BTV NEWS

នគរបាលនៅអាកាសយានដ្ឋានអន្តរជាតិភ្នំពេញ ឃាត់ខ្លួនជនបរទេសម្នាក់ ពាក់ព័ន្ធករណីដឹកជញ្ជូនកញ្ឆាក្រៀមឆ្លងដែនជិត ២០គីឡូក្រាម

ក្រុមក្មេងទំនើងជាង៤០នាក់ ត្រូវសមត្ថកិច្ចបញ្ជូនទៅពន្ធនាគារ អ្នកនាំពាក្យព្រមានថា "បើមិនកែ គឺគុក!"

នាយកដ្ឋានប្រឆាំងបទល្មើសបច្ចេកវិទ្យា បង្រ្កាបករណីឆបោកក្រោមរូបភាពទិញលក់ម៉ូតូតាមអនឡាញ

នគរបាលខណ្ឌកំបូលឃាត់ម៉ូតូ ១០គ្រឿង ករណីប្រេីប្រាស់សុីម៉ាំងបំពងសំឡេង

សន្តិសុខ និង សង្គម

ការវិភាគ៖ ទួរគីផ្អៀងទៅលោកខាងលិចជាថ្មី ក្នុងគោលនយោបាយការបរទេស ខណៈសេដ្ឋកិច្ចមានសម្ពាធ

វិភាគ៖ បន្ទាប់ពីកំណត់គោលនយោបាយដាក់ឲ្យប្រទេសទួរគីនៅឆ្ងាយពីសម្ព័ន្ធមិត្តលោកខាងលិច ប្រធានាធិបតីលោក Tayyip Erdogan បានផ្លាស់ប្ដូរគោលនយោបាយ ជាមួយនឹងការសម្រេច ដែលធ្វើឲ្យសហរដ្ឋអាមេរិកពេញចិត្ត ហើយផ្ដល់ការខកចិត្តដល់រុស្ស៊ី ដែលបញ្ហានេះគឺជាការបត់បែនមួយ ដែលត្រូវបានគេមើលឃើញថា មានគោលបំណងមួយផ្នែក ដើម្បីបង្វែរសេដ្ឋកិច្ចរបស់ប្រទេសដែលកំពុងតែធ្លាក់ចុះ ឲ្យងើបឡើងវិញ និងជំរុញឲ្យមានការវិនិយោគពីបរទេស។ការគិតគូរពីគោលនយោបាយការបរទេសឡើងវិញនេះ គឺជាផ្នែកមួយនៃការកែសម្រួលយ៉ាងទូលំទូលាយរបស់លោក Erdogan រយៈពេល ៦សប្តាហ៍ បន្ទាប់ពីរូបលោកជាប់ឆ្នោតជាប្រធានាធិបតីម្ដងទៀតពោលគឺលោកក៏បានផ្លាស់ប្តូរទិសដៅលើសេដ្ឋកិច្ចផងដែរ ដោយក្រឡាស់គោលនយោបាយហិរញ្ញវត្ថុតឹងរ៉ឹងជ្រុល ដែលត្រូវបានរិះគន់ថា បានធ្វើឲ្យមានអតិផរណាមិននឹងន និងរូបិយប័ណ្ណធ្លាក់ចុះ ក្នុងប្រទេសទួរគី។ចំណងទាក់ទងរបស់លោក Erdogan ជាមួយប្រធានាធិបតីរុស្ស៊ី លោក Vladimir Putin ចាប់ផ្ដើមមានសម្ពាធ ដោយសារទំនាក់ទំនងរបស់ប្រទេសទួរគីជាមួយសម្ព័ន្ធមិត្តលោកខាងលិច ដែលមានរយៈពេលជាច្រើនឆ្នាំ រួមជាមួយនឹងកត្តាផ្សេងៗទៀត ដោយក្នុងនោះរួមទាំងក្ដីបារម្ភអំពីការគ្រប់គ្រងតាមបែបអត្តាធិបតេយ្យដែលកើនឡើងជាលំដាប់របស់លោកផងដែរ។ប៉ុន្តែការយល់ព្រមរបស់លោក Erdogan កាលពីថ្ងៃចន្ទ (ទី១០ ខែកក្កដា) ដើម្បីឲ្យប្រទេសស៊ុយអែតបានចូលរួមជាមួយអង្គការណាតូ ពោលគឺជាការសម្រេចដែលរូបលោកបានប្រឆាំងអស់រយៈជាច្រើនខែនោះ ត្រូវបានស្វាគមន៍ដោយមេដឹកនាំលោកខាងលិច ដែលបានប្រឹងប្រែងពង្រឹងសម្ព័ន្ធភាព បន្ទាប់ពីមានការលុកលុយរបស់ប្រទេសរុស្ស៊ីលើអ៊ុយក្រែន។បន្ទាប់ពីមាននូវការកែប្រែដ៏គួរឲ្យភ្ញាក់ផ្អើលពីសំណាក់ថ្នាក់ដឹកនាំកំពូលរបស់ប្រទេសទួរគី ក្រុមអ្នកវិភាគជឿថា ការសម្រេចរបស់លោក Erdogan ដោយក្នុងនោះរួមទាំងការប្រកាសគាំទ្រដល់ប្រទេសអ៊ុយក្រែន ក្នុងការចូលជាសមាជិករបស់អង្គការណាតូផងដែរ មិនមែនជារឿងចៃដន្យនោះឡើយ។លោក Galip Dalay នៅវិទ្យាស្ថានស្រាវជ្រាវ Chatham House បាននិយាយថា៖ «មានការយល់ឃើញមួយ ក្នុងប៉ុន្មានឆ្នាំថ្មីៗនេះថា ទំនាក់ទំនងរវាងទួរគី និងរុស្ស៊ី កាន់តែមានគម្លាតឆ្ងាយទៅៗហើយ។ នេះបង្ហាញពីការរៀបចំតុល្យភាពថ្មីយ៉ាងច្បាស់លាស់»៕

