BTV NEWS

រោងចក្រ វិរៈ ប៊ុនថាំ ជីកសិកម្ម មានសមត្ថភាពផលិតបានប្រមាណ ២០០តោន ក្នុងមួយថ្ងៃសម្ពោធដាក់ឱ្យដំណើរការជាផ្លូវការ

រយៈពេល៣ខែដំបូង ការដោះដូរពាណិជ្ជកម្មកម្ពុជា-វៀតណាម សម្រេចបាន ៣,៤៤ ពាន់លានដុល្លារកើនឡើង ៤,៣%

ក្នុងត្រីមាសទី១ កម្ពុជានាំចេញសំបកកង់ឡាន និងគ្រឿងបន្លាស់ផ្សេងៗមានទឹកប្រាក់ជាង ៥៨០ លានដុល្លារ

ថ្លៃលក់រាយប្រេងឥន្ធនៈតាមស្ថានីយចាប់ថ្ងៃទី២៤ មេសានេះ សាំងឡើងបន្ដិច ខណៈម៉ាស៊ូតបន្តធ្លាក់ចុះ

សេដ្ឋកិច្ច និង កសិកម្ម

កម្ពុជា ទទួលបានគម្រោងវិនិយោគពីសិង្ហបុរី មានទុនសរុប ១.៥ប៊ីលានដុល្លារ

ភ្នំពេញ៖ កម្ពុជាទទួលបានគម្រោងវិនិយោគពីប្រទេសសិង្ហបុរី មានទុនវិនិយោគសរុប ១.៥ ប៊ីលានដុល្លារ គិតត្រឹមខែមិថុនាឆ្នាំ២០២២នេះ ដែលគម្រោងទាំងនោះ ផ្តោតលើវិស័យ វិស័យទេសចរណ៍ កម្មន្តសាល ហេដ្ឋារចនាសម្ព័ន្ធនិងវិស័យផ្សេងៗមួយចំនួនទៀត។គិតត្រឹមខែមិថុនា ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័ត គម្រោងវិនិយោគរបស់សិង្ហបុរី ចំនួន ១២៧គម្រោង មានទុនវិនិយោគសរុប ១.៥ ប៊ីលានដុល្លារ នៅក្នុងវិស័យទេសចរណ៍ កម្មន្តសាលហេដ្ឋារចនាសម្ព័ន្ធ និងវិស័យផ្សេងៗមួយចំនួនទៀត។ទិន្ន័យនេះត្រូវបានលើកឡើងនៅក្នុងសេចក្តីប្រកាសព័ត៌មានរបស់ CDC តាមរយៈជំនួបតាមប្រព័ន្ធវីឌីអូ រវាងក្រុមប្រឹក្សអភិវឌ្ឍន៍កម្ពុជា និងសហព័ន្ធធុរកិច្ចសិង្ហបុរី កាលពីថ្ងៃទី ២៦កក្កដា ជុំវិញប្រធានបទ «ស្វែងយល់ពីកម្ពុជា ការយល់ដឹងពីកាលានុវត្តភាពធុរកិច្ចនៅកម្ពុជា» ។ ឯកឧត្តម សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា បានបង្ហាញពីបរិយាកាសវិនិយោគនៅកម្ពុជា ច្បាប់វិនិយោគថ្មី ដែលផ្តល់ការលើកទឹកចិត្តដល់វិនិយោគិន និងមានភាពអំណោយផល សម្រាប់វិនិយោគិនសិង្ហបុរី ចាប់យកឱកាសក្នុងវិស័យកសិ-ចំណីអាហារ សេវាកម្ម និងកម្មន្តសា។ឯកឧត្តម បញ្ជាក់បន្ថែមថា “វិនិយោគិនសិង្ហបុរីមានតួនាទីសំខាន់ចំពោះកម្ពុជា ជាពិសេសការរួមចំណែកស្តារឡើងវិញ និងអភិវឌ្ឍន៍សេដ្ឋកិច្ចកម្ពុជាឱ្យបានឆាប់រហ័ស”។ សិង្ហបុរី ស្ថិតនៅក្នុងចំណោមវិនិយោគិនបរទេសធំជាងគេទាំង៥ របស់កម្ពុជា ដែលភាគច្រើនវិនិយោគទៅលើវិស័យ អចលទ្រព្យថាមពល ពាណិជ្ជកម្ម ម្ហូបអាហារ ការអប់រំ និងហិរញ្ញវត្ថុ។ឮសូមជម្រាបថា ទំហំពាណិជ្ជកម្មរវាងកម្ពុជា និងសិង្ហបុរី មានទំហំទឹកប្រាក់ជាង ២ពាន់លានដុល្លារ ក្នុងឆមាសទី១ ឆ្នាំ២០២២។ ទំហំនេះ មានការធ្លាក់ចុះខ្លាំងក្នុងអត្រា ៣៨,២ភាគរយ បើធៀបនិងរយៈពេលដូចគ្នាកាលឆ្នាំ២០២១ ដែលមានចំនួនជាង ៣,៣៦ពាន់លានដុល្លារ។ នេះបើយោងតាមស្ថិតិជញ្ជីងពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា៕ អត្ថបទ៖ វណ្ណៈ

