BTV NEWS

រោងចក្រ វិរៈ ប៊ុនថាំ ជីកសិកម្ម មានសមត្ថភាពផលិតបានប្រមាណ ២០០តោន ក្នុងមួយថ្ងៃសម្ពោធដាក់ឱ្យដំណើរការជាផ្លូវការ

រយៈពេល៣ខែដំបូង ការដោះដូរពាណិជ្ជកម្មកម្ពុជា-វៀតណាម សម្រេចបាន ៣,៤៤ ពាន់លានដុល្លារកើនឡើង ៤,៣%

ក្នុងត្រីមាសទី១ កម្ពុជានាំចេញសំបកកង់ឡាន និងគ្រឿងបន្លាស់ផ្សេងៗមានទឹកប្រាក់ជាង ៥៨០ លានដុល្លារ

ថ្លៃលក់រាយប្រេងឥន្ធនៈតាមស្ថានីយចាប់ថ្ងៃទី២៤ មេសានេះ សាំងឡើងបន្ដិច ខណៈម៉ាស៊ូតបន្តធ្លាក់ចុះ

សេដ្ឋកិច្ច និង កសិកម្ម

រាជរដ្ឋាភិបាលបញ្ចេញឥណទានគាំទ្រគម្រោងស្រូវអង្ករមានទំហំទឹកប្រាក់ ៨០ លានដុល្លារ

ភ្នំពេញ៖ រាជរដ្ឋាភិបាលបានបញ្ចេញឥណទាន គាំទ្រគម្រោងស្រូវអង្ករនៅកម្ពុជា គិតមកដល់ពេលនេះ មានទំហំទឹកប្រាក់ជាង ៨០ ដុល្លារអាមេរិក ដោយរាជរដ្ឋាភិបាល នឹងពិចារណាផ្តល់ឥណទានបន្ថែម ដើម្បីជម្រុញផលិតកម្មស្រូវអង្ករ និងចូលរួមចំណែកដល់កំណើនសេដ្ឋកិច្ចក្រោយពីវិបត្តិកូវីដ ១៩ នេះ។ឯកឧត្តម ចាន់ សីហា អគ្គនាយករងធនាគារអភិវឌ្ឍន៍ជនបទ និងកសិកម្ម (ARDB) នៃក្រសួងសេដ្ឋកិច្ច និងហិរញ្ញវត្ថុ ថ្លែងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV នៅថ្ងៃទី ១៥ ខែ សីហា ឆ្នាំ ២០២២ នេះថា ចំពោះគម្រោងពិសេសរបស់រាជរដ្ឋាភិបាល ដែលធនាគារអភិវឌ្ឍន៍ជនបទ និងកសិកម្ម បានអនុវត្តកន្លងមករួមមានគម្រោងគាំទ្រដល់វិស័យស្រូវអង្ករសម្រាប់ការនាំចេញ និងគម្រោងគំាទ្រដល់សហគ្រាសធុនតូច និងធម្យម ដែលពាក់ព័ន្ធវិស័យកសិកម្ម ដែលមានទំហំទឹកប្រាក់សរុប ១០០ លានដុល្លារ។ឯកឧត្តម បន្តថា ធនាគារអភិវឌ្ឍន៍ជនបទ និងកសិកម្ម បានអនុវត្តគម្រោងនេះចាប់តាំងពីឆ្នាំ ២០១៦ ។ មកដល់ពេលនេះ ARDB បានបញ្ចេញថវិកាប្រមាណជា ៨០ លានដុល្លារអាមេរិករួចហើយ គឺការគាំទ្រវិស័យស្រូវអង្ករតែមួយមុខគត់ ។ ចំណែកជំហានបន្តបន្ទាប់ទៀត ឯកឧត្តម រំពឹងថា រាជរដ្ឋាភិបាល នឹងពិចារណាផ្តល់ឥណទានបន្ថែម សម្រាប់គម្រោងទាំងនេះ ដើម្បីជម្រុញកំណើនសេដ្ឋកិច្ច នៅក្រោយពីវិបត្តិជំងឺកូវីដ-១៩ នេះ។ទាក់ទងគម្រោងគាំទ្រស្រូវអង្ករ,លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា ថ្លែងថា រាជរដ្ឋាភិបាលតែងតែគិតគូរនឹងផ្តល់កញ្ចប់ថវិកាពិសេស ដើម្បីគាំទ្រដល់ស្រូវអង្ករកម្ពុជា ជាពិសេសការផ្តល់ឥណទានជាទុនបង្វែល សម្រាប់ការប្រមូលទឹកស្រូវរបស់ម្ចាស់សហគ្រាសរោងម៉ាស៊ីនពីកសិករ, គម្រោងពង្រីករោងម៉ាស៊ីនកិនស្រូវ និងគម្រោងសម្រាប់បង្កើតឡសម្ងួតជាដើម ។ ឯកឧត្តម ចាន់ សីហា បញ្ជាក់ថា គម្រោងផ្តល់ហិរញ្ញប្បទានពិសេសរបស់រាជរដ្ឋាភិបាល បានចូលរួមចំណែកយ៉ាងខ្លាំង ជាពិសេសក្នុងការរីករាលដាលជម្ងឺកូវីដ ១៩ ដើម្បីលើកកម្ពស់ជីវភាពរស់នៅរបស់ប្រជាជន និងសម្រាប់ស្តុកស្បៀងក្នុងវិបត្តិដែលកំពុងកើតឡើងជាដើម, ជាក់ស្តែងការគាំទ្រសម្រាប់ការនាំចេញស្រូវអង្ករ តាមរយៈការផ្តល់ឥណទានមានការប្រាក់ទាបនេះ គឺជាការចូលរួមចំណែកកាត់នូវបន្ថយថ្លៃដើមដល់ម្ចាស់អាជីវកម្មជាច្រើនផងដែរ៕ អត្ថបទ៖ សុន រ៉ាឌី

