នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រតិបត្តិការការទូទាត់តាម QR Code នៅកម្ពុជា កំពុងពេញនិយមសម្រាប់អ្នកប្រើប្រាស់
ឯកឧត្តម ឌិត ទីណា លើកទឹកចិត្តសហគមន៍ និងក្រុមហ៊ុន​បន្តស្មារតី​សាមគ្គីភាព ដើម្បី​ទទួល​ផល​ចំណេញ​ទាំងអស់គ្នាថែមទៀត
កម្ពុជា និងកូរ៉េ រួមគ្នាជំរុញការកាត់បន្ថយឧស្ម័ន​ផ្ទះកញ្ចក់​តាមរយៈ​ការ​វិនិយោគ​មធ្យោបាយ​ដឹកជញ្ជូន​-អគ្គិសនី ឆ្ពោះទៅគោលដៅអព្យាក្រឹតកាបូនឆ្នាំ២០៥០
កសិករខេត្តកំពង់ធំជិតពីររយគ្រួសារទទួលផលចំណេញច្រើនក្រោយចងក្រងជាសហគមន៍កសិកម្មទំនើប

សេដ្ឋកិច្ច និង កសិកម្ម

ទ្រព្យសកម្មរបស់គ្រឹះស្ថានធនាគារបានហក់ឡើង ខណៈគ្រឹះស្ថានមីក្រូហិរញ្ញវត្ថុបានថយចុះ

2025/02/20 01:21:29 pm        164
Facebook Telegram Linkin
ទ្រព្យសកម្មរបស់គ្រឹះស្ថានធនាគារក្នុងឆ្នាំ ២០២៤ បានកើនឡើងជាង ៨ ភាគរយ ត្រូវប្រមាណជាង ៨៤ ប៊ីលានដុល្លារអាមេរិក ខណៈទ្រព្យសកម្មនៅក្នុងគ្រឹះស្ថានមីក្រូហិរញ្ញវត្ថុ បានថយចុះជិត ៤ ភាគរយ មកត្រូវប្រមាណជាង ៦,២ ប៊ីលានដុល្លារអាមេរិក។ធនាគារជាតិនៃកម្ពុជា បានបង្ហាញរបាយការណ៍ឆ្នាំ ២០២៤ ស្តីពីវឌ្ឍនភាពនៃការសម្រេចបាននៅក្នុងវិស័យធនាគារ និង ហិរញ្ញវត្ថុ ក្នុងនោះធនាគារបន្តរក្សាបានភាពធន់ទាំងផ្នែកដើមទុន និងសន្ទនីយភាព និងអនុវត្តប្រតិបត្តិការសេវាធនាគារ ប្រកបដោយ ភាពប្រុងប្រយ័ត្ន ខណៈដែលស្ថានភាពដើមទុនរបស់គ្រឹះស្ថានធនាគារ និងហិរញ្ញវត្ថុបន្តមានភាពគ្រប់គ្រាន់ អនុលោមតាមបទប្បញ្ញត្តិ (១៥%) ដោយអនុបាតភាពគ្រប់គ្រាន់នៃដើមទុនវិស័យធនាគារ មានកម្រិតជាមធ្យម ២២,៥% និងវិស័យមីក្រូហិរញ្ញវត្ថុមានកម្រិត ២៦,២%។ ចំពោះវិស័យធនាគារ, នៅក្នុងឆ្នាំ២០២៤ នេះ ទ្រព្យសកម្មរបស់គ្រឹះស្ថានធនាគារបានកើនឡើង ៨,២% ដល់ប្រមាណជាង ៣៤២ ទ្រីលានរៀល ត្រូវជាង ៨៤ ប៊ីលានដុល្លារអាមេរិក ដោយឥណទានបានកើនឡើង ៣,៣% ដល់ប្រមាណជាង ២២០ ទ្រីលាន រៀល ត្រូវជាង ៥៤ ប៊ីលានដុល្លារអាមេរិក និងមានចំនួន ២,៤ លានគណនី។ ឥណទានត្រូវបានផ្ដល់ទៅកាន់វិស័យសំខាន់ៗ ក្នុង សេដ្ឋកិច្ចដូចជា៖ ការជួញដូររាយ ១៦,៩%, ការទិញផ្ទះជាកម្មសិទ្ធិផ្ទាល់ខ្លួន ១២,៥%, ការជួញដូរអចលនទ្រព្យ ១១,៦%, ការឱ្យ ខ្ចីជាបុគ្គល ១០,១%, សំណង់ ៩,៧%, កសិកម្ម រុក្ខាប្រមាញ់ និងនេសាទ ៨,៩%, ការជួញដូរដុំ ៨,៨%, កម្មន្តសាល ៤,៣% សណ្ឋាគារនិងភោជនីយដ្ឋាន ៤,០%, និងផ្សេងៗ ១៣,២%។ដោយឡែកវិស័យមីក្រូហិរញ្ញវត្ថុក្នុងឆ្នាំ ២០២៤ នេះដែរ, ទ្រព្យសកម្មគ្រឹះស្ថានមីក្រូហិរញ្ញវត្ថុបានថយចុះជិត ៤% មកនូវជាង ២៥ ទ្រីលានរៀល ត្រូវប្រមាណ ៦,២ ប៊ីលានដុល្លារអាមេរិក ដែលក្នុងនោះឥណទានបានកើនឡើងជិត ២% ដល់ជាង ២១ ទ្រីលាន រៀល ត្រូវប្រមាណ ៥,៣ ប៊ីលានដុល្លារអាមេរិក ដោយមាន ១,៦ លានគណនី។ ឥណទានទាំងនេះបានផ្តល់ទៅកាន់វិស័យសំខាន់ៗ ក្នុងសេដ្ឋកិច្ចរួមមាន៖ អង្គភាពគ្រួសារ ៣២,៨%, កសិកម្ម ២០,៨%, ពាណិជ្ជកម្មនិងជំនួញ ២០,១%, សេវាកម្ម ១១,៨%, សំណង់ ៦,៧%, ដឹកជញ្ជូន ២,៧%, កម្មន្តសាល ២,៧% និងផ្សេងៗ ២,៤%៕ អត្ថបទ៖ សុន រ៉ាឌី

