នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានក្រុមការងារគណបក្សចុះមូលដ្ឋាន អញ្ជើញបើកការដ្ឋានសាងសង់​ផ្លូវលំ​ប្រវែង ៥.៧០០​ម៉ែត្រ ស្ថិតក្នុងស្រុកប្រាសាទបល្ល័ង្ក ខេត្តកំពង់ធំ
សម្ដេចតេជោ ចាត់ទុក អតីតរដ្ឋមន្ត្រីការពារជាតិវៀតណាម ជាមិត្តចាស់របស់កម្ពុជា
ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម កង ណម នៅគេហដ្ឋាន
មន្ត្រីជាន់ខ្ពស់ក្រសួងអភិវឌ្ឍន៍ជនបទ ចុះត្រួតពិនិត្យ និងវាយតម្លៃលើ​ការងារ​ស្ថាបនា​ផ្លូវ នៅ​ទីតាំង​ដីសម្បទានសង្គមកិច្ច ខេត្តឧត្តរមានជ័យ

នយោបាយ​ និង ការអភិវឌ្ឍន៍

ប្រទេសចិន បានបាញ់បង្ហោះយានអវកាសស៊ិនចូវ-១៧ សម្រាប់បេសកកម្មថ្មីនៅក្នុងស្ថានីយអវកាស

2023/10/26 02:01:00 pm        460
Facebook Telegram Linkin
នៅថ្ងៃព្រហស្បតិ៍ (២៦ តុលា) នេះ ប្រទេសចិន បានបាញ់បង្ហោះយានអវកាស ស៊ិនចូវ-១៧ (Shenzhou-17) ហើយអវកាសយានិកបីនាក់នៅលើយានអវកាសនោះ នឹងត្រូវបញ្ជូនឱ្យស្នាក់នៅក្នុងគន្លងតារាវិថីរយៈពេលប្រហែលប្រាំមួយខែ ក្នុងបេសកកម្មស្ថានីយអវកាសមួយ។ យោងតាមទីភ្នាក់ងារអវកាសចិន (CMSA) បានឱ្យដឹងថា យានអវកាស ដែលស្ថិតនៅពីលើយានចម្លងឈ្មោះ Long March-2F នេះ បានហោះចេញពីមជ្ឈមណ្ឌលបាញ់បង្ហោះផ្កាយរណប ជីវឈ័ន (Jiuquan) នៅភាគពាយ័ព្យប្រទេសចិន។អវកាសយានិកទាំងបីរបស់យានស៊ិនចូវ-១៧ មានឈ្មោះ លោក ថាង ហុងប៉ូ (Tang Hongbo) លោក ថាង សឹងជៀ (Tang Shengjie) និងលោក ជាំង ស៊ីនលីន (Jiang Xinlin) គឺជាក្រុមអវកាសយានិកក្មេងជាងគេ ចាប់តាំងពីការសាងសង់ស្ថានីយ៍អវកាស ធានកុង របស់ចិនបានចាប់ផ្តើមមក។ លោក លីន ស៊ីឈាំង (Lin Xiqiang) នាយករងនៃទីភ្នាក់ងារអវកាស CMSA បានប្រកាសនៅក្នុងសន្និសីទសារព័ត៌មានមួយកាលពីថ្ងៃពុធថា អវកាសយានិកទាំងបីរូបនោះ នឹងធ្វើបេសកកម្មវិទ្យាសាស្ត្រអវកាសក្នុងគន្លង និងការធ្វើតេស្តបន្ទុកកម្មវិធី ព្រមទាំងការពិសោធន៍ផ្សេងៗទៀត។លោក លីន បានបន្ថែមថា អវកាសយានិកទាំងនោះ ក៏នឹងបន្តវាយតម្លៃមុខងារ និងដំណើរការរបស់ស្ថានីយ៍អវកាស និងសាកល្បងការសម្របសម្រួល ព្រមទាំងភាពស្របគ្នានៃមជ្ឈមណ្ឌលទ្រទ្រង់ដី ក្នុងការអនុវត្តការងារ និងការគ្រប់គ្រងស្ថានីយអវកាស ដើម្បីបង្កើនប្រសិទ្ធភាពប្រតិបត្តិការ និងសមត្ថភាពកែតម្រូវកំហុសរបស់ស្ថានីយអវកាសនេះផងដែរ៕

អ៊ីស្រាអែល នឹងបដិសេធមិនផ្តល់ទិដ្ឋាការដល់មន្ត្រីUN បន្ទាប់ពីប្រមុខអង្គការអន្តរជាតិនេះ រិះគន់លើសង្រ្គាមហ្កាហ្សា

2023/10/26 01:56:35 pm        369
Facebook Telegram Linkin
ឯកអគ្គរដ្ឋទូតរបស់អ៊ីស្រាអែល ប្រចាំអង្គការសហប្រជាជាតិ បាននិយាយថា អ៊ីស្រាអែល នឹងបដិសេធមិនផ្តល់ទិដ្ឋាការដល់បណ្ដាមន្ត្រីអង្គការសហប្រជាជាតិ ខណៈជម្លោះរបស់អ៊ីស្រាអែល ជាមួយអង្គការអន្តរជាតិមួយនេះកាន់តែស៊ីជម្រៅ។ យោងតាមប្រព័ន្ធផ្សព្វផ្សាយអ៊ីស្រាអែល បានឲ្យដឹងថា លោក Gilad Erdan បានធ្វើសេចក្តីថ្លែងការណ៍បែបនេះកាលពីថ្ងៃពុធ (២៥ តុលា) ខណៈជម្លោះជុំវិញសុន្ទរកថារបស់ប្រធានអង្គការសហប្រជាជាតិ នៅមុខក្រុមប្រឹក្សាសន្តិសុខកាលពីថ្ងៃមុននោះ នៅតែបន្ត។អគ្គលេខាធិការអង្គការសហប្រជាជាតិ លោក Antonio Guterres បានរិះគន់ដោយប្រយោលទៅលើអ៊ីស្រាអែល ចំពោះការបញ្ជាឱ្យមានការជម្លៀសជនស៊ីវិលពីភាគខាងជើងទៅភាគខាងត្បូងនៃតំបន់ហ្កាហ្សា ស្ទ្រីប។ លោកក៏បាននិយាយផងដែរថា ការវាយប្រហាររបស់ពួកហាម៉ាស លើអ៊ីស្រាអែល កាលពីថ្ងៃទី៧ ខែតុលា មិនបានកើតឡើង «ដោយគ្មានហេតុផលនោះទេ» ខណៈពលរដ្ឋប៉ាឡេស្ទីន ត្រូវបាន «ទទួលរងនូវការគៀបសង្កត់អស់រយៈពេល ៥៦ឆ្នាំមកហើយ»។សារព័ត៌មាន Al Jazeera បានរាយការណ៍ថា ប្រទេសជាច្រើនបានស្វាគមន៍ «ការលើកឡើងប្រកបដោយតុល្យភាព» របស់លោក Guterres នេះ ប៉ុន្តែទោះយ៉ាងណាក៏ដោយ អ៊ីស្រាអែល មានការ «ខឹងសម្បារយ៉ាងខ្លាំង» ហើយក្រុមមន្ត្រីរបស់ខ្លួន បានអំពាវនាវឱ្យប្រធានអង្គការសហប្រជាជាតិរូបនេះ លាលែងពីតំណែងផងដែរ៕

