BTV NEWS

រយៈពេល៣ខែឆ្នាំ២០២៦នេះ ទីផ្សារអាមេរិកស្រូបយកទំនិញកម្ពុជា មានទឹកប្រាក់ជាង ៣,៣ ពាន់លានដុល្លារ

ទំហំពាណិជ្ជកម្មអន្តរជាតិកម្ពុជាសម្រេចបានប្រមាណ ១៧ពាន់លានដុល្លារក្នុងត្រីមាសទី១

ADBព្យាករថា សេដ្ឋកិច្ចកម្ពុជានឹងកើនឡើង៤,៥% ក្នុងឆ្នាំ២០២៦ នាំមុខដោយវិស័យកម្មន្តសាល

រាជរដ្ឋាភិបាលប្រឹងប្រែងជំរុញឱ្យសហគ្រាសបង្កើនធាតុចូលក្នុងស្រុក ដើម្បីប្រកួតប្រជែងលើទីផ្សារពិភពលោក

សេដ្ឋកិច្ច និង កសិកម្ម

ធនាគារជាតិ បកស្រាយការទូទាត់រវាងប្រាក់រៀល និងប្រាក់យ័នចិន តាមការស្កេន KHQR

ភ្នំពេញ៖ មន្រ្តីជាន់ខ្ពស់ធនាគារជាតិនៃកម្ពុជា បកស្រាយការទូទាត់ប្រាក់ឆ្លងដែន រវាងប្រាក់រៀលខ្មែរ និងប្រាក់យ័នចិន បន្ទាប់ពីមានការស្រាយខុសបច្ចេកទេស ដែលធ្វើឲ្យប្រជាជនមួយចំនួនមានការព្រួយបារម្ភ ។ ការទូទាត់តាមបែបឌីជីថលនេះ គឺអនុញ្ញាតឱ្យប្រជាជនចិន ធ្វើការទូទាត់តាមរយៈស្កេន QR Code ប៉ុណ្ណោះ ដោយមិនឱ្យអនុញ្ញាតឱ្យមានការចរចាលុយយ័នចិននៅកម្ពុជា។លោកជំទាវបណ្ឌិត ជា សិរី ទេសាភិបាលរងធនាគារជាតិនៃកម្ពុជា និងមន្ត្រីជំនាញនៅថ្ងៃទី១៦ ខែកក្កដាឆ្នាំ២០២៣នេះ បានលើកឡើងក្នុងជំនួបជាមួយសារព័ត៌មានថា កន្លងមកធនាគារជាតិនៃកម្ពុជា ឃើញសារព័ត៌មានមួយចំនួនតូច បានបកស្រាយខុសបច្ចេកទេសនៃគោលបំណងស្នូល បន្ទាប់ពីធនាគារជាតិនៃកម្ពុជា បានចុះអនុស្សរណៈយោគយល់គ្នា ជាមួយក្រុមហ៊ុន UnionPay របស់ប្រទេសចិន ក្នុងនោះបានធ្វើប្រជាជនមួយចំនួនមានការព្រួយបារម្ភ ខ្លាចលុយចិនមកចរាចរវាយលុកប្រទេសកម្ពុជា។ លោកជំទាវបណ្ឌិត បន្តថា ពាក់ព័ន្ធនិងគោលបំណងនៃអនុស្សរណ:យោគយល់គ្នា រវាងធនាគារជាតិនៃកម្ពុជា និងក្រុមហ៊ុន UnionPay International ស្ដីពី “កិច្ចសហប្រតិបត្តិការទូទាត់សងប្រាក់ឆ្លងដែន តាមឃូអរកូត" នាពេលថ្មីៗកន្លងមកនេះ ធនាគារជាតិ នៃកម្ពុជា មិនមែនឱ្យទេសចរចិនយកធនប័ត្រចិន ឬហៅសាមញ្ញក្រដាសលុយយ័នចិន មកចាយនៅកម្ពុជានោះឡើយ។ ជាក់ស្តែងកន្លងមក ធនាគារជាតិនៃកម្ពុជា តែងតែជំរុញការប្រើប្រាស់ប្រាក់រៀលឱ្យកាន់តែទូលំទូលាយ ក៏ដូចជាជំរុញការប្រើប្រាស់ការទូទាត់តាមប្រព័ន្ធ អេឡិចត្រូនិក ដោយធនាគារជាតិនៃកម្ពុជា មិនធ្វើអ្វីឱ្យខុសពីគោលការណ៍ខាងលើឡើយ។លោកជំទាវបណ្ឌិត ជា សិរី បញ្ជាក់ថា នៅក្រោមអនុស្សារណៈនេះ ធនាគារជាតិនៃកម្ពុជា មានគោលបំណងជំរុញឱ្យ ទេសចរចិន ដែលមកលេងស្រុកខ្មែរ អាចទូទាត់តាមទូរស័ព្ទ mobile app ដោយប្រើប្រាស់សេវាទូទាត់របស់ UnionPay ស្កេនលើ KHQR អ្នកលក់នៅស្រុកខ្មែរ។ ដូច្នេះធនាគារស្រុកចិន ត្រូវធ្វើការប្តូរប្រាក់ពីលុយយ៉ន់មកលុយរៀលសិន ទើបផ្ញើមកគណនីអ្នកលក់នៅស្រុក ខ្មែរ។ ប្រតិបត្តិការនេះធ្វើទៅបាន លុះត្រាតែអ្នកលក់ស្រុកខ្មែរ ទទួលការទូទាត់ជាប្រាក់រៀលទើបធ្វើបាន។ ចំពោះទេសចរខ្មែរទៅស្រុកចិនវិញ ពួកគេអាចចាយដូចទេសចរចិនមកចាយនៅកម្ពុជាបាន ដោយប្រើ app Bakong ស្កេនលើ QR អ្នក លក់នៅស្រុកចិន។ ការណ៍នេះក៏នឹងជំរុញប្រជាពលរដ្ឋខ្មែរ ដែលមិនមានប្រាក់ សន្សំជាប្រាក់រៀល ឱ្យទៅបើកប្រាក់សន្សំជាប្រាក់រៀល ដើម្បីទទួលផលប្រយោជន៍នៃអនុស្សរណៈនេះ ហើយវិធានធ្វើឡើង ក៏ដើម្បីលើក កម្ពស់ប្រាក់រៀល និងលើកកិត្យានុភាពប្រាក់រៀល និងមុខមាត់ប្រទេសកម្ពុជា ក្នុងវិស័យទូទាត់អេឡិចត្រូនិកលើឆាកអន្តរជាតិ៕អត្ថបទ៖ សុន រ៉ាឌី