ពន្ធដារប្រមូលពន្ធ-អាករបានជាង ២ ២១០ លានដុល្លារអាមេរិក ក្នុងរយៈពេល៧ខែ

ភ្នំពេញ៖ អគ្គនាយកដ្ឋានពន្ធដារ បានប្រមូលចំណូលពន្ធអាករគ្រប់ប្រភេទ តាមប្រព័ន្ធគ្រប់គ្រងទិន្នន័យអនឡាញ អនុវត្តបានចំនួនជិត ៨ ៩៥១ ប៊ីលានរៀល ត្រូវប្រមាណជាង ២ ២១០ លានដុល្លារ ក្នុងរយៈពេល៧ខែ ឆ្នាំ២០២២ ស្មើជាង ៧៨% នៃផែនការច្បាប់ហិរញ្ញវត្ថុប្រចាំឆ្នាំ។របាយការណ៍របស់អគ្គនាយកដ្ឋានពន្ធដារ បានបង្ហាញឲ្យដឹងថា នៅក្នុងខែ កក្កដា ឆ្នាំ ២០២២ នេះ ចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារប្រមូលបាន តាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ មានចំនួនជិត ៩៧០ ប៊ីលានរៀល ត្រូវប្រមាណជាង ២៣៩ លានដុល្លារ ស្មើជាង ៨% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២២ ប្រៀបធៀបនឹងចំណូលពន្ធ-អាករប្រចាំនេះ ទៅខែកក្កដា ឆ្នាំ២០២១ ឃើញថា បានកើនឡើងចំនួនជាង ១៥៦ ប៊ីលានរៀលប្រមាណជាង ៣៨ លានដុល្លារ ស្មើជាង ១៩%។ចំណែកប្រមូលចំណូលសរុបរយៈពេល ៧ខែ ឆ្នាំ២០២២ នេះវិញ ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបានជាក់ស្ដែង តាមប្រព័ន្ធគ្រប់គ្រងទិន្នន័យចំណូលអនឡាញ មានចំនួនជិត ៨ ៩៥១ ប៊ីលានរៀល ត្រូវប្រមាណជាង ២ ២១០ លានដុល្លារ ស្មើជាង ៧៨% នៃផែនការច្បាប់ហិរញ្ញវត្ថុប្រចាំឆ្នាំ ធៀបនឹងចំណូលពន្ធ-អាករក្នុងរយៈពេលដូចគ្នា ឆ្នាំ២០២១ កើនឡើងជាង ១ ៩៨៩ ប៊ីលានរៀល ត្រូវជាង ៤៩១ លានដុល្លារ ស្មើជាង ២៨%។ឯកឧត្តម គង់ វិបុល អគ្គនាយកដ្ឋានពន្ធដារ លើកឡើងថា ទោះបីជាមានហានិភ័យដែលបណ្តាលពីភាពមិនប្រាកដប្រជា និងការប្រែប្រួលបរិបទសេដ្ឋកិច្ចសកល រលកនៃការរីករាលដាល និងបំប្លែងឥតឈប់ឈរនៃមេរោគកូវីដ-១៩ ភាពតាន តឹងនៃភូមិសាស្ត្រនយោបាយ និងសន្តិសុខសកល ដែលបានជះឥទ្ធិពលមកលើស្ថានភាពសេដ្ឋកិច្ចកម្ពុជាយ៉ាងណាក្ដី ក៏ស្ថានភាពនៃការគ្រប់គ្រងប្រមូលចំណូលពន្ធក្នុងឆ្នាំ២០២០, ឆ្នាំ២០២១ និងរយៈពេល ៧ ខែ ឆ្នាំ ២០២២ នេះ នៅតែរក្សាបាននូវស្ថានភាពល្អប្រសើរ ដោយតែងតែសម្រេចបានគ្រប់ និងលើសផែនការ កំណត់ក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ ដែលបានឆ្លើយតបទៅនឹងតម្រូវការថវិកាសម្រាប់ការចំណាយនានា របស់រដ្ឋាភិបាល ជាពិសេស ក្នុងការប្រយុទ្ធប្រឆាំងនឹងកូវីដ-១៩៕អត្ថបទ៖ សុន រ៉ាឌី

កម្ពុជានាំចេញកៅស៊ូមានទឹកប្រាក់សរុប ២៥៥លានដុល្លារ ក្នុងរយៈពេល៧ខែ

ភ្នំពេញ៖ កម្ពុជា បាននាំចេញកៅស៊ូ ទៅក្រៅប្រទេស ទទួលបានចំណូលសរុប ប្រមាណ ២៥៥លានដុល្លារ ក្នុងរយៈពេល៧ខែ ឆ្នាំ២០២២នេះ។របាយការណ៍របស់អគ្គនាយកដ្ឋានកៅស៊ូ បានឱ្យដឹងថា កម្ពុជាបាននាំចេញកៅស៊ូស្ងួតចំនួន ១៦១ ៥៦២តោនក្នុងរយៈពេល៧ខែនៃឆ្នាំ ២០២២ ធ្លាក់ចុះបន្តិចបន្តួច ០.៣ ភាគរយ ធៀបនឹងរយៈពេលដូចគ្នាឆ្នាំមុន។របាយការណ៍ បាននិយាយថា ព្រះរាជាណាចក្រកម្ពុជា ទទួលបានប្រាក់ចំណូលចំនួន ២៥៤.៨ លានដុល្លារអាម៉េរិកពីការនាំចេញទំនិញក្នុងអំឡុងខែមករាដល់ខែកក្កដាឆ្នាំនេះ ធ្លាក់ចុះ ៦ ភាគរយពី ២៧១ លានដុល្លារក្នុងរយៈពេលដូចគ្នា កាលពីឆ្នាំមុន។ឯកឧត្តម ហ៊ឹម អូន អគ្គនាយកនៃអគ្គនាយកដ្ឋានកៅស៊ូ បាននិយាយនៅក្នុងរបាយការណ៍ថា ជ័រកៅស៊ូមួយតោនមានតម្លៃជាមធ្យម ១ ៥៧៧ ដុល្លារក្នុងអំឡុងពេលប្រាំពីរខែនៃឆ្នាំ ២០២២ បានថយចុះ ៩៥ ដុល្លារ ក្នុងមួយតោន បើធៀបនឹងរយៈពេលដូចគ្នាកាលពីឆ្នាំមុន ។ កម្ពុជានាំចេញជ័យកៅស៊ូភាគច្រើនទៅកាន់ប្រទេសម៉ាឡេស៊ី វៀតណាម សិង្ហបុរី និងចិន។ការវិនិយោគពីវិស័យឯកជន បង្កើតរោងចក្រផលិតកង់រថយន្ត ក្នុងក្រុងបាវិត និងក្រុងព្រះសីហនុ កាលពីពេលថ្មីៗនេះ នឹងជួយជំរុញ និងធានាទីផ្សារដល់ជ័រកៅស៊ូក្នុងស្រុក។របាយការណ៍ បានបន្តថា មកដល់ពេលនេះ កម្ពុជាបានដាំដើមកៅស៊ូលើផ្ទៃដីសរុបចំនួន ៤០៤ ០៤៤ ហិកតា ដែលក្នុងនោះផ្ទៃដីចៀរជ័រកៅស៊ូ ៣១០.១៩៣ ហិកតា ឬ ៧៧ ភាគរយ៕ អត្ថបទ៖ វណ្ណៈ

