BTV NEWS

ត្រីមាសទី១ឆ្នាំនេះ កម្ពុជាប្រមូលថវិកាពីដៃគូ និងការបោះលក់មូលបត្រមានទំហំជាង ៥៦១ លានដុល្លារ សម្រាប់តម្រូវការអភិវឌ្ឍ

រដ្ឋបាលខេត្តកំពតត្រៀមទុរេនទុំ ២តោន សម្រាប់ទទួលទេសចរចូលរួមព្រឹត្តិការណ៍ «មរតកផ្លែឈើ និងនំចំណីកំពត»

មន្ត្រីជំនាញ ស្នើដល់កសិករ សហគមន៍ និងអ្នកពាក់ព័ន្ធរួមគ្នាលើកកម្ពស់វិស័យកសិកម្មខេត្តកែប

អ្នកដាំទុរេនស្រុកចម្ការលើចង់ឲ្យអ្នកលក់ប្រកាន់ភាពស្មោះត្រង់លើអតិថិជន

សេដ្ឋកិច្ច និង កសិកម្ម

សេដ្ឋកិច្ចកម្ពុជាឆ្នាំ២០២៣រំពឹងសម្រេចបានកំណើនរឹងមាំ ទោះបីរងសម្ពាធពីកត្តាខាងក្រៅ

ភ្នំពេញ៖ សេដ្ឋកិច្ចកម្ពុជាឆ្នាំ២០២៣ ត្រូវបានវាយតម្លៃថា នឹងសម្រេចបានកំណើនក្នុងអត្រា ៥,៦% ជាមួយនឹងអត្រាអតិផរណាក្នុងរង្វង់ ២,៥% ទោះបីជាស្ថានភាពសេដ្ឋកិច្ចសកលមានកំណើនមិនច្បាស់លាស់ដោយសាររងផលវិបាកនៃសង្គ្រាមរុស្សី-អ៊ុយក្រែន និងការបន្តរឹតបន្ដឹងគោលនយោបាយរូបិយវត្ថុក្នុងបណ្តាប្រទេសអភិវឌ្ឍន៍។ក្នុងរបាយការណ៍លទ្ធផលនៃការអនុវត្តថវិការឆមាសទី១ និងការវាយតម្លៃការអនុវត្តច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ ក្រសួងសេដ្ឋកិច្ច និងហិរញ្ញវត្ថុ លើកឡើងថា ត្បិតរងផលវិបាកនៃសង្គ្រាមរុស្សី-អ៊ុយក្រែន, សង្គ្រាមពាណិជ្ជកម្ម និងបច្ចេកវិទ្យារវាងចិន-អាម៉េរិក និងការបន្តរឹតបន្ដឹងគោលនយោបាយរូបិយវត្ថុក្នុងបណ្តាប្រទេសអភិវឌ្ឍន៍ កំពុងធ្វើឱ្យទស្សនវិស័យសេដ្ឋកិច្ចសកល បន្តមានភាពមិនប្រាកដប្រជាខ្ពស់ និងបានដាក់សម្ពាធមកលើអនុវិស័យបម្រើការនាំចេញ ជាពិសេសអនុវិស័យកាត់ដេរ សេដ្ឋកិចុ្ចកម្ពុជា នឹងមានកំណើនរឹងមាំ សម្រេចក្នុងអត្រារឹងមាំ ដូចការប៉ាន់ស្មាន់ ធ្វើឡើងកាលពីដើមឆ្នាំ។វិស័យឧស្សាហកម្មត្រូវបានប៉ាន់ស្មានថា នឹងមានកំណើន ៥,០%ទាបជាងការរំពឹងទុក ដោយសារការថមថយកំណើននៃអនុវិស័យកាត់ដេរ និងការបន្តកំណើនទាបនៃអនុវិស័យសំណង់ ក្នុងខណៈដែលអនុវិស័យកម្មន្តសាលមិនមែនកាត់ដេរនៅបន្តរក្សាបានកំណើនល្អប្រសើរ។ចំពោះវិស័យសេវាកម្មវិញ, ត្រូវបានប៉ាន់ស្មានដែរថា នឹងបន្តងើបឡើងក្នុងរង្វង់ ៨,១% ដែលគាំទ្រដោយសន្ទុះលឿនជាងការរំពឹងទុកនៃកំណើនអនុវិស័យសណ្ឋាគារ និងភោជនីយដ្ឋាន និងសេវាកម្មគាំទ្រផ្សេងទៀតរួមមាន៖ អនុវិស័យលក់ដុំ-រាយ និងដឹកជញ្ជូន ទោះបីជាអនុវិស័យអចលនទ្រព្យ បន្តមានកំណើនទាបជាងការរំពឹងទុកយ៉ាងណាក្តី។ ដោយឡែកវិស័យកសិកម្ម ត្រូវបានប៉ាន់ស្មានថា សម្រេចបានកំណើនទាបជាងនិន្នាការធម្មតាបន្តិច ក្នុងអត្រា ០,៩% ដោយ សារកត្តាអាកាសធាតុ, ថ្លៃធាតុចូលកសិកម្មនៅបន្តមានតម្លៃខ្ពស់ និងកត្តាបញ្ហាប្រឈមជារចនាសម្ព័ន្ធ៕ អត្ថបទ៖ សុន រ៉ាឌី

វិស័យឯកជនបង្ហាញពីស្ថិរភាពក្នុងអាជីវកម្ម និងប្ដេជ្ញារួមគ្នាអភិវឌ្ឍន៍លើការកែច្នៃផលិតផលក្នុងស្រុក

