BTV NEWS

ឯកឧត្តម ប៉េង ពោធិ៍នា៖ «យើងត្រូវរួបរួមគ្នាជាធ្លុងមួយទប់ស្កាត់ និងបំផ្លាញមហិច្ឆតានយោបាយរបស់ក្រុមជ្រុលនិយមមួយក្តាប់តូច ដែលតែងតែបញ្ឆេះកំហឹងជាតិសាសន៍»

គណបក្សប្រជាជនខេត្តកំពង់ឆ្នាំង ប្រារព្ធពិធីអបអខួបអនុស្សាវរីយ៍លើកទី៧៤ថ្ងៃបង្កើតគណបក្ស

គណបក្សប្រជាជនកម្ពុជាជាកម្លាំងនយោបាយតែមួយគត់រួមសុខរួមទុក្ខជាមួយប្រជាជនគ្រប់កាលៈទេសៈ

គណបក្សប្រជាជនកម្ពុជារាជធានីភ្នំពេញ ប្រកាសបញ្ចូលសមាជិកសមាជិកាគណបក្សប្រជាជនកម្ពុជា ៥៧៧នាក់ ដែលជាអតីតសកម្មជនមកពីគណបក្សប្រឆាំង

នយោបាយ និង ការអភិវឌ្ឍន៍

មនី្ទរសុខាភិបាលភ្នំពេញ ស្នើពលរដ្ឋរៀនរស់តាមបែបគន្លងថ្មី ដោយអនុវត្តវិធានការពារឱ្យបានល្អ

ភ្នំពេញ៖ លោកវេជ្ជបណ្ឌិត ងី មានហេង ប្រធានមនី្ទរសុខាភិបាល រាជធានីភ្នំពេញ តាមរយៈ BTV ព័ត៌មាន នាព្រឹកថ្ងៃទី១៧ ខែកុម្ភៈ ឆ្នាំ២០២២នេះ បានស្នើដល់បងប្អូនប្រជាពលរដ្ឋរៀនរស់ តាម បែបគន្លងថ្មី ដោយអនុវត្តវិធានការសុខាភិបាលឲ្យបានល្អ ៣កុំ ៣ការពារ រៀនធ្វើតេស្តរហ័សរកកូវីដ-១៩ ដោយខ្លួនឯង និងចាក់វ៉ាក់សាំងដូសជម្រុញឲ្យបានគ្រប់ៗគ្នា។លោកវេជ្ជបណ្ឌិត ងី មានហេង បានឲ្យដឹងទៀតថា ស្របពេលដែលជំងឺកូវីដ-១៩ កំពុងរីករាលដាលក្នុងសហគមន៍ ជាពិសេសវីរុសកូវីដ១៩ បំប្លែងថ្មី ប្រភេទអូមីក្រុង (Omicron) វិធានការដែលប្រជាពលរដ្ឋគ្រប់រូប ត្រូវចូលរួមអនុវត្ត ដើម្បីទប់ស្កាត់ការចម្លងគឺនៅដដែល ៣កុំ ៣ការពារ។ និយាយដោយឡែកក្នុងមូលដ្ឋានរាជធានីភ្នំពេញ គិតត្រឹមព្រឹកនេះ មានអ្នកឆ្លងមេរោគកូវីដ-១៩ និងកំពុងសម្រាកព្យាបាលនៅតាមមណ្ឌល និងតាមខ្នងផ្ទះ មានចំនួនជាង ២០០០នាក់។ទន្ទឹមនឹងនោះដែរ លោកវេជ្ជបណ្ឌិត ងី មានហេង បន្តអំពាវនាវដល់បងប្អូន ប្រជាពលរដ្ឋ យើងទាំងអស់ នៅទូទាំងរាជធានីភ្នំពេញ ឲ្យបន្តប្រុងប្រយ័ត្នខ្ពស់ ការពារខ្លួន កុំភ្លេចខ្លួនឲ្យសោះ ដោយត្រូវចេះផ្លាស់ប្តូរទម្លាប់រស់នៅរបស់ខ្លួនឲ្យស្របតាមគន្លងនៃការ រៀនរស់នៅធម្មតាជា មួយ វីរុស កូវីដ-១៩ តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ-១៩ សំដៅបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុសកូវីដ១៩ ជាពិសេសពពួកប្រភេទបំប្លែងថ្មី អូមីក្រុងនេះ និងប្រភេទថ្មីបន្តបន្ទាប់ ផ្សេងទៀតផងដែរ៕ អត្ថបទ៖ រដ្ឋា

