នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ស្ពានមិត្តភាពកម្ពុជា-ចិន មេគង្គក្រចេះ នឹងបន្តបើកឱ្យឆ្លងកាត់រហូតដល់ថ្ងៃទី១ ខែតុលា ឆ្នាំ២០២៥ ដោយសារទឹកទន្លេបន្តហក់ឡើង និងដើម្បីជួយសម្រួលដល់ការធ្វើដំណើររបស់បងប្អូនប្រជាពលរដ្ឋ
គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%
សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាល​ដែលកំពុង​ធ្វើកិច្ច​ការងារ​យ៉ាង​សកម្ម​ស្វែង​រក​ដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

នយោបាយ​ និង ការអភិវឌ្ឍន៍

លោក Navalny ដែលជាសត្រូវរបស់លោក Putin រំពឹងថានឹងត្រូវជាប់ពន្ធនាគារជាច្រើនឆ្នាំទៀត

2023/08/04 12:36:17 pm        188
Facebook Telegram Linkin
រុស្ស៊ី៖ អ្នកនយោបាយប្រឆាំងរបស់រុស្ស៊ី លោក អាឡិច ណាវ៉ាល់នី (Alexei Navalny) រំពឹងថា តុលាការនឹងបន្តការកាត់ទោសឲ្យជាប់ពន្ធនាគារជិតពីរទសវត្សរ៍បន្ថែមទៀត នៅថ្ងៃសុក្រនេះ នៅក្នុងសំណុំរឿងព្រហ្មទណ្ឌ ដែលលោក និងក្រុមអ្នកគាំទ្ររបស់បាននិយាយថា ត្រូវបានបង្កើតឡើង ដើម្បីបន្តឃុំខ្លួនលោកនៅក្នុងពន្ធនាគារ និងក្រៅឆាកនយោបាយកាន់តែយូរ។  លោកNavalny វ័យ ៤៧ ឆ្នាំ ដែលជាអ្នករិះគន់ក្នុងស្រុកគ្មានសំចៃមាត់បំផុតលើលោក ប្រធានាធិបតី Vladimir Putin បានកំពុងជាប់ពន្ធនាគារសរុប ចំនួន១១ឆ្នាំកន្លះរួចទៅហើយពីបទក្លែងបន្លំ និងបទចោទប្រកាន់ផ្សេងទៀតដែលលោកនិយាយថាជារឿងក្លែងក្លាយផងដែរ។ ចលនានយោបាយរបស់លោកត្រូវបានគេដាក់ចេញក្រៅច្បាប់ និងបានប្រកាសថាជនជ្រុលនិយម។  ក្រុមរដ្ឋអាជ្ញាបានស្នើឲ្យតុលាការផ្តន្ទាទោសលើរូបលោកឲ្យជាប់ពន្ធនាគារចំនួន ២០ឆ្នាំ បន្ថែមទៀតនៅក្នុងពន្ធនាគារព្រហ្មទណ្ឌលើបទចោទប្រកាន់ព្រហ្មទណ្ឌចំនួន៦ដាច់ដោយឡែកពីគ្នា រួមទាំងការញុះញង់ និងផ្តល់ហិរញ្ញប្បទានដល់សកម្មភាពជ្រុលនិយម និងការបង្កើតអង្គការជ្រុលនិយម។  នៅក្នុងសារមួយដែលត្រូវបានបង្ហោះនៅលើប្រព័ន្ធផ្សព្វផ្សាយសង្គមកាលពីថ្ងៃព្រហស្បតិ៍ លោក Navalny បាននិយាយថា លទ្ធផលអាចតិចជាងបន្តិចគឺប្រហែល១៨ ឆ្នាំ ប៉ុន្តែគ្មានបញ្ហាអ្វីឡើយ ដោយសារតែលោកក៏ត្រូវបានគំរាមកំហែងជាប់ពាក់ព័ន្ធការចោទប្រកាន់អំពើភេរវកម្មដែលអាចបន្ថែមពេលវេលាមួយទសវត្សរ៍ទៀត។ លោកបាននិយាយថា គោលបំណង នេះ នឹងបំភ័យដល់ជនជាតិរុស្ស៊ី ប៉ុន្តែបានជំរុញពួកគេកុំឲ្យរឿងនោះកើតឡើង ហើយត្រូវគិតឲ្យបានល្អិតល្អន់អំពីរបៀបដែលល្អបំផុតដើម្បីទប់ទល់នឹងអ្វីដែលលោកហៅថា ជនទុច្ចរិត និងចោរ នៅក្នុងវិមានក្រឹមឡាំង៕

អាមេរិក៖ ប្រមុខការពារជាតិរុស៊ីធ្វើទស្សនកិច្ច នៅកូរ៉េខាងជើងស្វែងរកការគាំទ្រផ្នែកយោធា

