នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី៖គិតត្រឹមខែមេសាឆ្នាំនេះយុវជនមកពីគ្រួសារក្រីក្រ និងងាយរងហានិភ័យចំនួន ២៧,១ម៉ឺននាក់ទទួលបានការបណ្ដុះបណ្ដាលជំនាញវិជ្ជាជីវៈ
សម្ដេ​ចតេជោ ហ៊ុន សែន៖«២០ មិថុនា ១៩៧៧ ជីវិតរបស់ខ្ញុំ និងភរិយាពេលនោះជួបជាមួយគ្រោះថ្នាក់ និងលំបាកវេទនាខ្លាំងណាស់»
សម្តេចតេជោ ហ៊ុន សែន ថ្លែងថា អាវក្រោះ និងសម្ភារយោធាម៉ាក DSS សុទ្ធតែមានគុណភាពហើយអាវការពារនេះនាយករដ្ឋមន្រ្តីបានសាករួចហើយ
សម្ដេចតេជោ ហ៊ុន សែន អញ្ជើញពិនិត្យមើលរោងចក្រ ផលិតសម្ភារៈយោធា DSS និងសំណេះសំណាលជាមួយកម្មករ កម្មការិនី

នយោបាយ​ និង ការអភិវឌ្ឍន៍

ការធ្វើមិនបានល្អរបស់លោក Biden ក្នុងពេលជជែកដេញដោល ធ្វើឱ្យបក្សប្រជាធិបតេយ្យ ព្រួយបារម្ភ

2024/06/28 02:15:58 pm        158
Facebook Telegram Linkin
ការធ្វើមិនបានល្អរបស់លោកប្រធានាធិបតីអាមេរិក ចូ បៃដិន (Joe Biden) ប្រឆាំងនឹងគូប្រជែងលោក ដូណាល់ ត្រាំ (Donald Trump) កាលពីថ្ងៃព្រហស្បតិ៍ (២៧ មិថុនា) បានធ្វើឱ្យគណបក្សប្រជាធិបតេយ្យមានភាពច្របូកច្របល់ និងបានជំរុញឱ្យក្រុមអ្នកយុទ្ធសាស្រ្តមួយចំនួនចោទសួរថាតើគណបក្សរបស់ពួកគេគួរតែចាត់វិធានការដែលមិនធ្លាប់មានពីមុនមក គឺរើសអ្នកជំនួសលោកជាបេក្ខជនប្រធានាធិបតីរបស់ពួកគេ ឬទេ។អ្នកគាំទ្រលោក បៃដិន សង្ឃឹមថាការជជែកដេញដោលនៅយប់ថ្ងៃព្រហស្បតិ៍នេះ នឹងបំបាត់ការព្រួយបារម្ភដែលថាមេដឹកនាំវ័យ ៨១ ឆ្នាំរូបនេះចំណាស់ពេកក្នុងការកាន់អាណត្តិមួយទៀត ប៉ុន្តែការប៉ះទង្គិចគ្នាក្នុងការជជែកដេញដោលរយៈពេល ៩០ នាទីនោះ ហាក់ដូចជាបង្ហាញភាពផ្ទុយពីនេះ។ ទាំងលោក បៃដិន និងលោក ត្រាំ បានប្រឈមនឹងការព្រួយបារម្ភអំពីវ័យចំណាស់ និងកាយសម្បទារបស់ពួកគេនៅក្នុងការបោះឆ្នោតថ្ងៃទី០៥ ខែវិច្ឆិកា ប៉ុន្តែបញ្ហានោះបានដាក់បន្ទុកយ៉ាងធ្ងន់ទៅលើលោក បៃដិន។ ឥឡូវនេះ តិចជាងប្រាំខែមុនពេលការបោះឆ្នោតអាមេរិក អ្នកយុទ្ធសាស្រ្តបក្សប្រជាធិបតេយ្យ និងអ្នករៃអង្គាសប្រាក់មួយចំនួនកំពុងចោទសួរជាឯកជនថា តើប្រធានាធិបតីរូបនេះគួរតែត្រូវបានជំនួសឬទេ។ក្នុងសំឡេងដ៏ស្អករបស់ខ្លួននៅក្នុងអ្វីដែលមន្រ្តីសេតវិមានបានប្រាប់អ្នកយកព័ត៌មានថាមានភាពត្រជាក់ លោក បៃដិន បានប្រញាប់ប្រញាល់រំលងចំណុចនិយាយខ្លះរបស់ខ្លួននៅលើវេទិកា ដោយបានរអាក់រអួលខ្លាំងលើចម្លើយមួយចំនួន។ នៅដើមដំបូងនៃការជជែកដេញដោល លោក បៃដិន បានផ្អាកនៅពេលដែលលោកកំពុងរកនឹកប្រធានបទនិយាយអំពីវិស័យថែទាំសុខភាព និងកំណែទម្រង់ពន្ធ ហើយហាក់ដូចជាភ្លេចភ្លាំងបាត់បង់ការគិតរបស់ខ្លួន៕

បក្សកុម្មុយនិស្តចិន បណ្តេញអតីតរដ្ឋមន្ត្រីការពារជាតិពីររូបចេញពីបក្ស ជុំវិញអំពើពុករលួយ

