BTV NEWS

ស្នងការរាជធានី បញ្ជារឲ្យរឹតបន្តឹងកាន់តែខ្លាំង លើម៉ូតូកៃច្នៃបំពង់ស៊ីម៉ាំងបង្កសម្លេងរំខានដល់ពលរដ្ឋ តាមទីសាធារណៈ

ចាប់ខ្លួនជនសង្ស័យ៥នាក់ពាក់ពន្ធ័ករណីចាប់ ឃុំឃាំង និងបង្ខាំងមនុស្សដោយខុសច្បាប់

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

សន្តិសុខ និង សង្គម

មនុស្ស៦៣នាក់ ត្រូវបានចាប់ខ្លួននៅហ្ស៊កហ្ស៊ី អំឡុងការតវ៉ាប្រឆាំងសំណើច្បាប់ភ្នាក់ងារបរទេស

ក្រសួងមហាផ្ទៃរបស់ប្រទេសហ្ស៊កហ្ស៊ីបាននិយាយកាលពីថ្ងៃពុធទី១ឧសភាសប្ដាហ៍នេះ ថាមនុស្សជាង៦០នាក់ ត្រូវបានចាប់ខ្លួនដោយអាជ្ញាធរ អំឡុងការប្រមូលផ្តុំមួយកាលពីយប់ថ្ងៃអង្គារនៅក្នុងរដ្ឋធានី ប៊ីលីស៊ី (Tbilisi) ប្រឆាំងនឹងសេចក្ដីស្នើច្បាប់ស្ដីពី ភ្នាក់ងារបរទេស ដ៏ចម្រូងចម្រាស។ សភាហ្ស៊កហ្ស៊ី កាលពីថ្ងៃពុធទី១ឧសភា បានអនុម័ត អំណានទី២នៃសេចក្ដីស្នើច្បាប់ស្ដីពីភ្នាក់ងារបរទេស ដែលត្រូវបានរិះគន់ថាជាគំនិតរបស់រុស្ស៊ី ខណៈនគរបាលបាញ់ឧស្ម័នបង្ហៀរទឹកភ្នែក និងគ្រាប់បែកផ្សែងដើម្បីបោសសម្អាតក្រុមបាតុករប្រឆាំងសំណើច្បាប់នេះ។ ដោយនិយាយថា ក្រុមអ្នកតវ៉ាបានចាប់ផ្តើមប្រមូលផ្តុំនៅមុខសភាហ្ស៊កហ្ស៊ីនៅម៉ោង ៦ ល្ងាចថ្ងៃពុធ ម៉ោងក្នុងស្រុក សេចក្តីថ្លែងការណ៍របស់ក្រសួងខាងលើបាននិយាយថា ក្រុមអ្នកតវ៉ា បានចាប់ផ្តើមបិទផ្លូវចូល និងចេញក្រៅអគារសភា បន្ទាប់ពីម៉ោងប្រហែល ៩ យប់ម៉ោងក្នុងស្រុក ។ទោះបីជាមានការអំពាវនាវជាច្រើនដងដោយកងកម្លាំងនគរបាល ក៏ដូចជាសេចក្តីថ្លែងការណ៍ដែលចេញផ្សាយដោយក្រសួងមហាផ្ទៃ មិនឱ្យបិទអគាររដ្ឋបាល និងបន្តការតវ៉ាក្នុងក្របខ័ណ្ឌដែលបានកំណត់ដោយច្បាប់ក៏ដោយ ក៏ក្រុមបាតុករទាំងនោះ ពុំបានគោរពតាមការណែនាំរបស់មន្ត្រីអនុវត្តច្បាប់ និងបន្តបិទច្រកចេញចូលដដែល។ សេចក្តីថ្លែងការណ៍បានបន្ថែមថា ការប្រឈមដាក់គ្នាបានកើតឡើងរវាងនគរបាល និងក្រុមបាតុករ ដែលបានវាយដំលើមន្ត្រីនគរបាលទាំងផ្លូវកាយ និងការតេះដៀល ព្រមទាំងបានគប់វត្ថុធ្ងន់ៗ ដូចជាដុំថ្ម នឹងដបទឹកទៅលើកងកម្លាំងនគរបាល។ គួរម្លឹកថា ការតវ៉ាទ្រង់ទ្រាយធំបានផ្ទុះឡើងកាលពីខែមុនក្នុងប្រទេសហ្ស៊កហ្ស៊ី បន្ទាប់ពីសភាបានចាប់ផ្តើមពិចារណាឡើងវិញលើសំណើច្បាប់ស្ដីពីភ្នាក់ងារបរទេស ដែលដាក់ចេញដោយគណបក្ស កាន់អំណាច ក្ដីស្រមៃហ្ស៊កហ្ស៊ី (Georgian Dream) ។ សំណើរនេះតម្រូវឱ្យអង្គការ រួមទាំងប្រព័ន្ធផ្សព្វផ្សាយ ដែលទទួលបានច្រើនជាង ២០% នៃមូលនិធិរបស់ពួកគេពីបរទេស ចុះបញ្ជីជាមួយរដ្ឋ ហើយក៏តម្រូវឱ្យពួកគេចេញផ្សាយរបាយការណ៍ហិរញ្ញវត្ថុប្រចាំឆ្នាំផងដែរ៕