ធនាគារ SME ផ្តលឥណទានសរុបជាង ៧លានដុល្លារ ដល់អាជីវកម្មទេសចរណ៍

ភ្នំពេញ៖ រយៈពេល ២៧ថ្ងៃកន្លងមកនេះ មានអាជីវកម្មទេសចរណ៍ចំនួន ៥៦អាជីវកម្ម ត្រូវបានធនាគារSME អនុម័តផ្តល់ឥណទាន មានទំហំថវិកាជាង ៧លាន៦សែនដុល្លាអាមេរិក ខណៈមានអាជីវកម្មទេសចរណ៍ជាច្រើនទៀត មិនអាចស្នើសុំកម្ចីនេះបាន ដោយសារលក្ខណះរបាយការណ៍ហិរញ្ញវត្ថុរបស់អាជីវកម្ម ។លោកស្រី ឆាយ សៀវលីន ប្រធានសមាគមទីភ្នាក់ទេសចរណ៍កម្ពុជា CATA បានថ្លែងប្រាប់BTV នៅថ្ងៃទី២៨ ខែកក្កដានេះថា នៅពេលនេះមានអាជីវកម្មទេសចរណ៍តិចតួចណាស់បានទៅទទួលបា្រក់កម្ចីនេះ ដោយយសារឥណទានសហហិរញ្ញប្បទានស្តារអាជីវកម្មក្នុងវិស័យទេសចរណ៍ គឺហាក់មានលក្ខខ័ណ្ឌតឹងរ៉ឹង ជាពិសេសការទាមទាររបាយការណ៍ហិរញ្ញវត្ថុពីអាជីវកម្មទេសចរណ៍ ដែលជាកត្តាបង្កការរាំងស្ទះ ដល់អាជីវកម្មទេសចរណ៍ ។ លោកបណ្ឌិត លឹម អូន ប្រធានធនាគារសហគ្រាសធុនតូច និងមធ្យមកម្ពុជា បានថ្លែងថា នៅពេលនេះ រាជរដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ បាននិងកំពុងពិចារណា លើការបន្ធូបន្ថយលក្ខខណ្ឌ ផ្តល់ប្រាក់កម្ចីពីគម្រោងសហហិរញ្ញប្បទានរាជរដ្ឋាភិបាលដើម្បីអាជីវកម្មក្នុងវិស័យទេសចរណ៍ ដូចជាបង្កើនទុនឲ្យខ្ចីលើសពី៤០លានដុល្លាអាមេរិច ពង្រីកការពន្យាពេលបង់ការប្រាក់រហូតដល់២ឆ្នាំ និងពង្រីករយៈពេលបង់ប្រាក់សងត្រឡប់វិញពីចំនួន៧ឆ្នាំរហូតដល់១០ឆ្នាំដើម្បីជួយសម្រាលឲ្យការបង់ប្រាក់សងត្រឡប់មានចំនួនតិចតួចជាដើម។លោក បណ្ឌិត លឹម អូន បន្តថា យ៉ាងណាក៏ដោយនៅក្នុងអំឡុងពេលនេះ រាជរដ្ឋាភិបាលក៏បានបន្ធូរបន្ថយលក្ខខណ្ឌនិងលើកទឹកចិត្ត និងបន្ថយពិន្ទុសម្រាប់អាជីវកម្មទេសចរណ៍ដែលដុនដាបខ្លាំង ហើយតាមរយៈបន្ធូរបន្ថយលក្ខខណ្ឌនេះបានធ្វើឲ្យអាជីវកម្មទេសចរណ៍ចំនួន៥៦អាជីវកម្មគឺបានទទួលកម្ចីឥណទាននៅតាមបណ្តាធនាគារដៃគូចំនួន៧ធនាគារ ក្នុងចំណោមធនាគារជាដៃគូចំនួន១៩ធនាគារ និងមានអាជីវកម្មនានាបាននិងកំពុងរៀបចំសំណើរសុំទទួលកម្ចីនេះ។ឯកឧត្តម សុង តុងហាប់ រដ្ឋលេខាធិការក្រសួងទេសចរណ៍ ថ្លែងថា នៅពេលបច្ចុប្បន្នក្រសួងបានបង្កើតក្រុមការងារផ្សព្វផ្សាយនិងជួយស្តារអាជីវកម្មទេសចរណ៍ឲ្យងើបឡើងវិញតាមរយៈជួយសម្របសម្រួល និងធ្វើយ៉ាងណាឲ្យអាជីវកម្មអាចទទួលបានប្រាក់កម្ចីស្តារអាជីវកម្មទាំងអស់គ្នា និងមានលទ្ធភាពសងត្រឡប់ផងដែរ៕ អត្ថបទ ស៊ុម សុខជា

ករណីប្រេងឆៅរបស់កម្ពុជាចំនួនជិត ៣០ ម៉ឺនប៉ារ៉ែល នឹងដោះស្រាយបញ្ចប់ក្នុងពេលឆាប់ៗ

ភ្នំពេញ៖ ករណីប្រេងឆៅរបស់កម្ពុជា ចំនួនជិត ៣០ ម៉ឺនប៉ារ៉ែល ដែលនាវាឈ្មោះ MT Strovolos បានដឹកចេញពីកម្ពុជា នាពេលកន្លងមក ភាគីពាក់ព័ន្ធ បានចូលតុពិភាក្សាចរចារគ្នាដើម្បីសម្របសម្រួលលើផលប្រយោជន៍ដែលភាគីនីមួយៗទទួលបាន ដោយសង្ឃឹមថា គ្រោងបញ្ចប់ក្នុងពេលឆាប់ៗ។ឯកឧត្តម ជៀប សួរ អ្នកនាំពាក្យ និងជាអគ្គនាយកនៃអគ្គនាយកដ្ឋានប្រេងកាត បានលើកឡើងក្នុងកិច្ចសម្ភាសន៍ជាមួយអ្នកយកព័ត៌មាន លើករណីការលួចប្រេងឆៅរបស់កម្ពុជា នៅថ្ងៃទី២៧ ខែ កក្កដា ឆ្នាំ២០២២ នេះថា ជុំវិញបញ្ហាប្រេងឆៅចំនួនជិត ៣០ម៉ឺនបារ៉ែល ដែលនាវាឈ្មោះ MT Strovolos បានលួចដឹកចេញេពីកម្ពុជា កាលពីខែមិថុនា ឆ្នាំ២០២១ កន្លងមកនេះ បច្ចុប្បន្នមានសញ្ញាល្អជាបណ្តើរៗហើយ ដែលកម្ពុជារំពឹងថា ករណីប្រេងឆៅនេះនឹងដោះស្រាយចេញក្នុងពេលឆាប់ៗ។ទាក់ទងបញ្ហាប្រេងកាតប្លុក A នេះ , ឯកឧត្តម ជៀប សួរ បានបញ្ជាក់ឲ្យដឹងថា ចំពោះការអភិវឌ្ឍន៍របស់ក្រុមហ៊ុន KrisEnergy នៅប្លុកអេ នាពេលកន្លងមកនេះ ក្រសួងបានបញ្ចប់កិច្ចព្រមព្រៀងជាមួយក្រុមហ៊ុននេះរួចហើយ, បច្ចុប្បន្នចំពោះការវិនិយោគនៅប្លុកអេនេះ ក្រសួងបានកំពុងពិភាក្សាការងារជាមួយក្រុមហ៊ុនថ្មីមួយទៀត មកពីប្រទេសកាណាដា , ដោយក្រុមហ៊ុនថ្មីនេះបានកំពុងធ្វើការសិក្សានូវទិន្នន័យថ្មីៗឡើងវិញ មុននឹងសម្រេចចិត្តវិនិយោគនៅប្លុកAនេះជាបន្ត ដើម្បីចៀសវាងនូវកំហុសខុសឆ្លងដែលកើតមានឡើង។ មកដល់ពេលនេះ ការសិក្សារបស់ក្រុមហ៊ុនថ្មីមួយនេះ ជិតដល់ពេលវេលាមកពិភាក្សាគ្នាជាមួយក្រសួងហើយ ដោយការងារនេះក្រសួងនឹងបង្ហាញលទ្ធផលនៅពេលខាងមុខ៕អត្ថបទ៖ សុន រ៉ាឌី

