នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណបក្សនយោបាយសម្ព័ន្ធភាព បង្ហាញជំហររបស់ខ្លួនក្នុង​ការចូលរួ​ម​ដោះស្រាយ​បញ្ហារួម​សម្រាប់​ជាតិ
កម្ពុជានឹងមានវត្តមានរោងចក្រដំឡើងរថយន្តអគ្គិសនីថ្មីមួយទៀត នៅក្នុងតំបន់សេដ្ឋកិច្ចពិសេស ខេត្តពោធិ៍សាត់ ខណៈត្រឹមឆ្នាំ២០២៥ កំណើនរថយន្តអគ្គិសនីចុះបញ្ជីមានចំនួន ៦,១២៩គ្រឿង កើនឡើង ១៧២% បើធៀបឆ្នាំ២០២៤
ទូតចិនអបអរការដាក់ឱ្យពលរដ្ឋឆ្លងកាត់ស្ពានមិត្តភាពកម្ពុជា-ចិន មេគង្គក្រចេះនៅដើមខែក្រោយ ខណៈមិត្តចិនប្រកាសបន្តពង្រីកការសាងសង់ស្ពាន និងផ្លូវនៅកម្ពុជាឥតឈប់ឈរ
គម្រោងពង្រីក និងលើកកម្រិតផ្លូវជាតិលេខ៧ (ស្គន់-ក្រុងកំពង់ចាម) ជាបួនគន្លង សម្រេចលទ្ធផលការងារបានជិត ៩០%ហើយ គិតត្រឹមខែមីនា ឆ្នាំ២០២៦នេះ

នយោបាយ​ និង ការអភិវឌ្ឍន៍

ឯកអគ្គរដ្ឋទូតកាណាដាប្រចាំនៅកម្ពុជា ពេញចិត្តចំពោះទំនាក់ទំនងនិងកិច្ចសហប្រតិបត្តិការល្អរវាងកាណាដា-កម្ពុជា

2024/05/13 12:49:29 pm        161
Facebook Telegram Linkin
នាព្រឹកថ្ងៃទី១៣ ខែឧសភា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យលោកជំទាវ ពីង គិតនីកន (Ping M. Kitnikone) អគ្គរដ្ឋទូតនៃប្រទេសកាណាដាប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ នៅវិមានសន្តិភាព។ក្នុងឱកាសនៃជំនួបលោកជំទាវអគ្គរដ្ឋទូត បានថ្លែងអំណរគុណជូនចំពោះ សម្តេចធិបតី ដែល​បានឆ្លៀតពេលវេលាដ៏មមាញឹកអនុញ្ញាតឱ្យរូបលោកជំទាវ និងគណៈប្រតិភូ ចូលជួបសម្តែង​ការគួរសម និងពិភាក្សាការងារ ព្រមទាំងបាន​បញ្ជាក់អំពីការពេញចិត្តចំពោះទំនាក់ទំនង​ការទូត​ជាប្រវត្តិសាស្រ្ត និងកិច្ចសហប្រតិបត្តិការល្អ រវាងកាណាដា-កម្ពុជា ដែលជាទំនាក់ទំនង និងកិច្ច​សហប្រតិបត្តិការប្រកបដោយផ្លែផ្កា ​ហើយក្នុងអាណត្តិការទូតនៅកម្ពុជា ​លោកជំទាវឯកអគ្គរដ្ឋទូត ប្តេជ្ញាខិតខំបន្ត ពង្រឹង និងពង្រីកទំនាក់ទំនង និង កិច្ចសហប្រតិបត្តិការ រវាងប្រទេសទាំងពីរឱ្យកាន់​តែរីកចម្រើន។ បន្ថែមលើនេះលោកជំទាវឯកអគ្គរដ្ឋទូត ក៏បានគោរពជម្រាបជូនសម្តេចធិបតីអំពីការបន្តជំរុញ​កិច្ច​សហប្រតិបត្តិការលើវិស័យពាណិជ្ជកម្ម និងវិនិយោគរវាងកាណាដា-កម្ពុជា ក៏ដូចជាការពង្រឹងការ​វិនិយោគ​ប្រកប​ដោយគុណភាពរបស់ក្រុមហ៊ុនកាណាដានៅកម្ពុជាផងដែរ។ជាការឆ្លើយតប សម្តេចធិបតី​ បានស្វាគមន៍ចំពោះ លោកជំទាវ ពីង គិតនីកន ​និងគណៈប្រតិភូ ដែល​បានអញ្ជើញមកបំពេញបេសកកម្មការងារនៅព្រះរាជាណាចក្រកម្ពុជា ព្រមទាំងបានវាយ​តម្លៃខ្ពស់ចំពោះទំនាក់ទំនងការទូត និងកិច្ចសហប្រតិបត្តិការល្អ រវាងប្រទេសទាំងពីរ ដែលជាចំណងការទូតជាង៧០ឆ្នាំមកហើយ ​និងបានថ្លែងអំណរគុណចំពោះរដ្ឋាភិបាល និងប្រជាជនកាណាដា ដែលបានចូលរួមចំណែកក្នុងការកសាងសង្គម-សេដ្ឋកិច្ចកម្ពុជានាពេលកន្លងមក ការកសាងធនធានមនុស្ស ជាពិសេសការបណ្តុះបណ្តាលដល់កងកម្លាំងរក្សាសន្តិភាពមួកខៀវរបស់កម្ពុជា និងការគាំទ្រដល់វិស័យបោសសម្អាតមីន។ ពាក់ព័ន្ធនឹងវិស័យពាណិជ្ជកម្ម និងវិនិយោគ សម្តេចធិបតី បានគូសបញ្ជាក់ថា បច្ចុប្បន្ននេះ​សភាពាណិជ្ជកម្មកម្ពុជាបានបង្កើតនូវតំណាងសភាពាណិជ្ជកម្មនៅប្រទេសកាណាដា ដែលជាផ្នែក​មួយនៃការភ្ជាប់ទំនាក់ទំនង និងកិច្ចសហប្រតិបត្តិការលើវិស័យពាណិជ្ជកម្ម និងវិនិយោគ​រវាងប្រទេស​ទាំងពីរ។ បន្ថែមលើនេះ សម្តេចធិបតី បានបញ្ជាក់ជូនលោកជំទាវឯកអគ្គរដ្ឋទូតអំពីគោលនយោបាយ​ទាក់ទាញ និងលើកទឹកចិត្តវិនិយោគិននៅកម្ពុជា តាមរយៈការអនុវត្តច្បាប់ស្តីអំពីវិនិយោគ​នៃព្រះរាជាណាចក្រកម្ពុជា ក៏ដូចជាការដាក់ចេញនូវគោលនយោបាយជាក់ស្ដែង ដើម្បីគាំទ្រដល់​បរិយាកាសវិនិយោគ និងរក្សាភាពប្រកួតប្រជែងរបស់កម្ពុជា ទាំងក្នុងក្របខ័ណ្ឌតំបន់ និងសកលលោក។ ទន្ទឹមនោះ សម្ដេចធិបតីក៏បានគូសរំលេចអំពីការដាក់ចេញនូវគោលនយោបាយ និងយន្តការ​បន្ថែមទៀត​ក្នុងការគាំទ្រ និងដោះស្រាយនូវបញ្ហាប្រឈមនានារបស់វិនិយោគិននៅកម្ពុជា តាមរយៈការរៀបចំ​នូវវេទិការវាងរាជរដ្ឋាភិបាល-ផ្នែកឯកជន និងការបង្កើតក្រុមការងារតាមដាន​លើការអនុវត្តគោលនយោបាយ វិធានការ និងការស្វែងរកដំណោះស្រាយចំពោះបញ្ហាប្រឈមនានា របស់វិនិយោគិន។មុននឹងបញ្ចប់ សម្តេចធិបតី និងលោកជំទាវឯកអគ្គរដ្ឋទូត ក៏បានពិភាក្សា និងផ្លាស់ប្តូរយោបល់​ក្នុងការលើកកម្ពស់ទំនាក់ទំនង និងកិច្ចសហប្រតិបត្តិការទាំងក្នុងក្របខ័ណ្ឌទ្វេភាគី និងពហុភាគី ដោយផ្តោតលើគំនិតផ្តួចផ្តើមស្តីពីយុទ្ធស្ត្រឥណ្ឌូ-ប៉ាស៊ីហ្វិក របស់ប្រទេសកាណាដា និងកិច្ច​ព្រមព្រៀង​ពាណិជ្ជកម្មសេរីអាស៊ាន-កាណាដា ដែលជាផលប្រយោជន៍រួម​សម្រាប់ប្រទេសទាំងពីរ ដើម្បី សន្ដិភាព ស្ថិរភាព វិបុលភាព និង ការអភិវឌ្ឍក្នុងតំបន់ និងពិភពលោក។ ជាទីបញ្ចប់សម្តេចធិបតី ​បានជូនពរលោកជំទាវឯកអគ្គរដ្ឋទូត ឱ្យទទួលបានជោគជ័យក្នុង​បេស​កកម្មការ​ទូត​របស់លោកជំទាវនៅព្រះរាជាណាចក្រកម្ពុជា ៕

