នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រសួងទេសចរណ៍ និង ដៃគូឯកជន ​សហការ​រៀប​ចំ​ផែន​ការ​យុទ្ធសាស្ត្រ​ទីផ្សារ​ថ្មី​ដើម្បី​ទាក់​ទាញ​ទេសចរ​អន្តរជាតិ
ក្នុងត្រីមាសទី១ ឆ្នាំនេះ កម្ពុជាទទួលបានភ្ញៀវអន្តរជាតិជាង ១លាននាក់ ក្នុងនោះ ភ្ញៀវចិន​ឈរ​នៅ​លំដាប់ទី១
គ្រូជំនាញ កំពុងផ្ទេរចំណេះដឹងផ្នែកចម្លាក់ពុម្ពទៅកាន់ពលរដ្ឋនៅក្រុងរុនតាឯកតេជោសែន ក្នុងគម្រោងបណ្តុះបណ្តាលជំនាញមរតកដូនតា
វត្ថុបុរាណខ្មែរ១២២រូប ដាក់​​តាំងពិព័រណ៍​មិនអចិន្ត្រៃយ៍ នៅក្នុងសារមន្ទីរ Meet You Museum ក្រុងប៉េកាំង

វប្បធម៌ និងទេសចរណ៍

សមាគមមិត្តភាពកម្ពុជា-ចិន រួមគ្នារៀបចំព្រឹត្តិការណ៍ជិះកង់ទេសចរណ៍ក្នុងតំបន់អង្គរ ដើម្បីរឹតចំណងមិត្តភាព និងជំរុញវិស័យទេសចរណ៍

2026/03/29 12:56:43 pm        233
Facebook Telegram Linkin
នៅព្រឹកថ្ងៃទី២៨ ខែមីនា ឆ្នាំ២០២៦ លោក លី សារី អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប បានចូលរួមក្នុងព្រឹត្តិការណ៍ជិះកង់ទេសចរណ៍ក្នុងតំបន់រមណីយដ្ឋានអង្គរ រៀបចំដោយសមាគមមិត្តភាពកម្ពុជា-ចិន និងមូលនិធិចិន Peaceland ក្នុងគោលបំណងលើកកម្ពស់ទំនាក់ទំនងមិត្តភាពប្រជាជន និងប្រជាជន កម្ពុជា-ចិន ព្រមទាំងជំរុញការអភិវឌ្ឍវិស័យទេសចរណ៍ និងជំរុញកំណើនសេដ្ឋកិច្ច និងវប្បធម៌ តាមរយៈសកម្មភាពកីឡាទេសចរណ៍ដែលមិត្តភាពចំពោះបរិស្ថាន តាមរយៈសង្គមស៊ីវិលរបស់ចិនចំនួន ៨ស្ថាប័នដែលមកចូលរួម។លោក លី សារី អភិបាលរងខេត្ត បានលើកឡើងថា ព្រឹត្តិការណ៍នេះនឹងជួយជំរុញការចូលរួមសកម្មភាពកីឡា និងសុខភាពសាធារណៈ ដែលមានសារៈសំខាន់សម្រាប់ជីវភាពរស់នៅប្រកបដោយគុណភាព និងរួមគ្នាថែរក្សាបរិស្ថាន និងផ្តល់គុណតម្លៃដល់វិស័យទេសចរណ៍ធម្មជាតិនិងវប្បធម៌។ ព្រឹត្តិការណ៍ជិះកង់ទេសចរណ៍កម្ពុជា-ចិន នាថ្ងៃនេះ មិនត្រឹមតែបានចូលរួមផ្សព្វផ្សាយទាក់ទាញភ្ញៀវទេសចរឱ្យមកទស្សនាប្រទេសកម្ពុជា និងលើកកម្ពស់សុខភាពតាមរយៈការជិះកង់ប៉ុណ្ណោះនោះទេ ព្រឹត្តិការណ៍នេះ ក៏ជាការរឹតចំណងមិត្តភាពរវាងប្រទេសទាំងពីរឱ្យកាន់តែជិតស្និទ្ធ ស្របតាមយុទ្ធសាស្រ្តគ្រប់ជ្រុងជ្រោយរវាងកម្ពុជា-ចិន ដែលកំពុងឈានទៅដល់កម្រិតកំពូល ដែលថ្នាក់ដឹកនាំរបស់ប្រទេសយើងទាំងពីរបានកំណត់ជា «ឆ្នាំទេសចរណ៍កម្ពុជា-ចិន កាលពីឆ្នាំ២០២៥ កន្លងផុតទៅ» ដែលជាសក្ខីភាពដ៏អស្ចារ្យសម្រាប់ការពង្រឹងកិច្ចសហប្រតិបត្តិការទ្វេភាគី និងការផ្លាស់ប្តូររវាងប្រជាជន និងប្រជាជន។ ព្រឹត្តិការណ៍នាពេលនេះ មិនត្រឹមតែមានតួនាទីសំខាន់លើការលើកកម្ពស់ការយល់ដឹងអំពីការអភិរក្សបេតិកភណ្ឌ និងការពារបរិស្ថានប៉ុណ្ណោះទេ ថែមទាំងជាការចូលរួមនៅក្នុងយុទ្ធនាការដោយលើកទឹកចិត្តឱ្យភ្ញៀវជនជាតិចិនកាន់តែច្រើនមកទស្សនាកម្ពុជា និងរួមគ្នាផ្សព្វផ្សាយពីតំបន់ ទេសចរណ៍កម្ពុជាឱ្យក្លាយជាគោលដៅទេសចរណ៍ដ៏សំខាន់សម្រាប់ជនជាតិចិនឆ្លើយតបនឹងឆ្នាំទេសចរណ៍កម្ពុជា-ចិនថែមទៀត៕ 

ព្រឹត្តិការណ៍ទិវាវប្បធម៌រុស្ស៊ីនៅកម្ពុជាឆ្នាំ២០២៦ ដែលជាផ្នែក​នៃការ​អបអរ​សាទរ​ខួប​លើក​ទី៧០ នៃ​ការ​បង្កើត​ទំនាក់ទំនងការទូតកម្ពុជា-រុស្ស៊ី ត្រូវបានរៀបចំឡើងនៅរាជធានីភ្នំពេញ

