BTV NEWS

មន្ត្រីជាន់ខ្ពស់ក្រសួងអភិវឌ្ឍន៍ជនបទ ចុះត្រួតពិនិត្យ និងវាយតម្លៃលើការងារស្ថាបនាផ្លូវ នៅទីតាំងដីសម្បទានសង្គមកិច្ច ខេត្តឧត្តរមានជ័យ

គណបក្សនយោបាយសម្ព័ន្ធភាព បង្ហាញជំហររបស់ខ្លួនក្នុងការចូលរួមដោះស្រាយបញ្ហារួមសម្រាប់ជាតិ

កម្ពុជានឹងមានវត្តមានរោងចក្រដំឡើងរថយន្តអគ្គិសនីថ្មីមួយទៀត នៅក្នុងតំបន់សេដ្ឋកិច្ចពិសេស ខេត្តពោធិ៍សាត់ ខណៈត្រឹមឆ្នាំ២០២៥ កំណើនរថយន្តអគ្គិសនីចុះបញ្ជីមានចំនួន ៦,១២៩គ្រឿង កើនឡើង ១៧២% បើធៀបឆ្នាំ២០២៤

ទូតចិនអបអរការដាក់ឱ្យពលរដ្ឋឆ្លងកាត់ស្ពានមិត្តភាពកម្ពុជា-ចិន មេគង្គក្រចេះនៅដើមខែក្រោយ ខណៈមិត្តចិនប្រកាសបន្តពង្រីកការសាងសង់ស្ពាន និងផ្លូវនៅកម្ពុជាឥតឈប់ឈរ

នយោបាយ និង ការអភិវឌ្ឍន៍

ប្រជាជនឥណ្ឌូណេស៊ី រាប់ថយក្រោយសម្រាប់ការបោះឆ្នោតសកល ដែលមិនអាចទាយទុកមុនបាន

អ្នកក្រុងចាកាតារបស់ប្រទេសឥណ្ឌូនេស៊ីកាលពីថ្ងៃចន្ទ ១២ កុម្ភៈ បាននិយាយថា ពួកគេកំពុងទន្ទឹងរង់ចាំថ្ងៃបោះឆ្នោតប្រធានាធិបតី និងសភា ត្រឹមតែពីរថ្ងៃ មុនពេលម្ចាស់ឆ្នោតទៅបោះឆ្នោតទូទាំងប្រទេស។ ការបោះឆ្នោតដែលនឹងប្រព្រឹត្តទៅនៅថ្ងៃពុធ ទី១៤កុម្ភៈ គឺជាការប្រកួតប្រជែងដ៏តឹងតែងរវាងឧត្តមសេនីយចូលនិវត្តន៍ និងបេក្ខជនលេចធ្លោរដែលបានចូលរួមប្រកួត៣លើក លោកប្រាបូវ៉ូ ស៊ូបៀនតូ ( Prabowo Subianto) អតីតអភិបាលក្រុងចាកាតា លោក អានីស បាស្វេដាន (Anies Baswedan) និងអភិបាលខេត្តជ្វាកណ្ដាល(Central Java) លោក ហ្កានចា ប្រាណូវ៉ូ (Ganjar Pranowo)។ការស្ទង់មតិបានបង្ហាញដដែលៗថាលោក ប្រាបូវ៉ូ (Prabowo)គឺជាបេក្ខភាពដែលនឹងឈ្នះ ដោយមានការនាំមុខរហូតដល់២៨ពិន្ទុនៅក្នុងការស្ទង់មតិបានចេញផ្សាយកាលពីចុងសប្តាហ៍មុន ដែលព្យាករណ៍ថាលោកឈ្នះភាគច្រើន ដោយមានសំឡេងគាំទ្រចំនួន៥១,៨% និង៥១,៩%ជាប់ៗគ្នា។ លោកអេឌី ស៊ូប្រ៊ីយ៉ាឌី (Edi Supriyadi)ជាអ្នករស់នៅទីក្រុងចាកាតា និងជាអ្នកបើកបររថយន្តឈ្នួលបាននិយាយថា សំឡេងអ្នកបោះឆ្នោតត្រូវបានបែងចែកនៅពេលនេះ ពួកគេផ្លាស់ប្តូរសន្លឹកឆ្នោតរបស់ខ្លួនពីបេក្ខជនមួយទៅបេក្ខជនមួយទៀត។ ដូច្នេះកាន់តែរំភើប និងមិនអាចទាយលទ្ធផលទុកមុនបានឡើយ។ លោក អាយ៉ា ហ្វើណាដេស (Arya Fernandes) អ្នកស្រាវជ្រាវនៅមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ បាននិយាយថា ការបោះឆ្នោតនៅឆ្នាំនេះនឹងក្លាយជា "ការសាកល្បង" សម្រាប់លទ្ធិប្រជាធិបតេយ្យរបស់ប្រទេសឥណ្ឌូនេស៊ី ដោយសារលោកប្រធានាធិបតី Joko Widodo ដែលជិតផុតអាណត្តិគឺ ជាប់ពាក់ព័ន្ធយ៉ាងជ្រៅក្នុងការជះឥទ្ធិពលលើអារម្មណ៍ និងអាកប្បកិរិយារបស់អ្នកបោះឆ្នោត៕