ថ្នាក់ដឹកនាំ និងមន្ត្រីរាជការនៃរដ្ឋបាលរាជធានីភ្នំពេញ ជួបជុំគ្នាប្រកាសគាំទ្រយ៉ាងពេញទំហឹង ចំពោះគម្រោងព្រែកជីកហ្វូណនតេជោ

2024/05/13 12:22:58 pm        156
Facebook Telegram Linkin
ភ្នំពេញ៖ គណៈអភិបាលរាជធានីភ្នំពេញ និងមន្ត្រីក្រោមឱវាទចំណុះឲ្យរដ្ឋបាលរាជធានីភ្នំពេញ នាព្រឹកថ្ងៃទី១៣ ខែឧសភា ឆ្នាំ២០២៤ បានជួបជុំគ្នា ដើម្បីប្រកាសគាំទ្រយ៉ាងពេញទំហឹង ចំពោះគម្រោងជាប្រវត្តិសាស្ត្រ ព្រែកជីកហ្វូណនតេជោ ដែលផ្តល់អត្ថប្រយោជន៍ដ៏ធំធេងចំពោះជាតិ និងប្រជាពលរដ្ឋទាំងមូល។ការជួបជុំគ្នានេះដឹកនាំដោយឯកឧត្ដម ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ ​ដែលមានមន្ត្រីចូលរួមប្រមាណ ៤០០នាក់។ឯកឧត្ដម ឃួង ស្រេង មានប្រសាសន៍ថា គម្រោងព្រែកជីកហ្វូណនតេជោ មិនមែនជាទ្រព្យ សម្បត្តិរបស់នរណាម្នាក់នោះទេ តែជាទ្រព្យរបស់ជាតិ និងប្រជាពលរដ្ឋកម្ពុជាទាំងអស់គ្នា។ ព្រែកជីកហ្វូណនតេជោ ជាទ្រសម្បត្តិមហាសាលសម្រាប់កម្ពុជា ហើយព្រែកជីកនេះក៏មិនប៉ះពាល់​ដល់ផលប្រយោជន៍អ្នកដ៏ទៃដែរ។ ឯកឧត្ដម ឃួង ស្រេង បន្ថែមថា ​មានព្រែកជីកហ្វូណនតេជោ ទំនិញរបស់កម្ពុជានឹងមានការប្រកួតប្រជែងជាអន្តរជាតិ។ ក្នុងនាមមន្ត្រីរាជការសូមគាំទ្រយ៉ាងពេញទំហឹង ចំពោះគម្រោងព្រែកជីកហ្វូណនតេជោនេះ ដើម្បីឲ្យក្លាយជាចលនាឯកភាពជាតិតែមួយ។គួរបញ្ជាក់ថា គម្រោងព្រែកជីកហ្វូណនតេជោ ជាព្រែកជីកប្រវត្តិសាស្ត្រលើកទី១នៅកម្ពុជា ជាគំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា ហើយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបន្តស្នាដៃនិងជំរុញបន្ថែមក្នុងការអភិវឌ្ឍន៍គម្រោងព្រែកជីកហ្វូណនតេជោឲ្សសម្រេចបាននាពេលអនាគត។គម្រោងព្រែកជីកហ្វូណនតេជោ នឹងតភ្ជាប់ផ្លូវទឹករវាងទន្លេទៅកាន់សមុទ្រកម្ពុជា ដោយឆ្លងកាត់ខេត្តកណ្តាល តាកែវ កំពត និងខេត្តកែប មាន ប្រវែង១៨០ គីឡូម៉ែត្រ ។ ព្រែកជីកហ្វូណនតេជោ នឹងផ្តល់អត្ថប្រយោជន៍ដ៏មហាសាលដល់ប្រទេសកម្ពុជា ជាពិសេស​វិស័យដឹកជញ្ជូន ហើយកាត់បន្ថយតម្លៃដឹកជញ្ជូន ​ពេលវេលា ខូចខាតផ្លូវថ្នល់ ការកកស្ទះចរាចរណ៍ គ្រោះថ្នាក់ចរាចរណ៍ ក៏ដូចជាការកាត់បន្ថយនីតិវិធីសម្រាប់នាវា និងបែបបទក្នុងការឆ្លងកាត់ទំនិញ​ពីកម្ពុជាទៅសមុទ្រ ​ការបង្កើតតំបន់ពាណិជ្ជកម្ម តំបន់សេដ្ឋកិច្ចពិសេស ការអភិវឌ្ឍន៍​ផែរណបថ្មីៗជាច្រើន ការពង្រីកតំបន់អភិវឌ្ឍកសិកម្ម ​ធារាសាស្ត្រ វារីវប្បកម្ម ទេសចរណ៍​ជួយរំដោះទឹកជំនន់ក្នុងរដូវវស្សា ជួយបង្កើនផលត្រីទឹកសាបនៅតាមព្រែក អចលនទ្រព្យ និងការវិនិយោគផ្សេងៗ ។ល។ និយាយជារួម គម្រោងព្រែកជីកហ្វូណនតេជោ គឺជាគម្រោង​បម្រើផលប្រយោជន៍ជាតិដ៏ធំធេង ជាពិសេសផ្នែកសេដ្ឋកិច្ចសង្គមនៅកម្ពុជា៕អត្ថបទ ៖ ប្រាក់ វ៉ាន់ដា

ការបោះឆ្នោតនៅឥណ្ឌាឈានចូលដល់ដំណាក់កាលទី៤ ខណៈវោហាសាស្ត្រលើសាសនា និងវិសមភាពកាន់តែតានតឹង