ភ្នំពេញ៖ លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានថ្លែងថា ចាប់តាំពីមុនការបោះឆ្នោតជ្រើសតាំងតំណាងរាស្រ្ដនីតិកាលទី៧ឆ្នាំ២០២៣នេះ រហូតដល់ការបោះឆ្នោតបានបញ្ចប់វិស័យឯកជន ជាពិសេសសហគ្រាសធុនតូច និងមធ្យមនៅក្នុងប្រទេសកម្ពុជាអាចរក្សាបាននូវស្ថិរភាពក្នុងការប្រកបអាជីវកម្ម និងបានប្ដេជ្ញាសហការធ្វើការងារជាមួយរដ្ឋាភិបាលថ្មីជាដោយផ្ដោតសំខាន់លើការកែច្នៃផលិតផលក្នុងស្រុក។ លោកឧកញ៉ា តែ តាំងប៉ ថ្លែងប្រាប់ទូរទស្សន៍ BTV នាព្រឹកថ្ងៃទី៨ ខែសីហា ឆ្នាំ ២០២៣នេះថាប្រទេសកម្ពុជាក្រោមការដឹកនាំដោយរាជរដ្ឋាភិបាលមានសម្ដេចតេជោ ហ៊ុន សែន ជានាយករដ្ឋមន្រ្ដី កាលពីអាណត្តិមុនៗ គ្រប់គ្រងបានយ៉ាងល្អចំពោះបញ្ហានយោបាយនៅក្នុងប្រទេស ជាពិសេសវិបត្តិជំងឺកូវីដ-១៩ហើយបានរៀបចំព្រឹត្តិការធំៗជាច្រើនឱ្យទទួលបានជោគជ័យដូចជាព្រឹត្តិការស៊ីហ្គេម និងអាស៊ានប៉ារ៉ាហ្គេមជាដើម។ លោកបន្តថា តាមរយៈយុទ្ធសាស្រ្ដ និងគោលនយោបាយច្បាស់លាស់របស់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជានេះហើយទើបអាចរក្សាបាននូវស្ថិរភាព និងការអភិវឌ្ឍនៅក្នុងប្រទេសកម្ពុជា។ លោកឧកញ៉ា តែ តាំងប៉ ក្នុងនាមប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជាបានអបអរសាទរចំពោះឯកឧត្ដមបណ្ឌិត ហ៊ុន ម៉ាណែត ដែលព្រះមហាក្សត្របានចេញព្រះរាជក្រឹត្យចាត់តាំងនាយករដ្ឋមន្ត្រីថ្មី សម្រាប់ដឹកនាំប្រទេសកម្ពុជា ។ លោកបន្តថា វិស័យឯកជនជាពិសេសសហគ្រាសធុនតូច និងមធ្យមកម្ពុជា ប្ដេជ្ញារួមគ្នាធ្វើកិច្ចការងារជាមួយរាជរដ្ឋាភិបាលថ្មីជាពិសេសលើការកែច្នៃផលិតផលក្នុងស្រុកដើម្បីអភិវឌ្ឍន៍សេដ្ឋកិច្ច សង្គមកម្ពុជាឱ្យមានការរីកចម្រើនទៅមុខបន្ថែមទៀត។ សូមជម្រាបថា សហគ្រាសធុនតូច និងមធ្យម បានកំពុងដើរតួរជាឆ្អឹងខ្នងនៃសេដ្ឋកិច្ចជាតិ។ ដើម្បីគាំទ្រ និងជំរុញឱ្យមានកំណើនជាបន្តបន្ទាប់ និងការពង្រីកអាជីវកម្មខ្នាតតូច និងមធ្យមរបស់សហគ្រាសធុនតូច និងមធ្យមរាជរដ្ឋាភិបាលបានលើកទឹកចិត្តផ្នែកគោលនយោបាយដូចជា ការកាត់បន្ថយពន្ធ និងការលើកលែងពន្ធជាដើម៕អត្ថបទ៖ វ៉ន ដារ៉ា

