BTV NEWS

៣ខែដើមឆ្នាំនេះ ក្មេងទំនើងជិត ១ពាន់នាក់ត្រូវសមត្ថកិច្ចឃាត់ខ្លួន

នគរបាលជំនាញព្រហ្មទណ្ឌរាជធានីភ្នំពេញ បង្រ្កាបជនសង្ស័យជនជាតិចិន ៣នាក់ពាក់ព័ន្ធអំពើលួចរថយន្ត និងផ្លាកលេខរថយន្តចំនួន ៦ករណី

កម្លាំងនគរបាលរាជធានី បើកការឆ្មក់ចុះបង្ក្រាប Online Scams នៅខណ្ឌសែនសុខ ឃាត់ខ្លួនជនបរទេស ៣៣នាក់

ឃាត់ខ្លួនជនសង្ស័យ០៩នាក់ រកឃើញសម្ភារបម្រើឲ្យបទល្មើស Online Scams និងអាវុធខ្លីមួយដើម នៅខណ្ឌច្បារអំពៅ

សន្តិសុខ និង សង្គម

មនុស្សជាង ១២.៤០០ នាក់ ត្រូវបានសម្លាប់ នៅក្នុងជម្លោះប៉ាឡេស្ទីន-អ៊ីស្រាអែល

ជម្លោះហ្កាហ្សាដ៏បំផ្លិចបំផ្លាញ បានសម្លាប់មនុស្សជាង ១២.៤០០នាក់ទាំងភាគីប៉ាឡេស្ទីន និងអ៊ីស្រាអែល នេះបើយោងតាមទិន្នន័យចេញផ្សាយដោយអាជ្ញាធរសុខាភិបាលទាំងសងខាង កាលពីថ្ងៃសុក្រ។នាយកដ្ឋានសុខាភិបាលនៃតំបន់ហ្កាហ្សាស្ទ្រីប កាលពីថ្ងៃសុក្រ បានបង្ហាញពីចំនួនអ្នកស្លាប់ដ៏គួរឲ្យភ្ញាក់ផ្អើលចំនួន ១១.០៧៨ នាក់ ចាប់តាំងពីការផ្ទុះឡើងនៃជម្លោះហាម៉ាស-អ៊ីស្រាអែលដែលចាប់ផ្តើម នៅថ្ងៃទី៧ ខែតុលា។ លើសពីនេះ តំបន់វេសបែង បានរាយការណ៍ថា មានអ្នកស្លាប់ចំនួន ១៨៣នាក់។អ៊ីស្រាអែល បានកែប្រែចំនួនអ្នកស្លាប់ ដោយសារការវាយប្រហារពីក្រុមហាម៉ាស នៅថ្ងៃទី ៧ តុលា មកនៅត្រឹមប្រហែល១.២០០នាក់ពីការប៉ាន់ស្មានរបស់រដ្ឋាភិបាលមុនចំនួន ១.៤០០នាក់។អ្នកនាំពាក្យរបស់ក្រសួងការបរទេសអ៊ីស្រាអែល បាននិយាយថា ការពិនិត្យឡើងវិញនេះ ត្រូវបានធ្វើឡើងដោយសារតែមានសាកសពជាច្រើនដែលមិនស្គាល់អត្តសញ្ញាណ ហើយអ៊ីស្រាអែលជឿថា អ្នកស្លាប់ខ្លះជាយុទ្ធជនរបស់ក្រុមហាម៉ាសជាជាងជនជាតិអ៊ីស្រាអែល។

តុលាការបន្តនីតិវិធីសំណុំរឿងឃាត់ខ្លួនអនុប្រធានមន្ទីរប្រឆាំងបទល្មើសគ្រឿងញៀនម្នាក់ និងមន្ត្រី៤នាក់ ផ្សេងទៀត

