នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតីអញ្ជើញចុះត្រួតពិនិត្យ និងសួរសុខទុក្ខពលរដ្ឋរងគ្រោះដោយទឹកជំនន់នៅបន្ទាយមានជ័យ
សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង
សម្តេចតេជោ ហ៊ុន សែន អនុញ្ញាតឱ្យ ឯកឧត្តម ទ្រីសម៉ាន់ អ៉ីហ្គោរ៍ (Driesmans Igor) ឯកអគ្គរាជទូតសហភាពអឺរ៉ុបប្រចាំកម្ពុជា និងជាប្រេសិតពិសេស EU ប្រចាំនៅមីយ៉ាន់ម៉ា ចូលជួបសម្ដែងការគួរសម
សម្តេចតេជោ ហ៊ុន សែន អនុញ្ញាតឱ្យ ឯកឧត្តមឯកអគ្គរដ្ឋទូតសហភាពអឺរ៉ុប ប្រចាំកម្ពុជា ចូលជួបសម្តែងការគួរសម

នយោបាយ​ និង ការអភិវឌ្ឍន៍

យុវជនអ៊ីស្រាអែល ដែលបដិសេធមិនចុះឈ្មោះចូលបម្រើកងទ័ព ត្រូវកាត់ទោសឲ្យជាប់ពន្ធនាគារ រយៈពេល៣០ថ្ងៃ

2023/12/28 07:51:03 pm        514
Facebook Telegram Linkin
សកម្មជនអ៊ីស្រាអែល ដែលមានអាយុ ១៨ឆ្នាំម្នាក់ ត្រូវបានកាត់ទោសឲ្យជាប់ពន្ធនាគារយោធា រយៈពេល ៣០ថ្ងៃ បន្ទាប់ពីគេ បានបដិសេធមិនចុះឈ្មោះបម្រើក្នុងជួរកងទ័ពអ៊ីស្រាអែល ចំពេលសង្រ្គាមអ៊ីស្រាអែលហាម៉ាសដែលកំពុងបន្ត។យោងតាមវីដេអូដែលបានបង្ហោះនៅលើគណនីX របស់អង្គការMesarvot ដែលជាអង្គការមានទំនាក់ទំនងជាមួយជនជាតិអ៊ីស្រាអែលវ័យក្មេង ដែលមិនចង់បម្រើក្នុងយោធារដ្ឋ លោក Tal Mitnick បាននិយាយមុនពេលខ្លួនដើរចូលទៅក្នុងមូលដ្ឋានយោធា Tel HaShomerថា៖«ខ្ញុំជឿថា ការសម្លាប់មិនអាចដោះស្រាយការសម្លាប់បានទេ»។ «ការវាយប្រហារឧក្រិដ្ឋកម្មលើតំបន់ហ្កាហ្សា នឹងមិនដោះស្រាយការកាប់សម្លាប់ដ៏ឃោរឃៅ ដែលក្រុមហាម៉ាស បានធ្វើឡើងនោះ។ អំពើហិង្សា មិនអាចដោះស្រាយអំពើហិង្សាបានទេ។ នោះហើយជាមូលហេតុដែលខ្ញុំបដិសេធ»។មនុស្សមួយក្រុម បានប្រមូលផ្តុំគ្នាដោយសាមគ្គីភាពជាមួយ យុវជន Mitnick មុនពេលចូលទៅក្នុងមូលដ្ឋានយោធា ដែលលោក ត្រូវបានគេចាប់ខ្លួន កាលពីថ្ងៃអង្គារ។ ការកាត់ទោសដាក់ពន្ធនាគាររបស់លោក អាចនឹងត្រូវបន្តឲ្យលើសពី ៣០ថ្ងៃដំបូង ប្រសិនបើលោក បដិសេធមិនព្រមចុះឈ្មោះម្តងទៀត។ការសម្រេចចិត្តនេះ កើតឡើងក្នុងអំឡុងពេលអស់សង្ឃឹមចំពោះតំបន់ហ្កាហ្សា ដែលនៅតែរងការទម្លាក់គ្រាប់បែក និងការវាយប្រហារដោយកងកម្លាំងអ៊ីស្រាអែលជិត ១២សប្តាហ៍ហើយ បន្ទាប់ពីសង្គ្រាម បានចាប់ផ្តើម។ ប្រជាជនប៉ាឡេស្ទីនជាង ២០. 000នាក់ ត្រូវបានសម្លាប់ នេះបើយោងតាមតួលេខដែលផ្តល់ដោយក្រសួងសុខាភិបាលហ្កាហ្សា ដែលគ្រប់គ្រងដោយក្រុមហាម៉ាសកាលពីថ្ងៃសុក្រ។ របាយការណ៍របស់អង្គការសហប្រជាជាតិ ក៏បានព្រមានផងដែរថា ប្រជាជនជាងកន្លះលាននាក់ នៅតំបន់ហ្កាហ្សា កំពុងស្រេកឃ្លាន ដោយហានិភ័យនៃគ្រោះទុរ្ភិក្ស កើនឡើងជារៀងរាល់ថ្ងៃ។

រដ្ឋាភិបាលជប៉ុន អនុម័តផែនការបឋមសម្រាប់មូលដ្ឋានអាមេរិក ជុំវិញការប្រឆាំងរបស់ខេត្តអូគីណាវ៉ា