2023/08/04 12:33:04 pm        159
Facebook Telegram Linkin
អាមេរិក៖ មន្ត្រីជាន់ខ្ពស់សេតវិមានបាននិយាយថា គោលបំណងនៃដំណើរទស្សនកិច្ចរបស់រដ្ឋមន្ត្រីការពារជាតិរុស្ស៊ី លោក Sergei Shoigu ទៅកាន់ប្រទេសកូរ៉េខាងជើងកាលពីខែមុនគឺត្រូវជំរុញឲ្យទីក្រុងព្យុងយ៉ាងលក់អាវុធទៅឲ្យទីក្រុងមូស្គូ។ លោក Shoigu បានដឹកនាំគណៈប្រតិភូរុស្ស៊ី ទៅកាន់ប្រទេសកូរ៉េខាងជើងដើម្បីប្រារព្ធខួបលើកទី៧០នៃបទឈប់បាញ់ក្នុងសង្គ្រាមកូរ៉េ។ លោកបានជួបសន្ទនាដាច់ដោយឡែកជាមួយសមភាគីកូរ៉េខាងជើងរបស់លោក លោក Kang Sun Nam និងមេដឹកនាំប្រទេសលោក Kim Jong Un។និយាយទៅកាន់អ្នកសារព័ត៌មាន នៅក្នុងទីក្រុងវ៉ាស៊ីនតោន កាលពីថ្ងៃព្រហស្បតិ៍ លោក John Kirby អ្នកនាំពាក្យក្រុមប្រឹក្សាសន្តិសុខជាតិរបស់សេតវិមាន បាននិយាយថារុស្ស៊ីកំពុងស្វែងរកការបង្កើនកិច្ចសហប្រតិបត្តិការយោធាជាមួយប្រទេសកូរ៉េខាងជើងតាមរយៈមធ្យោបាយបែបនេះ ខណៈទទួលបានគ្រាប់កាំភ្លើងធំពីទីក្រុងព្យុងយ៉ាង។ លោក Kirby និយាយថាអាមេរិក នៅតែមានការព្រួយបារម្ភថា ប្រទេសកូរ៉េខាងជើង បន្តសំឡឹងមើលការផ្តល់ការគាំទ្រផ្នែកយោធាដល់ប្រតិបត្តិការយោធារបស់រុស្ស៊ីទៅលើប្រទេសអ៊ុយក្រែន។  លោកនិយាយថា កិច្ចព្រមព្រៀងអាវុធណាមួយ រវាងប្រទេសកូរ៉េខាងជើង និងរុស្ស៊ី នឹងបំពានដោយផ្ទាល់លើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិជាបន្តបន្ទាប់។ លោក Kirby និយាយថា ជាលទ្ធផលដែលរងផលប៉ះពាល់ដោយទណ្ឌកម្ម និងការគ្រប់គ្រងការនាំចេញ ដែលត្រូវបានដាក់ដោយប្រទេសលោកខាងលិច ប្រទេសរុស្ស៊ីកំពុងងាកទៅរកប្រទេសនានាដូចជាប្រទេសកូរ៉េខាងជើង និងប្រទេសអ៊ីរ៉ង់ ដើម្បីទទួលបានការគាំទ្រសម្រាប់សង្គ្រាម។  លោកនិយាយថា សហរដ្ឋអាមេរិក នឹងបន្តកំណត់អត្តសញ្ញាណ លាតត្រដាង និងប្រឆាំងកិច្ចប្រឹងប្រែងរបស់រុស្ស៊ីក្នុងការទទួលបានគ្រាប់រំសេវពីប្រទេសកូរ៉េខាងជើង និងរដ្ឋដ៏ទៃទៀត ដែលអាចត្រូវបានត្រៀមគាំទ្រសង្រ្គាមរបស់ខ្លួននៅអ៊ុយក្រែន៕

