BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

និស្សិតសាកលវិទ្យាល័យ Harvard នៅអាមេរិក ដែលតវ៉ាគាំទ្រប៉ាឡេស្ទីន បញ្ចប់ជំរំបាតុកម្ម ប៉ុន្តែប្ដេជ្ញាបន្តតវ៉ា

និស្សិតសាកលវិទ្យាល័យ ហាវើដ (Harvard) មួយក្រុម នៅក្នុងសហរដ្ឋអាមេរិក បាននិយាយកាលពីថ្ងៃអង្គារ (១៤ ឧសភា) ថា ពួកគេនឹងបញ្ចប់ដោយសន្តិវិធីនូវការបោះជំរំតវ៉ាដែលគាំទ្រប៉ាឡេស្ទីន បន្ទាប់ពីសាកលវិទ្យាល័យបានយល់ព្រមពិភាក្សាអំពីការសម្របសម្រួលរបស់ខ្លួនជាមួយក្រុមបាតុករ ហើយចាប់ផ្តើមពិចារណាឡើងវិញនូវការបណ្ដេញចេញមិនស្ម័គ្រចិត្ត ដែលខ្លួនបានដាក់លើបាតុករមួយចំនួន។អ្នកនាំពាក្យរបស់សាកលវិទ្យាល័យ Harvard បាននិយាយថា សាលាបានយល់ព្រមលើ «ការពិភាក្សាទាក់ទងនឹងសំណួររបស់សិស្សដែលទាក់ទងនឹងការសម្របសម្រួល» ហើយបានយោងទៅលើសេចក្តីថ្លែងការណ៍ពីមុនរបស់ថ្នាក់ដឹកនាំសាកលវិទ្យាល័យ Harvard ដែលបដិសេធការអំពាវនាវឱ្យមានការដកខ្លួនចេញពីក្រុមហ៊ុន ដែលមានទំនាក់ទំនងជាមួយអ៊ីស្រាអែល។សម្ព័ន្ធ ហាវើដគាំទ្រប៉ាឡេស្ទីន (HOOP) ដែលបានអំពាវនាវឱ្យសាលាដកខ្លួនចេញពីក្រុមហ៊ុនដែលមានទំនាក់ទំនងជាមួយអ៊ីស្រាអែលនេះ បានប្រកាសនៅក្នុងគណនីបណ្ដាញសង្គម អ៊ីនស្តាក្រាម (Instagram) ថាខ្លួននឹងរុះរើជំរំតវ៉ាដែលមានរយៈពេល ៣ សប្តាហ៍ ប៉ុន្តែបានប្តេជ្ញាថានឹង «បង្កើតក្រុមឡើងវិញ ហើយអនុវត្តការតស៊ូដ៏រ៉ាំរ៉ៃនេះតាមមធ្យោបាយផ្សេងទៀត»។ការបោះជំរំតវ៉ានៅសាកលវិទ្យាល័យដ៏មានកិត្យានុភាពបំផុតរបស់ប្រទេសនេះ បានបង្កភាពខ្វែងគំនិតក្នុងសហគមន៍សាកលវិទ្យាល័យ ដោយអតីតនិស្សិតមួយចំនួន ដែលជាអ្នកមានទ្រព្យសម្បត្តិ បានថ្កោលទោសការតវ៉ានេះថាជាការប្រឆាំងនឹងជនជាតិជ្វីហ្វ និងប្រឆាំងទៅនឹង «តម្លៃរបស់លោកខាងលិច» ខណៈដែលអ្នកផ្សេងទៀតបានចុះហត្ថលេខាលើលិខិតគាំទ្រក្រុមបាតុករ៕

