BTV NEWS

អាវុធហត្ថរាជធានីឃាត់ខ្លួនក្មេងទំនើង ០៥នាក់ ពាក់ព័ន្ធករណីហិង្សា កាប់ វាយ និងគប់ ប្លន់ម៉ូតូ

បង្ក្រាបករណីចាប់ឃុំឃាំង និងបង្ខាំងមនុស្សដោយខុសច្បាប់ ជំរិតទារប្រាក់១០ម៉ឺនដុល្លារ ឃាត់ខ្លួនជនសង្ស័យ០៤នាក់

ស្លាប់១៨នាក់ ក្នុងករណីគ្រោះថ្នាក់ចរាចរណ៍៦ថ្ងៃ,ពីថ្ងៃទី២០ដល់២៥សីហានេះ

ឃាត់ខ្លួនជនបរទេសចំនួន៥នាក់ក្នុងប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យានៅឃុំសំរោង ស្រុកចន្ទ្រា ខេត្តស្វាយរៀង

សន្តិសុខ និង សង្គម

អ៊ីរ៉ង់ចោទប្រកាន់អ្នកសារព័ត៌មាន និងកាសែតពីបទរិះគន់ការវាយប្រហារលើអ៊ីស្រាអែល

អ៊ីរ៉ង់បានចោទប្រកាន់អ្នកកាសែតជាច្រើននាក់ និងសារព័ត៌មានមួយចំនួន បន្ទាប់ពីពួកគេ បានរិះគន់ការវាយប្រហារកាលពីថ្ងៃសៅរ៍លើអ៊ីស្រាអែល។ការិយាល័យរដ្ឋអាជ្ញារបស់ទីក្រុងតេអេរ៉ង់ បាននិយាយថា ខ្លួនបានចេញការចោទប្រកាន់ប្រឆាំងនឹងសារព័ត៌មានគាំទ្រកំណែទម្រង់ Etemad និងអ្នកកាសែតរបស់ខ្លួនលោក Abbas Abdi សារព័ត៌មានហិរញ្ញវត្ថុ Jahan Sanat អ្នកកាសែតលោក Yashar Soltani និងផលិតករភាពយន្តដ៏ល្បីល្បាញ លោក Hossein Dehbashi។ពួកគេទាំងអស់ បានរិះគន់ការវាយប្រហាររបស់អ៊ីរ៉ង់ប្រឆាំងនឹងអ៊ីស្រាអែល ជាការឆ្លើយតបទៅនឹងការវាយប្រហារតាមផ្លូវអាកាសចុងក្រោយលើស្ថានកុងស៊ុលអ៊ីរ៉ង់នៅទីក្រុងដាម៉ាស កាលពីថ្ងៃទី១ ខែមេសា។អ៊ីរ៉ង់ បានបាញ់បង្ហោះយានដ្រូនប្រហែល៣០០គ្រឿង និងមីស៊ីលជាច្រើនគ្រាប់ កាលពីល្ងាចថ្ងៃសៅរ៍ ដែលស្ទើរតែទាំងអស់ ត្រូវបានបាញ់ទម្លាក់ដោយសហរដ្ឋអាមេរិក ចក្រភពអង់គ្លេស និងអ៊ីស្រាអែល។នៅក្នុងអត្ថបទមួយដែលបានចេញផ្សាយនៅក្នុងសារព័ត៌មាន Etemad កាលពីថ្ងៃអាទិត្យ លោក Abdi បានសរសេរថា៖«ផ្ទុយទៅនឹងជំនឿដ៏ពេញនិយម ខ្ញុំជឿថា ការវាយប្រហាររបស់អ៊ីស្រាអែល គឺជាប្រតិកម្មជាមូលដ្ឋាន ហើយមិនត្រូវការការឆ្លើយតបពីអ៊ីរ៉ង់ទេ»។

កងកម្លាំងសន្តិសុខឥណ្ឌា សម្លាប់ក្រុមឧទ្ទាមម៉ៅនិយម២៩នាក់ ក្នុងការប្រយុទ្ធគ្នាដោយកាំភ្លើង

