមេរិករូបនេះ បានយល់ព្រមលើការបង់ប្រាក់បំបិទមាត់ ដើម្បីបង្កប់រឿងរបស់តារាភាពយន្តអាសអាភាសចំពោះការជួបទំនាក់ទំនងផ្លូវភេទជាមួយនាងតាមការចោទប្រកាន់ មុនពេលដែលវាអាចបំផ្លាញយុទ្ធនាការបោះឆ្នោតរបស់លោកនៅឆ្នាំ២០១៦។ការបង់ប្រាក់ចំនួន ១៣០.០០០ដុល្លាររបស់ លោក Cohen ទៅឱ្យនាង Stormy Daniels ដែលមានបំណងរារាំងនាងមិនឱ្យនិយាយជាសាធារណៈអំពីការជួបតំនាក់ទំនងផ្លូវភេទ ដែលនាងនិយាយថានាងមានទំនាក់ទំនងនេះជាមួយ លោក Trump ក្នុងឆ្នាំ ២០០៦ គឺស្ថិតនៅចំណុចកណ្តាលនៃការជំនុំជម្រះក្តី។ រដ្ឋអាជ្ញា ជាមួយការិយាល័យមេធាវីទីក្រុង Manhattan លោក Alvin Bragg បានចោទប្រកាន់លោក Trump ពីបទក្លែងបន្លំឯកសាររបស់លោក ចំពោះការទូទាត់សំណងទៅឱ្យ លោក Cohen ក្នុងឆ្នាំ២០១៧ ថា ជាការចំណាយស្របច្បាប់នៅក្នុងសៀវភៅរបស់ក្រុមហ៊ុនអចលនទ្រព្យ មានមូលដ្ឋាននៅទីក្រុងញូវយ៉ក។លោក Trump បានផ្តល់ចម្លើយពីភាពគ្មានទោសចំពោះរឿងរ៉ាវចំនួន៣៤ករណី និងបដិសេធចំពោះទំនាក់ទំនងផ្លូវភេទជាមួយនាង Daniels ផងដែរ។ លោក បានអះអាងថា ករណីនេះជាការប៉ុនប៉ងផ្នែកនយោបាយ ដើម្បីជ្រៀតជ្រែកចូលក្នុងយុទ្ធនាការរបស់លោក។ លោក Trump បានទៅដល់តុលាការកាលពីថ្ងៃចន្ទ ជាមួយសមាជិកសភាមកពីគណបក្សសាធារណរដ្ឋជាច្រើនរូប ដើម្បីចូលរួមក្នុងការជំនុំជម្រះក្តីពីបទការបង់ប្រាក់បំបិទមាត់ទៅឲ្យតារាភាពយន្តអាសអាភាសម្នាក់ គឺនាង Stormy Daniels ។

លោក Blinken ទៅដល់អ៊ុយក្រែន ដើម្បីបង្ហាញសាមគ្គីភាពរបស់អាមេរិក ខណៈមានការវាយប្រហាររបស់រុស្ស៊ី

2024/05/14 11:53:01 am        68
Facebook Telegram Linkin
រដ្ឋមន្ត្រីការបរទេសអាមេរិក លោក Antony Blinken បានទៅដល់ទីក្រុង គីវ (Kyiv) នៅថ្ងៃអង្គារ ទី១៤ឧសភានេះ ក្នុងដំណើរទស្សនកិច្ចលើកដំបូងទៅកាន់ប្រទេសអ៊ុយក្រែន ដោយមន្ត្រីជាន់ខ្ពស់អាមេរិក ចាប់តាំងពីសភា បានអនុម័តកញ្ចប់ជំនួយយោធាដែលបានពន្យារពេលជាយូរ ចំនួន៦១ពាន់លានដុល្លារ សម្រាប់ប្រទេសនេះ កាលពីខែមុន។ ដំណើរទស្សនកិច្ចគ្មានការផ្ដល់ដំណឹងជាមុននេះ មានបំណងបង្ហាញសាមគ្គីភាពរបស់សហរដ្ឋអាមេរិកជាមួយនឹងអ៊ុយក្រែន ខណៈខ្លួនកំពុងតស៊ូទប់ទល់ការទម្លាក់គ្រាប់បែកដ៏ខ្លាំងក្លារបស់រុស្ស៊ីនៅតាមព្រំដែ នភាគឦសានរបស់ខ្លួន។ មន្ត្រីសហរដ្ឋអាមេរិក ដែលបានប្រាប់អ្នកយកព័ត៌មានពេលកំពុងធ្វើដំណើរជាមួយ Blinken ដោយសុំមិនបញ្ចេញឈ្មោះបាននិយាយថា លោក Blinken ដែលបានទៅដល់ទីក្រុង Kyiv តាមរថភ្លើងនៅព្រឹកថ្ងៃអង្គារនេះ សង្ឃឹមថានឹងបញ្ជូនសញ្ញានៃការធានាដ៏រឹងមាំដល់ប្រជាជនអ៊ុយក្រែន នៅក្នុងគ្រាដ៏លំបាក។ មន្ត្រីខាងលើនិយាយថា ប្រមុខការបរទេសអាមេរិក រូបនេះ នឹងធានាដល់ក្រុមមន្ត្រីអ៊ុយក្រែន រួមទាំងលោកប្រធានាធិបតី Volodymyr Zelenskiy ចំពោះការផ្ដល់ការគាំទ្ររបស់សហរដ្ឋអាមេរិក និងថ្លែងសុន្ធរកថា ផ្ដោតលើអនាគតរបស់អ៊ុយក្រែន ៕

