BTV NEWS

ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម កង ណម នៅគេហដ្ឋាន

មន្ត្រីជាន់ខ្ពស់ក្រសួងអភិវឌ្ឍន៍ជនបទ ចុះត្រួតពិនិត្យ និងវាយតម្លៃលើការងារស្ថាបនាផ្លូវ នៅទីតាំងដីសម្បទានសង្គមកិច្ច ខេត្តឧត្តរមានជ័យ

គណបក្សនយោបាយសម្ព័ន្ធភាព បង្ហាញជំហររបស់ខ្លួនក្នុងការចូលរួមដោះស្រាយបញ្ហារួមសម្រាប់ជាតិ

កម្ពុជានឹងមានវត្តមានរោងចក្រដំឡើងរថយន្តអគ្គិសនីថ្មីមួយទៀត នៅក្នុងតំបន់សេដ្ឋកិច្ចពិសេស ខេត្តពោធិ៍សាត់ ខណៈត្រឹមឆ្នាំ២០២៥ កំណើនរថយន្តអគ្គិសនីចុះបញ្ជីមានចំនួន ៦,១២៩គ្រឿង កើនឡើង ១៧២% បើធៀបឆ្នាំ២០២៤

នយោបាយ និង ការអភិវឌ្ឍន៍

នៅទីក្រុងប៉េកាំង រដ្ឋមន្ត្រីអារ៉ាប់ និងមូស្លីមជំរុញឲ្យបញ្ចប់សង្គ្រាម នៅតំបន់ហ្កាហ្សា

រដ្ឋមន្ត្រីអារ៉ាប់ និងមូស្លីមនៅថ្ងៃចន្ទនេះ បានអំពាវនាវឲ្យមានបទឈប់បាញ់ជាបន្ទាន់ នៅតំបន់ហ្កាហ្សា ខណៈដែលគណៈប្រតិភូរបស់ពួកគេ បានទៅបំពេញទស្សនកិច្ចនៅទីក្រុងប៉េកាំង ជើងទីមួយ ដើម្បីជំរុញឲ្យមានការបញ្ចប់អរិភាព និងអនុញ្ញាតឲ្យជំនួយមនុស្សធម៌ ចូលទៅក្នុងដែនដីនេះ។គណៈប្រតិភូដែលគ្រោងនឹងជួបជាមួយក្រុមមន្ត្រីតំណាងឲ្យសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ក៏កំពុងដាក់សម្ពាធលើលោកខាងលិចផងដែរ ដើម្បីបដិសេធយុត្តិកម្មរបស់អ៊ីស្រាអែលចំពោះសកម្មភាពរបស់ខ្លួនប្រឆាំងនឹងប៉ាឡេស្ទីន ជាការការពារខ្លួន។មន្ត្រីដែលជួបប្រជុំជាមួយអ្នកការទូតកំពូលរបស់ចិន លោក វ៉ាង យី នៅថ្ងៃចន្ទនេះ គឺមកពីប្រទេសអារ៉ាប៊ីសាអ៊ូឌីត ហ្ស៊កដានី អេហ្ស៊ីប ឥណ្ឌូនេស៊ី ប៉ាឡេស្ទីន និងអង្គការសហប្រតិបត្តិការឥស្លាម។កិច្ចប្រជុំកំពូលវិសាមញ្ញឥស្លាម-អារ៉ាប់រួម នៅទីក្រុងរីយ៉ាដក្នុងខែនេះ ក៏បានជំរុញឲ្យតុលាការឧក្រិដ្ឋកម្មអន្តរជាតិស៊ើបអង្កេត «ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដែលអ៊ីស្រាអែល កំពុងប្រព្រឹត្ត» នៅក្នុងទឹកដីប៉ាឡេស្ទីន។ប្រទេសអារ៉ាប៊ីសាអ៊ូឌីត បានព្យាយាមដាក់សម្ពាធលើសហរដ្ឋអាមេរិក និងអ៊ីស្រាអែល ឲ្យបញ្ចប់អរិភាព នៅក្នុងតំបន់ហ្កាហ្សា ហើយព្រះអង្គម្ចាស់ Mohammed bin Salman ដែលជាអ្នកគ្រប់គ្រងពិតប្រាកដ របស់ព្រះរាជាណាចក្រ បានប្រមូលផ្តុំមេដឹកនាំអារ៉ាប់ និងមូស្លីម ឲ្យបង្កើនការគាំទ្រសារនោះ។

