នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អ្នកនាំពាក្យ៖ ទីបំផុតលោក សម រង្ស៊ី បានបង្ហាញច្បាស់ថា គាត់ពិតជាបាននិយាយការពារថៃ និង​មួលបង្កាច់កម្ពុជា
កម្ពុជា-អាស៊ែបៃហ្សង់ នឹងបន្តពង្រឹង និងពង្រីកកិច្ចសហប្រតិបត្តិការឱ្យកាន់តែរីកចម្រើនបន្ថែមទៀត
សម្តេចធិបតី ជំរុញ កម្ពុជា-វៀតណាម មើលគ្នាជាគោលដៅទេសចរណ៍ និងទាក់ទាញទេសចរពី ទីផ្សារទី៣
សម្តេចធិបតី ជឿជាក់ថា កម្ពុជា-វៀតណាម អាចសម្រេចមហិច្ឆតា ជំរុញទំហំពាណិជ្ជកម្ម ២០ ពាន់លានដុល្លារ

នយោបាយ​ និង ការអភិវឌ្ឍន៍

ក្រសួងប្រៃសណីយ៍ និង GIZ សហការបង្កើតមជ្ឈមណ្ឌលបរិវត្តន៍កម្មឌីជីថល ដើម្បីបម្រើដល់ការធ្វើបរិវត្តកម្មឌីជីថលនៅកម្ពុជា

2023/08/28 07:46:43 pm        201
Facebook Telegram Linkin
ភ្នំពេញ៖ ក្រសួងប្រៃសណីយ៍ និងទូរគមនាគមន៍ បានសហការបង្កើតមជ្ឈមណ្ឌលបរិវត្តន៍កម្មឌីជីថល ដែលនឹងចូលរួមជួយគាំទ្រដល់សកម្មភាពនៃការធ្វើបរិវត្តកម្មឌីជីថល នៅតាមក្រសួងស្ថាប័ន សាកលវិទ្យាល័យ សហគ្រាស និងការលើកកម្ពស់ការចូលរួមរបស់ស្រ្តីក្នុងផ្នែកបច្ចេកវិទ្យា។ គម្រោងនេះ ត្រូវបានជួយឧបត្ថម្ភគាំទ្រពីអង្គការ GIZ នៃប្រទេសអាល្លឺម៉ង់ ក្នុងទំហំទឹកប្រាក់​ប្រមាណ ១.៤លានអឺរ៉ូ ក្នុងរយៈពេល២ឆ្នាំដំបូង ហើយក៏មានការគ្រោងកៀគរថវិកាពីប្រភពផ្សេងៗ​ទៀតក្នុងការរួមចំណែកអនុវត្តន៍គម្រោងសកម្មភាពនានា។ក្នុងពិធីចុះហត្ថលេខា លើកិច្ចព្រមព្រៀង (MOU) អនុវត្តគម្រោងកិច្ចសហប្រតិបត្តិការបច្ចេកទេស​មជ្ឈមណ្ឌលបរិវត្តកម្មឌីជីថលកម្ពុជា ​នៅថ្ងៃទី២៨ ខែសីហា ឆ្នាំ២០២៣​ ឯកឧត្តម ខូវ មករា រដ្ឋលេខាធិការ​ក្រសួងប្រៃសណីយ៍ ​និងទូរគមនាគមន៍ និងជាប្រធានក្រុមប្រឹក្សាភិបាល នៃបណ្ឌិតសភាបច្ចេកវិទ្យា​ឌីជីថលកម្ពុជា មានប្រសាសន៍ថា​ មជ្ឈមណ្ឌលនេះ នឹងចូលរួមជួយទាំង​ការអភិវឌ្ឍធនធានមនុស្ស បច្ចេកវិទ្យាផ្សេងៗពាក់ព័ន្ធនឹងឌីជីថល ដែលមានទាំងផ្នែករឹង (Hardware) និងផ្នែកទន់ (Software) ។ឯកឧត្តមបានបន្តថា សម្រាប់ការជួយបង្កើតមជ្ឈមណ្ឌលបរិវត្តកម្មឌីជីថលនេះ គឺភាគី GIZ នឹងមាន​ទាំងធនធាន​មនុស្សមកជួយ និងគាំទ្រផ្នែកបច្ចេកវិទ្យា ហើយរៀបចំឲ្យមានបណ្ដាញទំនាក់ទំនង​ក្នុងការគាំទ្រការធ្វើបរិវត្តន៍កម្មឌីជីថលរវាងអ្នកជំនាញកម្ពុជា ​និងអ្នកជំនាញអាល្លឺម៉ង់។ សកម្មភាពនានាដែលអនុវត្តក្នុងមជ្ឈមណ្ឌលនេះ ​ក៏នឹងចូលរួមចំណែក ក្នុងការអនុវត្តយុទ្ធសាស្ត្រ​បញ្ចកោណរបស់រាជរដ្ឋាភិបាល នៃអាណត្តិទី៧នេះ ។លោក Gunter Riethmacher ប្រធានអង្គការ GIZ ប្រចាំនៅកម្ពុជា លើកឡើងថា ឌីជីថលភាវូបនីយកម្ម ជាផ្នែកដ៏សំខាន់មួយ ដែលអាល្លឺម៉ងព្យាយាមគាំទ្រដល់រដ្ឋាភិបាលនៅជុំវិញពិភពលោក ដើម្បី​ធ្វើឱ្យប្រសើរឡើងយុទ្ធសាស្ត្រឌីជីថល​ ខណៈនៅកម្ពុជា​ គឺបានជួយគាំទ្រដល់រាជរដ្ឋាភិបាលកម្ពុជា និងប្រជាជនក្នុងវិស័យផ្សេងៗ ​ដែលមានទាំងវិស័យឌីជីថលភាវូបនីយកម្មនេះដែរ ដើម្បីតភ្ជាប់​ទៅផ្នែក​ផ្សេងៗទៀត ។លោកបានបន្តថា ការជួយបង្កើតមជ្ឈមណ្ឌល DTC គឺជាកម្មវិធីថ្មីនៅកម្ពុជា របស់រដ្ឋាភិបាល​អាល្លឺម៉ង់ ដោយវាជាកម្មវិធីសកល និងផ្តល់ហិរញ្ញប្បទានដល់ក្រសួង ដូច្នេះអត្ថប្រយោជន៍​នៃកម្មវិធីសកលនេះ គឺបទពិសោធន៍ពីប្រទេសផ្សេងៗ ត្រូវបានផ្តល់ដល់ការអនុវត្តសកម្មភាព​នៅទីនេះ ​និងបទពិសោធនៅកម្ពុជា ក៏នឹងត្រូវបានចែករំលែកទៅកាន់ប្រទេសផ្សេងៗដែរ ។ក្នុងឱកាសនោះ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ ​និងទូរគមនាគមន៍ បាន​សម្ដែងនូវការគាំទ្រ ចំពោះគម្រោងនេះ ​ហើយបានថ្លែងអំណរគុណដល់អង្គការ GIZ ដែលបានគាំទ្រ និងចូលរួមជាមួយរាជរដ្ឋាភិបាលកម្ពុជា ​លើការងារអភិវឌ្ឍន៍វិស័យឌីជីថល ៕ អត្ថបទ បាន សុខរិទ្ធិ