ចំនួនអ្នកស្លាប់ដោយទឹកជំនន់នៅកេនយ៉ា កើនឡើងដល់១៨១នាក់

រដ្ឋាភិបាល និងកាកបាទក្រហម បាននិយាយកាលពីថ្ងៃពុធថា ទឹកជំនន់ និងបំណាក់ដី នៅទូទាំងប្រទេសកេនយ៉ា បានបណ្តាលឲ្យមនុស្ស១៨១នាក់ស្លាប់ ចាប់តាំងពីខែមីនា ដោយរាប់សែននាក់ ត្រូវបង្ខំចិត្តចាកចេញពីលំនៅឋានរបស់ពួកគេ ខណៈមនុស្សច្រើននាក់ទៀត បានស្លាប់នៅក្នុងប្រទេសតង់ហ្សានី និងប៊ូរុនឌី ដែលនៅជិតខាង។ភ្លៀងធ្លាក់ខ្លាំង និងទឹកជំនន់ បានបំផ្លាញលំនៅឋានជាច្រើនខ្នង បំផ្លាញផ្លូវថ្នល់ ស្ពាន និងហេដ្ឋារចនាសម្ព័ន្ធផ្សេងៗនៅទូទាំងតំបន់។ចំនួនអ្នកស្លាប់នៅក្នុងប្រទេសកេនយ៉ា បានកើនលើសពីចំនួនអ្នកស្លាប់ដោយទឹកជំនន់ បង្កឡើងដោយបាតុភូតអាកាសធាតុ អែលនីញ៉ូ(El Nino) កាលពីចុងឆ្នាំមុន។នៅទីក្រុង Mai Mahiu ភាគកណ្តាលប្រទេសកេនយ៉ា ជាកន្លែងដែលមនុស្សយ៉ាងហោចណាស់ ៤៨ នាក់បានស្លាប់ ក្នុងទឹកជំនន់ដ៏គំហុកកាលពីថ្ងៃចន្ទ សាកសពពីរនាក់ ត្រូវបានរកឃើញពីកម្ទេចកម្ទីកាលពីថ្ងៃពុធ។ បុគ្គលិកយោធា ដែលអមដោយសត្វសុនខហិតក្លិន បានចូលរួមក្នុងការស្វែងរកនេះ។កាកបាទក្រហមប្រទេសកេនយ៉ា បាននិយាយនៅលើបណ្តាញX ថា នៅទីក្រុង គីតេនជែលឡា(Kitengela) ដែលមានចម្ងាយ៣៣គីឡូម៉ែត្រ ពីទីក្រុង Nairobi បុគ្គលិកកាកបាទក្រហមប្រទេស កេនយ៉ា កំពុងជួយជួយសង្គ្រោះប្រជាជនដែលលំនៅឋានរបស់ពួកគេត្រូវបានជន់លិចដោយទឹកជំនន់។ ពួកគេ ក៏កំពុងព្យាយាមជួយសង្គ្រោះអ្នកទេសចរដែលជាប់ខ្លួននៅក្នុងជំរំ នៅតំបន់ Narok មានចម្ងាយ២១៥គីឡូម៉ែត្រ ពីទីក្រុង Nairobi។ អាជ្ញាធរផ្លូវជាតិរបស់ប្រទេសកេនយ៉ា បាននិយាយថា ពួកគេបានបិទកំណាត់ផ្លូវហាយវ៉េមួយចំនួន ចូលទៅកាន់ទីក្រុង ហើយយ៉ាងហោចណាស់ផ្លូវបីខ្សែផ្សេងទៀតនៅក្នុងប្រទេស អាចនឹងត្រូវទឹកជន់លិច និងមានកម្ទេចកម្ទី។

ជនភៀសខ្លួននៅក្នុងជំរំនិយាយថា ប្រទេសហៃទី ផ្តល់ឲ្យពួកគេតែដំបង និងគ្រាប់កាំភ្លើងប៉ុណ្ណោះ