2023/12/28 07:42:07 pm        470
Facebook Telegram Linkin
រដ្ឋាភិបាលជប៉ុន បានអនុម័តផែនការបឋម ដែលជំនួសរដ្ឋាភិបាលខេត្តនូវការងារកែលម្អមូលដ្ឋាន ជាផ្នែកមួយនៃគម្រោងផ្លាស់ប្តូរទីតាំងមូលដ្ឋានកងម៉ារីនសហរដ្ឋអាមេរិក នៅក្នុងខេត្តអូគីណាវ៉ា។រដ្ឋាភិបាលកណ្តាល មានផែនការផ្លាស់ប្តូរទីតាំងស្ថានីយ៍ដែនអាកាស Futenma របស់កងម៉ារីនសហរដ្ឋអាមេរិក ពីទីក្រុង Ginowan ដែលមានប្រជាជនរស់នៅច្រើន ទៅកាន់ទីតាំងមួយនៅតំបន់ Henoko ទីក្រុង Nago ទោះបីជាមានការប្រឆាំងពីរដ្ឋាភិបាលខេត្តអូគីណាវ៉ា ក៏ដោយ។មន្ត្រីខេត្តអូគីណាវ៉ា បានជំទាស់ទៅនឹងការចេញសេចក្តីសម្រេចរបស់តុលាការជាន់ខ្ពស់ ដែលបង្គាប់ឱ្យខេត្តនេះ អនុម័តការងារកែលម្អមូលដ្ឋានដែលពាក់ព័ន្ធនៅតំបន់ឈូងសមុទ្រ នៅត្រឹមថ្ងៃចន្ទ។ក្រសួងរៀបចំដែនដី បានផ្តល់ភ្លើងខៀវចំពោះការងារនៅព្រឹកថ្ងៃព្រហស្បតិ៍នេះ។ វាជាលើកដំបូង សម្រាប់រដ្ឋាភិបាលកណ្តាល ក្នុងការជម្នះលើការសម្រេច របស់អាជ្ញាធរតំបន់ ដោយផ្អែកលើច្បាប់ស្វ័យភាពក្នុងតំបន់។ បន្ទាប់ពីមានការអនុម័ត ក្រសួងការពារជាតិ មានផែនការចាប់ផ្តើមការងារកែលម្អមូលដ្ឋាន នៅមូលដ្ឋានផ្លាស់ប្តូរទីតាំង នៅពាក់កណ្តាលខែមករា ខាងមុខនេះ។អភិបាលខេត្តអូគីណាវ៉ា លោក Tamaki Denny បានប្រាប់អ្នកសារព័ត៌មាននៅថ្ងៃព្រហស្បតិ៍នេះថា ការសម្រេចចិត្តរបស់រដ្ឋាភិបាលកណ្តាល បានរំលោភលើស្វ័យភាព និងការពឹងផ្អែកលើខ្លួនឯងរបស់រដ្ឋាភិបាលតំបន់។ លោកនិយាយថា ខេត្តអូគីណាវ៉ា ត្រូវតែអនុញ្ញាតម្តងទៀតឲ្យគេដឹងថា នេះមិនមែនគ្រាន់តែជាបញ្ហាទាក់ទងនឹងខេត្តនេះប៉ុណ្ណោះទេ។

ប្រធានាធិបតីអ៊ុយក្រែន និយាយថា ប្រទេសរបស់លោក អាចក្លាយជាប្រទេសផលិតសព្វាវុធដ៏ធំ

2023/12/28 07:24:29 pm        515
Facebook Telegram Linkin
ប្រធានាធិបតីអ៊ុយក្រែន លោក Volodymyr Zelensky បាននិយាយថា ប្រទេសរបស់លោក អាចក្លាយជាប្រទេសផលិតផ្នែកការពារជាតិធំបំផុតមួយនៅក្នុងពិភពលោក ហើយបញ្ហានេះ លោកប្រាកដថាឧស្សាហកម្មការពារជាតិរបស់ប្រទេសអ៊ុយក្រែន ពិតជាអាចក្លាយជារោងចក្រផ្នែកការពារជាតិដ៏មានផលិតភាព និងរឹងមាំបំផុតមួយក្នុងចំណោមរោងចក្រចំនួន ១០ នៅលើពិភពលោក នៅទីបំផុត។លោកបាននិយាយក្នុងអំឡុងសុន្ទរកថាតាមវីដេអូកាលពីថ្ងៃពុធថា ឧស្សាហកម្មនេះ កំពុងរួមចំណែករួចទៅហើយ មិនត្រឹមតែក្នុងការពង្រឹងសមត្ថភាពការពារផ្ទាល់ខ្លួនរបស់អ៊ុយក្រែនក្នុងពេលមានសង្គ្រាមប៉ុណ្ណោះទេ ប៉ុន្តែថែមទាំងជួយយ៉ាងសំខាន់ដល់កំណើនសេដ្ឋកិច្ច និងការងារផងដែរ ។លោក Zelensky បានសរសើរដល់កិច្ចព្រមព្រៀង ជាមួយដៃគូប្រទេសលោកខាងលិច លើសពីសហរដ្ឋអាមេរិកទាំងអស់ លើការផលិតសព្វាវុធរួមគ្នាថា ជាសមិទ្ធផលនយោបាយដ៏អស្ចារ្យបំផុតរបស់យើងនៅឆ្នាំនេះ។ លោកនិយាយថា នេះធ្វើឱ្យមានលទ្ធភាពក្នុងការបង្កើតយុទ្ធោបករណ៍ទំនើបៗ ហើយ ការផលិតសព្វាវុធបែបប្រទេសលោកខាងលិច នឹងត្រូវបានគេធ្វើមូលដ្ឋានីយកម្មបន្ថែមទៀត។កាលពីពេលមុន រដ្ឋមន្ត្រីក្រសួងឧស្សាហកម្មយុទ្ធសាស្ត្រអ៊ុយក្រែន លោក Olexander Kamyshin បានប្រាប់សារព័ត៌មានថា ប្រទេសអ៊ុយក្រែន បានបង្កើនការផលិតផ្នែកការពារជាតិរបស់ខ្លួនបីដង ក្នុងឆ្នាំបច្ចុប្បន្ន។