នគរបាលប៉េរូ រាយការណ៍ថា មនុស្ស១៣នាក់ស្លាប់ ក្នុងឧបទ្ទវហេតុរថយន្តក្រុង

នគរបាលនៅក្នុងប្រទេសប៉េរូ បានរាយការណ៍កាលពីថ្ងៃអង្គារថា មនុស្ស១៣នាក់បានស្លាប់នៅក្នុងឧបទ្ទវហេតុរថយន្តក្រុងនៅលើដងផ្លូវក្នុងតំបន់ភ្នំអង់ នៃប្រទេសអាមេរិកខាងត្បូង ជាឧប្បត្តិហេតុចុងក្រោយដែលមានស្លាប់។អាជ្ញាធរតំបន់ បាននិយាយនៅក្នុងសេចក្តីថ្លែងការណ៍ថា ឧបទ្ទវហេតុដែលពាក់ព័ន្ធទៅនឹងរថយន្តក្រុង ជាកម្មសិទ្ធិរបស់ក្រុមហ៊ុនដឹកជញ្ជូន អ៊ីនធឺប្រូវីនសល ស៊ីវ៉ា (Interprovincial Civa) បានកើតឡើង នៅជិតទីក្រុង Vinchos ខណៈរថយន្តក្រុងធ្វើដំណើរពីរដ្ឋធានី Lima ទៅកាន់ក្រុងអាយ៉ាឈូចូ( Ayachucho)។នៅពេលដំបូង អាជ្ញាធរបាននិយាយថា មនុស្ស១៤នាក់បានរងរបួស ប៉ុន្តែក្រោយមកនគរបាល បានប្រាប់ទូរទស្សន៍ Canal N ថាចំនួនអ្នករងរបួសមានយ៉ាងហោចណាស់១៨នាក់។អាជ្ញាធរក្រុង Ayacucho បាននិយាយថា រថយន្តសង្គ្រោះចំនួនប្រាំពីរគ្រឿង ត្រូវបានបញ្ជូនទៅកាន់កន្លែងកើតហេតុ ព្រមទាំងបុគ្គលិកសុខាភិបាលជាង២០នាក់ ហើយអ្នករងរបួស ត្រូវបានបញ្ជូនទៅមន្ទីរពេទ្យចំនួនបី ដាច់ដោយឡែកពីគ្នាដើម្បីព្យាបាល។

អ៊ុយក្រែន ដកថយបន្ថែមពីតំបន់ Kharkiv ខណៈព្រមានពីការបង្កើនកម្លាំងរបស់រុស្ស៊ី ជិតតំបន់ Sumy

យោធាអ៊ុយក្រែន បាននិយាយកាលពីថ្ងៃអង្គារ (១៤ ឧសភា) ថា កងកម្លាំងរបស់ខ្លួនបានដកថយទៅកាន់ទីតាំងថ្មីនៅក្នុងតំបន់ចំនួនពីរនៃតំបន់ ខាគីវ (Kharkiv) ភាគឦសាន ជាទីដែលទីក្រុងមូស្គូ កំពុងវាយលុក ហើយបានព្រមានអំពីការបង្កើនកម្លាំងទ័ពរបស់រុស្ស៊ី កាន់តែខ្លាំងក្លានៅភាគខាងជើងក្បែរតំបន់ ស៊ូមី (Sumy) របស់ខ្លួន។ការវាយប្រហារឆ្លងព្រំដែនលើផ្នែកថ្មីនៅក្នុងតំបន់ ស៊ូមី ទំនងជានឹងពង្រីកខ្សែការពារដែលបាត់បង់របស់ទីក្រុងគីវ បន្ថែមទៀត បន្ទាប់ពីការលុកលុយរបស់រុស្ស៊ី ចូលទៅក្នុងតំបន់ ខាគីវ បានបើកសមរភូមិថ្មីកាលពីថ្ងៃសុក្រ ដែលបង្ខំឱ្យអ៊ុយក្រែនប្រញាប់ប្រញាល់ក្នុងការពង្រឹងកម្លាំង។រុស្សី បានវាយបើកផ្លូវចូលទៅក្នុងភាគខាងជើងនៃតំបន់ ខាគីវ ហើយបាននិយាយកាលពីថ្ងៃអង្គារថា ខ្លួនបានវាយយកភូមិព្រំដែនទី១០ គឺភូមិ ប៊ូរូវ៉ាត់កា (Buhruvatka)។ ប្រមុខនគរបាលនៅទីក្រុង វូវឆានស្ក៍ (Vovchansk) ដែលជាទីប្រជុំជនចម្ងាយ ៥ គីឡូម៉ែត្រ ពីព្រំដែនដែលជាគោលដៅនៃការរុញច្រានដ៏សំខាន់មួយរបស់រុស្ស៊ី បានរាយការណ៍ពីការផ្ទុះអាវុធនៅភាគខាងជើងនៃទីក្រុង។ក្រៅពីការបំផ្លិចបំផ្លាញ និងទុក្ខសោករបស់ប្រជាជនអ៊ុយក្រែននៅក្នុងតំបន់ ខាគីវ ដែលជាទីក្រុងធំទីពីររបស់ខ្លួននេះ ការលុកលុយគឺជាការរំខានដល់ប្រតិបត្តិការការពាររបស់ទីក្រុងគីវ នៅភាគខាងកើត ដែលរុស្ស៊ី បានផ្តោតការវាយលុកអស់រយៈពេលជាច្រើនខែ៕

