BTV NEWS

សម្ដេចតេជោ ផ្តាំទៅសារព័ត៌មានថៃថា «បើឆ្កួតសូមឆ្កួតតែពួកឯងចុះ» ខណៈសម្ដេចជាមនុស្សទីពីរបន្ទាប់ពីព្រះមហាក្សត្រចាំបាច់អីទៅធ្វើជាអគ្គបញ្ជាការកងទ័ព

ឯកឧត្តម ប៉ែន បូណា៖ ដើម្បីបណ្តុះបានមនុស្សពូកែ ទាល់តែគ្រូខ្លាំង

សម្ដេចធិបតី៖ កងកម្លាំងនគរបាលជាតិដើរតួនាទី និងបំពេញភារកិច្ចសំខាន់ធានាសន្តិសុខ សុវត្ថិភាព

សម្ដេចធិបតី ហ៊ុន ម៉ាណែត អញ្ជើញប្រគល់សញ្ញាបត្រដល់ជ័យលាភីបញ្ចប់ការសិក្សានៅបណ្ឌិត្យសភានគរបាលជាតិ

នយោបាយ និង ការអភិវឌ្ឍន៍

ក្នុងឆ្នាំ២០២១ បេសកកម្មរថយន្តសម្អាតផ្លូវ ខ្មែរ ប៊ែវើរីជីស សម្អាតផ្លូវបានជាង ១៥,៣៨៣ គីឡូម៉ែត្រ

ភ្នំពេញ៖ រថយន្តសម្អាតផ្លូវ ខ្មែរ ប៊ែវើរីជីស បានសម្អាតផ្លូវបានជាង ១៥,៣៨៣គីឡូម៉ែត្រ នៅទូទាំងរាជធានីភ្នំពេញ និងតាមបណ្តាខេត្ត ក្នុងឆ្នាំ២០២១ ដើម្បីលើកកម្ពស់បរិស្ថានស្អាត និងសោភ័ណភាពក្នុងទីក្រុងភ្នំពេញ ក៏ដូចជាបន្តកិច្ចទំនួលខុសត្រូវចំពោះសង្គម និងបរិស្ថាន។លោកបណ្ឌិត អ៊ឹម សុធារិទ្ធ នាយកទំនាក់ទំនងសាធារណៈក្រុមហ៊ុន ខ្មែរ ប៊ែវើរីជីស មានប្រសាសន៍ថា បន្ថែមពីលើកិច្ចការសង្គមជាច្រើនរបស់ ខ្មែរ ប៊ែវើរីជីស រថយន្តសម្អាតផ្លូវ បានប្រតិបត្តិការជាប្រចាំ ដោយលាងសម្អាតផ្លូវ ដែលជាផ្នែកមួយ នៃការទទួលខុសត្រូវ ថែរក្សាបរិស្ថានស្អាត និងការពារផលប៉ះពាល់ ចំពោះសុខភាពផ្លូវដង្ហើម របស់សាធារណជន រាល់ពេលបើកបរតាមដងផ្លូវ។គួរបញ្ជាក់ផងដែរថា ក្នុងឆ្នាំ២០២២ រថយន្តសម្អាតផ្លូវ ខ្មែរ ប៊ែវើរីជីស ទាំង៤គ្រឿង នឹងនៅតែបន្តភារកិច្ចលើកកម្ពស់បរិស្ថានស្អាត យ៉ាងសកម្មនៅតាមទីសាធារណៈ និងដងវិថីសំខាន់ៗក្នុងរាជធានីភ្នំពេញ ក៏ដូចជាបណ្តាខេត្តមួយចំនួនផងដែរ៕

មន្រី្តជួរមុខ និងពលរដ្ឋបន្តមកចាក់វ៉ាក់សាំងដូសទី៤ នៅមនី្ទរពេទ្យបង្អែករាជធានីភ្នំពេញ

ភ្នំពេញ៖ មន្រី្តជួរមុខប្រជាពលរដ្ឋព្រមទាំងកុមារ យុវវ័យ បានបន្តនាំគ្នាមកចាក់វ៉ាក់សាំងបង្ការ ជំងឺកូវីដ-១៩ ដូសទី៤ ដូសទី៣ និងអ្នកសេសសល់មិនទាន់បានចាក់វ៉ាក់សាំងដូសមូលដ្ឋាន បានសម្រុកមកចាក់វ៉ាក់សាំងនៅក្នុងមនី្ទរពេទ្យបង្អែករាជធានីភ្នំពេញ ក្នុងខណ្ឌ៧មករា។បើតាមលោកវេជ្ជបណ្ឌិត ឃុន ទ្រី អនុប្រធានមនី្ទរពេទ្យ តំណាងលោកវេជ្ជបណ្ឌិត នេត សុវិរៈ ប្រធានមនី្ទរពេទ្យបង្អែករាជធានីភ្នំពេញ ប្រាប់BTV ព័ត៌មាន នាព្រឹកថ្ងៃទី៤ ខែកុម្ភៈ ឆ្នាំ២០២២នេះថា មកដល់ថ្ងៃនេះប្រជាពលរដ្ឋយើងនៅតែបន្តមកទទួលសេវាចាក់វ៉ាក់សាំងបង្ការជំងឺកូវីដ-១៩ ជាហូរហែដែលជាមធ្យមក្នុងមួយថ្ងៃ មានចំនួន២០០ ទៅ២៥០នាក់ ជាពិសេសច្រើនតែអ្នកមកចាក់វ៉ាក់សាំងបង្ការជំងឺកូវីដ-១៩ ដូសជំរុញ គឺដូសទី៣ និងដូសទី៤។ តាមចំនួនប្រជាពលរដ្ឋ មកទទួលសេវានៅក្នុងមនី្ទរពេទ្យបង្អែករាជធានីភ្នំពេញ ភាគច្រើន គឺប្រជាពលរដ្ឋរស់នៅក្នុងមូលដ្ឋានខណ្ឌ៧មករា។ជាមួយគ្នានោះដែរប្រជាពលរដ្ឋ បានអញ្ជើញមកចាក់វ៉ាក់សាំងបង្ការជំងឺកូវីដ-១៩ ដូសទី៤ ដូសទី៣ និងដូសទី២ ព្រមទាំងអ្នកមកចាក់វ៉ាក់សាំងដូសមូលដ្ឋាន បានលើកឡើងស្រដៀងគ្នាថា គ្រាន់តែដឹងថាប្រមុខរាជរដ្ឋាភិបាល អនុញ្ញាតឲ្យចាក់វ៉ាក់សាំងបង្ការជំងឺកូវីដ-១៩ ពួកគាត់រូតរះ មកចាក់វ៉ាក់សាំងការពារជំងឺកូវីដ-១៩ ភ្លាម គឺដើម្បីការពារ ទប់ស្កាត់ការចម្លងរីករាលដាលជំងឺកូវីដ-១៩ គ្រប់ប្រភេទក្នុងសហគមន៍។ក្នុងនាមលោកវេជ្ជបណ្ឌិត នេត សុវិរៈ ប្រធានមនី្ទរពេទ្យបង្អែករាជធានីភ្នំពេញ លោកវេជ្ជបណ្ឌិត ឃុន ទ្រី សូមអំពាវនាវដល់ប្រជាពលរដ្ឋ រស់នៅទីជិត ទីឆ្ងាយ និងនៅក្បែរមនី្ទរពេទ្យបង្អែករាជធានីភ្នំពេញ ដែលមិនទាន់បានមកទទួលសេវាចាក់វ៉ាក់សាំងបង្ការជំងឺកូវីដ-១៩ សូមអញ្ជើញមកចាក់វ៉ាក់សាំងឲ្យបានគ្រប់ៗគ្នា ព្រោះថាក្រុមការងារគ្រូពេទ្យយើងនៅរងចាំបំរើការចាក់វ៉ាក់សាំងជូនជារៀងរាល់ថ្ងៃ មិនថាថ្ងៃសៅរ៍ ថ្ងៃអាទិត្យ ឬថ្ងៃបុណ្យទាននោះទេ គឺរងចាំចាក់វ៉ាក់សាំងជូនជានិច្ច ជាពិសេសមន្រី្តរាជការ និងប្រជាពលរដ្ឋមិនទាន់បានចាក់វ៉ាក់សាំងដូសមូលដ្ឋាន សូមអញ្ជើញមកចាក់វ៉ាក់សាំងបង្ការជំងឺកូវីដ-១៩ ឲ្យបានគ្រប់គ្នា៕ អត្ថបទ រដ្ឋា