អង្ករកម្ពុជាចំនួនជាង ៣៦,០០០តោន បាននាំចេញទៅលក់២៣ប្រទេស ក្នុងទ្វីបអឺរ៉ុប

2025/02/18 12:18:43 pm        130
Facebook Telegram Linkin
យោងតាមរបាយការណ៍នាំចេញរបស់កម្ពុជា បានបង្ហាញឲ្យដឹងថា គោលដៅចំនួន ២៣ប្រទេស នៅក្នុងទ្វីបអឺរ៉ុប សម្រាប់កម្ពុជា គិតក្នុងរយៈពេល១ខែដំបូង ឆ្នាំ២០២៥នេះ ការនាំអង្ករចេញរបស់កម្ពុជាមានចំនួនសរុប ៣៦,៧១៤តោន គិតជាទឹកប្រាក់ ២៩.៧៩លានដុល្លារសហរដ្ឋអាម៉េរិក។នៅក្នុងរបាយការណ៍នាំចេញរបស់សហព័ន្ធស្រូវអង្ករកម្ពុជា បានចេញផ្សាយថា ក្នុងរយៈពេល ១ខែដំបូង នៃឆ្នាំ២០២៥ កម្ពុជាបាននាំចេញអង្ករសរុបចំនួន ៥៩ ០៨៦តោន តាមរយៈក្រុមហ៊ុននាំចេញអង្ករចំនួន ៣៩ក្រុមហ៊ុន ទៅកាន់គោលដៅចំនួន៤៥ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន២៣ បានបរិមាណអង្ករចំនួន ៣៦ ៧១៤ តោន គិតជាទឹកប្រាក់ចំនួន ២៩.៧៩លានដុល្លារ ទៅកាន់ប្រទេសចិន និងហុងកុង ចំនួន ៣ ៧៧២តោន គិតជាទឹកប្រាក់ចំនួន ២.៥៦ លានដុល្លារ ទៅកាន់ប្រទេសក្នុងអាស៊ានចំនួន ៤ប្រទេស បានបរិមាណចំនួន ៩ ៤១៣តោន គិតជាទឹកប្រាក់ចំនួន ៧.៣១លានដុល្លារ និងទៅកាន់គោលដៅ ១៦ ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន។ល។ បានចំនួន ៩ ១៨៧ តោន គិតជាទឹកប្រាក់ចំនួន ៨.៣៧ លានដុល្លារ។របាយការណ៍ដដែល បានឲ្យដឹងទៀតថា ចំពោះប្រភេទអង្ករ បាននាំចេញអង្ករក្រអូបចំនួន ៩៣.០១% ប្រភេទអង្ករស ធម្មតា ២.៩៣% អង្ករចំហ៊ុយ ២.៣១% អង្ករសរីរាង្គចំនួន ១.៤២% និងអង្ករផ្សេងៗចំនួន ០.៣៣% ។ ជុំវិញការនាំចេញនេះដែរ ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា បានមានប្រសាសន៍ឲ្យដឹងថា អង្ករកម្ពុជាដែលបាននាំចេញទៅកាន់គោលដៅខាងលើនេះ រួមមានប្រភេទ អង្ករសែនក្រអូប អង្ករសរីរាង្គ អង្ករស អង្ករចំហុយ និងអង្ករជប៉ុន។ ក្នុងនោះ ប្រទេសកម្ពុជា ក៏រកចំណូលបាន ១៣៩លានដុល្លារ ពីការនាំចេញអង្ករចំនួន ៦១៩,៤៨៩តោន ទៅប្រទេសជិតខាងផងដែរ ។ បន្ថែមពីនេះ កម្ពុជា ក៏បាននាំចេញស្រូវចំនួន ៦១៩ ៤៨៩ តោនស្រូវសើម ដែលគិតជាទឹកប្រាក់បានប៉ាន់ប្រមាណ ១៣៩.៣៨លានដុល្លារសហរដ្ឋអាមេរិក។ ចំពោះការងារនាំចេញអង្ករនេះ សមាគមកំពុងធ្វើការជំរុញការនាំចេញទៅកាន់គោលដៅនាំចេញសំខាន់ៗ និងបើកទីផ្សារថ្មីៗបន្ថែមទៀត ដើម្បីពង្រីកទីផ្សារនាំចេញ។ឧកញ៉ា បានបន្តថា ចំពោះការងារនេះ សហព័ន្ធស្រូវអង្ករកម្ពុជា បានកំណត់គោលដៅប្រកបដោយមហិច្ឆិតាក្នុងការនាំចេញអង្ករឱ្យបានយ៉ាងហោចណាស់ ១លានតោននៅឆ្នាំ២០២៥៕ អត្ថបទ ឈិត បូរ៉ាវី 

កម្ពុជានាំចេញផលិតផលសម្លៀកបំពាក់ក្នុងខែដំបូងឆ្នាំ២០២៥នេះមានទឹកប្រាក់ជិត ១ ពាន់លានដុល្លារ

2025/02/18 11:34:00 am        117
Facebook Telegram Linkin
កម្ពុជានាំចេញផលិតផលសម្លៀកបំពាក់ សម្រាប់ខែដំបូងនៅក្នុងឆ្នាំ២០២៥ នេះ មាន​ទំហំ​ទឹក​ប្រាក់​សរុបជិត ១ ពាន់លានដុល្លារ អាមេរិក បានងើបឡើងគួរកត់សម្គាល់ ដោយរាជ​រដ្ឋាភិបាល​រំពឹង​ថា វិស័យនេះនឹងជួយគាំទ្រដល់កំណើនសេដ្ឋកិច្ចកម្ពុជាឱ្យសម្រេចបាន ៦,៣ ភាគរយ ក្នុង​ឆ្នាំ​នេះ។អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បាន​បង្ហាញ​ស្ថិតិ​ពាណិជ្ជកម្ម នៃការធ្វើពាណិជ្ជកម្មលើ ទីផ្សារអន្តរជាតិរបស់កម្ពុជា ក្នុងនោះសម្រាប់ខែដំបូង ក្នុង​ឆ្នាំ​២០២៥នេះ, កម្ពុជាបាននាំចេញផលិតផលសម្លៀកបំពាក់ និងគ្រឿងបន្ទាប់ បន្សំធ្វើ​ពី​ក្រណាត់ មានទឹកប្រាក់ជាង ៥៧១ លានដុល្លារអាមេរិក កើនឡើងជាង ៣១ ភាគរយ ខណៈ​ការ​នាំ​ចេញ​សម្លៀកបំពាក់ និង គ្រឿងបន្ទាប់បន្សំ នៃសម្លៀកបំពាក់មិនធ្វើពីក្រណាត់ មានទឹក​ប្រាក់​ជាង ៣៧៨ លានដុល្លារអាមរិក កើនឡើងជិត ៤១ ភាគរយ បើធៀប រយៈពេល​ដូច​គ្នានិ​ង​ឆ្នាំ​២០២៤​។ទាក់ទិនការនាំចេញសម្លៀកបំពាក់ ថ្មីៗនេះ, ឯកឧត្តមបណ្ឌិត ផាន់ ផល្លា រដ្ឋលេខាធិការ​ក្រសួង​សេដ្ឋកិច្ច និងហិរញ្ញវត្ថុ លើក ឡើងនៅក្នុងវេទិកាស្តីពីការគ្រប់គ្រងមីក្រូហិរញ្ញវត្ថុ និងច្បាប់​ថវិ​កា​ឆ្នាំ​២០២៥ នេះថា សម្រាប់ឆ្នាំ២០២៤ កន្លងមក ចំពោះវិស័យដែល ធ្វើឱ្យ​កម្ពុជា​សម្រេច​បាន​កំណើន​សេដ្ឋកិច្ចក្នុងរង្វង់ ៦ ភាគរយ រួមមាន៖ អនុវិស័យកាត់ដេរ អនុវិស័យដឹកជញ្ជូន និងវិស័យ​ទេសចរ​ណ៍ ក្នុងនោះសម្រាប់អនុវិស័យកាត់ដេរ នៅក្នុងឆ្នាំ ២០២៤ កន្លងមក មានកំណើន​កើន​ឡើង​គួរ​កត់សម្គាល់ បច្ចុប្បន្នអនុវិស័យនេះបានកំពុង បន្តរក្សា នឹងគាំទ្រដល់កំណើនសេដ្ឋកិច្ច ដែល​រាជរដ្ឋាភិបាលរំពឹងថា នៅក្នុងឆ្នាំ២០២៥ នេះ កម្ពុជានឹងសម្រេចបានកំណើនសេដ្ឋ កិច្ច​ក្នុង​រង្វង់​ប្រមាណ ៦,៣ ភាគរយ។សូមបញ្ជាក់ថា នៅក្នុងខែ មករា ឆ្នាំ២០២៥ នេះ ការធ្វើពាណិជ្ជកម្មអន្តរជាតិរបស់កម្ពុជា មាន​ទំហំ​ទឹក​ប្រាក់សរុបប្រមាណជាង ៥ ពាន់ លានដុល្លារអាមេរិក កើនឡើង ២៤ ភាគរយ ធៀប​និង​ឆ្នាំ២០២៤ ក្នុងនោះកម្ពុជាបាននាំចេញទំនិញ មានទឹកប្រាក់ជាង ២,៣ ពាន់លានដុល្លារអាមេរិក កើន ១៧ ភាគរយ ខណៈការនាំចូល មានទឹកប្រាក់ ៣,៧ ពាន់លានដុល្លារអាមេរិក កើន​ឡើង​ជាង ៣១ ភាគរយ បើធៀបរយៈ ពេលដូចគ្នានិងឆ្នាំ ២០២៤៕ អត្ថបទ៖ សុន រ៉ាឌី 