ចំនួនអ្នកស្លាប់ក្នុងទឹកជំនន់នៅឥណ្ឌូនេស៊ី កើនឡើងដល់ ៥៧នាក់ និងបាត់ខ្លួន ២២នាក់

ក្រុមមន្ត្រីខេត្តបាននិយាយថា ក្រុមអ្នកជួយសង្គ្រោះបានរកឃើញសាកសពមួយចំនួនបន្ថែមទៀតកាលពីថ្ងៃអង្គារទី១៤ឧសភា បន្ទាប់ពីទឹកជំនន់ដ៏គំហុកកាលពីចុងសប្តាហ៍មុន និងលំហូរកម្អែរភ្នំភ្លើងត្រជាក់នៅលើកោះស៊ូម៉ាត្រា របស់ប្រទេសឥណ្ឌូនេស៊ី បានសម្លាប់មនុស្សយ៉ាងហោចណាស់ ៥៧ នាក់ និងបណ្ដាលឱ្យមនុស្ស ២២ នាក់ផ្សេងទៀតបាត់ខ្លួន។ ភ្លៀងធ្លាក់ខ្លាំងជាច្រើនម៉ោង បានបណ្តាលឱ្យផ្ទាំងថ្មភ្នំភ្លើងដ៏ធំរមៀលធ្លាក់ពីភ្នំភ្លើងផ្ទុះសកម្មបំផុតមួយរបស់ប្រទេសឥណ្ឌូនេស៊ី ចូលទៅក្នុងស្រុកចំនួន៦នៅលើកោះស៊ូម៉ាត្រា កាលពីល្ងាចថ្ងៃសៅរ៍ ខណៈទឹកជំនន់ជន់លិចផ្លូវថ្នល់ ផ្ទះសម្បែងប្រជាពលរដ្ឋ និងវិហារអ៊ីស្លាមនានា។ លោក អ៊ីលហាំ វ៉ាហាប់ (Ilham Wahab) មន្ត្រីទីភ្នាក់ងារសម្រាលគ្រោះមហន្តរាយ នៅខេត្ត ស៊ូម៉ាត្រាខាងលិច បានប្រាប់សារព័ត៌មាន AFP ថា មកដល់ពេលនេះ ជនរងគ្រោះចំនួន៥៧ នាក់ត្រូវបានរកឃើញ ថាបានស្លាប់ ហើយមនុស្ស២២នាក់ផ្សេងទៀត នៅតែបាត់ខ្លួន។ក្រុមអ្នកសង្រ្គោះ បានសម្អាតអគារដែលរងការខូចខាតបន្ទាប់ពីទឹកជំនន់ ស្របពេលក្រុមអ្នកជួយ សង្គ្រោះបានប្រើប្រាស់ យានដ្រូនជួយស្វែងរក ដោយប្រើឧបករណ៍ជីកកកាយតាមបំណាក់ដី និងល្បាប់ និងប្រើដៃទទេរបស់ពួកគេ ដើម្បីព្យាយាមស្វែងរកអ្នកនៅរស់រានមានជីវិតនៅក្នុងទន្លេ និងគំនរកម្ទេចថ្ម៕