ក្រុមការងារដោះស្រាយវិវាទដីធ្លីថ្នាក់ខេត្ត ចុះពិនិត្យទីតាំងដីកំពុងមានទំនាស់ នៅចំណុចអូរពីរ ភ្នំគីង្គក់ នៅភូមិរួតចំប៉ី

ឧត្តរមានជ័យ៖ នៅថ្ងៃទី៣ ខែកុម្ភៈ ឆ្នាំ២០២២ ក្រុមការងារដោះស្រាយវិវាទដីធ្លីថ្នាក់ខេត្ត បានចុះពិនិត្យទីតាំងដីនៅត្រង់ចំណុចអូរពីរ ភ្នំគីង្គក់ ស្ថិតនៅភូមិរួតចំប៉ី កំពុងមានទំនាស់រវាងពលរដ្ឋ និងបក្ខពួកក្រុមលោក និត សុវណ្ណារ៉ា ជាអតីតសមាជិកក្រុមប្រឹក្សាសង្កាត់អូរស្មាច់ ដែលជាបុគ្គលល្បីមួយរូប សំបូរមានរឿងអាស្រូវក្ដីក្ដាំងរឿងវិវាទដីធ្លី។ ក្នុងការចុះពិនិត្យស្ថានភាពជាក់ស្តែងនាពេលនោះដែរ ឯកឧត្តម ហួន វណ្ណនិត អភិបាលរងនិងជាអនុប្រធានគណះកម្មការដោះស្រាយវិវាទដីធ្លីថ្នាក់ខេត្ត បានឲ្យដឹងថា ទីតាំងទំនាស់ដីចំណីអូររបស់រដ្ឋខាងលើនៅឆ្នាំ២០០២នេះ គឺជាដីគ្រប់គ្រង ដោយអាជ្ញាធរសង្កាត់អូរស្មាច់ ដើម្បីធ្វើការអភិវឌ្ឍជាផលប្រយោជន៍ផ្សេងៗ របស់សាធារណៈលុះដល់ឆ្នាំ២០២០ ដល់២០២១ មានចលនាជនខិលខូចបានចូលមកកាប់ស្ការបង្កើតជាទំនាស់កើតមានឡើងជាហូរហែរ។ឯកឧត្តម បញ្ជាក់ថា៖ ក្នុងនោះដែរក្រុមការងារបានចុះពិនិត្យជាក់ស្តែងលើដីរដ្ឋកំពុងមានទំនាស់ដោយដីផ្នែកខ្លះក៏មានការទទូលស្គាល់ពីអតីតចៅសង្កាត់មុន និងដីផ្នែកខ្លះទៀតក៏មិនបានទទួលស្គាល់នោះទេ។ ឯកឧត្តម បន្ដថា ការចុះពិនិត្យទីតាំងដីកំពុងមានទំនាស់ខាងលើនេះដែរក្រុមការងារបានសម្រេចនិងកំណត់យកដីចំណីអូរសងខាងចម្ងាយ ១០០ម៉ែត្រ ពីបណ្តោយអូរធម្មជាតិជាក់ស្តែងដើម្បីកុំឲ្យមានការរុករានបន្តទៀតរបស់ជនខិលខូចមួយចំនួនដែលតែងតែរំលោភទន្ទ្រានយកនោះ។គួរបញ្ជាក់ផងដែរថា ដីរដ្ឋជាច្រើនហិកតា ស្ថិតនៅចំណុចអូរពី ភ្នំគីងគួក ក្នុងភូមិរួតចំប៉ី សង្កាត់អូរស្មាច់ ក្រុងសំរោង ខេត្តឧត្តរមានជ័យ កន្លងមក និងបច្ចុប្បន្ននេះ ត្រូវបានអតីតសមាជិកក្រុមប្រឹក្សាសង្កាត់អូរស្មាច់រួមទាំងបក្សពួកកំពុងតែចូលកាប់ទន្ទ្រានដីបោះបង្គោលព្រំដីចែកគ្នាលក់ជាបន្ដបន្ទាប់ រហូតកើតមានជម្លោះប្តឹងផ្តល់ពលរដ្ឋទៅប្រព័ន្ធតុលាការផងដែរ។សូមបញ្ជាក់ថា ប្រជាពលរដ្ឋដែលរងគ្រោះពីការរំលោភបំពានពីបក្ខពួកនិងក្រុមលោក និត សុវណ្ណារ៉ា កំពុងសិក្សាផ្លូវច្បាប់ធ្វើឯកសារ គ្រោងប្ដឹងទៅរដ្ឋមន្ដ្រីក្រសួងយុត្ដិធម៌ឯកឧត្តម កើត រិទ្ធ និងអង្គភាពប្រឆាំងអំពើពុករលួយ ហៅកាត់ថាACU ផងដែរ៕ ពាក់វែនតាខ្មៅ លោក និត សុវណ្ណារ៉ា ជាអតីតសមាជិកក្រុមប្រឹក្សាសង្កាត់អូរស្មាច់

គណៈរដ្ឋមន្ត្រីអនុម័តទាំងស្រុង លើសេចក្តីព្រាងច្បាប់ការពាររុក្ខជាតិ និងភូតគាមអនាម័យ