ក្រសួងពាណិជ្ជកម្មបើកកិច្ចប្រជុំលើកដំបូង ដើម្បីបង្ហាញសមាសភាពគណៈកម្មាធិការ ប្រកួតប្រជែងកម្ពុជា

ភ្នំពេញ៖ នៅទីស្តីការក្រសួងពាណិជ្ជកម្ម គណៈកម្មាធិការប្រកួតប្រជែងកម្ពុជា (គ.ប.ក) បានបើកកិច្ចប្រជុំលើកទី១របស់ខ្លួន ដើម្បីឱ្យសមាជិកទាំងអស់ បានជួបប្រជុំគ្នាជាលើកដំបូង និងបង្ហាញខ្លួន បន្ទាប់ពីរាជរដ្ឋាភិបាលបានចេញសេចក្តីសម្រេចកាលពីកន្លងទៅនេះ ស្តីពីការតែងតាំងសមាសភាពគណៈកម្មាធិការប្រកួតប្រជែងកម្ពុជា ព្រមទាំងដើម្បីពិនិត្យ និងពិភាក្សាលើបទបញ្ជាផ្ទៃក្នុងមួយចំនួន។នៅក្រោយចប់កិច្ចប្រជុំ កាលពីរសៀលថ្ងៃ២៦ កក្កដា ឆ្នាំ២០២២នេះ ប្រភពពីក្រសួងពាណិជ្ជកម្ម បានឲ្យដឹងថា កិច្ចប្រជុំនេះ ត្រូវបានរៀបចំឡើង ក្រោមការអញ្ជើញជាអធិបតីរបស់ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងជាប្រធានគណៈកម្មាធិការប្រកួតប្រជែងកម្ពុជា ព្រមទាំងមានការអញ្ជើញចូលរួមពីថ្នាក់ដឹកនាំ និងសមាជិក សមាជិកាជាច្រើនរូប។ក្នុងឱកាសនោះ ឯកឧត្តមរដ្ឋមន្រ្តី បានមានប្រសាសន៍ថា ច្បាប់ស្ដីពីការប្រកួតប្រជែងកម្ពុជា ត្រូវបានព្រះករុណាព្រះបាទសម្តេចព្រះនរោត្តម សីហមុនី ព្រះមហាក្សត្រនៃកម្ពុជា ឡាយព្រះហស្តលេខាប្រកាសដាក់ឱ្យប្រើ កាលពីខែតុលា ឆ្នាំ២០២១ និងបានធ្វើឱ្យបណ្ដារដ្ឋសមាជិកអាស៊ានទាំង១០ មានច្បាប់ស្ដីពីការប្រកួតប្រជែងទាំងអស់គ្នា ដូចបានកំណត់ក្នុងផែនការមេសហគមន៍សេដ្ឋកិច្ចអាស៊ាន២០២៥ ហើយការអនុម័តច្បាប់នេះធ្វើឱ្យកម្ពុជាបានបំពេញកាតព្វកិច្ចមួយរបស់កម្ពុជាសម្រាប់អាស៊ាន និងអង្គការពាណិជ្ជកម្មពិភពលោកផងដែរ។ ឯកឧត្តម បានឲ្យដឹងទៀតថា យោងតាមមាត្រា៤ នៃច្បាប់ស្ដីពីការប្រកួតប្រជែង តម្រូវឱ្យបង្កើតគណៈកម្មាធិការប្រកួតប្រជែងកម្ពុជាដែលជាអ្នកទទួលបន្ទុកដឹកនាំ និងត្រួតពិនិត្យការអនុវត្តច្បាប់ស្ដីពីការប្រកួតប្រជែង ហើយតាមការតម្រូវនេះ ប្រមុខរាជរដ្ឋាភិបាលសម្រេចចុះហត្ថលេខានៅខែកុម្ភៈកន្លងទៅ និងបានចេញសេចក្តីសម្រេចនៅខែកក្កដា នេះ ស្តីពីការតែងតាំងសមាសភាពនៃគណៈកម្មាធិការនេះ ដែលមានសមាសភាពសរុបចំនួន ១៥រូប ដែល ១០រូបជាតំណាងមកពីក្រសួង ស្ថាប័នពាក់ព័ន្ធ និង ៥រូប ជាបុគ្គលឯករាជ្យ ក្នុងនោះជាអតីតចៅក្រម ១រូប, អ្នកសេដ្ឋកិច្ច ២រូប និងអ្នកច្បាប់ ២រូប ដែលឆ្លងកាត់តាមការជ្រើសរើស ហើយមានអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» ជាសេនាធិការ ដើម្បីអនុញ្ញាតឱ្យគណៈកម្មាធិការប្រកួតប្រជែងកម្ពុជា ទទួលបាននូវសិទ្ធិពេលលេញក្នុងការអនុវត្តនូវតួនាទីនិងភារកិច្ចរបស់ខ្លួន។ឯកឧត្តមរដ្ឋមន្រ្តី បានបញ្ជាក់ថា សម្រាប់ការអនុវត្តច្បាប់ស្ដីពីការប្រកួតប្រជែង អគ្គនាយកដ្ឋាន ក.ប.ប. ដែលជាសេនាធិការ និងដើរតួនាទីជាអ្នកស៊ើបអង្កេត ខណៈដែលគណៈកម្មាធិការប្រកួតប្រជែងកម្ពុជា ជាអ្នកធ្វើសេចក្ដីសម្រេចក្នុងការកំណត់ថា បុគ្គលណាមួយបំពានច្បាប់ ដោយផ្អែកលើភស្ដុតាងដែលផ្ដល់ដោយមន្ត្រីនៃអគ្គនាយកដ្ឋាន ក.ប.ប.។ ដូចនេះ សមាសភាពខាងលើ តម្រូវឱ្យមានការចូលរួមពីបុគ្គលឯករាជ្យអតីតចៅក្រម អ្នកសេដ្ឋកិច្ច និងអ្នកច្បាប់ ដែលមានជំនាញច្បាស់លាស់ចូលរួមធ្វើសេចក្ដីសម្រេចក្នុងការកំណត់បទល្មើសក្រោមច្បាប់ស្ដីពីការប្រកួតប្រជែង ប្រកបដោយភាពត្រឹមត្រូវនិងពេញលេញ។ ឯកឧត្តម សង្កត់ធ្ងន់ថា ការអនុវត្តច្បាប់ស្តីពីការប្រកួតប្រជែងប្រកបដោយប្រសិទ្ធភាព នឹងបង្កើតនូវទីលានប្រកួតប្រជែងប្រកបដោយស្មើភាពក្នុងការធ្វើធុរកិច្ចនៅកម្ពុជា ដើម្បីប្រកួតប្រជែងគ្នាតាមរយៈមធ្យោបាយផ្សេងៗ រួមមាន នវានុវត្តន៍ គុណភាពខ្ពស់ និងតម្លៃទាបនៃផលិតផលនិងសេវា ដែលផ្តល់អត្ថប្រយោជន៍សម្រាប់អ្នកប្រើប្រាស់និងធើ្វឱ្យមានកំណើនសេដ្ឋកិច្ចជាតិទៀតផង៕ អត្ថបទ៖ ឈិត បូរ៉ាវី