ក្រុមហ៊ុន Amazon ព្យាករថា ប្រាក់ចំណូល នៅត្រីមាសទី៣ លើសពីការរំពឹងទុក

2023/08/04 12:26:55 pm        175
Facebook Telegram Linkin
អាមេរិក៖ ក្រុមហ៊ុនពាណិជ្ជកម្មតាមប្រព័ន្ធអេឡិកត្រូនិក Amazon.com ព្យាករណ៍ពីប្រាក់ចំណូលត្រីមាសទី៣ ថា លើសពីការរំពឹងទុករបស់ផ្សារហ៊ុន Wall Street កាលថ្ងៃព្រហស្បតិ៍ (ទី៣ ខែសីហា) ដោយចំណូលនេះ ត្រូវបានជំរុញដោយការលក់ក្នុងព្រឹត្តិការណ៍ Prime Day ដ៏ធំបំផុតរបស់ខ្លួន ក្នុងខែកក្កដា ដែលបានទាក់ទាញអ្នកប្រើប្រាស់ ដែលដឹងពីតម្លៃចូលទៅកាន់វេទិកាពាណិជ្ជកម្មអេឡិចត្រូនិករបស់ខ្លួន។ការលក់បញ្ចុះតម្លៃលើមុខទំនិញនានា និងកូដកិច្ចព្រមព្រៀងលើកដំបូងលើសេវាកម្ម ដូចជាការកក់សណ្ឋាគារ បានជំរុញឲ្យការលក់អនឡាញរបស់សហរដ្ឋអាមេរិក កើនឡើង ៦,១ភាគរយ គឺកើនដល់កំណត់ត្រា ១២,៧ពាន់លានដុល្លារ អំឡុងព្រឹត្តិការណ៍ទិញទំនិញរបស់ក្រុមហ៊ុន Amazon នេះ ខណៈជនជាតិអាមេរិក ដែលរងគ្រោះដោយអតិផរណា ប្រញាប់ប្រញាល់ចាប់យកឱកាសទិញទំនិញបន្ថែមទៀត។សមាជិក Prime ជិត ២០០លាននាក់របស់ក្រុមហ៊ុន Amazon សន្សំបានជាង ២,៥ពាន់លានដុល្លារ លើមុខទំនិញប្រហែល ៣៧៥លាន ដែលត្រូវបានលក់ ក្នុងអំឡុងពេលព្រឹត្តិការណ៍រយៈពេល ២ថ្ងៃ។ អ្នកវិភាគរំពឹងថា ដើម្បីបង្កើនប្រាក់ចំណូលពីការផ្សាយពាណិជ្ជកម្ម និងសេវាកម្មអាជីវករដែរ នៅពេលដែលពាណិជ្ជករភាគីទី៣ ចុះឈ្មោះកាន់តែច្រើន។ក្រុមហ៊ុនបានព្យាករពីការលក់សុទ្ធ ក្នុងត្រីមាសបច្ចុប្បន្ន ចន្លោះ ១៣៨ពាន់លានដុល្លារ និង ១៤៣ពាន់លានដុល្លារ។ អ្នកវិភាគដែលត្រូវបានស្ទង់មតិដោយក្រុមហ៊ុន Refinitiv រំពឹងថា ប្រាក់ចំណូលមានចំនួន ១៣៨,២៥ពាន់លានដុល្លារ៕

សាលារៀន ព្រះវិហារ និងយានយន្តត្រូវបានឆេះបំផ្លាញក្នុងការវាយប្រហារលួចដុត នៅឈីលី

2023/08/04 12:23:17 pm        154
Facebook Telegram Linkin
ឈីលី៖ អគារថែទាំសុខភាពបឋម ព្រះវិហារ សាលារៀន មជ្ឈមណ្ឌលសហគមន៍មួយ និងយានយន្តជាច្រើនគ្រឿង ត្រូវបានឆេះបំផ្លាញនៅក្នុងការវាយប្រហារដោយចេតនាលួចដុតនៅក្នុងតំបន់ Araucania (អារ៉ូកានី) ដែលស្ថិតនៅដាច់ស្រយាលរបស់ប្រទេសឈីលី។យោងតាមប្រព័ន្ធផ្សព្វផ្សាយក្នុងតំបន់បានឲ្យដឹងថាអ្នកវាយប្រហារបានបន្សល់ទុកសារមួយនៅកន្លែងកើតហេតុ មុនពេលភៀសខ្លួនចេញពីតំបន់ ក្នុងពេលការបាញ់កាំភ្លើង។ គ្រូពេទ្យសង្គ្រោះបឋមម្នាក់ បានរងការរលាកស្រាល បន្ទាប់ពីលោកបានព្យាយាមពន្លត់អគ្គិភ័យ។ តំបន់ Araucania ខេត្តBiobio និងខេត្តArauco នៅក្នុងតំបន់ Biobio ស្ថិតនៅក្រោមច្បាប់រដ្ឋក្នុងគ្រាអាសន្នរយៈពេលជាង១ឆ្នាំមកនេះ។ នេះត្រូវបានរង្គោះរង្គើជាយូរមកហើយដោយការបញ្ឆេះជម្លោះរវាងជនជាតិដើមភាគតិច Mapuche(ម៉ាពូឆេ) និងរដ្ឋាភិបាលប្រទេសឈីលី។ជនជាតិដើមភាគតិច Mapuche ប្រមាណ ១,៧ លាននាក់រស់នៅក្នុងប្រទេសឈីលី ភាគច្រើននៅក្នុងតំបន់ Araucania ជាតំបន់ព្រៃភ្នំភ្លើងដែលគ្របដណ្តប់ដោយព្រិល មានចម្ងាយ ៤០០ ម៉ាយ ភាគខាងត្បូងទីក្រុង Santiago របស់ប្រទេស។ តំបន់នេះមានអត្រានៃភាពក្រីក្រខ្ពស់ខ្លាំង។ សកម្មជនជនជាតិដើមភាគតិចនិយាយថា ដែនដីរបស់ពួកគេត្រូវបានគំរាមកំហែងកាន់តែខ្លាំងឡើងដោយវិស័យកសិកម្ម ព្រៃឈើ និងឧស្សាហកម្មផ្សេងទៀត និងបានបន្ទោសរដ្ឋចំពោះការមិនបានគាំទ្រសិទ្ធិជាប្រវត្តិសាស្ត្ររបស់ពួកគេ។