ជប៉ុនចង់ក្លាយជាដៃគូកម្ពុជា ក្នុងការថែរក្សាសន្តិភាពក្នុងតំបន់ និងពិភពលោក

ភ្នំពេញ៖ នាយករដ្ឋមន្រ្តីជប៉ុន បានថ្លែងថា ប្រទេសជប៉ុន បានចាត់ទុកកម្ពុជា ជាមិត្តដ៏ល្អ និងចង់ឃើញប្រទេសកម្ពុជា និងប្រទេសជប៉ុន ក្លាយជាដៃគូដ៏ល្អផងដែរ ក្នុងការថែរក្សាសន្តិភាព ទាំងនៅក្នុងតំបន់ ក៏ដូចជាពិភពលោក។នៅក្នុងជំនួបជាមួយឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក នៅថ្ងៃទី១៦ ខែកុម្ភៈនេះ នៅទីក្រុងតូខ្យូ ឯកឧត្តម ហ្វូមីអូ គិស៊ី ដា (FUMIO Kishida) បានលើកឡើងថា ប្រទេសជប៉ុន បានចាត់ទុកកម្ពុជា ជាមិត្តដ៏ល្អ និងចង់ឱ្យជប៉ុន-កម្ពុជា មានទំនាក់ទំនងកាន់តែស៊ីជម្រៅ និងជាដៃគូក្នុងការថែរក្សាសន្តិភាពនៅក្នុងតំបន់ និងពិភពលោក ជាពិសេសការគាំទ្រដល់យុទ្ធសាស្ត្រ FOIP ដើម្បីសន្តិភាព ស្ថិរភាព ការអភិវឌ្ឍនិងវិបុលភាពរួម។ឯកឧត្តម បានសម្តែងនូវការគាំទ្រចំពោះការបំពេញតួនាទីរបស់កម្ពុជា ក្នុងនាមជាប្រធានអាស៊ាន ជាពិសេសគំនិតផ្តួចផ្តើម និងកិច្ចការនានា ដែលសម្តេចតេជោ ហ៊ុន សែន បានរៀបចំ ដើម្បីព្យាយាមដោះស្រាយវិបត្តិនយោបាយនៅមីយ៉ាន់ម៉ា ហើយឯកឧត្តមសង្ឃឹមផងដែរថា កម្ពុជា ដែលមានសម្តេចតេជោ ជាប្រមុខដឹកនាំ នឹងអាចចូលរួមចំណែកដោះស្រាយបញ្ហាផ្សេងៗទៀត ដែលអាស៊ានកំពុងមានកង្វល់នោះ។ ឯកឧត្ដម បានអរគុណរាជរដ្ឋាភិបាលកម្ពុជា ចំពោះការចូលរួមប្រារព្ធខួបទី៣០ឆ្នាំ នៃប្រតិបត្តិការ PKO របស់ជប៉ុន ក្នុងក្របខ័ណ្ឌអង្គការសហប្រជាជាតិនៅកម្ពុជា ដែលជាប្រទេសគោលដៅទី១ ដោយនេះគឺជាការបង្ហាញឱ្យឃើញអំពីទំនាក់ទំនងដ៏រឹងមាំរវាងជប៉ុន-កម្ពុជា នៅក្នុងបុព្វហេតុសន្តិភាពសកល ហើយដំណើរទស្សនកិច្ចផ្លូវការរបស់ឯកឧត្តម ហ៊ុន ម៉ាណែត នាពេលនេះ ក៏ជាផ្នែកមួយ នៃការប្រារព្ធខួបដ៏មានអត្ថន័យនេះផងដែរ។ឧត្តមសេនីយ៍ឯក ហ៊ុន ម៉ាណែត បានជម្រាបជូននាយករដ្ឋមន្ត្រីជប៉ុនអំពីការគាំទ្ររបស់សម្តេចតេជោ ហ៊ុន សែន ក្នុងការរៀបចំប្រារព្ធខួបទី៣០ឆ្នាំ នៃប្រតិបត្តិការរក្សាសន្តិភាព (PKO) របស់កងស្វ័យការពារជើងគោកជប៉ុនក្នុងប្រទេសកម្ពុជា នៅខេត្តព្រះសីហនុ នាពេលខាងមុខ ដែលសម្តេចតេជោ ក៏ធ្លាប់បានប្រាថ្នាថា "គប្បីធ្វើយ៉ាងណាឱ្យខួបនេះ ក្លាយទៅជាការពង្រឹង និងពង្រីកកិច្ចសហប្រតិបត្តិការ រវាងប្រទេសទាំងពីរលើវិស័យការពារជាតិ។ ឧត្តមសេនីយ៍ឯក បានបញ្ជាក់ថា កម្ពុជា ធ្លាប់ទទួលកម្លាំង PKO ក្នុងឆ្នាំ១៩៩២-១៩៩៣ បច្ចុប្បន្ន កម្ពុជា ជាប្រទេសចូលរួមចំណែកការពារថែរក្សាសន្តិភាព ដោយបានបញ្ជូនកម្លាំងក្រោមឆ័ត្រអង្គការសហប្រជាជាតិទៅកាន់បណ្តាប្រទេសនានាជាច្រើន ដែលកំពុងមានជម្លោះ។ ជំហររបស់កម្ពុជា គឺនឹងខិតខំចូល រួមថែរក្សាសន្តិភាព ស្ថិរភាពក្នុងតំបន់ ធ្វើយ៉ាងណាឱ្យមានវិបុលភាពរួមសម្រាប់ទាំងអស់គ្នា។ ក្រៅពីនេះលើឆាកអន្តរជាតិ កម្ពុជា-ជប៉ុន ជានិច្ចកាល តែងតែគាំទ្រគ្នាទៅវិញទៅមកជាប់ជាប្រចាំផងដែរ។ ឧត្តមសេនីយ៍ឯក ហ៊ុន ម៉ាណែត ក៏បានផ្តួចផ្តើមគំនិតក្នុងការលើកកម្ពស់ទំនាក់ទំនងនៃប្រទេសទាំងពីរ ពីដៃគូយុទ្ធសាស្រ្ត ទៅជាដៃគូយុទ្ធសាស្ត្រគ្រប់ជ្រុងជ្រោយ ប្រសិនបើអាចធ្វើបាននៅពេលអនាគត៕អត្ថបទ៖ បាន ចក់

ក្រុមការងារចុះជួយស្រុកឱរ៉ាល់ អំពាវនាវដល់ប្រជាពលរដ្ឋបន្តអនុវត្តឲ្យបានខ្ជាប់ខ្ជួននូវវិធានការសុខាភិបាល

កំពង់ស្ពឺ៖ អនុប្រធានក្រុមការងារចុះជួយស្រុកឱរ៉ាល់ និងជាប្រធានក្រុមការងារចុះជួយឃុំតាសាល ឯកឧត្តម យឿន យឿត បានអំពាវនាវដល់បងប្អូនប្រជាពលរដ្ឋទាំងអស់ ដែលរស់នៅស្រុកឱរ៉ាល់ ខេត្តកំពង់ស្ពឺ បន្តប្រុងប្រយ័ត្នបន្ថែមទៀត និងត្រូវបន្តអនុវត្តឲ្យបានខ្ជាប់ខ្ជួននូវវិធានសុខាភិបាល ជាពិសេសអនុសាសន៍របស់សម្តេចតេជោ ហ៊ុន សែន ៣កុំ និង៣ការពារនេះតែម្តង ។ក្នុងឱកាសចុះសំណេះសំណាល និងបញ្ចូលសមាជិកថ្មីរបស់គណបក្សប្រជាជនកម្ពុជា នៅឃុំតាសាល ស្រុកឱរ៉ាល់ ខេត្តកំពង់ស្ពឺ ឯកឧត្តម យឿន យឿត បានលើកឡើងថា បើទោះបីជា បច្ចុប្បន្ននេះ កម្ពុជាយើងពុំមានករណីស្លាប់ដោយសារកូវីដ១៩ក្តី ប៉ុន្តែការរីករាលដាលនូវមេរោគកូវីដ១៩ បំប្លែងថ្មីនៅតែបន្ត ដូច្នេះយើងទាំងអស់គ្នាត្រូវអនុវត្តទៅតាមក្រសួងសុខាភិបាល ក៏ដូចជាប្រមុខរាជរដ្ឋាភិបាល ដែលលោកបានខិតខំទប់ស្កាត់ ដើម្បីសុខុមាលភាពរបស់ប្រជាជនយើងទាំងអស់គ្នា។ឯកឧត្តម បានលើកឡើងទៀតថា មានតែប្រទេសកម្ពុជាទេ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃម្ពុជា ដែលបានយកវ៉ាក់សាំងការពារជម្ងឺកូវីដ១៩ ចាក់ស្រោចពេញប្រទេសដល់ប្រជាពលរដ្ឋដោយមិនគិតថ្លៃ ហើយមិនប្រកាន់ពូជសាសន៍ និងនិន្នាការនយោបាយថែមទៀតផង។ឯកឧត្តម បានបន្តទៀតថា ខណៈដែលរាជរដ្ឋាភិបាលបានខិតខំស្វែងរកវ៉ាក់សាំងមកចាក់ជូនដល់បងប្អូន គ្រប់រូបនៅទូទាំងប្រទេសនោះ ហើយបងប្អូនណាដែលមិនទាន់បានចាក់គប្បីប្រញាប់ទៅចាក់ ដើម្បីបង្ការខ្លួនឲ្យរួចផុតពីការឆ្លងនូវមេរោគកូវីដ១៩ ជាពិសេសមេរោគបំប្លែងថ្មីប្រភេទអូមីក្រុងនេះតែម្តង។ ឯកឧត្តម បានលើកឡើងទៀតថា ក្នុងដំណាក់កាលដែលប្រទេសកម្ពុជា ស្ថិតក្នុងស្ថានភាពនៃការបិទខ្ទប់ប្រទេស រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន សែន មិនត្រឹមតែគិតគូរយកចិត្តទុកដាក់ពីសុខទុក្ខ និងជីវភាពការរស់នៅទេ ដោយសម្តេចបានឱ្យមន្រ្តីគ្រប់លំដាប់ថ្នាក់ផ្តល់ទាំងស្បៀងអាហារ ថែទាំសុខភាពអ្នកដែលបានឆ្លងជម្ងឺកូវីដ១៩ ក្នុងសហគមន៍ផងដែរ។ ជាងនេះទៅទៀត សម្តេចតេជោ ក៏បានជម្រុញដល់មន្រ្តីសុខាភិបាល និងកងទ័ព បង្កើនល្បឿនក្នុងការយកវ៉ាក់សាំងការពារជម្ងឺកូវីដ១៩ ជូនប្រជាពលរដ្ឋដល់ក្នុងមូលដ្ឋានដោយឥតគិតថ្លៃ រួមទាំងជនបរទេសផងដែរឱ្យតែនៅក្នុងប្រទេសកម្ពុជា ៕