ឯកឧត្តម រដ្ឋ សារ៉ាវុធ ដឹកនាំឧត្តមមន្រ្តីសេដ្ឋកិច្ចអាស៊ាន បំពេញបេសកកម្មស្វែងយល់ពីតថភាពក្នុងដំណើរការរៀបចំខ្លួនក្រោមសសរស្តម្ភសហគមន៍សេដ្ឋកិច្ចអាស៊ានរបស់ប្រទេសទីម័រខាងកើត

ភ្នំពេញ៖ កាលពីថ្ងៃទី១៩-២២ ខែកក្កដា ឆ្នាំ២០២២ ឯកឧត្តម រដ្ឋ សារ៉ាវុធ អគ្គនាយកពាណិជ្ជកម្មអន្តរជាតិ និងជាប្រធានកិច្ចប្រជុំឧត្តមមន្រ្តីសេដ្ឋកិច្ចអាស៊ានសម្រាប់ឆ្នាំ២០២២ បានដឹកនាំឧត្តមមន្រ្តីសេដ្ឋកិច្ចអាស៊ាន អមដំណើរដោយអគ្គលេខាធិការរងអាស៊ាននិងសហការី ទៅបំពេញបេសកកម្មស្វែងយល់ពីតថភាពក្នុងដំណើរការរៀបចំខ្លួនក្រោមសសរស្តម្ភសហគមន៍សេដ្ឋកិច្ចអាស៊ានរបស់ប្រទេសទីម័រខាងកើត។បេសកកម្មនេះ មានគោលបំណងវាយតម្លៃនូវវឌ្ឍនភាពរបស់ទីម័រខាងកើតក្នុងដំណើរការស្នើសុំចូលជាសមាជិកអាស៊ាន ក្រោមសសរស្តម្ភសហគមន៍សេដ្ឋកិច្ចអាស៊ាន ដោយពិនិត្យមើលគោលនយោបាយជាតិ បទប្បញ្ញត្តិ និងគំនិតផ្តួចផ្តើមនានា ដើម្បីឱ្យមានអនុលោមភាពស្របតាមគោលការណ៍អាស៊ាន។ភាគីទាំង២ ក៏បានពិភាក្សាផ្លាស់ប្តូរយោបល់ក៏ដូចជាចែករំលែកបទពិសោធន៍ទៅវិញទៅមក ជាពិសេសឱកាស បញ្ហាប្រឈម សក្តានុពល ក៏ដូចជាចំណុចខ្វះខាតនានារបស់ទីម័រខាងកើតដើម្បីអាចឱ្យអាស៊ានជួយកសាងសមត្ថភាព និងជំនួយបច្ចេកទេសផងដែរ។ ក្នុងនោះមានក្រសួងនិងស្ថាប័នរបស់ទីម័រខាងកើតចំនួន៨ ដែលដឹកនាំដោយឯកឧត្តម Domingos Lopes Antunes អនុរដ្ឋមន្រ្តីក្រសួងទេសចរ ពាណិជ្ជកម្ម និងឧស្សាហកម្ម ក្នុងនាមជាសហប្រធាននៃកិច្ចប្រជុំ បានចូលរួមធ្វើបទបង្ហាញជូនដល់គណៈប្រតិភូដើម្បីទទួលបានព័ត៌មានបន្ថែម។ក្រសួងនិងស្ថាប័នទាំងនោះមានដូចជា ក្រសួងហិរញ្ញវត្ថុ ក្រសួងកសិកម្មនិងនេសាទ ក្រសួងសាធារណការនិងទំនាក់ទំនង ក្រសួងប្រេងកាត និងរ៉ែ ក្រសួងទេសចរណ៍ ពាណិជ្ជកម្ម និងឧស្សាហកម្ម សភាពាណិជ្ជកម្មនិងឧស្សាហកម្ម អាជ្ញាធរគយ សមាគមសណ្ឋាគារ ព្រមទាំងវិស័យឯកជននានាផងដែរ។ឯកឧត្តមអគ្គនាយក ក៏បានដឹកនាំគណៈប្រតិភូអាស៊ានធ្វើទស្សនកិច្ច នៅមជ្ឈមណ្ឌលជាតិសម្រាប់ការងារនិងការបណ្តុះបណ្តាលជំនាញ កំពង់ផែឌីលី និងកំពង់ផែ Tibar Bay ដើម្បីពិនិត្យ និងវាយតម្លៃលើការបណ្តុះបណ្តាលកសាងធនធានមនុស្ស ក៏ដូចជាសក្តានុពលនៃការដឹកជញ្ជូនទំនិញរបស់ទីម័រខាងកើត ផងដែរ។ក្នុងអំឡុងបេសកកម្មនេះដែរ ឯកឧត្តមអគ្គនាយក ក៏បានជួបពិភាក្សាទ្វេភាគីជាមួយលោកជំទាវ Adaljiza Magno រដ្ឋមន្រ្តីក្រសួងការបរទេសទីម័រខាងកើត លោកស្រីទីប្រឹក្សាធនាគារ ADB និងលោកស្រី Maika Oshikawa ប្រធាននាយកដ្ឋានពិនិត្យនិងវាយតម្លៃការចូលជាសមាជិកអង្គការពាណិជ្ជកម្មពិភពលោក ដើម្បីជំរុញកិច្ចសហប្រតិបត្តិការតំបន់ បន្ថែមទៀត។បេសកកម្មរយៈពេល៤ថ្ងៃនេះ បានប្រព្រឹត្តទៅដោយទទួលបានផ្លែផ្កាគាប់ប្រសើរ។ ប្រទេសទីម័រខាងកើត បានប្តេជ្ញាបន្តផ្តល់កិច្ចសហប្រតិបត្តិការលើវិស័យពាក់ព័ន្ធជាមួយអាស៊ាន ដើម្បីពន្លឿននីតិវិធីក្នុងការស្នើសុំចូលជាសមាជិកអាស៊ាន៕