ទីក្រុងរបស់រដ្ឋវើម៉ិន សហរដ្ឋអាមេរិក ត្រូវបានទឹកជំនន់ជន់លិច ខណៈទំនប់ទឹកឈានជិតដល់កម្រិតហៀរចេញ

អាមេរិក៖ ខ្សែទឹកខាងលើទំបន់ពីទីក្រុងរបស់រដ្ឋវើម៉ិន (Vermont) កំពុងរ៉ាប់រងសមត្ថភាពទឹកដល់កម្រិតអតិប្បរមា កាលពីថ្ងៃអង្គារទី១១ខែកក្កដា បន្ទាប់ពីទឹកជំនន់ដ៏មហន្តរាយបានបិទផ្លូវនានាចេញពីទីក្រុងធំរបស់រដ្ឋវើម៉ិន គឺទីក្រុងម៉ុនប៉ែលយ័រ (Montpelier) និងបណ្ដាលឲ្យមនុស្សជាច្រើនជាប់ក្នុងលំនៅឋានរបស់ពួកគេ។ ក្រុមមន្ត្រីទីក្រុងនេះ បាននិយាយថាទំនប់ទឹក រៃសធ៍ស្វីលដាម (Wrightsville Dam) ដែលផ្ទុកទឹកបម្រុងចំនួន៦,៤គីឡូម៉ែត្រ ស្ថិតនៅភាគខាងជើងទីក្រុងម៉ុនប៉ែលយ័រ ជិតចំណុចដែលផ្លូវទឹកនឹងចាំបាច់ត្រូវបញ្ចេញទឹកចូលក្នុងទន្លេ ណស ប្រែនជ៍(North Branch)។ ខណៈដែលទីក្រុងរបស់រដ្ឋនេះ ស្ថិតក្នុងភាគឦសាននៅក្រោមទឹក សីតុណ្ហភាពនៅមហាសមុទ្រ បានកើនឡើងខ្ពស់ដល់៣២អង្សាសេ នៅក្នុងរដ្ឋហ្វ្លរីដា ជាមួយគ្នានោះ រដ្ឋតិចសាស់ កំពុងទទួលរកកម្ដៅខ្លាំង ហើយរដ្ឋកាលីហ្វ័រនីញ៉ា កំពុងត្រៀមទប់ទល់នឹងការហក់ឡើងនៃសីតុណ្ហភាពខ្ពស់រហូតដល់៤៩អង្សាសេ នៅក្នុងតំបន់វាលខ្សាច់នៅចុងសប្ដាហ៍នេះ។ ភាគច្រើននៃតំបន់ភាគឦសានសហរដ្ឋអាមេរិក រួមទាំងតំបន់មួយចំនួននៃរដ្ឋញ៉ូយ៉ក ម៉ាស្សាឈូសេត និង ខិននីធីខិត បានទទួលរងកម្ពស់ទឹកភ្លៀង២០សង់ទីម៉ែត្ររួចទៅហើយ កាលពីប៉ុន្មានថ្ងៃកន្លងទៅនេះ។ក្រុមមន្ត្រីរដ្ឋវើម៉ិន បានហៅទឹកជំនន់នេះថាជាគ្រោះមហន្តរាយដ៏ធ្ងន់ធ្ងរបំផុត ចាប់តាំងពីព្យុះសង្ឃរា អ៊ីរ៉េន(Irene) បានបោកបក់ដល់រដ្ឋញូវ អ៊ីងគ្លែន (New England) ជាព្យុះតំបន់ត្រូពិក កាលពីឆ្នាំ២០១១ និងបានបណ្ដាលឲ្យខូចខាតទ្រព្យសម្បត្តិប្រមាណ ៧៥០លានដុល្លារអាមេរិក និងសម្លាប់មនុស្ស៧នាក់ នៅក្នុងរដ្ឋមួយនេះ៕