ប្រមុខUN ច្រានចោលការចោទប្រកាន់របស់អ៊ីស្រាអែលដែលថា រូបលោកផ្តល់ភាពស្របច្បាប់ ដល់ការវាយប្រហាររបស់ក្រុមហាម៉ាស

2023/10/26 01:32:16 pm        147
Facebook Telegram Linkin
ប្រមុខអង្គការសហប្រជាជាតិលោក Antonio Guterres កាលពីថ្ងៃពុធបានច្រានចោលការចោទប្រកាន់ពីសំណាក់អ៊ីស្រាអែល នៅក្នុងសេចក្ដីថ្លែងការណ៍មួយ ទៅកាន់ក្រុមប្រឹក្សាសន្តិសុខអង្គការសហប្រជាជាតិដែលថា លោកបានបញ្ជាក់ពីភាពស្របច្បាប់ចំពោះការវាយប្រហារនានាដោយក្រុមសកម្មប្រយុទ្ធហាម៉ាសលើអ៊ីស្រាអែល។ លោកបានប្រាប់ក្រុមអ្នកសារព័ត៌មាន ដោយពុំបានបញ្ជាក់ចំឈ្មោះអ៊ីស្រាអែលថា លោកតក់ស្លត់ណាស់ចំពោះការបកស្រាយខុសក្នុងចំណុចមួយចំនួននៃសេចក្ដីថ្លែងការណ៍របស់លោក ដូចជាបើ លោកបញ្ជាក់ពីសកម្មភាពនៃភេរវកម្មដោយក្រុមហាម៉ាស រឿងនោះពិតជាខុសគឺវាផ្ទុយគ្នា។ កាលពីថ្ងៃអង្គារលោក Guterres បានទទូច ឲ្យមានការការពារជនស៊ីវិល ក្នុងសង្រ្គាមរវាងអ៊ីស្រាអែល និងក្រុមហាម៉ាស ដោយបង្ហាញក្ដីបារម្ភពី អំពីការបំពានយ៉ាងច្បាស់លើច្បាប់មនុស្សធម៌អន្តរជាតិក្នុងតំបន់ហ្កាហ្សា។ លោកបានប្រាប់ក្រុមប្រឹក្សាសន្តិសុខអង្គការសហប្រជាជាតិថាបញ្ហាសំខាន់ត្រូវបញ្ជាក់ឲ្យច្បាស់ថា សង្រ្គាមមានច្បាប់ដោយចាប់ផ្ដើមដោយគោលការណ៍ជាមូលដ្ឋាននៃការគោរពនិងការការពារជនស៊ីវិល។ប្រមុខអង្គការសហប្រជាជាតិរូបនេះនិយាយថាវាជារឿងសំខាន់ដែលត្រូវទទួលស្គាល់ផងដែរថា ការវាយប្រហារដោយស្នាដៃក្រុមហាម៉ាស ពុំមានជាប់ពាក់ព័ន្ធនឹងភាគីណាផ្សេងទៀតទេ។ប្រជាជនប៉ាឡេស្ទីន ត្រូវបានក្លាយជាគោលដៅរយៈពេល៥៦ឆ្នាំនៃការគ្រប់គ្រងប្រកបដោយការគាបសង្កត់។លោកបាននិយាយថា ប៉ុន្តែទុក្ខសោករបស់ប្រជាជនប៉ាឡេស្ទីនមិនអាចបង្ហាញអំពីភាពត្រឹមត្រូវនៃការវាយប្រហារដ៏គួរឱ្យរន្ធត់ដោយក្រុមហាម៉ាស នោះទេ។ ហើយការវាយប្រហារដ៏គួរឱ្យភ័យខ្លាចទាំងនោះមិនអាចបញ្ជាក់អំពីភាពត្រឹមត្រូវដោយដាក់ទណ្ឌកម្មរួមលើប្រជាជនប៉ាឡេស្ទីននោះដែរ។គួររម្លឹកថា ឯកអគ្គរដ្ឋទូតអង្គការសហប្រជាជាតិរបស់អ៊ីស្រាអែលលោក Gilad Erdan បានហៅសុន្ទរកថារបស់លោក Guterres ថា គួរឱ្យភ្ញាក់ផ្អើល ហើយបានអំពាវនាវឱ្យលោក Guterres លាលែងពីតំណែងភ្លាមៗ ខណៈរដ្ឋមន្ត្រីការបរទេសអ៊ីស្រាអែលលោក Eli Cohen បាននិយាយថា លោកនឹងមិនជួបជាមួយលោក Guterres នៅថ្ងៃអង្គារតាមការគ្រោងទុកនោះទេ៕

ពលរដ្ឋរងគ្រោះដោយទឹកជំនន់ចំនួន១៣០ គ្រួសាររស់នៅខណ្ឌព្រែកព្នៅ ទទួលអំណោយសង្រ្គោះបន្ទាន់