2026/03/29 09:28:22 am        243
Facebook Telegram Linkin
នាល្ងាចថ្ងៃទី២៨ ខែមីនា ឆ្នាំ២០២៦ ទិវាវប្បធម៌រុស្ស៊ីនៅកម្ពុជា បានរៀបចំឡើង ក្រោម​អធិបតី​ភាព​លោក​ជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និង​ឯកឧត្តម​ Anatoly Borovik ឯកឧត្តម​អគ្គរដ្ឋទូត​វិសាមញ្ញ​ និង​ពេញ​សមត្ថភាព​នៃ​សហព័ន្ធ​រុស្ស៊ី​ប្រចាំ​ព្រះរា​ជាណា​ចក្រកម្ពុជា នៅសាលសន្និសីទចតុម្មុខ។ព្រឹត្តិការណ៍​នេះមានការរៀបចំពិព័រណ៍វត្ថុសិល្បៈ សម្លៀកបំពាក់ប្រពៃណី និងការ​សម្តែង​សិល្បៈ​ក្រោម​ប្រធាន​បទ "អ្នកបន្តវេនតំបន់ស៊ីបេរី"។ កម្មវិធីនេះ ជាឱកាសក្នុងការចែករំលែក ការ​ផ្លាស់​ប្តូរ​ចំណេះ​ដឹង ក៏ដូចជាការស្វែងយល់ពីប្រពៃណីវប្បធម៌ក្នុងតំបន់ស៊ីបេរីដល់ប្រជាជនកម្ពុជា។សូម​បញ្ជាក់ថា ព្រឹត្តិការណ៍នេះមិនត្រឹមតែជាការរំលឹកដល់អតីតកាលនោះទេ ប៉ុន្តែ​គឺ​ជា​ការ​ផ្តល់​តម្លៃ​​ដល់ចំណងមិត្តភាពដ៏រឹងមាំ ក៏ដូចជាការប្តេជ្ញាចិត្តរួមគ្នាឆ្ពោះទៅកាន់អនាគតមួយ ដែល​មាន​កិច្ច​សហប្រតិបត្តិការលើវិស័យវប្បធម៌យ៉ាងស៊ីជម្រៅ។ ជាការពិតណាស់ វប្បធម៌គឺជា​ដួង​ព្រលឹង​របស់​ជាតិ ​ជាអត្តសញ្ញាណស្នូល និងជាធនធានដ៏មានតម្លៃមិនចេះរីងស្ងួត ហើយ​បាន​ដើរ​តួនា​ទី​យ៉ាង​សំខាន់​ក្នុងការពង្រឹងភាពជាដៃគូរវាងប្រទេសទាំងពីរកម្ពុជា-រុស្ស៊ី៕

យុទ្ធនាការផ្សព្វផ្សាយទេសចរណ៍កម្ពុជាចាប់ផ្តើមដោយមានក្រុមហ៊ុនទេសចរណ៍ជាច្រើនក្នុងតំបន់អាស៊ាន

2026/03/27 12:30:46 pm        224
Facebook Telegram Linkin
យុទ្ធនាការផ្សព្វផ្សាយគោលដៅទេសចរណ៍កម្ពុជាទៅកាន់ពិភពលោក រយៈពេលពេញមួយឆ្នាំ ដែលសហការរៀបចំឡើងដោយសមាគមទេសចរណ៍អាស៊ីប៉ាហ្វិក PATA ប្រចាំនៅកម្ពុជា គាំទ្រដោយក្រសួងទេសចរណ៍ បានចាប់ផ្តើមដំណើរការ ដោយមានបណ្តាក្រុមហ៊ុនទេសចរណ៍អន្តរជាតិ និងអ្នកផ្សព្វផ្សាយមាតិទេសចរណ៍ដែលមានឥទ្ធិពលជាច្រើន នៅក្នុងតំបន់អាស៊ាន អញ្ជើញមកដល់កម្ពុជា ដើម្បីចូលរួមជំនួបផ្លាស់ប្តូរពាណិជ្ជកម្មទេសចរណ៍CTM និងទស្សនាកម្ពុជា។បើតាមលោក ម៉េត សុជាតិ តំណាងសមាគមន៍ទេសចរណ៍អាស៊ីប៉ាហ្វិក PATA ប្រចាំនៅកម្ពុជា បានថ្លែងប្រាប់BTV នៅថ្ងៃទី២៧ ខែមីនានេះថា ដូចការគ្រោងទុក នៅថ្ងៃនេះ គ្រប់បណ្តាក្រុមហ៊ុនទេសចរណ៍ និងតំណាងបណ្តាញផ្សព្វផ្សាយមាតិការដ៏មានឥទ្ធិពល មកពីប្រទេសឥណ្ឌូនេស៊ី សឹង្ហបូរី និងម៉ាឡេស៊ី និងប្រទេសនានាទៀត នៅក្នុងតំបន់អាស៊ាន សរុបប្រមាណជាង៤០ ស្ថាប័ន បានអញ្ជើញមកដល់កម្ពុជា ដើម្បីចូលរួមព្រឹត្តិការណ៍ជំនួបផ្លាស់ប្តូរពាណិជ្ជកម្មទេសចរណ៍កម្ពុជា CTM ២០២៦ អមដោយមានការធ្វើដំណើរតាមខែ្សទស្សនកិច្ចសិក្សាស្វែងយល់សក្តានុពលវិស័យទេសចរណ៍ នៅរាជធានីភ្នំពេញ នៅខេត្តព្រះសីហនុ ខេត្តសៀមរាប រយៈពេល ៦យប់ ៧ថ្ងៃ។លោក បណ្ឌិត ធួន ស៊ីណាន ប្រធានPATA ប្រចាំនៅកម្ពុជា បានថ្លែងថា យុទ្ធនាការផ្សព្វផ្សាយទេសចរណ៍កម្ពុជា ទៅកាន់ពិភពលោក រយៈពេល១ឆ្នាំពេញដែលធ្វើឡើងជាសេរី អមដោយមានការរៀបចំព្រឹត្តិការណ៍ជំនួបធុរៈកិច្ចទេសចរណ៍កម្ពុជា CTM និងរៀបចំខ្សែទស្សនៈកិច្ចសិក្សាស្វែងយល់ក្នុងសក្តានុពលទេសចរណ៍កម្ពុជា នៅក្នុងដំណាក់កាលដំបូងនេះ គឺផ្តោតសហការអញ្ជើញបណ្តាក្រុមហ៊ុនទេសចរណ៍អន្តរជាតិ និងអ្នកផ្សព្វផ្សាយទេសចរណ៍ល្បីៗនៅតំបន់អាស៊ានអញ្ជើញចូលរួម ហើយដំណាក់កាលខែបន្តបន្ទាប់ទៀត សមាគម នឹងអញ្ជើញក្រុមហ៊ុនទេសចរណ៍អន្តរជាតិជាអ្នកទិញ និងតំណាងបណ្តាញផ្សព្វផ្សាយល្បីៗ តាមប្រទេសនានាទៀត នៅតំបន់អឺរ៉ុប អាមេរិច ចិន កូរ៉េ ឥណ្ឌា និងប្រទេសនានាទៀត អញ្ជើញមកកម្ពុជាចូលរួមព្រឹត្តិការណ៍ដូចគ្នានេះដែរ។លោកបណ្ឌិតថា យុទ្ធនាការផ្សព្វផ្សាយកម្ពុជាទៅកាន់ពិភពលោកនេះ គឺមានបំណងសំខាន់ជំរុញក្រុមហ៊ុនទេសចរណ៍អន្តរជាតិនានាដែលជាភាគីអ្នកទិញមកពីក្រៅប្រទេស និងក្រុមហ៊ុនទេសចរណ៍ដែលជាភាគីអ្នកលក់នៅក្នុងប្រទេស ទទួលបានឱកាសជួបគ្នា ពិភាក្សាគ្នាភ្ជាប់ដៃគូ ទំនាក់ទំនាក់អាជីវកម្មទេសចរណ៍ រួមគ្នាផ្សាយផ្សាយគោលដៅទេសចរណ៍កម្ពុជា សហការលក់កញ្ចប់ទេសចរណ៍កម្ពុជានៅក្រៅប្រទេស និងនាំគ្នាភ្ញៀវទេសចរអន្តរជាតិនានាមកទស្សនាកម្ពុជា នៅឆ្នាំក្រោយៗទៀត។លោកបណ្ឌិត ធួន ស៊ីណាន ថ្លែងថា បន្ទាប់ពីការរៀបចំយុទ្ធនាការផ្សព្វផ្សាយគោលដៅទេសចរណ៍កម្ពុជានេះរួច ក្នុងរយៈពេល៦ខែបន្ទាប់ រំពឹងថា នឹងមានភ្ញៀវទេសចរអន្តរជាតិនៅក្នុងតំបន់អាស៊ានមកទស្សនាកម្ពុជាកាន់តែច្រើន ហើយក្នុងរយៈពេល១ឆ្នាំទៅ២ឆ្នាំបន្ទាប់ រំពឹងមានភ្ញៀវទេសចរអន្តរជាតិ បណ្តាប្រទេសនៅតាមតំបន់អឺរ៉ុប អាមេរិក និងនៅកូរ៉េជាដើម នឹងមានទស្សនាកម្ពុជាកាន់តែច្រើនផងដែរ៕ អត្ថបទ ស៊ុម សុខជា