ក្រុមហ៊ុនចិនចំនួន ១៨ ចំណាប់អារម្មណ៍យ៉ាងខ្លាំងលើការបណ្តាក់ទុនវិនិយោគនៅកម្ពុជា

2025/02/17 02:55:27 pm        228
Facebook Telegram Linkin
ប្រតិភូក្រុមហ៊ុនចំនួន ១៨ មកពីទីក្រុងនីងប៉ ខេត្តចឺជាំង នៃសាធារណរដ្ឋប្រជាមានិតចិន បាន​បង្ហាញ​នូវ​ការចំណាប់អារម្មណ៍ យ៉ាងខ្លាំង អំពីគម្រោងមកបណ្តាក់ទុន ក្រោមបរិយាស​អំណោយ​ផល​លើ​ការវិនិយោគនៅព្រះរាជាណាចក្រកម្ពុជា។ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងសហការី តាមរយៈអ្នក​ឧកញ៉ា​​បណ្ឌិត ពុង ខៀវសែ ប្រធានក្រុមប្រឹក្សាភិបាលធនាគារ កាណាឌីយ៉ា ភីអិលស៊ី នៅថ្ងៃ​ទី​១៧ ខែកុម្ភៈ ឆ្នាំ២០២៥ បានទទួលជួបពិភាក្សាការងារ ជាមួយ គណៈប្រតិភូក្រុមហ៊ុនចិនចំនួន ១៨ មកពីទីក្រុងនីងប៉ ខេត្តចឺជាំង សាធារណរដ្ឋប្រជាមានិតចិន ដឹកនាំដោយលោកស្រី លូ ចឺឈីង (Lu Zhiqiong) អគ្គនាយកធនាគារ នីងប៉ ដែលក្រុមហ៊ុន​ទាំង​នោះ​មាន​កម្ម​វត្ថុ​អាជីវកម្ម​ក្នុង​វិស័យមួយចំនួនដូចជា៖ ការកែច្នៃកៅស៊ូ , ផលិតសម្ភារៈបរិក្ខារពេទ្យ, សម្ភារៈឆ្លាត​វៃ​ប្រើ​ប្រាស់​ក្នុងផ្ទះ, សម្លៀកបំពាក់ និងធនាគារជាដើម។ឯកឧត្តមអគ្គលេខាធិការ បានមានមតិស្វាគមន៍ ចំពោះ​គណៈ​ប្រតិភូ​ដែល​បាន​ចំណាយ​ពេល​វេលា​ដ៏​មាន​តម្លៃ មកធ្វើទស្សន កិច្ចសិក្សាផ្ទាល់នៅកម្ពុជា ក្នុងនោះឯកឧត្តមក៏បានលើកទ្បើង ពីស​ក្តា​នុពល​ក្នុ​​ងវិស័យឧស្សាហកម្ម, កម្មន្តសាល, ការកែច្នៃផលិតផល, ការបង្កើត​តំបន់​សេដ្ឋកិច្ច​ពិសេស និងវិស័យកសិកម្ម និងកសិ-ឧស្សាហកម្ម ជាពិសេស​កម្ពុជា​មាន​ដំណាំ​យុទ្ធ​សាស្ត្រ​ជា​ច្រើន​រួម​មាន ស្រូវ ដំទ្បូងមី និងស្វាយចន្ទីជាដើម ដែលទាមទារឱ្យមានការវិនិយោគ កែច្នៃ​ក្នុង​ស្រុក ដើម្បីបង្កើតតម្លៃបន្ថែម។ ឯកឧត្តម ជា វុទ្ធី ក៏បានជំរុញឱ្យវិនិយោគិនធ្វើការគិតគូរ ក្នុង​ការ​បង្កើត​ខ្សែ​ចង្វាក់​ផលិត​កម្ម​ក្នុង​វិស័យ​កសិកម្ម ជាពិសេសការ កែច្នៃស្វាយចន្ទី ដែលជាគំនិតផ្តួចផ្តើមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាផងដែរ។ ទន្ទឹមនឹងនេះ ឯកឧត្តម​អគ្គ​លេខា​ធិការ​ក៏បានជម្រាបជូនគណៈប្រតិភូ ពីស្ថានភាពវិនិយោគនៅកម្ពុជា ច្បាប់ និងបទ​ប្បញ្ញត្តិ​ពាក់​ព័ន្ធ នឹងការវិនិយោគដែលបើកចំហ មានតម្លាភាព និងអាចប៉ាន់ប្រមាណទុកជាមុនបាន ព្រម​ទាំង​ការ​លើកទឹកចិត្តនានា។ជាការឆ្លើយតប, លោកស្រី លូ ចឺឈីង បានថ្លែងអំណរគុណដល់ឯកឧត្តមអគ្គលេខាធិការ ដែល​បាន​ឆ្លៀត​ពេលមមាញឹក ទទួលជួបគណៈប្រតិភូ និងបានជម្រាប​ជូន​យ៉ាង​ក្បោះ​ក្បាយ​ពី​បរិយាកាស​វិនិយោគនៅកម្ពុជា។ លោកស្រីសង្ឃឹមថា តាមរយៈជំនួប លើកនេះ នឹងធ្វើ​ឲ្យ​ក្រុម​ហ៊ុន​មាន​ចំណាប់អារម្មណ៍កាន់តែខ្លាំងក្នុងការគិតគូរមកបណ្តាក់ទុនវិនិយោគនៅកម្ពុជា៕ អត្ថបទ៖ សុន រ៉ាឌី