2023/10/26 01:20:45 pm        283
Facebook Telegram Linkin
នៅព្រឹកថ្ងៃទី ២៦ ខែតុលា ឆ្នាំ២០២៣នេះ កាកបាទក្រហមកម្ពុជា ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ ​កាកបាទក្រហមកម្ពុជា សហការ​ជាមួយសាខា​ និងអនុសាខា​ ចុះសំណេះសំណាលសួរសុខទុក្ខ ​និងចែកអំណោយមនុស្សធម៌ ជួយសម្រាលការលំបាក​ ជូនប្រជាពលរដ្ឋរងគ្រោះដោយទឹកជំនន់ចំនួន១៣០គ្រួសារ រស់នៅខណ្ឌព្រែកព្នៅ រាជធានីភ្នំពេញ។ក្នុងឱកាសជួបសំណេះសំណាលនោះ លោកជំទាវ ម៉ែន នារីសោភ័គ បានពាំនាំមកនូវព្រះរាជបន្ទូល និងប្រសាសន៍ផ្តាំផ្ញើសួរសុខទុក្ខ ពីសំណាក់ព្រះអង្គរទាំងទ្វេ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយក្តីនឹករលឹក​ និងមនោសញ្ចេតនាជាប់ជានិច្ច ជាមួយប្រជានុរាស្ត្រកូនចៅ និងប្រជាពលរដ្ឋគ្រប់ពេលវេលា។ ទន្ទឹមនឹងនេះលោកជំទាវ បានពាំនាំផ្តាំផ្ញើ នូវសារសុខភាពមួយចំនួន ជូនដល់បងប្អូនឱ្យចេះថែទាំ​សុខភាពឱ្យបានល្អ ជាពិសេសនៅក្នុងពេលមានទឹកជំនន់នេះ ត្រូវសម្អាតបរិស្ថានជុំវិញផ្ទះឱ្យ​បានស្អាត កំចាត់ចោលនូវជម្រកសត្វមូសដែលមានជុំវិញផ្ទះ ​និងត្រូវយកចិត្តទុកដាក់ខ្ពស់ ចំពោះ មនុស្សចាស់ ​និងកុមារតូចៗ​ ជៀសវាងគ្រោះថ្នាក់កើតមានឡើងជាយថាហេតុ។ លើសពីនេះទៀតសូមចូលរួមសម្អាតបរិស្ថាន និងកាត់បន្ថយការប្រើប្រាស់ប្លាស្ទិក។ទាក់ទិននិងការផ្តល់អំណោយសង្រ្គោះបន្ទាន់នេះ ​លោកជំទាវ ម៉ែន នារីសោភ័គ បានឱ្យដឹងថា នៅក្នុងខែតុលា​ ឆ្នាំ២០២៣នេះ កាកបាទក្រហមកម្ពុជា​ ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់​អំណោយ​មនុស្សធម៌ជូន ប្រជាពលរដ្ឋរងគ្រោះដោយទឹកជំនន់​សរុបចំនួន ៧.៥១៦ គ្រួសារ (ក្នុងនោះថ្នាក់កណ្តាល ​បានឆ្លើយតបចំនួន ៦.២១០គ្រួសារ ​និងថ្នាក់សាខាឆ្លើយតបបាន ១.៣០៦គ្រួសារ) ​នៅតាមបណ្តារាជធានី-ខេត្តចំនួន ៩ រួមមាន រាជធានីភ្នំពេញ, ខេត្តពោធិ៍សាត់, ខេត្តកំពង់ស្ពឺ, ខេត្តបាត់ដំបង, ខេត្តបន្ទាយមានជ័យ, ខេត្តសៀមរាប, ខេត្តកណ្តាល, ខេត្តព្រះវិហារ និងខេត្តតាកែវ។សូមបញ្ជាក់ថា គ្រួសាររងគ្រោះ ដែលទទួលអំណោយនាពេលនេះ ក្នុងមួយគ្រួសារទទួលបាន៖ អង្ករ ២៥ គីឡូក្រាម, មី ១កេស, ត្រីខ ១០កំប៉ុង និងឃីត (មុង ភួយ សារុង ក្រមា) ១កញ្ចប់។ ​ដោយឡែក ទឹកត្រី ៦ដប, ទឹកបរិសុទ្ធ ១កេស និងថវិកា ​៣ម៉ឺនរៀល ​ជាអំណោយរបស់ ​ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ​និង​ជាប្រធានគណៈកម្មាធិការសាខាកាក​បាទ​ក្រហម​កម្ពុជា រាជធានីភ្នំពេញ៕អត្ថបទ៖ លោក សំ ងីម 

សម្តេចធិបតី ហ៊ុន ម៉ាណែត៖ ការសម្រេចចិត្តពង្រីកការវិនិយោគរបស់ក្រុមហ៊ុន Minebea ពិតជាបានស្តែងឱ្យឃើញនូវទំនុកចិត្តចំពោះស្ថិរភាពរបស់ប្រទេសកម្ពុជា

2023/10/26 01:13:46 pm        230
Facebook Telegram Linkin
ភ្នំពេញ៖ នាព្រឹកថ្ងៃទី២៦ ខែតុលា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យលោក កៃនុម៉ា យ៉ូស៊ីហ៊ីសា អគ្គនាយកក្រុមហ៊ុន Minebea ចូលជួបសម្តែងការគួរសម និងពិភាក្សាការងារ នៅវិមានសន្តិភាព ។ក្នុងកិច្ចជំនួបនេះ លោក កៃនុម៉ា យ៉ូស៊ីហ៊ីសា បានថ្លែងអំណរគុណចំពោះ សម្តេចធិបតី ដែលបានឆ្លៀតពេលវេលាដ៏​មមាញឹក​អនុញ្ញាត​ឱ្យរូបលោក និ​ងសហការី ចូលជួបសម្តែងការគួរសម និងពិភាក្សាការងារ ព្រមទាំងបានចូលរួមអបអរសាទរចំពោះ សម្តេចធិបតី ក្នុងឱកាសនៃការចូល​កាន់មុខ​តំណែងជានាយករដ្ឋមន្រ្តី នៃព្រះរាជាណាចក្រកម្ពុជា ក្នុងនីតិកាលទី៧ នៃរដ្ឋសភា ។ ក្នុងឱកាសនោះផងដែរ លោកអគ្គនាយក ​បានជម្រាបជូន សម្តេចធិបតីនាយករដ្ឋមន្ត្រីអំពីការរីក​ចម្រើនលូតលាស់យ៉ាងឆាប់រហ័សរបស់ក្រុមហ៊ុន Minebea ក្នុងនាមជារោងចក្រផលិតគ្រឿងបង្គុំ ហើយបន្តបោះជំហានទៅមុខឥតឈប់ឈរឆ្ពោះទៅការប្រែក្លាយជាក្រុមហ៊ុនបៃតង (Green Transformation GX) ដោយព្យាយាមកាត់បន្ថយនូវការបំភាយឧស្ម័នកាបូនិច ក្នុងខ្សែសង្វាក់ផលិតកម្មទាំងមូល ហើយបានប្រែក្លាយខ្លួនឱ្យទៅជាអព្យាក្រឹត្យកាបូន តាមរយៈការជម្រុញនូវការលក់ផលិតផលបៃតង និងផលិតផលផ្សេងៗទៀត ដែលមានលក្ខណៈសន្សំសំចៃថាមពល រួមទាំងផែនការអនាគតក្នុងបង្កើតកសិដ្ឋានផលិតថាមពលដោយពន្លឺព្រះអាទិត្យ និងការបង្កើតរោងចក្រថ្មីនៅក្នុងប្រទេសកម្ពុជា ផងដែរ ។ជាការឆ្លើយតប សម្តេចធិបតី បានស្វាគមន៍ចំពោះជំនួបជាមួយលោក កៃនុម៉ា យ៉ូស៊ីហ៊ីសា និងថ្នាក់ដឹកនាំក្រុមហ៊ុន Minebea នាឱកាសនេះ និងបានរំឭកផងដែរអំពីជំនួបនៅទីក្រុងតូក្យូ កាលពីឆ្នាំ២០២២ កន្លងទៅ ក្នុងឱកាសនៃដំណើរទស្សនកិច្ចផ្លូវការក្នុងនាមមេបញ្ជាការកងទ័ពជើងគោក នៃកងយោធពលខេមរភូមិន្ទ ។ បន្ថែមពីលើនេះ សម្តេចធិបតី ក៏បានចូលរួមអបអរសាទរចំពោះជោគជ័យនៃការវិនិយោគរបស់ក្រុមហ៊ុន Minebea នៅកម្ពុជា ដោយចាប់ផ្តើមពីដើមទុនប្រមាណ ២៣ លានដុល្លារ រហូតបានកើនដល់ ៦០០ លានដុល្លារ ហើយការសម្រេចចិត្តពង្រីកការវិនិយោគនេះ ពិតជាបានស្តែងឱ្យឃើញនូវទំនុកចិត្តរបស់ក្រុមហ៊ុនចំពោះស្ថិរភាពរបស់ប្រទេសកម្ពុជា ។ ជាមួយគ្នានេះ សម្តេចធិបតី ក៏បានវាយតម្លៃខ្ពស់ចំពោះការចូលរួមចំណែករបស់ក្រុមហ៊ុន Minebea នៅក្នុងដំណើរអភិវឌ្ឍរបស់កម្ពុជា តាមរយៈការជំរុញកំណើនសេដ្ឋកិច្ច និងការបង្កើតការងារសម្រាប់ប្រជាជន ក៏ដូចជាការបង្កើតនូវគំរូស្តង់ដារល្អនៃលក្ខខណ្ឌការងារសម្រាប់កម្មករ-និយោជិត ព្រមជាមួយនឹងការសង្កត់ធ្ងន់ថា រាជរដ្ឋាភិបាលកម្ពុជានឹងបន្តគាំទ្រ និងលើកទឹកចិត្តដល់ការវិនិយោគរបស់ក្រុមហ៊ុន Minebea ពីព្រោះជោគជ័យរបស់ Minebea ក៏ជាជោគជ័យរបស់កម្ពុជា ដូចគ្នា ៕

