នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ សង្ឃឹមថា ឯកអគ្គរដ្ឋទូតថ្មីអ៊ីរ៉ង់នឹងញ៉ាំងទំនាក់ទំនងកម្ពុជា និងអ៊ីរ៉ង់ឱ្យកាន់តែរឹងមាំបន្ថែមទៀត
ឯកអគ្គរដ្ឋទូតថ្មីអ៊ុយរូហ្កាយប្រចាំកម្ពុជា ប្ដេជ្ញាថាខិតខំពង្រឹងទំនាក់ទំនងទ្វេភាគីរវាងកម្ពុជា និងអ៊ុយរូហ្កាយឱ្យកាន់តែរីកចម្រើន
សម្តេចតេជោ ហ៊ុន សែន ជួបពិភាក្សាការងារតាមប្រព័ន្ធវីដេអូជាមួយប្រធានរដ្ឋសភា អាស៊ែបៃហ្សង់
គ​ណៈប្រតិភូនៃសន្និសីទប្រធានសភានៃអន្តរសភា វាយតម្លៃ​ខ្ពស់ចំពោះជោគជ័យនៃ «សន្និសីទប្រធានសភានៃអន្តរសភា លើកទី២»​ នៅកម្ពុជា

នយោបាយ​ និង ការអភិវឌ្ឍន៍

លោកស្រី Kamala Harris ទទួលបានការគាំទ្រពីក្រុមអ្នកបណ្តាក់ទុនធំៗជាង ១០០នាក់

2024/08/01 07:03:56 pm        177
Facebook Telegram Linkin
អ្នកបណ្តាក់ទុនធំៗជាង ១០០នាក់រួមទាំងសហគ្រិនពាន់លាន លោក ម៉ាក ឃ្យូបាន (Mark Cuban) បានគាំទ្រអនុប្រធានាធិបតីសហរដ្ឋអាមេរិក លោកស្រី កាម៉ាឡា ហារីស (Kamala Harris) មកពីបក្សប្រជាធិបតេយ្យ កាលពីថ្ងៃពុធ (៣១ កក្កដា) ដែលជាការប្រឆាំងទៅនឹងបណ្ដាមហាសេដ្ឋីបច្ចេកវិទ្យាដែលគាំទ្រគូប្រជែងគណបក្សសាធារណរដ្ឋ គឺលោក ដូណាល់ ត្រាំ (Donald Trump)។តំបន់ពាណិជ្ជកម្មបច្ចេកវិទ្យា ស៊ីលីខន វ៉ាលី (Silicon Valley) របស់អាមេរិក ជាទម្លាប់ត្រូវបានគេមើលឃើញថាជាបោះឆ្នោតសេរី ប៉ុន្តែពួកសាធារណរដ្ឋបានឈ្នះការគាំទ្រពីតួអង្គក្នុងឧស្សាហកម្មដ៏លេចធ្លោនៅក្នុងវដ្តនៃការបោះឆ្នោតនេះ។ ការគាំទ្រទាំងនោះត្រូវបានជំរុញដោយការជ្រើសរើសព្រឹទ្ធសមាជិក ជេឌី វែនស៍ (JD Vance) ដែលជាអតីតអ្នកបណ្តាក់ទុន ឱ្យធ្វើជាដៃគូបោះឆ្នោតជាមួយលោក Trump ប៉ុន្តែការសម្រេចដកខ្លួនពីការប្រជែងអាណត្តិថ្មីរបស់លោកប្រធានាធិបតី Joe Biden ក៏បានជំរុញឱ្យក្រុមឧស្សាហកម្មបច្ចេកវិទ្យាក្រោកឡើងគាំទ្រលោកស្រី Harris ផងដែរ។ក្រុមនេះបាននិយាយនៅក្នុងញត្តិសាធារណៈមួយដែលត្រូវបានបង្ហោះតាមអ៊ីនធឺណិតថា «យើងជឿជាក់លើលទ្ធិប្រជាធិបតេយ្យដែលជាឆ្អឹងខ្នងរបស់ប្រទេសជាតិ។ យើងជឿថាស្ថាប័នដ៏រឹងមាំ និងគួរឱ្យទុកចិត្តបានគឺជាលក្ខណៈពិសេសមួយសម្រាប់ជាតិ»។ ញត្តិពីក្រុមអ្នកបណ្ដាក់ទុននេះកើតឡើងបន្ទាប់ពីលោក Trump បានទាក់ទាញការគាំទ្រពីបណ្ដាអ្នកមានទ្រព្យ អ្នកបណ្តាក់ទុន និងវិនិយោគិនជាន់ខ្ពស់ផ្សេងទៀត។មហាសេដ្ឋី លោក អ៊ីឡុន ម៉ាស (Elon Musk) នាយកប្រតិបត្តិក្រុមហ៊ុនរថយន្ត តេស្លា (Tesla) បានផ្ដល់ការគាំទ្រជាសាធារណៈចំពោះលោក Trump ខណៈសហគ្រិន និងអ្នកវិនិយោគដទៃទៀតក៏បានជួយរៃអង្គាសប្រាក់សម្រាប់អតីតប្រធានាធិបតីរូបនេះផងដែរ៕