ស្តង់ដារជួយលើកកម្ពស់ផលិតផល និងការប្រកួតប្រជែងនៅទីផ្សារក្នុងស្រុក និងនាំចេញ

ភ្នំពេញ៖ កម្ពុជា បានអនុម័តស្តង់ដារ មានចំនួនជាង ១ ពាន់ស្តង់ដាររួចហើយ និងបច្ចុប្បន្ន ក្រុមប្រឹក្សាស្តង់ដារជាតិ កំពុងជម្រុញបង្កើត និងងអនុម័តយកស្តង់ដារថ្មីៗបន្ថែមទៀត សម្រាប់ជាមូលដ្ឋានបើកនូវរបាំងបច្ចេកទេស ដើម្បីលើកកម្ពស់ និងការប្រកួតប្រជែងផលិតផលទាំងក្នុង និងក្រៅស្រុក។តាមរបាយការណ៍របស់វិទ្យាស្ថានស្តង់ដារកម្ពុជា នៃក្រសួងឧស្សាហកម្ម វិទ្យាសាស្ត្រ បចេ្ចកវិទ្យា និងនវានុវត្តន៍ បង្ហាញឲ្យដឹងថា វិទ្យាស្ថានបានកំពុងខិតខំប្រឹងប្រែង រៀបចំ កែសម្រួលស្តង់ដារអន្តរជាតិមួយចំនួន ឲ្យមកជាស្តង់ដារជាតិ, គិតមកដល់ពេលនេះកម្ពុជាបានអនុម័តស្តង់ដារ មានចំនួន ១ ០៣០ ស្តង់ដាររួចហើយ នឹងកំពុងជម្រុញបង្កើត និងអនុម័តយកស្តង់ដារថ្មីៗឲ្យបានច្រើនទៀត ជាពិសេសស្តង់ដារសម្រាប់វិស័យឧស្សាហកម្ម និងកសិកម្មជាដើម។ វិទ្យាស្ថានស្តង់ដារកម្ពុជា បានចេញ និងបន្តវិញ្ញាបនបត្រប្រព័ន្ធសរុបចំនួន ៣៨ ក្នុងនោះរួមមានប្រព័ន្ធវិញ្ញាបនបត្រប្រព័ន្ធការអនុវត្តផលិតកម្មល្អ (GMP), វិញ្ញាបនបត្រប្រព័ន្ធសុវត្ថិភាពម្ហូបអាហារ (HACCP), ចេញវិញ្ញាបនបត្រប្រព័ន្ធប្រព័ន្ធគ្រប់គ្រងគុណភាព (ISO 9001:2015), វិញ្ញាបនបត្រប្រព័ន្ធគ្រប់គ្រងសុវត្តិភាពម្ហូបអាហារ ( ISO 22000: 2018) និងវិញ្ញាបនបត្របញ្ជាក់អនាម័យជាដើម។ស្តង់ដាសំខាន់ៗ ដែលកម្ពុជាកំពុងដាក់ឲ្យប្រើប្រាស់រួមមាន៖ ស្តង់ដារផលិតផលផ្នែកម្ហូបអាហារ និងម្ហូបអាហារវេចខ្ចប់ជាមុន ស្តង់ដារផលិតផលផ្នែកឧបករណ៍អគ្គិសនី និងអេឡិចត្រូនិក ស្តង់ដាផ្នែកវិធីសាស្ត្រធ្វើតេស្ត, ស្តង់ដាផ្នែកសារធាតុគីមី, ស្តង់ដាផលិតផលផ្នែកសម្ភារសំណង់, ស្តង់ដាផលិតផលផ្នែកយានយន្ត, ស្តង់ដាផលិតផលផ្នែកផលិតផលពីកៅស៊ូ, ស្តង់ដាផលិតផលផ្នែកគ្រឿងសង្ហារឹមផលិតពីឈើ ស្ថិតក្នុងចំណោមស្តង់ដារផ្សេងទៀត៕ អត្ថបទ៖ សុន រ៉ាឌី