សហរដ្ឋអាមេរិកបន្តកិច្ចសហការគាំទ្រកម្ពុជា លើវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ

2023/10/26 01:04:29 pm        272
Facebook Telegram Linkin
ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៥ តុលា ឆ្នាំ២០២៣ បានជួបពិភាក្សាការងារជាមួយ ឯកឧត្តម Patrick Murphy ឯកអគ្គរដ្ឋទូតអាមេរិក​ប្រចាំ​នៅកម្ពុជា ដើម្បីពិភាក្សាការងារពាក់ព័ន្ធមួយចំនួននៅកម្ពុជា។ប្រភពក្រសួងការងារ និងបណ្តុះបណ្តាលវិជ្ជាជីវៈ នៅក្រោយចប់ជំនួបការងារនេះ បានឲ្យដឹងថា ក្នុងកិច្ចពិភាក្សានេះ ប្រព្រឹត្តទៅដោយភាពជិតស្និទ្ធ ​និងត្រង់ទៅត្រង់មក។ នាឱកាសនោះ ឯកឧត្តមរដ្ឋមន្ត្រី បានជម្រាបអគ្គរដ្ឋទូតអាមេរិក ពីចក្ខុវិស័យរួមរបស់ក្រសួងការងារ ក្នុងអាណត្តិទី៧នេះ ដែលក្រសួងផ្ទាល់ ​ក៏ដូចជារាជរដ្ឋាភិបាលកម្ពុជា ដែលដឹកនាំដោយ​សម្តេចធិបតី ហ៊ុន ម៉ាណែត ចង់សម្រេចបាន​ គឺវិស័យការងារដែលមានបរិយាកាស និងលក្ខខណ្ឌការងារកាន់តែល្អប្រសើរ និងមានសុខដុមនីយកម្មក្នុងទំនាក់ទំនងវិជ្ជាជីវៈ ដែលភាគីនិយោជក និងកម្មករនិយោជិតអាចរក្សាបាននូវឧត្តមប្រយោជន៍​របស់ខ្លួនតាមរយៈការពង្រឹងសមត្ថភាព និងចំណេះដឹងពាក់ព័ន្ធនឹងច្បាប់ការងារ។ ឯកឧត្តមរដ្ឋមន្ត្រី បានគូសបញ្ជាក់ពីកម្មវិធីជាអាទិភាពសំខាន់ៗមួយចំនួនទៀត ដែលរាជរដ្ឋាភិបាល​ក្នុងអាណត្តិទី៧នេះ​ បានដាក់ចេញលើការបណ្តុះបណ្តាលបច្ចេកទេស​វិជ្ជាជីវៈជូនយុវជន​មកពីគ្រួសារក្រ១ ក្រ២ និងងាយរងគ្រោះចំនួន១,៥លាននាក់ដោយឥតគិតថ្លៃ ហើយទទួលបានប្រាក់ឧបត្ថម្ភបន្ថែម។ បន្ថែមពីនេះ រាជរដ្ឋាភិបាលកម្ពុជា ក៏គ្រោងនឹងផ្តល់របប​សន្តិសុខ​សង្គមផ្នែកថែទាំសុខភាពតាមគោលការណ៍ស្ម័គ្រចិត្តដល់អ្នកក្នុងបន្ទុកសមាជិក ប.ស.ស. ចំពោះកម្មករនិយោជិតតាមរយៈភាគទានស្ម័គ្រចិត្តចំនួន១៥, ៦០០រៀល ដែលអាចទទួលបានការ​ថែទាំ​សុខភាពដោយឥតគិតថ្លៃ ដែលជាយុទ្ធសាស្ត្រកាត់បន្ថយចំណាយ និងបង្កើនការសន្សំដល់​កម្មករនិយោជិត។ប្រភពខាងលើ បានលើកឡើងទៀតថា ក្រោយបានយល់ពីចក្ខុវិស័យរួមរបស់ក្រសួងការងារ និង​បណ្តុះបណ្តាលវិជ្ជាជីវៈនៅអាណត្តិទី៧នេះ ​ឯកអគ្គរដ្ឋទូតអាមេរិកប្រចាំនៅកម្ពុជា បានវាយ​តម្លៃខ្ពស់​ចំពោះគោលនយោបាយ និងចក្ខុវិស័យរបស់ក្រសួងក្នុងការពង្រឹងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ។ មុននឹងបញ្ចប់កិច្ចពិភាក្សាប្រកបដោយភាពស្និទ្ធស្នាលនោះ ភាគីទាំងពីរបានឯកភាពបន្ត​កិច្ចសហប្រតិបត្តិការ​ និងពង្រឹងភាពជាដៃគូលើវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ដើម្បីពង្រឹងបរិយាកាស និងផលិតភាពការងារកាន់តែប្រសើរ ដែលជាចន្ទល់ដ៏សំខាន់សម្រាប់ការអភិវឌ្ឍក៏ដូចជារក្សាកំណើនសេដ្ឋកិច្ចជាតិ៕