សហរដ្ឋអាមេរិក បញ្ចេញជំនួយយោធាចុងក្រោយ ២៥០លានដុល្លារឲ្យទៅអ៊ុយក្រែន

2023/12/28 06:47:43 pm        394
Facebook Telegram Linkin
សេតវិមាន បានអនុម័តកញ្ចប់ជញ្ជូនយោធាអាមេរិកមួយផ្សេងទៀតឲ្យទៅអ៊ុយក្រែន ក្នុងទំហំទឹកប្រាក់២៥០លានដុល្លារអាមេរិក។ ក្រុមមន្ត្រីអាមេរិក និយាយថា កញ្ចប់ជំនួយចុងក្រោយរួមមានប្រព័ន្ធការពារដែលអាកាស កាំភ្លើងធំនិងគ្រាប់រំសេវសម្រាប់អាវុធធុនតូច និង អាវុធប្រឆាំងរថក្រោះ ។ ប៉ុន្តែជំនួយនេះ នឹងក្លាយជាមូលនិធិចុងក្រោយ ដោយគ្មានការអនុម័តពីសភាថ្មីៗ ជាទីដែលការចរចា បានជាប់គាំង។ ប្រទេសអ៊ុយក្រែន បានព្រមានថា កិច្ចខិតខំសង្រ្គាមនិងហិរញ្ញវត្ថុសាធារណៈកំពុងជួបការប្រឈម ប្រសិនបើណ្ដាប្រទេសលោកខាងលិច ពុំផ្ដល់ជំនួយបន្ថែមទៀត។ ស្របពេលការវាយបកលើកងកម្លាំងរុស្ស៊ីនៅត្រឹង នៅក្នុងភាគខាងកើតប្រទេស និងមានការប្រែប្រួលតិចតួច លើការគ្រប់គ្រងសមរភូមិមុខ ក្រុមមន្ត្រីអ៊ុយក្រែន កំពុងប្រឈម នឹងការបាត់បង់ជំនួយពីក្រុមសម្ព័ន្ធមិត្ត នៅក្នុងទីក្រុងវ៉ាស៊ីនតោន និង អឺរ៉ុប ។ ទោះបីជាកិច្ចខិតខំប្រឹងប្រែងជួយក្នុងសង្រ្គាមអ៊ុយក្រែន ទទួលបានការគាទ្រខ្លាំង នៅក្នុងសភាអាមេរិក ក្ដី កិច្ចព្រព្រមព្រៀងជួយផ្ដល់អាវុធបន្ថែម ត្រូវបានរារាំងដោយគណបក្សសាធារណរដ្ឋ ដែលទទូចថា វិធានការសន្តិសុខកាន់តែតឹងរ៉ឹងលើព្រំដែនអាមេរិក និងម៉ិកស៊ិក ត្រូវតែជាផ្នែកមួយនៃកិច្ចព្រមព្រៀងជំនួយយោធាណាមួយ៕

រាជធានីភ្នំពេញកំពុងរីកចម្រើនតាមរយៈគម្រោងវិនិយោគ ការផ្តល់សេវា និងសន្តិសុខល្អ

2023/12/28 06:45:43 pm        584
Facebook Telegram Linkin
អភិបាលរាជធានីភ្នំពេញបានបង្ហាញការរីកចម្រើនជាច្រើនក្នុងរយៈពេលមួយឆ្នាំ នៃឆ្នាំ២០២៣​នេះ ក្រោយពេលបើកដំណើរការសេដ្ឋកិច្ចសង្គមពេញលេញឡើងវិញ។ថ្លែងក្នុងពិធីបើកសន្និបាតបូកសរុបលទ្ធផលការងារ ឆ្នាំ២០២៣ និងទិសដៅ​អនុវត្ត​ការងារ​ឆ្នាំ​២០២៤​ របស់រដ្ឋបាលរាជធានីភ្នំពេញ នាព្រឹកថ្ងៃទី២៨ ខែធ្នូ ឆ្នាំ២០២៣ នៅសណ្ឋាគារ រ៉េស៊ីដង់ សុខា ភ្នំពេញ ឯកឧត្តម ឃួង ស្រេង អភិបាលរាជធានីបានមានប្រសាសន៍ថា រដ្ឋបាលរា​ជ​ធានី​ភ្នំពេញ​ បានយកចិត្តទុកដាក់អនុវត្តគោលនយោបាយ ភូមិ សង្កាត់ មានសុវត្ថិភាព ដោយ​រក្សា​បាន​សន្តិសុខ​សណ្តាប់​ធ្នាប់សាធារណៈល្អ ជូនប្រជាពលរដ្ឋ និងសង្គមជាតិបានល្អ បើ​តាម​របាយការណ៍​បង្ហាញ​ឱ្យ​ឃើញពីសញ្ញាណវិជ្ជមាននៃការថយចុះនូវចំនួនបទល្មើសព្រហ្មទណ្ឌ សុខ​សុវត្ថិភាព និងកិច្ច​សហប្រតិបត្តិការ​បង្ក្រាប​បទ​ល្មើស​កាន់​តែ​មាន​ប្រសិទ្ធភាព​របស់​អាជ្ញាធរ​មូលដ្ឋាន និងកម្លាំងមានសមត្ថកិច្ច។ឯកឧត្តម ឃួង ស្រេង បន្ថែមថា រដ្ឋបាលរាជធានី​ក៏​បាន​អនុវត្ត​ដោយ​ជោគជ័យ​នូវ​គម្រោង​លើក​កម្ពស់​ជីវភាព​ប្រជាជនក្រីក្រ ដែលជាផ្នែកមួយនៃគម្រោង ថ្នាក់ជាតិរបស់រាជរដ្ឋាភិបាលកម្ពុជា ក្រោម​ឥណទានរបស់ធនាគារពិភពលោក និងដឹកនាំអនុវត្តដោយក្រសួងមហាផ្ទៃ។ គិត​មក​ទល់​ពេលនេះ គម្រោងបានអនុវត្តអស់រយៈពេល ៦ឆ្នាំហើយ និង​បាន​បិទ​បញ្ចប់​គម្រោង​កាល​ពី​ថ្ងៃ​ទី​៣០ ខែវិច្ឆិកា ឆ្នាំ២០២៣ ដែលបានផ្តល់ផលប្រយោជន៍ដោយផ្ទាល់ ដល់ប្រជា​ពលរដ្ឋ​ចំនួន​ប្រមាណ ៥៦.៦៧៧ នាក់ និងដោយប្រយោលប្រមាណ ២២ ម៉ឺននាក់ ។ឯកឧត្តម ឃួង ស្រេង បន្តថា ការផ្តល់សេវាសាធារណៈជូនប្រជាពលរដ្ឋតាមរយៈអង្គភាពច្រក ចេញ​ចូលតែមួយទទួលបានចំណូលថវិការដ្ឋចំនួនជិត ២៧ពាន់លានរៀល ឬស្មើនឹងប្រមាណ ៦,៥៨ លានដុល្លាអាមេរិក។ បច្ចុប្បន្ន​នេះគ​ម្រោង​អភិវឌ្ឍន៍​ជា​ច្រើន​បាន​នឹង​កំពុង​ដំណើរ​ការ​សាង​សង់​ក្នុង​រាជធានីភ្នំពេញ ក្នុងនោះមានសំណង់បុរីចំនួន ៣១០ កន្លែង អគារខ្ពស់ៗ​ចាប់​ពី​ប្រាំ​ជាន់​ឡើង​ទៅ​មានចំនួន ១.៧៧៧ អគារ និងបានពិនិត្យលើឯកសារស្នើសុំ លិខិតអនុញ្ញាត​សាង​សង់​ក្នុង​គ​ម្រោងថ្មីចំនួន ៥៣៦ គម្រោង ដែលមានទំហំទុនវិនិយោគប៉ាន់ស្មានប្រមាណ ១៣២ លាន​ដុល្លារ​អាមេរិកបន្ថែមទៀត ។ ដោយឡែករោងចក្រវិនិយោគមានចំនួន ៧៦៣ រោងចក្រ កើនឡើង ១៨ រោងចក្រ មានតម្លៃប៉ាន់ស្មានផលិតផលសរុប ៦.៥៩៣ លានដុល្លាអាមេរិក គឺកើន​ឡើង​យ៉ាង​គំហុកក្នុងអត្រាប្រមាណ ២១៨% បើធៀបនឹង​តម្លៃ​ប៉ាន់ស្មាន​ផលិតផល​សរុប​ក្នុង​ឆ្នាំ​២០២២ កន្លងទៅ ដែលជាការបង្ហាញឱ្យឃើញពីសញ្ញាណវិជ្ជមាននៃការវិនិយោគ ក្រោយ​ពេល​បើក​ដំណើរ​ការ​សេដ្ឋកិច្ចសង្គមពេញលេញឡើងវិញលើគ្រប់វិស័យនារយៈពេល ២ ឆ្នាំ​ចុង​ក្រោយ​នេះ​៕ អត្ថបទ ៖ ប្រាក់ វ៉ាន់ដា 