អ្នកគាំទ្រយោធាប្រទេសនីហ្សេ តវ៉ាចំពោះការដាក់ទណ្ឌកម្ម

2023/08/04 12:19:13 pm        165
Facebook Telegram Linkin
នីហ្សេ៖ ក្រុមអ្នកគាំទ្រយោធាប្រទេសនីហ្សេរាប់រយនាក់ បានប្រមូលផ្តុំគ្នានៅក្នុងរដ្ឋធានី Niamey កាលពីថ្ងៃព្រហស្បតិ៍អរបអរសម្រាប់យោធា និងតវ៉ាប្រឆាំងការដាក់ទណ្ឌកម្មរបស់អាហ្វ្រិកខាងលិច។ ស្ត្រីម្នាក់និយាយថា ពលរដ្ឋនីហ្សេ មានសេរីភាពនៅថ្ងៃនេះ ជាថ្ងៃមួយដែលលោកស្រីនិយាយថាលោកស្រីមិនដែលឃើញនោះទេ។ ក្រុមអ្នកតវ៉ាមួយចំនួនទៀត បានរិះគន់ទណ្ឌកម្មដែលបានដាក់ដោយសហគមន៍សេដ្ឋកិច្ចនៃបណ្តារដ្ឋអាហ្វ្រិកខាងលិច ឬ ECOWAS។ ទណ្ឌកម្មត្រូវបានប្រកាសបន្ទាប់ពីប្រធានាធិបតី លោក Mohamed Bazoum ត្រូវបានផ្តួលរំលំកាលពីសប្តាហ៍មុន។ ឧត្តមសេនីយ៍ លោក Abdourahamane Tiani អតីតប្រធានកងអង្គរក្សប្រធានាធិបតីរបស់ប្រទេសនីហ្សេ ចាប់តាំងពីពេលនោះមកបានប្រកាសខ្លួនឯងជាប្រមុខរដ្ឋ។ ប្រមុខការពារជាតិប្រចាំតំបន់ កំពុងពិភាក្សាគ្នាអំពីការធ្វើអន្តរាគមន៍ដែលអាចកើតមានដើម្បីស្តារលទ្ធិប្រជាធិបតេយ្យឡើងវិញ។ នេះគឺជារដ្ឋប្រហារលើកទី៧ នៅប្រទេសអាហ្វ្រិកភាគកណ្តាលនិងភាគខាងលិច ចាប់តាំងពីឆ្នាំ២០២០ ហើយក្រោយមកកាលពីពេលថ្មីៗមានការដណ្តើមអំណាចដោយយោធានៅក្នុងប្រទេសម៉ាលី បួរគីណាហ្វាសូ និងប្រទេសហ្គីណេ។ សហគមន៍សេដ្ឋកិច្ចនៃរដ្ឋអាហ្វ្រិកខាងលិច និយាយថា រដ្ឋប្រហារនឹងលែងត្រូវបានអត់ឱនទៀតហើយនៅក្នុងតំបន់នេះ ហើយខ្លួនអាចអនុញ្ញាតឲ្យមានការប្រើប្រាស់កងកម្លាំងប្រសិនបើទាហានមិនឲ្យលោក Bazoum ចូលកាន់អំណាចវិញនោះទេនៅត្រឹមថ្ងៃអាទិត្យ។ ឧបទ្ទវហេតុហិង្សា នៅក្នុងប្រទេសនីហ្សេ បានធ្លាក់ចុះជិត៤០ភាគរយ នៅក្នុងឆមាសដំបូងនៃឆ្នាំ២០២៣ បើប្រៀបធៀបទៅនឹងឆ្នាំកន្លងទៅ៕