រដ្ឋមន្រ្តីក្រសួងបរិស្ថាន ត្រៀមដាក់ចេញយុទ្ធនាការសំអាតបឹងទន្លេសាប ០១ មីនា ២០២៤ ដើម្បីការពារត្រីដែលជាប្រភពអាហារូបត្ថម្ភរបស់ប្រជាពលរដ្ឋ

ត្រីជាប្រភពអាហារូបត្ថម្ភដ៏ចម្បងរបស់ប្រជាពលរដ្ឋកម្ពុជា ហើយដើម្បីការពារនូវប្រភពទ្រទ្រង់សុខភាពប្រជាពលរដ្ឋ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថានបានត្រៀមដាក់ចេញនូវយុទ្ធនាការសំអាតបឹងទន្លេសាប នៅថ្ងៃទី០១ ខែមីនា ឆ្នាំ២០២៤ខាងមុខនេះ បន្ទាប់ពីទទួលបានជោគជ័យក្នុងជំហានទី១នៃការកាត់បន្ថយសំណល់ប្លាស្ទិកនៅលើគោក តាមរយៈយុទ្ធនាការ «ថ្ងៃនេះ! ខ្ញុំមិនប្រើប្រាស់ថង់ប្លាស្ទិកទេ» ដែលមានប្រជាពលរដ្ឋ និងសិស្សានុសិស្សចូលរួមជាង៤លាននាក់។ ការថ្លែងឡើងរបស់ឯកឧត្តមរដ្ឋមន្រ្តីក្រសួងបរិស្ថាន ធ្វើឡើងនៅក្នុងជំនួបសម្តែងការគួរសម និងស្វែងយល់អំពីការងារអាទិភាពរបស់ក្រសួងបរិស្ថាន ដើម្បីពង្រឹងកិច្ចសហប្រតិបត្តិការឱ្យកាន់តែល្អប្រសើររវាងអង្គការសហប្រជាជាតិសម្រាប់សេវាកម្មគម្រោង(UNOPS) និងក្រសួងបរិស្ថាន នៅទីស្តីការក្រសួង នាសៀលថ្ងៃទី ១២ ខែកុម្ភៈ ឆ្នាំ២០២៤។កញ្ញា អ៊ីដា ក្រាចា (Eda Kraja) អ្នកគ្រប់គ្រងប្រចាំប្រទេសកម្ពុជា-ឡាវនៃការិយាល័យអង្គការសហប្រជាជាតិសម្រាប់សេវាកម្មគម្រោង UNOPS បានជម្រាបជូនឯកឧត្តមរដ្ឋមន្រ្តីអំពីវត្ថុបំណងនៃជំនួប ដើម្បីបន្ត និងពង្រឹងកិច្ចសហប្រតិបត្តិការជាមួយក្រសួងបរិស្ថាន អនុលោមតាមយុទ្ធសាស្រ្តចក្រាវិស័យបរិស្ថានឆ្នាំ២០២៣-២០២៨។ លើសពីនេះកញ្ញា អ៊ីដា ក្រាចា (Eda Kraja) ក៏ចង់ស្វែងយល់បន្ថែមដែរអំពី ការងារអាទិភាពដើម្បីផ្សារភ្ជាប់ជាមួយគម្រោងជាសកលផ្សេងៗទៀតរបស់ UNOPS តាមរយៈការសម្របសម្រួលគម្រោងការងារជាមួយដៃគូជាច្រើនដូចជា មូលនិធិអាកាសធាតុបៃតង(GCF), ភាពជាដៃគូ(NDC partnership), UNEP មជ្ឈមណ្ឌលអាកាសធាតុទីក្រុងCopenhagen។ស្របជាមួយគ្នានេះ ឯកឧត្តមរដ្ឋមន្រ្តីបានអរគុណចំពោះដៃគូអភិវឌ្ឍន៍ដែលកន្លងមកបានរួមចំណែកជាមួយវិស័យបរិស្ថាន និងបានបង្ហាញជូនអំពីភាពជោគជ័យនៃការប្រែប្រួលឥរិយាបថរបស់សិស្សានុសិស្ស និងប្រជាពលរដ្ឋកម្ពុជាចំពោះការកាត់បន្ថយការប្រើប្រាស់ប្លាស្ទិក ការរៀបចំទុកដាក់សំរាម និងការបែងចែកសំរាមបានត្រឹមត្រូវដើម្បីធានាបាននូវភាពស្អាតពីបរិវេណជុំវិញផ្ទះ សាលារៀន វត្តអារាម រួមនឹងសហគមន៍មូលដ្ឋាន។ ជាមួយភាពស្អាតដែលកើតចេញពីសាមគ្គីភាព និងកម្លាំងនៃការរួបរួមចិត្តជាធ្លុងមួយនេះ នឹងធ្វើឱ្យកម្ពុជាស្អាតគឺទាំងនៅលើគោក ក្នុងទឹក និងអាកាស ហើយមរតកស្អាតនឹងបន្តទៅអ្នកជំនាន់ក្រោយហើយសាយភាយទៅប្រទេសជុំវិញក្នុងតំបន់អាស៊ី៕