រុស្ស៊ីអះអាងថា ខ្លួនបានប្តូរទិសដៅការនាំចេញប្រេងភាគច្រើនពីអឺរ៉ុប ទៅប្រទេសចិន និងឥណ្ឌាវិញ

2023/12/28 06:42:25 pm        448
Facebook Telegram Linkin
លោក ឧបនាយករដ្ឋមន្ត្រី Alexander Novak បានថ្លែងកាលពីថ្ងៃពុធថា ប្រទេសរុស្ស៊ី បានប្តូរទិសដៅការនាំចេញប្រេងរបស់ខ្លួនពីអឺរ៉ុប ទៅកាន់ប្រទេសចិន និងឥណ្ឌាវិញ រយៈពេលជិតពីរឆ្នាំ បន្ទាប់ពីទីក្រុងមូស្គូ រងការវាយប្រហារដោយទណ្ឌកម្មរបស់លោកខាងលិចជុំវិញជម្លោះអ៊ុយក្រែន។បន្ទាប់ពីប្រធានាធិបតី វ្ល៉ាឌីមៀ ពូទីន បានបញ្ជូនទាហានទៅអ៊ុយក្រែន ក្នុងខែកុម្ភៈ ឆ្នាំ ២០២២ បណ្តាប្រទេសលោកខាងលិច បានវាយប្រហាររុស្ស៊ីជាមួយនឹងទណ្ឌកម្មមួយចំនួន រួមទាំងការដាក់ទណ្ឌកម្មរបស់សហភាពអឺរ៉ុបលើការដឹកជញ្ជូនប្រេងតាមសមុទ្ររបស់ខ្លួន។លោក Novak ដែលទទួលបន្ទុកគោលនយោបាយថាមពល បាននិយាយថា៖«ពីមុន យើងបានផ្គត់ផ្គង់ប្រេងសរុបពី ៤០ភាគរយ ទៅ៤៥ភាគរយនៃផលិតផលប្រេងទៅកាន់អឺរ៉ុប»។លោក Novak បាននិយាយនៅក្នុងបទសម្ភាសន៍តាមទូរទស្សន៍ថា៖«ឆ្នាំនេះ យើងរំពឹងថា តួលេខនេះ នឹងមិនលើសពី ៤ ទៅ ៥ភាគរយនៃការនាំចេញសរុបទេ»។ដោយសារវាកំពុងបាត់បង់ចំណែកទីផ្សារជាច្រើននៅអឺរ៉ុប ទីក្រុងមូស្គូ បានងាកទៅរកអ្នកទិញផ្សេងទៀត រួមទាំងប្រទេសចិនផងដែរ។លោក បានបន្តទៀតថា៖«ប្រទេសចិនដែលមានចំណែក (នៃការនាំចេញប្រេង) បានកើនឡើងដល់ ៤៥-៥០ ភាគរយ ហើយឥណ្ឌា បានក្លាយជាដៃគូសំខាន់របស់យើង ក្នុងស្ថានភាពបច្ចុប្បន្ន។ប្រទេសឥណ្ឌា ដែលពីមុន ទទួលបានការដឹកជញ្ជូនស្ទើរតែគ្មាន បានក្លាយជាអ្នកទិញដ៏សំខាន់។