នគរបាលបាននិយាយថា កងកម្លាំងសន្តិសុខប្រទេសឥណ្ឌា បានសម្លាប់ក្រុមឧទ្ទាមម៉ៅនិយមយ៉ាងហោចណាស់ ២៩ នាក់ នៅក្នុងការប្រយុទ្ធគ្នាដោយកាំភ្លើងនៅ រដ្ឋ ឆាតទីសហ្គា(Chhattisgarh) ភាគកណ្តាល កាលពីថ្ងៃអង្គារ ប៉ុន្មានថ្ងៃនៅមុនពេលចាប់ផ្តើមការបោះឆ្នោត ដែលនាយករដ្ឋមន្រ្តី លោក Narendra Modi កំពុងស្វែងរកអាណត្តិទីបីជាប់ៗគ្នា។ ស្រុក Kanker ជាកន្លែងដែលការប៉ះទង្គិចបានកើតឡើងនឹងបោះឆ្នោតនៅក្នុងដំណាក់កាលទីពីរក្នុងចំណោមដំណាក់កាលចំនួនប្រាំពីរនៅក្នុងការបោះឆ្នោតនៅថ្ងៃទី ២៦ ខែមេសា ខណៈស្រុកជិតខាង Bastar គឺជាតំបន់លាក់ខ្លួនរបស់ក្រុមឧទ្ទាមម៉ៅនិយម នឹងបោះឆ្នោតដំណាក់កាលទីមួយនៅថ្ងៃសុក្រ។មន្ត្រីនគរបាលបាននិយាយថា ពួកគេបានទទួលព័ត៌មានអំពីវត្តមានរបស់ក្រុមឧទ្ទាមម៉ៅនិយមនៅក្នុងតំបន់នេះកាលពីថ្ងៃអង្គារ ហើយបានបើកការវាយឆ្មក់ដែលនាំទៅដល់ការប្រយុទ្ធគ្នាដោយកាំភ្លើង បណ្តាលឱ្យសមាជិកនៃកងកម្លាំងសន្តិសុខបីនាក់រងរបួស។លោក ភី ស៊ុនដារ៉ាច(P Sundarraj) អធិការស្រុក Bastar បាននិយាយថា បន្ទាប់ពីការប្រយុទ្ធគ្នា ក្នុងអំឡុងពេលស្វែងរកនៅតំបន់នោះថា សាកសពក្រុមឧទ្ទាមម៉ៅនិយម ២៩ នាក់ត្រូវបានគេរកឃើញ។ក្រុមឧទ្ទាមម៉ៅនិយមនិយាយថា ពួកគេកំពុងប្រយុទ្ធដើម្បីផ្តល់ឱ្យកសិករឥណ្ឌាក្រីក្រ និងកម្មករគ្មានដីធ្លី នូវការគ្រប់គ្រងបន្ថែមទៀតលើដីធ្លី និងការទាមទារកាន់តែច្រើនតំបន់រុករករ៉ែរបស់ខ្លួន ដែលកំពុងកេងប្រវ័ញ្ចដោយក្រុមហ៊ុនរុករករ៉ែធំៗ នាពេលបច្ចុប្បន្ន។

ការវាយប្រហាររបស់អ៊ីស្រាអែលនៅលីបង់ បានសម្លាប់មនុស្សបីនាក់រួមទាំងមេបញ្ជាការក្រុមហេសបូឡា

ប្រភពព័ត៌មានពីសន្តិសុខប្រទេសលីបង់បាននិយាយថា ការវាយប្រហាររបស់អ៊ីស្រាអែល នៅភាគខាងត្បូងប្រទេសលីបង់ កាលពីថ្ងៃអង្គារ បានសម្លាប់មនុស្ស៣នាក់ រួមទាំងមេបញ្ជាការតំបន់ របស់ក្រុមហេសបូឡា ជាការកើនឡើងអំពើហិង្សាបន្ទាប់ពីមានភាពស្ងប់ស្ងាត់យ៉ាងហោចណាស់មួយសប្តាហ៍ ក្នុងរយៈពេលជាងកន្លះឆ្នាំ នៃអរិភាព។យោធាអ៊ីស្រាអែល និយាយថា លោក អ៊ីម៉េល បាស(Ismail Baz) ត្រូវបានសម្លាប់នៅក្នុងការវាយប្រហារលើរថយន្តនៅជិតទីក្រុង អេន អ៊ីប៊ែល(Ain Ebel) ភាគខាងត្បូង គឺជាមេបញ្ជាការតំបន់ឆ្នេររបស់ក្រុមហេសបូឡា ហើយបានចូលរួមក្នុងការរៀបចំផែនការវាយប្រហារដោយគ្រាប់រ៉ុក្កែត និងមីស៊ីលប្រឆាំងរថក្រោះលើអ៊ីស្រាអែល។ក្រុមហេសបូឡា បានចេញសេចក្តីថ្លែងការណ៍កាន់ទុក្ខចំពោះការស្លាប់របស់លោក Baz ប៉ុន្តែពុំបានបញ្ជាក់លម្អិតអំពីតួនាទីរបស់លោកនៅក្នុងអង្គភាពនោះទេ។ ប្រភពព័ត៌មានពីសន្តិសុខ និងមន្ត្រីការពារស៊ីវិលម្នាក់បាននិយាយថា ការវាយប្រហារដាច់ដោយឡែកមួយរបស់អ៊ីស្រាអែលទៅលើរថយន្តពីរគ្រឿងនៅជិតទីក្រុង ឆេហាប៊ីយ៉េ(Chehabiyeh) ភាគខាងត្បូង បានសម្លាប់សមាជិកក្រុម ហេសបូឡា យ៉ាងហោចណាស់ពីរនាក់។ក្រុមហេសបូឡា និងអ៊ីស្រាអែល បានបាញ់តគ្នា ស្របពេលជាមួយសង្រ្គាមនៅតំបន់ហ្កាហ្សាក្នុងអរិភាពដ៏ធ្ងន់ធ្ងរបំផុត ចាប់តាំងពីពួកគេបានប្រយុទ្ធគ្នាក្នុងសង្គ្រាមដ៏ធំក្នុងឆ្នាំ២០០៦។ការប្រយុទ្ធគ្នានេះបានឆក់យកជីវិតមនុស្សយ៉ាងហោចណាស់ ៣៧០នាក់នៅប្រទេសលីបង់ រួមទាំងអ្នកប្រយុទ្ធក្រុមហេសបូឡាជាង២៤០នាក់ និងជនស៊ីវិល៦៨នាក់។