ការចុះឈ្មោះបេក្ខជនមេដឹកនាំកោះតៃវ៉ាន់ ចាប់ផ្តើមនៅថ្ងៃចន្ទនេះ

មន្ត្រីរៀបចំការបោះឆ្នោតកោះតៃវ៉ាន់ នឹងទទួលយកពាក្យសុំពីបេក្ខជនមេដឹកនាំចាប់ពីថ្ងៃច័ន្ទនេះរហូតដល់ថ្ងៃសុក្រ។ កិច្ចពិភាក្សា រវាងគណបក្សប្រឆាំងចំនួនពីរ លើការដោះស្រាយបេក្ខជនរួបរួមសម្រាប់ការប្រកួតប្រជែង នៅខែមករា នៅតែជាប់គាំង។ គណបក្សប្រជាធិបតេយ្យជឿនលឿនដែលកំពុងកាន់អំណាច បានជ្រើសរើសមេដឹកនាំទី២កោះតៃវ៉ាន់លោក Lai Ching-te ឲ្យចូលរួមក្នុងការប្រកួតប្រជែង។ លោកមានបំណង ធ្វើការជាមួយសហរដ្ឋអាមេរិក ជប៉ុន និងប្រទេសដទៃទៀត ដើម្បីទប់ទល់សម្ពាធពីសំណាក់ប្រទេសចិន។គណបក្សប្រឆាំងធំបំផុត Kuomintang (គូកមីនតាំង) បានជ្រើសរើសអភិបាលក្រុង New Taipei លោក Hou Yu-ih ជាបេក្ខជនរបស់គណបក្សខ្លួន។ គណបក្សនេះ បានបញ្ជាក់ពីតម្រូវការជំរុញការផ្លាស់ប្តូរជាមួយប្រទេសចិន។ គណបក្សប្រឆាំងធំបំផុតទីពីរ គឺគណបក្សប្រជាជនកោះតៃវ៉ាន់ បានដាក់អតីតអភិបាលក្រុងតៃប៉ិ លោក Ko Wen-je ។ ការបោះឆ្នោតស្ទង់មតិ បានដាក់លោក Lai ជាអ្នកនាំមុខគេ ដោយលោក Hou Yu-ih និងលោក Ko Wen-je ប្រជែងយកតំណែងទីពីរ។នៅក្នុងបំណងដើម្បីបង្កើនឱកាសនៃការផ្លាស់ប្តូរក្នុងជួររដ្ឋាភិបាល គណបក្សប្រឆាំងទាំងពីរ បានព្រមព្រៀងគ្នាថា ទាំងលោក Hou Yu-ih ឬ លោក Ko Wen-je នឹងឈរឈ្មោះជាបេក្ខជនមេដឹកនាំបង្រួបបង្រួមរបស់ពួកគេ។ទោះជាយ៉ាងណា គណបក្សទាំងពីរមិនអាចឈានដល់ការឯកភាពគ្នា ហើយបានលុបចោលការប្រកាសដែលបានគ្រោងទុកកាលពីថ្ងៃសៅរ៍។ បន្ថែមលើនេះ លោក Ko Wen-Je បានបង្ហាញពីសញ្ញានៃការសម្របសម្រួល។ លោកបាននិយាយកាលពីថ្ងៃអាទិត្យថា លោកនឹងបន្តតស៊ូរហូតដល់ទីបញ្ចប់ក្នុងនាមជាបេក្ខជនមេដឹកនាំរបស់គណបក្សប្រជាជនតៃវ៉ាន់(TPP)។-

មេដឹកនាំកំពូលប្រទេសអ៊ីរ៉ង់ ជំរុញឱ្យរដ្ឋមូស្លីម កាត់ផ្តាច់ទំនាក់ទំនងនយោបាយជាមួយអ៊ីស្រាអែល

មេដឹកនាំកំពូលរបស់ប្រទេសអ៊ីរ៉ង់ លោក Ayatollah Ali Khamenei កាលពីថ្ងៃអាទិត្យ ទី១៩ ខែវិច្ឆិកា បានអំពាវនាវដល់រដ្ឋមូស្លីមដែលមានទំនាក់ទំនងនយោបាយជាមួយប្រទេសអ៊ីស្រាអែល ឲ្យកាត់ផ្តាច់ទំនាក់ទំនងសម្រាប់ពេលវេលាកំណត់មួយ ប៉ុន្មានសប្តាហ៍បន្ទាប់ពីលោក បានអំពាវនាវឱ្យដាក់ការហាមឃាត់ប្រេងឥន្ធនៈ និងស្បៀងអាហារលើប្រទេសអ៊ីស្រាអែល។ក្នុងអំឡុងពេលកិច្ចប្រជុំកំពូលរួម រវាងសមាជិកអង្គការសម្រាប់កិច្ចសហប្រតិបត្តិការអ៊ីស្លាម និងសម្ព័ន្ធអារ៉ាប់ ក្នុងរដ្ឋធានីរបស់ប្រទេសអារ៉ាប៊ីសាអូឌីតកាលពីថ្ងៃទី ១១ ខែវិច្ឆិកា រដ្ឋមូស្លីម ពុំបានព្រមព្រៀងក្នុងការដាក់ទណ្ឌកម្មដ៏ទូលំទូលាយលើអ៊ីស្រាអែល ដូចដែលបានស្នើសុំដោយប្រធានាធិបតីអ៊ីរ៉ង់ លោក Ebrahim Raisi នោះទេ។លោក Khamenei បានធ្វើការអត្ថាធិប្បាយចុងក្រោយរបស់លោក ខណៈលោកចូលរួមក្នុងការតាំងពិពណ៌ដែលបង្ហាញពី សមិទ្ធិផលថ្មីបំផុតរបស់កងកម្លាំងដែនអាកាសនៃកងឆ្មាំបដិវត្តន៍អ៊ីស្លាម រួមមានទាំង Fattah 2 ជាកំណែថ្មីនៃអ្វីដែលត្រូវបានគេនិយាយថាជាមីស៊ីលល្បឿនលឿនជាងសំឡេងដំបូង របស់អ៊ីរ៉ង់។ប្រទេសអ៊ីរ៉ង់ បានបង្ហាញនូវអ្វីដែលខ្លួនបាននិយាយថា គឺជាមីស៊ីលបាលីស្ទីកល្បឿនលឿនជាងសំឡេងផលិតក្នុងស្រុកលើកដំបូងរបស់ខ្លួននៅក្នុងខែមិថុនា និងបាននិយាយថា វាអាចឆ្លងកាត់ប្រព័ន្ធ ប្រឆាំងមីស៊ីលបាលីស្ទីកទំនើបបំផុតរបស់សហរដ្ឋអាមេរិក និងអ៊ីស្រាអែល។