ADBអនុម័តប្រាក់កម្ចីជិត ១០០លានដុល្លារដល់កម្ពុជា សម្រាប់ដំណើរការចាក់វ៉ាក់សាំងជូនពលរដ្ឋ

ភ្នំពេញ៖ ធនាគារអភិវឌ្ឍន៍អាស៊ី (ADB) នៅថ្ងៃទី១៥ ខែកុម្ភៈ ម្សិលមិញនេះ បានអនុម័តប្រាក់កម្ចីចំនួន ៩៥ លានដុល្លារ ដើម្បីជួយរាជរដ្ឋាភិបាលកម្ពុជា ក្នុងដំណើរការចាក់វ៉ាក់សាំងប្រឆាំង នឹងជំងឺកូវីដ១៩ ជូនប្រជាពលរដ្ឋពីឆ្នាំ២០២២ ដល់ឆ្នាំ២០២៣ រួមមាន ការចាក់វ៉ាក់សាំងជំរុញប្រចាំឆ្នាំ សម្រាប់អ្នកដែលបានចាក់វ៉ាក់សាំងរួច និង ការចាក់វ៉ាក់សាំងមូលដ្ឋាន សម្រាប់កុមារអាយុក្រោម ៥ឆ្នាំ។ នេះបើយោងតាមគេហទំព័រ ផ្លូវការរបស់ADB។លោក Rikard Elfving អ្នកឯកទេសជាន់ខ្ពស់ផ្នែកសង្គមរបស់ ADB មានប្រសាសន៍ថា គម្រោង នេះនឹងជួយកម្ពុជា ដើម្បីសង្គ្រោះជីវិតដោយកាត់បន្ថយចំនួនករណីឆ្លងមេរោគធ្ងន់ធ្ងរ និងបង្កើនល្បឿននៃការស្តារសេដ្ឋកិច្ចរបស់ប្រទេសពីជំងឺរាតត្បាត។ ADB ក៏នឹងផ្តល់ជំនួយបច្ចេកទេសចំនួន ១លានដុល្លារ ផងដែរ ដើម្បីជួយកម្ពុជាបង្កើនប្រសិទ្ធភាពនៃប្រព័ន្ធដឹកជញ្ជូន និងផ្គត់ផ្គង់វ៉ាក់សំាង ព្រមទាំងកាត់បន្ថយបញ្ហាប្រឈមក្នុងការទទួលបានវ៉ាក់សំាងក្នុងចំណោមស្ត្រី កុមារី កុមារតូច និង ក្រុមពលរដ្ឋដែលនៅឆ្ងាយ។ជាមួយគ្នានោះដែរ ADB បានកោតសរសើរប្រទេសកម្ពុជាទទួលបានជោគជ័យយ៉ាងធំធេង ក្នុងការគ្រប់គ្រងការរីករាលដាលនៃកូវីដ១៩ ក្នុងឆ្នាំ២០២០។ ប៉ុន្តែការផ្ទុះការឆ្លងនៅឆ្នាំ ២០២១ បានបង្កជាសម្ពោធយ៉ាងធ្ងន់ធ្ងរដល់ប្រព័ន្ធថែទាំសុខភាព ហើយបណ្តាលឱ្យមានការបិទសាលារៀន និងអាជីវកម្មជាច្រើន មួយរយៈពេលធំក្នុងឆ្នាំនោះ។ប្រភព បានបន្តទៀតថា ប្រទេសកម្ពុជាបានផ្តល់ចាក់វ៉ាក់សាំងយ៉ាងពេញលេញដល់ប្រជាពលរដ្ឋប្រមាណ ៨០% នៃប្រជាពលរដ្ឋសរុប ១៦,៧ លាននាក់ចាប់តាំងពីការចាប់ផ្តើមយុទ្ធនាការចាក់វ៉ាក់សាំងថ្នាក់ជាតិ នៅថ្ងៃទី១០ខែ កុម្ភៈ ឆ្នាំ២០២១មក។ ជាមធ្យមពលរដ្ឋកម្ពុជាច្រើនជាងម្នាក់ ក្នុងចំណោមពលរដ្ឋប្រាំនាក់ ឬ ២១,៨% បានទទួលការចាក់វ៉ាក់សាំងដូសជំរុញ។ ទោះបីជាយ៉ាងនេះក្តី ប្រព័ន្ធសុខាភិបាលរបស់ប្រទេសនៅតែងាយរងគ្រោះចំពោះការកើនឡើងនៃការឆ្លងថ្មី នៃមេរោគបំប្លែងខ្លួនដូចជា Delta និង Omicron ជាដើម។បន្ថែមពីលើប្រាក់កម្ចី ដែលបានមកពីមូលនិធិសម្រាប់ការទទួលបានវ៉ាក់សាំងនៅអាស៊ីប៉ាស៊ីហ្វិក (Asia Pacific Vaccine Access Facility ឬហៅកាត់ថា APVAX) ធនាគារវិនិយោគហេដ្ឋារចនាសម្ព័ន្ធអាស៊ី (Asian Infrastructure Investment Bank) រំពឹងថា នឹងផ្តល់ជាសហហិរញ្ញប្បទានចំនួន ៥០លានដុល្លារ បើមានការយល់ព្រមពីក្រុមប្រឹក្សាភិបាលរបស់ខ្លួន។គម្រោងខាងលើ ជាការគាំទ្របន្ថែមទៅលើជំនួយទាក់ទងនឹងកូវីដ១៩ កន្លងទៅរបស់ADBដល់កម្ពុជា។ កាលពីថ្ងៃទី ៨ខែកក្កដា ឆ្នាំ ២០២០ ADB បានផ្តល់ប្រាក់កម្ចីចំនួន ២៥០ លានដុល្លារ ដើម្បីជួយរាជរដ្ឋាភិបាល ក្នុងការកាត់បន្ថយផលប៉ះពាល់ធ្ងន់ធ្ងរដល់សុខភាព សង្គម និងសេដ្ឋកិច្ចនៃ ជំងឺរាតត្បាតនេះ។ លើសពីនេះ ADB ក៏បានផ្តល់ឧបករណ៍ការពារខ្លួនប្រមាណ ១,៧ លានគ្រឿងដល់កម្ពុជាក្នុងឆ្នាំ ២០២១ ផងដែរ។សូមបញ្ជាក់ថា ចាប់តាំងពីឆ្នាំ ២០០៥ មក ADB បានគាំទ្រគម្រោងគ្រប់គ្រងជំងឺឆ្លងក្នុងតំបន់ របស់ក្រសួងសុខាភិបាលកម្ពុជា។ នៅខែតុលា ឆ្នាំ២០២១ ADB បានអនុម័តហិរញ្ញប្បទានបន្ថែមចំនួន ៣០ លានដុល្លារសម្រាប់គម្រោងសន្តិសុខសុខភាពមហាអនុតំបន់មេគង្គ (Greater Mekong Subregion Health Security Project) ដើម្បីពង្រឹងប្រព័ន្ធសុខាភិបាលរបស់ប្រទេសកម្ពុជា ខណៈពេលមានការកើនឡើងនៃករណីជំងឺកូវីដ១៩។ជាមួយគ្នានេះដែរ ធនាគារអភិវឌ្ឍន៍អាស៊ី ប្តេជ្ញាថានឹងសម្រេចឱ្យបាននូវ វិបុលភាព បរិយាប័ន្ន ភាពធន់ និងនិរន្តរភាព ក្នុងតំបន់អាស៊ីនិងប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំងផងដែរ៕អត្ថបទ៖ បាន ចក់