សភាមុខរបរកំពុងគាំទ្រសកម្មភាពអាជីវកម្មក្នុងស្រុក ខណៈភ្ញៀវទេសចរកំពុងហូរចូលមកវិញ

2025/02/17 11:22:36 am        240
Facebook Telegram Linkin
សភាមុខរបរ និងមីក្រូសហគ្រាសកម្ពុជា បាននិងកំពុងផ្តោតយកចិត្តទុកដាក់ លើកកម្ពស់មុខរបរនៅតាមមូលដ្ឋានអាជីវកម្មទេសចរណ៍ក្នុងស្រុក តាមរយៈការផ្តល់នូវប្រឹក្សាយោបល់ គន្លឹះដឹកនាំ និងវិធីសាស្រ្តសំខាន់ៗ ដើម្បីជួយជ្រោមជ្រែងធ្វើឱ្យប្រសើរឡើង ខណៈកម្ពុជាកំពុងមានកំណើនភ្ញៀវទេសចរឡើងវិញ។លោក ដា សុធន់ ប្រធានគ្រប់គ្រងវិស័យទេសចរណ៍ និងបដិសណ្ឋាកិច្ច នៃសភាមុខរបរនិងមីក្រូសហគ្រាសកម្ពុជា លើកឡើង លើការចុះហត្ថលេខាប្រគល់សិទ្ធប្រកបអាជីវកម្មសាខាហ្គាឌ័រហ្គ្រោនស៍ ហ្រ្វេនឆាយ (Gather Grounds) នាចុងសប្តាហ៍ កន្លងមកថា ក្នុងឆ្នាំ២០២៥ នេះ សភាមុខរបរបាននិងកំពុងផ្តោតការយកចិត្តទុកដាក់ខ្ពស់ ជួយដល់មុខរបរនៅតាមមូលដ្ឋានអាជីវកម្មទេសចរណ៍ តាមរយៈការផ្តល់ពិគ្រោះយល់ គន្លឹះដឹកនាំ ជាពិសេសសមាជិកនៅក្នុងសភាមុខរបរ ដើម្បីជួយអភិវឌ្ឍន៍នៅលើចំណុចខ្វះខាត ។ លោក បន្តលើកឡើងថា នៅក្នុងស្ថានភាពនៃវិបត្តិដែលផ្ទុះឡើងនាពេលកន្លងមក ខណៈដែលចំនួនភ្ញៀវទេសចរណ៍ធ្លាក់ចុះ អាជីវកម្ម បម្រើ ឱ្យវិស័យទេសចរណ៍ជាច្រើនបានបិទទ្វារ បច្ចុប្បន្នស្របពេលវិស័យទេសចរណ៍នៅកម្ពុជាបានកំពុងងើបឡើង ការជួយដល់មូលដ្ឋាន អាជីវកម្មទេសចរណ៍គឺជារឿងសំខាន់ ដើម្បីលើកកម្ពស់មូលដ្ឋានអាជីវកម្មឱ្យប្រសើរឡើង និងការទាក់ទាញភ្ញៀវទេសចរណផងដែរ។លោកស្រី នី ប៉ាឡូណា សមាជិកសភាមុខរបរនិងមីក្រូសហគ្រាសកម្ពុជា លើកឡើងថា សភាមុខរបរបានកំពុងគាំទ្រដល់ការ រីកលូតលាស់ក្នុងវិស័យឧស្សាហកម្ម ពាណិជ្ជកម្ម និងអាជីវកម្មផ្សេងៗ ជាពិសេសសហគ្រាសធុនមីក្រូ និងតូច និងវិស័យម្ហូបអាហារ បច្ចុប្បន្នវិស័យទាំងនេះនៅកម្ពុជា បានកំពុងងើបឡើង និងបានកំពុងបង្កើតនូវហ្រ្វេនឆាយដែលជារបស់ខ្លួនឯង គាំទ្រដល់សកម្មភាព សេដ្ឋកិច្ចក្នុងស្រុក តាមរយៈការបង្កើតការងារ ប្រាក់ចំណូល និងការចូលរួមទាក់ទាញភ្ញៀវទេសចរណ៍ជាដើម។លោក នួន រស្មី ទីប្រឹក្សាបច្ចេកទេស នៃសភាមុខរបរនិងមីក្រូសហគ្រាសកម្ពុជា ថ្លែងថា បន្ទាប់ពីស្ថានភាពនៃសេដ្ឋកិច្ចក្នុង ប្រទេសបានកំពុងងើបឡើង និងស្របពេលភ្ញៀវទេសចរណ៍អន្តរជាតិកំពុងហូរចូលមកវិញ ចំពោះវិស័យម្អូបអាហារ យើងគួរធ្វើយ៉ាង មិច? នាំផលិតផលក្រៅស្រុកមកលក់ឬយ៉ាងណា? ដែលបញ្ហានេះ, យើងត្រូវតែជំរុញបង្កើតផលិតផលក្នុងស្រុកឱ្យបានច្រើន ជា ផលិតផលដែលមានគុណភាព បច្ចុប្បន្នយើងឃើញមានផលិតផលក្នុងស្រុកកាន់តែច្រើន បានបង្កើតនូវហ្រ្វេនឆាយថ្មីៗរបស់ខ្លួន រហូត មានការលក់សិទ្ធិទៅក្រៅប្រទេស នេះគឺជាការទាក់ទាញមួយ និងបានបង្ហាញពីអត្តសញ្ញាណរបស់ខ្មែរឱ្យបរទេសស្គាល់ផងដែរ។សូមបញ្ជាក់ថា នៅក្នុងឆ្នាំ ២០២៤ កម្ពុជាទទួលបានភ្ញៀវវទេសចរណ៍អន្តរជាតិបានជាង១ លាននាក់ ខណៈនៅឆ្នាំ២០២៣ កម្ពុជា ទទួលបានភ្ញៀវទេសចរណ៍អន្តរជាតិ ក្នុងរង្វង់ ៨០ ម៉ឺននាក់ប៉ុណ្ណោះ បច្ចុប្បន្នរាជរដ្ឋាភិបាលបន្តពិនិត្យលទ្ធភាព ក្នុងការបន្តលើវិធាន ការអន្តរាគមន៍ ដើម្បីជួយស្ដារក្នុងវិស័យទេសចរណ៍ ចំពោះសហគ្រាសដែលបានចុះបញ្ជីពន្ធដារ និងមានសកម្មភាពអាជីវកម្មនៅខេត្ត សៀមរាប ទោះបីបច្ចុប្បន្នចំនួនទេសចរណ៍នៅខេត្តសៀបរាប បានហក់ឡើងជាបណ្តើរៗវិញក៏ដោយ៕ អត្ថបទ៖ សុន រ៉ាឌី

សមាគមជាតិ-អន្តរជាតិ មើលឃើញបរិយាកាសវិនិយោគនៅកម្ពុជា​មាននិន្នាការកើនឡើង​ជាបន្តបន្ទាប់

