នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី៖គិតត្រឹមខែមេសាឆ្នាំនេះយុវជនមកពីគ្រួសារក្រីក្រ និងងាយរងហានិភ័យចំនួន ២៧,១ម៉ឺននាក់ទទួលបានការបណ្ដុះបណ្ដាលជំនាញវិជ្ជាជីវៈ
សម្ដេ​ចតេជោ ហ៊ុន សែន៖«២០ មិថុនា ១៩៧៧ ជីវិតរបស់ខ្ញុំ និងភរិយាពេលនោះជួបជាមួយគ្រោះថ្នាក់ និងលំបាកវេទនាខ្លាំងណាស់»
សម្តេចតេជោ ហ៊ុន សែន ថ្លែងថា អាវក្រោះ និងសម្ភារយោធាម៉ាក DSS សុទ្ធតែមានគុណភាពហើយអាវការពារនេះនាយករដ្ឋមន្រ្តីបានសាករួចហើយ
សម្ដេចតេជោ ហ៊ុន សែន អញ្ជើញពិនិត្យមើលរោងចក្រ ផលិតសម្ភារៈយោធា DSS និងសំណេះសំណាលជាមួយកម្មករ កម្មការិនី

នយោបាយ​ និង ការអភិវឌ្ឍន៍

ឯកឧត្តមសាស្រ្តាចារ្យ ឈាង រ៉ា ចុះពិនិត្យការរៀបចំការបំពាក់សម្ភារបរិក្ខារពេទ្យ ហេដ្ឋារចនាសម្ព័ន្ធ មន្ទីរពេទ្យតេជោសែន កោះធំ

2024/03/12 07:09:23 am        274
Facebook Telegram Linkin
ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល នារសៀលថ្ងៃទី១១ ខែមីនា ឆ្នាំ២០២៤ បានដឹកនាំប្រតិភូក្រសួងសុខាភិបាល អញ្ជើញចុះពិនិត្យការរៀបចំការបំពាក់សម្ភារបរិក្ខារពេទ្យ ហេដ្ឋារចនាសម្ព័ន្ធ មន្ទីរពេទ្យតេជោសែន កោះធំ ដើម្បីត្រៀមសម្ពោធដាក់ឱ្យប្រើប្រាស់ជាផ្លូវការ ក្រោមអធិបតីភាពដ៏ខ្ពង់ខ្ពស់បំផុត សម្តេចមហាបរវធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នៅថ្ងៃទី១៣ ខែមីនា ឆ្នាំ២០២៤ ខាងមុខនេះ។ មន្ទីរពេទ្យតេជោសែនកោះធំ មានទីតាំងស្ថិតក្នុងស្រុកកោះធំ ខេត្តកណ្ដាល និងបានសាងសង់អគារថ្មីចំនួន០៣ខ្នង ទំហំសរុបស្មើនឹង ១២.៥៤៤,៤ ម៉ែត្រការ៉េ ដែលអាចផ្ទុកគ្រែអ្នកជំងឺបានចំនួន ១៥០គ្រែ មានបំពាក់ដោយម៉ាស៊ីនត្រជាក់ ប្រព័ន្ធបច្ចេកវិទ្យាទំនើប Hospital Information System (HIS) សម្ភារបរិក្ខារពេទ្យ និងឧបករណ៍បច្ចេកទេសទំនើបៗបម្រើឱ្យការព្យាបាល។អគារថ្មីចំនួន០៣ខ្នងរួមមាន៖ ១)អគារមន្ទីរពេទ្យ ចំនួន ០១ខ្នង មាន០៣ជាន់ ដែលជាន់ផ្ទាល់ដីមានទំហំ ៣.៥១៤,៨ ម៉ែត្រការ៉េ ជាន់ទី១មានទំហំ ៣.៥១៤,៨ ម៉ែត្រការ៉េ និងជាន់ទី២ មានទំហំ ៣.៥១៤,៨ ម៉ែត្រការ៉េ ស្មើនឹងទំហំសរុប ១០.៥៤៤,៤ ម៉ែត្រការ៉េ ២) អគារខាងឆ្វេង ចំនួន ០១ខ្នង មាន០២ជាន់ ដែលជាន់ផ្ទាល់ដីមានទំហំ ៥០០ម៉ែត្រការ៉េ និងជាន់ទី១មានទំហំ ៥០០ ម៉ែត្រការ៉េ ស្មើនឹងទំហំសរុប ១០០០ ម៉ែត្រការ៉េ ៣) អគារខាងស្តាំចំនួន០១ខ្នង មាន០២ជាន់ ដែលជាន់ផ្ទាល់ដីមានទំហំ៥០០ម៉ែត្រការ៉េ និងជាន់ទី១ មានទំហំ៥០០ម៉ែត្រការ៉េ ស្មើនឹងទំហំសរុប ១០០០ ម៉ែត្រការ៉េ៕អត្ថបទ រដ្ឋា

រដ្ឋមន្រ្តីក្រសួងធនធានទឹក អរគុណដល់សហរដ្ឋអាមេរិក ដែលបានគាំទ្រដល់វិស័យធនធានទឹកនៅកម្ពុជា