កោះច្រែង គឺជាតំបន់ទេសចរណ៍ធម្មជាតិដ៏ទាក់ទាញមួយ ស្ថិតនៅក្នុងខេត្តក្រចេះ តាមដង​ទន្លេមេគង្គ​ ដែលកំពុងទទួលបានការចាប់អារម្មណ៍ពីភ្ញៀវទេសចរជាតិ និងអន្តរជាតិ

2026/03/27 11:46:12 am        129
Facebook Telegram Linkin
នៅថ្ងៃទី២៦ ខែមីនា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ រួមជាមួយឯកឧត្តម វ៉ា ថន អភិបាល​នៃគណៈអភិបាលខេត្តក្រចេះ អញ្ជើញដឹក​នាំ​ក្រុម​ការងារ​ចុះ​ពិនិត្យ​ស្ថាន​ភាព​ជាក់​ស្តែង​នៅកោះ​ច្រែងខេត្តក្រចេះ ដើម្បីវាយតម្លៃសក្តានុពលទេសចរណ៍ និងហេដ្ឋារចនាសម្ព័ន្ធសំខាន់ៗ រួម​មានផ្លូវចូលទៅកាន់តំបន់ ទីតាំងសេវាកម្មទេសចរណ៍ និងបរិស្ថានធម្មជាតិជុំវិញកោះផងដែរ។ដំណើរចុះពិនិត្យនេះត្រូវបានចាត់ទុកថាជាជំហានសំខាន់មួយក្នុងការបង្កើនការយកចិត្តទុកដាក់លើតំបន់កោះច្រែង និងជំរុញឱ្យមានគម្រោងអភិវឌ្ឍន៍ទេសចរណ៍ថ្មីៗនៅតំបន់នេះ នាពេល​ខាង​មុខ​។

ភោជនីយដ្ឋាននានានៅតំបន់ផ្លូវបាសាក់ រាជធានីភ្នំពេញ ត្រៀមមុខម្ហូបជាច្រើន ដើម្បីទាក់ទាញ​ទេសចរ​ក្នុងព្រឹត្តិការណ៍ «នគរសង្ក្រាន្ត»

2026/03/24 04:39:10 pm        262
Facebook Telegram Linkin
ស្ថិតក្នុងព្រឹត្តិការណ៍ «នគរសង្ក្រាន្ត» ភោជនីយដ្ឋាននៅតំបន់ផ្លូវបាសាក់ ក្នុងរាជធានីភ្នំពេញ បាន​តុប​តែង​លំអ និងត្រៀមមុខម្ហូបជាច្រើនប្រទភេទ ដើម្បីទាក់ទាញ​ភ្ញៀវទេសចរ​ចូល​ទទួល​ទាន​អាហារ និងដើរកម្សាន្តនៅទីនេះ។អ្នកតំណាងម្ចាស់អាជីវកម្មនៅតំបន់ផ្លូវបាសាក់ ស្ថិតនៅសង្កាត់ទន្លេបាសាក់ ខណ្ឌចំការមន រាជ​ធានី​ភ្នំពេញ នៅព្រឹកថ្ងៃទី២៤ ខែមីនា នេះ បានប្រាប់BTVថា ការរៀបចំព្រឹត្តិការណ៍ «នគរសង្ក្រាន្ត»​ នៅតំបន់ផ្លូវបាសាក់ នឹងអាចទាក់ទាញភ្លៀវទេសចរមកច្រើន ហើយចំណូល​ក៏​អាច​រក​បានច្រើនដែរ។ អ្នកទាំងអស់នោះបានបន្តថា នៅក្នុងភោជនីយដ្ឋានមានមុខម្ហូប​បរទេស​ជា​ច្រើន​ភេទសម្រាប់បម្រើសេវាជូនភ្ញៀវទេសេចរ ដែលក្នុងនោះមានដូចជាប្រទេស បារាំង អេស្បាញ និង​ឥណ្ឌា ជាដើម។ ក្រៅពីនេះ ក៏មានមុខម្ហូបខ្មែរផងដែរ។ដើម្បី​អបអរសាទរពិធីបុណ្យចូលឆ្នាំថ្មី ប្រពៃណីជាតិ សហភាពសហព័ន្ធយុវជនកម្ពុជា នឹង​រៀបចំ​ព្រឹត្តិការណ៍ «នគរសង្ក្រាន្ត» ជាលើកដំបូង ក្នុងរយៈពេល៦ថ្ងៃ ដោយចាប់ពីថ្ងៃទី១៤ រហូតដល់​ថ្ងៃទី​១៩ ខែមេសា ឆ្នាំ២០២៦ នៅរាជធានីភ្នំពេញ ត្រង់ចំណុចទីតាំងមួយចំនួនដូចជា៖ តំបន់​រមណីយ​ដ្ឋានប្រវត្តិសាស្ត្រវត្តភ្នំ ផ្លូវថ្មើរ ជើងចតុមុខ សួនច្បារ Vattanac មកដល់ផ្សាររាត្រី បរិវេណវត្តបុទុមវត្តី តំបន់ផ្លូវបាសាក់ និងផ្សារទួលទំពូង។ បច្ចុប្បន្ន សហភាព​សហព័ន្ធ​យុវជន​កម្ពុជា សហការជាមួយអង្គភាពពាក់ព័ន្ធនានា កំពុងរៀបចំ​តុបតែង​លំអ​ទីតាំង​ទាំង​នោះ​មុនព្រឹត្តិការណ៍ «នគរសង្ក្រាន្ត» ឈានចូលមកដល់៕ អត្ថបទ៖ ទូច សោភ័ណ 

ក្រសួងទេសចរណ៍ និងរដ្ឋបាលខេត្តកោះកុង សហការជាមួយវិស័យឯកជន ជំរុញ​អភិវឌ្ឍ​វិស័យ​ទេសចរណ៍​កម្រិត​ខ្ពស់ក្នុងខេត្តកោះកុង