នាយឧត្តមសេនីយ៍ ទៀ សីហា៖រាជរដ្ឋាភិបាលប្រកាន់ជំហរម៉ឺងម៉ាត់មិនឲ្យមានមូលដ្ឋានកងទ័ពបរទេសលើទឹកដីកម្ពុជាឡើយ

2023/10/26 12:54:26 pm        361
Facebook Telegram Linkin
ភ្នំពេញ៖ នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានបញ្ជាក់ថា រាជរដ្ឋាភិបាលកម្ពុជា បានបន្តប្រកាន់ជំហរយ៉ាងម៉ឺងម៉ាត់ ដោយមិនអនុញ្ញាត​ឲ្យ​មានមូលដ្ឋានកងទ័ពបរទេសលើ ​ទឹកដីកម្ពុជានោះឡើយ ​ហើយមួយវិញទៀតរាជរដ្ឋាភិបាលកម្ពុជា ក៏ប្រឆាំងដាច់ខាតផងដែរចំពោះការប្រើប្រាស់ ឬការ​គម្រាម​ប្រើប្រាស់កម្លាំង​ក្នុងការ​ទំនាក់ទំនង​អន្តរជាតិនោះ។ក្នុងឱកាសអញ្ជើញជាអធិបតីភាពក្នុងពិធីប្រារព្ធខួប១៥ឆ្នាំ ​នៃថ្ងៃបង្កើតអគ្គនាយកដ្ឋាននយោបាយ និង​កិច្ចការបរទេសរបស់ក្រសួងការពារជាតិ ​នាព្រឹកថ្ងៃទី២៦ ខែតុលា​ ឆ្នាំ២០២៣នេះ នាយឧត្តម សេនីយ៍ ទៀ សីហា បានបញ្ជាក់ថា« រាជរដ្ឋាភិបាលបានប្តេជ្ញា​បន្តអនុវត្តនយោបាយការបរទេស​ឯករាជ្យ ​ដោយផ្អែកលើច្បាប់អន្តរជាតិ ​និងគោរពដាច់ខាតនូវអធិបតេយ្យ បូរណភាពទឹកដី និង​ឯករាជ្យរបស់រដ្ឋជា សមាជិក អនុលោមតាមធម្មនុញ្ញអង្គការសហប្រជាជាតិ និងគោលការណ៍​ដែលទទួលស្គាល់ជាសកល និងប្រកាន់គោលការណ៍មិនគាំទ្រការប្រើប្រាស់ ឬការគម្រាមប្រើប្រាស់​កម្លាំងក្នុងទំនាក់ទំនងអន្តរជាតិ ការឈ្លានពាន​ប្រឆាំងរដ្ឋឯករាជ្យ ការបំបែករដ្ឋការកាត់យកទឹកដី​ពីរដ្ឋធិបតេយ្យ និងការ​ជ្រៀងជ្រែក​កិច្ចការផ្ទៃ ​ក្នុងនៃប្រទេសដទៃ ព្រមទាំងបន្តប្រកាន់ជំហរម៉ឺងម៉ាត់​មិនអនុញ្ញាតឲ្យមានមូលដ្ឋានកងទ័ព​បរទេសនៅលើ ​ទឹកដីកម្ពុជានោះឡើយ»។នាយឧត្តសេនីយ៍ បាន​បញ្ជាក់​បន្ថែមទៀតថា​ រាជរដ្ឋាភិបាលកម្ពុជា​ ប្រកាន់​គោលការណ៍​អព្យាក្រឹត្យ​អចិន្ត្រៃយ៍​មិនចូលបក្សសម្ព័ន្ធ ​និង​អនុវត្តការទូត​ទន់ភ្លន់ ​ប៉ុន្តែ​ម៉ឺងម៉ាត់ ​បត់បែន​ និង​ថ្លឹងថ្លែង​ ស្របតាម ​ការ​ផ្លាស់ប្តូរ​ផ្នែកយុទ្ធសាស្រ្តភូមិសាស្រ្ត​នយោបាយ ​ក្នុង​តំបន់ ​និង​សកលោក ដោយ​តម្កល់​ផលប្រយោជន៍ ​ស្នូល​របស់ជាតិជាចម្បង​ ក្នុងការ​អនុវត្តគោលនយោបាយ​ការបរទេស​រួមចំណែក​ការពារ​អធិបតេយ្យជាតិ​ និងបូរណភាពទឹកដី​ ការអភិវឌ្ឍសង្គម-សេដ្ឋកិច្ច សម្រាប់​លើកកម្ពស់ជីវភាពប្រជាជន ​និងលើកកម្ពស់ កិត្យានុភាព ​និងឧត្តមភាពជាតិទាំងក្នុងក្របខ័ណ្ឌតំបន់ និងសកលលោក។ ​លើកកម្ពស់ទំនាក់ទំនងល្អជា ​មួយប្រទេសជិតខាង ​ដើម្បីសម្រេចចក្ខុវិស័យ​ប្រែក្លាយព្រំដែនទៅជាតំបន់សសន្តិភាព ស្ថិរភាព ​និងរីកចម្រើន ​ទន្ទឹមនឹងការបន្តពង្រឹង និង​ពង្រីកទំនាក់ទំនងជាមួយដៃគូយុទ្ធសាស្រ្តនានាទាំងក្នុង ​និងក្រៅតំបន់ជាដើម។នៅក្នុងកមុ្មវិធីនោះដែរនាយឧត្តមសេនីយ៍ ទៀ សីហា ក៏បានបញ្ជាក់ផងដែរថា ​រាជរដ្ឋាភិបាលនីតិ កាលទី៧ នៃរដ្ឋសភានេះ ​ក៏បានដាក់ចេញកម្មវិធីយុទ្ធសាស្រ្តបច្ចកោណដំណាក់កាលទី១ ក្នុងនោះវិស័យ ​ការបរទេសបានកំណត់ច្បាស់នូវគោលដៅយុទ្ធសាស្រ្ត គឺបន្តពង្រឹងអនុវត្ត​នយោបាយ​ការបរទេសឯករាជ្យ ​ផ្អែកលើច្បាប់ ​ក្នុងកិច្ចការពារ និងជំរុញបង្កើនផលប្រយោជន៍ស្នូល​របស់ជាតិ ការកសាងមិត្តភាព, កិច្ចស ហប្រតិបត្តិការប្រសើរជាមួយប្រទេសទាំងអស់នៅលើពិភព​លោក ​និងអង្គការអន្តរជាតិនានា ព្រមទាំងការ ​ចូលរួមយ៉ាងសកម្មចំពោះបុព្វហេតុសន្តិភាព ស្ថិរភាព សន្តិសុខ និងវិបុលភាពក្នុងតំបន់ ​និងសកលលោក ស្របតាមអភិក្រម«រក្សាចាស់ បង្កើតថ្មី»៕អត្ថបទ៖ បាន ចក់