ពលរដ្ឋ ៣ភូមិអាចរកចំណូលបានពីមុខរបរត្បាញក្រមា ជាមុខរបរបានបន្សល់ទុកតាំងពីដូនតា

ឧត្តរមានជ័យ៖ ប្រជាពលរដ្ឋចំនួន៣ភូមិគឺភូមិតាមា ភូមិទំនប់ថ្មី និងភូមិរង្សី ស្ថិតក្នុងឃុំបេង ស្រុកបន្ទាយអំពឹល ខេត្តឧត្តរមានជ័យ បង្កើតជាសហគមន៍ត្បាញក្រមា ដែលបន្សល់ទុកតាំងពីដូនតា អាចធ្វើឲ្យជីវភាពរបស់ពួកគាត់ បានធូរធាមួយកម្រិត បន្ទាប់ពីធ្វើស្រែចំការជៀសវាងការចំណាកស្រុក ។ប្រជាពលរដ្ឋឈ្មោះ សយ សារី តំណាងឲ្យពលរដ្ឋដទៃទៀត រស់នៅចំណុចភូមិទំនប់ថ្មីឃុំបេង បានរៀបរាប់ថា គ្រួសាររបស់គាត់ ក៏ដូចជាក្រុមគ្រួសារដទៃទៀត មួយចំនួនបានងាកមកប្រកបមុខរបរត្បាញក្រមា ដែលជារបរមួយមានតាំងបុរាណបានបន្សល់ទុកពីដូនតា បច្ចុប្បន្នមុខរបរនេះ នៅតែបន្តមានប្រជាពលរដ្ឋមួយចំនួនបន្តធ្វើរបរនេះ ព្រោះរបរត្បាញក្រមាអាចផ្តល់ប្រយោជន៍ច្រើនដល់ពួកគាត់បន្ទាប់ពីធ្វើស្រែចំការ។ពលរដ្ឋរូបនេះ បានបន្តថា ការត្បាញក្រមាប្រសិនបើយើងខិតខំនោះ ក្នុងមួយថ្ងៃអាចត្បាញបានចំនួនពីរទៅបីប្រមាផងដែរ ។ ក្រមាមួយអាចលក់បានតម្លៃជាងពីរម៉ឺនរៀល ទៅតាមប្រភេទសាច់ក្រមា ។ ក្នុងនោះនៅពេលយើងធ្វើបានហើយនោះ មានខាងមន្ទីរកិច្ចការនារីខេត្តមកទទួលទិញពីបងប្អូន និងជួយរកទីផ្សារឲ្យមិនលំបាកបងប្អូនយកទៅលក់នៅលើទីផ្សារនោះទេ ដោយតម្លៃសមរម្យដូចលើទីផ្សារផងដែរ។យ៉ាងណាម៉ិញលោកស្រីឯក សុភារុំ ប្រធានមន្ទីរកិច្ចការនារីខេត្តឧត្តរមានជ័យ បានលើកឡើងថា ការត្បាញក្រមានេះ មិនមែនសុទ្ធតែអ្នកស្រុកបន្ទាយអំពឹលចេះត្បាញទាំងអស់គ្រប់គ្នានោះទេ គឺក្រុមការងារជ្រើសរើស និងជួយឧបត្ថម្ភចំពោះតែពលរដ្ឋណាមានជំនាញស្រាប់ និងអ្នកមិនចេះអាចរៀនបន្តពីអ្នកចេះក្នុងមូលដ្ឋានរបស់ខ្លួន ដើម្បីទទួលបានជំនាញត្បាញនេះ។លោកស្រីបញ្ជាក់ថា ក្នុងនោះមន្ទីរកិច្ចការនារីខេត្តបានជ្រើសអ្នកដែលមានជំនាញចេះត្បាញស្រាប់នៅតាមបណ្តាលក្រុងស្រុកគោលដៅ រួមមាន៖ ស្រុកចុងកាល់ ក្រុងសំរោង និងស្រុកបន្ទាយអំពឹល ដើម្បីបង្កើតជាសហគមន៍នៅតាមមូលដ្ឋានរៀងៗខ្លួន រាល់សំម្ភារៈ និងរបស់របរប្រើប្រាស់ផ្សេងៗដែលពលរដ្ឋពុំមានលទ្ធភាពទិញខាងមន្ទីរជាអ្នកជួយឧត្ថម្ភធ្វើយ៉ាងណាឲ្យតែប្រជាពលរដ្ឋអាចរកចំណូលបានគ្រប់គ្រាន់សម្រាប់ការផ្គត់ផ្គង់ជីវភាពក្នុងក្រុមក្រួសាររបស់ពួគាត់។ជាមួយគ្នានោះដែរលោកស្រី ក៏បានអំពាវនាវដល់អាជីវករ និងតាមមន្ទីរស្ថាប័ននានាជុំវិញខេត្តធ្វើយ៉ាងណាជួយគាំទ្រ និងទិញផលិតផលដែលជាស្នាដៃរបស់កូនខ្មែរដែលធ្វើចេញពីដៃផ្ទាល់របស់ប្រជាពលរដ្ឋ ដើម្បីលើកកម្ពស់ និងជំរុញឲ្យមានការផលិតបន្ថែមទៀត ដើម្បីជាការលើកទឹកចិត្តដល់ពួកគាត់ផងដែរ៕

ផលិតផលជលផលកម្ពុជាចំនួន៤មុខទៀត ត្រូវអនុញ្ញាតឱ្យនាំចេញទៅប្រទេសចិន

ស្ថានទូតចិនប្រចាំនៅកម្ពុជា នៅយប់ថ្ងៃទី៧ ខែសីហា ឆ្នាំ២០២៣នេះ បានផ្សព្វផ្សាយលើ Facebook ផ្លូវការរបស់ខ្លួនថា រដ្ឋបាលគយនៃប្រទេសចិន ទើបបានបញ្ចប់នីតិវិធី ក្នុងការអនុញ្ញាតឱ្យផលិតផលជលផលរបស់កម្ពុជា ៤មុខទៀត អាចនាំចេញដោយផ្ទាល់ទៅកាន់ប្រទេសចិនបាន។ផលិតផលជលផលចិញ្ចឹមទាំង ៤មុខនេះរួមមាន៖ បង្កងប៉ាក អន្ទង់ ត្រីដំរី និងខ្យង។ស្ថានទូតចិនប្រចាំកម្ពុជា បញ្ជាក់ដូច្នេះថា ផ្អែកលើពាណិជ្ជកម្មប្រពៃណី ដែលមានស្រាប់លើជលផលរវាងចិន និងកម្ពុជា រួមមានបង្កងប៉ាក អន្ទង់ ត្រីដំរី និងខ្យង សម្រេចបាននូវជលផលទាំងស្រុង ដែលត្រូវបានអនុញ្ញាតនាំចេញទៅកាន់ប្រទេសចិន។ សម្រាប់ក្រុមហ៊ុនដែលត្រូវបានរដ្ឋបាលគយនៃប្រទេសចិន ទទួលស្គាល់សម្រាប់ការនាំចេញផលិតផលជលផលទាំងនេះគឺ ក្រុមហ៊ុន Cambodian Tienit International Trading។ ការអនុញ្ញាតនេះ ជាសមិទ្ធផលដ៏សំខាន់ក្នុងការនាំចេញកសិផលកម្ពុជា ទៅកាន់ទីផ្សារប្រទេសចិន។សូមជម្រាបថា កាលពីខែឧសភា ឆ្នាំ២០២៣ ផលិតផលជលផលធម្មជាតិរបស់កម្ពុជាចំនួន ១១ប្រភេទ ទទួលបានការអនុញ្ញាតឲ្យនាំចេញ ទៅកាន់ទីផ្សារប្រទេសចិន។ ផលិផលចំនួន ១១ប្រភេទនេះរួមមាន៖ កំពឹសទឹកសាប, ត្រីប្រាធំ, ត្រីប្រាខ្ចៅ, ខ្យងទឹកសាបពីរប្រភេទ, អន្ទង់ទឹកសាប, បង្កងកណ្តូបពីរប្រភេទ, បង្គាខ្លឹង, បង្គាស, និងបង្គាប៉ារ៉ា។អគ្គរដ្ឋបាលគយចិន បានអនុម័តលើការចុះបញ្ជី របស់ក្រុមហ៊ុននាំចេញមានឈ្មោះ KIM CHOU Co., Ltd Import Export and International Transportation ដែលបានស្នើសុំនាំចេញផលផលិតផលជលផលពីធម្មជាតិចំនួន ១១ប្រភេទទៅកាន់ប្រទេសចិន។សូមជម្រាបថា រហូតមកដល់ពេលនេះ ផលិតផលកសិកម្មរបស់កម្ពុជា ដែលអាចនាំចេញប្រទេសចិន រួមមាន៖ អង្ករ ដំឡូងមីក្រៀម គ្រាប់ស្វាយចន្ទី ចេក ផ្លែស្វាយ ពោត ផ្លែមៀនប៉ៃលិន (តាង៉ែន) ត្រីប្រា ម្រេច ផលិតផលជលផលពីធម្មជាតិចំនួន ១១ប្រភេទ និងផលិតផលជលផលចិញ្ចឹម ៤មុខទៀត៕