សិស្សសាលា ទាមទារឲ្យមានការដោះលែង គិលានុបដ្ឋាក ដែលត្រូវបានចាប់ជំរិតនៅហៃទី

2023/08/04 12:08:10 pm        133
Facebook Telegram Linkin
ហៃទី៖ សិស្សសាលា ឪពុកម្តាយ និងគ្រូបង្រៀន បានទាមទារឲ្យមានការដោះលែងគិលានុបដ្ឋាក លោកស្រី Alix Dorsainvil កាលពីថ្ងៃព្រហស្បតិ៍។ លោកស្រី Dorsainvil ដែលបានរៀបអាពាហ៍ពិពាហ៍ជាមួយនាយកអង្គការជំនួយមនុស្សធម៌ផ្អែកលើជំនឿ El Roi Haiti ត្រូវបានចាប់ជំរិតរួមជាមួយកូនរបស់នាង នៅក្នុងទីក្រុងព័រអូប្រាំង កាលពីថ្ងៃទី២៧ ខែកក្កដា។ នៅបរិវេណអង្គការ El Roi ជាទីដែលលោកស្រី Dorsainvil ត្រូវបានចាប់ជំរិត សមាជិកជាច្រើនរបស់សាលាអង្គការ បានទាមទារឲ្យមានការដោះលែងលោកស្រី ដែលបានរំលឹកឡើងវិញពីការងារដ៏ល្អដែលលោកស្រីបានធ្វើនៅក្នុងសហគមន៍។ គេព្រួយបារម្ភថា ការចាប់ជំរិតនឹងបណ្តាលឲ្យសាលារៀនត្រូវបិទទ្វារ ខណៈមនុស្សជាច្រើនទទួលបានអាហារ ការថែទាំផ្នែកវេជ្ជសាស្ត្រ និងការគាំទ្រដ៍ទៃទៀតតាមរយៈអង្គការ El Roi។  សេតវិមានបាននិយាយកាលពីថ្ងៃអង្គារថា ប្រធានាធិបតីលោក Joe Biden បានសង្ខេបខ្លីលើករណីនេះថាទីក្រុងវ៉ាស៊ីនតោនកំពុងធ្វើការដើម្បីជំរុញឲ្យមានការដោះលែង៕

រលកកម្ដៅដ៏ខ្លាំងបានជំរុញឱ្យអឺរ៉ុបបញ្ជាទិញម៉ាស៊ីនត្រជាក់ជាច្រើន

2023/08/04 12:05:03 pm        174
Facebook Telegram Linkin
អឺរ៉ុប៖ រលកកម្ដៅដែលហក់ឡើងក្នុងរង្វង់៤០អង្សាសេនៅអឺរ៉ុប កំពុងជំរុញការលក់ម៉ាស៊ីនត្រជាក់ ជាផលិតផលដែលប្រជាជនអឺរ៉ុបជាច្រើនមិនមាន ឬកម្រប្រើក្នុងរដូវក្តៅ។ យោងតាមសារព័ត៌មាន AP កាលពីថ្ងៃពុធបានឲ្យដឹងថា សីតុណ្ហភាពខ្ពស់មិនធម្មតាជាច្រើនឆ្នាំបានផ្លាស់ប្តូរម៉ាស៊ីនត្រជាក់ពីការបំពាក់ដើម្បីប្រណីតភាព ទៅជាតម្រូវការចាំបាច់នៅក្នុងផ្នែកជាច្រើននៃទ្វីបអឺរ៉ុប។សូម្បីតែនៅប្រទេសបារាំង ជាទីដែលផ្ទះសម្បែង និងអគារលំនៅឋានភាគច្រើនមិនមានបំពាក់ម៉ាស៊ីនត្រជាក់ទាល់តែសោះនោះ ត្រូវបានគេមើលឃើញថា ម៉ាស៊ីនត្រជាក់ចំនួន១លានគ្រឿងត្រូវបានលក់កាលពីឆ្នាំមុន។ ក្រុមអ្នកស្រាវជ្រាវមកពីសាកលវិទ្យាល័យ Ca' Foscari របស់ប្រទេសអ៊ីតាលីបានព្យាករណ៍ថា អត្រាជ្រៀតចូលម៉ាស៊ីនត្រជាក់តាមផ្ទះរបស់អេស្ប៉ាញនឹងឡើងដល់ ៥០% នៅឆ្នាំ២០៤០ ដោយកើនឡើងពីចំនួន ៥% កាលពីឆ្នាំ១៩៩០។ដោយសារអាកាសធាតុធ្លាប់តែត្រជាក់ សូម្បីតែក្នុងរដូវក្តៅក៏ដោយ ក៏ភោជនីយដ្ឋាន និងរោងកុនជាច្រើននៅក្នុងបណ្តាប្រទេសអឺរ៉ុបខាងលិចទំនងជាមិនសូវបើកម៉ាស៊ីនត្រជាក់ទេ។ លើសពីនេះ តម្លៃអគ្គិសនីគឺខ្ពស់ជាងនៅសហរដ្ឋអាមេរិក ហើយមនុស្សជាច្រើនចំណាយពេលវិស្សមកាលយូរនៅរដូវក្តៅ ដោយកាត់បន្ថយតម្រូវការម៉ាស៊ីនត្រជាក់។បណ្តាប្រទេសនៅអ៊ឺរ៉ុប រួមទាំងប្រទេសអេស្បាញ ជាប្រពៃណីបានយកឈ្នះលើអាកាសធាតុក្ដៅដោយការសម្រាកមិនចេញទៅណា ក្នុងអំឡុងរយៈពេលក្តៅបំផុត។ ទោះជាយ៉ាងណាក៏ដោយ រលកកម្ដៅដ៏អាក្រក់បំផុតក្នុងរដូវក្តៅនេះ បានបង្ហាញថា វិធីសាស្រ្តទប់ទល់កម្ដៅទាំងនោះមិនមានប្រសិទ្ធភាពនោះទេ៕