ភ្នំពេញ៖ មកដល់ថ្ងៃនេះ ករណីនគរបាលឃាត់ខ្លួនឧត្ដមសេនីយ៍ទោម្នាក់ មានតួនាទីជាអនុប្រធានមន្ទីរប្រឆាំងបទល្មើសគ្រឿងញៀន និងមនុស្ស៤នាក់ផ្សេងទៀតនោះ ស្ថាប័នតុលាការបាននឹងកំពុងបន្តនីតិវិធី។ករណីនគរបាលឃាត់ខ្លួនឧត្ដមសេនីយ៍ទោម្នាក់ មានតួនាទីជាអនុប្រធានមន្ទីរប្រឆាំងបទល្មើសគ្រឿងញៀន និងមនុស្ស៤នាក់ផ្សេងទៀត មកដល់ពេលនេះ លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញ បានឱ្យដឹងនៅវេលាថ្ងៃត្រង់ ថ្ងៃទី១១ ខែវិច្ឆិកា ឆ្នាំ២០២៣នេះថា តំណាងអយ្យការកំពុងតែអនុវត្តនីតិវិធី លោកនឹងជូនព័ត៌មាននៅពេលដែលមានចំណាត់ការចុងក្រោយរបស់អយ្យការ។ ការបញ្ជាក់របស់តំណាងអយ្យការនាថ្ងៃនេះ គឺបន្ទាប់ពីម្សិលមិញ នគរបាលនៃអគ្គស្នងការដ្ឋាននគរបាលជាតិបានបញ្ជូនសំណុំរឿងមួយនេះទៅដល់សាលាដំបូងរាជធានីភ្នំពេញម្ដងរួចមកហើយ។សូមជម្រាបថា កាលពីថ្ងៃទី០៩ ខែវិច្ឆិកា ឆ្នាំ២០២៣ នគរបាលនាយកដ្ឋានចារកម្មនៃអគ្គស្នងការដ្ឋាននគរបាលជាតិបានឃាត់ខ្លួន អនុប្រធានមន្ទីរប្រឆាំងបទល្មើសគ្រឿងញៀនម្នាក់ និងមនុស្ស៤នាក់ផ្សេងទៀត ដោយមានជាប់ពាក់ព័ន្ធករណីកំហែងយកប្រាក់ក្នុងបញ្ហាគ្រឿងញៀន។ បើតាមប្រភពឱ្យដឹងថា អនុប្រធានមន្ទីរប្រឆាំងបទល្មើសគ្រឿងញៀននោះមានឈ្មោះ វ៉ាន់ កុសល មានឋានន្តរសក្ដិថ្នាក់ឧត្តមសេនីយ៍ទោ ទទួលបន្ទុកការងារជំនាញ ក.៨ ៕

នគរបាលបង្ក្រាបការជួញដូរគ្រឿងញៀនឆ្លងដែនកាត់កម្ពុជាដកហូតបានជាង ១០០គីឡូក្រាម

ភ្នំពេញ៖ មន្ទីរប្រឆាំងបទល្មើសគ្រឿងញៀន បានបង្ក្រាបឧក្រិដ្ឋជនជួញដូរគ្រឿងញៀនជនជាតិថៃ និងឡាវ សរុបចំនួន៣នាក់ រឹបអូសបានថ្នាំញៀនជាង ១០០គីឡូក្រាម ។កម្លាំងជំនាញមន្ទីរប្រឆាំងបទល្មើសគ្រឿងញៀន បានបង្ក្រាបក្រុមឧក្រិដ្ឋជនជួញដូរគ្រឿងញៀនជនជាតិថៃ និងឡាវ សរុបចំនួន ៣នាក់ នៅក្នុងភូមិសាស្ត្ររាជធានីភ្នំពេញ ប្រតិបត្តិការចុះបង្ក្រាបនេះ អនុវត្តន៍តាមបទបញ្ជារបស់នាយឧត្ដមសេនីយ៍ ស ថេត អគ្គស្នងការនគរបាលជាតិ ដឹកនាំបញ្ជាដោយនាយឧត្ដមសេនីយ៍ ម៉ក់ ជីតូ អគ្គស្នងការរងទទួលផែនប្រឆាំងគ្រឿងញៀន និងមានការដឹកនាំផ្ទាល់ដោយឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន។នគរបាលបានឱ្យដឹងថា ប្រតិបត្តិការបង្ក្រាបនេះ ធ្វើឡើងនៅថ្ងៃទី០៩ ខែវិច្ឆិកា ឆ្នាំ២០២៣ វេលាម៉ោង១៤ និង៣០នាទី ដោយមានការសម្របសម្រួលពីលោក វង្ស សាវ៉ាត ព្រះរាជអាជ្ញារងអមសាលាដំបូងរាជធានីភ្នំពេញ កម្លាំងជំនាញមន្ទីរប្រឆាំងគ្រឿងញៀន ក.៧ ក.៤ និង ក.១ បានសហការជាមួយកម្លាំងស្នងការដ្ឋាននគរបាលរាជធានីភ្នំពេញ បានឆ្មក់បង្ក្រាបបទល្មើសជួញដូរគ្រឿងញៀនឆ្លងដែន នៅចំណុចក្នុងផ្ទះលេខ ៣០៤ ផ្លូវលំស្ថិតនៅភូមិកប់ស្រូវតូច សង្កាត់គោករកា ខណ្ឌព្រែកព្នៅ រាជធានីភ្នំពេញ។នគរបាលបន្ថែមថា ជនសង្ស័យទាំង៣នាក់រួមមាន ១.ឈ្មោះ Cheng veut ភេទប្រុស ជនជាតិឡាវ ២.ឈ្មោះ Wasin Saekue ភេទប្រុស ជនជាតិថៃ និង៣.ឈ្មោះ Saeli Chinnawat ភេទប្រុស ជនជាតិថៃ។ វត្ថុតាងចាប់បានរួមមាន សារធាតុញៀនប្រភេទម៉េតំហ្វេតាមីន ហៅកាត់ថា ICE ចំនួន ១០១កញ្ចប់ ស្មើទម្ងន់ ១០១គីឡូ ៤៤៩.២០ក្រាម។បច្ចុប្បន្នជនសង្ស័យ និងវត្ថុតាងសមត្ថកិច្ចជំនាញនៃមន្ទីរប្រឆាំងគ្រឿងញៀនបានរៀបចំកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធី៕ អត្ថបទ ៖ ប្រាក់ វ៉ាន់ដា

