នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតីបញ្ជាក់ជាថ្មីទៅប្រធានអាស៊ានប្តូរវេនចំពោះការប្ដេជ្ញាចិត្តរបស់កម្ពុជាលើការដោះស្រាយបញ្ហាជម្លោះព្រំដែនទាំងអស់ជាមួយប្រទេសជិតខាងដោយសន្តិភាព និងច្បាប់អន្តរជាតិ
គណៈកម្មាធិការអន្តរក្រសួងចុះពិនិត្យ និងវាយតម្លៃការស្ថាបនាផ្លូវក្រួសក្រហម១ខ្សែ ក្នុង​ស្រុកបាកាន ខេត្តពោធិ៍សាត់
រដ្ឋមន្ត្រីក្រសួងអភិវឌ្ឍន៍ជនបទចុះពិនិត្យវឌ្ឍនភាពការងារសាងសង់ស្ពានភ្នំក្រវាញ និង​ផ្លូវកៅ​ស៊ូ​ក្នុង​​ខេត្តពោធិ៍សាត់
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់

នយោបាយ​ និង ការអភិវឌ្ឍន៍

នាយករដ្ឋមន្ត្រីជប៉ុន ព្រមានថាពិភពលោកកំពុងប្រឈមចំណុចរបត់ជាប្រវត្តិសាស្ត្រ មុនជំនួបកំពូលដឹកនាំដោយអាមេរិក

2024/04/08 11:04:20 am        200
Facebook Telegram Linkin
លោកនាយករដ្ឋមន្ត្រីជប៉ុន Fumio Kishida បានប្រាប់ទូរទស្សន៍ CNN កាលពីថ្ងៃអាទិត្យ មុនការចេញដំណើររបស់លោកនៅថ្ងៃពុធ ដែលត្រូវបានឃ្លាំមើលយ៉ាងយកចិត្តទុកដាក់បំផុត សម្រាប់ជំនួបជាមួយលោកប្រធានាធិបតីអាមេរិក Joe Biden និងហ្វីលីពីន ដែលគ្រោងនឹងធ្វើឡើងនៅថ្ងៃព្រហស្បតិ៍សប្តាហ៍នេះ ថា ភាពតានតឹងភូមិសាស្ត្រនយោបាយដែលកំពុងកើនឡើងបានរុញពិភពលោកទៅកាន់តែជិតចំណុចរបត់ជាប្រវត្តិសាស្ត្រ និងកំពុងបង្ខំឱ្យប្រទេសជប៉ុនផ្លាស់ប្តូរជំហរការពាររបស់ខ្លួន ។ លោក Kishida បាននិយាយនៅក្នុងបទសម្ភាសន៍មួយនៅឯគេហដ្ឋានឯកជនរបស់លោកក្នុងទីក្រុងតូក្យូថា នៅពេលយើងកំពុងមើលឃើញការឈ្លានពានអ៊ុយក្រែនពីសំណាក់រុស្ស៊ី ស្ថានភាពនៅតែបន្តក្នុងមជ្ឈិមបូព៌ា ព្រមទាំងស្ថានភាពនៅអាស៊ីបូព៌ា យើងត្រូវបានប្រឈមនឹងចំណុចរបត់ប្រវត្តិសាស្ត្រមួយ។លោកបានលើកឡើងថា នោះជាដើមចមដែលប្រទេសជប៉ុន បានសម្រេចចិត្តពង្រឹងសមត្ថភាពការពាររបស់ខ្លួនជាមូលដ្ឋាន ហើយយើងបានផ្លាស់ប្តូរយ៉ាងខ្លាំងលើគោលនយោបាយសន្តិសុខរបស់ប្រទេសជប៉ុន នៅលើចំណុចជាអាទិភាពទាំងនោះ ។កិច្ចប្រជុំកំពូលរវាងលោក Kishida និងលោក Biden ត្រូវបានកំណត់លក្ខណៈដោយទីក្រុងវ៉ាស៊ីនតោនថាជាឱកាសប្រវត្តិសាស្ត្រសម្រាប់ប្រទេសទាំងពីរដើម្បីធ្វើទំនើបកម្មសម្ព័ន្ធភាពរបស់ខ្លួន ខណៈប្រទេសទាំងពីរសម្លឹងមើលការគំរាមកំហែងក្នុងតំបន់ពីការសាកល្បងអាវុធរបស់កូរ៉េខាងជើង និងទំនាក់ទំនងដែលកំពុងរីកចម្រើនជាមួយរុស្ស៊ី សកម្មភាពយោធារបស់ចិននៅសមុទ្រចិនខាងត្បូង និងឆ្ពោះទៅរកតៃវ៉ាន់៕

មន្ត្រីនៅបណ្ដាប្រទេសអាស៊ីអាគ្នេយ៍ ផ្តល់អាទិភាពដល់ទំនាក់ទំនងជាមួយចិនតាមរយៈដំណើរទស្សនកិច្ចសកម្ម