គ.ជ.ប ចែកប័ណ្ណព័ត៌មានអ្នកបោះឆ្នោត ក្រុមប្រឹក្សារាជធានី ខេត្ត ក្រុង ស្រុក និងខណ្ឌបានជាង៥០%

2024/05/14 11:48:57 am        124
Facebook Telegram Linkin
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា ដំណើរការចែកប័ណ្ណព័ត៌មានអ្នកបោះឆ្នោតសម្រាប់ការបោះឆ្នោតជ្រើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ បានចំនួនជាង៥០ភាគរយ។បើតាមឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានប្រាប់ BTV ឱ្យដឹងនៅថ្ងៃទី១៤ ខែឧសភា ឆ្នាំ២០២៤ថា យោងតាមប្រតិទិនស្តីពីប្រព្រឹត្តទៅនៃការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ អាណត្តិទី៤ គណៈកម្មការរាជធានី-ខេត្តរៀបចំការបោះឆ្នោតនៅទូទាំងប្រទេស បានកំពុងដំណើរការលើកិច្ចការចុះចែកប័ណ្ណព័ត៌មានអ្នកបោះឆ្នោតជូនដល់អង្គបោះឆ្នោតដែលជាសមាជិកក្រុមប្រឹក្សាឃុំ-សង្កាត់នៅ។ ឯកឧត្តម បន្តថា ការចេះចែកប័ណ្ណព័ត៌មានអ្នកបោះឆ្នោត ចាប់ផ្តើមពីថ្ងៃទី១១ ដល់ថ្ងៃទី១៥ ខែឧសភា ឆ្នាំ២០២៤ ដោយគិតមកត្រឹមពេលនេះ ការចែកប័ណ្ណមានចំនួនជាង៥០ភាគរយ បើធៀបនឹងទៅចំនួនអង្គបោះឆ្នោតសរុបប្រមាណ១ម៉ឺននាក់។ អ្នកនាំពាក្យ គ.ជ.ប បញ្ជាក់ថា ប័ណ្ណព័ត៌មានអ្នកបោះឆ្នោត គឺជាលិខិតជូនដំណឹងដល់អង្គបោះឆ្នោត ដែលប័ណ្ណនេះបានចែងអំពីទិន្នន័យរបស់អ្នកបោះឆ្នោតនីមួយ។អ្នកនាំពាក្យរូបនេះ បានអំពាវនាវដល់អង្គបោះឆ្នោតទាំងអស់ត្រូវត្រៀមឯកសារដែលបម្រើ​ដល់ការបោះឆ្នោតនោះ រួមមាន អត្តសញ្ញាណប័ណ្ណសញ្ជាតិខ្មែរ និងឯកសារបញ្ជាក់ពីមុខតំណែកក្រុមប្រឹក្សាឃុំ-សង្កាត់របស់ខ្លួន។សូមជម្រាបថា គ.ជ.ប បានប្រកាសទទួលស្គាល់ជាផ្លូវការចំពោះគណបក្សនយោបាយចំនួន៥ ឱ្យចូលរួមការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ អាណត្តិទី៤ ឆ្នាំ២០២៤ ក្នុងនោះ រួមមាន៖ គណបក្សប្រជាជនកម្ពុជា, គណបក្សឆន្ទៈខ្មែរ, គណបក្សកម្លាំងជាតិ, គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ ដោយការបោះឆ្នោតនេះនឹងប្រព្រឹត្តទៅ​ នាថ្ងៃទី២៦ ខែឧសភា ឆ្នាំ២០២៤៕អត្ថបទ សេក ឧត្តម

នាយករដ្ឋមន្ត្រីថ្មីរបស់សិង្ហបុរី ធ្វើការរុះរើដ៏តូចតាចក្នុងគណៈរដ្ឋមន្ត្រី ខណៈប្ដេជ្ញាបន្តស្ថិរភាព