ការចុះឈ្មោះប្រជែងតំណែងប្រធានាធិបតីរុស្ស៊ី បានបិទ ដោយមានលោក ពូទីន និងបេក្ខជនបីរូបទៀត

សារព័ត៌មាន TASS បានរាយការណ៍កាលពីថ្ងៃអាទិត្យ (១១ កុម្ភៈ) ថាការចុះឈ្មោះបេក្ខជនរបស់រុស្ស៊ី សម្រាប់ការបោះឆ្នោតប្រធានាធិបតីខែមីនា បានបិទ ជាមួយនឹងបញ្ជីឈ្មោះរួមមានលោកប្រធានាធិបតី វ្ល៉ាឌីមៀ ពូទីន ដែលរំពឹងថានឹងទទួលជ័យជម្នះ និងអ្នកនយោបាយបីរូបដែលគាំទ្រសង្គ្រាមទីក្រុងមូស្គូ នៅអ៊ុយក្រែន។បញ្ជីនេះមិនរាប់បញ្ចូលបេក្ខភាពប្រឆាំងសង្រ្គាមរុស្ស៊ី លោក បូរីស ណាដេសឌីន (Boris Nadezhdin) ទេ បន្ទាប់ពីគណៈកម្មាធិការរៀបចំការបោះឆ្នោតកណ្តាល (CEC) បានរារាំងលោកពីការឈរឈ្មោះកាលពីថ្ងៃព្រហស្បតិ៍ ដោយនិយាយថាខ្លួនបានរកឃើញកំហុសឆ្គងនៅក្នុងការប្រមូលហត្ថលេខា ដែលត្រូវការសម្រាប់ការគាំទ្របេក្ខភាពរបស់លោក។កម្មាធិការរៀបចំការបោះឆ្នោត CEC បានចុះឈ្មោះ លោក វ្ល៉ាឌីស្លាវ ដាវ៉ានខូវ (Vladislav Davankov) ដែលជាអនុប្រធានសភារបស់រុស្ស៊ី និងជាសមាជិកនៃគណៈកម្មាធិការប្រជាជនថ្មី លោក លីអូនីត ស្លាត់ស្គី (Leonid Slutsky) មេដឹកនាំគណបក្សប្រជាធិបតេយ្យសេរីនិយម-ជ្រុលនិយម របស់វិមានក្រឹមឡាំង (LDPR) និងអ្នកតែងតាំងរបស់បក្សកុម្មុយនិស្តមួយនេះ លោក នីខូឡៃ ខារីថូនៅ (Nikolai Kharitonov)។លោក ពូទីន វ័យ ៧១ឆ្នាំ ដែលបានជ្រើសរើសឈរឈ្មោះជាឯករាជ្យជាជាងជាបេក្ខជននៃគណបក្សរួបរួមរុស្ស៊ី ដែលកាន់អំណាច និងជាមេដឹកនាំកំពូលរបស់រុស្ស៊ី តាំងពីឆ្នាំ២០០០ ព្រមទាំងគ្រប់គ្រងគ្រប់ផ្នែកទាំងអស់របស់រដ្ឋ ត្រូវបានគេរំពឹងថានឹងឈ្នះការបោះឆ្នោតនៅខែក្រោយយ៉ាងងាយស្រួល៕

រដ្ឋាភិបាលនៅជុំវិញពិភពលោក ព្រួយបារម្ភចំពោះការវាយលុកតាមជើងគោករបស់អ៊ីស្រាអែល នៅរ៉ាហ្វា