2024/04/08 09:39:53 am        81
Facebook Telegram Linkin
ដំណើរទស្សនកិច្ចរបស់មន្ត្រីជាន់ខ្ពស់មកពីបណ្តាប្រទេសអាស៊ីអាគ្នេយ៍ទៅកាន់ប្រទេសចិនបានបង្ហាញពីការប្តេជ្ញាចិត្តយ៉ាងសកម្មរបស់ខ្លួនក្នុងការផ្តល់អាទិភាពដល់ការអភិវឌ្ឍន៍ទំនាក់ទំនងជាមួយប្រទេសចិន។ ប្រធានាធិបតីជាប់ឆ្នោតឥណ្ឌូនេស៊ីលោក Prabowo Subianto បានធ្វើដំណើរទៅកាន់ទីក្រុងប៉េកាំងជាទិសដៅដំបូង បន្ទាប់ពីការជាប់ឆ្នោត ដោយបានទៅដល់ប្រទេសចិនកាលពីថ្ងៃទី៣១ មីនាសម្រាប់ដំណើរទស្សនកិច្ចរយៈពេលបីថ្ងៃ។ ការសម្រេចចិត្តនេះបានគូសបញ្ជាក់ពីការប្តេជ្ញាចិត្តរបស់លោកក្នុងការរក្សាគោលនយោបាយមិត្តភាពរបស់លោកប្រធានាធិបតី Joko ចំពោះប្រទេសចិន និងជំរុញការអភិវឌ្ឍន៍កាន់តែទូលំទូលាយ និងប្រកបដោយគុណភាពខ្ពស់នៃទំនាក់ទំនងទ្វេភាគី។លោកឌីចូហារី អូរ៉ាម៉ានហ្កាន់(Djauhari Oratmangun) ឯកអគ្គរដ្ឋទូតឥណ្ឌូណេស៊ី ប្រចាំនៅប្រទេសចិនបានលើកឡើងថា ឥណ្ឌូនេស៊ី និងចិន មានសក្តានុពលក្នុងការរួមចំណែកដល់កិច្ចសហប្រតិបត្តិការកាន់តែទូលំទូលាយនៅក្នុងបរិបទនៃកិច្ចសហប្រតិបត្តិការក្នុងតំបន់ និងជាការពិតសម្រាប់ការអភិវឌ្ឍន៍ និងវិបុលភាពក្នុងតំបន់។មិនយូរប៉ុន្មាន រដ្ឋមន្ត្រីការបរទេសមកពីប្រទេសឡាវ វៀតណាម និងទីម័រខាងកើត បានទៅបំពេញទស្សនកិច្ចនៅប្រទេសចិន ជាបន្តបន្ទាប់ ចាប់ពីថ្ងៃទី ២ ដល់ថ្ងៃទី ៥ ខែមេសា។ មិនត្រឹមតែប៉ុណ្ណោះព្រះអង្គម្ចាស់ក្សត្រិយ៍ថៃ មហា ចក្រី សេរិនថន (Maha Chakri Sirindhorn) ក៏បានយាងបំពេញព្រះរាជទស្សនកិច្ចនៅប្រទេសចិនចាប់ពីថ្ងៃទី ៤ ដល់ថ្ងៃទី១០ ខែមេសានេះ ផងដែរ។ថ្មីៗនេះ រដ្ឋាភិបាលហ្វីលីពីន ដែលញុះញង់ និងគាំទ្រ ដោយសហរដ្ឋអាមេរិក បានធ្វើសកម្មភាពអុជអាលជាញឹកញាប់ទាក់ទងនឹងកោះ ហ័ងយ៉ាន់ (Huangyan) របស់ចិន និងថ្មប៉ប្រះទឹក រិនអាយ(Ren'ai) ដែលបង្កើនភាពតានតឹងនៅសមុទ្រចិនខាងត្បូង។បទពិសោធន៍នេះបានបង្ហាញថា ការរក្សាសន្តិភាព និងស្ថិរភាពនៅសមុទ្រចិនខាងត្បូង ពឹងផ្អែកលើកិច្ចខិតខំប្រឹងប្រែងរួមគ្នារបស់ប្រទេសចិន និងបណ្តាប្រទេសអាស៊ាន ដែលជាបញ្ហាប្រឈម និងមានគុណតម្លៃខ្ពស់។ កិច្ចខិតខំប្រឹងប្រែងរបស់សហរដ្ឋអាមេរិក ដើម្បីជំរុញឱ្យមានការប្រឈមមុខដាក់គ្នា ទទួលបានការគាំទ្រតិចតួចប៉ុណ្ណោះ៕

អគ្គនាយកដ្ឋានអន្តោប្រវេសន៍បដិសេធការផ្សព្វផ្សាយថា អាជ្ញាធរមិនយកចិត្តទុកដាក់ចំពោះពលករខ្មែរវិលចូលប្រទេសវិញ

2024/04/08 09:23:10 am        130
Facebook Telegram Linkin
ភ្នំពេញ៖ អគ្គនាយកដ្ឋានអន្តោប្រវេសន៍ បានឱ្យដឹងថា គិតត្រឹមថ្ងៃទី៦ ខែមេសា ឆ្នាំ២០២៤នេះ មានពលរដ្ឋខ្មែរជាង ៩៧,៣៧៧ នាក់ ក្នុងនោះជាពលករចំនួនជាង ៣១,០៣៩នាក់ បានធ្វើដំណើរវិលចូលប្រទេសវិញដោយក្តីសប្បាយរីករាយក្រោមកិច្ចស្វាគមន៍ និងជួយសម្រួលគ្រប់បែបយ៉ាងដោយមន្ត្រីនគរបាលអន្តោប្រវេសន៍ និងសមត្ថកិច្ចពាក់ព័ន្ធដទៃទៀតនៅតាមបណ្តាប៉ុស្តិ៍ច្រកទ្វារព្រំដែនអន្តរជាតិ។ សូមបញ្ជាក់ថា កាលពីថ្ងៃទី៥ ខែមេសាឆ្នាំ២០២៤កន្លងទៅ មានគណនីហ្វេសប៊ុកឈ្មោះ រ័ត្ន មង្គលបូរី បានបង្ហោះវីឌីអូបង្ហាញពីការកកស្ទះ ដោយសរសេររៀបរាប់ថា «មិនដូចការគិតរបស់ហ្វីមិនស្រួលទេ» បើចង់បានលឿនត្រូវអស់ ៤០០បាត។ អគ្គនាយកដ្ឋានអន្តោប្រវេសន៍បានចាត់វិធានការស្រាវជ្រាវ និងរកឃើញថា ការកកស្ទះដូចបានបង្ហោះនោះ គឺមិនស្ថិតនៅប៉ុស្តិ៍ច្រកទ្វារព្រំដែនអន្តរជាតិ ភ្នំដី របស់កម្ពុជាឡើយ៕

ប្រមុខការពារជាតិ៖ អ៊ីស្រាអែល បានត្រៀមខ្លួនដើម្បីដោះស្រាយគ្រប់ស្ថានការណ៍ឆ្លើយតបរបស់អ៊ីរ៉ង់