2024/06/28 02:07:13 pm        103
Facebook Telegram Linkin
ទីភ្នាក់ងារសារព័ត៌មានរដ្ឋស៊ីនហួ (Xinhua) បានរាយការណ៍ថា គណបក្សកុម្មុយនិស្តចិន កាលពីថ្ងៃព្រហស្បតិ៍ (២៧ មិថុនា) បានបណ្តេញអតីតរដ្ឋមន្ត្រីការពារជាតិ លោក លី សាងហ្វ៊ូ (Li Shangfu) និងអ្នកកាន់តំណែងមុនគឺលោក វ៉ី ហ្វឹងហឺ (Wei Fenghe) ពីបទ «បំពានវិន័យយ៉ាងធ្ងន់ធ្ងរ» ដែលជាឃ្លាប្រើជំនួសអំពើពុករលួយ។របាយការណ៍បាននិយាយដោយដកស្រង់គណៈកម្មាធិការមជ្ឈិមដែលបញ្ជាឱ្យស៊ើបអង្កេតថា លោក លី ត្រូវបានគេសង្ស័យថាបានទទួល «ចំនួនលុយដ៏ច្រើន» ក្នុងការសូកប៉ាន់ ក៏ដូចជាបានសូកប៉ាន់អ្នកដទៃ ហើយការស៊ើបអង្កេតបានរកឃើញថា លោក «មិនបានបំពេញទំនួលខុសត្រូវផ្នែកនយោបាយ» និង «កេងផលប្រយោជន៍បុគ្គលិកសម្រាប់ខ្លួនឯង និងអ្នកដទៃ»។លោក លី ត្រូវបានបណ្តេញចេញពីតំណែងជារដ្ឋមន្ត្រីការពារជាតិ យ៉ាងអាថ៌កំបាំងដោយគ្មានការពន្យល់កាលពីខែតុលា ឆ្នាំមុន បន្ទាប់ពីបាត់ខ្លួនអស់រយៈពេលពីរខែ។ នេះជាលើកទីមួយហើយ ដែលប្រទេសចិនបានបញ្ជាក់យ៉ាងច្បាស់ថា លោក លី ស្ថិតនៅក្រោមការស៊ើបអង្កេត ក៏ដូចជាព័ត៌មានលម្អិតអំពីលក្ខណៈនៃបទល្មើសរបស់លោក។ជាមួយគ្នានេះ លោក វ៉ី ហ្វឹងហឺ ដែលជាអ្នកកាន់តំណែងពីមុនរបស់លោក លី ក៏បានបាត់ខ្លួនពីទិដ្ឋភាពសាធារណៈចាប់តាំងពីលោកត្រូវបានជំនួសកាលពីខែមីនា ឆ្នាំមុន ក្នុងអំឡុងពេលការរុះរើគណៈរដ្ឋមន្ត្រីដែលបានគ្រោងទុក។ សារព័ត៌មានស៊ីនហួ បានរាយការណ៍ថា ការស៊ើបអង្កេតមួយដែលបានបើកដំណើរការលើលោក វ៉ី កាលពីខែកញ្ញា ឆ្នាំមុន បានរកឃើញថាលោកបានទទួលយក «ប្រាក់ក្នុងចំនួនដ៏ច្រើន និងវត្ថុមានតម្លៃ» នៅក្នុងសំណូក និង «បានជួយអ្នកដទៃឱ្យទទួលបានអត្ថប្រយោជន៍មិនសមរម្យនៅក្នុងការរៀបចំជួរបុគ្គលិក»។ របាយការណ៍បានបន្ថែមថា មន្ត្រីទាំងពីររូបនេះក៏ត្រូវបានរកឃើញថាបានប្រព្រឹត្តការរំលោភបំពានមិនជាក់លាក់ផ្សេងទៀតដែរ បុន្តែមិនបានបញ្ជាក់លម្អិតនោះទេ៕

លោក Biden និងលោក Trump ប៉ះទង្គិចគ្នាលើគោលនយោបាយការបរទេសជុំវិញសង្រ្គាមអ៊ុយក្រែន

2024/06/28 02:02:48 pm        145
Facebook Telegram Linkin
ឈ្មោះប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ត្រូវបានលោកឡើងដោយលោកប្រធានាធិបតីអាមេរិក ចូ បៃដិន (Joe Biden) និងគូប្រជែងលោក ដូណាល់ ត្រាំ (Donald Trump) ចំនួនរាប់សិបដងក្នុងអំឡុងការជជែកដេញដោលបេក្ខជនប្រធានាធិបតីអាមេរិក ក្នុងរយៈពេលមួយម៉ោងកន្លះកាលពីថ្ងៃព្រហស្បតិ៍ (២៧ មិថុនា) ខណៈដែលអ្នកទាំងពីរកំពុងប្រជែងគ្នាដើម្បីបង្ហាញថាអ្នកណាខ្លាំងជាង លើគោលនយោបាយការបរទេស។លោក ត្រាំ បាននិយាយអំពីលោក បៃដិន ដោយចាប់ផ្តើមការប៉ះទង្គិចគ្នាជាបន្តបន្ទាប់រវាងបេក្ខជនទាំងពីរជុំវិញសង្គ្រាមនៅអ៊ុយក្រែនថា «ប្រសិនបើយើងមានប្រធានាធិបតីពិតប្រាកដមួយរូប ដែលត្រូវបានគោរពដោយលោក ពូទីន នោះលោកប្រហែលជាមិនឈ្លានពានអ៊ុយក្រែនទេ»។លោក បៃដិន បានតបទៅលោក ត្រាំ ថា «អញ្ជើញចុះ! ទុកឱ្យលោក ពូទីន ចូលទៅគ្រប់គ្រងអ៊ុយក្រែន រួចបន្តទៅកាន់ប៉ូឡូញ និងកន្លែងផ្សេងទៀតចុះ ហើយចាំមើលថាមានអ្វីកើតឡើង។ លោក ត្រាំ មិនដឹងទេថាខ្លួនកំពុងនិយាយផ្ដេសផ្ដាសប៉ុណ្ណា»។របៀបបញ្ចប់សង្រ្គាមនៅអ៊ុយក្រែន ការជជែកដេញដោលលើការគាំទ្ររបស់សហរដ្ឋអាមេរិក ចំពោះអង្គការណាតូ និងថាតើបណ្តាប្រទេសនៅអឺរ៉ុប កំពុងរួមចំណែកគ្រប់គ្រាន់ដល់កិច្ចខិតខំប្រឹងប្រែងប្រឆាំងនឹងប្រតិបត្តិការយោធារុស្ស៊ី ដែរឬទេ បានគ្របដណ្តប់យ៉ាងក្ដៅគគុកលើការពិភាក្សាលើជម្លោះ។ ចំណែកលោក ពូទីន ធ្លាប់បានបង្ហាញការព្រងើយកន្តើយរបស់ខ្លួនចំពោះលទ្ធផលនៃការបោះឆ្នោតអាមេរិក ដោយនិយាយកាលពីខែមុនថា លោកមិនខ្វល់ឡើយថាអ្នកណានឹងឈ្នះ។នៅពេលដែលពលរដ្ឋអាមេរិកទៅបោះឆ្នោតនៅថ្ងៃទី០៥ ខែវិច្ឆិកា មនុស្សជាច្រើននឹងថ្លឹងថ្លែងលើបញ្ហាគោលនយោបាយការបរទេសដូចជាបញ្ហាអ៊ុយក្រែន និងអ៊ីស្រាអែល ប្រឆាំងនឹងក្តីកង្វល់ដែលនៅជិតខ្លួនដូចជាបញ្ហាអន្តោប្រវេសន៍ ការរំលូតកូន និងសេដ្ឋកិច្ចជាដើម៕