2025/02/17 11:00:27 am        546
Facebook Telegram Linkin
សមាគមជាតិនិងអន្តរជាតិ មើលឃើញពីបរិយាកាសវិនិយោគនៅកម្ពុជា នឹងមាន​និន្នាការ​កើន​ឡើង​ជាបន្តបន្ទាប់ ក្រោមការខិតខំ ប្រឹងប្រែង និងការកែទម្រង់​ដ៏​មុត​ស្រួច​នានា​របស់​រាជ​រដ្ឋាភិបាល ក្នុងការទាក់ទាញអ្នកវិនិយោគ និងជាប្រទេសមានសេដ្ឋកិច្ចបើកចំហរ បានផ្តល់​ភាព​អំណោយ​ផលដល់បរិយាកាសវិនិយោគ។លោក សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងនៅក្នុងកិច្ចសម្ភាសន៍ជាមួយ BTV ស្តីពីអំពីរំហូរវិនិយោគនៅ កម្ពុជានេះថា សន្តិភាពបានផ្តល់នូវការអភិវឌ្ឍន៍គ្រប់យ៉ាង និងបាន​បង្កើន​ទំនុក​ចចិត្តយ៉ាងខ្លាំងលើបរិយាកាសវិនិយោគនៅកម្ពុជា ជាក់ ស្តែងនៅពេល​មាន​វិបត្តិ​ដែល​ប៉ះ​ពាល់​ជា​អវិជ្ជមាន កម្ពុជាបានត្រៀមខ្លួន និងប្រែក្លាយបញ្ហាប្រឈមនានា ទៅជាកាលានុវត្តភាព ផ្តល់ ភាពអំណោយផល លើការលើកកម្ពស់ប្រសិទ្ធភាព និងភាពប្រកួតប្រជែងសេដ្ឋកិច្ច ដើម្បី​ទាក់​ទាញ​វិនិយោគិន និងធុរកិច្ចបន្ថែម ជាពិសេសការហូរចូលមកពីតំបន់ជម្លោះពាណិជ្ជកម្ម បាន​ធ្វើ​ឱ្យ​រំហូរ​វិនិយោគនៅកម្ពុជាមានកំណើនជាបន្តបន្ទាប់។ចំណែកលោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃប្រចាំនៅកម្ពុជា ក៏​មាន​ក្តី​រំពឹ​ង​ខ្ពស់ ចំពោះការហូរចូល វិនិយោគិនពីបរទេសមកកម្ពុជាផងដែរ ជាក់ស្តែងនៅដើមឆ្នាំ២០២៥ នេះ ធុរជន និងវិនិយោគិនថៃ បានហូរចូលមកកម្ពុជាជាច្រើន ដើម្បី​មក​សិក្សា​លទ្ធ​ភាព​អំពី​ការ​ធ្វើ​ពាណិជ្ជកម្ម និងការវិនិយោគផ្សេងៗ ខណៈដែលក្រុមហ៊ុនដែលកំពុងធ្វើអាជីវកម្មនៅកម្ពុជាមួយ ចំនួន ក៏មានផែនការពង្រីកអាជីវកម្មបន្ថែមផងដែរ ដែលទាំង​នេះ​សុទ្ធ​តែ​ជា​ការ​ចូល​រួម​ចំណែក​គាំទ្រសកម្មភាពវិនិយោគ។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លើក​ឡើង​ថា ជុំវិញឱកាសវិនិយោគ នេះ រាជរដ្ឋាភិបាលកម្ពុជាបានខិតខំប្រឹងប្រែងយ៉ាងខ្លាំង ដើម្បី​ទាក់​ទាញ​អ្នកវិនិយោគដូចជា ដើរគោះទ្វារនៅតាមបណ្តាប្រទេសមួយ ចំនួន ការទាក់ម៉ូយ និង​ការកែ​ទម្រង់ដ៏មុតស្រួចនានារបស់រាជរដ្ឋាភិបាលជាដើម គឺមាន​គោល​បំណង​រក​ការ​ងារ​ថ្មី​ៗ​ជូន​ប្រជាពលរដ្ឋ ជាពិសេសការឈានទៅសម្រេចបានតាមចក្ខុវិស័យរបស់កម្ពុជានៅឆ្នាំ២០៥០។សូមបញ្ជាក់ថា នៅក្នុងឆ្នាំ២០២៤ កន្លងមកនេះ ក្រុមប្រឹក្សាអភិវឌ្ឍន៍កម្ពុជា បានអនុម័ត​គម្រោង​វិនិយោគ​សរុបមានចំនួន ៤១៤ គម្រោង ក្នុងនោះគម្រោងវិនិយោគថ្មីចំនួន ៣៨៧ គម្រោង និង​គម្រោង​ពង្រីកផលិតកម្មចំនួន ២៧ គម្រោង មានទុនវិនិយោគសរុប ប្រមាណ៦,៩ ពាន់លាន​ដុល្លារ​អាមេរិក និងអាចបង្កើតការងារបានប្រមាណជិត៣២ ម៉ឺនកន្លែង។ ចំណែកនៅក្នុងខែមករា ឆ្នាំ២០២៥ នេះ CDC បានអនុម័តគម្រោងវិនិយោគក្នុងសរុបចំនួន ៦៨ គម្រោង មាន​ទុន​វិនិយោគ​ប្រមាណ ៧៤៨ លានដុល្លារអាមេរិក ក្នុងនោះ គម្រោងវិនិយោគថ្មីមានចំនួន ៦៤ គម្រោង និងគម្រោងពង្រីកផលិតកម្មចំនួន ៤ គម្រោង៕ អត្ថបទ៖ សុន រ៉ាឌី

រដ្ឋាភិបាលកម្ពុជារៀបចំកម្មវិធីដើម្បីស្វែងរកឱកាសជំរុញពាណិជ្ជកម្មវិស័យស្រូវអង្ករនៅប្រទេសហ្វីលីពីន

2025/02/13 12:44:03 pm        145
Facebook Telegram Linkin
ភ្នំពេញ៖ ក្រុមគណៈប្រតិភូកម្ពុជា រួមទាំងតំណាងមកពីសហព័ន្ធស្រូវអង្ករកម្ពុជា កាលពីកន្លងទៅនេះ បានចូលរួមកម្មវិធីផ្គូផ្គងទីផ្សារនៃវិស័យស្រូវអង្ករ កម្ពុជា-ហ្វីលីពីន នៅទីក្រុងម៉ានីល ប្រទេសហ្វីលីពីន ដែលរៀបចំឡើងដោយក្រុមការងារក្រសួងពាណិជ្ជកម្មកម្ពុជា ដើម្បីបានប្រមូលផ្តុំអ្នកនាំចេញ-នាំចូលសំខាន់ៗក្នុងវិស័យស្រូវអង្ករ នៃប្រទេសទាំងពីរ ក្នុងគោលបំណងស្វែងរកឱកាសនៃការជំរុញពាណិជ្ជកម្មក្នុងវិស័យស្រូវអង្ករ។យោងតាមក្រសួងពាណិជ្ជកម្មកម្ពុជា នៅថ្ងៃទី១២ ខែកុម្ភៈ ឆ្នាំ២០២៥កន្លងទៅ បានឲ្យដឹងថា ក្នុងឱកាសនោះ ក៏មានកិច្ចពិភាក្សាស្ដីពីការពង្រីកសក្តានុពល និងជំរុញការនាំចេញអង្កររបស់កម្ពុជាទៅកាន់ប្រទេសហ្វីលីពីន ព្រមទាំងលើកកម្ពស់ការសម្រួលពាណិជ្ជកម្ម ការធានាគុណភាព និងប្រសិទ្ធភាពខ្សែច្រវាក់ផ្គត់ផ្គង់ផងដែរ។ជាលទ្ធផលកម្មវិធីផ្គូផ្គងនេះ បានផ្គូផ្គងពាណិជ្ជកម្មតាមរយៈយន្តការ B2B ដោយជំរុញទំនាក់ទំនងផ្ទាល់ រវាងអ្នកនាំចេញអង្ករកម្ពុជា និងអ្នកទទួលទិញហ្វីលីពីន ក្នុងការពង្រឹងភាពជាដៃគូពាណិជ្ជកម្មឱ្យកាន់តែរឹងមាំ និងបង្កើនលទ្ធភាពក្នុងការពង្រីកទីផ្សារអង្ករកម្ពុជាទៅកាន់ប្រទេសហ្វីលីពីន៕