2024/04/08 09:00:12 am        134
Facebook Telegram Linkin
រដ្ឋមន្ត្រីការពារជាតិអ៊ីស្រាអែល លោក យ៉ាវ ហ្កាឡាន់ (Yoav Gallant) បាននិយាយកាលពីថ្ងៃអាទិត្យ (០៧ មេសា) ថាអ៊ីស្រាអែល ត្រៀមខ្លួនជាស្រេចដើម្បីដោះស្រាយសេណារីយ៉ូណាមួយដែលអាចកើតឡើងជាមួយអ៊ីរ៉ង់ បន្ទាប់ពីទីក្រុងតេអេរ៉ង់ បានគំរាមសងសឹកចំពោះការសម្លាប់ឧត្តមសេនីយ៍អ៊ីរ៉ង់ ក្នុងហេតុការណ៍វាយប្រហារតាមអាកាសលើស្ថានទូតខ្លួនក្នុងប្រទេសស៊ីរី កាលពីថ្ងៃទី០១ ខែមេសា។មន្ត្រីអ៊ីរ៉ង់ម្នាក់បាននិយាយមុននោះថា ស្ថានទូតអ៊ីស្រាអែលទាំងអស់មិនមានសុវត្ថិភាពទៀតទេ ហើយទីភ្នាក់ងារសារព័ត៌មានពាក់កណ្តាលផ្លូវការរបស់អ៊ីរ៉ង់ មួយបានចេញផ្សាយក្រាហ្វិកដែលបង្ហាញពីអាវុធ ដែលខ្លួនបាននិយាយថានឹងមានសមត្ថភាពវាយប្រហារអ៊ីស្រាអែល។ ការិយាល័យរបស់លោក ហ្កាឡាន់ បានចេញសេចក្តីថ្លែងការណ៍អំពីការត្រៀមខ្លួនរបស់អ៊ីស្រាអែលនេះ បន្ទាប់ពីលោកបានធ្វើ «ការវាយតម្លៃស្ថានភាពប្រតិបត្តិការ» ជាមួយបណ្ដាមន្ត្រីយោធាជាន់ខ្ពស់។អគ្គសេនាធិការ លោក ហើហ្ស៊ី ហាលេវី (Herzi Halevi) បាននិយាយថា អ៊ីស្រាអែល «ដឹងពីរបៀបដោះស្រាយជាមួយអ៊ីរ៉ង់ ទាំងការវាយលុក និងការពារ»។ អ៊ីរ៉ង់បានគំរាមឆ្លើយតបនឹងការវាយប្រហារដែលសង្ស័យរបស់អ៊ីស្រាអែល នៅក្រុងដាម៉ាស កាលពីសប្តាហ៍មុន ដែលបានសម្លាប់សមាជិកកងឆ្មាំបដិវត្តន៍អ៊ីរ៉ង់ប្រាំពីរនាក់ ក្នុងនោះមានមេបញ្ជាការជាន់ខ្ពស់ម្នាក់។ទីប្រឹក្សាជាន់ខ្ពស់របស់មេដឹកនាំកំពូលអ៊ីរ៉ង់ លោក យ៉ាសយ៉ា រ៉ាហ៊ីម សាហ្វាវី (Yahya Rahim Safavi) បាននិយាយកាលពីថ្ងៃអាទិត្យថា មិនមានស្ថានទូតណាមួយរបស់អ៊ីស្រាអែល មានសុវត្ថិភាពទៀតទេ ហើយថាទីក្រុងតេអេរ៉ង់ បានចាត់ទុកការប្រឈមមុខដាក់គ្នាជាមួយអ៊ីស្រាអែល ថាជា «សិទ្ធិត្រឹមត្រូវ និងស្របច្បាប់»៕

ចិន ធ្វើសកម្មភាពល្បាតបែបប្រយុទ្ធ ខណៈអាមេរិក ធ្វើសមយុទ្ធជាមួយសម្ព័ន្ធមិត្តក្នុងដែនទឹកមានជម្លោះ

2024/04/08 08:43:52 am        121
Facebook Telegram Linkin
កងទ័ពរបស់ប្រទេសចិន បាននិយាយថា ប្រទេសនេះ បានធ្វើសកម្មភាពល្បាតបែបប្រយុទ្ធកាលពីថ្ងៃអាទិត្យទី៧មេសា នៅក្នុងសមុទ្រចិនខាងត្បូង ចំថ្ងៃដែលប្រទេសហ្វីលីពីន សហរដ្ឋអាមេរិក ជប៉ុន និងអូស្ត្រាលី ធ្វើសមយុទ្ធយោធារួមគ្នា នៅក្នុងដែនដីមានជម្លោះ។សកម្មភាពនានានៅដែនសមុទ្រនេះ បានកើតឡើង ប៉ុន្មានថ្ងៃ មុនលោកប្រធានាធិបតីអាមេរិក Joe Biden គ្រោងរៀបចំកិច្ចប្រជុំកំពូលត្រីភាគីលើកដំបូង ជាមួយក្រុមមេដឹកនាំមកពីប្រទេស ហ្វីលីពីន និងជប៉ុន ខណៈភាពតានតឹងចេះតែកើនឡើង ជុំវិញការប្រកួតប្រជែងដ៏ក្ដៅគគុកនៅក្នុងសមុទ្រចិនខាងត្បូង ដែលក្លាយជារបៀបវារៈសម្រាប់ជំនួបនេះ។ ទីបញ្ជាការភូមិភាគរបស់កងទ័ពរំដោះប្រជាជនចិន (PLA) បាននិយាយថា ខ្លួនកំពុងរៀបចំ ការល្បាតបែបប្រយុទ្ធកងទ័ពជើងទឹក និងអាកាស នៅក្នុងសមុទ្រចិនខាងត្បូង។ ទីបញ្ជាការនេះបាននិយាយនៅក្នុងសេចក្ដីថ្លែងការណ៍មួយថា គ្រប់សកម្មភាពយោធាទាំងអស់ ដែលបង្កអស្ថិរភាពនៅក្នុងសមុទ្រចិនខាងត្បូង និងការបង្កបញ្ហាឲ្យកាន់តែក្ដៅគគុក គឺអាចគ្រប់គ្រងបាន ដែលទំនងជាសំដៅដល់សកម្មភាពសមយុទ្ធផ្សេងកំពុងធ្វើនៅក្នុងដែនទឹកដ៏ចម្រូងចម្រាសនេះ។ យោធាហ្វីលីពីន បាននិយាយថា សមយុទ្ធរបស់ខ្លួន ជាមួយសហរដ្ឋអាមេរិក អូស្ត្រាលី និងជប៉ុន បានបង្ហាញពីការប្ដេជ្ញាចិត្តរបស់បណ្ដាប្រទេសដែលកំពុងចូលរួម ដើម្បីពង្រឹងកិច្ចសហប្រតិបត្តិការក្នុងតំបន់និងអន្តរជាតិ ក្នុងការគាំទ្រដល់យុទ្ធសាស្ត្រ ឥណ្ឌូ-ប៉ាស៊ីហ្វិក សេរីភាព និងបើកចំហ តាមរយៈ លំហាត់អន្តរប្រតិបត្តិការនៅក្នុងសកម្មភាពដែនសមុទ្រ។ សមយុទ្ធដែលឲ្យឈ្មោះថា សកម្មភាពកិច្ចសហប្រតិបត្តិការដែនសមុទ្រចម្រុះ រួមបញ្ចូលទាំង អង្គភាពកងទ័ពជើងទឹកនិងអាកាស មកពីប្រទេសទាំង៤នេះ៕