នគរបាលបង្ក្រាបកុបកម្មហ្ស៊កហ្ស៊ីបោសសម្អាតក្រុមបាតុករ ខណៈសភាបានជជែកដេញដោលលើច្បាប់ភ្នាក់ងារបរទេស

នគរបាលបង្ក្រាបកុប្បកម្មក្នុងប្រទេសហ្ស៊កហ្ស៊ី បានចាប់ផ្តើមបោសសម្អាតកក្រុមបាតុករជុំវិញសភាសាងសង់ដោយអតីតរដ្ឋសូវៀតកាលពីថ្ងៃអង្គារ ១៦ មេសា ស្របពេលសមាជិកសភា បានជជែកដេញដោលច្បាប់ស្តីពី "ភ្នាក់ងារបរទេស" ដែលបក្សប្រឆាំង រិះគន់ថាជា ទង្វើរផ្តាច់ការ។សំណើច្បាប់នេះនឹងតម្រូវឱ្យអង្គការដែលទទួលបានច្រើនជាង២០% នៃមូលនិធិរបស់ពួកគេពីបរទេស ត្រូវចុះឈ្មោះជាភ្នាក់ងារនៃឥទ្ធិពលបរទេស។ សំណើច្បាប់នេះ ទំនងជាត្រូវឆ្លងកាត់សភាគ្រប់គ្រងដោយគណបក្សកាន់អំណាចក្ដីស្រមៃ ហ្ស៊កហ្ស៊ី (Georgian Dream) និងសម្ព័ន្ធមិត្តរបស់ខ្លួន។ក្រុមប្រឆាំងនិយាយថាច្បាប់នេះ នឹងធ្វើឱ្យប៉ះពាល់ដល់ការព្យាយាមរបស់ប្រទេសហ្ស៊កហ្ស៊ី ចូលរួមជាមួយសហភាពអឺរ៉ុប។ក្រុមបាតុករជាង៥.០០០នាក់ បានប្រមូលផ្តុំគ្នាជិតរដ្ឋសភាសម្រាប់ថ្ងៃទី ២ ដើម្បីតវ៉ាបង្ហាញការមិនពេញចិត្តចំពោះសេចក្តីព្រាងច្បាប់នេះ ដែលត្រូវបានអនុម័តដោយគណៈកម្មាធិការសភាកាលពីថ្ងៃចន្ទ ទី១៥មេសា ។មន្ត្រីដែលមួយចំនួនកំពុងកាន់កាំភ្លើងខ្លី បានបញ្ជាឲ្យបាតុករបំបែកជួរ ហើយបានដាក់ពង្រាយអ្វីដែលទំនងជាសារធាតុគ្រប់គ្រងហ្វូងមនុស្សដូចជាម្ស៉ៅម្រេចជាដើម។សេចក្តីស្នើច្បាប់នេះត្រូវតែឆ្លងកាត់អំណានចំនួនបីលើកនៅក្នុងសភា បន្ទាប់មកទំនងជានឹងត្រូវប្រឈមនឹងការបោះឆ្នោតជាលើកទីបួនដើម្បីលុបចោលការវេតូដោយលោកស្រីប្រធានាធិបតី សាឡូម៉េ ហ្ស៊ូរ៉ាប៊ីឈ្វីលី (Salome Zourabichvili) ដែលជាអ្នករិះគន់គណបក្សក្ដីស្រមៃហ្ស៊កហ្ស៊ី ដែលប្រឆាំងនឹងសេចក្ដីស្នើច្បាប់នេះ។ បណ្តាប្រទេសលោកខាងលិច រួមទាំងសហរដ្ឋអាមេរិក អង់គ្លេស និងអាល្លឺម៉ង់ បានជំរុញប្រទេសហ្ស៊កហ្ស៊ី កុំឱ្យអនុម័តសំណើច្បាប់នេះ៕