2026/03/24 02:33:22 pm        211
Facebook Telegram Linkin
ក្រសួងទេសចរណ៍ និងរដ្ឋបាលខេត្តកោះកុង ព្រមទាំងវិស័យឯកជន បានប្តេជ្ញារួមគ្នាក្នុងការជំរុញ និង​អភិវឌ្ឍ​វិស័យទេសចរណ៍នៅខេត្តកោះកុង ឱ្យក្លាយជាគោលដៅទេសចរណ៍កម្រិតខ្ពស់ សម្រាប់​ទាក់​ទាញភ្ញៀវទេសចរជាតិ និងអន្តរជាតិ។ ការអភិវឌ្ឍកោះទទឹងរីស្សតនេះ គឺជាការ​វិនិយោគ​ដោយ​ក្រុមហ៊ុនខ្មែរ ស្នាដៃនិងគំនិត ព្រមទាំងការឆ្នៃប្រឌិតដោយវិនិយោគិនខ្មែរ ដោយ​រក្សា​នូវ​អត្តសញ្ញាណខ្មែរ ដែលនេះបានឆ្លុះបញ្ជាំងពីការរួមចំណែករបស់ប្រជាជនខ្មែរ ដែល​ចេះ​ស្រឡាញ់​ និង​រួបរួមគ្នាក្រោមទិសស្លោក “ខ្មែររួមគ្នា ខ្មែរខ្លាំង”។ ក្នុងបេសកកម្មនេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ ព្រម​ទាំង​លោក​ជំទាវ​ ឈី វ៉ា អភិបាលនៃគណៈអភិបាលខេត្តកោះកុង នៅថ្ងៃទី២៣ ខែមីនា ឆ្នាំ២០២៦ បាន​ដឹកនាំ​គណៈ​ប្រតិភូ​ចុះ​ទស្សន​កិច្ច​សិក្សា ​និងពិនិត្យស្ថានភាពអភិវឌ្ឍន៍ជាក់ស្តែងនៅ “កោះ​ទទឹង​រីស្សត” ដែលជារ​មណីយ​ដ្ឋាន​ទេសចរណ៍​កម្រិតខ្ពស់ថ្មីមួយ ស្ថិតក្នុងទឹកដីខេត្តកោះកុង។ ដំណើរទស្សនកិច្ចនេះ មាន​ការ​ចូល​រួម​ពី​ថ្នាក់​ដឹកនាំក្រសួងទេសចរណ៍ ថ្នាក់ដឹកនាំខេត្តកោះកុង តំណា​ង​សមាគម​ក្នុង​ឧស្សាហ​កម្ម​ទេសចរណ៍​កម្ពុជា រួមមាន CATA, CTF និង PATA ព្រមទាំងអ្នកផលិតមាតិកាជាតិ និងអន្តរជាតិ សរុប​ប្រមាណ ៦០នាក់។គណៈប្រតិភូបានចុះពិនិត្យហេដ្ឋារចនាសម្ព័ន្ធសំខាន់ៗនៅលើកោះទទឹងរីស្សត រួមមាន វីឡា​លំហែ​ប្រណិត​ ផ្ទះឈើបែបខ្មែរបុរាណ បណ្ណាល័យ កន្លែងហាត់ប្រាណ និងយូហ្គា អាងហែលទឹក កន្លែង​មើល​ថ្ងៃ​លិច និងភោជនីយដ្ឋាន ដែលបានរៀបចំតាមស្តង់ដារខ្ពស់។ក្នុងឱកាសនេះ ឯកឧត្តមរដ្ឋមន្ត្រី បានថ្លែងអំណរគុណ និងវាយតម្លៃខ្ពស់ចំពោះក្រុមហ៊ុន ដែន​នគរ (ខេមូឌា) អ៊ិនវេសមិន ឯ.ក. ដែលបានវិនិយោគ និងអភិវឌ្ឍកោះទទឹងរីស្សត តាមរយៈ ឱ្យ​ក្លាយ​ជា​រមណីយដ្ឋានទេសចរណ៍ប្រណិត មានសក្តានុពល​ខ្ពស់ក្នុង​ការ​ប្រកួត​ប្រជែង​លើ​ទីផ្សារ​អន្តរជាតិ​។ គួរបញ្ជាក់ថា “កោះទទឹងរីស្សត” បានបើកដំណើរការសាកល្បងកាលពីថ្ងៃទី២០ ខែមីនា ឆ្នាំ ២០២៦ ដោយមានវីឡាសរុបចំនួន ២៤ រចនាបែបបុរាណ និងសហសម័យ ព័ទ្ធ​ជុំវិញ​ដោយ​ធម្មជាតិ​ខៀវ​ស្រងាត់ និងមានឆ្នេរខ្សាច់សស្អាតប្រវែងប្រមាណ ២,០០០ ម៉ែត្រ ដែលផ្តល់​នូវ​បទ​ពិសោធន៍​លំហែ​កាយដ៏ប្រណិត និងឯកជនភាពខ្ពស់៕

ក្រសួងទេសចរណ៍ និងសុខាភិបាល​សហការ​រៀបចំ​ព្រឹត្តិការណ៍​ដំណើរ​ទស្សន​កិច្ច​តំបន់​អង្គរ​ក្នុង​យុទ្ធនា​ការ​រៃអង្គាសថវិកា «Walk for a Smile» បង្ហាញអំពីទឹកចិត្តសប្បុរសធម៌ខ្មែរជួយខ្មែរ