ក្រសួងការងារ ស្ថានទូតខ្មែរ និងសហគមខ្មែរ ផ្តើមរៀបចំសង្រ្កាន្តឆ្នាំថ្មីនៅតំបន់នានារៀងរាល់ចុងសប្តាហ៍ ដើម្បីអបអរសាទរបុណ្យចូលឆ្នាំប្រពៃណីជាតិ

2024/04/07 07:24:23 pm        135
Facebook Telegram Linkin
សាធារណរដ្ឋកូរ៉េ៖ នៅថ្ងៃទី៧ ខែមេសា ឆ្នាំ២០២៤ ក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ ក្រុមការងារ ESEA និងសមាគមខ្មែរនាសាធារណរដ្ឋកូរ៉េ បានរៀបចំ“សង្ក្រាន្តខ្មែរនៅកូរ៉េ” ដើម្បីអបអរសាទរពិធីបុណ្យចូលឆ្នាំថ្មីប្រពៃណីខ្មែរ ឆ្នាំរោង ឆស័ក ព.ស.២៥៦៧ នៅសាធារណរដ្ឋកូរ៉េ ចំនួន ៣ទីតាំង ដែលមានសហគមន៍ខ្មែរចូលរួមប្រមាណ ៣ ០៥០នាក់ ក្នុងនោះមានតំបន់ក្វាងជូ មានសហគមន៍ខ្មែរចូលរួមប្រមាណ ២ ០០០នាក់, នៅតំបន់អ៊ុលសាន មានសហគមន៍ខ្មែរចូលរួមប្រមាណ ១ ០០០នាក់ និងតំបន់ថេហ្គូ មានសហគមន៍ខ្មែរចូលរួម ១០០នាក់។ ទន្ទឹមនឹងនេះ បងប្អូនសហគមន៍ខ្មែរក៏បានរៀបចំនៅតំបន់ផ្សេងទៀត រួមមានតំបន់គីមផូ តំបន់ប៊ូឆន់ និងកោះជេជូផងដែរ។សម្រាប់សង្ក្រាន្តខ្មែរនាថ្ងៃនេះ កម្មវិធីផ្តើមដោយពិធីសាសនា ទៅតាមប្រពៃណីទំនៀមទម្លាប់ព្រះពុទ្ធសាសនារបស់ខ្មែរ លេងល្បែងប្រជាប្រិយមានបោះអង្គញ់ ចោលឈូង ទាញព្រ័ត្រ លាក់កន្សែង និងរាំលេងកម្សាន្ដ ប្រកបដោយបរិយាកាសស្និទ្ធស្នាល សប្បាយរីករាយ និងសាមគ្គីភាពស្រាលាញ់រាប់អានគ្នាដូចបងប្អូន។ បន្ថែមពីនេះកម្មវិធីមានការដាក់បង្ហាញស្តង់ម្ហូបអាហារខ្មែរ ផលិតផលខ្មែរជាច្រើន ដូចជានំអន្សម នំគម ម្រេចខ្មែរ សម្លៀកបំពាក់ប្រពៃណីខ្មែរ ដើម្បីឱ្យអ្នកចូលរួមទស្សនា កម្សាន្ត និងស្វែងយល់ពីវប្បធម៌និងអរិយធម៌ខ្មែរដ៏ផូរផង់។ ជាមួយគ្នានេះដែរ ក៏មានកម្មវិធីអាហារសាមគ្គីជាមួយបងប្អូនខ្មែរក្រោយពីបញ្ចប់កម្មវិធីផងដែរ។សូមបញ្ជាក់ផងដែរថា កម្មវិធីធំ “សង្ក្រាន្តខ្មែរនៅកូរ៉េ” នឹងរៀបចំនៅថ្ងៃទី២១ ខែមេសា ឆ្នាំ២០២៤ ដោយមានការចូលរួមពីសំណាក់សិល្បករល្បីៗពីប្រទេសកម្ពុជា និងបន្តសហការរៀបចំនៅតាមតំបន់នានា​នៅសប្តាហ៍បន្តបន្ទាប់ទៀតរហូតដល់ចុងសប្តាហ៍ទី៤នៃខែមេសា ឆ្នាំ២០២៤៕

និស្សិតខ្មែរកំពុងសិក្សានៅឡាវ ថ្លែងអំណរគុណសម្ដេចធិបតី ហ៊ុន មាណែត បានផ្ដល់អំណោយ ក្រមាខ្មែរ គ្រឿងតុបតែងសម្រាប់បង្ហាញវប្បធម៌ប្រពៃណីជាតិខ្មែរ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ

2024/04/07 07:16:10 pm        127
Facebook Telegram Linkin
ភ្នំពេញ៖ ប្អូនសិក្ខាកាម និងនិស្សិតកម្ពុជាដែលកំពុងសិស្សានៅសាធារណរដ្ឋប្រជាធិបតេយ្យប្រជាមានិតឡាវ បានថ្លែងអំណរគុណដល់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានផ្ដល់អំណោយ មានដូចជា៖ ក្រមាខ្មែរ គ្រឿងតុបតែង សម្លៀកបំពាក់របាំជូនពរ និងរបាំគោះត្រឡោកជាដើម សម្រាប់ចូលរួមបង្ហាញ និងសម្ដែងនូវវប្បធម៌ប្រពៃណីជាតិខ្មែរ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ខាងមុខនេះ និងក្នុងឱកាសផ្សេងៗទៀតផងដែរ។ ជាមួយគ្នានេះ ប្អូនៗសិក្ខាកាម និងនិស្សិត មានក្តីសោមនស្សរីករាយ និងកក់ក្ដៅបំផុត ដែលតែងតែទទួលបានការយកចិត្តទុកដាក់ពីសម្ដេចធិបតីនាយករដ្ឋមន្ត្រី ដោយបានប្ដេជ្ញាចិត្ត នឹងខិតខំរៀនសូត្រ និងប្រតិបត្តិវិន័យឱ្យបានខ្ជាប់ខ្ជួន ដើម្បីបញ្ចប់ការសិក្សាឱ្យបានជោគជ័យ ដែលជាមោទនភាពរបស់ខ្លួនផ្ទាល់ ក្រុមគ្រួសារ និងប្រទេសជាតិ។សូមរំឭកផងដែរថា កាលពីថ្ងៃទី២៥ ខែមីនា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់​ទៅបំពេញ​ទស្សនកិច្ចផ្លូវការនៅសាធារណរដ្ឋប្រជាធិបតេយ្យប្រជាមានិតឡាវ សម្ដេចធិបតីនាយករដ្ឋមន្ត្រី បានជួបសំណេះសំណាលជាមួយប្អូនៗសិក្ខាកាម និងនិស្សិត ដោយបានសន្យាជួយឧបត្ថម្ភ ឈុតតុបតែង និងសម្លៀកបំពាក់របាំបុរាណខ្មែរ ក្នុងគោលបំណងឱ្យប្អូនៗសិក្ខាកាម និង​និស្សិតបានចូលរួមបង្ហាញ និងសម្ដែងនូវវប្បធម៌ប្រពៃណីជាតិខ្មែរ ទៅកាន់ប្រជាជនឡាវ​និយាយដោយឡែក និងទៅកាន់ពិភពលោកឱ្យស្គាល់ខ្មែរកាន់តែច្បាស់ថែមទៀត ៕

សម្ដេចតេជោ ហ៊ុន សែន ថ្លែងអំណរគុណព្រះមហាក្សត្រ ព្រះមហាក្សត្រី ថ្នាក់ដឹកនាំកំពូលរបស់កម្ពុជា និងបណ្ដាប្រទេសជាមិត្តដែលបានជូនពរសម្ដេច ក្នុងឱកាសជាប់ជាប្រធានព្រឹទ្ធសភា

2024/04/07 07:08:43 pm        86
Facebook Telegram Linkin
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា នៅថ្ងៃទី៧ ខែមេសា ឆ្នាំ ២០២៤នេះ បានថ្វាយ និងផ្ញើលិខិតថ្លែងអំណរគុណ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល និងព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា, សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា និងបណ្ដាថ្នាក់ដឹកនាំកំពូលប្រទេសជាមិត្តនានាដែលបានព្រះរាជសារ និងសារលិខិតអបអរសាទរ​សម្ដេចក្នុងឱកាសជាប់ឆ្នោតជាប្រធានព្រឹទ្ធសភានៃព្រះរាជាណាចក្រកម្ពុជា ក្នុងសម័យប្រជុំលើកដំបូង សម្រាប់នីតិកាលទី៥ កាលពីថ្ងៃទី៣ ខែមេសា ឆ្នាំ២០២៤នេះ។ សម្ដេចតេជោ និងនិងភរិយាបានថ្លែងអំណរព្រះរាជគុណប្រកបដោយបីតិសោមនស្ស រីករាយជាអនេកប្បការ ដោយបានទទួលព្រះរាជសារលិខិត សម្តេចម៉ែ និងព្រះមហាក្សត្រ ជាអម្ចាស់ ដែលទ្រង់សព្វព្រះរាជ ហឫទ័យប្រោសព្រះរាជទាននូវការអបអរសាទរ ព្រមទាំងប្រសិទ្ធពរបវរមហាប្រសើរចំពោះសម្ដេច និងភរិយារួមទាំងក្រុមគ្រួសារ ក្នុងឱកាសពោរពេញដោយមហាកិត្តិយសឧត្តុង្គឧត្តមដែលសម្ដេចត្រូវបានសម័យប្រជុំដំបូងព្រឹទ្ធសភា នីតិកាលទី៥ បោះឆ្នោតជាឯកច្ឆ័ន្ធជ្រើសរើសជា “ប្រធានព្រឹទ្ធសភា" នៃព្រះរាជាណាចក្រកម្ពុជា។សម្ដេចតេជោ ហ៊ុន សែន ក៏បានថ្លែងអំណរគុណយ៉ាងស្មោះស្ម័គ្រចំពោះសារអបអរសាទរ និង​ជូនពរពីបណ្ដាមេដឹកនាំនៃបណ្ដាប្រទេសជាមិត្តនានា ដែលបានជូនពរ និងអបអរសាទរ​ដល់គណបក្ស​ប្រជាជនកម្ពុជាចំពោះជ័យជន្នះក្នុងការបោះឆ្នោតព្រឹទ្ធសភាឆ្នាំ២០២៤ និងចំពោះសម្ដេចដែលត្រូវបានបោះឆ្នោតជ្រើសរើសជា ប្រធានព្រឹទ្ធសភានៃព្រះរាជាណាចក្រកម្ពុជាសម្រាប់នីតិកាលទី៥។សម្ដេចតេជោថ្លែងថា៖ «ក្នុងនាមខ្ញុំជាប្រធានព្រឹទ្ធសភា ខ្ញុំទន្ទឹងរង់ចាំធ្វើការយ៉ាងជិតស្និទ្ធ​ជាមួយស្ថាប័ន​នីតិប្បញ្ញត្តិ និងនីតិប្រតិបត្តិ របស់ប្រទេសនានា ក្នុងក្របខណ្ឌ​នៃកិច្ចសហប្រតិបត្តិការ​សភាទ្វេភាគី និងពហុភាគី ព្រមទាំងពង្រឹង ទំនាក់ទំនងល្អដែលមានស្រាប់រវាងប្រទេសកម្ពុជា និង​ប្រទេសជាមិត្តនានាឱ្យកាន់តែស៊ីជម្រៅថែមទៀត នៅក្រោមស្មារតីសហគមន៍អាស៊ាន ដើម្បីផលប្រយោជន៍​រួមសម្រាប់ប្រជាជន និងប្រទេស »៕

សង្ក្រាន្តខ្មែរនៅជប៉ុន ដើម្បីអបអរសាទបុណ្យចូលឆ្នាំ បានចាប់ផ្តើមជាមួយនឹងពិធីសាសនា និងល្បែងប្រជាប្រិយខ្មែរ