និយ័តករមូលបត្រកម្ពុជា ADB ជំរុញការអភិវឌ្ឍទីផ្សារសញ្ញាប័ណ្ណនិរន្តរភាពនៅកម្ពុជា

ភ្នំពេញ៖ និយ័តករមូលបត្រកម្ពុជា ធនាគារអភិវឌ្ឍន៍អាស៊ី (ADB) ជំរុញការអភិវឌ្ឍទីផ្សារសញ្ញាប័ណ្ណនិរន្តរភាព និងលើកកម្ពស់ការយល់ដឹងពាក់ព័ន្ធនឹងហិរញ្ញវត្ថុនិរន្តរភាព ជាពិសេសទីផ្សារមូលធននិរន្តរភាពក្នុងតំបន់អាស៊ានទៅដល់និយ័តករ និងតួអង្គពាក់ព័ន្ធសំខាន់ៗនៅក្នុងទីផ្សានៅកម្ពុជា ។និយ័តករមូលបត្រកម្ពុជា ជាប្រធាននៃវេទិកាទីផ្សារមូលធនអាស៊ាន (ACMF) ឆ្នាំ២០២២ និងជាសហ-ប្រធាននៃកម្មវិធីអភិវឌ្ឍន៍ទីផ្សាររបស់ ACMF ន.ម.ក. បានសហការជាមួយនឹងធនាគារអភិវឌ្ឍន៍អាស៊ី (ADB) រៀបចំសិក្ខាសាលាស្តីពី “ឥទ្ធិពលនៃការអភិវឌ្ឍទីផ្សារមូលធននិរន្តរភាពក្នុងតំបន់អាស៊ាន សម្រាប់ការអភិវឌ្ឍទីផ្សារសញ្ញាប័ណ្ណនិរន្តរភាពនៅកម្ពុជា”។សិក្ខាសាលានេះ ត្រូវបានរៀបចំឡើងកាលពីចុងសប្តាហ៍កន្លងទៅ ដោយផ្ទាល់ និងតាមប្រព័ន្ធអនឡាញ ក្រោមអធិបតីភាព ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា និងលោកស្រី Jyotsana Varma នាយក ADB ប្រចាំ ប្រទេស កម្ពុជា។សិក្ខាសាលានេះ ត្រូវបានរៀបចំឡើងក្នុងគោលបំណងដើម្បីលើកកម្ពស់ការយល់ដឹងពាក់ព័ន្ធនឹងហិរញ្ញវត្ថុនិរន្តរភាព ជាពិសេសទីផ្សារមូលធននិរន្តរភាពក្នុងតំបន់អាស៊ានទៅដល់និយ័តករ និងតួអង្គពាក់ព័ន្ធសំខាន់ៗនៅក្នុងទីផ្សារ និងកិច្ចគាំទ្រដែលផ្តល់ដោយ ADB ក៍ដូចជាដើម្បីជំរុញការអភិវឌ្ឍទីផ្សារសញ្ញាបណ្ណនិរន្តរភាពនៅកម្ពុជា។សិក្ខាសាលាខាងលើ មានអ្នកចូលរួមសរុបចំនួន ១៨៥ រូប ដែលក្នុងនោះមានសមាសភាពចូលរួមមកពី និយ័តករមូលបត្រកម្ពុជា. សមាជិក ACMF អគ្គលេខាធិការដ្ឋាននៃអាជ្ញាធរសេវាហិរញ្ញវត្ថុមិនមែនធនាគារ និយ័តករក្រោមឱវាទនៃអាជ្ញាធរសេវាហិរញ្ញវត្ថុមិនមែនធនាគារ ក្រសួងបរិស្ថាន ធនាគារជាតិនៃកម្ពុជា សមាគមធនាគារកម្ពុជា ក្រុមហ៊ុនផ្សារមូលបត្រកម្ពុជា ក្រុមហ៊ុនធានាទិញមូលបត្រ ក្រុមហ៊ុនទីប្រឹក្សាហិរញ្ញវត្ថុ ក្រុមហ៊ុនបោះផ្សាយសក្តានុពល និងភាគីពាក់ព័ន្ធ ។ ឯកឧត្តម ស៊ូ សុជាតិ មានប្រសាសន៍ថា និយតករ បាននិងកំពុងធ្វើការយ៉ាងសកម្មជាមួយ ADB ដើម្បីលើកកម្ពស់ការចេញមូលបត្របំណុលបៃតង សង្គម និងនិរន្តរភាពនៅក្នុងព្រះរាជាណាចក្រកម្ពុជា។ឯកឧត្តម បន្តថា និយ័តករមូលបត្រកម្ពុជា ចេញមូលធននិរន្តរភាពដ៏មានសក្តានុពលជាច្រើននៅក្នុងសេដ្ឋកិច្ចរបស់កម្ពុជា ដោយសង្ឃឹមថា នឹងឃើញអ្នកវិនិយោគក្នុងស្រុក និងបរទេសកាន់តែច្រើនមកវិនិយោគលើមូលធននិរន្តរភាពនៅក្នុងប្រទេសកម្ពុជា និងទូទាំងតំបន់៕ អត្ថបទ៖ វណ្ណៈ