គ្រួសារជនជាតិហៃទីរាប់សិបនាក់ បានរកឃើញទីជម្រកនៅសាលារៀនក្នុងទីក្រុងព័រអូប្រាំង ដែលបានប្រែក្លាយទៅជាជំរំមួយ ខណៈពួកគេរង់ចាំឲ្យអំពើហិង្សារបស់ក្រុមជនអន្ធពាលថយចុះ។ ក្រុមប្រឹក្សាប្រធានាធិបតីបណ្តោះអាសន្នមួយត្រូវបានតែងតាំងនៅក្នុងប្រទេសហៃទី ជាមួយនឹងបេសកកម្មនាំមកនូវសន្តិភាពដល់ប្រទេស និងដើម្បីអំពាវនាវសម្រាប់ការបោះឆ្នោតមុនឆ្នាំ ២០២៦ នៅពេលដែលអាណត្តិរបស់ក្រុមប្រឹក្សាផុតកំណត់។នៅក្នុងសាលា លីសេ ហ្វីមេម(Lycee Fimem) ជាសាលារៀនមួយនៅជាយរដ្ឋធានី ប្រទេសហៃទី ក្រុមគ្រួសារជាច្រើនបានមកដល់ បន្ទាប់ពីបានភៀសខ្លួនចេញពីអំពើហិង្សារបស់ក្រុមជនអន្ធពាល និងបានបាត់បង់លំនៅឋានរបស់ពួកគេ។ នាង វេនីថា អាន់តញ(Venitha Antoine) បានមកដល់ជាមួយកូនចំនួនប្រាំនាក់ និងស្វាមីរបស់នាង នៅពេលដែលក្រុមជនអន្ធពាលបានដុតលំនៅឋានរបស់ពួកគេ។ លោក អង់សេ ហ្សង់ ប៉ាទ្រីក(Ence Jean Patrique) អាយុ៣១ឆ្នាំ បានមកដល់ទីជម្រកជាមួយគ្រួសាររបស់គាត់ បន្ទាប់ពីត្រូវបាននិរទេសពីសាធារណរដ្ឋដូមីនីក នៅពេលដែលអំពើហិង្សាបានផ្ទុះឡើង។យោងតាមការប៉ាន់ប្រមាណរបស់អង្គការសហប្រជាជាតិ មនុស្សច្រើនជាងម្នាក់ ត្រូវបានសម្លាប់នៅក្នុងអំពើហឹង្សារបស់ក្រុមជនអន្ធពាលនៅប្រទេសហៃទីនៅក្នុងមួយម៉ោង ក្នុងរយៈពេលបីខែដំបូងនៃឆ្នាំនេះ។ ជាមួយគ្នានេះ ក៏មានរបាយការណ៍នៃក្រុមជនអន្ធពាលដែលប្រើអំពើហិង្សាផ្លូវភេទ ការចាប់ជំរិតទាមទារប្រាក់លោះ និងការធ្វើទារុណកម្មដើម្បីជំរិតទារប្រាក់ពីប្រជាជន។ប្រទេសហៃទី បានជួបប្រទះការកើនឡើងអំពើហិង្សារបស់ក្រុមជនអន្ធពាលចាប់តាំងពីខែកុម្ភៈ។ ស្ថានភាពសន្តិសុខបានជម្លៀសមនុស្សរាប់ពាន់នាក់ និងបង្កឱ្យមានភាពអត់ឃ្លានដ៏មហន្តរាយ។កាលពីសប្តាហ៍មុន បន្ទាប់ពីអតីតនាយករដ្ឋមន្ត្រី លោក Ariel Henry បានលាលែងពីតំណែង ក្រុមប្រឹក្សាប្រធានាធិបតីមួយ ត្រូវបានតែងតាំងជាផ្លូវការ ដែលត្រូវបានគេមើលឃើញថាជាជំហានដ៏សំខាន់ក្នុងការបង្កើតសន្តិសុខឡើងវិញ បន្ទាប់ពីអំពើហិង្សាក្រុមជនអន្ធពាលជាច្រើនឆ្នាំ ដែលបានកើនឡើងយ៉ាងខ្លាំងនាពេលថ្មីៗនេះ។

កម្មករអាមេរិកឡាទីន រាប់ម៉ឺននាក់ចេញតវ៉ាទ្រង់ទ្រាយធំនៅថ្ងៃទិវាពលកម្មអន្តរជាតិ

ទិវាពលកម្មអន្តរជាតិនៅអាមេរិកឡាទីន កាលពីថ្ងៃពុធ (០១ ឧសភា) បានមើលឃើញកម្មកររាប់ម៉ឺននាក់ ប្រមូលផ្តុំគ្នានៅក្នុងរដ្ឋធានីធំៗ ដើម្បីបន្តការតស៊ូទាមទារសិទ្ធិការងារ និងការគាំទ្ររបស់ពួកគេ។ នៅរដ្ឋធានី ប៊ុយណូស៊ែរ របស់អាហ្សង់ទីន គេឃើញមនុស្សម្នារាប់ពាន់នាក់ដើរកាន់បដា និងផ្ទាំងអក្សរ ហើយក្រុមបាតុករ និងសហជីពបានស្រែករិះគន់រដ្ឋាភិបាលចំពោះភាពក្រីក្ររបស់កម្មករ ខណៈដែលអតិផរណាជិតឈានដល់កម្រិត ៣០០ ភាគរយ។នៅរដ្ឋធានី បូហ្គោតា របស់កូឡុំប៊ី មនុស្សរាប់ម៉ឺននាក់បានដើរដង្ហែក្បួនគាំទ្រកំណែទម្រង់ដែលស្នើឡើងដោយលោកប្រធានាធិបតី ហ្គាស្តូវ៉ូ ផេត្រូ (Gustavo Petro) ដែលនិយាយថានឹងដោះស្រាយវិសមភាព ប៉ុន្តែពិបាកឈ្នះការអនុម័តពីសភា។បាតុកម្មនេះ គឺជាបាតុកម្មចុងក្រោយបង្អស់នៃការប្រមូលផ្តុំគ្នាប្រឆាំងទៅមកជាបន្តបន្ទាប់ ដែលមួយចំនួនធ្វើឡើងដោយក្រុមប្រឆាំងនឹងកំណែទម្រង់នេះ ដែលពួកគេនិយាយថា នឹងធ្វើឱ្យខូចសេដ្ឋកិច្ច ហើយមួយចំនួនទៀតធ្វើឡើងដោយលោកប្រធានាធិបតី ផេត្រូ ដែលគាំទ្រកំណែទម្រង់។ជាមួយគ្នានេះ នៅក្នុងរដ្ឋធានីប្រទេសប៉េរូ ក្រុមអ្នកតវ៉ាបានរិះគន់ «ការកេងប្រវ័ញ្ច» «អសន្តិសុខការងារ» និង «ភាពមិនផ្លូវការ» នៅក្នុងប្រព័ន្ធការងាររបស់ប្រទេសអាមេរិកឡាទីនមួយនេះ៕