អគ្គនាយកក្រុមហ៊ុនមីនីបៀជម្រាបជូនសម្ដេចតេជោ ពីលទ្ធភាពវិនិយោគថាមពលកកើតឡើងថ្មីនៅកម្ពុជា

2023/10/26 12:41:19 pm        424
Facebook Telegram Linkin
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ ព្រះមហាក្សត្រនៃព្រះរាជាណាចក្រកម្ពុជា នៅវិមាន ៧មករា ព្រឹកថ្ងៃទី២៦តុលា បានអនុញ្ញាតឲ្យ លោក យ៉ូស៊ីហ៊ីសា កនុម៉ា អគ្គនាយកក្រុមហ៊ុនមីនីបៀ ចូល ជួបសំដែងការគួរសម ដើម្បីរាយការណ៍ពីវឌ្ឍនភាពរបស់ករុមហ៊ុនមីនីបៀ នៅព្រះរាជាណាចក្រកម្ពុជា។សម្តេចតេជោ ហ៊ុន សែន បានសម្ដែងនូវការរីករាយចំពោះវឌ្ឍនភាពរបស់ក្រុមហ៊ុនមីនីបៀ ដែលបានបណ្តាក់ទុនវិនិយោគនៅកម្ពុជា ​មានការរីកចំរើនពីមួយអាណត្តិទៅមួយអាណត្តិ ពិសេសការបង្កើនភាពជាដៃគូវិនិយោគប្រកបដោយទំនុកចិត្ត នៅកម្ពុជា។ សម្តេចតេជោ បានស្នើឲ្យក្រុមហ៊ុនលើកឡើងពីវឌ្ឍនភាពរបស់ក្រុមហ៊ុន ក្នុងរយៈពេល១២ឆ្នាំកន្លងមក ដែលក្រុមហ៊ុនបានវិនិយោគនៅកម្ពុជា។ លោក យ៉ូស៊ីហ៊ីសា កនុម៉ា អគ្គនាយកក្រុមហ៊ុនមីនីបៀ មានប្រសាសន៍ថ្លែង នូវការគោរពកោតសរសើរចំពោះភាព​ជា​អ្នកដឹកនាំ​របស់សម្តេចតេជោ ហ៊ុន សែន ពិសេសទៅទៀតនោះ សម្តេចផ្ទាល់ ​គឺជាឆ្មបបង្កើតក្រុមហ៊ុនមីនី​បៀនៅកម្ពុជា ​ដែលរហូតមកដល់ពេលនេះមានរយៈពេល ១២ឆ្នាំមកហើយ។ លោក យ៉ូ ស៊ីហ៊ីសា កនុម៉ា ​បានរាយការណ៍ជូនសម្តេចតេជោដែរថា ក្នុងរយៈពេល ១២ ឆ្នាំកន្លងមកនេះ ក្រុមហ៊ុនបានផលិតនូវ ផលិតផលថ្មីជាច្រើនដើម្បីបម្រើឲ្យសក្តានុពលវិនិយោគ​នៅកម្ពុជា ក្នុងនោះផលិតផលអេឡិចត្រូនិច គឺជាផលិតផលថ្មី របស់ក្រុមហ៊ុនដែលត្រូវ​បានផលិត​ជាលើកដំបូងនៅកម្ពុជា ដើមបីធ្វើការនាំចេញទៅកាន់ទីផ្សារអន្តជាតិ។ លោកអគ្គនាយក ក៏បានជម្រាបជូនសម្ដេចតេជោអំពីលទ្ធភាពនៃការបង្កើតគម្រោងថ្មីសម្រាប់​ការវិនិយោគនៅកម្ពុជាក្នុងនោះរួមមានការវិនិយោគ​លើថាមពលកកើតឡើងថ្មី ដែលមិន​ធ្វើឲ្យប៉ះពាល់ដល់បម្រែបម្រួលអាកាសធាតុ។ លោកអគ្គនាយក ក្រុមហ៊ុនបានជំរាបជូនសម្ដេចតេជោដែរថា នៅក្នុងអាណត្តិទី៧ របស់រាជរដ្ឋាភិបាលកម្ពុជា ដែលដឹកនាំដោយសម្តេច មហាបវរធិបតី ហ៊ុន ម៉ាណែត ជានាយករដ្ឋមន្ត្រី ក្រុមហ៊ុនរបស់លោកនឹងកៀងគរដល់បណ្តាក្រុមហ៊ុនធំៗរបស់ជប៉ុន មកបណ្តាក់ទុន វិនិយោគនៅកម្ពុជាឲ្យកាន់តែមានសន្ទុះកើនឡើង ពិសេសការប្រមូលផ្ដុំប្រភពទុនលើការវិនិយោគអំពូ លភ្លើងឆ្លាតបំភ្លឺនៅតាមទីសាធារណៈ ដើម្បីធ្វើការនាំចេញទៅកាន់ទីផ្សារក្នុងតំបន់ និងអន្តរជាតិ៕

ទីក្រុងសេអ៊ូល សាកល្បងផែនការសុវត្ថិភាពហ្វូងមនុស្ស នៅមុនថ្ងៃគម្រប់ខួបឧបទ្ទវហេតុបុណ្យ Halloween