មនុស្ស ៨៦នាក់ស្លាប់ និង១៥១របួសដោយសារភ្លៀងធ្លាក់ខ្លាំងនៅប៉ាគីស្ថានចាប់តាំងពីខែមិថុនាមក

ប៉ាគីស្ថាន៖ សារព័ត៌មាន ARY News ដែលមានមូលដ្ឋាននៅប៉ាគីស្ថានបានរាយការណ៍ដោយសំអាងដល់សម្តីអាជ្ញាធរគ្រប់គ្រងគ្រោះមហន្តរាយជាតិ (NDMA)ថា មនុស្ស៨៦នាក់បានស្លាប់ និង១៥១នាក់ផ្សេងទៀតបានរងរបួសនៅក្នុងភ្លៀងមូសុងនាពេលថ្មីៗនេះចាប់តាំងពីថ្ងៃទី២៥ ខែមិថុនាមក។នៅក្នុងរបាយការណ៍របស់អាជ្ញាធរ NDMA បានបញ្ជាក់ថា មនុស្ស ៦នាក់បានស្លាប់ និង ៩នាក់ផ្សេងទៀត បានរងរបួសនៅក្នុងភ្លៀងធ្លាក់ខ្លាំងនៅទូទាំងប្រទេសប៉ាគីស្ថានក្នុងរយៈពេល ២៤ម៉ោងកន្លងមកនេះ បើយោងតាម ARY News ។យោងតាមទិន្នន័យរបស់ទីភ្នាក់ងារ NDMA បានឲ្យដឹងថា មកទល់បច្ចុប្បន្ននេះ មានអ្នកស្លាប់ចំនួន ៨៦នាក់ និងរបួស ១៥១នាក់ ដែលក្នុងនោះមានស្ត្រី ១៦នាក់ និងកុមារ ៣៧នាក់។ ផ្ទះសម្បែងចំនួន ៩៧ខ្នង ក៏បានរងការខូចខាតដែរ ខណៈភ្លៀងធ្លាក់យ៉ាងគំហុកបន្តធ្វើឲ្យមានការខូចខាតនៅទូទាំងប្រទេស៕

សាជីវកម្ម BBC របស់ចក្រភពអង់គ្លេសបានផ្អាកការងារពិធីករម្នាក់ជុំវិញរឿងអាស្រូវរូបថតក្មេងជំទង់

អង់គ្លេស៖ សាជីវកម្ម BBC របស់ចក្រភពអង់គ្លេសបានផ្អាកការងារបុគ្គលិកប្រុសម្នាក់កាលពីថ្ងៃអាទិត្យ (៩ កក្កដា) បន្ទាប់ពីមានការចោទប្រកាន់ថាតារាពិធីកររបស់ខ្លួនម្នាក់នេះ បានបង់ប្រាក់ឱ្យក្មេងជំទង់ចំនួនរាប់ពាន់ផោនដើម្បីថតរូបអាសអាភាស ដោយចាប់ផ្តើមពីពេលពួកគេមានអាយុ ១៧ឆ្នាំ។ប្រព័ន្ធផ្សព្វផ្សាយនេះបាននិយាយថា ខ្លួនបានដឹងជាលើកដំបូងអំពីពាក្យបណ្តឹងកាលពីខែឧសភា ប៉ុន្តែការចោទប្រកាន់ថ្មីអំពីលក្ខណៈផ្សេងគ្នាត្រូវបានធ្វើឡើងកាលពីថ្ងៃព្រហស្បតិ៍ (៦ កក្កដា) ហើយខ្លួនបានជូនដំណឹងដល់ "ក្រុមអាជ្ញាធរខាងក្រៅ" ។នគរបាលទីក្រុងឡុងដ៍្របាននិយាយថា ខ្លួនបានទទួលទំនាក់ទំនងដំបូងពី BBC ប៉ុន្តែមិនមានការបញ្ជូន ឬការចោទប្រកាន់ជាផ្លូវការណាមួយត្រូវបានធ្វើឡើងនោះទេ។សារជីវកម្ម BBC បាននិយាយថា នេះជា "កាលៈទេសៈដ៏ស្មុគស្មាញ និងឆាប់រហ័សពេក" ហើយខ្លួន "កំពុងធ្វើការឱ្យបានលឿនតាមដែលអាចធ្វើទៅបាន ដើម្បីរកការពិត និងជូនដំណឹងឱ្យបានត្រឹមត្រូវនូវជំហានបន្ទាប់ដ៏សមស្រប"៕