អ្នកជំនាញកម្ពុជាជួបប្រជុំគ្នា បើកវេទិកាស្តីពីបញ្ញាសិប្បនិមិ្មត និងសង្គម

ភ្នំពេញ៖ ដោយសង្កេតឃើញថា បញ្ញាសិប្បនិមិ្មត (Artificial Intelligence) ហៅកាត់ថា អេអាយ (AI) កំពុងដើរតួនាទីយ៉ាងសំខាន់ក្នុងការគាំទ្រនិងជំរុញកំណើនសេដ្ឋកិច្ច និងកសាងសង្គមឌីជីថលនៅកម្ពុជា សាកលវិទ្យាល័យខេមតិច សហការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង AI-Cambodia បានរៀបចំវេទិកាសំខាន់មួយ ស្តីពីបញ្ញាសិប្បនិមិ្មត និងសង្គម នៅរាជធានីភ្នំពេញ។វេទិកាស្តីពី បញ្ញាសិប្បនិមិ្មត និងសង្គម បានប្រព្រឹត្តទៅ នៅរសៀលថ្ងៃទី១០ ខែសីហា ឆ្នាំ២០២២ ដោយមានការចូលរួមពីអ្នកតំណាងមកពីក្រសួងពាក់ព័ន្ធ សាកលវិទ្យាល័យ ស្ថាប័នស្រាវជ្រាវ វិស័យឯកជន និងសិស្ស និស្សិត ដើម្បីឆ្លើយតបទៅនឹងការអភិវឌ្ឍ និងលើកកម្ពស់ការប្រើប្រាស់បច្ចេកវិទ្យាបញ្ញាសិប្បនិម្មិតក្នុងគោលដៅល្អៗ។ឯកឧត្តមសាស្រ្តាចារ្យបណ្ឌិត ឆែម គាតរិទ្ធី រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋមន្រ្តីស្តីទីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ប្រាប់ទូរទស្សន៍ព័ត៌មាន ប៊ីធីវី នៅក្រោយអង្គវេទិកាថា វេទិកានេះរៀបចំឡើងក្នុងយន្តការជាកត្តាលិករជំរុញការពិភាក្សា និងពង្រឹងកិច្ចសហប្រតិបត្តិការក្នុងចំណោមភាគីពាក់ព័ន្ធ ដើម្បីប្រមើមើលកាលានុវត្តភាព និងដោះស្រាយបញ្ហាចម្បងមួយចំនួនមាន ដូចជាឯកជនភាព សនិ្តសុខនិងសុវត្ថិភាព ការអប់រំ សុខភាព ទីផ្សារការងារ ការអភិវឌ្ឍឧស្សាហកម្ម និងការបង្កើនជំនាញ ឬបង្កើតជំនាញថ្មីសម្រាប់យុគសម័យឌីជីថល។លោក យឹម ប្រសិទ្ធីឬទ្ធិ នាយកប្រតិបតិ្ត នៃក្រុមហ៊ុន Quantum Engineering and Manufacturing បានលើកឡើងថា បច្ចេកវិទ្យាមួយនេះ ស្ថិតនៅក្នុងដំណាក់កាលអភិវឌ្ឍន៍ដំបូង និងទាមទារឱ្យបន្តការអភិវឌ្ឍដើម្បីឲ្យវានៅតែអាចមានសមត្ថភាពជំរុញនវានុវត្តន៍ និងការលូតលាស់ផ្នែកសេដ្ឋកិច្ច។ ក្នុងន័យនេះហើយ បានជាការអភិវឌ្ឍបច្ចេកវិទ្យាបញ្ញាសិប្បនិម្មិត ត្រូវបានចាត់ទុកជារបៀបវារៈ និងគោលនយោបាយចម្បងរបស់ប្រទេសមួយចំនួនធំ។វេទិកានេះថា ដើម្បីពិនិត្យមើលទិដ្ឋភាពនៃការប្រើប្រាស់បច្ចេកវិទ្យាបញ្ញាសិប្បនិម្មិតជាទូទៅ នៅកម្ពុជានា ពេលបច្ចុប្បន្ន និងនិន្នាការអនាគត និងឥទិ្ធពលនៃបច្ចេកវិទ្យាមួយនេះទៅលើសង្គមទាំងមូល ព្រមទាំងបង្ហាញ ពីគោលនយោបាយសំខាន់ៗរបស់រាជរដ្ឋាភិបាល សម្រាប់ការលើកកម្ពស់ និងពង្រឹងការអភិវឌ្ឍបច្ចេក វិទ្យាក្នុងយុគសម័យបដិវត្តន៍ឧស្សាហកម្ម៤.០៕អត្ថបទ៖ បូរ៉ាវី