អាជីករផ្សារ និងអ្នករកប្រាក់ចំណូលផ្ទាល់ខ្លួន ត្រៀមទៅស្នើសុំធ្វើបណ្ណ ប.ស.ស

នៅខាងមុខឆាប់ៗនេះ ប្រជាពលរដ្ឋរកប្រាក់ចំណូលផ្ទាល់ខ្លួន ដូចជា អាជីករ និងអ្នករត់ម៉ូតូឌុបជាដើម នឹងនាំគ្នាទៅស្នើសុំធ្វើប័ណ្ណ ប.ស.ស. ក្រោយទទួលដំណឹងថា ពួកគាត់អាចធ្វើប័ណ្ណនេះបាន តាមរយៈរបបភាគទានដោយស្ម័គ្រចិត្ត។ក្រុមអាជីករផ្សារឈូកមាស ស្ថិតនៅខណ្ឌសែនសុខ រាជធានីភ្នំពេញ បានឲ្យទូរទស្សន៍ព័ត៌មាន ប៊ីធីវី ដឹងនៅព្រឹកថ្ងៃទី១៥ កក្កដា ឆ្នាំ២០២៣នេះថា ពួកគាត់សប្បាយរីករាយណាស់ នៅពេលដែលរដ្ឋាភិបាលប្រកាសអនុញ្ញាតឲ្យពួកគាត់ ដែលអ្នករកចំណូលផ្ទាល់ខ្លួន អាចធ្វើប័ណ្ណ ប.ស.ស បានដូចអ្នកធ្វើការដែរ។ ពួកគាត់ បានឲ្យដឹងស្រដៀងគ្នាទៀតថា យ៉ាងយូរបំផុតក្រោយចប់ការបោះឆ្នោត នឹងទៅស្នើសុំធ្វើបណ្ណ ប.ស.ស ដើម្បីទទួលបានរបបថែទាំសុខភាព។ពលរដ្ឋប្រកបរបរក្នុងវិស័យសាឡន និងរត់ម៉ូតូឌុប បាននិយាយថា ដំណឹងនេះពិតជាល្អណាស់ សម្រាប់ពួកគាត់ដែលរកប្រាក់ចំណូលដោយខ្លួនឯង ជាពិសេសក្នុងពេលនេះកំពុងជួបវិបត្តិសេដ្ឋកិច្ចក្នុងគ្រួសារដែរ ដោយសាររកប្រាក់ចំណូលមិនបានច្រើនដូចមុន ហើយពេលខ្លះក៏ជួបនូវបញ្ហាសុខភាពខ្លះទៀត ដែលបង្ខំចិត្តត្រូវចំណាយក្នុងការថែទាំសុខភាព។ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីកន្លងទៅនេះ បានបញ្ជាក់ថា ដើម្បីទទួលបណ្ណសមាជិក ប.ស.ស. ប្រជាពលរដ្ឋ អាជីវករ អ្នករត់ម៉ូតូឌុប រត់កង់បី និងបងប្អូនអ្នករកចំណូលផ្ទាល់ខ្លួនគ្រប់ប្រភេទ ត្រូវអនុវត្តតាមលក្ខខណ្ឌដូចជា៖ ត្រូវមានមុខរបរមានប្រាក់ចំណូលផ្ទាល់ខ្លួន មិនពាក់ព័ន្ធ និងប្រាក់ឈ្នួល, ធ្វើការងារ ឬប្រកបរបរអាជីវកម្មផ្ទាល់ខ្លួន ដោយមិនប្រើប្រាស់បុគ្គលិក និងត្រូវមានអាយុមិនលើសពី៦០ឆ្នាំ គិតត្រឹមកាលបរិច្ឆេទស្នើចុះបញ្ជីនៅបេឡាជាតិសន្តិសុខសង្គម (ប.ស.ស.)។ បន្ថែមពីនេះទៀត សាមីខ្លួនត្រូវអញ្ជើញមកស្នើសុំធ្វើបណ្ណ ប.ស.ស. ដោយផ្ទាល់ និងភ្ជាប់ជាមួយនូវអត្តសញ្ញាណបណ្ណសញ្ជាតិខ្មែរច្បាប់ដើម (មានសុពលភាព)។ សូមបញ្ជាក់ទៀតថា ការស្នើសុំធ្វើបណ្ណ ប.ស.ស. តាមរយៈរបបភាគទានដោយស្ម័គ្រចិត្តនេះ ប្រជាពលរដ្ឋ តម្រូវបង់ប្រាក់ចំនួន ១៥ ៦០០រៀល ក្នុង១ខែ។ សេវាដែលនឹងទទួលបានតាមរយៈបណ្ណ ប.ស.ស.នេះ គឺសេវាព្យាបាល និងថែទាំ រួមទាំងប្រាក់បំណាច់មាតុភាព៕ អត្ថបទ៖ ឈិត បូរ៉ាវី