កម្ពុជានាំចេញគ្រឿងអេឡិចត្រូនិកមានទឹកប្រាក់ជាង ១,៤ពាន់លានដុល្លារ ក្នុងឆមាសទី១

ភ្នំពេញ៖ កម្ពុជាបាននាំចេញគ្រឿងអេឡិចត្រូនិក បានកើនឡើងគួរឱ្យសម្គាល់ ក្នុងឆមាសទី១ ឆ្នាំ២០២៣នេះ បើទោះបីជាការនាំចេញផលិតផលកាត់ដេរ សំលៀកបំពាក់ ស្បែកជើង និងផលិតផលធ្វើដំណើរ ដែលជាទំនិញនាំចេញសំខាន់របស់កម្ពុជា បានថយចុះ។របាយការណ៍ឆមាសទី១ និងទិសដៅការងារឆមាសទី២ ឆ្នាំ២០២៣ របស់ធនាគារជាតិនៃកម្ពុជា ចេញផ្សាយកាលពីពេលថ្មីៗនេះ បង្ហាញថា ការនាំចេញគ្រឿងអេឡិចត្រូនិក មានទឹកប្រាក់ប្រមាណ ១ ៤៤០ លានដុល្លារ ក្នុងរយៈពេល ៦ខែឆ្នាំ២០២៣នេះ កើនឡើង១.៣ដង ធៀបនឹងរយៈពេលដូចគ្នាកាលពីឆ្នាំមុន។របាយការណ៍លើកឡើងថា៖ ការនាំចេញបានថយចុះ ២,១ភាគរយ ជាចម្បងដោយសារការថយចុះការនាំចេញទោចក្រយាន ៣០,៥ភាគរយ ផលិតផលកាត់ដេរ ១៨,៤ភាគរយ និងកៅស៊ូ ៩,៨ភាគរយ ខណៈដែលមុខទំនិញផ្សេងទៀតបានកើនឡើងរួមមាន គ្រឿងអេឡិចត្រូនិក កើនឡើង១,៣ដង និងអង្ករ កើនឡើង ១២,៤ភាគរយ។ឯកឧត្តម ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា ការនាំចេញផលិតផលមិនមែនកាត់ដេរមានការកើនឡើងគួរឱ្យកត់សម្គាល់ក្នុងប៉ុន្មានឆ្នាំចុងក្រោយនេះ ឆ្លុះបញ្ជាំងពីប្រសិទ្ធិភាពនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មនៅកម្ពុជា។ឯកឧត្តម បន្តថា គោលនយោបាយអភិវឌ្ឍន៍ឧស្សាហកម្មកម្ពុជា ២០១៥-២០២៥ បានជំរុញការវិនិយោគលើបច្ចេកវិទ្យាក្នុងសង្វាក់ផលិតកម្ម និងជំរុញការនាំចេញផលិតផលមិនមែនកាត់ដេរកើនឡើងខ្ពស់៕ អត្ថបទ៖ វណ្ណៈ