2024/03/11 02:34:13 pm        281
Facebook Telegram Linkin
ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នៅថ្ងៃទី១១ ខែមីនានេះ បានអនុញ្ញាតឱ្យឯកឧត្តម Patrick Murphy ឯកអគ្គរដ្ឋទូតវិសាមញ្ញ និងពេញសមត្ថភាពសហរដ្ឋអាមេរិកប្រចាំព្រះរាជាណាចក្រកម្ពុជា ដឹកនាំគណៈប្រតិភូចូលជួបសម្តែងការគួរសម និងពិភាក្សាការងារ ស្ថិតនៅទីស្តីការក្រសួង។ក្នុងឱកាសនោះ ឯកឧត្តមរដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅចំពោះ ឯកឧត្តម​ឯកអគ្គរដ្ឋទូត និងគណៈប្រតិភូ និងបានថ្លែងអំណរគុណចំពោះរដ្ឋាភិបាលអាមេរិក តាមរយៈ​ឯកឧត្តមឯកអគ្គរដ្ឋទូត ដែលជានិច្ចកាលបានជួយគាំទ្រដល់ការកសាង និងអភិវឌ្ឍន៍​សេដ្ឋកិច្ចកម្ពុជា​ឱ្យមានការរីកចម្រើនជាបន្តបន្ទាប់ ជាពិសេសវិស័យធនធានទឹក ដែលជាផ្នែកមួយដ៏សំខាន់ចូលរួមចំណែកទ្រទ្រង់ដល់កំណើនសេដ្ឋកិច្ចជាតិ។ឯកឧត្តមរដ្ឋមន្ត្រី បានជម្រាបឯកឧត្តម Patrick Murphy ពីតួនាទីដ៏ចម្បងរបស់ក្រសួងធនធានទឹក និងឧតុនិយមដែលសេនាធិការរបស់រាជរដ្ឋាភិបាលកម្ពុជាមានការងារពីរសំខាន់គឺ ការគ្រប់គ្រង​ទឹកសម្រាប់ផ្គត់ផ្គង់ទឹកលើគ្រប់វិស័យមាន វិស័យកសិកម្ម ឧស្សាហកម្ម និងការប្រើប្រាស់ទូទៅក្នុងជីវភាពរស់នៅ និងការព្យាករឧតុនិយម ដោយធ្វើការជូនដំណឹងជាមុនពីស្ថានភាពអាកាសធាតុ។ ឯកឧត្តមរដ្ឋមន្ត្រី បានបញ្ជាក់ថា ក្រសួងធនធានទឹក និងឧតុនិយមនៅតែបន្តកសាងហេដ្ឋា​រចនាសម្ព័ន្ធ​និងអភិវឌ្ឍន៍វិស័យធនធានទឹក និងឧតុនិយម ​ដើម្បីធានាបាននូវសុវត្ថិភាពទឹក ការឆ្លើយតបទៅ​នឹងការប្រែប្រួលអាកាសធាតុ និងជាចលករជំរុញដល់កំណើនសេដ្ឋកិច្ច និងកាត់​បន្ថយភាពក្រីក្រ ជាពិសេសបម្រើឱ្យការងារបង្កបង្កើនផល និងប្រើប្រាស់ក្នុងជីវភាពរស់នៅប្រចាំថ្ងៃ​របស់បងប្អូនប្រជាកសិករ។ជាមួយគ្នានេះ ឯកឧត្តមរដ្ឋមន្ត្រីបានស្នើសុំភាគីអាម៉េរិក​ផ្តល់នូវកិច្ចសហប្រតិបត្តិការលើវិស័យ​ឧតុនិយម ជាពិសេស​ការព្យាករអាកាសធាតុ ​និងការជូនដំណឹងជាមុនដល់ប្រជាពលរដ្ឋងាយ​រងគ្រោះ​ឱ្យត្រៀមលក្ខណៈប្រុងប្រយ័ត្នជាមុន ដើម្បីឈានទៅកាត់បន្ថយគ្រោះមហន្តរាយ​ធម្មជាតិនានា ​និងកាត់បន្ថយ​បានការខាតបង់ផ្នែកសេដ្ឋកិច្ច និងជួយបណ្តុះបណ្តាលដល់មន្ត្រី​នាយកដ្ឋានឧតុនិយម និងនាយកដ្ឋានជលសាស្ត្រនិងការងារទន្លេ លើវិស័យឧតុនិយម និងជលសាស្ត្រ។ជាការឆ្លើយតប ឯកឧត្តម Patrick Murphy បានថ្លែងអំណរគុណចំពោះឯកឧត្តមរដ្ឋមន្ត្រី ដែលបានចំណាយពេលវេលាដ៏មានតម្លៃអនុញ្ញាតឱ្យឯកឧត្តម និងគណៈប្រតិភូបាន​ចូលជួប​សម្តែងការគួរសម និងពិភាក្សាការងារនាពេលនេះ។ឯកឧត្តមឯកអគ្គរដ្ឋទូតបានទទួលយកសំណើទាំងអស់ទៅពិភាក្សា និងបានបញ្ជាក់ពីការ ពង្រឹងពង្រីកចំណងមិត្តភាព ​និងភាពជាដៃគូ សំដៅធ្វើឱ្យព្រះរាជាណាចក្រកម្ពុជា​សម្រេច​បាននូវបុព្វហេតុសន្តិភាព ស្ថិរភាព និងការអភិវឌ្ឍ ក្នុងក្របខ័ណ្ឌឯករាជ្យ អធិបតេយ្យភាពជាតិ​របស់ខ្លួន៕អត្ថបទ៖ទូច សោភ័ណ

ព្រឹកស្អែកសម្តេចធិបតី ហ៊ុន ម៉ាណែត អញ្ជើញពិនិត្យការសាងសង់អាកាសយានដ្ឋានអន្តរជាតិតេជោ កណ្តាលស្ទឹង