ស្ថានភាពនៅវ៉េណេស៊ុយអេឡា កាន់តែតានតឹងខ្លាំងក្រោយលទ្ធផលឆ្នោតដ៏ចម្រូងចម្រាស

2024/08/01 06:55:13 pm        230
Facebook Telegram Linkin
ហាងលក់ទំនិញ និងសេវាដឹកជញ្ជូនសាធារណៈនៅទូទាំងប្រទេសវេណេហ្ស៊ុយអេឡា បានបិទកាលពីថ្ងៃពុធ (៣១ កក្កដា) ដោយសារស្ថានភាពកាន់តែតានតឹងជុំវិញការបោះឆ្នោតប្រធានាធិបតីដ៏ចម្រូងចម្រាស រួមជាមួយមឹងពាក្យចចាមអារ៉ាមអំពីការចាប់ខ្លួនក្រុមប្រឆាំងកាន់តែច្រើន និងអំពើហិង្សាជាបន្តបន្ទាប់ ធ្វើឱ្យមនុស្សសំងំលាក់ខ្លួននៅក្នុងផ្ទះមិនហ៊ានចេញក្រៅ។ប្រធានាធិបតីសង្គមនិយម លោក នីកូឡាស ម៉ាឌូរ៉ូ (Nicolas Maduro) ដែលដឹកនាំតាំងពីឆ្នាំ២០១៣មក ត្រូវបានប្រកាសថាជាអ្នកឈ្នះឆ្នោតម្ដងទៀតដោយក្រុមប្រឹក្សាបោះឆ្នោត ប៉ុន្តែបក្សប្រឆាំងនិយាយថា ចំនួនសន្លឹកឆ្នោតប្រហែល ៩០ភាគរយ បង្ហាញថាបេក្ខជនរបស់ខ្លួនគឺលោក អេដម៉ុនដូ ហ្គនហ្សាលេស (Edmundo Gonzalez) ជាអ្នកឈ្នះ។ខណៈភាពចម្រូងចម្រាសបានឈានចូលដល់ថ្ងៃទីបីរបស់ខ្លួនស្របពេលមានការអំពាវនាវឱ្យមានតម្លាភាពកាន់តែច្រើន រដ្ឋាភិបាលបានទទូចថា ខ្លួនមិនបានបញ្ចេញចំនួនសំឡេងឆ្នោតពេញលេញនៅកម្រិតការិយាល័យបោះឆ្នោតទេ ដោយសារតែចោរកម្មប្រព័ន្ធបច្ចេកទេសដែលមានប្រភពមកពីប្រទេសម៉ាសេដូនីខាងជើង ជំរុញឱ្យមានការពន្យារពេលបន្ថែម ប៉ុន្តែមិនផ្តល់ភស្តុតាងណាមួយដើម្បីគាំទ្រការលើកឡើងនោះឡើយ។ អង្គការគាំទ្រប្រជាធិបតេយ្យ ខាធើ សេនធើ (Carter Center) មានមូលដ្ឋាននៅអាមេរិក ដែលជាអង្គភាពឃ្លាំមើលឯករាជ្យមួយដែលត្រូវបានអនុញ្ញាតឱ្យសង្កេតការណ៍ការបោះឆ្នោត បានប្រកាសនៅក្នុងសេចក្តីថ្លែងការណ៍មួយកាលពីល្ងាចថ្ងៃអង្គារថា ការបោះឆ្នោតនេះ «មិនអាចចាត់ទុកថាជាលទ្ធិប្រជាធិបតេយ្យទេ»។ នៅក្នុងសុន្ទរកថាដែលចាក់ផ្សាយតាមទូរទស្សន៍រដ្ឋកាលពីថ្ងៃពុធ លោក Maduro បានច្រានចោលរាល់ការគំរាមកំហែងទាំងអស់ រួមទាំងលទ្ធភាពនៃទណ្ឌកម្មថ្មីរបស់សហរដ្ឋអាមេរិកផងដែរ៕

ប្រទេសក្រុមប្រឹក្សាសន្តិសុខUN សម្តែងការព្រួយបារម្មណ៍ចំពោះហានិភ័យនៃសង្គ្រាមនៅមជ្ឈិមបូព៌ា