ចំនួនអ្នកស្លាប់ដោយសារការរលំអគារនៅអាហ្វ្រិកខាងត្បូង កើនឡើងដល់ ៣៣ នាក់

ចំនួនអ្នកស្លាប់ដោយសារការបាក់រលំអគារនៅទីក្រុង ចច (George) នៃប្រទេសអាហ្វ្រិកខាងត្បូង កាលពីសប្តាហ៍មុនបានកើនឡើងដល់ ៣៣ នាក់កាលពីថ្ងៃអង្គារ (១៤ ឧសភា) ខណៈដែលក្រុមអ្នកជួយសង្គ្រោះបានបន្តរុះរើគំនរបាក់បែក ដោយមនុស្ស ១៩ នាក់នៅតែមិនទាន់បានសង្គ្រោះនៅឡើយអស់រយៈពេលជាងមួយសប្តាហ៍បន្ទាប់ពីឧបទ្ទវហេតុនេះ។មន្ត្រីសាលាក្រុងបាននិយាយនៅក្នុងសេចក្តីថ្លែងការណ៍មួយថា រហូតមកដល់ពេលនេះ មានតែអ្នកដែលត្រូវបានសម្លាប់នៅលើការដ្ឋានសំណង់ចំនួន ៦ នាក់ប៉ុណ្ណោះ ដែលត្រូវបានកំណត់អត្តសញ្ញាណ ដោយសារអាជ្ញាធរកំពុងជួបការលំបាកក្នុងការទទួលបានឈ្មោះត្រឹមត្រូវ។មនុស្សចុងក្រោយដែលត្រូវបានជួយសង្គ្រោះ ត្រូវគេទាញចេញពីគំនរបាក់បែកបន្ទាប់ពីជាប់ខ្លួនអស់ជិតមួយសប្ដាហ៍ នៅក្នុងអ្វីដែលនាយករដ្ឋមន្រ្ដីនៃខេត្ត វេសស្ទើន ខេប (Western Cape) នេះបានពណ៌នាថា «អព្ភូតហេតុនៅតែមាន»។គេមិនដឹងថាហេតុអ្វីបានជាអគារកម្ពស់ប្រាំជាន់នៅភាគខាងកើតនៃក្រុង ខេប ថោន (Cape Town) នេះបានបាក់រលំកាលពីថ្ងៃទី០៦ ឧសភា នោះទេ។ ការស៊ើបអង្កេតកំពុងតែប្រព្រឹត្តទៅ ហើយក្រុមអ្នកជួយសង្គ្រោះបានប្រើប្រាស់យានស្ទូច ឧបករណ៍ខួង និងដៃទទេរបស់ពួកគេ ដើម្បីព្យាយាមទៅដល់អ្នកជាប់ខ្លួននៅក្រោមអគារ៕

អង្គការសប្បុរសធម៌៖ ទឹកជំនន់បណ្ដាលឱ្យកុមារ ៤ម៉ឺននាក់ គ្មានផ្ទះសម្បែងនៅអាហ្វហ្គានីស្ថាន

អង្គការសប្បុរសធម៌ពិភពលោក Save the Children បាននិយាយកាលពីថ្ងៃចន្ទដើមសប្ដាហ៍នេះថា កុមារប្រហែល ៤០.០០០នាក់ បានបាត់បង់ផ្ទះសម្បែងរបស់ពួកគេនៅក្នុងខេត្តបាឡាន (Baghlan) ភាគខាងជើងក្នុងប្រទេសអាហ្វហ្គានីស្ថាន ខណៈភ្លៀងធ្លាក់ខ្លាំង និងទឹកជំនន់បានវាយប្រហារខេត្ត នេះ និងតំបន់ផ្សេងទៀត កាលពីថ្ងៃសុក្រសប្ដាហ៍មុន។ លោក អាសាដ ម៉ាលីគ (Arshad Malik)នាយកអង្គការសប្បុរសធម៌ប្រចាំតំបន់នេះ បាននិយាយថា កុមារមានការភ័យខ្លាច។ មនុស្សជាច្រើនបានបាត់បង់អ្វីៗគ្រប់គ្រង មិនត្រឹមតែផ្ទះសម្បែងរបស់ពួកគេប៉ុណ្ណោះទេ ថែមទាំង សាលារៀន និងកន្លែងដែលពួកគេលេងរាល់ថ្ងៃផងដែរ។ ពួកគេបានបាត់បង់អ្វីៗទាំងអស់ដែលធ្លាប់មាន។ពួកគេបានបាត់បង់ទម្លាប់ទាំងអស់នៅអាហ្វហ្គានីស្ថាន។ យោងតាមការិយាល័យកម្មវិធីស្បៀងអាហារពិភពលោកក្នុងប្រទេសអាហ្វានីស្ថាន និងមន្ត្រីអាហ្វហ្គានីស្ថានក្នុងតំបន់បានឱ្យដឹងថា មនុស្សជាង ៣៣០ នាក់ត្រូវបានសម្លាប់នៅទូទាំងប្រទេសក្រីក្រមួយនេះ ដែលភាគច្រើននៅក្នុងខេត្តបាឡាននិងមួយចំនួននៅក្នុងខេត្ត តាកា(Takhar)ខេត្ត បាដាកសាន (Badakhshan) និងខេត្តហ្គ័រ (Ghor ) ។ អង្គការពិភពលោកនានា និងក្រុមមន្ត្រីអាហ្វហ្គានីស្ថាន បានព្រមានពីការកើនឡើងចំនួនអ្នកស្លាប់ និង ជំងឺឆ្លង ជាពិសេសក្នុងចំណោមកុមារ បន្ទាប់ពីទឹកជំនន់។ឮអង្គការសុខភាពពិភពលោកបាននិយាយកាលពីថ្ងៃចន្ទថា ខ្លួនបានបញ្ជូនក្រុមឆ្លើយតបបន្ទាន់ចំនួន៨ក្រុមទៅកាន់តំបន់ដែលរងផលប៉ះពាល់ដោយសារទឹកជំនន់ ដើម្បីតាមដានហានិភ័យនៃការឆ្លងជំងឺ ដង្កាត់ផ្សេងៗ៕