អាវុធហត្ថខណ្ឌ៧មករា ឃាត់ខ្លួនមន្រ្តីយោធាម្នាក់ ក្រោយបាញ់គំរាមចំនួន០៥គ្រាប់ ដោយសារទំនាស់ជាមួយអ្នកជិតខាង

ភ្នំពេញ៖ មន្ត្រីយោធាម្នាក់បាញ់គំរាមប្រជាពលរដ្ឋអ្នកជិតខាងជាមួយគ្នាចំនួន០៥គ្រាប់ ក្រោយមកត្រូវបានកម្លាំងកងរាជអាវុធហត្ថខណ្ឌ៧មករា ឃាត់ខ្លួន និងដកហូតអាវុធខ្លី០១ដើម ម៉ាកCZ P.07 រួចប្រគល់ជូនកម្លាំងកងរាជអាវុធហត្ថខណ្ឌចាត់ការបន្ត។ប្រភពព័ត៌មានបានឲ្យដឹងថា មន្រ្តីយោធាដែលបានបាញ់គំរាមនោះមានឈ្មោះ ផាត ផានណូ ភេទប្រុស អាយុ៣៦ឆ្នាំ ជនជាតិខ្មែរ មុខរបរយោធា ឋានន្តរស័ក្តិ វរសេនីយ៍ត្រី បម្រើការងារនៅនាយកដ្ឋានបញ្ជូនសារក្រសួងការពារជាតិ ស្នាក់នៅផ្ទះលេខ ៣៦៧ DE0 ស្ថិតនៅតាមបណ្ដោយផ្លូវលេខ ២៣៨ ភូមិ០១ សង្កាត់បឹងព្រលឹត។តាមការបំភ្លឺរបស់ ជនបង្កបានឲ្យដឹងថា ឆ្លៀតពេលពីការងារ ខ្លួនបានទៅបម្រើការងារផ្នែកសន្តិសុខនៅកន្លែងកំសាន្តយីហោ នឹកX នៅពេលយប់ អស់រយៈពេលប្រហែល០២ខែមកហើយ លុះដល់ថ្ងៃកើតហេតុ វេលាម៉ោង០៣ និង៤០នាទីនាទីទៀបភ្លឺ ពេលចេញពីធ្វើការជិះម៉ូតូដល់មុខផ្ទះ ស្រាប់តែឃើញក្រុមក្មេងស្ទាវ០៤នាក់ រត់ចេញពីផ្លូវច្រកតូច សំដៅមករកខ្លួនមិនដឹងជាមានបំណងអ្វី ខ្លួនក៏ដកអាវុធខ្លីពីចង្កេះបាញ់ឡើងលើចំនួន០៥គ្រាប់ មិនបណ្តាលឲ្យមានរបួសអ្នកណាម្នាក់ឡើយ ពេលនោះក្រុមក្មេងបានរត់បាត់អស់ រួចចាក់សោរទ្វាចូលផ្ទះសំរាក។យោងតាមប្រភពពីកន្លែងកើតហេតុបានឲ្យដឹងថា មុនពេលកើតហេតុ គេបានលឺសម្លេងផ្ទុះចំនួន៥គ្រាប់ ចេញពីម្តុំផ្លូវលេខ២៣២ ដោយប្រជាពលរដ្ឋដែលរស់នៅក្បែរនោះមិនហ៊ានចុះពីលើផ្ទះទៅមើលនោះទេ ទើបគេនាំគ្នាទាក់ទងទៅកាន់សមត្ថកិច្ចមូលដ្ឋាន។ ភ្លាមៗនោះសម្ថកិច្ចមូលដ្ឋាន និងអាវុធហត្ថខណ្ឌ បានចុះទៅដល់ទីតាំងកើតហេតុ និងបានធ្វើការត្រួតពិនិត្យទីតាំងដែលប្រជាពលរដ្ឋរាយការណ៍ ក៏ប្រទះឃើញសំបកគ្រាប់ចំនួន០៥គ្រាប់ ប្រភេទអាវុធខ្លីម៉ាកCZ P07 ដែលគ្រាប់ទាំងនេះស្ថិតនៅចន្លោះផ្លូវ ក្បែរសំយ៉ាបផ្ទះ។ក្រោយកើតហេតុ សមត្ថកិច្ចបានយកសំបកគ្រាប់នោះទៅរក្សាទុកជាបណ្តោះអាសន្ន ដើម្បីរង់ចាំធ្វើបើកការស្រាវជ្រាវរកជនបង្ក និងក្រោយមកក៏បាននាំខ្លួនជនបង្កអនុវត្តតាមនីតិវិធីច្បាប់៕ អត្ថបទ៖ កុម្ភៈ