2024/08/01 06:45:47 pm        218
Facebook Telegram Linkin
បណ្តាប្រទេសក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃពុធ ទី៣១ ខែកក្កដា បានអំពាវនាវឱ្យបង្កើនកិច្ចខិតខំប្រឹងប្រែងផ្នែកការទូត ដើម្បីបញ្ចៀសជម្លោះនៅមជ្ឈិមបូព៌ា ដែលកាន់តែរីកធំ បន្ទាប់ពីការសម្លាប់មេដឹកនាំសកម្មប្រយុទ្ធពីររូប ធ្វើឲ្យភាពតានតឹងកាន់តែកើនឡើង។មេដឹកនាំក្រុមហាម៉ាស លោក Ismail Haniyeh ត្រូវបានគេធ្វើឃាតនៅក្នុងរដ្ឋធានី តេអេរ៉ង់ ប្រទេសអ៊ីរ៉ង់ កាលពីព្រឹកថ្ងៃពុធ បង្កឱ្យមានការគំរាមកំហែងសងសឹកប្រឆាំងអ៊ីស្រាអែល និងជំរុញឱ្យមានការព្រួយបារម្ភថា ជម្លោះនៅតំបន់ហ្កាហ្សា កំពុងក្លាយជាសង្រ្គាមមជ្ឈិមបូព៌ាពេញបន្ទុក។ការធ្វើឃាតនេះ បានកើតឡើងមិនដល់២៤ម៉ោងនោះទេ បន្ទាប់ពីមេបញ្ជាការយោធាជាន់ខ្ពស់ របស់ ក្រុមហេសបូឡា ត្រូវបានសម្លាប់នៅក្នុងការវាយប្រហាររបស់អ៊ីស្រាអែល ទៅលើរដ្ឋធានី Beirut របស់ប្រទេសលីបង់ ដើម្បីជាការសងសឹកចំពោះការវាយប្រហារដោយគ្រាប់រ៉ុក្កែតដ៏បង្ហូរឈាម នៅក្នុងតំបន់ ខ្ពង់រាប Golan Heights ដែលកាន់កាប់ដោយអ៊ីស្រាអែល។លោក Shino Mitsuko តំណាងរងប្រចាំអង្គការសហប្រជាជាតិរបស់ប្រទេសជប៉ុន បាននិយាយកាលពីថ្ងៃពុធ ដោយជំរុញឱ្យមានកិច្ចខិតខំប្រឹងប្រែងជាអន្តរជាតិក្នុងការការពារជម្លោះ ដោយព្រួយបារម្ភថា តំបន់នេះ ស្ថិតនៅលើមាត់ជ្រោះនៃសង្គ្រាមពេញបន្ទុក។ ប្រទេសចិន រុស្ស៊ី អាល់ហ្សេរី និងប្រទេសដទៃទៀត បានថ្កោលទោសការធ្វើឃាតលោក Haniyeh ដែលឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ ចាត់ទុកថាជាអំពើភេរវកម្ម ខណៈសហរដ្ឋអាមេរិក ចក្រភពអង់គ្លេស និងបារាំង បានលើកឡើងនូវអ្វីដែលពួកគេនិយាយថា ជាការគាំទ្ររបស់អ៊ីរ៉ង់ចំពោះ តួអង្គសំខាន់ៗដែលបង្កអស្ថិរភាពនៅក្នុងតំបន់។ លោក Fu Cong ឯកអគ្គរដ្ឋទូតចិនប្រចាំអង្គការសហប្រជាជាតិ បាននិយាយថា បណ្តាប្រទេសដែលមានឥទ្ធិពលធំៗ ត្រូវតែដាក់សម្ពាធបន្ថែមទៀត និងធ្វើការឱ្យកាន់តែខ្លាំងក្លា ដើម្បីពន្លត់ភ្លើងសង្រ្គាម នៅក្នុងតំបន់ហ្កាហ្សា។ ឯកអគ្គរដ្ឋទូតរបស់ចក្រភពអង់គ្លេស លោកស្រី Barbara Woodward បានជំរុញឱ្យមានភាពស្ងប់ស្ងាត់ និងភាពអត់ធ្មត់ ដោយបានរំលឹកឡើងវិញនូវការអំពាវនាវឱ្យមានបទឈប់បាញ់ជាបន្ទាន់នៅក្នុងតំបន់ហ្កាហ្សា។ លោក Robert Wood ឯកអគ្គរដ្ឋទូតរងសហរដ្ឋអាមេរិកប្រចាំអង្គការសហប្រជាជាតិ បានអំពាវនាវឱ្យសមាជិកក្រុមប្រឹក្សាសន្តិសុខ ដែលមានឥទ្ធិពលលើប្រទេសអ៊ីរ៉ង់ ឱ្យបង្កើនសម្ពាធលើប្រទេសនេះ ឱ្យបញ្ឈប់ការធ្វើឲ្យរីកធំនៃជម្លោះតំណាងប្រឆាំងអ៊ីស្រាអែល និងប្រទេសដទៃទៀត។