រាជរដ្ឋាភិបាលសម្រេចបង្កើតតំបន់បេតិកភណ្ឌធម្មជាតិ វប្បធម៌ប្រវត្តិសាស្ត្រ «នគរភ្នំឈើកាច់បាភ្នំ»

2023/08/04 12:03:04 pm        1419
Facebook Telegram Linkin
ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃកម្ពុជា នៅថ្ងៃទី ៣ ខែសីហា ឆ្នាំ ២០២៣នេះ បានចេញអនុក្រឹត្យ បង្កើតតំបន់បេតិកភណ្ឌធម្មជាតិ វប្បធម៌ប្រវត្តិសាស្ត្រ «នគរភ្នំឈើកាច់បាភ្នំ»។ យោងតាមអនុក្រឹត្យ ការបង្កើតតំបន់បេតិកភណ្ឌធម្មជាតិ នគរភ្នំឈើកាច់បាភ្នំនេះ លើផ្ទៃដីទំហំសរុប ១២៥,២៧៧៥ ហិកតា (មួយរយម្ភៃប្រាំហិកតាម្ភៃប្រាំពីរអាចិតសិបប្រាំសង់ទីអា) និងកំណត់ទីតាំងបេតិកភណ្ឌវប្បធម៌ ប្រវត្តិសាស្ត្រក្នុងតំបន់បេតិកភណ្ឌធម្មជាតិ នគរភ្នំឈើកាច់បាភ្នំ ដែលមានចំនួន ៩ ទីតាំងស្ថិតក្នុងភូមិសាស្ត ឃុំជើងភ្នំ ឃុំឈើកាច់ និងឃុំរោងដំរី ស្រុកបាភ្នំ ខេត្តព្រៃវែង។ ទីតាំង ៩កន្លែងនៃ តំបន់បេតិកភណ្ឌធម្មជាតិ វប្បធម៌ប្រវត្តិសាស្ត្រ «នគរភ្នំឈើកាច់បាភ្នំ» នេះ មានឈ្មោះនិងទំហំផ្ទៃដី ដូចជា ទី១- ភ្នំបាភ្នំ មានផ្ទៃដីទំហំ ១០១,៤១១៩ហិកតា (មួយរយមួយហិកតាសែសិបមួយអាដប់ប្រាំបួន សង់ទីអា)។ ២- ប្រាសាទអង្គច័ន្ទ មានផ្ទៃដីទំហំ០,៦៣៨៥ហិកតា(ហុកសិបបីអាប៉ែតសិបប្រាំសង់ទីអា)។ ៣- វត្តវិហារគុហ៍ មានផ្ទៃដីទំហំ១,៣៦៤២ហិកតា(មួយហិកតាសាមសិបប្រាំមួយអាសសិបពីរ សង់ទីអា)។ ៤- វត្តវិហារធំ មានផ្ទៃដីទំហំ៣,១៤៥១ហិកតា(បើហិកតាដប់បួនអាហាសិបមួយសង់ទីអា)។ ៥- ស្រះបិទបាយ មានផ្ទៃដីទំហំ៨,០៦០៧ហិកតា(ប្រាំបីហិកតាប្រាំមួយអាប្រាំពីរសង់ទីអា)។ ៦- អ្នកតាមេសរ មានផ្ទៃដីទំហំ០,៧៨១២ហិកតា(ចិតសិបប្រាំបីអាដប់ពីរសង់ទីអា)។ ៧- ស្រះស្រង់ មានផ្ទៃដីទំហំ១,៥៨១៦ហិកតា(មួយហិកតាហាសិបប្រាំបីអាដប់ប្រាំមួយសង់ទីអា)។ ៨- ភ្នំវត្តកំពូលភ្នំឈើកាច់ មានផ្ទៃដីទំហំ២,៥២៦៤ហិកតា(ពីរហិកតាហាសិបពីរអាហុកសិបបួន សង់ទីអា)។ ៩- មណ្ឌលមុនីស្ថានតាបសភ្នំតូច មានផ្ទៃដីទំហំ៥,៧៦៧៩ហិកតា(ប្រាំហិកតាចិតសិបប្រាំមួយអា ចិតសិបប្រាំបួនសង់ទីអា)។