ការមកដល់របស់ជនអន្តោប្រវេសន៍ដ៏ច្រើនមិនធ្លាប់មានពីមុនមក បានដាក់សម្ពាធលើប្រទេសអ៊ីតាលី

2023/08/28 07:44:26 pm        74
Facebook Telegram Linkin
អ៊ីតាលី៖ ប្រមុខនគរបាលរដ្ឋនៃខេត្ត Agrigento លោក Emanuele Ricifari បានប្រាប់សារព័ត៌មាន រ៉យទ័រ កាលពីថ្ងៃអាទិត្យ (២៧ សីហា)ថា យ៉ាងហោចណាស់ជនអន្តោប្រវេសន៍ប្រមាណ៤.២០០នាក់ បានទៅដល់ដល់ទីក្រុង Lampedusa ប្រទេសអ៊ីតាលី កាលពីចុងសប្តាហ៍ ដែលជាចំនួនច្រើនបំផុតក្នុងកំណត់ត្រានៃការមកដល់របស់ជនអន្តោប្រវេសន៍។ទិន្នន័យរបស់ក្រសួងមហាផ្ទៃបង្ហាញថា ប្រទេសអ៊ីតាលី ដែលជាផ្លូវដ៏សំខាន់មួយទៅកាន់ទ្វីបអឺរ៉ុបសម្រាប់អ្នកស្វែងរកសិទ្ធិជ្រកកោន និងជនអន្តោប្រវេសន៍រាប់រយរាប់ពាន់នាក់ផ្សេងទៀត បានមើលឃើញការមកដល់នៃជនអន្តោប្រវេសន៍ចំនួន១០៧.៥៣០នាក់ តាមសមុទ្ររហូតមកទល់ពេលនេះ ដោយកើនឡើងប្រហែល៤៥.០០០នាក់ក្នុងរយៈពេលដូចគ្នាកាលពីឆ្នាំមុន។លោក Ricifari បាននិយាយថា ការមកដល់ចុងក្រោយបំផុតនៃជនអន្តោប្រវេសន៍ កំពុងដាក់សម្ពាធយ៉ាងខ្លាំងលើកោះ Lampedusa និងក្រុមអាជ្ញាធរ ប៉ុន្តែពួកគេកំពុងដោះស្រាយបញ្ហានេះហើយ។ ទីភ្នាក់ងារព័ត៌មាន Ansa របស់ប្រទេសអ៊ីតាលីបាននិយាយថា ក្រុមអាជ្ញាធរកំពុងខិតខំប្រឹងប្រែងដើម្បីពន្លឿនការផ្ទេរអ្នកមកដល់ថ្មីពីកោះនេះទៅកាន់តំបន់ Porto Empedocle នៅលើដីគោកនៃកោះស៊ីស៊ីលី៕

ការវាយប្រហារតាមអាកាសរបស់អាមេរិក បណ្តាលឲ្យសកម្មប្រយុទ្ធ al Shabaab ១៣នាក់ស្លាប់នៅសូម៉ាលី