អភិបាលខេត្តឧត្ដរមានជ័យ អំពាវនាវដល់ពលរដ្ឋឱ្យទៅចាក់វ៉ាក់សាំងដូសទី៣ និងទី៤

ឧត្ដរមានជ័យ៖ អភិបាលខេត្តឧត្ដរមានជ័យ បានអំពាវនាវដល់ប្រជាពលរដ្ឋ ដែលមិនទាន់បានចាក់វ៉ាក់សាំងដូសទី៣ និងទី៤ ឱ្យទៅចាក់ឱ្យបានគ្រប់ៗគ្នា ដើម្បីបង្កើនភាពស៊ាំក្នុងសហគមន៍ ទប់ទល់នឹងជំងឺកូវីដ-១៩ ពិសេសប្រភេទបំប្លែងថ្មី អូមីក្រុង។ឯកឧត្តម ប៉ែន កុសល្យ អភិបាលខេត្តឧត្តរមានជ័យ និងជាប្រធានគណៈកម្មកាចំពោះកិច្ចការចាក់ វ៉ាក់សាំងខេត្ត បានឱ្យដឹងថា ខណៈពេលនេះ អូមីក្រុង ត្រូវបានរកឃើញក្នុងសហគមន៍ខេត្តជាប់ជាយដែនមួយនេះហើយ ដូច្នេះប្រជាពលរដ្ឋ ត្រូវបង្កើនការប្រុងប្រយ័ត្នបង្ការខ្លួនកុំឱ្យឆ្លង ដោយត្រូវអនុវត្តឱ្យបានខ្ជាប់ខ្ជួននូវិធានការសុខាភិបាល និងវិធានការបីកុំ បីការពារ ពិសេសគឺត្រូវទៅចាក់វ៉ាក់សាំងដូសជំរុញទី៣ និងទី៤ ឱ្យបានគ្រប់គ្នា បើម្បីបង្កើនអង់ទីគ័រក្នុងខ្លួនទប់ទល់នឹងមេរោគបំប្លែងថ្មីនេះ។ឯកឧត្តម បានបញ្ជាក់ថា ក្រុមគ្រូពេទ្យ កំពុងរង់ចាំចាក់វ៉ាក់សាំងជូនប្រជាពលរដ្ឋគ្រប់ពេលវេលា នៅតាមទីតាំងដែលកំណត់រៀបចំរួចរាល់។ ឯកឧត្តម ក៏បានធ្វើការអំពាវនាវដល់ប្រជាពលរដ្ឋទាំងអស់ កាត់បន្ថយការជួបជុំដែលមានមនុស្សច្រើន ដែលមានចរិតជាការឆ្លងជំងឺកូវីដ-១៩៕អត្ថបទ៖ ឃិន សារិទ្ធ

ក្រសួងទេសចរណ៍ រំពឹងថា ភ្ញៀវទេសចរនឹងចូលទស្សនាកម្ពុជាតាមកញ្ចប់ទេសចរណ៍ចាប់ពីពាក់កណ្តាលឆ្នាំ២០២២តទៅ

ភ្នំពេញ៖ ក្រសួងទេសចរណ៍កម្ពុជា បានឲ្យដឹងថា កម្ពុជាចាប់ពីខែមីនានេះទៅ នឹងចាប់ផ្តើមមានភ្ញៀវទេសចរវ៉ាក់សាំងអន្តរជាតិ មកទស្សនាកម្ពុជា តាមរយៈការកក់ និងការទិញកញ្ចប់ទេសចរណ៍មកទស្សនាកម្ពុជា លក្ខណៈក្រុមធំៗ នៅកម្រិតតិចតួច ហើយនឹងមានកំណើនឡើងខ្លាំង ចាប់ពីខែមិថុនា ឆ្នាំ២០២២នេះ។បើតាម លោក ឈុន មករា ប្រធាននាយកដ្ឋានទីភ្នាក់ទេសចរណ៍ ដឹកជញ្ជូន និងមគ្គុទ្ទេសក៍ទេសចរណ៍ នៃក្រសួងទេសចរណ៍ បានថ្លែងប្រាប់BTV នៅថ្ងៃទី១៦ ខែមករានេះ ថា ក្រោយពីប្រមុខថ្នាក់ដឹកនាំរាជរដ្ឋាភិបាល ប្រកាសបើកប្រទេសវិញនៅថ្ងៃទី១៤ ខែវិច្ឆិកាឆ្នាំ២០២១មក រហូតមកថ្ងៃទី៣១ ខែមករា ឆ្នាំ២០២២នេះ មានជើងហោះពីបណ្តាប្រទេសមកកាន់កម្ពុជា មានប្រមាណជាង ៣២៦ជើង កើនឡើងជិត២០% ។ចាប់តាំងពីខែមករាដើម ឆ្នាំ២០២២ នេះមក កម្ពុជា ចាប់ផ្តើមមានភ្ញៀវទេសចរវ៉ាក់សាំងអន្តរជាតិមកទស្សនាកម្ពុជាតាមកញ្ចប់ទេសចរណ៍ជាបណ្តើរៗតែក្នុងកម្រិតតិចតួច ជាពិសេសភ្ញៀវមកពីតាមតំបន់អឺរ៉ុប ហើយកម្ពុជាក៏មាននាំភ្ញៀវជាកញ្ចប់ទៅទស្សនាប្រទេសគេវិញដែរដូចជាទៅឌុយបៃ ទៅប្រទេសថៃ ជាដើម។បើតាមបណ្តាអ្នកជំនាញទេសចរណ៍ ក៏ដូចក្រុមហ៊ុនការីទេសចរណ៍ បានលើកឡើងថា ការបើកប្រទេសវិញរបស់ប្រមុខថ្នាក់ដឹកនាំរាជរដ្ឋាភិបាលកម្ពុជា កាលពីថ្ងៃទី១៤ ខែវិច្ឆិកា ឆ្នាំ២០២១នោះ បានធ្វើឲ្យការីទេសចរណ៍មានទំនុកចិត្តផ្សព្វផ្សាយដល់ដៃគូ និងភ្ញៀវទេសចរអន្តរជាតិមកទស្សនាកម្ពុជា ខណៈការទាក់ទាញភ្ញៀវទេសចរអន្តរជាតិមកទស្សនាកម្ពុជាគឺត្រូវបានពេលយូរដើម្បីឈានរកត្រឡប់មកភាពដើមវិញ។របាយការណ៍ក្រសួងទេសចរណ៍ បានឲ្យដឹងថា បច្ចុប្បន្នមានក្រុមហ៊ុនការីទេសចរណ៍ចំនួន ៣៦ក្រុមហ៊ុន បានចុះបញ្ជីធ្វើអាជ្ញាបណ្ណបើកអាជីវកម្មជាការីទេសចរណ៍ជាមួយនឹងការលើកលែងពន្ធ និងការបង់ថ្លៃសេវារដ្ឋនានាទៀត ។ របាយការណ៍ បញ្ជាក់ថា ចាប់តាំងពីរាជរដ្ឋាភិបាលបានប្រកាសបើកប្រទេសរហូតមកដល់រហូតដើមខែកុម្ភៈឆ្នាំ២០២២នេះ មានទេសចរក្នុងស្រុកចេញដើរប្រមាណជាងជាង ៤លាននាក់ គឺមានភ្ញៀវដើរតាមកញ្ចប់ទេសចរណ៍ក្នុងមានប្រមាណ៣០៧៤នាក់៕ អត្ថបទ ស៊ុម សុខជា