រុស្សី និងឥណ្ឌា កាន់តែខិតទៅជិតការផលិតគ្រឿងយុទ្ធោបករណ៍រួមគ្នា

2023/12/28 06:03:49 pm        289
Facebook Telegram Linkin
រដ្ឋមន្ត្រីការបរទេសរុស្ស៊ី លោក សើហ្កេ ឡាវរ៉ូវ (Sergei Lavrov) បាននិយាយកាលពីថ្ងៃពុធ (២៧ ធ្នូ) ថាប្រទេសរុស្ស៊ី និងឥណ្ឌា បានធ្វើឱ្យមានការវិវឌ្ឍន៍ជាក់ស្តែងនៅក្នុងកិច្ចពិភាក្សាស្តីពីផែនការរួមគ្នាផលិតគ្រឿងយុទ្ធោបករណ៍ បន្ទាប់ពីកិច្ចពិភាក្សាជាមួយសមភាគីឥណ្ឌាលោក ស៊ុប្រាហ្វម៉ានយ៉ាម ចៃសានការ (Subrahmanyam Jaishankar) នៅទីក្រុងមូស្គូ។ថ្លែងនៅក្នុងសន្និសីទសារព័ត៌មានមួយ លោក ឡាវរ៉ូវ បាននិយាយថា កិច្ចសហប្រតិបត្តិការបែបនេះមានលក្ខណៈជាយុទ្ធសាស្ត្រ និងជាផលប្រយោជន៍របស់ប្រទេសទាំងពីរ ហើយនឹងជួយធានាសន្តិសុខនៅលើទ្វីបអាស៊ីអឺរ៉ុប។ លោកបាននិយាយថា ទីក្រុងមូស្គូគោរពបំណងប្រាថ្នារបស់ឥណ្ឌាក្នុងការធ្វើពិពិធកម្មអ្នកផ្គត់ផ្គង់ផ្នែករឹងយោធារបស់ខ្លួន ហើយក៏បានត្រៀមខ្លួនផងដែរដើម្បីគាំទ្រដល់បំណងប្រាថ្នារបស់ទីក្រុងញ៉ូវដេលី ក្នុងការផលិតរបស់ដែលឥណ្ឌាត្រូវការនៅក្នុងប្រទេសឥណ្ឌា។ឥណ្ឌាបានក្លាយជាដៃគូសេដ្ឋកិច្ចស្នូលមួយរបស់រុស្ស៊ីចាប់តាំងពីប្រទេសលោកខាងលិចក្នុងឆ្នាំ២០២២ បានដាក់ទណ្ឌកម្មលើក្រុងមូស្គូ ជុំវិញសង្រ្គាមនៅអ៊ុយក្រែន។ រុស្ស៊ីបានបង្វែរការនាំចេញប្រេងជាច្រើនរបស់ខ្លួនទៅកាន់ប្រទេសឥណ្ឌា និងបង្កើនការទូតនៅក្នុងក្រុមប្រទេស ប្រ៊ីក (BRICS) ជាប្លុកដែលប្រទេសទាំងពីរកំពុងបង្កើតសមាជិក៕

ប្រធានាធិបតីទួរគី និយាយថាលោកនាយករដ្ឋមន្ត្រីអ៊ីស្រាអែល Netanyahu មិនខុសពីលោកហ៊ីត្លែរ ទេ

2023/12/28 05:30:38 pm        321
Facebook Telegram Linkin
ប្រធានាធិបតីទួរគី លោក ថាយីប អឺដូហ្កាន់ (Tayyip Erdogan) បាននិយាយកាលពីថ្ងៃពុធ (២៧ ធ្នូ) ថានាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) មិនខុសពីមេដឹកនាំបក្សកុម្មុយនីស្តណាហ្ស៊ីអាល្លឺម៉ង់ លោក អាដូហ្វ ហ៊ីត្លែរ (Adolf Hitler) នោះទេហើយបានប្រដូចការវាយប្រហាររបស់អ៊ីស្រាអែលលើតំបន់ហ្កាហ្សា ទៅនឹងការប្រព្រឹត្តអំពើសម្លាប់រង្គាលចំពោះជនជាតិជ្វីហ្វដោយពួកណាហ្ស៊ី។ដោយបន្ថែមវោហាសាស្ត្ររិះគន់របស់ខ្លួន លោក Erdogan បាននិយាយថា ប្រទេសទួរគី នឹងស្វាគមន៍ក្រុមអ្នកអប់រំ និងអ្នកវិទ្យាសាស្ត្រដែលប្រឈមមុខនឹងការធ្វើទុក្ខបុកម្នេញចំពោះទស្សនៈរបស់ពួកគេលើជម្លោះនៅតំបន់ហ្កាហ្សា ដោយបន្ថែមថាបណ្ដាប្រទេសលោកខាងលិចដែលគាំទ្រអ៊ីស្រាអែល ជាប់ពាក់ព័ន្ធនៅក្នុងអ្វីដែលលោកហៅថាឧក្រិដ្ឋកម្មសង្គ្រាម។លោក អឺដូហ្កាន់ បាននិយាយថា «ពួកគេទាំងនោះធ្លាប់និយាយអាក្រក់អំពីហ៊ីត្លែរ ប៉ុន្តែតើគេមានអ្វីខុសប្លែកពីលោកហ៊ីត្លែរ? អ្វីដែលលោក ណេតាន់យ៉ាហ៊ូ កំពុងធ្វើមិនខុសពីអ្វីដែលហ៊ីត្លែរបានធ្វើទេ។ លោក ណេតាន់យ៉ាហ៊ូ ទទួលបានការគាំទ្រពីលោកខាងលិច ហើយជាមួយការគាំទ្រទាំងអស់នោះពួកគេបានសម្លាប់ពលរដ្ឋហ្កាហ្សាជាង ២ម៉ឺននាក់»។លោក ណេតាន់យ៉ាហ៊ូ បានឆ្លើយតបនៅក្នុងសេចក្តីថ្លែងការណ៍មួយថា «លោក Erdogan ដែលបានប្រព្រឹត្តអំពើប្រល័យពូជសាសន៍ប្រឆាំងនឹងជនជាតិឃឺដ និងបានបង្កើតកំណត់ត្រាពិភពលោកសម្រាប់ការចាប់អ្នកសារព័ត៌មានដែលប្រឆាំងនឹងការគ្រប់គ្រងរបស់ខ្លួន គ្មានសិទ្ធិប្រៀនប្រដៅយើងនោះទេ»។សមាជិកណាតូទួរគី ដែលគាំទ្រដំណោះស្រាយរដ្ឋពីរចំពោះជម្លោះអ៊ីស្រាអែល-ប៉ាឡេស្ទីនមួយនេះ បានរិះគន់ការវាយលុកតាមផ្លូវអាកាសនិងជើងគោករបស់អ៊ីស្រាអែល លើតំបន់ហ្កាហ្សា ដោយហៅអ៊ីស្រាអែលថាជា «រដ្ឋភេរវករ» ហើយបាននិយាយថាមេដឹកនាំរបស់រដ្ឋនេះ ត្រូវតែត្រូវបានកាត់ទោសនៅក្នុងតុលាការអន្តរជាតិ៕