រដ្ឋាភិបាលនៅជុំវិញពិភពលោក បានសម្តែងការព្រួយបារម្ភ ចំពោះផែនការរបស់យោធាអ៊ីស្រាអែល ក្នុងការធ្វើប្រតិបត្តិការជើងគោកនៅទីក្រុង Rafah ភាគខាងត្បូងតំបន់ហ្កាហ្សា។ សេតវិមាន បានប្រកាសកាលពីថ្ងៃអាទិត្យថា ប្រធានាធិបតីសហរដ្ឋអាមេរិក លោក Joe Biden បានសន្ទនាតាមទូរស័ព្ទជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu ។ សេតវិមាន និយាយថាលោក Biden បានបញ្ជាក់ជាថ្មីនូវទស្សនៈរបស់លោកថា ប្រតិបត្តិការនៅទីក្រុង រ៉ាហ្វា(Rafah) មិនគួរធ្វើឡើងដោយគ្មានផែនការដែលអាចទុកចិត្តបាន និងអាចធ្វើប្រតិបត្តិការទៅបានសម្រាប់ការធានាសុវត្ថិភាព និងការគាំទ្រដល់ប្រជាជនជាងមួយលាននាក់ដែលជ្រកកោននៅទីនោះ។ ក្រសួងការបរទេសបារាំង កាលពីថ្ងៃអាទិត្យ បានចេញសេចក្តីថ្លែងការណ៍មួយដោយនិយាយថា ការវាយលុកទ្រង់ទ្រាយធំរបស់អ៊ីស្រាអែល នៅទីក្រុងរ៉ាហ្វា នឹងបង្កើតស្ថានភាពមនុស្សធម៌ដ៏មហន្តរាយ។ អ្នកនាំពាក្យក្រសួងការបរទេសអេហ្ស៊ីប ដែលដើរតួជាអ្នកសម្របសម្រួលសម្រាប់ការចរចារវាងអ៊ីស្រាអែល និងក្រុមហាម៉ាស ក៏បានចេញសេចក្តីថ្លែងការណ៍មួយកាលពីថ្ងៃអាទិត្យផងដែរ។ ក្រសួង បានអំពាវនាវឱ្យមានកិច្ចខិតខំប្រឹងប្រែងជាអន្តរជាតិនិងតំបន់រួមគ្នា ដើម្បីទប់ស្កាត់ការដាក់គោលដៅទៅលើទីក្រុង Rafah ដែលបច្ចុប្បន្ន បានផ្តល់ទីជម្រកដល់ប្រជាជនភៀសខ្លួនប៉ាឡេស្ទីនប្រហែល ១,៤ លាននាក់។ លោក Netanyahu បានបញ្ជាក់លើតម្រូវការសម្រាប់ការវាយប្រហារខ្លាំងទៅលើទីក្រុង Rafah ជាកន្លែងដែលអ៊ីស្រាអែល និយាយថា ជាទីតាំងរឹងមាំរបស់ក្រុមហាម៉ាស។ លោកបាននិយាយថា កងកម្លាំងអ៊ីស្រាអែល មិនចូលទៅក្នុងទីក្រុង Rafah គឺនិយាយជាមូលដ្ឋានថា «ចាញ់សង្រ្គាម»។ សមាជិកជាន់ខ្ពស់របស់ក្រុមហាម៉ាសម្នាក់ បានព្រមានថា ការដោះលែងចំណាប់ថ្នូរ នឹងមិនអាចចរចារបានឡើយ ប្រសិនបើការវាយប្រហារលើទីក្រុងរ៉ាហ្វាកាន់តែខ្លាំង។ នៅថ្ងៃចន្ទនេះ ទីភ្នាក់ងារសារព័ត៌មាន Reuters បានរាយការណ៍ថា ការវាយប្រហាររបស់អ៊ីស្រាអែលទៅលើទីក្រុង Rafah បានសម្លាប់មនុស្សយ៉ាងហោចណាស់ ៣៧នាក់ និងរាប់សិបនាក់ផ្សេងទៀតរងរបួស។

លោកបូរ៉ែល៖ យើងមិនអាចដាក់ទណ្ឌកម្មលើក្រុមប្រទេសទី៣ ដែលជួយរុស្ស៊ីបានទេ

លោក ចូសិប បូរ៉ែល (Josep Borrell) ប្រមុខការទូតរបស់សហភាពអឺរ៉ុប បានធ្វើទស្សនកិច្ចរយៈពេលពីរថ្ងៃទៅកាន់ប្រទេសអ៊ុយក្រែន ដើម្បីជួបជាមួយមន្ត្រីកំពូលៗរបស់ប្រទេសនេះ នៅក្នុងអ្វីដែលឥឡូវនេះបានក្លាយជាដំណើរទស្សនកិច្ចជាទៀងទាត់នៃការគាំទ្រ។ទស្សនកិច្ចអ៊ុយក្រែនជាលើកទី៤ ក្នុងរយៈពេលពីរឆ្នាំ លោកបូរ៉ែល មានភាពច្បាស់លាស់ក្នុងការជំរុញឲ្យផ្នែករបស់ខ្លួន ធ្វើបន្ថែមទៀតសម្រាប់អ៊ុយក្រែន។លោក បានប្រាប់សារព័ត៌មាន Kyiv Independent ក្នុងងអំឡុងដំណើរទស្សនកិច្ចរបស់ខ្លួនទៅកាន់ទីក្រុងគីវ កាលពីថ្ងៃទី៧ ខែកុម្ភៈ ថា៖«នៅចុងឆ្នាំនេះ សហភាពអឺរ៉ុប នឹងផ្តល់អំណោយដល់អ៊ុយក្រែននូវគ្រាប់កាំភ្លើងធំជាង មួយលានគ្រាប់ ដោយបន្ថែមថា ផលិតកម្មយោធារបស់សហភាពអឺរ៉ុប បានកើនឡើង ៤០ភាគរយ ចាប់តាំងពីដើមឆ្នាំ ២០២២។គិតត្រឹមខែកុម្ភៈ សមាជិកសហភាពអឺរ៉ុប បានផ្តល់ឲ្យអ៊ុយក្រែនតិចជាងពាក់កណ្តាលនៃចំនួនដែលបានសន្យា ដែលដំបូងនឹងត្រូវកំណត់ពេញលេញត្រឹមខែមីនា ឆ្នាំ ២០២៤។លោកបូរ៉ែល ក៏បានជំរុញឲ្យផ្តល់កញ្ចប់ជំនួយសេដ្ឋកិច្ច និងយោធាជាច្រើនពាន់លានដល់អ៊ុយក្រែន និងការកើនឡើងសម្ពាធទណ្ឌកម្មលើរុស្ស៊ី។