ភ្នំពេញ៖ នៅព្រឹកថ្ងៃទី០៤ ខែកុម្ភៈ ឆ្នាំ២០២២ នៅវិមានសន្តិភាព បើកកិច្ចប្រជុំពេញអង្គ គណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាដើម្បីពិភាក្សា និងឆ្លងរបៀបវារៈ៖១. សេចក្តីព្រាងច្បាប់ស្តីពីការការពាររុក្ខជាតិ និងភូតគាមអនាម័យ។២.បញ្ហាផ្សេងៗ។បើតាមឯកឧត្តម ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានឱ្យដឹងថា សេចក្តីព្រាងច្បាប់នេះត្រូវបានរៀបចំឡើងដោយផ្អែកលើគោលនយោបាយ និងយុទ្ធសាស្រ្តរបស់រាជរដ្ឋាភិបាល និងអនុលោមតាមមូលដ្ឋានគតិយុត្តិពាក់ព័ន្ធជាធរមាននៅក្នុងព្រះជាណាចក្រកម្ពុជា ព្រមទាំងកិច្ចព្រៀងនិងអនុសញ្ញាក្នុងតំបន់ និងអន្តរជាតិស្តីពីការការពាររុក្ខជាតិ និងភូតគាមអនាម័យ ដើម្បីឆ្លើយតបទៅនឹងនិន្នាការរីកចម្រើនរបស់វិស័យកសិកម្មក្នុងក្របខណ្ឌសុវត្ថិភាពស្បៀង ការលើកកម្ពស់គុណភាពផលិតផលកសិកម្ម ការបង្កើនការនាំចេញកសិផល និងធានាចីរភាពអភិវឌ្ឍន៍ក្នុងបរិការណ៍សមាហរណកម្មសេដ្ឋកិច្ចពិភពលោកប្រកបដោយការប្រកួតប្រជែងដ៏ស្រួចស្រាវ។សេចក្តីព្រាងច្បាប់នេះ កំណត់អំពីការគ្រប់គ្រងសុខភាពរុក្ខជាតិ ការអនុវត្តវិធានការការពាររុក្ខជាតិ និងវិធានការភូតគាមអនាម័យ ការពារធនធានរុក្ខជាតិគ្រប់ប្រភេទ ការទប់ស្កាត់ការបង្ក ការរាលដាលឆ្លងនិងការរាតត្បាតពីសំណាក់សមាសភាពចង្រៃ ការលើកកម្ពស់ផលិតភាពកសិកម្ម សន្តិសុខស្បៀងអនាម័យគុណភាព និងសុវត្ថិភាពផលិតផលកសិកម្ម ព្រមទាំងសន្តិសុខភូតគាមអនាម័យនៃរុក្ខជាតិ ផលិតផលរុក្ខជាតិ និងទំនិញជាកម្មវត្ថុនៃការត្រួតពិនិត្យភូតគាមអនាម័យ ការសម្រួលការធ្វើពាណិជ្ជកម្ម ការនាំចេញ ការនាំចូល ការដឹកជញ្ជូនឆ្លងកាត់នូវផលិតផលដំណាំ រុក្ខជាតិ និងផលិតផលរុក្ខជាតិ ព្រមទាំងការរួមចំណែកការអភិវឌ្ឍសេដ្ឋកិច្ចសង្គមជាតិ និងការលើកកម្ពស់សុខុមាលភាពនិងសុខភាពសាធារណៈប្រកបដោយនិរន្តរភាពធនធានធម្មជាតិ និងប្រព័ន្ធក្សេត្របរិស្ថាន ដើម្បីធានាការគ្រប់គ្រង ការការពាររុក្ខជាតិ និងភូតគាមអនាម័យនៅក្នុងព្រះរាជាណាចក្រកម្ពុជា។ រួមចំណែកផ្តល់នូវសារៈប្រយោជន៍ក្នុងការអភិវឌ្ឍវិស័យកសិកម្មដូចជា៖ - ការពារផលប្រយោជន៍របស់ប្រជាកសិករ តាមរយៈការគ្រប់គ្រង ការការពាររុក្ខជាតិ និងការអនុវត្តវិធានការភូតគាមអនាម័យ ដើម្បីកាត់បន្ថយការខាតបង់ដែលអាចបង្កឡើងដោយសមាសភាពចង្រៃចំពោះធនធានរុក្ខជាតិ និងផលិតផលដំណាំនៅក្នុងប្រព័ន្ធផលិតកម្មកសិកម្ម។- គាំទ្រគោលនយោបាយ និងយុទ្ធសាស្រ្តជំរុញផលិតកម្មកសិកម្ម ពិពិធភាវូបនីយកម្ម និងពាណិជ្ជូបនីយកម្មកសិកម្ម ដើម្បីរួមចំណែកជំរុញកំណើនសេដ្ឋកិច្ច ជួយកាត់បន្ថយភាពក្រីក្រ និងលើកកម្ពស់ជីវភាពប្រជាកសិករ- ផ្តល់នូវឧបករណ៍បទដ្ឋានគតិយុត្តិដ៏រឹងមាំ និងយន្តការគ្រប់ជ្រុងជ្រោយក្នុងការអនុវត្តវិធានការការពាររុក្ខជាតិ និងភូតគាមអនាម័យ ដើម្បីទប់ស្កាត់ការបង្ក ការរាលដាលឆ្លង និងការរាតត្បាតបំផ្លាញពីសំណាក់សមាសភាពចង្រៃគ្រប់ប្រភេទ- ផ្តល់នូវវិធានការច្បាស់លាស់ក្នុងការការពារធនធានរុក្ខជាតិ គ្រប់គ្រងសុខភាពរុក្ខជាតិ លើកកម្ពស់ផលិតភាព គុណភាព និងសុវត្ថិភាពផលិតផលកសិកម្មប្រកបដោយភាតរបរិស្ថាន និងនិរន្តរភាព ដើម្បីរួមចំណែកលើកកម្ពស់សុខភាពសាធារណៈ និងធ្វើឱ្យមាននិរន្តរភាពធនធានធម្មជាតិ និងប្រព័ន្ធក្សេត្របរិស្ថាន-រក្សាអធិបតេយ្យភាព និងសន្តិសុខភូតគាមអនាម័យតាមរយៈការទប់ស្កាត់ការហូរចូលផលិតផលកសិកម្មគ្រប់ប្រភេទដែលមានផ្ទុកនូវសមាសភាពចង្រៃ និងសារធាតុបង្កផលប៉ះពាល់ចំពោះសុខភាព (សំណល់ថ្នាំកសិកម្ម សារធាតុគីមី សំណល់ជីវសាស្រ្ត និងលោហៈធ្ងន់)។ជាពិសេសទប់ស្កាត់ការនាំចូល ឬការផ្ទុះឡើងនូវប្រភេទសមាសភាពចង្រៃរាតត្បាតឈ្លានពាន ដែលបង្កមហន្តរាយដល់ដំណាំកសិកម្ម បំផ្លាញជីវចម្រុះ និងបរិស្ថានក្នុងព្រះរាជាណាចក្រកម្ពុជា។ជាក់ស្តែងការផ្ទុះឡើងនូវសមាសភាពចង្រៃដូចជា ខ្យងមាស ខ្នងដូង ជំងឺស្លឹកប្រាក់លើដំណាំក្រូច ឆៃផ្កាឈូកលើដំណាំដំឡូងមី ជំងឺស្រពោនលឿងស្លឹកលើដំណាំដំឡូងមី និងដង្កូវហ្វូងប្រភេទថ្មីលើដំណាំពោតជាដើម ពិតជាបានបង្កឱ្យមានផលប៉ះពាល់ដល់ផលិតកម្មកសិកម្ម និងសេដ្ឋកិច្ចជាតិគួរឱ្យកត់សម្គាល់ ដែលបណ្តាលមកពីការរាតត្បាតសមាសភាពចង្រៃខាងលើនេះ។បំពេញបាននូវលក្ខខណ្ឌតម្រូវ និងស្តង់ដារភូតគាមអនាម័យ ដោយមានសង្គតិភាពនឹងអនុសញ្ញាអន្តរជាតិស្តីពីការការពាររុក្ខជាតិ អង្គការពាណិជ្ជកម្មពិភពលោក ក្របខ័ណ្ឌអាស៊ានជាដើម ។- ផ្តល់នូវជំនឿចិត្តជាមួយប្រទេសដៃគូពាណិជ្ជកម្ម និងកម្លាំងពេញលេញក្នុងការចរចាបើកទីផ្សារនាំចេញកសិផលកម្ពុជាជាមួយបណ្តាប្រទេសដែលមានទីផ្សារធំៗក្នុងពិភពលោក ជាពិសេសបន្ទាប់ពីសម្រេចបាននូវកិច្ចព្រមព្រៀងពាណិជ្ជកម្មសេរី ក្នុងក្របខ័ណ្ឌទ្វេភាគី និងពហុភាគី និងជួយសម្រួលការនាំចេញ ការនាំចូល ការដឹកជញ្ជូនឆ្លងកាត់នូវទំនិញជារុក្ខជាតិ និងផលិតផលរុក្ខជាតិនានា៕ អត្ថបទ មុត សុទ្ធ

សហគមន៍ទេសចរណ៍ និងអង្គការក្រៅរដ្ឋាភិបាល នាំគ្នាដាំកូនឈើនៅតំបន់ព្រៃលិចទឹកបឹងទន្លេសាប