ជប៉ុន ព្យាយាមដោះលែងក្រុមនាវិកឲ្យបានឆាប់ពីនាវាដឹកទំនិញដែលត្រូវបានរឹបអូសដោយក្រុមឧទ្ទាមហ៊ួទី នៅសមុទ្រក្រហម

ជប៉ុន បានលើកឡើងនៅថ្ងៃចន្ទទី២០វិច្ឆិកានេះថា ខ្លួនកំពុងព្យាយាមដោះលែងក្រុមនាវិកឲ្យបានឆាប់ពីនាវាដឹកទំនិញកម្មសិទ្ធិរបស់ចក្រភពអង់គ្លេស និងធ្វើប្រតិបត្តិការដោយប្រទេសជប៉ុន ដែលត្រូវបានរឹបអូសដោយ ក្រុមឧទ្ទាមហ៊ួទី នៅក្នុងសមុទ្រក្រហមភាគខាងត្បូង។ ក្រុមឧទ្ទាម ហួទី នៅក្នុងប្រទេសយ៉េមែនបានអះអាងថា ខ្លួនបានចាប់នាវាដឹកទំនិញរបស់អ៊ីស្រាអែលនៅសមុទ្រក្រហមភាគខាងត្បូងកាលពីថ្ងៃអាទិត្យ ប៉ុន្តែអ៊ីស្រាអែល បានបដិសេធថាពុំមែនជានាវារបស់ខ្លួនទេ។ ប្រធានឃុទ្ធការល័យនាយករដ្ឋមន្ត្រីជប៉ុនលោកហ៊ីរ៉ូកាស៊ុ ម៉ាតស៊ូណូ(Hirokazu Matsuno)បានប្រាប់ សន្និសីទសារព័ត៌មានប្រចាំថ្ងៃថាពុំមានជនជាតិជប៉ុននៅលើនាវា Galaxy Leader ដែលបានប្រតិបត្តិការដោយក្រុមហ៊ុន Nippon Yusen នោះទេ។ លោក Matsuno បាននិយាយថា ប្រទេសជប៉ុន បានថ្កោលទោសយ៉ាងដាច់អហង្ការ ចំពោះទង្វើនេះ និងកំពុងធ្វើការជាមួយបណ្ដាប្រទេសពាក់ព័ន្ធដើម្បីអាចដោះលែងនាវានិងក្រុមនាវិករបស់ខ្លួនឲ្យបានឆាប់រហ័ស។ កាលពីថ្ងៃអាទិត្យទី១៩វិច្ឆិកា ប្រទេសអ៊ីស្រាអែល បានលើកឡើងពីការរឹបអូសនាវានេះ ដោយហៅថាជាទង្វើភេរវកម្មរបស់អ៊ីរ៉ង់ ។ក្រុមឧទ្ទាមហ៊ួទី ដែលជាសម្ព័ន្ធមិត្តរបស់ទីក្រុងតេអេរ៉ង់ បាននិយាយថា ពួកគេបានរឹបអូសនាវាមួយគ្រឿង នៅក្នុងតំបន់នោះ ប៉ុន្តែបានហៅនាវានោះថាជារបស់អ៊ីស្រាអែល។មិនយូរប៉ុន្មានក្រុមសកម្មប្រយុទ្ធហាម៉ាសប៉ាឡេស្ទីន បានអរគុណដល់ក្រុមឧទ្ទាមហ៊ួទី របស់ប្រទេសយ៉េមែន ចំពោះការរឹបអូសនាវានោះ៕

ការបាញ់បង្ហោះយាន Starship របស់ក្រុមហ៊ុន SpaceX បានបរាជ័យប៉ុន្មាននាទីបន្ទាប់ពីទៅដល់ទីអវកាស