កម្ពុជា-សហរដ្ឋអាម៉េរិក បន្តកិច្ចសហប្រតិបត្តិការពាណិជ្ជកម្ម-វិនិយោគ

ភ្នំពេញ៖ កម្ពុជា និងសហរដ្ឋអាមេរិក ជំរុញបន្តកិច្ចសហប្រតិបត្តិការ សំដៅលើកកម្ពស់បរិយាកាសវិនិយោគ និងទាក់ទាញក្រុមហ៊ុនវិនិយោគធំៗរបស់សហរដ្ឋអាម៉េរិក ឱ្យមកវិនិយោគរយៈពេលវែងនៅកម្ពុជា។នេះជាការលើកឡើងក្នុងជំនួបរវាង ឯកឧត្តម បួន សារៈមុនី រដ្ឋលេខាធិការ ក្រសួងពាណិជ្ជកម្ម កាលពីថ្ងៃទី១០ ខែសីហា ជាមួយគណៈប្រតិភូ តំណាងពាណិជ្ជកម្មសហរដ្ឋអាម៉េរិក ដឹកនាំដោយលោកស្រី Wallis Yu នាយកប្រចាំតំបន់អាស៊ីអាគ្នេយ៍ និងប៉ាស៊ីហ្វិក ក្រោមកិច្ចសម្របសម្រួលដោយស្ថានទូតសហរដ្ឋអាម៉េរិកប្រចាំនៅកម្ពុជា ដើម្បីទទួលបាននូវបច្ចុប្បន្នភាពព័ត៌មានទាក់ទងនឹងវិស័យពាណិជ្ជកម្ម និងវិនិយោគ នៅកម្ពុជា។ក្នុងជំនួបនេះ ឯកឧត្តមរដ្ឋលេខាធិការ បានលើកឡើងថា ទោះបីស្ថិតក្នុងស្ថានភាពរីករាលដាលនៃជម្ងឺកូវីដ-១៩ក្តី ទំហំពាណិជ្ជកម្មកម្ពុជា-សហរដ្ឋអាម៉េរិកមានចំនួន ៦.២ប៊ីលានដុល្លារអាម៉េរិក ក្នុងរយៈពេល ៦ខែដើមឆ្នាំ២០២២ ដែលជាការកើនឡើងក្នុងអត្រាកំណើន ៦១.៥៤% ធៀបនឹង ៦ខែ ដើមឆ្នាំ២០២១។ឯកឧត្តមរដ្ឋលេខាធិការ បន្តថា កម្ពុជាបាននិងកំពុងខិតខំប្រឹងប្រែងឥតឈប់ឈរ ដើម្បីធ្វើយ៉ាងណាឱ្យបរិយាកាសពាណិជ្ជកម្ម-វិនិយោគនៅកម្ពុជាកាន់តែមានភាពទាក់ទាញ និងអំណោយផលដល់វិនិយោគិនអន្តរជាតិមកពីបណ្តាប្រទេសនានាលើពិភពលោក។ជាការឆ្លើយតប លោកស្រី Wallis Yu ក៏បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា ជាពិសេសគឺក្រសួងពាណិជ្ជកម្មកម្ពុជា ដែលបានធ្វើការសម្របសម្រួលអន្តរក្រសួងដើម្បីឱ្យកម្ពុជាសម្រេចទទួលយកស្តង់ដារយានយន្តសហរដ្ឋអាម៉េរិក ជាហេតុធ្វើឱ្យកម្ពុជាបានក្លាយជាទីផ្សារដ៏សំខាន់មួយក្នុងវិស័យយានយន្តសហរដ្ឋអាម៉េរិក។បន្ថែមពីនេះ លោកស្រីបានស្នើសុំឱ្យក្រសួងពាណិជ្ជកម្មកម្ពុជា បន្តសហការផ្តល់បច្ចុប្បន្នភាពព័ត៌មានទាក់ទងនឹងវិស័យច្បាប់ និងបទប្បញ្ញត្តិ ពាក់ព័ន្ធក្នុងវិស័យពាណិជ្ជកម្ម-វិនិយោគ ដល់តំណាងពាណិជ្ជកម្មសហរដ្ឋអាម៉េរិកសំដៅលើកកម្ពស់បរិយាកាសវិនិយោគ និងទាក់ទាញក្រុមហ៊ុនវិនិយោគធំៗរបស់សហរដ្ឋអាម៉េរិក ឱ្យមកវិនិយោគរយៈពេលវែងនៅកម្ពុជា ក្នុងវិស័យបច្ចេកវិទ្យា មានដូចជា ក្រុមហ៊ុន Amazon និង ក្រុមហ៊ុន Meta (Facebook) ជាដើម។ជាមួយគ្នានេះ លោកស្រីក៏បានជម្រាបមកកាន់ក្រសួងពាណិជ្ជកម្មកម្ពុជាផងដែរថា ថ្មីៗនេះរាជរដ្ឋាភិបាលសហរដ្ឋអាម៉េរិកកំពុងដំណើរការនីតិវិធីវាយតម្លៃលក្ខខណ្ឌនានា លើប្រទេសដែលទទួលអត្ថប្រយោជន៍មួយចំនួន ដើម្បីសម្រេចថានឹងបន្តផ្តល់ប្រព័ន្ធអនុគ្រោះពន្ធទូទៅ (GSP) ដល់ប្រទេសទាំងនោះ ដែលក្នុងនោះក៏មានកម្ពុជាផងដែរ៕ អត្ថបទ៖ វណ្ណៈ

កម្ពុជានាំទំនិញចេញមានតម្លៃជាង ១៣ ប៊ីលានដុល្លារ ក្នុងរយៈពេល៧ខែ

ភ្នំពេញ៖ កម្ពុជានាំចេញទំនិញចេញមានទឹកប្រាក់ជាង ១៣ ប៊ីលានដុល្លារ ក្នុងរៈពេល៧ខែ ឆ្នាំ២០២២នេះ កើនឡើង ៣០.៧ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ផលិតផលសំលៀកបំពាក់ ស្បែកជើង កាបូបធ្វើដំណើរ រួមចំណែកពាក់កណ្តាលនៃទំនិញនាំចេញរបស់កម្ពុជា។យោងតាមរបាយការណ៍ផ្លូវការពីអគ្គនាយកដ្ឋានគយ និងរដ្ឋាករ ទំហំពាណិជ្ជកម្មអន្តរជាតិរបស់កម្ពុជា សម្រេចបាន ៣២.៨២ប៊ីលានដុល្លារ ក្នុងអំឡុងពេលពីខែមករា ដល់ខែកក្កដា ឆ្នាំនេះ កើនឡើង ២១.៣ ភាគរយ ធៀបនឹងរយៈពេលដូចគ្នាឆ្នាំមុន។សហរដ្ឋអាមេរិក នៅតែជាទីផ្សារនាំចេញសំខាន់របស់ទំនិញរបស់កម្ពុជា មានតម្លៃទឹកប្រាក់ ប្រមាណ ៥ ៦៩៥ លានដុល្លារ ដោយបានរួមចំណែក ប្រមាណ ៤៣ភាគរយនៃតម្លៃការនាំចេញសរុបក្នុងរយៈពេលនេះ។ប្រទេសវៀតណាម និងប្រទេសចិន ជាទីផ្សារធំលំដាប់ទីពីរ និងទីបី ដោយមានទំហំនាំចេញ ១ ៣២៦ លានដុល្លារនិង ៨០៩ លានដុល្លារ។ ចំណែក ការនាំចូលរបស់កម្ពុជា មានតម្លៃ ១៩ ប៊ីលានដុល្លារកើនឡើង ១៥.៤ ភាគរយ ធៀបនឹងរយៈពេលដូចគ្នាឆ្នាំមុន។ទំនិញសំខាន់ៗដែលកម្ពុជា នាំចេញ មានដូចជា សំលៀកបំពាក់ តម្លៃសរុប ៥ ៦១៩ លានដុល្លារ វត្ថុអំពីស្បែក តម្លៃ ១ ២២៥ លានដុល្លារ ផលិតផលស្បែកជើង តម្លៃ ១ ០៤៥ លានដុល្លារ ឧបករណ៍អគ្គីសនីតម្លៃ ៩២៧លានដុល្លារ។ឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លើកឡើងក្នុងសន្និសីទសារព័ត៌មាន កាលពីពេលថ្មីៗនេះថា បានចាត់ទុកកំណើននេះ ដោយសារតែការចាប់ផ្តើមឡើងវិញពេញលេញនៃសកម្មភាពសេដ្ឋកិច្ចសង្គមនៅកម្ពុជា ការអនុគ្រោះពាណិជ្ជកម្ម និងការកើនឡើងនៃតម្រូវការសកល។ឯកឧត្តម លើកឡើងថា កិច្ចព្រមព្រៀងពាណិជ្ជកម្មសេរីភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលបានចូលជាធរមានក្នុងខែមករា ក៏បានរួមចំណែកដល់កំណើននេះ៕ អត្ថបទ៖ វណ្ណៈ