2023/08/28 07:42:08 pm        81
Facebook Telegram Linkin
សូម៉ាលី៖ យោធាសហរដ្ឋអាមេរិកបាននិយាយថា ខ្លួនបានជឿថា បានសម្លាប់ក្រុមអ្នកប្រយុទ្ធ al Shabaab ១៣នាក់ នៅប្រទេសសូម៉ាលីភាគខាងត្បូង ជាអ្វីដែលខ្លួនបានចាត់ទុកថាជាការវាយប្រហារតាមអាកាសស្វ័យការពាររួម តាមសំណើរបស់រដ្ឋាភិបាលប្រទេសសូម៉ាលី។ រដ្ឋាភិបាលប្រទេសសូម៉ាលី និងកងកម្លាំងសម្ព័ន្ធមិត្ត បានចាប់ផ្តើមយុទ្ធនាការមួយរយៈពេលមួយឆ្នាំមកហើយដែលយុទ្ធនាការនេះ បានរុញច្រានក្រុម al Shabaab ជាក្រុមមានទំនាក់ទំនងជាមួយក្រុមអាល់កៃដា នៅខាងក្រៅផ្នែកនៃមជ្ឈមណ្ឌលរបស់ប្រទេស ទោះបីជាក្រុមនេះ បន្តអនុវត្តការវាយប្រហារទ្រង់ទ្រាយធំៗក៏ដោយ។ទីបញ្ជាការអាហ្វ្រិកអាមេរិកបាននិយាយថា ខ្លួនបានធ្វើការវាយប្រហារតាមអាកាសកាលពីយប់ថ្ងៃសៅរ៍ លើក្រុម al Shabaab នៅជិតទីក្រុង Seiera មានចម្ងាយប្រមាណ៤៥គីឡូម៉ែត្រភាគពាយព្យទីក្រុង Kismayo តាមសំណើរបស់រដ្ឋាភិបាល។ទីបញ្ជាការអាហ្វ្រិកអាមេរិកបាននិយាយនៅក្នុងសេចក្តីថ្លែងការណ៍ថា ដោយធ្វើការជាមួយកងទ័ពជាតិសូម៉ាលី ការវាយតម្លៃបឋមរបស់ទីបញ្ជាការអាហ្វ្រិកអាមេរិក ការវាយប្រហារតាមអាកាស បានសម្លាប់ក្រុមអ្នកប្រយុទ្ធ al Shabaab ១៣នាក់ ហើយគ្មានជនស៊ីវិលណាម្នាក់រងរបួសឬស្លាប់នោះទេ។ កងទ័ពនិង ក្រុមអ្នកប្រយុទ្ធសម្ព័ន្ធមិត្ត របស់ប្រទេសសូម៉ាលី កាលពីថ្ងៃសុក្រដណ្តើមយកបានទីក្រុង El Buur ជាទីតាំងលាក់ខ្លួនធំរបស់ជីវពលក្រុម al Shabaab នៅក្នុងតំបន់ភាគកណ្តាលរបស់ប្រទេស ជាការទម្លាយភាពទាល់ច្រកដ៏សំខាន់នៅក្នុងយុទ្ធនាការនេះ។ទោះជាយ៉ាងណា អ្នកវិភាគយោធាភាគច្រើន និងអ្នកដែលពាក់ព័ន្ធនៅក្នុងយូទ្ធនាការ បាននិយាយថា ការប្តេជ្ញារបស់រដ្ឋាភិបាលដើម្បីលុបបំបាត់ក្រុមនេះ មិនប្រាកដប្រជានៅឡើយ៕