អ្នកស្រុក ប៉ះទង្គិចជាមួយកងកម្លាំងសន្តិសុខនៅក្នុងរដ្ឋម៉ានីពួរ ដែលរងគ្រោះដោយអំពើហិង្សាក្នុងប្រទេសឥណ្ឌា

2023/08/04 12:02:31 pm        158
Facebook Telegram Linkin
ឥណ្ឌា៖ ក្រុមអ្នកស្រុកជាពិសេសស្ត្រីមកពីសហគមន៍ជនជាតិភាគតិច ម៉ីតី បានប៉ះទង្គិចជាមួយកងកម្លាំងសន្តិសុខនៅក្នុងស្រុក Bishnupur នៃរដ្ឋម៉ានីពួរ ប្រទេសឥណ្ឌាកាលពីថ្ងៃព្រហស្បតិ៍ (៣ សីហា) ។កងកម្លាំងសន្តិសុខបានប្រើការបាញ់ផ្លោងបំពង់ឧស្ម័នបង្ហូរទឹកភ្នែកដើម្បីបំបែកហ្វូងមនុស្ស ខណៈដែលពួកគេត្រូវបានគេរាយការណ៍ថា បានព្យាយាមចូលទៅក្នុងកន្លែងមួយដែលកុលសម្ព័ន្ធ គូគី រៀបចំពិធីបុណ្យសពដ៏ធំមួយ សម្រាប់ជនរងគ្រោះនៃការប៉ះទង្គិចគ្នារវាងជនជាតិភាគតិច។ នៅព្រឹកថ្ងៃដដែលនោះ តុលាការក្នុងរដ្ឋបានបញ្ជាឱ្យពន្យារពេលការបញ្ចុះសពទៅរយៈពេលប្រាំពីរថ្ងៃបន្ទាប់។ទន្ទឹមនឹងនេះដែរ យោងតាមរបាយការណ៍ មនុស្សយ៉ាងហោចណាស់១៧នាក់បានរងរបួសនៅក្នុងការប៉ះទង្គិចគ្នា ហើយការបន្ធូរបន្ថយបម្រាមគោចរត្រូវបានដកចេញពីផ្នែកខ្លះនៃរដ្ឋបន្ទាប់ពីព្រឹត្តិការណ៍នេះ។ រដ្ឋនេះបានក្លាយជានិមិត្តរូបនៃជម្លោះនិកាយដ៏សាហាវរវាងសហគមន៍ជនជាតិភាគតិច ម៉ីតី កុលសម្ព័ន្ធ គូគី ដែលបានសម្លាប់មនុស្សជាង១៨០នាក់ចាប់តាំងពីខែឧសភាមក៕

ក្រុមអ្នកតវ៉ាអាកាសធាតុ បានគ្របក្រណាត់ខ្មៅលើគេហដ្ឋានឯកជនរបស់នាយករដ្ឋមន្ត្រីអង់គ្លេស

2023/08/04 11:58:02 am        155
Facebook Telegram Linkin
អង់គ្លេស៖ ក្រុមយុទ្ធនាការបរិស្ថានបាននិយាយកាលពីថ្ងៃព្រហស្បតិ៍ (៣ សីហា)ថា ក្រុមអ្នកតវ៉ាអាកាសធាតុ បានយកផ្ទាំងក្រណាត់ពណ៌ខ្មៅដ៏ធំ ទៅគ្របពីលើគេហដ្ឋានឯកជនរបស់នាយករដ្ឋមន្ត្រីអង់គ្លេសលោក Rishi Sunak ដើម្បីតវ៉ាប្រឆាំងនឹងគោលនយោបាយថាមពលរបស់រដ្ឋាភិបាលរបស់លោក។វីដេអូដែលបង្ហោះដោយក្រុមបរិស្ថានចក្រភពអង់គ្លេស បានបង្ហាញក្រុមបាតុករឡើងទៅលើគេហដ្ឋាននោះ ដោយគ្របវាដោយក្រណាត់ខ្មៅ ខណៈមនុស្សពីរនាក់ទៀតកាន់បដាដែលសរសេរថា «តើលោក RISHI SUNAK ជ្រើសរើសយកចំណូលពីការជួញដូរប្រេង ឬក៏គិតពីអនាគតបរិស្ថានរបស់ប្រទេស?»។ការិយាល័យរបស់លោក Sunak មិនមានការអត្ថាធិប្បាយភ្លាមៗចំពោះបញ្ហានេះទេ។ ចក្រភពអង់គ្លេសបានអនុម័តគោលដៅនៃការឈានដល់ការបំភាយឧស្ម័នកាបូនសុទ្ធស្មើសូន្យនៅឆ្នាំ២០៥០ ក្រោមការដឹកនាំរបស់អតីតនាយករដ្ឋមន្ត្រីអង់គ្លេសលោកស្រី Theresa May ក្នុងឆ្នាំ២០១៩ ហើយបានបង្កើនល្បឿនក្នុងការកសាងសមត្ថភាពថាមពលកកើតឡើងវិញរបស់ខ្លួន។ ប៉ុន្តែក្រុមអ្នកធ្វើយុទ្ធនាការបរិស្ថានបានរិះគន់កំណត់ត្រាបំភាយឧស្ម័នកាបូនសុទ្ធរបស់រដ្ឋាភិបាលក្នុងប៉ុន្មានឆ្នាំថ្មីៗនេះ៕