នាវាចម្បាំងកាណាដា ឆ្លងកាត់ច្រកសមុទ្រតៃវ៉ាន់ ដែលទាក់ទាញកំហឹងពីប្រទេសចិន

2024/08/01 05:53:56 pm        220
Facebook Telegram Linkin
នាវាចម្បាំងកាណាដាមួយគ្រឿងបានឆ្លងកាត់ច្រកសមុទ្រតៃវ៉ាន់ជាអ្វីដែលទីក្រុងអូតាវ៉ា(Ottawa) ហៅថាការប្តេជ្ញាចិត្តចំពោះឥណ្ឌូ-ប៉ាស៊ីហ្វិកបើកចំហ ដោយទាក់ទាញការស្តីបន្ទោសពីប្រទេសចិនថាសមយុទ្ធកងទ័ពជើងទឹកកាលពីថ្ងៃទី ៣១ ខែកក្កដា បានធ្វើឱ្យប៉ះពាល់ដល់សន្តិភាព។ក្រសួងការពារជាតិរបស់ប្រទេសកាណាដាបាននិយាយថា នាវាចម្បាំង HMCS ម៉ុងរ៉េអាល់ (HMCS Montreal) បានឆ្លងកាត់តាមទម្លាប់ នាពេលថ្មីៗនេះ នៅច្រកសមុទ្រ ជាអ្វីដែលរដ្ឋមន្ត្រីការពារជាតិរបស់ខ្លួនបាននិយាយថា គឺជាការបញ្ជាក់ឡើងវិញនៃការប្តេជ្ញាចិត្តរបស់ប្រទេសកាណាដាចំពោះ "សេរីភាព បើកចំហ និងរួមបញ្ចូល" ឥណ្ឌូ-ប៉ាស៊ីហ្វិក។រដ្ឋមន្ត្រីការពារជាតិលោកកាណាដា លោក ប៊ៀលប្ល៊ែរ( Bill Blair) បាននិយាយថា "ដូចដែលបានគូសបញ្ជាក់នៅក្នុងយុទ្ធសាស្ត្រឥណ្ឌូប៉ាស៊ីហ្វិករបស់យើង កាណាដាកំពុងបង្កើនវត្តមានរបស់កងនាវាជើងទឹកភូមិន្ទកាណាដា នៅក្នុងតំបន់ឥណ្ឌូ-ប៉ាស៊ីហ្វិក" ដោយសំដៅលើផែនការរបស់ប្រទេសកាណាដាសម្រាប់តំបន់ដែលបានប្រកាសនៅឆ្នាំ ២០២២។ លោក Li Xi អ្នកនាំពាក្យនៃបញ្ជាការភូមិភាគខាងកើតនៃកងទ័ពរំដោះប្រជាជនចិន (PLA) បាននិយាយថា ការឆ្លងកាត់នាវាចម្បាំងកាណាដាកាលពីថ្ងៃទី ៣១ ខែកក្កដា បានបៀតបៀន និងរំខានដល់ស្ថានភាព និងធ្វើឱ្យប៉ះពាល់ដល់សន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ។លោកបានបន្ថែមថា កងទ័ពចិនបានប្រុងប្រយ័ត្នខ្ពស់គ្រប់ពេលវេលា ហើយត្រៀមខ្លួនជាស្រេចក្នុងការឆ្លើយតបចំពោះរាល់ការគំរាមកំហែង និងការបង្កហេតុ។នាវាចម្បាំងអាមេរិក ហើយម្តងម្កាល យន្តហោះល្បាតរបស់កងទ័ពជើងទឹកអាមេរិក បានឆ្លងកាត់ ច្រកសមុទ្រ ប្រហែលមួយដងក្នុងមួយខែ ដោយមិនខ្វល់ពីការព្រមាន៕

កងទ័ពជើងទឹកហ្វីលីពីន និងសហរដ្ឋអាមេរិក ធ្វើសមយុទ្ធរួមគ្នានៅសមុទ្រចិនខាងត្បូង

2024/08/01 05:01:28 pm        245
Facebook Telegram Linkin
កងកម្លាំងប្រដាប់អាវុធហ្វីលីពីនបាននិយាយថា កងទ័ពជើងទឹកហ្វីលីពីន និងសហរដ្ឋអាមេរិក បានធ្វើសមយុទ្ធដែនសមុទ្ររួមគ្នានៅសមុទ្រចិនខាងត្បូងកាលពីថ្ងៃពុធ (៣១ កក្កដា)។ សម្ព័ន្ធមិត្តទាំងពីរបានចាប់ផ្តើមសកម្មភាពដែនសមុទ្ររួមគ្នានៅក្នុងខែវិច្ឆិកា ដើម្បីជំរុញវិធីសាស្រ្តដែលយោធារបស់ភាគីទាំងពីរអាចប្រតិបត្តិការស្របគ្នានៅពេលដែលមានភាពតានតឹងកើនឡើងជាមួយប្រទេសចិន នៅក្នុងសមុទ្រចិនខាងត្បូង។យោធារបស់ទីក្រុងម៉ានីល បាននិយាយនៅក្នុងសេចក្តីថ្លែងការណ៍មួយថា សមយុទ្ធចុងក្រោយបំផុតដែលបានធ្វើឡើងនៅក្នុងតំបន់សេដ្ឋកិច្ចផ្តាច់មុខរបស់ហ្វីលីពីននេះ រួមមាននាវាចំនួនពីរគ្រឿង ហើយត្រូវបានរៀបចំឡើងដើម្បីបង្កើនទំនាក់ទំនង និងការសម្របសម្រួលប្រតិបត្តិការរវាងកងទ័ពជើងទឹកទាំងពីរ។កាលពីថ្ងៃអង្គារ រដ្ឋមន្ត្រីការបរទេសអាមេរិក លោក អង់តូនី ប្លីងខិន (Antony Blinken) និងរដ្ឋមន្ត្រីក្រសួងការពារជាតិ លោក ឡយដ៍ អស្ទីន (Lloyd Austin) បានជួបពិភាក្សាជាមួយសមភាគីហ្វីលីពីន ដែលទីក្រុងវ៉ាស៊ីនតោន បានសន្យាផ្តល់មូលនិធិចំនួន ៥០០លានដុល្លារ ដើម្បីពង្រឹងកម្លាំងយោធា និងឆ្មាំល្បាតឆ្នេររបស់ទីក្រុងម៉ានីល។ការចូលរួមផ្នែកសន្តិសុខរវាងដៃគូសន្ធិសញ្ញាទាំងពីរបានកើនឡើងក្រោមការដឹកនាំរបស់ប្រធានាធិបតីហ្វីលីពីន លោក ហ្វឺឌីណាន ម៉ាកូស ជូនៀ (Ferdinand Marcos Jr.) ដែលបានជំរុញប្រទេសនេះឱ្យកាន់តែជិតស្និទ្ធជាមួយទីក្រុងវ៉ាស៊ីនតោន និងចាកឆ្ងាយពីគោលជំហរគោលនយោបាយការបរទេសរបស់អ្នកកាន់តំណែងពីមុនរបស់លោកក្នុងការធ្វើឱ្យទំនាក់ទំនងកាន់តែស៊ីជម្រៅជាមួយប្រទេសចិន៕