កម្ពុជារំពឹងថា នឹងទទួលបានភ្ញៀវទេសចរអន្តរជាតិ៥លាននាក់ នៅឆ្នាំនេះ

ភ្នំពេញ៖ នៅឆ្នាំនេះកម្ពុជារំពឹងថា នឹងទទួលបានភ្ញៀវទេសចរអន្តរជាតិ ប្រមាណ៥លាននាក់ និងឆ្នាំ២០២៦ នឹងមានការកើនឡើងដល់ប្រមាណ៧លាននាក់ ។ នេះបើតាមប្រសាសន៍ឯកឧត្តម ថោង ខុន រដ្ឋមន្រ្តីក្រ សួងទេសចរណ៍ ប្រាប់អ្នកសារព័ត៌មាន ក្នុងទិវារត់ប្រណាំងម៉ារ៉ាតុងអន្តរជាតិចក្រភពខ្មែរ លើកទី៨ ឆ្នាំ២០២៣ នៅខេត្តសៀមរាប នៅថ្ងៃទី៦ ខែសីហា នេះ ។ឯកឧត្តម ថោង ខុន បានមានប្រសាសន៍ថា ទិវារត់ប្រណាំងម៉ារ៉ាតុងអន្តរជាតិចក្រភពខ្មែរលើកទី៨ឆ្នាំ ២០២៣នេះ មានអ្នកចូលរួមសរុបជាង២ពាន់៥រយនាក់ ក្នុងនោះមានបរទេសជាង៥០០នាក់មកពី៤៥ប្រទេស ហើយចំនួននេះមានការ កើនឡើងច្រើនបើធៀបទៅនឹងការប្រកួតម៉ារ៉ាតុងអន្តរជាតិចក្រភពខ្មែរលើកទី៧ ដែលត្រូវបានរៀបចំជាថ្មី បន្ទាប់ពីវិបត្តិជំងឺកូវីដ- ១៩ កាលពីឆ្នាំ២០២២។ ការកើនឡើង នៃចំនួនអ្នកចូលរួមនៅក្នុងទិវានេះ ដោយសារភ្ញៀវទេសចរបានមើលឃើញថា កម្ពុជាមានសុខសន្តិភាពពេញបូរិបូណ៍ ហើយគណៈកម្មការ និងអ្នកពាក់ព័ន្ធផ្សេងៗ ទៀតបានរៀបចំតំបន់អង្គរបានល្អ។ក្នុងន័យនេះ ឯកឧត្តម រំពឹងថា នៅឆ្នាំនេះ កម្ពុជា នឹងទទួលបានភ្ញៀវទេសចអន្តរជាតិ៥លាននាក់ ក្នុងស្រុកប្រមាណ១៦លាននាក់ និងឆ្នាំ២០២៦ ទទួលបានភ្ញៀវទេសចរអន្តរជាតិកើនឡើងដល់ប្រមាណ ៧លាននាក់។ក្នុងរយៈពេល៧ខែ ក្នុងឆ្នាំ២០២៣ នៅទូទាំងប្រទេសកម្ពុជា ទទួលបានភ្ញៀវទេសចរផ្ទៃក្នុង ប្រមាណជាង១២លាននាក់ ។ នេះបើយោងតាមស្ថិតិរបស់ក្រសួងទេសចរណ៍ ។ជាធម្មតា ខែកក្កដា និងខែសីហា ជាខែដែលមានចរន្តភ្ញៀវទេសចរផ្ទៃក្នុងតិច ដោយសារជារដូវ ភ្លៀង អាចមានជំនន់ទឹកភ្លៀងដោយកន្លែង។ ម្យ៉ាងវិញទៀត ខែទាំង២នេះ មិនមានថ្ងៃឈប់សម្រាកជាតិ ទេ។ ប៉ុន្តែ ចរន្តភ្ញៀវ នឹងចាប់ផ្តើមមានសន្ទុះខ្លាំងចាប់ពីខែកញ្ញាវិញ ជាមួយការប្រារព្ធពិធីកាន់បិណ្ឌ និងភ្ជុំ បិណ្ឌ និងថ្ងៃ ឈប់សម្រាកនានា។ក្រសួងទេសចរណ៍រំពឹងថា នឹងទទួលបានភ្ញៀវទេសចរផ្ទៃក្នុង ប្រមាណ១៦លាននាក់ សម្រាប់ ឆ្នាំនេះ ក្រោមទម្រង់អក្សរ V ដូចដែលព្យាករក្នុងផែនទីចង្អុលផ្លូវ ស្តីពីការស្តារ និងលើកស្ទួយវិស័យទេស ចរណ៍ក្នុងនិងក្រោយដំណាក់កាលវិបត្តិជំងឺកូវីដ-១៩ ៕អត្ថបទ៖ ទូច សោភ័ណ

រដ្ឋមន្ត្រីក្រសួងទេសចរណ៍ ប្រកាសអនុវត្តផែនការមេអភិវឌ្ឍទេសចរណ៍ខេត្តកែប ឆ្នាំ២០២៣ -២០៣៥

កែប៖ នៅថ្ងៃទី៧ ខែសីហានេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានប្រកាសដាក់ឲ្យអនុវត្តផ្លូវការ ផែនការមេអភិវឌ្ឍវិស័យទេសចរណ៍ខេត្តកែប នៅសាលាខេត្តកែប ដើម្បីប្រែក្លាយខេត្ដកែបជាគោលដៅទេសចរណ៍ សម្រាកកម្សាន្ដប្រណិតកម្រិតខ្ពស់ ភាពទាក់ទាញ ធានាបានឧត្តមភាពប្រកួតប្រជែង នៅក្នុងតំបន់ និងពិភពលោក។ឯកឧត្តមរដ្ឋមន្ត្រី ថោង ខុន ថ្លែងថា ការរៀបចំផែនការមេអភិវឌ្ឍវិស័យទេសចរណ៍ខេត្តកែប គឺបានកំណត់ចក្ខុវិស័យប្រែក្លាយខេត្តកែបជា “គោលដៅទេសចរណ៍ធម្មជាតិសម្រាកកម្សាន្តបែបប្រណិតកម្រិតខ្ពស់” ដោយប្រកាន់យកគោលការណ៍នៃការអភិវឌ្ឍប្រកបដោយ ចីរភាព សុវត្ថិភាព គុណភាព ភាពប្រកួតប្រជែង និងទេសចរណ៍បែបឆ្លាតវៃ ហើយត្រូវបាន ហើយ ត្រូវបានទទួលបានការអនុម័តដ៏ខ្ពង់ខ្ពស់ពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា កាលពីថ្ងៃទី១៤ ខែកក្កដា ឆ្នាំ២០២៣ កន្លងមកនេះ។ឯកឧត្តម នី ផល្លី រដ្ឋលេខាធិការក្រសួងទេសចរណ៍ ថ្លែងថា នៅក្នុងផែនការមេអភិវឌ្ឍន៍វិស័យទេសចរណ៍ខេត្តកែបនេះ គឺបានកំណត់ប៉ូលអភិវឌ្ឍន៍សំខាន់ៗ និងជាយុទ្ធសាស្ត្រចំនួន៤ រួមមាន៖ ទី១ ប៉ូលទេសចរណ៍តំបន់ក្រុងកែបចាស់ ឲ្យក្លាយជាឧទ្យានប្រណិតកម្រិតពិភពលោក ទី២ ប៉ូលទេសចរណ៍តំបន់អង្កោល នឹងអភិវឌ្ឍន៍ឲ្យក្លាយជាតំបន់ទេសចរណ៍ឆ្នេរសមុទ្រធម្មជាតិទំនើប ទី៣ ប៉ូលទេសចរណ៍តំបន់ភ្នំវល្លិ៍ នឹងអភិវឌ្ឍន៍ឲ្យក្លាយជា តំបន់កសិទេសចរណ៍ និងទេសចរណ៍ធម្មជាតិប្រវត្តិសាស្ត្រ និងទី៤ ប៉ូលទេសចរណ៍តំបន់ប្រជុំកោះ នឹងអភិវឌ្ឍន៍ឲ្យក្លាយជា តំបន់ទេសចរណ៍កោះប្រណិត។ឯកឧត្តម នី ផល្លី ថ្លែងថា តាមរយៈការអនុវត្តផែនមេនេះ នឹងបង្កើនភាពទាក់ទាញ បណ្តាក្រុមហ៊ុនវិនិយោគជាតិអន្តរជាតិ និងអង្គការសមាគម ដៃគូរាជរដ្ឋាភិបាល នានាចូលរួមអភិវឌ្ឍន៍ និងរៀបចំកាយសម្បទាផ្តល់សេវាវិស័យទេសចរណ៍ប្រកបដោយភាពច្នៃប្រឌិត ឆ្លាតវៃ និងទាក់ទាញបំផុត។ឯកឧត្តម បន្តថា ទន្ទឹមនឹងនេះខេត្តកែប ក៏នឹងត្រូវបានទទួលបានអភិវឌ្ឍន៍ស្ថាបនាផ្លូវនៅក្នុងខេត្តចំនួន១៦ ខែ្សទៅកាន់បណ្តាតំបន់ប៉ូលទេសចរណ៍នានា រៀបចំបណ្តាញប្រព័ន្ធលូទឹកកខ្វក់ អាងទឹកគ្រប់គ្រងសំណល់រឹងរាវ ប្រឡាយទឹកបញ្ចៀសទឹកជំនន់ បណ្តាញផ្គត់ផ្គងអគ្គីសនី និងបណ្តាញប្រព័ន្ធប្រៃសណីយទូរគមនាគមន៍ជាដើម៕ អត្ថបទ ស៊ុម សុខជា