ប្រជាជនសូម៉ាលីរាប់ពាន់នាក់បាត់បង់លំនៅឋាន និងទ្រព្យសម្បត្តិ ដោយគ្រោះទឹកជំនន់ថ្មីៗនេះ

អង្គការសហប្រជាជាតិបានពណ៌នាអំពីទឹកជំនន់ ដែលបានបង្កមហន្តរាយដល់មនុស្សរាប់សែននាក់នៅក្នុងប្រទេសសូម៉ាលី និងប្រទេសជិតខាងនៅអាហ្វ្រិកខាងកើត បន្ទាប់ពីគ្រោះរាំងស្ងួតជាប្រវត្តិសាស្ត្រ ថាជាព្រឹត្តិការណ៍កើតមានឡើងម្តងក្នុងមួយសតវត្សរ៍។ ការិយាល័យអង្គការសហប្រជាជាតិទទួលបន្ទុកកិច្ចការមនុស្សធម៌ (OCHA) បាននិយាយនៅក្នុងសេចក្តីថ្លែងការណ៍ថា ប្រជាជនប្រមាណ ១,៦លាននាក់ នៅក្នុងប្រទេសសូម៉ាលី អាចរងផលប៉ះពាល់ដោយភ្លៀងធ្លាក់ខ្លាំងតាមរដូវ ដែលកាន់តែធ្ងន់ធ្ងរទៅៗ ដោយមានផលប៉ះពាល់រួមគ្នានៃបាតុភូតអាកាសធាតុពីរគឺអែលនីញ៉ូ(El Niño) និងឌីប៉ូល(Dipole)នៅមហាសមុទ្រឥណ្ឌា។ ទឹកជំនន់ បានកើតឡើងបន្ទាប់ពីមានភ្លៀងធ្លាក់ខ្លាំង ដែលចាប់ផ្តើមនៅដើមខែតុលា បានបណ្តាលឲ្យមនុស្សយ៉ាងហោចណាស់ ២៩នាក់ស្លាប់រួចទៅហើយ និងបានបង្ខំឱ្យមនុស្សជាង ៣០០.000 នាក់ភៀសខ្លួនចេញពីលំនៅឋានរបស់ពួកគេនៅក្នុងប្រទេសសូម៉ាលី ហើយបានជន់លិចក្រុងនិងភូមិនានានៅទូទាំងភាគខាងជើងប្រទេសកេនយ៉ា។ ក្រុមផ្តល់ជំនួយ បាននិយាយថា ជំរុំសម្រាប់ជនភៀសខ្លួនដោយការបះបោរអ៊ីស្លាមនិយម និងគ្រោះរាំងស្ងួតដ៏អាក្រក់បំផុតក្នុងរយៈពេល ៤ ទសវត្សរ៍មកនេះក៏បានជន់លិចផងដែរ ដែលបណ្តាលឱ្យមនុស្សភៀសខ្លួនជាលើកទីពីរ។