2024/03/11 01:07:51 pm        342
Facebook Telegram Linkin
ភ្នំពេញ៖ នៅព្រឹកថ្ងៃទី ១២ ខែមីនា ឆ្នាំ ២០២៤ ស្អែកនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញពិនិត្យការសាងសង់ អាកាសយានដ្ឋានអន្តរជាតិតេជោ ក្រុងតាខ្មៅ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល។យោងតាមរបាយការណ៍សង្ខេប ស្ដីអំពី៖ វឌ្ឍនភាពនៃការអភិវឌ្ឍអាកាសយានដ្ឋានអន្តរជាតិតេជោ ដែលបានដកស្រង់ពី​ទិន្នន័យ​សំខាន់ៗដែលទាក់ទងទៅនឹង​វឌ្ឍនភាព​នៃការសាងសង់ គម្រោងអាកាសយានដ្ឋានអន្តរជាតិតេជោជំហានទី១ មកដល់ថ្ងៃទី ២៧ ខែ កុម្ភៈ ឆ្នាំ ២០២៤ បានបង្ហាញថា ចំពោះវឌ្ឍនភាពនៃការសាងសង់គម្រោងអាកាសយានដ្ឋានអន្តរជាតិតេជោ ជំហានទី១ រួមមាន៖ ស្ថានីយអ្នកដំណើរ ដែលមាន អគារកណ្តាល និង អគារផែយន្តហោះខាងជើង, ផ្លូវរត់ទី១, ផ្លូវបរយន្តហោះ, វាល ចតយន្តហោះ និង អគារផ្សេងៗសម្រាប់ទ្រទ្រង់ប្រតិបត្តិការ ព្រលានយន្តហោះ ដែលអាចទទួល អ្នកដំណើរបាន ១៣ លាននាក់ នាឆ្នាំ ២០២៤ ។ ក្រៅពីនេះ ក្រុមហ៊ុន អូស៊ីអាយស៊ី (OCIC) ក៏បាន សាងសង់ហេដ្ឋារចនាសម្ព័ន្ធផ្លូវតភ្ជាប់ពី មហាវិថីសម្តេចហ៊ុន សែន ឆ្ពោះមកកាន់អាកាសយានដ្ឋានអន្តរជាតិតេជោ។វឌ្ឍនភាព និងថវិកាចំណាយសម្រាប់ការសាងសង់ និងការដោះស្រាយផលប៉ះពាល់ រួមមាន ជំហានទី១ នៃការសាងសង់ អាកាសយានដ្ឋានអន្តរជាតិតេជោ សម្រេចបានប្រមាណ ៦៦,១% ហើយបានចំណាយទឹកប្រាក់សរុបសម្រាប់ការសាងសង់ចំនួន ៩៦១ លានដុល្លារ។ ចំនួន​បុគ្គលិក និងជាង​កម្មករ​សរុប​ដែលកំពុងបម្រើការងារ ​ក្នុងគម្រោង​អាកាស យានដ្ឋានអន្តរជាតិតេជោ​មានចំនួន ១៥,៩០៤ នាក់ក្នុងនោះ មាន៥៣៥ នាក់ជាជនជាតិបរទេស៕

នាវាយោធាអាមេរិក ធ្វើដំណើរទៅកាន់តំបន់ហ្កាហ្សា ដើម្បីសាងសង់កំពង់ផែសម្រាប់ជំនួយចូលទៅតំបន់ហ្កាហ្សា

2024/03/11 12:50:39 pm        215
Facebook Telegram Linkin
កងទ័ពនិយាយថា នាវាយោធាអាមេរិកមួយគ្រឿង កំពុងធ្វើដំណើរឆ្ពោះទៅមជ្ឈិមបូព៌ា ដោយដឹកឧបករណ៍ដើម្បីសាងសង់ផែបណ្ដោះអាសន្ន នៅឆ្នេរហ្កាហ្សា។នាវាគាំទ្រ Frank S Besson បានចេញដំណើរពីមូលដ្ឋានយោធាក្នុងរដ្ឋវើជីនៀ (Virginia) កាលពីថ្ងៃសៅរ៍។ការសម្រេចនេះ កើតឡើង បន្ទាប់ពីលោកប្រធានាធិបតី ចូ បៃដិន (Joe Biden) បាននិយាយថា សហរដ្ឋអាមេរិក នឹងសាងសង់កំពង់ផែបណ្តែតទឹក ដើម្បីជួយទទួលជំនួយទៅកាន់តំបន់ហ្កាហ្សាហ្សាតាមសមុទ្រ។ចំណែកអង្គការសហប្រជាជាតិ បានព្រមានថា ទុរ្ភិក្សនៅតំបន់ហ្សាស្ទ្រីប គឺ «ស្ទើរតែជៀសមិនរួច» ហើយកុមារ កំពុងស្រេកឃ្លានរហូតដល់ស្លាប់។យោធាអាមេរិក បានបញ្ជាក់ថា សហរដ្ឋអាមេរិក និងហ្ស៊កដានី បានធ្វើការទម្លាក់ជំនួយតាមអាកាសកាលពីថ្ងៃអាទិត្យ ដោយប្រើលោតឆ័ត្រយោងចងភ្ជាប់អាហារជាង ១១.៥០០កញ្ចប់ ដែលរួមមានអង្ករ ម្សៅ ប៉ាស្តា(pasta)និងអាហារកំប៉ុង។ការផ្តល់ជំនួយតាមផ្លូវគោក និងផ្លូវអាកាស បានបង្ហាញពីការលំបាក និងគ្រោះថ្នាក់។កម្មវិធីស្បៀងអាហារពិភពលោក ត្រូវផ្អាកការដឹកជញ្ជូនដី បន្ទាប់ពីក្បួនរថយន្តរបស់ខ្លួន បានរងការបាញ់ប្រហារ និងការលួចប្លន់ ហើយកាលពីថ្ងៃសុក្រ មានសេចក្តីរាយការណ៍ថា មនុស្ស៥នាក់ ត្រូវបានសម្លាប់ដោយសារកញ្ចប់ជំនួយធ្លាក់សង្កត់លើ នៅពេលដែលឆ័ត្រយោង ដំណើរការមិនបានត្រឹមត្រូវ។

សមុទ្រក្រហម៖ អាមេរិក អង់គ្លេស និងបារាំង បានបំផ្លាញយានដ្រូនរបស់ក្រុមហ៊ូទី រាប់សិបគ្រឿង