បក្សនយោបាយនានាស្ងើចសរសើរពីការលះបង់របស់ថ្នាក់ដឹកនាំគណបក្សប្រជាជនកម្ពុជា និងមានសាមគ្គីភាព

2024/06/28 01:59:35 pm        123
Facebook Telegram Linkin
គណបក្សនយោបាយនានា ស្ងើចសរសើរពីការលះបង់របស់ថ្នាក់ដឹកនាំគណបក្សប្រជាជនកម្ពុជា និងមានសាមគ្គីភាព ទើបធ្វើឱ្យកម្ពុជាមានសន្តិភាព ស្ថិរភាព និងការអភិវឌ្ឍយ៉ាងពិតប្រាកដ។ថ្លែងប្រាប់ BTV នៅថ្ងៃទី២៨ ខែមិថុនា ឆ្នាំ២០២៤ ស្របពេល​គណបក្ស​ប្រជាជន​កម្ពុជា​អបអរ​សាទ​រ​ខួបលើកទី៧៣នៃថ្ងៃបង្កើតគណបក្សប្រជាជនកម្ពុជា បណ្តាមេដឹកនាំគណបក្សនយោបាយ បានចូលរួមបង្ហាញការអបអរសាទរជាមួយនឹងការតស៊ូ និង​ឆន្ទៈ​មុះមុត​របស់​ថ្នាក់​ដឹក​នាំ​គណបក្ស​ប្រជាជន​កម្ពុជា​ដែលបានពុះពារគ្រប់ឧបសគ្គដ៏វែងឆ្ងាយក្នុងការសង្គ្រោះ និងកសាងកម្ពុជា​ពី​បាត​ដៃ​ទទេ ពោលពីប្រទេសដែលធ្លាប់ធ្លាក់ក្នុងភ្លើងសង្គ្រាមមកជាប្រទេសមានកិត្យានុភាព និង​រីក​ចម្រើន​ទាំង​ក្នុងតំបន់ និងអន្តរជាតិ។ លោក អ៊ុន វិសិទ្ធគុន ប្រធានគណបក្សកម្លាំងប្រជាធិបតេយ្យ លើកឡើងថា គណបក្សប្រជាជន​មាន​ឆន្ទៈ​ស្រលាញ់ជាតិ និងប្រជាជន ជាង៤៥ឆ្នាំមកនេះ គណបក្សប្រជាជនកម្ពុជាបានស្វាគមន៍ និង​បើកចំហរភាពស្និទ្ធស្នាលជាមួយ​អ្នក​នយោបាយ​គ្រប់​និន្នាការ​ក្នុង​ស្មារតី​បន្ត​ដឹកនាំ​កម្ពុជា​ឱ្យ​មាន​សន្ដិភាព និងស្ថិរភាពតទៅមុខទៀត។ជាមួយគ្នាលោក អ៊ុន ជឹម ប្រធានគណបក្សឯកភាពជាតិខ្មែរ បានស្ងើច​សរសើរ​ចំពោះ​គុណ​បំណាច់​របស់​គណបក្សប្រជាជនកម្ពុជាជួយប្រជាជនផុតពីរបបប្រល័យពូជសាសន៍ ប៉ុល ពត និង​បន្តដឹកនាំមាគ៌ាពីប្រទេសក្សត់ខ្សោយទាំងសេដ្ឋកិច្ចរហូតនាំមកនូវលទ្ធិប្រជាធិបតេយ្យ សេរី ពហុ​បក្សពិតប្រាកដ។ ទន្ទឹមគ្នានេះ លោក ហួត សុខដុម ប្រធានគណបក្សនគរប្រជាធិបតេយ្យ លើកឡើងដែរថា គណបក្ស​ប្រជាជនកម្ពុជាបានបង្កើតចលនាមហាជន និងតែងតែលើកស្ទួយលទ្ធិប្រជាធិបតេយ្យ ដោយ​មិន​ប្រកាន់និន្នការ ក្នុងន័យសាមគ្គីភាព និងរួបរួមគ្នាជាខ្មែរតែមួយ ដើម្បីធានា​ឱ្យ​សង្គម​ជាតិ​រុង​រឿង​ជា​និរន្ត។សូមជម្រាបថា ក្រៅពីរយៈពេល៧៣ឆ្នាំនៃការកកើតគណបក្សប្រជាជនកម្ពុជា ក្នុង​នោះ​រយៈពេល​៤៥​ឆ្នាំ​គណបក្សដ៏មានវ័យចំណាស់ និងរឹងមាំមួយ​នេះបាន​នាំ​ឱ្យកម្ពុជា​ឆ្លង​ផុត​ដំណាក់​កាល​ដ៏​ឃោឃៅ​គឺ​របបប្រល័យពូជសាសន៍ ប៉ុល ពត ដែលជួយសង្គ្រោះជីវិតប្រជាជនជាច្រើនលាននាក់ រហូត​នាំឱ្យកម្ពុជាមានសន្តិភាព ស្ថិរភាពនយោបាយ និងសេដ្ឋកិច្ចតាមរយៈនយោបាយឈ្នះ ឈ្នះ ដែលមានប្រតិបត្តិករមគ្គុទេសឯក សម្តេចតេជោ ហ៊ុន សែន និងឥស្សរជនជាច្រើនរូបទៀត៕អត្ថបទ សេក ឧត្តម 