ក្រុមប្រឆាំងនៅមីយ៉ាន់ម៉ា និយាយថា ខ្លួនដណ្តើមបានប៉ុស្តិ៍ជួរមុខយោធា ខណៈជម្លោះនៅព្រំដែនកំពុងផ្ទុះឡើង

រដ្ឋាភិបាលរួបរួមជាតិរបស់សហភាពមីយ៉ាន់ម៉ា (NUG) បានបង្ហោះវីដេអូ នៅលើប្រព័ន្ធផ្សព្វផ្សាយសង្គម បង្ហាញពីយោធារបស់ខ្លួន ដុតបន្ទាយរដ្ឋាភិបាលនៅក្នុងពន្ធនាគារ Kalay ភាគខាងជើងសហភាពមីយ៉ាន់ម៉ា។ សារព័ត៌មាន Reuters មិនអាចផ្ទៀងផ្ទាត់ទីតាំង ឬកាលបរិច្ឆេទដែលវីដេអូនេះត្រូវបានថតដោយឯករាជ្យនោះទេ។យោងតាមរដ្ឋាភិបាលរួបរួមជាតិរបស់សហភាពមីយ៉ាន់ម៉ា (NUG) បានឲ្យដឹងថា ទីក្រុងជាច្រើននៅក្នុងតំបន់ Sagaing ស្ថិតនៅក្រោមការវាយលុកខ្លាំង ខណៈជម្លោះកាន់តែរីកធំឡើងរវាងរដ្ឋាភិបាលយោធា និងក្រុមអ្នកការតស៊ូ។នៅតំបន់ Sagaing កងកម្លាំងការពារប្រជាជន(PDF) ជាផ្នែកមួយនៃរដ្ឋាភិបាលរួបរួមជាតិរបស់សហភាពមីយ៉ាន់ម៉ា (NUG) បានដណ្តើមការគ្រប់គ្រងប៉ុស្តិ៍ជួរមុខរបស់កងទ័ព។ ក្នុងពេលជាមួយគ្នានេះដែរ សម្ព័ន្ធបងប្អូនទាំងបី ដែលជាក្រុមប្រដាប់អាវុធជនជាតិភាគតិច បានសម្រុកវាយលុកយ៉ាងខ្លាំងនៅរដ្ឋ Shan ភាគខាងជើង ក្បែរព្រំដែនជាមួយប្រទេសចិន។ របបយោធាមីយ៉ាន់ម៉ា បច្ចុប្បន្ននេះ ប្រឈមមុខនឹងបញ្ហាធំបំផុតរបស់ខ្លួនចំពោះអំណាច ចាប់តាំងពីរដ្ឋប្រហារឆ្នាំ ២០២១ ខណៈកងកម្លាំងប្រដាប់អាវុធបដិវត្តន៍និងជនជាតិភាគតិច បង្កើនការវាយប្រហាររបស់ពួកគេទៅលើមូលដ្ឋានយោធាជាច្រើនទីតាំងនៅទូទាំងភាគខាងជើង ភាគឦសាន ភាគពាយព្យ និងនៅភាគអាគ្នេយ៍របស់ប្រទេស។

សមត្ថកិច្ចមន្ទីរប្រឆាំងគ្រឿងញៀន ចាប់ខ្លួនជនសង្ស័យ៣នាក់ ដកហូតថ្នាំញៀនជាង១០១កញ្ចប់

ភ្នំពេញ៖ ជំនាញមន្ទីរប្រឆាំងគ្រឿងញៀន អគ្គស្នងការដ្ឋាននគរបាលជាតិ ក្រសួងមហាផ្ទៃ ចាប់ខ្លួនជនសង្ស័យ៣នាក់ ដកហូតថ្នាំញៀនប្រភេទ មេតំហ្វេតាមីន ( ម៉ាទឹកកក) ប្រមាណ ១០១កញ្ចប់ច្រកនៅក្នុងថង់តែ មិនទាន់ដឹងទម្ងន់ពិតប្រាកដ ។ជនសង្ស័យទាំង ៣នាក់ករណីបទល្មើសគ្រឿងញៀន ១០១កញ្ចប់ ត្រូវបានសមត្ថកិច្ចជំនាញមន្ទីរប្រឆាំងគ្រឿងញៀន អគ្គស្នងការដ្ឋាននគរបាលជាតិ ក្រសួងមហាផ្ទៃ បង្ហាញមុខជាសាធារណៈ នាព្រឹកថ្ងៃទី១១ ខែវិច្ឆិកា ឆ្នាំ២០២៣ នៅមន្ទីរប្រឆាំងបទល្មើសគ្រឿងញៀន ។