កម្ពុជានាំចេញអង្ករជាង៣៦ម៉ឺនតោន រកចំណូលបានជាង២៥០លានដុល្លារក្នុងរយៈពេល៧ខែ

ភ្នំពេញ៖ គិតក្នុងរយៈពេល ៧ខែ ឆ្នាំ២០២៣នេះ កម្ពុជាបានសម្រេចការនាំចេញអង្ករបានជិត ៥២% នៃផែនការ ៧០ម៉ឺនតោន គឺសម្រេចបានចំនួនជាង ៣៦ម៉ឺនតោន ដែលគិតជាទឹកប្រាក់មានចំនួនសរុបជាង ២៥៣លានដុល្លារសហរដ្ឋអាម៉េរិក។របាយការណ៍ សហព័ន្ធស្រូវអង្ករកម្ពុជា បានបញ្ជាក់ថា ក្រុមហ៊ុននាំចេញចំនួន ៥២ក្រុមហ៊ុន បាននាំចេញអង្ករទៅកាន់គោលដៅចំនួន៥២ ដែលក្នុងនោះ ប្រទេសចិន និងតំបន់ស្វយ័តបានចំនួនជាង ១៤ម៉ឺនតោន ដែលគិតជាទឹកប្រាក់បានចំនួន ៩០លានដុល្លារ។ចំណែកការនាំចេញអង្ករទៅទៅកាន់ប្រទេសនៅក្នុងទ្វីបអឺរ៉ុបចំនួន ២៥ប្រទេស បានចំនួនជាង ១៤ម៉ឺនតោន គិតជាទឹកប្រាក់ចំនួន ១០០ លានដុល្លារ, ទៅកាន់ ៤ប្រទេសសមាជិអាស៊ាន ចំនួនជាង ៣ម៉ឺនតោន គិតជាទឹកប្រាក់ចំនួន ២០លានដុល្លារ, ទៅកាន់ ២២ប្រទេសផ្សេងៗទៀត បានចំនួនជិត ៥ម៉ឺនតោន ដែលគិតជាទឹកប្រាក់បានចំនួន ៤២លានដុល្លារ។សហព័ន្ធស្រូវអង្ករកម្ពុជា បានឲ្យដឹងថា ចំពោះប្រភេទអង្ករក្រអូបគ្រប់ប្រភេទចំនួន ៨២.២៩% អង្ករសចំនួន ១២.៦៣% អង្ករចំហ៊ុយ ៣.៣៦ % អង្ករសរីរាង្គចំនួន ១.៧១% និង អង្ករសគ្រាប់ខ្លីចំនួន ០.០២%។ ប្រភពដដែលនេះ ឲ្យដឹងទៀតថា កម្ពុជាក៏បាននាំចេញស្រូវចំនួនជាង ២,៥លានតោន ដែលគិតជាទឹកប្រាក់បានចំនួនជាង ៦៦៣ លានដុល្លារសហរដ្ឋអាមេរិក ដែលក្នុងនោះ ៦០% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច៕អត្ថបទ៖ ឈិត បូរ៉ាវី