2024/03/11 12:47:00 pm        255
Facebook Telegram Linkin
កងកម្លាំងអាមេរិក អង់គ្លេស និងបារាំង បាននិយាយថា ពួកគេបានវាយបកទៅលើការវាយប្រហារជាបន្តបន្ទាប់របស់ក្រុមហ៊ួទីដែលគាំទ្រដោយអ៊ីរ៉ង់ នៅ ឆ្នេរសមុទ្រនៃប្រទេសយេម៉ែន។យោធាអាមេរិក បាននិយាយថា យ៉ាងហោចណាស់ យានអាកាសគ្មានមនុស្សបើក (UAVs) ចំនួន ២៨ គ្រឿង ត្រូវបានបាញ់ទម្លាក់ពីលើសមុទ្រក្រហម កាលពីព្រឹកថ្ងៃសៅរ៍។ដោយរួមជាមួយនឹងកងកម្លាំងចម្រុះ សហរដ្ឋអាមេរិក បាននិយាយថា ខ្លួនបានធ្វើសកម្មភាពបន្ទាប់ពីកំណត់គោលដៅវាយប្រហារ «ទ្រង់ទ្រាយធំ» បានបង្ហាញពីការគំរាមកំហែងដែលអាចនឹងកើតចំពោះនាវាជំនួញ»។ក្រុមហ៊ួទី បានអះអាងថា ពួកគេ បានកំណត់គោលដៅលើកនាវាពាណិជ្ជកម្ម Propel Fortune និងនាវាពិឃាតរបស់អាមេរិកមួយចំនួន។សេចក្តីថ្លែងការណ៍មួយពីទីបញ្ជាការកណ្តាលរបស់សហរដ្ឋអាមេរិក បាននិយាយថា មិនមានគ្រឿងយុទ្ធោបករណ៍របស់សហរដ្ឋអាមេរិក ឬក្រុមចម្រុះ ត្រូវបានខូចខាតទេ ហើយមិនមានរបាយការណ៍អំពីការខូចខាតនាវាពាណិជ្ជកម្មនោះទេ។ចាប់តាំងពីខែវិច្ឆិកាមក ក្រុមហ៊ួទី បាននិងកំពុងវាយប្រហារនាវានៅសមុទ្រក្រហម និងឈូងសមុទ្រ Aden ជាអ្វីដែលពួកគេនិយាយថា ជាយុទ្ធនាការនៃសាមគ្គីភាពជាមួយប៉ាឡេស្ទីន ក្នុងអំឡុងពេលសង្រ្គាមរបស់អ៊ីស្រាអែល នៅតំបន់ហ្កាហ្សា។ រដ្ឋមន្ត្រីការពារជាតិចក្រភពអង់គ្លេស លោក Grant Shapps បាននិយាយថា នាវាចម្បាំង HMS Richmond របស់កងទ័ពជើងទឹក HMS Richmond បានបាញ់ទម្លាក់យានដ្រូនពីរគ្រឿង ដែលបានបាញ់បង្ហោះដោយក្រុមហ៊ូទី កាលពីយប់ថ្ងៃសុក្រ។

បេសកជនUN ប្រចាំប្រទេសលីប៊ី សម្តែងការព្រួយបារម្ភអំពីភាពជាប់គាំងនយោបាយបច្ចុប្បន្ននៅលីប៊ី

2024/03/11 12:28:02 pm        248
Facebook Telegram Linkin
អ្នកតំណាងពិសេសរបស់អគ្គលេខាធិការអង្គការសហប្រជាជាតិប្រចាំប្រទេសលីប៊ី លោកអាប់ឌូលឡាយ៉េ បាធីលី (Abdoulaye Bathily) បានបង្ហាញការព្រួយបារម្ភចំពោះភាពជាប់គាំងផ្នែកនយោបាយ របស់ប្រទេសលីប៊ី ដោយជំរុញឱ្យមានការបង្កើតរដ្ឋាភិបាលបង្រួបបង្រួមមួយ ដើម្បីត្រួសត្រាយផ្លូវសម្រាប់ការបោះឆ្នោត។លោក Bathily បានជួបជាមួយនាយករដ្ឋមន្ត្រីលីប៊ី លោក អាប់ឌុល ហាម៉េដ ឌីបេបា(Abdul-Hamed Dbeibah) ក្នុងអំឡុងពេលដែលពួកគេពិនិត្យមើលស្ថានភាពនយោបាយ សន្តិសុខ និងសេដ្ឋកិច្ចរបស់ប្រទេសលីប៊ី ហើយបានពិភាក្សាអំពីវិធីដើម្បីជំរុញដំណើរការនយោបាយឆ្ពោះទៅមុខ តាមរយៈដំណោះស្រាយផ្នែកនយោបាយ។លោក Bathily បាននិយាយនៅលើបណ្តាញ X ថា លោក បាននិយាយឡើងវិញពីការព្រួយបារម្ភរបស់លោកទាក់ទងនឹងភាពជាប់គាំងនយោបាយបច្ចុប្បន្ន និងផលវិបាកចំពោះស្ថានភាពសន្តិសុខ និងសេដ្ឋកិច្ចរបស់ប្រជាជនលីប៊ី ហើយបានអំពាវនាវជាថ្មីដល់មេដឹកនាំប្រទេសលីប៊ីទាំងអស់ ឱ្យក្រោកឡើងប្រឈមមុខនឹងបញ្ហា ហើយព្រមព្រៀងលើរដ្ឋាភិបាលបង្រួបបង្រួម ដើម្បីដឹកនាំប្រទេសទៅកាន់ការបោះឆ្នោត។ក្នុងអំឡុងពេលកិច្ចប្រជុំជាមួយសមាជិកនៃក្រុមប្រឹក្សារដ្ឋជាន់ខ្ពស់ លោក Bathily បានបញ្ជាក់លើតម្រូវការបន្ទាន់ក្នុងការអនុវត្តច្បាប់បោះឆ្នោត និងបង្កើតរដ្ឋាភិបាលបង្រួបបង្រួមមួយ។ប្រទេសលីប៊ី បានបរាជ័យក្នុងការរៀបចំការបោះឆ្នោតសកល កាលពីខែធ្នូ ឆ្នាំ ២០២១ ខណៈត្រូវបានគ្រោងទុក ដោយសារការខ្វែងគំនិតគ្នាលើច្បាប់បោះឆ្នោត ក្នុងចំណោមគណបក្សនៅប្រទេសលីប៊ី។

ទិវាជាតិអំណានឆ្នាំនេះធ្វើឡើងក្រោមប្រធានបទ «អំណានជាមូលដ្ឋានគ្រឹះ សម្រាប់ទាំងអស់គ្នាក្នុងជីវិត»