រលកកម្ដៅបានសម្លាប់ព្រះសង្ឃមួយអង្គ និងបុរសម្នាក់នៅមីយ៉ាន់យ៉ា

ប្រភពបានឱ្យដឹងថា កម្ដៅដ៏ខ្លាំងក្លាបានសម្លាប់ព្រះសង្ឃមួយអង្គនៅភូមិ អូកកាឡាប៉ា ខាងត្បូង (South Oakkalapa) ហើយមនុស្សម្នាក់ទៀតបានស្លាប់ភ្លាមៗនៅភូមិ អ៊ីនសេន (Insein) នៅក្នុងទីក្រុងយ៉ានហ្គន (Yangon) សហភាពមីយ៉ាន់ម៉ា។ ហេតុការណ៍នេះបានកើតឡើងនៅពេលដែលព្រះសង្ឃមួយអង្គ បានដួលបោកព្រះកេសពេលកំពុងនិមន្តតាមផ្លូវ ហើយសុង្គត់ភ្លាមៗនៅនឹងកន្លែងនៅម៉ោងប្រហែល ២ រសៀល កាលពីទី៩ ខែមេសា ហើយព្រះសពត្រូវបានបញ្ជូនទៅមន្ទីពេទ្យអូកកាឡាខាងជើង នេះបើយោងតាមសមាគមជំនួយសង្គម មេត្តាធា យាយស៊ិន (Metta Theta Yay Sin)។មន្ត្រីម្នាក់របស់អង្គការជំនួយសង្គមនោះបាននិយាយថា៖ «គេមិនទាន់ដឹងថាព្រះសង្ឃអង្គនោះអាពាធ ឬយ៉ាងណាទេ គឺយើងកំពុងរង់ចាំការបញ្ជាក់ពីខាងមន្ទីរពេទ្យ។ ព្រះសង្ឈនោះបានដួលសន្លប់ពេលកំពុងនិមន្តតាមផ្លូវ ហើយក៏សុង្គត់ទៅ»។បន្ថែមពីលើនេះ ប្រជាពលរដ្ឋនៅជុំវិញតំបន់នោះបានជូនដំណឹងដល់សមាគមន៍ជួយសង្គម ធ្វេឡេក (Twe Lek) ថា បុរសម្នាក់បានដួលបោកក្បាលស្លាប់នៅចំណុចផ្លូវស៊ីតាធុកា (Sita Thukha) ភូមិ អ៊ីនសេន ហើយសមាគមបានចុះទៅជួយ។ បុរសវ័យ ៤៥ ឆ្នាំនោះ បានស្លាប់ដោយពុំមានរបួសខាងក្រៅ នៅវេលាម៉ោង ៤:៤០ នាទីរសៀល កាលពីថ្ងៃទី៩ ខែមេសា ដដែលនោះ ហើយត្រូវគេជឿថាបានស្លាប់ដោយសារជំងឺដាច់សរសៃឈាមក្នុងខួរក្បាល ដោយសារសីតុណ្ហភាពកើនឡើងខ្ពស់ខ្លាំងពេក៕