រដ្ឋមន្ត្រីការបរទេសឥណ្ឌូនេស៊ីជំរុញឲ្យតំបន់អាស៊ានគ្មាននុយក្លេអ៊ែរ

ឥណ្ឌូណេស៊ី៖ រដ្ឋមន្ត្រីការបរទេសឥណ្ឌូណេស៊ី Retno Marsudi បានបើកកិច្ចប្រជុំរដ្ឋមន្ត្រីការបរទេសអាស៊ាន (សមាគមប្រជាជាតិអាស៊ីអាគ្នេយ៍) ប្រចាំឆ្នាំនៅថ្ងៃអង្គារ (១១ កក្កដា)នេះ ដោយជំរុញឱ្យតំបន់នេះគ្មានអាវុធនុយក្លេអ៊ែរ។សុន្ទរកថាបើកនៃកិច្ចប្រជុំនេះ ត្រូវបានបន្តដោយសម័យប្រជុំបិទទ្វាររវាងប្រទេសជាសមាជិក ដែលសន្ធិសញ្ញាតំបន់គ្មានអាវុធនុយក្លេអ៊ែរអាស៊ីអាគ្នេយ៍ ដែលមិនមានរដ្ឋណាមួយក្នុងចំណោមរដ្ឋអាវុធនុយក្លេអ៊ែរទាំងប្រាំបានបានព្រមព្រៀងគ្នានោះ ត្រូវបានលើកយកទៅពិភាក្សា។កិច្ចប្រជុំប្រចាំឆ្នាំនេះធ្វើឡើង ស្របពេលមានសម្ពាធដើម្បីដោះស្រាយវិបត្តិនយោបាយបង្ហូរឈាមនៅក្នុងសហភាពមីយ៉ាន់ម៉ា និងដោះស្រាយភាពតានតឹងនៅសមុទ្រចិនខាងត្បូង ដែលសមាជិកអាស៊ានមួយចំនួនមានការទាមទារទឹកដីត្រួតស៊ីគ្នាជាមួយប្រទេសចិន។អាស៊ានក៏នឹងរៀបចំកិច្ចប្រជុំកំពូលអាស៊ីបូព៌ា និងវេទិកាតំបន់អាស៊ាននៅចុងសប្តាហ៍នេះផងដែរ ដោយមានរដ្ឋមន្ត្រីការបរទេសអាមេរិក លោក Antony Blinken និងរដ្ឋមន្ត្រីការបរទេសរុស្ស៊ីលោក Sergei Lavrov សុទ្ធតែបានគ្រោងនឹងចូលរួមក្នុងព្រឹត្តិការណ៍ទាំងនោះ៕

ទីភ្នាក់ងារអាកាសធាតុUN ៖ សប្តាហ៍ទី១ ខែកក្កដានេះ មានអាកាសធាតុក្តៅបំផុតក្នុងកំណត់ត្រា