យានអវកាស Starship មិនមានមនុស្សជិះរបស់ក្រុមហ៊ុន SpaceX ដែលត្រូវបានបង្កើតឡើងដើម្បីដឹកអវកាសយានិកទៅកាន់ឋានព្រះច័ន្ទ និងភពផ្សេងៗទៀត បានបរាជ័យក្នុងលំហអាកាសភ្លាមៗ បន្ទាប់ពីបានហោះឡើងកាលពីថ្ងៃសៅរ៍ (១៨ វិច្ឆិកា) ដោយធ្វើការសាកល្បងលើកទីពីររបស់វាមានរយៈពេលខ្លី ប៉ុន្តែបានធ្វើដំណើរលើសពីការប៉ុនប៉ងលើកមុនដែលបានបញ្ចប់ដោយការផ្ទុះ។យានរ៉ូកែតពីរដំណាក់កាលនេះ បានផ្ទុះចេញពីកន្លែងបង្ហោះ Starbase របស់ក្រុមហ៊ុន ដែលគ្រប់គ្រងដោយលោក Elon Musk នៅជិតទីក្រុង Boca Chica ក្នុងរដ្ឋតិចសាស របស់សហរដ្ឋអាមេរិក ដោយបានជួយជំរុញយាន Starship ឡើងដល់កម្ពស់ជាង ១៤៨គីឡូម៉ែត្រ ពីលើដីនៅលើបេសកកម្មសាកល្បងរយៈពេល ៩០នាទី ដែលបានគ្រោងទុកទៅកាន់ទីអវកាស និង ត្រឡប់មកវិញ។ប៉ុន្តែយានជំរុញដំណាក់កាលដំបូង Super Heavy របស់រ៉ូកែតនេះ បើទោះបីជាវាសម្រេចបាននូវការសាកល្បងដ៏សំខាន់មួយដើម្បីបំបែកខ្លួនជាមួយនឹងដំណាក់កាលយាន Starship ស្នូលរបស់វាក៏ដោយ ក៏វានៅតែផ្ទុះនៅលើឈូងសមុទ្រម៉ិកស៊ិកភ្លាមៗបន្ទាប់ពីការផ្ដាច់ខ្លួនចេញ នេះបើយងតាមការផ្សាយវីដែអូរបស់គេហទំព័រ SpaceX បានបង្ហាញ។ប្រហែលប្រាំបីនាទីក្នុងបេសកកម្មសាកល្បង ទិដ្ឋភាពកាមេរ៉ាដែលតាមដានយានជំរុញ Starship បានលេចឡើងបង្ហាញពីការផ្ទុះដែលបង្ហាញថាយានអវកាសនេះបានបរាជ័យនៅពេលនោះ។ ការបាញ់បង្ហោះនេះគឺជាការប៉ុនប៉ងលើកទីពីរក្នុងការបញ្ជូនយាន Starship ឲ្យឡើងលើកំពូលយានជំរុញ Super Heavy បន្ទាប់ពីការប៉ុនប៉ងកាលពីខែមេសា ដែលបានបរាជ័យដោយសារផ្ទុះនៅរយៈពេលប្រហែល ៤នាទីបន្ទាប់ពីការហោះឡើង៕

លោក ត្រាំ ប្តេជ្ញាលុបចោលកិច្ចព្រមព្រៀងពាណិជ្ជកម្មអាស៊ី របស់លោក បៃដិន ប្រសិនបើខ្លួនជាប់ឆ្នោត

លោក ដូណាល់ ត្រាំ (Donald Trump) ដែលជាអ្នកនាំមុខគេសម្រាប់ការតែងតាំងជាបេក្ខជនប្រធានាធិបតីមកពីគណបក្សសាធារណរដ្ឋ របស់សហរដ្ឋអាមេរិក បាននិយាយកាលពីថ្ងៃសៅរ៍ (១៨ វិច្ឆិកា) ថាលោកនឹងលុបចោលកិច្ចព្រមព្រៀងពាណិជ្ជកម្មប៉ាស៊ីហ្វិក ដែលត្រូវបានជំរុញដោយប្រធានាធិបតីអាមេរិក លោក ចូ បៃដិន (Joe Biden) ប្រសិនបើលោកឈ្នះការបោះឆ្នោតឆ្នាំ ២០២៤ ហើយត្រលប់ទៅសេតវិមានវិញ។ថ្លែងទៅកាន់អ្នកគាំទ្រនៅរដ្ឋ អ៊ីអូវ៉ា (Iowa) លោក ត្រាំ បាននិយាយថា លោកប្រឆាំងនឹងកិច្ចព្រមព្រៀងពាណិជ្ជកម្មក្នុងតំបន់ ដែលកំពុងត្រូវបានចរចាដោយរដ្ឋបាលលោកបៃដិន ជាមួយប្រទេសចំនួន ១៣ផ្សេងទៀត ដោយលើកហេតុផលថា វានឹងរារាំងការផលិតរបស់សហរដ្ឋអាមេរិក និងបង្កឱ្យមានការបាត់បង់ការងារ។កិច្ចពិភាក្សាលើផ្នែកពាណិជ្ជកម្មនៃក្របខ័ណ្ឌសេដ្ឋកិច្ចឥណ្ឌូ-ប៉ាស៊ីហ្វិក (IPEF) ដែលមានបំណងផ្តល់ជូនតំបន់នេះនូវជម្រើសមួយចំពោះការកើនឡើងនៃឥទ្ធិពលពាណិជ្ជកម្មរបស់ប្រទេសចិន បានមានភាពរអាក់រអួលក្នុងរយៈពេលប៉ុន្មានថ្ងៃថ្មីៗនេះ បន្ទាប់ពីប្រទេសមួយចំនួនរួមទាំងវៀតណាម និងឥណ្ឌូនេស៊ីបានបដិសេធមិនប្តេជ្ញាចំពោះកម្លាំងពលកម្មខ្លាំង និងស្តង់ដារបរិស្ថាន។លោក ត្រាំ ដែលបានដកខ្លួនចេញពីកិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិក (TPP) ដែលត្រូវបានក្លែងបន្លំដោយប្រទេសជាច្រើនដូចគ្នា បន្ទាប់ពីបានចូលកាន់តំណែងក្នុងខែមករា ឆ្នាំ២០១៧ បាននិយាយថា លោកនឹង «បោះបង់ចោល» នូវអ្វីដែលលោកហៅថា «ពាណិជ្ជកម្មភាពជាដៃគូអន្តរប៉ាស៊ីហ្វិកទី២» ភ្លាមៗ បន្ទាប់ពីទទួលបានតំណែង៕

រដ្ឋមន្ត្រីក្រសួងការងារ ផ្តល់អនុសាសន៍១០ចំណុច ដើម្បីជាមូលដ្ឋានលើការពិភាក្សាការងារសមរម្យ នៅកម្ពុជា២០២៤-២០២៨

ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃចន្ទ ទី២០ ខែវិច្ឆិកា ឆ្នាំ២០២៣នេះ ផ្តល់អនុសាសន៍ចំនួន១០ចំណុច ទៅកាន់សិក្ខាសាលាពិគ្រោះយោបល់ត្រីភាគីថ្នាក់ជាតិស្ដីពី«ការរៀបចំកម្មវិធីការងារសមរម្យសម្រាប់ប្រទេសកម្ពុជា ឆ្នាំ២០២៤-២០២៨» ជាមូលដ្ឋានគ្រឹះក៏ដូចជាធាតុចូលសម្រាប់អង្គសិក្ខាសាលាសម្រាប់កិច្ចពិភាក្សាដើម្បីធានាឧត្តមប្រយោជន៍របស់កម្ពុជា។ អនុសាសន៍ទាំង១០នេះ ធ្វើឡើងក្នុងពេលដែលឯកឧត្តមរដ្ឋមន្ត្រី បានអញ្ជើញជាអធិបតីក្នុងកម្មវិធីបើកសិក្ខាសាលាពិគ្រោះយោបល់ត្រីភាគីថ្នាក់ជាតិស្តីពី“ការរៀបចំកម្មវិធីការងារសមរម្យសម្រាប់ប្រទេសកម្ពុជា ឆ្នាំ២០២៤-២០២៨” ដែលប្រារព្ធនៅសណ្ឋាគារភ្នំពេញ ដែលមានការចូលរួមពីលោក Oktavianto Pasaribu នាយករងនៃការិយាល័យអង្គការអន្តរជាតិខាងការងារ (ILO) ប្រចាំប្រទេសថៃ កម្ពុជា និងឡាវ និងលោក សំ សឿន ប្រធានក្រុមប្រឹក្សាជាតិសហជីពសម្រាប់កម្មវិធីការងារសមរម្យប្រចាំនៅកម្ពុជា (NTUC) និងលោកឧកញ៉ា សុខ ពិសិដ្ឋ ប្រធានសហព័ន្ធនិយោជក និងសមាគមពាណិជ្ជកម្មកម្ពុជា (CAMFEBA)។ អនុសាសន៍ទាំង១០ចំណុចនោះរួមមាន១ ការកសាងជំនឿទុកចិត្តពីគ្រប់ភាគីពាក់ព័ន្ធមកលើប្រសិទ្ធភាពការងាររបស់ប្រតិបត្តិកររបស់ក្រសួង ទី២ ការបង្កើតអនុឡោមភាពលក្ខខណ្ឌការងារ និងលក្ខខណ្ឌសុខភាព(OSH) ទី៣ ការពង្រឹងប្រសិទ្ធភាពនៃយន្តការដោះស្រាយវិវាទការងារ (ក្រុមប្រឹក្សាអាជ្ញាកណ្តាល) ទី៤ ការពង្រីកវិសាលភាពបេឡាសន្តិសុខសង្គម ទី៥ ពលករទេសន្តរប្រវេសន៍ ទី៦ ការលុបបំបាត់ចោលទម្រង់ធ្ងន់ធ្ងរនៃពលកម្មកុមារ ទី៧ កាតព្វកិច្ចហ្វឹកហ្វឺនកូនជាងដើម្បីបង្កើនប្រសិទ្ធភាពសិក្ខាកាម ទី៨ ការបណ្តុះបណ្តាលជំនាញបច្ចេកទេសវិជ្ជាជីវៈតាមរយៈកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនគោលដៅ១,៥លាននាក់ ទី៩ ការលើកកម្ពស់យេនឌឺដល់កម្មករនិយោជិតជាស្ត្រីតាមគោលការណ៍សមធម៌ ទី១០ ការពង្រឹងយន្តការត្រីភាគី។ ចំពោះឯកឧត្តមរដ្ឋមន្ត្រី អនុសាសន៍១០ចំណុចនឹងធ្វើឱ្យប្រសើរឡើងនៅវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈក្នុងព្រះរាជាណាចក្រកម្ពុជាដែលស្របទៅតាមគោលដៅរបស់រាជរដ្ឋាភិបាលដែលបានប្រកាសដាក់ចេញតាំងពីដើមអាណត្តិ។មុននឹងបញ្ចប់ឯកឧត្តម រដ្ឋមន្ត្រី បានរំពឹងទុកថា ការពិភាក្សាពិគ្រោះយោបល់ត្រីភាគីថ្នាក់ជាតិស្តីពីការរៀបចំកម្មវិធីការងារសមរម្យប្រចាំប្រទេសកម្ពុជា ឆ្នាំ២០២៤-២០២៨ នឹងឈរលើពិភាក្សាដែលយកឧត្តមប្រយោជន៍របស់កម្មករនិយោជិតប្រមាណ១០លាននាក់ នៅកម្ពុជាជាមូលដ្ឋានគ្រឹះសម្រាប់ធាតុចូលក្នុងផែនការថ្នាក់ជាតិរបស់រាជរដ្ឋាភិបាល៕