កូរ៉េខាងជើង ចង់ចាប់ផ្តើមកិច្ចចរចានុយក្លេអ៊ែរឡើងវិញប្រសិនបើ លោក Trump ឈ្នះឆ្នោត

2024/08/01 04:22:02 pm        244
Facebook Telegram Linkin
អ្នកការទូតជាន់ខ្ពស់របស់ប្រទេសកូរ៉េខាងជើងម្នាក់ ដែលបានរត់ចូលទៅកាន់ប្រទេសកូរ៉េខាងត្បូង បានប្រាប់សារព័ត៌មាន Reuters ថា កូរ៉េខាងជើង ចង់បើកកិច្ចចរចានុយក្លេអ៊ែរឡើងវិញជាមួយសហរដ្ឋអាមេរិក ប្រសិនបើ លោក ដូណាល់ ត្រាំ ជាប់ឆ្នោតជាប្រធានាធិបតីជាថ្មី ហើយនឹងធ្វើការដើម្បីបង្កើតយុទ្ធសាស្ត្រចរចាថ្មីមួយ ។លោក Ri Il Gyu គឺជាអ្នកការទូតជាន់ខ្ពស់របស់កូរ៉េខាងជើង ដែលរត់ចូលទៅទៅកាន់ប្រទេសកូរ៉េខាងត្បូងចាប់តាំងពីឆ្នាំ២០១៦។ នៅក្នុងបទសម្ភាសន៍លើកដំបូងរបស់លោកជាមួយប្រព័ន្ធផ្សព្វផ្សាយអន្តរជាតិ លោក Ri បាននិយាយថា កូរ៉េខាងជើង បានកំណត់ ប្រទេសរុស្ស៊ី អាមេរិក និងជប៉ុន ជាអាទិភាព គោលនយោបាយការបរទេសរបស់ខ្លួនសម្រាប់ឆ្នាំនេះ និងហួសពីនេះ។លោក Ri បាននិយាយថា ខណៈកំពុងពង្រឹងទំនាក់ទំនងជាមួយរុស្ស៊ី ទីក្រុងព្យុងយ៉ាងមានបំណងបើកការចរចានុយក្លេអ៊ែរឡើងវិញ ប្រសិនបើលោក Trump ទទួលជ័យជម្នះក្នុងការបោះឆ្នោត នៅក្នុងខែវិច្ឆិកា ខាងមុខនេះ។លោក Ri និយាយថា អ្នកការទូតរបស់ទីក្រុងព្យុងយ៉ាង កំពុងដាក់ចេញផែនការយុទ្ធសាស្ត្រសម្រាប់សេណារីយ៉ូនោះ ដោយមានគោលដៅដកចេញទណ្ឌកម្មលើកម្មវិធីសព្វាវុធរបស់ខ្លួន និងដកចេញការចាត់តាំងថាជាអ្នកជួយឧបត្ថម្ភរដ្ឋក្នុងអំពើភេរវកម្ម។ការអត្ថាធិប្បាយរបស់លោក បង្ហាញពីសក្តានុពលនៃការប្រឈមមុខទៅនឹងជំហរបច្ចុប្បន្នរបស់ប្រទេសកូរ៉េខាងជើង បន្ទាប់ពីសេចក្តីថ្លែងការណ៍ថ្មីៗនេះ បានលុបចោលលទ្ធភាពនៃការសន្ទនាជាមួយសហរដ្ឋអាមេរិក និងព្រមានអំពីការប្រឈមមុខដាក់គ្នាដោយអាវុធ។កិច្ចប្រជុំកំពូលរវាងមេដឹកនាំកូរ៉េខាងជើងលោក Kim Jong Un និងលោក Trump នៅក្នុងប្រទេសវៀតណាម ក្នុងឆ្នាំ២០១៩ បានដួលរលំ ជុំវិញការដាក់ទណ្ឌកម្ម ។

សម្ដេចធិបតីវាយតម្លៃខ្ពស់ចំពោះវិនិយោគិនហុងកុងមកវិនិយោគនៅកម្ពុជា និងបង្កើតឱកាសវិនិយោគថ្មីៗ