2024/05/14 11:15:40 am        86
Facebook Telegram Linkin
នាយករដ្ឋមន្ត្រីថ្មីរបស់ប្រទេសសិង្ហបុរី លោក ឡរិន វ៉ុង (Lawrence Wong) ដែលកំពុងចូលកាន់តំណែង បានតែងតាំងឧបនាយករដ្ឋមន្ត្រីថ្មីនៅក្នុងការរុះរើដ៏តូចតាចមួយនៃគណៈរដ្ឋមន្ត្រី កាលពីថ្ងៃចន្ទ (១៣ ឧសភា) ខណៈលោកបេ្ដជ្ញាបន្តស្ថិរភាព និងត្រៀមខ្លួនដើម្បីក្លាយជាមេដឹកនាំទីបួនរបស់ទីក្រុងរដ្ឋនេះ ចាប់តាំងពីទទួលបានឯករាជ្យកាលពីប្រាំមួយទសវត្សរ៍មុនមក។រដ្ឋមន្ត្រីពាណិជ្ជកម្ម លោក កាន់ គីមយ៉ុង (Gan Kim Yong) ត្រូវបានផ្តល់តួនាទីបន្ថែមជាឧបនាយករដ្ឋមន្ត្រី ដែលជាម្នាក់ក្នុងចំណោមមន្រ្តីពីរនាក់នៅក្នុងគណៈរដ្ឋមន្ត្រីរបស់លោក វ៉ុង នេះបើយោងតាមការិយាល័យនាយករដ្ឋមន្ត្រី។ ធនាគារកណ្តាលបាននិយាយថា លោក កាន់ វ័យ ៦៥ ឆ្នាំរូបនេះក៏នឹងទទួលតំណែងរបស់លោក វ៉ុង ជាប្រធានក្រុមប្រឹក្សាភិបាលនៃអាជ្ញាធររូបិយវត្ថុសិង្ហបុរី (MAS) ផងដែរ។លោក វ៉ុង បាននិយាយថា លោកនឹងធ្វើការផ្លាស់ប្តូរសំខាន់ក្នុងគណៈរដ្ឋមន្ត្រី បន្ទាប់ពីការបោះឆ្នោតសកលដែលនឹងធ្វើឡើងនៅខែវិច្ឆិកា ឆ្នាំ២០២៥ ហើយលោកនឹងបន្តធ្វើជាមន្រ្តីនៅក្រសួងហិរញ្ញវត្ថុ ខណៈចូលកាន់តំណែងនៅថ្ងៃពុធ (១៥ ឧសភា) ស្អែកនេះពីលោកនាយករដ្ឋមន្ត្រីវ័យ ៧១ ឆ្នាំ លោក លី សៀនឡុង (Lee Hsien Loong)។ លោក លី ដែលជាកូនប្រុសរបស់បិតាស្ថាបនិកនៃសិង្ហបុរីសម័យទំនើប លោក លី គ័នយូ (Lee Kuan Yew) នឹងបន្តនៅក្នុងគណៈរដ្ឋមន្ត្រីជារដ្ឋមន្ត្រីជាន់ខ្ពស់ស្របតាមប្រពៃណី។ការរុះរើនេះមានលក្ខណៈតូចតាច ហើយរួមបញ្ចូលការដំឡើងឋានៈរដ្ឋមន្ត្រីវ័យក្មេងជាច្រើនរូប បូកនឹងការតែងតាំងអ្នកតំណាងរាស្រ្តពីររូបសម្រាប់តំណែងថ្នាក់រដ្ឋមន្ត្រី។ ការរុះរើគណៈរដ្ឋមន្ត្រីសំខាន់ៗគឺកម្រកើតមានណាស់ក្នុងប្រទេសសិង្ហបុរី។ ការរុះរើដ៏សំខាន់ចុងក្រោយបានកើតឡើងនៅក្នុងខែមេសា ឆ្នាំ២០២១ បន្ទាប់ពីអតីតអ្នកស្នងតំណែងដែលត្រូវបានជ្រើសរើសដោយលោក លី គឺលោក ហេង ស៊ីគៀត (Heng Swee Keat) បានដកខ្លួនចេញពីការងារលំដាប់កំពូលរបស់ប្រទេស៕

ចិន បដិសេធរបាយការណ៍ហ្វីលីពីន ដែលថាខ្លួនបង្កើត «កោះសិប្បនិម្មិត» នៅក្នុងដែនទឹកជម្លោះ

2024/05/14 09:10:56 am        149
Facebook Telegram Linkin
ប្រទេសចិន កាលពីថ្ងៃចន្ទ (១៣ ឧសភា) បានច្រានចោលការចោទប្រកាន់របស់ហ្វីលីពីន ដែលថាខ្លួនបានព្យាយាមសាងសង់កោះសិប្បនិម្មិតមួយនៅក្នុងដែនទឹកដែលមានជម្លោះ ខណៈហ្វីលីពីន បាននិយាយថា ខ្លួននឹងរក្សាការយាមកាមឱ្យកាន់តែជិតស្និទ្ធលើកោះផ្កាថ្មប៉ប្រះទឹក កោះថ្មប៉ប្រះទឹក និងកូនកោះនៅក្នុងតំបន់សេដ្ឋកិច្ចផ្តាច់មុខរបស់ខ្លួននៅសមុទ្រចិនខាងត្បូង។ឆ្មាំល្បាតឆ្នេរហ្វីលីពីន បាននិយាយកាលពីថ្ងៃសៅរ៍ សប្ដាហ៍មុនថា ខ្លួនបានដាក់ពង្រាយនាវាមួយគ្រឿងទៅកាន់ដែនទឹក សាប៊ីណា ស្ហូល (Sabina Shoal) នៅលើប្រជុំកោះ ស្រ្ពាតលី (Spratly) ជាទីដែលខ្លួនបានចោទប្រកាន់ចិន ថាបានសាងសង់កោះសិប្បនិម្មិតមួយ ដោយការចាក់គំនរថ្ម និងកំទេចផ្កាថ្មនៅលើនោះ។ក្រសួងការបរទេសចិន បានច្រានចោលការចោទប្រកាន់ចុងក្រោយរបស់ទីក្រុងម៉ានីល នេះថាជា «ពាក្យចចាមអារ៉ាមសុទ្ធសាធ និងគ្មានមូលដ្ឋានច្បាស់លាស់»។ អ្នកនាំពាក្យក្រសួង លោក វ៉ាង វិនពីន (Wang Wenbin) និយាយថា «ថ្មីៗនេះ ភាគីហ្វីលីពីនបានផ្សព្វផ្សាយពាក្យចចាមអារ៉ាមម្តងហើយម្តងទៀត ជេរប្រមាថចិនដោយចេតនា និងប៉ុនប៉ងបំភាន់សហគមន៍អន្តរជាតិ ដែលជារឿងឥតប្រយោជន៍»។លោកបានជំរុញក្រុងម៉ានីល ឱ្យ «វិលទៅរកផ្លូវត្រឹមត្រូវនៃការដោះស្រាយជម្លោះដែនសមុទ្រឱ្យបានត្រឹមត្រូវតាមរយៈការចរចានិងការពិគ្រោះយោបល់»។ ថ្មប៉ប្រះទឹក សាប៊ីណា ស្ហូល (Sabina Shoal) គឺជាចំណុចជួបប្រជុំគ្នាសម្រាប់នាវាផ្គត់ផ្គង់កងទ័ពហ្វីលីពីន ដែលឈរជើងលើនាវាចម្បាំងមានមូលដ្ឋាននៅដែនទឹក សេខិន ថូម៉ាស ស្ហូល (Second Thomas Shoal) ជាទីដែលទីក្រុងម៉ានីល និងក្រុងប៉េកាំង មានការប៉ះទង្គិចជាញឹកញាប់៕