សម្ដេចធិបតី អំពាវនាវអ្នករកស៊ីលើវិស័យកសិកម្មកុំប្រកួតប្រជែងគ្នាឯង ប៉ុន្ដែសហការគ្នានាំចេញ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវឱ្យអ្នករកស៊ីលើវិស័យកសិកម្ម កុំប្រកួតប្រជែងគ្នាឯង រហូតបាត់បង់លទ្ធភាពជាមួយអ្នកខាងក្រៅ ប៉ុន្ដែគ្រប់ផ្នែកពាក់ព័ន្ធសត្រូវសហការគ្នាចូលរួមអភិវឌ្ឍន៍ និងលើកកម្ពស់លើវិស័យកសិកម្មផ្ទៃក្នុងរបស់កម្ពុជា ដើម្បីឈានទៅប្រកួតប្រជែងនៅកម្រិតតំបន់ និងពិភពលោក។សម្ដេចធិបតី នាយករដ្ឋមន្រ្ដី មានប្រសាសន៍ ក្នុងឱកាសអញ្ជើញប្រកាសដាក់ឱ្យអនុវត្តជាផ្លូវការនូវកម្មវិធីនយោបាយចំនួន ៣ ទៀត ពាក់ព័ន្ធនឹងវិស័យកសិកម្ម នាព្រឹកថ្ងៃទី២០ ខែវិច្ឆិកា ឆ្នាំ២០២៣នេះថា នៅក្នុងការធ្វើពាណិជ្ជកម្មក្នុងពិភពលោកបច្ចុប្បន្ន ប្រទេសកម្ពុជាក៏ត្រូវគោរពតាមច្បាប់ស្ដីពីការប្រកួតប្រជែងក្នុងទីផ្សារសេរី ហេតុនេះត្រូវធ្វើយ៉ាងណាកុំឱ្យប៉ះពាល់ដល់ ស្មារតីប្រកួតប្រជែងក្នុងទីផ្សារសេរីដែលនាំឱ្យបាត់ទីផ្សារ។ សម្ដេចធិបតីបញ្ជាក់ថា រដ្ឋាភិបាលមិនមែនចេះតែអន្តរាគមន៍គ្រប់រឿងបាននោះទេ ព្រោះប៉ះពាល់ដល់ច្បាប់នៃការប្រកួតប្រជែងក្នុងទីផ្សារសេរី។សម្ដេចធិបតីនាយករដ្ឋមន្ត្រី បានស្នើដល់អ្នករកស៊ីទាំងអស់បង្កើនការផលិត និងពង្រឹងច្រវាក់ផលិតកម្មក្នុងប្រទេសឱ្យបានកាន់តែច្រើនឡើងថែមទៀត ដើម្បីបញ្ជៀសការនាំចេញវត្ថុធាតុដើម ដែលបម្រើឱ្យការផលិតនៅក្រៅប្រទេសនោះ។សូមជម្រាបថា កម្មវិធីគោលនយោបាយលើកស្ទួយផលិតកម្មកសិកម្ម រកទីផ្សារ និងរក្សាលំនឹងថ្លៃកសិផលតាមរយៈកម្មវិធីហិរញ្ញប្បទាន របស់រាជរដ្ឋាភិបាលដែលបានដាក់ចេញនាថ្ងៃនេះ គឺជាកម្មវិធីជាតិដ៏សំខាន់មួយក្នុងការរក្សាស្ថិរភាពតម្លៃកសិផល និងជួយដល់សេដ្ឋកិច្ច និងប្រព័ន្ធមុខរបររបស់គ្រួសារកសិករ និងសន្តិសុខស្បៀង។ កម្មវិធីនយោបាយនេះ នឹងដាក់ចេញកញ្ចប់ថវិកាជាក់លាក់មួយដោយចាប់ផ្តើមពីចំនួន ១០០ លានដុល្លារ ហើយនឹងវិភាជថវិកាបន្ថែមទៀត ប្រសិនបើមានតម្រូវការចាំបាច់។ក្រសួងកសិកម្មបានបញ្ជាក់ថា ដើម្បីអនុវត្តកម្មវិធីគោលនយោបាយនេះឱ្យទទួលជោគជ័យ ទាមទារឱ្យមានការចូលរួមពីស្ថាប័នជំនាញ និងអ្នកពាក់ព័ន្ធនានា។ បន្ថែមពីលើនេះ ត្រូវអនុវត្តឱ្យមានភាពប្រទាក់ក្រឡាគ្នាជាមួយគោលនយោបាយមួយចំនួនទៀត ដូចជាការដាក់ពង្រាយមន្ត្រីកសិកម្មនៅតាមឃុំ-សង្កាត់ និងគោលនយោបាយការអភិវឌ្ឍសហគមន៍កសិកម្មទំនើប និងគម្រោងអភិវឌ្ឍន៍នានាក្នុងការចូលរួមកសាងខ្សែច្រវាក់ផលិតកម្មផ្សារភ្ជាប់នឹងទីផ្សារជាដើម៕ អត្ថបទ៖វ៉ន ដារ៉ា