ភ្នំពេញ៖ សហគមន៍ទេសចរណ៍វប្បធម៌ ធម្មជាតិបឹងពារំាង និងអង្គការអហ្វហ្វាម ព្រមទាំងអង្គការសម្ព័ន្ធភាពដើម្បីអភិរក្សធនធានជលផល បានរួមទាំងស្ថាប័នពាក់ព័ន្ធជាច្រើនទៀត បាននាំគ្នាដាំកូនឈើស្ដារព្រៃឈើឡើងវិញ នៅតំបន់៣នៃតំបន់ព្រៃលិចទឹកបឹងទន្លេសាប ស្ថិតនៅសង្កាត់ជ្រាវ ក្រុងសៀមរាប ខេត្ដសៀមរាប ។លោក គង់ មង្គល ប្រធានសមាគមសហគមន៍ទេសចរណ៍វប្បធម៌ធម្មជាតិបឹងពារាំង លោកមានប្រសាសន៍នៅថ្ងៃទី៣ខែកុម្ភៈឆ្នាំ២០២២នេះថា កូនឈើព្រៃលិចទឹកនេះ មានជាង១ពាន់ដើម បានដាក់ដាំនៅលើផ្ទៃដីជាង៣ហិកតា ដែលបានដកហូតពីជនខិលខូចកន្លងមក ក្នុងគោលបំណងដើម្បីស្ដារព្រៃលិចទឹកឡើងវិញ ។លោក បានបន្ដថា កូនឈើទាំងនោះមានជាច្រើប្រភេទ រួមមានដើមរាំងទឹក ដើមឬស្សី ដើមម្ដេញ ដើមសណ្ដាន់ដែលបាជំនួយពីអង្គការអហ្វហ្វាមផង និងជារបស់សហគមន៍ទេសចរណ៍ផង។លោក បានបន្ដថា សហគមន៍ទេសចរណ៍មួយនេះ នឹងបន្ដបណ្ដុះកូនឈើព្រៃលិចទឹករាប់ពាន់ដើមទៀត ដើម្បីយកទៅដាក់ដាំក្នុងតំបន់៣នៃព្រៃកិចទឹកនៅតំបន់ទេសចរណ៍ធម្មជាតិបឹងពារំាងបន្ថែមទៀតនៅលើផ្ទៃដីប្រមាណ៥០ហិកតា ដែលរងការឆាបឆេះកាលពីឆ្នាំទៅមិញ។ដោយឡែក លោក មិញ ប៊ុនលី អ្នកសម្របសម្រួលអង្គការសម្ព័ន្ធភាពដើម្បីអភិរក្សធនធានជលផល ហៅកាត់ថា (Fact ហ្វេក) លោកមានប្រសាសន៍ថា ការដាំព្រៃលិចទឹកនេះមានសារៈសំខាន់ខ្លាំងណាស់ ព្រោះព្រៃលិចទឹកជាជម្រកត្រីពងកូន កាត់បន្ថយការប្រែប្រួលអាកាសធាតុ កាត់កន្ថយការហូរច្រោះដីចូលបឹងទន្លេសាប ជម្រកសត្វស្លាប ជាពិសេសព្រៃលិចទឹកមានភាពទាក់ទាញអ្នកទេសចរផងដែរ។លោក បានបន្ដថា អង្គការFact មានការគាំទ្រយ៉ាងខ្លាំងដែលបានសម្ដេចតេជោ ហ៊ុន សែន នាយករដ្ឋមន្ដ្រី ដកហូតដីព្រៃលិចទឹកពីជនខិលខូច ហើយធ្វើការដាំកូនឈើដើម្បីស្ដារព្រៃឈើឡើងវិញនេះ។លោក ស្នើឱ្យអាជ្ញាធរមានសមត្ថកិច្ច ចូលរួមទប់ស្កាត់ការនេសាទខុសច្បាប់ និងការកាប់បំផ្លាញព្រៃលិចទឹក ហើយរួមគ្នាដាំដើមឈើលិចទឹកឡើងវិញផងដែរ។លោក បូ ម៉េងទ្រី អភិបាលរងក្រុងសៀមរាប មានប្រសាសន៍ថា ដីព្រៃលិចទឹកក្នុងតំបន់៣ដែលបានដកហូតពីជនខិលខូចកន្លងមកនៅទូទាំងខេត្ដសៀមរាប មានចំនួនជាង២ពាន់៤រយហិកតា ប៉ុន្ដែរដ្ឋបាលក្រុងមានផែនការដាំស្ដារឡើងវិញ ជាបន្ដបន្ទាប់ នូវដើមឬស្សី ដើមរាំង គ្រាប់ត្នោត ក្នុងតសង្កាត់ទាំង៧សង្កាត់ នៅលើទីតាំងជាប់បឹងទន្លេសាបដែលបានទន្ទ្រានឈូសឆាយកាន់កាប់កន្លងមក។លោក បន្ដថា នៅពេលដែលទឹកទន្លេសាបស្រក នឹងបន្ដដាំកូនឈើលិចទឹកបន្ថែមទៀតរហូតដល់គ្រប់ផែនការដែលរាជរដ្ឋាភិបាលបានកំណត់៕

អាជ្ញាធរជាតិអប្សរា ធ្វើកំណាយនៅទួលឡដុតកុលាលភាជន៍ នៅក្រុមឡទ្វារដីឆ្នាំង

ភ្នំពេញ៖ នៅដើមខែកុម្ភៈ ឆ្នាំ២០២២នេះ អាជ្ញាធរជាតិអប្សរា តាមរយៈមជ្ឈមណ្ឌលអន្ដរជាតិស្រាវជ្រាវ និងតម្កល់ឯកសារអង្គរ បានចាប់ផ្តើមធ្វើកំណាយស្រាវជ្រាវនៅទួលឡដុតកុលាលភាជន៍មួយទៀត នៅក្រុមឡទ្វារដីឆ្នាំង ស្ថិតនៅពាយព្យខ្លោងទ្វារដីឆ្នាំង ក្រុងអង្គរធំ។លោក ទិន ទីណា អនុប្រធានមជ្ឈមណ្ឌលអន្ដរជាតិស្រាវជ្រាវ និងតម្កល់ឯកសារអង្គរ មានប្រសាសន៍ នៅថ្ងៃទី៣ខែកុម្ភៈ ឆ្នាំ២០២២នេះថា កាលពីចុងឆ្នាំ២០១៩ កន្លងមក ក្រុមការងាររបស់លោកបានធ្វើកំណាយជាលើកដំបូងនៅទួលបុរាណមួយ ដែលមានឈ្មោះថា ទួលត្រពាំងបុស្ស ដោយរកឃើញឡដុតកុលាលភាជន៍មួយកន្លែង ស្ថិតនៅពាយព្យខ្លោងទ្វារដីឆ្នាំង។លោកបន្តថា ការធ្វើកំណាយដែលចាប់ផ្តើមនៅខែវិច្ឆិកា ឆ្នាំ២០១៩ និងបញ្ចប់នៅខែ កុម្ភៈ ឆ្នាំ២០២០ អ្នកស្រាវជ្រាវបានរកឃើញ ជារចនាសម្ព័ន្ធឡបុរាណមួយដែលចាប់ផ្តើមផលិតកុលាលភាជន៍នៅពាក់កណ្ដាលសតវត្សរ៍ទី១២ និងបញ្ចប់នៅពាក់កណ្ដាលសតវត្សរ៍ទី១៣។លោក បន្ថែមថា ការធ្វើកំណាយនៅត្រពាំងទួលបុស្ស ដែលអ្នកស្រាវជ្រាវឱ្យឈ្មោះថា TDCK1 ឃើញមានរចនាសម្ព័ន្ធខុសពីឡដុតកុលាលភាជន៍នៅតំបន់អង្គរ ដូចជានៅតានី ខ្នារពោធិ៍ សសិ និងអន្លង់ធំ ដែលឡទាំងនោះមានប្រវែងវែង តែឡបុរាណនៅត្រពាំងទួលបុស្សនេះ មានទំហំស្ទើរមូល ដោយមានមុខកាត់២ម៉ែត្រ និងបណ្ដោយ៣ម៉ែត្រ។ ហើយការធ្វើកំណាយនៅទួលថ្មីនេះ គឺដើម្បីប្រៀបធៀបលទ្ធផលស្រាវជ្រាវនៅនឹងទីតាំងឡទី១ ដោយចង់បញ្ជាក់ថា តើរចនាសម្ព័ន្ធទីតាំងទាំង២ដូចគ្នា ឬយ៉ាងណា ដ្បិតថា គេឃើញទួលតូចធំចំនួន ២៤កន្លែង ដោយមានមន្ទិល ក្រែងឡទាំងនោះមានមុខងារផ្សេងគ្នាជាដើម៕