2024/03/11 12:15:04 pm        410
Facebook Telegram Linkin
កម្ពុជានៅថ្ងៃទី១១ ខែ មីនា ឆ្នាំ ២០២៤នេះ បានរៀបចំពិធីអបអរសាទរទិវាជាតិអំណានលើកទី ៩ ក្រោមប្រធានបទ «អំណានជាមូលដ្ឋានគ្រឹះសម្រាប់ទាំងអស់គ្នាក្នុងជីវិត»។ ទិវាជាតិ​អំណាន​នៅ​ក្នុង​ឆ្នាំ២០២៤នេះ រៀបចំឡើងនៅទីតាំងវិទ្យាស្ថានបច្ចេកវិទ្យាកម្ពុជា ដោយមានទាំង​ការ​តាំង​ពិព័រណ៍​សៀវភៅ ការធ្វើបឋកាថាពីវិស័យអប់រំ បូករួមទាំងការប្រកួតប្រជែង និងការប្រកាស​ជ័យ​លាភី អានអត្ថបទ ស្មូតកំណាព្យ តែងនិពន្ធ និងការបកស្រាយប្រធានបទផងដែរ។ក្នុងឱកាសបើកទិវាជាតិអំណាន នាថ្ងៃនេះ ឯកឧត្តម ឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រី​ក្រសួង​អប់រំ យុវជន និងកីឡា បានលើកឡើងថា ប្រធានបទ «អំណានជា​មូល​ដ្ឋាន​គ្រឹះ​សម្រា​ប់​ទាំង​អស់​គ្នាក្នុងជីវិត» ជាប្រធានបទឆ្លុះបញ្ចាំងពីសារៈសំខាន់នៃអំណាន ដើម្បីបណ្ដុះ​មូលដ្ឋាន​គ្រឹះ​​ដ៏រឹងមាំ សម្រាប់ឈានទៅរកជីវិតល្អប្រសើរសម្រាប់មនុស្សគ្រប់ៗគ្នា។ ឯកឧត្តមបញ្ជាក់ថា អំណានមិនមែនផ្តោតតែលើការទទួលបានព័ត៌មាននោះទេ ប៉ុន្តែ​អំណាន​នឹង​នាំមកនូវការពង្រឹងចំណេះដឹង ការយល់ដឹង ទស្សនៈរបស់អ្នកអានផងដែរ។ ការអាន​ជួយ​ឱ្យប្រជា​ពលរដ្ឋ​អាចស្វែងរកឃើញនូវគំនិតថ្មីៗ យល់ពីវប្បធម៌ជាតិ អន្តរជាតិ បទពិសោធន៍ ដែល​នាំ​ទៅ​រក​ការ​រីក​ចម្រើនរបស់ខ្លួន។ឯកឧត្តមបន្តថាតាមរយៈការអាន បានធ្វើឱ្យពលរដ្ឋមានលទ្ធភាពប្រាស្រ័យទាក់ទងគ្នា បានយ៉ាង​ល្អ​ប្រសើរ​ប្រកបដោយប្រសិទ្ធភាព ប្រកបដោយការត្រិះរិះពិចារណា ការដោះស្រាយបញ្ហាផ្សេងៗ ក្នុង​ទិដ្ឋភាពនៃជីវិតក្នុងពេលបច្ចុប្បន្ន និងទៅអនាគត។ក្នុងពិធី​ដដែលនេះ ក៏មានការប្រកាសជ័យលាភី អានអត្ថបទ ស្មូតកំណាព្យ តែងនិពន្ធ និង​ការ​បក​ស្រាយ​ប្រធានបទផងដែរ។ ជ័យលាភីទាំងនេះ ឆ្លងកាត់ការប្រកួត​ប្រជែង​ជ្រើស​រើស​ពី​កម្រិត​សាលា ស្រុក-ខណ្ឌ រាជធានី-ខេត្ត រហូតដល់វគ្គផ្ដាច់ព្រ័តក្នុងព្រឹត្តិការណ៍ទិវាជាតិអំណាន។ ក្រោយ​ប្រកាសលទ្ធផល ជ័យលាភីលេខ ១ ផ្នែកអានអត្ថបទ និងជ័យលាភីលេខ ១ផ្នែកស្មូត​កំណាព្យ បានលើកឡើងពីភាពរីករាយជាខ្លាំង ដែលខ្លួនអាចសម្រេចបានជោគជ័យនៅថ្ងៃនេះ។ ពួក​គេ​នឹងបន្តប្រឹងប្រែង ហើយចាត់ទុកថានេះជាជោគជ័យសម្រាប់ខ្លួនឯង សម្រាប់គ្រួសារ សម្រាប់​សាលា និងខេត្តទាំងមូលផងដែរ។គួរបញ្ជាក់ឱ្យដឹងថា ទិវាជាតិអំណានប្រព្រឹត្តិឡើងជារៀងរាល់ឆ្នាំ។ ព្រឹត្តិការណ៍ក្នុងឆ្នាំ ២០២៤នេះ ជាលើក​ទី៩ ដែលកម្ពុជាបានរៀបចំឡើង ដោយមានការតាំងពិព័រណ៍សៀវភៅជាង ១០០ស្តង់ បាន​ចូលរួមក្នុងរយៈពេល ៣ថ្ងៃផងដែរ៕ អត្ថបទ៖ គឹមហុក 