កម្ពុជាបន្ដរកឃើញករណីឆ្លងកូវីដចំនួន២០៤នាក់ ជាប្រភេទអូមីក្រុង

ភ្នំពេញ៖ ក្រសួងសុខាភិបាលនៅថ្ងៃនេះ បានប្រកាសថា លទ្ធផលតេស្តដោយម៉ាស៊ីន PCR រកឃើញថា មនុស្ស ២០៤នាក់ទៀត ត្រូវបានឆ្លងមេរោគកូវីដ-១៩ ជាប្រភេទអូមីក្រុងទាំងអស់ ក្នុងនោះ ឆ្លងក្នុងសហគមន៍ចំនួន១៩៥នាក់ ។ប៉ុន្ដែក្រសួង បានឱ្យដឹងបន្ថែមថា ថ្ងៃនេះករណីស្លាប់គឺគ្មាននោះទេ ។បើតាមក្រសួងសុខាភិបាល ចំនួនមនុស្សស្លាប់ដោយសារជំងឺកូវីដ-១៩ បានកើនឡើងរហូតដល់ ៣,០១៥នាក់ ហើយគិតត្រឹមថ្ងៃនេះ ខណៈចំនួនអ្នកឆ្លងជំងឺនេះសរុបបានកើនឡើងដល់ ១២៤,៣៤៣នាក់នៅទូទាំងប្រទេស។ក្រសួងសុខាភិបាលបញ្ជាក់ថា អ្នកជំងឺកូវីដ-១៩ សរុបរហូតដល់ ១១៩,៣៥៣នាក់ហើយ ត្រូវបានព្យាបាលជាសះស្បើយឡើងវិញ៕

ប្រសាសន៍សំខាន់ៗរបស់សម្ដេចតេជោ ក្នុងឱកាសសម្ពោធស្ពាន៧កន្លែង នៅតំបន់ប្រឈមនឹងទឹកជំនន់ ជាជំនួយរបស់ជប៉ុន