លោកZelenskyy៖ លោកនឹងស្នើសុំវិធានការប្រឆាំងអំពើពុករលួយកាន់តែតឹងរ៉ឹងនៅសប្តាហ៍នេះ

2023/08/28 07:39:31 pm        91
Facebook Telegram Linkin
អ៊ុយក្រែន៖ ប្រធានាធិបតីអ៊ុយក្រែន លោក Volodymyr Zelenskyy បាននិយាយនៅក្នុងបទសម្ភាសន៍តាមទូរទស្សន៍ ដែលបានចែករំលែកនៅលើបណ្តាញតេឡេក្រាមរបស់លោក កាលពីថ្ងៃអាទិត្យថា រូបលោក នឹងស្នើសុំសភានៅសប្តាហ៍ខាងមុខនេះ ឲ្យបង្កើនទណ្ឌកម្ម សម្រាប់អ្នកទាំងឡាយណាដែលត្រូវបានរកឃើញកំហុសពីអំពើពុករលួយ អំឡុងពេលសង្គ្រាមនេះ។ លោក និយាយថា«ខ្ញុំបានកំណត់នូវភារកិច្ចមួយ សម្រាប់និតិបញ្ញតិ និងសមាជិកសភាអ៊ុយក្រែនដែលនឹងត្រូវផ្តល់ឲ្យនូវសំណើរបស់ខ្ញុំដើម្បីចាត់ទុកអំពើពុករលួយជាអំពើក្បត់ជាតិខ្ពស់ ក្នុងពេលសង្គ្រាម»។លោក និយាយថា «ខ្ញុំគិតថា សភានឹងទទួលសំណើនេះហើយបន្ទាប់មកការជួបប្រជុំគ្នា នឹងធ្វើឡើងនៅក្នុងតុលាការរបស់សភា។លោក Zelenskyy ជាអ្នកដែលបាននិយាយថាការបញ្ចប់អំពើពុករលួយ គឺជាគន្លឹះដើម្បីធ្វើឲ្យរុស្ស៊ីបរាជ័យ ហើយសង្ឃឹមថា តាមរយៈការប្រយុទ្ធប្រឆាំងអំពើពុករលួយ លោកនឹងធ្វើឲ្យវាកាន់តែងាយស្រួលសម្រាប់ដៃគូនានាដើម្បីជួយគាំទ្រកិច្ចប្រឹងប្រែងស្តារឡើងវិញ ដែលនឹងចំណាយប្រាក់រាប់ពាន់លានដុល្លារ។ ភាពរង្គោះរង្គើរបស់រដ្ឋាភិបាលជាបន្តបន្ទាប់ជុំវិញអំពើពុករលួយ រួមមានទាំងការដកចេញមេបញ្ជាការជ្រើសរើសយោធាប្រចាំតំបន់ទាំងអស់នៅខែនេះរបស់លោក Zelenskyy បន្ទាប់ពីការធ្វើសវនកម្មនៅទូទាំងប្រទេស។ ប្រទេសអ៊ុយក្រែនមានចំណាត់ថ្នាក់ទី១១៦ ក្នុងចំណោមប្រទេសចំនួន១៨០ប្រទេស ស្ថិតនៅលើសន្ទស្សន៍វាយតម្លៃអំពើពុករលួយចុងក្រោយរបស់អង្គការតម្លាភាពក្រុមយុទ្ធនាការអន្តរជាតិ។ឧបនាយករដ្ឋមន្ត្រីលោកស្រី Iryna Vereshchuk បាននិយាយនៅលើកម្មវិធីតេឡេក្រាមកាលពីថ្ងៃអាទិត្យថាយើងកំពុងខិតទៅជិតយ៉ាងឆាប់រហ័ស នៅចំណុចដែលវានឹងជាយើងឬពួកគេ។ កត្តាខាងក្នុងនិងខាងក្រៅ មានមាន័យថា ការធ្វើឲ្យរស់រានរដ្ឋ កំពុងចាប់ផ្តើមពឹងផ្អែកលើសមត្ថភាពរបស់អ៊ុយក្រែនដើម្បីបំផ្លាញយ៉ាងពិតបា្រកដអំពើពុករលួយ ជាក្រុមសង្គម។លោក Zelenskyy និយាយថា អ្នកទាំងឡាយណាដែលត្រូវបានរកឃើញកំហុសត្រូវតែប្រឈមមុខចំពោះតុលាការ។ ប្រសិនបើមានភស្តុតាង អ្នកនោះត្រូវតែជាប់ពន្ធនាគារ៕

មនុស្សយ៉ាងហោច ៥នាក់ស្លាប់ ក្នុងហេតុការណ៍ផ្ទុះក្នុងរោងចក្រផលិតផាវខុសច្បាប់នៅប្រទេសឥណ្ឌា

2023/08/28 07:37:12 pm        98
Facebook Telegram Linkin
ឥណ្ឌា៖ សារព័ត៌មានក្នុងស្រុករាយការណ៍ថា ហេតុការណ៍ផ្ទុះក្នុងរោងចក្រផលិតផាវខុសច្បាប់ បានសម្លាប់មនុស្សយ៉ាងហោច ៥នាក់ នៅសង្កាត់ North 24 Pargana ស្ថិតក្នុងរដ្ឋភាគខាងកើតបឹងហ្គាល់ខាងលិច ប្រទេសឥណ្ឌា កាលពីថ្ងៃអាទិត្យម្សិលមិញ ។  យោងតាមសេចក្តីរាយការណ៍បានឲ្យដឹងថា អគារផ្តល់ជាទីតាំងរោងចក្រផលិតផាវ បានបាក់ ហើយជនរងគ្រោះដោយសាររលាកភ្លើងធ្ងន់ធ្ងរត្រូវបានបញ្ជូនទៅកាន់មន្ទីរពេទ្យដើម្បីព្យាបាល ។  មូលហេតុដែលបណ្តាលឲ្យកើតមានហេតុការណ៍ផ្ទុះនេះឡើង មិនត្រូវបាននគរបាលដឹងនោះទេ ស្របពេលដែលប្រតិបត្តិការរុករក កំពុងបន្តដើម្បីស្វែងរកជនរងគ្រោះបន្ថែមទៀត ។  គួរឲ្យដឹងថា ឧបទ្ទេវហេតុឧស្សាហកម្ម មិនមែនជារឿងចម្លែកនោះទេនៅក្នុងប្រទេសឥណ្ឌា ហើយពួកគេតែងតែដាក់ការស្តីបន្ទោសលើមនុស្សដែលរំលោភបទដ្ឋានសុវត្ថិភាព ហើយនិងកង្វះខាតការអង្កេតរបស់ក្រុមមន្រ្តីរដ្ឋាភិបាល ៕