អាជ្ញាធរប្រទេសប្រេស៊ីល រកឃើញសាកសពជនអន្តោប្រវេសន៍អាហ្វ្រិកនៅលើទូក

នគរបាលប្រទេសប្រេស៊ីល បាននិយាយកាលពីថ្ងៃអង្គារថា សាកសពមនុស្សចំនួន៩នាក់ ដែលត្រូវបានរកឃើញនៅលើទូកមួយគ្រឿងនៅឆ្នេរសមុទ្ររដ្ឋប៉ារ៉ា(Para) គឺជាពលរដ្ឋម៉ូរីតានី និងម៉ាលី។ នគរបាល និងក្រុមអ្នកពន្លត់អគ្គិភ័យរបស់ប្រទេសប្រេស៊ីល បានធ្វើការរុះរើទូកដែលដឹកសាកសពស្អុយរលួយនៅជិត ឆ្នេរសមុទ្រប្រាហ្កានកា(Braganca) រដ្ឋ Para ភាគខាងជើង។ទូកមួយគ្រឿងនេះ ត្រូវបានរកឃើញដោយអ្នកនេសាទនៅក្នុងតំបន់ដែលគេស្គាល់ថា បារ៉ា ដូ ហ្កាទីពូរូ(Barra do Quatipuru)។ នគរបាលសហព័ន្ធ បាននិយាយថា អ្នកដំណើរច្រើននាក់អាចស្លាប់ដោយសារតែកង្វះអាហារ និងទឹក ខណៈទូកនេះបានចាកចេញពីប្រទេសម៉ូរីតានី ក្រោយថ្ងៃទី ១៧ ខែមករា ហើយនៅចំណុចខ្លះទូកបានរសាត់អណ្តែតនៅលើសមុទ្រ។ ការស៊ើបអង្កេតនឹងបន្តដើម្បីបញ្ជាក់ពីអ្វីដែលបានកើតឡើងជាមួយទូកមួយគ្រឿងនេះ។

តំបន់មជ្ឈិមបូព៌ាប្រឈមការរីកសាយនៃសង្រ្គាម ខណៈអ៊ីស្រាអែល ប្ដេជ្ញាសងសឹកការវាយប្រហារពីអ៊ីរ៉ង់

អ៊ីស្រាអែល និងអ៊ីរ៉ង់បាន គំរាមកំហែងដាក់គ្នាទៅវិញទៅមក បន្ទាប់ពីការវាយប្រហារដោយផ្ទាល់ជាលើកដំបូងរបស់ក្រុងតេអេរ៉ង់ទៅលើសត្រូវរបស់ខ្លួន បានបង្កើនភាពតានតឹងយ៉ាងខ្លាំងនៅមជ្ឈិមបូព៌ា ខណៈសង្រ្គាមនៅតំបន់ហ្កាហ្សាមនៅតែបន្តដោយពុំទាន់មានបទឈប់បាញ់នៅឡើយ។ប្រមុខកងទ័ពអ៊ីស្រាអែល កាលពីថ្ងៃចន្ទ បានប្តេជ្ញាឆ្លើយតបវិញ បន្ទាប់ពីអ៊ីរ៉ង់ និងសម្ព័ន្ធមិត្តរបស់ខ្លួន បានបាញ់ស្រោចមីស៊ីល និងយានដ្រូន រួមទាំង រ៉ូកែតជាង ៣០០ ទៅកាន់ប្រទេសអ៊ីស្រាអែល កាលពីចុងសប្តាហ៍មុន ស្របពេលអ៊ីរ៉ង់និយាយថាជាការសឹងសឹកទៅនឹងការវាយប្រហារលើស្ថានកុងស៊ុលរបស់ខ្លួននៅប្រទេសស៊ីរី សម្លាប់មនុស្ស៧នាក់ រួមទាំងឧត្ដមសេនីយ៍អ៊ីរ៉ង់២នាក់ផងដែរ។ ទោះជាយ៉ាងណាក៏ដោយ ប្រធានាធិបតីអ៊ីរ៉ង់ លោក អ៊ីប្រាហ៊ីម រ៉េស៊ី (Ebrahim Raisi) ក៏បានព្រមានផងដែរថា ទោះបីជាសកម្មភាពនោះមានទំហំតិចតួចបំផុត ឲ្យតែជាការប្រឆាំងនឹងផលប្រយោជន៍របស់អ៊ីរ៉ង់ អ្នកនឹងត្រូវទទួលបានការឆ្លើយតបយ៉ាងធ្ងន់ធ្ងរ ធំធេង និងឈឺចាប់ ។ ក្រុមមេដឹកនាំពិភពលោក បានជំរុញឱ្យមានការអត់ធ្មត់ ចាប់តាំងពីការវាយប្រហាររបស់អ៊ីរ៉ង់លើ អ៊ីស្រាអែល ដែលបានបង្កឱ្យមានភាពច្របូកច្របល់នៃវិបត្តិការទូត និងបានធ្វើឱ្យតម្លៃប្រេងឡើងខ្ពស់ ខណៈទីផ្សារភាគហ៊ុនដាំក្បាលចុះ។អ៊ីស្រាអែលកំពុងថ្លឹងថ្លែងជម្រើសរបស់ខ្លួន បន្ទាប់ពីការវាយប្រហារដោយយានដ្រូន និងមីស៊ីលរបស់អ៊ីរ៉ង់ បណ្តាលឱ្យមានការខូចខាតតិចតួច ខណៈប្រព័ន្ធការពារដែនអាកាសរបស់អ៊ីស្រាអែលបានស្ទាក់ចាប់គ្រាប់មីស៊ីលភាគច្រើន ដោយមានជំនួយពីកងកម្លាំងសហរដ្ឋអាមេរិក អង់គ្លេស និងបារាំង និងសម្ព័ន្ធមិត្តក្នុងតំបន់។ក្រុមប្រដាប់អាវុធគាំទ្រដោយអ៊ីរ៉ង់នៅទូទាំងតំបន់មជ្ឈិមបូព៌ាបានបើកការវាយប្រហារជាបន្តបន្ទាប់អំឡុងសង្គ្រាមរយៈពេល៦ខែមកនេះ។ក្រុមឧទ្ទាមហេសបូឡា (Hezbollah) របស់ប្រទេសលីបង់ បានបើកការបាញ់ប្រហារឆ្លងព្រំដែនដ៏ខ្លាំងក្លាជាមួយអ៊ីស្រាអែល ក្រុមឧទ្ទាមហ៊ួទី គាំទ្រដោយអ៊ីរ៉ង់នៅប្រទេសយេម៉ែន បានដាក់គោលដៅលើការដឹកជញ្ជូនទំនិញនៅសមុទ្រក្រហម ហើយក្រុមប្រដាប់អាវុធនៅក្នុងប្រទេសអ៊ីរ៉ាក់ និងស៊ីរីបានបាញ់ផ្លោងទៅលើមូលដ្ឋានទ័ពអាមេរិក៕