រយៈពេល៤ខែ ក្រសួងការងារបានអនុវត្តអនុសាសន៍របស់សម្ដេចនាយករដ្ឋមន្ត្រីទាំង៦ចំណុច គ្រប់ជ្រុងជ្រោយ

2023/12/28 04:39:06 pm        326
Facebook Telegram Linkin
រយៈពេល៤ខែ នៃការចូលកាន់តំណែងជារដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ក្នុង​នីតិកាលទី៧នេះ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាល​វិជ្ជាជីវៈ​បាន​ដឹក​នាំ​​ក្រសួង​ការងារអនុវត្តអនុសាសន៍ទាំង៦ចំណុចរបស់នាយករដ្ឋមន្ត្រីគ្រប់ជ្រុងជ្រោយ។ ជា​អនុសាសន៍​ដែល​សម្តេចមហាបរវធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា បាន​ផ្តល់អនុសាសន៍ចំនួន៦ចំណុចកាលពីថ្ងៃទី២៩ ខែសីហា ដើមអាណត្តិ​ដើម្បី​អនុវត្ត​ឱ្យ​បា​ន​នៅ​ឆ្នាំ២​០២៣នេះ។ នេះបើតាមឯកឧត្តម កត្តា អ៊ន មន្រ្តីនាំពាក្យនៃក្រសួងការងារ និង​បណ្តុះ​បណ្តាល​វិជ្ជាជីវៈនៅថ្ងៃទី២៨ ខែធ្នូ ឆ្នាំ២០២៣ នេះ ។ បើតាមឯកឧត្តមគ្រប់ជ្រុងជ្រោយនោះរួមមាន ទី១. ការកំណត់​ប្រាក់​ឈ្នួល​អប្បរមា​ សម្រាប់​កម្មករ​និយោជិត​ឆ្នាំ​២០២៤ ដែល​សម្រេចបានកាលពីថ្ងៃទី២៨ ខែកញ្ញាចំនួន២០២ដុល្លារ​ តាមរយៈ​យន្តការ​ការ​ចរចាត្រីភាគីរបស់ក្រុមប្រឹក្សាជាតិប្រាក់ឈ្នួលអប្បរមា និង សមហតេចធិបតី​បន្ថែម​២​ដុល្លារ​ទៀត ធ្វើឱ្យប្រាក់ឈ្នួលអប្បបរមាមានចំនួន២០៤ដុល្លាសម្រាប់ឆ្នាំ២០២៤។ ត្រង់​ចំណុច​នេះ សម្តេចនាយករដ្ឋមន្ត្រី បានផ្តល់​អនុសាសន៍​ត្រូវ​សម្រេច​ឱ្យ​បាន​នូវ​មុន​ពិធី​បុណ្យ​ភ្ជុំបិ​ណ្ឌ​នៅ​ថ្ងៃ​ទី​១៣ ខែតុលា។ ឯកឧត្តមបន្ថែមថា កិច្ចការងារទី២ដែលសម្រេចបានគឺ ការរៀបចំដាក់ឱ្យដំណើរការរបប​សន្តិសុខ​សង្គម​ផ្នែកថែទាំសុខភាព តាមរបបភាគទានស្ម័គ្រចិត្តសម្រាប់បុគ្គលស្វ័យនិយោជន៍ និងអ្នកក្នុង​បន្ទុក​សមាជិកប.ស.ស.។ កិច្ចការដ៏សំខាន់នេះ ត្រូវបានសម្តេច​នាយករដ្ឋ​មន្ត្រី​ ប្រកាស​កា​ល​ពី​ថ្ងៃ​ទី​១៤ ខែវិច្ឆិកា ឆ្នាំ២០២៣ ហើយបើគិតពីពេលនោះ មកដល់ត្រឹមថ្ងៃទី២៧ ខែធ្នូ ឆ្នាំ២០២៣ មាន​ក្រុម​គោលដៅចំនួន១០២ ៦០៤នាក់ បានចុះបញ្ជី និងបានទៅប្រើប្រាស់សេវាចំនួន ចំនួន ៤៦ ៩១២ដង។លើសពីនេះទៅទៀត សម្រាប់កិច្ចការទី៣ដែលសម្រេចគួរឱ្យកត់សម្គាល់មួយទៀត គឺ ការ​ដាក់​ឱ្យ​ដំណើរ​ការ​កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និ​ង​គ្រួសារងាយរងហានិភ័យ។ កិច្ចការនេះ ក៏ត្រូវបានប្រកាសដោយសម្តេចនាយករដ្ឋមន្ត្រី ប្រកាសកាលពីថ្ងៃទី១៤ ខែវិច្ឆិកា ឆ្នាំ២០២៣ផងដែរ។ ហើយបច្ចុប្បន្ននេះ មានក្រុម​គោល​ដៅ​ប្រមាណ​ជិត២ម៉ឺននាក់ បានចុះឈ្មោះចូលរៀនរួចរាល់ហើយ។ ចំពោះកិច្ចការទី៤ ក្រសួង​បាន​ចុះ​អនុស្សរណៈ​នៃ​ការយោគយល់គ្នា ជាមួយសភាពាណិជ្ជកម្មកម្ពុជា និងសមាគមនិយោជក ចំនួន ១៧​រួចរាល់ដើម្បីបើកផ្លូវឱ្យមានកិច្ចសហប្រតិបត្តិការលើការហាត់ការ និងកម្មសិក្សា​ដើម្បី​គាំទ្រ​ដល់​ការ​បណ្តុះបណ្តាលជំនាញវិជ្ជាជីវៈ និងបច្ចេកទេស។ ដោយឡែកកិច្ចការឧបត្ថមសាច់ប្រាក់ដល់ស្ត្រីមានផ្ទៃពោះ ដែលជាកិច្ចការសំខាន់ទី៥ ក្រសួង​បាន​អនុវត្ត​ការងារ​នេះ​យ៉ាងខ្ជាប់ខ្ជួនចាប់តាំងពីខែសីហារហូតមក។ បើគិតចាប់តាំង​ពី​ខែ​សីហា​រហូត​ដល់​ថ្ងៃ​ទី​២០ ខែវិច្ឆិកានេះ រដ្ឋាភិបាលបាន​ចំណាយ​ថវិកា​ប្រមាណ​ជាង​៦​លាន​ដុល្លារ​អាមេរិក សម្រាប់​កម្មការិនី មន្ត្រីរាជការ មន្ត្រិកិច្ចសន្យាជាស្ត្រីទៅពិនិត្យសុខភាព មុន ក្រោយសម្រាល ពេល​សម្រាល និងចាក់វ៉ាកសាំងជិត៦ម៉ឺននាក់។ នេះបើតាម​ប្រសាសន៍​របស់​ឯក​ឧត្តម​រដ្ឋ​មន្ត្រី​កាល​ពី​ថ្ងៃ​ទី២១ ខែវិច្ឆិកាឆ្នាំ២០២៣កន្លងទៅ។ សម្រាប់​ការងារចុងក្រោយទី៦ស្តីពីសហគ្រាសមួយ គឺសហគមន៍សុខសាន្តមួយ ក្រសួងការងារ បាន​ដាក់​ចេញយន្តការពង្រឹងសមត្ថភាពមន្ត្រីអធិការកិច្ច មន្ត្រីផ្សះផ្សារវិវាទការងារ និង​ការ​ពង្រឹង​វិសាល​ភាព​ក្រុមប្រឹក្សាអាជ្ញាកណ្តាលដែលជាយន្តការត្រីភាគី។ មិនត្រឹមតែប៉ុណ្ណោះ ក្រសួង នឹង​ដាក់​ចេញ​នូវយុទ្ធនាការប្រឡងប្រណាំងយកពាន “សហគ្រាសមួយជាសហគមន៍សុខសាន្តមួយ” ចាប់​ពី​ឆ្នាំ២០២៤នេះតទៅ។ ក្រៅពីសម្រេចអនុសាសន៍ទាំង៦នោះ អនុសាសន៍​ចំនួន​៤​ចំណុច​ផ្សេង​ទៀត ក៏ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់​ពី​វឌ្ឍនភាព​ចំនួន​៤​ចំណុច​ផ្សេង​ទៀត​ដែលក្រសួងបានសម្រេចផងដែរ៕