ចំនួនអ្នកស្លាប់ដោយសារការបាក់ផ្លូវនៅប្រទេសចិនភាគខាងត្បូង កើនឡើងដល់៣៦នាក់

ទីភ្នាក់ងារព័ត៌មានរដ្ឋ ស៊ីនហួ (Xinhua) បាននិយាយថា គិតត្រឹមម៉ោង ៥ និង៣០នាទីព្រឹក ថ្ងៃទី២ ឧសភា មនុស្ស ៣៦ នាក់បានស្លាប់ និង ៣០ នាក់បានរងរបួស ដោយបន្ថែមថា របួសពុំបានគំរាមកំហែងដល់អាយុជីវិតទេ។ទីភ្នាក់ងារសារព័ត៌មានរដ្ឋដដែលនេះបាននិយាយថា ផ្លូវមួយខ្សែលាតសន្ធឹងរវាងទីក្រុង មីចូវ (Meizhou) និងស្រុក តាពូ (Dabu) ក្នុងខេត្ត ខ្វាងទុង (Guangdong) បានបាក់នៅម៉ោងប្រហែល ២និង១០នាទីព្រឹកថ្ងៃពុធទី១ឧសភា សប្ដាហ៍នេះ ។ ឧបទ្ទវហេតុនេះបានបណ្តាលឱ្យរថយន្តជាង ២០ គ្រឿងបានជាប់ក្នុងបំណាក់ផ្លូវ រួមទាំងមនុស្សសរុបចំនួន៥៤ នាក់។ ប្រព័ន្ធផ្សព្វផ្សាយរដ្ឋបាននិយាយថា ការបាក់ផ្លូវនេះគឺជា គ្រោះមហន្តរាយភូគព្ភសាស្ត្រធម្មជាតិ ដែលបណ្តាលមកពីភ្លៀងធ្លាក់ខ្លាំងជាបន្តបន្ទាប់។ខេត្តខ្វាងទុង ជារោងចក្រថាមពលឧស្សាហកម្មដែលមានប្រជាជនរស់នៅយ៉ាងច្រើន បានរងការវាយប្រហារដោយព្យុះភ្លៀងក្នុងប៉ុន្មានសប្តាហ៍ថ្មីៗនេះ បណ្តាលឱ្យមានទឹកជំនន់ និងបំណាក់ដីធ្ងន់ធ្ងរនៅក្នុងតំបន់មួយចំនួន។មានភ្លៀងធ្លាក់ខ្លាំងហួសពីការរំពឹងទុកជាធម្មតានៃឆ្នាំនេះ ហើយក៏ដោយសារតែសន្ទុះយ៉ាងលឿននៃបម្រែបម្រួលអាកាសធាតុដែរ ៕

អ៊ីស្រាអែល អនុញ្ញាតឱ្យរថយន្តដឹកជំនួយពីច្រកឆ្លងកាត់ Erez ដែលបើកឡើងវិញ ចូលតំបន់ហ្កាហ្សា