ឧបនាយករដ្ឋមន្ត្រីប្រចាំការ វង្សី វិស្សុត៖​ រាជរដ្ឋាភិបាលកំពុងកសាងនូវមូលដ្ឋានគ្រឹះរឹងមាំ ដើម្បីសម្រេចជាប្រទេសមានចំណូលខ្ពស់ឆ្នាំ២០៥០

2025/02/12 03:59:10 pm        238
Facebook Telegram Linkin
ឧបនាយករដ្ឋមន្ត្រីប្រចាំការ ថា រាជរដ្ឋាភិបាលនៅក្នុងអាណត្តិទី៧ នៃរដ្ឋសភា បានកំពុងជំហានយ៉ាងស្វាហាប់ ប្រកបដោយ ថាមពល ដោយបានកំពុងនាំកម្ពុជាដើរលើវិថីនៃការអភិវឌ្ឍន៍ វឌ្ឍនៈភាព និងកសាងបាននូវមូលដ្ឋានគ្រឹះដ៏រឹងមាំ នៃការឈានទៅសម្រេច បាននូវមហិច្ឆិតាជាប្រទេសមានចំណូលខ្ពស់នៅឆ្នាំ ២០៥០។ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់ សម្តេចមហាបវរ ធិបតី ហ៊ុន ម៉ាណែត នាយករដ្ឋមន្រ្តី លើកឡើងនៅក្នុងពិធីបិទសន្និបាតបូកសរុបសមិទ្ធផលការងារឆ្នាំ២០២៤ និងលើកទិសដៅបន្ត របស់ក្រសួងកិច្ចការនារី នៅថ្ងៃទី ១២ ខែ មករា ឆ្នាំ ២០២៤ នេះថា រាជរដ្ឋាភិបាលនៅក្នុងអាណត្តិទី ៧ នៃរដ្ឋសភា ក្រោមការដឹកនាំ ដ៏ប៉ិនប្រសព្វ ប្រាកដនិយម និងជាក់ស្តែងនិយម ក្នុងបេសកម្មដ៏ឧត្តុងឧត្តម្ភជាប្រវត្តិសាស្រ្តរបស់ខ្លួន របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា សម្តេចបានកំពុងនាំសង្គមជាតិនៃកម្ពុជា ដើរលើវិថីនៃការអភិវឌ្ឍន៍ វឌ្ឍនៈភាព និងកសាង បាននូវមូលដ្ឋានគ្រឹះដ៏រឹងមាំ នៃការឈានទៅសម្រេចបាននូវមហិច្ឆិតា ជាប្រទេសមានចំណូលខ្ពស់នៅឆ្នាំ ២០៥០។ឯកឧត្តមឧបនាយករដ្ឋមន្ត្រីប្រចាំការ លើកឡើងបន្ថែមថា ជុំវិញការឈានទៅសម្រេចចក្ខុវិស័យឆ្នាំ ២០៥០ បើមើលកំណត់ត្រា ប្រវត្តិសាស្រ្តនៅលើក្នុងពិភពលោក គឺមានតែប្រទេសកូរ៉េមួយគត់ ដែលសម្រេចបានពីប្រទេសមានចំណូលមធ្យម ក្លាយទៅប្រទេស អភិវឌ្ឍន៍ ខណៈប្រទេសលើពិភពលោកជាច្រើនទៀតដូចជានៅអឺរ៉ុប ឬសហរដ្ឋអាមេរិក ក៏មិនអាចសម្រេចបានតាមចក្ខុវិស័យនៅក្នុង រយៈពេល ២៥ ឆ្នាំនេះ។ឯកឧត្តមឧបនាយករដ្ឋមន្ត្រី លើកឡើងបន្ថែមថា ជុំវិញបញ្ហានេះសម្រាប់កម្ពុជា តើអាចសម្រេចបានតាមចក្ខុវិស័យរបស់ខ្លួន ដែរឬ ទេ? ឯកឧត្តម បន្តថា រឿងឆ្នាំ ២០៥០ លឿនឬក៏យឺតយ៉ាងណា វាគឺជារឿងមួយមិនសូវធំដុំប៉ុន្មាននោះទេ សំខាន់គឺយើងត្រូវមានឆន្ទៈ និង ស្មារតីដើរឆ្ពោះទៅរកអ្វីដែលខ្ពង់ខ្ពស់ និងរុងរឿង ។ ចំណែកមួយចំណុចទៀត យើងត្រូវចាប់ផ្តើមពីពេលនេះទៅដល់ឆ្នាំ ២០៥០ ឱ្យវារឹងមាំ និងប្រកបដោយភាពធន់។ជុំវិញការក្លាយជាប្រទេសអ្នកមាននេះ, ឯកឧត្តមឧបនាយករដ្ឋមន្ត្រីប្រចាំការ បន្តថា ប្រទេសជាតិមួយដែលមានពិពិធកម្មសេដ្ឋកិច្ច រឹងមាំរឹងមាំ វាគឺជាមូលដ្ឋានមួយដែលមានកម្រិតតម្លៃបន្ថែមខ្ពស់ ហើយម្ខាងទៀត, គឺជាសេដ្ឋកិច្ចមួយដែលមានភាពប្រកួតប្រជែងលើ ទីផ្សារអន្តរជាតិ ដែលបញ្ហាចំណែកតម្លៃលើមុខទំនិញវិញ ជាទំនិញដែលមានគុណភាព និងមានតម្លៃថោកសមរម្យ មានសេវាល្អ និងប្រកប ដោយភាពទាក់ទាញដូចជា៖ វិស័យវិនិយោគ ពាណិជ្ជកម្ម និងវិស័យទេសចរណ៍ជាដើម ត្រូវតែមានលក្ខណៈប្រកួតប្រជែង៕ អត្ថបទ៖ សុន រ៉ាឌី

ទួរគីកំពុងសិក្សាលទ្ធភាពនៃការនាំចេញគ្រាប់ស្វាយចន្ទីកែច្នៃពីកម្ពុជាទៅកាន់ប្រទេសរបស់ខ្លួន