2023/10/26 11:55:00 am        364
Facebook Telegram Linkin
រដ្ឋាភិបាលទីក្រុងសេអ៊ូល បានធ្វើការហ្វឹកហ្វឺនត្រួតពិនិត្យហ្វូងមនុស្ស កាលពីថ្ងៃពុធ (២៥ តុលា) នៅមុនខួបមួយឆ្នាំ នៃឧបទ្ទវហេតុប៉ះទង្គិចគ្នាកាលពីពិធីបុណ្យ Halloween ឆ្នាំមុន ដោយបង្ហាញកម្មវិធីដែលគាំទ្រដោយប្រព័ន្ធបច្ចេកវិទ្យាប្រាជ្ញាសិប្បនិមិត្ត AI ដែលត្រូវបានរចនាឡើងដើម្បីស្វែងរក និងជូនដំណឹងអំពីលទ្ធភាពនៃចំនួនមនុស្សច្រើនលើសលប់នៅទីតាំងណាមួយ។ប្រព័ន្ធព្រមានជាមុនមួយនេះ នឹងចាប់ផ្តើមដំណើរការពីថ្ងៃទី៣១ ខែតុលា នៅថ្ងៃបុណ្យ Halloween ហើយនឹងមានកាមេរ៉ាសុវត្ថិភាព CCTV ចំនួន ៩០៩គ្រឿង នៅក្នុងទីតាំងសំខាន់ៗចំនួន ៧១កន្លែង ដែលនឹងវិភាគចលនាហ្វូងមនុស្ស និងដង់ស៊ីតេ ព្រមទាំងជូនដំណឹងដល់ក្រុមអាជ្ញាធរសម្រាប់សញ្ញាគ្រោះថ្នាក់ផ្សេងៗ។ការសាកល្បងប្រព័ន្ធការពារមួយនេះ ត្រូវបានធ្វើឡើងនៅផ្លូវតូចចង្អៀតនៃបារ និងភោជនីយដ្ឋានជាច្រើនក្នុងទីក្រុងសេអ៊ូល ដែលមានអ្នកស្ម័គ្រចិត្តចំនួន ១៥០នាក់ បានប្រមូលផ្តុំគ្នាចូលទៅក្នុងផ្ទៃដីទំហំ ៣០ម៉ែត្រក្រឡា ដែលត្រូវបានត្រួតពិនិត្យដោយបុគ្គលិកនៅក្នុងបន្ទប់បញ្ជាមួយ។កង្វះខាតទាំងស្រុងនៃការរៀបចំជាមុន វិធានការគ្រប់គ្រងហ្វូងមនុស្ស និងការអំពាវនាវជាដំបូងសម្រាប់ជំនួយដែលមិនមានការឆ្លើយតប ត្រូវបានស្តីបន្ទោសថាជាមូលហេតុចំពោះសោកនាដកម្មកាលពីមួយឆ្នាំមុន នៅក្នុងសង្កាត់កម្សាន្តពេលរាត្រី Itaewon របស់កូរ៉េខាងត្បូង ដែលកំណើននៃហ្វូងមនុស្ស នាំឱ្យមនុស្ស ១៥៩នាក់បានស្លាប់នៅក្នុងផ្លូវតូចចង្អៀតមួយនោះផងដែរ៕

រុស្ស៊ីប្តេជ្ញាជំរុញក្រុមហ៊ុនវិនិយោគឱ្យមកកម្ពុជាបន្ថែម ពិសេសផ្នែកឧស្សាហកម្មរថយន្ត និងគ្រឿងចក្រ

2023/10/26 11:44:59 am        425
Facebook Telegram Linkin
ភ្នំពេញ៖ រុស្ស៊ីប្តេជ្ញាចិត្តជំរុញក្រុមហ៊ុនវិនិយោគឱ្យមកកម្ពុជាបន្ថែមទៀត ជាពិសេសនៅក្នុងផ្នែកឧស្សាហកម្មរថយន្ត និងគ្រឿងចក្រ, គ្រឿងយន្តកសិកម្ម, បរិក្ខារសុខាភិបាល និងបច្ចេកវិទ្យាព័ត៌មាន ។ការបញ្ជាក់បែបនេះធ្វើឡើងតាមរយៈជំនួបពិភាក្សាការងាររវាង សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ជាមួយ ឯកឧត្តម Anatoly Borovik ឯកអគ្គរដ្ឋទូតសហព័ន្ធរុស្សីប្រចំាកម្ពុជា ចូលជួបសម្តែងការគួរសម និងពិភាក្សាការងារ នៅវិមានសន្តិភាព នាព្រឹកថ្ងៃទី២៦ ខែតុលា ឆ្នាំ២០២៣។ ក្នុងជំនួបនេះ ឯកឧត្តម Anatoly Borovik បានថ្លែងអំណរគុណ សម្តេចធិបតី ដែលបានចំណាយពេលវេលាដ៏មមាញឹកអនុញ្ញាតឱ្យរូបឯកឧត្តម និងសហការី ចូលជួបសម្តែងការគួរសម និងពិភាក្សាការងារ នាឱកាសនេះ។ ឯកឧត្តម ឯកអគ្គរដ្ឋទូត ក៏បានចូលរួមអបអរសាទរចំពោះ គណបក្សប្រជាជនកម្ពុជា ដែលទទួលបានការគាំទ្រដ៏លើសលប់ក្នុងការបោះឆ្នោតជ្រើសតាំងតំណាងរាស្ត្រ ឆ្នាំ២០២៣ និងចំពោះការចូលកាន់មុខតំណែងជា នាយករដ្ឋមន្រ្តី នៃព្រះរាជាណាចក្រកម្ពុជា របស់ សម្តេចធិបតី នៅក្នុងអាណត្តិទី៧ នេះ ដោយបានសម្តែងនូវការជឿជាក់ថា ចំណងមិត្តភាពរុស្សី-កម្ពុជា នឹងកាន់តែរីកចម្រើនរឹងមាំ បន្ថែមលើកិច្ចសហប្រតិបត្តិការល្អ ដែលមានស្រាប់ ក្នុងរយៈកាលនៃចំណងការទូតជាប្រវត្តិសាស្ត្រយូរលង់ប្រមាណ ៦៧ ឆ្នាំ កន្លងមកនេះ។ មួយវិញទៀត ឯកឧត្តម ឯកអគ្គរដ្ឋទូត ក៏បានថ្លែងអំណរគុណដល់កម្ពុជា ដែលបានដើរតួនាទីក្នុងនាមជាប្រទេសសម្របសម្រួលអាស៊ាន-រុស្សី ដើម្បីលើកស្ទួយទំនាក់ទំនងកិច្ចសន្ទនាអាស៊ាន-រុស្សី បន្ថែមមួយកម្រិតទៀត ។ជាការឆ្លើយតប សម្តេចធិបតី បានស្វាគមន៍ចំពោះវត្តមានរបស់ ឯកឧត្តម ឯកអគ្គរដ្ឋទូតរុស្ស៊ី ដែលជាឱកាសសម្រាប់ការពិភាក្សាអំពីទំនាក់ទំនងទ្វេភាគីកម្ពុជា-រុស្ស៊ី និងបានរំឭកអំពីកិច្ចសហប្រតិបត្តិការល្អរវាងប្រទេសទាំងពីរ តាំងពីអតីតកាលរហូតមកដល់បច្ចុប្បន្ន ជាពិសេសក្នុងដំណាក់កាលដែលកាលនោះជាអតីតសហភាពសូវៀត បានជួយឧបត្ថម្ភគាំទ្រកម្ពុជាលើការស្តារកសាងប្រទេសឡើងវិញ បន្ទាប់ពីការដួលរលំនៃរបប ប៉ុល ពត ព្រមជាមួយនឹងការបញ្ជាក់ថា គោលនយោបាយការបរទេសរបស់កម្ពុជា មិនមានការប្រែប្រួលឡើយ ជាពិសេសនៅក្នុងទំនាក់ទំនងទ្វេភាគីរវាងកម្ពុជា-រុស្ស៊ី ។ជារួម សម្តេចធិបតីនាយករដ្ឋមន្ត្រី និង ឯកឧត្តម ឯកអគ្គរដ្ឋទូត បានវាយតម្លៃខ្ពស់ចំពោះលទ្ធផលនៃទំនាក់ទំនងទ្វេភាគី ក្នុងរយៈកាលកន្លងមក ជាពិសេស ការផ្លាស់ប្តូរទស្សនកិច្ចថ្នាក់ដឹកនាំជាន់ខ្ពស់ ទាំងនៅក្នុងអង្គនីតិប្បញ្ញត្តិ និងអង្គនីតិប្រតិបត្តិ ហើយក៏គ្រោងនឹងមានការរៀបចំដំណើរទស្សនកិច្ចរបស់ប្រធានព្រឹទ្ធសភាកម្ពុជា ទៅកាន់សហព័ន្ធរុស្ស៊ី នៅក្រោយការបោះឆ្នោតព្រឹទ្ធសភាអាណត្តិថ្មីរួច ក៏ដូចជាការផ្លាស់ប្តូរក្នុងវិស័យការពារជាតិ និងសន្តិសុខ ដូចដែលឆ្លុះបញ្ចាំងតាមរយៈគម្រោងនៃការចូលចតនាវារុស្ស៊ី នៅខេត្តព្រះសីហនុ ក្នុងខែវិច្ឆិកា ឆ្នាំ២០២៣ ខាងមុខនេះ ជាដើម ។ ចំពោះកិច្ចសហប្រតិបត្តិការនៅក្នុងវិស័យពាណិជ្ជកម្ម និងវិនិយោគ, រុស្ស៊ីក៏បានបញ្ជាក់អំពីការប្តេជ្ញាចិត្តក្នុងការជំរុញក្រុមហ៊ុនវិនិយោគរុស្ស៊ី ឱ្យមកកម្ពុជាបន្ថែមទៀត ជាពិសេសនៅក្នុងផ្នែកឧស្សាហកម្មរថយន្ត និងគ្រឿងចក្រ, គ្រឿងយន្តកសិកម្ម, បរិក្ខារសុខាភិបាល និងបច្ចេកវិទ្យាព័ត៌មាន ។ ចំពោះទិសដៅទៅមុខ ក្រៅពីកិច្ចសហប្រតិបត្តិលើវិស័យដែលមានស្រាប់, កិច្ចពិភាក្សាក៏បានផ្តោតផងដែរលើការប្តេជ្ញាចិត្តរួមក្នុងការពង្រឹង និងពង្រីកបន្ថែមទៀតនូវកិច្ចសហប្រតិបត្តិការក្នុងវិស័យទេសចរណ៍ និងអប់រំ ក៏ដូចជាបញ្ហាផ្សេងៗមួយចំនួនទៀត ដែលជាផលប្រយោជន៍រួមសម្រាប់ប្រទេស និងប្រជាជន ទាំងពីរ ៕