កម្ពុជានាំចេញកង់មានតម្លៃជាង៣៣០លានដុល្លារ ក្នុងឆមាសទី១ឆ្នាំ២០២៣

ភ្នំពេញ៖ កម្ពុជាបាននាំចេញកង់ដែលមានតម្លៃ ៣៣១ លានដុល្លារទៅទីផ្សារបរទេស ក្នុងឆមាសទី១ ឆ្នាំ២០២៣ ធ្លាក់ចុះ៣០,៥ភាគរយ ធៀបនឹងរយៈពេលដូចគ្នាឆ្នាំមុន។របាយការណ៍របស់ក្រសួងពាណិជ្ជកម្ម បង្ហាញថា កម្ពុជា បាននាំចេញកង់ទៅសហភាពអឺរ៉ុប សហរដ្ឋអាមេរិក អង់គ្លេស កាណាដា ជប៉ុន និងចិន ក្នុងចំណោមប្រទេសដទៃទៀត។ កម្ពុជាជាប្រទេសនាំចេញកង់ កំពូលមួយក្នុងចំណោមប្រទេសទាំងប្រាំក្នុងពិភពលោក បន្ទាប់ពីប្រទេសចិន ហូឡង់ និងអាល្លឺម៉ង់។ កង់បានក្លាយជាផលិតផលផលិតដ៏សំខាន់មួយរបស់កម្ពុជាបន្ទាប់ពីផលិតផលសំលៀកបំពាក់ ស្បែកជើង ទំនិញធ្វើដំណើរ គ្រឿងអេឡិចត្រូនិក និងផលិតផលកសិកម្ម។ឯកឧត្តម ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ធ្លាប់បានលើកឡើងថា ការធ្វើពិពិធកម្មផលិតផលឧស្សាហកម្មកំពុងត្រូវបានធ្វើឡើងគួរឱ្យកត់សម្គាល់ ខណៈដែលតម្រូវការ និងការបញ្ជាទិញផលិតផលមិនមែនកាត់ដេរមានការកើនឡើង។ឯកឧត្តម បានមានប្រសាសន៍ថា ផលិតកង់ ត្រូវបាននាំចេញយ៉ាងច្រើនទៅកាន់ទីផ្សារអន្តរជាតិ ជាពិសេសទៅសហភាពអឺរ៉ុប ដែលកង់ផលិតនៅកម្ពុជា កំពុងពេញនិយម”។ បច្ចុប្បន្នមានរោងចក្រកង់ ស្ថិតនៅក្នុងតំបន់សេដ្ឋកិច្ចពិសេសក្នុងក្រុងបាវិត ខេត្តស្វាយរៀ។ សូមបញ្ជាក់ថា ទីផ្សារសំខាន់ៗសម្រាប់កង់ផលិតនៅកម្ពុជា មានដូចជា អាល្លឺម៉ង់ អង់គ្លេស ជប៉ុន ចិន បណ្តាប្រទេសអាស៊ាន និង កូរ៉េខាងត្បូង ជាដើម ៕ អត្ថបទ៖ វណ្ណៈ

ក្រសួងពាណិជ្ជកម្ម បញ្រ្ជាបការយល់ដឹង ច្បាប់ស្តីពីការប្រកួតប្រជែង ដល់ក្នុងវិស័យធនាគារ និងហិរញ្ញវត្ថុ