UN៖ យោងតាមអង្គការឧតុនិយមពិភពលោក (WMO) របស់អង្គការសហប្រជាជាតិកាលពីថ្ងៃច័ន្ទ បានឱ្យដឹងថា សប្តាហ៍ដំបូងនៃខែកក្កដានេះគឺជារយៈពេលដែលមានសីតុណ្ហភាពក្តៅបំផុតក្នុងកំណត់ត្រា ដោយបានព្រមានអំពីសីតុណ្ហភាពពិភពលោកនឹងកើនឡើងនៅពេលដែលឥទ្ធិពលនៃបាតុភូត អ៊ែល នីញ៉ូ (El Nino) កើតមានឡើងនៅចុងឆ្នាំនេះ។យោងតាមទិន្នន័យពីអង្គការ WMO បានឲ្យដឹងថា ភពផែនដីទើបតែជួបប្រទះខែមិថុនាដ៏ក្តៅបំផុតចាប់តាំងពីកំណត់ត្រាបានចាប់ផ្តើម។ សីតុណ្ហភាពជាមធ្យមនៃខែមិថុនាឆ្នាំនេះគឺ ០,៦អង្សាសេខ្ពស់ជាងខែមិថុនា ពីឆ្នាំ១៩៩១ ដល់ឆ្នាំ២០២០។ នៅពេលដែលខែកក្កដាបានចាប់ផ្តើម សីតុណ្ហភាពពិភពលោកនៅតែបន្តកើនឡើង។ដោយសំអាងដល់ទិន្នន័យបឋមរបស់ទីភ្នាក់ងារឧតុនិយមជប៉ុន អង្គការ WMO បាននិយាយថា ថ្ងៃទី ៧ ខែកក្កដា គឺជាថ្ងៃដ៏ក្តៅបំផុត។ សីតុណ្ហភាពជាមធ្យមរបស់ពិភពលោកស្ថិតនៅកម្រិត ១៧,២៤ អង្សាសេ ពោលគឺ ០,៣អង្សារសេខ្ពស់ជាងមុនធៀបនឹងកំណត់ត្រាមុនដែលមានត្រឹម ១៦,៩៤អង្សារសេ ដែលបានកត់ត្រានៅថ្ងៃទី១៦ ខែសីហា ឆ្នាំ២០១៦។សីតុណ្ហភាពក្នុងមហាសមុទ្រនានាក្នុងខែឧសភា និងមិថុនា ក៏បានបំបែកកំណត់ត្រាផងដែរ។ ក្រុមអ្នកឧតុនិយមបានរកឃើញរលកកំដៅសមុទ្រ (MHW) នៅជិតប្រទេសអៀរឡង់ ចក្រភពអង់គ្លេស និងសមុទ្របាល់ទិក។ ទន្ទឹមនឹងនេះដែរ តំបន់ទឹកកកនៃសមុទ្រអង់តាក់ទិកបានរលាយធ្លាក់ចុះដល់កម្រិតទាបបំផុតក្នុងខែមិថុនា គឺតិចជាងជាមធ្យមចំនួន ១៧ភាគរយ។អង្គការ WMO បាននិយាយថា សីតុណ្ហភាពខ្ពស់ដែលបំបែកកំណត់ត្រានេះ អាចបង្កការខូចខាតដល់ប្រព័ន្ធអេកូឡូស៊ី និងបរិស្ថាន។ នេះឆ្លុះបញ្ចាំងពីផលប៉ះពាល់យូរអង្វែងនៃសកម្មភាពរបស់មនុស្សទៅលើអាកាសធាតុនៃភពផែនដីរបស់យើង៕

ឆ្មាំល្បាតឆ្នេរអេស្ប៉ាញជួយសង្គ្រោះជនអន្តោប្រវេសន៍យ៉ាងតិច៨៦នាក់ចេញពីប្រជុំកោះកាណារី

អេស្ប៉ាញ៖ យ៉ាងហោចណាស់មានជនអន្តោប្រវេសន៍ចំនួន៨៦នាក់ ត្រូវស្ទាក់ចាប់បាន និងជួយសង្គ្រោះដោយឆ្មាំល្បាតឆ្នេរអេស្ប៉ាញកាលពីថ្ងៃច័ន្ទ (១០ កក្កដា) ដែលមានចម្ងាយ ១១៣ គីឡូម៉ែត្រ (៧០ ម៉ាយ) ពីកោះ ក្រាន កាណារីយ៉ា។ នាវាកុងតឺន័រ MSC Marta ត្រូវបានបង្វែរទិសដៅទៅតំបន់នោះ ដើម្បីផ្តល់ការគាំទ្រ បន្ទាប់ពីយន្តហោះស្វែងរក និងជួយសង្គ្រោះ បានរកឃើញទូកខ្នាតតូចផ្ទុកមនុស្ស៨០នាក់ និងស្ត្រី ៦នាក់។ជនអន្តោប្រវេសន៍ទាំងនោះ ត្រូវបានបញ្ចូនទៅកាន់នាវាឆ្មាំល្បាតឆ្នេរ ហើយបន្ទាប់មកពិនិត្យ និងថែទាំដោយសេវាសង្គ្រោះបន្ទាន់នៅកំពង់ផែ Arguineguin នៅលើកោះ ក្រាន កាណារីយ៉ា។ ទិន្នន័យរបស់រដ្ឋាភិបាលអេស្ប៉ាញបានបង្ហាញថាមនុស្ស ៧.២១៣នាក់បានទៅដល់ប្រជុំកោះកាណារីនៅចន្លោះខែមករាដល់ចុងខែមិថុនាឆ្នាំនេះ ដែលតួលេខនេះបានធ្លាក់ចុះ ១៨,៥% បើធៀបនឹងរយៈពេលដូចគ្នាកាលពីឆ្នាំមុន៕