ប្រទេសអ៊ីស្រាអែល បានបើកច្រកឆ្លងកាត់ដែលមានតែមួយគត់នៅផ្នែកភាគខាងជើងតំបន់ហ្កាហ្សា កាលពីថ្ងៃពុធ ដោយអនុញ្ញាតឱ្យរថយន្តដឹកជំនួយឆ្លងកាត់ច្រក Erez បន្ទាប់ពីការទាមទាររបស់សហរដ្ឋអាមេរិក ឱ្យធ្វើការបន្ថែមទៀតដើម្បីដោះស្រាយវិបត្តិមនុស្សធម៌ដែលកំពុងកើនឡើង។ការបើកច្រកឆ្លងកាត់ Erez ឡើងវិញ គឺជាការអង្វរសុំរបស់របស់ទីភ្នាក់ងារផ្តល់ជំនួយអន្តរជាតិ រយៈពេលជាច្រើនខែមកហើយដើម្បីកាត់បន្ថយភាពអត់ឃ្លានដែលត្រូវបានគេជឿថាធ្ងន់ធ្ងរបំផុត ក្នុងចំណោមជនស៊ីវិលរាប់សែននាក់ នៅតំបន់ភាគខាងជើងតំបន់នោះ។រដ្ឋាភិបាលអ៊ីស្រាអែល បានបើកច្រកឆ្លងកាត់នៅថ្ងៃនៃដំណើរទស្សនកិច្ចរបស់រដ្ឋមន្ត្រីការបរទេសសហរដ្ឋអាមេរិក លោក Antony Blinken ដែលបានជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu និងបានអំពាវនាវឱ្យមានការផ្តល់ជំនួយមនុស្សធម៌បន្ថែមទៀត ចូលទៅក្នុងដែនដីនេះ។ ច្រកផ្លូវកាត់ Erez ត្រូវបានប្រើជាចម្បងសម្រាប់ចរាចរណ៍ផ្លូវគោក នៅតែបិទចាប់តាំងពីច្រកនេះត្រូវបានបំផ្លាញអំឡុងការវាយប្រហាររបស់ពួកហាម៉ាស កាលពីថ្ងៃទី៧ ខែតុលា ដែលបណ្តាលឱ្យមានសង្គ្រាម។ទីភ្នាក់ងារផ្តល់ជំនួយនិយាយថា ពួកគេបានប្រឈមមុខទៅនឹងការលំបាកក្នុងការចូលទៅដល់តំបន់នេះជាមួយនឹងអាហារ និងថ្នាំពេទ្យ ដែលត្រូវដឹកជញ្ជូនពីផ្នែកផ្សេងទៀតនៃតំបន់ហ្កាហ្សា ឆ្លងកាត់តំបន់សង្រ្គាម។អ៊ីស្រាអែល បានប្រកាសថា ខ្លួននឹងបើកច្រកឆ្លងកាត់ Erez ឡើងវិញ កាលពីខែមុន ប៉ុន្មានថ្ងៃបន្ទាប់ពីកងកម្លាំងរបស់ខ្លួនបានសម្លាប់ក្រុមបុគ្គលិកមនុស្សធម៌ ដែលផ្តល់ជំនួយស្បៀងអាហារនៅតំបន់ហ្កាហ្សា ក្នុងការវាយប្រហារតាមអាកាសដែលនាំឲ្យមានការថ្កោលទោសពីអន្តរជាតិ។ អ៊ីស្រាអែល បានសុំអភ័យទោស ចំពោះការវាយប្រហារតាមអាកាសទាំងនោះ។ ទីក្រុងវ៉ាស៊ីនតោន ដែលជាសម្ព័ន្ធមិត្តជិតស្និទ្ធបំផុតរបស់អ៊ីស្រាអែល បាននិយាយថា ការគាំទ្របន្ថែមទៀតសម្រាប់សង្គ្រាមនឹងពឹងផ្អែកលើការធ្វើឲ្យប្រសើរលទ្ធភាពទទួលបានជំនួយ។

ក្រុមហាម៉ាស គំរាមបញ្ឈប់ការចរចាបទឈប់បាញ់ហ្កាហ្សា បើអ៊ីស្រាអែល វាយប្រហារក្រុងរ៉ាហ្វា

ចលនាអ៊ីស្លាមប៉ាឡេស្ទីន ឬហៅថាក្រុមហាម៉ាស កាលពីថ្ងៃពុធ (០១ ឧសភា) បានព្រមានថា ការចរចាបទឈប់បាញ់ជាមួយអ៊ីស្រាអែលនឹងត្រូវផ្អាក ប្រសិនបើអ៊ីស្រាអែល វាយប្រហារថ្មើជើងលើទីក្រុង រ៉ាហ្វា (Rafah) នៅភាគខាងត្បូងតំបន់ហ្កាហ្សាស្រ្ទីប (Gaza Strip)។លោក អូសាម៉ា ហាមដាន (Osama Hamdan) មន្ត្រីជាន់ខ្ពស់របស់ក្រុមហាម៉ាស បាននិយាយនៅក្នុងបទសម្ភាសន៍ជាមួយទូរទស្សន៍ អាល់ម៉ាណា (al-Manar) ដែលមានមូលដ្ឋាននៅប្រទេសលីបង់ ថា ក្រុមហាម៉ាស នឹងបញ្ឈប់រាល់ការចរចាដោយប្រយោលជាមួយអ៊ីស្រាអែល ប្រសិនបើខ្លួនបើកប្រតិបត្តិការយោធាជើងគោកប្រឆាំងនឹងក្រុងរ៉ាហ្វា។ដោយចោទអ៊ីស្រាអែល ថាកំពុង «គំរាមគ្រប់ភាគីដោយប្រើការវាយប្រហាររបស់ខ្លួនលើក្រុង រ៉ាហ្វា» មន្ត្រីហាម៉ាសរូបនេះបានសង្កត់ធ្ងន់ថា «ចលនាតស៊ូនៅតែមានអំណាចដើម្បីការពារប្រជាជនហ្កាហ្សា»។ មេដឹកនាំក្រុមហាម៉ាស និងកងពលតូច អាល់កាសាម (Al-Qassam) ដែលជាស្លាបយោធារបស់ក្រុមហាម៉ាស បានរក្សាទំនាក់ទំនងជាមួយក្រុមនយោបាយរបស់ខ្លួន ហើយបន្តពង្រឹងជំហរនៅខ្សែប្រយុទ្ធ។ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា អ៊ីស្រាអែលនឹងវាយចូលទៅក្នុងទីក្រុង រ៉ាហ្វា និងលុបបំបាត់កងវរសេនាតូចហាម៉ាស នៅទីនោះ ទោះជា «មាន ឬមិនមាន» កិច្ចព្រមព្រៀងជាមួយក្រុមហាម៉ាសក៏ដោយ៕