គណៈកម្មាធិការ UN មិនអាចយល់ព្រមលើសំណើសមាជិកភាពពេញសិទ្ធិរបស់ប៉ាឡេស្ទីនបានទេ

គណៈកម្មាធិការក្រុមប្រឹក្សាសន្តិសុខអង្គការសហប្រជាជាតិ ដែលកំពុងពិចារណាលើពាក្យស្នើសុំរបស់អាជ្ញាធរប៉ាឡេស្ទីន ដើម្បីក្លាយជាសមាជិកពេញសិទ្ធិរបស់អង្គការសហប្រជាជាតិ «មិនអាចធ្វើអនុសាសន៍ជាឯកច្ឆ័ន្ទបានទេ» ទៅលើថា តើប៉ាឡេស្ទីនបំពេញតាមលក្ខណៈវិនិច្ឆ័យ ឬយ៉ាងណា នេះបើយោងតាមរបាយការណ៍របស់គណៈកម្មាធិការដែលមើលឃើញដោយសារព័ត៌មានរ៉យទ័រ កាលពីថ្ងៃអង្គារ (១៦ មេសា)។ក្រុមអ្នកការទូតបាននិយាយថា អាជ្ញាធរប៉ាឡេស្ទីននៅតែត្រូវបានគេរំពឹងថានឹងជំរុញក្រុមប្រឹក្សាសន្តិសុខដែលមានសមាជិក ១៥ រូបឱ្យបោះឆ្នោតឆាប់បំផុតនៅសប្តាហ៍នេះ លើពង្រាងសេចក្តីសម្រេចដែលបានផ្តល់អនុសាសន៍ឱ្យខ្លួនក្លាយជាសមាជិកពេញលេញ។សមាជិកភាពពេញសិទ្ធិបែបនេះ នឹងធ្វើឱ្យមានការទទួលស្គាល់រដ្ឋប៉ាឡេស្ទីនប្រកបដោយប្រសិទ្ធភាព។ ប៉ាឡេស្ទីនបច្ចុប្បន្នជារដ្ឋអ្នកសង្កេតការណ៍មិនមែនជាសមាជិក ដែលជាការទទួលស្គាល់ជាក់ស្ដែងនៃឋានៈរដ្ឋ ដែលត្រូវបានផ្តល់ដោយមហាសន្និបាតអង្គការសហប្រជាជាតិសមាជិក ១៩៣ ប្រទេសក្នុងឆ្នាំ២០១២។ប៉ុន្តែពាក្យស្នើសុំចូលជាសមាជិកពេញសិទ្ធិរបស់អង្គការសហប្រជាជាតិ ត្រូវតែអនុម័តដោយក្រុមប្រឹក្សាសន្តិសុខ ដែលសម្ព័ន្ធមិត្តរបស់អ៊ីស្រាអែលគឺសហរដ្ឋអាមេរិកអាចរារាំងបាន ហើយបន្ទាប់មកត្រូវមានការគាំទ្រយ៉ាងតិចពីរភាគបីនៃមហាសន្និបាត។ សហរដ្ឋអាមេរិកបាននិយាយកាលពីដើមខែនេះថា ការបង្កើតរដ្ឋប៉ាឡេស្ទីនឯករាជ្យមួយគួរតែកើតឡើងតាមរយៈការចរចាដោយផ្ទាល់រវាងភាគីនានា និងមិនមែននៅអង្គការសហប្រជាជាតិនោះទេ៕