មនុស្ស២នាក់បានស្លាប់ និង១២នាក់រងរបួសបន្ទាប់ពីបាក់ផ្លូវហាយវេដែលកំពុងសាងសង់នៅទីក្រុងបាងកក

ថៃ៖ បាងកក៖ យ៉ាងហោចណាស់មនុស្ស២នាក់បានស្លាប់ បន្ទាប់ពីរនាំងសំណង់ដ៏ធំនៅលើផ្លូវដ៏មមាញឹកមួយបានដួលរលំនៅក្នុងទីក្រុងបាងកក នគរបាលបាននិយាយនៅថ្ងៃអង្គារ (១១ កក្កដា)នេះ ដោយវីដេអូនៃឧបទ្ទវហេតុនេះត្រូវបានចែកចាយយ៉ាងឆាប់រហ័សតាមអ៊ីនធឺណិត។រនាំងដែកដ៏ធំនៅលើគម្រោងសាងសង់ផ្លូវហាយវេ Lat Krabang Tollway នៅភាគខាងកើតទីក្រុងនេះ បានបាក់ស្រុតដល់ដីកាលពីរសៀលថ្ងៃច័ន្ទ ដោយធ្វើឲ្យអ្នកថ្មើរជើង និងអ្នកបើកបរមានការភ្ញាក់ផ្អើលយ៉ាងខ្លាំង។ នគរបាលបាននិយាយថា មនុស្សយ៉ាងហោចណាស់២នាក់បានស្លាប់ និង១២នាក់ទៀតរងរបួស។លោក Chadchart Sittipunt អភិបាលក្រុងបាងកក បានប្រាប់អ្នកយកព័ត៌មានកាលពីល្ងាចថ្ងៃចន្ទ នៅទីតាំងកើតហេតុថា "យើងមិនទាន់ដឹងថា មូលហេតុអ្វីបណ្តាលឱ្យមានកើតមានឧបទ្ទវហេតុនេះទេ។ យើងមិនទាន់មានព័ត៌មានណាមួយអំពីអ្នកបាត់ខ្លួននៅឡើយទេ"។ លោកបានបន្ថែមថា អ្នករងរបួសបួននាក់ ដែលស្ថិតក្នុងចំណោមអ្នករងរបួសទាំងអស់ កំពុងមានស្ថានភាពធ្ងន់ធ្ងរ។លោក Chadchart បាននិយាយថា ក្រុមអ្នកជួយសង្គ្រោះនឹងរង់ចាំវិស្វករវិភាគការដួលរលំ មុនពេលចាប់ផ្តើមប្រតិបត្តិការ។ លោកបានបន្តថា៖ «យើងផ្តល់អាទិភាពដល់សុវត្ថិភាពជាមុន។ បន្ទាប់មកយើងនឹងចាប់ផ្តើមប្រតិបត្តិការស្វែងរកដោយប្រុងប្រយ័ត្ន»៕

រុស្ស៊ីបើកការវាយប្រហារតាមផ្លូវអាកាសទៅលើក្រុងគីវ ក្នុងរយៈពេលប៉ុន្មានម៉ោង មុនពេលកិច្ចប្រជុំកំពូលណាតូចាប់ផ្តើម