ភ្នំពេញ៖ កម្ពុជាបញ្រ្ជាបការយល់ដឹងដល់ភាគីពាក់ព័ន្ធ ជាពិសេសដល់ធុរជន ក្នុងវិស័យធនាគារ និងហិរញ្ញវត្ថុ អំពីច្បាប់ស្តីពីការប្រកួតប្រជែង និងបទប្បញ្ញត្តិពាក់ព័ន្ធ ជាពិសេសអនុក្រឹត្យស្ដីពីលក្ខខណ្ឌ និងនីតិវិធីអំពីការរួមបញ្ចូលគ្នានៃធុរកិច្ច ក៏ដូចជួយជំរុញឱ្យធុរជន ដែលធ្វើធុរកិច្ច ប្រកួតប្រជែងគ្នាប្រកបដោយសមធម៌ ស្មោះត្រង់ និងការពារផលប្រយោជន៍របស់អ្នកប្រើប្រាស់ជាដើម។សិក្ខាសាលាផ្សព្វផ្សាយស្តីពី «ការអនុវត្តច្បាប់ស្តីពីការប្រកួតប្រជែង និងអនុក្រឹត្យស្តីពីលក្ខខណ្ឌនិងនីតិវិធីអំពីការរួមបញ្ចូលគ្នានៃធុរកិច្ច» ត្រូវបានរៀបចំឡើងននៅថ្ងៃទី១៣ ខែកក្កដា ដោយសហការរៀបចំដោយអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ នៃក្រសួងពាណិជ្ជកម្ម និង ធនាគារជាតិនៃកម្ពុជា និងសមាជិក ធុរជន ក្នុងវិស័យធនាគារ និងហិរញ្ញវត្ថុ។សិក្ខាសាលានេះ បានដើរតួជាវេទិកាមួយក្នុងការផ្សព្វផ្សាយ បញ្រ្ជាបការយល់ដឹងដល់ភាគីពាក់ព័ន្ធ ជាពិសេសដល់ធុរជនក្នុងវិស័យធនាគារ និងហិរញ្ញវត្ថុ ឱ្យបានទូលំទូលាយ អំពីច្បាប់ស្តីពីការប្រកួតប្រជែង និងបទប្បញ្ញត្តិពាក់ព័ន្ធ ជាពិសេសអនុក្រឹត្យស្ដីពីលក្ខខណ្ឌ និងនីតិវិធីអំពីការរួមបញ្ចូលគ្នានៃធុរកិច្ច ដែលរាជរដ្ឋាភិបាលទើបអនុម័តនាពេលថ្មីៗនេះ នឹងចាប់អនុវត្តពីថ្ងៃទី ៦ ខែកញ្ញា ឆ្នាំ២០២៣ ខាងមុខ ដោយក្នុងអនុក្រឹត្យនេះ បានកំណត់នូវកាតព្វកិច្ចសំខាន់ៗចំនួន ០៣ ដែលធុរជនក្នុងវិស័យធនាគារ និងហិរញ្ញវត្ថុ ត្រូវតែដឹងអំពីកាតព្វកិច្ចទាំងនេះរួមមាន៖ ការជូនដំណឹងជាមុនអំពីការរួមបញ្ចូលគ្នានៃធុរកិច្ច, ការជូនដំណឹងជាក្រោយអំពីការរួមបញ្ចូលគ្នានៃធុរកិច្ច និងការចុះបញ្ជីការរួមបញ្ចូលគ្នានៃធុរកិច្ច។ ក្រៅពីគោលការណ៍ខាងលើ សិក្ខាសាលាផ្សព្វផ្សាយនេះ ក៏ជួយជំរុញឱ្យធុរជន ដែលធ្វើធុរកិច្ចក្នុងវិស័យនេះ ប្រកួតប្រជែងគ្នាប្រកបដោយសមធម៌ ព្រមទាំងការធ្វើធុរកិច្ចដោយស្មោះត្រង់ និងសុចរិត ការពារផលប្រយោជន៍របស់អ្នកប្រើប្រាស់ និងលើកកម្ពស់ការអនុវត្តច្បាប់ស្ដីពីការប្រកួតប្រជែង អនុក្រឹត្យស្ដីពីលក្ខខណ្ឌ និងនីតិវិធីអំពីការរួមបញ្ចូលគ្នា នៃធុរកិច្ចប្រកបដោយប្រសិទ្ធភាព ក្នុងវិស័យធនាគារ និងហិរញ្ញវត្ថុ ព្រមទាំងជួយឱ្យធុរជនក្នុងវិស័យនេះ មានមូលដ្ឋានគតិយុត្តក្នុងការស្នើសុំរួមបញ្ចូលគ្នា នៃធុរកិច្ចរបស់ខ្លួនតាមនីតិវិធីជាធរមាន៕ អត្ថបទ៖ សុន រ៉ាឌី

កម្ពុជា រំពឹងទាក់ទាញក្រុមហ៊ុនបច្ចេកវិទ្យាធំៗ បង្កើតរោងចក្រលើផ្នែកបច្ចេកវិទ្យា

ភ្នំពេញ៖ ក្រុមហ៊ុនលំដាប់អន្តរជាតិធំៗ កំពុងសិក្សាលទ្ធភាព នៃការវិនិយោគបង្កើតរោងចក្រលើផ្នែកបច្ចេកវិទ្យា ជាពិសេសការបង្កើតរោងចក្រផលិតបន្ទះឈីប (CHIP) ដែលវិស័យនេះកំពុងដើរតួយ៉ាងសំខាន់ សម្រាប់បម្រើសេចក្តីត្រូវការលើពិភពលោក ក៏ដូចកម្ពុជា សម្រាប់កិច្ចដំណើរការអភិវឌ្ឍ និងការឈានឡើងនៃសេដ្ឋកិច្ច។ឯកឧត្តមបណ្ឌិត ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា កន្លងងមកនេះ កម្ពុជាទទួលមានរោងចក្រខ្លះៗហើយដូចជា ក្រុមហ៊ុន Mini-bea ជាដើម បច្ចុប្បន្នបានកំពុងដំណើរការផលិតនូវបន្ទះ (CHIP) និងបាននាំចេញទៅកាន់បណ្តាប្រទេសដែលផលិតទូរស័ព្ទម៉ាក iphone មួយចំនួន។ក្រៅពីនេះក៏មានក្រុមហ៊ុនជាច្រើនបានចាប់អារម្មណ៍លើការវិនិយោគនៅកម្ពុជា។ជាក់ស្តែងថ្មីនេះ ក្រុមហ៊ុនលំដាប់អន្តរជាតិមកពីប្រទេសកូរ៉េ និងប្រទេសចិនជាដើម បានកំពុងសិក្សាលទ្ធភាព នៃការវិនិយោគបង្កើតរោងចក្រលើផ្នែកបច្ចេកវិទ្យានេះ ជាពិសេសការបង្កើតរោងចក្រផលិតបន្ទះឈីប (CHIP) នៅកម្ពុជា។ឯកឧត្តមបណ្ឌិត ហេង សុខគង់ ថ្លែងបន្ថែមថា ជុំវិញការអភិវឌ្ឍ កម្ពុជាបានកំពុងដើរលើផ្លូវត្រូវ ក្រោមការដឹកនាំដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តី ដោយបានដាក់នូវផែនការសកម្មភាពបង្ហាញផ្លូវច្បាស់លាស់ ដើម្បីកំណត់ទស្សនៈវិស័យ ក្នុងការជំរុញអភិវឌ្ឍន៍វិស័យបច្ចេកវិទ្យា ក្នុងនោះកម្ពុជាក៏មានគោលនយោបាយសម្រាប់អភិវឌ្ឍន៍វិស័យបច្ចេកវិទ្យាកម្ពុជា ឆ្នាំ២០២០-២០៣០ និងមានផែនទីបង្ហាញផ្លូវសម្រាប់វិស័យវិទ្យាសាស្រ្ត បច្ចេកវិទ្យា និងនវានុវត្តន៍ និងមានគោលនយោបាយជាច្រើនទៀត សម្រាប់ជាតម្រាយផ្លូវនៃការអភិវឌ្ឍន៍។បើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា នៅក្នុងឆមាសទី ១ ឆ្នាំ ២០២៣ នេះកម្ពុជាបាននាំចេញមានទំហំទឹកប្រាក់សរុបប្រមាណជាង ១ ៥៨៦ លានដុល្លារអាមេរិក កើនឡើងប្រមាណជាង ១០៨ ភាគរយ បើធៀបរយៈពេលដូចគ្នានិងឆ្នាំ ២០២២៕ អត្ថបទ៖ សុន រ៉ាឌី