ប្រធានាធិបតីចិន លោក Xi ជំរុញឱ្យបង្កើនភាពជិតស្និទ្ធ ស្របពេលជម្លោះពាណិជ្ជកម្ម និងការទូត

2024/06/28 01:57:25 pm        58
Facebook Telegram Linkin
ប្រធានាធិបតីចិន លោក ស៊ី ជីនពីង (Xi Jinping) នៅថ្ងៃសុក្រ (២៨ មិថុនា) នេះ បានអំពាវនាវឱ្យមានការកសាង «ស្ពានចម្លង» និងបង្កើនភាពជិតស្និទ្ធនៅក្នុងសេដ្ឋកិច្ចពិភពលោក ខណៈដែលទីក្រុងប៉េកាំង កំពុងដោះស្រាយជម្លោះសេដ្ឋកិច្ច និងសន្តិសុខជាមួយប្រទេសជិតខាង ព្រមទាំងដៃគូពាណិជ្ជកម្មជុំវិញពិភពលោក។ប្រទេសចិន នឹងមិនចាកចេញពីផ្លូវនៃការអភិវឌ្ឍន៍ដោយសន្តិវិធីនោះទេ នេះបើតាមលោក ស៊ី បានលើកឡើងនៅក្នុងសន្និសីទមួយដែលរំលឹកដល់គោលការណ៍ណែនាំរបស់ប្រទេសចិន សម្រាប់កិច្ចការបរទេសដែលបានបង្កើតជាលើកដំបូងកាលពី ៧០ ឆ្នាំមុន។លោក ស៊ី បានប្រាប់អ្នកចូលរួមសន្និសីទ ដែលរួមមានអតីតប្រធានាធិបតីមីយ៉ាន់ម៉ា លោក ថេន សេន (Thein Sein) និងអតីតអគ្គលេខាបក្សកុម្មុយនិស្តវៀតណាម លោក នុង ឌុកម៉ាញ់ (Nong Duc Manh) ថា ប្រទេសចិន នឹងមិនក្លាយជា «រដ្ឋដ៏រឹងមាំ» ដែលព្យាយាមគ្របដណ្ដប់សង្កត់សង្កិនលើប្រទេសដទៃនោះទេ។ចាប់តាំងពីទសវត្សរ៍ឆ្នាំ១៩៥០ មក បក្សកុម្មុយនិស្តដែលកំពុងកាន់អំណាចរបស់ប្រទេសចិន បានចាកចេញពីការមិនទទួលស្គាល់ដោយអង្គការសហប្រជាជាតិ ទៅជាប្រទេសមានឥទ្ធិពលការទូតដ៏ធំបំផុតនៅក្នុងពិភពលោក និងជាមហាអំណាចលើសេដ្ឋកិច្ចធំបំផុតទីពីរ។ ឥឡូវនេះទីក្រុងប៉េកាំង បង្ហាញការចង់បានមួយដែលឱ្យរដ្ឋផ្សេងទៀតមើលឃើញថាខ្លួនមានឥទ្ធិពលលើសលប់ខ្លាំងខាងការទូត ទោះបីជាប្រទេសមួយចំនួនចោទប្រកាន់ដោយមិនសមហេតុផលថាចិនមានការបង្ខិតបង្ខំផ្នែកសេដ្ឋកិច្ច និងការប្រកួតប្រជែងមិនយុត្តិធម៌ក៏ដោយ៕