2024/05/13 11:44:28 am        184
Facebook Telegram Linkin
នៅថ្ងៃចន្ទទី១៣ឧសភាសប្ដាហ៍នេះ ប្រទេសឥណ្ឌាបានបោះឆ្នោតដំណាក់កាលទី ៤នៃការបោះឆ្នោតសកលមានរយៈពេល ៧ សប្តាហ៍ ខណៈវោហាសាស្ត្រនៃយុទ្ធនាការបោះឆ្នោតកាន់តែតឹងតែងលើវិសមភាពសេដ្ឋកិច្ច និងការបែងចែកសាសនា។ ប្រទេសដែលមានប្រជាជនច្រើនជាងគេបំផុតលើពិភពលោកមួយនេះ បានចាប់ផ្តើមបោះឆ្នោតកាលពីថ្ងៃទី១៩មេសា ក្នុងការបោះឆ្នោត៧ដំណាក់កាល ដែលមនុស្សជិតមួយពាន់លាននាក់មានសិទ្ធិបោះឆ្នោត ដោយសន្លឹកឆ្នោតនឹងត្រូវរាប់នៅថ្ងៃទី ៤ខែមិថុនា។ លោកនាយករដ្ឋមន្ត្រី Narendra Modi កំពុងស្វែងរកអាណត្តិដ៏កម្រ និងទីបីជាប់គ្នានៅក្នុងការបោះឆ្នោតដែលដាក់គណបក្សជាតិនិយមហិណ្ឌូ បារ៉ាទីយ៉ា ចាណាតា (Bharatiya Janata) (BJP) របស់លោក តតាំងជាមួយសម្ព័ន្ធភាពនៃគណបក្សប្រឆាំងជាងពីរដប់ រួមទាំងគូប្រជែងសំខាន់របស់សភាផងដែរ។លោក អាមីត សា (Amit Shah) ជំនួយការដ៏មានឥទ្ធិពលរបស់លោក Modi និងជារដ្ឋមន្ត្រីក្រសួងមហាផ្ទៃរបស់ប្រទេសនេះ បាននិយាយ ខណៈការបោះឆ្នោតបានចាប់ផ្តើមថា ខ្ញុំសូមអំពាវនាវដល់ទាំងអស់គ្នាឱ្យបោះឆ្នោតឱ្យរដ្ឋាភិបាលរបស់លោកModi ។ ការបោះឆ្នោតត្រូវធ្វើឡើងសម្រាប់អាសនៈចំនួន ៩៦ ក្នុងរដ្ឋ និងដែនដីចំនួន ១០ នៅថ្ងៃចន្ទនេះ ដោយមានមនុស្ស ១៧៧ លាននាក់មានសិទ្ធិបោះឆ្នោត។ អាសនៈមួយចំនួនធំស្ថិតនៅក្នុងរដ្ឋភាគខាងត្បូង និងភាគខាងកើតរបស់ប្រទេសឥណ្ឌា ដូចជារដ្ឋ តេឡានហ្កាណា(Telangana)រដ្ឋអានដ្រា ប្រទេស ( Andhra Pradesh) និង រដ្ឋ អូឌីសា (Odisha) ដែល គណបក្ស BJP ពុំសូវមានប្រជាប្រិយភាពខ្លាំង ដូចជារដ្ឋផ្សេងទៀតនៃប្រទេសនេះឡើយ៕

ឯកឧត្តម ហេង សួរ ជួបជាមួយអង្គបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខណ្ឌចំការមន និងខណ្ឌពោធិ៍សែនជ័យ អាណត្តិទី៤ ឆ្នាំ២០២៤

2024/05/12 04:43:45 pm        124
Facebook Telegram Linkin
ឯកឧត្តម ហេង សួរ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារចុះមូលដ្ឋានខណ្ឌចំការមន និងខណ្ឌពោធិ៍សែនជ័យ នៅរសៀលថ្ងៃអាទិត្យ ទី១២ ខែឧសភា ឆ្នាំ២០២៤នេះ បានជួបសំណេះសំណាលជាមួយអង្គបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខណ្ឌចំការមន និងខណ្ឌពោធិ៍សែនជ័យអាណត្តិទី៤នៅឯទីស្នាក់ការគណបក្សរាជធានីភ្នំពេញ ដែលមានសមាសភាពចូលរួម១១៩រូប។មុនការសំណេះសំណាលរបស់ឯកឧត្តមប្រធានក្រុមការងារ លោក កៀង ល័ក្ខ ប្រធានគណៈកម្មាធិការគណបក្សខណ្ឌចំការមន និងលោក សក់ ច័ន្ទកញារិទ្ធ ប្រធានគណៈកម្មាធិការគណបក្សខណ្ឌពោធិ៍សែនជ័យ បានអានរបាយការណ៍​ស្តីពីសមាសភាពអង្គបោះឆ្នោត និងស្ថានការណ៍នៃខណ្ឌរៀងៗខ្លួន។ ក្រោយស្តាប់របាយការណ៍ ឯកឧត្តម ហេង សួរ បានអរគុណកោតសរសើរ និងវាយតម្លៃខ្ពស់​ចំពោះកិច្ច​ខិតខំប្រឹងប្រែងសាមគ្គីភាពទទួលខុសត្រូវរបស់ក្រុមការងារគ្រប់ថ្នាក់​ដែលបាន​រួមគ្នាអនុវត្តបាននូវរាល់ផែនការឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាអាណត្តិទី៤ ឆ្នាំ២០២៤ ដែលនឹងប្រារព្ធឡើងនៅថ្ងៃទី២៦ ខែឧសភា ឱ្យជោគជ័យដើម្បីបន្តជំរុញ និងលើកកម្ពស់​ដំណើរការនៃលទ្ធិប្រជាធិបតេយ្យសេរីពហុបក្សនៅកម្ពុជា និងចូលរួមទាំងអស់គ្នា​អនុវត្តនូវ​យុទ្ធសាស្រ្តបញ្ចកោណដំណាក់កាលទី១​ និងគោលនយោបាយភូមិ ឃុំ សង្កាត់ មានសុវត្ថិភាព​ដើម្បី​បន្តពង្រឹងបាននូវសន្តិភាព ស្ថេរភាពនយោបាយ ​និងការអភិវឌ្ឍសង្គមលើគ្រប់វិស័យ នាំ​មកវិបុលសុខ វិបុលភាពជូនប្រជាពលរដ្ឋ៕

ឡាវផ្ដល់ដំរីចំនួន២ក្បាលឈ្មោះ​រំដួល និងចំប៉ា ដល់កម្ពុជា ខណៈនៅកម្ពុជាមានដំរីជិត ៧០០ ក្បាល