យោធាអ៊ុយក្រែន បាននិយាយថា រុស្ស៊ីបានបើកការវាយប្រហារតាមផ្លូវអាកាសពេលយប់ទៅលើទីក្រុងគីវ នៅព្រឹកថ្ងៃអង្គារ ទី១១ ខែកក្កដានេះ ត្រឹមតែប៉ុន្មានម៉ោង មុនពេលចាប់ផ្តើមកិច្ចប្រជុំកំពូលណាតូ នៅក្នុងប្រទេសលីទុយអានី ដែលត្រូវដោះស្រាយការគំរាមកំហែងផ្នែកសន្តិសុខពីទីក្រុងមូស្គូ។លោក Serhiy Popko ប្រមុខរដ្ឋបាលយោធារបស់ទីក្រុងគីវ បាននិយាយនៅក្នុងការបង្ហោះនៅលើបណ្តាញTelegramថា៖ សត្រូវបានវាយប្រហារទីក្រុងគីវចេញពីលើអាកាសជាលើកទីពីរក្នុងខែនេះ»។លោក Popko បាននិយាយថា យោងតាមព័ត៌មានបឋម ប្រព័ន្ធការពារដែនអាកាសរបស់អ៊ុយក្រែន បានបាញ់ទម្លាក់យានដ្រូនShahed ដែលផលិតដោយអ៊ីរ៉ង់ទាំងអស់ ដែលរុស្ស៊ីបានបាញ់ចេញមុនដល់គោលដៅ។ មិនមានព័ត៌មានភ្លាមៗអំពីការខូចខាត ឬជនរងគ្រោះនោះទេ។ ការជូនដំណឹងអំពីការវាយប្រហារតាមផ្លូវអាកាស បានផ្ទុះឡើងលើទីក្រុងគីវ ក្នុងរយៈពេល១ម៉ោង និងយូរជាងនេះ នៅក្នុងតំបន់ផ្សេងទៀតនៃភាគខាងកើតរបស់ប្រទេសអ៊ុយក្រែន។ នេះបើយោងតាមកងទ័ព អាកាសរបស់អ៊ុយក្រែន។សាក្សីរបស់ Reuters នៅទីក្រុងគីវ បានឮការផ្ទុះដែលស្រដៀងនឹងសំឡេងនៃប្រព័ន្ធការពារដែនអាកាសស្ទាក់ចាប់គោលដៅក្នុងអំឡុងពេលការវាយឆ្មក់តាមផ្លូវអាកាស។កិច្ចប្រជុំកំពូលនៅទីក្រុង Vilnius ដែលចាប់ផ្តើមនៅថ្ងៃអង្គារនេះ នឹងត្រូវបានគ្របដណ្តប់ដោយផលប៉ះពាល់នៃការលុកលុយរបស់រុស្ស៊ីលើអ៊ុយក្រែន ដោយក្រុមមេដឹកនាំ គ្រោងនឹងអនុម័តផែនការដ៏ទូលំទូលាយលើកដំបូងរបស់អង្គការណាតូ ចាប់តាំងពីការបញ្ចប់សង្គ្រាមត្រជាក់ ដើម្បីការពារប្រឆាំងនឹងការវាយប្រហារណាមួយពីទីក្រុងមូស្គូ៕

ក្រុមអ្នកទេសចរជាច្រើនជាប់ខ្លួន ក្នុងទឹកជំនន់ក្រោយភ្លៀងធ្លាក់ខ្លាំង សម្លាប់មនុស្ស២៩នាក់នៅឥណ្ឌា

រដ្ឋតំបន់ភ្នំ ហិម៉ាចាល់ប្រទេស (Himachal Pradesh)ស្ថិតនៅភាគខាងជើងរបស់ប្រទេសឥណ្ឌា កាលពីថ្ងៃចន្ទទទួលរងគ្រោះដោយសារភ្លៀងធ្លាក់ខ្លាំង ដែលបង្កឲ្យមានបំណាក់ដី និងអ្នកដំណើរព្រមទាំងអ្នកទេសចរជាច្រើនបានជាប់នៅនឹងកន្លែង។ក្រុមមន្ត្រីបាននិយាយថា ភ្លៀងខ្លាំងរដូវមូសុងរាប់សិបមេ ដែលបានធ្លាក់រាយប៉ាយទូទាំងតំបន់ភាគខាងជើងប្រទេសឥណ្ឌា បានឆក់យកជីវិតមនុស្សយ៉ាងហោចណាស់២៩នាក់ ដែលបានកាត់ផ្ដាច់តំបន់ជាច្រើន ដោសារតែស្ពាន និងផ្លូវទាំងឡាយត្រូវបាន ទឹកជំនន់ជន់លិច។ ទឹកជំនន់ដ៏គំហុក នៅក្នុងរដ្ឋហិម៉ាចាល់ប្រទេស កាលពីចុងសប្ដាហ៍បានវាយបំបាក់ស្ពាននិងហូរកួចលំនៅឋានមួយចំនួនតាមទឹក ។ ក្រុមអាជ្ញាធរបានឧទ្ទម្ភាគចក្រដើម្បីជួយសង្រ្គោះមនុស្សដែលបានជាប់នៅលើផ្លូវ និងស្ពានដោយសារតែភ្លៀងធ្លាក់ខ្លាំង។ ក្រុមអាជ្ញាធរកំពុងរង់ចាំឲ្យភ្លៀងរាំងបន្តិច ដើម្បីបញ្ជូនបេសកកម្មឧទ្ធម្ភាគចក្រទៅជួយសង្រ្គោះមនុស្សប្រមាណ៣០០នាក់ដែលបានជាប់ រួមទាំងក្រុមអ្នកទេសចរ នៅក្នុងតំបន់ឡាហូលស្ពីទី(Lahaul-Spiti) និងតំបន់គូលូ(Kullu)របស់រដ្ឋហិម៉ាចាល់ប្រទេស។ សាលារៀន នៅក្នុងទីក្រុងញ៉ូដេលី ត្រូវបានបិទទ្វារកាលពីថ្ងៃចន្ទ បន្ទាប់មានភ្លៀងធ្លាក់ខ្លាំងបំផុតក្នុងពេលតែមួយថ្ងៃ ក្នុងខែកក្កដានេះក្នុងរយៈពេល៤០ឆ្នាំ ហើយរដ្ឋធានីមួយនេះ ត្រូវបានប្រកាសអាសន្ន ខ្ពស់ខណៈទឹកទន្លេយ៉ាមូណា(Yamuna) ហូរបុកខ្លាំងជិតដល់កម្រិតគ្រោះថ្នាក់ ដោយមានផ្លូវជាច្រើនត្រូវបានជន់លិច៕