មេដឹកនាំនយោបាយបារាំង ជជែកដេញដោលតាមទូរទស្សន៍ មុនការបោះឆ្នោតនៅពេលខាងមុខ

2024/06/28 12:38:37 pm        106
Facebook Telegram Linkin
មេដឹកនាំនយោបាយប្រទេសបារាំង បានជាប់គាំងនៅក្នុងការជជែកដេញដោល តាមទូរទស្សន៍ដ៏ក្តៅគគុកមួយ កាលពីថ្ងៃព្រហស្បតិ៍ លើបញ្ហាជាច្រើន ដែលរួមមានទាំងជំនួយសម្រាប់ប្រទេសអ៊ុយក្រែននៅមុនការបោះឆ្នោតសភាជាន់ទាប នៅក្នុងប្រទេសបារាំង។ ការបោះឆ្នោតជុំទីមួយ នឹងធ្វើឡើងនៅថ្ងៃអាទិត្យខាងមុខនេះ បន្ទាប់មកជុំទីពីរ នៅថ្ងៃទី៧ ខែកក្កដា។ប្រធានាធិបតីបារាំង លោក Emmanuel Macron បានអំពាវនាវឲ្យមានការបោះឆ្នោតមុនអណត្តិសម្រាប់សភាជាតិ នៅដើមខែនេះ។ ចំណាត់ការនេះ បានធ្វើឡើងបន្ទាប់ពីក្រុមចម្រុះនិយមកណ្តាលរបស់លោក បានបរាជ័យនៅក្នុងការបោះឆ្នោតសភាអឺរ៉ុប។ ការជជែកដេញដោលនេះ ត្រូវបានចូលរួមដោយនាយករដ្ឋមន្ត្រីបារាំង លោក ហ្គាប្រ៊ីអែល អាតាល់(Gabriel Attal)មកពីក្រុមចម្រុះនិយមកណ្តាល មេដឹកនាំគណបក្សNational Rally លោក ចឌែន បាដែលឡា(Jordan Bardella) និងមេដឹកនាំសង្គមនិយម លោក អូលីវីយឺ ហ្វូរ៉េ(Olivier Faure) ដែល តំណាងឱ្យគណបក្សសម្ព័ន្ធរណសិរ្សនិយមថ្មី ឆ្វេងនិយមដែលទើបបង្កើតថ្មី។លោក Bardella បាននិយាយថា លោកនឹងក្លាយជានាយករដ្ឋមន្ត្រីសម្រាប់ប្រជាជនបារាំងទាំងអស់ ហើយលោក មានបំណងធ្វើឲ្យជីវិតប្រចាំថ្ងៃរបស់ប្រជាជនក្លាយជាស្នូលនៃសកម្មភាពសាធារណៈ។ លោកនិយាយថា លោកនឹងដាក់អាទិភាពលើវិធានការដើម្បីដោះស្រាយការកើនឡើងតម្លៃ និងធ្វើឱ្យសន្តិសុខប្រសើរឡើង។ ទាក់ទងទៅនឹងជំនួយរបស់អ៊ុយក្រែន លោក Bardella បាននិយាយថា លោកប្រឆាំងការបញ្ជូនកងទ័ពបារាំង និងមីស៊ីលរយៈចម្ងាយឆ្ងាយទៅកាន់ប្រទេសអ៊ុយក្រែន ខណៈលោកចង់ការពារប្រទេសបារាំងពីហានិភ័យនៃការកើនឡើងភាពតានតឹងជាមួយរុស្ស៊ី។ ប៉ុន្តែលោក Attal បានបញ្ជាក់លើតម្រូវការគាំទ្រអ៊ុយក្រែន ដោយនិយាយថា ជ័យជម្នះរបស់រុស្ស៊ីនឹងមានផលប៉ះពាល់ធ្ងន់ធ្ងរ លើសន្តិសុខ និងសេដ្ឋកិច្ចរបស់ប្រទេសបារាំង។ការស្ទង់មតិសាធារណៈដែលបានចេញផ្សាយកាលពីថ្ងៃព្រហស្បតិ៍ បានបង្ហាញថា គណបក្ស National Rally និងបេក្ខជន ដែលមានទំនាក់ទំនងជាមួយគណបក្ស អាចទទួលជម្នះរហូតដល់២៦០ អាសនៈ។ ការស្ទង់មតិ បានបង្ហាញថាគណបក្សសម្ព័ន្ធភាពរណសិរ្សនិយមថ្មី អាចឈ្នះបានរហូតដល់២១០ អាសនៈ និងក្លាយជាកម្លាំងធំទីពីរនៅក្នុងសភាជាន់ទាប។