ក្រចេះ៖ នៅព្រឹកថ្ងៃទី១៦ ខែកុម្ភៈនេះសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា រួមជាមួយឯកឧត្តម មិកាមិ ម៉ាសាហ៊ីរុ ឯកអគ្គរដ្ឋទូតជប៉ុនប្រចាំនៅកម្ពុជា អញ្ជើញសម្ពោធដាក់ឱ្យប្រើប្រាស់ស្ពាន៧កន្លែង ស្ថិតនៅក្នុងខេត្តក្រចេះ និងព្រៃវែង ជាជំនួយជប៉ុន មានតម្លៃប្រមាណ ៣៥លានដុល្លារអាមេរិក។សមិទ្ធផលថ្មីនេះ គឺជាចំណងដៃដ៏ថ្លៃថ្លាមិនអាចកាត់ថ្លៃបាន ដែលកើតចេញពីចំណងមិត្តភាព និងកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរាជរដ្ឋាភិបាលនៃប្រទេសជប៉ុន ជូនដល់បងប្អូនប្រជាពលរដ្ឋខេត្តក្រចេះ ខេត្តព្រៃវែង ព្រមទាំងបងប្អូនប្រជាពលរដ្ឋនៅទូទាំងប្រទេស ដើម្បីប្រើប្រាស់ជាប្រយោជន៍ទូទៅ និងយូរអង្វែង។*ប្រសាសន៍របស់សម្ដេចតេជោដូចខាងក្រោម៖-សម្តេចតេជោ ហ៊ុន សែន នាយករដ្ឋមន្ត្រី បានឱ្យដឹងថា ជប៉ុន គឺជាប្រទេសមួយ ក្នុងចំណោយប្រទេសជាច្រើនដែលបានជួយកម្ពុជា ក្នុងការអភិវឌ្ឍហេដ្ឋារចនាសម្ព័ន្ធ និងស្តារឡើងវិញក្រោយពេលកម្ពុជាទទួលបានសុខសន្តិភាពទាំងស្រុង។-សម្តេចតេជោ បានលើកឡើងថា ស្ពាននីមួយៗប្រសិនបើគ្មានការដឹកលើសទម្ងន់ទេ អាចប្រើប្រាស់បានរាប់សិបឆ្នាំរហូតដល់មួយរយឆ្នាំក៏បាន។-សម្តេចតេជោ ហ៊ុន សែន ក៏បានឆ្លើយតបចំពោះអ្នករិះគន់សម្តេចថា ជាមនុស្សពូកែស្មូម ប៉ុន្តែការស្មូមរបស់សម្តេចនេះពុំមែនយកមកធ្វើផ្ទះសម្តេចផ្ទាល់ខ្លួននោះទេ គឺយកមកធ្វើហេដ្ឋារចនាសម្ព័ន្ធសម្រាប់ប្រទេសជាតិ និងប្រជាជនកម្ពុជាទាំងមូលតែប៉ុណ្ណោះ។- សម្តេចតេជោ ហ៊ុន សែន បានអោយដឹងថា ការតភ្ជាប់របស់កម្ពុជាកាន់តែមានការរីកចម្រើន ដែលផ្តល់ជម្រើសដល់ប្រជាពលរដ្ឋក្នុងការធ្វើដំណើរដោយសេរី និងឆាប់រហ័ស។-សម្តេចតេជោ ហ៊ុន សែន នាយករដ្ឋមន្រ្តី បានបញ្ជាក់ថា អ្វីដែលកម្ពុជាទទួលបាននាពេលនេះ គឺជាការរួមចំណែកយ៉ាងធំធេងរវាងទំនាក់ទំនងទ្វេភាគីកម្ពុជា និងជប៉ុនខណៈទំនាក់ទំនងរវាងប្រទេសទាំងពីរមានរយៈ ៦៩ឆ្នាំហើយនោះ។- សម្តេចតេជោ បានបញ្ជាក់ថា សម្តេចទើបតែដឹងថា អភិបាលខេត្តក្រចេះបច្ចុប្បន្ន គឺឯកឧត្តម វ៉ាថន ជាក្មួយប្រសាររបស់សម្តេច ដោយសម្តេច បានបញ្ជាក់ថា បើថ្ងៃណាមួយឯកឧត្តម វ៉ា ថន ធ្វើអ្វីខុស សូមកុំជេររាលដាលដល់សម្តេចអោយសោះ។- សម្តេចតេជោ ហ៊ុន សែន បានបញ្ជាក់ថា ជប៉ុនបានយកយន្តហោះផ្ទាល់ខ្លួនមកដឹកលោកឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិ និងជាមេបញ្ជាការកងទ័ពជើងគោក និងគណៈប្រភូទៅទស្សនកិច្ចផ្នែកយោធានៅប្រទេសជប៉ុន ដែលសម្តេចតេជោ ហ៊ុន សែន ចាត់ទុកជាទស្សនកិច្ចដ៏មានសារសំខាន់ និងបានជួបជាមួយនាយករដ្ឋមន្ត្រី និងមន្ត្រីជាន់ខ្ពស់សំខាន់ៗរបស់ប្រទេសជប៉ុន។-សម្តេចតេជោ ក៏បានប្រកាសថ្លែងអំណរគុណដល់ប្រទេសជប៉ុន ដែលប្រកាសគាំទ្រសម្តេច និងគណៈប្រតិភូកម្ពុជា ទៅទស្សនកិច្ចនៅប្រទេសមីយ៉ាន់ម៉ា ដែលជាការលើកទឹកចិត្តមួយសម្រាប់ការបញ្ឈប់ហិង្សានៅទីនោះ។ សម្តេច បញ្ជាក់ថា វត្តមានសម្តេចនៅទីនោះ គ្មានចង់បានអ្វី ក្រៅពីចង់ឃើញមីយ៉ាន់ម៉ា និងប្រជាជនមីយ៉ាន់ម៉ា រស់នៅក្នុងសុខសន្តិភាពនោះទេ។- សម្តេចតេជោ ហ៊ុន សែន បានប្រកាសថា ការទទួលពានរង្វាន់សន្តិភាព ស៊ុន ហាក់ របស់សម្តេចនៅសាធារណរដ្ឋកូរ៉េ គឺជាមោទនភាពរបសកម្ពុជាទាំងមូល ហើយការវាយតម្លៃដើម្បីទទួលបានពានរង្វាន់សន្តិភាពនេះ គឺធ្វើឡើងដោយហ្មត់ចត់ និងច្បាស់លាស់ និងធ្វើឡើងដោយឥស្សរជនកំពូលៗ និងសំខាន់ៗលើពិភពលោក។- សម្តេចតេជោ ហ៊ុន សែន ប្រកាសសារជាថ្មីថា វត្តមានសម្តេចនៅសាធារណរដ្ឋកូរ៉េ មិនមែនទៅដើម្បីតែទទួលពាននរង្វាន់សន្តិភាពស៊ុនហាក់នោះទេ គឺសម្តេចមានគោលដៅធំ ដើម្បីចូលរួមកិច្ចប្រជុំដ៏សំខាន់មួយ ដើម្បីវឌ្ឍនភាព និងសន្តិភាព នៅឧបទ្វីបកូរ៉េទាំងមូល។- សម្តេចតេជោ នាយករដ្ឋមន្ត្រី បានថ្លែងថា ដំណើរស្វែងរកសន្តិភាព មិនមែនទៅព្រឹក បានផលល្ងាចនោះទេ ។ សម្តេចតេជោ ក្នុងនាមមេដឹកនាំកម្ពុជា បានទាយទុកថា បញ្ហានៅមីយ៉ាន់ម៉ាបើសិនបន្តបែបនេះទៀត ប្រហែលពី៥ឆ្នាំ ទៅ១០ឆ្នាំទៀត មិនទាន់បានឃើញ ពន្លឺសន្តិភាពនៅមីយ៉ាម៉ាផង។-សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានអំពាវនាវដល់អាជ្ញាធរគ្រប់លំដាប់ថ្នាក់ទាំងអស់បង្ករលក្ខណៈងាយស្រួលដល់បណ្តាគណបក្សនយោបាយនានាដែលបានចុះបញ្ជីនៅក្នុងក្រសួងមហាផ្ទៃ ខណៈដែលពួកគេចុះមូលដ្ឋាន ជួបសំណេះសំណាលជាមួយសមាជិក-សមាជិកាគណបក្សរបស់គេទាំងនោះ។- សម្តេចតេជោ ហ៊ុន សែន បានប្រកាសអំពាវនាវដល់ប្រជាជនពលរដ្ឋបន្តអនុវត្តន៍វិធានការសុខាភិបាល និងវិធានការ ៣កុំ ៣ការពារ ដើម្បីទប់ស្កាត់ការឆ្លងរីករាលដាលជំងឺកូវីដ-១៩ ជាពិសេសមេរោគបំប្លែងខ្លួនថ្មី ប្រភេទអូមីក្រុង ដែលកំពុងរីករាលដាល ព្រមទាំងអំពាវនាវដល់ប្រជាពលរដ្ឋប្រញាប់ប្រញាល់ទៅទទួលវ៉ាក់សាំងទាំងដូសមូលដ្ឋាន និងដូសជំរុញអោយបានគ្រប់ៗគ្នា។- សម្តេចតេជោ ហ៊ុន សែន បានបញ្ជាក់ថា វ៉ាក់សាំងតែមួយមុខ មិនអាចការពារលោកអ្នកមិនអោយឆ្លងកូវីដ-១៩ នោះឡើយ។ បន្ថែមលើការចាក់វ៉ាក់សាំងកូវីដ-១៩ ត្រូវបន្តអនុវត្តន៍វិធានការសុខាភិបាលអោយបានខ្ជាប់ខ្ជួនជាទីបំផុត។-សម្តេចតេជោ ហ៊ុន សែន ប្រកាសអំពាវនាវកុំអោយទុកចិត្តលើអ្នកបើកបររថយន្តពេក ដោយសម្តេចបញ្ជាក់ថា សូម្បីអ្នកលើកបាយ ទឹក ជូនសម្តេចក៏ភ្លាត់មានកូវីដ-១៩ដែរ ដែលទាមទារអោយយើងគិតគូរអោយបានដិតដល់បន្ថែមទៀត ព្រោះពួកគេមិនបាននៅជាមួយយើងគ្រប់ពេលនោះទេ៕

សម្ដេចតេជោ៖ ដំណើរទស្សនកិច្ចទៅជប៉ុនរបស់ឯកឧត្តម ហ៊ុន ម៉ាណែត មានសារសំខាន់ផ្នែកការទូត