2024/04/07 10:44:21 am        213
Facebook Telegram Linkin
ជប៉ុន៖ នៅថ្ងៃអាទិត្យ ទី៧ ខែមេសា ឆ្នាំ២០២៤ ក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន ក្រុមការងារ ESEA និងសមាគមមិត្តយើង បានរៀបចំកម្មវិធី “សង្ក្រាន្ត ខ្មែរនៅជប៉ុន” ដើម្បីអបអរសាទរពិធីបុណ្យចូលឆ្នាំថ្មីប្រពៃណីខ្មែរ ឆ្នាំរោង ឆស័ក ព.ស ២៥៦៧ នៅសួនអូសាកា (Osaka Castle) ក្រុងអូសាកា នៃខេត្តអូសាកា របស់ប្រទេសជប៉ុន ។ពិធីនេះ ធ្វើឡើងក្រោមអធិបតីភាពឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាល​វិជ្ជាជីវៈ ដោយមានការអញ្ជើញចូលរួមពីឯកឧត្ដមណាហ្គាណុ ហ៊ីរូម៉ាសា (Nakano Hiromasa) សមាជិករដ្ឋសភានៃប្រទេសជប៉ុន តំណាងអភិបាលខេត្ត និងក្រុងអូសាកា បងប្អូនសហគមន៍ខ្មែរ និស្សិត កម្មសិក្សាការី ពលករ និងភ្ញៀវកិត្តិយសជាតិ និងអន្តរជាតិជាច្រើនកុះករ។ សម្រាប់សង្ក្រាន្តខ្មែរនៅព្រឹកនេះ កម្មវិធីផ្តើមដោយពិធីសាសនាសំខាន់ៗ ដូចជា រាប់បាត្រ ពូនភ្នំខ្សាច់ បង្សុកូល ប្រគេនចង្ហាន់ព្រះសង្ឃ ទៅតាមប្រពៃណីទំនៀមទម្លាប់ព្រះពុទ្ធសាសនា​របស់ខ្មែរ ​និងបន្តដោយកម្មវិធីដាក់បង្ហាញស្តង់ម្ហូបអាហារខ្មែរ ​ផលិតផលខ្មែរជាច្រើន ដូចជានំអន្សម នំគម ម្រេចខ្មែរ សម្លៀកបំពាក់ប្រពៃណីខ្មែរដើម្បីឱ្យអ្នកចូលរួមទស្សនា កម្សាន្ត និងស្វែងយល់ពីវប្បធម៌​និងអរិយធម៌ខ្មែរដ៏ផូរផង់។ ជាមួយគ្នានេះ អ្នកចូលរួមទាំងកម្ពុជា និងជប៉ុន ក៏បានចូលរួមលេងល្បែងប្រជាប្រិយដ៏សម្បូរបែបរបស់ខ្មែរដែលរួមមានបោះអង្គញ់ ចោលឈូង ទាញព្រ័ត្រ លាក់កន្សែង ប្រកបដោយបរិយាកាសស្និទ្ធស្នាល និងសប្បាយរីករាយយ៉ាងអឹកធឹក។ការៀបចំពិធីសង្ក្រាន្តខ្មែរឆ្នាំថ្មីជូនប្រជាពលរដ្ឋខ្មែរដែលកំពុងធ្វើការ ស្នាក់នៅ និងសិក្សានៅជប៉ុន​នាពេលនេះ គឺជាអនុសាសន៍ណែនាំដ៏ខ្ពង់ខ្ពស់របស់​សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាដែលតែងតែយកចិត្តទុកដាក់ដល់ពលរដ្ឋខ្មែរទាំង​អស់បើទោះបីស្ថិតនៅបរទេសក្តីដើម្បីឱ្យបានចូលរួមរីករាយអបអរសាទរប្រពៃណីជាតិរបស់ខ្លួន។ សម្រាប់កម្មវិធីដ៏សប្បាយរីករាយនេះ​ ក្រសួងការងារ និងបណ្តុះបណ្តាលវិជ្ជាជីវៈដែលជាសេនាធិការ​របស់ប្រមុខរាជរដ្ឋាភិបាល បានរៀបចំកម្មវិធីប្រពៃណីជាតិនេះយ៉ាងរលូនដែលធ្វើឱ្យអ្នកចូលរួម​ចងបាច់ជាអនុស្សាវរីយរវាងខ្មែរ និងខ្មែរដែលភាពកក់ក្តៅ ​ការយកចិត្តទុកដាក់ និងក្តីស្រឡាញ់​ទៅវិញទៅមក។សូមបញ្ជាក់ថា ដើម្បីអបអរសាទរពិធីបុណ្យចូលឆ្នាំប្រពៃណីជាតិខ្មែរ ក្រសួងការងារ និងបណ្តុះបណ្តាលវិជ្ជាជីវៈ ដោយមានការសហការជាមួយស្ថានទូតខ្មែរប្រចាំនៅប្រទេសជប៉ុន ក្រុមការងារESEA និងសមាគមមិត្តយើង គ្រោងរៀបចំកម្មវិធីសង្ក្រាន្តចូលឆ្នាំប្រពៃណីខ្មែរចំនួន ១១ទីតាំង​ផ្សេងគ្នានៅទូទាំងប្រទេសជប៉ុនដើម្បីផ្តល់ភាពសប្បាយរីករាយ​ដល់ពលរដ្ឋខ្មែរទាំងជាង៣ម៉ឺននាក់លើទឹកដីជប៉ុនអាចចូលរួមសប្បាយរីករាយ និងអបអសាទរពិធីបុណ្យចូលឆ្នាំប្រពៃណជីជាតិរបស់ខ្លួន ប៉ុន្តែកម្មវិធីសង្ក្រាន្ដខ្មែរនៅជប៉ុន នៅខេត្តអូសាកានេះ គឺជាកម្មវិធីធំជាងគេ។ក្រៅតែពិធីសាសនា និងការលេងល្បែងប្រជាប្រិយកម្មវិធីសង្ក្រាន្តនៅសួនអូសាកានាពេលនេះ ក៏នឹងមានសុន្ទរកថា គន្លឹះរបស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងឯកឧត្ដមណាហ្គាណុ ហ៊ីរូម៉ាសា (Nakano Hiromasa) សមាជិករដ្ឋសភានៃប្រទេសជប៉ុន​ និងអមដោយកម្មវិធីធម្មទេសនាដោយព្រះមេធានុរ័ក្ខ គូ សុភាព និងការបញ្ចប់កម្មវិធីដោយការប្រគុំតន្ត្រី និងការរាំលេងកម្សាន្តដោយសប្បាយរីករាយ៕