បារាំង នឹងហាមប្រាមការស្លៀកពាក់អាបាយ៉ារបស់មូស្លីមនៅក្នុងសាលារដ្ឋ

2023/08/28 07:34:49 pm        78
Facebook Telegram Linkin
បារាំង៖រដ្ឋមន្ត្រីក្រសួងអប់រំរបស់ប្រទេសបារាំងបាននិយាយកាលពីថ្ងៃអាទិត្យ (២៧សីហា)ថា ប្រទេសបារាំង នឹងហាមឃាត់កុមារមិនឱ្យស្លៀកសម្លៀកបំពាក់អាបាយ៉ា ជាឈុតរ៉ូបរលុង នឹងវែង ដែលពាក់ដោយស្ត្រីមូស្លីមមួយចំនួននៅក្នុងសាលារៀនដែលគ្រប់គ្រងដោយរដ្ឋ។ប្រទេសបារាំង ដែលបានអនុវត្តបម្រាមដ៏តឹងរ៉ឹងលើសញ្ញាសាសនានៅក្នុងសាលារដ្ឋ ចាប់តាំងពីច្បាប់សតវត្សទី១៩ ដោយដកឥទ្ធិពលសាសនាកាតូលិកប្រពៃណីចេញពីការអប់រំសាធារណៈ បានតស៊ូធ្វើបច្ចុប្បន្នភាពគោលការណ៍ណែនាំដើម្បីដោះស្រាយជាមួយកំណើនជនជាតិភាគតិចមូស្លីមក្នុងប្រទេស។ ក្នុងឆ្នាំ២០០៤ ប្រទេសនេះ បានហាមប្រាមពាក់ស្បែរុំក្បាលនៅក្នុងសាលារៀន និងបានអនុម័តបម្រាមលើការពាក់ស្បៃគ្របលើផ្ទៃមុខទាំងមូលនៅទីសាធារណៈនៅក្នុងឆ្នាំ២០១០ ដែលធ្វើឱ្យមនុស្សមួយចំនួននៅក្នុងសហគមន៍ឥស្លាមដ៏រឹងមាំ ដែលមានប្រជាជនចំនួនប្រាំលាននាក់របស់ខ្លួននេះ ខឹងសម្បាយ៉ាងខ្លាំង។ការការពារលទ្ធិសាសនានិយម គឺជាជំនឿដ៏មុតមាំនៅក្នុងប្រទេសបារាំង ដែលកើតឡើងនៅទូទាំងវិសាលគមនយោបាយ ចាប់ពីពួកឆ្វេងនិយមដែលលើកតម្កើងតម្លៃសេរីភាពនៃភាពស្មើគ្នា រហូតដល់ក្រុមអ្នកបោះឆ្នោតស្តាំនិយមជ្រុល ដែលព្យាយាមរារាំងប្រឆាំងនឹងកំណើនតួនាទីរបស់សាសនាឥស្លាមនៅក្នុងសង្គមបារាំង៕

ព្យុះត្រូពិក Idalia ត្រូវបានគេរំពឹងថានឹងវាយប្រហាររដ្ឋ Florida ក្នុងនាមជាព្យុះសង្ឃរា

2023/08/28 07:32:32 pm        83
Facebook Telegram Linkin
ម៉ិកស៊ិក៖  ព្យុះត្រូពិក Idalia ដែលបានវិវត្តន៍ខ្លួននៅក្នុងសមុទ្រការ៉ាអ៊ីបកាលពីថ្ងៃអាទិត្យ ទំនងក្លាយជាការគំរាមកំហែងដល់រដ្ឋ Florida សហរដ្ឋអាមេរិក ពេលដែលវាពង្រឹងកម្លាំងក្លាយជាព្យុះសង្ឃរា នៅឈូងសមុទ្រម៉ិកស៊ិកក្នុងរយៈពេលប៉ុន្មានថ្ងៃខាងមុខនេះ ។  មជ្ឈមណ្ឌលព្យុះសង្ឃរាជាតិសហរដ្ឋអាមេរិក(NHC) បាននិយាយកាលពីថ្ងៃអាទិត្យថា ព្យុះមួយនេះ បានបោកបក់ក្នុងល្បឿនខ្យល់បក់ ៦៥គ.មក្នុង១ម៉ោង ហើយនិងអាចឈានដល់កម្លាំងព្យុះកម្រិតទី ១ ជាមួយនឹងកម្លាំងខ្យល់បក់ ១៤៥គ.មក្នុង១ម៉ោង ពេលដែលគេព្យាករណ៍ថា វានឹងបោកបក់ដល់ដីគោកនៅតាមតំបន់ឆ្នេរភាគពាយ័ព្យរដ្ឋ Florida នាថ្ងៃពុធខាងមុខនេះ ។  លោក Jamie Rhomeគឺជាអនុប្រធាន NHC និយាយថា តំបន់ជាច្រើនរបស់រដ្ឋ Florida ងាយនឹងរងគ្រោះជាពិសេសដោយសារការជន់លិច បង្កឡើងពីការកញ្ជ្រោលឡើងរបស់ព្យុះ ។  បច្ចុប្បន្នព្យុះត្រូពិក Idalia ស្ថិតនៅជិតព្រែកជីក Yucatanនៅចម្ងាយប្រហែល ១៣០គ.មភាគឦសានកោះ Cozumelប្រទេសម៉ិកស៊ិក ៕