គណៈកម្មាធិការជួយសង្គ្រោះអន្តរជាតិ ព្រួយបារម្ភចំពោះសុខុមាលភាពជនភៀសខ្លួនអាហ្វហ្កានីស្ថានវិលត្រឡប់ពីប៉ាគីស្ថាន

ដោយរដូវរងារចូលមកដល់ គណៈកម្មាធិការជួយសង្គ្រោះអន្តរជាតិ (IRC) នៅក្នុងប្រទេសអាហ្វហ្គានីស្ថាន កាលពីថ្ងៃសុក្រ ទី១០ ខែវិច្ឆិកា បានបង្ហាញការព្រួយបារម្ភខ្លាំងអំពីការរស់រានមានជីវិតរបស់ជនភៀសខ្លួនអាហ្វហ្គានីស្ថាន ដែលបានមកដល់ពីប្រទេសប៉ាគីស្ថាន។ ប្រជាជនអាហ្វហ្គានីស្ថាន រាប់ម៉ឺននាក់ ភាគច្រើនបានទៅរស់នៅក្នុងប្រទេសប៉ាគីស្ថានអស់រយៈពេលជាច្រើនទសវត្សរ៍មកហើយ ត្រូវចាកចេញពីប្រទេសនេះ ហើយអាជ្ញាធរកំពុងដើរប្រមូលជាច្រើនបន្ថែមទៀតនៅក្នុងការឆ្មក់ចាប់។ ប្រទេសប៉ាគីស្ថាន បាននិយាយកាលពីថ្ងៃពុធទី ៨ ខែវិច្ឆិកាថា ចំណាត់ការរបស់ខ្លួន ត្រូវបណ្តេញចេញមនុស្សរាប់ម៉ឺននាក់ដែលគ្មានឯកសារ។ ការបណ្តេញចេញប្រជាជនអាហ្វហ្គានីស្ថាន គឺជាការឆ្លើយតបមួយចំពោះភាពគ្មានឆន្ទះរបស់រដ្ឋបាលដឹកនាំដោយក្រុមតាលីបង់ ក្នុងការធ្វើសកម្មភាពប្រឆាំងក្រុមសកម្មប្រយុទ្ធ ដែលប្រើប្រាស់ប្រទេសអាហ្វហ្គានីស្ថាន ដើម្បីធ្វើការវាយប្រហារនៅក្នុងប្រទេសប៉ាគីស្ថាន។ អ្នកនាំពាក្យរបស់រដ្ឋបាលក្រុមតាលីបង់ លោក Zabihullah Mujahid នៅក្នុងសេចក្តីថ្លែងការណ៍ បាន ច្រានចោលការចោទប្រកាន់នេះ។ គណៈកម្មាធិការជួយសង្គ្រោះអន្តរជាតិ (IRC) កំពុងផ្តល់សេវាថែទាំសុខភាព ជំនួយផ្លូវចិត្ត និងសេវាអនាម័យដល់ជនភៀសខ្លួនអាហ្វហ្គានីស្ថានរាប់ពាន់នាក់ដែលបានមកដល់ជំរុំក្នុងតំបន់ Torkham និងតំបន់ Nangarhar ។ នាយករងផ្នែកទំនាក់ទំនងអាស៊ី គណៈកម្មាធិការជួយសង្គ្រោះអន្តរជាតិ លោកស្រី Nancy Dent បានប្រាប់សារព័ត៌មានរ៉យទ័រក្នុងបទសម្ភាសន៍តាមបណ្តាញ Zoom ពីទីក្រុងកាប៊ុលថា ប្រទេសអាហ្វហ្គានីស្ថាន ពុំមានលទ្ធភាពទទួលគ្រួសាររាប់ពាន់គ្រួសារដែលបានមកដល់នោះទេ ហើយវាទំនងជានឹងដាក់បន្ទុកធ្ងន់លើសេដ្ឋកិច្ចកាន់តែខ្លាំងថែមទៀត។ ដូច្នេះស្ថានភាពសម្រាប់ប្រទេសអាហ្វហ្គានីស្ថានទាំងមូល ទំនងជាកាន់តែយ៉ាប់យ៉ឺន។