កងកម្លាំងអ៊ុយក្រែន វាយរុញទាហានរុស្ស៊ី ចេញពីផ្នែកមួយនៃទីក្រុងភាគខាងកើតដ៏សំខាន់

2024/06/28 11:09:46 am        331
Facebook Telegram Linkin
យោធាអ៊ុយក្រែនបាននិយាយកាលពីថ្ងៃព្រហស្បតិ៍ (២៧ មិថុនា) ថា កងកម្លាំងរបស់ខ្លួនបានបង្ខំឱ្យកងទ័ពរុស្ស៊ី ដកថយចេញពីតំបន់មួយក្នុងទីក្រុង ចាស៊ីវយ៉ា (Chasiv Yar) នៅផ្នែកសមរភូមិមុខភាគខាងកើតនៃសង្រ្គាម ដែលត្រូវបានគេមើលឃើញថាជាគោលដៅបន្ទាប់របស់ទីក្រុងមូស្គូ ក្នុងការវាយរុលទៅមុខយឺតៗតាមរយៈតំបន់នោះ។ប៉ុន្តែរបាយការណ៍រុស្ស៊ីមួយបាននិយាយថា កងកម្លាំងរបស់ក្រុងមូស្គូ បានបំផ្លាញប៉មទំនាក់ទំនងមួយនៅជិតក្រុងនេះ ហើយបានបន្តវាយឆ្ពោះទៅមុខទៀត។ កងកម្លាំងរុស្ស៊ី កំពុងវាយរុញបន្តិចម្តងៗឆ្លងកាត់ផ្នែកមួយចំនួននៃភាគខាងកើតអ៊ុយក្រែន ដោយដណ្តើមបានទីក្រុងជាច្រើនចាប់តាំងពីការដណ្តើមយកទីក្រុង អាវឌីអ៊ីវកា (Avdiivka) ដ៏សំខាន់ក្នុងខែកុម្ភៈ មក។ទីក្រុង ចាស៊ីវយ៉ា ស្ថិតនៅលើតំបន់ដីខ្ពស់ចម្ងាយ ២០ គីឡូម៉ែត្រ នៅភាគខាងលិចនៃក្រុង បាកមូដ (Bakhmut) ជាទីដែលកងកម្លាំងរុស្ស៊ី ដណ្ដើមបានកាលពីមួយឆ្នាំមុន បន្ទាប់ពីការប្រយុទ្ធជាច្រើនខែ។ ភាគីទាំងពីរមើលឃើញថាក្រុង ចាស៊ីវយ៉ា ជាចំណុចចាប់ផ្តើមដ៏មានសក្ដានុពលសម្រាប់រុស្ស៊ី ក្នុងការវាយរុលទៅមុខលើទីក្រុងសំខាន់ៗនៃតំបន់ ដូណិតស្ក៍ (Donetsk) ភាគខាងកើត និងតំបន់ផ្សេងទៀត។ ស្ថានទូតអ៊ុយក្រែននៅទីក្រុងវ៉ាស៊ីនតោន បានបង្ហោះការអង្វរករមួយនៅលើវេទិកាប្រព័ន្ធផ្សព្វផ្សាយសង្គម X ឱ្យរុស្ស៊ី បញ្ឈប់ការវាយរុលរបស់ខ្លួននៅលើក្រុង ចាស៊ីវយ៉ា ដោយនិយាយថាទីក្រុងមូស្គូ កំពុងព្យាយាមយ៉ាងខ្លាំងក្នុងការលុបបំបាត់ទីក្រុងនេះ ដាក់គោលដៅលើសូម្បីតែព្រះវិហារដែលរងការខូចខាតរួចទៅហើយ និងអគារលំនៅដ្ឋានស៊ីវិល៕

ក្រុមបាតុករគាំទ្រលោក Biden និងលោក Trump ប្រមូលផ្តុំគ្នានៅក្រុងអាត្លង់តា អំឡុងការជជែកដេញដោល

2024/06/28 11:05:19 am        125
Facebook Telegram Linkin
ក្រុមបាតុករគូប្រជែងបានប្រមូលផ្តុំគ្នានៅទីក្រុង អាត្លង់តា (Atlanta) រដ្ឋ ចចា (Georgia) សហរដ្ឋអមេរិក កាលពីថ្ងៃព្រហស្បតិ៍ (២៧ មិថុនា) ខណៈដែលប្រធានាធិបតីបក្សប្រជាធិបតេយ្យ លោក ចូ បៃដិន (Joe Biden) និងគូប្រជែងមកពីគណបក្សសាធារណរដ្ឋរបស់ខ្លួនគឺលោក ដូណាល់ ត្រាំ (Donald Trump) ស្ថិតក្នុងវេទិកាសម្រាប់ការជជែកដេញដោលបេក្ខជនប្រធានាធិបតី ដែលនឹងផ្តល់ឱ្យអ្នកបោះឆ្នោតនូវទិដ្ឋភាពដ៏កម្រមួយរវាងបេក្ខជនវ័យចំណាស់បំផុតទាំងពីរដែលមិនធ្លាប់មាន ក្នុងការស្វះស្វែងរកតំណែងប្រធានាធិបតីអាមេរិក។អ្នកគាំទ្រលោក បៃដិន ឈ្មោះថា អាន់តូណេត ហ្កាស្តុន (ANTOINETTE GASTON) និយាយថា «លោក បៃដិន គឺជាជម្រើសដ៏ល្អបំផុត ជំនួសឱ្យការគាំទ្រឧក្រិដ្ឋជន ដោយចង់សំដៅដល់លោក ត្រាំ ដែលជាប់បទចោទប្រកាន់ចំនួន ៣៤ ករណី។ »។អ្នកគាំទ្រលោក ត្រាំ ឈ្មោះថា ជីមមី (JIMMY) និយាយថា «យើគាំទ្រលោកព្រោះថាអតិផរណាមានកម្រិតទាបណាស់នៅលើការគ្រប់គ្រងរបស់លោក ត្រាំ មិនដូចពេលនេះទេ។ គ្រឿងទេស ហ្គាស តម្លៃផ្ទះ អ្វីគ្រប់យ៉ាងគឺទាបនៅពេលលោកកាន់តំណែង ហើយអត្រាអ្នកអត់ការងារធ្វើគឺកាន់តែទាបជាងនៅនេះទៅទៀតក្នុងចំណោមយុវជន»។ការជជែកដេញដោលតាមកញ្ចក់ទូរទស្សន៍រយៈពេល ៩០ នាទី ដែលជាលើកទីមួយរវាងប្រធានាធិបតីកំពុងកាន់តំណែង និងអតីតប្រធានាធិបតីអាមេរិក បានកើតឡើងនៅពេលដែលមានការខ្វែងគំនិតគ្នាយ៉ាងជ្រាលជ្រៅ និងការថប់បារម្ភយ៉ាងខ្លាំងក្នុងចំណោមអ្នកបោះឆ្នោតអំពីស្ថានភាពនយោបាយអាមេរិក៕

មេដឹកនាំអឺរ៉ុប ជ្រើសរើស លោកស្រី von der Leyen សម្រាប់អាណត្តិទីពីរ ជាប្រធានគណៈកម្មការ