កម្ពុជា-ថៃ ចុះហត្ថលេខារួមគ្នាលើ«លក្ខខណ្ឌស្តីពីកិច្ចសហប្រតិបត្តិការ» រវាងកងទ័ពជើងគោកនៃប្រទេសទាំងពីរ

ភ្នំពេញ៖ ក្នុងជំនួបពិភាក្សាទ្វេភាគីរវាងមេបញ្ជាការកងទ័ពជើងគោកកម្ពុជា-ថៃ ភាគីទាំងពីរ បានសម្រេចចុះហត្ថលេខារួមគ្នាលើ «លក្ខខណ្ឌស្តីពីកិច្ចសហប្រតិបត្តិការ (Terms of Reference - ToR) រវាងកងទ័ពជើងគោកនៃកងយោធពលខេមរភូមិន្ទ និងកងទ័ពជើងគោកភូមិន្ទថៃ» ក្នុងគោលបំណង ដើម្បីពង្រឹងនិងពង្រីកនូវទំនាក់ទំនងមិត្តភាព និងកិច្ចសហប្រតិបត្តិការទ្វេភាគី ព្រមទាំងការជំរុញឱ្យមានកិច្ចពិភាក្សាដោយបើកចំហលើប្រធានបទដែលផ្តល់ផលប្រយោជន៍រួម។តបតាមការអញ្ជើញរបស់កងទ័ពជើងគោកនៃកងយោធពលខេមរភូមិន្ទ ឯកឧត្តម នាយឧត្តមសេនីយ៍ ណារ៉ុងផាន់ ជិតកែវធែ (Narongpan Jittkaewtae) អគ្គមេបញ្ជាការកងទ័ពជើងគោកភូមិន្ទថៃ បានអញ្ជើញមកបំពេញទស្សនកិច្ចជាផ្លូវការរយៈពេល ២ថ្ងៃ នៅព្រះរាជាណាចក្រកម្ពុជាជាលើកដំបូង។នៅក្នុងអំឡុងពេលនៃដំណើរទស្សនកិច្ចនេះ នាព្រឹកថ្ងៃទី៣ ខែកុម្ភៈ ឆ្នាំ២០២២ ឯកឧត្តម បានដឹកនាំគណៈប្រតិភូជាន់ខ្ពស់នៃកងទ័ពជើងគោកភូមិន្ទថៃ ចូលជួបពិភាក្សាការងារទ្វេភាគីជាមួយឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក នៅបញ្ជាការដ្ឋានកងទ័ពជើងគោក។ក្នុងជំនួបនេះ ភាគីទាំងពីរក៏បានសម្តែងមោទនភាពចំពោះទំនាក់ទំនងមិត្តភាពជាប្រពៃណីភាពជា អ្នកជិតខាងល្អ និងកិច្ចសហប្រតិបត្តិការជិតស្និទ្ធលើគ្រប់វិស័យរវាងប្រទេសទាំងពីរកម្ពុជា-ថៃ ដែលនាំមកនូវផលប្រយោជន៍ទៅវិញទៅមក និងការអភិវឌ្ឍរីកចម្រើនរួមគ្នាទាំងក្នុងពេលបច្ចុប្បន្ន និងសក្តានុពលបន្តទៅមុខ ជាពិសេសកិច្ចខិតខំប្រឹងប្រែងជួយគ្នា និងឧបត្ថម្ភគាំទ្រគ្នាទៅវិញទៅមក ក្នុងពេលជួបគ្រោះយថាហេតុផ្សេងៗ ដូចជា៖ កិច្ចសហការទប់ស្កាត់ការរាតត្បាតនៃជំងឺកូវីដ-១៩ ក្នុងរយៈកាលកន្លងមកនេះជាដើម។ភាគីទាំងពីរ ក៏បានធ្វើការវាយតម្លៃខ្ពស់ចំពោះកិច្ចសហប្រតិបត្តិការយោធា កម្ពុជា-ថៃ ដែលបានដំណើរការបោះជំហានរីកចម្រើនទៅមុខ និងសម្រេចបានលទ្ធផលផ្លែផ្កាជាច្រើនទាំងនៅក្នុងក្របខ័ណ្ឌជារួម និងក្នុងកម្រិតកងទ័ពជើងគោកជាអាទិ៍ ការអប់រំបណ្តុះបណ្តាលធនធានមនុស្ស ការអនុវត្តលំហាត់ហ្វឹកហ្វឺន និងការផ្លាស់ប្តូរគណៈប្រតិភូទៅវិញទៅមក ក៏ដូចជាការរក្សាបានទំនាក់ទំនងការងារជាប់ជាប្រចាំរវាងបណ្តាអង្គភាពសំខាន់ៗចំណុះកងទ័ពជើងគោកទាំងពីរ ដែលនៅឈរជើងនៅតាមបណ្តោយព្រំដែន ដើម្បីបន្តរួមគ្នាសហការ អនុវត្តតាមបទបញ្ជា និងទិសដៅរបស់រាជរដ្ឋាភិបាលនៃប្រទេសទាំងពីរ ក្នុងការថែរក្សាសន្តិភាព សន្តិសុខ និងការទប់ស្កាត់បង្ក្រាបបទល្មើសឆ្លងដែននានា។ទន្ទឹមគ្នានេះ កងទ័ពជើងគោកនៃប្រទេសទាំងពីរ បានប្តេជ្ញាខិតខំចូលរួមចំណែកក្នុងការកសាង និង ពង្រឹងតំបន់ព្រំដែនមិត្តភាព សន្តិភាព សហប្រតិបត្តិការ និងការអភិវឌ្ឍ ដោយឈរលើស្មារតីអត់ធ្មត់ និងសម្របសម្រួលដោះស្រាយបញ្ហាតាមយន្តការគ្រប់កម្រិត ក្នុងគោលការណ៍គោរពឯករាជ្យ អធិបតេយ្យ និងបូរណភាពទឹកដីទៅវិញទៅមក។ សន្តិភាព សន្តិសុខ និងស្ថិរភាពនៅតាមបណ្តោយព្រំដែន គឺពិតជាបានបង្កនូវលក្ខណៈអំណោយផលដល់ការដោះដូរពាណិជ្ជកម្មឆ្លងដែន ដែលជាការចូលរួមចំណែកយ៉ាងសំខាន់ ក្នុងការបង្កើតឱកាសការងារ និងការលើកកម្ពស់ជីវភាពរបស់ប្រជាជននៃប្រទេសទាំងពីរ។នៅក្នុងឱកាសនោះផងដែរ ភាគីទាំងពីរក៏បានផ្លាស់ប្តូរទស្សនៈគ្នាទៅវិញទៅមកលើបញ្ហាសន្តិសុខសាកល និងតំបន់ ដែលកំពុងកើតមានឡើង និងបានបង្ហាញឆន្ទៈក្នុងការគាំទ្រ ជំរុញ និងលើកកម្ពស់ដល់កិច្ចសហប្រតិបត្តិការរវាងកងទ័ពជើងគោកនៃប្រទេសទាំងពីរ ទាំងក្នុងក្របខ័ណ្ឌទ្វេភាគី និងតំបន់ ដើម្បីបន្ត ចូលរួមចំណែកថែរក្សាសន្តិភាព ស្ថិរភាព និងវិបុលភាពក្នុងតំបន់ ក្រោមធ្លុងសាមគ្គីភាពនៃកងទ័ពជើងគោក បណ្តាប្រទេសសមាជិកអាស៊ាន។ឯកឧត្តម អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ក៏បានថ្លែងអំណរគុណដល់រាជរដ្ឋាភិបាលថៃ ចំពោះការគាំទ្រលទ្ធផលដំណើរទស្សនកិច្ចរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងនាមភាពជាប្រធានអាស៊ានឆ្នាំ២០២២ ទៅកាន់ប្រទេសមីយ៉ាន់ម៉ា ក្នុងគោលបំណងដើម្បីចូលរួមចំណែកបញ្ចៀសអំពើហិង្សា សង្គ្រាមស៊ីវិល និងវិបត្តិមនុស្សធម៌ ក៏ដូចជាដើម្បីធ្វើយ៉ាងណារកមធ្យោបាយធ្វើឱ្យអាស៊ានអាចរក្សាបាននូវមជ្ឈិមភាពរបស់ខ្លួន និងអាចពង្រឹងសាមគ្គីភាពល្អឡើងវិញ ដោយឈរលើគោលការណ៍នានាដែលមានចែងនៅក្នុងធម្មនុញ្ញអាស៊ាន ជាអាទិ៍ការគោរពអធិបតេយ្យ ការមិនជ្រៀតជ្រែកចូលកិច្ចការផ្ទៃក្នុង និងគោលការណ៍កុងសង់ស៊ីស៕