ប្រភព៖ កងទ័ពជើងទឹកអាមេរិក និងតៃវ៉ាន់ បានធ្វើសមយុទ្ធប៉ាស៊ីហ្វិកយ៉ាងស្ងាត់ៗក្នុងខែមេសា

2024/05/14 09:06:53 am        98
Facebook Telegram Linkin
ប្រភពចំនួនបួនបាននិយាយថា កងទ័ពជើងទឹករបស់សហរដ្ឋអាមេរិក និងកោះតៃវ៉ាន់ បានធ្វើសមយុទ្ធរួមគ្នាយ៉ាងស្ងាត់ៗនៅសមុទ្រប៉ាស៊ីហ្វិក ក្នុងខែមេសា ដែលមិនបានបង្ហាញជាផ្លូវការនោះទេ ខណៈយោធាទាំងពីរបង្កើនកិច្ចសហប្រតិបត្តិការ ស្របពេលមានការគំរាមកំហែងខាងយោធារបស់ចិនកើនឡើង។សមយុទ្ធដែលមិនត្រូវបានផ្សព្វផ្សាយជាសាធារណៈនេះបានធ្វើឡើងកាលពីខែមុន នៅតំបន់ប៉ាស៊ីហ្វិកខាងលិច នេះបើយោងតាមប្រភពដែលបានស្នើសុំមិនបញ្ចេញឈ្មោះដោយសារភាពរសើបនៃបញ្ហានេះ។ ប្រភពនោះបាននិយាយថា សមយុទ្ធនេះមិនមានជាផ្លូវការទេ ហើយត្រូវបានគេដាក់ឈ្មោះថា «ការជួបប្រជុំគ្នានៅសមុទ្រដែលមិនបានគ្រោងទុក» ដោយចង្អុលទៅកិច្ចព្រមព្រៀងដ៏ស្ងប់ស្ងាត់មួយ ដែលភាគីទាំងសងខាងអះអាងថា សមយុទ្ធនេះគ្រាន់តែជាលទ្ធផលនៃការជួបគ្នាដោយចៃដន្យប៉ុណ្ណោះ។ទីក្រុងវ៉ាស៊ីនតោន និងទីក្រុងតៃប៉ិ បាននិងកំពុងពង្រីកកិច្ចសហប្រតិបត្តិការយោធារបស់ពួកគេក្នុងប៉ុន្មានឆ្នាំថ្មីៗនេះ ស្របពេលមានសកម្មភាពយោធារបស់ចិនស្ទើរតែរាល់ថ្ងៃ ចូលទៅក្នុងតំបន់កំណត់អត្តសញ្ញាណការពារដែនអាកាសរបស់កោះតៃវ៉ាន់ និងសមយុទ្ធដោយកងកម្លាំងចិន នៅជិតកោះនេះ។ការចូលរួមផ្នែកយោធារវាងសហរដ្ឋអាមេរិក និងកោះតៃវ៉ាន់ រួមទាំងដំណើរទស្សនកិច្ច និងការហ្វឹកហ្វឺន ភាគច្រើនធ្វើឡើងដោយស្ងាត់ៗ ហើយមិនសូវត្រូវបានបង្ហាញជាផ្លូវការទេ ដោយសារតែការជំទាស់របស់ប្រទេសចិន ចំពោះទំនាក់ទំនងយោធាណាមួយរវាងទីក្រុងវ៉ាស៊ីនតោន និងក្រុងតៃប៉ិ៕

សម្តេចប្រធានរដ្ឋសភា៖ស្រ្តីមានលក្ខណៈសម្បត្តិសមស្របជាច្រើនក្នុងការបំពេញបេសកកម្មការទូតនាំប្រយោជន៍ជូនជាតិ និងប្រជាជន