អគ្គនាយកដ្ឋានពន្ធដារ ប្រមូលចំណូលបានចំនួនជាង២ ០០០ លានដុល្លារ នៅក្នុងឆមាសទី១នេះ

ភ្នំពេញ៖ អគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទ ក្នុងរយៈពេល ៦ខែឆ្នាំ ២០២៣ សម្រេចបានជាង ៨ ៣៩៣ ប៊ីលានរៀល ត្រូវប្រមាណជាង ២ ០៧២ លានដុល្លារ ស្មើនឹង ៥៨ ភាគរយ នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ លើកឡើងក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែ មិថុនា និងប្រចាំឆមាសទី១ ឆ្នាំ២០២៣ នៅថ្ងៃទី ១៣ ខែ កក្កដា ឆ្នាំ ២០២៣ នេះថា ចំពោះលទ្ធផលនៃការគ្រប់គ្រងប្រមូលចំណូលពន្ធនេះ ក្នុងខែ មិថុនា ឆ្នាំ២០២៣ ចំណូលពន្ធ-អាករគ្រប់ប្រភេទ ដែលអគ្គនាយកដ្ឋានពន្ធដារប្រមូលបានជាក់ស្តែងតាមប្រព័ន្ធគ្រប់គ្រង ទិន្នន័យចំណូលអនឡាញ បានចំនួនជាង ៩៩៥ ប៊ីលានរៀល ត្រូវប្រមាណជាង ២៤៥ លានដុល្លារ ស្មើនឹង ៦,៨៨% ក្នុងនោះបើសរុបរយៈពេល ៦ខែ អគ្គនាយកដ្ឋានពន្ធដារប្រមូលបានជាង ៨ ៣៩៣ ប៊ីលានរៀល ត្រូវប្រមាណជាង ២ ០៧២ លានដុល្លារ ស្មើនឹង ៥៨,០២% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ចំពោះការបន្តពង្រឹងគ្រប់គ្រងប្រមូលចំណូលពន្ធ ពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (E-Commerce) ក្នុងខែមិថុនា ឆ្នាំ២០២៣ នេះ អគ្គនាយកដ្ឋានពន្ធដារ ប្រមូលបានចំនួន ២៧,៥៥ ប៊ីលានរៀល ត្រូវប្រមាណជិត ៧លានដុល្លារ ហើយបើគិតរយៈពេល ៦ខែ ឆ្នាំ២០២៣ ទទួលបានជាង ១៥៩ប៊ីលានរៀល ត្រូវប្រមាណជាង ៣៩លានដុល្លារ។ឯកឧត្តម គង់ វិបុល បានបញ្ជាក់ឲ្យដឹងថា តាមរយៈស្ថានភាពនៃចំណូលពន្ធសម្រាប់រយៈពេល ៦ ខែ ឆ្នាំ២០២៣ អគ្គនាយកដ្ឋានពន្ធដារ រំពឹងថា ការអនុវត្តការងារគ្រប់គ្រងប្រមូលចំណូលពន្ធសម្រាប់ឆ្នាំ ២០២៣ នឹងអាចសម្រេចបានគ្រប់តាមផែនការច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ ២០២៣ ក្នុងចំនួនប្រមាណជាង ១៤ ៤៦៥ ប៊ីលានរៀល ត្រូវជាង ៣ ៥៧១ លានដុល្លារអាមេរិក៕អត្ថបទ៖ សុន រ៉ាឌី

កម្មកររោងចក្រគាំទ្រគណបក្សនយោបាយនាំសន្តិភាព ការអភិវឌ្ឍ និងបង្កើតការងារធ្វើដល់ប្រជាពលរដ្ឋ