ពិព័រណ៍ពាណិជ្ជកម្ម និងទេសចរណ៍ឥណ្ឌូនេស៊ីលើកទី១៤ ប្រកាសបើកផ្លូវការថ្ងៃនេះ

ភ្នំពេញ៖ ស្ថានទូតនៃសាធារណរដ្ឋឥណ្ឌូនេស៊ីប្រចាំនៅកម្ពុជា បានប្រកាសបើកកម្មវិធីផ្សព្វផ្សាយពាណិជ្ជកម្ម និងទេសចរណ៍ឥណ្ឌូណេស៊ី លើកទី១៤ ក្រោមប្រធានបទ «ការពង្រឹងកិច្ចសហប្រតិបត្តិការ តាមរយៈកិច្ចសហប្រតិបត្តិការ» ចាប់ពីថ្ងៃទី៤ ដល់ទី៦ ខែសីហា ឆ្នាំ២០២៣ នៅអគារមជ្ឈមណ្ឌលពិព័រណ៍កោះពេជ្រ ដើម្បីជំរុញពាណិជ្ជកម្ម និងទេសចរណ៍រវាងកម្ពុជា និងឥណ្ឌូនេស៊ី។ពិធីបើកផ្លូវការនេះបានប្រព្រឹត្តទៅក្រោមអធិបតីភាព ឯកឧត្តម ឈួន ដារ៉ា រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងពាណិជ្ជកម្ម, ឯកឧត្តម ថោង រដ្ឋស័ក្តិ រដ្ឋលេខាធិការក្រសួងទេសចរណ៍, លោកជំទាវ Lauti Nia Astri ភារធារីស្តីទី អមស្ថានទូតសាធារណរដ្ឋឥណ្ឌូនេស៊ីប្រចាំនៅកម្ពុជា, ឯកអគ្គរាជទូត ឯកអគ្គរដ្ឋទូត នៃបណ្តាប្រទេសជាមិត្តប្រចាំនៅកម្ពុជា និងភ្ញៀវកិត្តិយសជាច្រើននាក់ផ្សេងទៀត។ឯកឧត្តម ឈួន ដារ៉ា ថ្លែងថា ទំនាក់ទំនងការទូតរវាងប្រទេស កម្ពុជា-ឥណ្ឌូនេស៊ី មានរយៈពេល ៦៤ ឆ្នាំហើយដោយបានបង្កើនចំណងមិត្តភាពទ្វេភាគីកាន់តែរឹងមាំ និងស៊ីជម្រៅពីមួយឆ្នាំ ទៅមួយឆ្នាំ និងបានក្លាយទៅជាមិត្តភាពមិនអាចកាត់ផ្តាច់បាន ក្នុងការរួមគ្នាកសាងវឌ្ឍនភាព វិបុលភាព និងការយល់ចិត្តថ្លើមគ្នា។ ឯកឧត្តមបន្តថា ការរៀបចំពិព័រណ៍ពាណិជ្ជកម្ម និងទេសចរណ៍ឥណ្ឌូនេស៊ី លើកទី១៤នេះ គឺមានសារៈសំខាន់ណាស់ក្នុងការជំរុញ និងលើកកម្ពស់គុណតម្លៃនៃទំនាក់ទំនងកិច្ចសហប្រតិបត្តិការគ្រប់ជ្រុងជ្រោយ រវាងកម្ពុជា-ឥណ្ឌូនេស៊ី ឱ្យក្លាយជាមិត្តភាពដ៏រឹងមាំ និងស៊ីជម្រៅជាងមុនជាលំដាប់។ លោកជំទាវ Lauti Nia Astri ភារធារីស្តីទី អមស្ថានទូតសាធារណរដ្ឋឥណ្ឌូនេស៊ីប្រចាំនៅកម្ពុជា មានប្រសាសន៍ថា ក្រុមហ៊ុនដែលចុះឈ្មោះចូលរួមបង្ហាញផលិតផលក្នុងកម្មវិធីពិព័រណ៍នេះមានចំនួនជិត ៥០ក្រុមហ៊ុន ក្នុងនោះមាន វិស័យម្ហូបអាហារ សម្លៀកបំពាក់ និងសេវាកម្មទេសចរណ៍ជាដើម។ លោកជំទាវ បានបន្តថា ព្រឹត្តិការណ៍នេះ នឹងបង្កើតឱកាសបណ្តាញសម្រាប់ភ្នាក់ងារទេសចរណ៍ក្នុងការកសាងទំនាក់ទំនងអាជីវកម្មរបស់ពួកគេក្នុងការលើកកម្ពស់វិស័យទេសចរណ៍នៃប្រទេសទាំងពីរផងដែរ។យោងតាមរបាយការណ៍របស់ក្រសួងពាណិជ្ជកម្ម គិតមកត្រឹមខែមេសា ដើមឆ្នាំ២០២៣ ទំហំពាណិជ្ជកម្មទ្វេភាគី រវាងកម្ពុជា និងឥណ្ឌូនេស៊ី មានចំនួនជិត ៤០០ លានដុល្លារ កើនឡើង ២៧% បើប្រៀបធៀបរយៈពេលដូចគ្នាក្នុងឆ្នាំ២០២២ ដែលក្នុងនោះឥណ្ឌូនេស៊ីនាំចេញកើនឡើង ៦១% និងកម្ពុជានាំចូលកើនឡើង ២៦%៕អត្ថបទ ឈិត បូរ៉ាវី

រដ្ឋមន្ត្រីក្រសួងពាណិជ្ជកម្ម ស្នើសហអាមេរិកពន្លឿននីតិវិធី លើការបន្តសុពលភាពប្រព័ន្ធអនុគ្រោះពន្ធ GSP

ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ជំរុញឱ្យសហរដ្ឋអាមេរិក បន្តឡើងវិញប្រព័ន្ធអនុគ្រោះ GSP ដើម្បីពង្រឹងកិច្ចសហប្រតិបត្តិការពាណិជ្ជកម្មរវាងប្រទេសទាំងពីរ ដោយផ្ដល់ផលចំណេញឱ្យគ្នាទៅវិញទៅមក។ឯកឧត្តម ប៉ាន សូរស័ក្តិ លើកឡើងបែបនេះ ក្នុងជំនួបជាមួយប្រតិភូ សភាអាមេរិក អមដោយឯកអគ្គរដ្ឋទូតអាមេរិកប្រចាំនៅកម្ពុជា កាលពីរសៀលថ្ងៃទី២ ខែសីហា ឆ្នាំ២០២៣ នៅទីស្តីការក្រសួងពាណិជ្ជកម្ម ដោយមានការចូលរួមពីគណៈប្រតិភូសភាអាមេរិក ដឹកនាំដោយ លោក Jason Smith ប្រធានគណៈកម្មាធិការ ស្តីពីរបៀប និងមធ្យោបាយនៃសភាអាមេរិក និងមានការចូលរួមពីសមាជិក សភា អាមេរិកន និងឯកឧត្តម W. Patrick Murphy អគ្គរដ្ឋទូតអាមេរិកប្រចាំនៅកម្ពុជា និងសហការីមួយចំនួនទៀតផងដែរ។ក្នុងជំនួបខាងលើនេះ ឯកឧត្តម ប៉ាន សូរស័ក្តិ បានអំពាវនាវទៅកាន់ភាគីសហរដ្ឋអាមេរិក ជួយជំរុញឱ្យក្រុមហ៊ុនអាមេរិក មកបណ្ដាក់ ទុនវិនិយោគនៅកម្ពុជាឱ្យបានកាន់តែច្រើនបន្ថែមទៀត ដើម្បីកាត់បន្ថយឱនភាព ពាណិជ្ជកម្មរវាងប្រទេសទាំងពីរ ក៏ដូចជាដើម្បីទាញយកផលចំណេញពីគ្នាទៅវិញទៅមក។ឯកឧត្តម ប៉ាន សូរស័ក្តិ ក៏បានលើកឡើងពីសក្តានុពល និងភាពអំណោយផលរបស់កម្ពុជា នៅក្រោមកិច្ចព្រមព្រៀងពាណិជ្ជកម្មសេរីតំបន់ និងទ្វេភាគី ក៏ដូចជាការរៀបចំបរិយាកាសធុរកិច្ច និងវិនិយោគឱ្យរឹតតែប្រសើរឡើង ដើម្បីទាក់ទាញការវិនិយោគឱ្យបានរឹតតែច្រើនមកកាន់កម្ពុជា។ឯកឧត្តម ប៉ាន សូរស័ក្តិ បានស្នើសុំឱ្យសភាអាមេរិកបន្តឡើងវិញនូវប្រព័ន្ធ GSP សម្រាប់កម្ពុជាផងដែរ ជាពិសេសសម្រាប់ទំនិញមួយចំនួន ដូចជា សំលៀកបំពាក់ ស្បែកជើង និងទំនិញធ្វើដំណើរជាដើម ដោយបញ្ជាក់ថា ការបន្តឡើងវិញនូវប្រព័ន្ធ GSP នេះ នឹងពង្រឹងកិច្ចសហប្រតិបត្តិការ ពាណិជ្ជកម្មរវាងប្រទេសទាំងពីរ ដោយផ្ដល់ផលចំណេញឱ្យគ្នាទៅវិញទៅមក។សូមបញ្ជាក់ថា ប្រព័ន្ធអនុគ្រោះពន្ធ GSP ផ្តល់ដល់កម្ពុជា លើផលិតផលធ្វើដំណើរ និងកាបូប បានអស់សុពលភាព នៅចុងឆ្នាំ២០២០ កន្លងទៅ។ក្នុងអំឡុងពេលនៃការរង់ចាំបន្តសុពលភាពនៃប្រព័ន្ធអនុគ្រោះពន្ធ GSP ការនាំចេញផលិតធ្វើដំណើរ និងកាបូប ទៅទីផ្សារសហរដ្ឋអាមេរិក ត្រូវបង់ពន្ធ ៕ អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

បម្រែបម្រួលអាកាសធាតុធ្វើឲ្យប៉ះពាល់ដល់កសិករចិញ្ចឹមឃ្មុំនៅកូរ៉េខាងត្បូង

EU និង UNICEF បញ្ជូនគ្រឿងផ្គត់ផ្គង់សង្រ្គោះជំងឺអេបូឡាទៅកាន់កុងហ្គោ ខណៈផ្ទុះការរីករាលដាលឆ្លង

មន្ត្រីជាន់ខ្ពស់ការបរទេស៖កម្ពុជាបានជ្រើសរើសអ្នកផ្សះផ្សាពីររូបរួចហើយ ខណៈភាគីថៃមានពេល២១ថ្ងៃ ដើម្បីជ្រើសរើសអ្នកផ្សះផ្សាពីររូបដែរ

កម្ពុជាធ្វើជាម្ចាស់ផ្ទះសិក្ខាសាលាស្តីពី ការបង្កើតកិច្ចសហប្រតិបត្តិការស្ថាប័នប្រវត្តិសាស្ត្រយោធាអាស៊ាន(AMHIC)”

មានអ្នកស្លាប់ច្រើននាក់ ក្នុងហេតុការណ៍ធ្លាក់យន្តហោះនៅតំបន់ Istria របស់ក្រូអាត

ឆ្មាំបដិវត្តន៍អ៊ីរ៉ង់អំពាវនាវឲ្យអ៊ីស្រាអែលដកទ័ពទៅកាន់ទីតាំងមុនសង្គ្រាម នៅលីបង់

ប្រទេស ១១ នៅអឺរ៉ុប អំពាវនាវឲ្យ EU មានច្បាប់ទិដ្ឋាការកាន់តែតឹងរ៉ឹង សម្រាប់ជនជាតិរុស្ស៊ី

អ៊ីស្រាអែលឃុំខ្លួនក្រុមបាតុករជ្វីហ្វជ្រុលនិយម បន្ទាប់ពីបានវាយប្រហារលំនៅឋានរបស់ចៅក្រម

បទឈប់បាញ់នៅលីបង់ បង្កើនក្តីសង្ឃឹមពីការមានវឌ្ឍនភាព សម្រាប់កិច្ចព្រមព្រៀងអ៊ីរ៉ង់

អាកាសធាតុអាក្រក់បែងចែកអ៊ីតាលីដោយព្យុះកួចកើតមាននៅទីក្រុងរ៉ូមហើយអាកាសធាតុក្តៅវាយប្រហារកោះ Sicily

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877