ពលរដ្ឋកោះ Mallorca ប្រទេសអេស្ប៉ាញត្រៀមទប់ទល់មហន្តរាយព្យុះដ៏ធ្ងន់ធ្ងរ

2023/08/28 07:30:09 pm        75
Facebook Telegram Linkin
អេស្ប៉ាញ៖ ភ្លៀងធ្លាក់និងខ្យល់បក់ខ្លាំង បានវាយបក់បោកផ្នែកជាច្រើន នៅកោះ Balearic រួមទាំងកោះ Mallorca និងកោះ Catalonia នៅប្រទេសអេស្ប៉ាញ ភាគឦសាន កាលពីថ្ងៃអាទិត្យ។ ខ្យល់បក់ខ្លាំងបណ្តាលឲ្យដើមឈើបាក់រលំ តុនិងកៅអីនៅហាងកាហ្វេរហោះខ្ចាត់ខ្ចាយ ហើយកម្ទេចកម្ទី បានហោះទៅប៉ះអគារនៅក្បែរនោះ។អ្នកនាំពាក្យក្រុមហ៊ុនបាននិយាយថា ដោយឡែកមនុស្សមួយចំនួនបានរងរបួស កាលពីថ្ងៃអាទិត្យអំឡុង ឧបទ្ទវហេតុទាក់ទងទៅនឹងអាកាសធាតុនេះ រួមមានទាំងនាវាទេសចរណ៍ P&O Cruises Britannia ដែលចូលចតនៅកោះ Mallorca ប្រទេសអេស្បាញ។ អាជ្ញាធរកំពង់ផែ នៅក្នុងរដ្ឋធានី Palma បាននិយាយថា នាវា បានបុកជាមួយ នាវាដឹកប្រេងដោយសារតែខ្យល់បោកបក់ខ្លាំង។ សារព័ត៌មាន BBC បានរាយការណ៍ថានាវាពុំបានចូលចតក្នុងពេលមានព្យុះនោះទេ។នាវាទេសចរណ៍ P&O បានជាប់ពាក់ព័ន្ធក្នុងឧបទ្ទវហេតុទាក់ទងនឹងអាកាសធាតុខណៈធ្វើដំណើរតាមបណ្តោយ កោះ Palma de Mallorca ។អ្នកនាំពាក្យនាវាទេសចរណ៍ P&O Cruises របស់ក្រុមហ៊ុន Carnival បាននិយាយថាមនុស្សមួយចំនួនបានរងរបួសស្រាល ហើយកំពុងត្រូវបានយកចិត្តទុកដាក់ពីសំណាក់មជ្ឈមណ្ឌលវេជ្ជសាស្ត្រនៅលើនាវា៕

រដ្ឋមន្រ្តីក្រសួងពាណិជ្ជកម្មសហរដ្ឋអាមេរិក ជួបសមភាគីចិននៅទីក្រុងប៉េកាំងដើម្បីពង្រឹងទំនាក់ទំនងធុរកិច្ច

2023/08/28 07:26:27 pm        74
Facebook Telegram Linkin
អាមេរិក៖  រដ្ឋមន្រ្តីការបរទេសសហរដ្ឋអាមេរិកលោកស្រី Gina Raimondoបានជួបជាមួយសមភាគីចិនលោក Wang Wentao (វ៉ាង វិនថាវ)នៅទីក្រុងប៉េកាំងនាថ្ងៃចន្ទនេះ ស្របពេលដែលប្រទេសទាំង ២បើកកិច្ចប្រជុំស្វែងរកការពង្រឹងទំនាក់ទំនងធុរកិច្ច ។  លោកស្រី Raimondoដែលនឹងចូលរួមជំនួបរយៈពេល ៣ថ្ងៃជាមួយក្រុមមេដឹកនាំចិន និងក្រុមមេដឹកនាំធុរកិច្ចនោះ និយាយនៅក្នុងជំនួបនោះថា វាសំខាន់ខ្លាំងណាស់កាលដែលប្រទេសមហាអំណាចសេដ្ឋកិច្ចធំបំផុតទាំង ២របស់ពិភពលោក មាននូវទំនាក់ទំនងសេដ្ឋកិច្ចប្រកបដោយស្ថិរភាព ។  ដោយឡែក លោក Wangនិយាយថា ចិនត្រៀមខ្លួនរួចរាល់ក្នុងការធ្វើការជាមួយគ្នា ដើម្បីពង្រឹងបរិស្ថានគោលនយោបាយអំណោលផលជាងមុន សម្រាប់វិស័យធុរកិច្ចចិន និងអាមេរិក ។  សូមបញ្ជាក់ថា ទំនាក់ទំងរបស់ប្រទេសទាំង ២ស្ថិតក្នុងស្ថានភាពតានតឹង ពេលដែលទីក្រុងវ៉ាស៊ីងតោន ធ្វើការជាមួយសម្ព័ន្ធមិត្តរបស់ខ្លួន ដើម្បីរារាំងចិនមិនឲ្យចូលដល់ឧបករណ៍ពាក់កណ្តាលចម្លង ស្របពេលដែលទីក្រុងប៉េកាំង រឹតត្បិតការដឹកជញ្ជូនពីក្រុមហ៊ុនបន្ទះឈីបលេចធ្លោ Micron Technology ហើយនិងវាយឆ្មក់ និងពិន័យក្រុមហ៊ុនអាមេរិក Mintz Groupនូវទឹកប្រាក់ ១,៥លានដុល្លារ សម្រាប់ការធ្វើការងារស្ថិតិពុំមានការអនុញ្ញាត ។  ទីក្រុងប៉េកាំង បានផ្តាច់ទំនាក់ទំនងជជែកពិភាក្សាជាមួយទីក្រុងវ៉ាស៊ីងតោន លើបញ្ហាយោធា បរិយាកាស និងបញ្ហាជាច្រើនទៀតកាលពីខែសីហា ឆ្នាំ ២០២២ ដើម្បីសងសឹកនឹងដំណើរទស្សនកិច្ចរបស់អតីតប្រធានសភាសហរដ្ឋអាមេរិកលោកស្រី Nancy Pelosi ទៅកាន់កោះតៃវ៉ាន់ ដែលចិនប្រកាសសិទ្ធិជាដែនដីរបស់ខ្លួន ៕