2024/06/28 11:01:28 am        87
Facebook Telegram Linkin
មេដឹកនាំសហភាពអឺរ៉ុប បានព្រមព្រៀងតែងតាំងលោកស្រី Ursula von der Leyen មកពីប្រទេសអាល្លឺម៉ង់ សម្រាប់អាណត្តិទីពីររយៈពេលប្រាំឆ្នាំ ជាប្រធានគណៈកម្មការអឺរ៉ុបបន្តទៀត ដែលជាស្ថាប័នប្រតិបត្តិដ៏មានឥទ្ធិពលរបស់សហភាពអឺរ៉ុប។នៅក្នុងកិច្ចប្រជុំកំពូលនៅទីក្រុងប្រ៊ុចសែល ប្រទេសបែលហ្ស៊ិក មេដឹកនាំប្រទេសទាំង២៧ របស់ប្លុកនេះ ក៏បានជ្រើសរើសអតីតនាយករដ្ឋមន្ត្រីប្រទេសព័រទុយហ្គាល់ លោក Antonio Costa ជាប្រធាននៃកិច្ចប្រជុំក្រុមប្រឹក្សាអឺរ៉ុបនាពេលអនាគតរបស់ពួកគេ និងបានជ្រើសរើសនាយករដ្ឋមន្ត្រីប្រទេសអេស្តូនី លោក Kaja Kallas ជាប្រធានគោលនយោបាយការបរទេសរបស់សហភាពអឺរ៉ុប បន្ទាប់។កញ្ចប់ភាពជាអ្នកដឹកនាំ តំណាងឱ្យការបន្តនៅក្នុងតំណែងកំពូលរបស់ប្លុកអឺរ៉ុប ដែលមានប្រជាជនប្រហែល ៤៥០លាននាក់ ជាមួយនឹងក្រុមគាំទ្រអឺរ៉ុបនិយមកណ្តាល នៅរក្សាតំណែងកំពូល ទោះបីជាមានការកើនឡើងអ្នកស្តាំនិយម នៅក្នុងការបោះឆ្នោត សភាអឺរ៉ុប កាលពីដើមខែនេះក៏ដោយ។អ្នកទាំងបី បានទទួលការគាំទ្រយ៉ាងទូលំទូលាយ ប៉ុន្តែនាយករដ្ឋមន្ត្រីអ៊ីតាលីស្តាំនិយម លោក ចចា មែលឡូនី(Giorgia Meloni) បានអនុបវាទការបោះឆ្នោតលើលោកស្រី von der Leyen ហើយបានបោះឆ្នោតប្រឆាំងលោក Costa និងលោក Kallas នេះបើយោងតាមអ្នកការទូត។ការតែងតាំងលោកស្រី Von der Leyen នៅតែត្រូវការ ការអនុម័តពីសភាអឺរ៉ុប នៅក្នុងការបោះឆ្នោតសម្ងាត់មួយ ដែលត្រូវបានគេមើលឃើញយ៉ាងទូលំទូលាយថា ជាសំណើរដ៏ពិបាកមួយ ជាងការយល់ព្រមចំពោះលោកស្រី ដោយមេដឹកនាំសហភាពអឺរ៉ុប។

សម្ដេចតេជោ៖ សន្ដិភាពជាង២៥ឆ្នាំមកនេះ កម្ពុជាបានអភិវឌ្ឍន៍រីកចម្រើនផុតពីប្រទេសមានចំណូលទាប និងកំពុងឆ្ពោះទៅសម្រេចចក្ខុវិស័យចំណូលមធ្យមកម្រិតខ្ពស់នៅឆ្នាំ២០៣០

2024/06/28 10:44:58 am        250
Facebook Telegram Linkin
ក្នុងឱកាសប្រារព្ធមិទ្ទិញអបអរសាទរខួប៧៣ឆ្នាំ ថ្ងៃកំណើតគណបក្សប្រជាជនកម្ពុជាថ្ងៃទី២៨ ខែមិថុនា ឆ្នាំ១៩៥១ ថ្ងៃទី២៨ ខែមិថុនា ឆ្នាំ២០២៤ សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស​ប្រជាជនកម្ពុជា មានប្រសាសន៍បញ្ជាក់ថា ការសម្រេចបាននូវសន្តិភាពពេញលេញ​រយៈពេលជាង២៥ឆ្នាំមកនេះ បានអនុញ្ញាតឱ្យកម្ពុជាប្រមូលផ្តុំធនធានគ្រប់យ៉ាង និងកម្លាំងជាតិ​ទាំងមូល​ដើម្បីអភិវឌ្ឍប្រទេសជាតិឱ្យមានការរីកចម្រើនយ៉ាងលឿន​ដោយបានចេញផុតពីប្រទេស​មានចំណូលទាប ទៅជាប្រទេសចំណូលមធ្យមកម្រិតទាប ហើយកំពុងប្រឹងប្រែងឆ្ពោះទៅ​សម្រេចចក្ខុវិស័យជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០។សម្ដេចតេជោ ហ៊ុន សែន បានមានប្រសាសន៍ថា ដើម្បីបន្តឈានទៅធ្វើឱ្យកម្ពុជា ជាប្រទេសមាន​ចំណូល ខ្ពស់នៅឆ្នាំ ២០៥០ បច្ចុប្បន្នដំណើរជាតិកំពុងបន្តប្រព្រឹត្តទៅប្រកបដោយភាពវិជ្ជមាន។ ខណៈនៅក្នុងឆមាសទី១ឆ្នាំ២០២៤នេះ​ ប្រជាជនបន្តសម្រេចបានសមិទ្ធផលធំៗថ្មីៗថែមទៀត ក្នុងការអភិវឌ្ឍសង្គមជាតិទោះបីត្រូវរងឥទ្ធិពលពីការវិវត្តយ៉ាងស្មុគស្មាញនៃសភាពការណ៍អន្តរជាតិ ព្រមទាំងត្រូវបន្តដោះស្រាយផលវិបាកនៃវិបត្តិជំងឺកូវីដ-១៩ និងបញ្ហាប្រឈមផ្សេងៗទៀត​ជាច្រើនក្តី។ សម្ដេចតេជោ បានមានប្រសាសន៍ថា ឆ្លងតាមសមិទ្ធផលដ៏ថ្លៃថ្លាទាំងនេះបានបង្ហាញច្បាស់ថា​កម្ពុជាបាននិងកំពុងធ្វើដំណើរទៅមុខលើមាគ៌ាដ៏ត្រឹមត្រូវ គឺមាគ៌ាសន្តិភាព ប្រជាធិបតេយ្យ នីតិរដ្ឋ និងអភិវឌ្ឍន៍ ឆ្ពោះទៅរកអនាគតដ៏ភ្លឺស្វាង។ ក្នុងឱកាសនោះសម្ដេចតេជោ បានគូសបញ្ជាក់ឡើងវិញថា ជ័យជម្នះដ៏ត្រចះត្រចង់របស់គណបក្ស​ប្រជាជនកម្ពុជា ក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ នាខែកក្កដាឆ្នាំ២០២៣ បានអនុញ្ញាតឱ្យគណបក្សអនុវត្តនូវការសម្រេចចិត្តរបស់ខ្លួនក្នុងការប្រគល់ភារកិច្ច ដឹកនាំ​ប្រទេសជាតិ​ដល់ជួរអ្នកបន្តវេនវ័យក្មេង ដែលត្រូវបានបណ្តុះបណ្តាល និងត្រៀម លក្ខណសម្បត្តិ​យ៉ាងម៉ត់ចត់។ កិច្ចការនេះបានប្រព្រឹត្តទៅដោយរលូនក្នុងស្មារតីរក្សាដាច់ខាតនូវនិរន្តរភាពជាតិ និងដើម្បីធានានូវសន្តិភាព និងការអភិវឌ្ឍយូរអង្វែង ហើយមកដល់ពេលនេះ​រាជរដ្ឋាភិបាល​នីតិកាលទី៧នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណែត កំពុងដឹកនាំគ្រប់គ្រង​ប្រទេសប្រកបដោយភាពជោគជ័យ៕អត្ថបទ៖ វ៉ន ដារ៉ា