សម្តេចធិបតី ហ៊ុន ម៉ាណែត ជំរុញឱ្យក្រសួងស្ថាប័នពាក់ព័ន្ធច្បាមរកទីផ្សារនាំចេញថ្មីៗ ទៀតជូនកសិករ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានផ្តាំផ្ញើឱ្យក្រសួងកសិកម្ម រុក្ខាប្រមាញ់ និងនេសាទ ក៏ដូចជាក្រសួងពាណិជ្ជកម្មច្បាមរកទីផ្សារនាំចេញថ្មីៗ ថែមទៀតជូនកសិករ។សម្តេចធិបតីនាយករដ្ឋមន្ត្រីកម្ពុជា បានជំរុញឱ្យក្រសួងកសិកម្មរុក្ខាប្រមាញ់ និងនេសាទ ក៏ដូចជាក្រសួងស្ថាប័នពាក់ព័ន្ធបង្កើនការខិតខំរកទីផ្សារថ្មីជូនដល់កសិករឱ្យបានច្រើនថែមទៀត ខណៈអញ្ជើញជាអធិបតីក្នុងពិធីប្រកាសដាក់ឱ្យអនុវត្តជាផ្លូវការនូវគោលនយោបាយជាអាទិភាពទី៥និងទី៦ ក្នុងចំណោមកម្មវិធីគោលនយោបាយជាអាទិភាព ៦ ចំណុចរបស់រាជរដ្ឋាភិបាលសម្រាប់នីតិកាលទី៧នៃរដ្ឋសភា ។ក្នុងពិធីប្រកាសដាក់ឱ្យអនុវត្តកម្មវិធីគោលនយោបាយជាអាទិភាពទី៥និងទី៦ ដែលផ្តោតលើវិស័យកសិកម្មនៅទីស្តីការក្រសួង នាព្រឹកថ្ងៃទី២០វិច្ឆិកានេះ សម្តេច បានគូសបញ្ជាក់ការណែនាំឱ្យច្បាមរកទីផ្សារថ្មីៗថែមទៀតជូនដល់កសិករ និងផលិតផលដទៃទៀត កន្លងមករាជរដ្ឋាភិបាលបានតួនាទីជាអ្នកតម្រង់ទិសសម្របសម្រួល និងដើរតួជាអ្នកចរចាយ៉ាងសកម្មដើម្បីរក ទីផ្សារថ្មីជាមួយនឹងបណ្តាប្រទេសជាមិត្តដើម្បីនាំចេញផលិតផលកសិកម្មរបស់កម្ពុជា។សម្តេច បានបញ្ជាក់ជាថ្មីថា វិធានការអន្តរាគមន៍របស់រាជរដ្ឋាភិបាលគឺធ្វើយ៉ាងណាកុំឱ្យប៉ះពាល់ដល់ទីផ្សារសេរី។សូមបញ្ជាក់ថា ក្នុងរយៈពេល៩ខែ ឆ្នាំ២០២៣នេះ កម្ពុជាបាននាំចេញកសិផលប្រមាណជាង ៥.៥លានតោនទៅកាន់ទីផ្សារអន្តរជាតិប្រមាណ៧១ប្រទេស ដោយទទួលបានចំណូលជាង ៣ ពាន់២១៣លានដុល្លារ។ នេះបើតាមរបាយការណ៍ ស្តីពីស្ថានភាពនៃការនាំចេញកសិផល ក្នុងរយៈពេល៩ខែឆ្នាំ២០២៣ របស់ក្រសួងកសិកម្ម។របាយការណ៍ បានឱ្យដឹងថា ក្នុងចំណោមកសិផលដែលបាននាំចេញទាំងជាង ៥លានតោន ក្នុងនោះការនាំចេញអង្ករមានចំនួនជាង ៤៥ម៉ឺនតោន, ស្រូវចំនួនជាង ១.៨លានតោន និងកសិផលក្រៅពីស្រូវ-អង្ករចំនួនជាង ៣.៣ លានតោន ដោយបាននាំចេញទៅកាន់ ៧១ប្រទេស ថយចុះចំនួនជាង ១៣%។ចំណែកតម្លៃ ដែលទទួលបានពីការនាំចេញកសិផលសរុបមានចំនួនជាង ៣ ២១៣ លានដុល្លារអាមេរិក ក្នុងនោះ នាំចេញអង្ករទទួលបានថវិកាជិត ៣៩៥ លានដុល្លារអាមេរិក, ការនាំចេញស្រូវទទួលបានជាង ៦៥៨លានដុល្លារអាមេរិក និង ការនាំចេញកសិផលក្រៅពីស្រូវ-អង្ករ មានជិត ២ ១៦០ លានដុល្លារអាមេរិក។ក្រសួងកសិកម្មបានលើកឡើងថា ថ្វីត្បិតតែការនាំចេញកសិផលក្នុងរយៈពេល៩ខែ ឆ្នាំ២០២៣នេះ នៅតែបន្តមានបរិមាណតិចជាង កាលពីឆ្នាំ២០២២។ ប៉ុន្តែបើធៀបទៅនឹងរយៈពេល ៨ខែឆ្នាំ២០២៣ ឃើញថា មានកំណើនចំនួន ២.៤២ % ដែលជាក្តីសង្ឃឹមថា ការនាំចេញនឹងមាននិន្នាការកើនឡើងជាបន្តបន្ទាប់ នៅក្នុងខែខាងមុខៗទៀត ជាពិសេសដំឡូងមីស្រស់៕

លោក ប្រធានាធិបតីហ្វីលីពីន ម៉ាកូស ថ្លែងថា មីយ៉ាន់ម៉ា ជាបញ្ហាស្មុគស្មាញសម្រាប់អាស៊ាន