2024/05/12 11:12:06 am        192
Facebook Telegram Linkin
សាធារណរដ្ឋប្រជាធិបតេយ្យប្រជាមានិតឡាវបានប្រគល់ដំរីចំនួន ២ក្បាល ជាតង្វាយថ្វាយព្រះករុណាព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ត្រូវដាក់ឲ្យរស់នៅក្នុងឧទ្យានសួនសត្វភ្នំតាម៉ៅ ខណៈនៅកម្ពុជាកំពុងមានវត្តមានដំរីព្រៃ និងដំរីស្រុកចំនួនជិត ៧០០ក្បាល។ក្នុងពិធីប្រគល់ និងទទួល ដំរីចំនួនមួយគូ នៅព្រឹកថ្ងៃទី១២ ខែឧសភា ឆ្នាំ២០២៤ នៅឧទ្យានសួនសត្វភ្នំតាម៉ៅ ឯកឧត្តម ឡីនខាំ ដួងសាវ៉ាន់ (Linkham DOUANGSAVANH) រដ្ឋមន្ត្រីក្រសួងកសិកម្ម និងព្រៃឈើឡាវ បានថ្លែងថា ក្នុងឱកាសបំពេញទស្សនកិច្ចផ្លូវរដ្ឋនៅកម្ពុជា កាលពីថ្ងៃទី២៣-២៤ ខែមេសា ឆ្នាំ២០២៤ កន្លងមកនេះ ឯកឧត្តម ថងលន់ ស៊ីសូលីត (Thongloun SISOULITH) ប្រធានរដ្ឋឡាវ បានថ្វាយនូវតង្វាយសត្វដំរីចំនួនមួយគូ ថ្វាយព្រះករុណា​ជាអម្ចាស់​ជីវិតលើត្បូង ព្រះមហាក្សត្រកម្ពុជា ដើម្បីជានិមិត្តរូបនៃចំណងសាមគ្គីភាពរវាងរដ្ឋាភិបាល និងប្រជាជាតិទាំងពីរ ហើយព្រះអង្គទ្រង់សព្វព្រះរាជហឫទ័យ ដោយសេចក្តីសោមនស្សជាអនេក ទទួលតង្វាយសត្វដំរីមួយគូនេះ និងប្រោសព្រះរាជប្រទានជូនមករាជរដ្ឋាភិបាលកម្ពុជា ដើម្បីដឹកនាំចាត់ចែងរៀបចំពិធីប្រគល់-ទទួល និងទទួលចិញ្ចឹមថែរក្សាជាបន្ត។ ឯកឧត្តម បានបន្តថា សម្រាប់ដំរីទាំង ២ក្បាល ជាតង្វាយនោះ មានសត្វដំរីញី-ឈ្មោលដែលមានប្រភពមកពីស្រុក Thongmixay ខេត្ត Xaigna-bouli ដោយដំរីញីឈ្មោះរំដួល មានអាយុ ៣ឆ្នាំ ៩ខែ និងដំរីឈ្មោលឈ្មោះ ចំប៉ា អាយុ ៣ឆ្នាំ ៧ខែ ។ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ក្រសួងបានរៀបចំសាងសង់តុបតែងទ្រុងសម្រា់ដំរីមួយគូនេះ នៅឧទ្យានសួនសត្វ ព្រៃការពារ និងសួនភូតគាម “ភ្នំតាម៉ៅ” ខណៈឧទ្យាននេះ មានសត្វដំរីញី-ឈ្មោលចំនួន ៤ក្បាលស្រាប់ ក្នុងនោះញី២ក្បាល (ដំរីញី១ក្បាលឈ្មោះឡាក់គី មានអាយុ២៥ឆ្នាំ និង១ក្បាលទៀត ឈ្មោះចំរើនមានអាយុ ៣៥ឆ្នាំ) និងឈ្មោល២ក្បាល (ដំរីឈ្មោល១ក្បាលឈ្មោះឈូក អាយុ១៨ឆ្នាំ និង១ក្បាលទៀតឈ្មោះសាគរ មានអាយុ៣២ឆ្នាំ) ដែលកំពុងត្រូវបានថែទាំ និងផ្តល់ចំណីបានយ៉ាងល្អប្រសើរ ហើយដំរីទាំងពីរក្បាលដែលជាអំណោយរបស់ភាគីឡាវ នឹងត្រូវថែរក្សាជាមួយគ្នានឹងដំរីទាំង៤ក្បាល របស់ឧទ្យានសួនសត្វ ។ ឯកឧត្តមរដ្ឋមន្ត្រី បានបន្ថែមថា អំណោយដំរីមួយគូដ៏ថ្លៃថ្លានេះ នឹងចូលរួមរឹតបន្តឹងថែមទៀតនូវចំណងសាមគ្គីភាពជាប្រពៃណី និងជានិមិត្តរូប នៃកិច្ចសហប្រតិបត្តិការដ៏ស្អិតរមួត និងស្ថិតស្ថេររវាងប្រទេសទាំងពីរ ជាពិសេសក្នុងការថែរក្សាប្រភេទសត្វដំរី ដែលកំពុងរងគ្រោះ និងចូលរួមចំណែក ដល់ការអប់រំផ្សព្វផ្សាយអំពីបរិស្ថាន ដល់សាធារណជន នៃប្រទេសទាំងពីរ ការស្រាវជ្រាវវិទ្យាសាស្រ្ត ទេសចរណ៍ និងការអភិរក្សសត្វដំរីនៅក្រៅតំបន់ផងដែរ ។ឯកឧត្តម ឌិត ទីណា បានបញ្ជាក់ថា បច្ចុប្បន្ននៅកម្ពុជា សត្វដំរីកំពុងមានវត្តមាននៅភាគខាងជើង តំបន់ខ្ពង់រាបភាគខាងកើត និងតំបន់ជួរភ្នំក្រវាញ ហើយតាមការប៉ាន់ស្មានចំនួនសត្វដំរីព្រៃមានប្រមាណពី៤០០¬-៦០០ក្បាល និងសត្វដំរីស្រុកចំនួន ៧៥ក្បាលនៅកម្ពុជា។ កម្ពុជាក៏បានរៀបចំផែនការ សកម្មភាពអភិរក្សសត្វដំរីរយៈពេល១០ឆ្នាំ (២០២០ ២០២៩) ដោយបានដាក់ចេញនូវសកម្មភាព ជាយុទ្ធសាស្រ្ត ដើម្បីកាត់បន្ថយការគំរាមកំហែងដល់ការរស់នៅរបស់សត្វដំរី ដោយមានកិច្ចសហប្រតិបត្តិការជាមួយដៃគូអភិរក្សនានា ហើយការអភិរក្សសត្វដំរីនៅកម្ពុជាសម្រេចបានលទ្ធផលគួរឱ្យកត់សម្គាល់ ។ អំណោយដំរីមួយគូរបស់ឡាវ នឹងរួមចំណែកដល់ការបង្កើនចំនួនដំរីស្រុក នៅពេលដំរីទាំងពីរនៅវ័យក្មេង ដែលមានលទ្ធភាពបន្តពូជនៅពេលខាងមុខ និងជំនួសសត្វដំរីស្រុកដែលមានអាយុកាន់តែចាស់ ដោយសារកម្ពុជាមិនអនុញ្ញាតឱ្យមានការចាប់ទាក់សត្វដំរីព្រៃមកផ្សាំងទេ ៕អត្ថបទ បាន សុខរិទ្ធិ

លោក ស៊ុន ចន្ធី មេបក្សកម្លាំងជាតិត្រូវបានបញ្ជូនទៅឃុំខ្លួន នៅមណ្ឌលអប់រំកែប្រែទី៤ ខេត្តពោធិ៍សាត់