នៅបញ្ជាការដ្ឋានកងរាជអាវុធហត្ថខេត្តកណ្តាល រៀបចំពិធីបរិច្ចាគឈាម ដើម្បីអបអរសាទរ បុណ្យចូលឆ្នាំថ្មីប្រពៃណីជាតិខ្មែរ

2024/04/07 10:26:39 am        143
Facebook Telegram Linkin
កណ្តាល៖ ព្រឹកថ្ងៃទី៦ ខែមេសា ម្សិលមិញ​នេះ នៅបញ្ជាការដ្ឋានកងរាជអាវុធហត្ថខេត្តកណ្តាល សហការជាមួយមជ្ឈមណ្ឌលជាតិផ្តល់ឈាម និងមន្ទីរពេទ្យបង្អែកជ័យជំនះខេត្តកណ្តាល បានរៀបចំពិធីបរិច្ចាគឈាមជូនមជ្ឈមណ្ឌលជាតិផ្តល់ឈាម សំណេះសំណាល និងបំពាក់មេដាយ របស់មជ្ឈមណ្ឌលជាតិផ្តល់ឈាម ដើម្បីអបអរសាទរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស.២៥៦៨។ពិធីនេះ ប្រព្រឹត្តទៅ​ក្រោមអធិបតីភាព លោក ឧត្តមសេនីយ៍ មេបញ្ជាការ កងរាជអាវុធហត្ថខេត្តកណ្តាល ,លោក វិជ្ជបណ្ឌិត ប្រធានមជ្ឈមណ្ឌលជាតិផ្តល់ឈាមនិងលោក វិជ្ជបណ្ឌិត អនុប្រធានមន្ទីរពេទ្យបង្អែកជ័យជំនះខេត្តកណ្តាល ដោយមានការចូលរួមពីនាយទាហាន នាយទាហានរង ​និងពលទាហាន នៃកងរាជអាវុធហត្ថខេត្តកណ្ដាល ក្រុមគ្រូពេទ្យរបស់មជ្ឈ​មណ្ឌលជាតិ​ផ្តល់ឈាម និងក្រុមគ្រូពេទ្យបង្អែកជ័យជំនះខេត្តកណ្តាល មួយចំនួនទៀត។ក្នុងពិធីនោះលោកឧត្តមសេនីយ៍ មេបញ្ជាការ កងរាជអាវុធហត្ថខេត្ត បានលើកឡើងថា ដោយអនុវត្តតាមភារកិច្ចស្នូលរបស់កងរាជអាវុធហត្ថ បង្ការ បង្ក្រាប និងសង្គ្រោះ ដែលជាយន្តការដឹកនាំ​ដ៏មានប្រសិទ្ធិភាពរបស់លោក នាយឧត្តមសេនីយ៍ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស ធ្វើឱ្យនាយទាហាន នាយទាហានរង ​និងពលទាហាន នៃកងរាជអាវុធហត្ថ ខេត្តកណ្តាលទាំងអស់ បានយកអស់ស្មារតី​អនុវត្តតួនាទីភារកិច្ច និងមានការទទួលខុសត្រូវខ្ពស់ ជាពិសេសកម្លាំងកងរាជអាវុធហត្ថ បាន​ត្រៀមរួច​ជាស្រេច ដើម្បីជួយដល់ប្រជាពលរដ្ឋដែលកំពុងខ្វះឈាម ដែលរងគ្រោះដោយ​ឧបទ្ទេវហេតុ​ផ្សេងៗ។លោកឧត្តមសេនីយ៍ មេបញ្ជាការ បានសង្កត់ធ្ងន់ថា កងរាជអាវុធហត្ថខេត្តកណ្តាល បានធ្វើជាគំរូល្អ និងមានស្នាដៃកិត្តិយសកេរ្តិ៍ឈ្មោះល្អ ​នេះដោយមានការដឹកនាំចង្អុលបង្ហាញពីលោក នាយឧត្តមសេនីយ៍ អគ្គមេបញ្ជាការរង ​នៃកងយោធពលខេមរភូមិន្ទ ជាមេបញ្ជាការ កងរាជអាវុធ​ហត្ថលើផ្ទៃប្រទេស និងឯកឧត្តម អភិបាល នៃគណៈអភិបាល ខេត្តកណ្តាល ឱ្យកម្លាំងកងរាជអាវុធ​ហត្ថ​គ្រប់រូបយកចិត្តទុកដាក់ឈរលើគោលការណ៍គោរពបទបញ្ជា គោរពវិន័យ សាមគ្គី ឯកភាពផ្ទៃក្នុង គោរពតាមឋានានុក្រម ពិសេសមានឆន្ទៈក្នុងការការពារនិងបម្រើប្រជាពលរដ្ឋ។ ជាមួយនោះផងដែរ កងរាជអាវុធហត្ថ មានតួនាទីយ៉ាងសំខាន់សម្រាប់ជួយដល់សង្គមទាំងមូល ក្នុងការថែរក្សាការពារ ពង្រឹងសន្តិសុខ ស្ថិរភាពនយោបាយ និងរក្សាសន្តិសុខ សណ្តាប់ធ្នាប់​សាធារណៈ ហើយមកដល់បច្ចុប្បន្ននេះ កងរាជអាវុធហត្ថ ខេត្តកណ្តាល បានបង្កើតនូវសមិទ្ធផល​នានាជាច្រើន សម្រាប់អង្គភាព ជាពិសេសក្រៅពីការងារស្នូល បានចូលរួមសហការនិង​ចុះជួយ​ដល់ប្រជាពលរដ្ឋគ្រប់ពេលវេលាទីកន្លែង នៅពេលដែលប្រជាពលរដ្ឋមានតម្រូវការចាំបាច់។លោក ឧត្តមសេនីយ៍ មេបញ្ជាការ ក៏​បានផ្តល់កម្លាំងចិត្តដល់នាយទាហាន នាយទាហានរង និង​ពលទាហាន នៃកងរាជអាវុធហត្ថទាំងអស់ ដែលចូលរួមដោយផ្ទាល់ក្នុងការផ្តល់ឈាម​ដោយស្ម័គ្រចិត្ត​សម្រាប់បម្រើឱ្យជនរួមជាតិដែលមានតម្រូវការឈាមចាំបាច់ ដើម្បីជួយសង្គ្រោះជីវិត​មនុស្ស​នាពេលបច្ចុប្បន្ន និងទៅអនាគត។នាឱកាសនេះដែរលោក ឧត្តមសេនីយ៍ មេបញ្ជាការ បានថ្លែងនូវការកោតសរសើរ និងថ្លែងអំណរ​អរគុណយ៉ាងជ្រាលជ្រៅចំពោះបេសកកម្មដ៏ថ្លៃថ្លា​ របស់មជ្ឈមណ្ឌលជាតិផ្ដល់ឈាម និងមន្ទីរពេទ្យ​បង្អែកជ័យជំនៈខេត្តកណ្តាល ក្នុងការមកចូលរួមសហការជាមួយកងកម្លាំងកងរាជអាវុធហត្ថ​ខេត្ត​កណ្តាល ផ្ដល់ឈាមដើម្បីសង្គ្រោះជីវិតមនុស្ស ដោយមិនគិតពីឋានៈ ពណ៌សម្បុរ ឬនិន្នាការ ជាពិសេសបានជួយសម្រួលដល់កម្លាំងកងរាជអាវុធហត្ថខេត្តកណ្តាល និងក្រុមគ្រួសារ សាច់ញាតិ ពេលត្រូវការឈាមជាចាំបាច់។ ក្នុងនាម មេបញ្ជាការ កងរាជអាវុធហត្ថខេត្តកណ្តាល សូមធ្វើការ​កោតសរសើរ និងវាយតម្លៃខ្ពស់ ចំពោះទឹកចិត្តដ៏សប្បុរសរបស់ នាយទាហាន នាយទាហានរង នៃកងរាជអាវុធហត្ថខេត្តកណ្តាលទាំងអស់ ដែលបានចូលរួមស្ម័គ្រចិត្តបរិច្ចាគឈាម ដើម្បីជួយ​សង្គ្រោះជីវិតមនុស្សដែលត្រូវការឈាមចាំជាបាច់ ក្នុងរយះពេលកន្លងមក។ ក្នុងវេលាដ៏មានសារៈសំខាន់នេះលោក ឧត្តមសេនីយ៍ មេបញ្ជាការ បានផ្តល់អនុសាសន៍ថា ឈាម​មានប្រភពពីមនុស្ស មិនមានរោងចក្រណាផលិតបានឡើយ ដូចនេះខ្ញុំសូមលើកទឹកចិត្តដល់កង​កម្លាំង​យើងទាំងអស់ បន្តរួមគ្នាបង្កើតវប្បធម៌​ជួយគ្នា បរិច្ចាកឈាមដោយស្ម័គ្រចិត្តដែល​ជា​សកម្មភាពមនុស្សធម៌ដ៏ប្រពៃ ក្នុងការជួយជនរងគ្រោះដែលត្រូវការឈាមចាំបាច់ ដើម្បីសង្គ្រោះ​ជីវិតមនុស្ស៕ 