បណ្ដាញសង្គម

ព័ត៌មានថ្មីៗ

អ៊ុយក្រែនវាយប្រហារដោយដ្រូនជិត ២០០គ្រឿងទៅលើទីក្រុងមូស្គូ បណ្តាលឲ្យមនុស្សយ៉ាងតិច១៧នាក់រងរបួស
06/19/2026 03:06 PM
Facebook Telegram Linkin
កម្ពុជា និងអង្គការ SCO វាយតម្លៃខ្ពស់ចំពោះកិច្ចសហប្រតិបត្តិការទ្វេភាកីដ៏ល្អប្រសើរ នាពេលកន្លងមក
06/19/2026 03:06 PM
Facebook Telegram Linkin
មន្ត្រីជំនាញខេត្តកំពង់ចាម ចុះត្រួតពិនិត្យទីតាំងស្តុកសាច់បង្កក​តែមិនឃើញមាន​ទំនិញនាំ​ចូលខុសច្បាប់ពីថៃទេ
06/19/2026 03:06 PM
Facebook Telegram Linkin
កម្ពុជា-សហភាពសេដ្ឋកិច្ចអឺរ៉ុប-អាស៊ី​ (EAEU) ពិនិត្យ​ និង​ ពិចារណា​លើកិច្ច​ព្រមព្រៀង​ពាណិជ្ជកម្មសេរី (FTA)
06/19/2026 03:06 PM
Facebook Telegram Linkin
លោក TRUMP ពិពណ៌នាការចុះហត្ថលេខាលើ MoU របស់អ៊ីរ៉ង់ជាមួយអាមេរិកថា ជា «ការចុះចាញ់ដោយគ្មានលក្ខខណ្ឌ»
06/19/2026 02:06 PM
Facebook Telegram Linkin
លោក Vance៖ អាមេរិកត្រៀមខ្លួនជាស្រេចដើម្បីកាត់បន្ថយវត្តមានយោធានៅជិតអ៊ីរ៉ង់ដល់កម្រិតមុនជម្លោះ
06/19/2026 02:06 PM
Facebook Telegram Linkin
ស៊ីរីរាយការណ៍អំពីការលុកលុយថ្មីរបស់អ៊ីស្រាអែលចូលក្នុងទឹកដីរបស់ខ្លួន ខណៈភាពតានតឹងព្រំដែនកំពុងបន្ត
06/19/2026 02:06 PM
Facebook Telegram Linkin
នាយឧត្តមសេនីយ៍ គន់ គីម បន្តអញ្ជើញជួបសំណេះសំណាល និងពិភាក្សាការងារជាមួយថ្នាក់ដឹកនាំ និងសមាជិកនៃសមាគមមិត្តភាពរណសិរ្សភូមិភាគនិរតីកម្ពុជា
06/19/2026 02:06 PM
Facebook Telegram Linkin
លោក LAVROV៖ អឺរ៉ុបចង់បង្កកជម្លោះនៅអ៊ុយក្រែន ដើម្បីដាក់ពង្រាយកងយោធារបស់ខ្លួន
06/19/2026 02:06 PM
Facebook Telegram Linkin
UN៖បទឈប់បាញ់នៅហ្កាហ្សា «បរាជ័យ» ខណៈភាពអត់ឃ្លាន កណ្តុរ និងកម្ទេចកម្ទីបង្កការលំបាកដល់ជីវិតប្រចាំថ្ងៃ
06/19/2026 02:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.