2024/07/31 10:20:45 pm        367
Facebook Telegram Linkin
សម្ដេច​ធិបតីវាយតម្លៃខ្ពស់ចំពោះវិនិយោគិនហុងកុងមកវិនិយោគនៅកម្ពុជា និងបង្កើតឱកាសវិនិយោគថ្មីៗ ភ្នំពេញ៖សម្ដេច​មហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នាព្រឹកថ្ងៃទី៣១ ខែកក្កដា ឆ្នាំ២០២៤នេះបាន​អនុញ្ញាតឱ្យ ឯកឧត្តម John KC Lee ប្រធានប្រតិបត្តិនៃតំបន់រដ្ឋបាលពិសេសហុងកុង(HKSAR) ក្នុងជំនួបសម្ដែងការគួរសម និងពិភាក្សាការងារនៅវិមានសន្តិភាព។ ក្នុងឱកាសនៃជំនួប ឯកឧត្តម John KC LEE ប្រធានប្រតិបត្តិនៃតំបន់រដ្ឋបាលពិសេសហុងកុង (HKSAR) បានគោរពជម្រាបជូនសម្តេចធិបតីនាយករដ្ឋមន្រ្តី អំពីគោលបំណងនៃដំណើរទស្សនកិច្ច គឺដើម្បីពង្រឹង និងពង្រីកចំណងទំនាក់ទំនងរវាងតំបន់រដ្ឋបាលពិសេសហុងកុង និងកម្ពុជា ជាពិសេសក្នុងវិស័យធុរកិច្ច វិនិយោគ និងការតភ្ជាប់រវាងប្រជាជន​​ និងប្រជាជន។ តំណាងក្រុមហ៊ុនហុងកុងធំៗ ក៏បានចូលរួមក្នុងដំណើរទស្សនកិច្ច នាពេលនេះ ជាមួយឯកឧត្តម។ ឯកឧត្តម John KC LEE បានអរគុណរាជរដ្ឋាភិបាលកម្ពុជា ដែលបានគាំទ្រវិនិយោគិន និង ធុរជនហុងកុង នាពេលកន្លងមក។ សម្ដេចធិបតី បានសម្ដែងនូវក្ដីសោមនស្សរីករាយចំពោះការសម្រេចបាននូវការចុះអនុស្សរណៈនៃការយោគយល់គ្នា រវាងទីភ្នាក់ងារមួយចំនួនរបស់តំបន់រដ្ឋបាលពិសេសហុងកុង ជាមួយក្រុមប្រឹក្សាអភិវឌ្ឍន៍កម្ពុជា។ ការណ៍នេះនឹងបង្កើតបន្ថែមទៀតនូវយន្តការជំរុញវិនិយោគ និង ធុរកិច្ច និងរួមចំណែកដល់ការពង្រឹង ទំនាក់ទំនងដ៏រឹងមាំ រវាងកម្ពុជា-ចិន។ សម្តេចធិបតីបានវាយតម្លៃខ្ពស់ចំពោះវិនិយោគិនហុងកុង ដែលបានបោះទុនវិនិយោគនៅកម្ពុជា។ សម្ដេចធិបតី និងឯកឧត្តម John KC LEE ក៏បានពិភាក្សាអំពីការបន្តជំរុញការពង្រឹង និងពង្រីកទំនាក់ទំនង និងកិច្ចសហប្រតិបត្តិការរវាងកម្ពុជា និងតំបន់រដ្ឋបាលពិសេសហុងកុង លើវិស័យសក្តានុពលជាច្រើន មានជាអាទិ៍៖ ពាណិជ្ជកម្ម និងវិនិយោគ, ហិរញ្ញវត្ថុ និងធនាគារ, បច្ចេកវិទ្យា និងសេដ្ឋកិច្ចឌីជីថល, ទេសចរណ៍, ការអប់រំ និងការតភ្ជាប់ប្រជាជន និងប្រជាជន រួមទាំងការពិនិត្យលទ្ធភាពបង្កើតចំនួនជើងហោះហើរត្រង់ពីហុងកុង មកខេត្តសៀមរាបរបស់កម្ពុជា។ មុននឹងបញ្ចប់ សម្តេចធិបតី បានគូសបញ្ជាក់ពីគោលនយោបាយ និងយន្តការនានារបស់រាជរដ្ឋាភិបាល ក្នុងការបង្កើត និង​បង្កើនបរិយាកាសអំណោយផល និងការលើកទឹកចិត្តដល់ការវិនិយោគនៅកម្ពុជា៕

និយតករហិរញ្ញវត្ថុកោះតៃវ៉ាន់ថា ខ្លួនបានត្រៀមជាស្រេចសម្រាប់លទ្ធផលបោះឆ្នោតអាមេរិក

2024/07/31 08:20:36 pm        203
Facebook Telegram Linkin
និយតករហិរញ្ញវត្ថុជាន់ខ្ពស់របស់កោះតៃវ៉ាន់បាននិយាយថា ទីភ្នាក់ងាររបស់ខ្លួនមានផែនការឆ្លើយតបបន្ទាន់សម្រាប់លទ្ធផលដែលអាចកើតឡើងណាមួយនៃការបោះឆ្នោតប្រធានាធិបតីអាមេរិក មិនថាលោក ដូណាល់ ត្រាំ (Donald Trump) ឬលោកស្រី កាម៉ាឡា ហារីស (Kamala Harris ) ជាអ្នកឈ្នះឆ្នោតនោះទេ។លោក ជីនលុង ផឹង (Jin-lung Peng) ប្រធានគណៈកម្មការត្រួតពិនិត្យហិរញ្ញវត្ថុតៃវ៉ាន់ (FSC) បានប្រាប់សារព័ត៌មានរ៉យទ័រក្នុងបទសម្ភាសន៍មួយនៅថ្ងៃពុធ (៣១ កក្កដា) នេះថា «យើងពិតជាមានផែនការត្រៀមទុកជាស្រេច» ប៉ុន្តែមិនបានផ្តល់ព័ត៌មានលម្អិតលើផែនការនោះទេ។ លោកបានបន្ថែមថា «នៅពេលណាដែលយើងកំណត់យុទ្ធសាស្ត្រ យើងត្រូវពិចារណាពីហានិភ័យភូមិសាស្ត្រនយោបាយអន្តរជាតិ និងនយោបាយក្នុងស្រុក»។ចំណាត់ការនេះកើតឡើងបន្ទាប់ពីលោក Trump កាលពីថ្ងៃទី១៧ ខែកក្កដាបាននិយាយថា តៃវ៉ាន់គួរតែបង់ថ្លៃការពារជាតិឱ្យសហរដ្ឋអាមេរិក ដោយនោះជាការលើកឡើងដែលបានធ្វើឱ្យមានការរង្គោះរង្គើទូទាំងកោះ និងបានគូសបញ្ជាក់អំពីហានិភ័យនៃការបោះឆ្នោតប្រធានាធិបតីនាពេលខាងមុខសម្រាប់សម្ព័ន្ធមិត្ត និងដៃគូរបស់ទីក្រុងវ៉ាស៊ីនតោននៅអាស៊ីមួយនេះ។ភាគហ៊ុនរបស់ក្រុមហ៊ុនតៃវ៉ាន់ TSMC ដែលជាក្រុមហ៊ុនផលិតបន្ទះឈីបដ៏ធំបំផុតរបស់ពិភពលោកតាមរយៈការលក់ បានធ្លាក់ចុះ ២,៤ភាគរយក្នុងពេកនោះ បន្ទាប់ពីការលើកឡើងរបស់បេក្ខភាពមកពីគណបក្សសាធារណរដ្ឋរូបនេះនៅក្នុងបទសម្ភាសន៍ជាមួយសារព័ត៌មាន ប្លូមប៊ឺក (Bloomberg)៕