2026/03/23 02:42:32 pm        237
Facebook Telegram Linkin
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តមសាស្ត្រាចារ្យ ឈាង រ៉ា រដ្ឋ​មន្ត្រី​ក្រសួង​សុខាភិបាល អញ្ជើញជាគណៈអធិបតីក្នុងព្រឹត្តិការណ៍ «Walk for a Smile» ដើម្បី​ទ្រទ្រង់​សកម្ម​ភាព​មនុស្សធម៌របស់អង្គការស្នាមញញឹមកម្ពុជា ដែលនេះគឺជាលើកទី១ សម្រាប់​ក្រសួង​ទេសចរណ៍ ​និងជាលើកទី៨ ដែលកម្មវិធី Walk for a Smile ត្រូវបានរៀបចំ​ឡើង​នៅ​លើ​ទឹក​ដី​ដ៏​ពិសិដ្ឋ ​និងជាតំបន់វប្បធម៌បេតិកភណ្ឌនៃខេត្តសៀមរាប ស្របពេលដែល​ថ្ងៃ​នេះក៏​ជា​ថ្ងៃ​នៃ​ព្រឹត្តិ​ការណ៍​សម​រាត្រីអង្គរ។ក្នុងកម្មវិធីមនុស្សធម៌នេះ មានការអញ្ជើញចូលរួមពីលោក ចាន់ កុក ចយ នាយកប្រតិបត្តិ​អង្គការ​ស្នាម​ញញឹម​កម្ពុជា (smile Cambodia), ឯកឧត្តម លោកជំទាវ ថ្នាក់ដឹកនាំក្រសួងទេសចរណ៍ និង​ក្រសួងសុខាភិបាល, ឯកឧត្តម ឌី រ៉ាដូ អភិបាលរងខេត្តសៀមរាប តំណាង ឯកឧត្តម ប្រាក់ សោ​ភ័ណ អភិបាលនៃគណៈអភិបាលខេត្តសៀមរាប, ឯកឧត្តម លោកជំទាវ លោក លោកស្រី មកពី​អង្គការស្នាមញញឹមកម្ពុជា, ក្រុមគ្រូពេទ្យស័្មគ្រចិត្ត, តំណាងអាជ្ញាធរជាតិអប្សរា, មន្ទីរ​ពាក់​ព័ន្ធ​ជុំវិញ​ខេត្ត, សមាគមក្នុងឧស្សាហកម្មទេសចរណ៍, CATA, ធនាគារ, ក្រុមហ៊ុន- ដៃគូឧបត្ថម្ភ និង​វិស័យឯកជន សរុបប្រមាណ ៣០០នាក់។ជាមួយ​គ្នា​នេះ ឯកឧត្តមរដ្ឋមន្ត្រី បានគូសបញ្ជាក់ថា ក្រោមការដឹកនាំប្រកបដោយគតិបណ្ឌិតរបស់ លោក​ជំទាវ​បណ្ឌិត ពេជ ចន្ទមុន្នី ប្រធានក្រុមប្រឹក្សាភិបាលអង្គការស្នាមញញឹមកម្ពុជា ព្រម​ទាំង​ការ​ជួយ​ជ្រោម​ជ្រែងសព្វគ្រប់បែបយ៉ាងពីក្រសួងសុខាភិបាល ក្រោមការដឹកនាំ​របស់​ឯកឧត្តម​សាស្រ្តា​ចារ្យ ឈាង រ៉ា រដ្ឋមន្ត្រីក្រសួងសុខាភិបាល, អង្គការស្នាមញញឹមកម្ពុជា (Smile Cambodia​) បានបំពេញបេសកកម្មផ្ដល់សេវាវះកាត់ ដោយឥតគិតថ្លៃ ជូនអ្នកជំងឺមាត់ឆែប ក្រអូម​មាត់​ឆែប រលាក ព្យាបាលមាត់ធ្មេញ និងពិការមុខមាត់ នៅទូទាំងប្រទេស។ សូមបញ្ជាក់ជូនថា អង្គការស្នាមញញឹមកម្ពុជា (smile Cambodia) ក៏បាន​អញ្ជើញ​ក្រុម​គ្រូពេទ្យ​ដែល​ស្ម័គ្រ​ចិត្តពីសាធារណរដ្ឋប្រជាមានិតចិន មកពីអង្គការចំនួន ២ គឺ Future Smile China និង​BEAM Hong Kong ដើម្បីចូលរួមកម្មវិធីខាងលើនេះផងដែរ។ ឯក​ឧត្តម​រដ្ឋមន្ត្រី បានគាំទ្រយ៉ាងពេញទំហឹងនូវរាល់សកម្មភាពដែលផ្សារភ្ជាប់ ទេសចរណ៍ សុខ​ភាព និងមនុស្សធម៌ ដែលព្រឹត្តិការណ៍ដើរនៅថ្ងៃនេះ បានបង្ហាញឱ្យពិភពលោកឃើញថា កម្ពុជា​មិន​ត្រឹម​តែ​មាន​ប្រាសាទ​បុរាណដ៏អស្ចារ្យ និងតំបន់ទេសចរណ៍ធម្មជាតិ​ដ៏​ស្រស់​ត្រកាល​ប៉ុណ្ណោះ​ទេ ​ប៉ុន្តែកម្ពុជាគឺជា “ព្រះរាជាណាចក្រ អច្ឆរិយៈដែលផ្តល់នូវភាពកក់ក្តៅ” តាមរយៈ​បេះដូង​សប្បុរស​ធ​ម៌​របស់ប្រជាជនយើង ជាមួយនឹងស្នាមញញឹម ដែលត្រូវបានពិភពលោក ប្រសិទ្ធ​នាម​ថា​ «ស្នាមញញឹមកម្ពុជា»។ទន្ទឹមនឹងនេះ ឯកឧត្តមរដ្ឋមន្ត្រី បានគូសបញ្ជាក់បន្ថែមថា សកម្មភាពនៅថ្ងៃនេះ ក៏បាន​ចូល​រួម​ចំណែក​យ៉ាង​សំខាន់ក្នុងការលើកកម្ពស់រូបភាពវិជ្ជមានរបស់កម្ពុជា ទៅកាន់ពិភពលោកថា យើង​គឺ​ជា​ប្រជាជាតិមួយដែលពោរពេញដោយក្តីស្រឡាញ់ និងការចែករំលែក។តាមកម្ម​វិធីដែលបានគ្រោងទុក «Walk for a Smile» គណៈប្រតិភូក៏​បាន​ចូល​រួម​ទស្សនា​ប្រាសាទ​នានា​នៅតំបន់អង្គរ និងការទស្សនាព្រឹត្តិការណ៍ សមរាត្រីអង្គរ (Angkor Equinox) ដែល​ជាបាតុភូតធម្មជាតិដ៏​អស្ចារ្យ​ដែល​ព្រះ​អាទិត្យ​រះ​ចំកណ្តាល​កំពូល​ប្រាសាទ​អង្គរ​វត្ត​ចំនួន​២​ដង​ជា​រៀង​រាល់ឆ្នាំ គឺនៅរដូវប្រាំង ចាប់ពីថ្ងៃទី២០ ដល់ថ្ងៃទី២២ ខែមីនា, និងរដូវវស្សា ចាប់​ពី​ថ្ងៃ​ទី​២១ ដល់ថ្ងៃទី២៣ ខែកញ្ញា ពោលគឺព្រឹត្តិការណ៍ដ៏អស្ចារ្យនេះ តែងតែបាន​ទាក់​ទាញ​ភ្ញៀវ​ទេសចរ​ជាតិ និងអន្តរជាតិ ចូលរួមទស្សនានិងផ្តិតយករូបភាពនៃបាតុភូតពិសេសនេះ នៅប្រាសាទអង្គរវត្ត ជា​រៀងរាល់ឆ្នាំ៕

រយៈពេលបីថ្ងៃ អ្នកទេសចរណ៍ជាង ៧ម៉ឺន៤ពាន់នាក់មកទស្សនាព្រឹត្ដិការណ៍​សមរាត្រីនៅ​ប្រាសាទអង្គរ