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានថ្លែងថា ដំណើរទស្សនកិច្ចទៅកាន់ប្រទេសជប៉ុនរបស់ឯកឧត្តម ហ៊ុន ម៉ាណែត ជាដំណើរទស្សនកិច្ចដ៏មានសារសំខាន់ និងជាលក្ខណៈពិសេសមួយនៃផ្នែកការទូត ក្នុងទំនាក់ទំនងរវាងប្រទេសទាំងពីរ។សម្ដេចតេជោ ហ៊ុន សែន ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធី សម្ពោធបើកឲ្យប្រើប្រាស់ជាផ្លូវការនូវស្ពានចំនួន៧កន្លែង នៃគម្រោងសាងសង់ស្ពានឡើងវិញបន្ទាន់ នៅតំបន់ប្រឈមនឹងទឹកជំនន់ ក្រោមហិរញ្ញប្បទានឥតសំណងពីប្រទេសជប៉ុន នៅថ្ងៃទី១៦ ខែកុម្ភៈនេះ បានថ្លែងឱ្យដឹងថា បច្ចុប្បន្នឯកឧត្តម ហ៊ុន ម៉ាណែត កំពុងបំពេញទស្សនកិច្ចនៅប្រទេសជប៉ុន ដោយសម្ដេច បានថ្លែងអំណរគុណ និងវាយតម្លៃខ្ពស់ចំពោះកាយវិការរបស់ជប៉ុន ចំពោះមេបញ្ជាការកងទ័ពជើងគោកកម្ពុជា។សម្ដេចតេជោ បានបន្ថែមថា បញ្ហាជំងឺកូវីដ-១៩ បង្កើតឡើងនូវស្ថានភាពដ៏លំបាកក្នុងការធ្វើដំណើរទស្សនកិច្ចនៅប្រទេសជប៉ុន ប៉ុន្តែជប៉ុន បានបញ្ជូនយន្តហោះពិសេសមួយមកទទួលឯកឧត្តម ហ៊ុន ម៉ាណែត និងគណៈឞ្រតិភូ ហើយទោះបីជាទស្សនកិច្ចនេះ ក្នុងនាមជាមេបញ្ជាការកងទ័ពជើងគោក តែមានជំនួបជាមួយនាយករដ្ឋមន្ត្រីជប៉ុន ឯកឧត្តម ហ្វូមីអូ គីស៊ីដា និងមន្ត្រីជាន់ខ្ពស់ជាច្រើនរូបទៀតរបស់ជប៉ុន ។សម្ដេចតេជោ បានបញ្ជាក់ថា នឹងគាំទ្រជានិច្ចនូវគម្រោងកិច្ចសហប្រតិបត្តិការលើវិស័យយោធាជា មួយប្រទេសជប៉ុន ដែលត្រៀមធ្វើនៅពេលខាងមុខ ក្នុងនោះមានសមយុទ្ធរួមគ្នាមួយ ពិសេសលើការងារសង្គ្រោះគ្រោះមហន្តរាយ ការប្រឆាំងភេរវកម្ម តែសមយុទ្ធប្រយុទ្ធគ្នា សម្ដេចមិនសូវចង់បាននោះទេ៕ អត្ថបទ៖ បាន សុខរិទ្ធ

ពីរសប្ដាហ៍ទៀត ការចាក់វ៉ាក់សាំងដូសទី៣ជូនកម្មករ-កម្មការិនីនៅភ្នំពេញនឹងសម្រេចបាន ១០០ភាគរយ

ភ្នំពេញ៖ កម្មករ-កម្មការិនី ដែលកំពុងបម្រើការងារក្នុងរោងចក្រ សហគ្រាស នៅរាជធានីភ្នំពេញ មានប្រមាណ ៣៣ម៉ឺននាក់ ក្នុងនោះជិត៥ម៉ឺននាក់ មិនទាន់បានទទួលការចាក់វ៉ាក់សាំងដូសទី៣ ខណៈអ្នកផ្សេងទៀត បានចាក់វ៉ាក់សាំងដូសទី៣រួចរាល់។ យ៉ាងណាក៏ដោយ ការចាក់វ៉ាក់សាំងដូសទី៣ ជូនកម្មករ-កម្មការិនី នៅភ្នំពេញនឹងសម្រេចបាន ១០០ភាគរយ ក្នុងរយៈពេលពីរសប្តាហ៍ទៀត។នៅថ្ងៃទី១៧ខែកុម្ភៈនេះ ឯកឧត្តម ហេង សួរ រដ្ឋលេខាធិការក្រសួងការងារ និងបណ្តុះបណ្តាល វិជ្ជាជីវៈ បានប្រាប់BTVថា តាមការគ្រោងទុក ការចាក់វ៉ាក់សាំងដូសទី៣ ជូនកម្មករ-កម្មការិនី បម្រើការងារ នៅភ្នំពេញ អាចនឹងសម្រេចបាន ១០០ភាគរយ ក្នុងរយៈពេលពីរសប្តាហ៍ទៀត ខណៈកម្មករ កម្មការិនី ប្រមាណជិត ៥ម៉ឺននាក់ប៉ុណ្ណោះ មិនទាន់ទទួលបានការចាក់វ៉ាក់សាំង។ ដោយឡែកនៅតាមបណ្តាខេត្ត ការចាក់វ៉ាក់សាំងដូសទី៣ ជូនកម្មករ កម្មការិនី សម្រេចបាន ៦០ភាគរយហើយដែរ។កន្លងទៅក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងដល់ថៅកែរោង ចក្រ-សហគ្រាសទាំងអស់ នៅក្នុងប្រទេសកម្ពុជា ត្រូវផ្សព្វផ្សាយដល់កម្មករនិយោជិតឱ្យជ្រាបច្បាស់អំពីភាពចាំបាច់ក្នុងការចាក់វ៉ាក់សាំងដូសជំរុញ និងត្រូវសហការជាមួយកម្មករនិយោជិតរបស់ខ្លួន នៅតាមទីតាំងរោងចក្រ សហគ្រាស ឬអនុញ្ញាតឱ្យកម្មករនិយោជិតបានទៅចាក់វ៉ាក់សាំងដូសទី៣ ដូសជំរុញនៅតាមទីតាំងដែលបានកំណត់ ព្រមទាំងផ្តល់នូវការឈប់សម្រាក១ថ្ងៃ ដោយមានប្រាក់ឈ្នួល នៅថ្ងៃដែលកម្មក និយោជិត ត្រូវទៅចាក់វ៉ាក់សាំងដូសជំរុញ។របាយការណ៍របស់ក្រសួងការងារ បានបង្ហាញថា គិតត្រឹមចុងឆ្នាំ២០២១ រោងចក្រសហគ្រាស ដែលបានចុះបញ្ជីផ្លូវការក្នុងវិស័យនេះនៅទូទាំងប្រទេសកម្ពុជា បានកើនដល់ប្រមាណជាង ១,២០០រោងចក្រ ដែលផ្តល់ការងារក្នុងប្រព័ន្ធដល់កម្មករនិយោជិតប្រមាណជិត ១លាននាក់៕ អត្ថបទ៖ ទូច សោភ័ណ