ស្ថានទូតអាមេរិក ព្រមានពីការវាយប្រហារដែលនឹងកើតឡើងនៅទីក្រុងមូស្គូ ដោយពួកជ្រុលនិយម

2024/03/11 11:57:29 am        360
Facebook Telegram Linkin
ស្ថានទូតអាមេរិកប្រចាំនៅប្រទេសរុស្ស៊ី បានព្រមានថា «ពួកជ្រុលនិយម» មានផែនការដែលជិតមកដល់សម្រាប់ការវាយប្រហារនៅទីក្រុងមូស្គូ រយៈពេលប៉ុន្មានម៉ោងបន្ទាប់ពីសេវាសន្តិសុខរុស្ស៊ី បាននិយាយថា ពួកគេបានបញ្ឈប់ការបាញ់ប្រហារដែលបានគ្រោងទុកមួយនៅវិហារជី្វហ្វ ដោយសាខាប្រដាប់អាវុធរបស់ក្រុមរដ្ឋអ៊ីស្លាមអាហ្វហ្គានីស្ថាន។ស្ថានទូតអាមេរិក ដែលបានជំរុញម្តងហើយម្តងទៀតឱ្យពលរដ្ឋអាមេរិកទាំងអស់ឱ្យចាកចេញពីប្រទេសរុស្ស៊ីជាបន្ទាន់ មិនបានផ្ដល់ព័ត៌មានលម្អិតបន្ថែមអំពីលក្ខណៈនៃការគំរាមកំហែងនេះទេ ប៉ុន្តែបាននិយាយថា ប្រជាជនគួរតែជៀសវាងការប្រមូលផ្ដុំដូចជាការប្រគុំតន្ត្រី និងហ្វូងមនុស្ស ហើយត្រូវប្រុងប្រយ័ត្នពីអ្នកនៅជុំវិញខ្លួនរបស់ពួកគេ។ស្ថានទូតនេះបានចេញការព្រមានរបស់ខ្លួនជាច្រើនម៉ោង បន្ទាប់ពីសេវាសន្តិសុខសហព័ន្ធរបស់រុស្ស៊ី (FSB) ដែលជាអ្នកស្នងតំណែងសំខាន់នៃទីភ្នាក់ងារចារកម្ម KGB សម័យសូវៀត បាននិយាយថា ខ្លួនបានរារាំងការវាយប្រហារលើវិហារជី្វហ្វនៅទីក្រុងមូស្គូ ដោយសាខាប្រដាប់អាវុធរបស់ក្រុមសកម្មប្រយុទ្ធអ៊ីស្លាមនិកាយស៊ុននី។សម្ព័ន្ធមិត្តរបស់សហរដ្ឋអាមេរិក រួមមាន អង់គ្លេស កាណាដា កូរ៉េខាងត្បូង និងឡាតវី បានធ្វើការព្រមានដូចគ្នានេះ ហើយបានប្រាប់ពលរដ្ឋរបស់ពួកគេកុំឱ្យធ្វើដំណើរទៅកាន់ប្រទេសរុស្ស៊ី។ បណ្ដាប្រទេសលោកខាងលិចភាគច្រើនណែនាំប្រឆាំងនឹងការធ្វើដំណើរទាំងអស់ទៅរុស្ស៊ី ហើយនិយាយថាពលរដ្ឋរបស់ពួកគេគួរតែចាកចេញពីទីនោះ៕

ច្បាប់ស្តីពីការដឹកជញ្ជូនផ្លូវទឹក នឹងជួយឲ្យការប្រកួតប្រជែងវិនិយោគ កាន់តែយុត្តិធម៌ សមធម៌ និងតម្លាភាព

2024/03/11 11:36:02 am        581
Facebook Telegram Linkin
ភ្នំពេញ៖ សេចក្តីព្រាងច្បាប់ស្តីពី ការដឹកជញ្ជូនតាមផ្លូវទឹក នឹងជួយ​ឲ្យមាន​កាលានុវត្ត​ភាព​វិនិយោគ ​និងការប្រកួតប្រជែងតែមានយុត្តិធម៌ សមធម៌ និងតម្លាភាព ហើយ​សេចក្តី​ព្រាង​ច្បាប់​នេះ ព្រឹ​ទ្ធសភានឹងលើកយកទៅពិនិត្យ ហើយឲ្យយោបល់ ក្នុងសម័យប្រជុំព្រឹទ្ធសភា វិសាមញ្ញ នីតិកាលទី៤ នៅថ្ងៃទី១២ ខែមីនា ឆ្នាំ២០២៤ស្អែកនេះ ។បន្ទាប់ពីកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ក្រោមអធិបតី​ភាព​ឯកឧត្តម​កិត្តិនីតិ​កោស​ល​បណ្ឌិត ស៊ឹម កា ប្រធានស្តីទីព្រឹទ្ធសភា នាថ្ងៃទី១១ ខែមីនា ឆ្នាំ២០២៤ ឯកឧត្តម ម៉ម ប៊ុននាង អ្នក​នាំពាក្យព្រឹទ្ធសភា មានប្រសាសន៍ថា សេចក្តីព្រាងច្បាប់ស្តីពីការដឹកជញ្ជូនផ្លូវទឹក តាក់​តែង​ឡើងស្រ​ប​តាមមាត្រាទី១១៣ថ្មី នៃរដ្ឋធម្មនុញ្ញ នៃព្រះរាជាណាចក្រកម្ពុជា និងស្របតា​មប្រ​ការ​៣២​ ជំពូកទី៦ នៃបទបញ្ជាផ្ទៃក្នុងព្រឹទ្ធសភា ហើយសេចក្តីព្រាងច្បាប់នេះ មានចំនួន១៨ជំពូក និ​ង​២៧៥មាត្រា ។ឯកឧត្តមបន្តថា ច្បាប់នេះតាក់តែងឡើង ក្នុងគោលបំណងធានាការគ្រប់គ្រង និ​ង​ការ​អភិវឌ្ឍ​វិស័យ​ដឹកជញ្ជូនតាមផ្លូវទឹក និងកំពង់ផែកម្ពុជា ដើម្បីរក្សាសណ្ដាប់ធ្នាប់ ធានាសុវត្ថិភាព សន្តិសុខ​នៃ​ការ​ដឹកជញ្ជូនតាមផ្លូវទឹក ព្រមទាំងការកសាង និងថែរក្សាការពារហេដ្ឋារចនាសម្ព័ន្ធពាក់ព័ន្ធ និង​រួមចំណែកការពារបរិស្ថាន ព្រមទាំងផ្ដល់កាលានុវត្តភាពវិនិយោគ និង​ការ​ប្រកួត​ប្រជែង​តែ​មាន​យុត្តិធម៌ សមធម៌ និងតម្លាភាព សម្រាប់បម្រើពាណិជ្ជកម្មជាតិ និងអន្តរជាតិ និងការ​ទ្រទ្រង់​សេដ្ឋកិច្ច​ជាតិ ។ឯកឧត្តម ម៉ម ប៊ុននាង បានបន្ថែមថា ក្រៅពីសេចក្តីព្រាងច្បាប់ខាងលើ គណៈកម្មាធិការ​អចិន្ត្រៃយ៍​ព្រឹទ្ធ​សភា ក៏បានពិនិត្យលើសេចក្តីព្រាងច្បាប់ស្តីពី ការអនុម័តយល់ព្រមលើវិធីសារ សម្រាប់​ធ្វើវិសោធនកម្មកិច្ចព្រមព្រងម៉ារ៉ាកេស ស្តីពីការបង្កើតអង្គការពាណិជ្ជកម្មពិភពលោក ដើម្បី​បញ្ចូល​កិច្ចព្រមព្រៀងស្តីពីការឧបត្ថម្ភធនជលផល ។ឯកឧត្តម​អ្នកនាំពាក្យ បានបញ្ជាក់ថា សេចក្តីព្រាងច្បាប់នេះ មានចំនួន១២មាត្រា ធ្វើឡើង​ក្នុង​គោល​បំណង​ចូលរួមចំណែក ធានានូវនិរន្តរភាពធនធានជលផលសមុទ្រ ក្នុងកម្រិតសកល តំបន់ និង​រដ្ឋជាសមាជិកនីមួយៗ នៃអង្គការពាណិជ្ជកម្មពិភពលោក តាមរយៈការហាមឃាត់ ឬបញ្ឈប់​ការ​ឧបត្ថម្ភធនមានលក្ខណៈបង្កគ្រោះថ្នាក់ ពាក់ព័ន្ធនឹងការនេសាទសមុទ្រ ហើយព្រឹទ្ធសភា​នឹង​លើក​យក​ទៅពិនិត្យ ហើយឲ្យយោបល់ ក្នុងសម័យប្រជុំព្រឹទ្ធសភា វិសាមញ្ញ នីតិកាលទី៤ នៅថ្ងៃ​ទី១២ ខែមីនាស្អែកផងដែរ ៕ អត្ថបទ បាន សុខរិទ្ធិ