2024/05/13 01:17:10 pm        104
Facebook Telegram Linkin
ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃចន្ទ ទី១៣ ខែឧសភា ឆ្នាំ២០២៤ បានអនុញ្ញាតឱ្យលោកជំទាវ ទួត បញ្ញា ឯកអគ្គរាជទូតកម្ពុជាប្រចាំចក្រភពអង់គ្លេស អៀរឡង់ ដាណឺម៉ាក ស៊ុយអែត ន័រវែស និងហ្វាំងឡង់ ចូលជួបសម្តែងការគួរសម និងទទួលអនុសាសន៍មុនពេលលោកជំទាវ ត្រូវចេញទៅបំពេញបេសកកម្មការទូត។សម្តេចរដ្ឋសភាធិបតី បានសម្តែងក្តីសោមនស្សរីករាយ និងមានមោទនភាពជាទីបំផុតដែលលោកជំទាវ ទួត បញ្ញា ទទួលបានសេចក្តីទុកចិត្តពីរាជរដ្ឋាភិបាលក្នុងការតែងតំាងជាឯកអគ្គរាជទូត ប្រចាំបណ្តាប្រទេសចំនួន៦នៅប៉ែកអឺរ៉ុប។ សម្តេចបានវាយតម្លៃខ្ពស់ចំពោះសមត្ថភាព និងទេពកោសល្យរបស់លោកជំទាវដែលបានបំពេញបេសកកម្មក្នុងវិស័យការទូតនិងព័ត៌មានតំាងពីទសវត្សរ៍ឆ្នាំ៨០មក។សម្តេចប្រធានរដ្ឋសភា បានគូសបញ្ជាក់ថា ស្រ្តីមានលក្ខណៈសម្បត្តិសមស្របជាច្រើនពីធម្មជាតិក្នុងការបំពេញបេសកកម្មការទូត ដូចជាភាពទន់ភ្លន់ និងការបន់បែនតាមសភាពការណ៍ ជាដើម។ សម្តេចរដ្ឋសភាធិបតី បានបញ្ជាក់បន្តថា នាពេលបច្ចុប្បន្នបេសកកម្មការទូតមិនមែនសំដៅលើការទូតនយោបាយតែមួយនោះទេ។ ការទូតបានកំពុងផ្តោតការយកចិត្តទុកដាក់លើច្រើនវិស័យផ្សេងៗទៀត មានដូចជាការទូតសេដ្ឋកិច្ច និងការទូតប្រជាជនជាដើម។សម្តេចបានសង្កត់ធ្ងន់ថា ការទូតប្រជាជនគឺជាកត្តាសំខាន់ដែលធ្វើឱ្យប្រជាជននិងប្រជាជនស្គាល់គ្នា យោគយល់គ្នា និងមានទំនាក់ទំនងល្អជាមួយគ្នា ដែលឈានដល់ការភ្ជាប់ទំនាក់ទំនងពាណិជ្ជកម្ម សេដ្ឋកិច្ច និងទេសចរណ៍ជាដើម។ ជាមួយគ្នានេះ សម្តេចប្រធានរដ្ឋសភា ក៏បានបញ្ជាក់ថា ចាប់ពីពេលនេះតទៅលោកជំទាវ គឺជាឥស្សរជនជាន់ខ្ពស់តំណាងឱ្យព្រះរាជាណាចក្រកម្ពុជានៅបរទេស ដែលមានតួនាទីដ៏សំខាន់ក្នុងការលើកកម្ពស់ទំនាក់ទំនងមិត្តភាព និងសហប្រតិបត្តិការលើគ្រប់វិស័យជាមួយប្រទេសទាំងនោះ ពិសេសការលើកតម្កើងកិត្យានុភាពជាតិ ឯករាជ្យ និងការការពារអធិបតេយ្យជាតិ។ ក្នុងខណៈដែលពិភពលោក មានស្ថានភាពប្រែប្រួលក្នុងបរិបទថ្មី នៃសណ្ដាប់ធ្នាប់ពិភពលោក មានការងារសំខាន់ៗជាច្រើនទៀតដែលនឹងត្រូវបំពេញ ដូចជាការងារនយោបាយការបរទេសជាដើម។ ម្យ៉ាងវិញទៀត ក្នុងកាលៈទេសៈបច្ចុប្បន្ន ការស្តារសេដ្ឋកិច្ចសង្គមឱ្យងើបឡើងវិញបានឆាប់រហ័ស ជាកត្តាមួយដ៏សំខាន់ និងចាំបាច់ ដើម្បីរួមចំណែកលើកស្ទួយសេដ្ឋកិច្ចជាតិ។នៅក្នុងឱកាសនោះ សម្តេចរដ្ឋសភាធិបតី បានផ្តល់ជាអនុសាសន៍ មួយចំនួនដល់ លោកជំទាវ ឯកអគ្គរាជទូត ដោយត្រូវតម្កល់ប្រយោជន៍ជាតិជាធំ ទោះក្នុងកាលៈទេសៈណាក៏ដោយ ត្រូវរក្សា ការពារ និងលើកតម្លៃជាតិជានិច្ច ។ ត្រូវយកចិត្តទុកដាក់ជួយសម្របសម្រួល និង ដោះស្រាយបញ្ហានានារបស់ពលរដ្ឋយើងឱ្យមានប្រសិទ្ធភាព និងទាន់ពេលវេលា តាមរយៈការពង្រឹងទំនាក់ទំនង ឱ្យបានខ្ជាប់ខ្ជួនជាមួយបងប្អូនពលរដ្ឋខ្មែរ ជាដើម។លោកជំទាវ ទួត បញ្ញា បានថ្លែងអំណរគុណជ្រាលជ្រៅជូន សម្តេចរដ្ឋសភាធិបតី ឃួន សុដារី ដែលបានចំណាយពេលវេលាដ៏មមាញឹកអនុញ្ញាតឱ្យលោកជំទាវបានចូលជួបជម្រាបលានិងទទួលបានអនុសាសន៍ល្អៗ នាឱកាសនេះ។ លោកជំទាវ បានបេ្តជ្ញាចិត្តថានឹងខិតខំបំពេញបេសកកម្មការទូត ជាពិសេសការអនុវត្តតាមអនុសាសន៍ល្អៗ របស់សម្តេចរដ្ឋសភាធិបតី ឱ្យទទួលបានជោគជ័យក្នុងបេសកកម្មការទូតដោយនាំមកនូវផលប្រយោជន៍ជូនជាតិមាតុភូមិនិងប្រជាពលរដ្ឋ ស្របតាមការជឿទុកចិត្តរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា៕

កម្ពុជានិងអេមីរ៉ាតអារ៉ាប់រួម បន្តពង្រឹង និងពង្រីកកិច្ចសហប្រតិបត្តិការលើវិស័យពាណិជ្ជកម្ម វិនិយោគ