អ៊ីស្រាអែលបញ្ចេញចំនួនជនស៊ីវិលស្លាប់ថ្មីនៅហ្កាហ្សា ហើយថាចំនួនរបស់ក្រុមហាម៉ាស ក្លែងក្លាយនិងប្រឌិត

អ៊ីស្រាអែល បានចេញផ្សាយចំនួនជនស៊ីវិលស្លាប់តាមការប៉ាន់ប្រមាណរបស់ខ្លួន ជាលើកដំបូងនៅក្នុងដែនដីហ្កាហ្សា ដោយនិយាយថាមានប្រហែល១៦.០០០នាក់ ត្រូវបានសម្លាប់នៅក្នុងសង្គ្រាមដែលបានចាប់ផ្តើមកាលពីថ្ងៃទី៧ខែតុលាឆ្នាំមុន ជំនួសឱ្យចំនួនប្រហែល៣៥.០០០នាក់ ដែលក្រសួងសុខាភិបាលប៉ាឡេស្ទីនរបស់ក្រុមហាម៉ាសកំពុងអះអាង។ អ្នកនាំពាក្យរដ្ឋាភិបាលអ៊ីស្រាអែល លោកអាវី ហ៊ីមែន (Avi Hyman)បានប្រាប់ទូរទស្សន៍ Fox News ថាអស់រយៈពេល២២១ថ្ងៃ ប្រទេសរបស់លោកត្រូវបានរងការថ្កោលទោសជាសកល ដោយសារតែចំនួនជនស៊ីវិលស្លាប់ក្លែងក្លាយ និងប្រឌិត ដែលត្រូវបានបង្កើត និងផ្សព្វផ្សាយដោយក្រុមហាម៉ាស។លោកបាននិយាយថា អង្គការសហប្រជាជាតិ បានបោះត្រាលើចំនួនបញ្ចេញដោយក្រុមហាម៉ាសទាំងនេះ ហើយក្លាយជាអ្នកសារព័ត៌មានរបស់ក្រុមហាម៉ាស សម្រាប់ពិភពលោក។ កាលពីថ្ងៃចន្ទដើមសប្ដាហ៍នេះ លោក ហ៊ីមែន បានដកស្រង់សម្តីរបស់លោកនាយករដ្ឋមន្ត្រីអ៊ីស្រាអែល Benjamin Netanyahu ដោយនិយាយនៅក្នុងវីដេអូមួយថា យើងជឿថាយើងបានសម្លាប់ភេរវករជាង១៤.០០០នាក់ ហើយគួរឱ្យស្តាយ ដែលជនស៊ីវិលប្រហែល ១៦.០០០នាក់ នៅខាងក្នុងតំបន់ហ្កាហ្សាស្ទ្រីប បានស្លាប់។ លោកបាននិយាយថា ការខាតបង់ផ្ទាល់ខ្លួនរបស់កងកម្លាំងការពារអ៊ីស្រាអែលនៅក្នុងជម្លោះបានកើនឡើងដល់ ៦២០នាក់៕