បណ្ដាញសង្គម

ព័ត៌មានថ្មីៗ

រដ្ឋមន្រ្តីក្រសួងសុខាភិបាល បន្តចុះពិនិត្យ និងគាំទ្រតម្រូវការជាក់ស្តែងចំពោះមុខ ក្នុងមូលដ្ឋានសុខាភិបាលជាប់ព្រំដែន នៅមណ្ឌលសុខភាព ស្រអែម និងមណ្ឌលសុខភាពសម្តេចអគ្គមហាធម្មពោធិសាល ជា ស៊ីម ខេត្តព្រះវិហារ

ឯកឧត្តម ឌិត ទីណា បន្តជួបមន្ត្រីកសិកម្មឃុំ-សង្កាត់ ដេីម្បីផ្សព្វផ្សាយគោលនយោបាយអាទិភាព "មានហូប មានប្រេី មានបាន និងមានរហូត"

កងកម្លាំងរុស្ស៊ី បានប្រមូលផ្ដុំទាហាន ១១ម៉ឺននាក់ នៅជិតទីក្រុងយុទ្ធសាស្ត្ររបស់អ៊ុយក្រែន

មនុស្សជាច្រើននាក់ ស្លាប់និងរបួស ក្នុងហេតុការណ៍រត់ជាន់គ្នា ក្នុងពិធីបុណ្យសាសនានៅឥណ្ឌា

បាតុករសម្រុកតវ៉ានៅទីក្រុង Venice របស់អ៊ីតាលី ក្នុងពិធីមង្គលការរបស់ស្ថាបនិកក្រុមហ៊ុន Amazon

UN៖ ជនជាតិអាហ្វហ្គានីស្ថានយ៉ាងតិច ១,២លាននាក់ ត្រូវបង្ខំឱ្យចាកចេញពីអ៊ីរ៉ង់ និងប៉ាគីស្ថាន នៅឆ្នាំនេះ

មនុស្សជាង ២០នាក់ស្លាប់ និងជាច្រើននាក់បន្តបាត់ខ្លួន ក្នុងបំណាក់ដីនៅប្រទេសកូឡុំប៊ី

ឯកឧត្តម ហេង សួរ ឯកភាពជាមួយវិទ្យាស្ថាន CDRI ដើម្បីសិក្សាស្រាវជ្រាវពីវឌ្ឍនភាពតម្រូវការជំនាញនៅលើទីផ្សារ

លោក Trump៖ បទឈប់បាញ់នៅតំបន់ហ្កាហ្សា អាចកើតឡើងក្នុងពេលត្រឹមតែមួយសប្តាហ៍

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

មនី្ទរសុខាភិបាលភ្នំពេញ ស្នើពលរដ្ឋរៀនរស់តាមបែបគន្លងថ្មី ដោយអនុវត្តវិធានការពារឱ្យបានល្អ

ជប៉ុនចង់ក្លាយជាដៃគូកម្ពុជា ក្នុងការថែរក្សាសន្តិភាពក្នុងតំបន់ និងពិភពលោក

ក្រុមការងារចុះជួយស្រុកឱរ៉ាល់ អំពាវនាវដល់ប្រជាពលរដ្ឋបន្តអនុវត្តឲ្យបានខ្ជាប់ខ្ជួននូវវិធានការសុខាភិបាល

ADBអនុម័តប្រាក់កម្ចីជិត ១០០លានដុល្លារដល់កម្ពុជា សម្រាប់ដំណើរការចាក់វ៉ាក់សាំងជូនពលរដ្ឋ

អភិបាលខេត្តឧត្ដរមានជ័យ អំពាវនាវដល់ពលរដ្ឋឱ្យទៅចាក់វ៉ាក់សាំងដូសទី៣ និងទី៤

ក្រសួងទេសចរណ៍ រំពឹងថា ភ្ញៀវទេសចរនឹងចូលទស្សនាកម្ពុជាតាមកញ្ចប់ទេសចរណ៍ចាប់ពីពាក់កណ្តាលឆ្នាំ២០២២តទៅ

កម្ពុជាបន្ដរកឃើញករណីឆ្លងកូវីដចំនួន២០៤នាក់ ជាប្រភេទអូមីក្រុង

ប្រសាសន៍សំខាន់ៗរបស់សម្ដេចតេជោ ក្នុងឱកាសសម្ពោធស្ពាន៧កន្លែង នៅតំបន់ប្រឈមនឹងទឹកជំនន់ ជាជំនួយរបស់ជប៉ុន

សម្ដេចតេជោ៖ ដំណើរទស្សនកិច្ចទៅជប៉ុនរបស់ឯកឧត្តម ហ៊ុន ម៉ាណែត មានសារសំខាន់ផ្នែកការទូត

ពីរសប្ដាហ៍ទៀត ការចាក់វ៉ាក់សាំងដូសទី៣ជូនកម្មករ-កម្មការិនីនៅភ្នំពេញនឹងសម្រេចបាន ១០០ភាគរយ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

មនី្ទរសុខាភិបាលភ្នំពេញ ស្នើពលរដ្ឋរៀនរស់តាមបែបគន្លងថ្មី ដោយអនុវត្តវិធានការពារឱ្យបានល្អ

ជប៉ុនចង់ក្លាយជាដៃគូកម្ពុជា ក្នុងការថែរក្សាសន្តិភាពក្នុងតំបន់ និងពិភពលោក

ADBអនុម័តប្រាក់កម្ចីជិត ១០០លានដុល្លារដល់កម្ពុជា សម្រាប់ដំណើរការចាក់វ៉ាក់សាំងជូនពលរដ្ឋ

អភិបាលខេត្តឧត្ដរមានជ័យ អំពាវនាវដល់ពលរដ្ឋឱ្យទៅចាក់វ៉ាក់សាំងដូសទី៣ និងទី៤

កម្ពុជា​បន្ដ​រក​ឃើញ​ករណី​ឆ្លង​​កូវីដចំនួន២០៤នាក់ ជាប្រភេទអូមីក្រុង

សម្ដេចតេជោ៖ ដំណើរទស្សនកិច្ច​ទៅជប៉ុន​របស់​ឯកឧត្តម ​ហ៊ុន ម៉ាណែត ​មាន​សារសំខាន់​ផ្នែក​ការ​ទូត

ពីរសប្ដាហ៍ទៀត ការចាក់វ៉ាក់សាំងដូសទី៣ជូនកម្មករ-កម្មការិនី​នៅភ្នំពេញ​នឹង​សម្រេច​បាន​ ១០០ភាគរយ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

កម្ពុជាបន្ដរកឃើញករណីឆ្លងកូវីដចំនួន២០៤នាក់ ជាប្រភេទអូមីក្រុង

សម្ដេចតេជោ៖ ដំណើរទស្សនកិច្ចទៅជប៉ុនរបស់ឯកឧត្តម ហ៊ុន ម៉ាណែត មានសារសំខាន់ផ្នែកការទូត

ពីរសប្ដាហ៍ទៀត ការចាក់វ៉ាក់សាំងដូសទី៣ជូនកម្មករ-កម្មការិនីនៅភ្នំពេញនឹងសម្រេចបាន ១០០ភាគរយ