រដ្ឋាភិបាល គ្រោងដាក់ឲ្យប្រើប្រាស់ការធានារ៉ាប់រងយានយន្តឯកជនជាកាតព្វកិច្ច

ភ្នំពេញ៖ រាជរដ្ឋាភិបាលកម្ពុជា នឹងដាក់ឲ្យប្រើប្រាស់នូវការធានារ៉ាបរងយានយន្តឯកជនជាកាតព្វកិច្ច ដែលជាការទទួលខុសត្រូវរបស់ប្រតិបត្តិករធានារ៉ាប់រង និងម្ចាស់យានយន្តចំពោះសង្គមជាតិ ក្នុងគោលបំណងលើកកម្ពស់វិស័យធានារ៉ាប់រងឲ្យមានការរីកចម្រើនថែមទៀត នៅពេលអនាគតខាងមុខ។ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ កាលពីថ្ងៃទី២៥ កក្កដា ឆ្នាំ២០២២កន្លងទៅនេះ បានមានប្រសាសន៍ថា គម្រោងដាក់ឲ្យប្រើប្រាស់ការធានារ៉ាប់រងយានយន្តឯកជនជាកាតព្វកិច្ចនេះ គឺតាមរយៈការធានារ៉ាប់រងដល់ជនរងគ្រោះ ដែលបង្កដោយគ្រោះថ្នាក់ចរាចរណ៍នៅតាមដងផ្លូវក្នុងប្រទេសកម្ពុជា ជួយឲ្យពួកគាត់ទទួលបានសំណងសមស្របណាមួយសម្រាប់ការព្យាបាល និងដោះស្រាយបញ្ហាផ្នែកហិរញ្ញវត្ថុរបស់ខ្លួន។ឯកឧត្តម បានបន្តថា ផលប្រយោជន៍ក្នុងការដំណើរការប្រព័ន្ធធានារ៉ាប់រងខាងលើនេះ នឹងដើរតួនាទីយ៉ាងសំខាន់ក្នុងការពង្រឹង និងពង្រីកប្រព័ន្ធសំណាញ់សុវត្ថិភាពសង្គម ឲ្យដើរទន្ទឹមគ្នានឹងការដាក់ឲ្យអនុវត្តប្រព័ន្ធគាំពារសង្គមរបស់រដ្ឋាភិបាលផងដែរ។លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានបង្ហាញការគាំទ្រចំពោះគម្រោងការដាក់ឱ្យដំណើរការប្រព័ន្ធធានារ៉ាប់រងយានយន្តឯកជនជាកាតព្វកិច្ច ខណៈបច្ចុប្បន្នបានអនុវត្តជាអន្លើរតែទៅលើយានយន្តនៃក្រុមហ៊ុនដឹកជញ្ជូនអ្នកដំណើរ និងក្រុមហ៊ុនដឹកទំនិញប៉ុណ្ណោះ។ ឯកឧត្តម ប៊ូ ច័ន្ទភីរូ អគ្គនាយក នៃនិយ័តករធានារ៉ាប់រងកម្ពុជា បានបញ្ជាក់ថា ទីផ្សារធានារ៉ាប់រងកម្ពុជា នៅតែរក្សាបានកំណើនវិជ្ជមានក្នុងរង្វង់ប្រមាណ ៨% ក្នុងឆ្នាំ២០២០ និង១០% ក្នុងឆ្នាំ២០២១ ទោះក្នុងដំណាក់កាលវិបត្តិជំងឺកូវីដ-១៩ ក៏ដោយ។ បុព្វលាភដុលសរុបនៃទីផ្សារធានារ៉ាប់រងរបស់កម្ពុជា បានកើនឡើងដល់ប្រមាណ ៣០០លានដុល្លារអាម៉េរិក ក្នុងឆ្នាំ២០២១ និងមានកំណើនប្រមាណ២០%ជាមធ្យម ក្នុងរយៈពេល ៥ឆ្នាំចុងក្រោយនេះ។ទីផ្សារធានារ៉ាប់រងនៅកម្ពុជាក្នុងពេលបច្ចុប្បន្ន មានក្រុមហ៊ុនធានារ៉ាប់រងសរុប៣៩ ក្នុងនោះក្រុមហ៊ុនធានារ៉ាប់រងទូទៅមានចំនួន១៨ ក្រុមហ៊ុនធានារ៉ាប់រងអាយុជីវិតចំនួន១៤ និងក្រុមហ៊ុនធានារ៉ាប់រងខ្នាតតូចចំនួន៧ ព្រមទាំងមានក្រុមហ៊ុនធានារ៉ាប់រងបន្តចំនួន១៕ អត្ថបទ៖ ឈិត បូរ៉ាវី

នាវាដឹកភ្ញៀវទេសចរអន្តរជាតិ ចាប់ផ្តើមមកដល់ភ្នំពេញឡើងវិញលើកដំបូង ក្រោយជំរុញចលនាទេសចរណ៍

ភ្នំពេញ៖ នាវាទេសចរណ៍ដឹកភ្ញៀវទេសចរអន្តរជាតិទស្សនាតាមដងទន្លេមេគង្គកម្ពុជា វៀតណាម បានចាប់ផ្តើមមានមកដល់រាធានីភ្នំពេញ រួចបន្តទៅទស្សនាខេត្តសៀមរាប ជាលើកដំបូងឡើងវិញ ក្រោយរាជរដ្ឋាភិបាលកម្ពុជា និងរដ្ឋាភិបាលវៀតណាម សម្របសម្រួលគ្នាទៅវិញទៅមក ជម្រុញលំហូរចលនាទេសចរណ៍រវាងប្រទេសទាំងពីរ ឆ្ពោះទៅកាន់កម្ពុជាធ្វើម្ចាស់ផ្ទះរៀបចំកីឡា SEA GAME ឆ្នាំ២០២៣។បើតាមលោក Naidah Yazdanl អ្នកគ្រប់គ្រងនាវាទេសចរណ៍Croisi Europe បានថ្លែងប្រាប់ BTVនៅថ្ងៃទី២៥ ខែកក្កដានេះ ថ្លែងថា នេះលើកដំបូងហើយ ដែលនាវាទេសចរណ៍អន្តរជាតិរបស់លោក នៅក្នុងចំណោមនាវាទេសចរណ៍អន្តរជាតិនានាផ្សេងទៀត បានដឹកភ្ញៀវទេសចរអន្តរជាតិភាគច្រើនមកពីអាមេរិច អូស្ត្រាលី និងភ្ញៀវមកពីអឺរ៉ុប មកជិះនាវាទស្សនាកម្សាន្តតាមទន្លេមេគង្គឆ្លងដែនពីប្រទេសវៀតណាម ចូលមករាជធានីភ្នំពេញ រួចបន្តដំណើរទៅខេត្តសៀមរាប ទស្សនាប្រាសាទអង្គរ ក្រោយពីបានអាកខានរយៈពេលជាង២ឆ្នាំកន្លងមកនេះដោយសារវិបត្តិកូវីដ១៩។យ៉ាងណាក៏ដោយ លោក Naidah Yazdanl ក៏សូមសំដែងការដឹងគុណជាខ្លាំងចំពោះប្រមុខថ្នាក់ដឹកនាំរាជរដ្ឋាភិបាលកម្ពុជា ដែលជានិច្ចកាល បានយកចិត្តទុកដាក់ បានជួយអន្តរាគមន៍ និងជម្រុញបើកចលនាទេសចរណ៍ក្នុងតំបន់អាស៊ាន ជាពិសេសជម្រុញចលនាទេសចរណ៍កម្ពុជាវៀតណាមឡើងវិញ។សម្រាប់បណ្តាភ្ញៀវទេសចរអន្តរជាតិធ្វើដំណើរតាមនាវា បានថ្លែងថា តំបន់ទេសភាពតាមដងទន្លេមេគង្គនៅកម្ពុជា នៅកម្ពុជាមានសភាពស្រស់ស្អាត ហើយគេក៏បានឃើញរបៀបរស់នៅពលរដ្ឋខ្មែររស់នៅតាមដងទន្លេ ជាមួយនឹងគ្មានព្រួយបារម្ភបារម្ភអំពីបញ្ហាការរាតត្បាតកូវីដ១៩ ខណៈរាជរដ្ឋាភិបាលគ្រប់គ្រងបានល្អចំពោះទប់ស្កាត់ការរាតត្បាតនៃមេរោគកូវិដ១៩នេះ។សូមបញ្ជាក់ថា ក្នុងរយៈពេល ៦ខែដើមឆ្នាំ២០២២ នេះកម្ពុជាបានទទួលទេសចរអន្តរជាតិពីវៀតណាមកំណើនប្រមាណ១៥០% ហើយបើតាមឯកឧត្តម ថោង ខុន រដ្ឋមន្ត្រីក្រសួងទេសចរណ៍ ថ្លែងថា តាមរយៈការជម្រុញបើកទេសចរណ៍តាមផ្លូវទឹកនេះនឹងជម្រុញកម្ពុជាមានកំណើនទេសចរអន្តរជាតិមកទស្សនាកម្ពុជា កើនលើស ១លាននាក់នៅដំណាច់ឆ្នាំនេះ៕ អត្ថបទ ស៊ុម សុខជា