សមត្ថកិច្ច ខេត្តព្រះសីហនុ ឃាត់ខ្លួនយុវជន ៧១នាក់ពាក់ព័ន្ធនឹងករណីគ្រឿងញៀន

ព្រះសីហនុ៖ នាយការិយាល័យប្រឆាំងគ្រឿងញៀន នៃបញ្ជាការដ្ឋានកងរាជអាវុធហត្ថខេត្តព្រះសីហនុ បានប្រាប់នៅថ្ងៃទី១៤ឧសភាម្សិលមិញថា កម្លាំងការិយាល័យប្រឆាំងគ្រឿងញៀន បានចុះបង្ក្រាបករណីប្រើប្រាស់ និងជួញដូរគ្រឿងញៀន (មួយភូមិ) ឃាត់ខ្លួនមនុស្ស ៧១នាក់ និងដកហូតវត្ថុតាងមួយចំនួន នៅចំណុចក្រុម១១ ភូមិ៣ សង្កាត់លេខ៣ ក្រុង-ខេត្តព្រះសីហនុ រសៀលថ្ងៃទី១៣ ខែឧសភា ឆ្នាំ២០២៤។ លោកវរសេនីយ៍ត្រី ឡុង គឹមហួរ បន្ដថា បន្ទាប់ពីទទួលបានព័ត៌មានករណីចែកចាយ និងប្រើប្រាស់គ្រឿងញៀននៅក្នុងភូមិខាងលើដូចផ្សារលក់ត្រីរួចមក លោកបានដឹកនាំកម្លាំងចុះបង្ក្រាបករណីជួញដូរ និងប្រើប្រាស់សារធាតុញៀនខុសច្បាប់ ឃាត់ខ្លួនមនុស្សបានចំនួន ៧១នាក់ ដកហូតគ្រឿងញៀន ដូចជាម្សៅក្រាមពណ៌សថ្លាចំនួន ៤៤កញ្ចប់ ទម្ងន់ ៣៤.៣៤ក្រាម ខ្សែជក់ ០៣ ទូរសព្ទ ៣១គ្រឿង ម៉ូតូ ២០គ្រឿង។ បច្ចុប្បន្ន ជនសង្ស័យទាំង ៧១នាក់ និងវត្ថុតាងកំពុងបន្តនីតិវិធីនៅបញ្ជាការដ្ឋានកងរាជអាវុធហត្ថខេត្តព្រះសីហនុ ដើម្បីបញ្ជួនទៅសាលាដំបូងខេត្ដ ចាត់ការតាមផ្លូវច្បាប់។ ក្នុងប្រតិបត្ដិការនេះ កម្លាំងសមត្ថកិច្ចម្នាក់បានរងរបួសស្រាល (របួសដៃ)។

ការការពារដែនអាកាសរបស់អ៊ុយក្រែន បានព្យាយាមបាញ់ទម្លាក់មីស៊ីលរុស្ស៊ីត្រឹមតែ ៣០ភាគរយ កាលពីខែមុន