បណ្ដាញសង្គម

ព័ត៌មានថ្មីៗ

អ្នកនាំពាក្យក្រសួងព័ត៌មាន៖ បច្ចេកវិទ្យាAI អាចជួយការងារព័ត៌មានបានច្រើន ប៉ុន្តែត្រូវផ្ទៀងផ្ទាត់ខ្លឹមសារមុនប្រើប្រាស់
10/08/2025 04:10 PM
Facebook Telegram Linkin
អ្នកនាំពាក្យក្រសួងការងារ រំលឹកពីវិធានការសំខាន់ៗ១១ចំណុច ដើម្បីជួយបងប្អូនពលករ​ខ្មែរ​ដែល​ទើប​ត្រឡប់មកពីប្រទេសថៃឱ្យមានការងារធ្វើ និងគាំពារពលករ
10/08/2025 04:10 PM
Facebook Telegram Linkin
លោកស្រី Von der Leyen ៖ អឺរ៉ុបត្រូវការឆ្លើយតបទូលំទូលាយចំពោះការគំរាមកំហែងសង្រ្គាមកូនកាត់
10/08/2025 04:10 PM
Facebook Telegram Linkin
លោក Kim Jong Un ជួបប្រធានាធិបតីឡាវ មុនខួប ៨០ឆ្នាំនៃគណបក្សកាន់អំណាចកូរ៉េខាងជើង
10/08/2025 04:10 PM
Facebook Telegram Linkin
យោធភូមិភាគទី៤ កម្ពុជា ចេញលិខិតអញ្ជើញ កងទ័ពភូមិភាគទី២ ថៃ ចូលរួមកិច្ចប្រជុំពិភាក្សា នៅថ្ងៃទី១០ ខែតុលា
10/08/2025 04:10 PM
Facebook Telegram Linkin
ទឹកជំនន់ធំបំផុត កើតមាននៅទីក្រុងរបស់វៀតណាម ដោយមនុស្ស ៨នាក់ស្លាប់ នៅភាគខាងជើង
10/08/2025 04:10 PM
Facebook Telegram Linkin
ស្លាប់ ៦នាក់ និងរបួសធ្ងន់ស្រាល ១០នាក់ ក្នុងគ្រោះថ្នាក់ចរាចរណ៍ទូទាំងប្រទេស គិតត្រឹមម៉ោង ២រសៀលថ្ងៃនេះ
10/08/2025 04:10 PM
Facebook Telegram Linkin
និស្សិតខ្មែរទៅ​សិក្សានៅចិនថា នេះជាឱកាសដ៏ល្អក្នុងការប្រាប់បរទេសពីសក្ដានុពលរបស់ខ្មែរ ទាំងវប្បធម៌ អរិយធម៌ តំបន់ទេសចរណ៍ ជាពិសេសប្រាសាទ​​បុរាណ​របស់​ខ្មែរ​
10/08/2025 03:10 PM
Facebook Telegram Linkin
នាយករដ្ឋមន្ត្រីអ៊ីតាលី បញ្ជាក់ថា ត្រូវបានចោទពីបទសមគំនិត ក្នុងអំពើប្រល័យពូជសាសន៍ នៅ ICC
10/08/2025 03:10 PM
Facebook Telegram Linkin
រុស្ស៊ីស្វាគមន៍គណៈប្រតិភូតាលីបង់ និងព្រមានប្រឆាំងនឹងវត្តមានយោធាបរទេស នៅអាហ្វហ្គានីស្ថាន
10/08/2025 03:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.