បណ្ដាញសង្គម

ព័ត៌មានថ្មីៗ

មនុស្សរាប់ម៉ឺននាក់ក្នុងក្បួនដង្ហែអ្នកស្រឡាញ់ភេទដូចគ្នានៅរដ្ឋធានីហុងគ្រី សម្រុកតវ៉ាប្រឆាំងលោក Orban

ក្រុម G7 យល់ព្រមបញ្ចៀសពន្ធខ្ពស់ៗសម្រាប់ក្រុមហ៊ុនរបស់អាមេរិក និងចក្រភពអង់គ្លេស

អ៊ីរ៉ង់ រៀបចំពិធីបុណ្យសពដ៏ធំដល់មេទ័ពនិងអ្នកវិទ្យាសាស្ត្រ ដែលស្លាប់ក្នុងសង្គ្រាមជាមួយអ៊ីស្រាអែល

ជនអន្តោប្រវេសន៍អាមេរិក កំពុងច្របូកច្របល់ បន្ទាប់ពីសេចក្ដីសម្រេចតុលាការកំពូលលើសិទ្ធិពលរដ្ឋពីកំណើត

រដ្ឋមន្រ្តីសុខាភិបាល ណែនាំដល់មន្រ្តីសុខាភិបាលខេត្ត ពិនិត្យបន្ថែម និងគ្រប់ជ្រុងជ្រោយ កិច្ចការរៀបចំផែនការយុទ្ធសាស្រ្តសុខាភិបាល ជាពិសេសខេត្តជាប់ព្រំដែន

មនុស្សរាប់ម៉ឺននាក់ ចូលរួមព្យុហយាត្រាឥន្ទធនូនៅវេណេស៊ុយអេឡា ម៉ិកស៊ិក បូលីវី និងប៉េរូ អំពាវនាវឲ្យមានភាពចម្រុះបែប

រលកកម្តៅបន្តវាយប្រហារតំបន់ភាគខាងត្បូងអឺរ៉ុប ពេលដែលសីតុណ្ហភាពកើនឡើងដល់ជាង ៤០អង្សាសេនៅតំបន់ខ្លះ

TOP STORY | អគ្គនាយកដ្ឋានអន្តោប្រវេសន៍មិនអនុញ្ញាតឱ្យមានការដឹកជញ្ជូនទំនិញគ្រប់ប្រភេទចូល ចេញឬឆ្លងកាត់ច្រកទ្វារព្រំដែនអន្តរជាតិឬច្រកទ្វារតំបន់ណាមួយតាមខ្សែបន្ទាត់ព្រំដែនកម្ពុជា-ថៃឡើយ

ពលករខ្មែរវិលត្រឡប់មកពីថៃទទួលបានការយកចិត្តទុកដាក់ពីអាជ្ញាធរខេត្តបាត់ដំបង និងមន្រ្តីជំនាញ

TOP STORY | សម្ដេចធិបតី៖ អាជ្ញាធរថៃ និងប្រជាជនថៃដែលមានបំណងចង់ឱ្យមានការបើកច្រកព្រំដែនកម្ពុជា-ថៃ ឡើងវិញមិនចាំបាច់ស្នើមកកម្ពុជាទេ ប៉ុន្ដែត្រូវស្នើទៅអ្នកមានអំណាចពិតប្រាកដនៅប្រទេសថៃ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877