2026/03/23 12:24:49 pm        265
Facebook Telegram Linkin
មន្ដ្រីអាជ្ញាធរជាតិអប្សរា បានឱ្យដឹងថា អ្នកទេសចរជាតិ និងអន្ដរជាតិ ជាង៧ម៉ឺន៤ពាន់នាក់ បាន​ទៅ​ផ្ដិត​យករូបបភាពនិងទស្សនាព្រះអាទិត្យរះចំកំពូលប្រាសាទអង្គរ ឬសមរាត្រី រយៈពេលបីថ្ងៃ ដែ​ល​ចាប់ពីថ្ងៃទី២១ដល់ថ្ងៃទី២៣ខែមីនឆ្នាំ២០២៦នេះ ។បន្ទាប់​ពី​បានទស្សនាព្រឹត្ដិការណ៍ដ៏ទាក់ទាញបំផុតនៅក្នុងតំបន់រមណីយដ្ឋានអង្គរ ព្រះសង្ឃ​និមន្ដ​មក​ពី​វត្ដកម្ពុជាក្រោម ក៏ដូចជាអ្នកទេសជាតិ ក៏បានលើកឡើងដែរថា ការមកទស្សនា និងផ្ដិត​រូបភាព​ព្រឹត្ដិការណ៍នេះ មានភ្ញៀវទេសចរជាតិ និងអន្តរជាតិ បានធ្វើដំណើរមកពីគ្រប់ទិសទី ដើម្បី​ទស្សនា​ព្រឹត្តិការណ៍សមរាត្រី (Equinox) ដែលជា​ទិដ្ឋភាព​ព្រះសូរិយារះ​ឡើង​ចំកំពូល​ប្រាង្គ​កណ្តាល ​នៃប្រាសាទអង្គរវត្តយ៉ាងស្រស់ត្រកាលបំផុត។ ព្រឹត្ដិការណ៍សមរាត្រីនេះ គឺជា​ប្រវត្ដិសាស្ដ្រ​នៃ​អាណាចក្រខ្មែរ ដែលកូនខ្មែរមិនអាចបំភ្លេចបានឡើយ ហើយជាភស្តុតាង​ដែល​បង្ហាញ​ពី​ចំណេះដឹងផ្នែកតារាសាស្ត្រ និងស្ថាបត្យកម្ម​ដ៏​ខ្ពង់​ខ្ពស់​របស់​អតីត​ព្រះ​មហាក្សត្រ​នៃ​អាណា​ចក្រ​ខ្មែរ។អ្នកទេសចរគ្រប់ៗគ្នា ក៏បានបង្ហាញអារម្មណ៍រីករាយ រំលេចដោយសំឡេង​ហ៊ោរ​កញ្ជ្រៀវ​ នៅពេលបានឃើញព្រះអាទិត្យរះចំកំពូលប្រាសាទអង្គរ។យោងតាមរបាយការណ៍ លោក សេង សុធារ៉ា ប្រធានយកដ្ឋានទេសចរណ៍ និងវប្បធម៌ នៃ​អាជ្ញាធរ​ជាតិ​អប្សរា បានបង្ហាញថា ក្នុងចំណោមភ្ញៀវទេសចរចំនួនជាង៧ម៉ឺន៤នាក់នោះ មាន​អ្នក​ទេសចរ​ជាតិ​ចំនួន ៦៨ ១៣២នាក់ និងអ្នកទេសចរអន្ដរជាតិចំនួន៦,៨៣២នាក់ ដែលពួក​គាត់​បាន​ទៅ​ទស្សនា ចន្លោះចាប់ពីម៉ោង៥ព្រឹក ដល់ម៉ោង៧និង៣០នាទីព្រឹកព្រលឹម ក្នុងរយៈ​ពេល​បី​ថ្ងៃ​។ របាយការណ៍បន្ថែមថា នៅថ្ងៃទី១នៃព្រឹត្ដិការណ៍សមរាត្រីមានចំនួនជាង២ម៉ឺន៤ពាន់នាក់ នៅ​ថ្ងៃទី២មានចំនួនជាង៣ម៉ឺន៨ពាន់នាក់ និងនៅថ្ងៃទី៣ចំនួនជាង១ម៉ឺន២ពាន់នាក់ ដែល​សរុប​ក្នុង​រយៈពេលបីថ្ងៃចាប់ពីថ្ងៃទី២១ដល់ថ្ងៃទី២៣ខែមីនាឆ្នាំ២០២៦នេះ មានអ្នកទេសចរជាតិ និង​អន្ដរ​ជាតិ​ជាង៧ម៉ឺន៤ពាន់នាក់ ។ ក្នុងនោះ ភ្ញៀវទេសចរខ្មែរចំនួន: ៦៨,១៣២ និងភ្ញៀវទេស​ចរ​បរទេស​ចំនួន៦ ៨៣២នាក់៕ 

ការវាយតម្លៃបឋមការខូចខាតប្រាសាទព្រះវិហារមានចំនួនសរុប ៥៦២កន្លែង​ហើយ​មាន​សភាព​ធ្ងន់ធ្ងរ