ការិយាល័យសិទ្ធិមនុស្ស UN៖ អ៊ីស្រាអែល នៅតែរឹតបន្តឹងដោយខុសច្បាប់លើជំនួយហ្កាហ្សា

ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយកាលពីថ្ងៃអង្គារ (១៦ មេសា) ថា អ៊ីស្រាអែលនៅតែដាក់កំហិត «ដោយខុសច្បាប់» លើការផ្តល់ជំនួយមនុស្សធម៌សម្រាប់តំបន់ហ្កាហ្សា បើទោះបីជាមានការអះអាងពីអ៊ីស្រាអែល និងប្រទេសដទៃទៀតថា ឧបសគ្គរារាំងជំនួយបានធូរស្រាលច្រើនក៏ដោយ។ការវាយលុករបស់អ៊ីស្រាអែល នៅតំបន់ហ្កាហ្សាស្ទ្រីប ដែលបង្កឡើងដោយការវាយប្រហារឆ្លងព្រំដែនដ៏បង្ហូរឈាមរបស់ក្រុមហាម៉ាស កាលពីថ្ងៃទី០៧ ខែតុលា បានប្រែក្លាយតំបន់ហ្កាហ្សាភាគច្រើនទៅជាវាលរហោស្ថាន ដោយមនុស្សរាប់សែននាក់ឥឡូវនេះបានភៀសខ្លួន និងប្រមូលផ្ដុំគ្នាកកកុញទៅកាន់ទីជម្រកផ្សេងៗដែលពោរពេញដោយជំងឺ។លោកស្រី រ៉ាវីណា សាមដាសានី (Ravina Shamdasani) អ្នកនាំពាក្យការិយាល័យសិទ្ធិមនុស្សនៃអង្គការសហប្រជាជាតិ បាននិយាយនៅក្នុងសន្និសីទសារព័ត៌មាននៅទីក្រុងហ្សឺណែវថា «អ៊ីស្រាអែល បន្តរឹតបន្តឹងដោយខុសច្បាប់លើការចូល និងការចែកចាយជំនួយមនុស្សធម៌ និងដើម្បីអនុវត្តការបំផ្លិចបំផ្លាញយ៉ាងទូលំទូលាយនៃហេដ្ឋារចនាសម្ព័ន្ធស៊ីវិល»។បរិមាណជំនួយដែលចូលទៅក្នុងតំបន់ហ្កាហ្សាបច្ចុប្បន្ននេះកំពុងមានជម្លោះ ដោយអ៊ីស្រាអែល និងទីក្រុងវ៉ាស៊ីនតោន បាននិយាយថាលំហូរជំនួយបានកើនឡើងខ្លាំងក្នុងរយៈពេលប៉ុន្មានថ្ងៃថ្មីៗនេះ ប៉ុន្តែទីភ្នាក់ងារអង្គការសហប្រជាជាតិនិយាយថា ជំនួយនៅតែទាបជាងកម្រិតអប្បបរមាដែលត្រូវការ៕

ក្រុមឧទ្ទាមមីយ៉ាន់ បានវាយបកទៅលើកងទ័ពរដ្ឋាភិបាលយោធា ដើម្បីដណ្តើមយកទីប្រជុំជនព្រំដែនមកវិញ