នាយករដ្ឋមន្ត្រីអាមេនី៖ យើងមិនមែនជាសម្ព័ន្ធមិត្តរបស់រុស្ស៊ី ក្នុងសង្រ្គាមប្រឆាំងនឹងអ៊ុយក្រែនទេ

នាយករដ្ឋមន្ត្រីអាមេនី លោក នីកូល ប៉ាស៊ីនយ៉ាន (Nikol Pashinyan) បានថ្លែងនៅក្នុងបទសម្ភាសន៍មួយដែលបានចេញផ្សាយកាលពីថ្ងៃអាទិត្យថា ប្រទេសរបស់លោក មិនមែនជាសម្ព័ន្ធមិត្តរបស់រុស្ស៊ីក្នុង សង្គ្រាមប្រឆាំងនឹងអ៊ុយក្រែននោះទេ ប៉ុន្តែបានសង្កត់ធ្ងន់លើគម្រោងកិច្ចសហប្រតិបត្តិការយោធារបស់ខ្លួនមិនសំដៅប្រឆាំងនឹងប្រទេសណាមួយឡើយ។លោកក៏បាននិយាយផងដែរថា លោកសង្ឃឹមថា អ្នកជិតខាង និងជាគូប្រជែងដ៏យូរអង្វែងរបស់អាមេនី គឺ អាស៊ែរបៃហ្សង់ នៅតែប្តេជ្ញាចិត្តក្នុងការបញ្ចប់សន្ធិសញ្ញាសន្តិភាពយូរអង្វែង បើទោះបីជាមានសេចក្តីថ្លែងការណ៍ដោយប្រធានាធិបតីរបស់ខ្លួនអំពីការបោះបង្គោលព្រំដែនក៏ដោយ។ប្រទេសអាមេនី និងអាស៊ែរបៃហ្សង់ បានប្រយុទ្ធគ្នាក្នុងសង្គ្រាមធំពីរ ក្នុងរយៈពេល ៣០ ឆ្នាំកន្លងមកលើទឹកដីជម្លោះ ណាហ្គ័រណូ-ការ៉ាបាក់ (Nagorno-Karabakh)។ តំបន់នេះ ត្រូវបានទទួលស្គាល់ជាយូរមកហើយថា ជាផ្នែកមួយរបស់អាស៊ែរបៃហ្សង់ និងកងទ័ពអាស៊ែរបៃហ្សង់ទទួលបានការគ្រប់គ្រងពេញលេញលើវា កាលពីខែកញ្ញាឆ្នាំមុន។លោកប៉ាស៊ីនយ៉ាន បាននិយាយនៅក្នុងប៉ុន្មានខែថ្មីៗនេះថា អាមេនី មិនអាចពឹងផ្អែកលើរុស្ស៊ីទៀតទេ ដើម្បីធានាតម្រូវការការពារជាតិរបស់ខ្លួន ខណៈដែលប្រទេសរបស់លោក មិនបានធានាបាននូវជំនួយដែលខ្លួនត្រូវការពីទីក្រុងមូស្គូ។នៅក្នុងសុន្ទរកថារបស់ខ្លួនទៅកាន់សារព័ត៌មាន Daily Telegraph របស់ចក្រភពអង់គ្លេស លោក ប៉ាស៊ីនយ៉ាន បាននិយាយថា ខ្លួនបាននិយាយតាំងពីដើមដំបូងនៃការលុកលុយរបស់រុស្ស៊ីនៅខែកុម្ភៈ ឆ្នាំ ២០២២ លើអ៊ុយក្រែនថា ខ្លួនមិនអាចឈរជាមួយទីក្រុងមូស្គូ ជាសម្ព័ន្ធមិត្តបានទេ។លោកបានប្រាប់កាសែតប្រចាំថ្ងៃថា៖«ខ្ញុំបាននិយាយថា នៅក្នុងស្ថានភាពអ៊ុយក្រែន យើងមិនមែនជាសម្ព័ន្ធមិត្តរបស់រុស្ស៊ីទេ»។

នាយករដ្ឋមន្ត្រីហុងគ្រី៖ អ៊ុយក្រែន គួរតែជា«តំបន់ទ្រនាប់» នៅខាងក្រៅសហភាពអឺរ៉ុប និងអង្គការណាតូ