[UPDATE ] ចំនួនអ្នកស្លាប់ក្នុងបំណាក់ដីនៅឥណ្ឌាកើនឡើងដល់ជាង១៦០នាក់ ខណៈរាប់សិបនាក់បន្តជាប់ខ្លួន

2024/07/31 08:00:13 pm        108
Facebook Telegram Linkin
ចំនួនអ្នកស្លាប់បានកើនឡើងដល់ ១៦២ នាក់ និងរាប់សិបនាក់នៅតែត្រូវគេបារម្ភថាកំពុងជាប់ខ្លួនក្នុងបំណាក់ដី បន្ទាប់ពីមានភ្លៀងធ្លាក់ខ្លាំងបង្កឱ្យមានបំណាក់ដីដ៏ធំនៅក្នុងរដ្ឋកេរ៉ាឡា ( Kerala) ភាគខាងត្បូងនៃប្រទេសឥណ្ឌា។បំណាក់ដីបានវាយប្រហារតំបន់ភ្នំនៅក្នុងស្រុក វ៉ាយ៉ាណាដ (Wayanad) កាលពីព្រឹកព្រលឹមថ្ងៃអង្គារសប្ដាហ៍នេះ នៅពេលអ្នកស្រុកភាគច្រើនកំពុងលង់លក់ក្នុងដំណេក។ប្រតិបត្តិការជួយសង្គ្រោះកំពុងដំណើរការ ប៉ុន្តែកំពុងត្រូវបានរារាំងដោយភ្លៀងធ្លាក់ខ្លាំង និងការបាក់រលំស្ពានដ៏សំខាន់មួយ។ ក្រុមអាជ្ញាធរបារម្ភថា ចំនួនអ្នកស្លាប់និងរបួសនឹងកើនឡើងបន្ថែមទៀត ខណៈមនុស្សប្រហែល១០០ នាក់នៅតែជាប់ខ្លួនក្នុងតំបន់ ដែលសេវាសង្គ្រោះបន្ទាន់មិនទាន់អាចទៅដល់។បំណាក់ដីទាំងនេះគឺជាគ្រោះមហន្តរាយដ៏អាក្រក់បំផុតដែលបានវាយប្រហាររដ្ឋ Kerala ចាប់តាំងពីឆ្នាំ២០១៨ មក នៅពេលទឹកជំនន់បានសម្លាប់មនុស្សជាង ៤០០ នាក់។ក្រុមមន្ត្រីបាននិយាយថា ទាហានជាង ២០០ នាក់ត្រូវបានគេបញ្ជូនទៅជួយដល់កងកម្លាំងសន្តិសុខក្នុងកិច្ចខិតខំប្រឹងប្រែងស្វែងរក និងជួយសង្គ្រោះ។មន្ត្រីខាងលើបន្ថែមថា មន្ទីរពេទ្យក្នុងតំបន់កំពុងព្យាបាលអ្នករបួសយ៉ាងហោចណាស់ ១២៣ នាក់ ហើយមនុស្សជាង ៣.០០០នាក់ត្រូវបានជួយសង្គ្រោះ និងជម្លៀសទៅកាន់ជំរំសង្គ្រោះចំនួន ៤៥កន្លែង៕