កម្ពុជាមានរោងចក្រដំណើរការចំនួន ១ ៨៤៩ រោងចក្រ ផ្តល់ការងារចំនួនជាង ៩៧ ម៉ឺនកន្លែង

ភ្នំពេញ៖ កម្ពុជាមានរោងចក្រដំណើរការសរុប ចំនួន ១ ៨៤៩ រោងចក្រ គិតត្រឹមឆ្នាំ២០២១ បង្កើតការងារធ្វើជាង ៩៧ម៉ឺន កន្លែងដល់បងប្អូនប្រជាពលរដ្ឋ ចូលរួមលើកកម្ពស់ប្រាក់ចំណូលដល់ប្រជាពលរដ្ឋ។ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បង្ហាញរបាយការណ៍សមិទ្ធផលសំខាន់ៗសម្រេចបានរបស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ រយៈពេល៥ឆ្នាំ ២០១៧-២០២១ ក្នុងសន្និសីទសារព័ត៌មាន នៅថ្ងៃទី១១ ខែសីហា នៅអង្គភាពអ្នកនាំពាក្យរាជរដ្ឋាភិបាល។រោងចក្រដំណើរការមានចំនួន ១ ៨៤៩ រោងចក្រ ស្ថិតនៅក្នុង ២៥រាជធានី-ខេត្ត មានការកើនឡើងចំនួន ៣២៧រោងចក្រ ស្មើនឹង ២១.៤៨% បើធៀបទៅនឹងរយៈពេល៥ឆ្នាំកន្លងមក ដែលនៅក្នុងឆ្នាំ ២០១៧ រោងចក្រដំណើរការមានចំនួន ១ ៥២២ រោងចក្រ។រោងចក្រកើតថ្មីក្នុងរយៈពេល៥ឆ្នាំកន្លងមកនេះ មានចំនួន ៩៦២ រោងចក្រ ខណៈ រោងចក្របិទទ្វារឈប់ដំណើរការក្នុងរយៈពេល៥ឆ្នាំ មានចំនួន ៦៩២រោងចក្រ។កម្លាំងពលកម្មសរុប មានចំនួន ៩៧០ ៤៨៧នាក់ ក្នុងនោះមាន ស្រីចំនួន ៧៤៧ ៧០០នាក់ ស្មើនឹង ៧៧.០៤% មានការថយចុះចំនួន ១១ ៧១៦ នាក់ ស្មើនឹង ១.១៩% បើធៀប ទៅនឹងរយៈពេល៥ឆ្នាំកន្លងមក ដែលនៅក្នុងឆ្នាំ២០១៧ កម្លាំងពលកម្មសរុបមានចំនួន ៩៨២,២០៣នាក់។ចំណែក ទុនវិនិយោគសរុប មានចំនួនជាង ១៣,៤៧៤ លានដុល្លារអាមេរិក មានការកើនឡើងចំនួនជាង ៤ ០៦៤លានដុល្លារអាមេរិក ស្មើនឹង ៤៣.១៩% បើធៀបទៅនឹងរយៈពេល៥ឆ្នាំកន្លង មក ដែលនៅក្នុងឆ្នាំ ២០១៧ ទុនវិនិយោគសរុបមានចំនួនជាង ៩ ៤១០ លានដុល្លារអាមេរិក។តម្លៃបរិមាណផលិតផលសរុបនៃរោងចក្រដំណើរការ មានចំនួនជាង ៥ ៩៣៣ លានដុល្លារអាមេរិក ក្នុងនោះមាន តម្លៃបរិមាណផលិតផលបម្រើទីផ្សារក្នុងស្រុកមានចំនួនជាង ១ ៥៦០ លានដុល្លារអាមេរិក និងតម្លៃបរិមាណផលិតផលនាំចេញមានចំនួនជាង ៤ ៣៧៣ លានដុល្លារអាមេរិក៕ អត្ថបទ៖ សុន រ៉ាឌី