រាជធានីភ្នំពេញព្រមានផាកពិន័យ និងដាក់ពន្ធនាគារ ចំពោះអ្នកវិជ្ជមានកូវីដដែលមិនរាយការណ៍ជូនអាជ្ញាធរ

ភ្នំពេញ៖ រាជធានីភ្នំពេញ បានប្រកាសប្រើប្រាស់វិធានការក្ដៅចំពោះជនគ្រប់រូប ដែលវិជ្ជមានកូវីដ-១៩ លួចព្យាបាលនៅផ្ទះ ដោយមិនបានរាយការណ៍ជូនដំណឹងមក អាជ្ញាធរមានសមត្ថកិច្ច ឬមន្ត្រីសុខាភិបាល ។ នេះបើយោងតាម សេចក្ដីណែនាំបន្ថែម ស្ដីពី ការពង្រឹងប្រសិទ្ធភាពនៃការគ្រប់គ្រង ថែទាំ និងព្យាបាលអ្នកជំងឺកូវីដ-១៩ នៅតាមផ្ទះក្នុងភូមិសាស្រ្តរាជធានីភ្នំពេញ ដែលចេញផ្សាយកាលពីម្សិលម៉ិញ។ស្របពេលដែលករណីវិជ្ជមានវីរុសបំប្លែងថ្មី អូមីក្រុងក្នុងសហគមន៍ត្រូវបានរកឃើញជាបន្តបន្ទាប់ រដ្ឋបាលរាជធានីភ្នំពេញ បានចេញសេចក្ដីណែនាំបន្ថែម ស្ដីពី ការពង្រឹងប្រសិទ្ធភាពនៃការគ្រប់គ្រង ថែទាំ និងព្យាបាលអ្នកជំងឺកូវីដ-១៩ នៅតាមផ្ទះក្នុងភូមិសាស្រ្តរាជធានីភ្នំពេញ។ សេចក្ដីណែនាំនេះ ជាវិធានការក្ដៅក្នុងការទប់ស្កាត់ការរីករាលដាលកូវីដ-១៩ ជាពិសេសវីរុសបំប្លែងថ្មី អូមីក្រុង ដោយបញ្ជាក់ពីការផាកពិន័យ តាមមាត្រា២ នៃប្រកាសអន្តរក្រសួង ចុះថ្ងៃទី ១៩ ខែមីនា ឆ្នាំ២០២១របស់ក្រសួងសេដ្ឋកិច្ច និងក្រសួងសុខាភិបាល ស្ដីពីការពិន័យជាប្រាក់ចំពោះបុគ្គល ឬនីតិបុគ្គលដែលប្រព្រឹត្តិអំពើល្មើស នឹងវិធានការសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ លើសពីនេះគឺការដាក់ពន្ធនាគារ ស្របតាមមាត្រា ១០មាត្រា ១១ នៃច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។លើសពីនេះ រដ្ឋបាលរាជធានីភ្នំពេញលើកទឹកចិត្ត ឱ្យប្រជាពលរដ្ឋជួយរាយការណ៍ ចំពោះករណីសង្ស័យថា មានអ្នកជំងឺកូវីដ-១៩ ដែលកំពុងលួចលាក់ព្យាបាលដោយខ្លួនឯង ដោយគ្មានការវាយតម្លៃពីអាជ្ញាធរ រឺមន្រ្តីជំនាញសុខាភិបាល។ អាជ្ញាធរនឹងរក្សាការសម្ងាត់ជូន ចំពោះអ្នករាយការណ៍។ ការធ្វើបែបនេះ គឺដើម្បី អាជ្ញាធរអាចចាត់វិធានការបានទាន់ពេលវេលា ចៀសវាងការចម្លងបន្ត ជាពិសេសវីរុសបំប្លែងថ្មី អូមីក្រុង ចូលទៅក្នុងមូលដ្ឋានភូមិ សង្កាត់ដែលខ្លួនរស់នៅ។សម្រាប់ការងារនេះ លោក ជា សុខៃ ជាចៅសង្កាត់ចាក់អង្រែក្រោម លើកឡើងថា សង្កាត់ជាអាជ្ញាធរមូលដ្ឋានដែលនៅជាមួយពលរដ្ឋដោយផ្ទាល់ ក្នុងជំហ៊ានដំបូងនេះ គឺធ្វើការផ្សព្វផ្សាយដល់ពលរដ្ឋឱ្យបានទំលូទំលាយជាមុនសិន។ រីឯជំហ៊ានបន្ទាប់គឺបង្កើតក្រុមតាមដាន ដើម្បីធានាថា ពលរដ្ឋក្នុងមូលដ្ឋានរបស់ខ្លួនមិនប្រព្រឹត្តិខុស។ស្ថានភាពបច្ចុប្បន្ននៃការឆ្លងវីរុសបំប្លែងថ្មី អូមីក្រុង កម្ពុជាមានការរកឃើញទាំងករណីនាំចូល និងករណីឆ្លងក្នុងសហគមន៍។ ចំពោះករណីឆ្លងក្នុងសហគមន៍ គឺបានកើនលើសពី ៥០០ករណី ទៅហើយ។ ពាក់ព័ន្ធនឹងករណីវិជ្ជមានវីរុសបំប្លែងថ្មី អូមីក្រុង រាជរដ្ឋាភិបាលកម្ពុជា ក៏បានអនុញ្ញាតឱ្យមានការសម្រាកព្យាលបាលនៅតាមផ្ទះបានដែរ តែត្រូវផ្អែកលើស្ថានភាពជំងឺជាក់ស្ដែង៕ អត្ថបទ៖ គឹមហុក