សិស្សសាលានៅឥណ្ឌា រីករាយនឹងការលេងទឹកក្នុងថ្នាក់រៀន ដើម្បីទប់ទល់នឹងរលកកម្ដៅ

មានស្នាមញញឹម និងការសើចសប្បាយពេញបន្ទប់រៀននៃសាលាបឋមសិក្សារដ្ឋមួយនៅរដ្ឋ ឧតាប្រទេស (Uttar Pradesh) ភាគខាងជើងប្រទេសឥណ្ឌា នៅពេលសិស្សបានលោតចូលទៅក្នុងអាងទឹកបណ្តោះអាសន្នមួយ ដែលរៀបចំដោយគ្រូរបស់ពួកគេ ដើម្បីទប់ទល់នឹងរលកកម្ដៅក្ដៅខ្លាំងនៅសប្ដាហ៍នេះ។ គ្រូបង្រៀននៃសាលាបឋមសិក្សាគំរូនៅភូមិ មេសោណាពួរ (Mehsaunapur) ក្នុងស្រុក កាននួច (Kannuaj) បាននិយាយថា ពួកគេព្រួយបារម្ភពីចំនួនអ្នកចូលរៀនទាបនៅក្នុងសាលា ដោយសារតែការកើនឡើងនៃសីតុណ្ហភាពនៅក្នុងតំបន់ ដូច្នេះហើយទើបនឹងឃើញគំនិតនេះឡើង។សិស្សានុស្សមានការរំភើបចិត្តយ៉ាងខ្លាំងដែលបានចូលលេងទឹកក្នុងអាង ហើយបាននិយាយថា ពួកគេរីករាយនឹងបទពិសោធនេះ។សាលារៀនមួយនេះបានមើលឃើញវត្តមានសិស្សកើនឡើងចាប់តាំងពីមានសកម្មភាពនេះ ហើយ និយាយថា ពួកគេបានស្នើឱ្យអាជ្ញាធរធ្វើអាងហែលទឹកអចិន្ត្រៃយ៍សម្រាប់សិស្ស។ការិយាល័យអាកាសធាតុ របស់ប្រទេសឥណ្ឌា បានព្យាករណ៍សីតុណ្ហភាពពី៣៩ អង្សាសេទៅ ៤៣អង្សាសេ សម្រាប់សប្តាហ៍ខាងមុខនេះ ដែលបង្ហាញពីស្ថានភាពរលកកម្ដៅខ្លាំងនៅក្នុងតំបន់នេះ ខណៈ មានមនុស្ស២នាក់ បានស្លាប់ដោយសារជំងឺសុរិយរោគ ឬកម្ដៅក្ដៅខ្លាំងពេក ៕

អំពើហិង្សាផ្ទុះឡើងក្នុងការតវ៉ាគាំទ្រប៉ាឡេស្ទីន នៅតាមសាកលវិទ្យានានាទូទាំងសហរដ្ឋអាមេរិក