បណ្ដាញសង្គម

ព័ត៌មានថ្មីៗ

សម្ដេចតេជោ ហ៊ុន សែន អញ្ជើញ​​ជួបសំណេះសំណាលជាមួយសមាជិក សមាជិកា ​ក្រុម​ប្រឹក្សា​ខេត្ត ក្រុង-ស្រុក ឃុំ-សង្កាត់ និងមន្ត្រី នៃមន្ទីរ-អង្គភាពនានា ក្នុងខេត្តកំពង់ស្ពឺ
05/02/2026 08:05 AM
Facebook Telegram Linkin
អ្នកស្រុករស់នៅទីក្រុងដាម៉ាសវាយតម្លៃផលប៉ះពាល់ ខណៈការចំណាយកើនឡើងដោយសារជម្លោះនៅមជ្ឈិមបូព៌ា
05/01/2026 08:05 PM
Facebook Telegram Linkin
សិស្សសាលាស៊ូដង់មិនបានចូលរៀនជាច្រើនឆ្នាំ ដោយសារសង្គ្រាម
05/01/2026 08:05 PM
Facebook Telegram Linkin
អ៊ីស្រាអែលនឹងដោះលែងអ្នកជាប់ឃុំប៉ាឡេស្ទីនដែលរងរបួសធ្ងន់
05/01/2026 08:05 PM
Facebook Telegram Linkin
ចំនួនមនុស្សស្លាប់ក្នុងឧបទ្ទេវហេតុលិចទូកនៅឥណ្ឌា កើនឡើងដល់ ៦នាក់
05/01/2026 08:05 PM
Facebook Telegram Linkin
អាមេរិកចាប់ផ្តើមឡើងវិញជើងហោះហើរដឹកអ្នកដំណើរទៅកាន់វេណេស៊ុយអេឡា ក្រោយផ្អាករយៈពេល ៧ឆ្នាំ
05/01/2026 08:05 PM
Facebook Telegram Linkin
លោក Trumpនិយាយថា លោកប្រហែលជាដកទាហានសហរដ្ឋអាមេរិកចេញពីអ៊ីតាលី និងអេស្ប៉ាញ
05/01/2026 08:05 PM
Facebook Telegram Linkin
ជំរំរដ្ឋ Texas ជាទីដែលទឹកជំនន់សម្លាប់មនុស្ស ២៨នាក់ ផ្អាកផែនការបើកឡើងវិញក្នុងរដូវក្តៅនេះ
05/01/2026 07:05 PM
Facebook Telegram Linkin
ជនសង្ស័យត្រូវបានឃាត់ខ្លួន ក្រោយមនុស្ស ៦នាក់ រងការចាក់ដោយកាំបិតនៅវិទ្យាល័យរដ្ឋវ៉ាស៊ីនតោន សហរដ្ឋអាមេរិក
05/01/2026 07:05 PM
Facebook Telegram Linkin
មនុស្សរាប់ពាន់នាក់នាំគ្នាតវ៉ាក្នុងទីក្រុងម៉ានីល នៅទិវាពលកម្មអន្តរជាតិ ដោយទាមទារដំឡើងប្រាក់ខែ និងបញ្ចប់ជម្លោះមជ្ឈិមបូព៌ា
05/01/2026 07:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.