2024/05/13 01:07:52 pm        102
Facebook Telegram Linkin
នាព្រឹកថ្ងៃទី១៣ ខែឧសភា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម Obaid Saeed Obaid Bintaresh Aldhaheri ឯកអគ្គរាជទូតនៃប្រទេសអេមីរ៉ាតអារ៉ាប់រួមប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ នៅវិមានសន្តិភាព។ក្នុងឱកាសនៃជំនួប ឯកឧត្តម Obaid Saeed Obaid Bintaresh Aldhaheri បានថ្លែងអំណរគុណជូនចំពោះ សម្តេចធិបតី ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបឯកឧត្តម និងគណៈប្រតិភូ ចូលជួបសម្តែងការគួរសម និងពិភាក្សាការងារ និងបានសម្ដែងនូវការវាយតម្លៃខ្ពស់ចំពោះភាពរីកចម្រើននៃទំនាក់ទំនងការទូតរវាងប្រទេសទាំងពីរ ជាពិសេសការសម្រេចបាននូវកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងព្រះរាជាណាចក្រកម្ពុជា និងអេមីរ៉ាតអារ៉ាប់រួម (Cambodia-UAE Comprehensive Economic Partnership Agreement - CEPA) ដែលជាកិច្ចព្រមព្រៀងដ៏មានសារៈសំខាន់ក្នុងការជំរុញកិច្ចសហប្រតិបត្តិការរវាង អេមីរ៉ាតអារ៉ាប់រួម-កម្ពុជា ឱ្យកាន់តែរឹងមាំ។ បន្ថែមលើនេះ ឯកឧត្តមឯកអគ្គរាជទូត ក៏បានបញ្ជាក់ថា ក្នុងបេសកកម្មការទូតរបស់ឯកឧត្តមនៅកម្ពុជា ឯកឧត្តមនឹងខិតខំបន្តពង្រឹង និងពង្រីកកិច្ចសហប្រតិបត្តិការបន្ថែមទៀតលើវិស័យជាច្រើន រួមមាន៖ ពាណិជ្ជកម្ម វិនិយោគ ហេដ្ឋារចនាសម្ព័ន្ធ ដឹកជញ្ជូន កសិកម្ម ថាមពល និងទេសចរណ៍។ ជាការឆ្លើយតបសម្តេចធិបតី បានស្វាគមន៍ចំពោះវត្តមានរបស់ ឯកឧត្តម Obaid Saeed Obaid Bintaresh Aldhaheri និងគណៈប្រតិភូ ព្រមទាំងបានវាយតម្លៃខ្ពស់ចំពោះភាពរីកចម្រើន​នៃទំនាក់ទំនងការ​ទូត​រវាង​កម្ពុជា-អេមីរ៉ាតអារ៉ាប់រួម ជាពិសេសការចូលជាធរមាននៃកិច្ច​ព្រមព្រៀងភាព​ជាដៃគូសេដ្ឋកិច្ចគ្រប់ជ្រុងជ្រោយរវាងព្រះរាជាណាចក្រកម្ពុជា​ និងអេមីរ៉ាតអារ៉ាប់រួម (Cambodia-UAE Comprehensive Economic Partnership Agreement - CEPA) ហើយតាម​រយៈកិច្ច​ព្រមព្រៀងនេះ ប្រទេសទាំងពីរនឹងស្វែងរកឱកាសសម្រាប់កិច្ច​សហប្រតិបត្តិការបន្ថែមទៀត។ ជាមួយគ្នានេះ សម្តេចធិបតី បានគូសបញ្ជាក់ថា ការវិនិយោគលើវិស័យហេដ្ឋារចនាសម្ព័ន្ធ ថាមពលស្អាត ​ទេសចរណ៍ កសិកម្ម បច្ចេកវិទ្យា និងហេដ្ឋារចនាសម្ព័ន្ធ គឺជាអាទិភាពរបស់រាជរដ្ឋាភិបាលកម្ពុជាក្នុងការសម្រេចបាននូវកំណើន​ ការងារ សមធម៌ ប្រសិទ្ធភាព និងចីរភាព ដើម្បីអភិវឌ្ឍកម្ពុជាប្រកបដោយភាពធន និងបរិយាប័ន្ន។ ជាក់ស្ដែង ក្នុង​វិស័យថាមពលស្អាត បច្ចុប្បន្ន ព្រះរាជាណាចក្រកម្ពុជា បានសម្រេចនូវការប្រើប្រាស់​ថាមពលស្អាត​ចំនួន ៦២% នៃការប្រើប្រាស់ថាមពលសរុប និងបានដាក់ចេញនូវទិសដៅជំរុញការ​ប្រើប្រាស់ថាមពលស្អាត​ឱ្យបានដល់ ៧០% ត្រឹមឆ្នាំ២០៣០ ព្រមទាំងបានបញ្ឈប់ទាំងស្រុង​នូវការបង្កើតរោងចក្រដំណើរការដោយថាមពលធ្យូងថ្ម ដោយជំនួសមកវិញនូវគម្រោងអភិវឌ្ឍន៍​ថាមពលកកើតឡើងវិញ។ ទន្ទឹមនោះ សម្ដេចធិបតី ក៏បានបញ្ជាក់ពីសារៈសំខាន់នៃវិស័យទេសចរណ៍ ដោយរាជរដ្ឋាភិបាល​បានដាក់ចេញនូវវិធានការជាកញ្ចប់ ​ដើម្បីលើកទឹកចិត្ត និងលើកកម្ពស់វិស័យទេសចរណ៍ ហើយតាមរយៈកិច្ចសហប្រតិបត្តិការល្អរវាងកម្ពុជា-អេមីរ៉ាតអារ៉ាប់រួម​ សម្តេចធិបតី មានជំនឿជាក់ថា ចំនួនភ្ញៀវទេសចរនឹងកាន់តែកើនឡើងបន្ថែមទៀត។ សម្តេចធិបតី ក៏បានលើកទឹកចិត្តដល់ឯកឧត្តមឯកអគ្គរាជទូត ក្នុងការបន្តកិច្ចសហប្រតិបត្តិការជាមួយក្រសួង-ស្ថាប័ននៃព្រះរាជាណាចក្រកម្ពុជា ជាពិសេសបន្តជំរុញកិច្ចសហប្រតិបតិ្តការរវាងប្រទេសទាំងពីរលើវិស័យពាណិជ្ជកម្ម វិនិយោគ ទេសចរណ៍ និងវិស័យសក្ដានុពលផ្សេងៗទៀតផងដែរ។ ជាទីបញ្ចប់ សម្ដេចធិបតី បានជូនពរ ឯកឧត្តមឯកអគ្គរាជទូត ទទួលបានជោគជ័យក្នុងការបំពេញបេសកកម្មការទូតនៅ​ព្រះរាជាណាចក្រកម្ពុជា៕