បណ្ដាញសង្គម

ព័ត៌មានថ្មីៗ

កម្ពុជា អាហ្រ្វិកខាងត្បូង ពង្រីកទំហំពាណិជ្ជកម្មទ្វេភាគី កាន់តែល្អប្រសើរ
09/04/2025 10:09 PM
Facebook Telegram Linkin
មេដឹកនាំអឺរ៉ុប ជជែកតាមទូរសព្ទជាមួយលោក Trump បន្ទាប់ពីមានកិច្ចប្រជុំកំពូល ស្តីពីសន្តិសុខអ៊ុយក្រែន
09/04/2025 09:09 PM
Facebook Telegram Linkin
រុស្ស៊ីបណ្តេញអ្នកការទូតអេស្តូនី ជាវិធានការសងសឹកវិញ
09/04/2025 09:09 PM
Facebook Telegram Linkin
អ៊ីរ៉ង់ទម្លាក់កម្រិតទំនាក់ទំនងការទូតជាមួយអូស្ត្រាលី ក្រោយមានជម្លោះ ជុំវិញការវាយប្រហារដោយដុត
09/04/2025 08:09 PM
Facebook Telegram Linkin
[UPDATE] លោក ថាក់ស៊ីន ទៅពិនិត្យសុខភាព នៅសិង្ហបុរី ខណៈសន្យាវិលទៅស្ដាប់សាលក្រមវិញ ក្នុងរយៈពេល ២ថ្ងៃ
09/04/2025 08:09 PM
Facebook Telegram Linkin
ប្រមុខអង្គការណាតូ៖ មិនមែនរុស្ស៊ីជាអ្នកសម្រេចទេ ជុំវិញថា តើលោកខាងលិចអាចដាក់ពង្រាយទ័ព នៅអ៊ុយក្រែន ឬអត់
09/04/2025 08:09 PM
Facebook Telegram Linkin
មេដឹកនាំចិន និងកូរ៉េខាងជើង ប្រារព្ធកិច្ចពិភាក្សា នៅទីក្រុងប៉េកាំង
09/04/2025 07:09 PM
Facebook Telegram Linkin
BREAKING NEWS ៖ ​ ​លោក ថាក់ស៊ីន ទៅពិនិត្យសុខភាព នៅសិង្ហបុរី ខណៈសន្យាវិលត្រលប់វិញក្នុងរយៈពេល ២ថ្ងៃ
09/04/2025 07:09 PM
Facebook Telegram Linkin
គម្រោង «ពង្រឹងបច្ចេកវិទ្យា និងធនធាន សម្រាប់ស្រ្តីជនជាតិដើមភាគតិច ក្នុងវិស័យកសិកម្ម (STRIVE Project)» សម្ពោធក្រោមការចូលរួមពីដៃគូអន្តរជាតិ
09/04/2025 07:09 PM
Facebook Telegram Linkin
រដ្ឋមន្ត្រីក្រសួងទេសចរណ៍ ទាក់ទាញ ក្រុមហ៊ុនទេសចរណ៍ធំវៀតណាម បង្កើនវិនិយោគនៅកម្ពុជា
09/04/2025 07:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.