កម្ពុជាបានធ្វើជាម្ចាស់ផ្ទះការប្រកួតរ៉ូបូតថ្នាក់អន្តរជាតិបញ្ចប់ដោយជោគជ័យ ខណៈក្រុមប្រទេសជប៉ុន បានជ័យលាភីលេខ១

2023/08/28 07:22:01 pm        195
Facebook Telegram Linkin
ភ្នំពេញ៖ កម្ពុជានៅថ្ងៃទី ២៧ខែសីហា ឆ្នាំ ២០២៣ បានរៀបចំធ្វើជាម្ចាស់ផ្ទះព្រឹត្តិការណ៍ប្រកួតប្រជែងរ៉ូបូតថ្នាក់អន្តរជាតិ ABU Robocon 2023ធំបំផុតនៅអាស៊ីប៉ាស៊ីហ្វិក។ព្រឹត្តិការណ៍នេះ រៀបចំឡើងដោយមានក្រុមនិស្សិតមកពី ១៣ប្រទេសចូលរួម បូករួមទាំងក្រុម​និស្សិត​របស់កម្ពុជាចំនួន ២ក្រុមផងដែរ។ ព្រឹត្តិការណ៍ប្រកួតប្រជែង រ៉ូបូតថ្នាក់អន្តរជាតិABU Roboconនេះ ជាព្រឹត្តិការណ៍ធំបំផុតនៅអាស៊ីប៉ាស៊ីហ្វិកលើវិស័យបច្ចេកវិទ្យារ៉ូបូតដែលកម្ពុជា បានរៀបចំវាឡើង។ ព្រឹត្តិការណ៍គឺមានការចូលរួមប្រកួតពីក្រុមនិស្សិត ១៣ ប្រទេសចូលរួម ក្នុងនោះមាននិស្សិតកម្ពុជា ឥណ្ឌូនេស៊ី ម៉ាឡេស៊ី ចិន ហុងកុង នេប៉ាល់ វៀតណាម ឥណ្ឌា ជប៉ុន ប្រទេសថៃ ម៉ុងហ្គោលី ស្រីលង្កា និងប្រទេសអេហ្ស៊ីប។ ចំពោះក្រុមប្រកួតវិញ គឺមានចំនួន ១៤ក្រុម ព្រោះកម្ពុជាមានចំនួន ២ក្រុម គឺក្រុមមកពីវិទ្យា​ស្ថានបច្ចេកវិទ្យាកម្ពុជា និងក្រុមនិស្សិតនៃ វិទ្យាស្ថានជាតិពហុបច្ចេកទេសកម្ពុជា ហៅកាត់ថា NPIC។ក្រុមទាំងអស់ត្រូវប្រកួតប្រជែងក្រោមវិញ្ញាសារបស់កម្ពុជា គឺ រ៉ូបូតបាចផ្កាលើប្រាសាទអង្គរវត្ត រឺរ៉ូបូតបោះកងចូលក្នុងបង្គោល។ក្រោយឆ្លងកាត់ការប្រកួតយ៉ាងស្វិតស្វាញ ការប្រកួតបានរកឃើញម្ចាស់ជើងឯកលេខ១ គឺក្រុមមកពី​ប្រទេសជប៉ុន លេខ២គឺក្រុមនិស្សិតហុងកុង លេខ៣គឺក្រុមប្រទេសចិន និងវៀតណាម។ សម្រាប់ក្រុមកម្ពុជា១ក្រុម បានធ្លាក់ក្នុងជម្រុះពូល និង១ក្រុមទៀត បានឡើងត្រឹមវគ្គ ៨ក្រុមចុងក្រោយ។ ចំពោះក្រុមកម្ពុជាទាំងពីរក្រុម ទោះមិនទទួលលទ្ធផលគាប់ប្រសើរ តែពួកគេពេញចិត្តដែលមាន​ការរៀបចំអោយមានព្រឹត្តិការណ៍ជាលក្ខណៈអន្តរជាតិនេះឡើង។ ភាពពេញចិត្តដោយសារពួកគេ បានសិក្សាស្វែងយល់កាន់តែច្រើនពីភាពខ្លាំងបច្ចេកវិទ្យារ៉ូបូតក្រុមដទៃ ហើយវាជាឱកាស​ដើម្បីយកបទពិសោធន៍នេះ អភិវឌ្ឍន៍​រ៉ូបូតខ្លួនឱ្យកាន់តែប្រសើរ។ សម្រាប់អ្នកចូលរួមទស្សនា ក្នុងព្រឹត្តិការណ៍នេះ ក៏មានចម្រុះជាតិសាសន៍ ​គាំទ្រប្រទេសរៀងៗខ្លួន។ អ្នកគាំទ្រកម្ពុជា បង្ហាញការសប្បាយចិត្តដែលកម្ពុជា ​បានធ្វើជាម្ចាស់ផ្ទះរៀបចំកម្មវិធីនេះ ព្រោះវាផ្ដល់ជាផលប្រយោជន៍ឱ្យគេស្គាល់កម្ពុជាកាន់តែច្រើន។ ម្យ៉ាងទៀត ពួកគេក៏កោតសសើរចំពោះក្រុមកម្ពុជា ដែលបានខំប្រឹងប្រែងទោះមិនបានជ័យជំនះក្ដី។ព្រឹត្តិការណ៍ប្រកួតរ៉ូបូតនេះ នៅឆ្នាំ ២០២៤ គឺនឹងផ្លាស់ប្រទេសជាម្ចាស់ផ្ទះ។ ប្រទេសដែលនឹងរៀបចំព្រឹត្តិការណ៍នេះ នៅឆ្នាំ ២០២៤ គឺប្រទេស ​វៀតណាម។ ចំពោះវិញ្ញាសាគឺកំណត់ដោយប្រទេសវៀតណាមផងដែរ៕អត្ថបទគឹមហុក