ឯកអគ្គរដ្ឋទូតកាណាដាប្រចាំនៅកម្ពុជា ពេញចិត្តចំពោះទំនាក់ទំនងនិងកិច្ចសហប្រតិបត្តិការល្អរវាងកាណាដា-កម្ពុជា

2024/05/13 12:49:29 pm        137
Facebook Telegram Linkin
នាព្រឹកថ្ងៃទី១៣ ខែឧសភា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យលោកជំទាវ ពីង គិតនីកន (Ping M. Kitnikone) អគ្គរដ្ឋទូតនៃប្រទេសកាណាដាប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ នៅវិមានសន្តិភាព។ក្នុងឱកាសនៃជំនួបលោកជំទាវអគ្គរដ្ឋទូត បានថ្លែងអំណរគុណជូនចំពោះ សម្តេចធិបតី ដែល​បានឆ្លៀតពេលវេលាដ៏មមាញឹកអនុញ្ញាតឱ្យរូបលោកជំទាវ និងគណៈប្រតិភូ ចូលជួបសម្តែង​ការគួរសម និងពិភាក្សាការងារ ព្រមទាំងបាន​បញ្ជាក់អំពីការពេញចិត្តចំពោះទំនាក់ទំនង​ការទូត​ជាប្រវត្តិសាស្រ្ត និងកិច្ចសហប្រតិបត្តិការល្អ រវាងកាណាដា-កម្ពុជា ដែលជាទំនាក់ទំនង និងកិច្ច​សហប្រតិបត្តិការប្រកបដោយផ្លែផ្កា ​ហើយក្នុងអាណត្តិការទូតនៅកម្ពុជា ​លោកជំទាវឯកអគ្គរដ្ឋទូត ប្តេជ្ញាខិតខំបន្ត ពង្រឹង និងពង្រីកទំនាក់ទំនង និង កិច្ចសហប្រតិបត្តិការ រវាងប្រទេសទាំងពីរឱ្យកាន់​តែរីកចម្រើន។ បន្ថែមលើនេះលោកជំទាវឯកអគ្គរដ្ឋទូត ក៏បានគោរពជម្រាបជូនសម្តេចធិបតីអំពីការបន្តជំរុញ​កិច្ច​សហប្រតិបត្តិការលើវិស័យពាណិជ្ជកម្ម និងវិនិយោគរវាងកាណាដា-កម្ពុជា ក៏ដូចជាការពង្រឹងការ​វិនិយោគ​ប្រកប​ដោយគុណភាពរបស់ក្រុមហ៊ុនកាណាដានៅកម្ពុជាផងដែរ។ជាការឆ្លើយតប សម្តេចធិបតី​ បានស្វាគមន៍ចំពោះ លោកជំទាវ ពីង គិតនីកន ​និងគណៈប្រតិភូ ដែល​បានអញ្ជើញមកបំពេញបេសកកម្មការងារនៅព្រះរាជាណាចក្រកម្ពុជា ព្រមទាំងបានវាយ​តម្លៃខ្ពស់ចំពោះទំនាក់ទំនងការទូត និងកិច្ចសហប្រតិបត្តិការល្អ រវាងប្រទេសទាំងពីរ ដែលជាចំណងការទូតជាង៧០ឆ្នាំមកហើយ ​និងបានថ្លែងអំណរគុណចំពោះរដ្ឋាភិបាល និងប្រជាជនកាណាដា ដែលបានចូលរួមចំណែកក្នុងការកសាងសង្គម-សេដ្ឋកិច្ចកម្ពុជានាពេលកន្លងមក ការកសាងធនធានមនុស្ស ជាពិសេសការបណ្តុះបណ្តាលដល់កងកម្លាំងរក្សាសន្តិភាពមួកខៀវរបស់កម្ពុជា និងការគាំទ្រដល់វិស័យបោសសម្អាតមីន។ ពាក់ព័ន្ធនឹងវិស័យពាណិជ្ជកម្ម និងវិនិយោគ សម្តេចធិបតី បានគូសបញ្ជាក់ថា បច្ចុប្បន្ននេះ​សភាពាណិជ្ជកម្មកម្ពុជាបានបង្កើតនូវតំណាងសភាពាណិជ្ជកម្មនៅប្រទេសកាណាដា ដែលជាផ្នែក​មួយនៃការភ្ជាប់ទំនាក់ទំនង និងកិច្ចសហប្រតិបត្តិការលើវិស័យពាណិជ្ជកម្ម និងវិនិយោគ​រវាងប្រទេស​ទាំងពីរ។ បន្ថែមលើនេះ សម្តេចធិបតី បានបញ្ជាក់ជូនលោកជំទាវឯកអគ្គរដ្ឋទូតអំពីគោលនយោបាយ​ទាក់ទាញ និងលើកទឹកចិត្តវិនិយោគិននៅកម្ពុជា តាមរយៈការអនុវត្តច្បាប់ស្តីអំពីវិនិយោគ​នៃព្រះរាជាណាចក្រកម្ពុជា ក៏ដូចជាការដាក់ចេញនូវគោលនយោបាយជាក់ស្ដែង ដើម្បីគាំទ្រដល់​បរិយាកាសវិនិយោគ និងរក្សាភាពប្រកួតប្រជែងរបស់កម្ពុជា ទាំងក្នុងក្របខ័ណ្ឌតំបន់ និងសកលលោក។ ទន្ទឹមនោះ សម្ដេចធិបតីក៏បានគូសរំលេចអំពីការដាក់ចេញនូវគោលនយោបាយ និងយន្តការ​បន្ថែមទៀត​ក្នុងការគាំទ្រ និងដោះស្រាយនូវបញ្ហាប្រឈមនានារបស់វិនិយោគិននៅកម្ពុជា តាមរយៈការរៀបចំ​នូវវេទិការវាងរាជរដ្ឋាភិបាល-ផ្នែកឯកជន និងការបង្កើតក្រុមការងារតាមដាន​លើការអនុវត្តគោលនយោបាយ វិធានការ និងការស្វែងរកដំណោះស្រាយចំពោះបញ្ហាប្រឈមនានា របស់វិនិយោគិន។មុននឹងបញ្ចប់ សម្តេចធិបតី និងលោកជំទាវឯកអគ្គរដ្ឋទូត ក៏បានពិភាក្សា និងផ្លាស់ប្តូរយោបល់​ក្នុងការលើកកម្ពស់ទំនាក់ទំនង និងកិច្ចសហប្រតិបត្តិការទាំងក្នុងក្របខ័ណ្ឌទ្វេភាគី និងពហុភាគី ដោយផ្តោតលើគំនិតផ្តួចផ្តើមស្តីពីយុទ្ធស្ត្រឥណ្ឌូ-ប៉ាស៊ីហ្វិក របស់ប្រទេសកាណាដា និងកិច្ច​ព្រមព្រៀង​ពាណិជ្ជកម្មសេរីអាស៊ាន-កាណាដា ដែលជាផលប្រយោជន៍រួម​សម្រាប់ប្រទេសទាំងពីរ ដើម្បី សន្ដិភាព ស្ថិរភាព វិបុលភាព និង ការអភិវឌ្ឍក្នុងតំបន់ និងពិភពលោក។ ជាទីបញ្ចប់សម្តេចធិបតី ​បានជូនពរលោកជំទាវឯកអគ្គរដ្ឋទូត ឱ្យទទួលបានជោគជ័យក្នុង​បេស​កកម្មការ​ទូត​របស់លោកជំទាវនៅព្រះរាជាណាចក្រកម្ពុជា ៕