ព្រះមហាក្សត្រយាងទៅក្រុងប៉េកាំង ដើម្បីចូលរួមបើកព្រឹត្តិការណ៍កីឡាអូឡាំពិក រដូវរងា

ភ្នំពេញ៖ ព្រះករុណាព្រះបាទសម្តេចព្រះរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាបានយាងទៅទីក្រុងប៉េកាំង ប្រទេសចិន ដើម្បីយាងចូលរួមបើកព្រឹត្តិការណ៍កីឡាអូឡាំពិករដូវរងា។នៅព្រឹកថ្ងៃទី៣ ខែកុម្ភៈនេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រួមជាមួយសម្តេច ថ្នាក់ដឹកនាំកំពូល នៃស្ថាប័នរដ្ឋសភា ព្រឹទ្ធសភា និងឥស្សរជនសំខាន់ៗមួយចំនួនទៀត នៃស្ថាប័នរាជរដ្ឋាភិបាល បានអញ្ជើញថ្វាយព្រះរាជដំណើររបស់ព្រះករុណាព្រះបាទសម្តេចព្រះរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា យាងទៅកាន់ទីក្រុងប៉េកាំង ដើម្បីចូលរួមបើកព្រឹត្តិការណ៍កីឡាអូឡាំពិក រដូវរងា ឆ្នាំ២០២២ ដែលនឹងប្រព្រឹត្តទៅចាប់ពីថ្ងៃទី០៤ ដល់ថ្ងៃទី២០ ខែកុម្ភៈនេះ។យោងតាមព្រះរាជសារ កាលពីថ្ងៃទី៨ ខែមករា ឆ្នាំ២០២២ ព្រះករុណា នឹងអវត្តមានពីមាតុប្រទេស ចាប់ពីថ្ងៃទី០៣ ដល់ថ្ងៃទី០៥ ខែកុម្ភៈ នេះ ដើម្បីចូលរួមក្នុងពិធីបើកសម្ពោធព្រឹត្តិការណ៍កីឡា អូឡាំពិក រដូវរងា នៅទីក្រុងប៉េកាំង នៃសាធារណរដ្ឋប្រជាមានិតចិន ។នៅក្នុងឱកាសអវត្តមានព្រះអង្គនេះ សម្តេចវិបុលសេនា ភក្តី សាយ ឈុំ ប្រធានព្រឹទ្ធសភា នឹងទទួល ជួយព្រះអង្គក្នុងឋានៈជាប្រមុខរដ្ឋស្តីទី នៃព្រះរាជាណាចក្រកម្ពុជា ។ប្រទេសចិន បានទទួលធ្វើជាម្ចាស់ផ្ទះក្នុងការរៀបចំកីឡាអូឡាំពិករដូវក្តៅ និងរដូវរងារឆ្នាំ២០២២ ចាប់ពីថ្ងៃទី០៤ ដល់ថ្ងៃទី២០ ខែកុម្ភៈ ឆ្នាំ២០២២។ ការរៀបចំកម្មវិធីដ៏មានន័យជាប្រវត្តិសាស្រ្តនេះ សម្រាប់ មនុស្សជាតិ ក្នុងពេលដែលពិភពលោកទាំងមូល បាននឹងកំពុងប្រឈមមុខនឹងវិបត្តិ នៃជំងឺកូវីដ-១៩។ ប្រទេសចិន កំពុងស្ថិតនៅក្នុងដំណាក់កាលថ្មីមួយទៀត ក្នុងការធានាទាំងសុវត្ថិភាពសន្តិសុខ ទាំងសុវត្ថិភាព សុខាភិបាលសាធារណៈ សម្រាប់គណៈប្រតិភូកីឡា និងសម្រាប់វេទិកាកីឡាអន្តរជាតិនេះ។ការប្រកួតកីឡាអូឡាំពិករដូវរងា ក្រុងប៉េកាំង ដែលរៀបចំឡើងក្នុងបរិបទ នៃជំងឺកូវីដ-១៩នេះ នឹង ក្លាយជាការប្រកួតដ៏ឱឡារិក និងជារឿងមង្គលជាសកលដ៏កម្រមាន។ បណ្តាទីក្រុងនៅប្រទេសចិន បានដាក់ចេញចំណាត់ការតឹងរ៉ឹង ដើម្បីគ្រប់គ្រងការឆ្លងរាលដាលថ្មីៗ នៃកូវីដ-១៩៕អត្ថបទ៖ មុត សុទ្ធ

អ្នកដំណើរអន្តរជាតិមកកម្ពុជាមានកំណើនឡើង ក្រោយអាស៊ានប្រកាសបើកទេសចរណ៍ក្នុងតំបន់

ភ្នំពេញ៖ គិតចាប់តាំងពីរដ្ឋមន្ត្រីទេសចរណ៍អាស៊ាន បានប្រកាសបើកទេសចរណ៍អាស៊ានឡើងវិញ នៅឯខេត្តព្រះសីហនុ កាលពីអំឡុងថ្ងៃទី១៩ ខែមករា ឆ្នាំ២០២២នេះមក រហូតមកដល់ពេលនេះ ចំនួនអ្នកដំណើរអន្តរជាតិធ្វើដំណើរតាមផ្លូវអាកាសចូលមកកម្ពុជា មានកំណើនឡើងជាង១៦% ដែលមានចំនួនជើងហោះហើរកើនពី៧ជើងទៅដល់១២ជើងក្នុងមួយថ្ងៃ។បើតាមឯកឧត្តម ជា អូន រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល បានថ្លែងប្រាប់BTV នៅថ្ងៃទី៣ ខែកុម្ភៈ ឆ្នាំ២០២២នេះថា ជារួមចាប់តាំងពីប្រទេសកម្ពុជាប្រកាសបើកប្រទេសវិញ កាលពីអំឡុងថ្ងៃទី១៥ ខែ វិច្ឆិកា ឆ្នាំ២០២១ ធៀបនឹងចាប់ពីអាស៊ានប្រកាសបើកទេសចរណ៍អាស៊ានវិញមក អ្វីដែលប្លែកគឺ ខេត្តសៀមរាប ចាប់ផ្តើមមានភ្ញៀវទេសចរអន្តរជាតិទៅទស្សនាឡើងវិញ ដោយក្នុងមួយថ្ងៃនៅអាកាសយានដ្ឋានអន្តរជាតិខេត្តសៀមរាបគឺបានទទួលភ្ញៀវក្នុងកម្រិតពី ៥០នាក់ទៅ២០០នាក់ ។ ដោយឡែកអាកាសដ្ឋានអន្តរជាតិនៅរាជធានីភ្នំពេញគឺមានកំណើនតិចតួចជាង ១០០០នាក់ ក្នុងមួយថ្ងៃ ខណៈអាកាសដ្ឋានអន្តរជាតិនៅខេត្តព្រះសីហនុ ក៏ចាប់ផ្តើមមានកម្រើកវិញដែរ។តាមតួលេខពីអគ្គនាយកដ្ឋានអន្តោប្រវេសន៍ បានឲ្យដឹងដែរថា គិតត្រឹមកម្ពុជារៀបចំវេទិកាទេសចរណ៍អាស៊ានAFTថ្ងៃទី១៦ ខែមករា រហូតដល់ថ្ងៃទី៣១ ខែមករា ឆ្នាំ២០២២ អ្នកដំណើរអន្តរជាតិចូលតាមអាកាសយានដ្ឋានអន្តរជាតិ មានចំនួន១៧,៣៤១នាក់ ជាមធ្យមមានប្រមាណជាង១,០០០នាក់ក្នុង១ថ្ងៃ ពោលគឺកើនឡើង១៦.៤៥% បើធៀបនឹងរយៈពេលដូចគ្នាមុនវេទិកាទេសចរណ៍អាស៊ាន។ឯកឧត្តម ជា អូន បញ្ជាក់ថា នៅពេលនេះ មានក្រុមហ៊ុនអាកាសចរណ៍ជាតិអន្តរជាតិប្រមាណ ៧ក្រុមហ៊ុន បានចុះបញ្ជីបើកជើងហោះហើរមកកម្ពុជា ក្នុងក្រុមហ៊ុនដែលសកម្ម ហោះហើរច្រើនប្រចាំថ្ងៃគឺមានក្រុមហ៊ុន Singapore Airline, Jetstar, Malaysia Airline, bankok airline,និង Air asia, ជាដើម ។ ដោយឡែកក្រុមហ៊ុនASEANA ដែលហោះមកពីប្រទេសកូរ៉េក្នុង១សប្តាហ៍គឺមានអ្នកប្រមាណ ៥០០ទៅ ៦០០នាក់ ខណៈហោះមកពីប្រទេសចិន ក៏ចាប់ផ្តើមមានដែរ តែលក់សំបុត្រមានតំលៃថ្លៃ។បើតាមលោក ធូន ស៊ីណាន ប្រធានសមាគមទេសចរណ៍អាស៊ីប៉ាភិច PATAប្រចាំនៅកម្ពុជា បានថ្លែងថា ចាប់តាំងពីអាស៊ានបើករនាំងទេសចរណ៍អាស៊ានមក បានជម្រុញការលក់កក់ទិញកញ្ចប់ទេសចរណ៍ក្នុងតំបន់អាស៊ាន មានកំណើនឡើង មកទស្សនាកម្ពុជាដោយចាប់ផ្តើមពីខែមីនាតទៅ ខណៈបណ្តាប្រទេសនៅអឺរ៉ុប ក៏មានកក់ដែរតែត្រូវការពេលវេលារៀបចំប្រមាណពី ៨ខែទៅ ១២ខែទើបអាចធ្វើដំណើរបាន៕ អត្ថបទ៖ ស៊ុម សុខជា