2024/05/11 10:41:54 am        211
Facebook Telegram Linkin
ចៅក្រមស៊ើបសួរ នៃសាលាដំបូងរាជធានីភ្នំពេញ នៅព្រឹកថ្ងៃទី១១ ខែឧសភា ឆ្នាំ២០២៤នេះ បាន​សម្រេចបញ្ជូនលោក ស៊ុន ចន្ធី ប្រធានគណបក្សកម្លាំងជាតិ ទៅឃុំខ្លួន នៅមណ្ឌល​អប់រំកែប្រែ​ទី៤​(ម៤) នៅក្នុងខេត្តពោធិ៍សាត់។ នេះបើតាមលោក អ៊ី រិន អ្នកនាំពាក្យ​សាលាដំ​បូង​រា​ជធានី​ភ្នំពេញ ដែលបានបញ្ជាក់ប្រាប់ ទូរទស្សន៍BTV នាព្រឹកថ្ងៃទី១១ ខែឧសភា ឆ្នាំ២០២៤នេះ៕លោក អ៊ី រិន បានថ្លែងថា ចៅក្រមស៊ើបសួរនៃសាលាដំបូងរាជធានីភ្នំពេញបាន សម្រេច​យក​លោក ស៊ុន ចន្ធី ទៅកាន់ម៤ ខេត្តពោធិសាត់ហើយ។ តែយ៉ាងណាលោកមិនបានបញ្ជាក់ថា ការ​បញ្ជូន​នេះ​ទៅ​ពីពេលណា ឬថ្ងៃណានោះឡើយ ដោយលោក​បញ្ជាក់​យ៉ាង​ខ្លីថា «​នេះ​ជា​ដែន​សមត្ថកិច្ច» លោកសុំមិនហ៊ានបញ្ជាក់ពេលវេលានោះទេ។សូមបញ្ជាក់ថា លោក ស៊ុន ចន្ធី ត្រូវបានសមត្ថកិច្ចចាប់ខ្លួនកាលពីថ្ងៃទី៩ ខែឧសភា ឆ្នាំ២០២៤ កន្លង​មកនេះ នៅព្រលានយន្តហោះអន្តរជាតិភ្នំពេញ បន្ទាប់ពីលោកមកពីជួបជុំគ្នា ជាមួយ​អ្នក​គាំទ្រ​គណបក្សកម្លាំងជាតិនៅប្រទេសជប៉ុន។ ការចាប់ខ្លួនលោក ស៊ុន ចន្ធី គឺជាការអនុវត្ត តាម​ដី​កា​ប​ញ្ជាឱ្យចូលខ្លួនរបស់អយ្យការអមសាលាដំបូងរាជធានីភ្នំពេញ ចុះថ្ងៃទី៧ ខែឧសភា ឆ្នាំ​២០២៤។ បើតាមការបញ្ជាក់របស់អ្នកនាំពាក្យក្រសួងយុត្តិធម៌ បានលើកឡើងថាការចាប់ខ្លួននេះ ត្រូវ​បាន​ធ្វើ​ឡើង​ពាក់​ព័ន្ធនឹងដំណើររឿង «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដោយ​បុគ្គល​ រូបនេះបានផ្សព្វផ្សាយព័ត៌មានលើបណ្តាញសង្គម ដោយបាន​ទម្លាក់​កំហុស​ដោយ​អសុទ្ធ​ចិត្ត​ទៅ​លើ​រាជរដ្ឋាភិបាលលើការចែកប័ណ្ណក្រីក្រជូនប្រជាពលរដ្ឋថាមានការលម្អៀង និងរើសអើង ព្រមទាំងបានមូលបង្កាច់អំពីការអភិវឌ្ឍ ប្រទេសរបស់រាជរដ្ឋាភិបាល ក្នុង​ចេតនា​ញុះញង់​បំភ្លៃ​ព័ត៌មាន នាំឱ្យប្រជាពលរដ្ឋមានការយល់ច្រឡំ ដែលបង្កភាព វឹកវរធ្ងន់ធ្ងរដល់សន្តិសុខសង្គម និង​សណ្តាប់​ធ្នាប់​សាធារណៈជាដើម។ក្រសួងយុត្តិធម៌បានបញ្ជាក់បន្ថែមទៀតថា«ការចាប់ខ្លួននេះត្រូវបានធ្វើឡើងតាមរយៈដីកាបញ្ជាឱ្យចូលខ្លួន របស់អយ្យការអមសាលាដំបូងរាជធានីភ្នំពេញ ដែលជា​ការ​អនុវត្ត​ច្បាប់​ស្រប​តាម​ក្រម​នីតិ​វិធី​ព្រហ្ម​ទណ្ឌ ហើយការចាប់ខ្លួននេះ គឺពាក់ព័ន្ធទៅនឹងអង្គហេតុនៃបទល្មើស ដែលមាន​ចែង​នៅ​ក្នុង​ក្រម​ព្រហ្មទណ្ឌជាធរមាន។ ដូច្នេះការចាប់ខ្លួនឈ្មោះ ស៊ុន ចន្ធី គឺជាការអនុវត្តច្បាប់សុទ្ធសាធ ជា​ពិសេស​គឺផ្អែកតាមក្រមព្រហ្មទណ្ឌ និងក្រមនីតិវិធី ព្រហ្មទណ្ឌនៃព្រះរាជាណាចក្រកម្ពុជា។តាមរយៈ​សេចក្តីថ្លែងការណ៍ព៌ត៌មានរបស់ អ្នកនាំពាក្យក្រសួងយុត្តិធម៌ បានបញ្ជាក់ទៀតថា ការ​ចាប់​ខ្លួន​ដោយស្របតាមនីតិវិធីច្បាប់ ចំពោះបុគ្គលណាម្នាក់ដែលប្រព្រឹត្តបទល្មើស គឺជា​រឿង​ធម្មតា​នៅ​ក្នុង​សង្គមនីតិរដ្ឋ ហើយការអនុវត្តច្បាប់នេះត្រូវធ្វើទៅលើបុគ្គលគ្រប់រូបដោយស្មើភាពគ្នា ដោយ​មិនមានបុគ្គលណាម្នាក់អាចជ្រកក្រោមស្លាកសិទ្ធិមនុស្ស, អង្គការសង្គមស៊ីវិល ឬ​គណបក្ស​នយោបាយ​ណាមួ​យ ដើម្បីរួចផុតពីការទទួលខុសត្រូវតាមផ្លូវច្បាប់ ចំពោះបទល្មើស​ព្រហ្ម​ទណ្ឌ​ដែល​ខ្លួន​បានប្រព្រឹត្តនោះទេ។ ប៉ុន្តែ យ៉ាងណាក៏ដោយ​បុគ្គល​គ្រប់​រូប​មាន​សិទ្ធិ​ពេញ​លេញ​តាម​ផ្លូវ​ច្បាប់​ក្នុង​ការការពារខ្លួន តាមផ្លូវតុលាការ ដោយរួមទាំងសិទ្ធិក្នុងការពឹងពាក់មេធាវី។ជាមួយ​គ្នា​នោះដែរអ្នកនាំពាក្យរបស់ក្រសួងយុត្តិធម៌ ក៏បានចាត់​ទុក​ថា​ការ​ចេញ​សេចក្ដីថ្លែង​ការណ៍​របស់​គណបក្សកម្លាំងជាតិ ដោយប្រើពាក្យ “ថ្កោលទោស” ចំពោះការ​អនុវ​ត្ត​ច្បាប់​ដោយ​ស្ថាប័ន​មាន​សមត្ថកិច្ចបែបនេះ គឺជាការមិនត្រឹមត្រូវ និងមិនអាចទទួលយកបានឡើយ ហើយដែល​គណបក្ស​នេះ​គប្បីពិនិត្យពិចារណាឡើងវិញក្នុងការប្រើប្រាស់ពាក្យពេចន៍ឱ្យបានសមស្រប ដើម្បី​ធានា​បាននូវធម្មានុរូប ភាពជាតួអង្គនយោបាយមួយ ដែលគោរពច្បាប់ នៅក្នុងសង្គមនីតិរដ្ឋនោះ៕អត្ថបទ៖​បាន ចក់