នាយករដ្ឋមន្ត្រីហុងគ្រី លោក វីកទ័រ អ័របាន (Viktor Orbán) បាននិយាយថា អ៊ុយក្រែន គួរតែទុកជា «តំបន់ទ្រនាប់» រវាងរុស្ស៊ី និងលោកខាងលិច ដែលនឹងផ្តល់ការធានាសន្តិសុខជាក់លាក់ ប៉ុន្តែមិនទទួលស្គាល់អ៊ុយក្រែនជាសមាជិកសហភាពអឺរ៉ុប ឬណាតូនោះទេ។«មិនដឹងថាតើអ្នកចូលចិត្តវា ឬអត់ មិនថា អ៊ុយក្រែនចូលចិត្តវា ឬអត់ទេ អ៊ុយក្រែន គឺជាកន្លែងដែលវាស្ថិតនៅលើផែនទី។ ការរំពឹងទុកដ៏ល្អបំផុត គឺសម្រាប់វាជាតំបន់ទ្រនាប់រវាងរុស្ស៊ី និងលោកខាងលិច ជាមួយនឹងការធានាសុវត្ថិភាព។ ប្រសិនបើ តំបន់ទ្រនាប់មិនកើតឡើងទេ អ៊ុយក្រែន នឹងបន្តបាត់បង់ទឹកដី។ប្រទេសរុស្ស៊ី នឹងបំផ្លាញអ៊ុយក្រែនម្តងហើយម្តងទៀត។ រុស្ស៊ីនឹងមិនទទួលយកការចូលជាសមាជិកសហភាពអឺរ៉ុប និងណាតូរបស់អ៊ុយក្រែន ដូចប្រទេសនេះនៅតាមព្រំដែនរបស់ខ្លួនឡើយ។ទន្ទឹមនឹងនេះ នាយករដ្ឋមន្ត្រីហុងគ្រី ជឿជាក់ថា អ៊ុយក្រែន និងហ្ស៊កហ្ស៊ី អាចនឹងចូលរួមជាមួយសហភាពអឺរ៉ុប និងណាតូ ក្នុងឆ្នាំ ២០០៨ ប៉ុន្តែឱកាសនោះ ត្រូវបានខកខាន ហើយជាមួយនឹង «ការរំពឹងទុករបស់អ៊ុយក្រែនសម្រាប់អនាគតសមាជិកភាពសហភាពអឺរ៉ុប និងអង្គការណាតូ។

រដ្ឋមន្រ្តីការបរទេសអ៊ីរ៉ង់ និយាយថាអ៊ីរ៉ង់មិនចង់ពង្រីកសង្គ្រាមក្នុងតំបន់ទេ

ទូរទស្សន៍លីបង់ អាល់ម៉ាណា (al-Manar) បានរាយការណ៍ថា រដ្ឋមន្ត្រីការបរទេសអ៊ីរ៉ង់ លោក ហូហេន អាមឺ អាបឌុលឡាអៀន (Hossein Amir-Abdollahian) បាននិយាយកាលពីថ្ងៃសៅរ៍ (១០ កុម្ភៈ) ថាប្រទេសអ៊ីរ៉ង់ មិនចង់មើលឃើញការពង្រីកសង្រ្គាមនៅក្នុងតំបន់នោះទេ។លោកបាននិយាយក្នុងសន្និសីទសារព័ត៌មានរួមគ្នាជាមួយសមភាគីលីបង់ លោក អាបឌុលឡា ប៊ូហាប៊ីប (Abdallah Bou Habib) ក្នុងទីក្រុងបេរ៉ូត ថា «អ៊ីរ៉ង់ និងលីបង់ បញ្ជាក់ថាសង្រ្គាមមិនមែនជាដំណោះស្រាយទេ ហើយយើងក៏មិនដែលចង់ពង្រីកវិសាលភាពនៃសង្គ្រាមដែរ»។ប្រមុខអ្នកការទូតអ៊ីរ៉ង់រូបនេះក៏បានអំពាវនាវឱ្យសហរដ្ឋអាមេរិក ដាក់សម្ពាធលើអ៊ីស្រាអែល ឱ្យបញ្ឈប់ការវាយប្រហារលើតំបន់ហ្កាហ្សា និងតំបន់វេស បែង (West Bank)។យោងតាមសេចក្តីថ្លែងការណ៍ចេញផ្សាយដោយក្រុមប្រឹក្សារដ្ឋមន្ត្រីរបស់ប្រទេសលីបង់ បានឲ្យដឹងថា ក្នុងអំឡុងពេលនៃកិច្ចប្រជុំរបស់លោកជាមួយនាយករដ្ឋមន្ត្រីលីបង់ ណាជីប មីខាទី (Najib Mikati) នៅព្រឹកថ្ងៃនោះ លោក អាមឺ អាបឌុលឡាអៀន បានសង្កត់ធ្ងន់លើភាពចាំបាច់ក្នុងការខិតខំប្រឹងប្រែងបន្ថែមទៀតដើម្បីបញ្ឈប់ការឈ្លានពានរបស់អ៊ីស្រាអែលលើតំបន់ហ្កាហ្សា និងឈានដល់ដំណោះស្រាយសម្រាប់ប្រទេសទាំងអស់នៅក្នុងតំបន់៕