ក្រុមតស៊ូប្រឆាំងនឹងការគ្រប់គ្រងយោធារបស់មីយ៉ាន់ម៉ា បាននិយាយកាលពីថ្ងៃអាទិត្យថា ក្រុមយុទ្ធជនរបស់ខ្លួន បានវាយបកទៅលើការប៉ុនប៉ងរបស់កងទ័ពរបបយោធា ដើម្បីរុលចូលទៅកាន់ទីប្រជុំជន Myawaddy ដ៏សំខាន់នៅតាមបណ្តោយព្រំដែនថៃដែលត្រូវបានកាន់កាប់ដោយក្រុមឧទ្ទាមកាលពីសប្តាហ៍មុន។អ្នកនាំពាក្យរបស់សម្ព័ន្ធជាតិការ៉ែន(KNU) លោក Saw Taw Nee បាននិយាយនៅក្នុងបទសម្ភាសន៍មួយថា ការពង្រឹងកងកម្លាំងយោធា បានព្យាយាមវាយលុកលើទីប្រជុំជន Myawaddy អស់ជាច្រើនថ្ងៃ ប៉ុន្តែត្រូវបានវាយបកមកវិញ នៅក្នុងការប្រយុទ្ធគ្នា ដែលមានចម្ងាយប្រហែល ៤០គីឡូម៉ែត្រ។លោកបានប្រាប់សារព័ត៌មានរ៉យទ័រថា៖«វាមិនងាយស្រួលទេក្នុងការមកទីនេះ។ ពួកគេប្រឈមមុខនឹងការលំបាកជាច្រើន» ដោយនិយាយថា កងកម្លាំងរបស់ KNU បាននឹងកំពុង «រារាំង និងស្ទាក់ចាប់»កងទ័ពរបស់របបយោធា។ព័ត៌មានរបស់ KNU មិនអាចបញ្ជាក់ដោយឯករាជ្យបានទេ។ អ្នកនាំពាក្យរបបយោធាដែលបានដណ្តើមអំណាចពីរដ្ឋាភិបាលជាប់ឆ្នោតនៅឆ្នាំ ២០២១ មិនបានឆ្លើយតបនឹងទូរស័ព្ទពីសារព័ត៌មានរ៉យទ័រទេ។ទីប្រជុំជនព្រំដែន Myawaddy ជាប់នឹងប្រទេសថៃ ត្រូវបានវាយដណ្តើមពីការគ្រប់គ្រងដោយយោធា ដោយកងកម្លាំងប្រឆាំងរដ្ឋាភិបាលចម្រុះ ដែលដឹកនាំដោយ KNU កាលពីថ្ងៃព្រហស្បតិ៍។

បណ្ដាញសង្គម

ព័ត៌មានថ្មីៗ

ក្រសួងទេសចរណ៍កម្ពុជា និងខេត្តយូណានចុះអនុស្សរណៈចំនួន ៥ លើកិច្ចសហប្រតិបត្តិការវិស័យទេសចរណ៍ជាមួយគ្នា

ក្រសួងការពារជាតិកម្ពុជាសម្តែងការសោកស្តាយចំពោះឧបទ្ទវហេតុផ្ទុះគ្រាប់មីនបណ្តាលឱ្យកងទ័ពថៃរងរបួស ខណៈកម្ពុជាមិនបានប្រើប្រាស់ និងមិនបានដាក់គ្រាប់មីនថ្មីឡើយ

គ្រោះថ្នាក់រថយន្តក្រុងដឹកអ្នកដំណើរ នៅអាហ្វហ្គានីស្ថាន បណ្ដាលឲ្យមនុស្ស ២៥នាក់ស្លាប់

រដ្ឋមន្រ្តីសុខាភិបាល «អាកាសយានដ្ឋានអន្តរជាតិតេជោ ក្លាយជាច្រកព្រំដែនអាកាសរបស់ជាតិ យ៉ាងទូលំទូលាយជាមួយពិភពលោក ខណៈសុខាភិបាលផ្តោតការយកចិត្តទុកដាក់ខ្ពស់ លើសុវត្ថិភាពផ្នែកសុខភាព សម្រាប់ផ្តល់ជូនអ្នកដំណើរគ្រប់ៗគ្នា»

ឯកឧត្តមគង់ សុភី លើកឡើងថា សិក្ខាសាលាស្តីពីឌីជីថលូបនីយកម្មក្នុងរដ្ឋបាលសាធារណៈ នៅខេត្តសៀមរាបសម្រេចបានសមិទ្ធផលធំៗចំនួន ៥

គណៈរដ្ឋមន្ត្រីអាល្លឺម៉ង់ អនុម័តសេចក្ដីស្នើច្បាប់ចូលបម្រើយោធាដោយស្ម័គ្រចិត្ត

IAEA វិលទៅកាន់អ៊ីរ៉ង់វិញ តែមិនទាន់មានកិច្ចព្រមព្រៀង ស្តីពីការត្រួតពិនិត្យ

សម្តេច ប៉ាប ឡេអូ អំពាវនាវឲ្យមានបទឈប់បាញ់ និងការដោះលែងចំណាប់ថ្នូរ នៅក្នុងជម្លោះអ៊ីស្រាអែល-ហាម៉ាស

ចិន និងអារ៉ាប៊ីសាអ៊ូឌីត បើកកិច្ចពិភាក្សាពាណិជ្ជកម្ម និងវិនិយោគ នៅទីក្រុងប៉េកាំង

កូរ៉េខាងត្បូងនឹងហាមមិនឲ្យប្រើទូរសព្ទដៃ ក្នុងថ្នាក់រៀន ចាប់ពីខែមីនាឆ្នាំក្រោយ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877