2026/03/23 11:56:14 am        295
Facebook Telegram Linkin
ផ្អែកតាមការវាយតម្លៃបឋម ការខូចខាតប្រាសាទព្រះវិហារមានចំនួនសរុប ៥៦២កន្លែង ហើយ​មាន​សភាពធ្ងន់ធ្ងរដល់រចនាសម្ព័ន្ធប្រាសាទ ក្បាច់ចម្លាក់ និងបង្កការ​ខូច​ខាត​ចំពោះ​តម្លៃ​លេច​ធ្លោ​ជា​សកល។ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានថ្លែង​ឱ្យ​ដឹង​តាម​រយៈ​សន្និសីទ​សារ​ព័ត៌មាន​នៅ​ថ្ងៃ​ទី២៣ ខែមីនា ឆ្នាំ២០២៦នេះថា កាលពីថ្ងៃទី១៩ ខែមីនា ឆ្នាំ២០២៦ គណៈក​ម្មាធិការ​សម្រប​សម្រួលអន្តរជាតិដើម្បីការពារ និងលើកតម្លៃប្រាសាទព្រះវិហារ (ICC-ព្រះវិហារ) បាន​រៀប​ចំ​កិច្ច​ប្រជុំពេញអង្គលើកទី១១ នៅខេត្តសៀមរាប ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជា​ប្រធាន​គណៈ​ប្រតិ​ភូ​រាជ​រដ្ឋាភិបាល​កម្ពុជា​ ដោយមានតំណាងមកពីចិន និងឥណ្ឌា ជាសហប្រធាន។ឯកឧត្តម​បាន​ឱ្យដឹងថា កិច្ចប្រជុំនេះក៏មានការចូលរួមពីតំណាងរដ្ឋសមាជិកចំនួន៥ប្រទេស រួមមាន៖​បែលហ្សិក បារាំង ជប៉ុន ថៃ និងសហរដ្ឋអាមេរិក រួមទាំងប្រធានលេខាធិការដ្ឋាន អ្នក​ជំនាញ​ការ​អាដហុក ស្ថាប័នជាតិនិងអន្តរជាតិ និងអ្នកស្រាវជ្រាវខ្មែរ និងបរទេស ចូលរួម​ដោយ​ផ្ទាល់ ​និងតាមប្រព័ន្ធអនឡាញសរុបប្រមាណ១៥៨រូប។ កិច្ចប្រជុំ​នេះ​គឺ​ដើម្បី​តាម​ដាន​និង​ត្រួត​ពិនិត្យ​ការងារ​អភិរក្ស និងអភិវឌ្ឍន៍តំបន់រមណីយដ្ឋានប្រាសាទព្រះវិហារ និងប្រាសាទកោះកេរ ដែល​អនុវត្តដោយអាជ្ញាធរជាតិព្រះវិហារ និងដៃគូអន្តរជាតិ។ឯកឧត្តម​អ្នក​នាំពាក្យឱ្យដឹងថាអង្គប្រជុំបានស្ដាប់របាយការណ៍ខូចខាតប្រាសាទព្រះវិហារ និង​ផល​ប៉ះ​ពាល់​លើ​សហគមន៍ ប្រជាជន និងវិស័យទេសចរណ៍ បណ្តាលមក​ពី​ព្រឹត្តិការណ៍​ទាំង​ពី​រ​លើក​កាល​ពី​ឆ្នាំ២០២៥កន្លងទៅ។ ជាមួយគ្នានេះ អាជ្ញាធរជាតិព្រះវិហារ​ក៏​បាន​បង្ហាញ​អំពី​លទ្ធផល​នៃ​ការ​សិក្សា​ហានិភ័យបឋមនិងការលើកផែនការអភិរក្សបន្ទាន់ ដើម្បីទប់ស្កាត់ការ​ខូច​ខាត​បន្ត​ទៀត​ដល់​វត្ថុ​សិល្បៈដែលនៅជ្រុះរាយប៉ាយ និងហេដ្ឋារចនាសម្ព័ន្ធប្រាសាទដែលរងការខូចខាតធ្ងន់ធ្ងរ។ ផ្អែក​តាមការវាយតម្លៃបឋម ការខូចខាតប្រាសាទព្រះវិហារមានចំនួនសរុប ៥៦២កន្លែង ហើយ​មាន​សភាពធ្ងន់ធ្ងរដល់រចនាសម្ព័ន្ធប្រាសាទ ក្បាច់ចម្លាក់ និងបង្កការ​ខូច​ខាត​ចំពោះត​ម្លៃ​លេច​ធ្លោ​ជា​សកល។បើតាម​អ្នកនាំពាក្យរាជរដ្ឋាភិបាល នៅមុនកិច្ចប្រជុំនេះ អ្នកជំនាញការអាដហុកនៃគណៈកម្មាធិការ ICC-ព្រះវិហារ ក៏បានបំពេញទស្សនកិច្ច និងពិភាក្សាការងារ​អភិរ​ក្ស​និង​ជួស​ជុល​ប្រាសាទ​នៅ​ក្នុង​រមណីយ​ដ្ឋាន​ប្រាសាទព្រះវិហារ និងប្រាសាទកោះកេរ រយៈពេល២ថ្ងៃ ចាប់ពីថ្ងៃទី១៦ ដល់១៧ ខែ​មីនា ឆ្នាំ២០២៦ ជាពិសេសការចុះពិនិត្យមើលការខូចខាតប្រាសាទព្រះវិហារ និង​ផល​ប៉ះ​ពាល់​លើ​វិស័យ​ទេសចរណ៍និងសហគមន៍ ដើម្បីរៀបចំរបាយការណ៍ និងអនុសាសន៍ សម្រាប់កិច្ចប្រជុំ ICC-ព្រះវិហារ។ជាមួយគ្នានេះដែរ អង្គប្រជុំក៏បាន​ជូន​ដំណឹង​អំពី​បេសក​កម្ម​ប្រឹក្សា​យោបល់​បច្ចេកទេស​របស់​អង្គការ​យូណេស្កូ និង ICOMOS ចុះមកពិនិត្យប្រាសាទព្រះវិហារនៅសប្តាហ៍ទី១ ក្នុងខែមីនា តាម​ការ​អញ្ជើញ​របស់​កម្ពុជា​ស្របតា​ម​គោលការណ៍​ប្រតិបត្តិ​សម្រាប់​ការ​អនុវត្ត​អនុ​សញ្ញា​បេតិក​ភណ្ឌ​ពិភព​លោក។ គោល​បំណង​នៃ​បេសក​កម្ម​នេះ​គឺ​ដើម្បី​វាយ​តម្លៃ​ស្ថាន​ភាព​អភិរក្ស​សម្បត្តិ​បេតិក​ភណ្ឌ​ពិភព​លោក និងផ្តល់យោបល់បច្ចេកទេសដើម្បីគាំទ្រដល់ការងារអភិរក្សរយៈពេលវែង ស្រប​តាមគោលបំណងរបស់អនុសញ្ញាបេតិកភណ្ឌពិភពលោក និងគោលការណ៍ប្រតិបត្តិ។ របាយ​ការណ៍នៃ​បេសកកម្មនេះនឹងផ្ញើជូនភាគីកម្ពុជា ស្របតាមបេសក​កម្ម​ផ្តល់​យោបល់​បច្ចេក​ទេស​ដែល​ធ្លាប់​បានអនុវត្តកន្លងមក។អ្នកនាំពាក្យបញ្ជាក់ថា៖«សហប្រធានចិននិងឥណ្ឌា ព្រមទាំងបណ្តាប្រទេសជាសមាជិក រួម​ជា​មួយ​អ្នក​​ជំនាញការអន្តរជាតិ បានប្តេជ្ញាបន្ត​ចូល​រួម​ជាមួយ​រាជ​រដ្ឋាភិបាល​កម្ពុជា​ក្នុង​កិច្ច​ការពារ​ និង​ថែ​រក្សា​បេតិកភណ្ឌពិភពលោកប្រាសាទព្រះវិហារសម្រាប់មនុស្សជាតិជំនាន់ក្រោយៗទៀត ជា​ពិសេស​សហប្រធាន​ទាំង​ពីរ​បាន​បង្ហាញ​អំពី​ជំហរ​បន្ត​កិច្ច​ការ​អភិរក្ស​ប្រាសាទ​ព្រះវិហារ​តាម​រយៈ​វេទិកា​ពិគ្រោះយោ​បល់នេះ នៅពេលដែលស្ថានភាពវិលមកប្រក្រតីភាពវិញ»។បើតាមអ្នកនាំពាក្យ អង្គប្រជុំក៏បានពិភាក្សា​គ្នាអំពីវិធាន​ការ​បន្ទាន់​នានា​ដើម្បី​អភិរក្ស​សង្គ្រោះ​ប្រាសាទ​ព្រះវិហារ​មានដូចជា៖ អនុវត្តការងារបន្ទាន់មួយ​ចំនួន​ដូច​ជា​ការ​បោស​សម្អាត​អាវុធ​យុទ្ធភណ្ឌមិ​ន​ទាន់ផ្ទុះដើម្បីធានាដល់ការងារអភិរក្ស និងគ្រប់គ្រងប្រាសាទព្រះវិហារ, ការ​រៀប​ចំ​ឯក​សារ​វិភាគហានិភ័យប្រាសាទព្រះវិហារនិងបរិវេណភ្នំទាំងមូល និងការរៀបចំ​ឯកសារ​អំពី​វត្ថុ​សិល្បៈ​ និងរចនាសម្ព័ន្ធប្រាសាទដែលទទួលរងគ្រោះថ្នាក់ និងចាត់វិធានការសង្គ្រោះបន្ទាន់។សូម​រម្លឹកជូនថា កាលពីថ្ងៃទី១២ ខែមករា ឆ្នាំ ២០២៦ ក្រសួងវប្បធម៌ និងវិចិត្រសិល្បៈ ក៏បាន​ចេញ​សេច​ក្តី​ប្រកាស​ព័ត៌មាន​មួយ​ស្តីពី​ស្ថានភាព​ខូចខាត​រមណីយដ្ឋាន​ប្រាសាទ​ព្រះវិហារ​យ៉ាង​ធ្ងន់​ធ្ងរ​ដោយ​សារ​ការទម្លាក់គ្រាប់បែកនិងគ្រាប់ផ្លោងរបស់យោធាថៃ ក្នុងនោះមាន​ទាំង​ការ​ខូច​ខាត​ប្រាង្គ​ប្រាសាទ និងតំបន់ជុំវិញ រួមទាំងវត្តកែវសិក្ខាគីរីស្វារៈផងដែរ។ ក្រសួងវប្បធម៌និង​វិចិត្រ​សិល្បៈ​បាន​អំពាវនាវដល់អង្គការ និងសហគមន៍​អន្តរជាតិ​ផ្តល់​ការ​គាំទ្រ​ចំពោះ​វិធាន​ការ​បន្ទាន់​នានា​សំដៅ​ការពារប្រាសាទពីការវាយប្រហារបន្ថែម និងគាំទ្រដល់ការអភិរក្សបន្ត និងជួស​ជុល​ស្តារ​ប្រាសាទឡើងវិញ។ ទន្ទឹមនឹងនោះ ក្រសួងក៏បានអំពាវនាវឱ្យមានការគោរពច្បាប់អន្តរជាតិ អនុសញ្ញា និងពិធីសារក៏ដូចជាច្បាប់មនុស្សធម៌អន្តរជាតិ ដែលត្រូវបាន​បង្កើត​ឡើង​សម្រាប់​ចង​ភ្ជាប់​រដ្ឋភាគីទាំងអស់ឱ្យគោរពនិងការពារបេតិកភណ្ឌវប្បធម៌ដែលមានតម្លៃលេចធ្លោជាសាកល៕