លោក ម៉ាស៊ូដ ប៉េហ្សេស្គីអាន ស្បថចូលកាន់តំណែង ជាប្រធានាធិបតី អ៊ីរ៉ង់

2024/07/31 06:39:13 pm        203
Facebook Telegram Linkin
ប្រធានាធិបតីថ្មីរបស់ប្រទេសអ៊ីរ៉ង់ លោក ម៉ាស៊ូដ ប៉េហ្សេស្គីអាន(Masoud Pezeshkian) បានស្បថចូលកាន់តំណែង នៅក្នុងសភា ក្នុងទីក្រុងតេអេរ៉ង់ កាលពីថ្ងៃអង្គារ។លោកបានថ្លែងសុន្ទរកថា ដែលផ្តល់ក្តីសង្ឃឹមនៃការបន្ទន់ឥរិយាបថចំពោះទំនាក់ទំនងបរទេស ដោយសន្យាថានឹងធ្វើឱ្យប្រសើរឡើងនូវទំនាក់ទំនងអន្តរជាតិ និងបន្ធូរបន្ថយការរឹតត្បិតលើសេរីភាពសង្គមនៅក្នុងប្រទេស។លោក Pezeshkian បានប្រកាសថា ការបោះឆ្នោតរបស់លោកនឹងបើក «ឱកាសថ្មី» សម្រាប់ប្រទេសអ៊ីរ៉ង់ និងពិភពលោក។ លោកបាននិយាយថា «យើងអំពាវនាវឱ្យបណ្តាប្រទេសលោកខាងលិចយល់អំពីការពិត និងបង្កើតទំនាក់ទំនងដោយផ្អែកលើការគោរពគ្នាទៅវិញទៅមក និងគោលជំហរស្មើភាព។ លោក Pezeshkian ចូលកាន់តំណែងក្នុងពេលមានភាពតានតឹងនៅទូទាំងតំបន់មជ្ឈិមបូព៌ា និងបានមើលឃើញប្រទេសជាច្រើន ដូចជាសហរដ្ឋអាមេរិកបានបញ្ជូនជំនួយយោធាទៅកាន់ប្រទេសអ៊ីស្រាអែល ចាប់តាំងពីការចាប់ផ្តើមជម្លោះនៅតំបន់ហ្កាហ្សា។លោក និយាយថា អ្នកទាំងឡាយផ្គត់ផ្គង់អាវុធ ដែលបានសម្លាប់កុមារ មិនអាចបង្រៀនពលរដ្ឋមូស្លីមអំពីមនុស្សជាតិបានទេ។ តំណាងជាន់ខ្ពស់មកពីក្រុមហាម៉ាស និងក្រុមហេសបូឡានៅប្រទេសលីបង់ និងក្រុមឧទ្ទាមហ៊ូទី នៅប្រទេសយេម៉ែន បានចូលរួមពិធីស្បត់ចូលកាន់តំណែងនេះ។លោក Pezeshkian បាននិយាយថា អាទិភាពរបស់លោក គឺការធ្វើឲ្យប្រសើរ និងពង្រឹងទំនាក់ទំនងជាមួយប្រទេសជិតខាងរបស់អ៊ីរ៉ង់។

បណ្ដាញសង្គម

ព័ត៌មានថ្មីៗ

ពិធីចុះហត្ថលេខាលើកិច្ចព្រមព្រៀងហិរញ្ញប្បទានសម្រាប់គម្រោងគ្រប់គ្រងធនធានទឹកចម្រុះហ្វូណនតេជោ (BOT)
09/09/2026 08:09 PM
Facebook Telegram Linkin
គិតពីឆ្នាំ២០២៣មក សមត្ថកិច្ច​បង្ក្រាបបទល្មើសគ្រឿង​ញៀនជាង៣ម៉ឺន​ករណី និងឃាត់ខ្លួនមនុស្សជិត៩ម៉ឺននាក់ និងរឹបអូសសារ​ធាតុញៀន​គ្រប់ប្រភេទជាង ២៦តោន
09/09/2026 07:09 PM
Facebook Telegram Linkin
វិមានក្រឹមឡាំង៖ រុស្ស៊ីសង្ឃឹមថា កិច្ចប្រជុំសម្របសម្រួលដោយអាមេរិកជាមួយអ៊ុយក្រែន នឹងចាប់ផ្តើមឡើងវិញ ក្នុងពេលឆាប់ៗនេះ
09/09/2026 07:09 PM
Facebook Telegram Linkin
គណបក្សប្រឆាំងដ៏ធំ​របស់ជប៉ុន ប្រកាស​រំលាយ​​ ក្រោយបង្កើត​បាន​​រយៈ​ពេល​ ៨ខែ
09/09/2026 06:09 PM
Facebook Telegram Linkin
ឥណ្ឌូនេស៊ី ស្វែងរកអ្នកសារព័ត៌មានបាត់ខ្លួន ក្រោយពេលពួកគេធ្វើសេចក្តីរាយការណ៍ពីបន្ទុះភ្នំភ្លើង Anak Krakatau
09/09/2026 06:09 PM
Facebook Telegram Linkin
អ៊ីរ៉ង់សងសឹកអាមេរិកជាមួយការវាយប្រហារលើនាវាដឹកប្រេងរបស់ទីក្រុងវ៉ាស៊ីនតោន
09/09/2026 06:09 PM
Facebook Telegram Linkin
ការវាយប្រហាររបស់រុស្ស៊ីសម្លាប់មនុស្សម្នាក់ និងធ្វើឲ្យខូចខាតកំពង់ផែនៅទីក្រុង Mykolaivរបស់អ៊ុយក្រែន
09/09/2026 06:09 PM
Facebook Telegram Linkin
មនុស្ស ៤នាក់ស្លាប់ ក្រោយការវាយប្រហារយានដ្រូនអ៊ុយក្រែនលើទីក្រុង Novorossiysk របស់រុស្ស៊ី
09/09/2026 06:09 PM
Facebook Telegram Linkin
ប្រធានាធិបតីស៊ែប៊ី បញ្ជាក់ថា ការបោះឆ្នោតសភា នឹង​ត្រូវ​បាន​ធ្វើ​​នៅថ្ងៃទី២៥ ខែតុលា
09/09/2026 06:09 PM
Facebook Telegram Linkin
ហ្វីលីពីនរិះគន់ចិន បន្ទាប់ពីមានកំហុស​ឆ្គង ពាក់​ព័ន្ធ​នឹង​ឯក​សារបង្ហាញ​ជំហរ​លើ​តំបន់​មាន​ជម្លោះ​​
09/09/2026 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.