ភ្ញៀវទេសចរបរទេស បន្តមានកំណើនចូលមកទស្សនានៅកម្ពុជា

ភ្នំពេញ៖ វត្តមានភ្ញៀវទេសចរបរទេសចូលមកទស្សនាកម្ពុជាក្នុងខែកក្កដា នេះ ចាប់ផ្ដើមមានកំណើនជាបន្តបន្ទាប់គួរឱ្យកត់សម្គាល់ ខណៈភាគច្រើនឃើញមាននៅតាមទីតាំងទេសចរណ៍សំខាន់ៗក្នុងរាជធានីភ្នំពេញ។ក្រសួងទេសចរណ៍ ទើបបានបញ្ជាក់ថ្មីៗនេះថា ភ្ញៀវទេសចរជាតិ និងភ្ញៀវទេសចរអន្តរជាតិ មានចំនួនរហូតដល់ជាង ២៤ម៉ឺននាក់ បានធ្វើដំណើរកំសាន្តជុំវិញប្រទេសកម្ពុជា ក្នុងសប្ដាហ៍ដំបូងនៃខែសីហានេះ។ ក្នុងនោះភ្ញៀវទេសចរជាតិ មានជាង ២២ម៉ឺននាក់ និងភ្ញៀវអន្តរជាតិមានចំនួនជាង ២ម៉ឺននាក់។ ខណៈមានកំណើនភ្ញៀវទេសចរនេះ ទីតាំងទេសចរណ៍សំខាន់ៗក្នុងរាជធានីភ្នំពេញ ក៏ទទួលបានការចូលទស្សនាច្រើន។ ជាក់ស្ដែងសម្រាប់សារមន្ទីរជាតិ ដែលមានទីតាំងជិតព្រះបរមរាជវាំង គឺមានភ្ញៀវទេសចរប្រមាណ ១០០ទៅ ១៣០ នាក់ចូលទស្សនារៀងរាល់ថ្ងៃ ហើយក៏មានភ្ញៀវទេសចរជាតិចូលទស្សនាប្រមាណ ១២០ ទៅ១៥០នាក់ក្នុង១ថ្ងៃ។ទីតាំងសំខាន់មួយទៀត គឺស្ថិតនៅសារមន្ទីរទួលស្លែង ចំនួនភ្ញៀវទេសចរអន្តរជាតិ មានការកើនឡើងគួរឱ្យកត់សម្គាល់ផងដែរ។ នេះជាការលើកឡើងរបស់ លោក ហង្ស និស្ស័យ ជាប្រធានសារមន្ទីរ។ លោក បញ្ជាក់ថា ភ្ញៀវទេសចរបរទេសបានកើនឡើងពីប្រមាណ ៥០ ទៅ ៦០នាក់ក្នុង១ថ្ងៃ មកដល់ចំនួនជាង ២០០នាក់ក្នុងពេលនេះ។ លោក ក៏សង្ឃឹមថា ចំនួនភ្ញៀវទេសចរអន្តរជាតិបន្តកើនឡើងផងដែរ។លើកឡើងដូចគ្នាផងដែរ លោក ថុង សុំផល្គុន ជាមគ្គុទេសទេសចរណ៍មួយរូប ដែលកំពុងជូនភ្ញៀវបរទេសមួយក្រុមទស្សនាក្នុងសារមន្ទីរទួលស្លែង បង្ហាញនូវភាពសប្បាយចិត្ត។ ភាពសប្បាយចិត្ត ដោយសារបច្ចុប្បន្ន ចំនួនភ្ញៀវទេសចរបរទេសបន្តកើនឡើង ដែលអាចជួយដល់ជីវភាពរបស់លោក ក៏ដូចជាប្រជាពលរដ្ឋកម្ពុជា ដែលធ្វើការពាក់ព័ន្ធវិស័យទេសចរណ៍ដទៃទៀត អាចទទួលបានអត្ថប្រយោជន៍។ចំពោះភ្ញៀវទេសចរបរទេស ដែលភាគច្រើនជាដំណើរកំសាន្តមកកម្ពុជាជាលើកទីមួយ បានលើកឡើងពីការពេញចិត្តចំពោះកម្ពុជា ដោយប្រជពលរដ្ឋរួសរាយរាក់ទាក់ ទេសភាពស្អាត មានប្រវត្តិសាស្រ្ត និងរឿងជាច្រើនដែលមានភាពទាក់ទាញ។ ពួកគាត់ ក៏លើកឡើងដែរថា កម្ពុជា ជាជម្រើសដ៏ល្អមួយក្នុងការដើរកំសាន្តសម្រាប់ជនបរទេស។តាមរបាយការណ៍របស់ក្រសួងទេសចរណ៍ ទីតាំងសំខាន់ដែលស្រូបទាញភ្ញៀវទេសចរបានច្រើនជាងគេ គឺខេត្តសៀមរាប បន្ទាប់មកគឺខេត្តព្រះសីហនុ កំពត កែប ខេត្តបាត់ដំបង និងរាជធានីភ្នំពេញ៕ អត្ថបទ៖ គឹមហុក

ដំណឹងល្អ..! តម្លៃលក់រាយប្រេងឥន្ធនៈនៅកម្ពុជាបន្តធ្លាក់ចុះ បើធៀបនឹងសន្ទស្សន៍ចាស់

ភ្នំពេញ៖ ក្រសួងពាណិជ្ជកម្ម ប្រកាសពីតម្លៃលក់រាយប្រេងរាយប្រេងឥន្ធនៈតាមស្ថានីយប្រេងនានាទូទាំងប្រទេស ដែលត្រូវអនុវត្តចាប់ពីថ្ងៃទី១១ ដល់ថ្ងៃទី២០ ខែសីហា ឆ្នាំ២០២២ ដោយប្រេងសាំងធម្មតាត្រូវលក់តម្លៃ ៤.៦៥០រៀល/លីត្រ(ចុះ ១០០រៀល) និងប្រេងម៉ាស៊ុតត្រូវលក់តម្លៃ ៥.០០០រៀល/លីត្រ(ចុះ ១៥០រៀល)។

បណ្ដាញសង្គម

ព័ត៌មានថ្មីៗ

កម្ពុជា និងលីទុយអានី ប្ដេជ្ញាជំរុញកិច្ចសហប្រតិបត្តិការទ្វេភាគីលើវិស័យសក្តានុពលឱ្យកាន់តែស៊ីជម្រៅ

អនុប្រធានទី១ អាជ្ញាធរមីន ស្នើមូលនិធិចិន សម្រាប់សន្តិភាព និងការអភិវឌ្ឍ គាំទ្រដល់ជនមានពិការភាព និងសហគមន៍ងាយរងគ្រោះដោយសារមីន និងសំណល់ជាតិផ្ទុះពីសង្រ្គាមនៅកម្ពុជា