ក្រុមហាម៉ាស និយាយថា រាល់ការវាយលុករបស់អ៊ីស្រាអែលនៅក្រុង Rafah នឹងបំផ្លាញកិច្ចពិភាក្សាចំណាប់ថ្នូរ

ប៉ុស្តិ៍ទូរទស្សន៍ អាកសា (Aqsa) ដែលគ្រប់គ្រងដោយក្រុមហាម៉ាស បានដកស្រង់សម្តីមេដឹកនាំជាន់ខ្ពស់ក្រុមហាម៉ាសម្នាក់ ដែលបាននិយាយកាលពីថ្ងៃអាទិត្យ (១១ កុម្ភៈ) ថាការវាយលុកជើងគោកណាមួយរបស់អ៊ីស្រាអែលនៅក្នុងទីក្រុង រ៉ាហ្វា (Rafah) នៅតាមព្រំដែនហ្កាហ្សា នឹង «បំផ្លាញ» ការចរចាផ្លាស់ប្តូរចំណាប់ថ្នូរ។ការិយាល័យលោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា ខ្លួនបានបញ្ជាឱ្យយោធាបង្កើតផែនការជម្លៀសក្រុង រ៉ាហ្វា និងបំផ្លាញកងវរសេនាតូចហាម៉ាស ចំនួនបួនកង ដែលខ្លួននិយាយថាត្រូវបានដាក់ពង្រាយនៅទីនោះ។ ភាគច្រើននៃជនភៀសខ្លួនបានស្វែងរកទីជម្រកនៅក្រុង រ៉ាហ្វា ជាប់ព្រំដែនជាមួយប្រទេសអេហ្ស៊ីប ប៉ុន្តែបន្ទាប់ពីកិច្ចចរចាបទឈប់បាញ់គ្មានផ្លែផ្កា លោក ណេតាន់យ៉ាហ៊ូ នៅសប្តាហ៍នេះបាននិយាយថា កងកម្លាំងអ៊ីស្រាអែលនឹងប្រយុទ្ធរហូតទទួលបាន «ជ័យជំនះទាំងស្រុង»។យោធាអ៊ីស្រាអែល បានបញ្ជាឱ្យជនស៊ីវិលភៀសខ្លួនទៅភាគខាងត្បូង មុនពេលការវាយលុកពីមុនលើទីក្រុងហ្កាហ្សា ប៉ុន្តែឥឡូវនេះពួកគេមិនមានកន្លែងដែលត្រូវទៅទៀតទេ ហើយភ្នាក់ងារជំនួយបាននិយាយថាមនុស្សជាច្រើនអាចស្លាប់នៅទីនោះ៕

បណ្ដាប្រទេសមជ្ឈិមបូព៌ាព្រមានអ៊ីស្រាអែលពីគ្រោះមហន្តរាយមនុស្សធម៌បើឈ្លានពានក្រុងរ៉ាហ្វារបស់ហ្កាហ្សា