គណៈកម្មាធិការអាយស៊ីស៊ី ព្រះវិហារ បើកកិច្ចប្រជុំពេញអង្គលើកទី១១ ដើម្បីពិភាក្សា​អំពី​វិធានការ​សង្រ្គោះបន្ទាន់នៅប្រាសាទព្រះវិហារ និងការអភិរក្ស អភិវឌ្ឍន៍​រមណីយ​ដ្ឋាន​ប្រាសាទកោះកេរ

2026/03/21 02:10:42 pm        249
Facebook Telegram Linkin
គណៈកម្មាធិការសម្របសម្រួលអន្តរជាតិ សម្រាប់ការអភិរក្សប្រាសាទព្រះវិហារ (ICC-Preah Vihear) កាលពីថ្ងៃទី១៩ ខែមីនា ឆ្នាំ២០២៦កន្លងទៅនេះ បានរៀបចំកិច្ចប្រជុំពេញអង្គលើកទី១១ ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ និងមានការសម្របសម្រួលពីសហប្រធានចិន-ឥណ្ឌា ដើម្បីពិនិត្យ និងពិភាក្សាអំពីវិធានការបន្ទាន់ សង្រ្គោះប្រាសាទព្រះវិហារដែលរងគ្រោះយ៉ាងធ្ងន់ធ្ងរដោយជម្លោះប្រដាប់អាវុធទាំងពីរលើកកាលពីឆ្នាំ២០២៥កន្លងទៅ និងការអភិរក្ស និងអភិវឌ្ឍន៍រមណីយដ្ឋានប្រាសាទកោះកេរ។មុននឹងឈានដល់កិច្ចប្រជុំនេះ អ្នកជំនាញការអាដហុក អាយស៊ីស៊ី ព្រះវិហារ កាលពីថ្ងៃទី១៦-១៧ ខែមីនា ឆ្នាំ២០២៦កន្លងទៅ ក៏បានចុះពិនិត្យការងារអភិរក្ស និងអភិវឌ្ឍន៍រមណីយដ្ឋានប្រាសាទកោះកេរ និងពិនិត្យផលប៉ះពាល់នៅប្រាសាទព្រះវិហារ។ ក្នុងបេសកកម្មនោះ អ្នកជំនាញការអាដហុក បានផ្តល់អនុសាសន៍ណែនាំសម្រាប់រមណីយដ្ឋានប្រាសាទកោះកេររួមមាន៖ ការរៀបចំចំណតនៅប្រាសាទប្រាំ ការរៀបចំចងក្រងឯកសារស្ថាបត្យកម្ម និងរៀបចំសុវត្ថិភាពថ្មប្រាសាទខ្នារ ដើម្បីការងារអភិរក្ស ជួសជុលនៅពេលខាងមុខ។ ការអភិរក្ស ជួសជុល និងចងក្រងទិន្នន័យ នៅប្រាសាទគោកគ្រង ប្រាសាទបល្ល័ង្កត្បូង ជួសជុលគោបុរៈខាងលិចប្រាសាទក្រចាប់ ជួសជុលច្រកចូលខាងជើងនិងត្បូងនៃប្រាសាទក្រហម។ ចំណែកប្រាសាទព្រះវិហារ អ្នកជំនាញការបានផ្តល់អនុសាសន៍សម្រាប់កិច្ចអន្តរាគមន៍បន្ទាន់ទៅលើទីតាំងដែលរងគ្រោះដោយគ្រោប់ផ្លោង និងមានហានិភ័យខ្ពស់ចាប់ពីចំណុចពើយតាឌី ដល់ស្ពាននាគគោបុរៈទី៥ និងពិនិត្យការខូចខាតបញ្ជរលក់សំបុត្រនៅជើងភ្នំប្រាសាទព្រះវិហារផងដែរ។សូមបញ្ជាក់ថា លទ្ធផលនៃកិច្ចប្រជុំពេញមួយថ្ងៃ អង្គប្រជុំ សហប្រធានចិន-ឥណ្ឌា ព្រមទាំងបណ្តារដ្ឋសមាជិក(ICC-Preah Vihear) និងអ្នកជំនាញការអន្តរជាតិ បានប្តេជ្ញាបន្តចូលរួមជាមួយរាជរដ្ឋាភិបាលកម្ពុជាក្នុងកិច្ចការពារនិងថែរក្សាបេតិកភណ្ឌពិភពលោកប្រាសាទព្រះវិហារ សម្រាប់មនុស្សជាតិជំនាន់ក្រោយៗទៀត ជាពិសេសសហប្រធានទាំងពីរបានបង្ហាញជំហរបន្តកិច្ចការអភិរក្សប្រាសាទព្រះវិហារតាមរយៈវេទិការពិគ្រោះយោបល់នេះនៅពេលដែលស្ថានភាពវិលមករកប្រក្រតីភាពវិញ៕ 

បណ្ដាញសង្គម

ព័ត៌មានថ្មីៗ

AOT ចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែននៅតំបន់ភូមិជោគជ័យ ឃុំអូរបីជាន់
05/17/2026 03:05 PM
Facebook Telegram Linkin
លោក Zelenskiy ៖ រុស្ស៊ីពិចារណាផែនការវាយប្រហារប្រទេសសមាជិកអង្គការណាតូ ចេញពីបេឡារុស
05/17/2026 02:05 PM
Facebook Telegram Linkin
សហគមន៍អេកូទេសចរណ៍កោះផ្តៅ ក្នុងខេត្តក្រចេះ ជាតំបន់គួរទៅកម្សាន្ត
05/17/2026 01:05 PM
Facebook Telegram Linkin
រដ្ឋបាលខេត្តកែបទទួលស្វាគមន៍ដំណើរទស្សនកិច្ចរបស់ឯកអគ្គរដ្ឋទូតចិនប្រចាំកម្ពុជា
05/17/2026 01:05 PM
Facebook Telegram Linkin
ប្រធានក្រុមការងារចុះមូលដ្ឋានខេត្តកំពង់ធំ សម្ពោធដាក់ឱ្យប្រើប្រាស់អគារទីស្នាក់ការបក្សស្រុកស្ទោង
05/17/2026 01:05 PM
Facebook Telegram Linkin
ពលរដ្ឋមានជីវភាពខ្វះខាតចំនួន ៣០០គ្រួសារ ទទួលបានអំណោយពីយុវជនគណបក្សខេត្តបាត់ដំបង
05/17/2026 01:05 PM
Facebook Telegram Linkin
មន្ត្រីជំនាញចុះពិនិត្យវឌ្ឍនភាពការអនុវត្តគម្រោង និងតម្រង់ទិសជំរុញផលិតកម្មដំណាំស្រូវខេត្តត្បូងឃ្មុំ
05/17/2026 12:05 PM
Facebook Telegram Linkin
កម្ពុជាចូលរួមមហាសន្និបាតសុខភាពពិភពលោក លើកទី៧៩ (WHA79) នៅទីក្រុងហ្សឺណែវ ប្រទេសស្វីស
05/17/2026 12:05 PM
Facebook Telegram Linkin
ព្រឹត្តិការណ៍​ដង្ហែគោមឈូកព្រះពុទ្ធសាសនា «Lantern Parade/ Lotus Lantern Festival 2026»​ កណ្តាលទីក្រុងសេអ៊ូល​ សាធារណរដ្ឋ​កូរ៉េ​
05/17/2026 12:05 PM
Facebook Telegram Linkin
មេបញ្ជាការទី ២របស់ក្រុម ISIS ត្រូវបានសម្លាប់ ដោយកងកម្លាំងរបស់អាមេរិក និងនីហ្សេរីយ៉ា
05/17/2026 11:05 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.