សម្ដេចធិបតី៖ រាជរដ្ឋាភិបាលកំពុងអនុវត្តរបៀបវារៈគោលនយោបាយឌីជីថល​ដោយស្មារតីបុរេសកម្ម

2024/03/11 10:47:16 am        407
Facebook Telegram Linkin
សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍ថា រាជ​រដ្ឋាភិបាល​បាន​និង​កំពុងអនុវត្តរបៀបវារៈគោលនយោបាយឌីជីថល ដោយស្មារតីបុរេសកម្ម និងបើក​ចំហ​សំដៅ​ស​ម្រេច​ឱ្យបានគោលដៅអភិវឌ្ឍន៍ឌីជីថលជាតិ និងគោលដៅអភិវឌ្ឍន៍ ឌីជីថលតំបន់ និង​សកលដូចមានកំណត់ក្នុងផែនការមេឌីជីថលអាស៊ាន ២០២៥ និងយុទ្ធសាស្ត្រឌីជីថល ២០២២-២០២៥ របស់អង្គការសហប្រជាជាតិ។សម្ដេចធិបតីនាយករដ្ឋមន្រ្ដី មានប្រសាសន៍បែបនេះក្នុងឱកាអញ្ជើញជាអធិបតី ពិធី​បើក​«វេទិកា​រដ្ឋាភិបាល​ឌីជីថល​ លើកទី១ ឆ្នាំ២០២៤» នាព្រឹក ថ្ងៃទី១១ មីនា ២០២៤ នៅមជ្ឈមណ្ឌល​សន្និបាត និងពិព័រណ៍កោះពេជ្រ។ ក្នុងឱកាសនោះសម្តេចធិបតីបានបង្ហាញក្តីសោមនស្សរីករាយដោយបានចូលរួមជាអធិបតីក្នុងពិធីបើក «វេទិការដ្ឋាភិបាល ឌីជីថល និងពិព័រណ៍រដ្ឋាភិបាលឌីជីថល និងបច្ចេកវិទ្យាឌីជីថលកម្ពុជា-អន្តរជាតិ លើកទី ១» ក្រោមប្រធានបទ «ការលើកកម្ពស់ចីរភាព និង បរិយាប័ន្ននៃការអភិវឌ្ឍ តាម​រយៈការអនុវត្តគោល នយោបាយឌីជីថល» ដែលមានការចូលរួមពីបណ្ដាប្រទេសអាស៊ាន ប្រទេស​ក្នុងតំបន់ ក៏ដូចជា ក្រសួង-ស្ថាប័ន វិស័យឯកជន សាកលវិទ្យាល័យ និង ដៃគូ​អភិវឌ្ឍន៍​របស់​កម្ពុជា។សម្តេចធិបតីក៏បានវាយតម្លៃខ្ពស់ ចំពោះការរៀបចំវេទិកាដ៏មានសារៈសំខាន់នេះឡើង រយៈពេល​៣ថ្ងៃ ដើម្បីអបអរសាទរសមិទ្ធផលដែលសម្រេចបានកន្លងមក ព្រមទាំងរួមគ្នាបង្កើតសមិទ្ធផលថ្មី តាមរយៈកិច្ចពិភាក្សាផ្លាស់ប្តូរមតិយោបល់ ចែករំលែកបទពិសោធន៍ និងឧត្តមានុវត្តន៍ល្អៗ លើក​គំនិត​ផ្តួចផ្តើម និងកិច្ចសហប្រតិបត្តិការនានា ព្រមទាំងជំរុញ​ការ​អភិវឌ្ឍ​សេវា​សាធារណៈ​ឌីជីថល​ថ្មី​ៗ​បន្ថែម​ទៀត ក្នុងគោលដៅឆ្លើយតបឱ្យទាន់ពេលទៅនឹងតម្រូវការថ្មីរបស់ប្រជាពលរដ្ឋកម្ពុជា និង​អាស៊ាន ដើម្បីឆ្ពោះទៅកាន់សេដ្ឋកិច្ច និងសង្គមឌីជីថលពេញលេញ។សូមជម្រាបថា មុំថ្មី១ «បច្ចេកវិទ្យា» ដែលជាមុំទី៥ នៃយុទ្ធសាស្ត្របញ្ចកោណ បន្ថែម​ពីលើ​មុំ​ទាំង​៤ នៃយុទ្ធសាស្ត្រចតុកោណដែលមានស្រាប់មាន «មនុស្ស ទឹក ផ្លូវ ភ្លើង» រាជរដ្ឋាភិបាល​នីតិកាលទី៧ នៃ​រដ្ឋសភា បានបង្កើតក្របខណ្ឌគោលនយោបាយសង្គម សេដ្ឋកិច្ចគ្រប់ជ្រុង​ជ្រោយ​មួយ ​គឺយុទ្ធសាស្ត្របញ្ចកោណដំណាក់កាលទី១ (២០២៣-២០២៨)។ យុទ្ធសាស្រ្ត​នេះ​មាន​គោល​បំណង​ជំរុញសម្ទុះនៃកំណើនសេដ្ឋកិច្ចជាតិ និងកសាងមូលដ្ឋានគ្រឹះ​ដ៏រឹងមាំ​សម្រាប់​កម្ពុជា​ ដើម្បី​ប្រែក្លាយ​កម្ពុជា ជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងសម្រេច​ជា​ប្រទេស​ដែល​មានចំណូលខ្ពស់នៅឆ្នាំ២០៥០ ដែលត្រូវបានគេស្គាល់​ថា​ជា​ចក្ខុវិស័យ​កម្ពុជា​ឆ្នាំ​២០៥០​។ ដើម្បីសម្រេចបាននូវគោលដៅរបស់យុទ្ធសាស្ត្របញ្ចកោណ ដំណាក់កាលទី១ រាជ​រដ្ឋាភិបាល​បាន​កំណត់យកអាទិភាពគន្លឹះ សំខាន់ៗចំនួន៥ ដោយរួមបញ្ចូល បច្ចេកវិទ្យាឌីជីថល ជា​អាទិភាពថ្មីមួយទៀតបន្ថែមលើ មនុស្ស ផ្លូវ ទឹក និងភ្លើង។ អាទិភាព​ផ្នែក​បច្ចេក​វិទ្យា​ផ្តោត​ជា​ចម្បង​លើ​ការកសាង និងការអភិវឌ្ឍហេដ្ឋា​រចនា​សម្ព័ន្ធ​ឌីជីថល​ ដើម្បី​ភ្ជាប់​ទំនាក់​ទំនង​គ្នា​ជា​មួយ​សសរស្តម្ភ​ផ្សេងទៀតនៃយុទ្ធសាស្រ្ដ៕ អត្ថបទ៖ វ៉ន រ៉ា