ភ្នំពេញ៖ កម្មករ កម្មការិនី រោងចក្រ សហគ្រាសបានបង្ហាញការគាំទ្រ និងចង់ឲ្យគណបក្សប្រជាជនកម្ពុជាឈ្នះឆ្នោតបន្តទៀត ដើម្បីដឹកនាំប្រទេសឲ្យកាន់តែរីកចម្រើន ជាពិសេសជឿជាក់ថា គណបក្សមួយនេះ មិនសន្យាទទេៗនោះទេ តែសកម្មភាពជាក់ស្តែងដើម្បីសុខុមាលភាពកម្មករ។នៅក្នុងកិច្ចសម្ភាសន៍ នៅព្រឹកថ្ងៃទី១៣ ខែកក្កដានេះ ក្រុមកម្មកររោងចក្រកាត់ដេរសំលៀកបំពាក់ សេឌូណូ អ៊ិនវេសមេន ខេមបូឌា ហ្វេសិន ស្ថិតនៅខណ្ឌដង្កោ រាជធានីភ្នំពេញ បានលើកឡើងថា ពួកគាត់មើលឃើញ ការយកចិត្តទុកដាក់របស់ប្រមុខរាជរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា ដូចជាហេដ្ឋារចនាសម្ព័ន្ធផ្លូវថ្នល់ មន្ទីរពេទ្យ សាលារៀន ស្ពានអាកាស និងផ្លូវល្បឿនលឿន ជាពិសេសកម្មវិធីគាំពារសង្គម សម្រាប់កម្មករកម្មការនី ជាដើម។កម្មករ កម្មការិនី បានលើកឡើងថា ពួកគាត់ ពិតជាមានការពេញចិត្ត និងកក់ក្តៅណាស់ ទាំងការបំពេញការងារ និងការរស់នៅ នៅក្នុងប្រទេសមានសុខសន្តិភាពពេញលេញ និងសម្បូរសប្បាយ ទោះបីជាកម្ពុជាជួបវិបត្តិសាកលធ្ងន់ធ្ងរដោយសារកូវីដ១៩ យ៉ាងណាក្តី ក៏ប្រមុខរាជរដ្ឋាភិបាល តែងតែគិតគូរសុខទុក្ខ តាមរយៈកម្មវិធីចាក់វ៉ាក់សាំង កម្មវិធីជំនួញសង្គម និងកម្មវិធីឧបត្ថម្ភសាច់ប្រាក់ជូនគ្រួសារងាយរងគ្រោះ។លោក សំ សឿន ប្រធានក្រុមប្រឹក្សាជាតិសហជីព ដែលតំណាងឲ្យកម្មករនិយោជិតទូទាំងកម្ពុជា បានទទួលស្គាល់ថា ការដឹកនាំរបស់រាជរដ្ឋាភិបាលកម្ពុជា និងដោយគណបក្សប្រជាជនកម្ពុជា កម្មករនិយោជិតទាំងអស់ ពិតជាទទួលបាននូវការយកចិត្តទុកដាក់ និងអត្ថប្រយោជន៍ផ្សេងៗទៀត ជាពិសេសការទទួលបាននូវរបបសន្តិសុខសង្គមនានា ដែលដាក់ចេញដោយសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាបច្ចុប្បន្ន៕ អត្ថបទ ឈិត បូរ៉ាវី

រាជរដ្ឋាភិបាលឧបត្ថម្ភធុនលើវិស័យអគ្គិសនីចំនួន ១៥០លានដុល្លារ ដើម្បីគាំទ្រស្ថិរភាពសេដ្ឋកិច្ច-សង្គម

ភ្នំពេញ៖ រាជរដ្ឋាភិបាលកម្ពុជាក្នុងឆ្នាំ ២០២៣ នេះ បានឧបត្ថម្ភធុនជំនួសលើវិស័យអគ្គិសនី ចំនួន ១៥០ លានដុល្លារអាមេរិក ស្របពេលថ្លៃ ដើមផលិតបានហក់ឡើងខ្ពស់ ដើម្បីគាំទ្រដល់ការស្តារសេដ្ឋកិច្ចឡើងវិញ សម្រាប់ស្ថិរភាពសេដ្ឋកិច្ច-សង្គម និងជីវភាពរស់នៅរបស់ប្រជាជន។ឯកឧត្តម កែវ រតនៈ រដ្ឋមន្រ្តីប្រតិភូអមនាយករដ្ឋមន្រ្តី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយកអគ្គិសនីកម្ពុជា លើកឡើងថា គោលនយោបាយរបស់សម្តេចតេជោ ហ៊ុន សែន នាយករដ្ឋមន្រ្តី គឺមិនឲ្យថ្លៃភ្លើងឡើងចំពោះប្រជាជន អ្នកធ្វើ សេវាកម្ម រោងចក្រ សហគ្រាស រួមទាំងវិស័យកសិកម្មផងដែរ។ ដូច្នេះថ្លៃអគ្គិសនីរបស់កម្ពុជា នៅតែមានតម្លៃទាប ។ គិតក្នុងបំណាច់ឆ្នាំ ២០២៣ នេះ អគ្គិសនីកម្ពុជា នឹងខាតថវិការ ក្នុងរង្វង់ប្រមាណ ១៥០ លានដុល្លាអាមេរិក នេះជាបន្ទុកឧបត្ថម្ភធុនជំនួសរបស់រាជរដ្ឋាភិបាល។ឯកឧត្តម បន្តថា ពាក់ព័ន្ធការខាងបង់ក្នុងវិស័យអគ្គិសនីនេះ គឺដោយសាររាជរដ្ឋាភិបាលមានគោលការណ៍មិនឡើងថ្លៃអគ្គិសនី ដើម្បីធ្វើយ៉ាងណា គាំទ្រដល់ការស្តារសេដ្ឋកិច្ចឡើងវិញ ដើម្បីស្ថិរភាពសេដ្ឋកិច្ច-សង្គម និងជីវភាពរស់នៅរបស់ប្រជាជន និងស្របពេលថ្លៃ នៃការផលិតបានហក់ឡើងខ្ពស់។ ជាក់ស្តែងគោលនយោបាយជួយចេញខាតជូនប្រជាពលរដ្ឋ និងអ្នកវិនិយោគនេះ គឺបានដោះស្រាយជូន ប្រជាពលរដ្ឋមួយជំហ៊ានធំ ក្នុងនោះសម្រាប់ពេលខាងមុខ រាជរដ្ឋាភិបាលនៅបន្តការខិតខំប្រឹងប្រែង ធ្វើយ៉ាងណាមិនឲ្យអគ្គិសនីឡើងថ្លៃ។ទាក់ទិនវិស័យអគ្គិសនីនេះ, ឯកឧត្តម កែវ រតនៈ បញ្ជាក់ឲ្យដឹងថា គិតមកដល់ពេលនេះ ថ្លៃអគ្គិសនីនៅលើពិភពលោក ក៏ដូចនៅក្នុងតំបន់ អាស៊ានមួយចំនួន បានកំពុងបន្តឡើងថ្លៃ ជាក់ស្តែងនៅប្រទេសវៀតណាមជាដើម បានកំពុងខ្វះថាមពលសម្រាប់ការផ្គត់ផ្គង់ និងកំពុងដំ ឡើងថ្លៃអគ្គិសនីផងដែរ៕ អត្ថបទ៖ សុន រ៉ាឌី