សម្ដេចធិបតី ហ៊ុន ម៉ាណែត ស្វាគមន៍ការត្រឡប់មកវិញនាវាទេសចរណ៍ Westerdam មកកាន់កម្ពុជាសាជាថ្មី

2023/12/28 04:16:53 pm        662
Facebook Telegram Linkin
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នាព្រឹកថ្ងៃទី២៨ ខែធ្នូ ឆ្នាំ ២០២៣នេះ បានប្រកាស ស្វាគមន៍ការត្រឡប់មកវិញរបស់ នាវាទេសចរណ៍ខ្នាតយក្ស Westerdam មកកាន់កម្ពុជាសាជាថ្មី នឹងធ្វើឱ្យពិភពលោកកាន់តែស្គាល់កម្ពុជាបន្ថែមទៀត ដោយ​បាននាំអ្នកទេសចរជាង ២០០០នាក់ មកកាន់ព្រះរាជាណាចក្រកម្ពុជា។សម្ដេចធិបតីនាយករដ្ឋមន្រ្ដីមានប្រសាសន៍ថា នាវាទេសចរណ៍​ខ្នាត​យក្ស​របស់​សហរដ្ឋ​អាមេរិក​មួយ​នេះ បានចូលចតនៅកំពង់ផែស្វយ័តក្រុងព្រះសីហនុ ខេត្តព្រះសីហនុ នាព្រឹកថ្ងៃទី១៣ ខែ​កុម្ភៈ ឆ្នាំ២០២០ បន្ទាប់​ពី​ទទួល​បាន​ការ​អនុញ្ញាត​ពី​រាជរដ្ឋាភិបាល​កម្ពុជា​ដឹកនាំ​ដោយ​សម្តេច​អគ្គ​មហា​សេនាបតីតេជោ ហ៊ុន សែន អតីតនាយករដ្ឋមន្ត្រី និងជា​ប្រធាន​ឧត្ត​ម​ក្រុម​ប្រឹក្សា​ព្រះមហាក្សត្រ ក្នុងអំឡុងពេលវិបត្តិកូវីដ-១៩ កំពុងរីករាលដាលធ្ងន់ធ្ងរពាសពេញពិភពលោក ដែល​ជា​ទង្វើមនុស្សធម៌ ជួយសង្គ្រោះជីវិត លើកកម្ពស់សិទ្ធិរស់រានមានជីវិត និងផ្តល់​គុណ​តម្លៃ​នៃ​មនុស្ស​ជាតិ​។ សម្ដេចធិបតីនាយករដ្ឋមន្រ្ដីបញ្ជាក់ថា៖«កម្ពុជាតូច តែបេះដូងធំ» បានគិតគូរអំពីបញ្ហាមនុស្សធម៌ និងអាយុជីវិត​អ្នក​ទេសចរជាង ២២០០ នាក់ ដែលតែលតោលលើមហាសាគរ និងអនុញ្ញាតឱ្យចូលចតលើទឹកដីកម្ពុជា ថែមទាំងបាន​ទទួល​នូវ​បដិសណ្ឋារ​កិច្ច​ដល់​អ្នក​ទេសចរ​ទាំង​អស់ ដើម្បីផ្តល់ឱកាស ត្រឡប់ទៅកាន់ប្រទេសកំណើតរបស់ខ្លួនវិញ។ សម្ដេចថ្លែងថា ការត្រឡប់មកវិញនេះ គឺជាការរំលឹក ដឹងគុណ និង​យល់​ច្បាស់​អំពី​សក្តា​នុពល​របស់​កម្ពុជា ព្រមទាំងបេះដូងមនុស្សធម៌ ដែលបានគិតគូរពីអាយុជីវិតិ ជាជាងភាពភ័យខ្លាច គឺ​បាន​សរ​បញ្ជាក់ច្បាស់ ពីចក្ខុវិស័យដ៏វែងឆ្ងាយ និងប្រកប​ដោយ​ភាព​ប្រាកដ​និយម​របស់​សម្តេច​តេជោ ហ៊ុន សែន៕