សម្ដេចធិបតី ហ៊ុន ម៉ាណែត អនុញ្ញាតឱ្យប្រធានក្រុមហ៊ុនមានមូលដ្ឋាននៅអាមេរិក ចូលជួបសម្ដែងការគួរសម និងពិភាក្សាការងារ

2024/05/10 02:22:12 pm        254
Facebook Telegram Linkin
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា រសៀលថ្ងៃសុក្រ ទី១០ ឧសភា ២០២៤នេះ បានអនុញ្ញាតឱ្យលោកបណ្ឌិត ចន ស៊ី ម៉ាក់ស្វែល (John C. Maxwell) ប្រធានក្រុមហ៊ុន The John Maxwell Company, Equip Organization និង Maxwell Leadership Foundation ចូលជួបសម្ដែងការគួរសម និងពិភាក្សាការងារនៅវិមានសន្តិភាព។ក្រុមហ៊ុនទាំង៣ ខាងលើ មានមូលដ្ឋាននៅសហរដ្ឋអាមេរិក ផ្តោតលើការផ្តល់នូវសេវាកម្មផ្នែកបណ្តុះបណ្តាលលើភាពជាអ្នកដឹកនាំ ក្នុងការអភិវឌ្ឍផ្នត់គំនិត និងការវិវត្តបុគ្គល ដោយមាននូវវគ្គបណ្តុះបណ្តាល និងសៀវភៅជាច្រើនប្រភេទផ្សេងៗគ្នា ទៅតាមគោលដៅកម្មសិក្សាការី។

កោះតៃវ៉ាន់និយាយថា នាវាចិន១១គ្រឿង ចូលក្នុងដែនទឹកក្បែរកោះ Kinmen

2024/05/10 02:11:57 pm        304
Facebook Telegram Linkin
កោះតៃវ៉ាន់និយាយថា នាវារដ្ឋាភិបាលចិនចំនួន ១១ គ្រឿង បានចូលមកក្នុងដែនទឹកក្បែរប្រជុំកោះ Kinmen។ កោះតៃវ៉ាន់ បានគ្រប់គ្រងប្រជុំកោះយ៉ាងមានប្រសិទ្ធភាព និងកំណត់ដែនទឹកនៅជុំវិញពួកគេ ដោយបានរឹតត្បិតនិងហាមឃាត់។ កោះនេះ បានរារាំងនាវាចិនមិនឱ្យចូលមកក្នុងដែនទឹកទាំងនេះដោយគ្មានការអនុញ្ញាតឡើយ។ឆ្មាំល្បាតឆ្នេររបស់កោះតៃវ៉ាន់និយាយថា នាវារដ្ឋាភិបាលចិនចំនួនប្រាំពីរគ្រឿង រួមមាននាវាកិច្ចការដែនសមុទ្រ និងនាវានេសាទ បានចូលទន្ទ្រានទៅក្នុងដែនទឹកដែលបានកំណត់ កាលពីម៉ោងប្រហែល ៣ រសៀលថ្ងៃព្រហស្បត្តិ៍។ឆ្មាំល្បាតឆ្នេរនិយាយថា នាវាឆ្មាំល្បាតឆ្នេរចិនចំនួនបួនគ្រឿងផ្សេងទៀត បានបើកចូលទៅក្នុងដែនទឹកដែលត្រូវបានហាមឃាត់ និងដាក់ការរឹតត្បិតនៅពេលតែមួយនោះ។ឆ្មាំល្បាតឆ្នេររបស់កោះតៃវ៉ាន់និយាយថា នាវាចិនទាំង ១១ គ្រឿង បានស្ថិតនៅក្នុងដែនទឹកប្រហែល ៩០ នាទី ទោះបីជាទូកល្បាតរបស់កោះ ព្រមានពួកគេឱ្យចាកចេញក៏ដោយ។ឆ្មាំល្បាតឆ្នេរនិយាយថា នេះជាលើកទី ៤ ហើយនៅក្នុងខែឧសភា ដែលនាវាឆ្មាំល្បាតឆ្នេររបស់ប្រទេសចិន បានធ្វើដំណើរចូលទៅក្នុងតំបន់នេះ។កាលពីខែកុម្ភៈ អ្នកនេសាទជនជាតិចិនពីរនាក់ បានស្លាប់បន្ទាប់ពីទូករបស់ពួកគេបានក្រឡាប់លិច ខណៈ ត្រូវបានឆ្មាំល្បាតឆ្នេររបស់កោះតៃវ៉ាន់ដេញតាមនៅក្នុងដែនទឹកក្បែរកោះ Kinmen។ ប្រទេសចិនបានឆ្លើយតបដោយនិយាយថា ពុំមានដែនទឹកត្រូវបានហាមឃាត់ ឬដាក់ការរឹតត្បិតនោះទេ។ អ្នកវិភាគនិយាយថា ចិនកំពុងព្យាយាមបង្កើនសម្ពាធលើរដ្ឋបាលកោះតៃវ៉ាន់ របស់លោក Lai Ching-te ដែលគ្រោងនឹងចូលកាន់តំណែងនៅថ្ងៃទី ២០ ខែឧសភា។

រដ្ឋមន្ត្រីអ៊ីស្រាអែល ប្រាប់ទាំងមិត្តនិងសត្រូវថា អ៊ីស្រាអែលនឹងសម្រេចគោលដៅសង្គ្រាម