កាណាដាស៊ើបអង្កេតក្រុមហ៊ុន Nike និង Dynasty Gold ជុំវិញការចោទប្រកាន់ការប្រើប្រាស់ពលកម្មដោយបង្ខំ នៅក្នុងប្រទេសចិន

កាណាដា៖ ក្រុមឃ្លាំមើលក្រមសីលធម៌សាជីវកម្មរបស់ប្រទេសកាណាដា កាលពីថ្ងៃអង្គារ បានចាប់ផ្តើមការស៊ើបអង្កេតដាច់ដោយឡែកលើក្រុមហ៊ុន Nike Canada (NKE.N) និង Dynasty Gold (DYG.V) ដើម្បីស៊ើបអង្កេតការចោទប្រកាន់ថា ពួកគេបានប្រើប្រាស់ ឬទទួលបានអត្ថប្រយោជន៍ពីពលកម្មដោយបង្ខំរបស់ជនជាតិអួយហ្គ័រ (Uyghur) នៅក្នុងខ្សែសង្វាក់ផ្គត់ផ្គង់របស់ពួកគេ និងប្រតិបត្តិការនៅក្នុងប្រទេសចិន។ការស៊ើបអង្កេតនេះ ត្រូវបានធ្វើឡើង បន្ទាប់ពីការវាយតម្លៃដំបូងនៃពាក្យបណ្តឹងអំពីប្រតិបត្តិការនៅក្រៅប្រទេសរបស់ក្រុមហ៊ុនកាណាដាចំនួន១៣ ដែលដាក់ដោយសម្ព័ន្ធនៃអង្គការសង្គមស៊ីវិលចំនួន២៨ ក្នុងខែមិថុនា ឆ្នាំ២០២២។របាយការណ៍មួយរបស់ប្រធានសិទ្ធិមនុស្សរបស់អង្គការសហប្រជាជាតិ បានឲ្យដឹងកាលពីឆ្នាំមុនថា ការប្រព្រឹត្តរបស់ចិនលើជនជាតិអួយហ្គ័រ ជាជនជាតិភាគតិចមូស្លីម ដែលមានចំនួនប្រហែល ១០លានាក់នៅខេត្តស៊ីនជាំង(Xinjiang)ចុងខាងលិចរបស់ប្រទេសនេះ អាចជាអំពើឧក្រិដ្ឋកម្មប្រឆាំងមនុស្សជាតិ។ទីក្រុងប៉េកាំងបានបដិសេធម្តងហើយម្តងទៀតនូវការប្រើប្រាស់កម្លាំងពលកម្មដោយបង្ខំប្រឆាំងនឹងពួក អួយហ្គ័រ។នេះគឺជាការស៊ើបអង្កេតលើកដំបូង ដែលបានចាប់ផ្តើមដោយទីភ្នាក់ងារកាណាដា ចាប់តាំងពីសម្ព័ន្ធនេះ បានចាប់ផ្តើមយន្តការបណ្តឹងរបស់ខ្លួនក្នុងឆ្នាំ២០២១។ គ្មានទីភ្នាក់ងារកាណាដាផ្សេងទៀត កាលពីអតីតកាល បានចាប់ផ្តើមការស៊ើបអង្កេតប្រភេទនេះទេ។ពាក្យបណ្តឹងប្រឆាំងនឹងក្រុមហ៊ុនចំនួន១១ផ្សេងទៀតនៅតែត្រូវបានគេវាយតម្លៃជាមួយនឹងរបាយការណ៍ដែលរំពឹងទុកក្នុងប៉ុន្មានសប្តាហ៍ខាងមុខនេះ នេះបើយោងតាមសេចក្តីថ្លែងការណ៍ពីអ្នកទទួលបន្ទុកការស៊ើបអង្កេត(Ombudsperson) របស់ប្រទេសកាណាដាសម្រាប់សហគ្រាស ដែលមានទំនួលខុសត្រូវ៕