កងទ័ពអ៊ីស្រាអែល ដាក់គោលគោលដៅជាច្រើនទីតាំង នៅភាគខាងត្បូងប្រទេសលីបង់

កងកម្លាំងអ៊ីស្រាអែល បានកំណត់គោលដៅជាច្រើនទីតាំងនៅភាគខាងត្បូងប្រទេសលីបង់ កាលពីថ្ងៃសុក្រ ទី១០ ខែវិច្ឆិកា ហើយវីដេអូរបស់សារព័ត៌មាន Reuters បានបង្ហាញពីផ្សែងហុយឡើងបន្ទាប់ពីកងទ័ពអ៊ីស្រាអែល បានបាញ់ឆ្លងព្រំដែន។តំបន់នេះ បានស្ថិតលើការបង្កើនការប្រុងប្រយ័ត្នអស់រយៈពេលប៉ុន្មានសប្តាហ៍កន្លងទៅនេះ បន្ទាប់ពីក្រុមហេសបូឡាអ៊ីស្លាមនិយមលីបង់ បាននិយាយថា ខ្លួនបានបាញ់មីស៊ីលហួសព្រំដែនចូលទៅក្នុងប្រទេសអ៊ីស្រាអែល ហើយយោធាអ៊ីស្រាអែល បាននិយាយថា ខ្លួនបានឆ្លើយតបវិញដោយការបាញ់កាំភ្លើងធំ។អំពើហឹង្សា នៅព្រំដែនប្រទេសលីបង់-អ៊ីស្រាអែល គឺជាការសម្លាប់មនុស្សច្រើនបំផុតចាប់តាំងពីឆ្នាំ ២០០៦មក ខណៈអ៊ីស្រាអែល បានទម្លាក់គ្រាប់បែកលើក្រុមហាម៉ាសដែលជាសម្ព័ន្ធមិត្តប៉ាឡេស្ទីន របស់ក្រុមហេសបូឡា នៅតំបន់ហ្កាហ្សា ក្នុងការឆ្លើយតបទៅនឹងការវាយប្រហាររបស់ក្រុមហាម៉ាស ទៅលើប្រទេសអ៊ីស្រាអែល កាលពីថ្ងៃទី ៧ ខែតុលា។ មន្ត្រីសន្តិសុខប្រទេសលីបង់ បាននិយាយថា ការប៉ះទង្គិចគ្នានៅតាមព្រំដែនប្រទេសលីបង់ បានសម្លាប់អ្នកប្រយុទ្ធក្រុមហេសបូឡាជាង ៦០ នាក់ និងជនស៊ីវិល ១០ នាក់ ។ យ៉ាងហោចណាស់ ទាហានអ៊ីស្រាអែល ៧នាក់ និងជនស៊ីវិលម្នាក់ បានស្លាប់។

អង្គការសហប្រជាជាតិ កាន់ទុក្ខអ្នកស្លាប់យ៉ាងច្រើនក្នុងសង្គ្រាម ដោយមានបុគ្គលិកខ្លួនជាង១០០នាក់ ត្រូវបានសម្លាប់នៅហ្កាហ្សា

ទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ (UNRWA) បាននិយាយកាលពីថ្ងៃសុក្រ ទី១០ ខែវិច្ឆិកា ថា បុគ្គលិករបស់អង្គការសហប្រជាជាតិជាង ១០០នាក់ត្រូវបានសម្លាប់ ចាប់តាំងពីសង្គ្រាមអ៊ីស្រាអែល និងក្រុមហាម៉ាស់ ចាប់ផ្តើមនៅក្នុងតំបន់ហ្កាហ្សា ដែលធ្វើឲ្យវាក្លាយជាជម្លោះមានមនុស្សស្លាប់ច្រើនបំផុតមិនធ្លាប់មានសម្រាប់អង្គការសហប្រជាជាតិក្នុងអំឡុងពេលខ្លីបែបនេះ។ ទីភ្នាក់ងារ UNRWA បានប្រាប់សារព័ត៌មានរ៉យទ័រថា មនុស្សមួយចំនួនបានស្លាប់ដោយកំពុងឈរតម្រង់ជួរទទួលនំប៉័ង ខណៈអ្នកផ្សេងទៀតបានស្លាប់រួមជាមួយក្រុមគ្រួសាររបស់ពួកគេនៅក្នុងលំនៅឋាន ក្នុងពេលសង្រ្គាមពីលើអាកាសនិងតាមដីគោកដ៏មហន្តរាយរបស់អ៊ីស្រាអែលមកលើក្រុមហាម៉ាស់នៅក្នុងតំបន់ហ្កាហ្សាមានប្រជាជនរស់នៅច្រើន ដែលបានបន្តការឆ្លើយតបទៅនឹងការវាយប្រហារឆ្លងព្រំដែនកាលពីថ្ងៃទី ៧ ខែតុលា លើសហគមន៍អ៊ីស្រាអែល ធ្វើឡើងដោយក្រុមសកម្មប្រយុទ្ធ។លោក Philippe Lazzarini បាននិយាយនៅលើវេទិកាប្រព័ន្ធផ្សព្វផ្សាយសង្គម X ថា ដោយត្រូវបានបំផ្លិចបំផ្លាញ បុគ្គលិកទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ (UNRWA) ជាង ១០០នាក់ ត្រូវបានបញ្ជាក់ថាបានស្លាប់ក្នុងរយៈពេល ១ ខែមកនេះ មានទាំងឪពុកម្តាយ គ្រូបង្រៀន គិលានុបដ្ឋាក វេជ្ជបណ្ឌិត និងបុគ្គលិកគាំទ្រ។ ទីភ្នាក់ងារ UNRWAកំពុងកាន់ទុក្ខ ពលរដ្ឋប៉ាឡេស្ទីនកាន់ទុក្ខ ពលរដ្ឋអ៊ីស្រាអែលក៏កាន់ទុក្ខ។ ស្ថាប័នពិភពលោកមួយនេះ បាននិយាយថា បុគ្គលិករបស់អង្គការសហប្រជាជាតិនៅជុំវិញពិភពលោកនឹងស្ថិតនៅក្នុងភាពស្ងៀមស្ងាត់មួយនាទី ហើយទង់ជាតិនឹងត្រូវបង្ហូតនៅត្រឹមពាក់កណ្តាលដងនៅថ្ងៃច័ន្ទ។ អ៊ីស្រាអែល បានបន្ទោសក្រុមហាម៉ាស់ចំពោះការស្លាប់ជនស៊ីវិលនៅតំបន់ហ្កាហ្សា ដោយនិយាយថាក្រុមនេះប្រើប្រាស់ប្រជាជនជាខែលការពារ និងលាក់ទុកអាវុធ និងឧបករណ៍នៅជុំវិញមន្ទីរពេទ្យដែលត្រូវបានវាយប្រហារដោយការទម្លាក់គ្រាប់បែក។

ប្រមុខអង្គការសុខភាពពិភពលោកនិយាយថា កុមារម្នាក់ត្រូវបានសម្លាប់ជាមធ្យមរៀងរាល់ ១០ នាទីម្តងនៅហ្កាហ្សា