លោកប្រធានាធិបតីហ្វីលីពីន ហ្វឺឌីណាន ម៉ាកូស (Ferdinand Marcos) បាននិយាយថា ជម្លោះនៅក្នុងសហភាពមីយ៉ាន់ម៉ា ដែលគ្រប់គ្រងដោយយោធា គឺជាបញ្ហាដ៏លំបាកមួយសម្រាប់ អាស៊ាន របស់ប្លុកអាស៊ីអាគ្នេយ៍ ត្រូវដោះស្រាយ ជាមួយនឹងវឌ្ឍនភាពតិចតួច ឆ្ពោះទៅរកដំណោះស្រាយ ខណៈការប្រយុទ្ធគ្នាកាន់តែខ្លាំងក្នុងពេលថ្មីៗនេះ ។ ថ្លែងក្នុងវេទិកាមួយក្នុងរដ្ឋហាវ៉ៃ ដែលផ្សាយផ្ទាល់នៅប្រទេសហ្វីលីពីន នៅថ្ងៃចន្ទ ២០ វិច្ឆិកា លោក Marcos បាននិយាយថា មានការប្តេជ្ញាចិត្តពីសមាគមប្រជាជាតិអាស៊ីអាគ្នេយ៍ (អាស៊ាន) ប៉ុន្តែបញ្ហាមានភាពស្មុគស្មាញ រួមទាំងផលប៉ះពាល់មនុស្សធម៌ផងដែរ។ អង្គការសហប្រជាជាតិនិយាយថា មនុស្សជាងមួយលាននាក់ត្រូវបានភៀសខ្លួនចេញពីលំនៅឋាននៅចាប់តាំងពីយោធាមីយ៉ាន់ម៉ាបានធ្វើរដ្ឋប្រហារក្នុងឆ្នាំ ២០២១ ដោយបានទាញទម្លាក់លទ្ធិប្រជាធិបតេយ្យ រយៈពេលមួយទសវត្សរ៍ ហើយបានរុញឲ្យប្រទេសនេះធ្លាក់ចូលក្នុងជម្លោះ និងការបំផ្លាញសេដ្ឋកិច្ច។ លោក Marcos បាននិយាយថា មានកម្លាំងរុញច្រានយ៉ាងខ្លាំងសម្រាប់អាស៊ានក្នុងការដោះស្រាយបញ្ហានេះ។ ប៉ុន្តែជាបញ្ហាដ៏លំបាកបំផុត។ការបង្ក្រាបក្រោយរដ្ឋប្រហាររបស់របបយោធាលើក្រុមអ្នកប្រឆាំងបានបង្កើតឱ្យមានចលនាតស៊ូដែលបាននិងកំពុងកើនឡើងយ៉ាងខ្លាំង។ អាស៊ានបានហាមប្រាមបណ្ដាមេទ័ពជាន់ខ្ពស់របស់សហភាពមីយ៉ាន់ម៉ា មិនឲ្យចូលរួមកិច្ចប្រជុំរបស់ខ្លួនរហូតដល់ ពួកគេបង្ហាញការប្តេជ្ញាចិត្តចំពោះផែនទីបង្ហាញផ្លូវសន្តិភាពរយៈពេលពីរឆ្នាំរបស់ប្លុកនេះ ៕

បណ្ដាញសង្គម

ព័ត៌មានថ្មីៗ

គ្រឹះស្ថានអប់រំបន្តអនុវត្តវិធានការតឹងរ៉ឹង ហាមប្រាមសិស្សមិនឱ្យជក់បារីអេឡិចត្រូនិកក្នុង និងជុំវិញបរិវេណសាលារៀន

ឯកអគ្គរដ្ឋទូតរុស្ស៊ី៖ ការគាំទ្ររបស់ប្រទេសកាណាដា មិនបានជួយដល់របបក្រុងគីវទេ

អ្នកការទូត៖ រុស្ស៊ីបដិសេធលទ្ធភាពនៃការប្រើប្រាស់អាវុធនុយក្លេអ៊ែរនៅអ៊ុយក្រែន

ផែនទីបង្ហាញផ្លូវរបស់បារាំងបញ្ជាក់ថា ប្រទេសនេះ នឹងឈប់ប្រើប្រាស់ឥន្ធនៈហ្វូស៊ីល នៅឆ្នាំ ២០៥០

អាស៊ានមានសារសំខាន់សម្រាប់កម្ពុជាក្នុងការស្វែងរកដំណោះស្រាយជម្លោះព្រំដែនជាមួយប្រទេសថៃ

លីប៊ីនិយាយថា ជនអន្តោប្រវេសន៍យ៉ាងតិច ១៧នាក់ បានស្លាប់ នៅក្នុងសមុទ្រ និង ៩នាក់ បាត់ខ្លួន

ការស៊ើបអង្កេត៖ ក្រុមជ្វីហ្វអូស្ត្រាលីបានព្រមានអំពី «ការវាយប្រហារភេរវកម្ម» មុនពេលបាញ់ប្រហារនៅឆ្នេរ BONDI

សម្ដេចតេជោប្រាប់យូណេស្កូថា សម្បត្តិបេតិកភណ្ឌពិភពលោកត្រូវបានរងគ្រោះ ពិសេស ប្រាសាទព្រះវិហារ

WHO៖ ការវាយប្រហារលើមន្ទីរពេទ្យ និងគ្រូពេទ្យដែលជំរុញដោយជម្លោះនៅមជ្ឈិមបូព៌ា កំពុងកើនឡើង

រថយន្តក្រុងរដ្ឋជួយពលរដ្ឋកាត់បន្ថយចំណាយលើការធ្វើដំណើរ ខណៈកម្ពុជាកំពុងប្រឈមនឹងវិបត្តិតម្លៃប្រេង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