2025/02/12 11:03:25 am        857
Facebook Telegram Linkin
ធុរជនទួរគីកំពុងសិក្សាស្វែងយល់ ពីកាលានុវត្តភាព លើផលិតកម្មស្វាយចន្ទីនៅកម្ពុជា អំពីបរិមាណនៃការផលិត និងការកែច្នៃ គ្រាប់ស្វាយចន្ទីចេញជាផលិតផលសម្រេចផ្សេងៗលើទីផ្សារកម្ពុជា ដើម្បីសិក្សាលទ្ធភាពជំរុញនាំចេញទៅកាន់ប្រទេសរបស់ខ្លួន។លោក Egemen KIRAN អ្នកគ្រប់គ្រង Kingdom Hub Agro នៅកម្ពុជា និងជាសហគ្រិនមកពីប្រទេសទួរគី លើកឡើងនៅក្នុង ការបើកការិយាល័យ Kingdom Hub នៅកម្ពុជា នៅល្ងាចថ្ងៃទី១១ ខែកុម្ភៈ ឆ្នាំ២០២៥ នេះថា ជុំវិញដំណាំកសិ-ឧស្សាហកម្ម ផលិតកម្ម ស្វាយចន្ទីនៅកម្ពុជា បន្ទាប់ពីចុះធ្វើការសិក្សាឃើញថា កម្ពុជាគឺជាប្រទេសមួយដែលមានការដាំដុះស្វាយចន្ទីច្រើន និងជាប្រទេស ដែលបាននាំចេញគ្រាប់ស្វាយចន្ទីទៅកាន់ទីផ្សារអន្តរជាតិ មានទំហំនាំចេញគួរកត់សម្គាល់ផងដែរ។ លោកបន្តថា តាមរយៈការមើលឃើញសក្តានុពលនៃផលិតផលនេះ លោកក៏បានសម្រេចបង្កើតការិយាល័យនៅក្នុងប្រទេស កម្ពុជា ជាក់ស្តែងការជួបជុំនាពេលនេះ គឺជាការសិក្សាស្វែងយល់ពីកាលានុវត្តភាពផលិតកម្មស្វាយចន្ទី និងការកែច្នៃនិងវេចខ្ចប់នៅក្នុង ទីផ្សារកម្ពុជា ដើម្បីផ្គូផ្គងរវាងអ្នកផ្គត់ផ្គង់និងអ្នកទិញនៅប្រទេសទួរគី ជំរុញការនាំចេញឱ្យឆ្លើយតបតាមតម្រូវការទីផ្សារ ខណៈកន្លង មកបន្ទាប់ពីការផ្សព្វផ្សាយឃើញថា ប្រជាជននៅទួរគីមានការគាំទ្រច្រើន និងនិយមចូលចិត្តពិសារលើផលិតផលកែច្នៃមួយនេះ។លោក ស៊ុយ កុកធាន អនុប្រធានសមាគមស្វាយចន្ទីកម្ពុជា លើកឡើងថា អនុវិស័យស្វាយចន្ទីនេះ មកដល់បច្ចុប្បន្នមានការ រីកចម្រើនយ៉ាងខ្លាំង និងប្រមូលផលបានច្រើន គិតជាមធ្យមក្នុងរង្វង់៨០ ទៅ១ លានតោន បច្ចុប្បន្នត្រូវបានរាជរដ្ឋាភិបាលយកចិត្ត ទុកដាក់យយ៉ាងខ្លាំង នឹងជំរុញឱ្យអនុវិស័យនេះកាន់តែរីកចម្រើន ជាក់ស្តែងការសិក្សាលទ្ធភាពនៃគម្រោងនាំចេញគ្រាប់ស្វាយចន្ទី ទៅប្រទេសទួរគី នេះជាការបើកទីផ្សារថ្មីបន្ថែម ដើម្បីជំរុញផលិតផលគ្រាប់ស្វាយចន្ទីឱ្យបានកាន់តែច្រើនថែមទៀត។ លោកជំទាវ Ülkü Kocaefe ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណៈរដ្ឋទួរគីប្រចាំកម្ពុជា បានថ្លែងនូវការ កោតសរសើរចំពោះសហគ្រិនទួរគី ដែលបានបើកការិយាល័យតំណាងនៅកម្ពុជា នេះគឺជាការចូលរួមចំណែកដល់ការធ្វើពាណិជ្ជ កម្មទ្វេភាគីកម្ពុជា-ទួរគី ក្នុងវិស័យកសិកម្មនៅកម្ពុជា ដោយរំពឹងថា ការធ្វើពាណិជ្ជកម្មលើវិស័យនេះ នឹងបន្តកើនឡើងពី ១ ភាគរយ អាចដល់ ៥ ភាគរយ ខណៈកន្លងមក កម្ពុជាភាគច្រើននាំចេញផលិតផលសម្លៀកបំពាក់ទៅទួរគី មានទំហំជាប់ ៩៥ ភាគរយ។ចំណែកឯកឧត្តម សុខ ជា ឯកអគ្គរាជទូតកម្ពុជាប្រចាំសាធារណរដ្ឋទួរគី ថ្លែងលើកឡើងតាមប្រព័ន្ធអនឡាញថា វិស័យ សិកម្មនៅកម្ពុជាកំពុងមានការរីកចម្រើគួរកត់សម្គាល់ និងបានកំពុងនាំចេញកសិផលទៅកាន់ប្រទេសដៃគូរជាច្រើន ចំណែកគម្រោង ជំរុញនាំគ្រាប់ស្វាយចន្ទីកែច្នៃចូលទីផ្សារទួរគីនេះ គឺជាការចូលរួមចំណែកដល់ការធ្វើពាណិជ្ជកម្មរវាងប្រទេសទាំងពីរ និងការចូលរួម ចំណែកដល់ការនាំចេញទំនិញកម្ពុជាឱ្យកាន់តែច្រើនបន្ថែមទៀត៕ អត្ថបទ៖ សុន រ៉ាឌី 

កម្ពុជា-ហ្វីលីពីនផ្លាស់ប្តូរអនុស្សារណៈលើកទឹកចិត្តធុរជន និងជំរុញវិនិយោគក្នុងសហគមន៍ប្រទេសទាំងពីរ