កម្ពុជាទទួលបានគម្រោងវិនិយោគមានទុនសរុបជិត៣ប៊ីលានដុល្លារ ក្នុងឆមាសទី១

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគថ្មី និងគម្រោងពង្រីកផលិតកម្មចំនួន ៩៨គម្រោង ក្នុងឆមាសទី១ ឆ្នាំ២០២២ កើនឡើង ១១គម្រោង មានទុនវិនិយោគសរុប ២ ៩៩៨ លានដុល្លារ។របាយការណ៍ក្រុមប្រឹក្សាអភិវឌ្ឍន៍កម្ពុជា បានបង្ហាញថាក្នុងចំណោមគម្រោងវិនិយោគថ្មីទាំងអស់ វិនិយោគទុនក្នុងស្រុក បានឈរនៅលេខរៀងទី១ មានទុនវិនិយោគតំណាង៥៣% នៃទុនវិនិយោគសរុបនៅកម្ពុជា។តាមទិន្នន័យនេះ វិនិយោគចិនដែលមានប្រមាណ ៤៣.០២% ឬស្មើនឹង១.២៩ពាន់លានដុល្លារ នៃការវិនិយោគសរុបនៅកម្ពុជា ក្នុងឆមាសទី១ ឆ្នាំនេះ ដែល នាំមុខវិនិយោគពីប្រទេស ថៃ, សាម័រ, ប្រីដធីស វីរជិនអាយលែន, កូរ៉េ, សិង្ហបុរី, ខេមិនអាយលែន, ម៉ាឡេស៊ី, ជប៉ុន និងអូស្រ្តាលី។ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា លើកឡើងថា ការកើនឡើងទាំងចំនួនគម្រោងវិនិយោគ និងទុនវិនិយោគ កើតចេញពីកិច្ចខិតខំប្រឹងប្រែងរបស់រាជរដ្ឋាភិបាល ទទួលជ័យជម្នះប្រយុទ្ធប្រឆាំងនឹងជំងឺកូវីដ-១៩ តាមរយៈប្រើប្រាស់វ៉ាក់សាំងជាដែលឈានដល់ ការបើដំណើរការសង្គមសេដ្ឋកិច្ច លើប់វិស័យឡើងវិញចាប់តាំងពីថ្ងៃទី១ ខែ វិច្ឆិកា ឆ្នាំ២០២១។តាមរបាយការណ៍ក្រុមប្រឹក្សាអភិវឌ្ឍន៍កម្ពុជា ក្នុងឆមាសទី១ ឆ្នាំ២០២២នេះ ការវិនិយោគលើវិស័យកសិកម្ម និងកសិ-ឧស្សាហកម្ម មានចំនួន៧គម្រោង ដែលមានទុនជាង ១០៤លានដុល្លារ, វិស័យឧស្សាហកម្ម មានចំនួន៨៥ គម្រោង មានទុនជាង១ពាន់លានដុល្លារ , វិស័យទេសចរណ៍មាន១គម្រោងវិនិយោគ ដោយទទួលបានទុនជាង ១២៩លានដុល្លារ និងហេដ្ឋារចនាសម្ព័ន្ធ និងផ្សេងៗមាន ៥ គម្រោង ទទួលបានទុន ជាង១.៧ពាន់លានដុល្លារ៕ អត្ថបទ៖ វណ្ណៈ