បណ្ដាញសង្គម

ព័ត៌មានថ្មីៗ

រដ្ឋមន្ត្រីការបរទេសបារាំងស្វាគមន៍ការសម្រេចរបស់ចិន ជុំវិញស្រាកូញាក់ ប៉ុន្តែប្រាប់ថា បញ្ហានៅតែមាន
07/05/2025 05:07 PM
Facebook Telegram Linkin
ម៉ាឡេស៊ីដាក់ពន្ធប្រឆាំងការបង្ខូចតម្លៃលើផលិតផលដែក និងដែកថែបរបស់ចិន កូរ៉េខាងត្បូង និងវៀតណាម
07/05/2025 05:07 PM
Facebook Telegram Linkin
ក្រុមប្រទេស BRICS នឹងថ្កោលទោសវិធានការពន្ធរបស់លោក Trump
07/05/2025 04:07 PM
Facebook Telegram Linkin
ឯកឧត្តមរដ្ឋមន្ត្រី ជា វ៉ាន់ដេត ដឹកនាំកិច្ចប្រជុំលើកទី៧ របស់ គ.រ.ឌ. ពិនិត្យលើស្ថានភាព និងយន្តការនៃការទប់ស្កាត់ការវាយប្រហារសាយប័រ (Cyber Attack)
07/05/2025 04:07 PM
Facebook Telegram Linkin
EU ត្រូវបានរាយការណ៍ថា គ្រោងស្តុកទុកធនធានរ៉ែសំខាន់ៗ អំឡុងពេលមានហានិភ័យភូមិសាស្ត្រនយោបាយ
07/05/2025 04:07 PM
Facebook Telegram Linkin
អ៊ុយក្រែនឲ្យដឹងថា ខ្លួនបានវាយប្រហារអាកាសយានដ្ឋានយោធារុស្ស៊ី
07/05/2025 03:07 PM
Facebook Telegram Linkin
ជើងជ្រូក និងស្លាបមាន់ បង្កកជិត ៤តោនត្រូវបានកម្លាំងជំនាញនៃអគ្គនាយកដ្ឋានសុខភាពសត្វ និងផលិតកម្មសត្វ ឆ្មក់បង្រ្កាប
07/05/2025 03:07 PM
Facebook Telegram Linkin
លោក Trump៖ អាមេរិកនឹងចាប់ផ្តើមកិច្ចពិភាក្សាជាមួយចិន ជុំវិញកិច្ចព្រមព្រៀង TikTok សប្តាហ៍ក្រោយ
07/05/2025 02:07 PM
Facebook Telegram Linkin
ជប៉ុនត្រៀមសម្រាប់ការរញ្ជួយដីបន្ថែមទៀត ខណៈអាជ្ញាធរច្រានចោលការឃោសនាបំផ្លើសពីថ្ងៃវិនាសកម្ម
07/05/2025 02:07 PM
Facebook Telegram Linkin
លោក Trump ព្រលយពាក្យទណ្ឌកម្ម ដោយសារ «មិនសប្បាយចិត្តខ្លាំង» ជាមួយលោក Putin ជុំវិញបញ្ហាអ៊ុយក្រែន
07/05/2025 02:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.