2025/02/12 10:53:21 am        143
Facebook Telegram Linkin
កម្ពុជា-ហ្វីលីពីន ផ្លាស់ប្តូរអនុស្សារណៈនៃការយោគយល់គ្នា ក្នុងគោលបំណងលើកិច្ចសហប្រតិបត្តិការវិនិយោគ ដើម្បីលើក ទឹកចិត្តដល់ធុរជន និងវិនិយោគិន ដែលមានចំណាប់អារម្មណ៍ក្នុងការបង្កើត ឬពង្រីកអាជីវកម្មរបស់ខ្លួនទៅក្នុងសហគមន៍ធុរកិច្ច ក្នុងប្រទេសទាំងពីរ។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី ១១ ខែកុម្ភៈ ឆ្នាំ២០២៥ បានអញ្ជើញផ្លាស់ប្តូរអនុស្សារណៈនៃការយោគយល់គ្នារវាងក្រុមប្រឹក្សាអភិវឌ្ឍន៍កម្ពុជា ជាមួយនឹងគណៈកម្មាធិការវិនិយោគ នៃសាធារ ណរដ្ឋហ្វីលីពីន តំណាងដោយលោកជំទាវ Maria Cristina Aldeguer-Roque ។ ពិធីផ្លាស់ប្តូរអនុស្សារណៈនៃការយោគយល់គ្នានេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា រួមជាមួយ ឯកឧត្តម Ferdinand R. Marcos Jr. ប្រធានាធិបតី នៃសាធារណរដ្ឋហ្វីលីពីន។អនុស្សារណៈនៃការយោគយល់គ្នានេះ ជាលិខិតូបករណ៍លើកិច្ចសហការទ្វេរភាគីមួយ ក្នុងចំណោមលិខិតូបករណ៍ទាំងប្រាំបី ដែលត្រូវបានធ្វើការផ្លាស់ប្តូរនៅចំពោះមុខថ្នាក់ដឹកនាំកំពូលនៃប្រទេសទាំងពីរ។ អនុស្សារណៈនៃការយោគយល់គ្នានេះដែរ ត្រូវបាន រៀបចំឡើង ដោយសម្តែងពីបំណងលើកិច្ចសហប្រតិបត្តិការវិនិយោគ ដើម្បីលើកទឹកចិត្តដល់ធុរជន និងវិនិយោគិន ដែលមានចំណាប់ អារម្មណ៍ក្នុងការបង្កើត ឬពង្រីកអាជីវកម្មរបស់ខ្លួនទៅក្នុងសហគមន៍ធុរកិច្ច ក្នុងប្រទេសទាំងពីរ ព្រមទាំងផ្តល់ការគាំទ្រនានា សំដៅ សម្រួលដល់ការវិនិយោគ ទៅតាមលទ្ធភាពដែលអាចធ្វើទៅបាន ដោយស្ថិតនៅក្រោមច្បាប់ និងគោលនយោបាយនៃការវិនិយោ នៃប្រទេសទាំងពីរកម្ពុជា-ហ្វីលីពីន។សូមបញ្ជាក់ថា ជុំវិញការធ្វើពាណិជ្ជកម្មរបស់កម្ពុជានៅក្នុងទីផ្សារអាស៊ាននេះ ក្នុងនោះការធ្វើពាណិជ្ជកម្មទ្វេភាគីររវាងកម្ពុជា-ហ្វីលីពីន នៅមានទំហំសរុបតូចនៅឡើយ ជាក់ស្តែងនៅក្នុងរយៈពេល ១១ ខែ ឆ្នាំ ២០២៤ ការធ្វើពាណិជ្ជកម្មរវាងប្រទេសទាំងពីរ មានទំហំ ជាង ៧០ លានដុល្លារ ក្នុងនោ កម្ពុជាបាននាំចេញមានចំនួនជាង ៣៨ លានដុល្លារ ខណៈការនាំចូលមានទំហំជាង ៣១ លានដុល្លារ។ ចំណែកតាមរយៈដំណើរបំពេញទស្សនកិច្ចជាផ្លូវការ របស់សម្ដេចធិបតី នាយករដ្ឋមន្ត្រី នៅហ្វីលីពីន គឺជាការរឹតចំណងលើកិច្ច សហប្រតិបត្តិការបន្ថែមទៀត ដោយរំពឹងថា ការធ្វើពាណិជ្ជកម្មរវាងប្រទេសទាំងពីរ នឹងមានទំហំពាណិជ្ជកម្មកើនឡើងកាន់តែ ប្រសើរ៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ក្រសួងការងារ បើកយុទ្ធនា​ការជា​ទ្រង់ទ្រា​យធំ​ជំហានទី២ ដើម្បីនាំឱកា​សការងា​រជូនពលក​រខ្មែរដែ​លទើប​ត្រឡប់​ពីថៃ
08/02/2025 07:08 PM
Facebook Telegram Linkin
ឯកឧត្តម ទេសរដ្ឋមន្ត្រី គន់ គីម នាំយកថវិការបស់សម្តេចធិបតី ហ៊ុន ម៉ាណែត ប្រគល់​ជូន​វីរភាព​កងទ័ព​ពលី ចំនួន៤រូប នៅខេត្តឧត្តរមានជ័យ
08/02/2025 07:08 PM
Facebook Telegram Linkin
គណៈប្រតិភូជាន់ខ្ពស់សភាកម្ពុជា អញ្ជើញនិវត្តន៍មកដល់មាតុ​ប្រទេស​វិញ​ដោយ​សុវត្ថិភាព និង​ជោគជ័យ ក្រោយបញ្ចប់បេសកកម្មការទូតសភា នៅទីក្រុងហ្សឺណែវ ប្រទេសស្វីស
08/02/2025 06:08 PM
Facebook Telegram Linkin
សេចក្ដីរាយការណ៍៖ ឥណ្ឌានឹងបន្តទិញប្រេងពីរុស្ស៊ី ទោះមានការគំរាមកំហែងពីលោក Trump
08/02/2025 05:08 PM
Facebook Telegram Linkin
អាមេនី និងសហរដ្ឋអាមេរិក នឹងធ្វើសមយុទ្ធយោធារួមគ្នា ពីថ្ងៃទី ១២ ដល់ទី២០ ខែសីហា
08/02/2025 05:08 PM
Facebook Telegram Linkin
មនុស្សយ៉ាងតិច ៦នាក់ស្លាប់ ខណៈព្យុះត្រូពិក Wipha បង្កឲ្យមានទឹកជំនន់ នៅថៃ
08/02/2025 05:08 PM
Facebook Telegram Linkin
ចិនចោទអាមេរិកថា បានឆ្លៀតយកចន្លោះប្រហោងរបស់ Microsoft ដើម្បីវាយប្រហារតាមប្រព័ន្ធអ៊ីនធឺណិត
08/02/2025 05:08 PM
Facebook Telegram Linkin
នាយឧត្តមសេនីយ៍ វង្ស ពិសេន អញ្ជើញចុះសួរសុខទុក្ខយុទ្ធជនរបួស កំពុង​សម្រាក​ព្យាបាល​នៅ​មន្ទីរ​ពេទ្យព្រះកេតុមាលា
08/02/2025 04:08 PM
Facebook Telegram Linkin
ឯកឧត្តម ហ៊ុន ម៉ានី​ បញ្ជាក់ពីនិតិវិធីនៃការតាក់តែងវិញ្ញាសា និងផ្តាំផ្ញើដល់បេក្ខជនឱ្យ​ផ្តោតអារម្មណ៍ យកចិត្តទុកដាក់ និងខិតខំប្រឹងប្រែងមកលើការប្រឡងប្រជែង ដោយបញ្ចេញ​ឱ្យអស់ពីសមត្ថភាព
08/02/2025 04:08 PM
Facebook Telegram Linkin
ស៊ីម៉ាក់​រកឃើញភស្តុតាងដែលអាចបញ្ជាក់ច្បាស់ថា​ ទីតាំងវត្តតាមាន់សែនជ័យ​ត្រូវ​បានទ័ព​អាកាសថៃ​ ​ប្រើប្រាស់យន្តហោះF-16 ទម្លាក់គ្រាប់បែកប្រភេទ MK-82
08/02/2025 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.