2024/05/10 12:21:54 pm        199
Facebook Telegram Linkin
រដ្ឋមន្ត្រីក្រសួងការពារជាតិ លោក Yoav Gallant បានប្រាប់ ទាំងសត្រូវនិងមិត្ត របស់អ៊ីស្រាអែលថា អ៊ីស្រាអែល នឹងធ្វើអ្វីគ្រប់យ៉ាងដែលចាំបាច់ដើម្បីសម្រេចបាននូវគោលដៅសង្គ្រាមរបស់ខ្លួននៅតំបន់ហ្កាហ្សា និងនៅភាគខាងជើង ក្នុងការឆ្លើយតបជាក់ស្តែងចំពោះសម្ពាធរបស់សហរដ្ឋអាមេរិក ដើម្បីឲ្យបញ្ឈប់ប្រតិបត្តិការរបស់ខ្លួននៅទីក្រុងរ៉ាហ្វា។ការអត្ថាធិប្បាយនេះ ធ្វើឡើងនៅក្នុងពិធីរំលឹកវិញ្ញាណក្ខន្ធដល់អ្នកស្លាប់ក្នុងសង្គ្រាមរបស់អ៊ីស្រាអែល បន្ទាប់ពីការព្រមានរបស់ប្រធានាធិបតីសហរដ្ឋអាមេរិក លោក Joe Biden ដែលបាននិយាយថា សហរដ្ឋអាមេរិក នឹងបញ្ឈប់ការផ្គត់ផ្គង់សព្វាវុធ ប្រសិនបើអ៊ីស្រាអែលរុលចូលទៅក្នុងទីក្រុង Rafah ភាគខាងត្បូង នៃតំបន់ហ្កាហ្សា ជាកន្លែងដែលប្រជាជនប៉ាឡេស្ទីន ជាងមួយលាននាក់បានភៀសខ្លួនទៅកាន់ទីនោះ។ការអត្ថាធិប្បាយនានា ពីរដ្ឋមន្ត្រីគណៈរដ្ឋមន្ត្រីទទួលបន្ទុកសង្គ្រាម ដែលត្រូវបានចាត់ទុកថាមានភាពរសើបបំផុតចំពោះហានិភ័យនៃការងាករេរបស់សហរដ្ឋអាមេរិក បានបង្ហាញអំពីទំហំនៃការប្រឈមមុខដាក់គ្នារវាងរដ្ឋបាល លោក Biden និងរដ្ឋាភិបាលអ៊ីស្រាអែល។រថក្រោះអ៊ីស្រាអែល បានដណ្តើមការគ្រប់គ្រងផ្នែកខាងប៉ាឡេស្ទីននៅច្រកឆ្លងកាត់ព្រំដែនទីក្រុង Rafah ជាមួយប្រទេសអេហ្ស៊ីប កាលពីដើមសប្តាហ៍នេះ ។នាយករដ្ឋមន្ត្រី លោក Benjamin Netanyahu បានបំពានទៅនឹងសម្ពាធអន្តរជាតិដែលកើនឡើង ដើម្បីឲ្យព្រមព្រៀងលើបទឈប់បាញ់ ប៉ុន្តែរហូតមកដល់ពេលនេះ ពុំទាន់មានបទបញ្ជាឱ្យកងទ័ពចូលទីក្រុងនេះឡើយទេ ដែលអ៊ីស្រាអែលនិយាយថា កងវរសេនាតូចចំនួនបួនអង្គភាពរបស់អ្នកប្រយុទ្ធក្រុមហាម៉ាស មានមូលដ្ឋាននៅទីនោះ។នៅភាគខាងជើង កងកម្លាំងអ៊ីស្រាអែល បានបាញ់តគ្នាឆ្លងព្រំដែនប្រទេសលីបង់ ជាមួយកងកម្លាំងរបស់កងជីវពលក្រុមហេសបូឡាដែលគាំទ្រដោយប្រទេសអ៊ីរ៉ង់ ចាប់តាំងពីការចាប់ផ្តើមសង្រ្គាមនៅតំបន់ហ្កាហ្សា កាលពីខែតុលា ឆ្នាំមុន។

រាជរដ្ឋាភិបាលកម្ពុជា និងអង្គការ ILO បន្តពង្រឹងកិច្ចសហប្រតិបត្តិការ ដើម្បីការអភិវឌ្ឍសង្គម-សេដ្ឋកិច្ច

2024/05/10 11:27:26 am        224
Facebook Telegram Linkin
នាព្រឹកថ្ងៃទី១០ ខែឧសភា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃ​ព្រះរាជាណាចក្រកម្ពុជា បានអនុញ្ញាតឱ្យ លោកស្រី Chihoko Asada Miyakawa ឧបការី​អគ្គ​នាយក និងជានាយិកាប្រចាំតំបន់អាស៊ី-ប៉ាស៊ីហ្វិក នៃអង្គការអន្តរជាតិខាងការងារ (ILO) ចូល​ជួប​សម្តែង​ការគួរសម និងពិភាក្សាការងារ នៅវិមានសន្តិភាព។ ក្នុងឱកាសនៃជំនួប លោកស្រី Chihoko Asada-Miyakawa បានថ្លែងអំណរគុណចំពោះ សម្តេច​ធិបតី ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបលោកស្រី និងសហការី ចូល​ជួប​សម្តែង​ការ​គួរសម និងពិភាក្សាការងារនា ព្រមទាំងបាន​បញ្ជាក់​អំពី​កិច្ច​សហប្រតិបត្តិការ​ដ៏​យូរ​អង្វែង​រវាង​អង្គការ ILO និងកម្ពុជា និងបានប្តេជ្ញាចិត្តបន្តពង្រឹងកិច្ចសហប្រតិបត្តិការនេះបន្ថែមទៀត។ បន្ថែម​លើ​នេះ​លោកស្រីឧបការីអគ្គនាយក ក៏បានសម្តែងនូវការ​អបអរ​សាទរ​ចំពោះ​ការ​សម្រេច​បាន​នូវ​លទ្ធផល​ដ៏ល្អ​​ប្រសើររបស់រាជរដ្ឋាភិបាលកម្ពុជា​ក្នុងការដាក់ចេញនូវ​គោលនយោបាយ​គាំពារ​សង្គមជូ​នដល់គ្រួសារក្រីក្រ ក្រុមជនងាយរងគ្រោះ និងកម្មករ-និយោជិត ក្នុងគ្រាលំបាក នៃ​វិបត្តិ​ជំងឺ​កូវីដ-១៩ និងបាន​សម្តែង​នូវ​ការ​គាំទ្រ​ចំពោះ​ប្រទេសកម្ពុជាក្នុងការរៀបចំចាកចេញ​ពី​ចំណាត់​ថ្នាក់​ក្រុមប្រទេសអភិវឌ្ឍន៍តិចតួច (LDC Graduation) នាឆ្នាំ ២០២៩ ខាងមុខ។ ទន្ទឹម​នោះ លោកស្រីឧបការីអគ្គនាយក ក៏បានវាយតម្លៃខ្ពស់ចំពោះរាជរដ្ឋាភិបាលកម្ពុជា ដែល​បាន​ដាក់​ចេញនូវកម្មវិធីនយោបាយក្នុងការរួមចំណែក និងគាំទ្រដល់វិស័យការងារ និង​បណ្តុះ​បណ្តាល​វិជ្ជាជីវៈ និងជាពិសេសគាំទ្រ​ដល់​សមាគម​នានា​ក្នុង​ការ​លើក​កម្ពស់​ទំនាក់​ទំនង​វិជ្ជាជី​វៈ​ប្រកប​ដោយ​សុខុដុមនីយកម្មក្នុងរោងចក្រ និងសហគ្រាស។ លោកស្រីឧបការីអគ្គនាយក ក៏​បាន​គោរព​ស្នើ​សុំនូវមតិយោបល់ និងអនុសាសន៍របស់សម្តេចធិបតី ចំពោះអង្គការ ILO ក្នុង​ការ​បន្ត​ជួយ​គាំទ្រ​ដល់រាជរដ្ឋាភិបាលកម្ពុជាក្នុងក្របខ័ណ្ឌគោលនយោបាយ និងក្របខ័ណ្ឌយុ​ទ្ធសាស្រ្ត​របស់​រាជ​រដ្ឋាភិបាល នីតិកាលទី៧ នៃរដ្ឋសភា។ជាការឆ្លើយតប សម្តេចធិបតី បានស្វាគមន៍ចំពោះ លោកស្រី Chihoko Asada-Miyakawa និង​សហការី ដែលបានអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា និងបាន​ថ្លែង​អំណរ​គុណ​ដល់អង្គការ ILO ចំពោះការរួមចំណែកដល់ការអភិវឌ្ឍសង្គម-សេដ្ឋកិច្ច​កម្ពុជា​នា​ពេល​កន្លង​ម​ក។ ជាមួយគ្នានេះ សម្តេចធិបតី ក៏បានវាយ​តម្លៃខ្ពស់​ចំពោះ​ការ​ប្តេជ្ញា​ចិត្ត​របស់​លោកស្រី​ក្នុង​ការ​បន្ត​គាំទ្រ និងចូលរួមចំណែកអភិវឌ្ឍសង្គម-សេដ្ឋកិច្ចកម្ពុជា ដោយសម្តេចធិបតី បាន​សម្តែង​ការគាំទ្រ​ចំពោះ​កម្ម​វិធី​ដែលមានស្រាប់របស់ ILO នៅកម្ពុជា និងលើកទឹកចិត្តឱ្យ ILO បន្តគាំទ្រ​ដល់​វិស័យ​ការងារ​នៅ​កម្ពុជាបន្ថែមទៀត ជាពិសេស​ការកសាង​មូល​ធន​មនុស្ស​ឱ្យ​ឆ្លើយត​ប​ទៅនឹ​ង​តម្រូវ​ការ​ជាក់​ស្តែងរ​បស់ទីផ្សារ តាមរយៈការកសាងសមត្ថភាពឱ្យមានជំនាញខ្ពស់ និងជំនាញ​ប្រកប​ដោយ​ភាព​បត់​បែន ដើម្បីចូលរួមចំណែកក្នុងការសម្រេចបាននូវគោលដៅរបស់កម្ពុជាក្នុងឆ្នាំ២០៥០ ក្លាយ​ជា​ប្រទេស​ដែលមានចំណូលខ្ពស់។ បន្ថែមលើនេះ សម្តេចធិបតី បានបញ្ជាក់ថា រាជរដ្ឋាភិបាល នីតិកាលទី៧ នៃរដ្ឋសភា បន្តផ្តោត​ការ​យក​ចិត្ត​ទុកដាក់ និងលើកកម្ពស់ជីវភាពរបស់ប្រជាពលរដ្ឋ តាមរយៈ​ការដាក់​ចេញ​នូវ​គោល​នយោបាយ​អាទិភាពទាំង៦ តាមរយៈការធ្វើឱ្យប្រសើរឡើងនូវប្រព័ន្ធសុខាភិបាល ការកែទម្រង់​ប្រព័ន្ធ​អប់រំ និងកិច្ចគាំពារសង្គម ជាដើម។ ពាក់ព័ន្ធនឹង​ការលើកកម្ពស់សុខុដុមនីយកម្មក្នុងរោងចក្រ និង សហគ្រាស សម្តេចធិបតី បាន​គូស​បញ្ជាក់​ថា រាជរដ្ឋាភិបាល​បាន​យក​ចិត្ត​ទុក​ដាក់​ជាអាទិភាពលើការកសាងនូវ​សុខុដុមនីយកម្ម​នៅ​តាម​រោង​ចក្រ និងសហគ្រាស ដើម្បីធ្វើយ៉ាងណាធានា​ឱ្យ​បាន​នូវ​បរិយាកាស​ការងារ​ដ៏​ល្អ​សម្រាប់​និយោជិត និងនិយោជក ក៏ដូចជាការ​ពង្រឹង​នូវ​លក្ខខណ្ឌ​ការងារ​ឱ្យ​កាន់​តែ​ប្រសើរ​ឡើង​ជូន​បង​ប្អូន​កម្មករ​-និយោជិតគ្រប់រូប ហើយរាជរដ្ឋាភិបាល ក៏តែងតែយក​ចិត្ត​ទុក​ដាក់​ខ្ពស់​ក្នុង​ការ​ដាក់​ចេញ​នូវ​វិធាន​ការ​ដោះស្រាយឱ្យបានទាន់ពេល និងប្រកបដោយប្រសិទ្ធភាព​នៅ​ពេល​មាន​វិវាទ​ការងារ​កើត​ឡើង តាមរយៈក្រសួងការងារ និងបណ្តុះបណ្តាលវិជ្ជាជីវៈ ដែល​ជា​សេនា​ធិការ​របស់​រាជ​រដ្ឋាភិបាល​។ ជាទីបញ្ចប់ សម្តេចធិបតី ក៏បានជូនពរ លោកស្រីឧបការីអគ្គនាយក ឱ្យទទួលបាន​ជោគជ័យ​ក្នុង​បេសកកម្ម​ការងារនៅព្រះរាជាណាចក្រកម្ពុជា និងធ្វើមាតុភូមិនិវត្តន៍ប្រកបដោយសុវត្ថិភាព៕