បណ្ដាញសង្គម

ព័ត៌មានថ្មីៗ

មន្រ្តីអន្តរក្រសួងកម្ពុជាទទួលបានការបណ្តុះបណ្តាលជំនាញទប់ស្តាត់វិទ្យុសកម្ម និងសារធាតុគីមី នុយក្លេអ៊ែរ

ប្រមុខកងទ័ពកម្ពុជា៖ កម្ពុជាស្រលាញ់សន្តិភាព ស្អប់ខ្ពើមសង្គ្រាម ប៉ុន្តែកម្ពុជាមិនបណ្តែតបណ្តោយឲ្យអ្នកឈ្លានពានទឹកដីខ្លួនឡើយ

ប្រមុខUN រិះគន់ប្រតិបត្តិការផ្តល់ជំនួយនៅហ្កាហ្សាគាំទ្រដោយអាមេរិកថា «កំពុងសម្លាប់មនុស្សយ៉ាងច្រើន»

សម្តេចតេជោ៖ គណបក្សប្រជាជនកម្ពុជាគាំទ្រពេញទំហឹង ចំពោះរាជរដ្ឋាភិបាលយកសំណុំរឿងព្រំដែនជាមួយថៃ ទៅកាន់តុលាការឡាអេ

លោក Trump បញ្ឈប់កិច្ចពិភាក្សាពាណិជ្ជកម្មជាមួយកាណាដា ដោយបំផ្លាញសុទិដ្ឋិនិយមជុំវិញកិច្ចព្រមព្រៀងដំឡើងពន្ធ

ចិន បញ្ជាក់ពីក្របខណ្ឌកិច្ចព្រមព្រៀងពាណិជ្ជកម្ម ដែលបានឈានដល់ជាមួយសហរដ្ឋអាមេរិក

ប្រធានគណបក្សប្រជាជន អំពាវនាវឲ្យពលរដ្ឋរួមគ្នាប្រឆាំងក្រុមជ្រុលនិយម ដែលចង់បំផ្លិតបំផ្លាញសុខសន្តិភាព

ប្រមុខគណបក្សកាន់អំណាច៖ គណបក្សប្រជាជនកម្ពុជា រួមសុខរួមទុក្ខ ជាមួយប្រជាជនគ្រប់ដំណាក់កាលទាំងអស់

លោក Putin និយាយថា សំណើសន្តិភាព រុស្ស៊ីនិងអ៊ុយក្រែន មានភាពផ្ទុយគ្នា

លោក Trump នឹងពិចារណាទម្លាក់គ្រាប់បែកលើអ៊ីរ៉ង់ម្តងទៀត ហើយលុបចោលផែនការបន្ធូរបន្ថយទណ្ឌកម្ម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

ក្នុងឆ្នាំ២០២១ បេសកកម្មរថយន្តសម្អាតផ្លូវ ខ្មែរ ប៊ែវើរីជីស សម្អាតផ្លូវបានជាង ១៥,៣៨៣ គីឡូម៉ែត្រ

មន្រី្តជួរមុខ និងពលរដ្ឋបន្តមកចាក់វ៉ាក់សាំងដូសទី៤ នៅមនី្ទរពេទ្យបង្អែករាជធានីភ្នំពេញ

គណៈរដ្ឋមន្ត្រីអនុម័តទាំងស្រុង លើសេចក្តីព្រាងច្បាប់ការពាររុក្ខជាតិ និងភូតគាមអនាម័យ

សហគមន៍ទេសចរណ៍ និងអង្គការក្រៅរដ្ឋាភិបាល នាំគ្នាដាំកូនឈើនៅតំបន់ព្រៃលិចទឹកបឹងទន្លេសាប

អាជ្ញាធរជាតិអប្សរា ធ្វើកំណាយនៅទួលឡដុតកុលាលភាជន៍ នៅក្រុមឡទ្វារដីឆ្នាំង

កម្ពុជា-ថៃ ចុះហត្ថលេខារួមគ្នាលើ«លក្ខខណ្ឌស្តីពីកិច្ចសហប្រតិបត្តិការ» រវាងកងទ័ពជើងគោកនៃប្រទេសទាំងពីរ

រាជធានីភ្នំពេញព្រមានផាកពិន័យ និងដាក់ពន្ធនាគារ ចំពោះអ្នកវិជ្ជមានកូវីដដែលមិនរាយការណ៍ជូនអាជ្ញាធរ

ព្រះមហាក្សត្រយាងទៅក្រុងប៉េកាំង ដើម្បីចូលរួមបើកព្រឹត្តិការណ៍កីឡាអូឡាំពិក រដូវរងា

អ្នកដំណើរអន្តរជាតិមកកម្ពុជាមានកំណើនឡើង ក្រោយអាស៊ានប្រកាសបើកទេសចរណ៍ក្នុងតំបន់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ក្នុងឆ្នាំ២០២១ បេសកកម្មរថយន្តសម្អាតផ្លូវ ខ្មែរ ប៊ែវើរីជីស សម្អាតផ្លូវបានជាង ១៥,៣៨៣ គីឡូម៉ែត្រ

មន្រី្តជួរមុខ និងពលរដ្ឋបន្តមកចាក់វ៉ាក់សាំងដូសទី៤ នៅមនី្ទរពេទ្យបង្អែករាជធានីភ្នំពេញ

គណៈរដ្ឋមន្ត្រីអនុម័តទាំងស្រុង លើសេចក្តីព្រាងច្បាប់ការពាររុក្ខជាតិ និង​ភូតគាម​អនាម័យ

សហគមន៍ទេសចរណ៍ និងអង្គការក្រៅរដ្ឋាភិបាល នាំគ្នាដាំកូនឈើ​នៅ​តំបន់ព្រៃលិច​ទឹកបឹង​ទន្លេសាប

អាជ្ញាធរជាតិអប្សរា ធ្វើកំណាយនៅទួលឡដុត​កុលាលភាជន៍​ នៅក្រុមឡទ្វារដីឆ្នាំង

កម្ពុជា-ថៃ ចុះហត្ថលេខារួមគ្នាលើ«លក្ខខណ្ឌស្តីពីកិច្ចសហប្រតិបត្តិការ» រវាង​កង​ទ័ពជើង​គោក​នៃប្រទេសទាំងពីរ

រាជធានីភ្នំពេញព្រមានផាកពិន័យ និងដាក់ពន្ធនាគារ ចំពោះអ្នកវិជ្ជមានកូវីដ​ដែល​មិនរាយការណ៍​ជូន​អាជ្ញាធរ

ព្រះមហាក្សត្រយាងទៅក្រុងប៉េកាំង ដើម្បីចូលរួមបើកព្រឹត្តិការណ៍កីឡាអូឡាំពិក រដូវរងា

អ្នកដំណើរអន្តរជាតិមកកម្ពុជាមានកំណើនឡើង ក្រោយអាស៊ានប្រកាសបើកទេសចរណ៍ក្នុងតំបន់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

គណៈរដ្ឋមន្ត្រីអនុម័តទាំងស្រុង លើសេចក្តីព្រាងច្បាប់ការពាររុក្ខជាតិ និងភូតគាមអនាម័យ

សហគមន៍ទេសចរណ៍ និងអង្គការក្រៅរដ្ឋាភិបាល នាំគ្នាដាំកូនឈើនៅតំបន់ព្រៃលិចទឹកបឹងទន្លេសាប

អាជ្ញាធរជាតិអប្សរា ធ្វើកំណាយនៅទួលឡដុតកុលាលភាជន៍ នៅក្រុមឡទ្វារដីឆ្នាំង

កម្ពុជា-ថៃ ចុះហត្ថលេខារួមគ្នាលើ«លក្ខខណ្ឌស្តីពីកិច្ចសហប្រតិបត្តិការ» រវាងកងទ័ពជើងគោកនៃប្រទេសទាំងពីរ

រាជធានីភ្នំពេញព្រមានផាកពិន័យ និងដាក់ពន្ធនាគារ ចំពោះអ្នកវិជ្ជមានកូវីដដែលមិនរាយការណ៍ជូនអាជ្ញាធរ