បណ្ដាញសង្គម

ព័ត៌មានថ្មីៗ

សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់តំណាងនាំយកទេយ្យវត្ថុ និងបច្ច័យ ថ្វាយប្រគេនសម្ដេចព្រះមហាសង្ឃរាជ នន្ទ ង៉ែត
06/14/2026 03:06 PM
Facebook Telegram Linkin
ករណីនាំសាច់បង្កកមកពីថៃជាង២០០តោន : តំណាងអយ្យការចោទប្រកាន់ជនសង្ស័យ ២នាក់
06/14/2026 03:06 PM
Facebook Telegram Linkin
ក្រសួងបរិស្ថានគាំទ្រសហគមន៍តំបន់ការពារធម្មជាតិនៅកម្ពុជា ចូលរួមការពារនិងអភិរក្សធនធានធម្មជាតិ និងលើកកម្ពស់ជីវភាពប្រជាពលរដ្ឋនៅតាមសហគមន៍
06/14/2026 02:06 PM
Facebook Telegram Linkin
អ៊ីរ៉ង់៖ បុណ្យសពអតីតមេដឹកនាំកំពូល នឹងចាប់ផ្តើមនៅថ្ងៃទី ៤ ខែកក្កដា ហើយបញ្ចប់ជាមួយការបញ្ចុះសពនៅថ្ងៃទី ៩ខែកក្កដា
06/14/2026 02:06 PM
Facebook Telegram Linkin
សហគមន៍ទុរេនបែកអន្លូង ស្រុកស្ទឹងត្រង់បានចុះបញ្ជីម៉ាកសមូហភាព និងមាន QR Code ត្រឹមត្រូវ
06/14/2026 01:06 PM
Facebook Telegram Linkin
ស.ស.យ.ក បន្តចុះអប់រំនិស្យិតដោយផ្សារភ្ជាប់ព្រះពុទ្ធសាសនាទៅនឹងការរស់នៅថ្លៃថ្នូរ
06/14/2026 01:06 PM
Facebook Telegram Linkin
សមាគមអតីតយុទ្ធជន កំពង់ឆ្នាំង ប្រគល់ថវិកាបេឡាមរណៈសង្គ្រោះ ១២លានរៀល ជូនសមាជិក ៣គ្រួសារ
06/14/2026 01:06 PM
Facebook Telegram Linkin
សំណុំរឿងសាច់បង្កកជាង ២០០តោន នាំមកពីថៃចូលដល់ដៃតុលាការហើយ
06/14/2026 01:06 PM
Facebook Telegram Linkin
ការខូចខាតធ្ងន់ធ្ងរ បានកើតឡើងនៅទីក្រុងភាគខាងត្បូង Tyre ប្រទេសលីបង់ ក្រោយការវាយប្រហាររបស់អ៊ីស្រាអែល
06/14/2026 12:06 PM
Facebook Telegram Linkin
សម្ដេចធិបតី៖គិតត្រឹមខែមេសាឆ្នាំនេះយុវជនមកពីគ្រួសារក្រីក្រ និងងាយរងហានិភ័យចំនួន ២៧,១ម៉ឺននាក់ទទួលបានការបណ្ដុះបណ្ដាលជំនាញវិជ្ជាជីវៈ
06/14/2026 12:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.