ឆមាសទី១ CDC អនុម័តគម្រោងវិនិយោគចំនួន១១៣ មានទុនវិនិយោគ ១,១ ពាន់លានដុល្លារ

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគថ្មី និងគម្រោងពង្រីកផលិតកម្ម ចំនួន ១១៣គម្រោង ក្នុងឆមាសទី១ ឆ្នាំ២០២៣នេះ ដែលមានទុនវិនិយោគប្រមាណ ១ ១០៥ លានដុល្លារ។របាយការណ៍ក្រុមប្រឹក្សាអភិវឌ្ឍន៍កម្ពុជា បង្ហាញថា ក្នុងរយៈពេល ៦ខែដើមឆ្នាំ២០២៣ គម្រោងវិនិយោគមានការថយចុះចំនួន ១៥គម្រោង ខណៈទុនវិនិយោគមានការថយចុះចំនួនប្រមាណ ៨០០ លានដុល្លារអាមេរិក ធ្លាក់ចុះពី ១ ៩០០លានដុល្លារ ក្នុងឆមាសទី១ឆ្នាំ២០២២។ គម្រោងវិនិយោគទាំង១១៣នេះ បង្កើតការងារបានចំនួនប្រមាណ ១២២ពាន់កន្លែង។ក្នុងចំណោមគម្រោងវិនិយោគ១១៣ មានគម្រោងចំនួន ១០២ ស្ថិតនៅក្នុងវិស័យឧស្សាហកម្ម គម្រោងចំនួន៧ ស្ថិតក្នុងវិស័យកសិកម្ម និងកសិ-ឧស្សាហកម្ម គម្រោងចំនួន៣ ស្ថិតនៅក្នុងវិស័យទេសចរណ៍ និងគម្រោងចំនួន១ ស្ថិតក្នុងវិស័យហេដ្ឋារចនាសម្ព័ន្ធ។ការវិនិយោកមកពីប្រទេសចិន ឈរនៅលំដាប់លេខរៀងទី១ និងបានចូលរួមចំណែកប្រមាណ ២ភាគ៣ នៃគម្រោង សរុប ខណៈការវិនិយោគក្នុងស្រុក ឈរលំដាប់ទី២។ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានចាត់ទុកការចុះបញ្ជីវិនិយោគគម្រោងថ្មីៗ ថាជាការវិនិយោគដែលមានសក្តានុពលក្រោមច្បាប់វិនិយោគថ្មី កិច្ចព្រមព្រៀងពាណិជ្ជកម្មសេរី កិច្ចព្រមព្រៀងតំបន់ RCEP និងការអនុគ្រោះពាណិជ្ជកម្មនាំចេញរបស់កម្ពុជា។ឧកញ៉ា លឹម ហេង លើកឡើងថា ច្បាប់វិនិយោគថ្មី ជាមួយនឹងការអនុគ្រោះពាណិជ្ជកម្មសេរី កម្ពុជា-ចិន FTA និង FTA កម្ពុជា-កូរ៉េ RCEP គឺជាកត្តាដែលទាក់ទាញការវិនិយោគពីប្រទេសចិនមកកម្ពុជា ជាផ្នែកនៃផលិតកម្មសម្រាប់ការនាំចេញទៅកាន់សហរដ្ឋអាមេរិក និងទីផ្សារដទៃទៀត៕ អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

ព្យុះខ្សាច់បានវាយប្រហារតំបន់ស៊ីនជាំងរបស់ប្រទេសចិន

ប្រធានាធិបតីបារាំង ស្វាគមន៍ការបើកច្រកសមុទ្រ Hormuz ឡើងវិញនៅក្នុងកិច្ចប្រជុំពហុភាគី

អូស្ត្រាលី និងជប៉ុនចុះហត្ថលេខាលើកិច្ចសន្យាដើម្បីចាប់ផ្តើមកិច្ចព្រមព្រៀងនាវាចម្បាំងតម្លៃ៧ពាន់លានដុល្លារ

អ៊ុយក្រែនត្រៀមខ្លួនរួចជាស្រេចសម្រាប់កិច្ចប្រជុំថ្នាក់ដឹកនាំជាមួយរុស្ស៊ីក្រោមការសម្របសម្រួល

តម្លៃប្រេងឆៅធ្លាក់ចុះជាង ១០ ភាគរយ ខណៈច្រកសមុទ្រហ័រមូសបើកដំណើរការឡើងវិញ

ពលរដ្ឋលីបង់ភៀសខ្លួនពីសង្គ្រាមសម្រុកវិលត្រឡប់ទៅភាគខាងត្បូងវិញនៅថ្ងៃទីពីរនៃបទឈប់បាញ់ជាមួយអ៊ីស្រាអែល

អ្នកស្រុក Manipur របស់ឥណ្ឌាប្រមូលផ្ដុំដោយកាន់គប់ភ្លើង ជុំវិញការផ្ទុះដ៏សាហាវដែលបានសម្លាប់កុមារពីរនាក់

ពិធីអបអរសាទរបុណ្យចូលឆ្នាំថ្មីប្រពៃណីខ្មែរ រៀបចំដោយសមាគមនិស្សិតខ្មែរនៅប្រទេសជប៉ុន

អាមេរិកបន្តលើកលែងទណ្ឌកម្មប្រេងរុស្ស៊ី ក្រោយមានសម្ពាធពីប្រទេសដែលកំពុងដោះស្រាយវិបត្តិតម្លៃប្រេងក្នុងពេលមានសង្គ្រាមអ៊ីរ៉ង់

អ៊ីរ៉ង់គំរាមបិទច្រកសមុទ្រហ័រមូស (Hormuz) ប្រសិនបើអាមេរិកនៅតែបន្តបិទកំពង់ផែរបស់ខ្លួន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877