សារព័ត៌មាន The Wall Street Journal បានរាយការណ៍ថា ការការពារដែនអាកាសរបស់អ៊ុយក្រែន បានបាញ់ទម្លាក់មីស៊ីលរុស្ស៊ីត្រឹមតែ ៣០ភាគរយ កាលពីខែមុន បើធៀបនឹង ៤៦ភាគរយ ក្នុងរយៈពេល ៦ខែចុងក្រោយនេះ ដែលបង្ហាញពីនិន្នាការគួរឲ្យព្រួយបារម្ភសម្រាប់អ៊ុយក្រែន។សារព័ត៌មាន Journal បានបន្តទៀតថា អត្រាជោគជ័យរបស់អ៊ុយក្រែន គឺខ្ពស់រហូតដល់ ៧៣ភាគរយ ក្នុងរយៈពេល ៦ខែមុននោះ។សារព័ត៌មាននេះ បាននិយាយថា ខ្លួនបានទាញយកការវិភាគពីទិន្នន័យប្រចាំថ្ងៃ ដែលចែករំលែកដោយបញ្ជាការកងទ័ពអាកាសអ៊ុយក្រែន។អ៊ុយក្រែន បានព្យាយាមស្ទាក់ចាប់ការវាយប្រហារដោយមីស៊ីល និងយានដ្រូនរបស់រុស្ស៊ី ខណៈដែលខ្លួនមានប្រព័ន្ធការពារអាកាស និងគ្រាប់រំសេវនៅកម្រិតទាបប្រកបដោយគ្រោះថ្នាក់នោះ។យោងតាមទិន្នន័យដែលដកស្រង់ដោយសារព័ត៌មាន Journal អ៊ុយក្រែន បានបាញ់ទម្លាក់មីស៊ីលបាលិ ស្ទិករបស់រុស្ស៊ីត្រឹមតែ ១០ភាគរយ ហើយបានបរាជ័យ ក្នុងការស្ទាក់ចាប់មីស៊ីល S-300 និង S-400 ដែលរុស្ស៊ី បានបាញ់ចូលអ៊ុយក្រែន ក្នុងឆ្នាំនេះ។សារព័ត៌មាននេះ បានរាយការណ៍ដោយដកស្រង់ទិន្នន័យនោះថា ទន្ទឹមនឹងនោះ រុស្ស៊ីបានបង្កើនការវាយប្រហារដោយយានដ្រូន និងមីស៊ីលរបស់ខ្លួនប្រហែល ៤៥ភាគរយ ក្នុងរយៈពេល ៦ខែចុងក្រោយនេះ។

ប្រធានាធិបតីម៉ិកស៊ីក៖ លំហូរជនអន្តោប្រវេសន៍ទៅអាមេរិក ធ្លាក់ចុះ ៥០ ភាគរយ

ប្រធានាធិបតីប្រទេសម៉ិកស៊ិក លោក Andres Manuel Lopez Obrador បាននិយាយកាលពីថ្ងៃចន្ទថា លំហូរជនអន្តោប្រវេសន៍ទៅកាន់សហរដ្ឋអាមេរិក បានធ្លាក់ចុះចំនួន៥០ភាគរយ ក្នុងរយៈពេលប៉ុន្មានខែថ្មីៗនេះ ហើយជាថ្មីម្តងទៀត បានអំពាវនាវឱ្យទីក្រុងវ៉ាស៊ីនតោន ជួយផ្តល់មូលនិធិដល់កម្មវិធីអភិវឌ្ឍន៍ ដែលត្រូវបានរៀបចំដើម្បីទប់ស្កាត់ការធ្វើអន្តោប្រវេសន៍។នៅក្នុងសន្និសីទសារព័ត៌មានប្រចាំថ្ងៃ លោក Lopez Obrador បាននិយាយថា តួលេខថ្មីៗ បង្ហាញពីការធ្លាក់ចុះនៃលំហូរជនអន្តោប្រវេសន៍ បន្ទាប់ពី វិបត្តិការធ្វើអន្តោប្រវេសន៍ កាលពីខែធ្នូ ដែលបានមើលឃើញជនអន្តោប្រវេសនន៍រាប់ម៉ឺននាក់ ឆ្លងកាត់ប្រទេសម៉ិកស៊ិក ដើម្បីបានទៅដល់ព្រំដែនសហរដ្ឋអាមេរិក។ លោក បាននិយាយទៅកាន់អ្នកសារព័ត៌មាន នៅវិមានជាតិក្នុងទីក្រុង Mexico City ថា យើងមានវិបត្តិនៅព្រំដែនភាគខាងជើងកាលពីខែធ្នូ ដែលមានជនអន្តោប្រវេសន៍ ១២.០០០នាក់ ក្នុងមួយថ្ងៃ ហើយយើងមានកិច្ចខិតខំប្រឹងប្រែងរួមគ្នា និងបានកាត់បន្ថយជាមធ្យម រហូតធ្លាក់ចុះមកនៅត្រឹម តែ៦.០០០នាក់។លោកប្រធានាធិបតី បាននិយាយថា រដ្ឋបាលរបស់លោក បន្ត ដាក់សម្ពាធ សម្រាប់ជំនួយអភិវឌ្ឍន៍ដែលត្រូវការពីសហរដ្ឋអាមេរិក ដើម្បីដោះស្រាយការធ្វើអន្តោប្រវេសន៍ដ៏ច្រើននៅក្នុងឫសគល់ ដោយការវិនិយោគនៅក្នុងបណ្តាប្រទេសនៅអាមេរិកកណ្តាល ដើម្បីបង្កើតការងារ និងលើកកម្ពស់ជីវភាពរស់នៅ។ លោកនិយាយថា «នោះជាអ្វីដែលយើងកំពុងធ្វើ នោះគឺជាសំណើដើមរបស់យើង ដែលបានដោះស្រាយពីមូលហេតុ»។ប្រធានាធិបតីម៉ិកស៊ិក បានជំរុញដដែលៗឲ្យសមភាគីសហរដ្ឋអាមេរិករបស់លោក គឺលោក Joe Biden ឱ្យលៃលកធនធានដើម្បីកាត់បន្ថយការធ្វើអន្តោប្រវេសន៍ តាមរយៈការអភិវឌ្ឍន៍។