បណ្ដាញសង្គម

ព័ត៌មានថ្មីៗ

លោក Rutte៖ សមាជិក​ណាតូ​ត្រូវប្រឹង​ប្រែង​បន្ថែម ដើម្បីពង្រឹងប្រព័ន្ធការពារដែនអាកាសរបស់អ៊ុយក្រែន
10/14/2026 06:10 PM
Facebook Telegram Linkin
ម្តាយ និងកុមារ គេច​មិន​ទៅ​ទទួលសេវាថែទាំសុខភាពសំខាន់​ ខណៈ​ជំងឺអេបូឡារាលដាលនៅ​ភាគខាងកើត​កុងហ្គោ
10/14/2026 06:10 PM
Facebook Telegram Linkin
លីបង់អំពាវនាវឲ្យUNបន្តរក្សាវត្តមានកងកម្លាំង UNIFIL ខណៈអ៊ីស្រាអែលបន្តកាន់កាប់ភាគខាងត្បូងប្រទេសនេះ
10/14/2026 06:10 PM
Facebook Telegram Linkin
បុគ្គលិកសន្តិសុខស៊ីរីត្រូវបានបាញ់សម្លាប់នៅតំបន់ជនបទនៃខេត្ត Hama
10/14/2026 06:10 PM
Facebook Telegram Linkin
មន្ត្រីការទូតឥណ្ឌា មាន​សុទិដ្ឋិនិយមចំពោះកិច្ចពិភាក្សាជាមួយអាមេរិក និងការពារទំនាក់ទំនងជាមួយរុស្ស៊ី
10/14/2026 05:10 PM
Facebook Telegram Linkin
ប្រធានសេដ្ឋកិច្ច EU៖ មិនទាន់ច្បាស់ថា ប្រេងម៉ាស៊ូតរុស្ស៊ីអាចប៉ះពាល់ដល់តម្លៃឬអត់
10/14/2026 05:10 PM
Facebook Telegram Linkin
ប្រជាជន ៦០ម៉ឺននាក់ នៅអ៊ុយក្រែន គ្មានអគ្គិសនីប្រើប្រាស់​ ដោយសារការវាយប្រហាររបស់រុស្ស៊ី
10/14/2026 05:10 PM
Facebook Telegram Linkin
ប្រធានក្រុមប្រឹក្សាភាពជាអ្នកដឹកនាំប្រធានាធិបតីយេម៉ែន ប្តេជ្ញាបន្តប្រតិបត្តិការប្រឆាំងនឹងក្រុមហ៊ូទី
10/14/2026 05:10 PM
Facebook Telegram Linkin
នគរបាល​ប៉ះទង្គិចជាមួយអ្នកគាំទ្ររបស់​លោក Imran Khan នៅភាគពាយព្យប៉ាគីស្ថាន
10/14/2026 05:10 PM
Facebook Telegram Linkin
នាយករដ្ឋមន្ត្រីជប៉ុនថា ការងារផ្ទះធ្វើឲ្យលោកស្រីរវល់ជាងនាយករដ្ឋមន្ត្រីបុរសមុនៗ
10/14/2026 05:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.