អ្នកជំនាញសេដ្ឋកិច្ច៖ ទំនាក់ទំនងកិច្ចសហប្រតិបត្តិការទ្វេភាគីកម្ពុជា-ចិន នឹងកាន់តែស៊ីជម្រៅលើវិស័យសេដ្ឋកិច្ច និងកសិកម្ម

មេដឹកនាំអ៊ីរ៉ង់ បញ្ជាក់ពីការរួបរួមជាតិ ខណៈប្ដេជ្ញាសងសឹក ស្របពេលមានរបាយការណ៍ពីជម្លោះផ្ទៃក្នុង

អនុប្រធានទី១ អាជ្ញាធរមីន និងឯកអគ្គរដ្ឋទូតអូស្រ្តាលីប្រចាំនៅកម្ពុជាជួបពិភាក្សាគ្នា ស្តីពីការអនុវត្តផែនការភាពជាដៃគូអភិវឌ្ឍន៍គាំទ្រវិស័យសកម្មភាពមីននៅកម្ពុជា

សម្តេចធិបតី បន្តដាក់បទបញ្ជាយ៉ាងម៉ឺងម៉ាត់បំផុតឱ្យសមត្ថកិច្ច និងកងកម្លាំងពាក់ព័ន្ធទាំងអស់បន្តការបង្ក្រាបបទល្មើសការឆបោកតាមប្រព័ន្ធបច្ចេកវិទ្យាដោយគ្មានបង្អង់ដៃឡើយ

អ្នកវិភាគ៖កម្ពុជា-ចិន គឺជាមិត្តជិតស្និទ្ធដែលមិនអាចខ្វះគ្នាបាន ខណៈកិច្ចប្រជុំ ២+២ ដើម្បីបង្កើនទំនាក់ទំនងបន្ថែម

កម្ពុជា-ចិន ឯកភាពគ្នាថា យន្តការ «២+២» នឹងដើរតួនាទីជាវេទិកាពង្រឹងទំនាក់ទំនងជាយុទ្ធសាស្ត្រ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

រាជរដ្ឋាភិបាលបញ្ចេញឥណទានគាំទ្រគម្រោងស្រូវអង្ករមានទំហំទឹកប្រាក់ ៨០ លានដុល្លារ

ពន្ធដារប្រមូលពន្ធ-អាករបានជាង ២ ២១០ លានដុល្លារអាមេរិក ក្នុងរយៈពេល៧ខែ

កម្ពុជានាំចេញកៅស៊ូមានទឹកប្រាក់សរុប ២៥៥លានដុល្លារ ក្នុងរយៈពេល៧ខែ

ស្តង់ដារជួយលើកកម្ពស់ផលិតផល និងការប្រកួតប្រជែងនៅទីផ្សារក្នុងស្រុក និងនាំចេញ

អ្នកជំនាញកម្ពុជាជួបប្រជុំគ្នា បើកវេទិកាស្តីពីបញ្ញាសិប្បនិមិ្មត និងសង្គម

កម្ពុជា-សហរដ្ឋអាម៉េរិក បន្តកិច្ចសហប្រតិបត្តិការពាណិជ្ជកម្ម-វិនិយោគ

កម្ពុជានាំទំនិញចេញមានតម្លៃជាង ១៣ ប៊ីលានដុល្លារ ក្នុងរយៈពេល៧ខែ

កម្ពុជាមានរោងចក្រដំណើរការចំនួន ១ ៨៤៩ រោងចក្រ ផ្តល់ការងារចំនួនជាង ៩៧ ម៉ឺនកន្លែង

ភ្ញៀវទេសចរបរទេស បន្តមានកំណើនចូលមកទស្សនានៅកម្ពុជា

ដំណឹងល្អ..! តម្លៃលក់រាយប្រេងឥន្ធនៈនៅកម្ពុជាបន្តធ្លាក់ចុះ បើធៀបនឹងសន្ទស្សន៍ចាស់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សេដ្ឋកិច្ច និង កសិកម្ម

រាជរដ្ឋាភិបាលបញ្ចេញឥណទានគាំទ្រគម្រោងស្រូវអង្ករមានទំហំទឹកប្រាក់ ៨០ លានដុល្លារ

ពន្ធដារប្រមូលពន្ធ-អាករបានជាង ២ ២១០ លានដុល្លារអាមេរិក ក្នុងរយៈពេល៧ខែ

កម្ពុជានាំចេញកៅស៊ូមានទឹកប្រាក់សរុប ២៥៥លានដុល្លារ ក្នុងរយៈពេល៧ខែ

ស្តង់ដារជួយលើកកម្ពស់ផលិតផល និងការប្រកួតប្រជែងនៅទីផ្សារក្នុងស្រុក និងនាំចេញ

អ្នកជំនាញកម្ពុជាជួបប្រជុំគ្នា បើកវេទិកាស្តីពីបញ្ញាសិប្បនិមិ្មត និងសង្គម

កម្ពុជា-សហរដ្ឋអាម៉េរិក បន្តកិច្ចសហប្រតិបត្តិការពាណិជ្ជកម្ម-វិនិយោគ

កម្ពុជានាំទំនិញចេញមានតម្លៃជាង ១៣ ប៊ីលានដុល្លារ ក្នុងរយៈពេល៧ខែ

កម្ពុជាមានរោងចក្រដំណើរការចំនួន ១ ៨៤៩ រោងចក្រ ផ្តល់ការងារចំនួនជាង ​៩៧ ម៉ឺនកន្លែង

ភ្ញៀវទេសចរបរទេស បន្តមានកំណើនចូលមកទស្សនានៅកម្ពុជា

ដំណឹងល្អ..! តម្លៃលក់រាយប្រេងឥន្ធនៈនៅកម្ពុជាបន្តធ្លាក់ចុះ បើធៀបនឹងសន្ទស្សន៍ចាស់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

កម្ពុជាមានរោងចក្រដំណើរការចំនួន ១ ៨៤៩ រោងចក្រ ផ្តល់ការងារចំនួនជាង ៩៧ ម៉ឺនកន្លែង