អគ្គនាយកអង្គការសុខភាពពិភពលោក លោក Tedros Adhanom Ghebreyesus បានថ្លែងទៅកាន់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃសុក្រ ទី១០ ខែវិច្ឆិកា ថា កុមារម្នាក់ត្រូវបានសម្លាប់ជាមធ្យមរៀងរាល់១០នាទីម្តងនៅតំបន់ហ្កាហ្សា ដោយព្រមានថាគ្មានកន្លែងណាសុវត្ថិភាពនោះទេ។ លោកនិយាយថា ពាក់កណ្តាលនៃមន្ទីរពេទ្យចំនួន ៣៦កន្លែងនៅតំបន់ហ្កាហ្សា និងពីរភាគបីនៃមណ្ឌលថែទាំសុខភាពបឋមនៅតំបន់នេះ មិនដំណើរការទេ ហើយនៅកន្លែងដែលកំពុងដំណើរការគឺហួសពីសមត្ថភាពរបស់ពួកគេ ដោយពណ៌នាអំពីប្រព័ន្ធថែទាំសុខភាពថា «វាស្ទើតែដួលរលំ» ។ លោក Ghebreyesus បានថ្លែងទៅកាន់ក្រុមប្រឹក្សាដែលមានសមាជិក ១៥រូបថា «ច្រករបៀងមន្ទីរពេទ្យចង្អៀតដោយអ្នករងរបួស អ្នកជំងឺ និងអ្នកស្លាប់។ បន្ទប់ដាក់សពពេញហៀរ។ ចំណែកការវះកាត់ ធ្វើឡើងដោយគ្មានការប្រើថ្នាំស្ពឹក។ អ្នកជម្លៀសខ្លួនរាប់ម៉ឺននាក់ ស្នាក់នៅក្នុងមន្ទីរពេទ្យ។ អ៊ីស្រាអែល បានវាយលុកលើតំបន់ហ្កាហ្សា ជាតំបន់ហ៊ុមព័ទ្ធមួយមានប្រជាជន ២,៣លាននាក់ ពីលើអាកាស ដោយបានដាក់ការហ៊ុមព័ទ្ធ និងបានបើកការវាយលុកលុយតាមដីគោក។ លោក Ghebreyesus និយាយថា «ជាមធ្យម កុមារម្នាក់ត្រូវបានសម្លាប់រៀងរាល់ ១០ នាទីម្តងនៅក្នុងតំបន់ហ្កាហ្សា»។ លោក Ghebreyesus បាននិយាយថា ចាប់តាំងពីថ្ងៃទី ៧ ខែតុលាមក អង្គការសុខភាពពិភពលោក បានផ្ទៀងផ្ទាត់ការវាយប្រហារមានច្រើនជាង ២៥០លើក មកលើទីតាំងថែទាំសុខភាពនៅក្នុងតំបន់ហ្កាហ្សា និងតំបន់ West Bank ខណៈមានការវាយប្រហារចំនួន ២៥ លើក លើទីតាំងថែទាំសុខភាពនៅក្នុងប្រទេសអ៊ីស្រាអែល។ អ៊ីស្រាអែល និយាយថា ក្រុមហាម៉ាស់លាក់ទុកអាវុធនៅក្នុងផ្លូវរូងក្រោមដីក្រោមមន្ទីរពេទ្យ ដែលការចោទប្រកាន់នេះក្រុមហាម៉ាស់បានបដិសេធ។ ឯកអគ្គរដ្ឋទូតប្រចាំអង្គការសហប្រជាជាតិរបស់អ៊ីស្រាអែល លោក Gilad Erdan បានថ្លែងទៅកាន់ក្រុមប្រឹក្សាសន្តិសុខថា អ៊ីស្រាអែលបានបង្កើតក្រុមការងារមួយដើម្បីបង្កើតមន្ទីរពេទ្យនៅភាគខាងត្បូងតំបន់ តំបន់ហ្កាហ្សា។

បណ្ដាញសង្គម

ព័ត៌មានថ្មីៗ

លោក Zelenskiy ៖ រុស្ស៊ីពិចារណាផែនការវាយប្រហារប្រទេសសមាជិកអង្គការណាតូ ចេញពីបេឡារុស

សហគមន៍អេកូទេសចរណ៍កោះផ្តៅ ក្នុងខេត្តក្រចេះ ជាតំបន់គួរទៅកម្សាន្ត

រដ្ឋបាលខេត្តកែបទទួលស្វាគមន៍ដំណើរទស្សនកិច្ចរបស់ឯកអគ្គរដ្ឋទូតចិនប្រចាំកម្ពុជា

ប្រធានក្រុមការងារចុះមូលដ្ឋានខេត្តកំពង់ធំ សម្ពោធដាក់ឱ្យប្រើប្រាស់អគារទីស្នាក់ការបក្សស្រុកស្ទោង

ពលរដ្ឋមានជីវភាពខ្វះខាតចំនួន ៣០០គ្រួសារ ទទួលបានអំណោយពីយុវជនគណបក្សខេត្តបាត់ដំបង

មន្ត្រីជំនាញចុះពិនិត្យវឌ្ឍនភាពការអនុវត្តគម្រោង និងតម្រង់ទិសជំរុញផលិតកម្មដំណាំស្រូវខេត្តត្បូងឃ្មុំ

កម្ពុជាចូលរួមមហាសន្និបាតសុខភាពពិភពលោក លើកទី៧៩ (WHA79) នៅទីក្រុងហ្សឺណែវ ប្រទេសស្វីស

ព្រឹត្តិការណ៍ដង្ហែគោមឈូកព្រះពុទ្ធសាសនា «Lantern Parade/ Lotus Lantern Festival 2026» កណ្តាលទីក្រុងសេអ៊ូល សាធារណរដ្ឋកូរ៉េ

មេបញ្ជាការទី ២របស់ក្រុម ISIS ត្រូវបានសម្លាប់ ដោយកងកម្លាំងរបស់អាមេរិក និងនីហ្សេរីយ៉ា

អ៊ីរ៉ាក់នាំចេញប្រេងត្រឹម ១០លានបារ៉ែលប៉ុណ្ណោះតាមច្រកសមុទ្រ Hormuz អំឡុងខែមេសា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877