បណ្ដាញសង្គម

ព័ត៌មានថ្មីៗ

[TOP STORY] សម្ដេចធិបតី ចេញបទបញ្ជាឲ្យស្រាវជ្រាវបណ្ដាញលួចនាំប្រេងខុសច្បាប់ពីថៃ ចូលម​កកម្ពុជា បើមានមន្ដ្រីពាក់ព័ន្ធត្រូវបញ្ចប់តួនាទី និងបណ្ដេញចេញពីក្របខណ្ឌ
04/03/2026 07:04 AM
Facebook Telegram Linkin
អ៊ីរ៉ង់សន្យាវាយកម្ទេចសហរដ្ឋអាមេរិក និងអ៊ីស្រាអែល ក្រោយការគំរាមកំហែងរបស់លោក Trump
04/02/2026 08:04 PM
Facebook Telegram Linkin
ក្រុមចម្រុះមាន ៤០ប្រទេសដឹកនាំដោយអង់គ្លេស សន្យាចាត់វិធានការលើច្រកសមុទ្រ Hormuz
04/02/2026 08:04 PM
Facebook Telegram Linkin
បេសកជន៖ អ៊ីរ៉ង់មិនមានបំណង «ចាប់ផ្តើមឡើងវិញ» ក្នុងការបង្កើនសារធាតុអ៊ុយរ៉ានីញ៉ូមទេ
04/02/2026 08:04 PM
Facebook Telegram Linkin
នេប៉ាល់រៀបចំសម័យប្រជុំសភាជាលើកដំបូង ក្រោយការបោះឆ្នោត
04/02/2026 08:04 PM
Facebook Telegram Linkin
លោក Macron ៖ វាមិនប្រាកដនិយមនោះទេក្នុងការបើកច្រកសមុទ្រ Hormuz ដោយកម្លាំង
04/02/2026 08:04 PM
Facebook Telegram Linkin
ក្រុមឧទ្ទាមហ៊ូធីសម្របសម្រួលជាមួយអ៊ីរ៉ង់ ប៉ុន្តែនៅតែរក្សាឯករាជ្យភាព បើទោះបីជាមានសង្រ្គាមក៏ដោយ
04/02/2026 08:04 PM
Facebook Telegram Linkin
ប្រទេសចំនួន ៨ ថ្កោលទោសចំពោះទោសប្រហារជីវិតរបស់អ៊ីស្រាអែលលើជនប៉ាឡេស្ទីន
04/02/2026 08:04 PM
Facebook Telegram Linkin
តំបន់ភាគកណ្តាល និងភាគខាងត្បូងអ៊ីតាលី រងការវាយប្រហារដោយព្យុះព្រិល និងអាកាសធាតុអាក្រក់
04/02/2026 08:04 PM
Facebook Telegram Linkin
មនុស្សម្នាក់ស្លាប់ ក្រោយព្យុះវាយប្រហារប្រទេសក្រិកបង្កជាទឹកជំនន់ និងបង្អាក់ការធ្វើដំណើរ
04/02/2026 08:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.