បណ្ដាញសង្គម

ព័ត៌មានថ្មីៗ

មនុស្សរាប់ពាន់នាក់ប្រមូលផ្តុំគ្នានៅយេម៉ែន ខណៈក្រុមហ៊ូទី បង្ហាញការគាំទ្រចំពោះលីបង់ ក្រោយបទឈប់បាញ់

ក្រុមហ៊ុនដឹកជញ្ជូន ស្វែងរកការបញ្ជាក់ច្បាស់ មុនពេលឆ្លងកាត់ច្រកសមុទ្រ Hormuz

UN ព្រមានថា ស៊ូដង់ខាងត្បូងប្រឈមនឹងហានិភ័យនៃ «ទុរ្ភិក្សទ្រង់ទ្រាយធំ» ខណៈការប្រយុទ្ធគ្នាកាន់តែខ្លាំង

ពិភពលោក ប្រតិកម្មចំពោះការបើកឡើងវិញច្រកសមុទ្រ Hormuz ក្នុងពេលមានជម្លោះរវាងអាមេរិក និងអ៊ីរ៉ង់

ថ្ងៃទី៥នៃ «នគរសង្រ្កាន្ត» ពលរដ្ឋ យុវជន បន្តមកដើរលេងកម្សាន្ត និងកោតសរសើរពីការតាំងពិព័រណ៍ ក្នុងភូមិវប្បធម៌ ពិសេសការរៀបចំផ្សេងៗនៅភ្នំពេញ

ថ្លៃលក់រាយប្រេងសាំង និងម៉ាស៊ូត បន្តធ្លាក់ចុះ ខណៈរដ្ឋបន្តទម្លាក់ពន្ធដល់សូន្យ% ដើម្បីជួយពលរដ្ឋ

អ្នកនាំពាក្យ៖ ការប្រារព្ធពិធីចូលឆ្នាំថ្មីមិនត្រឹមតែជាការថែរក្សាទំនៀមទម្លាប់ប្រពៃណី និងវប្បធម៌ពីដូនតាប៉ុណ្ណោះទេ ប៉ុន្ដែបានរួមចំណែកដល់ចរន្តសេដ្ឋកិច្ចជាតិថែមទៀត

បីថ្ងៃពិធីបុណ្យចូលឆ្នាំមានពលរដ្ឋ និងទេសចរអន្តរជាតិដើរលេងកម្សាន្តជាង ២១ លាននាក់ មានន័យថា ពលរដ្ឋម្នាក់អាចដើរលេងលើសពីមួយដង

ប្រជាពលរដ្ឋជាង ១សែននាក់ធ្វើដំណើរតាមរថយន្តក្រុងដោយ ឥតគិតថ្លៃដើម្បីទៅលេងស្រុកកំណើត

ករណី Online Scam សាលាដំបូងរាជធានីភ្នំពេញសម្រេចឃុំខ្លួនជនជាតិចិន និង ជប៉ុន៨នាក់ នៅពន្ធនាគារ PJ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877