បណ្ដាញសង្គម

ព័ត៌មានថ្មីៗ

ប្រធានក្រុមការងារចុះមូលដ្ឋានស្រុកបាធាយ៖ សម្តេចធិបតី តែងតែគិតគូរ និងយកចិត្តទុកដាក់ចំពោះសុខុមាលភាព និងជីវភាពប្រជាពលរដ្ឋ ដោយមិនទុកនរណាម្នាក់ចោល
09/30/2026 02:09 PM
Facebook Telegram Linkin
ប្រាក់ឈ្នួលគោលកម្មករកាត់ដេរឆ្នាំ២០២៧កើនដល់ ២១២ដុល្លារ និងបន្តរក្សាប្រាក់​ឧបត្ថម្ភ​បណ្តោះ​អាសន្ន​លើសោហ៊ុយធ្វើដំណើរ និងថ្លៃស្នាក់នៅ ២,៥ដុល្លារ
09/30/2026 02:09 PM
Facebook Telegram Linkin
រុស្ស៊ីបង្កើនវោហារសាស្ត្រជុំវិញតំបន់ Kaliningrad ដោយគំរាមប្រើអាវុធនុយក្លេអ៊ែរប្រឆាំងនឹងអង្គការ NATO
09/30/2026 01:09 PM
Facebook Telegram Linkin
សម្ដេចធិបតី៖ ប្រាក់ឈ្នួលគោលរួមប្រាក់អត្ថប្រយោជន៍ផ្សេងទៀតឆ្នាំ២០២៧ កម្មករនិយោជិត ត្រូវ​ទទួលបានចន្លោះពី ២៣១,៥ដុល្លារ ដល់ ២៤២,៥ ដុល្លារក្នុងមួយខែ
09/30/2026 01:09 PM
Facebook Telegram Linkin
មេដឹកនាំអ៊ុយក្រែន៖ ប្រទេសបែលហ្ស៊ិកនឹងផ្ទេរយន្តហោះF-16 បីគ្រឿងទៅឱ្យអ៊ុយក្រែននៅឆ្នាំនេះ
09/30/2026 01:09 PM
Facebook Telegram Linkin
សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា សៅ ទី ហេង សំរិន អញ្ជើញកាន់បិណ្ឌវេនទី៤នៅវត្តក្រពើហា
09/30/2026 01:09 PM
Facebook Telegram Linkin
ឯកឧត្តម អូន ព័ន្ធមុនីរ័ត្ន អញ្ជើញដាក់ដំណើរការផែនការប្រតិបត្តិសម្រាប់អនុវត្តន៍គោលការណ៍ណែនាំក្របខណ្ឌកិច្ចគាំពារសង្គមឆ្លើយតបនឹងគ្រោះអាសន្នឆ្នាំ២០២៦-២០៣០
09/30/2026 12:09 PM
Facebook Telegram Linkin
គ.ជ.ប នឹងរៀបចំសម្រួលដល់ពលរដ្ឋភៀសសឹក ​សម្រាប់ការពិនិត្យបញ្ជីឈ្មោះ និង​ចុះ​ឈ្មោះ​បោះឆ្នោត​ឆ្នាំ២០២៦
09/30/2026 12:09 PM
Facebook Telegram Linkin
សម្តេច ម៉ែន សំអន អញ្ជើញរាប់បាត្រវេនកាន់បិណ្ឌទី៤ ឧទ្ទិសកុសលជូនដល់ដួងវិញ្ញាណក្ខន្ធអ្នកស្នេហាជាតិ បុព្វការីជន កម្មាភិបាល យុទ្ធជន យុទ្ធនារី ញាតិកាទាំង​៧សន្ដាន ដែលបានពលី ជីវិតដើម្បីបុព្វហេតុជាតិ មាតុភូមិ
09/30/2026 12:09 PM
Facebook Telegram Linkin
ប្រាក់ឈ្នួលអប្បបរមាកម្មករនិយោជិតក្នុងវិស័យកាត់ដេរសម្រាប់ឆ្នាំ២០២៧ ឡើងដល់ ២១២ ដុល្លារ
09/30/2026 12:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.