អ៊ីស្រាអែលកំពុងប្រឈមនឹងសម្ពាធក្នុងតំបន់ និងអន្តរជាតិដែលកំពុងកើនឡើងជុំវិញការវាយលុកតាមផែនការរបស់ខ្លួនប្រឆាំងក្រុមហាម៉ាសនៅក្នុងទីក្រុងរ៉ាហ្វា(Rafah)ស្ថិតនៅភាគខាងត្បូងនៃតំបន់ហ្កាហ្សាស្ទ្រីប(Gaza Strip) ដែលហែកហួរដោយសង្រ្គាម។ក្នុងរយៈពេលប៉ុន្មានថ្ងៃកន្លងមកនេះ បណ្តាប្រទេសក្នុងតំបន់បានព្រមានអ៊ីស្រាអែលប្រឆាំងនឹងការសកម្មភាពមនុស្សធម៌នៅរ៉ាហ្វា បើកងកម្លាំងអ៊ីស្រាអែលទទូចឱ្យអនុវត្តការវាយលុកដោយថ្មើជើងលើ ក្រុងរ៉ាហ្វា ដែលប្រជាជនប៉ាឡេស្ទីនជាង១,៤លាននាក់រស់នៅ រួមទាំងមនុស្ស ១,៣លាននាក់បានភៀសខ្លួនពីតំបន់ភាគខាងជើង។ នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃសុក្រថា លោកបានដឹកនាំយោធាឱ្យរៀបចំជម្លៀសជនស៊ីវិលចេញពីទីក្រុង Rafah ដ៏ច្រើនលើសលប់ មុនពេលការវាយលុកកាន់តែខ្លាំងឡើងប្រឆាំងនឹងក្រុមហាម៉ាស។ កាតាដែលកំពុងចូលរួមក្នុងកិច្ចខិតខំប្រឹងប្រែងការទូតរួមជាមួយសហរដ្ឋអាមេរិក និងអេហ្ស៊ីបដើម្បីជំរុញឱ្យមានបទឈប់បាញ់នៅតំបន់ហ្កាហ្សារវាងក្រុមហាម៉ាស និងអ៊ីស្រាអែល ថ្កោលទោសយ៉ាងដាច់អហង្ការបំផុតចំពោះការគំរាមកំហែងរបស់អ៊ីស្រាអែលក្នុងការវាយលុកទីក្រុងរ៉ាហ្វានៅភាគខាងត្បូងហ្កាហ្សាស្ទ្រីប ។ក្រសួងការបរទេសរបស់ខ្លួនបាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ថាខ្លួនព្រមានពីមហន្តរាយមនុស្សធម៌នៅក្នុងទីក្រុងដែលបានក្លាយជាជម្រកចុងក្រោយសម្រាប់មនុស្សរាប់សែននាក់ក្រោយភៀសខ្លួនចេញពីលំនៅឋាន។ទាំងអារ៉ាប់រួម (UAE) ទាំងបារ៉ែន ដែលបានចុះហត្ថលេខាលើសន្ធិសញ្ញាសន្តិភាពជាមួយអ៊ីស្រាអែលកាលពីឆ្នាំ ២០២០ ក៏បានសម្តែងការព្រួយបារម្ភយ៉ាងខ្លាំងផងដែរ។ អារ៉ាប៊ីសាអ៊ូឌីត បានព្រមានពីផលប៉ះពាល់យ៉ាងធ្ងន់ធ្ងរ នៃការវាយលុក និងបានដាក់គោលដៅលើទីក្រុងរ៉ាហ្វាដែលរមណីយដ្ឋានចុងក្រោយ សម្រាប់ជនស៊ីវិលរាប់សែននាក់ ដែលបានភៀសខ្លួនចេញពីការវាយប្រហារដ៏ខ្លាំងក្លារបស់អ៊ីស្រាអែល ទៅលើតំបន់ហ្កាហ្សាភាគខាងជើង។ ប្រទេសអេហ្ស៊ីប ហ្ស៊កដានី និងអគ្គលេខាធិការសម្ព័ន្ធអារ៉ាប់ក៏បានព្រមាន និងរិះគន់ការប្រើកម្លាំងយោធាលើពលរដ្ឋបាឡេស្ទីនស្លូតត្រង់ដែរ៕

បណ្ដាញសង្គម

ព័ត៌មានថ្មីៗ

ព្រះសង្ឃចាប់ផ្តើមនិមន្ត ដើម្បីសន្តិភាពរយៈពេល ១សប្តាហ៍នៅប្រទេសស្រីលង្កា

ប៉ាគីស្ថានរឹតបន្តឹងសន្តិសុខនៅទីក្រុងអ៊ីស្លាម៉ាបាដ ខណៈភាពពុំច្បាស់ចំពោះកិច្ចប្រជុំសន្តិភាពអាមេរិក-អ៊ីរ៉ង់

ការវាយប្រហាររបស់អ៊ីស្រាអែលសម្លាប់មនុស្ស ៥នាក់ នៅតំបន់ហ្កាហ្សា

សង្រ្គាមអ៊ីរ៉ង់ជំរុញឲ្យមានតម្រូវការកើនឡើងសម្រាប់ថាមពលពន្លឺព្រះអាទិត្យនៅអឺរ៉ុប

កងទ័ពជើងទឹកអាល្លឺម៉ង់ត្រៀមខ្លួនសម្រាប់លទ្ធភាពនៃបេសកកម្មបោសសម្អាតមីននៅច្រកសមុទ្រ Hormuz

ទឹកជំនន់បណ្តាលឲ្យខូចខាតរដ្ឋធានី Mogadishu របស់ប្រទេសសូម៉ាលី

លោក Macron ត្រូវបានស្វាគមន៍ដោយប្រធានាធិបតីស៊ីប មុនជំនួបកំពូល EUស្តីពីអ៊ីរ៉ង់

តំណាងរាស្រ្តហេសបូឡារបស់លីបង់ គាំទ្រឲ្យបន្តបទឈប់បាញ់ បើសិនអ៊ីស្រាអែលអនុលោមតាមយ៉ាងពេញលេញ

វិមានក្រឹមឡាំង៖ រុស្ស៊ីនៅរក្សាការផ្គត់ផ្គង់ប្រេង បុន្តែពុំមានគំនិតផ្តួចផ្តើម OPEC+ ថ្មីនោះទេ

លោក Trump បានបញ្ជាឲ្យកងទ័ពជើងទឹកអាមេរិក «បាញ់កម្ទេច» ទូកដាក់មីននៅច្រកសមុទ្រ Hormuz

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