រាជរដ្ឋាភិបាល ប្រមូលចំណូលថ្នាក់ជាតិបានជាង ១៤ ពាន់ប៊ីលានរៀល

ភ្នំពេញ៖ លទ្ធផលនៃការអនុវត្តថវិការក្នុងឆមាសទី ១ ឆ្នាំ២០២២ រាជរដ្ឋាភិបាលប្រមូលចំណូលថ្នាក់ជាតិ សរុបបានចំនួនជាង ១៤ ពាន់ប៊ីលានរៀល ស្មើប្រមាណ ៥៧% នៃច្បាប់ហិរញ្ញវត្ថុ គឺខ្ពស់ជាង ១,២ ពិន្ទុភាគរយ ធៀបនឹងរយៈពេលដូចគ្នាក្នុងឆ្នាំ២០២១។លទ្ធផលនៃការអនុវត្តថវិកាឆមាសទី១ និងការវាយតម្លៃនៃការអនុវត្តច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២ បង្ហាញថា ការអនុវត្តប្រមូលចំណូលថ្នាក់ជាតិរបស់រាជរដ្ឋាភិបាល សរុបបានចំនួនប្រមាណជាង ១៤ ពាន់ប៊ីលានរៀល ស្មើនឹង ៥៧% នៃច្បាប់ហិរញ្ញវត្ថុ គឺខ្ពស់ជាង ១,២ ពិន្ទុភាគរយ ធៀបនឹងរយៈពេលដូចគ្នាក្នុងឆ្នាំ ២០២១ ដែលអនុវត្តបាន ៥៥,៨% នៃច្បាប់ហិរញ្ញវត្ថុ, បើគិតចំណូលជាសាច់ប្រាក់ គឺកើនឡើង ២១,៥% ធៀបនឹងរយៈពេលដូចគ្នក្នុងឆ្នាំ ២០២១។ក្នុងនោះចំណូលចរន្តអនុវត្តបានចំនួនជាង ១២ ពាន់ប៊ីលានរៀល ស្មើនឹង ៥៧,៣% នៃច្បាប់ហិរញ្ញវត្ថុ គឺខ្ពស់ជាង ៣,៨ ពិន្ទុភាគរយ ធៀបនឹងរយៈពេលដូចគ្នាក្នុងឆ្នាំ ២០២១។ ចំណែកចំណូលសារពើពន្ធអនុវត្តបានចំនួនជាង ១២ពាន់ប៊ីលានរៀល ស្មើនឹង ៥៩,៤% នៃច្បាប់ហិរញ្ញវត្ថុ គឺខ្ពស់ជាង ៤,១% ពិន្ទុភាគរយ ធៀបនឹងរយៈពេលដូចគ្នាក្នុងឆ្នាំ ២០២១។ ដោយឡែកចំណូលមិនមែនសារពើពន្ធអនុវត្តបានចំនួនជាង ៦៧៦ ប៊ីលានរៀល ស្មើនឹង ៣៥,០% នៃច្បាប់ហិរញ្ញវត្ថុ គឺទាបជាង ៣,៩ ពិន្ទុភាគរយធៀបនឹងរយៈពេលដូចគ្នាក្នុងឆ្នាំ ២០២១ ។ចំណូលសារពើពន្ធរួមមាន ចំណូលពីគយ និងរដ្ឋាករកម្ពុជា និងចំណូលពីពន្ធដារ គឺអនុវត្តបានល្អប្រសើរ ពោលគឺខ្ពស់ជាងឆ្នាំ ២០២១ ធៀបនឹងរយៈពេល ៦ ខែដើមឆ្នាំដូចគ្នា។ ចំណែកចំណូលមិនមែនសារពើពន្ធរួមមាន ចំណូលទ្រព្យសម្បត្តិរដ្ឋ ការជួលទ្រព្យសម្បត្តិរដ្ឋ និងចំណូលកាតព្វកិច្ចកាស៊ីណូ និងឆ្នោត អនុវត្តបានទាប ដោយសារប្រភពចំណូលសារពើពន្ធសំខាន់ៗនៅទទួលរងនូវផលប៉ះពាល់ខ្លាំងពីជំងឺកូវីដ-១៩។ ទោះជាយ៉ាងនេះក្តី, តាមការប៉ាន់ប្រមាណរហូតដល់ដំណាច់ឆ្នាំ ២០២២, ចំណូលសារពើពន្ធ និងចំណូលមិនមែនសារពើពន្ធអាចនឹងសម្រេចបាន ១០៣,៥% នៃច្បាប់ហិរញ្ញវត្ថុឆ្នាំ ២០២២ គឺខ្ពស់ជាងច្បាប់ហិរញ្ញវត្ថុចំនួន ៣,៥% ។ តាមការវាយតម្លៃនេះ ចំណូលចរន្ត នឹងសម្រេចបានខ្ពស់ជាងផែនការ ១៩០ លានដុល្លារអាមេរិក ដោយសារចំណូលមិនមែនសារពើពន្ធនឹងសម្រេចខ្ពស់ជាងផែនការប្រមាណ ៥ លានដុល្លារអាម៉េរិក, ចំណូលពន្ធដារអាចសម្រេចបានខ្ពស់ជាងផែនការ២២៩ លានដុល្លារអាមេរិក ប៉ុន្តែចំណូលគយអាចទាបជាងផែនការ ៤៤ លានដុល្លារអាម៉េរិក៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

លោក Netanyahu ថាលោកទទួលការព្យាបាលជំងឺមហារីកក្រពេញប្រូស្តាតដោយជោគជ័យ

លោក Zelenskiy ធ្វើដំណើរទៅដល់អារ៉ាប៊ីសាអ៊ូឌីត ដើម្បីស្វែងរកកិច្ចសហប្រតិបត្តិការសន្តិសុខ

មនុស្ស ២នាក់ស្លាប់ អំឡុងការវាយប្រហារតាមអាកាស ខណៈយោធោអ៊ីស្រាអែលចេញការព្រមានជម្លៀស នៅភាគខាងត្បូងលីបង់

សមាជិកសភាហេសបូឡា៖ បទឈប់បាញ់ «គ្មានន័យ» ទេ ដោយសារតែការវាយប្រហាររបស់អ៊ីស្រាអែល

កងកម្លាំងរក្សាសន្តិភាពឥណ្ឌូនេស៊ីរបស់ UN ស្លាប់ដោយសាររបួស អំឡុងការផ្ទុះ នៅលីបង់

ទីក្រុងប៉េកាំងច្រានចោលការចោទប្រកាន់របស់លោក Trumpថា នាវាអ៊ីរ៉ង់ស្ទាក់ចាប់បានមានអំណោយពីចិន

អាល្លឺម៉ង់ និងអ៊ីតាលី សង្កត់ធ្ងន់លើការរួបរួម ក្នុងចំណោមសមាជិករបស់អង្គការណាតូ

លោក Putinនិយាយថា រុស្ស៊ីនឹងការពារផលប្រយោជន៍របស់ខ្លួននៅតំបន់អាក់ទិក

ក្តីបារម្ភ និងភាពមិនច្បាស់លាស់កើតមាននៅអ៊ីរ៉ាក់ ខណៈអាមេរិកបញ្ឈប់ការដឹកជញ្ជូនប្រាក់ដុល្លារ

គណៈកម្មការស៊ើបអង្កេតតង់ហ្សានី៖ មនុស្សជាង ៥០០នាក់ ត្រូវបានសម្លាប់ក្នុងអំពើហិង្សាបោះឆ្នោតឆ្នាំមុន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877