ក្រុមបាតុករបានប៉ះទង្គិចគ្នាជាមួយកងកម្លាំងនគរបាលកាលពីថ្ងៃពុធទី១ឧសភា សប្ដាហ៍នេះ នៅឯសាកលវិទ្យាល័យកាលីហ្វ័រនីញ៉ា ក្នុងទីក្រុង Los Angeles (UCLA) ដោយមានការវាយតប់ រុញច្រានគ្នា ទាត់ធាក់ និងប្រើដំបងវាយគ្នាទៅវិញទៅមក។ ប៉ុន្មានម៉ោងកន្លងទៅនេះ កងកម្លាំងនគរបាលបានឆ្មក់ចូលក្នុងអគារមួយនៅសាកលវិទ្យាល័យ Columbia ក្រោយក្រុមបាតុករគាំទ្រប៉ាឡេស្ទីនបានចូលកាន់កាប់ ដើម្បីបំបែកបាតុកម្មដែលបានធ្វើឱ្យមានភាពចលាចលនៅតាមសាកលវិទ្យាល័យនានាទូទាំងសហរដ្ឋអាមេរិក ខណៈមានការបំផុសគំនិតឲ្យបន្តការតវ៉ាលុះត្រាការទាមទារបានសម្រេច។ យោងតាមសារព័ត៌មាន Arizona Daily Star ជាមួយគ្នានោះ នគរបាល និងក្រុមបាតុករបានប៉ះទង្គិចគ្នានៅបរិវេណសាកលវិទ្យាល័យ អារីហ្សូណាស៍ ធូសុន (Arizona's Tucson)។ បន្ទាប់ពីមានការប៉ះទង្គិចគ្នាពីរ-បី ម៉ោង រវាងបាតុករគាំទ្រប៉ាឡេស្ទីន និងក្រុមគាំទ្រអ៊ីស្រាអែលនៅ សាកលវិទ្យាល័យ UCLA កងកម្លាំងនគរបាលពាក់មួកសុវត្ថិភាព និងប្រដាប់ដោយខែលការពារ បានបង្កើតជាជួរ ហើយបំបែកក្រុមអ្នកមតវ៉ាបន្តិចម្តងៗ និងឈានដល់ការបញ្ឈប់អំពើហិង្សា។ការបោះជំរំតង់តវ៉ា អំពាវនាវឱ្យសាកលវិទ្យាល័យនានាឈប់ធ្វើអាជីវកម្មជាមួយអ៊ីស្រាអែល ឬក្រុមហ៊ុនដែលគាំទ្រសង្រ្គាមនៅដែនដីហ្កាហ្សា បានរីករាលដាលពាសពេញសហរដ្ឋអាមេរិក នៅក្នុងចលនានិស្សិតដ៏ចលាចល មិនធ្លាប់បានឃើញនៅក្នុងសតវត្សទី ២១ ដែលចាប់ពីរដ្ឋញូវយ៉ក ដល់រដ្ឋតិចសាស់និងកាលីហ្វ័រនីញ៉ា។ ការបង្រ្កាបជាបន្តបន្ទាប់ពីសំណាក់កងកម្លាំងនគរបាលនៅតាមបរិវេណសាកលវិទ្យាល័យមួយចំនួន បានធ្វើឱ្យមានការរំជើបរំជួលកើតចេញពីចលនាតវ៉ារបស់និស្សិតដែលមានទំហំធំជាងអំឡុងសម័យសង្គ្រាមវៀតណាមទៅទៀត។ មានការប្រឈមដាក់នឹងការអនុវត្តច្បាប់ពោពេញដោយហឹង្សា និងមានការចាប់ខ្លួនមនុស្សជាង១ ពាន់នាក់ អំឡុងការបង្ក្រាបនោះ។ ក្នុងករណីដ៏កម្រ មន្ត្រីសាកលវិទ្យាល័យ និងអ្នកដឹកនាំការតវ៉ាបានចុះកិច្ចព្រមព្រៀងដើម្បីរឹតបន្តឹងការរំខានដល់ជីវិតក្នុងសាកលវិទ្យាល័យ និងការប្រារព្ធពិធីនានា ដែលនឹងចាប់ផ្តើមនាពេលខាងមុខ៕

បណ្ដាញសង្គម

ព័ត៌មានថ្មីៗ

កម្ពុជាកំពុងបន្តស្រាវជ្រាវ និងសើបអង្កេតលើភ័ស្តុតាងទាំងឡាយ ដែលរឹបអូសបាន ដើម្បីកំណត់មុខសញ្ញាមេខ្លោង និងវែកមុខអង្គការចាត់តាំងពាក់ព័ន្ធនឹងឧក្រិដ្ឋកម្មឆបោកតាមបច្ចេកវិទ្យា

មន្ទីរ សុរិយោដី រាជធានី និងអាជ្ញាធរ ចុះបិទផ្សាយឯកសារក្បាលដី ត្រៀមចេញ ប្លង់ជូនពលរដ្ឋ៤ភូមិ នៅខណ្ឌ ដង្កោ

កម្ពុជា-វៀតណាមនឹងរៀបចំពិព័រណ៍អន្តរជាតិ លើកទី២ ដើម្បីជំរុញទីផ្សារពាណិជ្ជកម្ម និងកសិកម្មនៅកម្ពុជា

អ៊ុយក្រែន ព្រមានបេឡារុស ប្រឆាំងនឹងការបង្កហេតុ អំឡុងសមយុទ្ធយោធាជាមួយរុស្ស៊ី នៅខែកញ្ញា

ឥណ្ឌា កំពុងប្រឹងប្រែងចរចាពាណិជ្ជកម្មជាមួយសហរដ្ឋអាមេរិក ខណៈពន្ធថ្មីខិតជិតមកដល់

ព័រទុយហ្គាល់ កំពុងស៊ូទ្រាំនឹងរលកកម្ដៅដ៏កំណាច ដែលឆក់យកជីវិតមនុស្សជាង ១ពាន់នាក់ នៅឆ្នាំ២០២៥នេះ

ការិយាល័យថវិកាសភាអាមេរិក៖ ពន្ធរបស់លោក Trump អាចបន្ថយឱនភាពបាន ៤សែនកោដិដុល្លារ

ទីភ្នាក់ងារសិទ្ធិមនុស្ស UN៖ ការស្លាប់ដោយសារភាពអត់ឃ្លាននៅហ្កាហ្សា អាចជាឧក្រិដ្ឋកម្មសង្គ្រាម

UN៖ កងកម្លាំងប្រដាប់អាវុធ RSF របស់ស៊ូដង់ សម្លាប់ជនស៊ីវិលជិត ៩០នាក់ ក្នុងការវាយប្រហារ ១០ថ្ងៃ

ភ្នំភ្លើងនៅរដ្ឋហាវ៉ៃ របស់អាមេរិក ផ្ទុះឡើងជាលើកទី៣១ ដោយព្រួសកម្អែភ្នំភ្លើងរាប់សិបម៉ែត្រឡើងលើមេឃ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877